Ioane 4.5-42 Päpe.

Tāpati 15 no Mati 2020.

Päpe.

Taramo 95

1 Tätou e himene i te Fatu, e himene hua tätou i te mato e ora ai tätou nei. 2 E haere tätou i mua i ta na aro mä te haamaitaì, e mä te taramo e himene hua atu ai ia na. 3 E Atua rahi hoì te Fatu. E arii rahi i nià i te mau atua atoà ra. 4 Tei ta na rima te vähi hohonu o te fenua nei, e te teiteiraa o te mau mouà ra, no na ia. 5 Na na te tai, na na hoì i hämani, e na ta na rima i hämani i te repo marô. 6 E haere mai tätou, e haamori mä te piò i raro, e tuu i to tätou turi i te aro o tei hämani ia tätou nei, i te Fatu. 7 O ia hoì to tätou Atua, o tätou hoì te nana no ta na ra âua, te mau mämoe i ärataìhia e ta na rima.  Ia tià ia òutou, i teie nei mahana i te faaroo i ta na reo 8 Eiaha e faaètaèta i to òutou âau mai tei Meripa ra, e mai tei te mahana i Mata, i te mëtëpara ra, 9 i ta to òutou mau metua i faaoôo mai ia ù ra, e ua àa mai ia ù, ìte noa ai rätou i ta ù ra mau òhipa. 10 A maha aè ra àhururaa o ù mätahiti i te oôoraa i te reira uì, e ua nä ô aè ra vau: E feiä âau hapa rätou, e aore i haapaò i ta ù ra parau, 11 o tei tapuhia e au i ta ù ririraa ra, e eiaha roa rätou ia ö i to ù ra faaearaa.

Ètoto 17.3-7

3 Ua poìhä rä te taata i reira i te pape òre; e ua amuamu hoì te taata ia Möte, e ua nä ô mai ra, E aha òe i arataì mai ai ia mätou mai Àifiti mai ia pohe mätou, e ta mätou mau tamarii, e ta mätou mau puaa atoà, i te poìhä? 4 Ua tiàoro atu ra Möte i te Fatu, nä ô atu ra, E aha vau i teie nei feiä. Rooaù aè rätou ua tuì mai ia ù i te ôfaì. 5 Ua parau mai ra te Fatu ia Möte, E haere òe nä mua i taua mau taata nei, o òe e te tahi pae o te hui mätahiapo o Ìteraèra ra, e hopoi atoà i te räau ta òe i täìri i te pape ra i to rima, a haere ai. 6 E inaha, ei nià vau i te mato i Hörepa tià atu ai i mua ia òe na; e na òe e papaì i taua mato ra, e e tahe mai te pape no roto mai ei inuraa na te taata. E ua nä reira hoì Möte i mua i te aro o te hui mätahiapo o Ìteraèra ra. 7 Maìri iho ra o ia i te iòa o taua vähi ra ia Mata, e ia Meripa, no te àvau a te tamarii a Ìteraèra, e no te mea ua faatiò rätou i te Fatu, i te nä-ô-raa e, Tei roto änei te Fatu ia tätou, e aore änei?  

Rōma 5.1-8

Te hau a te Atua

1 E teie nei, ua tiàhia tätou i te faaroo, e hau to tätou i te Atua ra, i to tätou Fatu ia Ietu Metia ra; 2 no na hoì tätou i ö ai i te faaroo i roto i teie nei maitaì i pärahihia e tätou nei, e te òaòa nei i te tiaìraa i te maitaì o te Atua. 3 Eere hoì te reira anaè ra, te òaòa atoà nei rä tätou i te mau àti nei; ua ìte hoì tätou e, na te pohe e faatupu i te faaòromaì; 4 e na te faaòromaì e faatupu i te ìte; na te ìte e faatupu i te tiaì. 5 E òre hoì te tiaì e faahaamä mai, no te mea ua niniihia mai te hinaaro o te Atua i roto i to tätou âau e te Värua Maitaì i horoàhia mai ia tätou nei. 6 I to tätou vai-paruparu-raa ra hoì i pohe ai te Metia i te tau mau ra, no te feiä paieti òre ra. 7 E òre hoì te hoê e haapohe no te tahi taata parau tià, e faaòromaì rä paha te hoê taata atu i te pohe no te taata maitaì.

Ioane 4.5-42

Âpoo päpe

5 E tae atu ra o ia i te hoê ôire i Tämäria, o Titara te iòa, tei pïhaì iho i te maa fenua a Iatöpa i horoà atu no ta na tämaïti ra no Iotëfa. 6 Tei reira te âpoo pape a Iatöpa ra. E rohirohi aè ra Ietu i te haereà, pärahi iho ra i te hiti i taua âpoo päpe ra. Ua tae i te ono o te hora ra.

Vahine Tämäria

7 Ua haere mai ra te hoê vahine Tämäria e huti i te pape; ua parau atu ra Ietu ia na

Ietu

Hö mai na e inu.

Mau pipi

8 Ua reva atu ra hoì ta na mau pipi i roto i te ôire e hoo i te mäa.

Vahine Tämäria

 9 Ua parau mai ra taua vahine Tämäria ra ia na : E aha òe te âti-Iüta na i ani mai ai ia ù, i te vahine Tämäria nei, i te pape. Eita hoì te âti-Iüta e au maitaì atu i to Tämäria.

Ietu

10 Ua parau atu ra Ietu ia na, nä ô atu ra: Ahiri òe i ìte na i ta te Atua i horoà mai ra, e tei parau atu ia òe na e : Hö mai na e inu, ua ani mai ia òe ia na, e ua horoà o ia i te pape ora no òe.

Vahine Tämäria

11 Ua parau mai ra taua vahine ra ia na : E te Fatu, aita a òe pätete, e âpoo hohonu teie. I hea ta òe pape ora e noaa ai? 12 E rahi änei òe ia Iatöpa i to mätou metua ra, o tei horoà mai na mätou i teie nei âpoo pape, e ua inu o ia iho, e ta na mau tamarii, e te mau puaa?

Ietu

13 Ua parau atu ra Ietu ia na, nä ô atu ra : O të inu i tënä na pape, e poìhä faahou ä ia. 14 Âreà të inu i te pape e horoàhia atu e au nei, e òre roa ia o ia e poìhä faahou, e riro rä taua pape e horoàhia atu e au na, ei pape pihaa i roto ia na iho, e tià i te pihaaraa e tae noa atu i te ora-mure-òre ra.

Vahine Tämäria

15 Ua parau mai ra taua vahine ra ia na: E te Fatu, hö mai na i taua pape ra na ù, ia òre roa vau ia poìhä faahou, e ia òre hoì ia haere mai i ô nei e huti.

Ietu

16 Ua parau atu ra Ietu ia na: A haere, a tii i to täne, e a hoì mai ai.

Vahine Tämäria

17 Ua parau mai ra taua vahine ra, nä ô mai ra: Aita a ù täne.

Ietu

Ua parau atu ra Ietu ia na: E parau-tià ta òe i parau mai nei e: «Aita a ù täne». 18 A toopae aè nei hoì a òe täne, e tënä na ta òe e taòto na, eere ia i te täne na òe. E parau mau ta òe i parau mai nei.

Vahine Tämäria

19 Ua parau mai ra taua vahine ra ia na: E te Fatu, e perofeta òe nei, te ìte nei au. 20 I haamori na hoì to mätou hui-metua i nià i teie nei mouà, e te parau nei òutou, tei Ierutarëma te vähi e tià ai ia haamori te taata.

Ietu

21 Ua parau atu ra Ietu ia na: A faaroo mai na, e teie nei vahine, ua fätata te hora e òre e tae mai ai òutou i teie nei mouà, e e òre hoì e haere i Ierutarëma, haamori ai i te Metua. 22 Aore òutou i ìte i ta òutou e haamori nei, ua ìte mätou i ta mätou e haamori nei, no te âti-Iüta mai te ora. 23 Ua fätata rä, e teie nei hoì taua hora, e haamori ai i te Metua te feiä haamori mau ra, mä te värua e te parau mau o te huru ia o te feiä haamori ta te Metua e tïtau nei. 24 E Värua te Atua, e te feiä e haamori ia na ra, e haamori ia mä te Värua e te parau mau e tià ai.

Vahine Tämäria

25 Ua parau mai ra taua vahine ra ia na: Ua ìte au e, te haere mai na te Metia o tei Faatähinuhia ra ia. E ia tae mai o ia ra, na na ia e faaìte mai ia mätou i te mau parau atoà ra.

Ietu

26 Ua parau atu ra Ietu ia na: O vau ia e parau atu ia òe na.

Pipi

27 I reira te taeraa mai ta na mau pipi, e mäere noa iho ra, o ia i paraparau atu i taua vahine ra; aita rä te hoê i parau atu e: E aha ta òe e ui na?, e: E aha òe i paraparau atu ai ia na?

Vahine Tämäria

28 Vaiiho iho ra taua vahine ra i ta na färii pape, haere atu ra i roto i te ôire, ua parau atu ra i te taata 29 Mai haere na e hiò i te taata i faaìte mai ia ù i ta ù mau peu atoà nei. Eere änei tërä aè te Metia. 30 Haere atu ra rätou ia na ra, mai roto mai i te ôire ra.

Pipi

31 Ua parau na ta na mau pipi ia na, nä ô atu ra: E Rapi, a àmu.

 Ietu

32 Ua parau mai ra o ia ia rätou: E mäa ta ù ia àmu aita òutou i ìte.

Pipi

33 Ua parau iho ra te mau pipi rätou rätou iho: I hopoi mai änei te taata i te mäa na na?

Ietu

34 Ua parau mai ra Ietu ia rätou: Teie ta ù mäa, o të haapaò i to na hinaaro o to tei tono mai ia ù nei, e të faaoti i ta na òhipa. 35 Eere te parau nei òutou, E maha märama toe e àuhune ai? Ìnaha, e parau atu vau ia òutou, e faateitei i to òutou mata, e hiò i te mau âua ra, ua teatea ia i teie nei ua àuhune. 36 E te taata e ôoti ra, e utuà ta na, e ua haaputu i te maitaì no te ora-mure-òre ra, ia òaòa âpipiti, o të ueue e o të ôoti. 37 Ua tupu iho nei hoì te maa parau ra e: Na te hoê e ueue, e na te tahi ê e ôoti. 38 E tono vau ia òutou ei ôoti i tei òre i òhipahia e òutou na, na vëtahi ê i òhipa, e te faaö atu nei òutou i roto i ta rätou òhipa.

