Ioane 17.11-19 Hoê

 

Tāpati 16 no Më 2021.

Hoê

Taramo 103

1 Na Tävita E haamaitaì i te Fatu, e ta ù värua, e to roto ia ù nei, i to na ra iòa moà. 2 E haamaitaì i te Fatu, e ta ù värua, e eiaha te hoê maitaì a ana i horoà mai ra e haamoèhia. 3 O ia tei faaòre i ta òe atoà ra mau hapa, e o tei faaora i to òe atoà ra mau maì, 4 o tei faaora ia òe i te pohe, o tei faatoröna ia òe i te hämani maitaì e te aroha, 5 o tei faaî i to vaha i te maitaì, ia faaâpï-faahou-hia òe mai te àeto ra. 6 Te rave ra te Fatu i te parau tià e te au i te feiä atoà i hämani-ìno-hia ra. 7 Ua faaìte o ia i ta na haapaòraa ia Möte, e ta na òhipa i te tamarii a Ìteraèra. 8 E aroha e te hämani maitaì to te Fatu, e òre e riri vave, te rahi ra to na aroha. 9 E òre o ia e tämau i te aò mai ia tätou e òre hoì e vaiiho maro i to na riri e a muri noa atu. 10 Aita aè nei o ia i tähoo mai ia tätou e ia fäito i ta tätou mau hara, aore hoì i faautuà mai ia tätou e ia fäito i to tätou mau ìno. 11 Mai te teiteiraa o te mau raì i nià i te fenua nei, mai te reira te rahi o to na aroha i te feiä i mataù ia na ra. 12 Mai te hitià-o-te-rä e taa ê i te tooà-o-te-rä ra, o ta na ia faataa-ê-raa i ta tätou mau hara ia tätou nei. 13 Mai te aroha o te metua i ta na ra mau tamarii, o to te Fatu ia aroha i te feiä i mataù ia na ra. 14 Ua ìte hoì o ia i to tätou huru, te manaò ra o ia e, e repo tätou nei. 15 O te taata nei e au to na puè mahana i te àihere nei: mai te tiare i roto i te aru ra to na ruperuperaa. 16 Ua farara anaè te mataì nä nià iho ra, ua mou ia, e to na vähi i tupu ai ra e òre e ìte faahou ia na. 17 Âreà te aroha o te Fatu mai tahito mai ia e a muri noa atu, i te feiä i mataù ia na ra, e ta na ra parau tià i te tamarii a ta rätou ra mau tamarii, 18 i te feiä i haapaò i ta na ra faufaa, e tei haapaò i ta na ra parau e rave ra. 19 Ua haamau te Fatu i to na ra teröno i nià i te mau raì, e ua auraro te mau mea atoà nei i to na ra pätireia. 20 E haamaitaì i te Fatu, e to na ra mau merahi e, o tei hau i te püai, e ua haapaò i ta na faaueraa, i te faarooraa i ta na reo ia parau. 21 E haamaitaì i te Fatu, òutou atoà, o to na ra mau pupu, o to na ra mau tävini tei rave i to na ra hinaaro. 22 E haamaitaì i te Fatu, e ta na atoà ra mau òhipa, i te mau vähi atoà ra i to na ra hau. E haamaitaì i te Fatu, e ta ù värua e.

Òhipa 1.15-26

15 E i tei reira ra mau mahana, ua tià aè ra Pëtero i nià i röpü i te mau pipi ra, ua nä ô mai ra (hoê hänere e piti àhururaa te taata i putuputu mai): 16 «E hömä, e te mau taeaè, ia tupu te parau i päpaìhia ra e tià ai, ta te Värua Maitaì i parau mai i te vaha o Tävita i mütaa iho ia Iüta ra, o tei riro ei arataì i te feiä i haru ia Ietu ra. 17 I âmui-atoà-hia hoì o ia i roto ia mätou nei, i noaa atoà hoì teie nei töroà ia na. 18 E hoo na iho ra e taua taata ra te hoê fenua iti i te utuà o ta na hara, e maìri iho ra o ia i raro te mata, àmaha atu ra röpü ia na, purehu atu ra ta na âau i räpae. 19 E ua ìteä taua mea ra e to Ierutarëma atoà, e maìrihia iho ra taua mäa fenua iti ra i ta rätou iho parau, Àteratama, oia hoì «O te fenua toto. 20 Ua päpaìhia hoì i roto i te puta Taramo: «Ia ano to na pärahiraa, e eiaha roa ei taata e pärahi i reira, e ia riro hoì to na töroà ia vëtahi ê.» 21 E teie nei, te mau taata i âmui atoà mai ia tätou, a pärahi atoà ai te Fatu ra o Ietu i röpü ia tätou nei ra, 22 mai to na päpetito-raa-hia mai ä e Ioane ra, e tae roa mai nei i te mahana i ravehia atu ai o ia i nià ra, ia faataahia te hoê o rätou e tià ai, ei ìte e tätou atoà hoì i ta na tiàfaahouraa i nià nei. 23 Ua täpaò atu ra rätou i e toopiti puè taata, o Iotëfa Paratapa, o tei maìrihia ia Iuteto ra, e o Matätia hoì. 24 Ua pure iho ra rätou, nä ô atu ra: «E te Fatu, o tei ìte i te âau o te taata atoà nei, e faaìte mai òe i ta òe i hinaaro i eie nei puè taata, 25 ia rave atoà mai o ia i teie nei töroà i te âpotetoro, i maìri ia Iüta i te hara, ia tae o ia i to na ra vähi mau. 26 Ua tuu iho ra rätou i te terero, riro atu ra te terero ia Matätia; âmui-atoà-hia mai ra o ia i te mau âpotetoro tino àhuru mä hoê ra.

1 Ioane 4.11-16

11 E a ù mau here e, i nä reira te Atua i te aroharaa mai ia tätou nei, ia aroha atoà tätou ia tätou iho e tià ai. 12 Aita e taata i hiò i te Atua. Te aroha nei tätou ia tätou iho ra, te pärahi nei te Atua i roto ia tätou, e ua maitaì roa to na aroha ia tätou nei.13 O te mea teie i ìte ai tätou e te pärahi nei tätou i roto ia na, e te pärahi nei o ia i roto ia tätou, no te mea ua horoà mai o ia i to na Värua ia tätou nei. 14 Ua hiò aè nei mätou, e te faaìte hua nei mätou, e ua tono mai te Metua i te Tamaiti ei Ora no to te ao. 15 O të fäì hua e, o Ietu te Tamaiti a te Atua, te pärahi ra te Atua i roto ia na e te pärahi ra o ia i roto i te Atua. 16 Ua ìte hoì tätou, e ua faaroo tätou, i to te Atua aroha ia tätou nei.

Ioane 17.11-19

11 Ua òre au ua pärahi i teie nei ao; e tià rä rätou i teie nei ao, e te haere atu nei au ia òe na. E ta ù Metua Moà ra e, e tiaì òe ia rätou i ta òe i hö mai no ù i to iòa na, ia hoê aè rätou mai ia täua atoà nei ä. 12 I ta ù pärahiraa i te ao nei e rätou atoà ra, na ù ia rätou i tiaì i to iòa na; i ta òe i hö mai no ù ra, ua tiaìhia ia e au, e aore roa te hoê i moè, maori rä o te tamaiti o te pohe ra, ia tupu te parau i päpaìhia ra. 13 I teie nei rä, te haere atu nei au ia òe na, e te parau nei au i teie nei mau parau i te ao nei ia tià roa to rätou òaòa ia ù. 14 Ua tuu atu vau i ta òe parau ia rätou, e te riri nei to te ao nei ia rätou, no te mea eere rätou i to teie nei ao, mai ia ù nei hoì eere i to teie nei ao ra. 15 Aore au i pure ia òe e ia hopoi ê atu òe ia rätou i teie nei ao, ia tiaì mai rä òe ia rätou eiaha ei ìno. 16 Eere rätou i to teie nei ao, mai ia ù nei hoì eere i to teie nei ao. 17 E haamaitaì òe ia rätou i te parau mau na òe; o to parau na te parau mau. 18 Mai ia òe i tono mai ia ù i teie nei ao ra, ua tono atoà atu hoì au ia rätou i teie nei ao. 19 E ua faataa vau ia ù iho no rätou, e ia faataa-atoà-hia rätou e te parau mau.

