Ruta èv 16.1-13 Ärai

Tāpati 22 no Tetepa 2019.

Ärai

Taramo 113

1 E haamaitaì i te Fatu E haamaitaì, e te mau tävini o te Fatu, e haamaitaì i te iòa o te Fatu. 2 Ia haamaitaìhia te iòa o te Fatu, i teie nei e a muri noa atu. 3 Mai te hitiraa mai o te mahana e tae noa atu i to na maìriraa, ia haamaitaìhia te iòa o te Fatu 4 E teitei to te Fatu i to te mau fenua atoà E ua hau to na hanahana i te teitei i to te mau raì atoà ra 5 O vai tei au i to tätou Atua i te Fatu, o tei teitei e ua pärahi i te raì teitei. 6 Te tuu haèhaa nei rä o ia i te hiòraa mai i raro i nià i te mau raì, e i nià atoà i te fenua. 7 Te faateitei nei o ia i tei haèhaa ra no raro mai i te repo ra, e ua faateitei i tei àti no raro i te tiriäpera ra, 8 i te faanohoraa o ia ia na i roto i te feiä rarahi ra, i roto i te feiä rarahi ra i to na iho ra pupu taata. 9 O tei haapärahi i te vahine fänautama òre i te ùtuafare ra, ei metua vahine òaòa i ta na ra mau tamarii. Hareruia.

Àmota 8.4-7

Te taehae o te feiä hoohoo 4 E faaroo mai i teie, e te feiä i horomii noa i tei àti ra, i te faaòre i te taata rii i nià i te fenua nei, 5 i te nä-ô-raa e, Â hea ra e òre ai te märama âpï nei, ia hoo tätou i te mäa? E te täpati, ia faaìteìte tätou i te tïtona? E te faaitiraa i te êfä, e te tëtera ia rahi, e te faahaparaa i te mau fäito i te haavare;  6 e te hooraa i tei àti ra i te ârio, e tei ère i nä tämaa e piti ra; e te hooraa i te tïtona i faaruèhia ra. 7 Ua tapu te Fatu i te maitaì rahi o Iatöpa, E òre roa e moè ia ù ta rätou atoà ra mau parau.

1 Timoteo 2.1-8

Haapiiraa no te pure 1 E mata vau i te aò atu ia òe, e ei faaora, e te pure, e te ani, e te haamaitaì i te Atua i te taata atoà nei; 2 i te hui-arii, e te feiä mana atoà ra, ia pärahi-haùti-òre-hia tätou mä te hau, mä te paieti, e te tura. 3 E mea maitaì hoì te reira, e te au, i te aro o to tätou Ora ra o te Atua; 4 o tei hinaaro i te taata atoà ia ora, e ia noaa te ìte i te parau mau. 5 Hoê hoì Atua, e hoê hoì ärai i röpü i te Atua e te taata, o te taata ra o Ietu Metia; 6 o tei horoà ia na iho ei hoo i te taata i atoà, ia faaìtehia i te tau au ra; 7 i haapaòhia ai au nei ei aò, e ei âpotetoro e parau mau ta ù i te Metia ra, aore au i haavare, ei haapii i te Ètene i te faaroo e te parau mau. 8 E teie nei, te faaue atu nei au i te mau täne ra, ia pure i te mau vähi atoà ra, mä te hopoi i te rima viivii òre i nià, mä te riri òre, e te märô òre;

Ruta èv 16.1-13

Te parapore o te tävini haapaò maitaì

1 Ua parau atoà atu ra Ietu i ta na ra mau pipi. E tïàau to te hoê taata taoà rahi ra, e i fäìhia mai o ia e ua pau ta na taoà i taua tïàau ra. 2 Ua parau atu ra o ia ia na, nä ô atu ra. E aha teie roo ia òe ta ù e faaroo nei? A faaìte mai i te parau i to òe na töroà, a tirë roa òe i te tïàau. 3 Ua nä ô noa iho ra taua tïàau ra i roto ia na iho E aha rä vau? Te hopoi ê nei ta ù fatu i te töroà tïàau ia ù nei: eita e tià ia ù ia faaàpu, e haamä hoì au ia ani haere. 4 E nä ô vau  Ia färiihia mai au e rätou i roto i to rätou mau fare, ia faaèrehia vau i te töroà tïàau ra 5 Ua tii atu ra o ia i te mau àmutärahu atoà a taua fatu no na ra, ua ui atu ra o ia i te hoê, E hia a ta ù fatu taoà ia òe aore i hoo na. 6 Ua parau mai ra o ia Hoê hänere pato monoì. Ua parau atu ra taua tïàau ra ia na A rave i te pëpa na òe, a pärahi i raro i tënä na, a päpaì ai e, e pae àhuru. 7 Ua ui atu ra o ia i te tahi E hia a òe taoà aore i hoo na. Ua nä ô mai ra o ia Hoê hänere tora tïtona. Ua parau atu ra o ia ia na A rave i te pëpa na òe, a päpaì ai e, e vaù àhuru. 8 Haamaitaì atu ra te fatu i te räveà a taua tïàau parau tià òre ra; e paari rahi hoì to te tamarii o teie nei ao i ta rätou ra mau peu, i to te tamarii o te märamarama. 9 E teie nei, e parau atu vau ia òutou: e faatauà atu òutou i te tauà no òutou i te taoà haavare nei, e ia tuua-ê-hia òutou ra, ia färiihia òutou e rätou i roto i te fare tähuti òre ra. 10 O tei haapaò maitaì i te mea iti ra, ua haapaò maitaì atoà i te mea rahi; e o tei òre i haapaò i te mea iti ra, aore atoà ia i haapaò i te mea rahi. 11 E teie nei, aore òutou i haapaò i te taoà haavare ra, nä vai e tuu atu ia òutou i te taoà mau? 12 E aore òutou i haapaò i te raveraa i ta vëtahi ê ra, nä vai e tuu atu ia òutou i te rave i ta òutou iho? 13 Aore e tävini e tià ia faaroo atu i te fatu piti: e riro o ia i te òre i te au atu i te tahi, e te au atu i te tahi; e aore ia, e riro i te haapaò atu i te tahi e te faaruè täùe atu i te tahi. O òutou nei hoì e òre e tià ia faaroo i te Atua e te Mämona.

Manaò.

Taramo 113,  7 Te faateiteihia tei haèhaa no raro i te repo, e tei àti i raro i te tiriäpera ra,

Àmota 8, 74 E faaroo mai, te feiä horomiihia te àti, i faaòre te taata rii i nià i te fenua.

1 Timoteo 2, 5 Hoê Atua, hoê ärai i röpü i te Atua e te taata, te taata ra o Ietu Metia;

Ruta èv 16, 13 O òutou nei hoì e òre e tià ia faaroo i te Atua e te Mämona.

Ei manaò mätamua.

Eita i te mea òhie ia tuatäpapa i teie mau taiòraa, no te hiòraa i te tahi auraa. I te Mau parau-iho-aa, ta Ietu e faatià nei no teie tiàau haapaò-òre. Ia faaroo tätou teie mau manaò to Ietu, E teie nei, e parau atu vau ia òutou, e faatauà atu òutou i te tauà no òutou i te taoà haavare nei, e ia  tuua-ê-hia òutou ra, ia färiihia òutou e rätou i  roto i te fare tähuti òre ra. I teie manaò, te faaitoitohia nei te taata e tiàturi nei i te Atua ia rave i teie mau òhipa. Te reira mau ra nei te auraa no te parau ta Ietu e faahiti nei. E teie atoà parau i te ìrava 8 Haamaitaì atu ra te fatu i te raveà a taua tiàau parau-tià-òre ra. Mai te mea teie mau te faaitoitoraa, e tuuhia nei i mua i te feia e tiàturi nei i te Atua, te ö nei ia tätou i roto i te tahi faanahoraa, ìte-òre-hia te ùputa no te parau tià e te aroha. Teie huru faanahoraa, eita e ìtehia to na ànanahiraa, e riro ia teie ao, ei ao tei patuhia i nià i te haavare, e te täviri taata. Tei hia atu ra ia te Èvaneria i te vairaa , no te faatupu ra nei i te parau tià, e aore ra i te tià òre.