Ôire.

39 E rave rahi mai ra i taua ôire ra to Tämäria i faaroo ia na i te parau a te vahine i parau atu ra e, Ua faaìte mai o ia ia ù i te mau peu atoà na ù nei 40 E tae mai ra to Tämäria ia na ra, ua täpeà mai ra rätou ia na e pärahi io rätou ra, ua pärahi iho ra o ia i reira ia piti ruì. 41 E rave rahi hoì tei faaroo i ta na iho parau. 42 Ua parau aè ra rätou i taua vahine ra: Eere atu ra i to te parau ta òe i parau mai ra i faaroo ai mätou, ìte hua aè nei mätou ia na iho; ua ìte atu ra mätou e o te Ora mau teie o to te ao, o te Metia.

Manaò.

Taramo 95, 1 E himene hua tätou i te mato e ora ai tätou nei.

Ètoto 17, 3 Ua poìhä, ua amuamu ia Möte, E aha òe i ärataì mai  ai ia pohe mätou.

Röma 5, 5 E òre faahaamä, ua niniihia mai te hinaaro o te Atua i te Värua Maitaì.

Ioane 4, 42 ìte hua aè nei mätou, ua ìte ra mätou e o te Ora mau teie o to te ao, o te Metia.

Parau

Te taiòraa e tià ia ravehia no teie täpati, teie ia i roto i te Parau Maitaì, i te mea te  tupu nei i te hoê òhipa taaê roa i roto ia Ietu e te vahine Tämaria, tei haafarëreihia e te päpe.

IOANE 4 : 5 - 42

TE APOO PAPE A IATOPA

TE VAHINE TAMARIA

TE ANIRAA A IETU 1 TE PAPE

TE PAPE ORA A IETU

IETU E TE VAHINE TAMARIA

TE POIHA O IETU, E TE VAHINE TAMARIA                                                              

TE POIA O TE MAU PIPI

TE FAAITERAA A TE VAHINE TAMARIA

IETU TE ORA O TE AO

Te ìte nei tätou i te roa o teie taiòraa, te âparauraa o Ietu e te Vahine Tämaria. Tei haamata na roto i to Ietu aniraa i te päpe i teie vahine. Te ìtehia nei i roto i teie âparauraa, te faufaa rahi o teie vahine, noa atu ä ia te tahi mau pätoìraa, mau faataaêraa, mau hunaraa. Ua tae ra teie âparauraa i nià i te hoê fäito e ìte ai teie vahine  ta na e faatià parau nei o ta te Atua ia i faatahinu. Teie ra e tià ia tätou ia haapoto i teie taiòraa ma te rave noa i te mau ìrava i muri nei, mai te 13 e tae i te 26. Tei roto i teie tuhaa te vairaa no te hohonuraa to raua mau manaò. Teie ra te tuatapaparaa te taatoàraa ia o te taiòraa.

Te päpe ta teie vahine e huti nei e poiha faahou  ä ia o ia,

Te päpe ta Ietu e horoà e òre ia e poiha faahou,

Te vahi e haamori ai i te Atua, èita tei nià i te mau mouà atoà, ia haamorihia ra te Atua ma te Värua e te parau tià, 

Hoê noa Atua te haamori èita e pae,

Te vahine Tämaria ìteraa o te Metia teie, tei rahi ia Iatopa,

Te mau pipi ua poìa, ua paìa o Ietu,

Te riroraa te vahine Tämaria èi Haapii Parau Maitaì i roto ia Titara,

Te tiàturiraa to Titara o Ietu te Ora o teie ao.

Teie te huru no te âparauraa a Ietu e te Vahine Tämaria, e âparauraa tei manuia maitaì, i te mea ua riro teie vahine, èi rave òhipa atoà na Ietu te haaparari i te mau patu faataa ê i ropu i te mau Àti Iuta e to Tämaria.

Ei haapotoraa i ta tatou parau

1) Te poiha päpe,

2) Te haamoriraa ma te varua parau  tià,

3) Te poìa o te mau pipi,

4) TE faaìteraa a te vahine Tämaria,

5) Ietu te Ora o teie ao.

* TE TATUHAARAA O TE PENE PARAU *

*************************************

Ìrava 5 – 6.      Te Apoo Päpe a Iatopa i Titara no te fenua ra o Tämaria

Ìrava 7 – 15     Te Poiha o Ietu e te poiha o  te Vahine Tämaria

Ìrava 16 – 26   Ia haamorihia te Atua ma te Pure

Ìrava 27 – 38   To te  mau pipi hoìraa mai ma te maa, e te maere i te paìa o Ietu.

Ìrava 39 – 42   Te Fäìraa Faaroo a to Tämaria. Ua ìte atu ra mätou e, o te Ora mau teie o to te ao o te Metia

Ia hiò maitaì anaè tätou i teie tätuhaaraa, e ìtehia te hoê täuiraa e vai ra i roto i te âparauraa a Ietu e te Vahine Tämaria e tae noa atu i te mau pipi. Teie färereiraa i pïhaìiho i te ùtu no te àpoo pape a Iatopa ta na i horoà na ta na tämaïti o Iotëfa. I reira mau te ômuaraa ta tätou parau. Na te pätete òre a Ietu i faatupu teie äniraa e horoà mai ia inu au. E tià ia tätou ia parau e na teie pätete i ìriti te ùputa no te tauàraa parau. Te poiha o Ietu i te päpe e haamahahia ò ia na roto i to na tïtauraa i teie vahine e färiu i nià i te Atua tei horoà i te Ora. E to na poìa e haamahahia ia e te maa varua, o ta teie vahine i tiàturi.

Òre roa aè ra te poiha o te vahine Tämaria i te pape täpatete, inu iho ra i te pape täpatete òre. E riro aè ra ò ia e ìte no te Atua i roto i to na nunaa, tiàturi iho ra rätou o Ietu te Metia.

 TE TUATAPAPARAA - IOANE 4 : 5 - 42

* Ìrava 5 - 7 v.m.

E tae atu ra Ò ia i te hoê òire i Tämaria o Titara te iòa tei pïhaìiho i te maa fenua o Iatopa i horoà atu no ta na tämaïti ra no Iotëfa tei reira te àpoo päpe a Iatopa ra ; e rohirohi aè ra o Ietu i te haereraa, pärahi iho ra i te hiti i taua àpoo päpe ra, ua tae i te ono o te hora ra (12) ua haere mai ra te hoê vahine Tämaria e huti i te pape.

 TE APOO PAPE

Ia taiò maitaì anaè tätou i teie tuhaa, e ìte tätou i te àravihi o Ioane i te päpaìraa te òhipa e tupu nei i roto i te hoê tau atea, te tau no Iatopa, te tau, no Iotëfa, te tau no Ietu, e tae mai i teie mahana. Te horoà mai nei o Ioane i te hoê hohoà ora, no te òhipa e tupu ra i te hiti no teie àpoo päpe. Te horoà nei teie àpoo päpe  i te hau no tei poiha i roto i te mau taata atoà tei rohirohi, e  tae noa atu i te mau ànimara. E teie àpoo päpe te vai noa mai ra e tae roa mai i teie mahana.

E rohirohi to Ietu i te haere-noa-raa i raro aè i te hoê mahana puai, mai te poìpoì o na e ta na mau pipi te haere-noa-raa, ua tae i te avatea, te taime puai o te mahana. Ua poìa rätou, ua poiha, èita e tano faahou ia haere i mua, e faaea rii rätou i reira, e aita ta rätou e pätete hutiraa i te päpe, e àpoo hohonu hoì teie tei naeàhia e 32 metera.

Teie mai nei te hoê vahine no taua vahi ra no Tämaria, ta na färii päpe i nià i ta na upoo, e ta na pätete e te taura i ta na rima. Ua mätau maitaì teie vahine i te haere i teie hora, te taime taata òre, e i taua mahana ra te vai ra te hoê taata i reira tei òre roa ò ia i mätau ia na. E taata âpï i roto i to na òire no Titara, tei äni atu ia na i te päpe.

* Ìrava 7 v.h. - 10

Ua parau atu ra Ietu ia na, ho mai na e inu. (Ua reva atu ra hoì ta na mau pipi i roto i te òire e hoo i te maa) ua parau mai ra taua vahine Tämaria ra, ia na, e aha oe te Àti Iuta na i äni mai ai ia ù i te vahine Tämaria nei i te päpe, èita hoì te Àti Iuta e au maitaì atu i to Tämaria.

TE ANIRAA A IETU

Ietu te taata tiàma, aita to na e ènemi ua ènemihia ra Ò ia. Teie Ò ia e vävähi nei te patu e faataa ê nei te Àti Iuta e to Tämaria. To Tämaria e feiä ia tei faataa ê ia rätou tei naeàhia e vaù ui taata i maìri a tae atu ai o Ietu i reira. Ta rätou haamoriraa o te mau atua Ìtoro ia. Èita hoì e tià ia àparau te taata Tämaria e te Àti Iuta.

No Ietu ra, aita Ò ia e faariro nei teie mau fifi èi fifi, o ta na ra e hinaaro nei ia marua teie patu e faataa ê nei. I tià ai i teie vahine i te parau atu ia Ietu.

* Ìrava 11 - 15

Ua parau mai ra taua vahine ra ia na, e te Fatu, aita ta òe e pätete, e àpoo hohonu teie, e aha ta òe päpe ora e noa ai, E rahi anei òe ia Iatopa i to mätou metua ra, o tei horoà mai na mätou i teie nei àpoo päpe, e ua inu o ia iho, e ta na mau tämarii e te mau puaa. Ua parau atu ra Ietu ia na, na o atu ra o te inu i te na na päpe, e poiha faahou a ia. Àreà te inu i te päpe e horoàhia atu e au nei, e òre roa ia ò ia e poiha faahou, e riro ra taua päpe e horoàhia atu e au na, èi pape pihaa i roto ia na iho, e tià i te pihaaraa e tae noa atu i te ora mure òre. Ua parau mai ra taua vahine ra ia na e te Fatu, ho mai na i taua päpe ra na ù ia òre roa vau ia poiha faahou e ia òre hoì ia haere mai i o nei e huti.

TE ANIRAA A TE VAHINE TAMARIA

Te faaroo ra o Ietu i te manaò mätamua o teie vahine, òre roa aè ra to na poiha e to na poìa. I te mea o ta na e tiaì ra ua parauhia mai ia e teie nei vahine, e àpoo päpe teie  na to mätou metua o Iatopa. Päpü maitaì atu ra ia Ietu èita ò ia i te taata ê i teie nei vahine, e teie àpoo päpe e tià atoà ia na ia inu i reira.

