Ruta èv. 12.49-53 Tamaì.

 

Tāpati 14 Âtete 2022.

Tamaì.

Taramo 40

1 Na te Mënätehe. Taramo na Tävita.

2 Tiaì mäite atu ra vau i te Fatu, e ua färiu mai ra o ia ia ù, e ua faaroo i ta ù pure.

3 Ua ùme o ia ia ù i räpae i taua âpoo riàrià ra, no roto i te vari hohonu e te piripiri. E ua tuu o ia i ta ù âvae i nià i te papa, e ua faaau mäite hoì i to ù mau haereà.

4 E ua tuu mai o ia i te himene âpï i roto i to ù nei vaha, e himene haamaitaì i to tätou Atua. E rave rahi të hiò, e ua mataù ia na e tiàturi hoì rätou i te Fatu.

5 E ao to te taata e tiàturi i te Fatu, e aore i haapaò i te teòteò, e tei färiu i te parau haavare ra.

6 E rave rahi, e ta ù Atua, e te Fatu, te mau òhipa taa ê i ravehia e òe ra, e to òe ra manaò ia mätou nei E òre e tià ia taiò noa atu i mua ia òe na, e faaìte hoì au, e parau vau i te reira eita rä e tià ia taiò atu i te rahi.

7 Aore òe i hinaaro i te tütia e te tütia àmu, ua haafatafata òe i to ù puè tarià. Te tütia-täauahi e te tütia no te hara ra, aita òe i tïtau mai.

8 Ua parau atu ra vau: «Inaha, te haere atu nei au. Ua päpaìhia te parau no ù i roto i te puta ra.

9 E mea au na ù te rave i to òe hinaaro, e ta ù Atua; te vai nei hoì ta òe ture tei roto i to ù nei âau.»

10 Te parau nei au i te parau tià i roto i te âmuiraa rahi o te taata nei; inaha, aore roa ta ù vaha i mämü i te reira ua ìte atoà hoì òe, e ta ù Atua e te Fatu.

11 Aore au i huna i te parau tià na òe i roto i ta ù âau; te faaìte nei au i to parau mau e te ora na òe. Aore au i huna i to hämani maitaì e to parau mau i te âmuiraa rahi ra.

12 Eiaha òe e hopoi ê i to aroha hämani maitaì ia ù, e te Fatu e; na to hämani maitaì e to parau mau e tiaì mai ia ù.

13 Ua haaàtihia hoì au e te ìno e rave rahi; ua roohia vau i ta ù nei mau hara, e eita e tià ia nänä noa atu i nià ra. E rahi te reira i te iò rouru i to ù nei upoo; e teie nei, ua taiä ta ù âau i roto ia ù nei.

14 Ia tià ia òe, e te Fatu, e faaora ia ù: ia peepee mai, e te Fatu, e tauturu mai ia ù.

15 Ia haamä rätou e ia hepohepo rätou atoà ra o tei tïtau mai ia ù nei ia pohe. Ia faahoìhia rätou e ia hepohepo tei tïtau mai ia ù nei ia ìno.

16 O te pau të noaa ia rätou, ei utuà no ta rätou faaìno, o tei parau ia ù nei e: «Àitoa! Àitoa!»

17 O te feiä atoà rä i ìmi ia òe ra, e òaòa ia rätou, e ia reàreà ia ia òe; e te feiä i hinaaro i te ora na òe ra, e parau ia rätou e: «Ia faarahihia te Fatu e a muri noa atu.»

18 E àti e te veve to ù, te manaò mai ra rä te Fatu ia ù. O òe tau tauturu e ta ù ora. Eiaha e faaroaroa, e ta ù Atua.

Ieremia 38.4-10

4 Ua nä ô atu ra te pupu arii atoà ra i taua arii ra, ia pohe atu teie nei taata, e tià ai, ta mätou ia parau ia òe, no te mea nö na i paruparu ai te rima o te feiä tamaì e toe i roto i teie nei ôire, e te rima atoà o te taata atoà nei, o ia i nä reira i te parauraa mai: aore teie nei taata i ìmi i te maitaì no teie nei feiä, o te ìno ra.

5 Ua parau mai ra taua arii ra o Tetetia, inaha, tei to òutou rima; aita hoì a te arii parau ia ètaèta òutou.

6 Ua rave iho ra rätou ia Ieremia, e ua huri atu ra ia na i roto i te âpoo io te tamaiti a te arii ra io Maretia, i te àumoa o te täpeàraa ra; i tätaurahia Ieremia e rätou i te tuuraa i raro ra: e aore e pape i roto i taua âpoo ra, o te vari anaè rä maìri iho ra Ieremia i raro i taua vari ra.

7 Ìte aè ra te âti-Tuta ra o Èteta-mereta i roto i te fare o taua arii ra, e ua huri rätou ia Ieremia i raro i te âpoo; te pärahi noa ra te arii i te ùputa o Pëniämina ra;

8 ua haere iho ra Èteta-mereta i räpae àu i taua fare o te arii ra, e ua parau atu ra i te arii, nä ô atu ra,

9 E ta ù fatu, e te arii, hämani ìno to teie nei feiä i te perofeta nei ia Ieremia, tei hurihia e rätou i roto i te âpoo: e pohe roa hoì o ia i reira i te poìa, aita atu ra o te ôire nei e mäa.

10 Ua faaue atu ra te arii ia Èteta-mereta âti-Tuta ra, nä ô atu ra. E arataì atoà òe i te taata ia toru aè àhuru, a rave ai i taua perofeta ra ia Ieremia e ìriti mai i räpae, e pohe o ia.