Manaò

Taramo 103, 13 Mai te aroha o te metua i ta na ra mau tamarii, o to te Fatu ia aroha i te feiä i mataù ia na ra.

Òhipa 1, 24 Ua pure iho ra rätou, nä ô atu ra: «E te Fatu, o tei ìte i te âau o te taata atoà nei, e faaìte mai òe i ta òe i hinaaro i eie nei puè taata

1 Ioane 4, 15 O të fäì hua e, o Ietu te Tamaiti a te Atua, te pärahi ra te Atua i roto ia na e te pärahi ra o ia i roto i te Atua.

Ioane 17, 11 vh ia hoê aè rätou mai ia täua atoà nei ä.

Tatararaa.

11 vh ia hoê aè rätou mai ia täua atoà nei ä. E tià atoà i te parau e, Ia riro rätou atoà ei hoê ; mai ia täua e hoê nei.

Te parau ta tätou e hiò nei i teie mahana, te parau ia i faatupu noa nei i te uiuiraa i roto i te taata i teie mahana ; oia hoì to Ietu vairaa hou te rahuraa o teie nei ao e te parau no te hoêraa. Te manaò mätamua e au ia tätou e parau teie ia, no roto mai i te parau to te Atua faaìteraa mai ia na. I roto i tera parauraa e, i vai na Ietu, te Tämaïti hou te mau mea atoà a rahuhia ai, èere ia i roto i terä huru i ìtehia i to na taeraa mai i te ao nei ; no terä mea, e Parau tei riro mai èi taata (Ioane 1, 1). Ia parau anaè tätou e, ua riro, täpaò faaìte ia e, eere ia o na mai te taata i te haamataraa, e parau noa ra. Hou rä o ia a riro mai ai èi taata, e i roto i te parauraa, hoê ä te Metua e te Tämaïti, no terä ia mea e, e piti atoà ra e Parau, hoê ä te Metua e te Tämaïti, ia au te faaìteraa a te (Ioane 1, 1) i te vähi hopeà ;’ … e o te Atua hoì te Parau (Logo)’. No reira atoà te perofeta Ìtaia i parau ai i roto i te pene 40, 18 : O vai ta òutou e faafäïto i te Atua ? E aha ta òutou hohoà ia faaäu ia na ?

Te fifi terä i ìtehia a haamatahia ai i te tatara i terä parau Tätou i roto i te Tenete 1, 26 : E hämani tätou i te taata… No terä mea, ua hiò te taata i te hohoà ta na i ìte ia Ietu no te faatüàtiraa i terä parau ta tätou i faahiti i mua atu. E ua tae roa atoà te tahi i te parauraa e, terä Tätou e parauhia ra i roto i te Tenete, o te Toru Tahi ia, oia te Metua, te Tämaïti e te Värua Moà. Te vahi rä e tïtauhia ra ia tätou ia tütonu, o te parau ia no te tauiraa mai terä huru mätamua i ìtehia i roto i te tahi huru ê (Ioane 1, 1). Te tahi noa haapotoraa no te auraa o teie parau Toru Tahi. Mea ê ihoä te Metua, mea ê ihoä te Tämaïti, e mea ê ihoä te Värua Maitaì. Te mea rä e tähoê ra ia rätou e i parauhia ai Toru Tahi : Hoê parau, hoê manaò, e hoê ôpuaraa. Te parau a te Metua, hoê ä ia i ta te Tämaïti e ta te Värua maitaì. Te manaò o te Metua, hoê ä e to te Tämaïti e to te Värua Maitaì. E te ôpuaraa a te Metua, hoê ä ia e ta te Tämaïti e ta te Värua Maitaì : Te ora o teie nei ao.

Te vai ra terä parauraa ta Ietu e, Tei hiò mai ia ù, ua ìte ia i te Metua. Te manaò ta Ietu e hinaaro ra i te parau i ô nei, eere ia te hiòraa aore ra te raveraa i te hohoà mata, e hiò ra i te parau e te òhipa ta Ietu i rave, o tei tamata i te faaìte i te taata i huru o te Metua. No reira eiaha tätou e piri taò noa, mai tei ìtehia i roto i te tahi pae o tätou. Te mea päpü, pinepine Ietu i te parau i te parau, te manaò ra ta na e hinaaro ra i te faaìte, vähi ê roa ia.

Te tahi taime te faaroohia ra Ietu i te parauraa e, Aore o te tino e faufaa, no te värua rä te ora. (Ioane 6, 63). Te auraa no teie parau ta Ietu, eiaha e piri taò noa, eiaha e hiò noa i te päpaì, aore ra, eiaha e hiò noa i te parau, e hiò rä i te auraa, oia hoì te värua o te parau, te mea ia e ärataì i te taata i te faatupuraa i ta te parau e tïtau mai ra e rave.

Ia riro rätou atoà ei hoê ; mai ia täua e hoê nei.

Terä hoêraa to na e to na Metua, no terä mea e, na te Värua o na e ärataì ra. Te taa-ê nei ihoä o na e te Metua i teie taime, no terä mea ua riro mai o ia èi taata. O ia hoì, ua faaruè o na ia na iho, ua haamoè o na ia na iho, no te faatupuraa i te hinaaro o to na Metua, te mea ia ta Pauro e faahiti ra i roto i te Firipi 2, 5-11. Te mea ia i faatupu i te hoêraa i roto ia na e to na Metua.

 

I mau rä i teie parau, te vai ra terä parau ta Ietu i faahiti no te taata tei hinaaro i te pee ia na, E faaruè o ia ia na iho. (Mataio 16, 24). Te reira te taata e hinaarohia e haere e tävini. Te auraa, aita e taata e tano e riro èi tävini mai te peu e, eita o ia e faaruè i te vähi tei reira o ia i te raeàraahia i te parau no te haere i te vähi i hinaarohia mai ai o ia e to na Fatu. Te mea atoà ia ta Pauro e parau ra e, Ia ö te taata i roto i te Metia, ua riro ia èi taata âpï… Te tahi hiòraa tano ia rave, te parau ia no mäa tei parauhia òe e faaruè. Na mua aè rä òe e faaruè ai terä mäa, tei roto ihoä i to òe rima, e ia faaruè òe aita faahou ia ; ia tii faahou rä òe i taua mäa ra, aita ia òe i faaruè.

Te mea pinepine ihoä ia e ìtehia nei i roto i te taata, te ìtehia nei ihoä te taata i te faaruèraa i terä huru tahito no te faariroraa ia na èi taata âpï ; te haapäpüraa änei i te päpetitoraa, te haereraa änei tiàtono, te haereraa änei haapii parau maitaì, te hereraa änei e òrometua, e te   vai atu ä…

Te mea pinepine atoà rä e ìtehia nei, èita e maoro roa atu i roto i te rä huru taata âpï, erä ua tii faahou terä huru tahito ta na i faaruè. Te auraa, aita ia i faaruè roa e àita ä i riro roa èi taata âpï, e èi taata no te Atua.

Te tahi hohoà e tano e täpirihia i pïhaì iho i teie parau, te parau ia e Ìtaia no nià i te repo àraea e te pötëra (Ìtaia 45, 9). Àhiri paì te àraea i vai noa i to na vähi, i roto i te faa, i nià i te âïvi, èita o na e riro èi âuà. No te mea rä, ua faaruè o na to na vähi mauraa, i ôhie ai te pötëra i te faariro ia na èi âuà, èi hapäina, èi pita, oia hoì èi taihaa faufaa.