Te päpe i ta Ioane faaìteraa e täpaò ia no te ora, e, e horoà hoì te reira na te Atua.

Te pape ora o te hohoà mau ia te reira no te Atua, ia au te faaìteraa a,  Ieremia 2 : 13 ; Ìtaia 12 : 3, 55 : 1 ; Etetiera  47 : 1; Tetaria 14 : 8...

Te pape tei tauihia èi uaina te ôroà faaipoiporaa Tana... Ioane 2 : 7...

Te pape hopu no Peteteta... Ioane 5

Te pape tei faaora no Tiroama... Ioane 9 : 7...

Te pape ora no roto mai la  Ietu... Ioane 7 : 38

Tei fänau i te päpe e te Värua te parauhia ia Nitotemo. ..Ioane 3 : 5...

Te päpe tei manii mai, mai te àoào o Ietu... Ioane 19 : 34……

Teie te päpe ora pihaa e vai nei i roto i te âau o Ietu, te òre roa e pau.

No te vahine Tämaria te ìte nei ò ia te hohonuraa no te parau a Ietu e, TE INU I TE NA NA PÄPE E POIHA FAAHOU A IA, AREA TE INU I TE PÄPE TA Ù E HOROA ATU E ÒRE ROA IA E POIHA FAAHOU. O te piti ia o te manaò o teie vahine te äniraa ia Ietu e ho mai na i taua päpe ra, teie päpe èita i te mea täpatete, èita atoà e 32 metera te hohonu, èita atoà i te mea ta taura. Te pätete no teie päpe ta Ietu o te âau ia o te taata, te taura huti te Faaroo ia ua oti atu ai, e te àpoo èita atoà i te mea hohonu roa, i roto i te mau taata faaroo atoà te vai ra taua päpe pihaa ra i te taime a päpetitohia òia.

* Ìrava 16 - 26

Ua parau atu ra Ietu ia na a haere, a tii to tane, e a hoì mai ai, ua parau mai ra taua vahine ra na o mai ra aita à ù e tane. Ua parau atu ra Ietu ia na, e parau tià ta òe i parau mai nei e, aita à ù e tane. A toopae aè nei hoì a òe tane e te na na ta òe e taòto na e ère ia i te tane na òe, e parau mau ta òe i parau mai nei. Ua parau mai ra taua vahine ra ia na, e te Fatu, e perofeta òe nei, te ìte nei au. I haamori na hoì to mätou hui metua i nià i teie nei mouà e te parau nei òutou tei Ierutarëma te vahi e tià ai ia haamori te taata. Ua parau atu ra Ietu ia na, a faaroo mai na, e teie vahine, ua fatata te hora e òre e tae mai ai òutou i teie nei mouà, e  òre hoì e haere i Ierutarëma, haamori ai i te metua. Aore òutou i ìte i ta òutou e haamori nei, ua ìte mätou i ta mätou e haamori nei no te Àti Iuta mai te ora. Ua fatata rä e teie nei hoì taua hora, e haamori mau ra ma te Värua e te Parau mau o te huru ia o te feiä haamori ta te metua e tïtau nei. E Värua te Atua, te feiä e haamori ia na ra e haamori ia ma te Värua e te parau mau e tià ai. Ua parau mai ra taua vahine ra ia na, ua ìte au e, te haere mai na te Metia (o te faatähinuhia ra ia). E ia tae mai ò ia ra, na na ia e faaìte mai ia mätou i te mau parau atoà ra. Ua parau atu ra Ietu ia na o vau ia e parau atu ia òe na.

TE HAAMORIRAA Eiaha tätou e manaò e, E pae tane ta teie vahine, e pae ra atua ta na e haamori nei. E mau atua teie no Atura, tei  taìtaìhia mai,  mai Päpuronia mai.

1) TUTOTA – PENOTA      E atua teie no te mau fare o te mau pötii

2) TUTA - NERETARA        Na atua ê atoà teie tei òre i päpü te auraa, te parauhia ra e na atua teie

3) HAMATA - ATIMA        Tiaì i te vahi o te pohe.

4) AVA - NIPEHATA          Teie na atua hoê no te ruì, e hoê no te paruru….II Arii 17 : 24 – 31…

5) TARATATA                     Teie to mau tane ra a te Vahine Tämaria.

E tià ia parauhia 158 mätahiti te mäoro te vai-noa-raa to Tämaria mai teie te huru, i te au-òre-raa i te Àti Iuta. Te tumu no nià ia i te oraraa faaroo, ua tutuìhia te fare pureraa a to Tämaria i nià i te faaueraa a te mau tahuà no Ierutarëma, ia au te mau tuatapaparaa. O Teretima te mouà i faatiàhia teie fare pure i te 332 hou o Ietu Metia. E i te mätahiti 128 hou o Ietu Metia i tutuìhia ai. Na roto i teie mau ìrava 16 e faaèa i te ìrava 26, ua mäheu te parau no te haamoriraa ìtoro a te nunaa Tämaria, na roto i teie vahine. Ta rätou vahi haamoriraa i nià i te mouà, ua faa-òre-roa-hia, i te mea aita te reira i au i te mau tahuà no Ierutarëma.

Te parau nei ra o Ietu, i teie vahine e haamori i te Atua ma te Parau mau e tià ai. Èita i te mea tià ia haamorihia te Atua na roto i te rave peu-noa-raa. E ua ìte teie vahine, e perofeta o Ietu, e Metia. Te poiha o teie vahine ua haamahahia, te veàveà o te mahana, ua haahaumaruhia e Ietu. Te päpe ta te Vahine Tämaria i hinaaro e poiha faahou a  ia ò ia, te päpe ora i noaa ia na, èita ia e tano ia tuuhia i roto i te pätete e naìnaì roa te färii, hoê noa färii to teie pape maoti ra ia to tätou âau .Te haapäpü nei o Ietu i te reira, o vau ia e Parau atu ia oe na.

* Ìrava 27 - 30

I reira te taëraa mai ta na mau pipi, e maere noa iho ra, ò ia i paraparau atu i taua vahine ra ; aita ra te hoê i parau atu e, e aha ta òe e ui na ? E aha òe i paraparau atu ai ia na ? Vai iho atu ra i taua vahine ra i ta na färii pape haere atu ra i roto i te òire, ua parau atu ra i te taata mai haere na e hiò i te taata i faaìte mai ia ù i ta ù mau peu atoà nei, e ère änei tera aè te Metia, Haere atu ra rätou ia na ra mai roto mai i te òire.

 TE MAERE O TE MAU PIPI, TE FAAITERAA A TE VAHINE TÄMARIA

No te mau pipi te uiui nei ia rätou te òhipa a Ietu e rave nei. Te âparauraa i teie vahine èita i te mea tià ia au te faanahoraa a te peu Àti Iuta. Aita ra rätou i ui noa atu. No te vahine Tämaria ua vai iho ò ia i ta na pätete i pïhaì iho i te àpoo päpe, te mea ta na i mätau i te rave i te mau mahana atoà, ua hoì ò ia i te òire ma te pätete òre, tei roaa ra ia na te päpe ora ia noo mai i te Atua ra, te hoê päpe tei òre roa ò ia e mätau i te inu. E päpe tei faaora ia na, i tià ai ia na i te haere i te òire no te faaìte i ta na i ìte i roto ia Ietu, ma te parau e, E ÈRE ANEI TERA AÈ TE METIA ?

E òaòa i te rahi to te Vahine Tämaria to na ìteraa i to na hape, i roto i te mau parau ta Ietu i faaìte no na. E ua riro te reira èi parau òaòa. Pii haere atu ra ò ia i teie parau òaòa, MAI HAERE NAÈ E HIÒ I TE TAATA. Ua faaìte o Ietu i te mea tano no teie vahine, e ua färii ò ia, haere mai ra to Tämaria e hiò ia Ietu.

* Ìrava 31 - 38

Ua parau atu ra ta na mau pipi ia na, na o atu ra, E Rapi, a àmu. Ua parau mai ra o ia ia rätou e maa ta ù i àmu aita òutou i ìte. Ua parau iho ra i te mau pipi rätou rätou iho. I hopoi mai nei te taata i te maa na na ? Ua parau mai ra Ietu ia rätou, teie ta ù maa, O TE HAAPAÒ I TO NA HINAARO O TO TEI TONO MAI IA Ù NEI E TE FAAOTI I TA NA ÒHIPA. E ère te parau nei òutou, e maha märama toe e àuhune ai ? Ìnaha, e parau atu vau ia òutou, e faateitei i to òutou mata, e hiò i te mau àua ra, ua teatea ia i teie nei, ua àuhune. E te taata e ôoti ra, e utuà ta na, e ua haaputu i te maitaì no te ora mure òre ia òaòa âpitipiti o te ueue, e o te ôoti. Ua tupu iho nei hoì te maa parau ra e, na te hoê e ueue e na te tahi ê, e ôoti. E tono vau ia òutou èi ôoti i tei òre i òhipahia e òutou na vëtahi ê i òhipa, e te faaö atu nei òutou i roto i ta rätou òhipa.

TE ÒOTIRAA

Aita te Vahine Tämaria i pïhaì iho ia rätou, ua haere e faaìte i ta na i ôoti mai roto atu i te Fatu o te faaàpu. Te mau pipi ra te poìa ra ia, pii atu ra ia Ietu ia tämaa âmui rätou. Riro atu ra teie reo, èi reo no te faaìte i te mau pipi e maa tei àmuhia e Ietu. Eita ra mai te maa ta rätou i tii na i te òire, e maa ra tei faatupu i te hinaaro o te Atua. Òia hoì te òaòaraa i te täviniraa i tei tono mai e faaoti te òhipa. Te manaò tumu o Ietu i ù nei, mea ru teie òhipa, aita e taime no te tämaa, aita e taime no te faaea noa, te rahi nei te àuhune. Te poto nei te taime no te ôotiraa. Teie parau te ôotiraa tei roto i te faaüraa  âpï e te faaüraa mätamua, e hohoà ia no te hora o te haaväraa, e hora no te haamaitaìraa. No te nunaa Tämaria te piri mai ra taua hora ra no te taata ôoti. I te mea e faaàpu atoà teie na te Atua i ueue i te huero maitaì, ua tae ra i te hora ôotiraa o ta te Vahine Tämaria ia i rave i o na iho. No te mau pipi ra te toe rahi noa nei te faaàpu a te Atua tei òre a i ôotihia atu ra, o ta Ietu e hinaaro nei ia ìte atoà te mau pipi i te reira, o rätou atoà te haere e ôoti e mea ru, eiaha e faataerehia, i tonohia mai ai o Ietu e te Metua, o ta na atoà ia e tono nei i ta na mau pipi e ia tätou i teie mahana.