Hēpera 12.1-4

Te Atua to tätou Metua

1 E teie nei, ua haaàtihia tätou e taua nahoà rahi i ìte nei, e haapae tätou i te mau mea teimaha atoà, e te ìno e hara ai tätou nei, a horo tämau mäite ai i teie nei hororaa i mua ia tätou nei,

2 mä te tiàtonu mäite to tätou mata ia Ietu, i te tumu e te faaoti i to tätou faaroo; o tei faaòromaì i te tätauro, aore i haapaò i te haamä, i te maitaì i tuuhia mai i mua i ta na aro; e te pärahi ra i teie nei i te pae àtau i te teröno o te Atua ra.

3 E haamanaò mäite hoì ia na, o tei faaòromaì i te reira huru faaìno a te feiä rave hara ia na iho ra, ia òre hoì òutou ia töàruàru, ia òre ia taiä to òutou âau.

4 Aita ä hoì i tae i te maniiraa toto to òutou taputöraa i te ìno ra.

Ruta èv. 12.49-53

Ietu te tumu o te âmaharaa

(Mät 10,34-36)

49«I haere mai au e hopoi mai i te auahi i te ao nei, e e aha to ù nei hinaaro maori rä ia àma ä i teie nei?

50 E päpetitoraa rä to ù e vai nei e aita to ù mäuiui ia oti.

51 Te manaò na òutou e, i haere mai au e faatupu i te hau i te ao nei? E faaìte atu vau ia òutou: aore, e tamaì rä.

52 Teie hoì a àmaha nä taata toopae i te fëtii hoê ra, o e tootoru ra, e tamaì mai i e toopiti; o e toopiti hoì, e tamaì mai i e tootoru.

53 E tamaì te metua täne i te tamaiti, e te tamaiti i te metua täne; e tamaì te metua vahine i te tamahine, e te tamahine i te metua vahine; e tamaì te metua hoovai vahine i te hunoà vahine, e te hunoà vahine i te metua hoovai vahine.

Manaò.

Te mau taiòraa tei faataahia no teie mahana, e mau parau ia tei haamanaò ia tätou te puai o te faaroo tei niuhia te tiàturiraa i nià i te Atua Nui Tumu Tahi, e ua ìte rätou o te papa aueue òre te reira. E parau ia tätou teie mau huru taiòraa e toro èà, no te mea e èà âpï teie e faatorohia nei. Na te mau parau ihoä rä tätou i faaìte mai i te vähi e nä reira tätou i te haere mai teie atu ra, o òe e to òe Atua, òrua e to òrua Atua, òutou e to òutou Atua. Eiaha atoà hoì e manaò e, tei roto tätou i te reru i teie nei no te mea te haapaò noa atu ra te reira taata ia na, te haapaò atu ra te reira ia na. E manaò hape te reira, no te mea te òe, te òrua, te òutou, te mau taata ia ta te Atua e parau âfaro atu ra, e ö rätou i roto i te faanahoraa ta tätou i parau nei e : to ù vaha, to òe tarià. Aita i moèhia i te Atua to òe iòa, ua ìte o ia o vai òe. Mai teie atu, te taata faufaa, eere te mau taata ta òe i mätau i te parau e, te feiä mana, te mau upoo faatere. Aita te Atua i ìte i te auraa o te parau e, peretiteni no te Etärëtia, peretiteni Tuhaa, päpaì parau rahi, òrometua, tiàtono, hoê noa ta te Atua i ìte päpü, o òe, o na, òutou, rätou, mätou. I te mau taime atoà te Atua hinaaro ai e färerei i te taata, ua nä reira atoà mai Ietu, teie ta na parau here roa : eiaha e mataù.  No reira, eiaha e mataù, te faaâpï nei te Atua i te mau mea atoà, ua òre te mau faanahoraa tahito. A hoì io òe iho, i roto i ta òe iho, o òe e to òe Atua, i te vahi i reira òe e ora i te ora a te Atua Nui Tumu Tahi. Ua ìtehia i te mea maitaì i roto i te mau faanahoraa ia au i te Atua.

Ia topa mai te mau parau mai teie te huru, e haamata ihoä te taata i te ônevaneva e te uiui atoà e : o vai terä e parauhia ra, te taata i roto i te mau taiòraa ua ìte rätou no rätou teie mau parau. E a pähono-noa-hia ai o ia i te reira vähi, e tämau ä o ia i te ui ia ìte i te taime o ia i faaìtehia ai i te reira parau, nä reira hoì te taata na na i rave i te òhipa ta na e òre e haamanaò ra, e ta na e maere nei i te faarooraa, no te huru manaò-òre-hia o te parau. No te mea aita e iòa i faaroohia, eita ihoä ia tätou e maere ia ônevaneva te taata i te ìmiraa i te haapäpüraa ia òre o ia ia hape i te pähonoraa i te tahi parau tei òre i haapaòhia no na. Mea haamä atoà hoì ia parauhia mai e, eere o òe terä e parauhia mai ra. E òhie tätou i te märamarama i teie huru to te taata. Te tanoraa mau rä, ia faahitihia teie huru parau, e hiò te taata parau i te taata ta na e parau ra, mata e mata, vaha e tarià, mai te peu eita o ia e tüòu mai, eita hoì e faatoro roa mai i te rima, òe, no reira, eita te taata e faaroo mai ra e rahi roa te hape. No te tautururaa ia tätou ia òhie i te tomoraa i roto i te märamarama o te parau, rave na tätou i te hiòraa no te àhu faaau. Ua faaoti te tahi âmuiraa i te hohoà àhu ta te taata âmuiraa e òòmo, te rau räau e tae noa atu i te pëni ; âreà te huru auraa ra, oia te huru niraraa, na te taata tätaì tahi ia e hiò mai i te reira vähi. Te piti o te auraa o te àhu faaau, te tahi ia àhu tei fäitohia i nià ia ù, e ta ù i horoà i te hohoà. Te tanoraa mau, to ù anaè te niraraa taa ê, aita e piti mai to ù. Mai te reira rii atoà te auraa ta te Atua e hinaaro nei i te haamau i roto ia na e o òe ; òrua anaè tei ìte i ta òrua faanahoraa, aita e taata ê atu e ö mai i roto. Mai ia tätou e parau nei e, aita e piti mai te Atua ; e tano atoà tätou e parau e, aita e piti mai ia òe, e o òe ta te Atua e hinaaro ra. Teie atu ra te haapotoraa no teie mau manaò i ômuahia, ia au i te faanahoraa o na ìrava e maha :

