Ruta èv 15.1-32 Hoì

Tāpati 15 Âtete 2019.

Hoì

Taramo 51

1 Na te Mënätehe. Taramo na Tävita. 2 I te haereà mai o te perofeta ra o Nätana ia na ra i muri aè i to na haereraa atu ia Pätetepa ra. 3 E aroha mai òe ia ù, e te Atua e, i taua hämani maitaì no òe ra, e no te rahi o to òe ra hämani maitaì: e parai òe i ta ù nei mau hara. 4 E horoi hua mai òe ia ù i to ù nei ìno, tämä hua mai ia ù i ta ù nei hara. 5 Te fäì nei hoì au i ta ù nei hara, e te vai noa nei ä to ù ìno i pïhaì iho ia ù. 6 I mua i to aro, to òe anaè ra, i hara ai au nei, e i mua i to mata i rave ai au i teie nei ìno. Ia faatiàhia hoì ta òe parau, e eiaha e faahapahia ia parauhia ra. 7 Inaha, i fänau mai au mä te hara, e i töhia vau e ta ù metua vahine mä te ìno. 8 Inaha, o te parau mau no roto ra ta òe e hinaaro. E haapii mai òe ia ù i te haapaò maitaì i te vähi moè ra. 9 E tämä mai òe ia ù i te hïtopa e ia mä roa vau, e horoi òe ia ù, e ùoùo roa aè ra vau i to te hiona. 10 E faaìte mai òe ia ù i te òaòa e te reàreà, ia òaòa te mau ivi i ôfatihia e òe ra. 11 E huna ê atu òe i to mata i ta ù nei mau hara, e parai hua i to ù nei mau ìno. 12 E faaau na òe i te âau mä i roto ia ù nei, e ta ù Atua. E faahou na hoì òe i te âau manaò tià i roto ia ù nei. 13 Eiaha e faaârue ia ù i mua i to aro nei, eiaha hoì e rave ê atu i to Värua Maitaì ia ù nei. 14 E faahoì mai òe i te òaòa i te ora na òe ra, e ia täuturuhia mai au e te âau tiàmä ra. 15 E i reira vau e haapii ai i te feiä rave hara i ta òe parau, e e haafäriuhia mai te rave parau ìno ra ia òe. 16 Ia ora vau ia òe i te hara toto ra, e te Atua e, te Atua e ora ai au nei; e na ta ù vaha e himene pii hua i to òe ra aroha. 17 E vëvete na òe, e te Fatu, i ta ù vaha, e na ta ù vaha e ârue ia òe. 18 Eere hoì i te tütia ta òe i hinaaro, àhiri o te reira, ua horoàhia ia e au, aore hoì òe e au i te tütia-täauahi. 19 O ta te Atua tütia hinaaro ra, o te âau paruparu ra ia. O te âau paruparu ra e te òto ra, e òre roa te Atua e vahavaha i te reira. 20 Ei hämani maitaì to òe ia Tiona; e patu hoì òe i te âua i Ierutarëma nei. 21 Ei reira òe e mauruüru ai i te tütia parau tià e te tütia-täauahi täatoà mau ra; ei reira te puaatoro e hopoihia ai i nià i ta òe ra fata.  

Ètoto 32.7-14

7 Ua parau mai ra te Fatu ia Möte, nä ô mai ra, A haere, a pou òe i raro ua ìno to mau taata ta òe i arataì mai mai Àifiti mai ra. 8 Ua faaruè vave roa iho nei rätou i te èà ta ù i faaue ia rätou e e nä reira. Ua hämani rätou i te täfa faatö na rätou e ua haamori atu i te reira; e ua hopoi rätou i te tütia, e ua parau e, Teie to òe atua, e Ìteraèra, o tei arataì mai ia òe mai te fenua mai ra mai Àifiti. 9 E ua nä ô mai ra hoì te Fatu ia Möte, ua hiò vau i taua feiä nei; e inaha, e feiä ètaèta. 10 E teie nei, eiaha òe e parau mai ia ù, ia tupu noa na ta ù riri ia rätou a haapau roa atu ai au ia rätou, e o òe ta ù e faariro ei nünaa rahi. 11 Pure iho ra Möte i to na Atua i te Fatu, nä ô atu ra, E aha i tupu ai to riri, e te Fatu, i to mau taata nei, i ta òe i arataì mai mai te fenua mai ra mai Àifiti, ma te mana rahi, e ma te rima püai? 12 O te parau hoì to Àifiti e, I arataì o ia ia rätou ia roohia e te ìno, ia täparahi o ia ia rätou i nià i te mouà, e ia mou roa rätou i te ao nei? E faaruè i taua riri rahi no òe na, ruri ê aè òe i to òe manaò i te pohe no teie nei mau taata. 13 E haamanaò i to mau tävini ra ia Âperahäma, e ia Îtaata, e ia Ìteraèra, ta òe i tapu atu i to òe iho iòa, e ua parau atu ia rätou e, E faarahi au i to òutou huaai e mai te fetià o te raì ra te rahi, e taua fenua atoà ra ta ù i parau ra, e höroà ia vau no to òutou na huaai, e na rätou e pärahi e a muri noa atu. 14 Ua ruri ê aè ra te Fatu i to na manaò i te ìno ta na i parau e e hopoi i nià iho i to na ra mau taata.  

1 Timoteo 1.12-17

Te hämani maitaì o te Atua

12 E te haamaitaì nei au i to tätou nei Fatu i te Metia ra ia Ietu, i tei faaètaèta mai ia ù nei, o ia i parau ia ù i te haavare òre, e ua faatöroà òrometua mai ia ù nei; 13 i tei faaìno hoì i mütaa iho, e te hämani ìno, e te haùti i arohahia mai rä vau, no te mea i nä reira maùa noa vau no te faaroo òre. 14 I rahi roa rä te aroha o to tätou Fatu mä te faaroo e te hinaaro i te Metia ra ia Ietu. 15 E parau mau teie, e te au hoì ia färiihia e te taata atoà, e i haere mai te Metia ra o Ietu i te ao nei e faaora i te feiä hara e o vau hoì to rätou i hau. 16 Teie rä te mea i arohahia mai ai au, ia ìteä te faaòromaì rahi roa o Ietu Metia ia ù, i tei hau i te hara nei, ei hiò-täpaò-raa na te feiä e faaroo ia na a muri atu, e noaa atu te ora mure òre ra. 17 E teie nei, ei te Arii hau mure òre e te pohe òre, e te ìteä òre ia hiò ra, ei te Atua paari aita ä atu, ei ia na te tura, e te hanahana, e a muri noa atu. Âmene.

Ruta èv 15.1-32

Te parapore o te mämoe moè i ìte-faahou-hia mai

(Mät 18,12-14)

1 Ua ruru atoà mai ra te feiä òhi tute e te feiä rave hara e faaroo ia Ietu. 2 Ua ôhumu iho ra rä te mau Färitea e te mau päpaìparau, nä ô aè ra. Te ìte nei teie nei taata i te feiä rave hara, e te àmu atoà nei i ta rätou àmuraa. 3 Ua parau atu ra o ia ia rätou i teie nei parapore, nä ô atu ra 4 O vai ia taata io òutou nei, hoê hänere a ana mämoe, ia moè rä te hoê, e òre e vaiiho i te iva àhuru e iva tiàhapa i te mëtëpara ra, a haere a ìmi ai i tei moè ra, e ia ìteä atu? 5 E ìteä atu ra ia na, amo aè ra i nià i te täpono mä te òaòa. 6 E tae mai ra o ia i te ùtuafare, ua haaputuputu mai ra i te mau tauà e te mau taata tupu, ua nä ô atu ra ia rätou. E òaòa atoà tätou, ua ìteä hoì ia ù tau mämoe i moè ra. 7 E faaìte atu hoì au ia òutou, e òaòa rahi to nià i te raì i te taata hara hoê ia tätarahapa, i te feiä parau tià e ia iva noa atu te àhururaa e iva tiàhapa të òre e au ia rätou te tätarahapa.

Te parapore o te titerama moè i ìte-faahou-hia mai.

8 E o vai hoì ia vahine, hoê àhuru a ana titerama, ia moè ra te hoê, e òre e tïtià i te rämepa, a purümu ai i te fare, a mäìmi mäite ai e ia ìteä atu ia na? 9 E ìteä iho ra, ua haaputuputu mai ra i te mau tauà, e te mau taata-tupu, ua nä ô atu ra. E òaòa atoà tätou, ua ìteä hoì ia ù te titerama i moè ia ù ra. 10 E faaìte atu vau ia òutou, o te huru ia o to te mau merahi a te Atua ra òaòa, ia tätarahapa te taata hara hoê ra.

