Ruta èv 21, ­­­­­25-36. Mata

Täpati 02 no Titema 2018.

ÔROÀ

Tiaìraa HOÊ

Mata

Taramo 25

1 Taramo na Tävita. Te faaäraaraa atu nei au i ta ù värua ia òe, e te Fatu, 2 e ta ù Atua, te tiàturi nei au ia òe. Eiaha vau ia haamä, eiaha ta ù mau ènemi ia teòteò ia ù. 3 Eiaha roa tei tiàturi ia òe ra ia roohia e te haamä. O tei rave haavare noa i te hara ra, ia haamä atu ia. 4 E faaìte mai òe ia ù i to mau èà, e te Fatu, e haapii mai òe ia ù i to mau haereà.5 E faaìte mai òe ia ù i te parau mau na òe ra, e haapii mai hoì ia ù; o òe hoì te Atua o to ù ora, te tiàturi nei au ia òe i te mau mahana atoà nei. 6 E haamanaò, e te Fatu, i to aroha faaherehere ra, e to hämani maitaì i te mau mahana i maìri aè nei. 7 Eiaha òe e manaò mai i te ìno e te mau hara o ta ù âpïraa ra; manaò mai rä òe ia ù, mä to aroha atoà, no to òe hämani maitaì, e te Fatu ra. 8 Maitaì to te Fatu e te piò-òre e haapii mai ai o ia i te feiä hara i te èà tià mau. 9 E arataì o ia i te feiä âau marü mä te tià; e haapii mai o ia i te feiä âau marü i to na iho èà.10 Te mau haereà a te Fatu ra, o te aroha ia e te parau mau, i te feiä i haapaò i ta na parau i faaau e ta na i faaìte mai. 11 Rahi noa iho ä ta ù nei hara, e te Fatu, e faaòre mai ä òe i to òe ra iòa.12 O vai te taata i mataù i te Fatu. E faaìte o ia ia na i ta na èà ia hinaaro ra. 13 E pärahi te reira taata mä te maitaì, e riro te fenua i to na ra huaai. 14 Te parau moè a te Fatu ra, tei te feiä ia i mataù ia na ra; e o rätou ta na e faaìte mai i te parau faaau na na ra. 15 Te tano noa nei ä ta ù mata i te Fatu, no te mea e tià ia na ia ìriti mai i ta ù âvae i te märei ra. 16 Ìte mai ia ù, e aroha mai ia ù, e àti hoì to ù i te moèmoè. 17 Ua rahi iho nei te mäuiui o ta ù âau, e faaora òe ia ù i ta ù mau àti nei.18 E hiò mai òe i ta ù pohe e ta ù mäuiui, e faaòre mai òe i ta ù mau hara atoà nei. 19 A hiò na i ta ù mau ènemi ua rahi, e te ûàna mai ra to rätou riri ia ù. 20 Faaitoito mai òe ia ù, ia ora vau ia òe; eiaha vau ia roohia e te haamä, te tiàturi nei hoì au ia òe. 21 Ia ora vau i te parau mau e te parau tià; te tiàturi nei hoì au ia òe. 22 E te Atua e, ia ora Ìteraèra ia òe i to na atoà ra mau àti.

Ieremia 33,14-16

14 Te nä ô mai ra te Fatu  inaha, te fätata mai ra te tau e faatupu ai au i taua mea maitaì ra ta ù i faaìte i te ùtuafare o Ìteraèra, e te ùtuafare o Iüta. 15 I taua mau mahana ra, e te reira ànotau e faatupu ai au, no te huaai o Tävita, i te ohi parau tià, nä na e faatupu i te parau au e te parau tià i te fenua nei. 16 Ia tae i te reira tau e ora ai Iüta, e pärahi mai hoì Ierutarëma mä te ora; teie hoì te iòa e maìrihia nö na, o te Fatu ta tätou parau tià ra.

1 Tetaronia 3,12-4, 1-2

12 E ia faaîî mai te Fatu ia òutou i te aroha e ia manii noa ia òutou iho, e te taata atoà ra, mai ia mätou e aroha ia òutou na. 13 Ia itoito mäite to òutou âau ia na i te maitaì mä te hapa-òre i mua i te aro o te Atua, o to tätou ra Metua, ia fä mai to tätou Fatu ra o Ietu Metia, mä te feiä moà atoà no na ra.

4, 1-2

Te haereà e au i te Atua

1 Te parau maitaì atu nei ä mätou ia òutou, e te mau taeaè, e te aò atu nei ia òutou i te Fatu ra ia Ietu, e mai ta òutou i ìte aè nei ia mätou i te huru o to òutou haereà e au ai i te Atua, ia rahi atu ä to òutou nä reira. 2 Ua ìte hoì òutou i te aò ta mätou i tuu atu ia òutou, na te Fatu ra na Ietu.

Ruta èv 21, ­­­­­25-36.

Te haereà mai o te Tamaiti a te taata

(Mät 24,29-31; Mär 13,24-37)

25 E e piri to roto i te mahana i reira, e to roto i te märama, e to roto i te mau fetià; e e àti rahi to te mau fenua i te ao nei, e te ahoaho; e te miti e te àre i te harururaa; 26 e te tärapaperaa o te âau taata i te mataù, e te manaòraa i taua mau mea e fätata i te tupu i te ao nei; e pau hoì te mau mea o te raì ra i te ueuehia. 27 Ei reira rätou e ìte ai i te Tamaiti a te taata i te haereà mai nä nià i te ata mä te mana e te hanahana rahi. 28 E ua tupu anaè teie nei mau mea, e nänä i to òutou mata i nià, e faateitei i to òutou upoo, te fätata mai ra hoì to òutou ora.

Te haapiiraa a te tumu tute

(Mät 24,32-35; Mär 13,28-31)

29 Ua parau atu ra o ia ia rätou i teie nei parapore A hiò na i te tute e te mau räau atoà 30 ia hiò òutou i te ôteoraa, te ìte noa ra òutou e, ua fätata te àuhune i reira. 31 Oia atoà teie, ia hiò òutou i taua mau mea nei i te tupuraa, ua fätata ia te Pätireia o te Atua, ia ìte hoì òutou. 32 Oia mau ta ù e parau atu ia òutou nei, e òre teie nei uì e mou e hope ai i te tupu. 33 E mou te raì e te fenua, e òre rä ta ù nei parau e mou.

Te vai-ara-raa

34 E ara rä ia òutou, o te teimaha òutou i te rahi o te mäa e te taèro, e te peàpeà o teie nei ao, a roohia mai ai òutou e taua mahana ra aore i manaòhia. 35 E roohia mai hoì to te ao atoà nei i te reira mai te märei ra. 36 E tënä na, e ara òutou, tämau mäite ä i te pure, ia au ia òutou te ora i teie nei mau mea ìino e fätata mai nei, e ia tià mäite òutou i mua i te aro o te Tamaiti a te taata nei.

Manaò.

O te tiaìraa mätamua teie, e aha te tiaì, e vahi i reira e tià ai e pärahi ai, ia vai ineine noa ia tupu te ôpuaraa i manaòhia no te haere, e no te tere i te vahi i faanahohia. I te mea e ärataìraa e feruriraa parau te vai ra i mua i te òhipa e tiaì mai ra, mai te hoê ohi âpï i te tupuraa. No faaìte ia i te parau e mauhia ra e te òhipa, tei haapii mai i te ora a te Atua Nui Tumu Tahi te tumu o te ora. Tei tiàturihia i te mau mahana atoà. Te  tiaì to na turu te tiàturi te faaòromaì, aita e haereraa i mua, tei òre i riro atoà ei haereraa i muri, eiaha te ôtoheraa te haereraa rä i te vähi tei reira te parau, te vähi no reira mai òe, tei tïtau i te ìte e te hiò ma te tütonu i nià i te faufaa tei faatupu i te ora. Ia riro te puai o te mata èi päpü i te mea e hiòhia ra. Ia hiòhia te tahi, eiaha ia moèhia ia e, terä e hiò ra, e i roto i te reira hiòraa, te vähi paruparu, te ärea e vai ra i roto i te vahi e tiàhia ra e te mea e hiòhia ra, e tauturu te reira i te ìteraa i te mea e hinaarohia ra ia ìte. Mai te fefe tei haamanaò mai i te âfaro, te teiaha tei haamanaò mai i te mämä, mai te taere tei haamanaò mai te vitiviti. Te faahiroàroà noa mai ra te reira, i roto i te tiaìraa i te hinaaro o te Atua Nui Tumu Tahi, eita te hiò e tano ia faataa-ê-hia i te faaroo, oia te mea i parauhia. Hiò noa ai te mata i  roto i te tiaìraa, na te parau e arataì ra i te ìteraa i te mea ta te Atua e hinaaro ra ia ìte. No te mea e Värua te Atua, te mea e märamaramahia, te mata te värua te âau o te taata ta te Atua e hinaaro no te tautururaa ia tupu hau noa ta na Rähu. I te mea te faamanaò noa mai ra te reo i te faufaa o te taò, e taoà ora te reo, te värua te reira o te hoê nünaa, te rämepa türama i te èà o te taata, tae atu ai o ia i roto i te ìte. Ia ìno te reo, te èà o te taata terä e mohimohi ra, parau hänoa atu ai o ia i te parau mai te taa òre i te mea ta na e parau ra, mai te haapeàpeà òre to na upoo i te ìno ta na e rave ra, no na iho nä mua roa, e no te feiä atoà e faaroo mai ra ia na. Ua ineine te reira taata i te parau i te mea e parauhia ia na e parau, aita hoê aè fifi to na i te parauraa i te maitaì, e ìno, e te ìno ra, e maitaì ia ; te parauraa i te pöuri, e märamarama, e te märamarama ra, e pöuri ia ; te parauraa hoì i te maramara, e momona, e te momona ra, e maramara ia. No te mea e taoà ora te reo, ia ö te tahi taò i roto i te tahi reo, eere te taò anaè të ö mai, te manaò atoà rä e paèpaè ra i te reira taò, oia te hiòraa a te nünaa na na te taò. A faaroo mai na i te haapotoraa o na taiòraa e maha nei te puai o te au taò. 

