Mätaio 1.1-12 Puta ora.

 

Tāpati 7 no Tënuare/Varehu 2024.

ÔROÀ

Puta ora.

Mau taiòraa.

Taramo 72

1 Taramo na Toromona. A hö mai na, e te Atua, i te mau parau au na òe ra na te arii, e te parau-tià na òe ra na te tamaiti a te arii.

2 E haavä o ia i to mau taata mä te parau-tià, e to òe ra mau taata haèhaa mä te parau au.

3 E hopoi mai te mau mouà i te hau i te mau taata, e te mau âivi hoì mä te parau-tià.

4 Na na e faaau i te parau i te haèhaa io te mau taata ra; e te tamarii a tei àti i te veve ra, na na e faaora; e e haavï ôfatifati roa o ia i tei hämani ìno ra.

5 E mataù rätou ia òe mai te mahana e te märama e vai nei i te mau uì atoà ra.

6 E riro o ia mai te ua i nià i te àihere motu âpï ra, e mai te tuäua e faararirari i te fenua nei.

7 I to na ra tau e tupu roa ai te parau-tià, e rahi roa hoì te hau, òi vai aè te märama.

8 E riro o ia ei arii mai te tahi miti e tae noa atu i te tahi miti, e mai te pape ra e tae noa atu i te hopeà o te fenua.

9 To te mëtëpara ra, e piò ia i raro ia na, e mitimiti to na mau ènemi i te vari.

10 E àufau mai te mau arii no Taretita e to te mau fenua rii i te taoà: te mau arii o Tehepa e to Tepa të hopoi mai i te ö.

11 E hope roa te mau arii i te tähopu i mua ia na, e hope roa te mau fenua i te auraro ia na.

12 O tei veve ra e ua tiàoro mai ra, na na ia e faaora, e tei àti ra e aita o na e tauturu.

13 E faaherehere o ia i tei paruparu ra e tei veve, e faaora hoì o ia i te feiä taoà òre ra.

14 E faaora o ia ia rätou i te haavare e te rave ìno ra, e to rätou toto e riro ei mea taoà na na.

15 E tià o ia i te oraraa E horoàhia mai te àuro o Tehepa ra na na, e pure tämau hoì te taata ia na,  e haamaitaì hoì rätou ia na, eita e mahana e tuua.

16 E riro hoì e maa tïtona tei te fenua i nià i te tupuaì o te mau mouà ra, e tei tupu ra, e àhehe ia mai te mau räau e tupu i Repanona ra; e ruperupe to te ôire ra mai te räau o te fenua nei.

17 E vai ä to na iòa e a muri noa atu. E vai ä to na iòa mai te mahana ra. E maitaì te taata atoà ia na,

e e hope te mau fëtii atoà o te fenua nei i te haamaitaì ia na.

18 Ia haamaitaìhia te Atua, te Atua o Ìteraèra, o te Fatu, o ia anaè ra tei rave i te mau mea taa ê ra.

19 Ia haamaitaìhia hoì to na iòa hanahana e a muri noa atu. Ia faaîhia hoì te mau fenua atoà i to na hanahana.

Âmene, e âmene.

20 Te mau pure a te tamaiti a Iete ra a Tävita, ua hope ia.

Ìtaia 60.1-6

Te hinuhinu o te ètärëtia

1 A tià i nià, ia märamarama òe, ua tae mai to òe märamarama, e ua hiti mai te hanahana o te Fatu i nià ia òe. 2 Inaha, e ua àti hoì te fenua nei i te pöuri; e te mau êtene i te pöuri taòtaò: e hiti mai rä te Fatu i nià ia òe, e ìteä noa mai hoì to na hanahana i nià iho ia òe ra.

3 E haere noa mai hoì te mau fenua i to òe ra märamarama; e te mau arii i te ànaana o to òe ra mahana e hiti ra.

4 A nänä na i to mata i nià a hiò e àti noa aè; ua putuputu atoà mai rätou, i haere mai rätou ia òe ra; e tae mai to mau tamarii tamäroa mai te fenua roa mai; e to mau tamähine, e âfaì-tuta-hia mai ia.

5 Ei reira òe e ìte ai, e rahi roa te òaòa; e horuhoru hoì to âau, e horahorahia; ia hopoihia mai te mau taoà no te moana ia òe ra; e ia tae mai te mau taoà no te mau fenua ia òe ra.

6 E api òe i te rahi o te tämera; e te petari no Metai e no Èfa; o rätou atoà to Tepa i te haere mai: mä te àuro e te rïpano i te hopoiraa mai; e mä te hïmene i te haamaitaìraa i te Fatu.

Èfetia 3.2-6.

2 Ua ìte òutou i te tuuraa i te parau ra i te aroha mau a te Atua i hömaihia mai ia ù nei ia òutou na.

3 E na na i faaìte hua mai ia ù i te parau àro ra, i päpaì-poto-hia iho nei e au,

4 e ìte ai hoì òutou i to ù paari i te parau àro o te Metia nei ia taiò ra,

5 o tei òre i faaìtehia i te taata i te mau uì i mütaa iho ra, mai tei faaìtehia mai e te Värua i teie nei, i te mau âpotetoro moà e te mau perofeta na na ra:

6 e ei feiä âià atoà te Ètene/nünaa, ei âmuiraa hoê ä e ia noaa atoà tei parauhia mai e ana i te Metia, i te Èvaneria nei.

Mätaio 1.1-12

Te paparaa tupuna o Ietu Metia

(Rut 3.23-38)

1 Teie te paparaa tupuna no Ietu Metia, tamaiti na Tävita, tamaiti na Âperahäma.

2 Fänau aè ra ta Âperahäma o Ìtaata; fänau aè ra ta Ìtaata o Iatöpa; fänau aè ra ta Iatöpa o Iüta e ta na hui taeaè;

3 fänau aè ra ta Iüta o Färeta e o Tara, ia Tämara; fänau aè ra ta Färeta o Èteroma; fänau aè ra ta Èteroma o Àrama;

4 fänau aè ra ta Àrama o Àminatapa; fänau aè ra ta Àminatapa o Naatona; fänau aè ra ta Naatona o Taramona;

5 fänau aè ra ta Taramona o Poata ia Rähapa; fänau aè ra ta Poata o Òpeta ia Ruta; fänau aè ra ta Òpeta o Iete;

6 fänau aè ra ta Iete o Tävita. Fänau aè ra ta te arii ra o Tävita o Toromona i te vahine a Ùria ra;

7 fänau aè ra ta Toromona o Ropoäma; fänau aè ra ta Ropoäma o Âpia; fänau aè ra ta Âpia o Âtafa;

8 fänau aè ra ta Âtafa o Iotafata; fänau aè ra ta Iotafata o Iorama; fänau aè ra ta Iorama o Utia;

9 fänau aè ra ta Utia o Iotama; fänau aè ra ta Iotama o Àhata; fänau aè ra ta Àhata o Hetetia;

10 fänau aè ra ta Ètetia o Manate; fänau aè ra ta Manate o Âmota; fänau aè ra ta Âmota o Iotia;

11 fänau aè ra ta Iotia o Ietonia e ta na mau taeaè, i te ànotau no te tïtïraa i Päpuronia.