Te parapore o te tamaiti moè i ìte-faahou-hia mai

11 Ua parau atu ra hoì o ia Toopiti a te hoê taata tamarii tamaroa. 12 Ua parau atu rä tei muri aè i te metua täne E ta ù metua, hö mai na i ta ù ra tufaa i te taoà nei. Ua tufa iho ra o ia i te taoà na räua. 13 E muri iti iho ra, ua haaputu iho ra te tamaiti hopeà i ta na, haere atu ra i te fenua roa, pühura atu ra i ta na taoà i te haapaò òre. 14 E pau roa aè ra, roohia iho ra taua fenua ra i te oè rahi, e àti iho ra o ia i te poìa. 15 Ua täàti atu ra o ia i te hoê taata tupu no taua fenua ra, o tei tono ia ia na i roto i te âua e faaàmu i te puaa. 16 E ua hiaai atu ra o ia i te pipi i àmuhia e te puaa ra ia paìa o ia; aore hoì e taata i hopoi mai i te mäa na na. 17 E iho faahou mai ra to na iho huru mau, ua nä ô aè ra. E rave rahi to ta ù metua tävini tärahuhia e mäa rahi ta rätou e e toe te tahi pae, e te pohe nei au i te poìa. 18 E tià vau e haere i ta ù metua ra, a parau atu ai ia na. E ta ù metua, ua hara vau i te Atua o te raì e ia òe atoà hoì, 19 e eita atu ra e au ia ù ia parauhia e, e tamaiti na òe, e faariro òe ia ù mai te hoê i te mau tävini tärahu no òe nei. 20 Ua tià aè ra o ia, haere atu ra i ta na metua ra. E tei te ätea ê ä o ia, ìte mai ra ta na metua ia na, aroha mai ra, horo mai ra, täuvahi mai ra i nià i ta na àî, hoìhoì mai ra ia na. 21 Ua parau atu ra taua tamaiti ra ia na E ta ù metua, ua hara vau i te Atua o te raì, e ia òe atoà hoì, eita atu ra vau e au ia parauhia e, e tamaiti na òe. 22 Ua parau atu ra rä te metua i te mau tävini A hopoi mai na i te àhu pü maitaì ra, e faaàhu mai ia na nei, e ôomo hoì i te täpeà i ta na rima, e te tämaa i ta na âvae 23 e tii hoì i te täfa faaàmu ra e pätia, e àmu hoì tätou i te mäa, e òaòa hoì tätou; 24 o ta ù tamaiti nei hoì, i pohe na, e ua ora mai nei; i moè na, e ua ìteä mai nei. Òaòa atu ra rätou. 25 Tei roto i te âua te tamaiti mätahiapo ra, te haere mai ra i te ùtuafare. E fätata mai ra te fare ia na faaroo mai ra i te òto vivo e te òri. 26 Ua tiàoro mai ra o ia i te hoê tävini, ua ui mai ra i taua mau mea ra. 27 Ua parau atu ra o ia ia na Teie mai nei to teina, e ua pätia iho nei to metua i te täfa faaàmu nei, no te mea i haere ora mai nei o ia aore e maì. 28 Riri aè ra o ia aore aè ra i tae i roto i te fare haere atu ra te metua täne i räpae, täparu atu ra ia na. 29 Ua nä ô mai ra o ia i te parauraa mai i ta na metua täne. Inaha, e rave rahi aè nei o ù mätahiti i te täviniraa ia òe nei, e aita roa aè nei au i faaroo taìàtä i ta òe parau. E aita ä òe i horoà noa mai i te hoê pinia puaaniho na ù, ia faaàmu atu vau i to ù ra tauà 30 te hoìraa mai rä o to tamaiti na, o tei pühura i ta òe taoà na te mau vahine faaturi ra, pätia iho nei òe i te täfa faaàmu nei na na. 31 Ua nä ô atu ra te metua ia na E ta ù tamaiti, e tià òe i ô nei ia ù nei, e te mau taoà atoà na ù nei, na òe ia. 32 E mea tià hoì ia tätou ia faaàmuraa mäa e ia òaòa; o to taeaè nei hoì, i pohe na, e ua ora mai nei; i moè na, e ua ìteä mai nei.

Manaò.

I mua i teie mau parau no ta tätou mau taiòraa, e riro te tahi i te parau e, eiaha e ìnoìno e hömä, no Ìteraèra teie parau, ua tupu i terä tau, teie te tupuraa o teie mau parau. E parau mau ihoä paha, e aha rä te faufaa no ù ia ìte i te àamu o Ìteraèra. Nä ô noa na tätou ei hiòraa na tätou te faaroo ra vau i te tahi pehe marü e te òtooto, aore ra te tahi pehe uàuà, e Tïnïtö te taata himene, aore ra e Täpönë, e Purutia, e Marite, aore ra e Päniöra . Eere no te mea aita vau e taa ra i te paraparau, aore ra aita vau i ìte i te àamu e himenehia ra, e òre ai teie pehe e haru i nià ia ù. No te mea tei roto te pehe i to ù tarià, te amoamo ra hoì i to ù âau, te faahaùti ra i to ù tino, te mea faufaa i te reira taime, eere te mea e himenehia ra, te taata hoì na na te reira himene i fatu, e tae noa atu i te feiä na rätou e haùti ra i te ùpaùpa, to ù rä hoêraa i te pehe e òre ai e noaa ia ù te faataa e, o vau änei tei ö i roto i te pehe, aore ra te pehe tei uru mai i roto ia ù. O ia atoà teie mau taiòraa, e amoamo te mau ìrava i to tätou värua i te mau faahitiraa parau e faahithia ra.

-Taramo 51, 16 Ia ora vau ia òe i te hara toto ra, e te Atua e, te Atua e ora ai au nei

-Etoto 32, 14 Ua ruri te Fatu i te ìno ta na i parau e hopoi i nià i te mau taata.

-1 Timoteo 1, 17 E Arii hau mure òre e te pohe òre, ìteä òre ia hiò, e Atua paari,

-Ruta èv 15, 12 Ua tufa iho ra o ia i te taoà na räua.

Nehenehe noa ai te parau, te vai ra te fifi o te manaò taata, ta na e manaò ra, ua au ia i te Atua. No reira te faufaa ia haamanaò-noa-hia teie reo to te päpaì taramo e parau ra 16 Ia ora vau ia òe i te hara toto ra, e te Atua e, te Atua e ora ai au nei. Parau noa ai tätou I te maitaì o te Atua Nui Tumu Tahi, ia ìte atoà tätou e, eita te taata e mono i te Atua, i te mau taime atoà rä, e hinaaro o ia i te tauturu ia òre ia rara to na mau manaò. I te reira vähi ra, aita ä o ia i haamata i te faanaho i to na manaò, ua ineine te tauturu, maoro noa ia na i te ìteraa  e 14 Ua ruri te Fatu i te ìno ta na i parau e hopoi i nià i te mau taata. Teie parau ta tätou e faahiti nei, eita teie te faahoperaa i roto i te tiàturiraa. Eiaha ia moèhia ia tätou e, i te matahurahura o teie nei ao, i te parauraa te Atua, aita ta na parau i riro mai ei reta, ei taò, ei ìrava, ei puta. Ua riro mai rä ei märamarama, ei fenua, ei räau, ei manu, ei mahana, ei fetià, ei âvaè. Te nä ô ra te paari o te Mäòhi E tarià to te mau mea atoà, to te fenua e te moana, to te mataì, to te vero, to te fafatatiri, to te püahiohio, to te ureuretiàmoana, e faaroo ; e tarià to te fetià, to te âvaè, to te rä, to te uira, to te tau mä te taiò, to te moana hauriuri, to te mau mautai, i faaroo anaè ia i te reo o te nuu atua (T. HENRY, 406).

Ia parau mai hoì o Pauro e 17 E Arii hau mure òre e te pohe òre, ìteä òre ia hiò, e Atua paari, Te haapäpü noa mai ra te reira te puaa, te räau, te fenua, te manu, te ià, no te mea ia e tarià to rätou, ua ìte rätou i te parau, no te mea no roto mai rätou i te parau. I parau ai o Ietu I te mau taata i te faaìteraa a Ruta èv, Ua ôhumu iho ra te mau Färitea te mau päpaì parau. Te ìte nei teie nei taata i te feiä rave hara, e te àmu nei i ta rätou àmuraa. Ua parau parapore atu ra o Ietu, O vai ia taata io òutou nei, hoê hänere ana mämoe, ia moè te hoê, e òre e vaiiho i te iva àhuru e iva tiàhapa i te mëtëpara ra, a haere ai a ìmi tei moè, e ia ìteä atu, E ìteä atu ra ia na, amo aè ra i nià i te täpono mä te òaòa.  

Ua tae roa tätou i te tahi fäito, aita tätou i ìte faahou e aha ta tätou e parau i nià i te Atua ia òre tätou ia faahiti i te tahi parau no roto i te fenua, te auraa, teie ta tätou e parau noa nei, eere na tätou, eere no roto i to tätou âau, mai te mea atu ra e Atua ê teie ta tätou e haamori nei. Te tiàturiraa ia o te tahi pae o tätou ua  huehue roa  i te parau o te fenua tei päpaìhia i roto i te pïpïria tei faaìte i te ora. Tätou i nä reira, aita änei tätou i haafaufaa òre i te Atua e ta na rahu. Mai te mea atu ra ia e, eita te parau a te Atua, e te mea i tupu mai no roto i ta na parau, e horoà i te ora, te päpaìraa i nià i te àpi parau tei riro mai èi puta, òre noa atu ai e märamarama i te auraa o te mea i päpaìhia, te mea ia e horoà ra i te ora. Ia faaroo tätou I te reo o teie tämaïti e naò ra e, E ta ù metua, hö mai na i ta ù ra tufaa i te taoà nei. Ua tufa iho ra o ia i te taoà na räua. Ua haaputu iho ra te tamaiti hopeà i ta na, haere atu ra i te fenua roa, pühura atu ra i ta na taoà i te haapaò òre. E pau roa aè ra, roohia iho ra taua fenua ra i te oè rahi, e àti iho ra o ia i te poìa. Täàti atu ra i te hoê taata tupu no taua fenua ra, tei tono ia na i roto i te âua e faaàmu i te puaa. Ua hiaai i te pipi i àmuhia e te puaa ia paìa, aore hoì e taata i hopoi mai i te mäa. Iho mai ra to na huru mau, ua nä ô aè ra. E rave rahi to ta ù metua tävini tärahuhia e mäa rahi ta rätou e toe te tahi pae, e te pohe nei au i te poìa. Ua täuturu te fenua e te puaa i te tämaïti no te hoì i te ùtuafare metua. Haamanaòhia atu ra te tahi reo himene e himene-noa-hia nei i roto i te mau ârearearaa, teie te himene

E tämaïti ori noa

Hoì òe na te ära

Âue te mauiui

O vau nei ra

Te metua te mihi nei

Te òto nei te tama

Te ära na te ao nei.