Ei tuatapaparaa.

Ia hiò  tätou i te mau òhipa i ravehia  e teie tiàau  haapaò òre, e aore  ra tià òre, te òhipa mätamua ta na i rave, te òre-raa ia e haapaò i te faufaa a to na fatu. Te piti  to na  tiàvaruraahia, ia òre o ia ia haapaò faahou i te mau òhipa a to na fatu. Te toru to na tïtauraa i te feia àmu tärahu a to na fatu, no te faaitiraa. Te mau òhipa  e  ravehia  nei e teie taata, e  parauhia te reira i te faahuru-ê-raa  i te mau parau  papaì. E teie òhipa i mua i te ture, e faahapa ètaèta-roa-hia. E te tahi ua ère teie taata i te tiàturiraa a to na fatu òhipa. E ia taiò maitai  tätou i te mau ìrava 8 e tae i te ìrava 12, mai te mea ra te faaitoitohia nei teie òhipa i te täviri taata, te reira mau anei ra te tumu e vai nei i roto i teie parapore. Eita  roa ia, te manaò  ia ta Ietu e parau nei i te ìrava 13, o vai te tävinihia te Atua, e aore o Mämona. Ia noaa i te taata i te faataa tei hia roa o ia i te vairaa, tei te pae anei o te Atua, e aore i te pae o Mämona. Ia ìte atoà ra tätou e aita o Ietu  e faahapa nei i te atua o te moni, te tïtauraa ra a Ietu, ia ìte tätou teihea roa te vairaa  te autaeaèraa i roto i te moni, aore ra te parahiraa o te aroha. E parau mau eita te aroha e pee i te moni ia hoo mai, te tuhaa ra a te moni te täpihooraa ia, i te rohirohi o te taata tei faatupuhia na roto i te mau òhipa ta na e faatupu ra. Ua na reira anaè tätou i te hiò te faanahoraa o te moni, te riro ra ia teie faufaa ei taoà i roto i te oraraa o te taata. Te tuu ra ia tätou i te Atua tei aroha i te taata, ei faaora atoà no te feia e faaòhipa nei i te moni ei täuturu i te taata, eiaha ra no te hoo i te taata, e to na varua. Ia tae anaè te faanahoraa o te moni mai teie te huru, i reira o Mämona e upootià ai i nià i te Atua, e te taata. Ia vai ra te moni ia au i to na faanahoraa, ei faahoìraa i te taime o te taata rave òhipa, te vai ra ia te moni i nià i to na iho tumu i hämanihia ai o ia e te taata. I te mea te faateitei nei te Atua Nui Tumu Tahi i te taata i te faaìteraa a te päpaì Taramo, 7 Te faateitei nei o ia i tei haèhaa ra no raro mai i te repo ra, e ua faateitei i tei àti no raro i te tiriäpera ra.

Ei haafatataraa i te auraa.

Ia hiò maitai anaè tätou i te manaò hopeà o Ietu i roto i te parapore, i te ìrava 13 aore e tävini e tià ia faaroo atu i te fatu piti, e riro o ia i te òre i te au atu i te tahi, e aore ia, e riro i te haapaò atu i te tahi e te faaruè täùe atu i te tahi. O òutou nei e òre e tià ia faaroo i te Atua e te Mämona.

Te tahi parau ta Ietu e hinaaro nei e faahiti i ù nei, mauti ra ia te huru o te taata ta täìtahi, te haafaufaa nei O ia te huru o te taata, ia au i ta te Atua hämaniraa. Te hohoà o te taata no te Atua, e hohoà ia no te faatupu te aroha e te here, te huru o te taata no te Atua ia, e huru ia no te faatupu i te autaeaèraa, e te tiàmaraa o te taata, te aho o te taata, e aho ia no te Atua, no te faatupuraa, i te parau tià, te ìte, te märamarama e te vai atu ra.

O te mea ia i òre i òhipahia e teie tiàau parau-tià-òre i te pae mätamua o te parapore, i te mau maitai e vai ra i roto ia na, aita ia o ia i rave i te reira. Ua rave ra o ia i te hoê òhipa tei òre e au i to na fatu i tiàvaruhia o ia. O te tià ra ia na ia rave mauti ra ia te piti ia o te huru ta na i òhipa. Teie te piiraa a Àmota no teie huru taata, 4 E faaroo mai i teie, e te feiä i horomii noa i tei àti ra, i te faaòre i te taata rii i nià i te fenua nei, Ia hiò ra tätou i roto atu i te tahi ìmiraa i te auraa, e faanaho ia tätou mai teie te huru, e taata teie e piti to na pae, mai te moni ra.  Te tuhuà  mätamua o to na huru o te haapaò òre ia, e te tahi pae, te täviri taata ia, e te parau nei te Fatu i teie huru taata, e paari rahi to te Mau tamarii o teie nei ao, e te märamarama. To na auraa ra, ua haapaò noa teie taata ia na iho ia maitaì o ia i nià i te tua o to na fatu, eiaha ra to na fatu ia faufaahia ia na. E te vai atu ra te tahi atu Mau tuatapaparaa no te auraa o teie taiòraa. Eiaha ra tätou ia manaò e, te haapii mai nei teie taiòraa i te täviri taata. E haamanaò ra tätou teie parau e faahitihia nei e Pauro ia Timoteo, 5 Hoê hoì Atua, e hoê hoì ärai i röpü i te Atua e te taata, o te taata ra o Ietu Metia. Faahiti-anaè-hia te parau no te ärai, no terä ia mea e, i roto i ta tätou parauraa no te faaìte ia te faufaa o te ora e ia paruruhia, e parau teie no te taata ia ära ia òre ia topa i roto i te tahi faanahoraa ia ätea ò ia i te aroha e te here no te mau hinaaro o te Atua. I teie huru parauraa a Ietu, no te Atua Nui Tumu Tahi i teie reo, 13 O òutou nei hoì e òre e tià ia faaroo i te Atua e te Mämona. I teie rä mahana, te räveà paì ta te taata e faaòhipa nei no te faaìteraa e te vai ra o na, aore ra no te haafaufaa ia na, aita paì te taata i faaea noa i nià i te ärai, mea rahi atu ä ia te mau räveà ta te taata e faaòhipa nei ia ìtehia e te vai ra o na. I ô nei, ua faahiti-noa-hia te parau no te ärai, ua ìte rä tätou i teie mahana, te vai ra te faanahoraa e haaparuparu ra te värua no te auraa o te ärai,  te haavare, te haavarevare, te täviri mai teie taata i roto i ta tätou parapore no teie mahana, a hiò na  tätou i ta na peu tià òre  ta na i rave, Hoê hänere pato monoì, a päpaì e pae àhuru, ua moè ia pae àhuru pato monoì. Hoê hänere tora tïtona, päpaì vaù àhuru, ua moè ia piti àhuru tora tïtona, teie huru faanahoraa aita te tiàau i riro èi ärai te pau ua tuu ra i to na fatu i roto i te topatari. Teie te tahi mea mäere i roto i te taata i teie mahana, mai te huru ra e i roto i te taime e ìno roa ai o na, aore ra e moè ai to na hiroà, te manaò ra o na e i te reira taime e taata o na. Âreà i roto i ta tätou parau, te haamanaò-noa-hia mai ra e, terä feiä i topa i roto i terä peu no te haavare e te haavarevare, e tano tätou e püòi mai i te tahi atu ä mau peu, i te reira taime aita te taata i täuà faahou ra i te Atua e te òhipa ta na i rave. Te reira te mea ta Ietu e peàpeà ra, i roto i te òhipa e ravehia ra e terä feiä. Teie nei, e tano atoà tätou e faariro i te reira ei uiuiraa na tätou i teie mahana, to tätou mau taata e topa ra i roto i terä fifi, aore ra no te faatumu ia rätou i roto i terä peu, eere paha e, te rahu a te Atua anaè terä e moèhia ra, to rätou atoà iho oraraa, e to te taata atoà te reira haapae-roa-raa i te rave i to na iho mau fifi ia riro e na na iho e tatara. Ua faaruè o na i to na oraraa, aita o na e täuà faahou, eere atu ra e te rahu noa a te Atua i òre i haapaò-faahou-hia, to na atoà iho oraraa ua moè-atoà-hia ia na, aita atoà o na e haapaò faahou ra. Tei ô tätou. Eere anei. Terä parau ta Ietu e faahiti ra, te ìte ra tätou e ia faaäuhia i nià i te tupuraa, i nià i te tereraa o to tätou oraraa i teie mahana, mea rahi roa ta tätou mau òhipa e haamoè atoà nei i to tätou hiroà, òre atu ai tätou e ìte faahou i ta tätou tuhaa, ta tätou täpura òhipa. Eiaha no tätou noa, i roto atoà rä i te ôpuaraa a te Atua. Mai te peu e, te faahiti ra tätou i te parau no te haavare, te haavarevare, ua ìte tätou e, te maì rahi roa o te taata i teie mahana, te moni tei òre faatahehia i te hou o te rae, te moni tei peta i te värua o te taata, te moni o te àvaava taèro.  Terä atoà te tahi vähi e moè atoà ai te hiroà o te taata. E moè ia na to na hiroà tävini no te Atua, haapaò i ta na faufaa ora i vai iho mai e te arataì-atoà-raa i te nünaa i roto i te ìteraa i te Atua. Te auraa, mea rahi atoà te mau mea e haamoè nei i to tätou hiroà i teie mahana.