I mua i terä parau ta Ietu, te taata e hinaaro i te pee ia na, mai te peu èita e faaruè ia na iho, èita e haamoè ia na iho, no te reira taata, èita te parau e òhipa i nià ia na no te faatupuraa i te täuiraa. Hoê ä ia e te parau no te hoêraa ta Ietu e parau ra no na e te Metua, no te mea, te hanahana o te Metua ta na e hinaaro ra ia ìtehia e ta na e faatupu ra. Te auraa ia o terä mau parau ta na e pinepine noa ra i te faaära e, Àita vau i haere e faatupu i to ù hinaaro, to te Metua rä. Te reira atoà te huru ta Ietu e hinaaro ra i te taata, e i ta na mau pipi, ia riro rätou èi hoê.

Mai terä repo àraea, te taime o na a riro mai ai èi âuà, èi hapäina, èi pita ; i mua i te mata o te taata, eere i te àraea faahou, èita e tano e parau faahou e àraea. Eere noa atoà rä i te âuà noa, i te hapäina noa aore ra i te pita noa, te manaò rä terä o te taata hämani i riro mai èi âuà, èi pita, èi hapäina. Hoê ä ia e te parau no te mau pipi e no te taata i roto i terä manaò to Ietu e, Ia riro rätou atoà èi hoê. Te auraa, te mea faufaa, eere te ìteraahia mai e o Petero, Ioane, Mataio, Iuta, to rätou ra riroraa èi raveà e ìtehia ai te hinaaro e te hanahana o te Atua. Eere terä taata tätaì tahi te mea faufaa, te täuiraa rä ta rätou e faatupu atu.

Te âuà e te manaò o te taata na na te òhipa i riro mai ai èi âuà, hoê ä ia. Oia hoì, aita e taa-ê-raa i roto i te manaò e te tupuraa o te manaò, hoê ä. Te vähi noa e taa-ê-rii ia raua, te mea ia e, nehenehe te tahi e täpeà, areà te tahi èita ia. I nià i terä hohoà, èi reira tätou e marämarama ai i terä hoêraa o te Metua e te Tämaïti, e te huru hoêraa ta Ietu e hinaaro ra ia tupu atu i roto ia na e ta na mau pipi e i roto i ta na mau pipi rätou rätou iho.

Oia hoì, te taime e ìte ai te taata e e tupuraa o ia no te hinaaro o te Atua e ua färii i te hoì i te Atua ra, te reira noa te taime e ìtehia ai e täpaò no te hoêraa i roto ia na e to na Atua. Oia hoì, te taime e färii ai te taata e o te manaò o ia no te Atua i riro mai èi taata, te taime atoà ia e tupu ai te hoêraa i roto ia na e to na Atua.

E tano e parau e, tei mua tätou i te hiò hipa, oia te parau a te Atua, te mea e anihia ia tätou te haèhaa ia o te âau, no e faatanoraa ia òe i nià i te Fatu, e i nià i te Atua. Eiaha rä e, na te Fatu e na te Atua e faatano mai i hià ia òe, i vaho roa ia òe e vai atu ai. Èita e òre e, te tahi teie tumu no te mau âmahamaharaa e tupu nei i roto i to tätou oraraa i teie mahana, vaamataèinaa änei, poritita änei, faaroo änei, no te mea àita te Atua e Atua faahou ra i teie fenua. Eiaha no te mea e, àita tätou e rave nei i ta tätou òhipa, oia ia. Te mea noa rä e toe ra, terä parau ta te Fatu e na ô ra e : E faaruè o ia ia na iho. Oia, te tuu-hope-roa-raa tätou i te täatoàraa o to tätou tiàturiraa i roto i te Fatu, i roto i te Atua, mai te reo o te Fatu e na ô ra e : E tià ia ù ia horoà, e e tià hoì ia rave faahou. O  ta ù Metua ia i faaue ma ia ù. Te auraa ia no terä parau e, faaruè ia na iho. Oia hoì ia riro te Atua e ärataì i te taata i roto i to na oraraa, e reira noa e tupu ai te hoêraa ta te Fatu e pure nei.

 

Ia haamaitaìhia te Atua te Tumu o to tätou ora, ia ora na.

 

Peretiteni EPM.

Tahiarii òr.

Märeto 16, 9-20

 

Mahana maha 13 no Më 2021.

REVARAA

 

Taramo 47

1 Na te Mënätehe. Taramo na te tamarii a Tora. 2 E patupatu na i to òutou rima, e te mau taata e, e pii hua i te Atua i te reo ûmere ra, 3 o Tei Teitei ra, o te Fatu, të mataùhia ia, o te arii rahi ia i nià i te fenua atoà nei. 4 Na na i tuu i te mau taata i raro aè ia mätou, e te mau fenua täatoà i raro aè i to mätou âvae. 5 Na na i haapaò i ta mätou tufaa, te terero maitaì a Iatöpa ta na i hinaaro ra. Tera. 6 Te aè nei te Atua mä te ûmere, o te Fatu, mä te haruru o te pü ra. 7 E himene ei ârue i te Atua, e himene ei ârue; e himene ei ârue i to tätou arii, e himene ei ârue.8 O te Atua hoì te arii i te mau fenua atoà nei, o te Atua ta òutou e himene mä te ìte ra. 9 Tei te Atua te hau i te mau fenua atoà nei, te pärahi ra te Atua i nià i to na ra teröno moà. 10 Tei reira te mau tävana o te mau taata i te âmuiraa, te mau taata no te Atua o Âperahäma, no te Atua hoì, o tei faateitei-roa-hia ra, te päruru o te fenua nei.

Òhipa 1,1-11

Te Värua Maitaì i fafauhia i te mau âpotetoro

1 I päpaì na vau i tei mütaa iho ra papaa parau, e Teofiro, no te mau mea atoà a Ietu i rave e ta na i haapii ra, 2 e tae roa aè nei i te mahana i ravehia atu ai o ia i nià ra, ia oti te mau àpotetoro i mäìtihia e ana ra, i te poroìhia e ana i te Värua Maitaì. 3 O ta na atoà ia i faaìte ia na iho i te oraraa, i muri aè i ta na poheraa, mä te täpaò hapa-òre e rave rahi ra; e maha hoì àhururaa o na ruì i te hiòhiò-raa-hia e rätou, e te parauraa o ia ia rätou i te parau o te Pätireia o te Atua. 4 E haaputuputu aè ra o ia ia rätou ra, ua aò atu ra ia rätou: «Eiaha e faaruè ia Ierutarëma, e tiaì rä i ta te Metua i parau mai ra, o ta òutou i ìte na ia ù ra. 5 Ua päpetito ä hoì Ioane i te pape, e päpetitohia rä òutou i te Värua Maitaì i eie nei puè mahana.

Te revaraa o Ietu

6 E putuputu aè ra rätou, ua ui mai ra rätou ia na, nä ô mai ra: «E te Fatu, ei teie nei änei òe e faahoì mai ai i te hau ia Ìteraèra? 7 Ua parau atu ra rä o ia ia rätou: «Aore ia i haapaòhia e ia ìte òutou i te taime e te ànotau, i vaiihohia e te Metua ia na iho ra. 8 E noaa rä to òutou mana i te Värua Maitaì ia haere mai i nià iho ia òutou: e ei ìte hoì òutou no ù i Ierutarëma nei e Iutea atoà hoì e àti noa aè, e Tämäria, e tae noa atu i te hopeà o te fenua ra. 9 E te parau noa ra o ia i taua mau parau nei, e te hiò noa mai ra rätou ia na, ravehia atu ra o ia i nià, e vehia mai ra o ia e te ata, moè atu ra o ia i to rätou mata. 10 E tei to rätou tiàtonu-mäite-raa i nià i te raì i te peeraa atu o ia i nià ra, inaha, te tià noa mai ra e toopiti puè taata i pihaì iho ia rätou mä te àhu teatea; 11 o tei parau mai ia ia rätou e: E te mau taata o Tarirea nei, e aha òutou i tià noa ai e i tiàtonu märô ai i nià i te raì ra? O Ietu nei ä, tei ravehia aè nei i nià i te raì, e hoì mai ia mai te reira atoà ra, mai ta òutou i ìte atu ia na i te revaraa atu i nià i te raì ra.

