Ioane 17,20-26 Täua

Tāpati 2 no Tiunu 2019.

ÔROÀ

Täua

Taramo 97

1 O te Fatu te arii, ia ôuàuà te fenua, e te mau fenua rii e rave rahi ra, ia òaòa ia 2 Te haaàtihia ra o ia i te mau ata e te pöuri. O te parau tià rä e te au, o te tumu ia o to na teröno. 3 Te haere ra te auahi nä mua ia na, e te àma ra to na mau ènemi e àti noa aè. 4 Te märamarama ra te fenua i to na ra uira, te hiò ra te fenua mä te rürütaina. 5 Te tärapape ra te mau mouà mai te täpau i te aro o te Fatu, i te aro o te Fatu o te fenua atoà ra. 6 Te faaìte mai ra te mau raì i te parau tià na na, e te ìte ra te taata atoà i to na hanahana. 7 Ia haamä te feiä atoà i haamori i te mau atua òtiòtihia ra, o tei teòteò i to rätou iho mau îtoro. E haamori ia na, e te mau atua ra. 8 Ua ìte Tiona e ua òaòa, e te fänaò nei te mau tamahine o Iüta i te parau au na òe, e te Fatu. 9 E teitei rahi to òe, e te Fatu, i te mau fenua atoà nei, tei nià ê ä òe i te mau atua atoà ra. 10 O òutou o tei hinaaro i te Fatu ra, ia riàrià òutou i te ìno, te tiaì ra o ia i te värua o to na feiä moà ra, e te faaora ra o ia ia rätou i te rima o te paieti-òre ra. 11 Ua ueuehia te märamarama na te feiä parau tià ra, e te òaòa na te feiä i tià te âau ra. 12 E òaòa òutou, e te feiä parau tià, i te Fatu, e e haamaitaì atu mä te haamanaò i to na ra maitaì.

Òhipa 7,55-60

55 Î aè ra rä o ia i te Värua Maitaì, e hiò tämau mäite atu ra i nià i te raì, e ìte atu ra i te hanahana o te Atua, e ia Ietu i te tià-mäite-raa i te rima àtau o te Atua ra. 56 Ua nä ô aè ra o ia Inaha, te ìte atu ra vau i te raì, ua vëvetehia, e te Tamaiti a te taata i te tiàraa i te rima àtau o te Atua ra. 57 Ua pörutu mai ra to rätou reo, ôpanipani iho ra i to rätou mau tarià, horo püpara noa mai ra rätou atoà i nià ia na. 58 Aratö atu ra ia na i räpae i taua ôire ra, pëhi iho ra ia na i te ôfaì; e nä taata i ìte ra, tuu atu ra i to räua àhu i te pae âvae o te hoê taata âpï ra, o Tauro te iòa. 59 Ua pëhi iho ra rätou ia Tetefano i te ôfaì, te pure noa ra o ia, te nä ô ra E ta ù Fatu, e Ietu e, a rave mai òe i ta ù värua 60 Topa turi iho ra o ia, ua pii hua atu ra te reo E te Fatu, eiaha teie nei hara e häio tià ia rätou nei E teie te nä-reira-raa ra, maìri atu ra ta na taòto.  

Àpotarupo 22,12-20

12 Inaha, te haere vave atu nei au  E tei ia ù nei ta ù utuà, ia hopoi atu na te taata atoà i tei au i ta na ra òhipa. 13  O vau te Ârefa e te Ômeta, te mätamua e te faahopeà, o to mua e o to muri. 14 E ao to te feiä e haapaò i ta na ra parau, ia au ia rätou ia àmu i to nià i te räau ora ra, e ia nä te mau ùputa rätou i te tomo i roto i te ôire ra. 15 Âreà to räpaeàu ra, e ùrï ia, e te tahutahu, e te faaturi, e te täparahi taata, e te haamori îtoro, e te feiä atoà e hinaaro e ua parau i te parau haavare ra 16 O vau o Ietu, e ua tono atu vau i ta ù merahi e faaìte ia òutou i roto i te mau Ètärëtia i teie nei mau parau. O vau te tumu e te huaai o Tävita, e te fetià poìpoì ànaana ra. 17 E te parau nei te Värua e te Vahine faaipoipo âpï E haere mai E o tei faaroo ra, a parau atoà o ia e E haere mai E o tei poìhä ra, a haere mai. E tei hinaaro ra, a rave noa mai o ia i te pape ora.

Püòhuraa

18 Te faaìte päpü nei hoì au i te taata atoà e ìte i te parau tohu i roto i teie nei puta, ia täàti noa mai te tahi taata i te tahi parau ê i teie nei mau parau, na te Atua e täàti mai ia na i te mau pohe i päpaìhia i roto i teie nei puta. 19 E ia ìriti noa atu te hoê taata i te hoê parau i te mau parau tohu i roto i teie nei puta, na te Atua e ìriti ê atu i ta na tufaa i roto i te puta ora, e i roto i te ôire moà ra, e i tei päpaìhia i roto i teie nei puta. 20 Te nä ô mai ra tei faaìte mai i teie nei mau parau E tae vave mau atu ä vau Âmene. Oia ia A haere mai, e te Fatu, e Ietu e  21 Ei ia òutou atoà na te aroha mau o to tätou Fatu ra o Ietu Metia. Âmene.

Ioane 17,20-26

20 Aore hoì au i pure ia rätou anaè nei, i te feiä atoà rä e faaroo mai ia ù i ta rätou ra haapiiraa. 21 Ia riro rätou atoà ei hoê, mai ia òe, e ta ù Metua, i roto ia ù nei ra, e mai ia ù hoì i roto ia òe na. Ia hoê atoà rätou i roto ia täua, ia faaroo to te ao e na òe au i tono mai. 22 E ua horoà vau i te hinuhinu no rätou i ta òe i hö mai no ù ra, ia riro rätou ei hoê mai ia täua e hoê nei. 23 E i roto vau ia rätou, e ei roto òe ia ù, ia tià to rätou âmuiraa, e ia ìte to te ao e na òe au i tono mai, e ua here mai òe ia rätou mai ia òe e here mai ia ù nei ra. 24 E ta ù Metua e, ua hinaaro vau i te feiä ta òe i hö mai no ù ra, ei pïhaì-atoà-iho ia ù i te vähi e pärahi ai au ra, ia hiò mai rätou i to ù hinuhinu i ta òe i hö mai no ù ra; ua here mai na hoì òe ia ù hou te fenua i hämanihia ai ra. 25 E ta ù Metua Parau tià e, aore ä hoì to te ao i ìte ia òe, ua ìte rä vau ia òe; e ua ìte hoì rätou nei e na òe au i tono mai. 26 E ua faaìte atu hoì au ia rätou, e e faaìte atu ä vau i to òe iòa, ia herehia mai rätou i to hereraa mai ia ù nei ra, e o vau hoì e pärahi i roto ia rätou.

Manaò.

I mua i teie mau taiòraa te ìte nei tätou te mau pure, e purehia nei ia au te huru o te tau e te uì taata e te huru parau e faahitihia ra no te Atua Nui Tumu Tahi. Mea maitaì ra tätou ia haamanaò e, e tiàraa taata pure noa to tätou, eere te tiàraa fatu no te pure, i te faahaparaa i te taata i hinaaro e tïtau i te märamarama, nä roto noa atu ai i te tauiraa, aore ra te monoraa i te tahi mau taò. E faaea atoà tätou i te manaò e, mea moà te pure. Ahiri mau e, o te reira, eita te Atua e horoà teie raveà ia tätou. A ui rii na tätou e tano änei te tahi mea moà i roto i te vaha viivii o te taata. Eie hoì te Atua e ani noa nei i te taata ia òre ia faahiti faufaa òre noa i to na iòa moà, ia faaea i te haaviivii i to na hanahana, ia òre to na iòa ia faarirohia ei tähoro haavare, aore ra ei faatupu i te ìno e te pohe te haapaò ra änei tätou e. No te âti Iuta, tei nä roto atoà tätou i ta na märamaramaraa i te parau o te Atua i te hiò e te ìte i te huru o te Atua, aita e vaha taata e tano e parau i te iòa o te Atua, ia tae hoì i te vähi i päpaìhia ai to na iòa, te parau ra rätou i te tahi taò ê atu, no te faatura i to na moà. I mua i te reira manaò, e tano ia parauhia e, o tätou te mea haafaufaa òre roa aè, e te mea faatura òre roa aè i te moà o te Atua. E tïtauraa teie ia tätou ia faaea Mäòhi noa, e ta tätou hoì märamaramaraa i te auraa o te pure, eiaha atoà ia ia nä räpae aè i to tätou hiroà mäòhi. Mai ia tätou i parau na e, i nä roto atoà tätou i ta te âti Iuta märamaramaraa i te parau o to na Atua i te hiò e te ìte i te huru o te Atua, i teie nei rä, no te mea ua haapii-atoà-hia tätou i te pure, e tano atu ra tätou e nä roto noa i to tätou iho hiroà mäòhi i te hiò e te märamarama i te parau a te Atua, mai teie e faahitihia nei i roto i te haapotoraa o na taiòraa e maha nei.

-Taramo 97,  4 Te märamarama ra te fenua i te uira, te hiò ra te fenua e te rürütaina.

-Òhipa 7, 59 E ta ù Fatu, e Ietu e, a rave mai òe i ta ù värua

-Àpotarupo 22, 13  O vau te Ârefa te Ômeta, te mätamua te faahopeà, to mua e to muri.

-Ioane 17, 22 ia riro rätou ei hoê mai ia täua e hoê nei.