Hoì mai e te tama e

A hoì mai i te fenua nei e

Ua î hoì au i te mauiui e te mihi e

Nahea ra o vau nei

Vau nei te metua nei e

Tei roto ta ù tino

Te ruhiruhiäraa

Te Maitaì o te Metua e to na faaòromaì, à hoì mai i  te fenua nei, ua ìte tätou i to na maitaì. Aita e ture, aita e faanahoraa, aita e faaheporaa, o òe e to òe Atua, tirä atu ai. E roaa ä ta te taata täpuniraa i muri mai i te ture ; e moè atoà o ia i muri mai i te faanahoraa ; a tae atu ai i te faaheporaa, e ôtoheraa maitaì roa teie no te taata ei pärururaa ia na i te parauraa e, ta na i rave, eere na na i hinaaro. Aita atu ta te Atua tiaìraa ia òe maoti rä, ta òe haapäpüraa e, ua ìte ihoä òe i te mea maitaì, oia te hoì e ua ineine i te rave i te reira. I roto noa i teie parau, aita ä òe i faaìte i to òe tiàturiraa i te Atua, aita ä to òe vaha i hamama no te parau i to òe manaò, ua haapäpü ê mai na te Atua i to na tiàturiraa ia òe.

Tano maitaì ai te reo o te Fatu e parau ra e O vai ia taata io òutou nei, hoê hänere a ana mämoe, ia moè rä te hoê, e òre e vaiiho i te iva àhuru e iva tiàhapa i te mëtëpara ra, a haere a ìmi ai i tei moè ra, e ia ìteä atu? 5 E ìteä atu ra ia na, amo aè ra i nià i te täpono mä te òaòa. E ia faatano tätou i teie parau i nià i te ôpuaraa a te Atua, teie ia to na faaauraa  Eere òe tei ìmi mai ia ù, o vau rä tei ìmi atu ia òe. O vai teie òe. Te taata te reira ta ù e parau ra. E au te òe no te taata hoê, aore ra no te hoê pupu taata, te hoê nünaa. Teie parau ta te Atua, eere te mea parau hänoa, ua faaroohia mai ra, ua faaroohia mai ia; e aita ra, tirä atoà ia. E parau âfaro teie i nià i te taata, e nä ô paì ia tätou e  to ù vaha, to òe tarià. Mai te peu te parau âfaro mai ra te Atua i te taata, te tiaì atoà mai ra ia te Atua i te tahi pähonoraa âfaro ; ei pähonoraa ihoä rä. Te Atua ihoä ia te Atua, e taata hoì te taata, te faariro nei rä te Atua i te taata ei täuaro no na. Te auraa, mai te peu te parau mai ra te Atua i te taata, no te haamanaò ia i te mea ta na e tiaì ra i te taata ia rave ; e tano atoà te taata e parau i te Atua, no te faaìte i te mea ta na e tiaì ra i te Atua ia rave no na. Te mea ia tätou i parau ai e, aita e ture, aita e faanahoraa, aita e faaheporaa, no te mea aita te Atua e hinaaro ra i te tahi mea ia haere mai e faaapiapi i te auraa âpï ta na e hinaaro nei i te haamau i roto ia na e te taata o vau e o òe; o òe e o vau. E no teie auraa fätata e vai ra i teie nei i roto i te Atua e te taata, e tano ai te Atua e haamanaò mai i te taata e, 14 Ua ruri ê aè ra te Fatu i to na manaò i te ìno ta na i parau e e hopoi i nià iho i to na ra mau taata. Aita e mea toe tei òre i horoàhia i te taata ra, tei te taata ra te parau i teie nei. Ia hiò-anaè-hia, aita te Atua e nä murimuri noa nei i te taata, i te parau-noa-raa ia na i te mea e rave, i te mea të òre e rave. E tiàmäraa rahi roa teie ta te Atua e hinaaro nei i te taata ia faaòhipa atu. Te fifi rä, te mea ia e, ua maoro roa te taata i te färiiraa ia ärataìhia o ia, ia faanahohia mai te òhipa ta na e rave, ia parauhia mai o ia i te vähi ta na e haere, ia parau hoì i te parau mai tei hinaarohia ia parau o ia, e riro teie tiàmäraa i te faatupu i te manaò ôtohe i roto i to na âau. Ua moèhia änei i te taata to na parau, aore ra aita o ia e hinaaro ra e haamanaò. Te mea e tauturu i te taata i mua i teie parau, te tütonu-tämau-raa ia to na manaò, to na âau i nià i teie parau e 12 Ua tufa iho ra o ia i te taoà na räua.  I te mea ua hämani te Atua i te taata i to na huru e to na hohoà, Te parau teie e tauturu ia na i te faaìteraa i te huru mau e te hinaaro hoì o te Atua i te taata, ia hanahana to na iòa moà.

Teraì òr. Faatura.

Ruta èv 14.25-33 Peneiaè

Tāpati 8 Tetepa 2019.

Peneiaè

Taramo 90

1 Te pure a te taata o te Atua ra, a Möte. E te Fatu, o òe to mätou haapüraa, i tërä uì, i tërä uì. 2 Aore te mau mouà nei i fänau, e aore hoì te fenua e te ao atoà nei i hämanihia e òe ra, te vai ra òe, e te Atua, mai tahito mai ä e a muri noa atu. 3 O te taata nei rä, te faariro faahou nei òe ei repo, te parau ra hoì òe: A hoì, e te tamarii a te taata na. 4 Ia òe rä hoì, hoê tautani noa atu i te mätahiti e au i te mahana hoê i mahemo ra, e mai te äraraa hoê i te ruì ra. 5 Te riro nei rätou ia òe mai te riro pape puè ra, e mai te vareà taòto ra rätou. I te poìpoì ra, mai te àihere e tupu ra rätou, 6 o tei ôteu e tei tupu i te poìpoì ra, e ua ahiahi anaè ra, ua täpühia e ua ôriorio atu ra.7 Oia teie, ua pau mätou i to òe ra riri, e ua riàrià mätou i ta òe ra mäinaina. 8 Ua tuu òe i ta mätou hara i mua ia òe, e ta mätou hapa moè i roto i te märamarama o to mata ra. 9 Ua mou aè nei to mätou mau mahana i to òe ra riri, ua pau to mätou mau mätahiti mai te manaò âau e pee ra. 10 To mätou puè mahana i te oraraa nei, e hitu ia àhuru i te mätahiti, e ia tae i te vaù i te àhuru i te mätahiti i te ètaèta, e riro rä taua ètaèta ra ei rohirohi e ei taiäraa. E òre hoì e mähia motu ê atu ra, maùe atu ra mätou 11 O vai rä tei haapaò i te püai o to òe ra riri? E ta òe ra täiroiro, mai te mataù e au ia òe ra? 12 E haapii mai ia mätou i te taiò i to mätou puè mahana, ia riro to mätou âau i te haapaò maitaì.13 E färiu mai ia mätou e te Fatu: a hea ra ia? A faite mai òe i to mau tävini nei. 14 A haamauruüru vave mai òe ia mätou i to òe ra aroha, ia reàreà mätou e ia òaòa i to mätou nei puè mahana toe. 15 A faaòaòa mai ia mätou e ia fäito i te mau mahana i àti ai mätou ra, e te mau mätahiti i faaòromaì ai mätou i te ìno ra. 16 A faaìte mai i ta òe ra òhipa i to mau tävini nei, e to òe ra hanahana i ta rätou ra tamarii.17 Ia vai mai ä te here o to mätou nei Atua, o te Fatu, i nià ia mätou nei, e te òhipa a to mätou nei rima, e haamau òe, oia ia, o te òhipa a to mätou rima i rave ta òe e haapäpü.  

Māteri 8.32-36

E ao to tei faaroo i te Paari, 32 E tënä na, e faaroo mai ia ù, e te mau tamarii e, e ao hoì to te feiä e haapaò mai i ta ù nei parau. 33 E faaroo mai i te aò ia paari, eiaha roa e òhipa ê i te reira.34 E ao to te taata e faaroo mai ia ù ra, o tei ara mäite i te mau mahana atoà i te mau ùputa nö ù ra, o tei tiaì mäite i nä ùputa nö ù ra 35 Ua ìteä hoì au ia na ra, ua ìte ia te èà i te ora, e herehia mai hoì o ia e te Fatu. 36 O tei hara ê rä ia ù nei, ua hämani ìno ia i to na iho värua; e tei ôre atoà i hinaaro mai ia ù nei, ua hinaaro ia i te pohe.  