13 O òutou nei hoì e òre e tià ia faaroo i te Atua e te Mämona.

Terai or. Faatura.

Ruta èv 15.1-32 Hoì

Tāpati 15 Âtete 2019.

Hoì

Taramo 51

1 Na te Mënätehe. Taramo na Tävita. 2 I te haereà mai o te perofeta ra o Nätana ia na ra i muri aè i to na haereraa atu ia Pätetepa ra. 3 E aroha mai òe ia ù, e te Atua e, i taua hämani maitaì no òe ra, e no te rahi o to òe ra hämani maitaì: e parai òe i ta ù nei mau hara. 4 E horoi hua mai òe ia ù i to ù nei ìno, tämä hua mai ia ù i ta ù nei hara. 5 Te fäì nei hoì au i ta ù nei hara, e te vai noa nei ä to ù ìno i pïhaì iho ia ù. 6 I mua i to aro, to òe anaè ra, i hara ai au nei, e i mua i to mata i rave ai au i teie nei ìno. Ia faatiàhia hoì ta òe parau, e eiaha e faahapahia ia parauhia ra. 7 Inaha, i fänau mai au mä te hara, e i töhia vau e ta ù metua vahine mä te ìno. 8 Inaha, o te parau mau no roto ra ta òe e hinaaro. E haapii mai òe ia ù i te haapaò maitaì i te vähi moè ra. 9 E tämä mai òe ia ù i te hïtopa e ia mä roa vau, e horoi òe ia ù, e ùoùo roa aè ra vau i to te hiona. 10 E faaìte mai òe ia ù i te òaòa e te reàreà, ia òaòa te mau ivi i ôfatihia e òe ra. 11 E huna ê atu òe i to mata i ta ù nei mau hara, e parai hua i to ù nei mau ìno. 12 E faaau na òe i te âau mä i roto ia ù nei, e ta ù Atua. E faahou na hoì òe i te âau manaò tià i roto ia ù nei. 13 Eiaha e faaârue ia ù i mua i to aro nei, eiaha hoì e rave ê atu i to Värua Maitaì ia ù nei. 14 E faahoì mai òe i te òaòa i te ora na òe ra, e ia täuturuhia mai au e te âau tiàmä ra. 15 E i reira vau e haapii ai i te feiä rave hara i ta òe parau, e e haafäriuhia mai te rave parau ìno ra ia òe. 16 Ia ora vau ia òe i te hara toto ra, e te Atua e, te Atua e ora ai au nei; e na ta ù vaha e himene pii hua i to òe ra aroha. 17 E vëvete na òe, e te Fatu, i ta ù vaha, e na ta ù vaha e ârue ia òe. 18 Eere hoì i te tütia ta òe i hinaaro, àhiri o te reira, ua horoàhia ia e au, aore hoì òe e au i te tütia-täauahi. 19 O ta te Atua tütia hinaaro ra, o te âau paruparu ra ia. O te âau paruparu ra e te òto ra, e òre roa te Atua e vahavaha i te reira. 20 Ei hämani maitaì to òe ia Tiona; e patu hoì òe i te âua i Ierutarëma nei. 21 Ei reira òe e mauruüru ai i te tütia parau tià e te tütia-täauahi täatoà mau ra; ei reira te puaatoro e hopoihia ai i nià i ta òe ra fata.  

Ètoto 32.7-14

7 Ua parau mai ra te Fatu ia Möte, nä ô mai ra, A haere, a pou òe i raro ua ìno to mau taata ta òe i arataì mai mai Àifiti mai ra. 8 Ua faaruè vave roa iho nei rätou i te èà ta ù i faaue ia rätou e e nä reira. Ua hämani rätou i te täfa faatö na rätou e ua haamori atu i te reira; e ua hopoi rätou i te tütia, e ua parau e, Teie to òe atua, e Ìteraèra, o tei arataì mai ia òe mai te fenua mai ra mai Àifiti. 9 E ua nä ô mai ra hoì te Fatu ia Möte, ua hiò vau i taua feiä nei; e inaha, e feiä ètaèta. 10 E teie nei, eiaha òe e parau mai ia ù, ia tupu noa na ta ù riri ia rätou a haapau roa atu ai au ia rätou, e o òe ta ù e faariro ei nünaa rahi. 11 Pure iho ra Möte i to na Atua i te Fatu, nä ô atu ra, E aha i tupu ai to riri, e te Fatu, i to mau taata nei, i ta òe i arataì mai mai te fenua mai ra mai Àifiti, ma te mana rahi, e ma te rima püai? 12 O te parau hoì to Àifiti e, I arataì o ia ia rätou ia roohia e te ìno, ia täparahi o ia ia rätou i nià i te mouà, e ia mou roa rätou i te ao nei? E faaruè i taua riri rahi no òe na, ruri ê aè òe i to òe manaò i te pohe no teie nei mau taata. 13 E haamanaò i to mau tävini ra ia Âperahäma, e ia Îtaata, e ia Ìteraèra, ta òe i tapu atu i to òe iho iòa, e ua parau atu ia rätou e, E faarahi au i to òutou huaai e mai te fetià o te raì ra te rahi, e taua fenua atoà ra ta ù i parau ra, e höroà ia vau no to òutou na huaai, e na rätou e pärahi e a muri noa atu. 14 Ua ruri ê aè ra te Fatu i to na manaò i te ìno ta na i parau e e hopoi i nià iho i to na ra mau taata.  