I to tätou faarooraa i te haapotoraa o ta tätou mau taiòraa, te varovaro ra te mau taò ärataì, mai teie To na, ta ù, O vau, e mau taò teie e faaìteraa te taata hoê, te faahitihia nei ra te täua i te parauraa a Ietu i roto i ta na pure, ia riro rätou ei hoê mai ia täua e hoê nei, teie täua no Ietu ia e te Metua. Mäite mea atu ra e, e taùraa teie e faanahohia nei e Ietu i roto i teie hoêraa no te mea ai-ti-ä te taata i riro atu ra i roto i te ôpuaraa faaora a te Atua. I te mea te taùraa i te Atua, te aniraa ia i te Atua. No te Atua anaè teie taò. I roto i te mea e parauhia nei e, taù, te vai atoà ra te manaò faatura tei mua tätou i to tätou Atua. No reira, e tià atoà ia tätou ia auraro ia na, ia faatura i to na hanahana. Mai teie ta te päpaì Taramo e faahiti ra 4 Te märamarama ra te fenua i to na ra uira, te hiò ra te fenua mä te rürütaina. Mea maitaì tätou ia haamanaò e, tei mua tätou, e te parau ra i te Fatu o te raì e te fenua, te Atua hoì i hämani ia tätou, te Atua no na tätou i Mäòhi ai, e tei riro to taua mäòhiraa no tätou ei taoà horoà na na ia tätou nei. E taùraa teie, eere te ahuahuraa vaa. No reira, mea maitaì atoà tätou ia fäito maitaì i te parau ia parau, ia faaea hoì i te haere mai i mua i te Atua ûtätä noa ai, mai te tamarii tei òaòa i te faaìteraa e, ua mau te parau i horoàhia na na e tämau. A òre o ia a märamarama i te auraa o te mea ta na e parau ra, eere te reira ta na haapeàpeàraa. E tano tätou e uiui e, teie ta tätou e taù nei, te manaò ra änei tätou i te Atua, te ìte ra änei tätou i te auraa o te mea ta tätou e parau atu ra ia na, aore ra mai te tamarii, te haapeepee atoà nei tätou ia pau atu te paraparau o te tahi pure tei mau maitaì ia tätou, e tei riro te amene ei faaìte ia tätou e, ua oti te òhipa i anihia ia tätou i te rave. Ia taiò faahou hoì tätou i teie reo to Ietu e parau ra e, ia riro rätou ei hoê mai ia täua e hoê nei.

I roto i te tereraa o teie taò, eita tätou e haere hänoa, e tütonu rä tätou i te vähi i turämahia ra, mai te haapaò maitaì i te mea e vai ra, te mea ta tätou e ìte mau ra, eiaha te mea ta tätou e manaò ra, aore ra ta tätou e hinaaro ra i te ìte, te mea rä ta te märamarama e faaìte mai ra ia tätou. E faaea tätou i te parau i te haamataraa ihoä e, te tauiuihia nei, te faahuru-ê-hia nei, no te mea noa aita te mörï i patahia i nià i te âvae o te taata faaea, ua faahaerehia rä i te tahi vähi âpï tei òre tätou i mätau i te hiò. I mua i teie türamaraa, na tätou iho e parau, e aha te mea ta tätou e ìte ra, te mea ta te àma o te mörï e faaìte mai ra. Ua ìte anaè rä, eita ia tätou e tano e haavare ìte òre, eita hoì e tano e faahapa no te mea ua faaìtehia. Te vähi mätamua ta tätou e hinaaro nei ia türamahia, teie ia taò täua, ia au ta Ietu parauraa, te pärahiraa o te Metua. Te nä ô ra te Atua i roto i te ôrama i ìtehia e i faaroohia e Ioane i nià i te motu ra o Pätamo 13  O vau te Ârefa te Ômeta, te mätamua te faahopeà, to mua e to muri. Te ìte ra tätou, i te puai o te mau parau e faahitihia ra no te pärahiraa o te Atua i roto i te taata e to te ao nei ia hoê.

Teraì òr. Faatura.

Ioane 14.23-29 Mäua

Tāpati 26  no  Më 2019.

Mäua

Taramo 67

1 Na te Mënätehe, i nià i te Netinota. Taramo e himene. 2 E aroha mai ia mätou, e te Atua e, e haamaitaì mai ia mätou. E faaànaàna mai hoì i to mata i nià ia mätou. Tera. 3  Ia ìteä to parau e àti noa aè teie nei ao, e te ora na òe i te mau êtene atoà ra. 4 Ia haamaitaì te mau taata ia òe, e te Atua e Ia haamaitaì tahi te taata atoà ia òe. 5 Ia òaòa te mau êtene e ia himene i te òaòa, na òe hoì e haavä i te mau taata mä te parau au, e te mau êtene o te fenua nei na òe e arataì Tera. 6 Ia haamaitaì te mau taata ia òe, e te Atua e Ia haamaitaì tahi te taata atoà ia òe 7 Ei reira e hotu rahi mai ai te fenua E na te Atua, na to tätou iho Atua, e haamaitaì mai ia tätou nei. 8 E tämau ä te Atua i te haamaitaì mai ia tätou,  e e tae roa te mataù ia na i te mau hopeà atoà o te fenua ra.

Òhipa 15.1-29

Te âpooraa i Ierutarëma

1 Ua haere mai ra e toofanu mau taata mai Iutea mai, ua haapii mai ra i te mau taeaè, nä ô mai ra Ia òre òutou ia peritomehia mai te peu a Möte ra, e òre òutou e ora. 2 E märô mäite atu ra Pauro räua o Paranapa ia rätou, ua haapaò atu ra rätou ia Pauro räua o Paranapa, e i e toofanu mau taata no rätou iho, e haere i Ierutarëma i te mau âpotetoro ra e te mau peretiputero ra i taua parau ra. 3 E ärataìhia atu ra rätou e te Ètärëtia i taua haereà ra, haere atu ra rätou nä Foinitia e Tämäria, i te faaìte-mäite-raa atu i to te Ètene färiuraa, rahi roa atu ra to te mau taeaè òaòa ia rätou. 4 E tae atu ra rätou i Ierutarëma, ìtehia mai ra rätou e te Ètärëtia, e te mau âpotetoro, e te mau peretiputero, ua faaìte atu ra ia rätou i ta te Atua i rave ia räua ra. 5 Ua tià mai ra e toofanu no te pupu Färitea tei faaroo ra, nä ô mai ra. E peritome ia rätou e tià ai, e e aò atu e haapaò i te ture a Möte ra. 6 E ua haaputuputu iho ra te mau âpotetoro e te mau peretiputero ra e feruri i taua parau ra. 7 E rahi roa aè ra te märörö, ua tià aè ra Pëtero, ua parau mai ra ia rätou. E te mau taeaè nei, ua ìte òutou e ua haapaò te Atua i roto ia tätou nei ia ù i mütaa iho, ia ìte te Ètene i te Èvaneria i to ù nei vaha ia faaroo. 8 E o te Atua hoì tei ìte i te âau ra tei faatià mai ia ia rätou, i te horoàraa mai i te Värua Maitaì ia rätou, mai ta na i horoà mai ia tätou nei. 9 Aore hoì i faahuru ê atu ia rätou e ia tätou nei, i te haamaitaìraa i to rätou âau i te faaroo. 10 E teie nei, e aha òutou i haapeàpeà atu ai i te Atua, i te tuuraa i te tuto i nià i te àî o te mau pipi, aore i maraa i to tätou hui tupuna ra e ia tätou atoà nei hoì 11 Ua ìte rä tätou e, e ora tätou i te aroha o to tätou Fatu o Ietu Metia, mai ia rätou atoà ra.12 Ua mämü iho ra taua feiä rahi atoà ra, ua faaroo mai ra ia Paranapa räua o Pauro, i te faaìteraa atu i te mau täpaò e te mau temeio ta te Atua i rave ia räua io te Ètene ra. 13 E ia faaoti aè ra ta räua parauraa, ua parau atu ra Iatöpo, nä ô atu ra. E te mau taeaè, a faaroo mai na ia ù 14 te parau mai nei Timona e, ua hiò aroha mai te Atua i te Ètene i mütaa iho ra, e rave i te hoê pae taata i roto ia rätou ra no to na ra iòa. 15 Te au nei hoì te parau a te mau perofeta ra i te reira, oia hoì tei päpaìhia ra e 16 Muri aè ra e hoì atu vau, e patu faahou i te tëtene o Tävita i maìri i raro ra e te huàhuà o taua tëtene ra e patu-faahou-hia ia e au, e tià atu i nià. 17 Ia ìmi te toeà o te taata i te Fatu, e te mau Ètene atoà i maìrihia i to ù ra iòa, te nä reira mai ra te Fatu, o tei faatupu i teie atoà nei mau parau. 18 Ua ìte te Atua i ta na atoà ra mau òhipa mai te mätamua mai ä. 19 E teie nei, teie ta ù parau, eiaha tätou e haapeàpeà atu i te feiä i färiu i te Atua no roto i te Ètene ra. 20 E päpaì atu rä tätou i te parau ia rätou ra, eiaha rätou e rave i te mea viivii hopoihia na te mau îtoro, eiaha e faaturi, eiaha e àmu i te mea ûumi-noa-hia, e te toto. 21 Te vai nei hoì te feiä i parau ia Möte i te mau ôire atoà mai tahito mai ä, te taiòhia mai nei hoì o ia i roto i te mau tunato i te mau mahana täpati atoà nei.

