TE PAPA HAAMORI

TE PAPA HAAMORI

Aroharaa

Mai te hihi o te rā e tāhei nei i te fenua i to na mahanahana, te Atua atoà ia i te tāheiraa ia tātou i te mahanahana o to Na here e to Na aroha. E ia òutou atoà na te mahanahana o te  here Metua, O ia i Vai na, te Vai nei, e Vai ā e a muri noa atu. (Mai te peu mea pārahi te taata, e faatià ia i nià, e mai te peu mea tià te taata, e topa ia teie tuhaa)

Taùraa

Te âmui nei to mātou reo, i te reo o te pāpaì Taramo e nā ô ra e : Te parau hua nei te mau raì i to Oe hanahana e te Atua e, e te faaìte nei te òhipa ta to Oe rima i rave, te haapii nei te tahi ao i te tahi i te parau, e te faaìte nei te tahi ruì i te tahi i te ìte. Aore e ôrero, aore e parau, aore to rātou reo i ìteä, ua tae rā to rātou haruru i te mau fenua atoà, e ta rātou faaìteraa i te ôtià o teie nei ao… Ta mātou atoà ia haamoriraa ia Oe, mātou te taata ta to Oe rima i hāmani, ia Oe e to mātou haapūraa e to mātou ora, i to Oe Hanahana, to Oe Tura e te Moà e tāhei nei ia Oe, e te Atua Metua e. Haere mai, haere mai e te Atua Nui Tumu Tahi e, te  Tumu o to mātou parau, te Tumu o to mātou tiàturiraa, te Tumu o to mātou haapūraa vai tāmau. Te hei noànoà o to òe here Metua e tāmarū nei ia mātou to òe nūnaa iti. Haere mai i rotopū i ta òe mau tamarii, ia hoê to tātou manaò i te haamoriraa nei no te faahanahana i to Oe iòa Moà.

Himene

Faateni

E reo âmui no te mau tamarii no Moana Nui ātea e to te Ao atoà i te parauraa atu ia Oe e, faaroo mai e te Atua Metua i te reo faateniteni o te Huià ia Oe : E te Atua Nui Tumu Tahi e, te Atua o te raì e te fenua, te Atua o to mātou mau tupuna, te Atua o ta mātou e tiàturi nei. I pinaìnaì mai na to Oe reo i mütaa iho ra, E fano  A fano  A fano rā. A fano i te Hitiraa o te rā, a fano i te Tooà o te rā, a fano i Apatoèrau e i Apatoà, a fano i Raro i te Tumu o te fenua, te Tumu o te Ora. Tävevo mai na te parau i raro roa ra i te nā ôraa e : Te ìte

nei au, e tei mua ia ù nei te auraa o teie nei peu maere rahi. Tenā mai te fanauà ùnaùna na te Tumu, e haere mai e hiò i teie uru rāau i Taputapuātea nei. E tino ê to rātou, e tino ê to tātou, hoê anaè rā no te Tumu mai. E e riro teie nei fenua ia rātou, e mou teie nei haapaòraa tahito, e e tae mai hoì te manu moà o te moana, e haere mai e taìhaa i ta teie rāau i motu e faaìte nei. Pinaìnaì mai ra to Reo i te nā ôraa mai e : A Hiò e a Faaroo.

Himene

Haamanaòraa

Ietu e te faaroo o te taata I te roaraa o ta na tau òhiparaa i roto i teie nei ao, mea pinepine Ietu i te haamaitaì i to na Atua no te faaroo i noaa i te taata i roto i to rātou oraraa. I te rahiraa o te taime, òre noa atu ai paha te taata e ìte e, na to rātou iho faaroo e faaora ra ia rātou, pinepine Ietu i te haapāpū atu ia rātou e, aita atu e mea i ora ai to rātou iho maì, aore rā te maì o ta rātou tamarii maoti to rātou ia faaroo.

