Ruta èv. 24.35-48 Hitimaùe.

 

Tāpati 18 no Èperera 2021.

Hitimaùe.

Taramo 4

1 Na te Mënätehe nä nià i te Netinota. Taramo na Tävita. 2 Ia tiàoro atu vau ra, e faaroo mai, e te Atua o ta ù parau tià ra, ua faaorahia mai au e òe i ta ù àtiraa ra. E tënä na, e aroha mai ia ù, e faaroo mai i ta ù pure.3 Mai te aha te roa, e te mau taata na, to òutou haapaò i ta ù hinuhinu nei ei mea haamä? E to òutou hinaaroraa i te faufaa òre e te ìmiraa i te haavare? Tera. 4 Ia ìte mai rä òutou, ua mäìtihia e te Fatu ta na taata paieti ra: te faaroo mai ra te Fatu ia tiàoro atu vau ia na. 5 E mataù òutou, eiaha rä e rave i te hara, a feàfeà na to òutou âau i nià i to òutou mau roì, a faaea noa ai. Tera. 6 Ei tütia parau tià ta òutou e hopoi, a tiàturi atu ai i te Fatu. 7 Rave rahi të parau e: Nä vai e faaìte mai i te maitaì ia tätou nei E nänä mai, e te Fatu, i te märamarama o to mata i nià ia mätou nei 8 Ua horoà mai òe i te òaòa i roto i ta ù âau, e ua hau i to rätou, ia faarahihia ta rätou tïtona e te uaina ra. 9 E tïraha vau i raro mä te ora, e e taòto hoì; na òe anaè rä, e te Fatu, i pärahi ai au mä te ora.

Òhipa 3.13-19

13 Na te Atua o Âperahäma, e o Ìtaata, e o Iatöpa, na te Atua o to tätou hui tupuna ra i haamana i ta na Tamaiti ia Ietu, o ta òutou i püpü nei, e ua faaruè i mua i te aro o Pirato, ia na i märô ra e, e tuu. 14 Faaruè iho nei rä òutou i te Taata Moà e te Parau tià ra, e ani atu ra hoì i te täparahi taata ia tuuhia mai ia òutou na; 15 täparahi iho nei hoì i te Tumu o te ora, i ta te Atua i faatià mai te pohe mai ra, o mätou nei ä hoì te ìte. 16 Na na i faaètaèta i teie nei taata i te faarooraa i to na iòa, i ta òutou e hiò nei, e ta òutou hoì i ìte nei: oia ia, na te faaroo hoì ia na i roaa ai ia na teie nei ora rahi mau i mua ia òutou atoà nei. 17 E teie nei, e a ù mau taeaè, ua ìte au e, e hoê ä ìte òre to òutou, e to òutou hui raatira i nä reira ai. 18 O te mau parau rä a te Atua i faaìte mai i mütaa iho i te vaha o ta na mau perofeta atoà ra, e e pohe te Metia, o ta na ia i faatupu iho nei. 19 E teie nei, e tätarahapa òutou, e e färiu mai, ia päraihia ta òutou hara, ia ìteä mai te ànotau haumärü no ô mai i te aro o te Fatu ra;

1 Ioane 2.1-5

E tauturu mai te Metia ia tätou

1 E a ù mau tamarii ra, te päpaì nei au i teie nei mau parau ia òutou, ia òre òutou ia rave i te hara. Ia roohia atu rä te hoê taata i te hara, e tià to tätou tei ô i te Metua ra, o Ietu Metia, o te taata parau tià ra; 2 e o ia hoì te täraèhara i ta tätou nei hara; eere hoì i ta tätou anaè ra, i ta to te ao atoà nei rä. 3 Teie te mea e ìte ai tätou e, ua ìte tätou ia na: ia haapaò tätou i ta na parau. 4 O tei parau e: Ua ìte au ia na, e aore o ia i haapaò i ta na parau, e haavare o ia, aore te parau mau i roto ia na. 5 O tei haapaò rä i ta na ra parau, ua maitaì roa mau ä te hinaaro o te Atua ia na. O te mea ia e ìte ai tätou e, tei roto tätou ia na ra:

Ruta èv. 24.35-48

35 Ua faaìte atoà mai ra räua i te parau ta räua i ìte i te äratià ra, e to räua ìteraa ia na i te vähiraa i te päne ra.

Te färaa mai Ietu i nä pipi àhuru mä hoê

(Mät 28,16-20; Mär 16,14-18; Ioane 20,19-23; Òhipa 1,6-8)

36 E tei te parauraa räua i taua parau ra, ua tià noa mai ra Ietu i rotopü ia rätou, nä ô mai ra: Ia ora na òutou 37 Hitimaùe atu ra rätou, e te mehameha, parau aè ra e värua ta rätou i hiò ra. 38 Ua parau mai ra o ia ia rätou: E aha òutou i hitimaùe ai? E aha i tupu ai te manaò i to òutou âau? 39 A hiò mai na i ta ù rima e ta ù âvae: o vau mau ä, A fäfä mai na ia ìte; aita o te värua e ìò e te ivi mai to ù nei, ta òutou e hiò mai nei. 40 Nä reira mai ra o ia e oti aè ra, ua faaìte mai ra ia rätou i ta na rima e ta na âvae. 41 E aore ä rätou i faaroo i te òaòa e te mäere, ua parau mai ra o ia ia rätou: E mäa ta òutou e vai nei? 42 Ua hopoi atu ra rätou i te tahi maa ià tunu na na e te meriterio. 43 Ua rave iho ra o ia, àmu iho ra i mua i to rätou aro. 44 E ua parau mai ra o ia ia rätou: Oia teie ta ù i parau atu ia òutou a pärahi atoà ai tätou ra, e ia hope te mau parau atoà no ù i päpaìhia i roto i te ture a Möte, e te mau perofeta, e te taramo i te faatupuhia e tià ai. 45 Ua faaìte mai ra o ia i to rätou âau ia ìte rätou i te parau i päpaìhia ra. 46 Ua nä ô mai ra o ia ia rätou: I nä-reira-hia taua parau ra i te päpaì, e ia nä-reira-hia to te Metia pohe e tià ai, e ia tiàfaahou mai te pohe mai i te ruì toru; 47 e ia poro-haere-hia te tätarahapa e te faaòreraa i te hara i to na ra iòa, na Ierutarëma atu nei ä, e àti noa aè te mau fenua atoà e tià ai. 48 E teie nei, ei ìte òutou i teie nei mau parau.