Te èpitetore i to Ànetiohia, Turia e Tiritia

22 Ua manaò iho ra te mau âpotetoro, e te mau peretiputero, e te Ètärëtia atoà, e tono i e toopiti puè taata mäìtihia i roto ia rätou iho ra i Ànetiohia, ia Iüta, o Paratapa te hoê iòa ra, e ia Tira, e puè taata hau ia i roto i te mau taeaè ra, o Pauro hoì e Paranapa. 23 E ua päpaì atu ra hoì i te reta na to rätou rima i hopoi, nä ô atu ra: Te mau âpotetoro e te mau peretiputero e te mau taeaè atoà nei, te häpono atu nei mätou i to mätou aroha ia òutou, i te mau taeaè i roto i te Ètene i Ànetiohia, e i Turia, e i Tiritia ra. 24 Ìte aè nei mätou e, ua tiàrepuhia to òutou âau i te parau a vëtoofanu puè taata no ô nei atu io mätou nei, i te nä-ô-raa atu e, e peritome ia òutou, e e haapaò i te ture e tià ai; aore hoì mätou i faaue noa atu ia rätou. 25 Haaputuputu aè nei hoì mätou atoà, manaò aè nei e mea maitaì ia faatono atoà atu i e toopiti puè taata mäìtihia ia òutou na, e to mätou puè taeaè here nei ia Paranapa e Pauro. 26 E puè taata faaruru ia i to räua pohe, no te iòa o to tätou Fatu o Ietu Metia ra. 27 E teie nei, tono atu na hoì mätou ia Iüta räua o Tira, e na räua e parau vaha noa atu ia òutou i taua parau ra. 28 E mea maitaì i te Värua Maitaì e ia mätou atoà nei hoì, eiaha roa ei teimaha ê i tuuhia atu i nià iho ia òutou, maori rä o teie nei mau mea tià. 29 Eiaha òutou e àmu i te mäa i âfaìhia i te îtoro ra, e te toto, e te mea ûumi-noa-hia ra, e eiaha hoì e faaturi i faaruè òutou i te reira, e maitaì ia òutou. Ia ora na.

Àpotarupo 21.10-23

10 Ua arataì atu ra o ia i ta ù värua i nià i te hoê mouà rahi teitei, ua faaìte mai ra ia ù i taua ôire rahi ra ia Ierutarëma moà, i te pouraa mai mai te raì mai, mai ô i te Atua ra, 11 mä te ànaana no ô i te Atua ra. E to na märamarama mai to te ôfaì maitaì roa ra, mai te ôfaì ìtefe ateate mai te terehe ra. 12 E ua àti i te âua rahi e te teitei, e hoê àhuru e piti tiàhapa ùputa, e nä merahi tino àhuru mä piti tei taua mau ùputa ra, e e iòa anaè hoì tei päpaìhia i nià iho, no te mau ôpü o te mau tamarii a Ìteraèra tino àhuru e mä piti ra. 13 Tei te pae i te hitià-o-te-rä ra, e toru ia ùputa; tei te pae i àpatoèrau ra, e toru ia ùputa; tei te pae i àpatoà ra, e toru ia ùputa; e tei te pae i te tooà-o-te-rä ra, e toru ia ùputa. 14 Auàhuru mä piti niu to te âua o taua ôire ra; mä te iòa hoì o te mau âpotetoro a te Ârënio tino àhuru mä piti ra i nià iho. 15 E e fäito àuro ta na ta tei paraparau mai ia ù ra, ei fäito i taua ôire ra, e te mau ùputa, e te âua. 16 E maha aroä o taua ôire ra, ua fäito atoà te âano e te mäoro. Ua fäito iho ra o ia i taua ôire ra i te fäito, e hoê àhuru mä piti tautani i te tetatia. O te âano, e te mäoro, e te teitei, hoê ä ia hete. 17 E ua fäito iho ra o ia i te âua, hoê hänere e maha àhuru mä maha i te tüpiti, i te fäito taata nei, oia atoà ta te merahi. 18 E taua âua ra, e ìtefe ia, e te ôire ra, e àuro tämähia ia, mai te hiò märamarama ra. 19 E ua faanehenehehia te mau niu o te âua i taua ôire ra i te mau ôfaì maitataì atoà ra. O te niu mätamua rä, e ìtefe ia; te piti ra, e tafira ia; te toru ra, e haretetoni ia; te maha ra, e temaratino ia; 20 te pae ra, e taretonu ia; te ono ra, e àtama ia; te hitu ra, e taritita ia; te vaù ra, e tema ia; te iva ra, e fetate ia; te àhuru ra, e herutoparata ia; te àhuru mä hoê ra, e huatineto ia, te àhuru mä piti ra, e àhereme ia. 21 E nä ôpani auàhuru mä piti ra, e poe anaè ia auàhuru mä piti; taìhoê roa poe i te ôpani hoê e hope roa aè taua mau ôpani ra; e te aroä o taua ôire ra, e àuro tämähia ia, mai te hiò märamarama. 22 E aore roa e hiero i ìteä e au i roto ra; o te Fatu rä hoì, o te Atua Mana hope ra e te Ârënio, o to na ia hiero. 23 E aore hoì o te reira ôire e mahana e te märama, ei haamäramarama i roto ra, na te ànaana no ô i te Atua ra i haamäramarama i te reira, o te Ârënio hoì to reira märamarama.

 Ioane 14.23-29

23 Ua parau atu ra Ietu ia na, nä ô atu ra Ia hinaaro mai te taata ia ù ra, e haapaò ia i ta ù parau. E e here mai hoì ta ù Metua ia na, e e haere atu hoì mäua ia na ra e pärahi mau atu io na ra. 24 O të òre e hinaaro mai ia ù ra, aore ia i haapaò i ta ù parau. Eere rä i ta ù teie nei parau ta òutou e faaroo nei, na te Metua rä i tono mai ia ù nei ra. 25 I faaìte au ia òutou i teie nei mau parau, i te pärahiraa vau io òutou nei. 26 Na te Faaaò rä, na te Värua maitaì ra, o ta te Metua e tono mai mä to ù nei iòa ra, na na e haapii mai ia òutou i te mau mea atoà; e e faaìte faahou mai hoì ia òutou i te mau parau atoà ta ù i parau atu ia òutou na. 27 E hau Àpotarupo 21òutou. Eiaha e taiä to òutou âau, eiaha hoì e mataù. 28 Ua ìte òutou i ta ù i parau atu ra e Te haere ê nei au, e e hoì faahou mai au ia òutou nei. Ahiri òutou i hinaaro mai ia ù, e òaòa ia òutou o vau e haere tià i te Metua ra; e rahi hoì ta ù Metua ia ù. 29 Ua faaìte ätea atu na vau ia òutou i teie nei i taua parau ra, ia faaroo òutou ia tupu ra.

Manaò.

I to tätou faarooraa te mau parau no na taiòraa e maha nei te turäma ra i te ôpuaraa faaora a te Atua Nui Tumu Tahi ia au i teie haapotoraa.

-Taramo 67, 3  Ia ìteä to parau e àti noa aè teie nei ao, e te ora na òe i te mau êtene atoà ra.

- Òhipa 15, 11 Ua ìte rä tätou e, e ora tätou i te aroha o to tätou Fatu o Ietu Metia

-Àpotarupo 21, 23 na te ànaana no ô i te Atua ra i haamäramarama i te reira, o te Ârënio hoì to reira märamarama.

-Ioane 14, 23 E e here mai hoì ta ù Metua ia na, e e haere atu hoì mäua ia na ra e pärahi mau atu io na ra.

Te parau o te Èvaneria i faaroohia aè nei e tätou, mai roto mai ia Ietu  te reo o te Metua ra, i te faaitoitoraa i ta na mau tamarii o ta na e tiàturi ra, ma te horoà i te mau faanahoraa èi ärataì i roto i te oraraa. Teie taua mau tïtauraa ra,

1-ìrava 23 Ia hinaaro mai te taata ia ù ra, e haapaò ia i ta ù parau.

2-ìrava 23 vh E e here mai hoì ta ù Metua ia na, e pärahi mau atu io na ra.

3-ìrava 24 O të òre e hinaaro mai ia ù ra, aore ia i haapaò i ta ù parau.

4-ìrava 24 vh Eere rä i ta ù teie nei parau ta òutou e faaroo nei, na te Metua rä. 

5- ìrava 26 Na te Faaaò rä, na te Värua maitaì ra, o ta te Metua e tono mai.

6-ìrava 26 vr na na e haapii mai ia òutou i te mau mea atoà.

7-ìrava 26 vh e faaìte faahou mai hoì ia òutou i te mau parau atoà.

8-ìrava 27 E hau ta ù e vaiiho, Eiaha e taiä to òutou âau, eiaha hoì e mataù.

9-ìrava 28 Àhiri òutou i hinaaro mai ia ù, e òaòa ia òutou e rahi hoì ta ù Metua ia ù.

10-ìrava 29  ia faaroo òutou ia tupu ra.