Na rēpera hoê àhuru

Te òhipa ia i tupu nō nā rēpera hoê àhuru i faaorahia. I nià i te èà rātou i te ìteraa e, ua ora rātou, ua mā te maì. Hoê rā i roto ia rātou o tei hoì mai e haamauruüru e haamaitaì i te Atua no te òhipa i tupu i nià ia na. To na òaòa i te hoìraa mai e fārerei ia Ietu no te faaìte ia na i ta na ârueraa, e ta na haamaitaìraa i te Tumu Nui. Teie ta Ietu i parau. Eere ānei hoì tino àhuru i tāmāhia nei ? Tei hea iho nei rā e tooiva. Aore roa te hoê i hoì mai e haamaitaì i te Atua, maoti rā teie nei taata ê. I teie taata Ietu te parauraa atu e : A tià a haere i to tere, ua ora òe i to òe faaroo.

Te vahine âti Tanaana

Te parau no te vahine âti Tanaana tei tià atu i mua ia Ietu no te rahi o te maì o ta na tamahine, ta Ietu i parau atu e, Eita te māa a te tamarii e tano ia tītirihia na te ûrī. Aita roa atu rā te teimaha o teie toparaa reo to Ietu i haaparuparu iti noa aè i teie mētua vahine. No teie metua vahine, ta na noa i ani te huà rii māa no raro aè i te àmuraa a to na Fatu.

I te reira fāito hopeà o te haèhaa i tae roa ai Ietu i te parauraa atu e, E teie vahine, e faaroo rahi to òe, e ta òe i hinaaro ra, ia na reirahia òe.

Te Faaroo, o tātou ia e to tātou Atua. No te faaroo i tiàturi ai, e no te tiàturiraa i tāmau ai i te faaroo, e no te naìnaì o te faaroo e ora ai tātou.

Himene

Fāìraa faaroo

Ia òre te fanauà manu ia faaruè i te ôfaaraa, e aha o ia e ìte ai i to na parau ei manu, ia òre te tama ia faaruè i te rima o te metua, e aha o ia e ìte ai i te tiàmäraa o te tamarii a te Atua. Ia òre mātou ia haafätata faahou i te fenua, e aha mātou e ìte ai e, na roto i te fenua, te haapii noa mai nei Oe ia mātou i te ora. E te Tumu Nui i te raì tua tinitini e, te Fatu o te raì e te fenua, teitei noa ai te raì i to na teiteiraa, mai te pū fenua tei pūòhu i te tama i roto i te ôpū o te metua vahine, te hana atoà ia o to Oe here metua i te pūòhuraa e te faaherehereraa ia mātou. E te Atua Nui Tumu Tahi e, o Oe te Tumu, o mātou te ohi, o mātou ia i Māòhi ai. Te aroha e te here, te faufaa ia ta Oe i hōroà na mātou, o Oe te reira, e o Oe hoì ra, o mātou ia, ta Oe i hāmani i to Oe huru e i to Oe hohoà. Ua tanu Oe i ta Oe faufaa ora i roto i to mātou fenua iti, te mea ia Oe i ani ai ia mātou, a Hiò i tei au ei māa, a rave e a àmu. Te fanauà rii honu, aore e maiaa i haapii, ua faaroo rā rātou i te reo o te miti. Te rāau o te fenua, èie ua tiàtià i mua i to Oe Teitei, no te faateniteni i to Oe iòa moà. Te ôtaha e rere te tāhuhu o te raì, te haamaitaì ra ia Oe. Tuu mai i te haèhaa i to mātou âau, ia faarii hope roa mātou i to mātou Māòhiraa, ia here i ta Oe faufaa ora, e ia ìte mātou i te haamoriraa e au i to Oe Hanahana. E te Metua e, ua hapa mātou ia Oe, o mātou e ruri ê noa nei i ta Oe Parau. To Oe aroha e to Oe here, tirā rā mea e faaora ia mātou. Ua tono mai Oe i to Tamaiti, to mātou Fatu o Ietu Metia, no te faaìte ia mātou i ta Oe ôpuaraa ora, to Na rā pohe ta mātou i faahanahana, i te ìmiraa i te ora i roto i te pohe, ta mātou i faariro ei tumu no to mātou ora, aita rā i haamaitaì ia Oe no te aroha i riro mai ei taata. Nā roto i te fānauraa pū fenua o Ietu, te tiaì nei Oe ia mātou ia tätarahapa e ia faaroo ia Na, faariro atu ra mātou i te reira ei faatiàraa àamu na mātou, o mātou ia e haafänau noa nei ia Na ia òre ia naeàhia i ta Oe faahaparaa. E te Tumu Nui e, o Oe te Atua, o mātou te nūnaa. Faatīoi Oe i to mātou aro i nià ia Oe, faahoì ia mātou i te âià, faahoì ia mātou i te fare metua, tāhoê i to Oe nūnaa ta Oe i māìti no te haamori e te faateniteni i to Oe iòa moà, faatià faahou ia na, ia  ìte o ia i te ora ta Oe i faaherehere no na. Ia faaàrepu to Oe Vārua i to mātou âau ia ìte e ia färii mātou e, te faaroo Māòhi mau, te mea noa ia e faaora ia mātou. Mai te fenua e tāmā i te huero e te ohi, tāmā mai ia mātou, ia tià mātou i mua i to Oe aro mai te rāau e tupu i te hiti ânävai. Faahoì faahou mai i te ùnaùna o teie rāau ta Oe i tanu i rōpū i teie moana rahi, ia riro ei poupouraa na Oe, mai teie nei e a tau e a hiti noa atu. Amene.