Firemona 9-17

8 E teie nei, tià noa ä ia ù i te Metia nei ia faaue hua atu ia òe i te mea au ra, 9 no te aroha rä to ù e parau mäite noa atu ai au ia òe, o Pauro taata paari hoì au, e taata no Ietu Metia i täpeàhia i te âuri fifi i teie nei. 10 Te parau mäite noa atu nei au ia òe, i ta ù tamaiti, i ta ù i fänau i ta ù täpeàraa nei, ia Ònetimo ra: 11 i te tävini faufaa òre no òe i mütaa iho ra, i teie nei rä e faufaa ia ta òe ia na, e ta ù atoà hoì; 12 o ta ù ia e faahoì atu ia òe na. E tënä na, e färii mai òe ia na o to ù ia âau mau: 13 i hinaaro hoì au i te täpeà ia na i ô nei ia ù nei, ia onohia òe ia na i te poihereraa mai ia ù, i to ù nei täpeà-raa-hia i te Èvaneria nei. 14 Aita rä vau e rave noa i tei òre i tià ia òe ra; ia riro to òe hämani maitaì no te hinaaro mau, eiaha no te tahi mea ê. 15 Peneiaè hoì i taa ê iti poto noa mai ai o ia, ia färii mai òe ia na ia pärahi mau atu. 16 Eiaha rä ei tävini, ia hau atu rä o ia i te tävini, ei taeaè here ra, ia ù nei ia, a tae atu ai hoì ia òe ra, i te Fatu nei, e te tino atoà nei hoì. 17 E tënä na, te parau na òe ia ù e e hoa, e färii mai òe ia na mai te mea e o vau iho.

Ruta èv 14.25-33

Te peeraa ia Ietu

(Mät 10,37-38)

25 E tïàa rahi tei pee haere mai ia na, e ua färiu mai ra o ia, ua parau mai ra ia rätou 26 O te taata e haere mai ia ù nei, e aore i haapae i ta na metua täne e te metua vahine e te vahine iho, e te tamarii, e te mau taeaè, e te mau tuahine, e ia na atoà iho, e òre roa o ia e tià i te pipi na ù. 27 E o të òre e hopoi i to na iho tätauro a pee mai ai ia ù, e òre ia e tià i te pipi na ù. 28 O vai ia taata io òutou nei ia ôpua i te fare e faatià, e òre e mata na i te pärahi i raro, a taiò ai i te taoà e oti ai, i te navaìraa ta na taoà. 29 O të haamau hoì o ia i te niu, e aore aè ra i oti ia na, o te nä ô hoì te feiä atoà i hiò ra i te tähitohitoraa ia na 30 I tämata iho nei teie nei taata i te faatià i te fare, e aore aè nei i oti ia na. 31 E o vai hoì ia arii ia haere e àro atu i te tahi arii, e òre e mata na i te pärahi i raro, a feruri mäite ai i te tiàraa ia na e o na tau taata hoê àhuru i te tautani, ia haafärerei atu i te tahi e haere mai e àro ia na ra, mä to na atoà ra taata e piti àhuru i te tautani? 32 E e òre e tià ra, e vaiiho ätea i te tahi a tono atu ai o ia i te veà e ani i te hau. 33 Oia atoà hoì òutou, o tei òre i faaruè i te mau mea atoà na na ra, e òre atoà o ia e riro ei pipi na ù.

Manaò.

Ia faaroo tätou i teie pure, e purehia nei e Mote maite mea ra te tupu nei teie manaò te Peneiaè, i roto i to na âau i teie mau faahitiraa parau. E te Fatu, to mätou haapüraa, i tërä uì, i tërä uì. Aore te mau mouà i fänauhia, te fenua e te ao atoà i hämanihia, te vai ra òe, e te Atua Nui Tumu Tahi, mai tahito mai ä. Te taata te faariro faahouhia nei ei repo, ma te parau a hoì, e te tamarii a te taata na. I te mea hoê tautani i te mätahiti e au i te mahana hoê i mahemo ra, e mai te äraraa hoê i te ruì ra. Te riro nei mai te riro pape puè ra, e mai te vareà taòto ra tätou. I te poìpoì ra, mai te àihere e tupu ra tätou, o tei ôteu e tei tupu i te poìpoì ra, e ua ahiahi anaè ra, ua täpühia e ua ôriorio. Mäite reira to tätou pau i te riri o te Atua, mate riàrià i te mäinaina. Ua tuuhia te hara te mau hapa moè i roto i te märamarama o to na òriò mata. Ua mou to tätou mau mahana i to riri na, ua pau to tätou mau mätahiti mai te manaò âau e pee ra. Peneiaè,  to tätou puè mahana i te oraraa nei, e hitu ia àhuru i te mätahiti, e ia tae i te vaù i te àhuru i te mätahiti i te ètaèta, e riro rä taua ètaèta ra ei rohirohi e ei taiäraa. E òre hoì e mähia motu ê atu ra, maùe atu ra tätou. Te faateiteihia nei te rähu tei türama i to tätou ätearaa i te ôpuaraa faaora a te Atua Nui Tumu Tahi, no te faatupu tämauraa i te mau haapiiraa ia au i te  mau tïtauraa e haaparuparu ra te tiàmaraa o te hoê nünaa. Tei  haaparuparu i te nünaa Mäòhi te òreraa ia e ìte faahou i te taiò i te mau parau tei faaätea ia na i to na fenua, i to na moana, e i to na reva. No reira ia faaroo tätou te haapotoraa o na taiòraa e maha,

-Taramo 90, ta mätou hara i mua ia òe, e te hapa ua moè i roto i te märamarama o to mata.

-Materi 8, 36 O tei hara ia ù nei, ua hämani ìno i to na värua; tei hinaaro ia i te pohe.  

-Firemona, 15 Peneiaè i taa ê iti poto noa o ia, ia färii mai òe ia na ia pärahi mau atu.

-Ruta èv 14, 33 Tei òre i faaruè te mau mea atoà ra, e òre o ia e riro ei pipi na ù.

E Mau taiòraa teie e horoà nei ia tätou i te puai no te ìmiraa i te Mau hinaaro e tïtauhia nei i te taata e tiàturi nei i te Atua. I mua i teie Mau tumu parau tei manaòhia e tauturu ia tätou i roto i te Mau tuatapaparaa, te horoà nei ia te reira ia tätou i te tahi raveà no te haafatataraa i pïhaìiho i te Atua. E au teie Mau tumu parau i te taura no hihi  o te hiromona, tei natinati mai te i te tahi i te tahi, ei faaìteraa i te tïtauraa e ôpuahia nei. Mea tano ra, Ia hiò maitaìhia teie Mau taiòraa ta tätaìtahi, i te mea e tupuraa ê to te tahi e tupuraa ê to te tahi. To na auraa ra èita i te hoê vahi te päpairaahia, èita atoà hoê ä tuatapaparaa. Te vahi ra e tuàti teie Mau taiòraa te mau hinaaro ia e tïtauhia nei i roto, i ta te Mau tävini o te Atua faaìteraa. Taaê noa atu ai ta te reira faaìteraa, papaìraa, te manaòraa i nià i te Atua hoê ä ia. I ù nei tätou e päpü ai e, te Atua e faaìtehia nei e teie feiä papaì te faaâpï noa ra ai te faatiàraa i roto i te tau. E Atua teie, èita e tano ia vai -iho- hia  i roto i te hoê tau, no roto ra O ia i te tau, e O ia te tau.

Taiòraa Èv. Ruta 14, 25 - 33

25 E tiàâ rahi tei pee haere mai ia na, e ua färiu mai ra ò ia, ua parau mai ra ia rätou,

26 O te taata e haere mai ia ù nei, e aore i haapae i ta na metua tane e te metua vahine e te vahine iho, e te tamarii, e te mau taeaè, e te mau tuahine, e ia na atoà iho, e òre roa ò ia e tià i te pipi na ù.

27 E o te òre e hopoi i to na iho tätauro a pee mai ai ia ù, e òre ◊a e tià i te pipi na ù.

28 O vai ◊a taata i ó òutou nei ia ôpua i te fare e faatià, e ore e mata na i te pärahi i raro, a taiò ai i te taoà e oti ai, i te navaìraa ta na taoà ?

29 o te haamau hoi ò ia i te niu, e aore aè ra i oti ia na, o te na ò hoì te feiä atoà i hiò ra i te tähitohitoraa ia na,

30 I tämata iho nei teie nei taata i te faatià i te fare, e aore aè nei i oti ia na.

31 E o vai hoì ia arii ia haere e aro atu i te tahi arii, e òre e mata na i te pärahi i raro, a feruri maite ai i te tiàraa ia na e ò na tau taata hoê àhuru i te tautani, ia faafarerei atu i te tahi e haere mai e àro ia na ra, ma to na atoà ra taata e piti àhuru i te tautani ?

32 E  òre e tià ra, e vaiiho ateä i te tahi a tono atu ai ò ia i te veà e ani i te hau.

33 Oia atoà hoì òutou, o tei òre i faaruè i te mau mea atoà na na ra, e òre atoà ò ia e riro ei pipi na ù.

Te Èv. a Ruta i te pene 14, i te ìrava 25 e tae i te 33 e rave rahi taime to Ietu faahitiraa i te parau È ÒRE. E täpaò faaìte ia te hinaaro nei o Ietu e tuu i te tahi parau i mua i ta na pipi no te faufaa o te mau òhipa e tupu i teie mau tau e a muri atu.