·         Ìrava 39 - 42 :

E rave rahi mai ra i taua òire ra to Tämaria i faaroo ia na i te parau a te Vahine i parau atu ra e, ua faaìte mai òia ia ù i te mau peu atoà na ù nei. E tae mai ra to Tämaria ia na ra, ua täpeà mai ra rätou ia na e pärahi i o rätou ra, ua pärahi iho ra ò ia i reira ia piti ruì. E rave rahi hoì tei faaroo i ta na iho parau. Ua parau aè ra rätou i taua vahine ra, e ère atu ra i to te parau ta òe i parau mai ra i faaroo ai mätou, ìte hua aè nei mätou ia na iho : ua ìte atu ra mätou e. O te ora mau teie o to te ao o te Metia.

NA RUÌ E PITI O IETU I TÄMARIA E TA RÄTOU FÄÌRAA FAAROO.

Te mau tuatapaparaa ta tätou i hiò mai, aita aè i te hoê taataahiraa àvae o ta Ioane i haapou ia tätou i roto i teie àpoo päpe e 32 taahiraa. O ta Ietu i horoà ia tätou i te hoê òhipa maere rahi e te moè i mua i to tätou tiàturiraa. Te òhipa ra ta Ietu i rave te ìriti nei ò ia i mua i to Tämaria te hoê òhipa tei òre roa teie nunaa e ìte e, e tupu. Òia hoì to rätou ìteraa e o Ietu te Metia, tei ìte i roto i te hohonuraa o te âau o te taata, mai teie Vahine Tämaria. Eita ra i te faaìteraa a teie vahine i tiàturi ai to Tämaria, i to Ietu ra faaeraa i reira e piti ruì i tiàturi ai to Tämaria, teie Metia ta rätou e ìte nei, o te Fatu âpï ia noo roa mai i te Atua ra. Tei haapihaa i te päpe ora i roto i to rätou âau. E taua pihaa päpe ra ua tupu ia i roto i te âau o to Tämaria i te parauraa ia Ietu e, o te Ora mau teie o to te ao o te Metia. Te riro nei teie parau èi Fäìraa Faaroo àmui na te nunaa Tämaria. Hoê Fäìraa tei huri i te mau mea tähito i raro, teie Metia o ta rätou i faaìte hua i to rätou tiàturiraa, tei haapihaa i te ora âpï ia riro mau rätou èi ìte no te mau òhipa atoà a Ietu i rave e piti ruì i ropu ia rätou. Te vahi faahiahia i roto i teie nei Fäìraa Faaroo, aita to Tämaria i Fäì noa, no rätou, no to te ao atoà ra.

 ... Ia pihaa te Puna Ora i roto ia tatou ...

Terai òr. Faatura.

Mätaio 17, 1-9 Mätaù.

Tāpati 8 no Mati 2020.

Mätaù.

Taramo 33

1 E òaòa i te Fatu, e te feiä parau-tià e. E au te haamaitaì i te feiä parau tià. 2 E haamaitaì i te Fatu i te tïnura, e himene ia na i te näpara aho àhuru ra. 3 E himene ia na i te himene âpï, faaòto maitaì na mä te òaòa e te au mäite. 4 E parau tià ta te Fatu, e te haavare òre hoì ta na atoà ra mau òhipa. 5 Hinaaro o ia i te parau tià e te au, te î nei te fenua i te maitaì a te Fatu. 6 Na te parau a te Fatu i oti ai te mau raì, e to rätou atoà ra i te aho o to na vaha. 7 Ua haaputu o ia i te moana ra o te tai ei puèà, e ua vaiiho o ia i te moana i roto i te fare vairaa. 8 Ia mataù te mau fenua atoà i te Fatu; e ia höriri to te ao atoà nei ia na. 9 Ua parau hoì o ia, e oti aè ra; ua faaue o ia, e ua mau atu ra. 10 Te faaòre nei te Fatu i te âpooraa a te mau êtene, te faariro nei i tei ôpuahia e te mau taata ra ei mea faufaa òre. 11 Tei faaäuhia e te Fatu ra, e tià ia i te vai-mäite-raa, e tei manaòhia e ta na âau e tae noa atu i te mau uì atoà ra.12 E ao to te fenua, o te Fatu to rätou Atua; e te mau taata i mäìtihia e ana ei tufaa na na. 13 O te Fatu tei hiò mai nä mai nià mai i te raì, te hiò mai ra i te mau tamarii atoà a te taata nei. 14 Te vähi i pärahihia e ana ra, ta na ia hiòraa mai i to te ao atoà nei. 15 O ia anaè rä tei haafäito i to rätou âau, e o ia tei hiòpoà mai i ta rätou mau räveà. 16 Aore e arii i ora i te rahi o ta na nuu, aore e taata püai i ora i te rahi o te püai. 17 E mea faufaa òre te puaahorofenua ei haapüraa, aore e taata e ora i to na püai rahi., 19 e faaora ia rätou i te pohe, e ia ora hoì rätou i te oè ra. 20 Te tiaì nei to mätou värua i te Fatu; o to mätou ia tauturu, e to mätou ia päruru. 21 Te òaòa nei to mätou âau ia na; te tiàturi nei hoì mätou i to na ra iòa moà. 22 Ia vai mäite mai ä to aroha, e te Fatu, i nià ia mätou, mai ia mätou nei e tiàturi atu ia òe ra.

Tenete 12.1-4

To te Atua tïtauraa ia Âperäma

1 I parau mai hoì te Fatu ia Âperäma, E haere ê mai òe i to fenua na, i to fëtii, e te ùtuafare o to metua na, i te fenua na ù e faaìte atu ia òe na 2 e faariro hoì au ia òe ei nünaa rahi; e e haamaitaì au ia òe, e faarahi atu vau i to òe iòa, e e riro òe ei maitaì. 3 e o tei haamaitaì ia òe ra, o ta ù ia e haamaitaì, e o tei faaìno ia òe ra, o ta ù ia e faaìno e ei ia òe e maitaì ai te mau fëtii atoà o te ao nei. 4 Haere atu ra Âperäma i ta te Fatu i parau mai ia na ra; e haere atoà atu ra hoì Rota a hitu aè ra o Âperäma àhururaa i te mätahiti e pae tiàhapa, i reva atu ai o ia mai Harana atu.

2Timōteo 1.8-10

8 Eiaha òe e haamä i te parau o to tätou Fatu, e eiaha atoà e haamä ia ù i to na taata i täpeàhia nei. E färii atoà rä òe i te pohe o te Èvaneria nei, i te itoito a te Atua ra 9 o tei faaora ia tätou nei, e ua parau ia tätou i te parauraa moà ra, eiaha no ta tätou òhipa, no to na iho rä hinaaro, e te aroha mau i horoàhia mai i te Metia ra ia Ietu no tätou, hou teie nei ao ra. 10 Ua faaìte-hua-hia mai rä i teie nei i te färaa mai o to tätou ora o Ietu Metia, o tei faaòre i te pohe nei, e ua faaìte päpü mai i te ora mure òre i te Èvaneria nei ra;

Mātaio 17.1-9

To Ietu faahuru-ê-raa-hia

(Mär 9.2-9; Rut 9.28-36)

1 E ruì ono aè ra, ua rave aè ra Ietu ia Pëtero, e ia Iatöpo, e ta na taeaè ia Ioane, e ua ärataì atu ra ia rätou i nià i te hoê mouà teitei. 2 E faahuru-ê-hia iho ra o ia i mua ia rätou; ànaana aè ra ta na mata mai te mahana ra, e teatea aè ra to na àhu mai te märamarama ra. 3 E inaha, ua fä mai ra Möte räua o Èria ia rätou ra, e täuàparau anaè iho ra räua e o Ietu. 4 Ua parau atu ra Pëtero ia Ietu, nä ô atu ra. E te Fatu, e mea maitaì ia pärahi tätou i ô nei. E ia tià ia òe ra, e faatià vau i ô nei e toru aè fare autä no òe te tahi, no Möte te tahi, no Èria hoì e tahi. 5 E te parau noa ra o ia, e inaha, täpoìhia mai ra rätou e te hoê ata ànaana; e inaha, te hoê reo mai ra no roto i te ata, i te nä-ô-raa mai e O ta ù Tamaiti here teie, ua mauruüru roa vau ia na. A faaroo ia na. 6 E ia faaroo aè ra te mau pipi i te reira, ua tïpapa iho ra rätou i raro, mä te mataù rahi. 7 Ua haafätata mai ra Ietu i pïhaì iho, faatiàià mai ra ia rätou nä ô mai ra, A tià, eiaha e mataù. 8 E ia nänä aè ra i to rätou mata i nià, aore roa e taata i ìteä e rätou, mäori rä o Ietu anaè ra. 9 E tei to rätou pouraa mai, mai nià i te mouà ua faaue mai ra Ietu ia rätou Eiaha roa atu òutou e faaìte i te taata i ta òutou i ìte aè nei, e tae noa atu i te taime e tiàfaahou mai ai te Tamaiti a te taata mai te pohe mai.

Manaò.