12 E i muri aè i te ànotau no te tïtïraa i Päpuronia ra, fänau aè ra ta Ietonia o Taratiera; fänau aè ra ta Taratiera o Töropäpera.

Haapotoraa.

Te mau taiòraa i faataahia no teie mahana, e mau ìrava ia tei î i te mau poroìraa tei ìriti i te ora o te mau taò e faahitihia ra, mai roto mai i te mau mätaì e te mau areö. Tei tuuhia i roto i te pure ma te ani i te Atua ia höroà mai i te paari e te parau-tià no te faatere i te nunaa e faaroo ma te tiàturi i ta te Atua faatupuraa i te ora. Teie te tahi mau manaò e tià ia faufaahia e tià ia faahitihia.

Te maitaì o te Ture, te paari e te parau-tià : Te haamataraa ia te reira o te marämarama tei na rotohia i te aniraa i te Atua ia höroà mai ma te faaära i roto i te värua o te taata pure te àravihi e vai ra i roto i to na âau no te faatere i to na iho paari e ta na märamaramaraa i te parau-tià. O te mea e fänau mai, mai roto i teie huru aniraa, te tautururaa ia i te feia i ère e te navaì òre i te haapiiraa a te fenua i te vahi i reira o ia i te oraraa. No te mea te ani nei òe i te Atua ua ineine òe i te faatupuraa i te mau faaueraa no te haere e àtuàtu e haapii i te feia i ère i te türamaraa i te here faatupu ora a te Atua i te mau tamarii e te feiä e pärahi noa ra i roto i te ano no te oraraa. Te vai maoro i roto i te rupehu o te oraraa tei tiàturi i ta na iho faatereraa tei papahia i nià i te teòteò, te hupehupe, te faatau, e te täparu. Ia pure te taata te faaìte nei oia e òre te mau mea atoà e faaapiapi nei i te mau hinaaro e faatupu ra i te mau faanahoraa e au i ta na faahitiraa i roto i te pure i mua i te Atua Nui Tumu Tahi, i reira e hanahana ai ta na faatereraa ia au i to na värua ta te Atua i haapüaì i roto ia na. Èi haamauraa i te hau e te ruperupe, ma te faatura e te haamoriraa na te ao atoà nei, ia tähopu e ia tïpapa te mau faatere atoà i mua i te arii Tävini te Metia èi parau Hepera aore ra Àramea e aore ra te Kirito èi parau Herëni. E te mau nunaa atoà o te ao nei. E tano teie mau poroì eiaha noa no te feia faatere, no te feia atoà rä e tiàraa mana aore ra e ärataìraa ta rätou, i te hoê pupu òhipa. Te haapäpü ra te reira i te faufaa o te paari, te parau-tià, te turu i te feia paruparu roa aè, te hau e te ruperupe. Ua riro atoà te reira ei haamanaòraa i te faufaa o te haehaa e te täviniraa.

Teie te tahi tautururaa a te Ìtaia pene 60 i te mau ìrava 1 e tae i te ìrava 6 te parau poroì e te täpaò.

Märamarama e hanahana ia no te Atua, a tià mai na i nià, ia märamaramahia, no te mea te tae mai nei te märamarama, e te hiti mai nei te hanahana o te Atua Nui Tumu Tahi i nià ia òutou. E täipe teie i te taeraa mai o te hanahana o te Atua o te haamäramarama i te nunaa i roto i te pöuri. Tei faatupu i te autahiraa o te mau nunaa, tei ùmehia e te märamarama o te Atua e ànaana mai i nià i to na mau taata o te ao nei. Ia märamarama i reira te hoìraa e tupu ai i te mea e rama te vai ra i nià i te èà èi täpaò no te haaputuputuraa i te feia atoà tei hitihia i te märamarama e ànaana rätou mai te mau fetià o te raì, i reira e ìtehia te ànaana o te auro e te noànoà te monoì Maurua. E tano teie mau poroìraa no te feiä atoà e ìmi nei i te tiàturiraa e te faaoraraa i roto i te mau tau pöuri. Te haapäpü nei te reira i te fafauraa a te Atua ia hopoì mai i te märamarama, te hanahana, te faahoìraa, e te mau haamaitaìraa i To na mau taata

I roto i teie mau parau te püòi nei o Pauro i roto i ta na èpitetore i to Èfetia i te pene 3 i te mau ìrava 2 e tae i te ìrava 6 o te hoê ia mau papaìraa tei î i te mau parau poroì. Tei faaìte i te aroha o te Atua tei haamata na roto i te parauraa ua ìte mau òe i te mana o te aroha o te Atua i horoàhia mai ia ù nei e täpaò te reira no te aroha mau o te Atua tei horoàhia ia Paulo no to Èfetia.

I te parau àro a te Metia e aore te Kirito, teie mau parau àro a te Metia tei heheuhia ia Paulo na roto i te parauraa e Aroha e te Here i te Atua i te mau taata atoà e i roto i te tahi atu mau uì, e tae roa mai i o tätou nei i Mäòhi Nui nei. Na te reira i faaö ia tätou i roto i te hoêraa e te Metia aore te Kirito. Te faaìtehia na roto i te Parau Maitaì, e fatu àià te mau Nunaa atoà o te ao nei e o Ìteraèra, e mau mero no te hoê ä tino, e e feiä tufaa i te fafauraa i roto i te Metia e aore te Kirito ia Ietu. Teie mau poroì i te mau taata atoà e ìmi nei ia märamarama i te aroha o te Atua, tei haapäpü i te parau o te Metia e aore te Kirito, faahoê ra i roto i te Atua Nui Tumu Tahi.

-Taramo 72, 11 E hope roa te mau arii i te tähopu i mua ia na, e hope roa te mau fenua i te auraro ia na.