Èfetia 4.1-13

Te hoêraa o te tino

1 E teie nei, te aò atu nei au, te taata i täpeàhia i te Fatu nei, ia òutou, ia au to òutou haereà i te parauraa i parauhia mai ai òutou na, 2 mä te âau haèhaa, e te marü, mä te haamahuraa roa, i te faaòromaìraa te tahi i te tahi mä te aroha; 3 mä te ara mäite ia vai ä te au tähoê a te Värua i te àti ra i te hau. 4 Hoê ä tino, hoê hoì Värua, mai ia òutou hoì i parauhia i te tiaìraa hoê o to òutou parauraa ra. 5 Hoê hoì Fatu, hoê faaroo, hoê päpetito, 6 hoê Atua o te Metua o te taata atoà ra, e tei nià iho hoì i te taata atoà, e tei pihaì iho i te taata atoà, e tei roto hoì ia òutou atoà.

7 Ua horoàhia mai hoì te maitaì ia tätou atoà nei, i ta te Metia i au i te horoà mai. 8 Oia i parauhia ai e: «Ia na i reva i nià ra, e tïàa rahi tïtï ta na i arataì, e ua horoà mai i te maitaì i te taata nei.» 9 (E o ia hoì i reva i nià ra, eere änei no te mea ua pou mai na o ia i raro i te vähi haèhaa i teie nei ao? 10 O tei pou mai i raro nei, o tei reva ä ia i nià roa atu i te mau raì atoà nei, ia faaî o ia i te mau mea atoà ra.) 11 E ua haapaò o ia i e tahi pae ei àpotetoro, e te tahi pae ei perofeta, e te tahi pae ei haapii-èvaneria, e te tahi pae ei tiaì e ei òrometua; 12 ei faaau i te feiä moà i te òhipa ra e òrometua, ia tupu i te maitaì o te tino o te Metia ra. 13 Ia riro tätou atoà nei ei taata paari, i te faaroo hoê e te ìte hoê i te Tamaiti a te Atua, ia taeà te fäito ra i te î o te Metia i te rahi;

Märeto 16.9-20

Te färaa mai Ietu ia Märia i Matätara

(Mät 28,9-10; Ioane 20,11-18)

9 Tià aè ra Ietu i nià i te poìpoì roa i te mahana mätamua o te hepetoma ra, e ua nä mua i te faaìte ia na iho ia Märia i Matätara ra, ta na i tiàvaru nä tëmoni toohitu no roto ia na ra. 10 Haere atu ra o ia, faaìte atu ra i te feiä i pee ia na ra, te mihi noa ra ia mä te roimata. 11 Ia faaroo rä rätou e ua ora o ia, e ua ìteä ia na, aore rätou i faaroo.

Te färaa mai Ietu i nä pipi toopiti

(Ruta èv 24,13-35)

12 E muri aè ra, ìteä iho ra o ia i e toopiti o rätou mä te huru ê, i to räua haere-noa-raa i räpae. 13 Ua hopoi mai ra räua, e ua faaìte mai ra i e tahi pae, aita rä rätou i faaroo ia räua.

Te tono-raa-hia te mau pipi

(Mät 28,16-20; Ruta èv 24,36-49; Ioane 20,19-23; Òhipa 1,6-8)

14 E muri aè ra, ua faaìte mai ra o ia i te tino àhuru mä hoê, i ta rätou àmuraa mäa ra, ua àvau mai ra ia rätou i to rätou faaroo òre, e te märô, o rätou aore i faaroo i te feiä i ìte ia na i muri aè i to na tiàfaahouraa ra. 15 E ua parau mai ra ia rätou: «E haere òutou e àti noa aè te mau fenua atoà, e faaìte haere i te Èvaneria i te taata atoà. 16 O të faaroo e ua päpetitohia, e ora ia; âreà o të òre e faaroo ra, e faahapahia ia. 17 E te feiä faaroo ra, e riro ia rätou teie nei mau täpaò: e hee te mau tëmoni ia rätou i to ù nei iòa; e parau hoì rätou i te parau âpï; 18 e rave noa hoì rätou i te ôfï; e ia inu rätou i te mea taèro, e òre rätou e ìno; e ora hoì te maì ia rätou ia tuu i to rätou rima i nià iho.

Te revaraa o Ietu

(Ruta èv 24,50-53; Òhipa 1,9-11)

19 E oti aè ra ta te Fatu parauraa mai ia rätou, ravehia mai ra o ia i nià i te raì, pärahi atu ra i te rima àtau o te Atua ra. 20 Haere atu ra rätou, parau haere atu ra i te mau vähi atoà, e te Fatu atoà hoì i te rave-atoà-raa i te òhipa, e te faatupuraa i taua parau ra, i te mau temeio atoà i ravehia ra. Âmene.

Tätararaa.

Eiaha tatou e manaò e a tahi roa ra a tupu ai teie òhipa, no te revaraa te taata i nià i te raì,  ua tupu ätoà ra teie òhipa i roto i te faufaaraa mätamua. O e Noha hoê tei rave-ora-noa-hia e te Atua, reva ätu ra o ia i te raì. O Eria te piti, e pereoo puaahorofenua ia to na i te revaraa i te raì. E na taata paieti teie tei ora tämau maite i te mau hinaaro o te Atua, e tei òre-roa i ìte i te pohe e te tähuti.

Te taiòraa ra ta tätou i faaroo äè nei, e parau ia no to Ietu reva hanahanaraa i te raì, no te pärahi i te rima àtau no te Atua. Ua tupu ia teie parau ta tätou i muri äè i to Ietu Tiàfaahouraa mai te pohe mai, ua faaineine ateä Ò ia to na revaraa na roto i na 40 mahana te maoro. Ma te faaìte ia na iho i te mau taata e rave rahi, e tià ia tätou ia parau e, 10 taime to Ietu färaa i mua i te mau taata tei faaèa i roto i te òto i te òhipa riàrià tei tupu i nià i te Fatu tei tiàturihia Ò ia äè te ìriti i te nunaa o te Atua i rapae i te mau faatïtïraa rau e tupu nei.

Teie  taua mau taime ra,

1) i mua ia Maria i Matätara                                         Märeto          16:9-10, Ioane 20:14.

2) i mua ia Maria i Matätara e te tahi Maria                 Mataio           28:1-9.

3) i mua i na pipi no Emäuta                                         Märeto         6:12;    Ev.Ruta24:13.

4) i mua ia Petero                                                           I Torin.       15:5,    Ev. Ruta 24:34.

5) i mua i na Apotetoro 10                                             Ev. Ruta     24:36, Ioane 20:19.

6) i mua i na Apotetoro 11                                             Märeto        16:14, Ioane 20:26.

7) i mua i te mau Apotetoro i te hiti roto no Tïpëria      Ioane           21:1-24.

8) i mua i na Apotetoro 11 i te mouà no Tarirea            I Torin.       15:5,    Mat 28:16.

9) i mua i te mau taata e 500                                           I Torin.      15:6.

10) i mua ia Iatöpo                                                           I Torin.     15:7.

Teie ia te huru no to Ietu faaineineraa i to na revaraa.

E aha te tumu ?

No te mea ua paruparu to rätou faaroo, e ua faaruè i te òhipa ta rätou i patu mai, aita e tiàturi faahou ra i te mau haapiiraa i horoàhia ia rätou no te pohe e te tiàfaahouraa, ua vai rätou i roto i te rupehu no te peàpeà. Na teie mau färaa no Ietu e haapäpü e, te ora nei Ò ia, aita O ia i mau i te pohe i te natinati i te vahi no hate.

Te faaìte ätoà nei ra Ò ia e, èita ò ia e faaèa tumu i rotopü ia rätou. Te hoì nei ra Ò ia i to na Metua ra. Âuë ia parau peàpeà no te mau pipi, ua manaòhia e, e pärahi tumu faahou mai te Fatu i pïhaìiho ia rätou. E haere ra O ia i te vahi no reira mai Ò ia. Nahea ätu ra ia i teie nei, E riro änei rätou èi mau tamarii òtare? Èita. E mea päpü maitai, èita rätou e riro èi mau tamarii òtare.