Parau mau, te hinaaro nei tätou ia âfaì mai na taiòraa e maha i te tahi türamaraa i nià i te mau parau i taiòhia e tätou no te mau faaìteraa e märamaramaraa ai tätou i te tumu òhipa, no te ôpuaraa faaora a te Atua no to na aroha e te here. Hou rä te manaò a riro mai ai ei parau, oia te taime te taata e faaìte ai i ta na hiòraa, ta na hoì märamaramaraa i te reira parau, te vai ra ia teie taò here e te aroha. E aha te here e te aroha. Ia tämata tätou i te pähono i teie uiraa, na tätou ihoä e ìte atu, e huti ihoä te taata i te parau ia na ra, oia hoì e rave o ia i te mea ta na e ora ra, ei tatararaa no teie na taò. Ua nä reira, e te nä reira noa nei te taata mai te tau a uìuì mai, mai ta to na metua vahine, te fenua, i haapii ia na. I teie nei rä, mai te peu aita i matara ia ù na taò nei, i nià i te fenua, e i roto i te nünaa no reira vau i te püraa mai i te ao nei, nä hea vau e tano ai e parau e, te mea ta ù e ora ra, te reira te tatararaa. E hia taata e tano e nä reira mai i te pähono, e i roto i teie rahiraa taata, ta vai ra nei te pähonoraa huru piri aè i te parau mau. E ia nä reira hoì tätou i te parau, te fäì atoà ra ia tätou e, te vai ra te pähonoraa hape. Na vai rä i horoà ia tätou i te mana i te parauraa e, e hiòraa tano terä, e hiòraa hape terä. Te ìte noa ra tätou i te fifi, aita ä te taò i tatarahia, aita ä i matara te värua o te taò, ua haamata ê na tätou i te tuu i te tano e te hape. Eiaha tätou e maere ia tano atoà ia tätou te faahaparaa ta te mau tahuà rarahi e te feiä paari i faaü atu i nià ia Ietu no te mau parau ta na e parau ra, e te mau òhipa ta na e rave ra O vai te tumu i teie nei mau mea ta òe e rave nei, e na vai i horoà mai i teie nei mana ia òe türama te parau i to tätou haereà, e ìte atoà ai tätou i te vähi e nä reira tätou i te arataì i to tätou manaò. Te mea faufaa i roto i te here e te aroha, eere te parau, aore ra te taò, te òhipa rä, oia hoì te mea ta na e faatupu mai. Ia parau rä tätou e, òhipa, aita tätou e faaea noa ra i nià i te mea ta te taata tätaì tahi e ora ra, no te mea ua au noa te reira no na iho. Hiò na tätou i te rahuraa te Atua i teie nei ao e to na mau î atoà, ua parau te Atua, ua riro mai ta na parau ei òhipa ìtehia e te mata. Te mea faufaa rä, eere te mea e ìtehia atu ra, oia te mea ta te parau i faatupu, te mea rä ta te rahu e hinaaro ra i te faaìte mai, oia te aroha e te here o te Atua, a riro atu ai te reira ei haamaitaìraa i te Atua Hiò aè ra te Atua i te reira e, e mea maitaì. Nä ô noa na tätou  E mäa maitaì te ùru, e mäa tumu na te Mäòhi. E parau tià roa te reira. Mai te peu e täôtià tätou i te faufaa o te ùru i nià i to tätou ôpü, tei hea te hanahana o te Atua ; âreà rä ia riro te ùru ei täpaò no te aroha e te here o te Atua i te Mäòhi, e taui ia to na auraa. Hoê rii ä ia e teie parau no te here. Mai te peu e faaea noa te taata tätaì tahi i nià i te mea ta na e ora ra, te mea e faaòaòa ra, aore ra te mea e haapeàpeà ra ia na, e aha to reira faufaa. Hiò na tätou i te pape, no nià mai te pape i te raì, ia òre rä te pape ia hoì faahou i nià i te raì, nä hea o ia i te faaâpï e te ôpere i te ora i nià i te fenua nei. Te haapotoraa ia na taiòraa e maha nei.

-Taramo 33, 18 Te mata o te Fatu tei nià i te feiä i mataù, e te feiä i tiàturi i to na ra aroha.

-Tenete 12, 3   Ia òe e maitaì ai te mau fëtii atoà o te ao nei.

-2 Timoteo 1, 10 Ietu i Fä mai, ua faaòre i te pohe, ua päpü i te ora mure òre i te Èvaneria.

-Mätaio 17, 5 O ta ù Tamaiti here teie, ua mauruüru roa vau ia na. A faaroo ia na. 

No te haapäpü teie mau manaò e haafatata tätou i te Parau Maitaì no Ietu i päpa7hia e Mätaio i te pene 17 i te mau ìrava 1 e moti i te ìrava 7.

Te àamu

Tei te pae i nià no te roto rahi (te roto no Tarirea) te tiàraa teie nei òire no Taitarea i Firipi. Ua: mäìtihia teie iòa èi haamanaòraa i te hoê no te tämaïti a Heroda Nui, tei riro (èi tävana rahi) no taua tuhaa fenua ra. Na te reira i faataa i te òire no Taitarea, i te òire faaearaa no te tävana Roma e faatere ia Iutea. I Taitarea i Firipi to Ietu uiuiraa  ta na mau pipi i to rätou manaò ia na; òia hoì : o vai ra vau nei i ta te taata parauraa ?  E ia au  i te pähonoraa a te mau pipi, te ìte nei tätou e, ua riro noa Ietu, i roto i te mau  manaò taata, mai te hoê perofeta noa. No te mea ra te hinaaro nei Ietu i te ìte e, o vai mau ra Ò ia i roto i te manaò o te mau pipi, te ui nei òia ia rätou : o vai ra vau i ta òutou parauraa ? Ua pähono vave atu ra Petero e : o te Metia Òe  Tämaïti a te Atua ora  Te faaìte nei Petero na roto i teie fäìraa parau nehenehe, teie nei Fatu, e ère ia i te taata no te Atua, e Atua ra o tei riro mai nei èi taata.



Te parau no te taiòraa.

Ua òaòa roa Ietu ia Petero, eiaha ra na roto i to Petero marämarama, no te mea ra, ua fäì ò ia i te parau mau, e ère ra taua parau mau ra na na iho, na te Värua-Maitaì ra. Òia, Ietu iho taua Metia ra, èi muri aè i te pohe e te tiàfaahouraa e tupu päpü ai taua parau ra. E ia tae i te taime i faaära ai Ietu ia rätou i te mau parau no to na pohe e no to na tiàfaahouraa, te peàpeà nei te mua pipi, e o Petero iho. Ua ärataì ïti ê atu ra Petero ia na e ua na o atu ra Eiaha roa ia e te Fatu, eiaha roa Òe ia na reirahia. Ua färiu mai ra Ietu, e ua na o mai ra ia Petero : "E haere e atu òe e te na na ènemi, e türoriraa òe na ù, aore hoì òe i ìte i ta te Atua, o ta te taata ra ta  òe i au. E no taua parau ra, te faaìte nei Ietu i ta na mau pipi e, èita roa e tià ia pee ia na mai te färii - òre i te pohe, no te mea, e na roto paatoà te taata i te pohe e tupu ai te tiàfaahouraa. No reira, te feiä  atoà tei hinaaro i te faatere ia rätou iho i to rätou oraraa, aita roa ia to rätou e pärahiraa i pïhaìiho ia Ietu. Eita hoì e pee ia Ietu  mai te mea e, aita tätou i faaruè ia tätou iho e i to tätou mau manaò tià-òre.

Te tupuraa o te taiòraa.

E ruì ono aè ra rätou i reira, ua ärataì atu ra Ietu ia Petero Iatöpo e ia Ioane i nià i te mouà teitei. E ère hoì e, o Täpora teie nei mouà, no te mea, e mouà haèhaa o Täpora (e 562 metera i te teitei). Ua manaòhia e, o Heremona (e 2 800 m i te teitei) tei te pae i nià i te òire ra o Taitarea i Firipi taua mouà ra. Ia tae rätou i reira, huru ê atu ra Ietu i mua ia rätou, ànaana atu ra to na mata mai te mahana ra, e teatea atu ra to na àhu mai te marämarama ra. Ìnaha, ua fä mai ra Mote raua o Eria.

Ua parau atu ra Petero, e te Fatu e mea maitaì ia pärahi tätou i o nei; e faatià mätou i te fare autä e toru aè, no òe, no Mote e no Eria. Täpoìhia mai ra rätou e te hoê ata  ànaana e o te reo mai ra, no roto i taua ata ra i te parauraa mai e : o ta ù Tamaiti here teie, a faaroo ia na, Na roto i teie nei parau, mai te huru e, te vaiiho nei Ietu i to na huru taata, huru tïtï, e ua rave i to na huru Atua, to na huru Metia tei tohuhia e Pauro i roto i ta na èpitetore i to Firipi i te pene 2 i te ìrava 6  o  te huru ia O ia no te Atua, e aore ò ia i parau e haru toroà ia fäito atoà ò ia i te Atua. Te färaa mai no Mote e o Eria, òia hoì Mote : te ture ia, o  Eria : o te mau perofeta ia, ua riro ia èi haapäpüraa i te parau ta Ietu iho i parau i te Mataio pene5 i te ìrava 17 : "Aore hoì au i haere mai e faaòre i te ture e te mau perofeta, èi faatià rä. Òia mau, na roto i to Ietu pohe tätauro, te faatupu nei Ò ia te òpuaraa a te Atua, tohuhia e faaineinehia e Mote, e Eria e te mau taata atoà no te faaäuraa mätamua.

I to Ietu faahuruêraahia, ua vai noa na âpotetoro tootoru i roto i te mataù. Aita roa rätou i ìte i te auraa mau no teie òhipa maere rahi. O Petero anaè ra tei parau atu i te Fatu e, e hämani mätou e 3 fare autä, ua manaò paha Petero e, e tià ia Mote, ia Eria e ia Ietu iho ia pärahi i roto i teie nei ao. Aita o ia i hinaaro faahou e hoì i raro i teie nei mouà no te rave faahou i te òhipa. Ia faaea noa ra rätou i reira. Te faaìte nei ra Ietu ia na e, èita te reira e tià, e hoì ra rätou e ia rave faahope hua rätou i te òhipa e tiaì mai ra. Te reo tei na roto mai i te ata e täpaò faaìte ia i to te Atua färaa mai, no te mea, èita roa te mata taata nei e tano e hiò ia na. O ta ù  Tamaiti here teie, a faaroo ua au teie nei reo e te reo tei faaroohia i Iörïtäna i te taime no to Ietu päpetitoraahia. I roto i te Faaäuraa mätamua, e mea riàrià to te Atua färaa i te taata hara, e mea òaòa ra to te Atua färaa mai na roto ia Ietu Metia na roto i to na huru taata, mai te faaitoito i te feiä atoà tei hinaaro atu ia na.

Èi manaò faaitoito

Ìrava 5 O ta ù Tamaiti here teie, ua mauruüru roa vau ia na. A faaroo ia na.

I roto i ta tätou taiòraa te tupu nei te hoê òhipa mätau-òre-hia e te mata taata i te hiò. E toru-anaè-iho pipi tei ìte i teie òhipa, o Ioane, Iatöpo, Petero, o ta Ietu ia, i rave na muri i teie tere i nià i te mouà, te vahi ta te Fatu i faataa èi farerei ai, O ia i to na Metua.