-Taramo 25, 15 Te tano noa nei ä ta ù mata i te Fatu.

-Ieremia 33, 15 nä na e faatupu i te parau au e te parau tià i te fenua nei.

-1 Tetaronia 3,  13 Ia itoito mäite to òutou âau ia na i te maitaì mä te hapa-òre i mua i te aro o te Atua, o to tätou ra Metua, ia fä mai to tätou Fatu ra o Ietu Metia, mä te feiä moà atoà no na ra.

-Ev. Ruta 21, 29 A hiò na i te tute e te mau räau atoà

Teie mau ìrava, eita e tià ia parau-noa-hia i roto i te parau no te raveraa i te òhipa, te vai ra te tahi mea hau atu të ìmi i roto i te auraa ta teie mau ìrava e horoà ra no te òhipa, oia te faatupuraa i te ora, te raveraa i te òhipa no te maitaì o te taata, no te tatara i te taata i räpae i te fifi, aore ra te raveraa i te òhipa ia òre te taata, te ùtuafare ia topa i roto i te fifi. Te taata e rave i ta na òhipa, eiaha te òhipa i faauehia ia na e rave, te òhipa no reira o ia i àufauhia ai, te taata rä e faatupu i te värua o te òhipa, e tiàraa faaora to na. Ia parau te Taramo e 15 Te tano noa nei ä ta ù mata i te Fatu. Oia hoì te òhipa e vai ra i roto i aru ta na e ìte ra tei àua haaàti ia na. E òhipa ihoä to roto i te parau o te aru,  te aru ra te fenua ia, ia ìte tätou i te uruaì i nià i ta tätou iho märamaramaraa i te parau o te òhipa,  ia  tüàti ta tätou märamaramaraa i teie parau ia tano noa te mata i nià i te òhipa.

Te taata faaàpu i roto i ta na òhipa ta na märamaramaraa i te värua o teie parau, aita atu e manaò e arataì ia na i roto

i ta na òhipa maoti rä, to na here i ta na òhipa, e te ìteraa i te auraa o te òhipa ta na e rave ra, oia te horoàraa i te ora, aore ra te riroraa o ia ei ora no to na ùtuafare. Aita hoê taiò e ö mai i roto i ta na raveraa i ta na òhipa, no te mea aita e hoo to te ora. Eita teie taata e taiò i te hora haamataraa e te hora faaotiraa, eita e taiò i te rahiraa mahana ta na i rave i te òhipa, eita e taiò i te rahiraa mäa ta na i tanu, eita e taiò i te rahiraa moni e roaa ia na. Hoê noa ta na i ìte, e ora to na ùtuafare i ta na òhipa. Aita i ö mai i roto i te manaò o teie taata e, e tiàraa faaora to na, o tätou teie e parau nei e, e tiàraa faaora to na, te mea atoà te reira e horoà i to na turaraa taata. Aita teie taata e ìmi ra i to na hanahana i roto i ta na òhipa, aita hoì e ìmi ra i te räveà ia faahanahanahia, aore ra ia haafetiàhia o ia, mai ta Ieremia  e parau ra no te Atua 15 nä na e faatupu i te parau au e te parau tià i te fenua nei. Te fenua e parauhia ra i roto i te ìrava e fenua e turämahia  i te parau Atua e tae noa atu i te mau motu i teie huru  parauraa  o te fenua, e nä ô ia tätou e, e fenua ta te Atua i horoà i te Mäòhi, e ture ta te hoê arii e tuu i to na nünaa, âreà te fenua, aita ta na e ture, te haapaò noa ta na i te hinaaro o te Atua. Mai ta Pauro e parau ra i te naòraa e, 13 Ia itoito mäite to òutou âau ia na i te maitaì mä te hapa-òre i mua i te aro o te Atua, o to tätou ra Metua, ia fä mai to tätou Fatu ra o Ietu Metia, mä te feiä moà atoà no na ra. Te mea atoà ia i itoito ai tätou i te maitaì, no te faatupu i te haapiiraa, ei haapäpüraa  eere te färaa mai o Ietu no te haere mai e faatere i te fenua no te tïtau ra, no te faaìteraa i te taata e te mau nünaa atoà i te parau tià a te Atua nä roto i te haapiiraa, oia hoì nä roto i te türamaraa i te taata i te hinaaro o te Atua. Na te haapiiraa e arataì i te taata i te märamarama i faatupu ai o ia i te parau tià. Aita hoê faaheporaa i te taata ia rave i te tahi òhipa, aore ra te tahi  haafifiraa ia märamarama, eita ia e tià i te taata ia òre ia rave i te mea ta te märamarama i faaìte ia na. Te auraa rii atoà ia o te mea ta Ietu e parau ra, ia nä ô mai o ia e, 29 A hiò na i te tute e te mau räau atoà. Te horoà nei o Ietu i te ìteraa i te mea e hiò, te puai ia ta te mata e tütonu nei ia òre ia vai rupehu noa te òhipa e faatupu, mai ta te hiò hipa e faahoì mai nei i to tätou hohoà te aru a te Atua to tätou te reira hiò hipa.

Teraì òr. Faatura.

Ioane 18, 33-37 Hii

Täpati 25 no Novema 2018.

Hii

Taramo 93

1 Tei te Fatu te hau, ua faaàhuhia i te mana, ua vehihia te Fatu, e ua tätuahia i te püai. Ua mau hoì te fenua, e òre roa e âueue. 2 Ua haamau-ê-hia na to òe teröno, mai tahito mai ra, mai tahito mai ä hoì òe. 3 Te teitei nei te tai, e te Fatu, te teitei nei te reo o te mau àru ra, e ta na mau àru ra, te teitei nei te fätiraa. 4 O te Fatu i te vähi teitei ra, e püai rahi to na i to te haruru o te miti ra, e te mau àru rahi o te moana ra. 5 O ta òe hoì i faaìte mai ra, e parau mau ia; o te maitaì tei au i to òe ra fare, e te Fatu, e hope roa aè te mau uì atoà ra.

Täniera 7, 13-14

13 Hiò iho ra vau i taua ôrama i te ruì ra, e inaha, te hoê mai te Tamaiti a te taata ra i te haereà mai nä roto i te mau ata o te raì ra; e ua haafätata atu ra o ia i To te mau mahana tahito ra, e tuuhia iho ra i pïhaì iho ia na. 14 E ua höroàhia mai ra te mana, e te hinuhinu, e te pätireia nö na, ia auraro mai te taata atoà, e te mau fenua atoà, e te reo atoà ia na. To na na mana, e mana mure òre ia, e òre ia e mou, e to na pätireia, e òre ia e pau.

Àpotarupo 1, 5-8

5 E tënä na, a haamanaò i to òe hiàraa, e tätarahapa e rave i te òhipa mätamua ra. Aore rä, e haere vave atu ia vau ia òe na, e e hopoi-ê-hia e au ta òe rämepa i to na vairaa, ia òre òe ia tätarahapa. 6 Teie rä ta òe maa maitaì e mau na te faufau na òe i te parau a te mau pipi a Nitora, ta ù atoà e faufau nei.7 E tarià to na ra, e faaroo o ia i ta te Värua e parau i te mau Ètärëtia ra. Të riro ia na te rë ra, e faaàmu ia vau ia na i te räau ra o te ora, e tià i rotopü i te parataito a te Atua ra.