Himene

Taiòraa

Himene

Faaitoitoraa + Tumu Pure

Himene ôroà

Oroà a te Fatu

Himene hopeà

Faaitoitoraa/Haamaitaìraa

E to mātou Metua i te Raì Tua Tinitini e, ènā atu te hei o te here e te aroha, ènā atu te hinuhinu e te tura o te Māòhi. Enā atoà atu te Faroo Māòhi mau. Mauruüru i to òe âmuiraa mai i te haamoriraa nei. Ia Oe i hanahana ai ta mātou nei haamoriraa. Hoì noa ai òe i roto i to òe nohoraa tāmau i te Raì Tua Tinitini, te vāhi e òre ai òe e naeàhia e te ìno. Vai iho mai òe ia mātou i roto i te rima o to mātou metua vahine, e na na e hii ia mātou i to na here metua. E to te hui faaroo, e haere òutou i teie nei, a haere ma te Faaroo Māòhi mau, a haere ma te here e te aroha o te Atua. Teie to Na reo ia tātou, a haere ma tenā na faaroo i roaa ia òutou. Ia ora na.

Te Oroà a te Fatu

Te Oroà a te Fatu

Te parau i haamau i te ôroà I teie taime e faatià ai tātou i te ôroà a te Fatu. A haamanaò na tātou i to na reo e nā ô ra e, eiaha e manaò e i haere mai au e faaòre i te ture e te mau perofeta, aore au i haere mai e faaòre, e faatià rā. Te auraa, i haere noa mai te Tamaiti e faatià i te parau a te Metua. Ta tātou atoà ia e faatià nei, i teie nei mahana. A faaroo faahou na rā tātou i te mau parau i haamau i te ôroà. E te tāmāa ra rātou, ua rave iho ra Ietu i te färaoa, e oti aè ra te haamaitaì i te Atua metua, vävähi iho ra, tuu atu ra i ta na mau pipi ra, nā ô atu ra, A rave a àmu o ta ù tino tenā. Ua rave iho ra i te âuà, haamaitaì atu ra i te Atua metua, tuu atu ra i ta na mau pipi ra, nā ô atu ra, a rave a inu, o ta ù toto tenā, e toto no te faaauraa âpī, tei haamaniihia no te taata e rave rahi, ia matara te hara. Haamanaò tātou e, te ôroà, to te taata ia haamaitaìraa e to na faahanahanaraa i te Atua Nui Tumu Tahi, no te parau maitaì o te here e te aroha o te Atua ta te fenua e faaìte noa ra, aore e mahana tuua. Tano roa ai terā reo to te Atua metua e nā ô ra e, a hiò i tei au ei māa a rave e a àmu. Ta te Tamaiti e haamanaò atoà mai ra i te nā ôraa e, a rave a àmu a rave e a inu. Te parau ta te Tamaiti i haere mai e faatià oia te faaauraa âpī, teie ia, O vau tenā oia hoì, tenā māa ìò aore ra tenā māa pape e o vau, hoê āia. Te here e te aroha o te Atua metua i riro mai ei hotu no te fenua, e te here e te aroha o te Atua tei riro mai ei taata, hoê ā ia, e tupuraa no te tiàmaraa o te Tumu Nui.

