HEPETOMA PURE NO TE HÖÊRAA O TE MAU MARU-METIA MATAHITI 2022

 

HEPETOMA PURE

NO TE HÖÊRAA O TE MAU MARU-METIA

MATAHITI 2022

 

Tumu parau : Ite aè nei hoì mätou i to na fetià i te hitià o te rä, i haere mai hoì mätou e tähopu ia na. » (Mätaio 2.1-11)

PAPA HAAMORI

Himene tomoraa :

AROHARAA

R : E aù mau taeaè, e aù mau tuahine, ua ruru tätou i teie mahana, mai to tätou atoà mau taeaè maru-metia, no nä poro e hä o te ao nei ; no të tomo i roto i te pure no te höêraa o te mau Êtärëtia. Te mau taiòraa ta tätou e faaòhipa atu i teie matahiti, na te mau Êtärëtia no te mau pae Hitiaa o te rä mä i faaineine mai, papahia i nià i te parau no teie feiä paari i haere mai e hiò i te Arii fänau âpï, ia au i te faaìteraa a Mätaio : « Ìte aè nei hoì mätou i to na fetià i te hitià o te rä, i haere mai hoì mätou e tähopu ia na ».

PURE

R : Färiu anaè to tätou aro i nià i teie fetià e ànapa ra i te hitià o te rä, a vai iho ai e na na e arataì ia tätou.

Haere anaè e färerei  i te Atua o te ora, e no te òaòa, ma të tuu atu i mua ia na te parau o te feiä maì, te feiä e mäuiui nei, te feiä i tuuhia i te hiti, te feiä i tiàvaruhia e tei faa-ätea-ê-roa-hia i räpae i te oraraa âmui ; ia ìte mai tätou, e tià noa i te Atua nä roto i to na märamarama, e faaòre i te pöiri. I teie mahana i roto i ta tätou pureraa no te höêraa o te Êtärëtia, ia riro atoà tätou ei märamarama, no të arataì i te taata ia Ietu Metia ra, to tätou faaora. 

Ia haamaitaìhia òe e te Metua mana hope, tei faaìte mai ia òe nä roto i te mau mea ta òe i rahu, e tei tïtau i te mau nünaa atoà ia ora i roto ia òe. Ua fä mai te fetià o Ietu i roto i to mätou oraraa, e të haere mai nei mätou e faahanahana i to mätou faaora, mai tei ravehia e te feiä paari. I teie mahana, të püpü nei mätou ia mätou iho no na, e të tiàoro atu nei mätou ia òe.

A : Tähöê ia mätou te tahi e te tahi, to te hitià o te rä, to te tooà o te rä, to àpatoà, to àpatoèrau, te feiä paari, te feiä âpï, te täne, te vahine, ia faahaèhaa mätou i mua ia na, e ia faahanahana ia òe, e te Arii Teitei. Amene.

Himene :

HAAMAITAÌRAA

R : Haamaitaì mätou ia òe e te Atua Metua, te Fatu o te raì e te fenua, no te mau tiàrama ta òe i tuu i nià i te mau raì ; ei faataa i te märamarama e te pöiri ; e ei täpaò faaìte no te mau tau, te mau mahana, e te mau matahiti. Ua faaî òe i te mau raì i te fetià ; ua ìtehia te maitaì o te mau òhipa ta òe i rave ; të faaìte nei te mau raì i to òe hanahana, e te täatoàraa o te mau mea ta òe i rahu.

A : Ia faahanahanahia òe e te Fatu e.

 

R : Të haamaitaì nei mätou ia òe, tei òre e faaruè ia mätou noa atu to mätou faaroo òre ; ua tono mai òe i ta òe Tamaiti no të türama ia mätou i roto i te pöiri ; ua riro o ia ei märamarama, e ei ora no mätou. Tei roto ia na te ora, e taua ora ra, o te märamarama ia o teie nei ao ; e të ànaàna nei te reira märamarama i roto i te pöiri.

A : Ia faateiteihia òe e te Fatu e.

R : Të ârue nei mätou ia òe e te Fatu, e arataì nei ia mätou i roto i te âehuehu o te oraraa, nä roto i te püai o to Värua Moà. Të haamäramarama nei òe i to mätou haereà, e të höroà nei ia mätou te paari e te faaroo, i roto i teie ao parau tià òre e te hepohepo.

A : Ia âruehia òe e te Fatu e.

R : Të haamaitaì nei mätou ia òe e te Atua, te tonoraa ia mätou nä roto i teie nei ao, no të faaànaàna i teie märamarama, nä mua roa i roto ia mätou, e i roto i te mau Êtärëtia atoà ; ia riro mätou ei ìte no Ietu, te Arii höê roa, te arii mau, nä roto i te püpüraa ia mätou no na.

A : Ia haamaitaìhia òe e te Fatu e.

Himene :

FAAHAÈHAARAA

R : Ia faahaèhaa te mau nünaa atoà i mua ia òe, e ia haamori ia òe. Ua mätau noa mätou i të noho i roto i te pöiri, ua höroà mai rä òe i te märamarama. No reira, të haere mai nei mätou i mua ia òe, no të fäì i ta mätou hara, ma të parau atu e :

A : Të fäì nei mätou i mua ia òe, ua hahi mätou i to òe mau èà, ua auraro òre i ta òe mau faaueraa ; ua faaìno mätou i te mau mea nehenehe ta òe i rahu ; ua tapihoo i to òe mau maitaì ; ua haaviiivii i te mau ânävai, e te moana ; ua faataèro i te mataì ora o te reva, e to te fenua ; ua tüìno i te aru.

A : Ua rave mätou i te mau òhipa tià òre i mua i to mätou mau taeaè e tuahine ; ua faatupu noa i ta mätou mau ôpuaraa, e to mätou mau hinaaro taata ; ua faatià mätou i te mau patu no te faataa-ê-raa i rotopü ia mätou ; e aita i ìte faahou i të faatura i te taata.

A : Ua âpapahia e mätou te tiàraa o te taata atoà, ia au i ta rätou òhipa, ta rätou haapaòraa, a parau ai e : tei to mätou pae te Fatu i te tiàraa, tei roto i ta mätou àroraa. E te Fatu e, faaòre mai i te hape o ta mätou i rave, te ìno o te òhipa ta mätou i faatupu, ta mätou e tuu atu nei i mua ia òe, ma te âau tätarahapa.

A : E te Atua Mana Hope, te Metua o to mätou Fatu o Ietu Metia ta òe i tono mai no të hoo faahou ia mätou te taata nei, aroha mai òe ia mätou, faaòre i ta mätou hara, hämani faahou ia mätou i to òe hohoà, ia riro mätou ei mörï no te ora, e àma i roto i teie nei ao.

 

A : E te Atua mana hope, faaroo mai i ta mätou pure, aroha mai ia mätou, e a faaòre mai i ta mätou mau hara. Ei ia òe te hanahana e te Atua Metua, ta mätou e haamori nei.

Himene :

TARAMO 8 :

E to mätou Atua, e to mätou Fatu, ua teitei to òe iòa e àti noa aè te mau fenua atoà nei. E to òe ra hanahana, ua tuuhia e òe i nià iho i te mau raì ra.

Nä roto i te vaha o te mau tamarii e te mau àiü, i faatupu na òe i te püai i to mau ènemi ra ; ia mämü atu te ènemi e te ono ra.

Ia hiò vau i te mau raì i te òhipa a to rima ra, te marama e te mau fetià ta òe i faaau ra : E aha te taata nei i manaò mai ai òe ia na ? E ta te taata nei tamaiti i haapaò mai ai òe ia na ?

I raro iti aè o ia i te mau merahi i te hämaniraahia e òe ra, e ua faahei òe ia na i te hinuhinu e te tura. Ua faariro òe ia na ei tävana i te mau òhipa a to rima, e ua tuuhia e òe te mau mea atoà nei i raro aè i ta na âvae :

Te mau mämoe e te mau nana puaatoro atoà, e te mau puaa atoà o te aru ra ;  te mau manu o te reva ; e te ià o te tai, tei nä te èà moana i të haere ra.

E to mätou Atua, e Iehova, ua teitei to òe iòa e àti noa aè te mau fenua atoà nei.

Himene :

TAIÒRAA

Himene :

POROÌRAA

PURE MANAÒ

Himene :

FÄÌRAA FAAROO

Na òe e te Atua i rahu i te raì e te fenua, e ua höroà i te reira ei ora no mätou : o te mea ia i fäì ai mätou e, e Metua Ora òe no mätou. O mätou ta òe mau tamarii, te mau tamarii i fänauhia e teie fenua, te mea ia i parauhia ai e : Tamarii Mäòhi.

O ta mätou e fäì nei.

Te àiü fänau âpï Ietu, Tamaiti na te Atua, Tamaiti na te taata, Tamaiti na te Fenua, Tamaiti na te Mäòhi, ua riro ei täpaò märöhia, tei faahià i te taata e rave rahi, e tei faatià atoà rä i te taata tei faaroo ia na. Ia maitaì to òe Hau, nä roto ia mätou te tamarii Mäòhi. Ia âruehia òe e te Metia Imanuera.

O ta mätou e fäì nei.

E te Värua Maitaì e, a faatavai ia mätou i roto i te mä o ta òe parau faatiàmä e te maitaì. Ia riro ä ei mäa no te mörï tuitui, te mörï âvae teitei, te mörï päruru, o tei türama i to mätou nei haereà âpï i teie nei, ananahi e a tau e a hiti noa atu.

O ta mätou e fäì nei. Amene.

Himene :

 

PURE ÄRAI

Ma te faaroo e te tiàturi, të fäì nei tätou i mua i te Atua, nä roto i ta tätou pure, o vai te Metua, te Tamaiti, e te Värua Moà.

Ua haere mai te feiä paari mai te hitià o te rä mai, no të tähopu i teie tamaiti ia Ietu, e no të püpü ia na i ta rätou mau taoà, ta rätou i tari mai i roto i to rätou tere, mai roto mai i to rätou fenua.

Të pure nei mätou i teie mahana no te âmuitahiraa o te hui faaroo o te ao nei, i roto i te rau o ta rätou haamoriraa, e te rau o ta rätou peu.

E te Fatu e, të ani nei mätou ia òe ia päruru i te faufaa a te mau fenua atoà, e tae noa atu i te mau Êtärëtia e faaruru nei i te mau haamataùraa, te mau hämani-ìno-raa, e te mau haavïraa.

E te Fatu e, faaroo mai i ta mätou pure.

I te mau matahiti mätämua no te oraraa o Ietu, ua faaruru atoà mai na o ia i te mau hämani-ìno-raa, ua taparahihia, ia au i te faaueraa a te arii Herota.

Të pure nei mätou ia òe no te mau tamarii o te ao nei, e faaruru atoà ra i te mau hämani-ìno-raa, e tae noa atu i terä e tupu ra i mua i to mätou mata.

Haapaari e te Fatu i te taura no te höêraa e te here i rotopü i te mau Êtärëtia, e a tauturu mai ia mätou i te òhiparaa, e te faaìteraa i to òe iòa moà. Faaitoito ia mätou i te òhiparaa ma te tuutuu òre, no të päruru i te turaraa o te taata, e te färiiraa i te feiä i roto i te fifi ia âmui mai rotopü ia mätou. I mua i te mau fifi e tupu nei, faaitoito ia mätou, ia vai höê noa mätou i roto i to òe pätireia i te fenua nei.

E te Fatu e, faaroo mai i ta mätou pure. 

Muri aè i teie tere färerei to te feiä paari i te Fatu, eita e òre, ua haere atu teie ùtuäfare na te mëtëpara, e noho tià atu i Àifiti. 

Të pure nei mätou ia òe, no rätou e ôvere nei, tae noa atu ia rätou i roto i te ère.