Poroì i te Ètärëtia i Temurina

8 E e päpaì òe i te parau i te merahi a te Ètärëtia i Temurina ra Te nä ô mai ra te mätamua e te faahopeà, o tei pohe, e te ora nei.

Ioane 18, 33-37

33 Hoì atu ra Pirato i roto i te haaväraa ra, ua parau atu ra ia Ietu, nä ô atu ra ia na O te Arii òe o te âti-Iüta? 34 Ua parau mai ra Ietu ia na Na òe iho änei tënä na parau, e na vëtahi ê änei òe i nä reira mai ia ù? 35 Ua parau atu ra Pirato E âti-Iüta änei au? Na to òe iho fenua e na te mau tahuà rarahi ra òe i tuu mai ia ù nei. E aha na òe? 36 Ua parau mai ra Ietu Eere i to teie nei ao to ù Pätireia. Ahiri no teie nei ao to ù Pätireia, ua faaitoito ia ta ù mau tävini ia òre au ia tuuhia atu i te rima o te âti-Iüta. Eere rä to ù Pätireia i to ô nei. 37 Ua parau atu ra Pirato O te Arii maori òe? Ua parau mai ra Ietu Te parau mai ra òe e e Arii au. I fänau mai ai au, e i haere mai ai hoì au i te ao nei, e faaìte i te parau mau. No te parau mau o ia ra, e faaroo ia i ta ù reo.

Manaò.

E mau âparauraa teie e tupu nei i roto i te taata e te  rähu, te taata e te puai o te mau àru, te taata e te taata ia ìte e ia faufaahia te ôpuaraa faaora a te  Atua Nui Tumu Tahi. Teie huru parauraa te hii nei te taata i te òhipa a te Atua i ta na e ìte nei, no te mea ia, na na i hinaaro, e no te mea ua fati to na manaò i te maitaì o ta na e faanaò ra, i tämau ai te taata i te rave i te tahi òhipa, no te maitaì ia o taua òhipa ra, aore ra no te mea aita ä te reira òhipa i faaìte mai ra i te ìno. Te räveà a te taata te faatanoraa i te òhipa ta na e ìte ra, tei roto atoà te reira i te tupuraa o te òhipa tià òre. Te faufaa ia e vai nei i roto i na taiòraa e maha tei horoà i te taata i te taime no te hiòraa i te auraa o te òhipa ta na e ìte ra, e ia riro na na iho e ìriti i te ùputa ta na e faatupu no te haapii ia na. Taua mau haapiiraa rä no te haafatata ia na i pïhaì iho i te tumu o te ora ei haapäpüraa i ta na e tiàturi ra i te rähu, e te aru e àua haaàti ra ia na, i te mea te ìtehia nei i roto i te mau faufaa ora te ärataìraa a te Atua Nui Tumu Tahi i te parauraa ia a na taiòraa e maha nei,

-Taramo 93, 4 O te Fatu i te vähi teitei ra, e püai rahi to na i to te haruru o te miti ra, e te mau àru rahi o te moana.

-Täniera 7, 14 To na na mana, e mana mure òre ia, e òre ia e mou, e to na pätireia, e òre ia e pau.

-Àpotarupo 1, 7 E tarià to na ra, e faaroo o ia i ta te Värua e parau i te mau Ètärëtia ra.

-Ioane 18, 37 No te parau mau o ia ra, e faaroo ia i ta ù reo.

Te vai faahou atu ra änei te tahi parau huru fenua aè i teie mau taiòraa,  i te faaauraa a te taata i te Atua, Tei hau, tei faaàhuhia i te mana, tei vehihia tei tätuahia i te püai. Ua mau hoì te fenua, e òre roa e âueue  i te aroha e te here o te Atua. Ia ìte rä hoì tätou e teie mau faaäuraa, te mea ta tätou e tiaì nei ia tuuhia mai e te Atua mai te raì mai, ua tuu-ê-hia mai na te reira, tei roto ê na i te fenua. E aha atu ra te auraa o ta tätou tiaìraa i te tahi mea tei horoà-ê-hia mai na. Teie mau horoà ta te fenua e mau nei te ua, oia hoì te pape no te raì mai, e te pape e mauhia ra e te fenua, taua mea nei ia. Te auraa, aita ä tätou i ani, ua pähono ê mai na te Atua. Te vähi taa ê noa, te mea ia e, te pape e mauhia ra e te fenua, te mea fätata aè ia ia tätou, âreà te pape no te raì mai, aita ta tätou e parau i reira. Ua tià i te Atua i te horoà ra, ua horoàhia mai ia, e aita ra, aita ihoä ia. E tano ra tätou i te parau mai teie te huru no te raì e te fenua i te nä ôraa e a rave i terä i horoàhia mai, te parau ia o te fenua, eiaha e tiaì i terä i òre ä i horoàhia mai. Na te Atua te tahi, na te Atua te tahi ; ua horoàhia mai te tahi, aita te tahi i horoàhia mai. Te taata märamarama, e färii o ia i tei horoàhia mai âreà te taata maamaa ra, e tiaì ia i tei òre i horoàhia, mai te tähitohito i tei horoàhia mai. Ia faaroo hoì tätou i te  parauraa a te Taramo 4 O te Fatu i te vähi teitei ra, e püai rahi to na i to te haruru o te miti ra, e te mau aru rahi o te moana. Te parau e varovaro nei i teie huru faahitiraa no te fäì  ia i te Atua i te maitaì o te miti te moana, ia ìte ia tätou e, e tupuraa teie o te mau maitaì, ta te fenua e faahoì noa ra i te vahi teitei mai reira mai te maitaì o taua maitaì ra te märamarama ia. Te auraa, vai noa te fenua i roto i te märamarama e te türamaraa a te parau a te Atua, vai noa atoà mai te maitaì ei huru no te fenua. Te maitaì o teie märamarama, te mea ia e, aita o ia i türama noa i te fenua mai te tahi mea i nä nià mai i te tau i raro, ua nä roto atoà mai rä i te fenua, nä roto i te mau täpaò ora ta te fenua i faaìte mai e tei riro ei mauruüruraa na te Atua. O teie ia e parauhia nei e Täniera, 14 To na na mana, e mana mure òre ia, e òre ia e mou, e to na pätireia, e òre ia e pau. To na pätireia te fenua ia mai ia Mäòhi Nui e faufaa pau òre teie, tei àua haaàtihia e te Moana Nui a Hiva, te fati mure òre noa i nià i te aàu te auraa, eita teie fenua e tano ia faataa-ê-hia i te Parau, eita hoì te ora e tano ia faataa-ê-hia i te fenua ta te reira Parau i faatupu mai. No reira e òre ai e tià ia tätou ia faaea noa i nià i te mea i parauhia, aore ra te mea i päpaìhia mai te òre e tïtau i ta te fenua faaìteraa. Eita te taata e ora i te parau, oia te mea i parauhia, aore ra te mea i päpaìhia, riro noa ai ei parau no te fenua, aore ra ei parau no te Mäòhi, e ora rä i te märamarama o te parau, te märamarama tei riro èi parau, aore ra te päpaì, ei püòhu, ei fauraò. Ia na reira tätou no te faatupu ia i te parau, 7 E tarià to na ra, e faaroo o ia i ta te Värua e parau i te mau Ètärëtia ra. Te faufaa o te parau, te riroraa ia ei faatupu i te märamarama, oia hoì ei tauturu i te taata i te ìteraa i te òhipa e tiaìhia ra ia na ia rave atu. A hiò noa ai e a faaroo noa ai tätou i te fenua, mai te ìte òre e te häroàroà òre, no te mea ia, ua mäìti ê na e ua faaoti ê na tätou i te mea ta tätou e hiò, e te mea ta tätou e faaroo, e aha ia ta te fenua haapiiraa mai ia tätou i reira. Haamanaò tätou e, eere te fenua no roto atu ia tätou i te püraa mai i te ao nei, o tätou rä, e tamarii ia na te fenua, e eita to tätou parau e tano ia faataa-ê-hia i to te fenua. I parau ai o Pirato ia  Ietu e, na to òe iho fenua e na te mau tahuà rarahi ra òe i tuu mai ia ù nei. I  teie huru parauraa e faaìte o Ietu i te puai o te parau o te fenua ta na i hii i roto ia na  i te parauraa e, I fänau mai ai au, e i haere mai ai hoì au i te ao nei, e faaìte i te parau mau. No te parau mau o ia ra, e faaroo ia i ta ù reo. Oia hoì, tei fänau pü fenuahia e òre e haavare, e òre e hoo i to na àià, e hii ra o ia i to na fenua ia Mäòhi Nui i roto ia na.