Ia parau o Ietu e haapae i tera e tera, e tae roa i nià i ta te mau tävini i here, te haamanaò noa mai ra o Ietu i te puai no te Aroha e te here o te Atua i te taata. Ua hinaaro anaè te tävini i te pee ia Ietu, ia ìte ia te tävini i te here i te mau hinaaro o te Atua, mai ta na e here nei to na fetii, ta na mau tamarii, e tae noa atu ta na here. Ia faahiti o Ietu i te parau no te tätauro, ia noaa i te mau tävini i te hiò i te tätauro, mai te hoê täpura òhipa e tïtauhia nei ia rätou ia faatupu no te maitaì o te oraraa o te feiä e tiàturi nei i te ora noo mai i te Atua ra. Ia tuu o Ietu teie manaò i mua i ta na mau pipi, e pärahi e mätutu, te horoà nei o Ietu i te hoê faaäraraa i to na mau tävini ia faatupu i te hoê ôpuaraa no te patu, no te àroraa ia noaa ia i te mätutu e oti anei, e upootià anei, no te hiòraa i te mau vahi puai, paruru, o te ôpuaraa. Hau atu i te reira ia tupu maite te âparauraa i roto i te mau taata atoà e ö i roto i teie mau faanahoraa. I reira e ìtehia ai te tupu-maitaì-raa te hinaaro o te Atua i to na mau tävini. Noa atu ä ia te mau tävini o te Atua aore i ìte i te mauiui o te pohe tätauro, mai to te Metia e te mau pipi, te ìte nei ra rätou i te haapaò i te èà ta te Metia i tuu i mua ia rätou. Te tïtau nei te Metia i to na mau tävini, ia haapaò i ta na mau faaueraa, òia hoì,

1) Ia hau atu te here o te tävini i te mau òhipa a te Atua.

2) e ìmi tämau i te hau i roto i te oraraa.

3) e pärahi e mätutu.

I mua i teie mau parau te ìte nei tätou i te tuhaa òhipa o te vai noa ra, tei teie vahi te tätauro i te tiaìraa mai i to na mau tävini. I te mea e rave rahi to te mau tävini here i te tahi atu mau taata, mau ànimara, mau òhipa e te vai atu ra. No Ietu àita i navaì i te mea te taata, te ànimara, te òhipa, o te Atua te tumu, e ua here mau te Atua ia tätou, te tïtau mai nei ra o Ietu i to na mau tävini ia hau atu i te here. Peneiaè, to òe fenua, to òe nünaa, to òe Atua, e e nä fea tätou. Ua tähemo änei o na i to na parau, ua faaruè änei. Eita tätou e parau i teie nei e, oia, te manaò matamua ia hiò-anaè-hia te taata e parau i terä huru parau, ua ineine i te faaruè i ta na, te huna i to na parau, to na reo, to na nünaa, to na hiroà. Na te tupuraa paha o te òhipa e haapäpü mai ia tätou e, mea taaê rii, te vai ra ihoä te manaò matamua ta te parau e höroà ia tätou i te manaò e, ua faaruè tätou. Te tahi, ua hoì, te auraa ua färii i te hoì faahou i roto i ta na. Te parau nei tätou, e haere au nä muri iho ia Ietu. Terä huru haereraa, haamanaòhia atu ra, te tahi mau òhipa tei tupu i ô nei io tätou, ua haere atoà mai te tahi mau taata räpae. Rave na tätou i roto i te âàmu o terä mau taata, tei haere mai na nià i terä pahï o Bounty, ua haru rätou te faatereraa o te pahï, e hinaaro rätou e haere i te vähi ê, no to rätou tüàti-òre i te faatereraa a te taata i faatere mai i te pahï. E hia mäòhi, te täne e te vähine, ôuà i nià i te pahï, aita i uiui e, te haere ra i hea, e hoì faahou mai änei teie pahi, ua hoì mai, ua haere. E tano atoà rä tätou e uiui, i roto paì i terä haereraa, terä feiä âpï tei âpee i terä mau ìhitai, no te mea änei e manaò faaruè to rätou, to rätou fenua, to rätou âià, te mau metua, aore ra e manaò taureàreà, haere e mätaìtaì i te fenua. E tano atoà te manaò e uiui. Ia manaò anaè rä vau, terä feiä âpï tei âpee i terä mau ìhitai, eere no to rätou fiu to rätou fenua,e te au òre i ta rätou peu, to rätou hiroà. No te hinaaro ra i te ìte te mau faufaa o te rähu a te Atua Nui Tumu Tahi e vai ra i räro i te moana nui a hiva. 33 Oia atoà hoì òutou, o tei òre i faaruè i te mau mea atoà na na ra, e òre atoà o ia e riro ei pipi na ù.

Teraì òr. Faatura.

Ruta èv 14.1-14 Täuahi

Tāpati 1 no Tetepa 2019.

ÔROÀ

Täuahi

Taramo 68

1 Na te Mënätehe. Taramo, e himene na Tävita. 2 Ia tià mai te Atua, e ia haapurara i to na mau ènemi E te feiä i riri ia na ra, e maùe ê atu ia i mua i to na mata 3 Mai te auauahi e pee ra, ia pee atoà rätou Mai te täpau e tahe i te auahi ra, ia nä reira to te paieti-òre pohe i te aro o te Atua. 4 Ia òaòa rä te feiä parau tià e ia ôuàuà noa i te aro o te Atua, e ia rahi to rätou òaòa 5 E himene i te Atua, e himene haamaitaì i to na iòa, e faateitei i tei horo nä roto i te reva ra o Te Fatu to na iòa. E ôuàuà òutou i mua i ta na aro. 6 O te metua o te mau ôtare, e te haavä o te mau ìvi, o te Atua ia i to na ra pärahiraa moà. 7 E tuu hoì te Atua i te pütii ia pärahi i to na ra ùtuafare, e tei täpeàhia i te fifi âuri ra, na na ia e tätara. Âreà tei haùti ra, e pärahi ia i te fenua marô. 8 E te Atua e, ia òe i haere nä mua i to òe ra mau taata, ia òe i haere nä roto i te mëtëpara ra, Tera. 9 ua âueue iho ra te fenua, e ua tärapape hoì te mau raì i te aro o te Atua, o Tinai atoà ra i te aro o te Atua, te Atua o Ìteraèra. 10 Ua manii mai ra ia òe te ua rahi, e te Atua e, e te tufaa rohirohi na òe ra, ua turuhia ia e òe. 11 Ua pärahi hoì to òe ra pupu taata i rotopü i te reira, no to òe hämani maitaì i faanahonaho ai òe, e te Atua, i ta te taata rii. 12 Ua tuu mai te Fatu i te parau, e e pupu rahi te feiä i faaìte ra.13 Te mau arii o te mau nuu ra, ua maùe, ua maùe, e te mau fëtii i te ùtuafare ra, te tufa ra i te taoà pau. 14 Taòto noa iho ä òutou i te pae auahi ra E riro òutou mai te pererau ûupa i täpoìhia i te ârio, e tei faaìravarava-haere-hia i te àuro ra. 15 Ia purara atu ra taua mau arii ra i te Püaihope i reira ra, ua riro ia i te ùoùo mai te hiona i Taramona. 16 E au te mouà o te Atua i te mouà ra o Pätäna; e mouà teitei rahi mai te mouà ra o Pätäna.17 E aha òutou i feìi ai, e te mau mouà teitei na, i te mouà ta te Atua i hinaaro ei pärahiraa, e na te Fatu e pärahi i reira e a muri noa atu 18 Te mau pereoo a te Atua, e piti àhuru tautani i te taauraa i te merahi maitataì, tei roto te Fatu ia rätou, i roto i te vähi moà ra mai tei Tinai ra. 19 Ua reva òe i nià, ua arataì òe i te tïtï e rave rahi, e ua tufa òe i te taoà na te taata ra, e i roto atoà i te feiä i haùti atoà ra, ia pärahi te Atua ra, o Te Fatu, i roto ia rätou. 20 Ia haamaitaìhia te Fatu, o tei tauturu mai ia tätou i tërä mahana, i tërä mahana O taua Atua nei to tätou ora. Tera. 21 O to mätou nei Atua, o te Atua ia e ora ai no te ATUA hoì, no te Fatu, i ora ai tätou i te mau pohe nei. 22 Ua täìri rä te Atua i te upoo o to na mau ènemi, e te tupuaì upoo o te feiä i mau märô i ta rätou hara. 23 Ua parau hoì te Fatu E arataì mai au ia rätou mai Pätäna mai, e e arataì hoì au ia rätou mai tähatai mai ra mai te moana, 24 ia uhi òe i to âvae i roto i te toto o to mau ènemi, e ia miti te arero o to mau ùrï ra i te reira. 25 To òe ra mau haereà, e te Atua, te hiòhia nei e te taata te haereà o taù Atua, o taù arii i te vähi moà ra 26 Ua nä mua te mau himene, muri iho te feiä i faaòto i te mau peu i rotopü i te mau pötii i te faaòtoraa i te tofe ra. 27 E haamaitaì i te Atua i roto i te âmuiraa, te fanauà a Ìteraèra tei haamaitaì i te Fatu. 28 Teie hoì o Peniamina, taata âpï ra, o to rätou ia arataì, te mau arii o Iüta, e to rätou atoà ra pupu, te mau arii o Tepuruna, te mau arii o Nafatari. 29 Ua faaue to Atua i to òe ra püai, e haapäpü na, e te Atua, i ta òe i rave no mätou nei 30 E no to òe ra nao i Ierutarëma, e hopoi mai ai te mau arii ra i te taoà na òe. 31 E aò atu òe i te taehae o te uru âèho ra, te âmuiraa o te puaatoro ra, e te mau puaatoro âpï o te mau taata ra, a auraro mäite ai rätou mä te ârio i te rima e haapurara òe i te feiä i hinaaro i te tamaì. 32 E tae mai te feiä rarahi no Àifiti mai, e rü mäite hoì Tuta i te horoà i ta na rima i te Atua. Atua 33 E te mau pätireia o te ao nei, e himene òutou i te Atua, e himene ei haamaitaì i te Fatu, Tera. 34 ia na i tei horo nä nià i te raì teitei tahito ra. Inaha, haruru iho ra ta na reo rahi i te pätiri 35 E tuu atu i te püai i te Atua ra, tei nià ia Ìteraèra to na mana, e tei te mau raì ra to na püai. 36 Mataùtaù-rahi-hia to òe e te Atua, i to òe vähi moà ra, o te Atua o Ìteraèra o te Fatu O ia tei horoà mai i te itoito e te püai i to na ra taata. Ia haamaitaìhia te Atua