1 Timoteo 1.12-17

Te hämani maitaì o te Atua

12 E te haamaitaì nei au i to tätou nei Fatu i te Metia ra ia Ietu, i tei faaètaèta mai ia ù nei, o ia i parau ia ù i te haavare òre, e ua faatöroà òrometua mai ia ù nei; 13 i tei faaìno hoì i mütaa iho, e te hämani ìno, e te haùti i arohahia mai rä vau, no te mea i nä reira maùa noa vau no te faaroo òre. 14 I rahi roa rä te aroha o to tätou Fatu mä te faaroo e te hinaaro i te Metia ra ia Ietu. 15 E parau mau teie, e te au hoì ia färiihia e te taata atoà, e i haere mai te Metia ra o Ietu i te ao nei e faaora i te feiä hara e o vau hoì to rätou i hau. 16 Teie rä te mea i arohahia mai ai au, ia ìteä te faaòromaì rahi roa o Ietu Metia ia ù, i tei hau i te hara nei, ei hiò-täpaò-raa na te feiä e faaroo ia na a muri atu, e noaa atu te ora mure òre ra. 17 E teie nei, ei te Arii hau mure òre e te pohe òre, e te ìteä òre ia hiò ra, ei te Atua paari aita ä atu, ei ia na te tura, e te hanahana, e a muri noa atu. Âmene.

Ruta èv 15.1-32

Te parapore o te mämoe moè i ìte-faahou-hia mai

(Mät 18,12-14)

1 Ua ruru atoà mai ra te feiä òhi tute e te feiä rave hara e faaroo ia Ietu. 2 Ua ôhumu iho ra rä te mau Färitea e te mau päpaìparau, nä ô aè ra. Te ìte nei teie nei taata i te feiä rave hara, e te àmu atoà nei i ta rätou àmuraa. 3 Ua parau atu ra o ia ia rätou i teie nei parapore, nä ô atu ra 4 O vai ia taata io òutou nei, hoê hänere a ana mämoe, ia moè rä te hoê, e òre e vaiiho i te iva àhuru e iva tiàhapa i te mëtëpara ra, a haere a ìmi ai i tei moè ra, e ia ìteä atu? 5 E ìteä atu ra ia na, amo aè ra i nià i te täpono mä te òaòa. 6 E tae mai ra o ia i te ùtuafare, ua haaputuputu mai ra i te mau tauà e te mau taata tupu, ua nä ô atu ra ia rätou. E òaòa atoà tätou, ua ìteä hoì ia ù tau mämoe i moè ra. 7 E faaìte atu hoì au ia òutou, e òaòa rahi to nià i te raì i te taata hara hoê ia tätarahapa, i te feiä parau tià e ia iva noa atu te àhururaa e iva tiàhapa të òre e au ia rätou te tätarahapa.

Te parapore o te titerama moè i ìte-faahou-hia mai.

8 E o vai hoì ia vahine, hoê àhuru a ana titerama, ia moè ra te hoê, e òre e tïtià i te rämepa, a purümu ai i te fare, a mäìmi mäite ai e ia ìteä atu ia na? 9 E ìteä iho ra, ua haaputuputu mai ra i te mau tauà, e te mau taata-tupu, ua nä ô atu ra. E òaòa atoà tätou, ua ìteä hoì ia ù te titerama i moè ia ù ra. 10 E faaìte atu vau ia òutou, o te huru ia o to te mau merahi a te Atua ra òaòa, ia tätarahapa te taata hara hoê ra.

Te parapore o te tamaiti moè i ìte-faahou-hia mai

11 Ua parau atu ra hoì o ia Toopiti a te hoê taata tamarii tamaroa. 12 Ua parau atu rä tei muri aè i te metua täne E ta ù metua, hö mai na i ta ù ra tufaa i te taoà nei. Ua tufa iho ra o ia i te taoà na räua. 13 E muri iti iho ra, ua haaputu iho ra te tamaiti hopeà i ta na, haere atu ra i te fenua roa, pühura atu ra i ta na taoà i te haapaò òre. 14 E pau roa aè ra, roohia iho ra taua fenua ra i te oè rahi, e àti iho ra o ia i te poìa. 15 Ua täàti atu ra o ia i te hoê taata tupu no taua fenua ra, o tei tono ia ia na i roto i te âua e faaàmu i te puaa. 16 E ua hiaai atu ra o ia i te pipi i àmuhia e te puaa ra ia paìa o ia; aore hoì e taata i hopoi mai i te mäa na na. 17 E iho faahou mai ra to na iho huru mau, ua nä ô aè ra. E rave rahi to ta ù metua tävini tärahuhia e mäa rahi ta rätou e e toe te tahi pae, e te pohe nei au i te poìa. 18 E tià vau e haere i ta ù metua ra, a parau atu ai ia na. E ta ù metua, ua hara vau i te Atua o te raì e ia òe atoà hoì, 19 e eita atu ra e au ia ù ia parauhia e, e tamaiti na òe, e faariro òe ia ù mai te hoê i te mau tävini tärahu no òe nei. 20 Ua tià aè ra o ia, haere atu ra i ta na metua ra. E tei te ätea ê ä o ia, ìte mai ra ta na metua ia na, aroha mai ra, horo mai ra, täuvahi mai ra i nià i ta na àî, hoìhoì mai ra ia na. 21 Ua parau atu ra taua tamaiti ra ia na E ta ù metua, ua hara vau i te Atua o te raì, e ia òe atoà hoì, eita atu ra vau e au ia parauhia e, e tamaiti na òe. 22 Ua parau atu ra rä te metua i te mau tävini A hopoi mai na i te àhu pü maitaì ra, e faaàhu mai ia na nei, e ôomo hoì i te täpeà i ta na rima, e te tämaa i ta na âvae 23 e tii hoì i te täfa faaàmu ra e pätia, e àmu hoì tätou i te mäa, e òaòa hoì tätou; 24 o ta ù tamaiti nei hoì, i pohe na, e ua ora mai nei; i moè na, e ua ìteä mai nei. Òaòa atu ra rätou. 25 Tei roto i te âua te tamaiti mätahiapo ra, te haere mai ra i te ùtuafare. E fätata mai ra te fare ia na faaroo mai ra i te òto vivo e te òri. 26 Ua tiàoro mai ra o ia i te hoê tävini, ua ui mai ra i taua mau mea ra. 27 Ua parau atu ra o ia ia na Teie mai nei to teina, e ua pätia iho nei to metua i te täfa faaàmu nei, no te mea i haere ora mai nei o ia aore e maì. 28 Riri aè ra o ia aore aè ra i tae i roto i te fare haere atu ra te metua täne i räpae, täparu atu ra ia na. 29 Ua nä ô mai ra o ia i te parauraa mai i ta na metua täne. Inaha, e rave rahi aè nei o ù mätahiti i te täviniraa ia òe nei, e aita roa aè nei au i faaroo taìàtä i ta òe parau. E aita ä òe i horoà noa mai i te hoê pinia puaaniho na ù, ia faaàmu atu vau i to ù ra tauà 30 te hoìraa mai rä o to tamaiti na, o tei pühura i ta òe taoà na te mau vahine faaturi ra, pätia iho nei òe i te täfa faaàmu nei na na. 31 Ua nä ô atu ra te metua ia na E ta ù tamaiti, e tià òe i ô nei ia ù nei, e te mau taoà atoà na ù nei, na òe ia. 32 E mea tià hoì ia tätou ia faaàmuraa mäa e ia òaòa; o to taeaè nei hoì, i pohe na, e ua ora mai nei; i moè na, e ua ìteä mai nei.