Manaò.

Te mau parau i faaroohia e tätou o te mau òhipa ia o ta te Atua Nui Tumu Tahi i faatupu i roto i ta na ôpuaraa faaora. E mataù tätou, eiaha rä e rave i te hara, ia feàfeà tätou i to tätou âau i te heheuraa i te mau tïtauraa e tïtauhia nei ia tätou i nià i to tätou mau huru te au faahou nei ra i te huru o te Atua, a faaea noa ai tätou. Ei tütia parau tià ta tätou e hopoi, a tiàturi atu ai i te Fatu. Na te Atua Nui Tumu Tahi, na te Atua o to tätou hui tupuna ra i haamana i ta na Tamaiti ia Ietu, o ta tätou i püpü, e ua faaruè i mua i te aro o te pohe. E teie nei, e a ù mau taeaè, ua ìte au e, e hoê ä ìte òre to tätou, e to tätou hui raatira i nä reira ai. E tauturu mai te Metia ia tätou. E a ù mau tamarii ra, te päpaì nei au i teie nei mau parau ia òutou, ia òre òutou ia rave i te hara. O tei haapaò rä i ta na ra parau, ua maitaì mau ä te hinaaro o te Atua ia na. Te faaìteraa ia a na pipi no Èmäuta  i te parau ta räua i ìte i te äratià ra, e to räua ìteraa ia na i te vähiraa i te päne ra. I fä mai ai o Ietu i nä pipi àhuru mä hoê. Nä reira mai ra o ia e oti aè ra, ua faaìte mai ra ia rätou i ta na rima e ta na âvae. Ua rave iho ra o ia i te maa i faaineinehia, àmu iho ra i mua i to rätou aro. Ua faaìte mai ra o ia i to rätou âau ia ìte rätou i te parau i päpaìhia ra. E teie nei, ei ìte òutou i teie nei mau parau. Ua horoà mai òe i te òaòa i roto i ta ù âau, e ua hau i to rätou, ia faarahihia ta rätou tïtona e te uaina ra, Hitimaùe atu ra rätou, e te mehameha, parau aè ra e värua ta rätou i hiò ra. E au mau teie mau parau ta tätou i taiò iho nei, e i faaroo, ei faatomoraa ia tätou i roto i te hau Atua. Ia òre tätou ia hitimaùe i te tupuraa o te mau faaâpïraa e tià ia ravehia, teie mau faaâpïraa o te Atua te tumu èita te taata i te mea o te Atua teie e ärataì nei i te faataaêraa i to na nünaa i te mau faanahoraa tei òre roa e au i ta na i faanaho ia ora te taata i roto i te hau. Teie atu ra te haapotoraa o na taiòraa e maha nei,

-Taramo 4, 8 Ua horoà mai òe i te òaòa i roto i ta ù âau, e ua hau i to rätou, ia faarahihia ta rätou tïtona e te uaina ra.

-Òhipa 3, 19 E teie nei, e tätarahapa òutou, e e färiu mai, ia päraihia ta òutou hara, ia ìteä mai te ànotau haumärü no ô mai i te aro o te Fatu ra;

1 Ioane 2, 3 Teie te mea e ìte ai tätou e, ua ìte tätou ia na: ia haapaò tätou i ta na parau.

Ruta Ev. 24, 37 Hitimaùe atu ra rätou, e te mehameha, parau aè ra e värua ta rätou i hiò ra.

Tatararaa.

Ua hitimaùe na pipi hoê àhuru mä hoê i te ìteraa i te Fatu tei Tiàfaahou i rotopü ia rätou, ua haamarü O ia ia rätou i ta rätou e ìte ra, ua faaea noa te mau pipi i nià i te parau no te pohe. O Ietu teie e faaitoito nei i ta na mau pipi ma te faaìte i to na mau puta âuri, te parau nei ia rätou ia täpeà i to na tino, to te värua aita to na e tino, e ua poìa o Ietu ua àmu i mua i to rätou aro, te ià tunu e te meriterio. E ua parau mai ra o ia ia rätou: ia hope te mau parau atoà no ù i päpaìhia i roto i te ture a Möte, e te mau perofeta, e te taramo i te faatupuhia e tià ai. Ua faaìte mai ra o ia i to rätou âau ia ìte rätou i te parau i päpaìhia ra. Ua nä ô mai ra o ia ia rätou: I nä-reira-hia taua parau ra i te päpaì, e ia nä-reira-hia to te Metia pohe e tià ai, e ia tiàfaahou mai te pohe mai i te ruì toru; e ia poro-haere-hia te tätarahapa e te faaòreraa i te hara i to na ra iòa, na Ierutarëma atu nei ä, e àti noa aè te mau fenua atoà e tià ai E teie nei, ei ìte òutou i teie nei mau parau. Ua faatäpeà o Ietu i to na tino i ta na mau pipi, ei haapäpüraa ua tià mau o ia mai te pohe mai, ei faaìteraa èita tei pohe i te faatere te òhipa a te Atua, o te Atua ra. Ua àmu o Ietu i te maa, èi faaìteraa ua poìa o ia i te mea o to na tino tera e tïtauraa ia haamäha te ôpu i roto i te hau. Ua parau i ta na mau pipi, ia faaotihia te papaì te ture a Mote, mau perofeta, te taramo, ma te faahiti i to ù iòa i roto i teie mau puta. Teie mau parau ta Ietu e höroà nei i ta na mau pipi no te faaö ia rätou i roto i te faanahoraa e au i te Atua. Te mea e au i te Atua, ia tätarahapa te taata, e ia riro èi ìte i te mau fenua atoà ia òre te mau taata ia hitimaùe, e ia mehameha i te mau faaâpïraa e tupu ia hanahana te Atua Nui Tumu Tahi.