Teraì òr. Faatura.

Märeto 13,24-32 Riro.

Täpati 18 no  Novema  2018.

Riro

Taramo 16

1 Mitetäma na Tävita. E faaoraraa ia ù, e te Atua, te tiàturi nei au ia òe. 2 Te parau nei au i te Fatu e O ta ù Fatu òe, aita a òe e faufaa i to ù nei maitaì. 3 Âreà te feiä moà i te fenua nei, o te feiä maitataì rätou o ta ù e pöpou nei. 4 E faarahihia to rätou mäuiui tei rü i te hoì i muri. Ta rätou tütia-inu toto ra, e òre au e hopoi, e òre hoì ta ù vaha e faahiti noa atu i to rätou iòa. 5 O te Fatu, o ta ù ia tufaa e ta ù âuà, o òe tei haapaò mai i to ù nei terero. 6 Ua maìri aè nei to ù terero i te vähi maitaì; e te maitaì nei au i ta ù nei tufaa. 7 E haamaitaì ä vau i te Fatu o tei haapii mai ia ù ra te aò mai ra ta ù manaò âau ia ù i te ruì. 8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue. 9 I òaòa ai ta ù âau, e te òaòa nei ta ù värua; e taòto atoà ta ù tino nei mä te tiaì. 10 E òre hoì òe e vaiiho i ta ù värua i häte, e òre hoì òe e tuu i te taata moà ra ia ìte i te tähuti. 11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu.

Täniera 12,1-3

1 Ia tae i te reira ra atu e tià mai ai te arii rahi ra o Mitaèra, o tei tià mai e faatià i te mau tamarii a to òe ra mau taata ei reira te ànotau ahoaho, aita ia ahoaho mai te tupuraa mai o te fenua ra e tae roa aè nei i teie nei taime ia tae hoì i te reira tau e ora ai to òe mau taata, te feiä atoà i päpaìhia i roto i te puta ra. 2 E rave rahi to tei taòto i raro i te repo nei e ara mai; e rave i te ora-mure-òre te tahi pae te tahi pae e rave ia i te haamä e te vahavaha mure òre. 3 E te feiä i haapii i te parau maitaì ra, e ànaana mai ia mai te ànaana o te raì ra; e o tei faafäriu i te taata e rave rahi i te parau tià ra, mai te feiä atoà ra ia e a muri noa atu.

Hepera 10,11-14

11 E tià hoì te mau tahuà atoà i te tià-noa-raa i te mau mahana atoà i te haamoriraa, e te püpü-pinepine-raa i te mau tütia hoê ä huru o të òre roa e tià ia matara te hara ra. 12 Âreà te Metia, oti aè ra ta na tütia hoê i te püpühia ei täraèhara faufaa mure òre, pärahi atu ra i te rima àtau o te Atua ra. 13 E teie nei, te tiaì ra e ia faarirohia ta na mau ènemi ei taahiraa âvae no na. 14 Ua maitaì roa hoì e a muri noa atu te feiä haamoàhia e ana, i te perotefora hoê ra. 18 Ua faaòre-anaè-hia hoì te reira ra, aita atu ra e püpüraa täraèhara toe.

Märeto 13,24-32

Te haereà mai o te Tamaiti a te taata

(Mät 24,29-31; Ruta èv 21,25-28)

24 Ia tae rä i taua ànotau ra, i muri aè i taua pohe ra, e haapöurihia ai te mahana, e e òre hoì te märama e ànaana mai 25 e maìri mai hoì te mau fetià o te raì ra, e te mau mea mana o te raì ra, e ueuehia ia. 26 Ei reira rätou e ìte ai i te Tamaiti a te taata i te haereà mai i nä roto i te ata, mä te mana rahi e te hanahana. 27 Ei reira o ia e tono ai i ta na ra mau merahi, e haaputu mai i to na ra feiä i mäìtihia, no nä âpoo mataì e maha ra, no te hopeà mai o te raì e te fenua ra.

Te haapiiraa a te tumu tute

(Mät 24,32-35; Ruta èv 21,29-33)

28 E teie nei, ia ìte òutou i te tahi parapore i te tute nei. E ia ôteo te ômou rii e mähora aè ra te rau, ua ìte ia òutou e ua fätata te àuhune i reira. 29 Oia atoà i teie nei, ia hiò òutou i taua mau mea nei, ua fätata ia i reira tei te pae ùputa ia, ia ìte hoì òutou. 30 Oia mau ta ù e parau atu ia òutou nei, e òre e mou teie nei uì e hope ai teie nei mau mea atoà i te tupu. 31 E mou te raì e te fenua, e òre roa rä ta ù parau e mou.

Te Metua anaè tei ìte i te ànotau hopeà

(Mät 24,36-44)

32 Âreà te reira mahana e te reira hora, e òre roa te hoê e ìte; e òre hoì te mau merahi o te raì, e òre atoà te Tamaiti, maori rä o te Metua anaè ra.

Manaò.

Te Atua Nui Tumu Tahi teie e faateiteihia nei tei riro ei türuìraa no te taata tei tiàturi i te faatupuraa ora ta te rähu e faaìte noa ra ma te hanahana. Mai te taata e ìmi ra i te ora ia noaa mai te maitaì, mai te reira atoà te òhipa e tupu ra i roto i na taiòraa e maha. Eere rä i te ìmiraa mätamua e noaa mai ai te ora. Te hiroà ra ia tätou e, no te rahi o te mau manaò tei ätea i te mau hinaaro o te Atua, i faahoì noa ai te Atua ia tätou i te haamataraa o to tätou parau, mai te tahi taata tei hahi i te èà, e tei hoì faahou, aore ra tei faahoì-faahou-hia i te vähi i hahi ai o ia, no te faatïtïàifaro mai i to na èà. Ua ìte maitaì tätou e, i teie mahana, ua ätea roa tätou i te fenua, ua ätea roa i te mau haapiiraa i ärataìhia mai i te mau metua, e aita tätou e òhie nei i te färiiraa i te parau no te hoìraa. E au rii i te tahi mau taata tei faaruè i te parau o te  fenua no te haere e ìmi i te tahi oraraa oti noa e tei manaò e, e maitaì ia topa ra i roto i te fifi, ia ìte i te hape, ua haamä i te hoì i te vähi no reira mai te ora. Aita e fifi to te hape, te fifi te òreraa rä e färii i te haamata âpï faahou, te reira te mea peàpeà. Te tamarii nei ia ìte i to na hape e faaea o ia i te haùti, no te hoì i te vahi i reira te haperaa e aore ra e hoì roa i te haamataraa. Oia atoà te mau parau e faahitihia nei e taiòraa e maha a faaroo mai na

-Taramo 16, 11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu.

-Täniera 12, E te feiä i haapii i te parau maitaì ra, e ànaana mai ia mai te ànaana o te raì ra; e o tei faafäriu i te taata e rave rahi i te parau tià ra, mai te feiä atoà ra ia e a muri noa atu.

-Hepera 10, 12 Âreà te Metia, oti aè ra ta na tütia hoê i te püpühia ei täraèhara faufaa mure òre, pärahi atu ra i te rima àtau o te Atua ra.

Märeto 13, 31 E mou te raì e te fenua, e òre roa rä ta ù parau e mou.