-Taramo 40, 3 Ua ùme o ia ia ù i räpae i taua âpoo riàrià ra, no roto i te vari hohonu e te piripiri. E ua tuu o ia i ta ù âvae i nià i te papa, e ua faaau mäite hoì i to ù mau haereà.

-Ieremia 38, 6 Ua rave iho ra rätou ia Ieremia, e ua huri atu ra ia na i roto i te âpoo io te tamaiti a te arii ra io Maretia, i te àumoa o te täpeàraa ra; i tätaurahia Ieremia e rätou i te tuuraa i raro ra: e aore e pape i roto i taua âpoo ra, o te vari anaè rä maìri iho ra Ieremia i raro i taua vari ra.

-Hepera 12, 1 E teie nei, ua haaàtihia tätou e taua nahoà rahi i ìte nei, e haapae tätou i te mau mea teimaha atoà, e te ìno e hara ai tätou nei, a horo tämau mäite ai i teie nei hororaa i mua ia tätou nei,

-Ruta èv.12, 51 Te manaò na òutou e, i haere mai au e faatupu i te hau i te ao nei? E faaìte atu vau ia òutou: aore, e tamaì rä.

Te Parau Maitaì, e färereihia nei e tätou i teie mahana, e parau rua tahi teie to na faanahoraa :

E auahi, ia àma.

Päpetito, mäuiui oti òre.

Te Hau e te Tämaì.

E àmaha, e te Tämaì.

Metua Tane e te Tämaïti e tämaì.

Metua Vahine e te Tamähine e tämaì.

Metua hoovai vahine, e te hunoà vahine e tämaì.

Te hunoà vahine, e te Metua hoovai vahine e tämaì.