No reira e Mäòhi Nui e, eiaha tätou e hitimaùe, e eiaha e mehameha, i mua i te mau òhipa e tupu nei ia ìmi ra tätou i te mau raveà i te amoraa tätou i te hopoià e au ia tätou. I roto i teie tau no te hinapaarae, hinapaarae  e reo Mäòhi tumu teie o ta te Atua i höroà ia tätou, àita teie taò i tärapape, i te mea o te tumu teie no te faatomo ia tätou i roto i te faaâpïraa, teie faaâpïraa èita te fare, èita te àhu, èita te höroà, te hinapaarae e parau teie no te taata, e no te fänau. E tau ia e tïtauhia ra i te reira uì taata ia faaâpï, ia tämä, no te mea ua mäaro roa te toto o te ôpü fëtii. Ua faaea noa te fëtii i te fëtii. E ua ìte atoà hoì tätou e, e mea au òre roa no te Mäòhi, te mau metua ihoä rä, ia faaea ta rätou huaai i te tahi no roto noa iho i taua ôpü ra. Te mea ia rätou i täpü ai i te taura ôpü fëtii o te uì taata ta te hinapaarae e fänau mai. Eiaha no te täpü noa, faataa ê atu ai, ei räveà rä no te faaitoito i te hinapaarae ia amo i te auraa o to na parau, oia hoì na roto i ta na faaâpïraa ia na, aita atu ia e värua to teie parau, faahoì i ta na e fänau mai i roto i te mä. E te reira hoì uì ta te hinapaarae e fänau mai, o na atu ra ia te papa, oia hoì te metua no te uì taata ta na e fänau. Eiaha tätou e hitimaùe, eiaha e mehameha i te tomo i roto i teie tau, te tau no te faaâpïraa. Ia faaroo hoì tätou i teie reo no Ietu i te parauraa, 44 E ua parau mai ra o ia ia rätou: Oia teie ta ù i parau atu ia òutou a pärahi atoà ai tätou ra, e ia hope te mau parau atoà no ù i päpaìhia i roto i te ture a Möte, e te mau perofeta, e te taramo i te faatupuhia e tià ai. Te faaue atoà mai ra o Ietu ia rave i teie òhipa i roto i teie tau no te hinapaarae, eiaha e hitimaùe, eiaha e mehameha.

 

Terai òr. Faatura.

 

Papa Haamori Faaroo Tāpati 11 no Èperera 2021.

Tāpati 11 no Èperera 2021.

Papa Haamori

Faaroo

Ômuaraa.

E haamaitaì au ia òe, ua faaroo mai hoì òe ia ù, e ua riro ei ora no ù. 22 Te ôfaì i faaruèhia e te feiä i patu ra, tei riro iho nei ei ôfaì tihi. O ta te Fatu teie i rave. E mea maerehia hoì i mua i to tätou nei mata. E te Atua Nui Tumu Tahi e, aroha mai ia mätou.

I teie tau no te hinapaarae te tïtauraahia nei tätou ia faatupu, Te hinapaarae, te hitu te reira o te uì i roto i te faanahoraa ôpū tamarii a te Māòhi. Ia tae i te reira uì, e motu te taura ôpū fētii, e faaâpīraa uì to reira. E hoì te âpaparaa uì na te haamataraa mai. E no te mea na te Atua e Na na anaè te faanahoraa i te parau o te taata e to na oraraa, te hinapaarae e te mau uì atoà, e faanahoraa faaroo anaè te reira. Te auraa, te Atua, e te tāatoàraa o ta na rahu, o rātou teie e rave nei i te faaâpīraa o te uì o te taata nei. Aita te taata e anihia nei e rave i te faaâpīraa, tē ani-noa-hia nei rā ia na, ia ora i roto i te faaâpīraa i faatupuhia e te Atua Nui Tumu Tahi, e te tāatoàraa o te Rahu o ta na i hōroà mai ei faufaa ora na te taata nei.

 

Haamaitaì tätou i te Atua i te hoê reo himene e tià mai tätou.

Himene.

Pärahi tätou.

 

Faaroo mai tätou i te mau parau i ta te Taramo faaìteraa.

Taramo 118.19-23

19 A ìriti na ia ù i te mau ùputa parau tià ra, e tomo vau nä reira mä te haamaitaì i te Fatu ra. 20  O te ùputa teie na te Fatu, e nä reira te feiä parau tià i te tomo 21 E haamaitaì au ia òe, ua faaroo mai hoì òe ia ù, e ua riro ei ora no ù. 22 Te ôfaì i faaruèhia e te feiä i patu ra, tei riro iho nei ei ôfaì tihi. 23 O ta te Fatu teie i rave. E mea maerehia hoì i mua i to tätou nei mata. E te Atua Nui Tumu Tahi e, aroha mai ia mätou. Âmene.

 

Himene tätarahapa.