Manaò.

I mua i teie mau parau no ta tätou mau taiòraa, e riro te tahi i te parau e, eiaha e ìnoìno e hömä, no Ìteraèra teie parau, ua tupu i terä tau, teie te tupuraa o teie mau parau. E parau mau ihoä paha, e aha rä te faufaa no ù ia ìte i te àamu o Ìteraèra. Nä ô noa na tätou ei hiòraa na tätou te faaroo ra vau i te tahi pehe marü e te òtooto, aore ra te tahi pehe uàuà, e Tïnïtö te taata himene, aore ra e Täpönë, e Purutia, e Marite, aore ra e Päniöra . Eere no te mea aita vau e taa ra i te paraparau, aore ra aita vau i ìte i te àamu e himenehia ra, e òre ai teie pehe e haru i nià ia ù. No te mea tei roto te pehe i to ù tarià, te amoamo ra hoì i to ù âau, te faahaùti ra i to ù tino, te mea faufaa i te reira taime, eere te mea e himenehia ra, te taata hoì na na te reira himene i fatu, e tae noa atu i te feiä na rätou e haùti ra i te ùpaùpa, to ù rä hoêraa i te pehe e òre ai e noaa ia ù te faataa e, o vau änei tei ö i roto i te pehe, aore ra te pehe tei uru mai i roto ia ù. O ia atoà teie mau taiòraa, e amoamo te mau ìrava i to tätou värua i te mau faahitiraa parau e faahithia ra.

-Taramo 51, 16 Ia ora vau ia òe i te hara toto ra, e te Atua e, te Atua e ora ai au nei

-Etoto 32, 14 Ua ruri te Fatu i te ìno ta na i parau e hopoi i nià i te mau taata.

-1 Timoteo 1, 17 E Arii hau mure òre e te pohe òre, ìteä òre ia hiò, e Atua paari,

-Ruta èv 15, 12 Ua tufa iho ra o ia i te taoà na räua.

Nehenehe noa ai te parau, te vai ra te fifi o te manaò taata, ta na e manaò ra, ua au ia i te Atua. No reira te faufaa ia haamanaò-noa-hia teie reo to te päpaì taramo e parau ra 16 Ia ora vau ia òe i te hara toto ra, e te Atua e, te Atua e ora ai au nei. Parau noa ai tätou I te maitaì o te Atua Nui Tumu Tahi, ia ìte atoà tätou e, eita te taata e mono i te Atua, i te mau taime atoà rä, e hinaaro o ia i te tauturu ia òre ia rara to na mau manaò. I te reira vähi ra, aita ä o ia i haamata i te faanaho i to na manaò, ua ineine te tauturu, maoro noa ia na i te ìteraa  e 14 Ua ruri te Fatu i te ìno ta na i parau e hopoi i nià i te mau taata. Teie parau ta tätou e faahiti nei, eita teie te faahoperaa i roto i te tiàturiraa. Eiaha ia moèhia ia tätou e, i te matahurahura o teie nei ao, i te parauraa te Atua, aita ta na parau i riro mai ei reta, ei taò, ei ìrava, ei puta. Ua riro mai rä ei märamarama, ei fenua, ei räau, ei manu, ei mahana, ei fetià, ei âvaè. Te nä ô ra te paari o te Mäòhi E tarià to te mau mea atoà, to te fenua e te moana, to te mataì, to te vero, to te fafatatiri, to te püahiohio, to te ureuretiàmoana, e faaroo ; e tarià to te fetià, to te âvaè, to te rä, to te uira, to te tau mä te taiò, to te moana hauriuri, to te mau mautai, i faaroo anaè ia i te reo o te nuu atua (T. HENRY, 406).

Ia parau mai hoì o Pauro e 17 E Arii hau mure òre e te pohe òre, ìteä òre ia hiò, e Atua paari, Te haapäpü noa mai ra te reira te puaa, te räau, te fenua, te manu, te ià, no te mea ia e tarià to rätou, ua ìte rätou i te parau, no te mea no roto mai rätou i te parau. I parau ai o Ietu I te mau taata i te faaìteraa a Ruta èv, Ua ôhumu iho ra te mau Färitea te mau päpaì parau. Te ìte nei teie nei taata i te feiä rave hara, e te àmu nei i ta rätou àmuraa. Ua parau parapore atu ra o Ietu, O vai ia taata io òutou nei, hoê hänere ana mämoe, ia moè te hoê, e òre e vaiiho i te iva àhuru e iva tiàhapa i te mëtëpara ra, a haere ai a ìmi tei moè, e ia ìteä atu, E ìteä atu ra ia na, amo aè ra i nià i te täpono mä te òaòa.  

Ua tae roa tätou i te tahi fäito, aita tätou i ìte faahou e aha ta tätou e parau i nià i te Atua ia òre tätou ia faahiti i te tahi parau no roto i te fenua, te auraa, teie ta tätou e parau noa nei, eere na tätou, eere no roto i to tätou âau, mai te mea atu ra e Atua ê teie ta tätou e haamori nei. Te tiàturiraa ia o te tahi pae o tätou ua  huehue roa  i te parau o te fenua tei päpaìhia i roto i te pïpïria tei faaìte i te ora. Tätou i nä reira, aita änei tätou i haafaufaa òre i te Atua e ta na rahu. Mai te mea atu ra ia e, eita te parau a te Atua, e te mea i tupu mai no roto i ta na parau, e horoà i te ora, te päpaìraa i nià i te àpi parau tei riro mai èi puta, òre noa atu ai e märamarama i te auraa o te mea i päpaìhia, te mea ia e horoà ra i te ora. Ia faaroo tätou I te reo o teie tämaïti e naò ra e, E ta ù metua, hö mai na i ta ù ra tufaa i te taoà nei. Ua tufa iho ra o ia i te taoà na räua. Ua haaputu iho ra te tamaiti hopeà i ta na, haere atu ra i te fenua roa, pühura atu ra i ta na taoà i te haapaò òre. E pau roa aè ra, roohia iho ra taua fenua ra i te oè rahi, e àti iho ra o ia i te poìa. Täàti atu ra i te hoê taata tupu no taua fenua ra, tei tono ia na i roto i te âua e faaàmu i te puaa. Ua hiaai i te pipi i àmuhia e te puaa ia paìa, aore hoì e taata i hopoi mai i te mäa. Iho mai ra to na huru mau, ua nä ô aè ra. E rave rahi to ta ù metua tävini tärahuhia e mäa rahi ta rätou e toe te tahi pae, e te pohe nei au i te poìa. Ua täuturu te fenua e te puaa i te tämaïti no te hoì i te ùtuafare metua. Haamanaòhia atu ra te tahi reo himene e himene-noa-hia nei i roto i te mau ârearearaa, teie te himene

E tämaïti ori noa

Hoì òe na te ära

Âue te mauiui

O vau nei ra

Te metua te mihi nei

Te òto nei te tama

Te ära na te ao nei.