Māteri 4.1-9

E taoà maitaì te paari 1 E faaroo mai, e te mau tamarii ra, i te aò a to metua täne; e haapaò mäite mai ia noaa ia òutou te ìte. 2 O te parau maitaì hoì tä ù e faaìte atu ia òutou eiaha hoì òutou e faaruè i ta ù nei parau. 3 E tamaiti pöpouhia hoì au e to ù ra metua täne, e te here ôtahi mäite i te mata o to ù ra metua vahine. 4 E ua haapii mai o ia ia ù, e ua nä ô mai ra, E täpeà mäite to âau i ta ù nei parau; e haapaò i ta ù e parau atu, e ora hoì òe i reira. 5 E tïtau te paari ia noaa, e te haapaò maitaì ia noaa atoà eiaha e àramöina, eiaha e färiu-ê i te parau o ta ù vaha nei. 6 Eiaha e faaruè ia na, e nä na e tiaì ia òe; ia hinaaro mäite òe ia na, nä na òe e faaora.7 O te paari ä te mea maitaì; e tïtau i te paari; e te mau mea atoà e noaa ia òe ra e tïtau ä te haapaò maitaì. 8 E faateitei òe ia na, e nä na e faateitei ia òe; e täuahi òe ia na, e nä na e faatura atu ia òe.9 Na na e höroà mai i te täupoo nehenehe no to upoo na; e te toröna hanahana tä na e tuu mai i nià ia òe ra.

Hēpera 12.18-24

18 Eere hoì i te mouà e tiàià atu ta òutou i haere mai na, e te auahi i ura ra, eere hoì i te ata èreere, e te pöuri, e te vero, 19 e te òto pü ra, e te haruru o te parau i ta te feiä i faaroo ra i parau e, eiaha roa ia parau e parau-faahou-hia mai ia rätou ra 20 aita atu ra hoì i tià ia rätou ia haamahu i tei faaìtehia mai ra E ia faatiàià noa atu te hoê puaa i taua mouà ra, e tüìhia ia i te ôfaì, e e pätia-pupu-roa-hia ia i te hoto ra. 21 E no te mea mataù rahi tei faaìtehia mai ra, ua parau iho ra Möte Mataù rahi to ù e te rürütaina. 22 I te mouà rä o Tiona ta òutou e haere mai nei, e te ôire o te Atua ora ra, Ierutarëma i te ao ra, e te pupu merahi atoà eita e hope ia taiò ra, 23 i te taìrururaa rahi ra i te Ètärëtia feiä mätahiapo ra, tei päpaìhia te iòa i te ao ra, e te Atua hoì te haavä i te taata atoà ra, e te mau värua o te feiä parau tià i haamaitaì-roa-hia ra, 24 e ia Ietu hoì i te ärai i te faufaa âpï ra, e te toto pïpï ra, e parau maitaì rahi to te reira i to te toto o Àpera ra.

Ruta èv 14.1-14

Te faaora-raa-hia te hoê taata i pohehia i te höpue

1 E tae aè ra i te hoê täpati, haere atu ra o ia i roto i te fare o te hoê Färitea taata mana e àmu i te mäa, te hiòpoà mäite mai ra rätou ia na. 2 E inaha, tei mua i ta na aro te hoê taata i pohe i te höpue. 3 Ua parau atu ra Ietu i te mau haapii ture e te mau Färitea, nä ô atu ra E faaorahia änei te maì i te täpati? 4 Aita rä rätou i parau mai, ua rave atu ra o ia i te rima o taua taata ra, faaora atu ra, e tuu noa atu ra ia haere na. 5 Ua parau faahou atu ra o ia ia rätou, nä ô atu ra O vai to òutou e òre e ùme mai i nià i ta na âtini e ta na puaatoro ia maìri i roto i te âpoo i te mahana täpati? 6 Aita atu ra e tià ia rätou ia mötoì mai i taua parau ra. Te mäìtiraa i te pärahiraa 7 E ia hiò atu o ia i taua mau manihini ra i te rü ia noaa te vähi teitei i te àmuraa mäa ra, ua parau atu ra o ia i teie nei parapore, nä ô atu ra 8 Ia parauhia mai òe e haere i te ôroà faaipoiporaa, eiaha e haere i te vähi teitei i te àmuraa mäa ra, o te parau-atoà-hia te hoê taata teitei atu; 9 o te haere atu hoì taua taata i parau ia òrua ra, o te parau atu ia òe e A tuu mai i tënä na vähi i teie nei taata, o te haere haamä noa atu hoì òe i te vähi haèhaa. 10 Ia parauhia rä òe ra, e haere noa atu i te vähi haèhaa, e ia tae mai tei parau ia òe ra, ia nä ô mai o ia ia òe e E hoa ìno, a haere atu òe i nià atu. Tura atu ra òe i reira i mua i te aro o taua feiä atoà i te àmuraa mäa ra. 11 O tei faateitei hoì ia na iho ra, e faahaèhaahia ia; e o tei faahaèhaa ia na iho ra, e faateiteihia ia. 12 Ua parau atu ra o ia i taua taata i parau mai ia na ra. Ia faatupu òe i te àmuraa mäa avatea e te àmuraa ahiahi, eiaha e parau atu i to mau hoa, e to mau taeaè, e to fëtii e te feiä mana taata tupu ra; o te parau atoà mai hoì rätou ia òe, o te tähoo mai rätou ia òe. 13 Ia faatupu rä òe i te ôroà àmuraa mäa, o te taata rii të tii atu, te anapero, te piriòì, e te matapö. 14 E e ao ia to òe i reira aita hoì a rätou ia faautuà mai ia òe, e utuàhia mai hoì òe ia tae i te tiàfaahouraa o te feiä parau tià ra.

Manaò.

Taramo 68, 12 Ua tuu mai te Fatu i te parau, e pupu rahi te feiä i faaìte ra.

Māteri 4. 8 E faateitei ia na, e täuahi ia na, e nä na e faatura atu ia òe.

Hēpera 12, 23 Te taìrururaa te Ètärëtia, tei päpaìhia te iòa e te Atua te haavä, te mau värua o te feiä parau tià i haamaitaì-roa-hia ra,

Ruta èv 14. 5 O vai to òutou e òre e ùme mai i nià i ta na âtini e ta na puaatoro ia maìri i roto i te âpoo i te mahana täpati?

Te taiòraa ta tätou e farerei nei i teie hora paieti, e parau ia no te parapore no te faahaèhaa e te faateitei. Ua tupu ia teie parau mai roto mai  i te hoê ôroà àmuraa maa, tei faanahohia i muri aè i te haamoriraa i te Atua i te mahana tapati. Peu Àti Iuta teie ia ôpani ta rätou pureraa e faatupu te tahi mau taata i te àmuraa maa ma te tïtau manihini i te taata atoà ia àmui no te faaite i to rätou mauruüru i te òhipa i tupu i te taime haamoriraa, tei haamata i te mahana pae ahiahi no te àvari i te mahana maa ahiahi oia hoi te tapati Âti Iuta. No reira te mau manihini i haere rü ai i te vahi maitataì te maa, no te poia, e aore ra ia àmu rätou i te maa ma te òre e haapeàpeàhia mai e te tahi pae.

Ei tuatapaparaa.