Ia haapoto tätou i te taiòraa mai teie te huru e ìtehia te manaò peàpeà o Ietu i nià i ta na mau pipi, i teie parauraa e na na e haapii mai, e faaìte faahou, oia hoì eiaha ia paruparu i te faaìte i te hinaaro o te Atua. No te mea e hau te vaiihohia mai i te tuuraa i te mau pipi i nià i te èà no te parau tià e te parau mau. E ia faaroo tätou i teie reo to Ietu, àhiri, te faaìte nei teie taò i te peàpeà o Ietu i ta na mau pipi te tumu ia o Ietu i tämahanahana ai ta na mau ia òaòa rätou o te rahi teie no te aroha e te here o te Metua, ia òaòa, ia faaroo te mau pipi e tupu te hinaaro o te Metua. E aha te parau e au no tätou i teie mahana. Te manaò i täpeàhia mai teie ia tei te  Ìrava 23 E e here mai hoì ta ù Metua ia na, e e haere atu hoì mäua ia na ra e pärahi mau atu io na ra, Te pähonoraa e horoàhia nei e Ietu, no nià ia i te uiraa a Iuta eiaha o Iuta i Tatariota  tei hoo i te Fatu. Te haapäpü nei ra o Ietu na roto i teie manaò, te tumu O ia i òre ai e faaìte ia na i to te ao nei. No te huru ia o te faanahoraa e orahia ra e te mau taata o te ao nei, i te mea te vai nei te tahi pae te tiaì nei i te hoê faaora tei haere mai na roto i te puai, ei faatîtîraa i te tahi pae. Teie ao ra, e ao tahito ia, o tei òre-roa i ìtehia te àifaitoraa, e te autaeaèraa. Te hinaaro nei ra o Ietu e faataui teie ao ia au i te hoê e ìte ai te taata i te taata. Ma te haamata i te ìteraa i te taata, e ta na tiàturiraa i te Atua. Ua tupu anaè mai teie te huru, e here mai te Atua i taua taata ra, e haere roa mai te Atua e pärahi i roto ia na tei riro èi ùtuafare no na. Na roto i te aha? Na roto ia i te haapaòraa i te mau parau a te Atua, tei òhipahia i te mau mahana atoà. Na teie faanahoraa e horoà i te taata i ìteraa i te mau hinaaro o te Atua. E teie faanahoraa èi faaìteraa ia, i to te Atua pärahi tämauraa mai i pïhaìiho i te taata e tiàturi nei ia ta na mau òpuaraa no te faaora. Ia faaroo maite anaè tätou i teie reo to Ietu te vai ra te tahi tiaìtururaa, no te here o te Metua i te feiä tei haapaò i ta na parau, e haere mai raua e pärahi i roto i taua taata ra. Oia hoì, e ìte mai te Atua, i taua taata ra tei ora i to na faaroo ma te hinaaro i te mau piiraa e piihia nei ia na. Ma te ìte eita te tino o te Metua, e o Ietu, tera i pïhaìiho ia na, o te Värua ra o te parau, tera e òhipa ra i roto i to na âau. Tei faariro ia na èi tino, èi Värua, èi reo, no te paari o te Atua i roto i te àroraa, ia tupu te hau i te mau vahi atoà, e faaìtehia ai to te Atua roo i ropu i te mau taata atoà.

Noa atu a ia teie mau manaò ta Ietu e faaìte nei, te uiui nei te taata i to te Atua mämuraa, e aore ra, teihea te Atua ? E tià ia parauhia te vai noa ra te taata i roto i te parau no te tiàturi-òre-raa i faatupu ai rätou i teie mau manaò. ( Taramo 42, 4). Teie mau uiuiraa te ö nei i roto i te faanahoraa no te faateäraa i te Ètärëtia. E riro noa o Ietu mai te hoê taata tei rave i te tahi mau òhipa faahiahia, ma te vaiiho ia na i tihiti o te oraraa. Aita e parau e tano ia faahiti no na, ma te mohi i roto i tera parau ra e, e taata tiàturi au i te Atua, e aita ra vau e haere nei i te pureraa, e taata haere pure au, aita ra vau e märama nei i te mau hinaaro o Ietu. I teie vahi tätou e ìte mau ai te taaêraa, te tïtauraa e hinaarohia nei e Ietu, ia hinaaro mai te taata ia ù ra, e haapaò ia i ta ù parau, aita o Ietu e faaapaapa nei i te taata tei haapaò e aore ra tei òre i haapaò, te vaiiho nei o ia i te taata, i te märamarama e vai ra i roto ia na. I parau ai o Ietu e,  e here mai hoì ta ù Metua ia na ra, e haere atu hoì maua ia na ra e pärahi mau atu i o na ra. Ia hinaaro mai te taata ia ù ra, e haapaò ia i ta ù parau. Te horoà nei o Ietu i roto i teie reo te puai e te manaònaò e vai nei, i te faahitiraa i te parau no te hinaaro, e aha te hinaaro o Ietu i roto i te värua o teie taò? E tià ia parauhia e, te vaiiho nei o Ietu i te taata ia rave i te hoê faanahoraa e ìtehia ai te maitaì i roto i teie reo. No te mea o te Atua te tumu o te taata, no reira te tuu faahou nei o Ietu i mua i te taata te räveà e tupu ai te Hinaaro i te Atua.

Te Hinaaro e te haapaò, e na taò teie i roto i te faanahoraa a te faaäuraa âpï i te faufaa no te manaò e tïtauhia nei no te faatupu i te ôpuaraa no te ora ta te Atua i tuu nei i roto i te taata. Te pure a te Fatu, te faaroo-atoà-hia nei teie na taò, Mataio pene 6 i te ìrava 10 ia haapaòhia to òe hinaaro i te fenua nei, mai tei te ao atoà na. Te auraa òia hoì, e rave i te òhipa tei au i te hinaaro o te Atua. Ia hiò maitaì tätou i te tupuraa o te värua o te parau e tohuhia ra te taata rave, o vai mä rätou? Te vaiiho nei te puai o te parau i te taata i te tuuraa ia na iho i roto i te haapaò e te hinaaro. Òia hoì, hoê ä ia tiàraa to te taata atoà, te tahi i te tahi ia parau o Ietu e, Ia hinaaro mai te taata ia ù ra, e haapaò ia i ta ù parau, e teie parau e, ia haapaòhia to òe hinaaro i te fenua nei. O te taata teie i mua i te Atua, ia ìte te taata e na na ihoä e rave i te mea ta na e parau. Te vai noa nei ra te manaònaòraa, e aha mau te hinaaro o te Atua, ia tià i te taata ia haapaò. No reira e tïtauraa teie i te taata ia ìmi i te mau räveà atoà, i te hinaaro o te Atua. Ua riro te faatupuraa i te hinaaro e te haapaò èi äraraa tuutuu òre na Ietu, te mea atoà ra te reira e horoà i te auraa o te mau òhipa atoà ta na e rave ra.

 Ia hinaaro mai te taata ia ù ra, e faaäuraa òhipa teie e haapäpühia nei e Ietu i mua i te taata. No te mea ua päpü maitaì te reira na te taata e täamu atu ia na i nià i te faanahoraa o ta Ietu e hinaaro nei. Èi ärataìraa i te taata na nià i te èà e tae atu ai i te ìte, ma te färii i ta te Atua mau tïtauraa no te ora. Ia nä reira anaè te taata i te märamarama i parau o te hinaaro. E tià ia parauhia e, o te Värua o te Atua tera e òhipa ra i roto i te faaäuraa, òia hoì e tuhaa ta te Atua, e tuhaa ta te taata. Ua päpü te tuhaa a te Atua i roto i ta na rahu, e ta na hämaniraa i te taata. Te manaò rahi ra o te taata, te hiòraa ia i te hinaaro mai te tahi mea tei hope i roto i te hoê faanahoraa tei faaìte te hopeàraa no te tahi ôpuaraa. E ìnaha te turaì nei teie taò i te manaò taata ia tae i nià i te hoê fäito puai, ia ìtehia te faufaa ta na e horoà ra i te taata. Ua rave te Atua i te faaäuraa, no te tahi faanahoraa e faataa ra i te ôpuaraa a te Atua e te mea ta na e hinaaro ra i te taata. E te reira faaäuraa ta Ietu i haere mai e faatupu i te hinaaro i te taata. E aha te hinaaro, e manaò e vai ra i roto i te taata o ta na e ìte rä i to na ère, tei türaì ia na ia ìmi i te räveà ia noaa taua mea e èrehia ra e ana a topa atu ai to na manaò i roto i te hau. E rave rahi te ùputa e ö mai ai te hinaaro i roto i te taata, oia hoì e òre roa te taata e tià e haapae i te hinaaro. I mua i te rahiraa no te hinaaro te vai nei te mau faatïanianiraa, tei haapihaa i roto i te taata. E te rahiraa o te taime te paremo nei te taata i roto, ma te raveà òre i te haamauruüruraa i te täatoàraa.

Ia parau o Ietu, Ia hinaaro mai te taata ia ù ra, to na auraa te hinaaro o te Atua ta Ietu e parau nei. Ia hiò mai tätou i te mau òhipa atoà ta te Atua i rave e ta na e faaìte mai; e riro tätou i te märamarama rii i te vahi te hinaaro o te taata i taa ê ai i to te Atua. Mai te peu i roto i to na hinaaro, te ìmi ra te taata i te räveà ia noaa mai ia na te mea e faaära i to na hinaaro, te hinaaro o te Atua, tei roto ia i to na ìmiraa i te räveà no te horoà i te taata i te mea ta na e ère ra, oia te ora. E hinaaro rave o te taata, no te faarahi i ta na, e hinaaro horoà to te Atua, ia rahi ta te taata. Te taata tei hinaaro i te Atua, e taata ia tei hinaaro i to na ora i te Atua ra, tei färii ua faaòhipa ia i te mau faaueraa a te Atua, no te hau. Òia atoà teie taò i roto èo Ènata te HIA, Te hia o te Ètua, ia hinaaro atu ia te taata ia na o te mea hoì te reira e noaa ai ia na te ora, e ia aroha o ia mai te Atua i aroha ia na. Te hinaaro i te Atua e te aroharaa i te taata, o nä ture ia e piti e faatere i te Hau i reira te Atua e mana ai. E o tätou hoì i hinaaro e ani i to na hau ia faatupuhia i nià i te fenua e i roto i teie nei ao, te faaìte atoà ra ia tätou e, teie atoà te ture ta tätou iho e rave nei i te faaòhipa ia tupu te parau tià, te parau mau, e te òaòa i nià i te fenua nei, ia maitaì roa te roo o te Atua e ia hanahana roa to na iòa moà.

 E haapaò ia i ta ù parau. Ia faaroohia teie reo o te Fatu, e au i te mau taahiraa o te hoê èà e haere tià i nià, e èà e haamata na roto i te Atua, e faahope na roto i te Atua. No reira, te taata tei ìte i te faatura i te iòa o te Atua, ua ìte ia i te haapae i te mau mea atoà tei òre e au i te huru e te hohoà o te Atua. Te taata e na reira, ua ìte ò ia e, e faaineine rä te parau a te Atua ia na no te färii i te Atua.