Höroà mai ia mätou e te Fatu te ìteraa i te taata, te färiiraa ia rätou i tiàvaruhia i räpae i to rätou oraraa, e ia tauturu i te feiä e ìmi nei i te nohoraa no rätou.

E te Fatu e, faaroo mai i ta mätou pure.

Te fänauraa o Ietu, ua riro ia ei parau âpï no tätou, tähoê anaè i te taata no te mau hau atoà, e no te mau haapaòraa atoà, i te faahanahanaraa i teie Tamaiti.

Të pure nei mätou ia òe, ia roaa ia mätou të ìmi i te hau, e ia tupu te täuàparauraa i rotopü ia mätou e te tahi atu mau haapaòraa.

E te Fatu e, höroà mai ia mätou te haèhaa e te marü, te arataìraa i te taata atoà, ma të faatura to rätou haereà.

E te Fatu e, faaroo mai i ta mätou pure.

Ua hoì mai teie mau taata paari iö rätou iho, na te tahi èà ê.

Të pure nei mätou ia òe, no te mau Êtärëtia atoà i tonohia na te ao nei. 

E te Fatu e, tauturu mai ia mätou i te feruriraa, te ìmiraa i te räveà âpi, te âpeeraa ia òe, te faaìteraa i to òe parau, ia tiàturi to te ao ia òe.

E te Fatu e, faaroo mai i ta mätou pu

I te ìteraa teie mau taata paari i teie tamaiti, î roa aè ra rätou i te òaòa.

E to mätou Metua i te ao ra, haapäpü i to mätou mata i nià ia na, ia òre mätou ia hahi hänoa. Tähoê anaè i to tätou Fatu ia Ietu, o ia te èà, te parau mau, e te ora. Amene.

Himene âmui

(ÔROÀ A TE FATU)

PURE A TE FATU :

HAAMAITAÌRAA :

A haere rä, e ia riro òutou ei tamarii no te märamarama.

Te hotu o te märamarama, tei roto ia i te mea maitaì, te mea tano, e te mea mau.

Eiaha e rave i te mau òhipa faufaa òre o te pöiri.

E tià, e a färii i te märamarama o te Fatu ia tomo mai i roto ia tätou.

Ei ia òutou te hau, te here o te Atua, te Metua, e to Ietu Metia, i nià ia òutou. Ia vai mai te aroha o te Atua i nià i te feiä atoà tei here ia na ra, mai teie nei, a tau e a hiti noa atu. Amene. Ia haamaitaìhia te Atua.

 

MAHANA MÄTÄMUA

 

« Ìte aè nei hoì mätou i tona fetià i te hitià o te rä » (Mätaio 2, 2).

A tauturu mai, a faatià e a arataì ia mätou i roto i te märamarama maitaì.

TE MAU TAIÒRAA

Tetaria 4,1-7 :             I hiò na vau, e ìnaha, e vairaa ramepa àuro… 

Taramo 139,1-10 :    Na to rima àtau e mau ia ù

2 Timoteo 1,7-10 :     Te aroha…ua faaìte-hua-hia mai rä i teie nei i te färaa                         

mai o to tätou ora o Ietu Metia…

Ioane 19,7-14 :           Ia tae mai rä te Värua Parau Mau ra, nana ia e arataì ia

òutou i te mau Parau Mau atoà ra…

 

TÄTARARAA

I roto i teie ao hepohepo, päpü òre, të tïtau nei tätou i te märamarama. Ia âuahäatihia tätou i te ìno, e ìmi tätou i te maitaì. Tei ia tätou iho, no to tätou rä paruparu, ua hià taua maitaì ra. Ua haamau tätou i to tätou tiàturiraa i nià i te Atua. No tona hämani maitaì, i ôhie noa ai tätou i të färiu i te ora no nià mai. E taua ora, eita o ia e fä mai i te ao nei, mai te taata ra te huru, o te Atua iho taua märamarama ra. Ua höroà mai te Atua i te püai e te here fäito òre. Eere rä nä roto i to tätou iho paari e te püai e tae ai tätou i te èà o taua märamarama ra, nä roto rä i te Värua Maitaì.

I te ao « pöiri » taata nei, ua fä mai te fetià o te hitià o te rä. Nä roto ia na e fä mai ai te märamarama i roto i te pöiri taòtaò e faataaê ra te tahi i te tahi. Aita o ia i fä noa mai no te höê noa taime manaòhia, no te höê ia ao âpï. Mai te tau i mahemo e te taime i fä mai ai taua fetià ra no te taime mätämua, ua märamarama te taata mai roto mai i te mau pipi te ora e vai ra i roto i te Värua Maitaì. I roto i te mau òhipa atoà ta te Atua e faaìte ra, të ora nei te Värua Maitaì. Noa atu te mau haaapiapiraa, te òhipa tià òre tei òre e tüàti ra, na te Tiàfaahouraa e faaàma faahou mai i taua mörï ra, e arataì ia tätou i te ora. Të hiaai nei tätou ia ìriti mai ia tätou mai roto mai i te vähi pöiri, e të tïtau nei ia tätou ia pure e ia rohi âmui no te höêraa maru-metia.

PURE

Te Atua e, türama mai i to mätou mau haereà ta te märamarama o te Metia e vai nei mua ia mätou. Hiti mai e e pärahi mai i roto ia mätou. Arataì, e heheu mai ia mätou i teie mörï e täòto nei i roto i to mätou âau. Òe tei faaàma mai i teie mörï, të haamaitaì atu nei mätou, teie täpaò maitaì tei òre i hià, Ietu Metia, to mätou Fatu, to mätou Faaora. Ia riro o ia ei mörï türama ia mätou te mau pererina « Haapii Parau Maitaì », faaora i to mätou mau âmahamaharaa, e faaitoito mai ia mätou i te tütavaraa i teie märamarama ia höê noa mätou. Amene.

 

PITI O TE MAHANA

 

Teihea te Arii fänau âpï o te âti-Iuta nei ? (Mätaio 2, 2).

Na te haèhaa e te mau faatere e faatopa i te mau patu, e e patu nä roto i te here.

TE MAU TAIÒRAA

Ieremia 23, 1-6 :         Ei arii e haapaò i te parau maitaì e të faatupu hoì i te parau au

Taramo 46 :       E täpeà o ia i te tamaì e tae atu i te hopeà o te fenua

Firipi 2, 5-11 :   O ia … Tei òre e faariro ia na ei tütia tei haruhia no te àifäito i te Atua ra.

Mataio 20, 20-28 :     I haere mai te Tamaiti a te taata eiaha ia tävinihia no të tävini rä.

MANAÒ

No Ieremia, ua riro te mau arii no Iteraèra ei mau arataì ìno tei faataaê e tei haapürara i te nünaa. I mua i te arataì mana a te arii, ua haapauhia te nünaa e ua türaì-roa-hia te nünaa ia faaruè i to na iho fenua. Areà rä, ua fafau te Fatu i te höê Arii ei tïaì mämoe tei arataì ia au i tona àravehi e tei haere mai no të päruru i te tiàmäraa e te parau tià i tona fenua e tei haaputuputu i tana nana.

Të hinaaro nei teie ao i te mau arataì tei ìmi noa i te tahi tià tei tano e pähono i te mau hiaai. Na hea e ìtehia ai teie huru arataì. Tei roto ia Ietu anaè teie hiòraa i te tahi arii aore ra te tahi upoo faatere tei faaòhipa ia au te arataìraa a te Atua. Piihia no të pee atu na muri ia na, të tïtau-atoà-hia ra ia tätou ia riro te reira huru täviniraa i roto i teie nei ao e i roto i te Êtärëtià. E, eita te Fatu e haapau aore ra e faataaê, e patu rä o ia e haaputuputu o ia i te iòa hanahana o te Atua. Tana rëni arataìraa eere nä roto i te  ôpipiriraa e te püaì. Nä roto anaè ia na e ìtehia ai e tävini i te here e te haèhaa, tei òre e faariro ia na ei tütia hau atu i ta te Atua. Ua haere mai o ia no të tävini eiaha rä ia tävinihia, tïtau-atoà-hia te mau pipi i të pee i te reira huru arataìraa.

I teie mahana, höê tuhaa o te nünaa no Apatoà faahepohia ia faaruè i to rätou fenua, e eita e ìtehia te parau no te tiàmä e te parau tià, ua riro te reira mai te tahi mäa tei varavara roa i roto i teie tuhaa fenua e i roto i teie ao. Te tïaìtururaa e vai o ia e eita o ia e mure, noa atu e häatihia tätou e te âueueraa o te mau pätireia.

No te reira, hinaarohia te mau arataì päpü no të faatere i teie nei e i roto i te Êtärëtia tei haa no të haaputuputu eere no të haapürara, faataaê i te nünaa a te Atua. Te hinaaro e te hiaaì o te mau tumu te reira no te âmahamaharaa o te nünaa i roto i teie nei ao e i roto i te Êtärëtia. Mea hau aè ia rave te taata i te hohoà o Ietu te tävini, ia upootià i nià i te âmahamaharaa i roto i te ao e i roto i te Êtärëtia. Ia rohi e ia tià te parau tià e te Hau no te täatoàraa, ia faaìte tätou nä roto i te haèhaa e Arii Tïaì to tätou, tei arataì ia tätou e te ora âmui tätou i roto ia na.

PURE

Te Atua, o òe to mätou haapüraa, to mätou püaì, të faateitei nei mätou ia òe no te mea e Atua parau tià e te maitaì òe. Të fäì nei mätou, të faahinaaro atoà nei mätou i te huru o te mau faatere o teie ao. Tauturu maì ia mätou, eiaha rä no të ìmi i te Fatu ia Ietu-Metia i roto i te mau Aoraì o te mau hau rarahi, i roto i te haèhaa o te fatene e rave tona huru, te marü. A faaitoito mai ia mätou no të vai iho höê pärahiraa i roto i to mätou âau no të färii te tahi e te tahi mai ta òe e faaue mai.  Të ani nei mätou i te iòa o Ietu, ôrua e te Värua Maitaì i roto i te hanahana e a muri noa atu. Amene

 

TORU O TE MAHANA

E ìte aè ra te arii ra o Herota i taua parau ra, âehuehu  roa aè ra o ia e to Ierutarëma atoà. (Mätaio 2, 3).

Te fänauraa o Ietu Metia ei âehuehuraa i te ao atoà.

 

TE MAU TAIÒRAA

Nehemia 4, 21 :          Ua òhipa iho ra mätou i taua òhipa ra : e na te tahi pae i täpeà i te maehae mai te poìpoì mai ä e ia ìteä mai te fetià ra.

Taramo 2, 1-10 :                  E aha te mau êtene e ârepurepu-noa-hia ai… ?

II Tetaronia 2, 13-3,5 :       E Fatu tauiui òre to tätou e tei haapäpü ia òutou

Mätaio 2, 1-5 :            Ua âehuehu te arii o Herota e Ierutarema atoà

MANAÒ POTO

Teie te toru o te mahana no te hepetoma pure. Të riro nei te tohu no te fänauraa o te Metia, e âehuehuraa i roto i teie nei ao. Te taaêraa i roto i te mau arataì fenua, te mau arataì o te ao e te Fatu, ua haere mai te Fatu nä roto i te haèhaa no të faaara i te òhipa tià òre ta te mau hau e faaòhipa nei i to rätou mana ia monihia rätou. Te fänauraa o te Metia o te tauiraa o te mäfatu, te Värua te reira o te taata, te mero e höroà nei te toto ora, te fänauraa o te Metia, te faatauiraa te reira i te oraraa o te taata, ia tiàmä te täne e te vahine i mua te haavïraa e te faatïtïraa tei tümä i tona ra parau.