 

Teie te huru no te ôpereraa taoà a te mau taata faaroo, i te parauraa a Pauro,

Òhipa 4.32-35

32 E hoê atu ra âau e hoê hoì värua to taua feiä rahi atoà i faaroo ra, aore roa te hoê i parau i ta na taoà e na na anaè iho, ua âmui-noa-hia na rätou atoà. 33 Ûàna mäite atu ra to te mau âpotetoro faaìteraa atu i te tiàfaahouraa mai o te Fatu ra o Ietu; tura roa atu ra hoì rätou atoà. 34 Aore roa hoì te hoê o rätou i ère, e te feiä atoà hoì e fenua to rätou ra e te fare, hoo atu ra ia, e hopoi mai ra i te hoo i taua mau mea i hoohia ra, 35 tuuhia iho ra i raro i te pae âvae o te mau âpotetoro ra; e tufahia iho ra na rätou atoà e au mäite aè ra. E te Atua e a faarahi mai i to mätou faaroo e ia Nui.

 

Haamaitaì tätou i te Atua no teie mau parau e tiaì.

Himene òaòa.

 

Teie ta tätou fäìraa faaroo, To tätou upootiàraa i nià i te ao nei i te faaìteraa a Ioane.

1 Ioane 5.1-6

1 O tei faaroo e, o Ietu te Metia mau ua haafänauhia o ia e te Atua: o tei hinaaro i tei haafänau ra, të here atoà ra ia i tei haafänauhia e ana ra. 2 Teie te mea e ìte ai tätou e, te aroha nei tätou i te tamarii a te Atua: ia hinaaro tätou i te Atua, e ia haapaò i ta na parau. 3 Teie hoì te hinaaro i te Atua, o te haapaò i ta na ra parau: eere hoì ta na parau i te mea teimaha. 4 O ta te Atua hoì i fänau ra, te vï nei teie nei ao ia na; teie hoì te mea e vï ai teie nei ao ia tätou o to tätou faaroo. 5 O vai te taata i vï teie nei ao ia na ra? Mäori rä o tei faaroo e, o Ietu te Tamaiti a te Atua.

Te faaìteraa ia Ietu Metia

6 O tei haere mai ia mä te pape e te toto, o te Metia ra o Ietu; eiaha mä te pape anaè ra, mä te pape rä e te toto. E o te Värua tei faaìte mai, e e parau mau hoì ta te Värua. Âmene.

 

Pärahi tätou.

Haamaitaì tätou i te Atua i te hoê reo himene.

 

Himene.

 

 

 

Pure

Pure tätou i te Atua, ua papa mätou i ta mätou haamoriraa ia au i te mau parau i faaroohia e mätou, e mau parau teie faaìte i to Aroha e to Here, ua ineine mätou i teie nei i te taiòraa e te faarooraa i te Parau Maitaì a to Tämaïti, teie parau ia mätou i teie mahana e Ia ora na òutou. Âmene.

 

Taiòraa.

Ta tätou taiòraa no teie mahana tei roto ia, i te Parau Maitaì o Ietu ia au i te päpaìraa a Ioane, 

Ioane 20.19-31.

Te färaa mai Ietu i ta na ra mau pipi

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou: Ia ora na òutou 20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra. 21 Ua parau faahou mai ra Ietu ia rätou: Ia ora na òutou. Mai ta ù Metua hoì i tono mai ia ù nei ra, e tono atoà hoì au ia òutou na. 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì. 23 Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia.

To Toma ìte-roa-raa i te Fatu

24 E te hoê o te Àhuru mä piti ra, o Toma, o të parauhia ia, ia Titimo ra, aore rä ia ia rätou ra a tae mai ai Ietu ra. 25 Ua parau atu ra te mau pipi ra ia na: «Ua ìte aè nei mätou i te Fatu  Ua parau mai ra o ia ia rätou: «I òre au i ìte i te puta âuri i ta na rima ra, e aore i tuu i ta ù rima i taua puta âuri ra, e aore hoì ta ù rima i tuu i ta na àoào ra, e òre roa ia vau e faaroo. 26 E ruì varu aè ra, tei roto faahou atu ra te mau pipi i te fare, e o Toma atoà hoì, ua haere mai ra Ietu, ua ôpanihia nä ôpani, ua tià mai ra o ia i röpü, ua parau mai ra: Ia ora na òutou. 27 Ua färiu mai ra ia Toma, ua parau mai ra: «A faatoro mai na to rima, e a hiò mai na hoì i ta ù rima nei; e a faatoro mai na hoì i to rima e fäfä i ta ù àoào. Eiaha e faaroo taìàtä, e faaroo rä. 28 Ua parau atu ra Toma ia na, nä ô atu ra: «E ta ù Fatu, e ta ù Atua. 29 Ua parau mai ra Ietu ia na: «No te mea te hiò mai nei òe ia ù, e Toma, i faaroo ai òe? E ao to te feiä aore i ìte ia ù a faaroo mai ai. Tei ia na te Tamaiti ra, tei ia na ia taua ora ra 30 E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta. 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Na te hau i te raì teitei e haamaitaì mai i te täiòraahia ta na parau.

 

Pure.

Pure tätou i te Atua, e Ietu tei Tiàfaahou ua parau òe ia mätou i teie poìpoì, Ia ora na òutou. Na roto i teie reo te faanä  nei òe i to mätou âau, ia pärahi noa i roto i te hau. Âmene.

Haamaitaì tätou i te Atua i te hoê reo himene.

 

Himene.

Faaitoitoraa.

Himene

Parau faaära

Himene püpüraa moni

Pure Ärai

E Atua Nui Tumu Tahi e, e  tärahu rahi roa ta mātou ia òe e te Tumu Nui e, o mātou i faaìno e i vahavaha i te ora ta te mau rāau o te fenua e faaìte noa nei, aore e mahana tuua, o mātou hoì i hiò i te reira ei mea maamaa ; e tärahu rahi atoà rā ta mātou ia òe, o mātou i vahavaha i te haèhaa o ta òe Tamaiti, i te òreraa e haamā i tē rave i te huru o te arii, e inaha, i haere tāvini mai o ia no tē faaìte ia mātou e, aita e ora to te taata i rāpae aè i te Faufaa ora ta òe i hō mai na mātou, o mātou hoì i òre i hinaaro i tē ìte i roto i te haèhaa o to mātou Faaora, i te teitei rahi fāito òre o to òe here ia mātou. Âmene.