E aha te haapaò, no te pinepine teie parau te faahitihia e tätou, vai noa atu ra to na auraa i roto ia na iho. E ìnaha te vai noa ra te faufaa o teie parau o te tià ia hiòhia èi haamanaò-noa-raa te värua o teie parau. Òia hoì, e taata tei horoà i to na tarià i parauhia atu ia na. E taata atoà teie tei tae to na manaò, e to na âau I nià I te tahi òhipa, no reira o na i te rave roa. E taata rä tei hinaaro ia matara mai te maitaì nä roto i ta na òhipa. E taata hoì tei vai ära noa to na mata e to na âau i nià i te òhipa e tupu ra i mua ia na, no to na hinaaro ìte i te mau taime atoà i te tere-maitaì-raa o te òhipa tei horoàhia i roto i to na rima, e aore ra te òhipa ta na i ôpua i te rave. No reira o ia i riro ai èi taata tiàturihia.

Ua ìte maitaì te Haapaò i te mea ta te parau a te Atua e tïtau ra ia na. Ma te ìte atoà e, te vai ra to te Atua hinaaro ia na, ua faaroo to na tarià, e ua tae to na värua e to na manaò i nià i te mau ôpuaraa a te Atua. Te rave nei to na rima, e te vai àraàra nei to na mata i te hiòraa i te tupu-maitaì-raa o te òhipa ta na e rave ra. Te hinaaro o te Atua, ua tuuhia e i nià, e o te vähi atoà ia ta na e tïtau nei, ma te òre e tuu i te hinaaro o te Atua i roto i te faanahoraa i raro, ia vai hanahana noa ra te Atua.  

O te tahi mau manaò teie i nià i te reo o Ietu e, 23 E e here mai hoì ta ù Metua ia na, e e haere atu hoì mäua ia na ra e pärahi mau atu io na ra.

Teraì òr. Faatura.

Ioane 13.31-35 Òutou.

Tāpati 19 no më 2019.

Òutou.

Taramo 145

1 Taramo haamaitaì na Tävita. E faateitei ä vau ia òe, e ta ù Atua, e te Arii, e haamaitaì ä vau i to òe ra iòa e a muri noa atu. 2 E haamaitaì ä vau ia òe i te mau mahana atoà nei, e ârue au i to iòa e a muri noa atu. 3 E rahi te Fatu, e ia haamaitaì-rähihia, oia ä ia,  e òre to na rahi e ìteä ia ìmi. 4 Te mau uì atoà të faarahi i ta òe òhipa, e e faaìte hoì i ta òe ra òhipa mana. 5 E parau vau i te tura e te hanahana o to òe ra mana, e te mau räveà taa ê na òe ra. 6 E parau rätou i te mana o ta òe ra mau räveà mataù, e e faaìte hoì au i to òe ra mana. E parau ä rätou i te manaòraa o to òe ra maitaì rahi, e himene hua hoì i ta òe ra parau-tià. 8 E hämani maitaì e te aroha to te Fatu, e òre e riri vave, e te faaherehere rahi. 9 Hämani maitaì to te Fatu i te taata atoà, e te vai ra to na aroha faaherehere rahi i nià i to na atoà ra mau òhipa. 10 E ârue anaè ta òe atoà ra mau òhipa ia òe, e te Fatu, e na to mau tävini moà e haamaitaì ia òe. 11 E parau rätou i te hanahana o to òe ra pätireia, e faatià noa hoì i ta òe ra mau räveà püai. 12 I te faaìteraa i te tamarii a te taata nei i to na ra mana, e te hanahana e te manaò to na ra pätireia. 13  O to òe ra pätireia, e pätireia mure òre ia, e to òe ra mana, e tae ia i te mau uì atoà ra. 13 E Atua mau te Atua e te haavare òre i roto i ta na mau òhipa. 14 Te mau ra te Fatu i te feiä e hià ra, e ua faatià i te feiä e piò i raro ra.15 Te hiò nei te mata o te mau mea atoà nei ia òe, e te horoà mai ra òe i te mäa na rätou i te tau mau. 16 Te heheu nei òe i to rima, e te haamäha nei i te hiaai o te mau mea ora atoà nei. 17  E parau-tià ta te Fatu i ta na atoà ra mau haereà, e te hämani maitaì i ta na atoà ra mau òhipa. 18 Te fätata mai ra te Fatu i te feiä e tiàoro atu ia na,  i te feiä atoà i tiàoro atu ia na mä te haavare òre. 19 E faatià o ia i te hinaaro o te feiä i mataù ia na, e faaroo mai o ia i ta rätou tiàoro, e e faaora hoì ia rätou. 20 Te tiaì nei te Fatu i te feiä i hinaaro ia na, âreà te feiä paieti-òre ra, e haamouhia ia e ana. 21 E parau ta ù vaha mä te ârue i te Fatu, e ia haamaitaì te taata atoà i to na ra iòa moà e a muri noa atu.

Òhipa 14.21-27

Te hoìraa i Ànetiohia i Turia

21 E ia parau räua i te Èvaneria i te reira ôire, e rave rahi hoì i tei faarirohia ei pipi, hohoì faahou mai ra räua i Rutetera, e Ìtonio, e i Ànetiohia; 22 i te faaitoitoraa i te âau o te mau pipi, e te aòraa atu ia rätou ia mau päpü mäite ä rätou i te parau, e te nä-ô-raa atu e. E nä roto tätou i te pohe rahi e ö atu ai i te Pätireia o te Atua ra. 23   E ia haapaòhia e räua te peretiputero no rätou i te mau Ètärëtia atoà mä te pure e te haapaeraa mäa, ua püpü atu ra räua ia rätou i te Fatu, i ta rätou i faaroo ra. 24 E maìri mai ra Pititia ia räua, tae atu ra räua i Pamefuria. 25 E ia parau räua i te parau i Perete, haere atu ra räua i Àtaria. 26 E mai reira hoì, fano mai ra räua i Ànetiohia, i te vähi i püpühia atu ai räua i te ìte o te Atua, i te òhipa i oti ia räua ra. 27 E tae mai ra räua i reira, ua haaputuputu mai ra räua i te Ètärëtia, e ua faaìte atu ra i ta te Atua i rave ia räua ra, e ua ìriti o ia i te ùputa faarooraa no te Ètene.

Àpotarupo 21.1-5

Te raì âpï e te fenua âpï

1 E ìte atu ra vau i te raì âpï e te fenua âpï. Ua mou hoì tei mütaa iho raì, e tei mütaa iho ra fenua; e aore aè ra e miti. 2 E ìte atu ra hoì au, o Ioane, i te ôire moà ra, ia Ierutarëma âpï, i te pouraa mai mai ô mai i te Atua i nià i te raì ra; ua faanehenehehia mai te vahine i faanehenehehia no te faaipoiporaa i ta na täne ra. 3 Ua faaroo atu ra vau i te hoê reo rahi no te raì mai ra, i te nä-ô-raa mai e Inaha tei ô te taata ra te tëtene o te Atua  E e pärahi o ia i roto ia rätou ra, e ei taata rätou no na, e ei pïhaì atoà iho te Atua ia rätou, ei Atua no rätou. 4  E na te Atua e horoi i to rätou roimata atoà, e e òre roa te pohe, e te òto, e te mihi, e te mäuiui. E òre atoà ia, no te mea ua mou te mau mea tahito ra. 5 E ua parau mai ra tei pärahi i nià iho i te teröno ra Inaha, te faaâpï nei au i te mau mea atoà nei. E ua parau mai ra o ia ia ù A päpaì, e parau mau hoì teie nei mau parau, e te haavare òre.

 Ioane 13.31-35

Te faaueraa âpï

31 E reva atu ra o ia, ua parau atu ra Ietu Ua maitaì te Tamaiti a te taata i teie nei, e ua maitaì hoì te Atua ia na. 32 Ua maitaì te Atua ia na ra, i haamaitaìhia mai o ia i te Atua ia na iho, i teie nei ä hoì te haamaitaìraa ia na. 33 E a ù mau tamarii nei, no pärahirahi aè au io òutou nei. E ìmi òutou ia ù, e ta ù i parau atu i te âti-Iüta ra e te vähi ta ù e haere nei e òre òutou e tae aè i reira, ta ù ia parau ia òutou i teie nei. 34 E tuu atu vau i te parau âpï na òutou e aroha òutou ia òutou iho, mai ia ù e aroha atu ia òutou na, e aroha atoà hoì òutou ia òutou iho. 35 O te mea teie e ìte ai te taata atoà e, e pipi òutou na ù, ia aroha òutou ia òutou iho.

Manaò

Teie te tahi tuatapaparaa ei haafatataraa i pïhaì iho i te auraa e faaìtehia nei e na taiòraa e maha. Ia hio maitai-änaè-hia te mau parau e faahitihia nei, te horoà nei ia i te mau òhipa no te tupuraa no te huru o te taata tiàturi Atua, i te faaìteraa i to na hiroà. Oia hoi ia àpapa tatou i te mau taiòraa e ìtehia teie huru to te taata tiàturi Atua, püòiraa i te mau faanahoraa o ta na e haapäpü nei no te Atua. E aita roa te Atua, i faaea i te faaòhipa i te taata i nia i ta na mau ôpuaraa, e tae roa mai  ia tatou nei.

Ei hiòraa na tatou i te Taramo 145.    Te mana.

Te faateitei nei o Tavita i te Atua, no te mau òhipa ia ta na e tiàturi nei o ta te Atua i faatupu na roto i to na mana. I tera manaò e na te mau ui atoà e faaìte i te reira, to na auraa ra, eita te hanahana o te Atua e òre-raa e vai noa ia e a muri atu. E teie hanahana to te Atua, te aroha faaherehere ia ta na i horoà no te taata, tei himenehia na roto i te âau parau tià. Te vahi faahiahia no teie Taramo, to Tavita ia faahitiraa e hitu taime te parau no te MANA. Ua tuuhia ia teie tao i roto i te vahi ia òre ia pohe te iho o te taata tiàturi  Atua i roto i te tau, i tera ia mana e, e a muri atu.