Ia au i teie mau parau te tahi manaò ta Ietu e hinaaro nei ia òhipa te taata te Hau, e ia parau o Ietu i haere mai au e hopoi i te auahi, to ù hinaaro mäori ra ia àma. I teie huru parauraa to na auraa ua töàruàru roa te parau o te Hau i roto i te taata, ua pohe te àma o te ahi, tei turäma i te èà o te oraraa. I te mea te ura o te ahi e vai àrahu òre noa ua pohe, ua ö i roto i te ano, i te vahi no te pöuri. E faanahoraa òhipa teie ta Ietu e tuu mai nei i mua ia tätou i teie mahana, teie mau faahitiraa parau ua ìte tätou mea pinepine te taata i te faatupu i te tämaì, noa atu no te tahi mau tumu òre e tupu te tämaì. Te vahi faufaa no teie mau reo no Ietu, te faahitiraa o ia i te parau no teie ao, e teie ao tätou atoà to roto, no tätou atoà teie parau. Ia tupu teie mau faanahoraa mai teie te huru e hiti mai te parau no te ture, e àveià ärataì teie i te nünaa i roto i te vaamateìnaa te vahi i reira te oraraa o te mau ùtuafare, te mau metua, te mau tamarii te tià e ora i roto i te hau e te maitaì. E mau faaueraa teie ta Ietu e tïtauhia mai nei ia tätou ia haapaò ia òre tätou ia naeàhia i te faahaparaa. Te tanoraa mau, no te täatoà teie parau, te mea te reira e faanaho i to tätou oraraa âmui, te mea hoì e faataa ra i te tuhaa a te taata tätaì tahi no te maitaì o te täatoà, e aita e taata e tano e haapae ia na i te haapaòraa i te reira.  Te auraa ra, eere no te taata hoê teie reo no Ietu. I haamauhia ai te ture, ei räveà ia e faatura ai te taata te tahi i te tahi, i te òreraa e rave noa i te mea tei au i to na manaò, aore ra to na maitaì, e a fifi atu ai te oraraa o te tahi pae. Te hopeàraa o te ture, te maitaì ia o te oraraa âmui o te taata. Mai te peu e faahapa te ture i te taata tei òre i faatura, aore ra tei ôfati i te ture, eere no te päruru i te ture, no te mea e riro te reira peu i te haafifi i te maitaì o te oraraa âmui o te taata. Aita e ture e haamauruüru i te taata no te haapaòraa i te mea tei tïtauhia ia na. Ta te Atua anaè te ture e ìte ra i te reira vähi : Faatura atu i to metua täne e to metua vahine, ia haamaorohia to òe puè mahana i te fenua ta to Atua ta te Tumu Nui e horoà no òe na (Etoto 20, 12). E tano te taata e taui i te ture, e tano e faaòre, e faaravaì, e haamaitaì. Te maitaì o te tahi ture i te tahi tau, e tano te taata e haapae i te tahi atu tau, no te mea ua taui ta na peu, ta na hiòraa, e ta na faanahoraa i te oraraa. Te haamanaò noa mai ra te reira i te taata e, te maitaì, aore ra te fifi o to na oraraa, tei to na noa ia faatura, aore ra to na faatura òre i ta na iho ture ; te auraa, tei roto noa to na ora i to na rima. Ia tupu mai teie te huru te oraraa o te taata, e ïti mai te parau no te àmahamaha i roto i te oraraa ùtuafare, e te oraraa vaamateìnaa. Te tïtau atoà mai nei o Ietu i roto i teie ìrava, 51 Te manaò na òutou e, i haere mai au e faatupu i te hau i te ao nei? E faaìte atu vau ia òutou: aore, e tamaì rä. E reo teie e faatupu ra i te haereraa e te Atua Nui Tumu Tahi, Teie haere e parauhia nei, eere ia no te tuuraa âvae noa ta te taata e faatano ra i nià i te vähi ta na e tïtau ra, e haamanaòraa noa rä i te taata e, eere o ia te mea faaea tumu mai, e rätere noa o ia, i roto rä i to na tere, te hinaaro nei te Atua e, räua aè ia haere. Ia päpü maitaì rä tätou e, eere te tiàraa âpee noa, aore ra te âpiti o te taata ta te Atua e hinaaro nei, te hinaaro nei rä te Atua ia ìte te taata e, eita to na parau e tano ia faataa-ê-hia i to te Atua. No reira, aita te Atua i âmui noa mai i roto i te tere o te taata, aita hoì te taata i haere noa e te Atua, i haere rä o ia e to na Atua. E no te mea te parau âfaro noa mai nei te Atua i te taata, teie atu ra ia te faanahoraa tano o te parau : ia haere òe mai te haèhaa e to Atua, oia hoì to òe Atua. Te hinaaro nei te Atua ia märamarama te taata i te auraa âpï ta na e hinaaro nei i te haamau i roto ia na e te taata. Ia parau tätou e, te Atua o te nünaa, ua moè ia te parau o te taata tätaì tahi ; ia parau tätou e, te Atua o te mau tupuna, aita atoà to te taata tätaì tahi e parau ; ia parau rä tätou e, to Atua, aore ra to òe Atua, aita ia hoê mea e faaapiapi, aita hoì e mea e faataa ê ia òe i to òe Atua, aita e taata, aita e tiàraa, aita hoì e faanahoraa. Inaha e hinaaro hopeà teie no te Atua, aore ra teie anaè to na hinaaro ia òe e te taata, eita änei te reira e maraa ia òe ia färii, ua rahi roa änei teie iti, aore ra no teie iti e òhie roa ai òe i te faatupu i te mea ta te Atua e ani mai ra ia òe. Mea maitaì atoà rä tätou ia märamarama maitaì i te auraa o te mea e anihia mai ra ia òe. Ia parau tätou e, eiaha ei patu faahou e tuuhia ei faataa ê ia òe i to òe Atua, eiaha ihoä ia e tuu faahou mai i te tahi mea. Ia onoöno tätou i te tuu mai i te tahi mea i roto i te taata e te Atua, te ärai ra tätou i te taata ia òre ia färerei i to na Atua, e te àro ra hoì i te Atua ia òre ia tupu to na hinaaro. Mea maitaì tätou ia feruri maitaì i te püai e te hohonu o teie parau. Nä hea e tupu ai teie hinaaro to te Atua i te färerei i to na taata, i te haere hoì e to na taata, mai te peu o tätou iho te feiä mätamua e haafifi e të faaapiapi i te tupuraa o teie hinaaro to te Atua. Parau mau, ua ora mai e ua paari mai tätou i roto i teie mau faaapiapiraa ta tätou i faariro roa ei ture e arataì i te oraraa o te Atua, mai te mea e, tirä rä èà ta te taata e rave ia hinaaro o ia i te färerei i te Atua. Te vähi peàpeà rä hoì, aita e räveà te taata e ìteraa ai i te hopeàraa o to na tere, mai te räau e huna i te uru räau, te faanahoraa i te hunaraa i te faanahoraa, te auraa, ua moè te faanahoraa i roto i te faanahoraa. I to tätou nä reiraraa, aita änei tätou i mono i te Atua, aita änei i haru te tiàraa o te Atua. Eie te Atua e ani mai nei e ìriti i te mau mea atoà e faaapiapi nei i to na färereiraa i te taata. Tano mau atu ai teie to Pauro e naò ra e, 1 E teie nei, ua haaàtihia tätou e taua nahoà rahi i ìte nei, e haapae tätou i te mau mea teimaha atoà, e te ìno e hara ai tätou nei, a horo tämau mäite ai i teie nei hororaa i mua ia tätou nei……

 

Teraì òr. Faatura.

 

Ruta èv. 12.32-48 Ruta èv.

 

Tāpati 7 no Âtete 2022.

Ôroà

Mäìtihia 

Taramo 33.