-Ìtaia 60, 5 Ei reira òe e ìte ai, e rahi roa te òaòa; e horuhoru hoì to âau, e horahorahia; ia hopoihia mai te mau taoà no te moana ia òe ra; e ia tae mai te mau taoà no te mau fenua ia òe ra.

-Èfetia 3, 6 e ei feiä âià atoà te Ètene/Nünaa, ei âmuiraa hoê ä e ia noaa atoà tei parauhia mai e ana i te Metia, i te Èvaneria nei.

-Mätaio 1, 1 Teie te paparaa tupuna no Ietu Metia, tamaiti na Tävita, tamaiti na Âperahäma.

Te tuatapaparaa tupuna te puta ora ia o te ôpu fetii, e mau parau faufaa roa te päpaìhia i roto i te haamäramarama no te tau i maìri o te faatià ia tätou ia taa i to tätou iho àamu e to tätou parau. Ua riro te reira ei faahanahanaraa i te feiä tei haere mai na mua atu ia tätou, te tüàtiraa päpü i ta tätou faufaa àià. Te mau iòa, te mau taio mahana, te mau tuhaa rii atoà, o te hoê ia tuhaa taa ê o tei piri i to tätou iho taata.

O te ìmiraa ia i te parau mau, tei tere na roto i te tau e te reva teitei, o te àfaì ia tätou mai te mau tupuaì mouà e tae atu i te mau peho hohonu, mai te mau oire taata roa e tae atu ai i te mau oire ïti maniania òre. Te faaìte mai nei te reira i te mau àamu no te here e te moèraa, te upootiàraa e te àti, te tiàturiraa e te hepohepo. Te hoê tuatapaparaa tupuna o te hoê ia faahanahanaraa i te oraraa, no te färiiraa i te faufaa a te taata tätaìtahi i roto i te ôpuaraa no te mau mea i roto i te oraraa vaamataèinaa. Te faahaamanaò mai ra te reira ia tätou e ua täaihia tätou paatoà, e e tuhaa ta tätou paatoà no te tahi mea rahi aè ia tätou iho.

No reira, e hiò na tätou i te parau no te tuatapaparaa tupuna, te rahiraa o te mau haamäramaramaraa ta na e höroà mai, te paari ta te reira e höroà mai, e te hiòraa ôtahi ta na e höroà mai nei i nià i to tätou tiàraa i roto i te ao nei. E höroà faufaa rahi teie, ia poiherehia e ia faaìtehia i te mau uì a muri aè.

Haaputu i te mau haamäramaramaraa mätamua: A haamata na roto i te haaputuraa i te haamaramaramaraa e vai ra no roto mai i to oe iho ùtuafare. A päpaì i te mau iòa, te mau taiò mahana e te mau vahi e roaa i te faanahohia.

Mäìmi i te mau parau mana: A ani i te mau parau faaìte no te tiàraa tivira (fänauraa, faaipoiporaa, pohe) i roto i te mau piha a te oire i reira teie mau òhipa i te haaputuraahia, e aore rä i roto i te mau piha òhipa a te mau Ètärëtia, puta päpetitoraa, haapäpüraa i te faaroo, täatiraa, e poheraa.

A hiò i te mau parau ùtuafare : Te mau puta àamu ùtuafare, te mau tiàraa taata, te puta rätere, te mau puta parau a te nuu faèhau, eiaha rä te mau puta àamu, e te mau rata.

A uiui i te ùtuafare : E nehenehe ta te mau mero paari o te ùtuafare e höroà mai ia tätou i te tahi atu mau haamäramaramaraa, te mau àamu e te mau haamäramaramaraa àita i roto i te mau parau mana ua vai noa ra te reira i roto i te fetii.

Faanaho i te haamäramaramaraa: A hämani i te hoê tumu räau ùtuafare no te faanaho i te haamäramaramaraa ta tätou i haaputu mai. Te vai ra te mau faanahoraa roro uira e te mau tahua natirara o te nehenehe e tauturu ia tätou ia rave i te reira.

Haaputuraa parau tähito: Ia pau anaè ta tätou mau raveà no te ùtuafare, e nehenehe ta tätou e haamata i te mäìmi i te mau püturaa parau tähito o te fenua iho, o te tuhaa fenua e aore rä o te fenua iho.

A tämau noa i te ìmi: E òhipa tämau te tuatapaparaa tupuna. Rahi noa atu ta tätou mäìmiraa, rahi noa atu te haamaramaramaraa e ìtehia ia tätou. Na teie mau mäìmiraa e haapäpü ra e puta ora te paparaa tupuna, e ora mai te mau parau tei taòto noa ra, e tei faataòtohia.

Ia au i te paparaa tupuna o Ietu, E täpura iòa teie, tera rä, te faahohoà ra te iòa tätaì tahi i te hoê àamu, te hoê oraraa, te hoê tau. E tuhaa ta te taata tätaì tahi i nià i teie täpura i roto i te àamu o te faaoraraa, e tae roa atu i te fänauraa o Ietu Metia. Na roto i te hiòpoàraa i teie täpura, te faahanahana nei tätou i te haamanaòraa e te ìte nei tätou i ta Èvaneria täutururaa i te àamu o to tätou faaroo. E faamanaòraa te reira, e òhipa te Atua na roto i te mau uì e rave rahi no te faatupu i Ta na mau òpuaraa. I parau ai teie manaò e, te paparaa tupuna e puta ora.

Te puta ora o te hoê ia manaò tei faatupu i te faaroo e te varua, tei faahiti-pinepine-hia i roto i te Pîpîria. Ua faataahia te reira mai te hoê puta no te raì mai tei roto te iòa o te mau taata atoà e roaa ia rätou te ora mure òre. Ia au i te Pîpîria, te auraa o te iòa o te hoê taata i päpaìhia i roto i teie puta, oia ia e taata parau-tià oia i mua i te Aro o te Atua e e fänaò oia i te ora mure òre mai te peu e e täpeà noa te hoê taata i to na haapaò maitaì e tae noa atu i te hopeà o to na oraraa i te pae tino. Te vai ra i roto i te puta ora te iòa o te feiä o tei faafäriuhia i te pae varua e o tei püpü i to rätou oraraa no te täviniraa ia te Atua Nui Tumu Tahi. Ua faahiti-atoà-hia e, e tümahia te iòa o te hoê taata mai roto mai i te puta ora. Ei hiòraa, i roto i te Ètoto pene 32 ìrava 33, ua haamäramarama maitaì te Atua e e nehenehe te iòa o te hoê taata e tümahia i roto i te puta ora: O te rave noa mai i te hara ia ù nei, e tümä ia vau i ta ù i päpaì.