Te vai nei te mana òhipa,                               tei faaìte ia i te itoito ìr.4.

Te vai nei te mana raveà,                               tei faaìte ia i te ìmiraa ìr.5.

Te vai nei te mana mataù,                              tei faaìte ia i te faatura ìr.6 vm.

Te vai nei te mana faaìte,                               tei faaìte i te haapäpüraa ìr. 6 vh.

Te vai nei te mana faaìte,                               tei faaìte i te tupuraa ìr.12 vm.

Te vai nei te mana hanahana,                         tei faaìte i te haehaa ìr 12 vh.

Te vai nei te mana no te patireia mure ore,    tei faaìte i te mau ui atoà ir 13.

Teie mau tuatapaparaa, eiaha tätou e mähea atu i te parauraa e mea rau te auraa o te mana, ua rau ra to na faaòhiparaahia. To na auraa no te faaìte i te hoê òhipa naeà-ore-hia e te ite o te taata i roto i teie Taramo te faaòhipahia nei teie tao  e, e Mana. Na teie tao e ärataì nei, te faateiteiraa a Tavita i te Atua, ia ite-a-hia to te Atua aroha faaherehere, te hämani maitaì, e te ìteraa te mata o te mau mea ora atoà i te rima o te Atua i te heheuraa i te taata no te haamäharaa i to rätou hiaai. Te uiraa e tià e parau i nià i teie taiòraa, E aha te mana ? Eiaha no te mea aita i uihia nei teie parau oia, ua vai noa ra te tahi mau manaò i roto i te rupehu no te tatararaa.

Ei hiòraa na tatou te puta Òhipa 14 : 21 - 27. Te Ètärëtia Veà tono.

I muri aè i te mau vahi i haerehia e Pauro e o Paranapa i roto ia Atia iti, aita raua e haapaò faahou nei i te täpura òhipa i faanahohia e raua i te ômuaraa no to raua tere mitionare. To raua ra tiàturiraa i te ärataìraa a te Varua  Maitai, te rahi noa atu ra  i te puai. Te fifi ta raua e farerei nei te mau  tià faatere  Ati Iuta ia teie e òre nei e farii i te mau parau e faahitihia nei no te Fatu ra o Ietu. No rätou te parau no Ietu, ua tupu noa ia mai to te mau taata, eita o Ietu e tià ia faahanahanahia. I hoì ai raua i Anetiohia i Turia te vahi i ômua ai raua i te tere no te pororaa èvaneria. I reira to Anetiohia ìteraa i te itoito no te òhipa i ravehia e teie na veà tono. Na roto i na tumu e toru e vai nei,

1) ia amo raua i te parau no te veà tono ei faaìteraa, i te parau maitai a te Atua,

2) ia haapäpü raua i te òhipa a te Atua e vai ra i roto ia raua i mua i te Mau Etene,

3) ia ite raua e na te Atua i tono ia raua no te faaìte i te parau tià no te Evaneria.

Na teie mau parau e ìriti i te ùputa i te mau Etene, tei haafifi i te mau manaò o te mau faatere Ati Iuta. Te ìte nei o Pauro i roto i teie òhipa ta na e rave nei, te âano ra ia te ùtuafare o te Atua, aita atu ra ia i ta ôtià-noa-hia i roto i te Âti-iuta. O te tahi ia auraa no teie parau e Ètärëtia, ia o atoà te Etene i roto, e a ore te feia i rapae tei ìte i to rätou piiraahia e te Atua, mau  Etene teie  e faahitihia nei e Pauro. Oia hoì te Etene e taata atoà rätou, te feia täiva e taata atoà rätou, te feia pätoì i te mau faanahoraa a te Ètärëtia e taata atoà rätou, e tae noa atu te mau faaroo âpï e mau taata anaè rätou. Te òhipa a te Ètärëtia veà tono, aita ta na haapäpüraa i te taata i mua i te aro o te Atua, o to te Atua ia hinaaro te taata.

Ei hiòraa i te Apotarupo 21 : 1 - 5 Te tiaìtururaa.

Hoê raì âpï, hoê fenua âpï, no vai mä ia ? Ia faaroo tätou i te mau parau e tupu nei i teie mau mahana i o tätou nei, te mau mataì rorofaì, te hororaa fenua tei täpoì i te tahi mau utuafare, ma te haapohe i te taata e tupu atoà te mau uiuiraa. Mai teie anei te huru ia tae i taua mahana ra e hoì mai ai te Fatu, ia ù nei aita vau e tiàturi mai te reira te huru.     

Te haapäpü nei o Ioane e tupu te rahuraa âpï a te Atua, no te faatupuraa i te tiaìtururaa ora, i teie vahi tei roto ia i te ao no te mauiui òre, peàpeà òre, eita e faaroo faahouhia te taì a te mau taata, eita atoà e ìtehia, te òto e te pohe, e na te Atua e horoi te roimata o te feia e tiàturi nei ia na. Ia faahiti anaè o Ioane i teie parau e, e mou ia mau mea i mütaa iho ra, to na auraa, te haere nei ia te mau òhipa i nia i te maitaìraa, ia au i te faanahoraa a te Atua. Ia tütonu anaè tätou i nia i te mau mea tahito, e tupu atoà te tahi peàpeà i roto i te âau, no te mea ua ìte tätou i to na faanahoraa. Te hoê ra òhipa âpï mai ta Ioane e faaìte nei no te hoê ao âpï ai-ti-a ia tätou i ìte atu ra, te tïtauhia nei ia tätou ia tiàturi. O ta tatou e tiaì nei te mahana e tupu ai teie faaâpïraa. No te mea ia au te haapotoraa o na taiòraa e maha te faaìtehia te  huru o te Atua Nui Tumu Tahi.

-Taramo 145, 13 E Atua mau te Atua e te haavare òre i roto i ta na mau òhipa.

-Òhipa 14, 27 e ua ìriti o ia i te ùputa faarooraa no te Ètene.

-Àpotarupo 21, 5 A päpaì, e parau mau hoì teie nei mau parau, e te haavare òre.

-Ioane 13, 35 ia aroha òutou ia òutou iho.

Te Ioane 13 : 31 - 35. Te parau tütuu a te Metia. Teie ia tuhaa parau ta tätou e hiò nei, te o nei ia tätou i roto i te hoê taime faufaa rahi no Ietu i te fenua nei, ma te faaineine i ta na mau pipi no te vaiiho i nià i te mau òhipa tei horoàhia ia rätou. I roto i teie maa taime ïti e toe nei no to na oraraa i raro nei, te vaiiho nei o Ietu i te mau taata âau ètaèta i roto i te rima no te arii mana o teie nei ao, oia hoì i roto i te ao tahito. Te faataa nei O ia ia na no ta na mau pipi no te ao âpï tei reira te ora mure òre. Te hinaaro nei O ia e haamäramarama e e faaitoito i te faaroo no teie pupu ïti te niu o te Ètärëtia, no te òhipa rahi e höroàhia ia rätou, te pororaa ia i te Evaneria i roto i teie nei ao. Te faatupu nei O ia i taua òhipa ra i roto i to rätou âau na roto i te mau òhipa ta na e rave nei i mua i to rätou mata, na roto i te horoiraa i te àvae o ta na mau pipi e te faateäraa ia Iuta i ta na mau pipi, mai te ìrava 1 e tae i te ìrava 30. Na roto i te òreroraa parau tei riro mai te parau tütuu ra te huru i ta na mau pipi ìrava 31 e tae roa i te pene 16 mai te ìrava 1 e tae i te ìrava 33. E na roto hoì i te pure ärai i te pene 17. Te parauhia teie tuhaa te parau tütuu a te Metia. Teie taiòraa tätou e hope ia i te pene 17.Te òhipa tumu i teie po hopeà no to na âmuiraa i ta na mau pipi, o te faaineineraa ia ia rätou no to na poheraa e te faaìteraa hoì ia rätou i te auraa o taua pohe ra, oia hoì to na aroha rahi i to na taata i te ao nei. Te tià nei te Fatu ma te hanahana rahi, ua oti te òhipa i höroàhia mai ia na e ua tae i te hora e hoì atu ai O ia i te Metua ra, e tupu taua hoìraa hanahana i te Metua ra, na roto i te faahaèhaaraa hohonu roa, te pohe Tätauro. E na roto i teie vahi haehaa roa ta na e fatata i te tomo e o atu ai O ia i roto i te hanahana no te ao mure ore. No reira, i nià i teie àmuraa maa, te rave nei o Ietu i te hoê òhipa haèhaa roa, tei faataahia na te mau titi, te horoiraa i to rätou àvae. Na roto i taua òhipa ra, o te Fatu tei haere mai, mai o mai i te Atua ra e, e tei ineine no te hoi faahou atu ia na ra, te faaite nei i ta na mau pipi e, e tävini atoà O ia no Iehova, tei vahavahahia e tei òre i haapaòhia e te taata Ìtaia 53 : 3. O rätou o tei uiui aè nei i to rätou e hau i te rahi, te hiò nei ia i teie nei ma te maere i to rätou Arii tävini, eita ra i te hoê arii raatira i te horoiraa i to rätou àvae tei viivii i te hou e i te repo no te puromu. Area ta te Atua ra e roimata ia ta na e horoi. Te tahi auraa no teie òhipa ta Ietu e rave nei, no te haapäpü ia i teie parau i te ìrava 35 ia aroha òutou ia òutou iho. O teie hoì te òhipa e tià i te taata tiàturi Atua ia rave, i reira e ìtehia ai te raì âpï, e te fenua âpï. Te faaue nei o Ietu i to na mau tävini no teie ao âpï ia  aroha e ia  here.

Terai or.



Ioane 10.27-30 Hoê ä ia.

Tāpati 12  no  Mai 2019.

Hoê ä ia.