1 E òaòa i te Fatu, e te feiä parau tià e. E au te haamaitaì i te feiä parau tià.

2 E haamaitaì i te Fatu i te tïnura, e himene ia na i te näpara aho àhuru ra.

3 E himene ia na i te himene âpï, faaòto maitaì na mä te òaòa e te au mäite.

4 E parau tià ta te Fatu, e te haavare òre hoì ta na atoà ra mau òhipa.

5 Hinaaro o ia i te parau tià e te au, te î nei te fenua i te maitaì a te Fatu.

6 Na te parau a te Fatu i oti ai te mau raì, e to rätou atoà ra i te aho o to na vaha.

7 Ua haaputu o ia i te moana ra o te tai ei puèà, e ua vaiiho o ia i te moana i roto i te fare vairaa.

8 Ia mataù te mau fenua atoà i te Fatu; e ia höriri to te ao atoà nei ia na.

9 Ua parau hoì o ia, e oti aè ra; ua faaue o ia, e ua mau atu ra.

10 Te faaòre nei te Fatu i te âpooraa a te mau êtene, te faariro nei i tei ôpuahia e te mau taata ra ei mea faufaa òre.

11 Tei faaauhia e te Fatu ra, e tià ia i te vai-mäite-raa, e tei manaòhia e ta na âau e tae noa atu i te mau uì atoà ra.

12 E ao to te fenua, o te Fatu to rätou Atua; e te mau taata i mäìtihia e ana ei tufaa na na.

13 O te Fatu tei hiò mai nä nià mai i te raì, te hiò mai ra i te mau tamarii atoà a te taata nei.

14 Te vähi i pärahihia e ana ra, ta na ia hiòraa mai i to te ao atoà nei.

15 O ia anaè rä tei haafäito i to rätou âau, e o ia tei hiòpoà mai i ta rätou mau räveà.

16 Aore e arii i ora i te rahi o ta na nuu, aore e taata püai i ora i te rahi o te püai.

17 E mea faufaa òre te puaahorofenua ei haapüraa, aore e taata e ora i to na püai rahi.

18 Inaha, tei nià to te Fatu mata i te feiä i mataù ia na, i nià i te feiä i tiàturi i to na ra aroha,

19 e faaora ia rätou i te pohe, e ia ora hoì rätou i te oè ra.

20 Te tiaì nei to mätou värua i te Fatu; o to mätou ia tauturu, e to mätou ia päruru.

21 Te òaòa nei to mätou âau ia na; te tiàturi nei hoì mätou i to na ra iòa moà.

22 Ia vai mäite mai ä to aroha, e te Fatu, i nià ia mätou, mai ia mätou nei e tiàturi atu ia òe ra.

Ètetiera 33.10-16

10 E o òe atoà, e te tamaiti a te taata na, e parau atu i te ùtuafare o Ìteraèra; Te vai nei ta mätou mau hara, e ta mätou nei mau parau ìno i nià ia mätou nei, e ua roohia mätou i te ìno i te reira, e aha iho ra hoì mätou e ora ai?

11 E parau atu ia rätou te nä ô mai ra te ATUA ra o te Fatu te ora nei au ra, aore roa o ù e mauruüruraa i te pohe o te taata ìno ra; ia färiu mai ra te taata i ta na parau ìno ia ora: e färiu mai òutou, e färiu mai òutou, i ta òutou mau parau ìno ra; e aha hoì òutou i hinaaro ai i te pohe, e te ùtuafare o Ìteraèra e?

12 E parau atoà atu òe, e te tamaiti a te taata na, i te mau tamarii a to mau taata ra, E òre te taata parau tià e ora i ta na ra parau tià i te mahana e hara ai o ia ra; e te parau ìno hoì a te taata parau ìno ra, e òre o ia e hià i te reira i te mahana e färiu mai ai o ia i te parau ìno nä na ra; e òre atoà e ora te taata parau tià i te mahana e hara ai o ia i ta na ra parau tià.

13 Ia parau vau i te taata parau tià ra, E ora mau o ia; e ua tiàturi iho ra o ia i ta na iho parau tià, e ua rave hoì i te parau ìno, e òre e manaòhia te mau parau tià atoà nä na ra, no ta na ra parau tià ìno tä na i rave ra, e pohe o ia i te reira.

14 E mai reira hoì, ia parau atu vau i te taata parau ìno ra, E pohe mau ä òe na; e ua färiu mai o ia i ta na parau ìno, e ua rave i te mea au e te mea tià ra;

15 e ua faahoì mai ra taua taata parau ìno ra i te mauhaa, e ua hopoi mai i tä na i haru ra, e ua haapaò i te parau ora mau ä o ia, e òre ia e pohe.

16 Te mau hara atoà tä na i rave ra, e òre ia e manaò-faahou-hia ei hara nä na; ua rave o ia i te mea au e te parau tià: e ora mau ä o ia ra.

Hēpera 11.1-19

Te faaroo

1 E teie nei, o te faaroo nei, o te tiàturi ia i te mau mea e tiaìhia nei, e te ìte i te mau mea aore e hiòhia nei.

2 No te reira hoì i noaa ai te roo maitaì i te feiä tahito ra.

3 No te faaroo i ìte ai tätou e, no te parau a te Atua nä ao nei i hämanihia ai, eere hoì te mau mea e hiòhia nei i to te hoê mau mea i ìteä ra.

4 No te faaroo i maitaì roa ai ta Àpera tütia i püpü i te Atua i ta Taina; i parauhia mai ai o ia e, e taata parau tià, o te Atua i faatià mai i taua taoà horoà na na ra; e teie nei, pohe noa ä o ia, te parau noa mai ra ia, i taua faaroo ra.

5 No te faaroo i tähitihia ai Ènoha ia òre o ia ia ìte i te pohe; e aita ra o ia, no te mea ua tähitihia o ia e te Atua; hou hoì o ia i tähitihia ai i ìte ai o ia e, te mauruüru ra te Atua ia na.