Te auraa, eere te pohe o te taata ta te Atua i hinaaro, to na rä ora. No reira e òre ai e tià ia tätou ia färii i te manaò e, te pohe ta tätou e faaruru nei, e färii noa, e tupuraa no te hinaaro o te Atua. Eiaha atoà rä e tiaì noa ia haere roa mai te Atua e haru i to tätou rima no te huti mai ia tätou i räpae i te pohe tei reira tätou i te heiraa. Haamanaò tätou i te mau taime atoà e, mai te peu te vai ra te topa, te vai atoà ra te tià ; te vai ra te taì ra, te vai atoà ra ia te àta ; te vai ra hoì te pöiri ra, te vai atoà ra ia te raumaì. Eiaha tätou e täpoì i te reo o te päpaì taramo e haamanaò noa mai ra 11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu. No reira, tätou i amoamo e i taoraora i to tätou âvae i tae roa ai tätou i roto i te àti, na tätou atoà e amoamo e e taoraora i to tätou âvae no te faahaere mai ia tätou i räpae i te fifi tei reira tätou i te mauraa. E faaea tätou i te ani i te Atua ia haere mai o ia e tatara i te ìno ta tätou iho i faatupu, e tano rä tätou e ani i te Atua ia horoà mai ia tätou i te itoito, te püai, e te märamarama no te tatara i te fifi ta tätou i faatupu. I parau noa mai na tätou, e te parau faahou nei ä tätou e, te pohe rahi o te Mäòhi i teie mahana, to na ia ère, to na maùa, e ta na faaìno rahi i to na reo. Na na iho e tüpohe nei i te märamarama e arataì ia na i roto i te ora, oia hoì i te Atua ra. Taua märamarama ra, ua hunahia ia i roto i te reo ta na e vahavaha nei e ta na e haafaufaa òre nei i teie mahana i te haapeuraa i roto i te reo eere i to na, mai te tahi taata e haapeu ra i roto i te àhu eere i to na, te faufaa eere i ta na, te oraraa eere i to na. Tano roa ai te reo o te Atua ta Täniera e haamanaò mai ra i te nä ôraa e 3 E te feiä i haapii i te parau maitaì ra, e ànaana mai ia mai te ànaana o te raì ra; e o tei faafäriu i te taata e rave rahi i te parau tià ra, mai te feiä atoà ra ia e a muri noa atu. Ua tae roa atoà tätou i te ìteraa i te nehenehe i roto i te pohe, ta tätou e parau noa nei e, heipuni mai te manaò e, e hei nehenehe terä e faaàti ra ia tätou, e inaha te parau noa mai ra te reo e, ua mau tätou i nià i te ùpeà, mai te ià i hei, e ua haapunihia, ua faaàtihia tätou e te pohe. Mai te peu e àti to te taata i topa, e àti atoà to te feiä na rätou i türaì i te nünaa i roto i te hape e te pohe. Te taata i ànaana e tei färii i te ànaana, ua ineine atoà ia taata i te haere mai i räpae i te vähi o ia i fifi ai, no te tïtau i te tahi vähi maitaì atu. Te ànana atoà ra ia tätou i te mea Ietu i rave ai i te parau o te haapii e te ìte tei au mai ia na, ei papa no ta na òhipa, ei räveà tauturu i te taata ia òhie o ia i te ìte i te ôpuaraa faaora a te Atua. No te mea ua riro mai te reira parau ei taata, ua riro mai hoì te ànaana ei märamarama ei türama i te taata, i parau ai e i haapii ai o ia i te taata, e i faaìte roa ai hoì i te taata e i teie parau a Pauro i to Hepera 12 Âreà te Metia, oti aè ra ta na tütia hoê i te püpühia ei täraèhara faufaa mure òre, pärahi atu ra i te rima àtau o te Atua ra.

Faufaa noa ai Ietu e ta na parau, eita e tià ia tätou ia vahavaha i te fenua të òre to na parau e tià ia faataaêhia i to te vai i fänau mai ia na, te vai hoì te mätamua i faaroo i te reo o te Atua, e te mätamua atoà i pü mai i roto i te märamarama. Aita ihoä paha te fenua e parau ra i te reo o te taata mai ia Ietu e parau ra i te reo o te taata, te fenua rä te tumu o te reo o te taata, e te parau noa ra te fenua i te reo o te Atua, e nä roto hoì i te fenua, te haapii noa nei te Atua i te taata i te ora. No reira, te feiä të òre e färii i te märamarama e te türamaraa e horoàhia ra e te fenua, aore ra tei faahua riri i mua i te reira parau ei hunaraa i to rätou färii òre, e matapö ia e arataì ra i te matapö. Aita rätou e ìte ra, aore ra eita e hinaaro i te ìte e, te fenua, e te mau mea atoà e faaî ra i te fenua, te tai, e te reva, no roto mai ia i te märamarama o te Atua, e tupuraa no te parau a te Atua, e i roto hoì i ta te Mäòhi hiòraa ra, o te Atua iho te reira. Te auraa, eita e tano e faataa ê i te parau o te Atua i te parau o te fenua e te vai. Mea nä hea atu ra te Tumu o te märamarama i faarirohia ai ei tumu no te pöuri. Tei òre i färii i te märamarama, no te mea ia te au ra i te pöuri, e tei pärahi i roto i te pöuri ra, e au ia i te matapö. E  faaâpï Ietu i ta na parau i te naò ra e, 31 E mou te raì e te fenua, e òre roa rä ta ù parau e mou. Te mea ia i riro ai te fenua, èi tïteàmata no te ìte, to tätou te reira tauturu i te ìteraa i te märamaramaraa e te auraa o te mau mea atoà e haaàti ra ia tätou, e tae noa atu i to na iho parau, to na mäòhiraa i roto i te ôpuaraa a te Atua. Te feiä atoà i färii hope roa i te fenua ei àpu färii i te täpaò no te aroha e te here o te Atua i te taata, ei taoà horoà na te Atua ia na, eiaha no te faatupu noa i to na hinaaro, ei tauturu rä ia na i te ìteraa e te faatupuraa i te hinaaro o te Atua, e topa te poa i to na mata, e riro te fenua i reira ei tïteàmata mau no na e òhie ai i te ìte e Te mau haereà o Te Atua Nui Tumu Tahi, e òre ai te mau fetià o te raì e purehu, e òre te raì e te fenua e mou i reira te reo e riro ai èi fauraò no te î i te ìte e te märamarama.

Teraì òr. Faatura.

Märeto 12,38-44 E Ara

Täpati 11 no Novema 2018.

E Ara

Taramo 146

1 E haamaitaì i te Fatu A haamaitaì i te Fatu, e ta ù värua 2 E haamaitaì au i te Fatu, òi vai aè to ù ora; e himene au i ta ù Atua, òi vai aè au nei. 3 Eiaha e tiàturi i te hui arii, e te taata atoà, aita hoì o na e ora. 4 Te reva nei hoì to na värua, te hoì nei o ia i to na ra repo, mou roa atu ra ta na i ôpua i taua mahana ra. 5 E ao to na tei te Atua o Iatöpa te tauturu ia na, e tei to na Atua, tei te Fatu to na tiàturiraa 6 O tei hämani i te mau raì e te fenua, te tai e te mau mea atoà i roto ra o tei haapaò i te parau mau na na e a muri noa atu. 7 O tei faatià mai i te feiä i hämani-ìno-hia, e ua horoà mai i te mäa na tei poìa ra. O te Fatu tei tätara i tei täpeàhia ra, 8 o te Fatu tei faaàraàra i te mata o tei matapö ra, o te Fatu tei faatià i të faahaèhaahia ra, o te Fatu tei hinaaro i te feiä parau tià ra. 9 Te faaora nei te Fatu i te mau taata èê ra, te tauturu nei o ia i te ôtare e te vahine ìvi ra âreà te haereà o te paieti òre ra, e huri-ê-hia ia. 10 E vai arii mai ä te Fatu e a muri noa atu. O to Atua, e Tiona, e tae noa atu i te mau uì atoà ra. Hareruia.

1 Te mau Arii 17,10-16

10 Ua tià aè ra o ia haere atu ra i Tarefate. E tae atu ra o ia i te ùputa o te ôire, inaha, e vahine ìvi te òhi haere ra i te vahie ua pii atu ra o ia ia na, nä ô atu ra, A hopoi mai na i te hoê maa pape i roto i te färii, ia inu vau. 11 E te tii atu ra o ia i taua pape ra, ua parau atu ra o ia ia na, nä ô atu ra, Hopoi atoà mai i te tahi mäa päne i to rima na. 12 Ua parau mai ra o ia, Te ora ra to Atua o te Fatu, aita roa a ù e mäa àma, mäori rä te hoê mäa färaoa hoê rima e î tei roto i te hue, e te hoê mäa hinu i roto i te färii e inaha, te òhi haere ai au i roto a tunu ai nä mäua o ta ù tamaiti, a àmu ai mäua, a pohe atu ai. 13 Ua parau atu ra Èria ia na, Eiaha e mataù, e haere rä òe e nä reira ta òe i parau ra e mata na rä i te hämani i te hoê vähi iti nä ù. 14 Te nä ô mai ra hoì te Atua o Ìteraèra a te Fatu, E òre te hue färaoa e iti, e òre hoì e pau te färii hinu, e tae noa atu i te mahana e hopoi mai ai te Fatu i te ua i te fenua nei. 15 Ua tii atu ra o ia, ua rave i ta Èria i parau mai ra ua àmu iho ra o ia e o Èria, e to na atoà ùtuafare, e rave aè ra te mahana. 16 Aore hoì taua hue färaoa ra iti, aore hoì te färii hinu i pau, ta te Fatu hoì i parau mai, i te vaha o Èria ra.