I Tarirea, i nià i te mouà ra no Òriveta te tupuraa ta tätou parau no teie hora paieti. I reira to Ietu paraparau hopeàraa i ta na mau pipi i te mau parau no to na Pätireia. Ua horoà ia rätou i te hoê faaueraa, EIAHA E FAARUÈ IA Ierutarëma, E TIAÌ RA I TA TE METUA E PARAU MAI RA, ÒIA HOÌ TE MAHANA E PAPETITOHIA AI RÄTOU I TE VÄRUA MAITAÌ. E ère teie nei revaraa te hopeà no teie nei ao, e haamataraa ra no te hoê tau âpï, no te òhipa âpï ta te mau pipi e rave, èi ìte no te mau òhipa tei faaìtehia ia rätou, i Ierutarëma te oire i faaìnohia ai o Ietu, i Tämaria e i te mau vahi ätoà, e tae noa ätu i te hopeà no te mau fenua ra, òia hoì, i te mau fenua ätoà, i te mau nunaa ätoà, e i te mau reo ätoà. No te faaìte e ua tià mau te Metia, to tätou Fatu, e te Fatu no to te ao ätoà nei. Ua ìte hoì te mau pipi i te Fatu, ua faaroo i ta na mau parau e te mau haapiiraa. E aha te mea e toe nei. Te haereraa e faaìte i te mau vahi ätoà.

E ère änei teie mahana revaraa i te hoê mahana peàpeà no te Ètärëtia, ìnaha, mai taua mahana ra e tae mai i teie nei, e hia mäororaa to na taaêraa i to na Fatu? No te mau pipi, ua riro mau taua mahana ra, èi mahana peàpeà, no te mea, aita faahou te Fatu i pïhaìiho ia rätou no te faaitoito e no te ärataì hoì. No reira, aita ätu e hinaaro rahi i roto ia rätou, mau ri ra, ia vave to na hoìraa mai ma te hanahana.

E riro ätoà ra te mahana revaraa, èi mahana peàpeà òre, èi mahana òaòa e te haamaitaìraa. Aita taua mahana ra e faaère nei i te mau pipi i te tahi mea, ìnaha hoì, o te haamataraa ia e o te tumu hoì e niniihia mai ai te Värua Maitaì i nià iho ia rätou. O te taime ra teie no te haamanaòraa i te parau fäfau a te Fatu.

AREA IA HOPOIHIA VAU I NIA RA, E ÙMEHIA MAI IA E AU TE TAATOA IA U NEI (Ioane 12:32).

E teie hoì te tahi, E PARAU MAU TA U E PARAU ATU IA ÒUTOU NEI, E MAITAÌ AI ÒUTOU, O VAU E HAERE Ê NEI (Ioane16:7).

No reira, aita te mau pipi e faaruèhia nei. Na te Varua o te Fatu, ta na e tono mai, e faaâpï ia rätou e faariro ia rätou èi mau taata âpï e te itoito, o te tià ia färii i te mau faaueraa a te Atua e ia faatere i te Ètärëtia. E ère ra o te reira änaè. Te parau no te revaraa, i teie ätoà mahana, ua matara o Ietu e a muri noa ätu i te mana no te ìno e no te pohe. Ua tupu nehenehe mau teie mahana te upootiàraa no te tiàfaahouraa, e mai teie ätu mahana, e pärahi Ietu i te pae àtau i te teröno o te Atua, i roto i te hanahana ta na i haapae no te haere mai e faaora ia tätou. Na roto i to na àmui-faahou-raa i roto i te mana no te Metua, te faatere nei Ò ia ma te mana arii e tae noa ätu i te hopeà o te mau tau.

I muri mai i teie mau parau rii ta te Èvaneria a Märeto e faatià nei i te pene 16 ma te ìrava 14 e tae i te ìrava 20, e mea tià ia tätou ia täpeà ma te faaroo i te parau âpï òaòa tei turu i to tatou tiàturiraa, i roto i teie nei ao tei reira to Tätani òhiparaa. O Ietu Metia, o te Fatu ia tei pärahi i teie nei i te pae àtau no to na Metua. No reira i te mau mätahiti tätaì tahi, te faahanahana nei te ÈTÄRËTIA i te mahana revaraa, òia hoì te mahana no to Ietu tomoraa i roto i to na hau.

Te hoi-faahou-raa mai no te Fatu tei faaärahia mai i taua mahana ra, te faahuru ê nei ia i te mau mea e tupu nei. Na te tiàturiraa e faafarerei-faahou-raa i te Fatu e turäma nei i te mau tämataraa o teie tau. E taime au ia teie no te oraraa o te Ètärëtia, no te tiäì i te hoìraa mai o te tane faaipoipo âpï. E te mau òhipa ta tätou e rave nei, o te mau faaineineraa ia no te Patireia ta te Atua iho i tïtau mai ia tätou.

No reira, to Ietu tonoraa i ta na mau pipi i te taime no to na revaraa, ia haere rätou i nià i te mau èà o teie nei ao no te faaìte haere i te tere mätamua e to na hoìraa mai. O te Ètärëtia tera e haere ra.

 

HAERE ATU RA RÄTOU, PARAU HAERE ÄTU RA I TE MAU VAHI ÄTOA.

 

Teraì òr. Faatura.

 

Papa Haamori Here Tāpati 9 no Më 2021.

 

Tāpati 9 no Më 2021.

Papa Haamori

Here

Färiiraa.

Ia ora na, na te Taramo 98 e färii ia tätou i teie taime haamoriraa, tätou e faataa nei no te Atua Nui Tumu Tahi.

Taramo 98

1 Taramo. E himene i te Fatu i te himene âpï, e mau mea taa ê hoì tei ravehia e ana, no to na iho rima àtau e to na rima moà, i riro mai ai te rë ia na. 2 Ua faaìte mai ra te Fatu i te ora na na, i mua i te mata o te mau nünaa atoà ra, te faaìte-raa-hia te parau tià na na ra. 3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua. 4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene. 5 A himene i te Fatu mä te tïnura, mä te tïnura e te reo haamaitaì atoà ra; 6 mä te mau pü e te òto o te tuferi, te harururaa i te haamaitaì i te arii ra, i te Fatu.7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre.

Haamaitaì tätou i te Atua i te hoê reo Himene, e tià mai tätou.

 

Himene.

Pärahi tätou.

 

Faaroo tätou i reo o Pëtero i te parauraa i te nünaa o te Metia tei tiàfaahou, ta te Metua i here, i te faaìteraa a te puta Òhipa.

Òhipa 10.25-48

25 E tei te tomoraa atu Pëtero i roto ra, ua färerei mai ra Torenerio ia na, haamaìri iho ra i raro i ta na pae âvae, tähopu mai ra ia na. 26 Ua faatià atu ra rä Pëtero ia na, nä ô atu ra: «A tià, e taata atoà hoì au nei. 27 Ua paraparau iho ra räua, e haere atu ra i roto, roohia atu ra ua putuputu te taata e rave rahi. 28 Ua parau atu ra o ia ia rätou: «Ua ìte hoì òutou e, e òre te taata âti-Iüta e âmui atu, e e òre hoì e tomo i te fare o te taata o te hoê fenua ê ra. Ua faaìte mai rä te Atua ia ù e, eiaha vau e parau i te taata e, e viivii e te mä òre hoì. 29 I haere mai ai au i te tïpapa-raa-hia aè nei, aore au i märô. E teie nei, e ui atu vau, no te aha i tïpapa aè ai òutou ia ù nei? 30 Ua parau mai ra Torenerio: «A ruì maha aè nei te haapae ra vau i te mäa e tae aè ra i teie nei hora. E i te iva o te hora i pure ai au i roto i ta ù fare, e inaha, ua tià noa mai ra te hoê taata i mua ia ù mä te àhu ànaana, 31 e ua nä ô mai ra: «E Torenerio, ua faaroohia ta òe pure, e ua manaòhia to òe hämani maitaì i mua i te aro o te Atua ra. 32 E teie nei, e faatono òe i te taata i Iopa, e parau atu ia Timona e haere mai i ô nei o të parauhia ia Pëtero ra. E tià o ia i tähatai i te fare o Timona räpaau-ìri ra i te taòtoraa, e ia tae mai o ia ra, na na ia e paraparau mai ia òe.» 33 I reira ra to ù tonoraa atu i te veà ia òe, e maitaì atu ra o òe i haere mai nei. E teie nei, teie anaè mätou tei mua i te aro o te Atua, ia ìte mätou i te mau parau atoà a te Atua i poroì iho ia òe ra.