 

Himene Âmui.

 

Pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie te faaitoitoraa.

Faaitoitoraa.

31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

 

Teie te haamaitaìraa.

Haamaitaìraa.

4 O ta te Atua hoì i fänau ra, te vï nei teie nei ao ia na; teie hoì te mea e vï ai teie nei ao ia tätou o to tätou faaroo. 5 O vai te taata i vï teie nei ao ia na ra? Mäori rä o tei faaroo e, o Ietu te Tamaiti a te Atua. Âmene.

 

Teraì òr. Faatura. 

Ioane 20.19-31. Faaroo

 

Tāpati 11 no Èperera 2021.

Faaroo

Taramo 118.19-23

19 A ìriti na ia ù i te mau ùputa parau tià ra, e tomo vau nä reira mä te haamaitaì i te Fatu ra. 20  O te ùputa teie na te Fatu, e nä reira te feiä parau tià i te tomo 21 E haamaitaì au ia òe, ua faaroo mai hoì òe ia ù, e ua riro ei ora no ù. 22 Te ôfaì i faaruèhia e te feiä i patu ra, tei riro iho nei ei ôfaì tihi. 23 O ta te Fatu teie i rave. E mea maerehia hoì i mua i to tätou nei mata.

Òhipa 4.32-35

Te ôpereraa taoà a te mau taata faaroo

32 E hoê atu ra âau e hoê hoì värua to taua feiä rahi atoà i faaroo ra, aore roa te hoê i parau i ta na taoà e na na anaè iho, ua âmui-noa-hia na rätou atoà. 33 Ûàna mäite atu ra to te mau âpotetoro faaìteraa atu i te tiàfaahouraa mai o te Fatu ra o Ietu; tura roa atu ra hoì rätou atoà. 34 Aore roa hoì te hoê o rätou i ère, e te feiä atoà hoì e fenua to rätou ra e te fare, hoo atu ra ia, e hopoi mai ra i te hoo i taua mau mea i hoohia ra, 35 tuuhia iho ra i raro i te pae âvae o te mau âpotetoro ra; e tufahia iho ra na rätou atoà e au mäite aè ra.

1 Ioane 5.1-6

To tätou upootiàraa i nià i te ao nei

1 O tei faaroo e, o Ietu te Metia mau ua haafänauhia o ia e te Atua: o tei hinaaro i tei haafänau ra, të here atoà ra ia i tei haafänauhia e ana ra. 2 Teie te mea e ìte ai tätou e, te aroha nei tätou i te tamarii a te Atua: ia hinaaro tätou i te Atua, e ia haapaò i ta na parau. 3 Teie hoì te hinaaro i te Atua, o te haapaò i ta na ra parau: eere hoì ta na parau i te mea teimaha. 4 O ta te Atua hoì i fänau ra, te vï nei teie nei ao ia na; teie hoì te mea e vï ai teie nei ao ia tätou o to tätou faaroo. 5 O vai te taata i vï teie nei ao ia na ra? Mäori rä o tei faaroo e, o Ietu te Tamaiti a te Atua.

Te faaìteraa ia Ietu Metia

6 O tei haere mai ia mä te pape e te toto, o te Metia ra o Ietu; eiaha mä te pape anaè ra, mä te pape rä e te toto. E o te Värua tei faaìte mai, e e parau mau hoì ta te Värua.

Ioane 20.19-31.

Te färaa mai Ietu i ta na ra mau pipi

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou: Ia ora na òutou 20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra. 21 Ua parau faahou mai ra Ietu ia rätou: Ia ora na òutou. Mai ta ù Metua hoì i tono mai ia ù nei ra, e tono atoà hoì au ia òutou na. 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì. 23 Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia.

To Toma ìte-roa-raa i te Fatu

24 E te hoê o te Àhuru mä piti ra, o Toma, o të parauhia ia, ia Titimo ra, aore rä ia ia rätou ra a tae mai ai Ietu ra. 25 Ua parau atu ra te mau pipi ra ia na: «Ua ìte aè nei mätou i te Fatu  Ua parau mai ra o ia ia rätou: «I òre au i ìte i te puta âuri i ta na rima ra, e aore i tuu i ta ù rima i taua puta âuri ra, e aore hoì ta ù rima i tuu i ta na àoào ra, e òre roa ia vau e faaroo. 26 E ruì varu aè ra, tei roto faahou atu ra te mau pipi i te fare, e o Toma atoà hoì, ua haere mai ra Ietu, ua ôpanihia nä ôpani, ua tià mai ra o ia i röpü, ua parau mai ra: Ia ora na òutou. 27 Ua färiu mai ra ia Toma, ua parau mai ra: «A faatoro mai na to rima, e a hiò mai na hoì i ta ù rima nei; e a faatoro mai na hoì i to rima e fäfä i ta ù àoào. Eiaha e faaroo taìàtä, e faaroo rä. 28 Ua parau atu ra Toma ia na, nä ô atu ra: «E ta ù Fatu, e ta ù Atua. 29 Ua parau mai ra Ietu ia na: «No te mea te hiò mai nei òe ia ù, e Toma, i faaroo ai òe? E ao to te feiä aore i ìte ia ù a faaroo mai ai. Tei ia na te Tamaiti ra, tei ia na ia taua ora ra 30 E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta. 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Manaò.