Taramo 100

1 Taramo haamaitaì. Ia haruru te fenua atoà i te haamaitaì i te Fatu 2 E haamori i te Fatu mä te òaòa, e haere mai i mua i ta na aro mä te himene. 3 Ia ìte hoì òutou o te Fatu anaè ra te Atua, na na tätou i hämani, e no na hoì tätou, e taata no na, e te mämoe no ta na ra âua. 4 E tomo i to na mau ùputa mä te ârue; e to na ra mau hëtere mä te himene haamaitaì. E ârue òutou ia na, e haamaitaì i to na iòa. 5 E maitaì hoì to te Fatu, e to na aroha e tià ia i te vai-mäite-raa, e ta na ra parau mau i tërä uì, i tërä uì.

Òhipa 13.14-52

14 E mai Perete hoì reva atu ra rätou, e tae atu ra i Ànetiohia i Pititia, tomo atu ra i roto i te tunato i te mahana täpati, pärahi iho ra i raro. 15 E oti aè ra te taiòraa i te ture e te mau perofeta ra, ua tono aè ra te mau tävana o te tunato ra i te veà ia rätou, nä ô atu ra E te mau taeaè nei, te hinaaro na òutou i te aò mai i te taata nei, a parau mai. 16 Ua tià mai ra Pauro i nià, ua popoì mai ra i te rima, nä ô mai ra E te mau taata Ìteraèra nei, e te feiä atoà e mataù i te Atua ra, a faaroo mai 17 Na te Atua o teie nei mau taata Ìteraèra nei i mäìti i to tätou hui tupuna, e ua faateitei o ia i taua mau taata ra ia rätou i pärahi noa i Àifiti ra, e ua arataì mai o ia ia rätou i räpae mä ta na rima püai. 18 E ua faaòromaì o ia i ta rätou parau i te mëtëpara ra, e a maha aè ra àhururaa te mätahiti. 19 E pau iho ra hoì e hitu fenua ia na i taua fenua i Tanaana ra, ua tufa terero iho ra o ia i to rätou fenua no rätou iho. 20 E oti aè ra te reira, a maha atu ra hänere e pae àhururaa te mätahiti. I tuu mai ai i te feiä haavä no rätou e tae aè ra i te perofeta ra ia Tämuera. 21 Mai reira hoì, ua hinaaro aè ra rätou i te arii, ua horoà mai ra te Atua ia Taura te tamaiti a Tita, no te ôpü o Peniamina taua taata ra, e a maha aè ra àhururaa te mätahiti. 22 E tuua-ê-hia aè ra o ia e ana, ua faatupu aè ra o ia ia Tävita e arii no rätou; ta na hoì i parau mai ra i te nä-ô-raa mai e Ua ìteä ia ù Tävita te tamaiti a Iete, e taata e au i ta ù âau, e na na e faatupu i ta ù mau hinaaro atoà. 23 Ua faatupu iho nei te Atua i te Ora no Ìteraèra ia Ietu, no te huero o teie nei taata, o tei parauhia mai ra. 24 I parau haere na Ioane i te päpetito tätarahapa i te taata atoà o Ìteraèra i haere mai ai o ia. 25 Te faatupu ra Ioane i to na tere, e ua nä ô aè ra o ia O vai au nei i to òutou manaòraa? Eere au i te Metia. A hiò na rä, te haere mai ra te hoê i muri iho ia ù, eita vau e au ia tätara noa atu i te tämaa i ta na âvae. 26 E te mau taeaè nei, e te tamarii o te fëtii o Âperahäma, e te feiä atoà e mataù i te Atua i roto ia òutou na, i häponohia mai teie nei parau ora ia òutou nei. 27 Te feiä hoì i pärahi i Ierutarëma, e to rätou hui raatira atoà, no te mea aore rätou i ìte ia na, e te parau a te mau perofeta i taiòhia i te mau mahana täpati atoà ra, ua faatupu iho nei rätou i taua mau parau ra i te faahaparaa atu ia na ra. 28 Aore ä hoì a ana hara i ìteä e rätou e pohe ai, ua ani atu ra rätou ia Pirato ia taparahihia o ia. 29 E hope aè ra i te faatupuhia e rätou te mau parau atoà no na i päpaìhia ra, ua tuu mai ra rätou ia na i raro mai nià mai i taua räau ra, e vaiiho atu ra ia na i roto i te menema ra. 30 Ua faatià mai rä te Atua ia na mai te pohe mai ra. 31 I ìteä mai hoì o ia e rave rahi te mahana i te feiä i haere atoà mai, e oia atoà i Ierutarëma mai Tarirea mai ra, o rätou to na ìte i te mau taata atoà ra. 32 E parau maitaì ta mätou i hopoi mai ia òutou nei, te parau i parauhia mai i to tätou hui tupuna ra; 33 ua faatupu iho nei te Atua i taua parau ra ia tätou nei i ta rätou tamarii, o ia i faatià faahou ia Ietu i nià, o ia hoì tei päpaìhia i roto i te Taramo piti ra Ta ù Tamaiti òe, i naùanei òe i fänauhia ai e au. 34 I faatià mai o ia ia na mai te pohe mai ra, eiaha o ia e hoì faahou i te âpoo, o ia i nä ô mai e E horoà vau ia òutou i te mau maitaì i faaìtehia ia Tävita ra i te mea haavare òre ra. 35 I parau mai ai hoì o ia i roto i te tahi Taramo ra Eita òe e tuu i to Mea Moà ia tähuti noa na. 36 Âreà Tävita, rave atu ra o ia i te hinaaro o te Atua i to na ra uì, maìri atu ra to na taòto, e âmuihia atu ra o ia i to na ra hui metua, e tähuti atu ra. 37 Âreà o ia, o ta te Atua i faatià i nià ra, aore ia i tähuti. 38 E teie nei, ia ìte òutou, e te mau taeaè nei, no teie nei taata i parauhia atu ai ia òutou na e, e matara te hara. 39 E te mau mea atoà eita òutou e tiàhia mai i te ture a Möte ra, e tiàhia mai ia ia na te feiä atoà i faaroo ra. 40 E teie nei, e haapaò maitaì, òi roohia mai òutou e tei parauhia mai e te mau perofeta ra 41 A hiò na òutou, e te feiä e vahavaha, a mäere atu, e a pohe atu E òhipa hoì au i te hoê òhipa i to òutou na ànotau, e òhipa rä, parau noa atu te taata ia òutou na, e òre roa òutou e faaroo. 42 E tei te haereà te âti-Iüta i räpaeàu i taua tunato ra, ua ani atu ra te Ètene ia parauhia mai taua mau parau ra ia rätou ia tae i te täpati ra. 43 E purara atu ra taua tunato ra, ua pee mai ra to te âti-Iüta e te mau pipi pure Atua ra e rave rahi ia Pauro räua o Paranapa; o tei parau atu ia ia rätou, e aò atu ra, ia mau mäite ä i te aroha mau o te Atua. 44 E tae aè ra i te täpati, ua haaputuputu mai ra to taua ôire atoà ra e faaroo i te parau a te Atua, aore reà i toe. 45 Ia hiò mai rä te âti-Iüta i taua feiä rahi ra, î aè ra rätou i te feìi, e ua märô mai ra i taua mau parau i parauhia e Pauro ra, mä te faaòre e te faaìno hoì. 46 Itoito atu ra Pauro räua o Paranapa, e nä ô atu ra E mata ia òutou i te parau atu i te parau a te Atua e tià ai. O òutou rä i tute ê atu i ta na parau nei, e te parau na òutou eita òutou e au i te ora mure òre, inaha, te färiu nei mätou i te Ètene. 47 O ta te Fatu hoì ia i poroì mai ia mätou nei ra Ua haapaòhia òe e au ei tiàrama no te Ètene, ia riro òe ei ora e tae noa atu i te hopeà o te fenua ra. 48 E ia faaroo mai ra te Ètene i taua parau ra, òaòa atu ra rätou, e haamaitaì atu ra hoì i te parau a te Fatu. E te feiä i haapaòhia no te ora mure òre ra, ua faaroo anaè ia. 49 Parare atu ra te parau a te Fatu e àti noa aè taua fenua ra. 50 Ua tiàrepu iho ra te âti-Iüta i te mau vahine mana pure Atua ra, e te feiä haavä i taua ôire ra, faatupu atu ra hoì i te hämani ìno ia Pauro e Paranapa, tiahi ê atu ra rätou ia räua e maìri mai ra to rätou ra fenua. 51     Ueue atu ra rä räua i te repo i to räua âvae ia rätou, e tae atu ra hoì i Ìtonio. 52 Î aè ra te mau pipi i te òaòa e i te Värua maitaì.  

Àpotarupo 7.9-17

E feiä rahi roa

9 E i muri aè i te reira, hiò atu ra vau, e inaha e feiä rahi roa, e òre roa e pau ia taiò, no te mau fenua atoà, e te mau ôpü atoà, e te mau nünaa atoà, e te mau reo atoà, i te tià-noa-raa i mua i te teröno, e i mua i te Ârënio, mä te àhu teatea i te àhuraa e mä te âmaa tämara i to rätou rima; 10 e mä te pii hua hoì to rätou reo, i te nä-ô-raa e Tei to tätou Atua te ora, tei pärahi i nià iho i te teröno ra, e tei te Ârënio 11 Te tià anaè mai ra te mau merahi e àti noa aè taua teröno ra, e taua mau peretiputero ra, e nä mea ora e maha ra, e ua tïpapa anaè iho ra i raro to rätou mata i mua i te teröno ra, haamori atu ra i te Atua, 12 nä ô atu ra Âmene O te ârue, e te hanahana, e te paari, e te haamaitaì, e te tura, e te mana, e te püai, ei to tätou Atua ia e a muri noa atu  Âmene. 13 Ua parau mai ra te hoê o te mau peretiputero ra ia ù, nä ô mai ra O vai eie nei feiä e àhu i te àhu teatea nei E mai hea mai ä rätou 14 Ua parau atu ra vau ia na Ua ìte òe, e ta ù raatira. Ua parau mai ra o ia ia ù O te feiä i haere mai mai roto mai i te àti rahi ra, e ua horoi i to rätou àhu, e ua teatea, i te toto o te Ârënio ra. 15 I pärahi ai rätou i mua i te teröno o te Atua ra, e i haamori ai rätou ia na i te ruì e te ao i roto i to na ra hiero. E na tei pärahi i nià iho i te teröno ra e pärahi i roto ia rätou nei. 16 E òre rätou e poìa faahou, e òre hoì e poìhä faahou; e òre hoì rätou e tiàrià e te mahana e te veàveà. 17 Na te Ârënio hoì tei pärahi i röpü i te teröno ra e faaàmu ia rätou, e e arataì hoì ia rätou i te mau pape ora pihaa ra. E na te Atua e horoi hua i to rätou roimata.