No reira, ua haere mai te Fatu no të haapäpü i te taata tei pïhaì iho te Atua i te taata tei faatïtïhia, ua ìte te Atua ei tamarii o ia na na e tei herehia e ana. Oia atoà te fänauraa o Ietu, ua riro e âehuehu i te oraraa, ua faaòpa i te pahï o te mau òna e te mau Hau rarahi tei manaò ia rätou e to rätou anaè te maitaì. No te taata e faatupu i te Hau e te Höêraa, ua riro te fänauraa o Ietu Metia ei märamarama, ei tïaìtururaa no te täatoàraa.

I teie mahana, të tïtauhia ra ia tätou, ia patu âmui no te Parau Tià, ia riro ei òhipa tumu na tätou e to te ao atoà. Ia färii atoà tätou, eere te èà o te Parau Tià e te Höêraa e arataì nei i to tätou ora. No reira, e te mau maru-metia, ia tähöê tätou no të faaìte i te Parau Tià e te Höêraa e püai hope te reira. Ia höê te täatoàraa i roto i te pure ei märamarama taaê, tei türama atu te tahi tei pärahi moèmoè noa i roto i te pöuri, te hepohepo, te tïtïraa e te haavïraa. Te parau maitaì to te Atua pärahi noa ra i roto i te marü e tei faaätea ia tätou i te ìno no te rohi tämau i roto i te maitaì. Ia ora na.

PURE

E te Fatu, ua arataì mai òe ia mätou nä roto i te pöuri e tae ai ia Ietu ra. Ua ànaàna mai te fetià o te tïaìtururaa i roto i to mätou oraraa. Tauturu mai ia mätou ia vai höê noa i roto i ta mätou tautooraa, a tuu mai i te Hau o te Here, te Parau Tià ei türama i te täatoàraa. E te Fatu, täpeà to mätou rima, höê ä tätou i roto i te oraraa i te mau mahana atoà. Ia haere atu mätou e o òe to mätou arataì e eita mätou e mataù faahou.

Ia ànaàna faahou te märamarama i nià ia mätou, e ia ura to mätou âau e ia manii to òe Here i nià ia mätou. Ia faateitei faahou mätou ia òe e to Aroha, o òe tei höroà i to òe ora ia hanahana to òe iòa e te Metua, e te Tamaiti e te Värua Moà. Amene.

 

MAHA O TE MAHANA

E o oè hoì Peterehema …aore roa òe i iti roa i roto i te mau òire » (Mätaio 2, 6).

Noa atu te iti e te mäuiui, aita Höê mea e ère.

 

TE MAU TAIÒRAA

Mita 5, 2-5a, 7-8 :      … e tae mai ra te höê ia ù nei mai roto mai ia òe ra o të riro ei Tävana i Iteraèra.

Taramo  23 :               O Iehova to ù tïaì e òre roa vau e ère

I Pëtero 2, 21-25 :      … E teie nei, ua hoì mai ra i te Tïaì e te tïaì o to òutou mau Värua

Ruta èv. 12, 32-40 :   Eiaha e mataù e taù nana iti e

MANAÒ POTO

E parau rahi to òe e Peterehema òire iti, te tohuraa o te fänauraa o te Fatu, te Tamaiti a te Teitei i roto i teie nei ao. Tei roto i teie òire iti, tona tupuraa nä roto i te haèhaa e te oraraa mätarohia e rätou. Peterehema, te auraa : èuraa faraoa, tüàti noa ai e te òhipa ta te Fatu e rave. Ua rave o ia i te hohoà o te huero tïtona muri ei hopue no te faraoa, hohoà no te hihi o te rä no te mata ei türama i te mau fenua atoà. Efarata no roto òe i te pöuri ìritihia no roto i te fänauraa i te arii âpï o teie nei ao. Te tïaì mämoe maitaì o to mätou Värua tei faarirohia ei ârënio tei amo i te hara a to teie nei ao.

Noa atu to òe naìnaì e to òe iti i roto i te mau tuhaa no Iuta, ua ìtehia òe Peterehema nä roto i te fänauraa i te Tïaì mämoe i roto i te mau tïaì mämoe atoà, te Arii o te mau arii. Peterehema, te auraa, te fare no te èuraa faraoa, faahohoàhia i te Êtärëtia tei faaàmu i te faraoa no nià mai i te raì i te ao täatoà.

Te Êtärëtia, te Peterehema o teie tau, e vähi i reira te nünaa iti haìhaì e ruru ai, vähi färiihia ai te nünaa, e vähi e ìtehia ai rätou. Te rururaa âmui o te nünaa, te hohoà te reira o te huero tei ohihia. Ia ohi anaè te täatoàraa ei hopue o ia e püai hope atoà tei ìtehia mai te hihi ra o te rä tona àma e të arataì ia tätou.

Ua riro teie nei ao ia au te faanahoraa poritita mai te here pata ra te huru e haere mai e rämä i te nünaa no të haavï ia na, no të tuu i te hiti o te oraraa vaamataèinaa. Aita te nünaa faaroo i mataù, aita atoà o ia i fati i mua i teie mau faanahoraa. Na te Tïaì mämoe maitaì e arataì nei ia rätou, e haaputuputu o ia ia rätou, ia höê rätou. Nä roto i te âmuitahiraa e te höêraa o te mau maru-metia, e ìtehia to rätou püai mai te hopue, e tupu te faraoa mai te reira atoà te püai o te nünaa.

Nä roto atu ia na e ìtehia ai te haèhaa, e faaroo o ia i te piiraa ia tähoê faahou höê nana. Noa atu te iti o te nana, höê ä putaraa âvae e te ârënio tei mäuiui no tona Aroha i teie nei ao, e vai noa rätou i roto i te tïaìtururaa, eiaha rätou ia ère. Ia ora na.

PURE

E te òrometua, ua riro te âmahamaharaa ei haaparuparu i to òe Värua Moà. Të tätarahapa atu nei mätou no to mätou paruparu i mua i to mätou taere no te faatupuraa i ta òe ôpuaraa faaora. Höroà mai i te mau tïaì, te ìteraa te reira mau âmahamaharaa e te arataìraa i ta òe Êtärëtià i roto i te Parau Tià e te Moà e te höêraa e òe. Të ani haèhaa atu nei mätou ia òe e te Fatu, faaroo mai i ta mätou pure. Amene.

PAE O TE MAHANA

 

« E ìnaha, te fetià i ìtea ia rätou i te hitià o te rä ra, nä mua atu ra ia rätou »

(Mätaio 2. 9).

Arataìhia e te Atua Tumu Tahi.

 

TE MAU TAIÒRAA

Ètoto 13.17-14.4 :               Ua nä mua hoì te Atua ia rätou i të haere, ua nä roto

i te pou ata..

Taramo 121 :               E hiò änei ta ù mata i te âivi. E noaa änei te tauturu ia ù

i reira.

Àpotarupo 22.5-9 :     …no te mea, o te Fatu ra,  te Atua to rätou märamarama e e hau ä to rätou e a muri noa atu.

Mätaio 2.7-10 :           Te fetià i ìtea ia rätou i te hitià o te rä ra, nä mua atu ra ia rätou

 

TE MAU MANAÒ

Të haamanaò noa mai ra ta tätou mau taiòraa e, të arataì, të âpee noa ra te Atua i to na nünaa, te päruru e të mata-ara-noa ra i nià ia na i te ao e te pö. Eere rä i te tahi èà âfaro noa. Taime ra ihoä, e hoì mai i nià i to òe mau haereà, e taime ra i nià i te tahi èà ê atu. Te mea päpü rä i reira i nià i to tätou mau haereà, tei rotopü noa te Atua ia tätou, tei òre roa atu e taòto,  no te mea të päruru nei o ia ia tätou eiaha to tätou mau âvae ia pähee e ia òre tätou ia hià.

I roto i te pöuri rahi, tei ia tätou ra te märamarama o te Atua. Nä roto i te mau perofeta i tonohia mai, të türama noa ra taua märamarama ra ei arataì i te nünaa o te Atua i nià i te èà, mai të haamanaò ia rätou i te parau faaau i ravehia i roto i te Fatu e rätou.

I te tau mau ra, ua tono mai te Atua i ta na Tamaiti fänau Tahi, Ietu Metia. O ia te märamarama no te arataìraa i te nünaa, te hanahana o te Atua i roto i teie ao, te tumu o te ora, o ia i haamau i te faaauraa âpï nä roto i to na toto.

Te èà no te faatupuraa i te höêraa e te täatiraa i roto i te Metia, eere roa atu i te mea ôhie i të ora. No te mea, mea nä roto anaè tätou i to tätou iho püai ma te âau tae i te paturaa i te höêraa, ua faaruè ia tätou i te tumu parau päpü o te mau päpaì : Aita te Atua e faaruè i to na nünaa, noa atu te manuia òre, e te âmahamaha. Te auraa, eere teie parau tïaìtururaa no te mau maru-metia anaè, no to te ao atoà rä. Të haamanaò mai ra te parau o te feiä paari e, na te ànaàna o te fetià, to te Atua arataìraa ia tätou, rau noa atu ä tätou, i te Metia, te märamarama o te ao.

Ua tono mai te Atua i te Värua Maitaì, o ia te märamarama no te türamaraa ia tätou i te parau mau no teie Tama fänau âpï e no te faarooraa ia tupu te höêraa e te faahauraa i roto i te mau mea atoà nä roto ia na. Taua Värua ra tei arataì ia tätou mai te mau pöuri e te teimaha i roto i te märamarama o te Metia e te ora.

PURE

E te Atua e, to mätou Metua, ua tuu mai òe te fetià i roto i te raì no te arataìraa i te feiä paari i to Tamaiti Fänau Tahi. A faarahi i to mätou tïaìtururaa ia òe, e a tauturu ia mätou i te mau taime atoà o to mätou mau haereà, ia tiàturi mätou e, tei pïhaìiho noa òe ia mätou no te pärururaa i to òe nünaa. Haapii mai òe ia mätou ia arataìhia mätou e to Värua Moà, noa atu te fifi o te èà, ia tià ia mätou i të faatupu te höêraa i roto ia Ietu Metia, te märamarama o teie nei ao. A ìriti i to mätou mau mata i to Värua, ia rahi mätou i roto i te faaroo, no te haapäpüraa e, o Ietu to mätou Fatu, e ia ârue mätou e ia òaòa mätou i roto ia na, mai te feiä paari i ora na i Peterehema. A färii mai i teie mau haamaitaìraa i te iòa o to Tamaiti Ietu Metia. Amene.

 

ONO O TE MAHANA

« Ite atu ra rätou i taua Tamaiti iti ra e ta na metua vahine o Märia.

Tïpapa iho ra i raro, tähopu atu ra ia na. » (Mätaio 2.11).

Höêraa no te haamoriraa i te Atua Tumu Tahi.

 

TE MAU TAIÒRAA

Etoto 3.1-6                  Ua purou iho ra Mote i to na mata, i mataù hoì o ia ia hiò atu i te Atua

Taramo 84                            E mea popou rahi to òe ra mau tiàhapa, e te Atua e.

Apotarupo 4.8-11                A haamori ai ia na i te tià i te oraraa e a muri noa atu.

Mätaio 28.16-20                  E ìte aè ra rätou ia na, ua tähopu atu ra.