Ua tupu ia teie òhipa maere e ono ruì e aore ra e ono mahana i muri noa aè to Petero fäìraa i to na faaroo i mua i te Metia. O vai teie mouà o Täpora, e aore ra o Heremona, aita ra ta tätou taiòraa e haapäpü nei, te mea ra e tano ia parau te mouà ia no te faahuruêraa, tei iòa ia, e tià ia parau. I te mea i roto i taua faahuruêraahia o Ietu i ìtehia ai to na hanahana.

Te tià rä, ia tätou ia haapäpü te òhipa ia e tupu rä i roto i te taiòraa, no te mea e taime poto roa te huruêraahia te Fatu, maite ànaana o te mahana, e te teatea o te àhu maite märamarama ra. E täpaò ia, ua ineine te Fatu no te färii na tià e piti o te Atua, Mote e o Eria. Te àparau nei rätou ma te faaroo-òre-hia ta rätou âparauraa. Teie ra, e tano ia parauhia te àmui nei te ture e te mau perofeta i roto i te òhipa faaoraraa a te Metia. Te pae o te ture o Mote ia, tei parauhia e te Atua i haere òe e ìriti mai i to ù nunaa i Àifiti, i te mea ua faaroo au i to rätou reo auë, e arataì ia rätou i te fenua o te täpü. Ia òre rätou ia faaèa faahou i raro aè i te faatîtîraa a Faraò.

Àreà te tià o te mau perofeta o Eria ia, tei àro i te mau perofeta a Paara, ia òre te nunaa ia fati i raro aè i te haamoriraa îtoro. Teie na tià no te faaäuraa mätamua, te haere mai nei ia e turu i te Tamaiti a te Atua, ma te ìte e, te faatupu rä O ia i te hinaaro o te Metua, te faatiàraa i te ture, e te mau parau tohu.

Te tupu nei teie mau òhipa atoà i mua ia Petero, Iatöpo, e o Ioane, te manaò o Petero te ìteraa i teie mau òhipa, ia haamau roa ia rätou i te tahi nohoraa, i nià i teie tupuaì mouà, ma te tämau roa e toru aè fare autä. Aita rä o Petero i marämarama e, o Mote e o Eria na te Atua ia i tono mai, èita raua e faaèa faahou i roto i te fare hämanihia e te rima taata, i roto rä raua i te fare hämanihia e te Atua faaèa ai, i te mea ua oti  te òhipa i te fenua nei.

E te parau noa rä o Petero, i täpoìhia mai ai rätou e te ata ànaana. Ma te faaroo i te reo o te Atua, i te parauraa e, o ta ù Tamaiti here teie ua mauruüru roa vau ia na a faaroo ia na.  Te mataù nei o Petero, Iatöpo, Ioane i teie mau òhipa, tei òre te taata i mätau i te hiò. Na teie mau òhipa e faaìte ia tätou e, e hiò rä ê ta te Atua i te taata, e hiòraa ê ta te taata i te Atua. I haafatata ai o Ietu i pïhaìiho i ta na mau pipi, ma te faatiàià, òia hoì ma te haapahara i to na rima i nià ia rätou ma te parau e, A tià, eiaha e mätaù.

E toru noa taata tei ìte i teie òhipa, e aha te auraa, no te aha e toru noa, no te aha èita te taatoàraa o te mau pipi. Teie ia, ua àmui to te raì e to te fenua no te àparau i te mau òhipa a te Atua. Te mau tià no te raì mai o Mote e o Eria, te mau tià no te fenua nei Petero, Iatöpo, Ioane no te ìte e, o Ietu te Tamaiti a te Atua.

E toru noa, i te mea e tau pipi tiàturihia teie e te Fatu, eiaha no te mea e, aita to na tiàturiraa i te tahi mau pipi òia ia. E parau ra ta Ietu e parau i na pipi e toru i te täpeà, ia au i te faaìteraa a te ìrava 9 eiaha roa òutou e faaìte i te taata i ta òutou  i ìte nei, e ia tià faahou mai te Tamaiti a te taata mai te pohe mai. Ia hope rä te òhipa a te Tamaiti a te Atua e ia tià mai, mai te pohe mai i reira te mau pipi e haaparare ai te hanahana o te Metia.

Te ìte nei te Metia, te fatata mai ra taua hora ra i faatiàià ai Ò ia i na pipi e toru nei, ma te parau e, A tià, eiaha e mätaù. Te mataù nei teie mau pipi no te mau parau a Ietu ta rätou i faaroo, e no te faahuru –ê-raa-hia te Fatu. E hopoià teimaha mau teie, ia ämo rätou, o te ìte ia teie no te âparauraa ta te vahi Teitei, e to raro nei, èita hoì te moemoeä, èita hoì te taòtòotoa, èita hoì i te rià, èita hoì te ôrama, mea ìte mata roa rä. E mataùhiahia ihoä, te òhipa faatupu maere a te Atua. Te parau nei ra te Fatu, eiaha e mätaù, tei roto i te rima o te Atua. E mau òhipa maere teie e ravehia nei, no te fenua nei ia fäì to te ao e o Ietu Metia te päpä o te o te Faaroo.

I mätaù ai tätou i teie faahuru-ê-raa i roto i te Atua. Ia haamataù te Atua i te taata no te haapii ia, i te haèhaa, e te faatura. E no te ärataì i nià, i te èà no te parau tià. Eiaha e mätaù, e Èvaneria mure òre ta te Metia e parau mai nei ia tätou. Ia haamaitaì mai te Atua ia tätou, èi ia faaitoito mai i to tätou faaroo.

A faaroo ia na, a tià, eiaha e mätaù, na reo e piti nei, hoê no Ietu i nià i na pipi e toru, hoê no te Atua i nià ä i teie mau pipi tei ìte i te mau òhipa moà i nià i te mouà. Na reo teie tei tïtau i te mau taata ia tiàturi i te mau òhipa no te ora mure òre i ravehia i te fenua nei na roto i na ôroà moà piti, 1) te ôroà no te Päpetitoraa, a 2) te ôroà moà no te Eufari. I tià ai ia Ietu i te parauraa e eiaha e mataù, a färii i te mau täpaò no te ora, o te faatupuhia i te fenua nei na roto i te moà. O ta Ietu ia i faatupu i te ruì i haavarehia mai ai Ò ia ra. Rave iho rä i te maa hotu o te fenua, haamaitaì-iho rä, vävähi-iho rä e ua parau atu rä, A rave mai a àmu, o ta ù tino teie tei püpühia no òutou, e na reira òutou èi manaòraa ia ù. Ia oti anaè ta na àmuraa rä, e ua parau atu rä, Teie nei âuà o te faufaa âpï ia i to ù nei toto e na reira òutou èi manaòraa ia ù. O teie te faahuru-ê-raa a te Metia i te mau taata atoà tei färii i ta te Atua tïtauraa ia taui i roto i ta na mau faaueraa, eiaha e mataù, a tiàturi. I ta te ôroà eufari e faatupu no te faataui i te hoê oraraa, no te hoê anei ùtuafare täati âpï, no te hoê anei âmuiraa uì âpï e aore no te hoê taata âpï tei ìte e tuhaa òhipa ta na i roto i te Metia tei parau ia na e eiaha e mataù, a faaroo i ta te Atua e parau nei e, a faaroo ia na.

I tià roa ai ia tätou ia parau e, E aha te ôroà eufari ? E ôroà ia no te aroha taiò-òre-hia e te Atua i to na taime. I reira to te Atua faaìteraa i te hohonuraa mau no to na aroha i te taata nei. E ère te aroha o te Atua i te aroha parau vaha noa, tirärä atu ai, e aroha päpü ra, e aroha mau tei tupu e tei tae mai i roto i teie nei ao, a faaroo ia na te reo ia o te Atua. O ta tätou ia e färii nei na roto i te eufari, to tätou ìteraa na roto i te aroha o te Atua e, e taata hara tätou, taata paruparu tätou i mua i te mau faatäuiraa rau e vai nei i roto i te ao nei. Te turaì nei rä ta tätou färiiraa i to tätou tiàturiraa eiaha e mataù i te mea ua hoo faahouhia mai tätou e Ietu, ua pii Ò ia ia tätou ma to tätou iòa no te Metia tätou. I tupu ai te fäìraa àmui i te ôroà eufari na roto i te maa âpï o te fenua ta te Fatu i tuu i mua ta na Ètärëtia. Ia fäì te taatoàraa o Ietu Metia te Fatu, ma te tuu ia tätou i raro aè i te mana o te Fatu, i to tätou tino, to tätou manaò e to tätou âau. E ia pärahi fatata noa tätou ia na na roto i te faarooraa, i to na reo na roto i te pure, te taiòraa pipiria, te haamoriraa e te färiiraa i te mau taime atoà e faatiàhia ai te ôroà Eufari.

I reira hoì tätou e ìte ai te tïtauraa a te Atua i roto i teie ôroà, mai ta Pauro i parau e, I noaa hoì ia ù te Fatu, òia hoì ua tià roa ia na ia pähono i te tïtauraa a te Atua, ia haafatata i pïhaìiho i teie ôroà moà e te tura rahi e aha ia te tumu ? Ia òre ò ia ia färii i taua ôroà ra ma te au òre, a hara faahou ä ò ia i te tino e te toto o te Fatu. I tià ai i te ôroà eufari i te faaitoito i to tätou faaroo, no te mea o te niu te reira no te tiàturiraa o te Ètärëtia a te maru metia. A àmu a inu èi manaòraa na òutou ia ù, reo faaitoito mau ia teie ia tätou, o ta te ôroà e faatupu nei na roto i te maa hotu o te fenua.

Ia ìte-mau-hia pane faatupuraa i te perehahuraa no te vävähi i te mau mea tià òre no te faatupu i te autaeaèraa, èi ia tià i te uaina ia faahaumäru i te mau vahi e ôteu mai ai te mau öhi rii âpï no te hoê fänauraa âpï. a tià, eiaha e mätaù

Teraì òr. Faatura.          

Mätaio 4, 1-11 Färiu

Täpati 1 no Mäti 2020.

Täpati ôroà.