Te ôpereraa taoà a te mau taata faaroo tei hoê ia i to na âau e tei hoê hoì i to na  värua to taua feiä rahi atoà i faaroo ra, aore roa te hoê i parau i ta na taoà e na na anaè iho, ua âmui-noa-hia na tätou atoà. Te faaìteraa ia Ietu Metia E o te Värua tei faaìte mai, e e parau mau hoì ta te Värua. To Toma ìte-roa-raa i te Fatu E te hoê o te Àhuru mä piti ra, o Toma, o të parauhia ia, ia Titimo ra, aore rä ia rätou ra a tae mai ai Ietu ra. Eiaha e faaroo taìàtä, e faaroo rä. Tei ia na te Tamaiti ra, tei ia na ia taua ora ra. E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta. O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa. O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa. Ia faaroo tätou i te haapotoraa no te mau taiòraa tei faataahia no teie mahana.

-Taramo 118, 22 Te ôfaì i faaruèhia e te feiä i patu ra, tei riro iho nei ei ôfaì tihi.

-Òhipa 4, 33 Ûàna mäite atu ra to te mau âpotetoro faaìteraa atu i te tiàfaahouraa mai o te Fatu ra o Ietu; tura roa atu ra hoì rätou atoà.

-I Ioane 5, 4 O ta te Atua hoì i fänau ra, te vï nei teie nei ao ia na; teie hoì te mea e vï ai teie nei ao ia tätou o to tätou faaroo.

-Ioane 20, 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Te tumu.

Te parau e tià ia faatumu tätou i te manaò, teie ia faaìteraa a Ioane i te pene 20, i te ìrava 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Ia au i teie huru päpaìraa, e noaa ia tätou i te ora i to na iòa ia faaroo tätou i teie nei, to te Atua Nui Tumu Tahi ia faatomoraa  ia tātou i roto i te tau no te hinapaarae. E parau teie no te ôpū tamarii, ia au i ta te mau tupuna Māòhi i ora mai na, mai te tau âuìuì mai. E tau faufaa roa no te mea, i te reira noa tau e hoì ai te uì i te haamata-faahou-raa. E faaâpī te mau mea atoà. E motu te fētii i tāàmuhia e te taura o te toto. Aita hōê òhipa e mau i roto i teie faaâpīraa ärataìhia e te Atua, e te fenua. Tē hinaaro e tē hinaaro òre o te taata, e tupuhia ihoā ta te Tumu Nui. Nō reira, aita atu e mea e anihia i te taata māoti, te tomoraa i roto i taua faaâpīraa ra. Ta Ietu ia e faatomo nei ia tätou na roto i to na tiàfaahouraa, ma te parau i te mau pipi i te ahiahi no te mahana mätamua, e te piti no te mahana mätamua no te hepetoma i te naòraa e Ia ora na òutou, oia ia hoì te faanä nei o Ietu i te âau o ta na mau pipi ia pärahi rätou i roto i te hau. I te mea e täpura òhipa âpï ta rätou e faatupu i roto i te nünaa tei hepohepo, tei topa i roto i te ère no te faaroo te faaïti i te parau o te aroha e te here i te Atua.

Ia au i terā reo iti to te päpaì Taramo 118, ìrava 22 Te ôfaì i faaruèhia e te feiä i patu ra, tei riro iho nei ei ôfaì tihi. E teie atoà te pure a to tātou mau tupuna e nā ô rā e : « Ia Atua te Atua, ia fenua te fenua, ua maitaì roa ». E hinaaro tumu teie no te Atua Nui Tumu Tahi, ia ora noa to na nūnaa i roto i te Hau i nià i to na iho fenua. Tē vai ra ihoā teie Hau ta te Māòhi e parau noa ra, te oraraa peàpeà òre, tē vai atoà ra teie Hau ta te mau tupuna e parau atoà ra, e faatereraa i te tahi nūnaa i nià i te tahi fenua.

Âreà te Êtārētia, e parau ia no te tahi nūnaa o tei faaroo, e tei tiàturi i te Fatu hōê. O tātou nei rā hoì te nūnaa Māòhi, e nūnaa faaroo roa i te Atua, mai to na haapārahiraa i to tātou huitupuna i roto i te uru maitaì o Māòhi Nui nei, e tae roa mai i teie mahana. Nō reira, te ìritiraa teie i te Êtārētia, ia tomo na roto, i te ùputa no te nūnaa mäìtihia e te Atua, oia te nūnaa Māòhi, ia ora hope roa i to na Faaroo Māòhi Mau i te Atua ra. Te parau no te Faaroo Mäòhi Mau, ua papahia i nià i te Moana Nui a Hiva tei haaàtihia e te mau ôpape te faaìte i te mau àriàriraa o te mau òutu no te mau fenua i parauhia i te mau tamarii no Raro i te Tumu o te Fenua. No te mea te Mäòhi ei moana, èi ànavai, èi ua, èi mataì, e hau ai te fenua, èi reira o ia e ora ai. Ia faaroo hoì tätou i teie reo to Ietu, 21 Ua parau faahou mai ra Ietu ia rätou: Ia ora na òutou. Mai ta ù Metua hoì i tono mai ia ù nei ra, e tono atoà hoì au ia òutou na. 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì.

 

Teraì òr. Faatura.

Märeto 11,1-10 ; Firipi 2,6-11 Haere atu ra räua.

 

Täpati 28 no Mäti 2021

 

 

Täpati no te mau Âmaa

 

        Taiòraa : Märeto 11,1-10 ; Firipi 2,6-11

        Ìrava faaitoitoraa : Mätaio 11, 4 vm

 

Haere atu ra räua.

 

Te tomo nei tätou i roto i te tau, e haamanaò faahou ai tätou i te mau parau e faatià ra i te mau taime rii hopeà, no te oraraa o Ietu i roto i teie nei ao: to na mau àti, to na mau mauiui, to na pohe e to na tià-faahou-raa, parauhia ai teie hepetoma e, e Hepetoma Moà. I uiui rii ai te manaò e, àhiri na, mai te peu paì e, hoê anaè hepetoma i roto i te mätahiti e mea moà, e nahea ia tätou ia parau no terä pae àhuru mä hoê e toe ra. No terä noa änei mea e, e mau parau no te mau taime rii hopeà no Ietu i te ao nei, i moà ai teie hepetoma. E te mau parau no te haamataraa mai no to Ietu oraraa i te ao nei, eere ia i te mea moà?