Hoì mai e te tama e

A hoì mai i te fenua nei e

Ua î hoì au i te mauiui e te mihi e

Nahea ra o vau nei

Vau nei te metua nei e

Tei roto ta ù tino

Te ruhiruhiäraa

Te Maitaì o te Metua e to na faaòromaì, à hoì mai i  te fenua nei, ua ìte tätou i to na maitaì. Aita e ture, aita e faanahoraa, aita e faaheporaa, o òe e to òe Atua, tirä atu ai. E roaa ä ta te taata täpuniraa i muri mai i te ture ; e moè atoà o ia i muri mai i te faanahoraa ; a tae atu ai i te faaheporaa, e ôtoheraa maitaì roa teie no te taata ei pärururaa ia na i te parauraa e, ta na i rave, eere na na i hinaaro. Aita atu ta te Atua tiaìraa ia òe maoti rä, ta òe haapäpüraa e, ua ìte ihoä òe i te mea maitaì, oia te hoì e ua ineine i te rave i te reira. I roto noa i teie parau, aita ä òe i faaìte i to òe tiàturiraa i te Atua, aita ä to òe vaha i hamama no te parau i to òe manaò, ua haapäpü ê mai na te Atua i to na tiàturiraa ia òe.

Tano maitaì ai te reo o te Fatu e parau ra e O vai ia taata io òutou nei, hoê hänere a ana mämoe, ia moè rä te hoê, e òre e vaiiho i te iva àhuru e iva tiàhapa i te mëtëpara ra, a haere a ìmi ai i tei moè ra, e ia ìteä atu? 5 E ìteä atu ra ia na, amo aè ra i nià i te täpono mä te òaòa. E ia faatano tätou i teie parau i nià i te ôpuaraa a te Atua, teie ia to na faaauraa  Eere òe tei ìmi mai ia ù, o vau rä tei ìmi atu ia òe. O vai teie òe. Te taata te reira ta ù e parau ra. E au te òe no te taata hoê, aore ra no te hoê pupu taata, te hoê nünaa. Teie parau ta te Atua, eere te mea parau hänoa, ua faaroohia mai ra, ua faaroohia mai ia; e aita ra, tirä atoà ia. E parau âfaro teie i nià i te taata, e nä ô paì ia tätou e  to ù vaha, to òe tarià. Mai te peu te parau âfaro mai ra te Atua i te taata, te tiaì atoà mai ra ia te Atua i te tahi pähonoraa âfaro ; ei pähonoraa ihoä rä. Te Atua ihoä ia te Atua, e taata hoì te taata, te faariro nei rä te Atua i te taata ei täuaro no na. Te auraa, mai te peu te parau mai ra te Atua i te taata, no te haamanaò ia i te mea ta na e tiaì ra i te taata ia rave ; e tano atoà te taata e parau i te Atua, no te faaìte i te mea ta na e tiaì ra i te Atua ia rave no na. Te mea ia tätou i parau ai e, aita e ture, aita e faanahoraa, aita e faaheporaa, no te mea aita te Atua e hinaaro ra i te tahi mea ia haere mai e faaapiapi i te auraa âpï ta na e hinaaro nei i te haamau i roto ia na e te taata o vau e o òe; o òe e o vau. E no teie auraa fätata e vai ra i teie nei i roto i te Atua e te taata, e tano ai te Atua e haamanaò mai i te taata e, 14 Ua ruri ê aè ra te Fatu i to na manaò i te ìno ta na i parau e e hopoi i nià iho i to na ra mau taata. Aita e mea toe tei òre i horoàhia i te taata ra, tei te taata ra te parau i teie nei. Ia hiò-anaè-hia, aita te Atua e nä murimuri noa nei i te taata, i te parau-noa-raa ia na i te mea e rave, i te mea të òre e rave. E tiàmäraa rahi roa teie ta te Atua e hinaaro nei i te taata ia faaòhipa atu. Te fifi rä, te mea ia e, ua maoro roa te taata i te färiiraa ia ärataìhia o ia, ia faanahohia mai te òhipa ta na e rave, ia parauhia mai o ia i te vähi ta na e haere, ia parau hoì i te parau mai tei hinaarohia ia parau o ia, e riro teie tiàmäraa i te faatupu i te manaò ôtohe i roto i to na âau. Ua moèhia änei i te taata to na parau, aore ra aita o ia e hinaaro ra e haamanaò. Te mea e tauturu i te taata i mua i teie parau, te tütonu-tämau-raa ia to na manaò, to na âau i nià i teie parau e 12 Ua tufa iho ra o ia i te taoà na räua.  I te mea ua hämani te Atua i te taata i to na huru e to na hohoà, Te parau teie e tauturu ia na i te faaìteraa i te huru mau e te hinaaro hoì o te Atua i te taata, ia hanahana to na iòa moà.

Teraì òr. Faatura.

Ruta èv 14.25-33 Peneiaè

Tāpati 8 Tetepa 2019.

Peneiaè

Taramo 90

1 Te pure a te taata o te Atua ra, a Möte. E te Fatu, o òe to mätou haapüraa, i tërä uì, i tërä uì. 2 Aore te mau mouà nei i fänau, e aore hoì te fenua e te ao atoà nei i hämanihia e òe ra, te vai ra òe, e te Atua, mai tahito mai ä e a muri noa atu. 3 O te taata nei rä, te faariro faahou nei òe ei repo, te parau ra hoì òe: A hoì, e te tamarii a te taata na. 4 Ia òe rä hoì, hoê tautani noa atu i te mätahiti e au i te mahana hoê i mahemo ra, e mai te äraraa hoê i te ruì ra. 5 Te riro nei rätou ia òe mai te riro pape puè ra, e mai te vareà taòto ra rätou. I te poìpoì ra, mai te àihere e tupu ra rätou, 6 o tei ôteu e tei tupu i te poìpoì ra, e ua ahiahi anaè ra, ua täpühia e ua ôriorio atu ra.7 Oia teie, ua pau mätou i to òe ra riri, e ua riàrià mätou i ta òe ra mäinaina. 8 Ua tuu òe i ta mätou hara i mua ia òe, e ta mätou hapa moè i roto i te märamarama o to mata ra. 9 Ua mou aè nei to mätou mau mahana i to òe ra riri, ua pau to mätou mau mätahiti mai te manaò âau e pee ra. 10 To mätou puè mahana i te oraraa nei, e hitu ia àhuru i te mätahiti, e ia tae i te vaù i te àhuru i te mätahiti i te ètaèta, e riro rä taua ètaèta ra ei rohirohi e ei taiäraa. E òre hoì e mähia motu ê atu ra, maùe atu ra mätou 11 O vai rä tei haapaò i te püai o to òe ra riri? E ta òe ra täiroiro, mai te mataù e au ia òe ra? 12 E haapii mai ia mätou i te taiò i to mätou puè mahana, ia riro to mätou âau i te haapaò maitaì.13 E färiu mai ia mätou e te Fatu: a hea ra ia? A faite mai òe i to mau tävini nei. 14 A haamauruüru vave mai òe ia mätou i to òe ra aroha, ia reàreà mätou e ia òaòa i to mätou nei puè mahana toe. 15 A faaòaòa mai ia mätou e ia fäito i te mau mahana i àti ai mätou ra, e te mau mätahiti i faaòromaì ai mätou i te ìno ra. 16 A faaìte mai i ta òe ra òhipa i to mau tävini nei, e to òe ra hanahana i ta rätou ra tamarii.17 Ia vai mai ä te here o to mätou nei Atua, o te Fatu, i nià ia mätou nei, e te òhipa a to mätou nei rima, e haamau òe, oia ia, o te òhipa a to mätou rima i rave ta òe e haapäpü.  