Hepera 9,24-28

24 Aita aè nei hoì te Metia i tomo i roto i nä vähi moà i hämanihia e te rima ra, i te hohoà no te vähi moà mau ra, tei te raì mau rä o ia ia faaìte o ia ia na iho i mua i te aro o te Atua no tätou, i teie nei ä. 25 Eere rä ia püpü pinepine o ia ia na iho ei tütia, mai te tahuà rahi i tomo i roto i te vähi moà i te mau mätahiti atoà, mä te toto ê ra. 26 Ahiri hoì i nä reira na, mai te mätamua mai ä o teie nei ao, ua rahi roa ia to na poheraa. Hoê roa rä o na faaìteraahia mai i teie nei, i te hopeà o te mau tau nei, ia faaòre o ia i te hara i te faatütiaraa ia na iho. 27 E mai te taata nei hoì ua haapaòhia ia hoê aè poheraa, e muri aè o te haaväraa ia, 28 oia atoà te Metia, a hoê aè nei o na püpüraahia ei tütia ia hopoi ê o ia i te hara ä te taata e rave rahi; e e fä mai ä o ia o te piti ia o te färaa mai, eiaha ei täraèhara, ia ora rä te feiä e tiaì ia na ra.  

Märeto 12,38-44

Te huru o te mau päpaìparau (Mät 23,1-36; Ruta èv 20,45-47)

Te faaroo ra te taata rii ia na mä te pöpou. 38 Ua parau atu ra o ia ia rätou i te haapiiraa ra E ara, i te mau päpaìparau i hinaaro i te àhu haapereue a hahaere ai, e ia arohahia i te vähi taata, 39 e te pärahiraa maitataì i roto i te mau tunato ra, e te vähi teitei i te àmuraa mäa ra. 40 O tei rave pau roa i ta te fëtii o te mau vahine ìvi ra, e te haamäoro i te pure ei täpoì. E pohe rahi roa atu ia to rätou.

Te horoà a te hoê vahine ìvi taoà òre (Ruta èv 21,1-4)

41 E te pärahi ra Ietu i mua iho i te piha vairaa taoà ra, hiò atu ra i te taata i te tuuraa i te moni i roto i taua vairaa ra. E rave rahi te feiä taoà i tuu i te moni rahi i roto. 42 Ua haere mai ra te hoê vahine taoà òre, e ìvi, ua tuu mai ra i e piti repeta i roto, oia te toterane hoê ra. 43 Ua parau atu ra Ietu i ta na mau pipi, nä ô atu ra ia rätou Oia mau ta ù e parau atu ia òutou nei e rahi ta teie nei vahine ìvi taoà òre i tuu i roto i te puèraa taoà nei i ta rätou atoà. 44 E tiàhapa hoì no ta rätou taoà rahi ta rätou i tuu i roto, âreà o ia ua hope roa a ana taoà rii navaì òre i te tuuhia e ana i roto.

Manaò.

E pü tara maha ta tätou e färerei nei i teie mahana, te Atua Nui Tumu Tahi tei haamaitaìhia faateiteihia, te perofeta tei poìa, te vahine ìvi e ta na horoà, te Fatu o Ietu i te haapiiraa. Mau tumu parau ärataì teie tei faatupu i te âparauraa ia ìtehia te puai o te manaò i roto i te faaòromaì. Te faaòromaì te päpä teie no te hau, e tià i te tauturu i te taata i roto i to na oraraa i te mau mahana atoà, e topa te mau patu faataaê e puehu te feìi e te ahoaho, e fänau mai te taata ta te Atua i hämani e ta na i hii i nià i to na ôuma. I te mea te faaòromaì te haafatataraa ia te tahi i te tahi ia î te ärea tei faaäpiäpihia e te àmahamaha. No reira, ia parauhia e, faaòromaì, eiaha tätou e manaò i te huru faaòromaìraa mai teie ta tätou i mätau i te ìte. Te auraa o teie taò faaòromaì, teie ia: haafatata, tuu i te parau i roto i te tahi e te tahi ma te tüpohe te mau manaò o te tähoo ia maitaì te fëruriraa ia tupu  te òaòa i roto i te âau. I reira e ìtehia ai te faufaa i te faaìteraa na tara e mäha teie te haapotoraa.

-Taramo 146, 10 E vai arii mai ä te Fatu e a muri noa atu.

-1 Mau Arii 17, 12 Te ora ra to Atua o te Fatu

-Hepera 9, 28 e e fä mai ä o ia o te piti ia o te färaa mai, eiaha ei täraèhara, ia ora rä te feiä e tiaì ia na ra.

-Märeto 12, 38 Ua parau atu ra o ia ia rätou i te haapiiraa ra E ara,

E Atua Tumu Tahi teie e âpee noa nei i te mau faaìteraa na roto i te tere o te mau taata faaroo i roto i te tau. Te auraa ra, e faatupu-noa-hia te hoê vähi âpï ta te fenua e faaìte nei to na î. E hinaaro teie no te Atua i te taata faaroo i roto i to na faaòromaì, e i roto i ta na parauraa, inaha no roto mai o ia i te ôpuaraa a te Atua, no te Atua hoì o ia i fäì ai te faaroo. I roto i teie huru parauraa e au ia faaäuhia i te tahi heuraa taò, te fäìraa faaroo e haapäpüraa na te taata faaroo te faufaa o te faaroo ta na ia e ìte ra i roto i to na oraraa. Mai ia tätou i parau na e, no te mea i parau te Atua i ìtehia ai e, te vai ra te Atua, e nä ô ia tätou i te parauraa e, no te mea e parau ta te taata i nià i te tiàturiraa, e ìtehia ai to na manaò i nià i te parau, na te reira atoà rä e haapäpü mai e, ua arataì änei te reo i te taata i te Atua ra, te tumu o te reo e te tumu o te faaroo, aore ra aita. Ia faaroo tätou teie fäìraa a te Taramo 10 E vai arii mai ä te Fatu e a muri noa atu. E parau mutu òre teie mai te vai e tahe i roto i te ànavai tei faatoro i te muri a vai no te moana nui a hiva o te puai atoà ia o te reo. E ora teie, aore ra e puai te faaroohia nei teie nä parauraa e piti i teie mahana. E puai  te reo ta te feiä âpï i ìte, âreà te feiä paari, ua ora mai na rätou i roto i te parauraa e, e ora. Mai te peu ua vai teie na parau i roto i te tau te puai, te ora e tià ia parauhia te mau faatoro no te mau reo fëtii, te vähi tätou i taa ê rii ai, te mea ia e, o tätou anaè tei färii i te faaö atoà mai i te puai, i te vähi i parau noa ai te täatoàraa o teie mau reo i te ora. Te riro ra te reira ei haapäpüraa mai e, e ora te parau mätamua, e no muri rii nei ihoä te puai i te ö-atoà-raa mai. Aita rä te öraa mai o te puai i faaòre i te ora. Ua horoà ra te reira i te faaìteraa i te tumu no te märamarama, ta fenua e mau ra, i te mea 12 Te ora ra to Atua o te Fatu.

Te ora, aore ra te puai, aita atoà ia i riro noa ei iòa no te tahi mau tuhaa fenua mätauhia e te taata, inaha te ö atoà ra to na parau i roto i te ao o te mau atua. E no te mea hoì e, te òhipa a te ora, te faaìteraa ia i te òhipa tei riro o ia ei ìte, te märamarama atoà ra ia tätou e, mai te Atua tei riro ei tumu no te ora, o to tätou ia puai e faaìte atoà i te ora ta tätou e mau ra, ei faaìteraa na tätou i te Atua, ei hanahana hoì no te iòa. Ia au i to na huru, te faahoì nei te ora i te ànaana o te mahana i te vähi no reira mai taua ànaana ra, te auraa, te faaìte noa ra te ora e, te vai ra o ia, te tumu ia o te hanahana. No te reira faufaa hoê roa ta te ora e mau ra, i haamau ai te Atua i ta na ôpuaraa faaora i nià i te ora i reira, 28 e e fä mai ä o ia o te piti ia o te färaa mai, eiaha ei täraèhara, ia ora rä te feiä e tiaì ia na ra. I te haereraa mai Ietu, aita atu to na hinaaro maoti rä, ia ìte faahou te taata i te Atua e ia hoì i te Atua ra. Te vähi rä i moèhia i te taata, te mea ia e, eita teie hoìraa e tupu ia òre ia nä roto i te fenua i te haere, e mai te peu e nä roto i te fenua, e nä roto atoà ia i te vai no reira to te Atua ìritiraa mai i te mau mea atoà tei riro ei täpaò no ta na ôpuaraa faaora. No te tauturu ia na i roto i ta na täpura òhipa, ua ani atoà Ietu i te tauturu a te fenua, te auraa ia o ta na haapaeraa mäa i rave i muri aè i to na päpetitoraahia ua rave atoà rä o ia i te hotu o te fenua no te faaâpï i te faaauraa ta te Atua i rave i roto ia na e te taata, 38 Ua parau atu ra o ia ia rätou i te haapiiraa ra E ara, E reo pü fenua teie ta Ietu e parau nei èi faaìteraa i to na aroha e to na here i te mau taata ta na e haapii nei. No te mea ta na faaìteraa hoê a ia e ta te fenua i te Atua, e tano ai tätou e parau e, ta te taata märamaramaraa i te parau o te Atua, ua haamäramarama atoà mai ia i ta na huru hiòraa i te parau o te fenua te huru auraa hoì e faanaho ra i te oraraa o te tata e to na fenua, te horoà atoà mai ra ia i te tahi türamaraa i nià i te mau auraa e täamu ra i te taata i to na Atua. Rau noa atu ai ta te mau nünaa hiòraa i teie parau, eita te parau o te taata e tano ia faataa-ê-hia i to te fenua e to te Atua. Te auraa, ia färii hope roa te taata i te fenua e te Atua, e märamarama ai o ia i to na parau ei taata ; te mea atoà rä te reira e horoà i te auraa i to na oraraa.