Te haamaitaìraa a te Fatu o te ôroà (Tià paatoà i nià).

No te māa ìò : Haamaitaì mātou ia Oe e te Atua Metua, i te mea i roto i to òe tiàmaraa, ua māìti òe i te mau mea maamaa, te mau mea haèhaa i Māòhi Nui nei, mai te färaoa, te taro, te ùru, te uto… ei faaìteraa mai i to òe here e to òe aroha ia mātou. Te tià atu nei mātou, mā to mātou faaroo Māòhi mau i mua i ta òe ôpuaraa faaora, te aroha e te parau mau ua fārerei rāua, te parau tià e te hau ua hohoì rāua. No te māa pape : Haamaitaì mātou ia Oe e te Atua Metua, i te mea i roto i to òe tiàmäraa, ua māìti òe i te mau mea maamaa, te mau mea haèhaa i Māòhi Nui nei, mai te uaina, vai haari, vai täporo… ei faaìteraa mai i to òe here e to òe aroha ia mātou. Te tià atu nei mātou, mā to mātou faaroo Māòhi mau i mua i ta òe ôpuaraa faaora, te aroha e te parau mau ua fārerei rāua, te parau tià e te hau ua hohoì rāua. Ia hope te àmuraa e te inuraa : Haamaitaì mātou ia òe e te Atua metua, o Oe i òre i pïpiri i to òe here ia mātou, òe i māìti i to mātou fenua iti ia Māòhi Nui, ei vāhi tupuraa ùnaùna no to òe aroha, o ta mātou ia i faarii òaòa aè nei. Oe atoà rā i māìti i te nūnaa Māòhi ei tupuraa hanahana no ta òe ôpuaraa faaora. Ia Oe ā ta mātou faateniteniraa e ta mātou faahanaharaa, mai teie nei e a tau a hiti noa atu.

Mahana mätamua Tei haamā ra, ua huna ia i te Atua, tei fāì ra i to na faaroo, ua faarii ia i te ora. -Pehepehe

Tāpati 6 no Tēnuare 2019

Mahana mätamua

-Tumu parau : Tei haamā ra, ua huna ia i te Atua, tei fāì ra i to na faaroo, ua faarii ia i te ora.

-Pehepehe

HIROHITI

Te märama i èeva i te tua o Tireo

Ua hiro nā hiti i te taha o Rumia,

O Hirohiti ia pō  a rire, a pōpō.

Ua huriarepo te ohi i te piiaraì,

Mahutahuta aè nei te ià i te tapi ìriatai.

E rohipehe nui o Hirohiti i nā tara i toroaraì.

A hiro nā tara, a hiti faatara i te rohi a Hirohiti,

E faateni tārava na Fenua ruperupe ia Tumu Nui

Ua hipa verovero te fetià i te maremareatai,

A rire to te raì, a pōpō i te faateni atua a Fenua ruperupe.