To Pëtero ôreroraa i mua ia Torenerio mä

34 Ua parau atu ra te vaha o Pëtero: «Ua ìte mau atu ra vau e òre te Atua e haapaò i te huru o te taata. 35 O tei mataù rä ia na, e o tei rave i te parau tià i te mau fenua atoà ra, o të ìtehia mai ia e ana. 36 Ua ìte hoì òutou i te parau ta na i häpono mai i te tamarii a Ìteraèra ra, i te parau-haereraa i te Parau Maitaì i te hau ra ia Ietu Metia o te Fatu no te mau mea atoà ra. 37 O te parau i parauhia nä Tarirea mai ra e àti noa aè Iutea atoà ra, i muri aè i te päpetito i parau-haere-hia e Ioane ra: 38 ia Ietu o Nätareta, o tei faatähinuhia mai e te Atua i te Värua Maitaì e te mana ra; o tei hämani maitaì haere ra, e te faaoraraa i te feiä atoà i neìneìhia e te tiàporo ra, tei ia na ra hoì te Atua. 39 O mätou nei hoì të ìte i te mau peu atoà ta na i rave i Ierutarëma ra, e te fenua atoà hoì o te âti-Iüta ra; e ua täparahi hoì rätou e faauta atu ra ia na i nià i te räau. 40 Oia hoì ta te Atua i faatià aè nei i nià i te ruì toru ra, e ua faaìte ia na i te vähi ätea ra; 41 eiaha rä i te taata atoà ra, i te feiä rä i haapaòhia e te Atua ei ìte ra, oia hoì mätou nei, o tei àmu atoà e tei inu hoì e o ia atoà, i muri aè i ta na tiàraa mai mai te pohe mai ra. 42 E ua poroì iho o ia ia mätou e, e parau haere mätou i te taata, e faaìte hua atu hoì e o ia tei haapaòhia e te Atua ei haavä i tei ora e tei pohe ra hoì. 43 Oia hoì ta te mau perofeta atoà i parau mai ra e, o të faaroo ia na ra, e matara ia ta rätou hara i to na ra iòa. E te Atua e, a faaòre mai ta mätou hara tei hara ia Òe. Âmene.

 

Himene tätarahapa.

 

 

To te nünaa färiiraa i te Värua Maitaì, 44 E te parau atu ra Pëtero i taua mau parau nei, ua maìri mai ra te Värua Maitaì i nià iho i taua feiä atoà i faaroo mai i taua parau ra. 45 E te feiä atoà o te peritome i faaroo ra, o tei haere atoà mai rätou o Pëtero ra, mäere atu ra rätou, i te mea i niniihia mai te Värua Maitaì horoà-noa-hia ra i nià atoà i te nünaa. 46 I faaroo atu ra hoì rätou ia rätou i te parauraa i te parau èê, e te haamaitaìraa i te Atua. Ua parau atu ra Pëtero ia rätou: 47 E tià änei i te taata ia faaòre i te pape ia òre ia päpetitohia teie nei feiä, o tei noaa hoì ia rätou te Värua Maitaì mai ia tätou atoà nei? 48 Ua parau atu ra Pëtero ia rätou e päpetito mä te iòa o te Fatu ra. Ua täpeà mai ra rätou ia na ia pärahi o ia io rätou ra i e fanu puè mahana. Haamaitaì tätou i te Atua no teie mau parau òaòa e tià ai.

 

Himene òaòa

 

Teie ta tätou fäìraa faaroo i te faaìteraa a Ioane âpotetoro,

 

1 Ioane 4.7-10

E aroha te Atua

7 E a ù mau here e, e aroha tätou ia tätou iho, no ô mai hoì te aroha i te Atua ra. E o tei aroha ra, ua haafänauhia ia e te Atua, e ua ìte hoì o ia i te Atua. 8 O tei òre i aroha ra, aore ia i ìte i te Atua; e aroha hoì te Atua. 9 Ua ìteä to te Atua aroha ia tätou nei, o te Atua i tono mai i ta na Tamaiti fänautahi i te ao nei, ia ora tätou ia na. 10 O te aroha mau teie, eere rä e na tätou i aroha atu i te Atua, o ia rä tei aroha mai ia tätou nei, e ua tono mai i ta na Tamaiti ei täraèhara i ta tätou nei hara. Âmene.

 

Pärahi tätou.

Haamaitaì i te Atua i te hoê reo himene.

 

Himene.

 

Pure

Pure tätou i te Atua, te Atua e ua parau ta òe Tämaïti ia mätou, ia aroha òutou ia òutou iho, mai ia ù e aroha atu ia òutou na. Âmene.

 

Te parau ta tätou e taiò, te Parau maitaì ia no Ietu i te päpaìraa a Ioane.

 

Ioane 15.9-17

9 Mai te Metua i here mai ia ù nei ra, ua here atoà atu hoì au ia òutou: ia vai-here-hia atu ä òutou e au. 10 I haapaò òutou i ta ù ra parau, e vai-here-hia atu ä òutou e au; mai ia ù i haapaò i te parau a ta ù Metua ra, e te vai-here-hia nei ä vau e ana. 11 I parau atu vau ia òutou i teie nei mau parau, ia vai ä to ù òaòa ia òutou, e ia tià atoà hoì to òutou òaòaraa. 12 Teie ta ù parau, ia aroha òutou ia òutou iho, mai ia ù e aroha atu ia òutou na. 13 Ia horoà te taata i to na iho ora no to na ra mau täuà, aita roa e taata aroha ê atu i tei reira. 14 O òutou to ù täuà ia haapaò òutou i te mau parau atoà ta ù i parau atu ia òutou na. 15 Eita atu rä vau e parau atu ia òutou e e tävini; aore hoì te tävini i ìte i ta to na ra fatu e rave ra. Ua parau rä vau ia òutou e e täuà; ua faaìte atu hoì au ia òutou i te mau parau atoà ta ù i ìte i ta ù Metua ra. 16 Eere o òutou tei hinaaro mai ia ù, o vau rä tei hinaaro atu ia òutou, e ua haapaò ia òutou ia haere òutou e ia hotu i te huero, ei huero vaiiho taìàtä, ia horoà mai te Metua ia òutou i ta òutou e ani atu mä to ù nei iòa ia na ra. 17 Teie ta ù parau ia òutou, ia aroha òutou ia òutou iho.

Na te Atua e haamaitaì mai te täiòraahia.

 

Pure

Pure tätou i te Atua, te Atua tei Aroha mai ia mätou mauruüru no teie mau faaueraa no te here, aroha mai ia mätou. Âmene.

 

Haamaitaì tätou i te hoê reo himene.

 

Himene.

Faaitoitoraa

Himene

Parau faaära

Himene püpüraa moni.

 

Pure Ärai

Pure tätou i te Atua, Aroha mai ia mātou e te Tumu Nui e. Mai ta òe i haapii mai ia mātou nā roto i to Tämaïti tei tiàfaahou, hōroà mai ia mātou i te òaòa, te itoito, e te pūai, i te here-faahou-raa i to mātou māòhiraa, te hereraa i te vauvau heeuri ta òe i hohora ei pārahiraa no mātou, e te hereraa hoì ia òe, te Tumu hōê roa o to mātou ora, te Atua i Vai na, e Vai nei, e Vai ā. Âmene.

 

Pure a te Fatu

Amui to tätou reo i roto i te pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie te faaitoitoraa.

Faaitoitoraa.