Teraì òr. Faatura.



Märeto 12,28-34. Faaueraa

Täpati 4 no  Novema 2018.

Faaueraa

ÔROÀ

Taramo 119,97-106

97 Te rahi roa nei to ù hinaaro i ta òe ra ture O to ù ia manaòraa i te mau mahana atoà nei. 98 E ìte rahi to ù i te parau na òe ra, i to ta ù mau ènemi ra, e tià hoì i te vai-mäite-raa i pïhaì iho ia ù. 99 Ìte rahi to ù i to ta ù mau òrometua atoà ra, no te mea te feruri nei au i ta òe i faaìte mai ra. 100 Ìte rahi to ù i to te feiä tahito ra, no te mea te haapaò nei au i ta òe parau. 101 Te täpeà nei au i o ù puè âvae i te mau èà ìino atoà ra, ia haapaò vau i ta òe parau.102 Aita vau i faaruè i ta òe ra mau faaauraa, no te mea ua haapii mai òe ia ù. 103 O te momona o ta òe nei parau i ta ù nei tämataraa e E momona rahi ia to te reira i to te meri i to ù nei vaha. 104 No ta òe ra parau i noaa ai ia ù te ìte, i òre i au ai ia ù te mau èà ìino atoà ra. 105 E rämepa ta òe parau i to ù nei âvae, e tiàrama no to ù nei mau èà. 106 Ua tapu vau, e e haapaò vau i taua tapu ra, e e haapaò vau i te mau faaauraa parau-tià na òe ra.

Teuteronomi 6,2-6

2 Ia mataù hoì òe i to Atua ra i te Fatu e ia haapaò i ta na atoà ra mau haapaòraa, e ta na mau parau, ta ù e parau atu ia òe na; o òe, e to tamaiti, e to mootua, i to òe pärahiraa i te ao nei, e ia haamaorohia hoì to òe na puè mahana. 3 E faaroo mai, e Ìteraèra, e haapaò maitaì ia rave; ia maitaì òe, e ia rahi roa òe i taua fenua tahe pape noa te ü e te meri ra, i ta te Atua no to mau metua ta te Fatu i parau mai ia òe ra. 4 E faaroo mai, e Ìteraèra e O te Fatu to tätou Atua, hoê te Fatu 5 e teie nei, e hinaaro atu òe i to Atua i te Fatu mä to âau atoà, e mä to värua atoà, e mä to püai atoà. 6 E teie nei mau parau ta ù e parau atu nei ia òe i teie nei mahana, ei roto i to âau e vai ai

Hepera 7,23-28

23 E rave rahi hoì to rätou i riro ei tahuà, no te mea, aore rätou i mau i te pohe. 24 Âreà o ia ra, no te mea e tià i te pärahiraa e a muri noa atu, e òre to na toroà tahuà e riro ia vëtahi ê. 25 E teie nei, e tià maitaì roa atu ia na ia faaora i te feiä e nä reira atu ia na ra i te haere i te Atua ra, e tià hoì o ia i te oraraa e a muri noa atu ei tià ia rätou. 26 O te huru ia o te tahuà rahi e au ia tätou nei, o tei maitaì roa ra, e te rave òre i te ìno, e te viivii òre, e te taa ê hoì i te feiä rave hara ra, e ia faateiteihia i nià iho i to te raì ra. 27 E òre hoì e au ia na ia nä mua i te püpü i te tütia i ta na iho hara, a püpü ai i ta te taata atoà, mai ta taua mau tahuà rarahi i te mau mahana atoà ra. Hoê roa a ana püpüraa i ta te taata atoà, ia na i püpü ia na iho ra. 28 O te taata paruparu nei hoì ta te ture e faariro ei tahuà rarahi, âreà te parau ra o te tapu, i muri aè i taua ture ra, o te Tamaiti ia ta te reira i faariro ei tahuà rahi, no na te au rahi maitaì roa, e a muri noa atu.

Märeto 12,28-34.

Te faaueraa rahi roa aè

(Mät 22,34-40; Ruta èv 10,25-28)

28 Ua haere mai ra te hoê päpaìparau i pïhaì iho, i faaroo na i ta rätou paraparauraa, e ìte aè ra hoì i te tià o ta na parauraa atu ia rätou, ua ui mai ra ia na Tei hea na te parau rahi o te ture ra 29 Ua parau atu ra Ietu ia na Teie te parau tahi o te ture ra E faaroo mai, e Ìteraèra e O te Fatu to tätou Atua, hoê hoì te Fatu. 30 E e hinaaro òe i to Atua i te Fatu mä to âau atoà, e mä to värua atoà, e mä to manaò atoà, e mä to püai atoà. O te parau teie i hau i mua. 31 E mai te reira atoà hoì te piti E aroha atu òe i to taata-tupu mai to aroha ia òe iho na. Aita atu ä parau e hau i te reira. 32 Ua parau mai ra taua päpaìparau ia na ra Oia mau, e te Òrometua  E parau-tià ta òe i parau mai nei hoê roa hoì Atua e aita atu o ia anaè ra. 33 E të hinaaro atu ia na mä te âau atoà, e mä te ìte atoà, e mä te värua atoà, e mä te püai atoà, e te aroha i te taata-tupu mai to na aroha ia na iho ra, e rahi ia i tei hopoihia ia pau täatoà i te auahi, e te mau tütia atoà ra. 34 E ìte aè ra Ietu e, e parau-tià ta na i parau mai ra, ua parau atu ra o ia ia na Aore òe i ätea ê atu i te Pätireia o te Atua ra. E aita roa atu e taata i ui faahou i te ui ia na mai reira mai ä.

Manaò.

E parau faaue teie e faahitihia nei e na taiòraa e maha, te faaue nei te Atua Nui Tumu Tahi i to na nünaa ia faaroo e ia haapaò i te ora i te Aroha e te Here tei reira te ora. E faaueraa  ei faatüàti faahou i te taata, tei ätea, tei purara, e tei hahape i te hinaaro tumu o te Atua. i te mea ua tae-roa te taata i te raveraa i te tahi mau òhipa të òre roa atu o ia e rave, àhiri i vai noa te taura täamu ia na i te feiä e ora i te vähi ta na e ora ra, oia to na mau taata tupu. Ia ineine te taata i te faaroo ia òre ia mutu te taura paraparauraa ta te Atua e faatoro nei, teie taura e parau no te here, mai te àiü i roto i te pü fenua o te metua vahine ta tätou e parau nei e, taura pito. Teie taura, eere te räveà faaàmuraa noa i te tamarii, te taura atoà rä teie o te here, te here o te metua i ta na tamarii, te here hoì o te tamarii i to na metua. E no te mea aita e here e aita e parau, ia paraparau te metua vahine, te faaroo mai ra te tamarii, e ia parau hoì te tamarii, te faaroo atoà mai ra te metua vahine. Mea nä reira te here, oia te taura e täamu ra ia räua i te haere noa i te püairaa e te paariraa. I roto i te ôpü o to na metua vahine. Ia fänau mai teie tamarii, te faahoìhia ra te taura i täamu mai na ia na i to na metua vahine i roto i te rima o te fenua ei räveà haapäpü e te haapaari i te taura o te here e täamu i te tamarii i to na metua vahine, te fenua. Te faufaa rahi ia ta te Mäòhi e ìte ra i roto i te parau no te tänuraa i te püfenua o te tamarii, te räveà e ìte ai te tamarii i te here o te fenua, te taime atoà rä te reira e haapäpü ai o ia i to na here i te fenua. Ia faaroo tätou i te haapotoraa o na taiòraa maha no teie mahana,

-Taramo 119, 103 O te momona o ta òe nei parau i ta ù nei tämataraa e E momona rahi ia to te reira i to te meri i to ù nei vaha.