 

Hepetoma Moà, te auraa, aita atu ia e òhipa e ìtehia i te taata i te raveraa, te haapaeraa ia i te mau mea atoà tei òre e tüàti i nià i terä parau, Moà. Ia parau-anaè-hia te parau no te Moà, e Mä, aore ra e Ora to na auraa. Rave mai tätou i te tahi hiòraa, te tahi taata maì e faauehia e te tahuà räpaau maì, e haamoà i te mäa. Te auraa, te faaätearaa aore ra te haapaeraa o ia i te mau mäa atoà të riro ei fifi no te tupuraa o te ora, ia òre e fifi e hapehape anaè e pohe roa. Te reira atoà änei hoì te mea o ta tätou e rave nei i roto i teie hepetoma ; oia hoì, te ìmiraa i te mau räveà atoà e ìtehia ai te tupuraa no te mä e te ora a te Atua i roto ia tätou, o ta Ietu i haere mai e faaìte (aita rä teie manaò e täôtià ra i te parau o te ora, e no te mä). Aore ra, aita atoà änei hoì tätou e ora noa ra i roto teie hepetoma, no terä mea, ua oti i te faanahohia e terä te taime ?

 

I roto i ta tätou taiòraa no teie täpati, te faatià ra Märeto i te huru no to Ietu tomoraa i roto i Ierutarema. E tano e parau e, ua mau âau roa teie parau ia tätou ; ahiri te tahi i roto ia tätou e uihia na e, e faatià mai i te huru no to Ietu tomoraa i Ierutarema, manaò anaè au aita e taiò-faahou-raa i roto i te pïpïria, mea tahe noa ia haere mai. E, mea faufaa i te tämau-àau-raa i te parau ! te mea faufaa roa atu rä, te ìteraa ia i te auraa o ta teie parau e tïtau mai ra ia ù, ia faatupu, ia òre, mea faufaa òre, mäuà te taime.

 

Haere atu ra räua.

 

E riro paha tätou i te maere, no te aha te manaò i haamau ai i nià i teie parau, e tumu ia. No terä mea mea pinepine teie parau i te hiòhia e tätou, e no terä atoà hoì mea e, ua parauhia teie täpati e Täpati no te mau Âmaa, e tütonu noa ihoä ia to tätou manaò i nià i te taime a haamata ai Ietu i te tomo i roto i Ierutarema. No te mea te reira atoà te taime to teie nähoà rahi i taìruru mai i taua mahana ra päfaìraa i te âmaa räau no te vauvau i nià i te èà mea nä reira Ietu i te tomoraa. Te tahi vähi atoà e tütonu ai to tätou manaò, tei nià ia i te huru no to Ietu tomoraa i roto i Ierutarema ; to na haèhaa o ta te àtini e faahohoà ra, e no te mea atoà hoì, e parau teie tei tohu-ätea-hia e te perofeta Tetaria (ìr.4-5).

 

 

 

 

Rau noa atu ä ra i to tätou haamauraa i to tätou manaò ia au i teie taiòraa, te tahi vähi ta teie parau e tïtau mai ra ia tätou, e tütonu : O te huru ia no teie nä pipi i tonohia e Ietu e tii e pütö mai i te àtini, to raua ia auraroraa i to raua Fatu. No te mea, ia hiòhia te mau parau o ta Ietu iho i parau no na, ta Tetaria perofeta hoì e tae noa atu i ta terä nähoà rahi taata i taìruru mai, teie : Ietu, e Fatu, e Arii, e veà no ô mai i te Atua ra, e perofeta.

 

No reira, mai te peu e teie te Ietu o ta te taata i faahotana, te faaìte noa mai ra te huru o terä nä pipi e, a auraro, e a faaroo paì ia i ta na parau. No te mea, ia parau anaè tätou i te tahi taata e, e fatu, te auraa aita atu ia i nià aè ia na e ta na anaè te parau, e to na anaè te reo e faaroo. Ia hiò-anaè-hia ra hoì te huru o teie mau taata i muri aè i to rätou fäìraa ia Ietu e, e Fatu, e Arii, e veà nä te Atua, e e perofeta, teie te reo i faaroohia i muri mai, A faatatatauro atu.

 

Haere atu ra räua.

 

No reira, i mua i teie parau ta tätou e hiò nei, te tïtauraa e vai nei, o te haapäpü-faahou-raa ia tätou i ta tätou parauraa ia Ietu i teie mahana ; e haapäpü faahou i to tätou tiàraa i mua ia Ietu, o ta tätou i fäì na i te tahi mahana e, o to ù ia Fatu. Te uiraa, o vai mau na Ietu no òe, no ù, no tätou i teie mahana ? Te riro mau ra änei o ia ei Fatu e ei Arii i roto i to tätou oraraa, aore ra e parauparau noa ?

 

I mua i teie mau uiuiraa, teie te reo pähono no Pauro i roto i te Firipi 2,9-11 : 9. I faateitei roa atu ai te Atua ia na, e ua horoà i te iòa i hau ê roa i te mau iòa atoà nei no na. 10.Ia tuu te mau turi atoà i raro, to te raì, to nià i te fenua e to raro aè i te fenua, i te iòa o Ietu ra. 11.E ia fäì te mau vaha atoà e, o Ietu- Metia te Fatu, e hanahana atu te Atua Metua ra.