Māteri 8.32-36

E ao to tei faaroo i te Paari, 32 E tënä na, e faaroo mai ia ù, e te mau tamarii e, e ao hoì to te feiä e haapaò mai i ta ù nei parau. 33 E faaroo mai i te aò ia paari, eiaha roa e òhipa ê i te reira.34 E ao to te taata e faaroo mai ia ù ra, o tei ara mäite i te mau mahana atoà i te mau ùputa nö ù ra, o tei tiaì mäite i nä ùputa nö ù ra 35 Ua ìteä hoì au ia na ra, ua ìte ia te èà i te ora, e herehia mai hoì o ia e te Fatu. 36 O tei hara ê rä ia ù nei, ua hämani ìno ia i to na iho värua; e tei ôre atoà i hinaaro mai ia ù nei, ua hinaaro ia i te pohe.  

Firemona 9-17

8 E teie nei, tià noa ä ia ù i te Metia nei ia faaue hua atu ia òe i te mea au ra, 9 no te aroha rä to ù e parau mäite noa atu ai au ia òe, o Pauro taata paari hoì au, e taata no Ietu Metia i täpeàhia i te âuri fifi i teie nei. 10 Te parau mäite noa atu nei au ia òe, i ta ù tamaiti, i ta ù i fänau i ta ù täpeàraa nei, ia Ònetimo ra: 11 i te tävini faufaa òre no òe i mütaa iho ra, i teie nei rä e faufaa ia ta òe ia na, e ta ù atoà hoì; 12 o ta ù ia e faahoì atu ia òe na. E tënä na, e färii mai òe ia na o to ù ia âau mau: 13 i hinaaro hoì au i te täpeà ia na i ô nei ia ù nei, ia onohia òe ia na i te poihereraa mai ia ù, i to ù nei täpeà-raa-hia i te Èvaneria nei. 14 Aita rä vau e rave noa i tei òre i tià ia òe ra; ia riro to òe hämani maitaì no te hinaaro mau, eiaha no te tahi mea ê. 15 Peneiaè hoì i taa ê iti poto noa mai ai o ia, ia färii mai òe ia na ia pärahi mau atu. 16 Eiaha rä ei tävini, ia hau atu rä o ia i te tävini, ei taeaè here ra, ia ù nei ia, a tae atu ai hoì ia òe ra, i te Fatu nei, e te tino atoà nei hoì. 17 E tënä na, te parau na òe ia ù e e hoa, e färii mai òe ia na mai te mea e o vau iho.

Ruta èv 14.25-33

Te peeraa ia Ietu

(Mät 10,37-38)

25 E tïàa rahi tei pee haere mai ia na, e ua färiu mai ra o ia, ua parau mai ra ia rätou 26 O te taata e haere mai ia ù nei, e aore i haapae i ta na metua täne e te metua vahine e te vahine iho, e te tamarii, e te mau taeaè, e te mau tuahine, e ia na atoà iho, e òre roa o ia e tià i te pipi na ù. 27 E o të òre e hopoi i to na iho tätauro a pee mai ai ia ù, e òre ia e tià i te pipi na ù. 28 O vai ia taata io òutou nei ia ôpua i te fare e faatià, e òre e mata na i te pärahi i raro, a taiò ai i te taoà e oti ai, i te navaìraa ta na taoà. 29 O të haamau hoì o ia i te niu, e aore aè ra i oti ia na, o te nä ô hoì te feiä atoà i hiò ra i te tähitohitoraa ia na 30 I tämata iho nei teie nei taata i te faatià i te fare, e aore aè nei i oti ia na. 31 E o vai hoì ia arii ia haere e àro atu i te tahi arii, e òre e mata na i te pärahi i raro, a feruri mäite ai i te tiàraa ia na e o na tau taata hoê àhuru i te tautani, ia haafärerei atu i te tahi e haere mai e àro ia na ra, mä to na atoà ra taata e piti àhuru i te tautani? 32 E e òre e tià ra, e vaiiho ätea i te tahi a tono atu ai o ia i te veà e ani i te hau. 33 Oia atoà hoì òutou, o tei òre i faaruè i te mau mea atoà na na ra, e òre atoà o ia e riro ei pipi na ù.

Manaò.

Ia faaroo tätou i teie pure, e purehia nei e Mote maite mea ra te tupu nei teie manaò te Peneiaè, i roto i to na âau i teie mau faahitiraa parau. E te Fatu, to mätou haapüraa, i tërä uì, i tërä uì. Aore te mau mouà i fänauhia, te fenua e te ao atoà i hämanihia, te vai ra òe, e te Atua Nui Tumu Tahi, mai tahito mai ä. Te taata te faariro faahouhia nei ei repo, ma te parau a hoì, e te tamarii a te taata na. I te mea hoê tautani i te mätahiti e au i te mahana hoê i mahemo ra, e mai te äraraa hoê i te ruì ra. Te riro nei mai te riro pape puè ra, e mai te vareà taòto ra tätou. I te poìpoì ra, mai te àihere e tupu ra tätou, o tei ôteu e tei tupu i te poìpoì ra, e ua ahiahi anaè ra, ua täpühia e ua ôriorio. Mäite reira to tätou pau i te riri o te Atua, mate riàrià i te mäinaina. Ua tuuhia te hara te mau hapa moè i roto i te märamarama o to na òriò mata. Ua mou to tätou mau mahana i to riri na, ua pau to tätou mau mätahiti mai te manaò âau e pee ra. Peneiaè,  to tätou puè mahana i te oraraa nei, e hitu ia àhuru i te mätahiti, e ia tae i te vaù i te àhuru i te mätahiti i te ètaèta, e riro rä taua ètaèta ra ei rohirohi e ei taiäraa. E òre hoì e mähia motu ê atu ra, maùe atu ra tätou. Te faateiteihia nei te rähu tei türama i to tätou ätearaa i te ôpuaraa faaora a te Atua Nui Tumu Tahi, no te faatupu tämauraa i te mau haapiiraa ia au i te  mau tïtauraa e haaparuparu ra te tiàmaraa o te hoê nünaa. Tei  haaparuparu i te nünaa Mäòhi te òreraa ia e ìte faahou i te taiò i te mau parau tei faaätea ia na i to na fenua, i to na moana, e i to na reva. No reira ia faaroo tätou te haapotoraa o na taiòraa e maha,

-Taramo 90, ta mätou hara i mua ia òe, e te hapa ua moè i roto i te märamarama o to mata.

-Materi 8, 36 O tei hara ia ù nei, ua hämani ìno i to na värua; tei hinaaro ia i te pohe.  

-Firemona, 15 Peneiaè i taa ê iti poto noa o ia, ia färii mai òe ia na ia pärahi mau atu.

-Ruta èv 14, 33 Tei òre i faaruè te mau mea atoà ra, e òre o ia e riro ei pipi na ù.