6 Aore e faaroo ra e òre roa o ia e mauruüru: o te haamori i te Atua ra, e faaroo o ia e, e Atua, e tià ai, e o o ia të faautuà i te feiä i ìmi päpü ia na ra.

7 No te faaroo hoì to Noa, a faaìtehia mai ai o ia e te Atua i te mau mea aore ä i ìteä mai ra, e roohia iho ra e te mataù, i tarai ai i te pahï ia ora to na fëtii; faahapa iho ra i to te ao, e riro atu ra o ia ei fatu i te parau tià e noaa i te faaroo ra.

8 No te faaroo i haapaò ai Âperahäma, a parauhia mai ai o ia e, e haere i te hoê vähi e noaa mai ia na a muri atu ei âià; e haere atu ra o ia mä te ìte òre i taua fenua i haerehia e ana ra.

9 No te faaroo i purutia noa ai o ia i taua fenua i parauhia mai ra, mai te mea e, e fenua ê ra; i te pärahi-noa-raa i roto i te tiàhapa ra, rätou atoà o Ìtaata, e o Iatöpa; o nä taata âià atoà ia e o ia atoà i tei parauhia mai ra. 10 Te tïtau ra hoì o ia i taua ôire niu mau ra, o te Atua te faaau e te faatià ra.

11 No te faaroo atoà i noaa ai ia Tara iho te maitaì i tö ai ra, e fänau mai ra ta na tamaiti, hope noa ai to na tau mau ra, no te mea i manaò o ia e e parau mau ta na ta tei parau mai ra.

12 I fänau mai ai ta te taata hoê ra, e mai te taata pohe hoì te huru, mai te fetià o te raì ra te rahi, e mai te one tähatai eita e hope ia tataù ra.

13 I pohe anaè atu ra taua feiä ra mä te faaroo, aita i noaa tei parauhia mai ra, ua hiò rä rätou i taua mau mea ra i te ätea ê, e ua faaroo päpü e ua färii mäite, e ua fäì hua e, e taata èê rätou e te purutia i teie nei ao.

14 O te feiä hoì i nä reira mai, ua faaìte hua ia e, te ìmi ra rätou i te fenua mau.

15 Àhiri hoì rätou i nounou i taua fenua no reira mai rätou ra, e tià noa ia ia rätou ia hoì.

16 Ua hinaaro rä rätou i te fenua maitaì roa ra, oia hoì te ao ra: i òre ai te Atua i haamä ai ia rätou ia parauhia o ia e e Atua no rätou; ua haapaò hoì o ia i te hoê ôire no rätou.

17 No te faaroo i püpü ai Âperahäma ia Ìtaata, a tämatahia ai o ia ra; e te taata i noaa ia na te parau i parauhia mai ra, ua püpü ia i ta na tamaiti fänau tahi,

18 no na te parau i parauhia ra e: «Ei ia Ìtaata to òe ra huaai e noaa ai.»

19 I parau hoì o ia e, e tià i te Atua ia faatià faahou mai ia na mai te pohe mai ra; e mai te mea hoì e mai te pohe mai ra te noaa-faahou-raa ia na.

Ruta èv. 12.32-48

Te mau taoà i nià i te raì

(Mät 6,19-21)

32 «Eiaha e mataù, e ta ù nana iti e. E mea hinaaro na to òutou Metua i te horoà mai i te Pätireia no òutou.

33 E hoo i ta òutou taoà, a horoà noa atu ai; ei pütë marau òre ta òutou, ei taoà pau òre i te ao ra; i te vähi e òre e taeà e te èiä, e òre hoì e pau i te huhu.

34 Te vähi hoì i vai ai ta òutou taoà, tei reira atoà ia to òutou âau.

Te mau tävini e vai ara nei

35 «Ia tätuahia to òutou tauupu, e ia vai àma ä ta òutou rämepa.

36 E ia au òutou i te feiä i tiaì i to rätou fatu i te hoìraa mai, mai te faaipoiporaa mai ra; ia haere mai rä o ia e pätötö mai ra, ia ìriti rätou i te ôpani ia na i reira ra.

37 E ao to te reira mau tävini, i te roohiaraa mai e to rätou fatu, te ara ra. Oia mau ta ù e parau atu ia òutou na, e riro o ia i te tätua ia na iho, a tuu atu ai ia rätou i te àmuraa mäa ra, a raverave ai i te mäa na rätou.

38 E ia tae mai o ia i te piti o te äraraa, e te toru hoì, roohia mai te nä reira ra, e ao to te reira mau tävini.

39 Ua ìte hoì òutou e: àhiri i ìte na te taata fare i te hora e tae mai ai te èiä, e ära ia o ia, e òre e vaiiho noa i to na fare ia vävähi-noa-hia na.

40 E teie nei, ia vai ineine ä òutou, no te mea ei te hora manaò-òre-hia e òutou na e tae mai ai te Tamaiti a te taata nei.

Te tävini haapaò maitaì e te tävini haapaò òre

(Mät 24,45-51).

41 Ua parau mai ra Pëtero ia na: «E te Fatu, i parau tià mai änei òe i tënä na parapore ia mätou anaè nei, e i te taata atoà nei änei?

42 Ua parau atu ra te Fatu: «O vai hoì te tïàau haavare òre e te haapaò maitaì, i ta te fatu e tuu i nià iho i to na atoà ra mau tävini, ei tuu atu i ta rätou tufaa mäa i te tufaraa mau ra?