12 Teie ta ù parau, ia aroha òutou ia òutou iho, mai ia ù e aroha atu ia òutou na.

 

Teie te haamaitaìraa.

Haamaitaìraa.

9 Mai te Metua i here mai ia ù nei ra, ua here atoà atu hoì au ia òutou: ia vai-here-hia atu ä òutou e au. 10 I haapaò òutou i ta ù ra parau, e vai-here-hia atu ä òutou e au; mai ia ù i haapaò i te parau a ta ù Metua ra, e te vai-here-hia nei ä vau e ana. Âmene.  

 

 

Teraì òr. Faatura.

 

 

Ioane 15.9-17 Here

 

Tāpati 9 no Më 2021.

Here

Taramo 98

1 Taramo. E himene i te Fatu i te himene âpï, e mau mea taa ê hoì tei ravehia e ana, no to na iho rima àtau e to na rima moà, i riro mai ai te rë ia na. 2 Ua faaìte mai ra te Fatu i te ora na na, i mua i te mata o te mau êtene atoà ra, te faaìte-raa-hia te parau tià na na ra. 3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua. 4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene. 5 A himene i te Fatu mä te tïnura, mä te tïnura e te reo haamaitaì atoà ra; 6 mä te mau pü e te òto o te tuferi, te harururaa i te haamaitaì i te arii ra, i te Fatu.7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre.

Òhipa 10.25-48

25 E tei te tomoraa atu Pëtero i roto ra, ua färerei mai ra Torenerio ia na, haamaìri iho ra i raro i ta na pae âvae, tähopu mai ra ia na. 26 Ua faatià atu ra rä Pëtero ia na, nä ô atu ra: «A tià, e taata atoà hoì au nei. 27 Ua paraparau iho ra räua, e haere atu ra i roto, roohia atu ra ua putuputu te taata e rave rahi. 28 Ua parau atu ra o ia ia rätou: «Ua ìte hoì òutou e, e òre te taata âti-Iüta e âmui atu, e e òre hoì e tomo i te fare o te taata o te hoê fenua ê ra. Ua faaìte mai rä te Atua ia ù e, eiaha vau e parau i te taata e, e viivii e te mä òre hoì. 29 I haere mai ai au i te tïpapa-raa-hia aè nei, aore au i märô. E teie nei, e ui atu vau, no te aha i tïpapa aè ai òutou ia ù nei? 30 Ua parau mai ra Torenerio: «A ruì maha aè nei te haapae ra vau i te mäa e tae aè ra i teie nei hora. E i te iva o te hora i pure ai au i roto i ta ù fare, e inaha, ua tià noa mai ra te hoê taata i mua ia ù mä te àhu ànaana, 31 e ua nä ô mai ra: «E Torenerio, ua faaroohia ta òe pure, e ua manaòhia to òe hämani maitaì i mua i te aro o te Atua ra. 32 E teie nei, e faatono òe i te taata i Iopa, e parau atu ia Timona e haere mai i ô nei o të parauhia ia Pëtero ra. E tià o ia i tähatai i te fare o Timona räpaau-ìri ra i te taòtoraa, e ia tae mai o ia ra, na na ia e paraparau mai ia òe.» 33 I reira ra to ù tonoraa atu i te veà ia òe, e maitaì atu ra o òe i haere mai nei. E teie nei, teie anaè mätou tei mua i te aro o te Atua, ia ìte mätou i te mau parau atoà a te Atua i poroì iho ia òe ra.

To Pëtero ôreroraa i mua ia Torenerio mä

34 Ua parau atu ra te vaha o Pëtero: «Ua ìte mau atu ra vau e òre te Atua e haapaò i te huru o te taata. 35 O tei mataù rä ia na, e o tei rave i te parau tià i te mau fenua atoà ra, o të ìtehia mai ia e ana. 36 Ua ìte hoì òutou i te parau ta na i häpono mai i te tamarii a Ìteraèra ra, i te parau-haereraa i te Parau Maitaì i te hau ra ia Ietu Metia (o te Fatu no te mau mea atoà ra). 37 O te parau i parauhia nä Tarirea mai ra e àti noa aè Iutea atoà ra, i muri aè i te päpetito i parau-haere-hia e Ioane ra: 38 ia Ietu o Nätareta, o tei faatähinuhia mai e te Atua i te Värua Maitaì e te mana ra; o tei hämani maitaì haere ra, e te faaoraraa i te feiä atoà i neìneìhia e te tiàporo ra, tei ia na ra hoì te Atua. 39 O mätou nei hoì të ìte i te mau peu atoà ta na i rave i Ierutarëma ra, e te fenua atoà hoì o te âti-Iüta ra; e ua täparahi hoì rätou e faauta atu ra ia na i nià i te räau. 40 Oia hoì ta te Atua i faatià aè nei i nià i te ruì toru ra, e ua faaìte ia na i te vähi ätea ra; 41 eiaha rä i te taata atoà ra, i te feiä rä i haapaòhia e te Atua ei ìte ra, oia hoì mätou nei, o tei àmu atoà e tei inu hoì e o ia atoà, i muri aè i ta na tiàraa mai mai te pohe mai ra. 42 E ua poroì iho o ia ia mätou e, e parau haere mätou i te taata, e faaìte hua atu hoì e o ia tei haapaòhia e te Atua ei haavä i tei ora e tei pohe ra hoì. 43 Oia hoì ta te mau perofeta atoà i parau mai ra e, o të faaroo ia na ra, e matara ia ta rätou hara i to na ra iòa.

To te Ètene färiiraa i te Värua Maitaì

44 E te parau atu ra Pëtero i taua mau parau nei, ua maìri mai ra te Värua Maitaì i nià iho i taua feiä atoà i faaroo mai i taua parau ra. 45 E te feiä atoà o te peritome i faaroo ra, o tei haere atoà mai rätou o Pëtero ra, mäere atu ra rätou, i te mea i niniihia mai te Värua Maitaì horoà-noa-hia ra i nià atoà i te Ètene. 46 I faaroo atu ra hoì rätou ia rätou i te parauraa i te parau èê, e te haamaitaìraa i te Atua. Ua parau atu ra Pëtero ia rätou: 47 E tià änei i te taata ia faaòre i te pape ia òre ia päpetitohia teie nei feiä, o tei noaa hoì ia rätou te Värua Maitaì mai ia tätou atoà nei?

48 Ua parau atu ra Pëtero ia rätou e päpetito mä te iòa o te Fatu ra. Ua täpeà mai ra rätou ia na ia pärahi o ia io rätou ra i e fanu puè mahana.

1 Ioane 4.7-10

E aroha te Atua

7 E a ù mau here e, e aroha tätou ia tätou iho, no ô mai hoì te aroha i te Atua ra. E o tei aroha ra, ua haafänauhia ia e te Atua, e ua ìte hoì o ia i te Atua. 8 O tei òre i aroha ra, aore ia i ìte i te Atua; e aroha hoì te Atua. 9 Ua ìteä to te Atua aroha ia tätou nei, o te Atua i tono mai i ta na Tamaiti fänautahi i te ao nei, ia ora tätou ia na. 10 O te aroha mau teie, eere rä e na tätou i aroha atu i te Atua, o ia rä tei aroha mai ia tätou nei, e ua tono mai i ta na Tamaiti ei täraèhara i ta tätou nei hara.