Färiu

Mau taiòraa

Taramo 51

1 Na te Mënätehe. Taramo na Tävita. 2 I te haereà mai o te perofeta ra o Nätana ia na ra i muri aè i to na haereraa atu ia Pätetepa ra. 3 E aroha mai òe ia ù, e te Atua e, i taua hämani maitaì no òe ra, e no te rahi o to òe ra hämani maitaì: e parai òe i ta ù nei mau hara. 4 E horoi hua mai òe ia ù i to ù nei ìno, tämä hua mai ia ù i ta ù nei hara. 5 Te fäì nei hoì au i ta ù nei hara, e te vai noa nei ä to ù ìno i pïhaì iho ia ù. 6 I mua i to aro, to òe anaè ra, i hara ai au nei, e i mua i to mata i rave ai au i teie nei ìno. Ia faatiàhia hoì ta òe parau, e eiaha e faahapahia ia parauhia ra. 7 Inaha, i fänau mai au mä te hara, e i töhia vau e ta ù metua vahine mä te ìno. 8 Inaha, o te parau mau no roto ra ta òe e hinaaro. E haapii mai òe ia ù i te haapaò maitaì i te vähi moè ra. 9 E tämä mai òe ia ù i te hïtopa e ia mä roa vau, e horoi òe ia ù, e ùoùo roa aè ra vau i to te hiona. 10 E faaìte mai òe ia ù i te òaòa e te reàreà, ia òaòa te mau ivi i ôfatihia e òe ra. 11 E huna ê atu òe i to mata i ta ù nei mau hara, e parai hua i to ù nei mau ìno. 12 E faaau na òe i te âau mä i roto ia ù nei, e ta ù Atua. E faahou na hoì òe i te âau manaò tià i roto ia ù nei. 13 Eiaha e faaârue ia ù i mua i to aro nei, eiaha hoì e rave ê atu i to Värua Maitaì ia ù nei. 14 E faahoì mai òe i te òaòa i te ora na òe ra, e ia täuturuhia mai au e te âau tiàmä ra. 15 E i reira vau e haapii ai i te feiä rave hara i ta òe parau, e e haafäriuhia mai te rave parau ìno ra ia òe. 16 Ia ora vau ia òe i te hara toto ra, e te Atua e, te Atua e ora ai au nei; e na ta ù vaha e himene pii hua i to òe ra aroha.  17 E vëvete na òe, e te Fatu, i ta ù vaha, e na ta ù vaha e ârue ia òe. 18 È ere hoì i te tütia ta òe i hinaaro, àhiri o te reira, ua horoàhia ia e au, aore hoì òe e au i te tütia täauahi.19 O ta te Atua tütia hinaaro ra, o te âau paruparu ra ia. O te âau paruparu ra e te òto ra, e òre roa te Atua e vahavaha i te reira. 20 Ei hämani maitaì to òe ia Tiona; e patu hoì òe i te âua i Ierutarëma nei. 21 Ei reira òe e mauruüru ai i te tütia parau tià e te tütia täauahi täatoà mau ra; ei reira te puaatoro e hopoihia ai i nià i ta òe ra fata.

Tenete 2, 7-9 

7 A hämani ai te Atua ra o te Fatu i te taata i te repo fenua nei, ua haapüaì iho ra o ia i te aho ora i roto i ta na âpoo ihu ra, riro aè ra te taata ei taata ora. 8 Ua ô hoì te Atua ra o te Fatu i te ô i te pae i te hitià o te rä i Êtene ra, e ua tuu iho ra o ia i te taata ta na i hämani ra i reira. 9 Ua faatupu te Atua ra o te Fatu i te mau räau maitataì atoà ia hiò, e tei au ei mäa, i taua fenua ra, e te räau ora i röpü i taua ô ra, e te räau e ìte ai i te maitaì e te ìno.

Pene 3,1-7.

1 E paari rahi to te ôfï i to te mau manu âvae maha atoà o te fenua, i ta te Atua ra ta te Fatu i hämani ra; e ua nä ô mai ra o ia i te vahine, oia ia, ua parau mai te Atua e, eiaha òrua e àmu i to te mau räau atoà o te ô nei. 2 Ua parau atu ra te vahine i taua ôfï ra E àmu mäua i to te mau räau atoà o te ô nei 3 mäori rä o to taua räau i röpü i te ô nei, ua parau mai ia te Atua e, eiaha ò rua e àmu i to reira; eiaha hoì ò rua e rave noa atu; a pohe ò rua 4 Ua parau mai ra taua ôfï ra i te vahine E òre roa e pohe. 5 Ua ìte hoì te Atua e, ua àmu anaè ò rua i to reira, e àraara ia to òrua mata, e e riro ò rua mai te atua ra te huru, i te ìte i te maitaì e te ìno. 6 E ìte aè ra te vahine, e räau maitaì ei mäa, e te au hoì i te mata ia hiò atu, e te räau hinaaro hoì ia noaa te ìte; ua rave iho ra o ia i te mäa no nià i taua räau ra, àmu iho ra, hopoi atu ra hoì i ta te täne, àmu atoà iho ra hoì o ia. 7 Àraara aè ra to räua mata, ìte aè ra räua e te vai tahaa noa ra räua; ua fatu iho ra räua i te rau tute ei päreu no räua.

Roma 5, 12-17.

Àtamu e te Metia

12 E teie nei, no te taata hoê ra i ö mai ai te ìno i te ao nei, e no te ìno hoì te pohe; e ua taeà-atoà-hia te taata atoà e te pohe i te mea ua hara päatoà. 13 I vai na hoì te hara i te ao nei e tae roa aè nei i te ture nei; e òre rä te hara e haapaòhia i te ture òre. 14 I mana na rä te pohe mai ia Àtamu mai ä e tae roa aè nei ia Möte, e i te feiä atoà aore i rave i te hara mai te hara a Àtamu ra, e hohoà o ia no të tae mai. 15 Eita rä tei horoà-noa-hia mai e au i taua hara ra. E rave rahi tei pohe i te hara a te taata hoê ra, e rahi atu hoì te aroha o te Atua, e tei horoàhia mai e taua aroha ra, i te tae i te taata e rave rahi, ia Ietu Metia i te taata hoê ra. 16 Eere hoì mai ta te taata hoê i rave i te hara ra, tei horoà-noa-hia mai; no te hara hoê hoì te utuà faahapa, âreà tei horoà-noa-hia mai ra, ia tiàhia mai ra ia i te hara atoà e rave rahi. 17 No te hara hoì a te taata hoê ra, i mana ai te pohe i taua taata hoê ra; te feiä hoì i noaa ia rätou te maitaì rahi e te parau tià i horoàhia mai ra, e rahi atu ia to rätou mana i te ora i te taata hoê ra, ia Ietu Metia.18 E teie nei, mai te taata atoà i taeà i te utuà faahapa i te hara a te taata hoê ra, ua taeà-atoà-hia te taata atoà i te tià ia ora, i te parau tià a te taata hoê ra. 19 Mai te taata atoà hoì e rave rahi i faarirohia ei taata hara i te haapaò òre o te taata hoê ra, e rave rahi hoì tei faarirohia ei taata parau tià, i te haapaò o te taata hoê ra.

Mätaio 4, 1-11

To Ietu tämataraahia

(Mär 1.12-13; Rut 4.1-13)

1 E ua ärataìhia atu ra Ietu e te Värua i te mëtëpara, ia tämatahia o ia e te tiàporo. 2 I muri aè i to na haapaeraa i te mäa e maha àhuru ao e maha hoì àhuru ruì, poìa iho ra o ia. 3 Ua haere mai ra te tämata/faahema, nä ô mai ra ia na, E Tamaiti òe na te Atua ra, a faaue i teie nei mau ôfaì ia riro ei färaoa. 4 Ua pähono atu ra o ia, Ua päpaìhia E òre te taata e ora i te färaoa anaè ra, i te mau parau atoà rä no roto mai i te vaha o te Atua. 5 Ua ärataì atu ra te tiàporo ia na i roto i te ôire moà, tuu atu ra ia na i nià iho i te àuru o te hiero 6 e ua parau atu ra ia na, E Tamaiti òe na te Atua ra, a haamaìri ia òe iho i raro; ua päpaìhia hoì e, E faaue o ia i ta na mau merahi, e na rätou hoì e mau ia òe i to rätou rima, ia òre to âvae ia tiàìa noa atu i nià i te ôfaì. 7 Ua parau mai ra Ietu ia na Ua päpaì-atoà-hia e Eiaha òe e àa i te Fatu to Atua. 8 Ua ärataì faahou atu ra te tiàporo ia na i nià i te hoê mouà teitei roa, ua faaìte mai ra ia na i te mau hau atoà o te ao e to rätou hinuhinu. 9 Ua parau mai ra ia na, E höroà atu vau i teie nei mau mea atoà no òe, ia tïpapa mai òe i raro i to ù pae âvae e ia haamori mai ia ù. 10 Ua parau atu ra Ietu E haere ê atu òe, e Tätani  Ua päpaìhia hoì: O te Fatu, to Atua, ta òe e haamori, e o ia anaè ra ta òe e tävini. 11 Faaruè iho ra te tiàporo ia na, e inaha, e mau merahi tei haere mai e ua täuaro mai ra ia na.

Manaò.

Rahu iho ra te Atua i te raì e te fenua i te mätamua ra. Te vai ano noa ra te fenua aore e faufaa, e te pöuri hoì i nià iho i te ìriatai, e ua faaàrepurepu iho ra te Värua o te Atua i nià iho i te moana. Ua parau iho ra te Atua Ei reva i rotopü i te pape, e na te reira e vehe i te pape e te moana. Ua rahu iho ra te Atua i taua reva ra, vehe atu ra i te moana i raro aè i taua reva ra, e te pape i nià aè i taua reva ra ; e oia mau atu ra. Te mea ta teie parau e heheu mai nei, te rahi ia o te pape e täpoì ra i te fenua. Riro noa ai e, no te raì e te fenua te parau mätamua i faahitihia, ua riro rä te pape ei ùputa i parauhia ai to te raì e te fenua. Oia mau, hou te mau mea atoà, te vai ra te pape. Mai te peu i roto i te ao o te Atua, te vai ra teie haapäpüraa e  I vai na te Parau i te mätamua ra, tei te Atua ra hoì te Parau, e o te Atua hoì te Parau, e tano atoà ia parauhia e, i roti te ao taata, i te mätamua ra, te vai ra te pape, e tei te mau vähi atoà te pape, e no roto mai hoì te mau mea ora atoà i te pape. E au ra ia hiòhia e, te faaìte-noa-hia mai ra te vähi i reira te Värua o te Atua e òhipa atu ai. Te òhipa mätamua hoì ta te Atua i rave, te reira atoà rä te parau mätamua ta na i parau, te ìritiraa ia i te ùputa o te märamarama, te parau hoì tei faaìte mai e, te vai ra te Atua. Teie atu ra te haapotoraa o ta tätou no teie mahana.