Pehepehe

Paparaa Tupuna.

E puta ora, ua päpaìhia te hoê àamu

Te mau iòa atoà, te mau hohoà mata atoà

I roto i te roaraa o te tau

Te tuatapaparaa tupuna

Te  tere ia i te tau i maìri

I reira e haaputuhia ai

Te mau haamanaòraa faufaa atoà

 

Mai roto mai i te mau aa hohonu

E fänauhia mai ai te tumu räau

Ua täaihia te mau àmaa atoà

Te mau rauère atoà, e oraraa faataahia

Mai tera uì e tera uì

Te faatiàhia nei te mau àamu

I roto i te mäfatu o te ùtuafare

Ua niuhia rätou i nià i te reira

 

Metua tane, Metua vahine, tamaiti, tamahine,

E mea faahiahia mau te tüàtiraa atoà

Te tuatapaparaa tupuna, e hiòraa no mütaa iho ra

Mai te mea e, e faahiti-pinepine-hia

Te parau no to tätou mau tupuna

 

Te mau parau àro i heheuhia mai

Te mau parau mau i ìtehia

Ia matara anaè te mau parau moè

E matara mai te hoê ôpani

Te parau tuatapaparaa tupuna, ìmiraa hopeà òre,

I te mau vahi i reira te mau mea tahito

E no teie nei tau e âmuihia ai

 

No reira, a ìmi, a hiòpoà, a ìte mai,

I roto i te puta ora, ua nänaòhia to òutou àamu.

Te tuatapaparaa tupuna, te hoê faufaa àià e tià ia poiherehia,

Te hoê taoà faufaa rahi e ôpere e e höroà.

 

Te auraa o teie pehepehe te Haapäpüraa i to tätou tiàraa àià, ta te püfenua e pii noa ra i ta na mau tamarii, a here i to fenua höroà ora, a here  i to reo, te höroà fäito òre a te Atua Nui Tumu Tahi ma te taiò òre. Na te Atua teie mäìtiraa i Mäòhi ai tätou i Mäòhi Nui nei, i te faaìteraa a te puta ora te fenua, i päpaìhia ai te pîpîria. Teie rä, mea faufaa ia täpaòhia te Pîpîria e puta tei päpaìhia e te mau taata tei uruhia rätou i te varua o te vai, o te fenua, o te reva, ta rätou i parau e e Mau Atua. To na rä märamaramahia e täui ia au i te mau tiàturiraa e te mau tatararaa a te taata tätaìtahi. No reira, noa atu te rauraa te mau manaò, te Pîpîria e hiòhia èi faaotiraa päpü, te höroà atoà ra oia e rave rahi atu ä mau haapiiraa e mau heheuraa. Ia noaa ia tätou te faaòromaì i te mea te faaotiraa päpü e vaa tauàti, tei tauàtihia i te faaòromaì. Na roto i te faaìteraa i te faaòromaì i roto i to tätou iho oraraa e te faaitoitoraa ia vëtahi ê ia na reira atoà, e nehenehe ta tätou e tauturu i te haapuai i te parau poroì no te faaotiraa päpü.

Pour résumé la généalogie est le livre de vie, qui détermine l’origine de notre être, la détermination c’est faire preuve à la patience, comme une pirogue double qui vogue dans la même direction qui nous en courage les uns les autres pour nous aider à renforcer la détermination à notre Seigneur le Christ Sauveur pour cette année 2024.

 

Teraì òr. Faatura.

 

Himene te mataì

Pepena au Petit Gymnase à Paris

Michel Sardou - Le France (Audio Officiel)

Ruta èv. 2.22-40. Tämäraa.

 

Tāpati 31 no te Titema 2023.

Tämäraa

Taramo 105.

(Ìr. 1-15 ; hiò Parareipomeno 16.8-22)

1 E ârue i te Fatu, e tiàoro i to na iòa, e faaìte i ta na i rave i rotopü i te taata atoà ra.

2 E himene ia na, e himene ia na mä te taramo e paraparau faahou i te mau òhipa taa ê na na ra.

3 E fänaò òutou o to na ra taata i to na ra iòa moà, ia òaòa te âau o te feiä i ìmi i te Fatu ra.

4 E ìmi i te Fatu, e to na ra püai, e ìmi tämau i to na mata.

5 E tämau ä i te manaò i te òhipa taa ê na na ra, ta na òhipa taa ê, e te utuà no roto i to na ra vaha;

6 e te mau huaai o ta na tävini ra, o Âperahäma; e te mau tamarii a Iatöpa hinaarohia e ana ra

7 O ia to tätou Atua, o te Fatu, ua ìteä ta na parau au i te fenua atoà ra.

8 E tämau o ia i to na manaò i ta na ra faufaa, i te parau ta na i tuu mai e tautani noa atu i te uì ra:

9 te faufaa ta na i fäfau ia Âperahäma; e te tapu ta na i tapu ia Ìtaata ra;

10 ta na i haamau ia Iatöpa, ei ture; e ia Ìteraèra, ei faufaa vaiiho tämau;

11 a nä ô ai ra e: «E horoà atu vau i te fenua ra o Tanaana ia òe, ei tufaa na òutou, ei terero.»

12 I to rätou ïtiraa ra, aore reà ia taiò ra, te varavara ra, e te taata èê hoì i reira.

13 To rätou haereraa ra mai te tahi mataèinaa e tae atu ra i te tahi mataèinaa, e mai te tahi pätireia e tae atu ra i te tahi pae taata ê;

14 aore o ia i horoà noa atu ia rätou ia hämani-ìno-hia e te taata ra; e e hui arii hoì tei aòhia mai e ana ia rätou,

15 nä ô mai ra: «Eiaha e tiàià noa atu i tei faatähinuhia e au ra, e eiaha e hämani ìno i ta ù ra mau perofeta.»

16 Ia na i hopoi mai i te oè i nià i te fenua ra, e ua faaòre atu ra i te mau mäa atoà ra.

17 Ua tono-ê-hia na te hoê taata i mua ia rätou i Àifiti o Iotëfa, ua hoohia ia ei tävini.

18 I mäuiui to na âvae i te täpeà, ua mau hoì o ia i te âuri;

19 e tupu aè ra ta na parau i faaìte-ätea-hia mai ra e ua tämatahia o ia i te parau a te Fatu.