Ioane 15.9-17

9 Mai te Metua i here mai ia ù nei ra, ua here atoà atu hoì au ia òutou: ia vai-here-hia atu ä òutou e au. 10 I haapaò òutou i ta ù ra parau, e vai-here-hia atu ä òutou e au; mai ia ù i haapaò i te parau a ta ù Metua ra, e te vai-here-hia nei ä vau e ana. 11 I parau atu vau ia òutou i teie nei mau parau, ia vai ä to ù òaòa ia òutou, e ia tià atoà hoì to òutou òaòaraa. 12 Teie ta ù parau, ia aroha òutou ia òutou iho, mai ia ù e aroha atu ia òutou na. 13 Ia horoà te taata i to na iho ora no to na ra mau tauà, aita roa e taata aroha ê atu i tei reira. 14 O òutou to ù tauà ia haapaò òutou i te mau parau atoà ta ù i parau atu ia òutou na. 15 Eita atu rä vau e parau atu ia òutou e e tävini; aore hoì te tävini i ìte i ta to na ra fatu e rave ra. Ua parau rä vau ia òutou e e tauà; ua faaìte atu hoì au ia òutou i te mau parau atoà ta ù i ìte i ta ù Metua ra. 16 Eere o òutou tei hinaaro mai ia ù, o vau rä tei hinaaro atu ia òutou, e ua haapaò ia òutou ia haere òutou e ia hotu i te huero, ei huero vaiiho taìàtä, ia horoà mai te Metua ia òutou i ta òutou e ani atu mä to ù nei iòa ia na ra. 17 Teie ta ù parau ia òutou, ia aroha òutou ia òutou iho.

Manaò.

Te fifi o te taata i teie mahana, rahi noa ai te niuniu paraparau, te mea ia e, aita e taura faatüàti faahou i te taata, ua ätea, ua purara, e ua hahapehia te taata. Mea nä reira atoà te taata i te tae-roa-raa i te raveraa i te tahi mau òhipa të òre roa atu o ia e rave, àhiri i vai noa te taura täamu ia na i te feiä e ora i te vähi ta na e ora ra, oia to na mau taata tupu. Te faufaa o teie taura ta tätou e parau nei e, here, ua haamata ê mai na i roto i te ôpü o te metua vahine e ta na tamarii, ta tätou e parau nei e, taura pito. Teie taura, eere te räveà faaàmuraa noa i te tamarii, te taura atoà rä teie o te here, te here o te metua i ta na tamarii, te here hoì o te tamarii i to na metua. E no te mea aita e here e aita e parau, ia paraparau te metua vahine, te faaroo mai ra te tamarii, e ia parau hoì te tamarii, te faaroo atoà mai ra te metua vahine. Mea nä reira te here, oia te taura e täamu ra ia räua i te haere noa i te püairaa e te paariraa. I roto i te ôpü o to na metua vahine, te reo o te tamarii, ta na ia haùti, ta na taahi, aore ra te òreraa o ia e haùti faahou. Teie te tahi mau parau tei haapotohia mai roto mai na taiòraa e maha.

v  Taramo 98, 4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene.

v  Òhipa 10, 44 E te parau atu ra Pëtero i taua mau parau nei, ua maìri mai ra te Värua Maitaì i nià iho i taua feiä atoà i faaroo mai i taua parau ra.

v  I Ioane 4, 7 E a ù mau here e, e aroha tätou ia tätou iho, no ô mai hoì te aroha i te Atua ra. E o tei aroha ra, ua haafänauhia ia e te Atua, e ua ìte hoì o ia i te Atua.

v  Ioane 15, 12 Teie ta ù parau, ia aroha òutou ia òutou iho, mai ia ù e aroha atu ia òutou na.

Tätararaa.

Mai te tamarii tei ìte i te mau mea atoà e orahia ra e to na metua vahine : te òaòa, te peàpeà, te mauiui, mea nä reira atoà te metua vahine i te ìteraa i te mea e orahia ra e to na tamarii. E tano ia parauhia e, te mata o te metua vahine, te mata atoà ia o te tamarii ; te tarià o te metua vahine, te tarià atoà ia o te tamarii. Ia fänau mai teie tamarii, te faahoìhia ra te taura i täamu mai na ia na i to na metua vahine i roto i te rima o te fenua ei räveà haapäpü e te haapaari i te taura o te here e täamu i te tamarii i to na metua vahine, te fenua. Te faufaa rahi ia ta te Mäòhi e ìte ra i roto i te parau no te tänuraa i te püfenua o te tamarii, te räveà e ìte ai te tamarii i te here o te fenua, te taime atoà rä te reira e haapäpü ai o ia i to na here i te fenua. Ia päpü teie tuhaa, te toe ra i te taata te haapäpüraa i te taura täamu ia na i te Tumu o te ora, oia te Atua, te parau ia o te iho tumu. Mai te parau i haapaari i te taura täamu i te tamarii i to na metua vahine, e haapaari atoà te parau i te taura täamu i te tamarii i te fenua, mai te reira atoà te parau i te haapaariraa i te taura täamu i te taata i te Atua. No te taata, te haamataraa o te parau o te here, te taura pito ia ; a ferohia teie taura i nià i te fenua nä roto i te püfenua, èi haapäpü te tiàraa o te taata, i reira noa e tano ai e haapaari i te taura täamu ia na i te Atua, te iho tumu ia. Te mea ia e ìte ai o ia i te òaòa, te maitaì, e te hau.

Ua faaìte mai ra te Atua Nui Tumu Tahi i te ora na na, i mua i te mata o te mau taata atoà ra, te faaìte-raa-hia te parau tià na to na aroha no to na here e ta na parau mau, ua manaòhia e ana i te mau ùtuafare atoà. Ua ìte te mau hopeà atoà o te fenua i te ora a to tätou Atua Nui Tumu Tahi. Ia haruru te tai e to na îraa, te ao atoà e to na ra mau taata. Ia paìpaì te mau pape i to rätou rima, e ia ûmere tahi te mau mouà atoà, i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre. Ua faaìte mai rä te Atua ia tätou e, eiaha e parau i te taata ê, e viivii e te mä òre hoì. I haere mai ai te taata i te tïpapa-raa i mua i ta Na aro, aore rätou i märô.

E teie nei, e tonohia te taata ia faatupu te parau a te Atua ma te here e haere i te mau vahi i reira te mau täuaro i te nohoraa i te pae tähatai anei, i te pae mouà anei i te fare anei. E teie nei, teie tätou i mua i te aro o te Atua, ia ìte mätou i te mau parau atoà a te Atua i poroìhia mai ra. To Pëtero ôreroraa i mua ia Torenerio mä. O tei mataù ia na, e o tei rave i te parau tià i te mau fenua atoà ra, o të ìtehia mai ia e ana. Ua ìte hoì òutou i te parau ta na i häpono mai i te tamarii a Ìteraèra ra, i te parau haereraa i te Parau Maitaì i te hau ra ia Ietu Metia. E ua poroì iho o ia, e parau haere mätou i te taata, e faaìte hua atu hoì e o ia tei haapaòhia e te Atua ei haavä i tei ora e tei pohe ra.  Oia hoì ta te mau perofeta atoà i parau mai ra e, o të faaroo ia na ra, e matara ia ta rätou hara i to na ra iòa. To te nünaa färiiraa i te Värua Maitaì. E te parau atu ra Pëtero i taua mau parau nei, ua maìri mai ra te Värua Maitaì i nià iho i taua feiä atoà i faaroo mai i taua parau ra. E te feiä atoà o te peritome i faaroo ra, o tei haere atoà mai rätou o Pëtero ra, mäere atu ra rätou, i te mea i niniihia mai te Värua Maitaì horoà-noa-hia i nià atoà i te nünaa. I faaroo atu ra hoì rätou ia rätou i te parauraa i te parau èê, e te haamaitaìraa i te Atua. i te mea e aroha te Atua. I parau atu vau ia òutou i teie nei mau parau, ia vai ä to ù òaòa ia òutou, e ia tià atoà hoì to òutou òaòaraa. Teie ta ù parau, ia aroha òutou ia òutou iho, mai ia ù e aroha atu ia òutou na. O òutou to ù taüà ia haapaò òutou i te mau parau atoà ta ù i parau atu ia òutou na. Eere o òutou tei hinaaro mai ia ù, o vau rä tei hinaaro atu ia òutou, e ua haapaò ia òutou ia haere òutou e ia hotu i te huero, eiaha huero vaiiho taìàtä, ia horoà mai te Metua ia òutou i ta òutou e ani atu mä to ù nei iòa ia na ra. Teie ta ù parau ia òutou, ia aroha òutou ia òutou iho. Te reo ia o Ietu ia tätou i teie mahana, ia maitaì tätou i te Here o te Metua.

 

Teraì òr. Faatura.