-Taramo 51, 15 Ia haapiihia te feiä rave hara i ta òe parau, e  haafäriu i te parau ìno.

-Tenete 3, 7 Àraara aè ra to räua mata, te vai tahaa ra räua; ua fatu i te rau tute ei päreu.

-Roma 5, 14 I mana te pohe ia Àtamu e ia Möte, tei òre i rave e hohoà o ia no të tae mai.

-Mätaio 4, 10  O te Fatu, to Atua, ta òe e haamori, e o ia anaè ra ta òe e tävini. 

E mau tumu parau teie e tià e täuturu ia tätou i te märamaramaraa i te Parau Maitaì a  Ietu i päpaìhia e Mätaio i te pene 4 i te mau ìrava 1 e tae i te ìrava 11. Parau tumu i täpeàhia mai te ìrava 10  O te Fatu, to Atua, ta òe e haamori, e o ia anaè ra ta òe e tävini. 

Ua tupu teie ìrava ta tätou i muri iti noa aè i to Ietu färiiraa i te päpetitoraa i te pape ra no Iörïtäna. I reira atoà te faarooraahia te reo mauruüru o te Atua i nià i ta na Tamaiti here. Ua mauruüru roa vau Ia na.

Mai roto mai i teie reo, to Ietu ärataìraahia i te mëtëpara e te Varua Maitai, ia faahemahia O ia e te tiàporo. Eiaha ra i roto i tera manaò no te faatito i te Tamaiti a te Atua i nià i te Tiàporo. I roto ra i tera manaò e, ia aurarohia te Tamaiti a te Atua. Aita ra teie òpuaraa i manuia, ua tupu mau ra ta te tiàporo faaturoriraa i te tiàturiraa o Ietu. Ma te manaò e, e manuia faahou o ia, mai ta na i rave i nià ia Atamu e o Eva. Eita o ia e upootià faahou i nià i te Atua, e fifi ra o ia. I te mea ua noaa ia Ietu te hoê puai taaê, tei òre roa i noaa i na taata mätamua i faahemahia e te Tiàporo. Na taata mätamua  ua haamaitaìhia e te Atua, aita e täpaò to nià ia raua. Àreà o Ietu e täpaò ia ta te Atua i nià ia na, te peritome ei faaìteraa i te mä o te nunaa o te Atua, e te päpetitoraa ei faaìteraa i to Ietu tämaraa i te hara a to te ao nei. E te täpaò no te Varua Maitai te pouraa mai i nià Ia na ei faaìteraa i te parahiraa mai, te mana o te Atua. Na te mana o te Varua Maitai i ärataì ia Ietu, i te mau vahi atoà i reira  O ia e faahiti ai te mau hinaaro o te Atua.

E tià ia parauhia teie te òhipa mätamua i ravehia e Ietu i muri mai i to na päpetitoraahia, e farerei i te Tiàporo, i te mëtëpara ei haapäpüraa i te tiàraa o te Atua e faatere i te ao nei, eiaha ra ia faateähia te ao nei e te Tiàporo. Tei nià i teie mau tuhaa to te Tiàporo faahemaraa i te Tamaiti a te Atua.

1) Te tuhaa o te ôpu, oia hoì te parau no te maa i te mëtëpara.

2) Te tuhaa no te tiàmaraa, oia hoì te tiàraa Tamaiti o te Atua, teie vahi ra tei roto roa ia i te òire o Ierutarëma.

3) Te tuhaa no te haamoriraa, oia hoì te tiàraa taata faaroo o Ietu ia hema ia i raro aè i te faanahoraa a te Tiàporo.

Teie te mau tuhaa ta te Tiàporo e hinaaro nei e vävähi i roto ia Ietu, ia riro atoà o Ietu mai ia na ra te huru. E vävähi te tino, te feruriraa e te tiàturiraa o Ietu. Ia au teie mau òpuaraa a te Tiàporo, eita o Ietu e ôtohe rii aè i te hoê taime i te mau parau faateitei, e te täparu a te Tiàporo. Ei ia parau te Tiàporo e, e Tamaiti oe na te Atua ra, a parau i teie nei mau ôfaì ia riro ei maa. E pähono o Ietu e, eita te taata e ora i te maa anaè ra, i te mau mea atoà ra i haapaòhia e te Atua. Te tino o Ietu teie e hinaarohia nei e vävähi, aita ra o Ietu e topa i roto i teie mau faatïanianiraa, i te mea aita ä i tae atu ra i te hora no te tämäaraa. E Tamaiti òe na te Atua ra, tei nià i te poretito  o te hiero to te Tiàporo parauraa ia Ietu e, e haamori ia na, e poroìhia hoì te mau merahi ia haere mai e täpeà i ta na rima ia òre ta na àvae ia tiàià  noa atu i te ôfaì. Te hinaaro nei te tiàporo e vävähi i ù nei te feruriraa o Ietu, àhiri O ia i ôuà, te àa nei ia O Ietu i te Atua i reira. I te mea ra ua ìte o Ietu e, tei pïhaìiho te Atua ia na i te mau taime atoà. No reira, aita e tià ia na ia faatupu te faaueraa maau a te Tiàporo, a maau-atoà-hia O ia mai te Tiàporo ra te huru. No te paari ra to na feruriraa i tià ai ia na i te parau e, Eiaha oe e àa i to Atua ra ia Iehova. To na auraa teie parau, eiaha e faafäïto i to puai i nià i te mea puai aè ia oe. Te òhipa ia a te Tiàporo e rave nei, e faafäïto i to na puai i nià i te Atua. Te huru iho ä teie, no te taata teòteò te hinaaroraa e àa i nià i te mea puai aè ia na. Aita te feruriraa o Ietu e àueue nei i teie mau faanahoraa a te Tiàporo. Àreà  ra te toru o te vahi o te mouà ia, i reira to te Tiàporo faaìteraa i te hinuhinu o teie nei ao, te patireia patuhia i nià i te hinaaro o te taata. E horoàhia no Ietu ia haamori o Ietu i te Tiàporo. Eita te tiàturiraa o Ietu e ruri ê i te parauraa e, o to Atua o Iehova ta òe e haamori, e O ia anaè ra ta òe e faaroo. I teie parau haamoè rii maru noa atu ra te Tiàporo, ma te poroì òre mai e, ua upootià òe te Tamaiti a te Atua. Haere mai ra te mau merahi a te Atua e täuturu i te toa àpi o te faaroo.

Teie ra ia ara ia tätou, aita te Tiàporo i haamouhia e Ietu, ua faatea noa o ia ia Ietu. Ma te peàpeà to na àau te manuia òre ta na òpuaraa tià òre i nià i te Fatu no te ora mure òre. No reira ia haapaò maitai ia tätou, aita aè te Tiàporo mai te veri tara ra te huru ia tapuhia te veri na ropu, e täpeà ai te vahi tei reira te niho e puta-iho-a ia pätiahia, ia täparahi-roa-hia ra haapohe i reira eita ia oia e pätia faahou. Oia atoà te Tiàporo, aita o Ietu i täparahi haapohe, ua faaruè-noa-mai ra te Tiàporo ia na.

No tätou i teie mahana, eiaha tätou e ìmi i te Tiàporo i rapae au atu i to tätou tino, eiaha atoà na tihiti ia tätou. Tei roto ra ia tätou i te parahiraa, mai te Varua o te Atua e pärahi ra i roto ia tätou. Te òhipa a te Tiàporo, te ìmiraa ia i te mau haafifiraa ia òre ia tupu te mau òpuaraa a te Atua.

Àreà ra ta te Varua Maitai, te ìmiraa ia ia ora te mau òpuaraa a te Atua. Ia tupu te òaòa i roto i ta na mau tamarii tei òre i àueue te tiàturiraa. Tei noaa ia na te Varua Maitai, eita o ia e àa i te Atua. E ärataì ra te Varua o te Atua ia na i nià i te èà no te upootiàraa. Tei òre roa e tià ia na ia faataa ê i te aroha o te Atua. E tei nià taua aroha ra no te Atua ia tätou, tei na roto i to tätou päpetitoraahia. Na teie täpaò e faaìte ia tätou e, aita e parahiraa to te tiàporo i roto ia tätou. I te mea ua vai te täpaò a te Atua i nià ia tätou, ta na i haamauruüru i ta na Tamaiti, oia atoà tätou tei färii i te hinaaro mauruüru o te Atua. E tià atoà ia, ia tätou ia parau e, eiaha oe e àa i to Atua ra ia Iehova, e here ra tätou i to tätou Atua Nui Tumu Tahi.

Te Värua Maitaì e horoà o ia i te itoito i roto i te taata, ia tià  ra ia faatupu i te mau hinaaro o te Atua. Ia ìte-ä-hia te òaòa no te faaìteraa i te ora i te mau vahi atoà. Ta te haapaeraa maa a Ietu e haamanaò mai nei ia tätou, e maha àhuru ruì e te ao, òre noa atu ai ta tätou taiòraa e faahitiraa te faanahoraa, naò noa ia te manaò i te parauraa e, ua hoì o Ietu i roto i te vai, e te fenua i te vahi mai reira mai to te Atua Nui Tumu Tahi, hämaniraa i te taata i püfenuahia ai to te taata. Ua noaa te puai o Ietu i roto i te vai e te fenua.  Ia faaroo tätou i teie reo to te päpaì Taramo 51, ia au i teie mau ìrava, 10 E faaìte mai òe ia ù i te òaòa e te reàreà, ia òaòa te mau ivi i ôfatihia e òe ra. 11 E huna ê atu òe i to mata i ta ù nei mau hara, e parai hua i to ù nei mau ìno. 12 E faaau na òe i te âau mä i roto ia ù nei, e ta ù Atua. E faahou na hoì òe i te âau manaò tià i roto ia ù nei. 13 Eiaha e faaârue ia ù i mua i to aro nei, eiaha hoì e rave ê atu i to Värua Maitaì ia ù nei. 14 E faahoì mai òe i te òaòa i te ora na òe ra, e ia täuturuhia mai au e te âau tiàmä ra. 15 E i reira vau e haapii ai i te feiä rave hara i ta òe parau, e e haafäriuhia mai te rave parau ìno ra ia òe.

                                                                                                                      Ia ora na.

Teraì Òr. Faatura.