43 E ao to te reira tävini, to tei roohia mai e to na ra fatu te nä reira ra.

44 Oia mau ta ù e parau atu ia òutou nei, e faariro ia o ia ia na ei mau i te mau taoà atoà na na ra.

45 Âreà te tävini e parau noa i roto ia na iho e: «E òre ta ù fatu e tae vave mai», papaì iho ra i te mau tävini täne, e te mau tävini vahine, àmu iho ra i te mäa, e inu faataèro iho ra i te àva;

46 e tae mai ia te fatu o taua tävini ra i te mahana manaò-òre-hia e ana, e i te hora-ìteä-òre-hia e ana ra, e e täpüpü atu ia na, a tuu atu ai i ta na tufaa i roto i te feiä haapaò òre atoà ra.

47 E te tävini i ìte i te hinaaro o to na ra fatu, e aita i faaineine ia na iho, aore hoì i rave i ta te fatu i hinaaro ra, e papaìhia ia e rave rahi te täìriraa.

48 Âreà tei òre i ìte ra, rave atu ra rä i te parau e au ia na te päpaì, e täìriraa iti ia to na: o tei tuuhia atu te mea rahi ra, e mea rahi atoà të tïtauhia atu; e ta te taata hoì i tuu atu i te mea rahi ra, e mea rahi atoà ia të anihia atu ia na ra.

Manaò.

I te nünaa mäìtihia e te Atua Nui Tumu tahi, te hiti noa nei te mau maitaì o te aru i roto i te tau tuatau te tere nei i to na tereraa, te tupu nei te àihere, i to na tupuraa, te hotu nei te mau hotu i to rätou mau hoturaa. Te vava nei te mau ànavai i roto i te mau vao, no te faaìte i te heeùri o te fenua, te pïnaì nei te vai i nià i te mato, te horo nei te vai i te muri a vai, i reira e färerei ai i te fati miti, tei fati tuatau i nià i te aau te mau papa e te mau pari. Te faahoì nei i te ànaana o te miti i nià i te tuaraì, tei mauhia e te mau tiàrama, tei èpahia i roto i te reva, o ta te mau ata e faaìte nei i na âpoo mataì àhuru mä ono no te ao o Mäòhi Nui. No te faaìte i te mau hororaa ôpape i roto ia Moana Nui a Hiva, te Hiva e nuu atua no te moana, i te mea te hiòraa a te feiä ära pö, i te pö ra, hoê noa moana uri paò i to rätou tiàturiraa, na te mau ôpape e faafarerei i te mau fenua i raro i te moana, ta rätou aroharaa, te naò nei ia ora na to raro i te moana tei fäno mai, mai te moana uri paò ; no te faaìte ia hoê teie nünaa no te Tumu mai o te fenua, i faaroohia na teie huru parauraa ia tae i te mau taime ôroà tumu o te fenua, ia âmui te mau fenua atoà i te vahi hoê no te heiva.

Ua mäìtihia tätou no te ära, no te haapaò maitaì, no te tiàau tià, i nià i te mau faufaa tumu o te fenua to nià iho e to raro aè, te moana, e to roto, te reva, e to toro. E teie mau faufaa, e faufaa tuatau, ta te mau òna i haere mai e èia teie mau faufaa tei paèpaèhia i nià i te moni te heruraa repo i Makatea 49 mätahiti ua topatari te tià noa mai ra o Makatea noa atu te mau rahiraa âpoo e vai mai ra e tae mai i teie mahana, Maururoa, Fangataufa, Tureia, Hao, 30 mätahiti te òhiparaahia teie mau fenua no te mau haapaìnaraa âtömï, ua faaruè mai i teie mau fenua, i te mea ua naeàhia i te fenua Färani te fäito puai no te uira âtömï e numera piti o Färani no teie ito, e te hoohia nei i roto i te ao atoà. I teie mahana te tupu noa nei teie mau òhipa piò, tei paèpaèhia i nià i te parau no te faahoturaa òhipa, e hau atu i te reira ua faarirohia o Mäòhi Nui èi papa no te mau mä ìmiraa i te mau faufaa tumu o te fenua, te moana, e te reva. E haere mai rätou e ta rätou moni, e pau te moni i te huhu e te pë, i te mea e òhipahia te moni èi haamämüraa i te fëia rave òhipa i reira e reru ai te hiroà o te taata. E haere atoà mai teie mau òna, e ta rätou mau täpu àuri, täpu raau te àpi punu, no faanehenehe te ìmiraa moni i reira tätou e parau ai e, e òhipa maraa òre teie ia tätou o te reira to tätou hape, e te hape noa nei tätou teie mau täuihaa e pau i te huhu e te pë. Heruhia Makatea i te iòa o te moni topatari, haapaaìnahia te pau ra âtömï i te iòa o te moni topatari, te tahi faufaa tumu o te fenua e tumu haari te vai noa ra, te mäoa noa ra te ùru, te para noa ra te meià, i teie mahana i roto i ta tätou haamoriraa, e tauturu te mau taiòraa ia tätou ia au i teie parauraa, Ua mäìtihia tätou no te ära, no te haapaò maitaì, no te tiàau tià :     

-Taramo 33, 12 E ao to te fenua, o te Fatu to rätou Atua; e te mau taata i mäìtihia e ana ei tufaa na na.

-Etetiera 33, 16 Te mau hara atoà tä na i rave ra, e òre ia e manaò-faahou-hia ei hara nä na; ua rave o ia i te mea au e te parau tià: e ora mau ä o ia ra.