Ua tatari märama to te fenua e to te raì ia Hirohiti,

Tahi nei pō a tū i te tape ìriatai, tahi a māhu te ora tini.

Aore e ôrero i varovaro, aore e rautī i pinaìnaì,

Ua hiro tahi rā te ohi mā te tumu i te reo o Hirohiti,

Ua hiti tahi te ià ma te àta i te aro o Hirohiti.

16 Mahana mātāmua

Te mau taiòraa

-Ruta Ev 11, 37 – 44. (46) vāhi hopeà : te tuu na hoì òutou i te hopoià maraa òre i nià i te taata, e òre roa hoì te hoê rima o òutou na e faatiàià noa atu i taua mau hopoià ra.

-Amota 5, 24 : Ia huri noa mai ra te parau au mai te pape ra, e te Parau Tià mai te pape tahe ûàna

Te manaò tauturu

I roto i te Ruta èv 11, 46 vh  te tuu na hoì òutou i te hopoià maraa òre i nià i te taata, e òre roa hoì te hoê rima o òutou na e faatiàià noa atu i taua mau hopoià ra. Te pūai o te mau Färitea, te mau Pāpaì Parau, te mau Haapii Ture, rau noa atu ai te tiàraa o teie mau taata i roto i te faaroo Ati Iuta, tei nià i te vaha te pāpaìraahia, eiaha rā i roto i te ôpū. Mai terā i parauhia e te Atua i nià ia Ìtaia, e parau i mua i te nūnaa Ìteraèra i te nā ôraa e « Te fātata mai nei to rātou vaha ia ù, âreà to rātou âau, tei te ātea ê ia ». Te auraa, te faanahoraa i ô nei, haamau i te tahi arataìraa e tano na te tāatoàraa, muri mai hiò atu ai rātou, na vai e haamata i te rave. To na tanoraa mau, te parau o te Ture, na rātou e haamata i te rave, no rātou teie parau, hou a topa atu ai i roto i te nūnaa. Te pāpū atoà ra ia tātou e, i ô nei, vaiiho na te nūnaa e faaòhipa i teie Ture Ati Iuta, ua fifi anaè, e faahapahia ia, ia hape anaè, e faautuàhia ia. Ia haapaò anaè te nūnaa i ta verā Ture, eita e ìte faahou i te nūnaa, to rātou anaè hanahana te ìtehia mai, te roo o teie mau arataì o te nūnaa faaroo Ati Iuta te pārahi i mua roa e i te vāhi teitei, ia ìtehia mai i te vāhi taata. Te nā ô ra te tahi parau e, Ia

Mahana mātāmua 17

òre ia maraa te òhipa ia òutou, vaiiho mai na mātou e rave, ia òre to òutou rima ia tāfetafeta. Mai te mea, eita òutou e haere, vaiiho na mātou e haere, ia òre to òutou âvae ia puta i te pohe haavare. Mai te mea, eita òutou e parau, vaiiho na mātou e parau, ia òre to òutou vaha ia î i te hora pāpua. Âuē ia nūnaa i te aroha ē… Te nā ô ra te Amota pene 5 ìrava 24 : « Ia huri noa mai ra te Parau au mai te pape e te Parau Tià mai te pape tahe ûàna », Te nā ô atoà ra te tahi huriraa « Te haavāraa, e au ia mai te tahi haapahuraa pape, faaū i te mau ôfaì rarahi, tahe atu ai i to na vairoìroi, âreà te Parau Tià, mai te vaipuè ra i te pūai, eita e noaa ia tinai atu ». E maha tau parau rii e tano tātou ia tütonu maitaì, te vai ra  te Parau au e te Parau Tià » te vai atoà ra « te Pape e te Pape tahe ûàna ». I roto i te tohu na Amota, i terā ra Tau, ua pātoì te Atua i te huru haamoriraa a te feiā faaroo, haapaò noa i ta rātou Parau Au, aita rā i haafānaò i te tahi pae. Te haapūai nei rātou i nià i te Parau Tià, mai te pape tahe ûàna, aita rātou e ìte ra i te feiā e tāumiumi-noa-hia ra i roto i te haavare. E huru terā o te tahi taata faaroo, taata pāpū te pure, pāpū atoà i roto i te haamoriraa. E tere pure ihoā paha to rātou, e moè-atoà-hia na i te taata faaroo, i te feiā atoà e âua haaàti ra ia na, mai te feiā i roto i te àti ānei, te feiā veve ānei. Eita atoà paha teie taata e parauhia nei, taata faaroo, e ìte rā i te faatura òre o te taata i te Rahu a te Atua.