-Teuteronomi 6, 5 e teie nei, e hinaaro atu òe i to Atua i te Fatu mä to âau atoà, e mä to värua atoà, e mä to püai atoà.

-Hepera 7, 27 Hoê roa a ana püpüraa i ta te taata atoà, ia na i püpü ia na iho ra.

-Märeto 12, 30 E e hinaaro òe i to Atua i te Fatu mä to âau atoà, e mä to värua atoà, e mä to manaò atoà, e mä to püai atoà. O te parau teie i hau i mua. 31 E mai te reira atoà hoì te piti E aroha atu òe i to taata-tupu mai to aroha ia òe iho na. Aita atu ä parau e hau i te reira.

Hoê roa rä parau e haatumu ra i teie mau manaò mauti te faaueraa, oia mau e parau faatupu òhipa e vai ra i roto i teie reo tei päpähia i nià i te tiàmaraa o te taata ta täìtahi. Teie tiàmaraa to te taata te haapaò maitaìraa ia te faufaa o teie parau i roto i te ôpuaraa a te Atua e tiàmaraa to te taata, no te färii e no te faatura èita ra e täno i te hoê taata i te pätoì e tiàmaraa tera na te Atua i horoà, e täno vau i te parau èita vau e hinaaro i te reira ora, e haere ia o na i te tahi vahi e ìmi ai to na ora. Te täno noa ra te parau a te Atua ia tätou, te auraa te vai ra tera mea ta tätou e ìte ra eiaha no te mea ua täòtiàhia te aroha e te here o te Atua i nià i tera e täno ia faarahihia ia haamanaò ra tätou i te rahu a te Atua ua ta taìhitu o na i te parau-noa-raa mea maitaì, mea maitaì, e täno atoà tätou i te faarahi i te maitaì, tera i noaa e täno e faarahi faahou atu ä. I te mea te faauehia ra ia tätou i te faatupu i te maitaì ia ïti te ìno. Tano mau atu ra teie parauraa a te Taramo, 103 O te momona o ta òe nei parau i ta ù nei tämataraa e E momona rahi ia to te reira i to te meri i to ù nei vaha. Te maitaì te reira i orahia mai e te mau tupuna, rätou i faaroo i te faaueraa, ua färii rätou i to rätou fenua, ua here rätou i to rätou fenua, e vahi faufaa roa atu na roto rätou i te here i to rätou fenua, mea na reira rätou i te ìteraa i te Atua, e no to te Atua mauruüru rahi ia , ua horoà te Atua ia rätou i te mana, ua faaroo te ïà, faaroo te mataì, faaroo te miti, te mana ta te Atua i horoà no te mea ua tiàturi rätou i te faaueraa e ua here rätou i te horoà a te here Atua i teie mahana te paraparau i te ïà e märö te vaha i tähatai aita te ïà e haere mai, no te mea o tätou tera e hinaaro ra e faanaho, aita tätou e vaiiho ra ia î tätou i te aroha e te here o te Atua. E tià teie parau ta Teuteronomi e faahiti ra i te täuturu ia tätou, 5 e teie nei, e hinaaro atu òe i to Atua i te Fatu mä to âau atoà, e mä to värua atoà, e mä to püai atoà. Te auraa, te riro ra teie reo ei faaueraa i reira e ìtehia ai te tahi ôpuaraa e te vähi hoì e tïtauhia ra nä roto i taua ôpuaraa ra. Mai te parau tei haamanaò mai e, te vai ra te Atua, inaha, no te mea i parau te Atua, i ìtehia ai e, te vai ra te Atua, te märamarama atoà ra ia tätou e, aita te parau i faaìte noa mai i te tahi ôpuaraa, ua faaìte atoà mai rä i te Atua na na taua ôpuaraa ra. Ia nä ô rä tätou e, no te mea i parau te Atua, i ìtehia ai e, te vai ra te Atua, ua ìte atoà ia tätou e, te vai ra te taime aita te Atua i parau eere rä e, no roto te Atua i te parau i te püraa mai, inaha o ia iho te Parau. No reira, te parau tei faaìte mai i te Atua, te parau hoì tei ìriti i te ùputa o te märamarama, te parau atoà ia tei ìriti i te ùputa o te tau, tei riro te mahana hoê ei taiò mätamua. Aita ta te taata e parau i nià i te tau, to na rä te parau i mau i roto i te tau, inaha no roto o ia i te ânaìraa o te mau mea ta te Atua i faatupu i te mau mahana tätaì tahi o ta na i rahu, i faaorahia ai tätou e to tätou Fatu te Metia i te mea 27 Hoê roa a ana püpüraa i ta te taata atoà, ia na i püpü ia na iho ra. Te haapäpüraa noa mai ra te reira, aita te Atua i hau e aita hoì to na parau i rahi i roto i te âau o te taata, te mea ia i tae roa te tahi pae i te haapeàpeàraa i te Atua no te òreraa e vai iho noa mai ia rätou ia haapaò na i to rätou hinaaro, ia haere na hoì nä mua e haamau i te hau o te taata, ia oti, hoì mai ai e haapaò i te Hau o te Atua. A ui atu ai ia tätou e to vai te èà e haamaitaìhia nei. Ua ìte atoà rä tätou e, te faufaa o te parau, eere no te mea ua parauhia, no te mea rä ua faaroohia, e aita atu hoì e täpaò hau aè i te maitaì ei haapäpüraa e, ua faaroohia te tahi parau maoti rä, ia ìtehia te tupuraa o taua mea i faauehia e i parauhia. Te mea e ìtehia i roto i teie faaueraa, te rahi ia e te teiaha fäito òre o te òhipa e tuuhia mai i mua i te taata. Te vähi faufaa rä ta tätou e täpeà mai, te riroraa ia teie faaueraa ei räveà haaferuriraa ia tätou i nià i ta tätou iho huru hiòraa i te parau a te Atua. Ua färerei pinepine noa mai na tätou i te fifi mai teie i mua i te mau parau a Ietu. Mea pinepine roa Ietu i te faahiti i te tahi mau parau, âreà te auraa, tei te tahi ia vähi ê atu. Ua riro te reira ei faaararaa ia tätou ia òre ia piri noa i nià i te taò, ia tämata rä i te mau taime atoà i te hiò i te manaò e hinaarohia ra i te faaìte mai. Ia faaroo tätou i teie mau faaueraa a Ietu i te päpaìraa a Märeto, 30 E e hinaaro òe i to Atua i te Fatu mä to âau atoà, e mä to värua atoà, e mä to manaò atoà, e mä to püai atoà. O te parau teie i hau i mua. 31 E mai te reira atoà hoì te piti E aroha atu òe i to taata-tupu mai to aroha ia òe iho na. Aita atu ä parau e hau i te reira. Te märamarama ra tätou e, te vai ra te tahi òhipa e hinaarohia ra i te taata ia òre o ia ia faatautau i te rave. No reira, ia vai noa to tätou märamaramaraa  i te parau i nià i te mau faaueraa, e riro ihoä ia te taata i te parau e, ei te tahi atu taime feruri atu ai. To na rä òiòi, aore ra to na taere, ua riro atoà ia ei faaòiòiraa, aore ra ei faataupupüraa i te tupuraa o te ôpuaraa a te Atua. No te taata tei òre i tiàturi i te Atua, aita to te reira parau e fifi, e eere te reira i te òhipa na na no te taata rä tei färii i te ôpuaraa a te Atua, e riro o ia i te hiò mai te mea ra, ua tärahu o ia i te Atua, no te mea ua ìte e aita i rave, aita i faatupu. Mea tano ia haapäpühia i ô nei, te òhipa ta te Atua i faataa na te taata, eere no te mea noa e taata o ia, i riro ai teie ei täpura òhipa na na. E parau teie no te feiä tei ìte i teie parau, e no te mea ua ìte rätou, e òre ai e tià ia rätou ia ora noa mai te mea ra aita e òhipa i tupu. Te päpü atoà ra ia tätou e, i mua i te Atua, eita e tià i te taata ia haavare faaroo òre, no te mea, te ôtohe, e haapäpüraa atoà te reira e, ua ìte te taata i te tahi parau, aita rä i färii, aita i hinaaro ia haapeàpeàhia to na hau, te mea ia o ia i ìmi ai i te räveà faataa ê mai ia na, ia òre taua parau ra ia haapeàpeà maoro noa atu ä ia na.

Teraì òr. Faatura.