 

TE MAU MANAÒ

I te taeraa mai te feiä paari mai te hitià o te rä mai i Peterehema, ua ìte atu ra i te Tamaiti iti e to na metua vahine, ua tähopu atu ra i mua ia na. Ia au i te parau tohu a te Atua i rotopü ia tätou, të hiò nei to tätou mata i raro e të tuturi nei tätou. Mai ia Möte atoà i te pü àihere ra, ua täpoì i to na mata, no te mea, ua mataù i të hiò i te Atua. E mai te mau pipi i nià i te mouà ra i Tarirea, ua maere e ua huru ê. Tïpapa iho ra rätou. Te haamoriraa i nià i te raì, ua tïpapa te mau peretiputero e piti àhuru ma maha i raro, i mua ia na i tei pärahi i nià i te teröno ra. Ma të âmui e te Atua, teie ta tätou parau : « ua ìte mätou, ua tapuhia e ua topa mätou i roto i te ârueraa e te taùraa. »

Terä rä, të ìte ra änei tätou. Ua uruhia änei tätou. Tei roto änei tätou i te ârueraa. A hia atu ra taime i te hiòraa ma te òre e ìte, ua vai matapö noa tätou i mua i te aro o te Atua. Na hea tätou e tià ai i të ârue i te Atua ma te parau mau, mai te peu e aita tätou e ìte ra. I roto i ta tätou hiòraa to tätou oraraa, të ìte noa ra tätou i to tätou mau tüàti-òre-raa e to tätou reruraa, no te mea ua moèhia ia tätou, höê noa Atua o tei färii i te täatoàraa i roto i to na maitaì manahope e ua höroà atoà i te Värua Faaaò no te arataìraa ia tätou i roto i te höêraa. No to tätou rä teòteò, i pö ai to tätou mau mata, të faatura noa ra tätou i ta tätou iho mau ture i haamau e ta tätou mau peu tumu a te taata, aita rä tätou e faatupu ra i te here e te aroha o te Atua o tei tïtauhia ia tätou te nünaa faatiàmähia e te toto o te Metia, ia ôpere i roto i te faaroo höê ia Ietu, to tätou Faaora.

 

No te mea hoì e, e nünaa tätou tei uruhia e te Värua Maitaì, të tïtau nei te mau êtärëtia atoà ia tätou, ia haere âmui nä nià i te èà e haere tià rä i te Tamaiti Ietu no te haamanaòraa ia na mai te mea ra, höê nünaa tätou. Na te Värua o te aroha e arataì ia tätou no te haereraa i to tauaro ra no te âmuiraa ia haere âmui tätou i te Atua Tumu Tahi. Mea nä roto anaè i taua arataì e tià ai ia tätou i të « haamori ma te Värua e te parau mau ». To tätou ananahi i te Atua ra, e ananahi i roto i te höêraa e i roto i te aroha e te here ; e taua fä ra, höê ä ia parau mau i roto i te höêraa o te Metia.

PURE

Te Atua no te aroha, ua höroà òe i te mau matapö i te ìteraa ia òe ei Faaora, a höroà mai i te tätarahaparaa. I to aroha, ia ìte faahou to mätou mau mata ia tià ia mätou i të haamori ia òe, o òe to mätou Atua e to mätou Faaora. Noa atu te mäuiui e te rahi o ta mätou mau hara, a färii ia mätou i te aroha no òe ma to mätou âau atoà. Ia tià mätou ia haere âmui tätou, ma të arataìhia e to märamarama, ma te âau höê e te Värua höê, mai te mau pipi mätämua roa. Ia vai te haamaitaìraa a te Fatu Ietu Metia i nià ia mätou, e ia ârue âmui mätou i to hanahana i roto i te âmuitahiraa o te Värua Moà, e ia tià ia mätou i te faaìteraa ia òe i te mau taata atoà tei âuahäati ia mätou nei. Amene.

 

HITU O TE MAHANA

« Ua ìriti aè ra i ta rätou taoà, hopoi atu ra i te ö na na,

i te àuro e te täpau ripano e te mura » (Mätaio 2/11).

Te ö o te faatüàtiraa.

 

TE MAU TAIÒRAA

Hötea 6/1-6                 Hinaaro hoì au i te aroha eiaha te tütia

Taramo 100      E tomo i tona mau ùputa ma te ârue ; e tona mau hëtere ma te himene haamaitaì

Ohipa 3/-1-10    Aita aù àrio e te àuro, e ta ù rä e vai nei, o ta ù ia e höroà atu na òe

Mätaio 6 /19-21 Te vähi hoì i vai-iho-hia ai ta òutou taoà ra, e riro atoà i reira to òutou âau

 

TE MAU MANAÒ

Ia tere perenina tätou i Peterehema, te òire o te faraoa, e ìte tätou i te tere o te feiä paari no të tähopu i taua Tamaiti ra ia Ietu. Ua ìriti rätou i ta rätou mau taoà e ua püpü na taua Tamaiti hui arii ra i te àuro e te täpau ripano e te mura. Na te mau âmahamaha tüätau, te rave matapö-noa-raa i te mau faanahoraa e te mau peu, te faa-rahi-raa i te mau peu o teie nei ao, i faatupu i te âmahamaha i roto ia tätou. E aha atu rä ia te ö ta tätou i faataa ei püpüraa na te Arii, o ia i haere mai e türama i to tätou oraraa, e i arataì ia tätou i roto i te aroha ia tupu te höêraa. Ua ìte hoì tätou e, e òre te Atua i hinaaro i ta tätou mau taoà e ta tätou mau tütia, ia òhipa rä to na aroha nä roto i to tätou ère ia au i teie reo e : « aita a ù àrio e te àuro ». To te Atua hinaaro, ia here tätou : i te taata tei here ia na e i te mau taeaè e te mau tuahine i roto i te Metia tei taaê ia tätou ; te taata tei î tona âau i te aroha hämani maitaì ; te taata tei tätarahapa mau e tei faatupu i te tauiraa rahi i roto i tona oraraa.

A faaineine anaè ia ia tätou no të püpü ia na, te höê ö e ìtehia ai te here aita tona e fäito. Te mea e tïtauhia i te taata, ia haamori ia na mai te haèhaa, o te taata ia e ua pëpë to na âau i tana mau hara i faataaê ia tätou, e o tei haapaò maitaì i te taata ta tätou e tävini ra. E faaàma, e faaora e faafäite taua huru haapaò maitaì ra i tei pëpë i roto ia tätou.

Ua höroà ê mai na te Fatu i te höêraa i tana êtärëtia. E tupu to tätou àtiraa i te rahi ia ôpere tätou i te maitaì i noaa ia tätou, nä roto i te rau o te mau faanahoraa e ia ìte atoà rä hoì tätou e, te Fatu anaè te tumu o te mau höroà.

PURE

E te Atua e, ei ia òe te ârueraa, te hanahana e te hämani maitaì. Ua heheu mai òe ia òe nä roto i to Tamaiti i te feiä i tïàituru na i to na taeraa mai, nä reira atoà i tei òre i pärahi i roto i te tïàitururaa. Ua ìte òe i to mätou mau àti, te mau mäuiui ta te mau âmahamaha i orahia e mätou i faatupu. Të ìte ra òe i teie nei ao i roto i te àroraa e te fifi i ìno roa atu i teie mahana i te mau pae fenua hitià-o-te-rä, te fenua i mäìti e fänau ai òe e tei moà i to òe taeraa mai. Të pure atu nei mätou : ia ìte faahou mätou ia òe. Të âmuitahi nei mätou i roto i te tere o te feiä paari no te hitià-o-te-rä mai, të pure nei mätou ia matara mätou i to aroha e te aroha o to  mätou mau taeaè e mau tuahine. A tuu mai i te manaò e te räveà ia tupu te tauiraa i nià te fenua, a höroà noa mai ta òe mau ö e ta òe mai maitaì. A färii mai i ta mätou pure i te iòa o to Tamaiti o Ietu Metia, te ora a tau a hiti noa atu e te Värua Maitaì. Amene.

 

VAÙ O TE MAHANA

« Haere atu ra rätou i to rätou iho fenua na te tahi èà ê » (Mätaio 2/12).

I ô mai i te mau èà mätaro-noa-hia i faatupui te âmahamaha,

i nià i te èà âpï a te Atua i teie nei.

 

TE MAU TAIÒRAA

Ieremia 31/31-34 : « Teie rä te faufaa taù e faaau atu i te ùtuäfare o Iteraèra

Taramo 16 :                 « E riro òe i të faaìte mai ia ù i te èà ora »

Efetia 4/ 20-13 :                  « Ia faahouhia òutou i to òutou värua ra i te âau »

Mätaio 11/25-30 :       « E haamaitaì au ia òe, … i huna ê noa òe i teie nei mau parau i te feiä paari e te ìte ra, e ua faaìte mai i te tamarii nei »

 

TE MAU MANAÒ

Aita tätou i ìte te manaò o te feiä paari i to rätou faaararaahia e hoì i to rätou iho fenua na te tahi èà ê, ìnaha, e mau àivänaa teie no te tuatäpaparaa i te reva. Ua taui änei hoì rätou i te èà, ìnaha, te fetià i türama i to rätou tuuraa âvae ua faaìte faahou ia rätou i te tahi èà ê. Ua tïtauhia rätou e taui i te haereraa.

E riro te tahi mau tupuraa òhipa ta tätou i te faahuru-ê-hia e te mau mea i mätaro-noa-hia e tätou i të rave e ta tätou hiòraa i teie nei ao. Te tahi taime, e mea fifi roa i të rave i taua mau èà ra, e uiui ihoä tätou, nä hea atu ai i të haere. E faatoro mai ihoä te Atua i roto i tona mana hope i te tahi èà âpï. Ia ihu anaè tätou, e faaâpï te Atua i te faaauraa ia matara tätou. Te mea i tïtauhia ia tätou maori rä, to tätou tiàturiraa i te Atua. O ia i türama mai na, e tià atoà ia na e höroà mai i te räveà ia haere ä tätou i mua i te taime ua fifi te mau èà i mätaro-noa-hia e tätou i të rave. E èà âpï të faatorohia ia färii atoà tätou mai te tiàmä i mua i te òhipa a te Värua. E tauturu mai ihoä paha te türamaraa i haahia mai e te mau êtärëtia, të hiò nei rä tätou i mua no të ìmi ä i te mau èà âpï, ia türama itoito noa ä te märamarama o te èvaneria i te tahi e te tahi mai te Metia i färii ia tätou no te hanahana o te Atua.

Te mau èà tahito i taraihia mai, ua faaâmahamaha te reira i te mau âmuiraa faaroo. I nià i te èà âpï i taraihia e te Atua iho, të tïtauhia nei te mau maru Metia ia tuiau i to rätou tere. No te reira tupuraa, e mea tïtauhia te haèhaa e te itoito. E taime teie no te tauiraa e te faahauraa.

PURE

Te Atua o te aroha e, höê noa èà ta mätou i ìte e ua manaò mätou e nä nià faahou i taua èà ra i të haere, e i nià i teie mau èà ua fifi te tere, e tae mai te manaò paruparu, âreà òe të vai noa ra. E Atua òe e faaâpï faahou i te parau faaau. Ua ineine noa òe no të ìriti faahou i te èà âpï e të manaò-òre-hia i mua ia mätou. Të haamaitaì nei mätou ia òe no te mea e matara noa te mau mea i òre i manaòhia e mätou. Haamaitaì mätou ia òe no te paari tei hau ê i te ìte taata. Haamaitaì mätou ia òe no te mea, e ìriti noa òe i te mau èà tei î i te mau räveà manaò-òre-hia. I nià i te täpura fenua e òre e ìtehia te èà, o òe rä, e ìte mätou ia òe, to mätou arataì mau. Nä roto ia Ietu Metia to mätou Fatu e te âmuitahiraa i te Värua Maitaì, a arataì ia mätou ia òe ra. Amene.

Rata Haaàti no te mau tiaìraa.

 

Täpati 31 no Atopa 2021

 

Täpati 31 no Atopa 2021

Täpati faatïtïàifaroraa (Reforomatio)

Taiòraa : Märeto 12,18-34

Tumu Parau : Te rämäraa a te mau Tätutea ia Ietu i nià i te parau no te tià-faahou-raa e te parau no te Ture o te here.