20 Ua tono aè ra te arii i te veà e tätara ia na, te tävana o te mau taata ra, tei tuu ia na.

21 Ua faariro atu ra o ia ia na èi raatira i to na ra ùtuafare, e èi ia na anaè ra te parau i ta na atoà ra mau taoà,

22 ia täpeà o ia i to na ra hui arii ia hinaaro ra, e ia haapii i ta na feiä moimoi i te parau paari.

23 Reva atu ra Ìteraèra i Àifiti, e ua pärahi Iatöpa i te fenua o Hama ra.

24 I reira te Atua i te faarahi-roa-raa i to na taata, e püai atu ra rätou i to rätou mau ènemi.

25 Tïoi atu ra to rätou âau i te ririraa i to na ra mau taata, e i te haavare i to na mau tävini.

26 Ua tono aè ra o ia i ta na tävini ia Möte, e ia Àarona i mäìtihia e ana.

27 Na räua i faaìte i ta na mau täpaò i roto ia rätou, e ta na mau räveà taa ê i te fenua o Hama ra.

28 Ua tuu atu ra o ia i te pöuri, e mahora aè ra i nià ia rätou; e aore rätou i märô noa mai i ta na parau.

29 Ua faariro o ia i ta rätou mau päpe ei toto, e pau iho ra ta rätou mau ià i te pohe.

30 Î roa aè ra to rätou fenua i te rana, e roto roa i te mau piha o te hui arii ra.

31 Ua faaue aè ra o ia, e ua haere mai ra te popoti, e te ùtu e àti aè ra to rätou fenua.

32 Ua faariro aè ra o ia i ta rätou ua ei ua-paari, e te ànaparaa uira e àti noa aè to rätou fenua.

33 Ua täìri atu ra i ta rätou mau vine e te mau tute, e ua ôfati aè ra i te mau räau o to rätou ra fenua.

34 Ua parau o ia e ua haere mai ra te àrape, e te hë, eita e hope ia taiò;

35 o tei àmu pau roa i te mau räau rii o to rätou ra fenua, e pau roa aè ra te mau mäa atoà io rätou ra.

36 Ua täìri hoì o ia i te mau mätahiapo o to rätou fenua, te mätamehaì o to rätou ra püai.

37 Ua ärataì mai o ia i to na ra mau taata mä te ârio e te àuro; e aore roa te hoê i paruparu i to rätou atoà ra mau ôpü.

38 Ua òaòa hoì Àifiti i to rätou revaraa, ua roohia hoì rätou i te mataù ia rätou.

39 Ua hohora o ia i te hoê ata ei tämarü ia rätou e te hoê auahi ei haamäramarama ia rätou i te pö.

40 Ua ani mai rätou, e ua hopoi mai o ia i te taru, e ua paìa rätou ia na i te mäa o te raì.

41 Ua vähi o ia i te mato, e ua manii mai ra te päpe, e ua tahe haere noa atu ra nä te mau vähi marö atoà ra.

42 Te manaò ra hoì o ia i ta na parau moà, i parauhia e ana i ta na tävini ia Âperahäma:

43 i ärataì mai ai o ia i to na taata mä te òaòa, e tei mäìtihia e ana mä te himene ûmere ra.

44 Ua horoà mai ra o ia i te mau fenua o te mau êtene no rätou, e ua riro mai ra ia rätou ta te mau taata ra i òhipa;

45 ia haapaò rätou i ta na ra mau peu, e ia faaroo i ta na mau ture.

Hareruia.

 

Tenete 15.1-6

Te fafauraa faufaa a te Atua ia Âperäma.

1 E muri aè i te reira, o te reo mai ra o te Fatu ia Âperäma i te ôrama ra, i te nä-ô-raa mai e, Eiaha e mataù e Âperäma, o vau to òe päruru; e ta òe utuà rahi roa.

2 Ua parau atu ra Âperäma, E te Fatu, e te Fatu, e aha ta òe e hö mai no ù, teie hoì au a pohe ma te tamarii òre, e te tiàau no to ù nei ùtuafare, o Erietera nei ia no Tämäteto ra.

3 E ua nä ô atu ra Âperäma, Inaha hoì au, aita o ù e huaai hö-mai-hia mai e òe, e inaha, e riro te hoê tamaiti i fänau i to ù nei ùtuafare ei taata âià no ù.

4 E inaha, o te reo mai ra o te Fatu ia na, nä ô mai ra, E òre teie taata e riro ei taata âià no òe, e riro rä te hoê taata no roto i to òe iho ôpü ei taata âià no òe.

5 Ua arataì aè ra o ia ia na i te vähi ätea, nä ô mai ra, A hiò na to mata i nià i te raì, a taiò na i te mau fetià, i te tiàraa ia òe ia taiò. E ua nä ô mai ra o ia ia na, Oia atoà to òe na huaai.

6 Ua faaroo atu ra Âperäma i te Fatu; e ua faariro atu ra o ia i te reira ei parau-tià na na.

Tenete 21.1-3.

Te fänauraa o Itaata: o Hätara räua o Itemaèra i te tono-ê-raa-hia.

1 Ua haere mai ra te Fatu ia Tara i ta na i parau mai ra; e ua faatupu te Fatu i ta na i faaìte mai ia Tara ra.

2 Ua tö iho ra hoì Tara, e e tamaiti ta na i fänau na Âperahäma i to na ruhiruhiäraa ra, i te tau ta te Atua i faaìte mai ia na ra.

3 Maìri iho ra Âperahäma i te iòa o ta na tamaiti i fänau ra, ta Tara i fänau na na ra, o Itaata.

Hëpera 11.8-19.

8 No te faaroo i haapaò ai Âperahäma, a parauhia mai ai o ia e, e haere i te hoê vähi e noaa mai ia na a muri atu ei âià; e haere atu ra o ia mä te ìte òre i taua fenua i haerehia e ana ra.

9 No te faaroo i purutia noa ai o ia i taua fenua i parauhia mai ra, mai te mea e, e fenua ê ra; i te pärahi-noa-raa i roto i te tiàhapa ra, rätou atoà o Ìtaata, e o Iatöpa; o nä taata âià atoà ia e o ia atoà i tei parauhia mai ra. 10 Te tïtau ra hoì o ia i taua ôire niu mau ra, o te Atua te faaau e te faatià ra.

11 No te faaroo atoà i noaa ai ia Tara iho te maitaì i tö ai ra, e fänau mai ra ta na tämaïti, hope noa ai to na tau mau ra, no te mea i manaò o ia e e parau mau ta na ta tei parau mai ra.

12 I fänau mai ai ta te taata hoê ra, e mai te taata pohe hoì te huru, mai te fetià o te raì ra te rahi, e mai te one tähatai eita e hope ia tataù ra.