E Mau taiòraa teie e horoà nei ia tätou i te puai no te ìmiraa i te Mau hinaaro e tïtauhia nei i te taata e tiàturi nei i te Atua. I mua i teie Mau tumu parau tei manaòhia e tauturu ia tätou i roto i te Mau tuatapaparaa, te horoà nei ia te reira ia tätou i te tahi raveà no te haafatataraa i pïhaìiho i te Atua. E au teie Mau tumu parau i te taura no hihi  o te hiromona, tei natinati mai te i te tahi i te tahi, ei faaìteraa i te tïtauraa e ôpuahia nei. Mea tano ra, Ia hiò maitaìhia teie Mau taiòraa ta tätaìtahi, i te mea e tupuraa ê to te tahi e tupuraa ê to te tahi. To na auraa ra èita i te hoê vahi te päpairaahia, èita atoà hoê ä tuatapaparaa. Te vahi ra e tuàti teie Mau taiòraa te mau hinaaro ia e tïtauhia nei i roto, i ta te Mau tävini o te Atua faaìteraa. Taaê noa atu ai ta te reira faaìteraa, papaìraa, te manaòraa i nià i te Atua hoê ä ia. I ù nei tätou e päpü ai e, te Atua e faaìtehia nei e teie feiä papaì te faaâpï noa ra ai te faatiàraa i roto i te tau. E Atua teie, èita e tano ia vai -iho- hia  i roto i te hoê tau, no roto ra O ia i te tau, e O ia te tau.

Taiòraa Èv. Ruta 14, 25 - 33

25 E tiàâ rahi tei pee haere mai ia na, e ua färiu mai ra ò ia, ua parau mai ra ia rätou,

26 O te taata e haere mai ia ù nei, e aore i haapae i ta na metua tane e te metua vahine e te vahine iho, e te tamarii, e te mau taeaè, e te mau tuahine, e ia na atoà iho, e òre roa ò ia e tià i te pipi na ù.

27 E o te òre e hopoi i to na iho tätauro a pee mai ai ia ù, e òre ◊a e tià i te pipi na ù.

28 O vai ◊a taata i ó òutou nei ia ôpua i te fare e faatià, e ore e mata na i te pärahi i raro, a taiò ai i te taoà e oti ai, i te navaìraa ta na taoà ?

29 o te haamau hoi ò ia i te niu, e aore aè ra i oti ia na, o te na ò hoì te feiä atoà i hiò ra i te tähitohitoraa ia na,

30 I tämata iho nei teie nei taata i te faatià i te fare, e aore aè nei i oti ia na.

31 E o vai hoì ia arii ia haere e aro atu i te tahi arii, e òre e mata na i te pärahi i raro, a feruri maite ai i te tiàraa ia na e ò na tau taata hoê àhuru i te tautani, ia faafarerei atu i te tahi e haere mai e àro ia na ra, ma to na atoà ra taata e piti àhuru i te tautani ?

32 E  òre e tià ra, e vaiiho ateä i te tahi a tono atu ai ò ia i te veà e ani i te hau.

33 Oia atoà hoì òutou, o tei òre i faaruè i te mau mea atoà na na ra, e òre atoà ò ia e riro ei pipi na ù.

Te Èv. a Ruta i te pene 14, i te ìrava 25 e tae i te 33 e rave rahi taime to Ietu faahitiraa i te parau È ÒRE. E täpaò faaìte ia te hinaaro nei o Ietu e tuu i te tahi parau i mua i ta na pipi no te faufaa o te mau òhipa e tupu i teie mau tau e a muri atu.

Ia parau o Ietu e haapae i tera e tera, e tae roa i nià i ta te mau tävini i here, te haamanaò noa mai ra o Ietu i te puai no te Aroha e te here o te Atua i te taata. Ua hinaaro anaè te tävini i te pee ia Ietu, ia ìte ia te tävini i te here i te mau hinaaro o te Atua, mai ta na e here nei to na fetii, ta na mau tamarii, e tae noa atu ta na here. Ia faahiti o Ietu i te parau no te tätauro, ia noaa i te mau tävini i te hiò i te tätauro, mai te hoê täpura òhipa e tïtauhia nei ia rätou ia faatupu no te maitaì o te oraraa o te feiä e tiàturi nei i te ora noo mai i te Atua ra. Ia tuu o Ietu teie manaò i mua i ta na mau pipi, e pärahi e mätutu, te horoà nei o Ietu i te hoê faaäraraa i to na mau tävini ia faatupu i te hoê ôpuaraa no te patu, no te àroraa ia noaa ia i te mätutu e oti anei, e upootià anei, no te hiòraa i te mau vahi puai, paruru, o te ôpuaraa. Hau atu i te reira ia tupu maite te âparauraa i roto i te mau taata atoà e ö i roto i teie mau faanahoraa. I reira e ìtehia ai te tupu-maitaì-raa te hinaaro o te Atua i to na mau tävini. Noa atu ä ia te mau tävini o te Atua aore i ìte i te mauiui o te pohe tätauro, mai to te Metia e te mau pipi, te ìte nei ra rätou i te haapaò i te èà ta te Metia i tuu i mua ia rätou. Te tïtau nei te Metia i to na mau tävini, ia haapaò i ta na mau faaueraa, òia hoì,

1) Ia hau atu te here o te tävini i te mau òhipa a te Atua.

2) e ìmi tämau i te hau i roto i te oraraa.

3) e pärahi e mätutu.

I mua i teie mau parau te ìte nei tätou i te tuhaa òhipa o te vai noa ra, tei teie vahi te tätauro i te tiaìraa mai i to na mau tävini. I te mea e rave rahi to te mau tävini here i te tahi atu mau taata, mau ànimara, mau òhipa e te vai atu ra. No Ietu àita i navaì i te mea te taata, te ànimara, te òhipa, o te Atua te tumu, e ua here mau te Atua ia tätou, te tïtau mai nei ra o Ietu i to na mau tävini ia hau atu i te here. Peneiaè, to òe fenua, to òe nünaa, to òe Atua, e e nä fea tätou. Ua tähemo änei o na i to na parau, ua faaruè änei. Eita tätou e parau i teie nei e, oia, te manaò matamua ia hiò-anaè-hia te taata e parau i terä huru parau, ua ineine i te faaruè i ta na, te huna i to na parau, to na reo, to na nünaa, to na hiroà. Na te tupuraa paha o te òhipa e haapäpü mai ia tätou e, mea taaê rii, te vai ra ihoä te manaò matamua ta te parau e höroà ia tätou i te manaò e, ua faaruè tätou. Te tahi, ua hoì, te auraa ua färii i te hoì faahou i roto i ta na. Te parau nei tätou, e haere au nä muri iho ia Ietu. Terä huru haereraa, haamanaòhia atu ra, te tahi mau òhipa tei tupu i ô nei io tätou, ua haere atoà mai te tahi mau taata räpae. Rave na tätou i roto i te âàmu o terä mau taata, tei haere mai na nià i terä pahï o Bounty, ua haru rätou te faatereraa o te pahï, e hinaaro rätou e haere i te vähi ê, no to rätou tüàti-òre i te faatereraa a te taata i faatere mai i te pahï. E hia mäòhi, te täne e te vähine, ôuà i nià i te pahï, aita i uiui e, te haere ra i hea, e hoì faahou mai änei teie pahi, ua hoì mai, ua haere. E tano atoà rä tätou e uiui, i roto paì i terä haereraa, terä feiä âpï tei âpee i terä mau ìhitai, no te mea änei e manaò faaruè to rätou, to rätou fenua, to rätou âià, te mau metua, aore ra e manaò taureàreà, haere e mätaìtaì i te fenua. E tano atoà te manaò e uiui. Ia manaò anaè rä vau, terä feiä âpï tei âpee i terä mau ìhitai, eere no to rätou fiu to rätou fenua,e te au òre i ta rätou peu, to rätou hiroà. No te hinaaro ra i te ìte te mau faufaa o te rähu a te Atua Nui Tumu Tahi e vai ra i räro i te moana nui a hiva. 33 Oia atoà hoì òutou, o tei òre i faaruè i te mau mea atoà na na ra, e òre atoà o ia e riro ei pipi na ù.

Teraì òr. Faatura.