E te nünaa mäìtihia e te Atua, a färii mai i te täpaò no te aroha mai roto I te Faatereraa o ta tätou Etärëtia Porotetani Mäòhi. I roto i teie taiòraa o ta tätou e hiò nei no teie Täpati Faatïtïàifaroraa, o ta tätou I mätau noa na i te parau e, Täpati Reforomatio, teie na tumu parau rahi e piti e faahitihia ra. Te mea päpü, ua tupu teie parau i muri aè i to Ietu rämäraahia e te mau Färitea i nià i te parau no te tute àufau a Taitara. Ua ìte tätou e, aita Ietu i topa i roto i te herepata a te mau Färitea. Mea nä reira te piti o te pupu taata i te täpiriraa mai i pïhaì iho, oia te mau Tätutea, no te tamata atoà e rämä ia Ietu, i nià i te parau no te tià-faahou-raa. Te manaò e tano tätou e täpeà mai i mua i te huru o teie nä pupu taata, piti atoà ra ua hoê te manaò no te haafifi ia Ietu i nià i ta na täpura òhipa. Teie rä, hoê noa ai raua i roto i ta raua ôpuaraa ìno, te mea pinepine rä e ìtehia nei, te rahi ia o te ùmeùmeraa e vai ra i roto ia rätou i te pae no ta rätou mau arataìraa e tae noa atu i te pae no te tiàturiraa. Te tahi hiòraa, te parau no te tià-faahou-raa : No te mau Färitea, te tiàturi nei rätou e e tià faahou te taata i te hoê mahana. Areà no te mau Tätutea, aita ia rätou e tiàturi nei e te vai ra te tià-faahou-raa. Te tumu ia rätou i haere roa ai e rämä ia Ietu nä roto i te faatiàraa i te àamu no terä vahine i täatihia i nä taeaè toohitu, mä te ui atu ia na e : Na vai ia terä vahine ia tae i te tià-faahou-raa ? Te tahi atoà parau e tano tätou e haapäpü no teie pupu taata, Tätutea, e pupu taata teie tei papa i ta rätou arataìraa i nià i terä parau e, Ta rätou anaè te mea tià e te mea mau, e te auraa atoà ihoä ia o terä iòa to rätou, Tätutea. I o tätou nei i teie mahana, te ìte-atoà-hia ra teie mau pupu taata e ori haere nei nä nià i te poromu, e teie atoà te hohoà pehe o ta rätou e faataì ra, ‘Ta mätou anaè te mea tià e te mea mau’. No reira, e ara-maitaì-atoà ia tätou o te topa atoà tätou i roto i teie reru, a parau-atoà-hia atu ai tätou e e mau fänauà tätutea. Hoê noa ta tätou niu no te parau tià e te parau mau, te Atua ta te Tamaiti i haere mai e faaìte. To tätou noa taahiraa âvaë terä e anihia ra e haapäpü maitaì, i nià i te èà o ta Ietu i faatoro no tätou, no te fänaòraa i te ora. No reira i mua i terä huru manaò o te mau Tätutea i te rämäraa ia Ietu, e parau paha tätou e e mau taata pöiri teie. I roto rä i te tahi hiòraa, maoti atoà paha rätou i ui i teie huru uiraa, i roaa atoà ai to tätou ìte i teie mahana i nià i te parau no terä ao i ô mai i te pohe. Ia au i ta Ietu mau pähonoraa ia rätou, te haapäpü maitaì ra o ia ia rätou e, te vai ra ihoä te tià-faahou-raa, oia te ora i muri mai i te pohe. Te auraa, eere tei te pohe te parau hopeà o te oraraa o te taata, tei te ora rä, tei te Atua. Te mea ia Ietu i parau ai i roto i te ìrava 27 e : Eere te Atua i te Atua no te feiä pohe, no te feiä ora rä.

A taa noa atu ai rä teie haapäpüraa ta Ietu i nià i te huru o te Atua, te haapäpü atoà ra O ia i te huru o te taata e ora atu i roto i terä ao, ’e au rä rätou i reira i te mau merahi o te ao ra’ (ìr 25vh). Ua ìte tätou i roto i te mau faatiàraa, te mau merahi te nuu atua ia te reira o te raì, e te mau tävini te reira no te Atua Metua. Te uiraa paha e tano e ui teie ia, pau roa änei hoì te taata e au i te mau merahi ? No te mea ia hiò anaè tätou i te tahi mau parau ta Ietu i faatià no te Pätireia o te Atua, te mea e ìtehia ra, a taa noa atu ai ia te parau no te tià-faahou-raa, te vai atoà ra te parau no te faataaraa i te feiä e òre e au ia rätou i terä ao (parapore no te ûpeà toro, parapore no te mau mämoe e te mau puaaniho). Te auraa, eiaha atoà paì tätou e moemoeä i mua i teie huru parau ta Ietu e eiaha atoà tätou e faariro i te Hau o te Atua e faaruèraa pehu na tätou. Te tahi atoà paha ia tumu Ietu i parau atu ai i terä Päpaì Parau i te ìrava 34vr: Aore òe i atea ê i te Pätireia o te Atua.

Te tahi atoà rä manaò o ta Ietu e hinaaro nei i te faaìte i te mau Tätutea nä roto i teie pähonoraa teie ia : Eiaha nä rätou e faanaho i te ao o te Atua, e vaiho ihoä paì nä te Atua e faanaho i to na ao. O tätou atoà te tahi mau àito püai roa i teie mahana, no te faanaho e te ôpere i te pärahiraa o te Pätireia i terä e i terä taata. Te vähi fifi rä hoì, te taata ôpere ia, te òreraa o na e päpü e, e pärahiraa änei hoì to na. No reira, mai te mea te horoà nei Ietu i teie mau pähonoraa, no te haapäpü-maitaì-raa ia i te taata e, aita ta na e tuhaa i roto i terä ao. Mai te mea e hinaaro o na ia riro o na mai te hoê o te feiä e au ia rätou terä ao, e haapaò ia i te parau mau. Mai te pähonoraa ta Âperahäma i horoà i te taata taoà rahi, Tei ia rätou ra Möte e te mau perofeta, a faaroo rätou i te reira e tià ai (Ruta 16,29). Mai te mea te roaa nei ia Ietu i te faaìte i te huru no terä ao no a muri aè, e täpaò faaìte ia e, no ô mai ihoä O ia i te Atua ra. E o Ta na ia parau e fäìraa pinepine i roto i Ta na mau haapiiraa, ia ìte te taata e, e mea tonohia mai O ia e te Atua (Ioane 17,21). Te auraa, o na anaè te taata e aita atu, mea na roto mai i terä ao tot e Atua i te haereraa mai. E aita i haere noa mai, ua hoì faahou i reira.

Te manaò tumu rä o ta tätou e täpeà mai i roto i teie faatïtoraa manaò i rotopü ia Ietu e te mau Tätutea, a tahi, terä ia haapäpüraa ta Ietu e, e tià faahou ihoä te taata ia tae i te hoê mahana. Te tahi hiòraa päpü maitaì, o Ietu iho, i pohe na e ua tià faahou mai. E tei nià i teie parau no te tià-faahou-raa, teie parau no te ora te niuraahia to tätou tiàturiraa i teie mahana: Te Atua, e Atua ia no te feiä ora, eere rä i te Atua no te feiä pohe. Te vai atoà ra te tahi parau a te paari i te mätamua ra, te nä ô ra : Tei tiàturi i to na ora e tei te Atua ra, e Atua to na ; areà tei òre i tiàturi i to na ora tei te Atua ra, aita to na e Atua. Te piti, eere nä tätou e faanaho i te ao o te Atua, no te mea i roto i te pure ta te Fatu i haapii i ta na mau pipi, aita Ietu i parau e:’Ia haapaòhia to òe hinaaro i te raì mai to te fenua atoà nei‘. Teie rä Ta na i parau :’Ia haapaòhia to òe hinaaro i te fenua nei, mai to te raì atoà na‘. E aha, e nä ô noa atoà paì tätou i te hiò, teie hoì oraraa to tätou aita e räveà e roaaraa ai ia tätou ia faanaho ia òaòa e ia pärahi noa te taata i roto i te hau, e roaa ia ia tätou e faanaho i te ao o te Atua, ta tätou e òre e ìte atu ra ? Te auraa, eiaha nä te Atua e faatano mai i nià i te mea o ta tätou e hinaaro ra e e manaò ra, nä tätou rä e faatano atu i nià i te hinaaro o te Atua ia tätou. Te mea paha e manaònaò, terä ia parau ta Ietu i roto i te Ruta 18,8:‘Ia tae mai rä te Tamaiti a te taata nei, te vai ra änei te faaroo i te fenua nei?‘ Oia hoì, e ìtehia änei te täpaò i nià i te fenua nei, o tei haapäpü e ua haapaòhia te hinaaro e te faaueraa a te Atua? E ìtehia änei

i nià i te fenua te mau täpaò no te tupuraa o te here e te aroha o te Atua?

Täpati Faatïtïàifaroraa teie, e ia parau hoì tätou e, faatïtïàifaro eere ia hoê ä e te faaàfaro aore ra, faaâpïraa. E tano e faaàfaro i te tahi hape tupu âpï. E tano e faaâpï i te tahi manaò aore ra, te tahi faanahoraa e arataìraa o te hoê nünaa. Areà, te faatïtïàifaroraa, te hoì-roaraa ia i te vähi tei reira te haamataraa mai te fifi i te tupu, e faatano faahou mai ai te haereà. Mai te tahi taata täià, ia mau anaè ta na ùpeà i nià i te toà, e hopu o ia no te haere e tatara e hoì faahou mai ai i nià. Aita teie hiòraa i ätea roa i te pähonoraa o ta Ietu i horoà atu i te mau Tätutea, oia te faahoìraa i te taata i te Tumu o te ora, oia te Atua, ia au i to na reo e:‘Te Atua e Atua ia no te feiä ora (ìr.27), o te horoà i te ora i te taata, te Atua no te Here e te Aroha o ta te Tamaiti i haere mai e faaìte. Tirä rä atu ai, eiaha e haamäoro i te tuapaparaa no te faatià ia tätou e to tätou manaò, a riro tätou ei mau fänauà Tätutea. Te tïtauraa:‘E here òe i to Atua mä to âau atoà, e mä to värua atoà, e mä to manaò atoà e mä to püai atoà, e e aroha atu òe i to tauaro mai to aroha ia òe iho na (ìr.30- 31).‘ Ia ora na e ia maitaì i teie hepetoma âpï.

 

 

François, Tahiarii a PIHAATAE òrometua

Täpati 28 no Novema 2021

Täpati 28 no Novema 2021

 

(Tiaìraa 1)

 

Poro-Faaitoitoraa

 

-Te Pehepehe : To òe Ora.

 

Ua ihu te Fenua,

Ua tärehua te feruriraa o te mau faatere,

Ua pee aore noa te nünaa i to na èà,

I to na haereà tumu òre e te tïtauraa tumu òre,

E òre e neva, e òre e ôtohe, e òre e faaroo.

Ua ihu te nünaa, ua manunu i te tiàturiraa òre,

Mai te ià i hei i nià i te ùpeà i haapuni ia na,

Eie ua parau i to na pohe e, to na ia ora,

Ua vahavaha i te fenua i hii mai ia na.

E òre e neva, e òre e ôtohe, e òre e faaroo.

Ua aniania te mau faatere i te hanahana tura òre,

Aore e mëharo, aore e mëhara.

Eiaha rä ia e maere,

E manaò mai änei te ômii i te îtere eere i to na,

Ua tapihoohia òe no te haapori ia rätou.

Ua rapu, ua reru, ua rara te mau mea atoà,

A hoì i te toàpü o to òe hiroà,

Oi vaivai aè te ora e te märamarama,

Eiaha e onoöno, ua ihu ra, e hoì ia.