Ioane 10.27-30

27 E faaroo mai ta ù ra mämoe i to ù reo, o ta ù i parau atu ia òutou ra, ua ìte au ia rätou, e e pee mai hoì rätou ia ù. 28 E e horoà atu ä hoì au i te ora-mure-òre no rätou; e òre roa rätou e pohe, e e òre roa hoì rätou i roto i ta ù rima nei, e riro i te haru ia vëtahi ê. 29 O ta ù Metua i horoà mai ia rätou no ù ra, o të hau atu ä ia; e òre roa e tià ia vëtahi ê ia haru atu ia rätou i roto i te rima o ta ù Metua ra. 30 O vau e te Metua ra, hoê ä ia.

Manaò.

I mua i teie mau parau no ta tätou mau taiòraa te haavarovaro noa ra i roto i te tärià, e riro te tahi i te parau mai e, eiaha e ìnoìno mai e hömä, no Ìteraèra teie parau, ua tupu i terä tau, mai teie te tupuraa o te reira parau. E parau mau ihoä paha, e aha rä te faufaa no ù ia ìte i te àamu o Ìteraèra. Nä ô noa na tätou ei hiòraa na tätou ia faaroo tätou i te mau pehe marü e te òtooto ra, aore ra te tahi pehe uàuà, tei na rotohia i te tahi reo eere i to tätou te taata e himene ra e Täpönë, e Purutia, e Marite, aore ra e Päniöra. Eere no te mea aita tätou e taa ra i te paraparauraa, aore ra aita tätou i ìte i te àamu e himenehia ra, e òre ai teie pehe e haru i nià ia tätou. No te mea tei roto te pehe i to tätou tarià, te amoamo ra hoì i to tätou âau, te faahaùti ra i to tätou tino, te mea faufaa i te reira taime, eere te mea e himenehia mai ra, te taata hoì na na te reira himene i fatu, e tae noa atu i te feiä na rätou e haùti ra i te ùpaùpa, to tätou rä hoêraa i te pehe e òre ai e noaa ia tätou te faataa e, o tätou änei tei ö i roto i te pehe, aore ra te pehe tei uru mai i roto ia tätou. Ia faaroo hoì tätou i te haapotoraa o te  mau taiòraa, ua tupu ia i roto i tera tau tera uì ma te ärataì ia tätou i te ìteraa i te mau hinaaro  o te Atua Nui Tumu Tahi. Mai te hoê ùpaùpa ra te huru, tei au ia òrihia i nià i te turaa âvae ia haruru te fenua i te haamaitaì i te Atua, teie atu ra te haapotoraa.

-Taramo 100, 4 E tomo i to na mau ùputa mä te ârue;

-Òhipa 13, 47 Ua haapaòhia òe e au ei tiàrama no te Ètene

-Àpotarupo 7, 17 E na te Atua e horoi hua i to rätou roimata.

-Ioane 10, 30 O vau e te Metua ra, hoê ä ia.

Te hinaarohia nei ia märamarama tätou nä roto i teie mau tumu parau ia riro èi hiòraa na tätou i te rave ei parau aè na tätou i te ìteraa i te mau maitaì o te Atua, tei mua tätou i te tahi mau tumu parau, to na auraa, o tätou ia teie nei e teie mau parau, te ìte ra änei tätou i roto i teie mau parau, mai te mea ra, te reo atoà teie o te Atua ia tätou e te Mäòhi i teie mahana, aore ra, mai te pape e tahe ra i nià i te rauère taro, te pähee atoà atu ra teie parau i roto i te moè e te täuà òre o te taata, no te mea no Ìteraèra terä parau, aore ra no te mea ua mäaro roa to tätou tarià i te parau a te Atua. Ia faaroo tätou i teie parauraa e, 4 E tomo i to na mau ùputa mä te ârue;  e aha te mea e ôpani ra ia tätou i te faarooraa i teie reo mai te mea, te au atoà ra ia tätou, e te ìmi-atoà-raa i te räveà e faaâfaro ia tätou iho ia òre tätou ia naeà-atoà-hia i te faahaparaa te òre-raa e faaroo. Te pärihia ra tätou i te tärià turi, te aoaoa, te nevaneva aore ra te tahi atu huru tähitohitoraa, aita o reira e fifi, e eita hoì e taui e hoê iti aè i teie parau ta Metia ia Pauro i te naòraa e 47 Ua haapaòhia òe e au ei tiàrama no te Ètene. E nä ô ia tätou e, tei ia tätou ra te parau i teie nei, ia tupu teie parau ia tätou e ia hotu roa atu, ia òre e tiihia mai, âfaìhia atu ra i te vähi ê tanu atu ai. Ua ìte atoà ia tätou e, aita e nünaa i fatu i te Atua, te vai ra rä ta te tahi e te tahi nünaa märamaramaraa i te parau o te Atua, ia au i ta te fenua haapiiraa ia na, te parau rä a te Atua, oia hoì ta na faaìteraa mai i to na mau hinaaro, e au ia no te mau nünaa atoà tei ineine i te färii i te reira. Mea nä nià i te reira tiàraa to tätou hiòraa i teie mau parau ta Ietu e parau nei ia tätou i teie mahana, 30 O vau e te Metua ra, hoê ä ia. Te auraa, rau noa atu te huru o te nünaa, hoê te Atua. Ia faahiti hoì tätou i te parau o te rauraa, ua ìte ia tätou e, te vai ra te mea e faataa ê i te tahi nünaa i te tahi, i roto änei i to na reo, ta na peu, to na hiroà, to na fenua, ta na mäa, aita rä te reira i faaòre i te parau o te Atua, aita atoà hoì i haafaufaa òre i te huru taa ê e te ôtahi o te nünaa tätaì tahi, e tei hau roa atu, aita te reira i faaòre i te here o te Atua i te nünaa tätaì tahi i roto i to rätou rauraa. Te faaìte mai nei o ia ia tätou te taata nei i te mea maitaì i te parauraa e hoê ä ia. I roto i teie ìrava, tei nià te manaò i te òhipa i ravehia e te Atua, e ia òre te taata ia haapaò, e roaa roa ta na parauraa e, aita o ia e haamanaò ra, te auraa, e roaa roa ta na faahaparaa i te Atua. Areà ia taui tätou i te parauraa o teie ìrava, aita ia to te taata e hororaa faahou Ua faaìtehia tätou e te taata na i te mea maitaì. No te mea te parau âfaro nei o Ietu i te taata, e tano ai tätou e faapäpü i teie puè taò O vau e te Metua ra, e haapäpüraa  teie o te auraa o te ìrava. Te mea faufaa i ô nei, eere te taata na na te òhipa i rave, aore ra te räveà i faaòhipahia no te faaìteraa i te taata i te reira parau, nä reira hoì te taime, aore ra te vähi i ravehia ai te reira òhipa, te mea rä e, e òhipa oti teie. Aita tätou e anihia nei e hoì faahou i muri, i te ìteraa e, oia mau änei. I roto noa i te parauraa e, ua faaìtehia tätou, ua piri te reira ùputa. E tano tätou e haapoto ä i te parauraa i te nä ôraa e  Ua ìte tätou i te mea maitaì ta teie parau ta Ietu e faahiti nei O vau e te Metua ra, hoê ä ia, no te mea ua faaìtehia tätou. Mai teie atu, eita e tià i te taata ia òre ia rave i ta na tuhaa. E huru mätauhia e tätou teie huru to te taata i te ìmiraa i te räveà ia òre o ia ia naeàhia i te parau, âreà i teie, e au ra e, te parauhia nei te taata e  tei roto te parau i to òe tarià. Rahi noa atu te ârivarivaraa te taata, e vai noa te parau i to na vairaa. Te tiàturiraa ia i te Atua, oia hoì te räveà e ìte ai te taata i te mea tià ia na ia rave. Teie te tiàturiraa o Ietu, e tauturu te fenua i te taata i te ìteraa i te mea tià. E tano ia parauhia e, e hoa päpü te reira no te taata, no te tauturu ia na i te ìteraa e te faatupuraa i te mea tià, oia hoì te mea tei au i te hinaaro o te Atua. Nä roto i te fenua, te haapii noa nei te Atua i te taata i te ora. Ia märamarama te taata i te reira, e haere ta na haamaitaìraa i te Atua ra, e no te mea i hämanihia o ia i te huru e te hohoà o te Atua, ua ìte atoà ia o ia e, ta te Atua i rave no na, te mea tià atoà ia no na ia rave no to na täuaro. Te auraa, eita te fenua e haapii noa i te taata i te ora, e haapii atoà rä ia na i te here, tei au i te huru e te hohoà o te Atua, eita hoì te tahi e tano ia faataa-ê-hia i te tahi. I te mea ua tae roa te taata tiàturi Atua i te parauraa e,  17 E na te Atua e horoi hua i to rätou roimata.

Teraì òr. Faatura.