13 I pohe anaè atu ra taua feiä ra mä te faaroo, aita i noaa tei parauhia mai ra, ua hiò rä rätou i taua mau mea ra i te ätea ê, e ua faaroo päpü e ua färii mäite, e ua fäì hua e, e taata èê rätou e te purutia i teie nei ao.

14 O te feiä hoì i nä reira mai, ua faaìte hua ia e, te ìmi ra rätou i te fenua mau.

15 Àhiri hoì rätou i nounou i taua fenua no reira mai rätou ra, e tià noa ia ia rätou ia hoì.

16 Ua hinaaro rä rätou i te fenua maitaì roa ra, oia hoì te ao ra: i òre ai te Atua i haamä ai ia rätou ia parauhia o ia e e Atua no rätou; ua haapaò hoì o ia i te hoê ôire no rätou.

17 No te faaroo i püpü ai Âperahäma ia Ìtaata, a tämatahia ai o ia ra; e te taata i noaa ia na te parau i parauhia mai ra, ua püpü ia i ta na tämaïti fänau tahi,

18 no na te parau i parauhia ra e: «Ei ia Ìtaata to òe ra huaai e noaa ai.»

19 I parau hoì o ia e, e tià i te Atua ia faatià faahou mai ia na mai te pohe mai ra; e mai te mea hoì e mai te pohe mai ra te noaa-faahou-raa ia na.

Ruta èv. 2.22-40.

Te faaìte-raa-hia o Ietu i roto i te hiero.

22 E hope aè ra o na puè mahana tämäraa i haapaòhia i te ture a Möte ra, hopoi atu ra rätou ia na i Ierutarëma e püpü atu i te aro o te Fatu ra.

23 Mai tei päpaìhia hoì i te ture a te Fatu ra e: «O te mau tamäroa mätahiapo atoà a te metua vahine ra, ua moà ia no te Fatu.»

24 E e hopoi atu hoì i te tütia mai tei parauhia i te ture a te Fatu ra: «E piti ûupa, e aore ra, e piti ûuàiraò fanauà.»

25 E inaha, tei Ierutarëma te hoê taata o Timeona te iòa, e taata parau-tià e te haapaò maitaì, te tiaì ra i te haamähanahana no Ìteraèra, e tei ia na te Värua Maitaì.

26 E i faaìtehia mai o ia e te Värua Maitaì e eita o ia e pohe vave ia ìte rä o ia i te Metia o te Fatu ra.

27 E i ärataìhia o ia e te Värua i roto i te hiero; te hopoi mai ra nä metua i te tämaïti ra ia Ietu i roto, e rave i ta te ture ra ia na,

28 ua rave atu ra o ia ia na, ua hii iho ra, haamaitaì atu ra i te Atua, nä ô atu ra:

29 «E te Fatu, e tuu òe i to tävini i teie nei mä te hau, ua au hoì i ta òe parau.

30 Ua ìte aè nei hoì ta ù mata i te Ora na òe,

31 i haapaòhia e òe i mua i te mata o te taata atoà nei;

32 e tiàrama ei haamäramarama i te Ètene, e ei hanahana no to òe ra taata no Ìteraèra.

Te tohu a Timeona.

33 Mäere iho ra Iotëfa e te metua vahine o Ietu i taua mau parau i parauhia e ana ra.

34 Ua faaora atu ra Timeona ia räua, nä ô atu ra i te metua vahine ia Märia: «Inaha, ua haapaòhia teie nei tämaïti ia hià to Ìteraèra e rave rahi e ia tiàfaahou mai to Ìteraèra e rave rahi; ei täpaò e märöhia

35 e e putapupü atoà to òe iho âau mai te puta hoto ra, ia ìteä te manaò no te âau taata e rave rahi.

Te perofeta vahine ra o Àna.

36 E te hoê perofeta vahine ra o Àna, e tamahine na Fänuera, no te ôpü o Àtera. Ua ruhiruhiä o ia, e hitu o na mätahiti i te taòtoraa i te täne, ta na i faaipoipo i te pötiiraa ra:

37 ua ìvi ra o ia a varu aè ra àhururaa o na mätahiti e maha tiàhapa, aore roa o ia i faaruè i te hiero, e tià rä i te haamoriraa i te Atua mä te pure e te haapaeraa mäa i te ruì e te ao.

38 E o ia i tomo mai i roto i reira ra, haamaitaì atoà atu ra i te Fatu, e ua parau iho ra ia na i te feiä atoà i haapapa i te ora i Ierutarëma ra.

Te hoìraa i Nätareta.

39 E oti aè ra ia räua tei parauhia mai i roto i te ture a te Fatu ra, hoì atu ra räua i Tarirea i to räua iho ôire mau i Nätareta.

40 Tupu atu ra taua tamaiti ra, e itoito atu ra te âau, î aè ra hoì i te paari, e te vai ra te maitaì a te Atua i nià ia na.

Manaò.

I te ùputa no teie mätahiti âpï 2024, te manaò tumu o te Taramo 105, o te àrueraa e te mauruüru i te Fatu no ta na mau òhipa taa-ê e to na haapaò maitaì i to na nunaa mäìtihia. Te haapäpü nei te reira i te haapaò maitaì o te Atua i ta Na fafauraa e ta Na mau fafauraa, e te haamanaò nei te reira i te àamu o te nünaa ta Na i mäìti, mai te tau o te mau patereareha e tae roa atu i te revaraa i te mau fenua ateä. Te faahiti atoà ra te taramo i te mau òhipa taa-ê e te mau temeio ta te Atua i faatupu. E faamanaòraa te reira i te haapaò maitai o te Fatu i te mau patereareha e ia Ìteraèra.

Te himenehia nei te âruehia ra i te mauruüru i te Fatu no ta na mau òhipa faahiahia e to na haapaò maitaì i to na mau taata. E haamata oia na roto i te hoê piiraa ia ârue i te Fatu e ia faaìte i ta na mau òhipa rahi i rotopü i te taata. Te haamanaò ra te taramo i to tätou àamu no teie mätahiti i ômuahia mai e tätou, eihia to tätou i maìri i nià i teie èà, hoê ä tätou i te haereà mai, ta tätou i here, te mau òhipa e toe nei i te rave, no te faaìte noa ia te pau òre te òhipa a te Atua.   