Te Fenua, te iho tumu, e te Atua, to òe ia ora.

Turo a Raapoto

(Tïreo)

 

-Te Taiòraa : Ruta 21. 25-36.

 

Ìr 33 : E mou te raì e te fenua, e òre rä ta ù nei parau e mou.

 

Ia ora na to Mäòhi Nui. Ia haamaitaìhia to tätou nä Metua, nä papa âueue òre. Ta räua tamaiti, te Tamaiti a te taata. Te värua Maitaì. Te hui àito e te hui tupuna. te tohu-raa-hia te haereraa mai o Ietu, mea ätea te faaararaa. O Ioane päpetito te tahi i faaära noa atoà i to na tau : Ruta 3. 3 Haere atu ra o ia nä te mau vähi atoà i te pae i Iörïtäna ra, i te poro haereà i te päpetito tätarahapa ia faaòrehia te hara; 4 mai tei päpaìhia i roto i te puta a te perofeta ra a Ìtaia: «E reo no te hoê i te poro haereà i te mëtëpara ra : A haamaitaì i te èà o te Fatu, e faatïtïàifaro i to na haereà.

5 Ia hope te peho i te faaîhia, ia hope te mouà e te mau âivi i te haapäpühia; ia faatïtïàifarohia te èà piò, e ia haamaninahia te èà puupuu. 6 Ia ìte te taata atoà i te ora a te Atua.» Aita te taata i faaineine i te èà. Aita te taata i ineine. Aita te mau âpoo i faaîhia, aita te mau patu e faataa ê i te taata i vävähihia. E ìno roa atu, aita o ia i färiihia e reva noa atu ai o ia. Ua faaärahia, aita i haapaòhia. Teie ta tätou e hiò nei i teie mahana, to Ietu ia te Tamaiti a te taata Hoìraa mai. A fea rä o ia e hoì mai ai, aita ia o ia iho i ìte, aita atoà te mau mërahi i ìte, aita e taata e ìte, hoê anaè të ìte maoti rä, o Taaroa Nui Tumu Tahi. Te auraa, eere na tätou te mahana no te hoìraa mai o Ietu, ta tätou, te faaineineraa ia ia tätou i te mau taime atoà. Ta tätou Tiaìraa, eita ia e tano noa no te âvaè Titema noa, e tano rä no te mau taime atoà o to tätou oraraa.

E Haapiiraa teie na Ietu i roto i te fare pure. E parau teie no te Hoìraa mai o Ietu te Tamaiti a te taata i te Ao nei. E tau hopeà, e tau riàrià rahi, e tau no te haaväraa. E tau no te pohe rahi. E tau e täpeàhia ai te mau mea atoà. Aita e hororaa. E mou te mau mea atoà.

E tupu te miti rahi, e topa mai te mahana, te âvaè, te mau fetià i nià i te fenua nei. E ora te tahi pae, e e pohe te tahi pae. Mea manaònaò no te uì e ora atu i te reira tau. Te mea päpü, oia hoì, ua Faaärahia. Aita ä ra ia i tupu atu ra, noa atu paì tera parau fifi roa ta Ietu e : e òre teie nei uì e mou e hope ai i te tupu. E Atua teie to tätou no te Aroha e no te Here rahi, e te faaòromaìraa roa. E fati mai o ia i ta tätou täparuparuraa. Eita teie pohe rahi e tupu mai te peu e haapäpü tätou i to tätou faaroo i nià i te Atua. E ora tätou i to tätou anaè Faaroo. Aita te Atua e te Fatu e pata huna ia tätou. Eita teie mahana e tupu täùe noa. Eita te Rahu e faaea i te rave i ta na tuhaa. Mai te tupuraa o te räau teie mahana hopeà. E aha te auraa, e tupuraa to te mau räau atoà ta te Atua i rahu, aita e räau ôrure hau. Te tupuraa o te rahiraa o te mau räau atoà a te Atua, e huero te haamataraa, e aa, e ohi, e rauère, e tumu, e âmaa, e tiare, e maahia atu ai. Aita ä ia e räau ta te Atua i rahu e, e huero e e horoà täùe mai te mäa, e räau ôrure hau te reira.

Hoê ä ia no teie mahana ta te Fatu e faaära ra, eita e tupu täùe noa, te vai ra te mau täpaò rii mätamua e täpae atu ai i nià i to na hoìraa mai. E, mai te peu e tupu i teie uì i to tätou ra, a òaòa tätou.

Mea rahi roa ta Ietu tautururaa mai ia tätou : A tahi, e hoì mai te Tamaiti a te taata. Terä te tiàraa here-roa-hia e Ietu. Te auraa, aita e fenua i räpae i teie hoìraa mai no na. Aita e fenua e moèhia ia na. E tià ihoä paha ia te reira nünaa mä to na parau. E haamanaò ia nünaa e, na te Atua i hinaaro i to na tupuraa taa ê, ei Popaa änei, ei Tinitö, ei Purutia, ei Mäòhi….Të haafaufaa òre ia na iho, o te Atua iho ia ta na e haafaufaa òre ra. Të òre i here ia na iho, o te Atua iho ia ta na e òre ra e here.

A piti, a mou noa atu ai te Rahu, oia te parau a te Atua i riro mai ei òhipa, te parau rä a Ietu, oia hoì te Tumu ia o te parau, eita ia e mou. E täàmu ia i nià i te Atua te tumu o te parau, eiaha rä i nià i te rahi o te mäa e te taèro, e te peàpeà o teie nei ao. Eiaha e täamuhia i nià i te faatereraa, i nià i te taata (ta tätou ia pehepehe) e mauà te püai, të te âpoo ihu noa to rätou ora.

A toru, E pure. Te pure hoì ra, o òe ia e te Atua. Teie hoì mau mea ra, eere ia i te taime hopeà e haapäpü ai, e haapäpü i teie nei e a muri noa atu. E ia tupu noa atu hoì teie pohe rahi, eiaha e haapeàpeà, na to tätou faaroo e faaora ia tätou. Na to tätou here i te Atua, here ia tätou e faaora ia tätou. No reira, eiaha e Tiaì faahou a taere roa : Ua rapu ra, ua reru, ua rara te mau mea atoà, A hoì ia i te toàpü o to tätou hiroà. Oi vaivai aè te ora e te märamarama, eiaha e onoöno. Ua ihu ra, e hoì ia. Te Fenua, te iho tumu, e te Atua, to tätou ia ora. Parau Mau…

 

 

René a RAÌ òrometua

Tapati 5 no Titema 2021

 

Poroì no te Tapati 5 no Titema 2021

(Tiaìraa 2)

 

Te taiòraa : Ìtaia 60, 1-11

 

Ìrava papa i te manaò : Ìtaia 60, 1. A tià i nià, ia märamarama òe : ua tae mai to òe märamarama, e ua hiti mai e te hanahana o te Tumu Nui i nià ia òe. Inaha, e àti hoì te fenua nei i te pöuri ; e te mau êtene i te pöuri taòtaò ; e hiti mai rä te Atua Nui Tumu Tahi i nià ia òe, e ìteä noa mai hoì to na hanahana i nià iho ia òe ra.

E faaauhia na te Mäòhi i te tumu haari. To na paari, to na päètaèta, te päutuutu e te rahi atoà o to na faufaa. Eere te Mäòhi i te tärere, eere hoì i te tüturi, eere atoà i te nee. E tau roa rä i teie nei to te nünaa Mäòhi faatuturiraahia, to na faatautauraahia, to na faatärereraahia, e ua tae roa i te faaneeraa ia na mai te mea ra e, e nünaa fenua òre teie, peu òre teie, hiroà òre e te Atua òre. E au atu ra e, e nünaa teie o të täomiomi-noa-hia ra i roto i te rumaruma o te pö e te pöuri taòtaò mai te mea ra e aore o na e ao. Inaha ia ui hoì tätou e, te vai ra änei hoê nünaa o te ao nei eere i to te Atua i tae ai te tahi pae i te ìriti roa atu i te märamarama o te reira nünaa no te haapae ia na i roto i te pöuri e te taa òre. O te mea mau ta te nünaa Mäòhi e ora nei teie mahana. Oia mau, te ìte noa nei tätou i teie ata rahi pöiri e e te hahano e faarumaruma noa ra i te oraraa o te nünaa Mäòhi mai te tau a tae mai ai te mau ìri tea i o tätou nei e tae roa mai i teie mahana.

Hau roa atu i teie mahana, ua ûàna roa teie peu faariroraa i te nünaa Mäòhi ei nünaa pöiri. Ua rahi roa e te ûàna roa te mau peu o të haapöiri noa hia nei ia òre ia noaa ia na te ìte i te mau mea atoà e au no te tauturu ia na i to na oraraa i nià i te tua o te fenua nei.

Ia parau Ìtaia ia Ìteraèra e, « a tià i nià ia märamarama òe », aita atoà paha e òre ua na roto noa mai : Ìteraèra i te maru pohe i te oraraa mai e tae noa atu i te rahi e te rau o te mau täomiomiraa o tei haafifi roa i te oraraa hau o te nünaa. Ia parau anaèhia te tahi taata, aore rä te tahi nünaa a tià i nià, no te mea ia e tei raro te reira taata. Tei nià änei i te parahiraa aore rä tei nià i te vari i te nee noa raa.

Te vähi päpü rä i te taime a mohi ai te taata i raro i to na mataù e to na mataùtaù, i raro i to na mau òtohetoheraa eita roa ia taata e naeàhia i te hihi o te märamarama o te hiti noa nei no te taatoàraa. I te parauraa a Ìtaia i te nünaa a tià i nià e haamanaò atoà raa te reira e, aita roa atu te nünaa o te Atua e tano faaea noa mai te òre o ia e fänaò i te ora ta te märamarama e niinii tämau noa nei i nià ia na.

Ia òre ia moèhia ia tätou e, te mätamehaì o te rahu a te Tumu Nui o te märamarama ia, tei riro hoì ei ùputa no te ora, e no te mau mea atoà o ta te taata e fänaò i roto i te täatoàraa o to na oraraa. Te auraa aita roa atu te Tumu Nui e färii ia ère te taata e te nünaa i te märamarama e te ora.

I te parauraa e, au aè mäoti te papaâ i tae mai i o tätou nei i hitihia ai te nünaa Mäòhi e te märamarama, teie atu ra te haapäpüraa e, i te taeraa mai te papaâ io tätou nei i tärehua ai te oraraa o te Mäòhi e tae roa mai i teie mahana. Te auraa e nünaa märamarama te nünaa Mäòhi mai te mätamua mai ä. I roto roa rä i teie tau märamarama o ia i te haapöiriraahia.

Aita atoà paha e òre, i te taeraa mai teie reo to te Atua i roto i te tarià o Ìteraèra ua î roa to rätou àau i te òaòa no te mea, ia hitihia te tahi nünaa e te märamarama, o to na atoà ia fänaòraa i te ora. Ua ìte hoì tätou e, aita roa e tano i teie nau parau ia faataaêhia te tahi i te tahi. O te mea ia ta Ioane e na ò ra i te parau e, « tei roto ia na te ora, e taua ora ra o to te taata ia märamarama ».

I mua i te huru o te oraraa fifi, te ahoaho e te rumaruma o ta te nünaa Mäòhi e faaruru nei i teie mahana. I mua i te päpü òre o te huru o te oraraa o te nünaa Mäòhi ànanahi, eita atoà paha e òre tahi atoà teie reo ia tätou i teie mahana. O te Atua iho teie e faatià nei i te nünaa Mäòhi o tei hià i raro aè i te teimaha o te mau haavïraa rau a te Hau e faatere nei ia tätou.