Ietu i roto i ta tätou parau Èvaneria a Ruta i te pene 14 i te ìrava 1 i te vai mätamua, te ìrava 7 e tae i te ìrava 14, tei roto ia O ia i te fare no te hoê taata färitea, i te àmuraa i te maa. Eita ra O ia anaè, te mau papaì ture tei reira atoà, e te mau manihini. E mahana tapati teie, i reira e rave rahi te färitea, te mau papaì ture, te hiòpoà nei i te taime a tomo ai o Ietu i roto i te fare no taua färitea ra. Ietu i ropu i teie rahiraa taata, tei faatura i te fatu ùtuafare, ma te hiò atoà i te òhipa e tupu ra. Te tahi pae no te mau taata tiàraa i roto i te faaroo Âti Iuta, mai tei matauhia ia farerei rätou ia Ietu, te ui nei ia noaa te faahaparaa atu ia na. Ta rätou hiòraa ia Ietu, mai te hoê ènemira ia te huru. No te noaa òre ia rätou te faahaparaa i nià i te parau no te tapati, te vaiiho nei rätou ia Ietu ia tämaa hau noa e ta na mau pipi. Aita ra o Ietu e haapaò rahi nei te huru o te taata ta täìtahi, e te huru no te maa. Ta Ietu ra e haapaò nei te huru ia no te faanahoraa e vai nei no te huru fäito taata, te vai nei mea naho to rätou faaearaa, te vahi teitei, e te vahi haehaa. Te hiòraa a Ietu i teie huru faanahoraa, aita hoê aè faahaparaa, aita atoà hoê haaväraa, ta na ra e hinaaro nei e faaära, eiaha e rü i te pärahi vave noa i te vahi te faataahia no vëtahi ê, ia tiaì ra i te fatu o te ôroà ia faanaho, tera vahi ra no tera ia pupu taata, tera vahi ra no tera ia .Te hiòraa a Ietu i ù nei, ia tià i te taata ia pärahi i te vahi, i faataahia no te reira taata. I faatiàhia ai teie parapore no te vahi teitei, e no te vahi vahi haehaa. I roto i teie parapore te faamanaò nei o Ietu i te hoê parau ta na iho i faaìte e, I haere mai nei te Tamaiti a te taata eiaha ia tävinihia ei tävini ra, e no te horoà i te ora no te mau taata e rave rahi e haapäpüraa teie na Ietu, no te horoà i te hoê haapiiraa i te mau Faritea, e i te mau papaì ture, eiaha ia ìmi noa i te mau parahiraa i te vahi teitei, e ìmi ra na mua roa i te aroha o te Atua ia noaa. E manaò hohonu roa teie ta Ietu e faaite nei ia tae i te haaväraa hopeà, e faahaèhaahia e te Atua te feia teòteò, e faateiteihia e te Atua te feia tei ìte i to rätou haehaa. Oia hoì i mua i te aro  o te ao nei mea teitei, i mua ra i te aro o te Atua mea haehaa ia. Te tïtauraa ra ta te parapore e tïtau nei, ia fäì ia te mau taata e rave rahi i  mua i te aro o te Atua i te mau mahana atoà, ia noaa te puai i te taata faaroo na roto i te Värua Moà, i te mea te reira anaè te mauhia e au i te Maru Metia no te àroraa i te teòteò, ia tià i te taata ia tävini na roto i te haehaa i te Atua e to na taata tupu.  I haamanaò ai o Ietu i te parau no te feia e ere nei i teie tïtauraa, no te ôroà tämäaraa, te anapero, te piriòì e te matapö, aita ia e haapaòhia nei, mai te mea ra eita rätou i te taata, e aore e fäito ê to teie mau taata i mua i te aro no te tahi pae, area ra i mua i te aro o Ietu eita ia, e mau taata ra tei ere i te mau maitai faahiahia atu e faanaòhia ra. Te utuà ra e noaa i te feia tei òre i maìti i te huru o te taata no te hoê  ôroà, o te tiàfaahouraa ia o te feia parau tia. Mai teie ta Pauro e faaìte nei, 23 i te taìrururaa rahi ra i te Ètärëtia feiä mätahiapo ra, tei päpaìhia te iòa i te ao ra, e te Atua hoì te haavä i te taata atoà ra, e te mau värua o te feiä parau tià i haamaitaì-roa-hia ra, E ia hio atu o ia i taua mau manihini ra i te rü, ia noaa te vahi teitei i te àmuraa maa ra. Te mata o Ietu i teie taime, e mata ia no te hoê metua ùtuafare tei hiò i te mau òhipa ta te mau tamarii e rave ra. Te vai nei hoi te haapaò ra te faanahoraa, e te vai atoà nei, tei ore e haapaò ra, te pärahi atu ra te tahi i nià i to te tahi parahiraa, e te tahi i nià i to te tahi, te vai nei te maìti ra i te vahi rahi aè te maa, e te nehenehe hoi, te vai ra ia te parau nei eita no òe te reira parahiraa no ù tera to òe tera ia, e te vai atu ra…… E te mata o Ietu i nià i te feia e rü nei, mai te mea ra e poia i te rahi to rätou, tei ore i tiaì i te faanahoraa a te fatu no te ôroà , te rü nei i te mau vahi maitai, ma te faatura òre i te tahi. I roto i te hiòraa a Ietu i teie mau manihini , e manihini ìte òre ia i te faatura. E nahea ra ia? Ia ìte, te taata ta täìtahi ia na teihea roa o ia i te tiàraa, tei roto anei i tera pupu manihini teitei , e aore ra i tera pupu manihini haehaa. Ia ìte tätou teihea roa tätou i te tiàraa i reira tätou e riro ai ei hoa no Ietu. Aita o Ietu e faahapa nei i te feia teitei, ia ìte ra te feia teitei no vai rätou i teitei ai. Oia atoà i te feia haehaa. Ia faaroo tätou teie reo to te Materi e naò ra e, 8 E faateitei òe ia na, e nä na e faateitei ia òe; e täuahi òe ia na, e nä na e faatura atu ia òe.

Teraì. Òr Faatura.

Ruta èv 13.22-30 Ïti

Tāpati 25 Âtete 2019.

Ïti

Taramo 117

1 E haamaitaì i te Fatu, e te mau nünaa e, e faateitei ia na, e te mau taata atoà na. 2 Hämani maitaì rahi to na ia tätou nei, e te parau mau a te Fatu, e tià ia i te vai-mäite-raa. Hareruia

Ìtaia 66, 18-21

18 Ua ìte hoì au i ta rätou mau parau e rave, e ta rätou i ôpua ra e e riro hoì au i te haaputuputu atoà mai i te mau fenua atoà e te mau reo atoà; e haere mai hoì rätou, e ìte rätou i to ù ra hanahana. 19 E tuu atu vau i te täpaò ia rätou; e te feiä i ora mai ra, ta ù ia e tono i te mau fenua ra: i Taretita, i Pura, i Ruta, o tei faafefe i te fana; i Tüpara hoì, e i Iävana, nä fenua roa ra; i te feiä aore roa i faaroo i ta ù iòa, e aore roa i ìte i to ù ra hanahana e nä rätou e faaìte i to ù ra hanahana i roto i te mau êtene. 20 E nä rätou e hopoi i to òutou mau taeaè atoà, no te mau fenua atoà, ei tütia nä te Fatu; nä nià i te mau puaahorofenua, te mau pereoo ra, e te mau tepa; e te mau fërati, e te mau petari ra; i ta ù mouà moà ra ia Ierutarëma, te parau mai ra te Fatu, mai te tamarii a Ìteraèra i hopoi mai i te tütia, i roto i te färii viivii òre, i te fare o te Fatu ra. 21 O to rätou ta ù e rave, ei tahuà, ei âti-Revi, te parau mai ra te Fatu.

Hēpera 12.5-13

5 E ua moè änei ia òutou te aò i aòhia mai ai òutou mai te mea e, e tamarii ra E ta ù tamaiti, eiaha òe e haafaufaa òre i te aò a te Fatu nei, eiaha hoì ia pau te aho ia faahapahia mai òe e ana ra. 6 O ta te Fatu e here ra, o ta na ia e aò mai, e e papaì ä o ia i te mau tamarii atoà ta na e ìte mai ra. 7 Te aòhia mai na òutou, mai te rave a te metua i te tamarii ra ta te Atua rave ia òutou. O vai hoì ia tamaiti aore i aòhia e te metua ra? 8 Aore òutou i aòhia i te aò i te tamarii atoà ra, na te faaturi ia òutou, eere i te tamarii mau. 9 E e metua hoì to tätou to te tino nei, o tei aò mai ia tätou, e ua faaïti hoì tätou, eiaha ia rahi atu to tätou auraro i te Metua o te värua nei, e ia ora atu? 10 I aò mai hoì rätou ia tätou i te reira ra puè mahana aore reà ra, no to rätou iho ia hinaaro, âreà o ia ia faufaahia tätou, ia noaa atoà ia tätou to na ra maitaì. 11Aita roa hoì e aò e riro ei mea òaòa i reira ra, e mea òto rä; âreà i muri aè, o te maitaì ra ia o te parau tià të tupu i taua aò ra, i te feiä i haamätarohia i te reira. Faaitoitoraa e faaararaa 12 E tënä na, e âfaì na i nä rima i faatautauhia i raro ra i nià, e e faaètaèta i te turi paruparu ra; 13 e haamanina hoì i te èà o to òutou âvae, ia òre te piriòì ra ia maòìa roa, ia faaorahia rä

Ruta èv 13.22-30

Te ùputa pirihaò

(Mät 7,13-14; 21-23)

22 Haere atu ra o ia i Ierutarëma nä roto i te mau ôire e te mau ôire rii i te haapii-haere-raa atu. 23 Ua parau mai ra te hoê taata ia na E te Fatu, e iti änei te ora 24 Ua parau atu ra o ia ia rätou E faaitoito hua i te tomo nä te ùputa pirihaò e faaìte atu hoì au ia òutou, e rave rahi të tämata noa i te tomo i reira, e e òre roa e ö. 25 Ua tià anaè hoì te taata ùtuafare i nià, e ua haamau i te ùputa, e ua tià mai òutou i räpaeàu mai, pätötö mai ai i te ùputa, a nä ô mai ai ra e, E te Fatu, e te Fatu, ìriti aè na ia mätou. E riro o ia i te nä ô mai ia òutou Aore au i ìte ia òutou e to òutou ra vähi 26 Ei reira òutou e parau mai ai e I àmu na hoì mätou e inu na hoì i mua i to aro, e i haapii na hoì òe i te mau aroä io mätou ra. 27 E parau atu ä o ia Te parau atu nei au ia òutou, aore au i ìte ia òutou e to òutou na vähi, ia ätea ê atu òutou, e te mau rave parau ìno. 28 O te òto iho ra e te àuàuraa niho i reira ra, ia hiò òutou ia Âperahäma, e ia Ìtaata, e ia Iatöpa, e te mau perofeta atoà tei roto i te Pätireia o te Atua, e höparahia òutou iho i räpaeàu; 29 e tae mai ä to te hitià-o-te-rä, e to te tooà-o-te-rä; to àpatoèrau, e to àpatoà, e e riro ia ei manihini i te Pätireia o te Atua. 30 E inaha, e riro to muri ra no mua, e to mua ra no muri.