No te haapaò maitaì o te Atua i ta Na mau parau fäfau, no te mau uì e rave rahi tauatini mätahiti, ta na i rave i to tätou mua hui metua, e te tapu i ravehia ia hanahana te ora. Ua höroà te Atua Nui Tumu Tahi ia tätou i teie tau te ìteraa i te tahi mau täuiuiraa i roto i to tätou oraraa vaamataèinaa, noa atu te mau vero o te hoo, te taupupu, te haafifi, e te vai atu ra, mai te mea ra e ua tomo mai te Atua i roto ia tätou i teie haereà âmui ò Na e tätou, te mea ia e parauhia nei e, e tama te tama te haamaitaìraa ia i ta te Atua i faatupu i te ìte, ta na i höroà i roto ia Vaitä i te parauraa e Te Ìte Nei Au, oia hoì ua tama teie tumu räau i tope àuruhia i to na mata i te ìteraa i te mau täuiraa i nià i te fenua e te taata.    

Te mea ia ta te Atua i faatupu i te tau o Mote, te tauiraa i te päpe ei toto, te tonoraa i te rana, te raò taèro, te ùtu, e te ua paari, i te âau teòteò o Faraò i tupu ai teie mau faahaparaa, i te hinaaroraa e àa i te puai mana hope o te Atua.

Noa atu ra i teie huru o te taata, e pärahi fatata noa te Atua i pïhaì iho i te taata no te faatupu i te âparauraa ta na i rave ia Âperäma na roto i te hoê ôrama, ma te parau ia na eiaha e mataù, i te mea e, o Oia to na paruru e ta na haamauruüruraa rahi. Te faaite ra Âperäma i to na tapitapi i te mea e aita to na e àià, e ta na tävini ra o Erietera no Tamateto, o to na ia taata àià i teie nei. Te haapäpü nei te Fatu ia na e, e fatu àià to na mai roto mai i to na iho ôpu.

Te faaâpï nei te Fatu i ta na fafauraa ia Âperäma, ma te parau ia na e, e riro to na huaai mai te mau fetià i te raì ra. Te tiàturi ra Âperäma i te Fatu, o te faariro i te reira ei parau-tià na na. Ua rave iho ra te Fatu i te hoê fafauraa parau e o Âperäma, ma te höroà ia na i te fenua no Tanaana.

Ua faaìte te Fatu ia Âperäma e riro to na huaai èi feia èe i roto i te hoê fenua e ère na rätou, e faatîtîhia e haavïhia rätou e maha hänere mätahiti i te maoro. Areà rä, e haava te Fatu i te nunaa i reira rätou e faatîtîhia ai, e i reira rätou e haere atu ai ma te taoà rahi.

I te faaìteraa a te Tenete pene 15 i te faaroo o Âperäma i te Fatu, te parau tapu a te Fatu no nià e rave rahi huaai no Âperäma, e te faufaa i rotopü ia Iehova e ia Âperäma mauti ra ia :

-Te Parau Fäfau e te Faaroo : Mai ta te Atua i fäfau ia Âperäma e rave rahi huaai, e nehenehe ta tätou e fëruri i te mau fafauraa ta tätou e rave e aore rä, e färii i roto i to tätou oraraa i te mau mahana atoà. E nehenehe te faaroo o Âperäma i te Atua, noa atu te ïti o te mau faaìteraa, e faaäuhia i to tätou tiàturiraa i tei herehia e tätou, i to tätou feiä faatere, e aore rä, i to tätou iho mau tiàturiraa.

-Te faufaa: E nehenehe te faufaa i rotopü i te Atua e o Âperäma e hiòhia mai te hoê parau faaäu aore ra te hoê faaäuraa i rotopü e piti pae. I roto i to tätou nei ao âpï, te rave tämau nei tätou i te mau faaäuraa, te hoê parau faaäu anei no te òhipa, te hoê faaipoiporaa, aore ra te hoê faaäuraa parau i rotopü i te mau hoa.

-Te haaväraa: E nehenehe te heheuraa e faatîtîhia e haavïhia te huaai o Âperäma e maha hänere mätahiti i te maoro, e faaäuhia i te mau tämataraa e te mau tämataraa ta tätou e faaruru nei i roto i to tätou oraraa. E nehenehe te reira e haamanaò ia tätou e noa atu te mau taime fifi, te vai ra te hoê raveà no te haere i mua e no te haamaitaì atu ä.

Te tiàmäraa: Mai ta te Atua i tapu ia Âperäma e tiàmä mai to na huaai i te mau taoà rahi, e nehenehe te reira e haamanaò mai ia tätou e i muri aè atoà i te hoê taime fifi, e nehenehe noa e ora mai ma te manuia.

 I te mea te vai noa ra ta Na mau tumu parau tapu, faaroo, fafauraa, tämataraa, e faatiàmäraa i roto i to tätou nei ao no teie nei tau. Mea faufaa ia täpaò e nehenehe teie mau tatararaa e täui ia au i te mau tiàturiraa e te mau manaò o te taata tätaì tahi.

-Taramo 105, 8 E tämau o ia i to na manaò i ta na ra faufaa, i te parau ta na i tuu mai e tautani noa atu i te uì ra:

-Tenete 15, 5 Ua arataì aè ra o ia ia na i te vähi ätea, nä ô mai ra, A hiò na to mata i nià i te raì, a taiò na i te mau fetià, i te tiàraa ia òe ia taiò. E ua nä ô mai ra o ia ia na, Oia atoà to òe na huaai.

-Hepera 11, 16 Ua hinaaro rä rätou i te fenua maitaì roa ra, oia hoì te ao ra: i òre ai te Atua i haamä ai ia rätou ia parauhia o ia e e Atua no rätou; ua haapaò hoì o ia i te hoê ôire no rätou.

-Ruta Èv. 2, 40 Tupu atu ra taua tamaiti ra, e itoito atu ra te âau, î aè ra hoì i te paari, e te vai ra te maitaì a te Atua i nià ia na.

Te Èvaneria a Ruta o te toru ia o na Èvaneria faauruhia e maha o te Faaäuraa Âpï. Teie te tahi mau manaò faufaa no nià i to na tupuraa i roto i te tuatua. Te faaìte nei te hiroà faaroo teretetiano, ua päpaì o Ruta i te Èvaneria o te Metia i roto i te huru oraraa vaamataèinaa no to na tau. E täote räpaau i te taata no teie òhipa, i parauhia o Ruta, o tei here i te Atua, e aore ra te hoa o te Atua. Ua päpaì o Ruta i te taatoàraa o te parau no Ietu Metia mai to na fänauraa, ta na mau òhipa, to na faatätauroraahia, e to na tià-faahou-raa. Te faatumu nei te reira i nià i te mau haapiiraa a te Metia no nià i te faaoraraa e te tupuraa o te mau parau tohu o te Faaäraa Mätamua no nià i te taeraa mai o te Metia. E mea faufaa ia täpaò e ua niuhia teie mau haamaramaramaraa i nià i te mau tatararaa i te pae tuatapaparaa e i te pae faaroo, e mea taa ê paha ia au i te mau tiàturiraa e te peu a te taata tätaì tahi.