O te Tumu Nui iho teie e faaî faahou nei ia Mäòhi Nui i to na märamarama e to na atoà hoì hanahana, ia òre te upoo o te Mäòhi ia taupe faahou i raro i mua i te rahi o te haamere o ta na faaruru noa nei aore e mahana tuuä. Ia ìte te nünaa Mäòhi e, te hanahana o te Atua o to na iho ia ora.

Ia haamanaò tämau noa rä hoì taua e te nünaa Mäòhi i te rahi hau ê o te Here e te Aroha o te Atua Nui Tumu Tahi ia tätou i te mea e, e ôriò mata e pütarià òe no na. Faaruru noa atu ä tätou i te rahi o te mau faaìnoraa rau, te mau haavïraa rau e te mau faaheporaa teimaha o te täomiomi noa nei ia òe, e tae roa atu i te taime e riro ai te huà repo ei mäa na òe.

Teie to Atua te haere mai nei ia òe mä te mä e te tiàmä, teie O Ia e vëhia nei ia òe i te rahi o to na hanahana, to na tura e to na atoà ra Hau. Teie to Atua e haere mai nei e faatià ia òe ia tiàmä òe e ia ora òe mä te Hau i nià i to òe fenua iti, e ia riro mau O Ia ei Atua no òe, e ei nünaa mau hoì òe no na.

E ta ù nünaa Mäòhi e, e tau teie no ta te Tumu Nui faaoraraa ia òe. Faaora ia òe mai roto mai i te tiàraa ài-huà-räau ta òe e amo tano òre noa ra. Faaora ia òe mai roto mai i to òe iho täuà òre i te rahi o to òe iho faufaa e te rahi ta òe faufaa ora o ta te Tumu Nui i hö noa mai na òe.

Ia färii atoà paì taua e te nünaa Mäòhi e, e tuhaa atoà ta taua iho i roto i te àti ta taua e faaruru noa nei. Eere änei e, no to täua atoà ätearaa e to taua täivaraa i te Tumu Nui i neneìhia ai taua e teie rahiraa àti o ta taua e faaruru noa nei. Ua hinaaro mau te Tumu Nui e färerei roa ia òe e te nünaa Mäòhi, ua faaruè O Ia i to na nohoraa moà roa. Teie rä, eita paha teie färereiraa to tätou e O Na mai te mea, eita e noaa ia tätou te haèhaaraa o te àau, no te tätarahapa e no te vaiho ia tätou ia tämähia e te rahi o to na here ia tätou nei.

I mua i te rahi e te ûàna o te tupuraa no te haavare e te parautià òre i roto i teie nei ao e i roto ia Mäòhi Nui i teie mahana, ia faaitoito tätou i te pähono i teie reo to te Atua ia tätou i teie mahana : A tià i nià ia märamarama òe, ua hiti mai te hanahana o te Tumu Nui i nià ia òe.

No te haamanaò faahouraa ia òe e te nünaa Mäòhi e, eere òe i te täparu, eere hoì i te tïpara, e nünaa rä òe o tei faaauhia e te Tumu Nui ia riro ei hiò hipa no na i nià i te tua o te fenua nei. I nià ia òe, i roto i to òe iho parau ei Mäòhi, e tupuraa hanahana no te hinaaro o te Tumu Nui, e ìte ai to te ao i te hanahana o te Atua riro atu ai te reira ei haamaitaìraa na te taatoàraa i te Teitei rahi te Atua Nui Tumu Tahi. Ia ora na.

 

Mïtema, Faatura a TÄPATI òrometua

Täpati 12 no Titema 2021

 

Täpati 12 no Titema 2021

(Tiaìraa 3)

Faaitoitoraa

 

Te Taiòraa : Ruta 3, 10-18

E haapiiraa teie na Ioane Päpetito, i teie mau taata, tei täpapa mai ia na, i te hiti o te Pape Iörïtäna. Ia au i te faaìteraa a Ioane a Tepetaio, mai ô atoà mai Ioane i te Atua ra i te tonoraahia mai i teie ao (Ioane 1/6). Ia au hoì te faaìteraa a te Perofeta Ìtaia 40/3. E reo teie o te pii haere na te mëtëpara, e faatïtïàifaro i te èà o te Fatu. Te auraa, ia tae anaè mai Ietu, ua ineine to na èà. Mänina noa. Faatïtïàifaro i te mau mouà teitei, te mau âivi, te mau èà puupuu, tuu mai i raro, faaî te mau peho, e te mau âpoopoo rii. Te auraa, ia àifaïto te oraraa o te taata. Ia tuea noa. Aita te tahi i nià, aita atoà e taata i raro, hoê anaè rä fäito to te mau taata atoà i mua i te Atua. E hinaaro teie no te Atua, eere no Ioane. Ta Ioane, te türama noa raa ia i te hinaaro o te Atua i te taata. Ia tätarahapa te taata, ia tämä, te haere mai ra te Atua i roto i te taata e ora ai, na roto i ta na Tamaiti ia Ietu Metia. I mua i teie haapiiraa paari mau ta Ioane e faatere nei. Mea rahi atoà te òre e märamarama ra, e mea rahi atoà te òre e faarii ra. E te uiui nei te tahi pae ia Ioane : « E na hea ia mätou ». Ia hiòhia te manaò, e feiä taoà teie e uiui nei. Terä mau mouà, terä mau âivi i roto i te oraraa nei. Ta Ioane pähonoraa, faarahi i te here e te aroha. Mea rahi ta òe àhu, höroà te tahi no te feiä veve. Mea rahi ta òe mäa, ôpere na te feiä riirii. Terä e ora ra i roto i te mau peho, terä e ora ra i nià i te fenua nei. Te òaòaraa o te taatoàraa o te taata o teie ao, ta te Atua e hinaaro nei. Aita atoà hoê noa aè faatereraa i te ao nei, i patu noa aè ta rätou arataìraa i nià i te hinaaro o te Atua. No te rahi o te nounou, e te ìno o te âau o te taata. Faaitoito rä hoì te porotetani, ia faatupuhia te hinaaro o te Atua i te fenua nei. Ua maitaì rahi to reira.

I roto i ta tätou parau, te haere atoà mai nei te mau Terona, e ani ia Ioane e Päpetito atoà ia rätou. Te feiä hara rahi roa aè teie i mua i te mata o te nünaa faaroo Âti Iuta. No ta rätou ihoä ia òhipa, täviri i te faufaa a te nünaa. Te uiui nei teie mau Terona ia Ioane Päpetito. Mai te peu, e päpetito òe ia matou, e aha ia ta matou tuhaa e rave. Maru roa te Pähonoraa a Ioane, faaea i te èia i te moni a te nünaa, haapaò noa i ta òe tuhaa moni, e àufauhia mai e te Hau Röma. Na reira atoà te mau faèhau Röma, ua haere atoà mai, ia päpetitohia e Ioane. Ma te ani atoà atu ë, e aha ta matou e rave i teie nei. Ua aò atu ra Ioane ia rätou. Faaea roa i te pari haavare noa i te taata. No te mea, te mau atoà ra te mau faèhau Roma i te tiàraa mutoì. Ua au rätou i terä taata, noa atu ta na òhipa èiä, eita rätou e haru. Ia òre anaè rätou e au i terä taata, noa atu ta na mau òhipa maitaì roa, e tià noa i teie mau faèhau, e pari i teie taata. Mea nä ô ta rätou hämani-ìno-raa i te mau taata Âti-Iuta. E àufauhia teie mau faèhau. Mea na ô ta rätou mau räveà, ia rahi atu ä ta rätou moni. Ta Ioane e parau atu ra ia rätou : « a mauruüru noa i ta òe moni âvaè ». Te mäere atoà nei teie mau taata, mea na hea o Ioane i te ìteraa i teie mau òhipa ìno ta rätou e rave noa nei. Òre noa atu ai te taata e ìte, te ìte noa mai ra te Atua. Mea na roto i te mata o te Atua o Ioane i te hiò i te huru o te taata. I tae roa ai te tahi pae i te manaòraa ia Ioane ë, o ò ia te Metia. I haapii atu ai Ioane ia rätou. Tä ù, e päpetito noa vau ia òutou i te pape. E taoà pohe te pape i te ômuaraa o teie ao. Ua faaàrepurepu atu ra te varua o te Atua i nià i te pape, riro mai nei te pape, ei taoà ora, tei fänau mai i te mau Raì, e te fenua. Te nä ô ra Ioane. Ta terä e haere mai ra na muri ia ù, e mana rahi aè to na i to ù, e päpetito ô na ia òutou i te värua maitaì e te auahi. Eita Ietu e faaea noa i nià i te pape. Faaòhipa rä Ietu i te mana o te varua, tei faatupu i te ora o te pape. Te auahi te mörï ia. O Ietu te märamarama o teie ao. Te auraa, mea hau aè ta Ietu huru Päpetito. Te faaìte atoà ra o Ioane i to na haèhaa i mua ia Ietu. Èita e tià ia Ioane i te tatara i te tïaa o Ietu. No te Âti-Iuta. Te taoà viivii roa aè teie i nià i te taata. No Ioane rä, te moà o Ietu, mai raro atu i to na tïaa, haere roa i nià i to na rouru. Eita Ietu e tänina i te taata i te auahi. E mörï türama ò ia i te taata, e pärahi noa ra i roto i te pöuri. Te auraa ia no teie auahi ta Ioane e haapii mai nei. Haamanaò terä reo to Ietu i parau atu i ta na mau pipi, i te mahana a rêva atu ai ò ia i nià i te raì. Te nä ô ra to na reo ia rätou : I päpetito na Ioane i te taata i te pape, e päpetitohia rä òutou i te mau mahana i muri nei, i te varua maitaì e te auahi. Òhipa 1/5.

Te òhipa mau ia i tupu, àhuru mahana i muri mai, te mahana no te Penetetote. Ua püpühi mai ra te tahi mataì rahi i nià ia rätou, î roa aè ra taua fare ra i te varua maitaì, ua fä mai ra te arero mäa i nià i to rätou upoo, mai te ahi ra te huru. Òhipa 2,1-4. Ia haamanaò hoì tätou i terä reo to Ietu i ta na mau pipi : « E teie nei, e haere òutou e faariro i te mau fenua atoà ei pipi, a päpetito atu ai ia rätou i te iòa o te Metua, te Tamaiti, e te Varua maitaì : » Mataio 28, 19. Ta tätou ia Päpetitoraa e rave nei. Terä ta Ioane i haapii mai, e päpetito pape noa tä ù, mea mana aè ta Ietu Päpetitoraa i ta ù. E faahopuhia òutou i te mana o te Varua Maitaì, e te märamarama o te Atua. E faahopuhia òutou i te mana o te Atua Metua, te mana o Ietu Metia, te mana o te Varua Maitaì. Ia haamaitaìhia te Atua, no teie mau aòraa maitaì roa ta Ioane Päpetito. Ia maitaì te nünaa faaroo o te Atua i Mäòhi Nui nei, i teie ôroà fänau, e teie mätahiti âpï e fä mai nei, ia òaòa i te Atua no te ora mure òre. Âmene.