 

Te auraa, te haapäpü noa mai ra Pauro e i mua ia vai tätou e tuu ai i to tätou turi. E te tïtauraa atoà i ô nei, e haapäpü faahou i to tätou tiàraa i mua i te Atua. Aita änei hoì tätou e tuu hänoa atoà ra i to tätou mau turi i mua i te taata i teie mahana? Te manaò o ta tätou e täpeà mai i roto i ta tätou ìrava, te parau ia no te faarooraa, te aurarooraa, e te faatupuraa i te faaueraa a to tätou Fatu. Haere atu ra nä pipi, nä reira atu ra i ta Ietu i faaue mai ia raua ra.

 

Ei faahoperaa, te hinaaro nei au e tuu atu i te tahi nau uiraa ia riro ei manaònaòraa nä tätou e e haapäpüraa atoà nä tätou i te mau mahana atoà i to tätou tiàraa : O vai òe ? Na vai òe ? e No vai òe ?

 

TE VAI NEI AU, O ÒE E VAI NA

 

Te ora ta ù e tïtau nei,

Te tumu atoà ia o te mea ta ù e haa nei.

Ua ìte te räau i te reira,

Ta te fenua atoà ia e haapii mai nei.

 

Te räau tumu òre, e räau pohe ia ;

Te räau aa òre, e räau hotu òre ia.

A ìtea te räau i te haapaeraa ia na iho,

E te hoturaa i te mäa eere i to na.

 

O vau I huna ia ù, ua huna ia ia òe.

O vau I täiva ia ù, ua täiva ia ùe.

Te vai nei au, o òe e vai na.

Ta ù i nä reira ia ù, ua nä reira ia ia òe.

 

E te Mäòhi e, o òe e te Tumu Nui, hoê ä ia.

A here ia òe, ia hanahana te Tumu Nui,

Te vain a òe, te Tumu Nui e vai nei.

Tei here òe ia òe, ua here ia I te Tumu Nui.

 

Mai te vai e faahoì i te ànaàna i te raì,

I te vähi no reira mai te märamarama,

Ia riro atoà to òe haereà,

Ei hanahana no tei hämani ia òe.

 

Ia haamaitaìhia te Atua, te Tumu o te ora, ia ora na.

 

Òrometua Tahiarii a Pihaatae

Ruta 22, 63 – 71 ‘E parau mau ta òutou e parau na, o vau ia.’

 

Monirë 29 no Mäti 2021

 

Taiòraa: Ruta 22, 63 – 71

 

‘E parau mau ta òutou e parau na, o vau ia.’

 

(Aroharaa)

 

I muri aè i to na tomoraa hanahana i Ierutarëma, teie te tahi o te mau haamataraa no to te Fatu mau hämani-ìno-raa, mau mauiui e mau àti. Hau roa atu hoì i te peàpeà, na te mau ärataì faaroo i terä tau e rave nei. Ta rätou ìmiraa i te mau räveà atoà ia roaa ta rätou pariraa no te haapohe ia na, no te mea te faahuru ê nei Ietu i ta rätou mau faanahoraa, o tei faaère ia rätou i te hanahana, te tura e mau maitaì ta rätou e fänaò nei no roto mai i te nünaa, ia au i ta rätou mau faaheporaa.

 

I mua rä i ta rätou mau haamataùraa e ta rätou mau hämani-ìno-raa, aita Ietu i òtohe, aita Ietu i huna ia na iho e to na Metua. E hau roa atu na te feiä iho e haavä nei ia na e haapäpü atoà ra i ta Ietu fäìraa :’O te Tamaiti maori òe na te Atua ?’ e o ta Ietu i haapäpü atu e :’E parau mau ta òutou e parau na, o vau ia.’

 

E au rii paì teie huru tupuraa òhipa, mai te tahi parau paari a te Rurutu e na ô ra e :’Tei ìri i te rua no te taì, o na io te topa i roto.’(Tei ô te âpoo no te tahi, o na iho te topa i roto). Te mea ia ta Ietu i rave, te faahoì noa raa te parau a te mau ärataì faaroo ia rätou iho, no te haapäpüraa i to na tiàraa Tamaiti na te Atua. Te parau tumu e täpeà mai, i roto i teie färereiraa no Ietu e te mau ärataì faaroo : Eiaha e huna, e faaìte ra i te parau mau. Haamanaò noa tätou e, ta tätou tuhaa, te ìmiraa ia i te räveà ia tupu te parau tià tüatau a te Atua i nià i te fenua nei. Ei faahoperaa :

 

HAPE HURU HAPE

 

Ta òe i huna, e òre ia e vai mai,

Ta òe i mämü, e òre ia e parauhia,

Ta òe i haamä, e òre ia e faaìtehia,

A ara, o te haamä atoà to òe fenua ia òe.

 

Te reo, e mana ia ta te Atua i horoà i te taata,

Te èà e tae ai te taata i roto i te ìteraa i te Atua,

Inaha i parau te Atua, i ìtehia ai e, te vai ra te Atua,

A parau, ia ìtehia e, te vai ra òe.

 

Ua mämü òe i to òe parau, a tahi ia hape,

Aita to vaha i fäì i to reo, tahi ä ia hape,

Ua haapeu òe i roto i te hiroà o te tahi, a tini ia hape,

Aita òe i here ia òe, ua mano tini te hape ta òe i rave.

 

A tirë i te haavare noa i te parauraa e:

E reo to ù, e fenua to ù, e peu ta ù,

Te hea reo, te hea fenua, te hea peu,

Haamä òre òe i te taiòraa i te mea ta òe i haapae.

 

O vai òe, inaha aita òe i hinaaro i te ìte ia òe,

Ua pohe te tumu ra, ei te auahi ia vai ai,

Te toe nei rä te huero e te ohi rii hou,

Na rätou e faateniteni i teie fenua.

 

Ia maitaì tätou i te Atua.

 

Òrometua Tahiarii a Pihaatae