Te faaite mai nei te Èvaneria a Ruta i te pene 2 i te parau no te fänauraa o Ietu, tei faaìtehia i roto i te hiero, e i to na tamarii-rii-raa. Teie te tahi mau manaò faufaa o te nehenehe e tatara i te reira i roto i te mau ìrava täpiri:

-Te haehaa e te ôhie: Ua riro te fänauraa o Ietu i roto i te hoê fare vairaa puaa e to na taòtoraa i roto i te hoê vairaa maa èi täipe no te haehaa e te ôhie. E nehenehe te reira e haamanaò mai ia tätou i te faufaa o teie mau faufaa i roto i to tatou oraraa i te mau mahana atoà.

-Faaäraraa i te mau Tiaì mämoe: Te faaìte ra te parau faaìte no nià i te fänauraa o Ietu i te mau tiaì mämoe, o tei faarirohia ei feiä tiàraa haìhaì i taua tau ra, e no te taata atoà te poroì a te Atua, noa atu e aha to rätou tiàraa totiare. E nehenehe te reira e faaitoito ia tätou ia faaìte i te àifaitoraa e te faatura i te mau taata atoà.

Te faaroo e te haapaò : Ua pee Maria e o Iotëfa i te arataìraa tei horoàhia mai e te mau merahi e te mau ture faaroo no to raua ànotau, ma te faaìte i to raua faaroo e to raua e haapaò. E nehenehe i te reira e faaüru ia tätou ia faatupu i te faaroo e ia haapaò i roto i to tätou iho oraraa i te värua.

Te òaòa e te hau: E hopoi mai te faaìte-haere-raa i te fänauraa o Ietu i te òaòa rahi i te mau tiaì mämoe e e faatupu i te hau i nià i te fenua nei. E nehenehe te reira e haamanaò ia tätou ia ìmi i te òaòa i roto i to tätou mau auraa e te Atua e ia haa no te faatupu i te hau i roto i to tätou nei ao.

Te tupuraa e te tupuraa : Te faaìte nei te èvaneria e, ua tupu Ietu i te rahi i roto i te paari, te paari e te maitaì i mua i te Atua e i te taata nei. E nehenehe te reira e faaitoito ia tätou ia ìmi i te tupuraa tämau i roto i to tätou iho oraraa, i te pae varua e i te pae tino atoà.

E mea faufaa atoà ra ia ite e, e nehenehe te tätararaa o te èvaneria e täuiui noa ia au i te mau tiàturiraa e te peu a te taata tätaì tahi. No reira, te faaitoitohia ra tätou ia hiò i te hoê ärataì haapiiraa pîpîria aore ra i te hoê ärataì i te pae varua no te ìte hohonu atu ä.

E rave rahi auraa to te parau ra aroha. E nehenehe e parau e : Te nehenehe, te nehenehe: I roto i te Èvaneria a Ruta i te pene 2 i te ìrava 52, te parauhia ra e ua herehia o Iesu e te Atua e te taata. Te auraa ia e ua faahiahiahia te taata i to na mau huru maitataì. Te âau maitaì, te maitaì : E nehenehe atoà te aroha e riro èi maitaì aore rä ei maitaì tei faaìtehia mai e te taata. Èi hiòraa, te mau taata Teretetiano mätamua ua herehia rätou e te taata. Te färii maitaì e te maitaì fäito òre o te Atua: E pinepine te aroha i te faataahia mai te färii maitaì e te maitaì rahi ta te Atua e tuu mai i nià i te huitaata, noa atu to tätou au òre e to tätou paruparu. Na roto i te aroha o te Atua e faaorahia ai tätou i te faaora tuatau. Te huru o te Atua i nià i te taata: Te faaite ra te aroha i te huru o te Atua i nià i te taata, te hoê raveà no te riro e no te òhipa o tei faaurua-mau-hia e te here. E mea faufaa ia ìte e, e nehenehe te tatararaa o te aroha e täui ia au i te mau tiàturiraa e te peu a te taata ta tätaì tahi.

Teie te tahi parau poroì

 

Te ùputa o te mätahiti âpï.

 

Mau hoa here mä e, e te mau ùtuafare,

 

I mua i teie ùputa no te mätahiti âpï.

Te hinaaro nei au e faaìte atu ia òutou.

I te hoê poroì no te tiàturiraa e te oaoa.

Ia au i te parau no te fänauraa o Ietu.

I te faaìteraa a Ruta Èvaneria i te pene piti.

 

I te tahi mau taime i teie mätahiti.

Ua manaò paha tätou e tei roto tätou.

I te hoê fare vairaa täuihaa i te atea ê.

I to tätou fare e aita e vahi no tätou.

I roto i te fare vairaa täuihaa.

 

A haamanaò rä e, i taua mau taime ra.

Ua fänauhia te Faaora. Mai te mau tiaì mämoe.

I roto i te faaàpu, ua ìte tätou i te mau taime mätaù e te päpü òre.

Àreà rä, mai te merahi i àfaì mai i te parau âpï maitai ia rätou rä.

Te höroà atu nei au ia òutou i te hoê parau poroì oaoa mau.

 

Noa atu te mau tämataraa, ua tämau noa tätou i te ora.

Ua ìtehia ia tätou te mau taime maitaì e te haamaitaìraa.

A faaineine ai tätou no te farii i te mätahiti âpï.

E haamanaò na tätou i te mau parau a na merahi.

Ia haamaitaìhia te Atua i nià i te raì.

 

E ia pärahi mai te hau i nià i te fenua nei.

I rotopü i te feiä ta na e hinaaro.

Ia taìtaì tätou i teie hau i roto i to tätou âau.

E ia faaìte i te reira i te feiä e haaàti nei ia tätou.

 

Ia hopoi mai te Mätahiti Âpï ia òutou i te oaoa.

Te here e te hau ta te Metia i hopoi mai i to te ao nei.

I taua mahana ra i Peterehëma, e i Mäòhi Nui nei.

 

Mä to ù here atoà,

 

Ia òaòa òutou i teie Mätahiti âpï 2024.

 

Teraì òr. Faatura.