Henri, Heitarauri a GERMAIN òrometua

Täpati 19 no Titema 2021

 

 

Täpati 19 no Titema 2021

(Tiaìraa 4)

Ruta èv. 1, 39 – 45

 

Ìrava 45 : « E ao hoi to na to tei haaroo : e e haatupuhia te mau mea a te Fatu i haaìte mai ia na ra. »Tau rii mahana noa e toe ra, e ö haahou tätou i roto i te haamanaòraa i te tahi taiò mahana faufaa roa e te faahiahia i roto i te oraraa o te Teretetiano no te ao atoà, mai Mäòhi nui nei, e tae noa atu i te hopeà o te mau fenua atoà tei naeàhia i te here e te aroha o te Fatu. Hou rä hoi te reira, ua nä roto mai na tätou i nä tau e maha no te tiaìraa, faarooroo mai na tätou i te mau parau atoà e tauturu ia tätou i te ìteraa i te hinaaro o te Atua i roto i nä tau e 3, e riro atoà te reira e tauturu i to tätou faaroo, to tätou tiàturiraa, e teie mahana, tei te 4 no te tau tiaìraa. Uiui atoà ia te manaò e, e aha rä ia ta te Atua parau ia ù, ia täua, ia mäua, ia mätou, ia tätou, ia òutou i teie mahana âpï ? No reira, e to Mäòhi nui nei, to hiti nià, to hiti raro, to hiti pae, Ia ora na i teie mahana. Ia haamaitaìhia te Atua Nui Tumu Tahi ! Ia haamaitaìhia te Fenua, metua vahine faatupu ora ! Ia haamaitaìhia te hui àito, te hui tupuna, e o tätou atoà i teie mahana tei taìruru mai no te haamori i te Atua, aita tätou i täpapa mai i te hinaaro o te taata, ia au rä i te hinaaro hoê no te Atua, ia hanahana to na iòa, na roto änei i te papa haamori, te mau taiòraa, te mau hïmene tei riro atoà ei ârueraa ia na. Tätou paatoà tei âmui, Ia ora, ia ora, te aroha ia rahi.

Te na ô ra ta tätou ìrava no teie mahana : « E ao hoi to na to tei haaroo : e e haatupuhia te mau mea a te Fatu i haaìte mai ia na ra. » E reo teie no te tahi metua vahine ra o Èritäpeta i to na tuahine ra o Märia. E reo òaòa teie nö na, no roto roa mai i te papa o to na manava, to na mëharo, to na âau, o ta na e vauvau nei, to na mauruüru rahi i te òhipa e tupu nei i roto i to räua färereiraa. Hoa here mä, o nä tävini vahine teie tei mäìtihia no te amo i te ôpuaraa faaora a te Atua, tahi pae e tamahine âpï roa, o Märia te iòa, e o Iotëfa to na hoa here, e tahi pae, e vahine paari o Èritäpeta te iòa, o Tätäria to na hoa here. I roto i to rätou oraraa, e ùtuafare teie tei paari i roto i te parautià te auraa, e ùtuafare piri roa teie i te Atua, i te fenua e i te rahu. E ùtuafare tei papa i to rätou oraraa ia au i te faatereraa a te Atua, e te auraa ra, e mau taata teie tei here i te Atua, e tei ineine noa i te tiaì i te ôpuaraa a te Atua Metua. Parau mau, i roto i te tuatua, e nau vahine teie tei òre ä i fänau i te tama, e nä roto i teie tïtauraa a te Atua, ua noaa ia tätou i te haapäpü i terä manaò e, te vähi tei òre i tià i te Taata, ua tià ia i te Atua, e teie nei, ua tö nä vahine i nä Toa no te parau mau e te parautià, o Ioane e o Ietu. I roto i te tiàmäraa o te Atua Metua, tei mäìti ia räua ei fauraò, ei mauhaa e pü mai ai tahi toa no te faatävai e faatïtïàifaro i te èà o te Fatu, e pü atoà mai rä tahi Toa ei Faaora no to te ao atoà nei. Te auraa, ua riro teie nä vahine ei Metua, ei Pou päpü no te haapäutuutu faahou i teie Fare tei huehue e tei hua nane roa i te rave a te faatereraa Arii, e te mau faatere faaroo.

Eere änei rä hoi no to räua tiàturi rahi i te Atua, eere atoà nei rä hoi no to räua parautià rahi i mua i te Atua i ìtehia mai ai räua ei mauhaa päpü no te oraraa hau o te nünaa o te Atua. I muri iti noa aè i to te Mërahi faaäraraa ia rätou i te tïtauraa e te ôpuaraa a te Atua, ua hinaaro o Märia e färerei i to na tuahine ra ia Èritäpeta, të noho nei i Iuta i nià i te hoê mouà. E tano e parau e, nä roto i to na òaòa i teie ôpuaraa maitaì roa, to na òaòa i teie ö i roto i to na ôpü, ua hinaaro o Märia e ôpere i te reira i roto i te ùtuafare o to na tuahine ra o Èritäpeta. Ua hinaaro o ia e faaìte atoà i to na mauruüru rahi no teie òhipa maere rahi e tupu nei i roto i to rätou oraraa, te tumu mau ia o Märia i täpapa itoito ai i te fare o to na tuahine. Noa atu hoi te ätea, aita te reira i faaapiapi noa aè i to na tere, aita atoà i faaòtohe noa aè i to na manaò, na to na òaòa, na to na faaroo, na to na here i türaì i to na hinaaro e färerei i to na tuahine, e te mea ihoä ia i ìtehia i to na tomoraa atu i roto i te fare ma te aroha atu ia na. E tano e parau e, eere ta Märia i te aroha täùtu, eere i te aroha tävaha, eere i te aroha peu noa, eere i te aroha haavarevare noa. E aroha oraora, te ièiè, te ànaanatae, te ànaanaea, e parau mau, e parau tià, no roto roa mai i te papa o to na mëharo. Eere änei hoi te reira te tumu i ôuà òaòa ai te tama i roto i te ôpü o to na Tuahine ? Eita tätou e hape i te haapäpü e, oia mau, na to na faaroo, to na püai, to na tiàturiraa, to na here, to na värua i faaànaanatae i te värua o to na tuahine e ta na tama. Eita mau atoà tätou e hape i te parauraa e, te aroharaa a Märia, e parau ia no te Faaroo. Aita ihoä paha i haapäpühia e aha mau na te huru aroharaa o ta Märia i faaòhipa, e aha mau na te parau o ta na i faahiti i puta roa ai i roto i te tarià o to na tuahine e ta na tama. Aita atoà rä e òre e, teie te reo aroha o Märia ia Èritäpeta : « IA ORA NA ». Haamanaò aè nei tätou i te reo aroha o te Fatu i te taime a ôpanipani ai te mau pipi ia rätou no te mataù i te Âti Iuta, teie atoà te reo o te Fatu no te faahoì mai i te hau i roto i te âau o ta na mau tamarii : IA ORA NA òutou. I teie maa parau iti, ua pee ê te mataù, ua pee ê te manaònaò, ua hoì mai te

hau, te ànaanatae, ua haùtiùti te ora no te haapäpü mai ia tätou e, te IA ORA NA, e parau te reira no te FAAROO, i tano roa ai o Èritäpeta i te fäì e : « E ao hoi to na to tei faaroo : e e faatupuhia te mau mea a te Fatu i haaìte mai ia na ra. » Aita o ia i faaroo tarià noa, ua faaroo âau atoà rä, ua faaroo atoà to na mëharo, ua hiòhiò, ua tütonu, ua manaò, e ua haaputu i roto i te mëharo, te tumu ia te òaòa i mäì mai ai i räpae. E ia haapotohia te manaò, ua faatura e ua tiàturi hopehope roa nä Metua vahine i te parau i faataehia mai e te mërahi i roto i to räua ùtuafare.

I teie tiaìraa maha, te ìte nei ä tätou i te hinaaro rahi o te Atua Metua ia tätou i teie mahana, oia hoi, e Atua òaòa to tätou, e Atua no te mau vähi atoà, e Atua teretere, eita e mau i te hoê vähi tumu, e Atua no te mouà, e Atua no tatahi, e Atua no roto i te faaàpu, no roto i te täutairaa, no roto i te mau òhiparaa atoà, no te mea e Atua hau roa teie e te here rahi i to na nünaa. E Atua tei ìte i te manaònaò e te hepohepo o to na nünaa, e Atua tei ìte i te faaòaòa, faahau, faaànaanatae noa i te taata, e Atua ôhie atoà i te tomo noa i roto i te ùtuafare, e Atua ìte atoà rä i te ìmi i te räveà no te tomo roa i roto i to òe âau, ia Atua faahouhia to te taata i roto i teie nei ao.

Te ìte atoà nei tätou i te huru tei uruhia i roto ia Èritäpeta i te reo noa o Märia, e taua reo ra, te reo ihoä ia o te Atua, e aore ra, o te Atua iho tei tomo roa i roto i te ôpü. Te òaòa tei ìtehia, te auraa, e tano tätou e haapäpü e, ia tomo te Atua i roto i te ùtuafare, e aore ra, ia färii tätou i te Atua i roto i to tätou mau ôpü fëtii, te mau ùtuafare, e òaòa të ìtehia, e òuàuà noa tätou i te òaòa, eita e peàpeà faahou, e oraraa hau to tätou mai teie atu nei a tau a hiti noa atu.

E tano rä hoi e uiui ia täua i teie mahana : Ea ha ta te Atua parau i tae mai ia täua ra mai tei tae mai ia Märia ra e o Èritäpeta ? E aha to te Atua hinaaro ia täua i teie mahana ? Te mea päpü e aù nünaa here, eere na täua e faatere nei ia täua iho e io täua iho. Na te faräni e parau nei no täua, aita roa atu ta täua e parau io täua iho. Ua faaèrehia täua i to täua tiàraa taata mäòhi i nià i to täua fenua mäòhi. Aita ihoä paha täua i hopoi tîtîhia, âreà to täua värua e to täua âau, ua riro roa, ua päenu hänoa i roto i te ânoì e te taamino. Te tupuraa mai teie tirotiro taèro 19, ua haamata mäite mai to täua âau mäòhi i te hoì faahou mai io täua iho, ua topatopa märiirii te mau poa e faaapiapi nei i to täua mata, te ùputa no te ìte i te maitaì a te Atua. Te auraa, ua hau täua e te Fenua, ua faaàpu faahou täua na te pae fare, ua faaàpu ä ia i te òre roa. I teie mätahiti 2021, no te âvaè Âtete, ua püai e ua maraa faahou te fäito tirotiro i nià. I roto i te àrepurepu e te taamino, ua huehue roa te oraraa hau o to täua nünaa mäòhi, aita e tiàturi faahou i te faatereraa hau mäòhi, aita e tiàturi faahou i te räveà pätia tämatamata a te mau täote, ua färiu rä täua i nià i ta täua räau mäòhi, ua hau täua i te 20 tauatini taata e hau atu, tei inu i ta täua räau, te auraa, te nuu mäite noa ra to täua hohoìraa i te Atua ra, i te Fare Metua ra. Teie pahaia te parau huru tano rii noa aè, ua riro teie räau ei mauhaa no te faahoì marü noa mai to täua iho âau i roto i te ôpü moà o teie Fenua. Teie räau ta täua, o te Atua iho terä e tomo mai nei i roto i to täua oraraa, mai ia Märia i âfaì i te tama Atua i roto i te ùtuafare o Èritäpeta. Te noni, te Aloé, te ôporo, te reà, te parau iho te reira na te Atua, e aore ra, te värua iho te reira o te Atua, tei roto täatoà o na i teie mau mäa, te Rahu, te Ora ia o te nünaa mäòhi.

Haamanaò noa na tätou, i roto i te tere o Märia, eere tei te rahi o te parau i faaòaòa i te tama. Aita o ia i taiò i te Taramo, aita i taiò i te puta täatoà. E aroharaa noa, ma te âpeehia e to na âau, to na värua, to na manaò e to na püai iti e hope roa, maa parau iti haìhaì noa : IA ORA NA. No te Atua iho teie reo, o ia te haamataraa o teie parau, e hinaaro no te Atua ia vai noa te Ora i roto i te taata hoê, te nünaa o teie nei ao, mai ia täua atoà i teie mahana e te nünaa mäòhi, e hinaaro no te Atua ia tüatau noa te Ora i roto i te nünaa mäòhi, no te mea te IA ORA Na, e parau te reira no te Faaroo. No reira e a ù nünaa here iti e, A ORA E TO TĀUA ATUA, IA ORA, IA ORA NA !

 

Raìtui, Vavaeteraì a TAUHIRO òrometua