Te onoöno nei o Amota, ia tupu te tüàtiraa i roto i te Haamoriraa e te Rahu a te Atua, e faatupuhia ra e te Parau Tià. Te auraa, ia tāhoê anaè te taata faaroo i roto i na òhipa, te haapii atoà mai ra, nā hea i te faaroo i te auē o te feiā riirii e te piiraa a te feiā i

18 Mahana mātāmua

roto i te hāmani-ìno-raa. Ua tae anaè te taata i nià i te reira faanahoraa, e aha atu ā ia te auē e te hāmani ìno a te taata i te Rahu a te Atua. Hoê ā ia i te parau no te Māòhi, e ìte te Māòhi ia na i roto i terā parau no te faaroo, âpeehia e te Rahu a te Atua, te Mätahiapo o te Māòhi. E e riro hoì te reira, ei teòteòraa na na i mua i te taata e i mua atoà i te Atua. Te auraa, aita te peu tumu a te tahi nūnaa, eere i ta te Atua. E tano rā e parau, te peu tumu, e parau atoà ia, no te taata, Faaroo Māòhi Mau. Ia ora na.

Te Pure

Haamaitaì mātou ia Òe e te Atua Metua, Te Tumu hoê roa no te mau mea atoà, te Puna no to mātou ora. Òe i faaìte ia mātou i to Here Metua i te nūnaa Māòhi, i teie hepetoma no te Hoêraa o te mau Marumetia i teie mätahiti âpī 2019. Haamaitaì mātou ia Òe e te Tamaiti a te Tumu, tei pou mai, e tere fārerei te taata, tauturu, faaitoito, ia òre te àti rau ia īri i nià ia na. Te fānaò nei te feiā i pārahi fātata ia Òe, ia fānaò atoà mātou i te reira maitaì, noa atu, aita to mātou mata i ìte ia Òe. Haamaitaì mātou ia Òe e te Vārua Maitaì, tei òre e faaea i te ninii i te Parau Tià i roto i te ao o te taata hara. Te tätarahapa nei mātou i mua ia Òe, o mātou i òre i faaroo i to Òe reo, e te òreraa e faatupu i ta Òe Parau. Täpiri atu ra mātou i te ùputa o to mātou âau, mata ê atu ra i te täuaro. Te haamori nei mātou ia Òe, mai te taata faaroo haapaò maitaì i mua i te mata o te taata, ma te ìte òre, tei nià atoà to òe Mata e te Tumu Nui i te taata. Te faahaèhaa nei mātou i mua ia Òe, e te ani nei ia Òe, ia aroha mai ia mātou, e a faaòre mai i ta mātou Hapa. Te ani nei mātou ia Òe, a faatoro mai i to Òe rima faaora, no te ìriti mai ia mātou te nūnaa Māòhi tei topa i roto i te âpoo, faaineinehia e te feiā maraa òre te òhipa. Eiaha mātou ia pārahi noa i roto i te pōuri, ia hiti-faahou-hia mātou e te māramarama no te Ora e te Here. Ia hoì faahou mai te huru e te hohoà ta Òe i hinaaro no mātou te Māòhi. E te Tumu Nui e, no Òe te hanahana, mai teie nei, e a tau a hiti no atu. Amene.