Manaò.

Maite mea ra te tïtau nei na taiòraa e mäha ia tätou ia ìte faahou i te mau täpaò, tei haapäpü i te parau no te ora ia tae mai, mai te hitià-o-te-rä, i tooà-o-te-rä; to àpatoèrau, e to àpatoà, e e riro ia ei manihini i te Pätireia o te Atua. Ia au i te haapotoraa o te mau parau,

-Taramo 117, 2 Hämani maitaì, te parau mau a te Fatu, e tià i te vai-mäite-raa. Hareruia

-Ìtaia 66, 19 E tuu vau i te täpaò e te feiä i ora, ta ù ia e tono i te mau fenua ra.

-Hēpera 12, 7 O vai hoì ia tamaiti aore i aòhia e te metua ra.

-Ruta èv 13, 23 E te Fatu, e iti änei te ora.

E au ra ia hiòhia teie mau parau, te faaìte-noa-hia mai ra te vähi i reira te Värua o te Atua e òhipa ai. Te òhipa mätamua hoì ta te Atua i rave, te reira atoà rä te parau mätamua ta na i parau, te ìritiraa ia i te ùputa o te märamarama, te parau hoì tei faaìte mai e, te vai ra te Atua. Te auraa, no te mea i parau te Atua, i ìtehia ai e, te vai ra te Atua, e te tüàti noa ra hoì te parau o te Atua i te parau o te märamarama. Aita rä teie märamarama e türama noa ra i te ano o te fenua, ua faaìte atoà mai rä i te ïti i te tiaìraa i te parau e matara ai te ùputa o te ora ta na e mau ra. No teie faufaa hoê roa ta te ora e mau ra, i haamau ai te Atua i ta na ôpuaraa faaora i nià i te ùputa. Te märamarama ra ia tätou e, ia parau te Atua e 19 E tuu atu vau i te täpaò ia rätou; e te feiä i ora mai ra, ta ù ia e tono i te mau fenua ra Te Vai nei au o vau e Vai nei, te faaìte noa ra te ora e, oia mau, te vai mau ra, inaha te faahoì noa ra o ia i te hanahana i te tumu o te hanahana ra. O vai hoì të tano e parau i te parau o te Atua mai te faaroo-òre-hia te hoê reo, o vai të tono e faaìte e, te vai ra te Atua, mai te òre ta na parau e faaroohia mai mäori rä, te ora e ïti änei. Mai te peu te fäì nei te reo o te päpaì taramo e, E haamaitaì i te Fatu, e te mau nünaa e, e faateitei ia na, e te mau taata atoà na. 2 Hämani maitaì rahi to na ia tätou nei, e te parau mau a te Fatu, e tià ia i te vai-mäite-raa. Hareruia Te vähi rä e faateiteihia ra, te mea ia e, te vai-mäite-raa te ôpuaraa faaora a te Atua, ta na atoà te parau i iti roa i te haamanaòhia i roto i te faahanahanaraa i te Atua, e inaha, te fenua, te vähi ia ta te ora i färii ei faatupuraa i te hinaaro o te Atua, nä reira atoà hoì te hämani maitaì. I te öraa mai te aò i roto i ta tätou parau, te taime atoà ia i ìtehia ai te fäìraa hanahana a te aò. E ua tae ihoä paha i te tau e fäì ai tätou i te maitaì rahi ta te aò e faaìte ra te auraa ra, e faaitoito ia tätou i te parau-faahou-raa i te òhipa rahi ta te ora i rave mai no tätou e no te Atua, i te faahiti-faahou-raa i to na parau, a nä ô atu ai tätou e 7 Te aòhia mai na òutou, mai te rave a te metua i te tamarii ra ta te Atua rave ia òutou. O vai hoì ia tamaiti aore i aòhia e te metua ra ia au i te huru o te Atua no na te parau ta na e faaìte noa ra. E taoà ora te aò Ia faaroo tätou i te aò, e parau e haapäpü ra i to na püraa mai i te ao nei, mai te parau e ìte ra i te haamataraa o te märamarama, ua riro rä te aò ei tumu no te ora te mau mea atoà ta te parau i faatupu, oia hoì te mau mea i nä roto mai i te parau a te Atua, eita atoà to rätou ora e tano ia faataa-ê-hia i to te aò. I roto i te tuhaa ta tätou e fätata nei i te tuatäpapa, e hiò mai tätou i te mau taò e haapäpü ra e, e taoà ora e ïti änei, e te auraa o te reira ora no te taata. Ia hiò tätou i te hoê räau tei î te mau âmaa i te rauère, tei tiarehia hoì, e tei tauperetau haere noa te mau âmaa i te teiaha o te mäa, te parau nei tätou i te reira räau e, te ora ra ua ïti änei . Te auraa, te ïti ra ihoä te täpaò e ìtehia ai te tupuraa o taua ora ra, e te tupu hoì, e parau ia no te tahi mea e haere i te rahi e te âanoraa. Aita atu rä paha e vähi òhie roa aè no tätou i te märamaramaraa i te parau o te tupuraa o te ora maoti rä, i nià ia tätou iho. No reira, ia ìte tätou i te hoê taata i te vai-noa-raa mai te haùtiùti òre, e mai te huti òre i te aho, e riro tätou i te manaò e, ua pohe paha ia taata. Areà ia tiàtià te reira taata, ia hahaere, ia paraparau, ia àmuàmu hoì i te mäa, ua riro te reira ei täpaò haapäpü ia tätou i te ora e òhipa ra i roto ia na. Te auraa, no te mea te vai ra te ora aita ra i ïti, i parauhia ai to te haùtiùti e te maniania ua rau to na huru tupuraa. Ua ìte tätou e, aita atu ta te taata e räveà, aita atu e moihaa haapäpüraa e te faaìteraa hoì i te mea ta na i märamarama maoti rä, te nä rotoraa i to na iho parau, oia te parau o te taata, e te parau a te taata. Te nä reira nei te taata i te parauraa i te parau o te Atua te mea atoà rä te reira ta Ietu i haapäpü mai i te nä ôraa e 29 e tae mai ä to te hitià-o-te-rä, e to te tooà-o-te-rä; to àpatoèrau, e to àpatoà, e e riro ia ei manihini i te Pätireia o te Atua. 30 E inaha, e riro to muri ra no mua, e to mua ra no muri. No reira, ia parau tätou i te parau o te ora, aita atu ta tätou e räveà maoti rä, te raveraa i te mau parau i mätauhia no te taata, e te faaòhiparaa atu i nià i te ora. Tätou rä i nä reira ai, eere ia no te huri noa i to tätou manaò, ia riro atoà aè ei parau no te ora no te haamanaòraa tätou e, te ère ra o ia i te reira maitaì. Eere roa atu. Nä roto rä i te reira faanahoraa, te ìte atoà atu ra tätou i roto i te ora i te manaò e vai ra i roto ia tätou ia au i teie uiraa 23 Ua parau mai ra te hoê taata ia na E te Fatu, e iti änei te ora, Ia hiòhia te manaò o te taata i teie mahana, te haapiiraa, te mau faanahoraa atoà ia e ravehia no te faaòhieraa i te taata i te märamaramaraa i te tahi òhipa, aore ra te ìteraa i te rave i te tahi òhipa. Areà ia rave tätou i te arataìraa a te reo, te haapiiraa, te òhipa ia e ravehia no te âfaìraa i te tahi taata i nià. Mai te peu rä te vai ra te manaò no te âfaìraa i te tahi taata i nià, no te mea ia no raro te reira taata i te raveraahia mai. Te taata i haere i nià, ua maraa ia taata, oia hoì ua maitaì âreà te taata i topa, te taata tei òre i maraa, aita ia i maitaì mai. Te ìte atoà ra ia tätou e, te haapiiraa, te arataìraa ia i te taata i roto i te maitaì. I mua i teie mau haapäpüraa ta te reo e horoà mai nei, te märamarama ra ia tätou e, i roto i te poroì a te Fatu, te pipi, e taata ia tei tiàturi i te maitaì e vai ra i roto i te parau ta na i faaroo, e no te reira tiàturi, i färii atoà ai o ia i te pee, oia hoì te tuu i te Fatu i mua ia na, a riro atu ai te reira ei tïtauraa tuutuu òre na na. No reira, te pipi, eere ia i te tahi taata tei pee puèà noa i te Fatu, aore ra tei pee i te faanahoraa mai te manaò e, ua au atoà te reira i te haapiiraa a te Fatu. No te mea rä, aita e taata i ìte tei hea teie nià ta te haapii e faahiti nei, aita atoà ia e taata i ìte e aha te tae ; eere rä te faaea i te reo no te pipi. Te auraa, mai te peu e haamataraa to te parau o te pipi, aita to na e hopeàraa. I roto i te haapiiraa a te Fatu, te tiàraa te reira o te taata tei färii i te pee ia na. No te mea hoì, ua färii te tahi ia riro o ia ei pipi, e tano ai o ia e päpetitohia eere rä te reira päpetitoraa i te täpaò e ôpani ra i te tiàraa pipi o te taata i färii i te parau. e iti änei te ora,

Teraì òr. Faatura.