-Hepera 11, 1 E teie nei, o te faaroo nei, o te tiàturi ia i te mau mea e tiaìhia nei, e te ìte i te mau mea aore e hiòhia nei.

-Ruta èv.12, 32 «Eiaha e mataù, e ta ù nana iti e. E mea hinaaro na to òutou Metua i te horoà mai i te Pätireia no òutou.

Te parau maitaì i haapaòhia no teie mahana i te päpaìraa a Ruta èv. I te pene 12 i te mau ìrava 32 e moti i te ìrava 48, te faaìte nei :

-Te mau taoà i nià i te raì, te faaitoito mai nei ia tätou i teie reo no Ietu 32 «Eiaha e mataù, e ta ù nana iti e. E mea hinaaro na to òutou Metua i te horoà mai i te Pätireia no òutou. E hoo i roto i te âpï, ia vai mai te tumu o te faufaa, te tumu te aa e mauhia ra e te fenua. A horoà ia ìtehia te faufaa tumu o te fenua, te moana te reva, i reira te pütë e òre ai e marau, te mau taoà tumu a Mäòhi Nui e òre e pau i te ao; i te mea te vähi e mauhia ra e òre e taeàhia e te èiä, e òre hoì e pau i te huhu e te pë. Te tiàturi nei au teie reo to Ietu e parau ra e, 34 Te vähi hoì i vai ai ta òutou taoà, tei reira atoà ia to òutou âau. I mäìtihia ai tätou, èi nünaa no te Atua Nui Tumu Tahi.

-Te mau tävini e vai ara nei

I mua i teie mau parau, ia tätuahia to tätou tauupu, e ia vai àma ä ta tätou mau rämepa. Ia au tätou i te tiaì mata ära i to tätou fenua i te ìteraa i to na nehenehe, to na ùnaùna mai te tane e te vahine faaipoipo ra; ia haere mai e pätötö i te ùputa o to tätou âau, ia ìriti tätou i te ôpani ma te hau e te maitaì. E ao to te reira mau tävini, ia roohia ia rätou, te mau faufaa tumu ma te ara i nià iho. Oia mau, ia na reira tätou i te tätua i ta tätou hopoià e î noa ta tätou àiraa mäa e òre e pau. Ia tämau maite i te ära, e ao to te reira mau tävini, i mua i te mau faanahoraa ìte-òre-hia, e färerei o ia i te feiä èiä, e òre o ia e vaiiho noa i to na fare ia vävähi-noa-hia na. Ia vai ineine rä tätou, i te mau hora manaò-òre-hia e tae mai ai te Tamaiti a te taata nei. I te mea e nünaa mäìtihia tätou :

-Te tävini haapaò maitaì

Teie ta Ietu parauraa no teie huru tävini :

-O vai hoì te tïàau haavare òre e te haapaò maitaì, i ta te fatu e tuu i nià iho i to na atoà ra mau tävini, ei tuu atu i ta rätou tufaa mäa i te tufaraa mau ra?

-E ao to te reira tävini, to tei roohia mai e to na ra fatu te nä reira ra.

-Oia mau ta ù e parau atu ia òutou nei, e faariro ia o ia ia na ei mau i te mau taoà atoà na na ra.

Te tävini haapaò òre  

 -E òre ta ù fatu e tae vave mai», papaì iho ra i te mau tävini täne, e te mau tävini vahine, àmu iho ra i te mäa, e inu faataèro iho ra i te àva;

-e tae mai ia te fatu o taua tävini ra i te mahana manaò-òre-hia e ana, e i te hora-ìteä-òre-hia e ana ra, e  täpüpü atu ia na, a tuu atu ai i ta na tufaa i roto i te feiä haapaò òre atoà ra.

-E te tävini i ìte i te hinaaro o to na ra fatu, e aita i faaineine ia na iho, aore hoì i rave i ta te fatu i hinaaro ra, e papaìhia ia e rave rahi te täìriraa.

-Âreà tei òre i ìte ra, rave atu ra rä i te parau e au ia na te päpaì, e täìriraa iti ia to na: o tei tuuhia atu te mea rahi ra, e mea rahi atoà të tïtauhia atu; e ta te taata hoì i tuu atu i te mea rahi ra, e mea rahi atoà ia të anihia atu ia na ra.

Teie te tahi mau tumu e tïtauhia nei i te nünaa mäìtihia, ia faatïtïàifaro faahou i to na oraraa, ia tiàturi faahou ia na, ia rave faahou e ia àtuàtu i te mau maitaì ta te Atua Nui Tumu Tahi i höroà mai èi faufaa tumu i Mäòhi Nui ia ora te mau Mäòhi atoà. Ua tae i te taime no te faaora faahouraa ia tätou, na tätou iho e tiàau i te mau faufaa tumu o te fenua, te moana, te reva, tei roto tätou i te rima faaora o te Atua Nui Tumu Tahi, e rave i ta tätou iho, e tänu i ta tätou iho ia òre tätou ia àihamu, i teie mahana e a tau hiti noa atu. I ìmi nao na tätou te âpï i roto i te pau, i teie nei e ìmi tätou te âpï i roto i te mau faufaa tumu no te ao Mäòhi i Mäòhi Nui nei, ma te èiä òre, te täparu òre, e te haavare òre. Ia niu faahou tätou i to tätou oraraa i nià i te here e aroha ia tupu mau te hau i Mäòhi Nui nei.

 

Teraì òr. Faatura.