Märeto 8,27-35 Faaruè

Täpati 16 no Tetepa 2018.

Faaruè

Taramo 116

1 E hinaaro rahi to ù i te Fatu, o tei faaroo mai i ta ù reo e i ta ù i ani atu. 2 No te mea ua färiu mai o ia i ta na tarià ia ù nei, e tiàoro ä vau ia na e mure noa atu to ù nei aho. 3 I haapunihia vau e te märei ra o te pohe; i haaàtihia vau e te ahoaho o häte; i roohia vau e te àti e te mäuiui. 4 Ua tiàoro iho ra vau i te iòa o te Fatu, te pure nei au ia òe E te Fatu e, e faaora na òe i ta ù värua nei 5 O te hämani maitaì e te parau-tià ta te Fatu, oia ia, ua î to tätou Atua i te aroha.6 E tiaì mai te Fatu i te feiä haavare òre; i tuu-haèhaa-hia vau, e ua faaora o ia ia ù. 7 E hoì, e ta ù värua, i to òe ra faaearaa, ua hämani maitaì mai te Fatu ia òe. 8 Ua faaora òe i ta ù värua i te pohe, e ta ù mata i te òto, e ta ù âvae ia òre ia hià. 9 E hahaere ä vau i mua i te Fatu i te fenua o te feiä e ora nei. 10 Ua tiàturi au i te Fatu i parau ai au Ua rahi roa iho nei to ù pohe 11 E ua parau hoì au i ta ù rüraa ra E haavare anaè to te taata atoà nei 12 E aha rä ta ù ia hopoi atu na te Fatu, i te mau hämani maitaì no na ia ù nei 13 E rave au i te âuà ora e hopoi i nià a tiàoro ai i te iòa o te Fatu. 14 E faatupu vau i ta ù i èuhe i te Fatu, i teie nei i mua i te aro o to na atoà ra mau taata. 15 E mea taoà i te aro o te Fatu te pohe o to na ra mau tävini moà. 16 Oia mau, e te Fatu, no te mea o vau to òe tävini, to tävini e te tamaiti a to tävini vahine Ua matara ia òe to ù nei mau täpeà. 17 E hopoi au i te tahi tütia haamaitaì ia òe, a tiàoro ai au i te iòa o te Fatu. 18 E faatupu vau i ta ù i èuhe i te Fatu, i teie nei i mua i te aro o to na atoà ra mau taata, 19 i roto i te mau àumoa i te fare o te Fatu ra, i rotopü ia òe, e Ierutarëma e. Hareruia.

 Ìtaia 50,5-9

5 Ua haafätata te Fatu ra o te Fatu i ta ù tarià, e aore hoì au i pätoì atu; aore hoì au i ôraì tià i muri. 6 Ua tuu noa atu vau i ta ù tua i te feiä i täìri mai e ta ù päpärià i te feiä i huhuti i te ùmiùmi; aore hoì au i huna ê atu i te vahavaha e te tufatufa haere. 7 E tauturu mai ä te Fatu ra o te Fatu ia ù; i òre ai au i haamä ai; i haamau ai au i ta ù mata mai te ôfaì ra; ua ìte hoì au, e òre au e haamä. 8 O te tià mai ia ù nei, te fätata nei ia o vai te märô mai ia ù. Tià atoà mai o ia mäua atoà: o vai ta ù ènemi. Tii mai o ia e rave ia ù nei. 9 Inaha, na te Fatu ra nä te Fatu e tauturu mai ä ia ù, O vai te faahapa mai ia ù nei? Ìnaha e marau rätou mai te àhu nei, e pau rätou i te manumanu.

Iatöpo 2,14-18

Te faaroo e te òhipa

14 E aha te faufaa, e a ù mau taeaè, ia parau mai te hoê e, e faaroo to na, e aore a ana e òhipa, e ora änei o ia i te faaroo. 15 Ia pohe hoì te hoê taeaè, e te hoê tuahine i te veve, e aore e mäa i te mau mahana atoà ra, 16 ia parau atu rä te hoê o òutou ia räua ra Ia ora na i te haereà, ia mähanahana hoì òrua, e ia paìa hoì, aita rä i horoà atu i te mea e maitaì ai te tino ra; e aha to reira faufaa. 17 Oia atoà te faaroo, aore e òhipa ra, e mea pohe ia, i te mea te vai hoê noa ra. 18 E tià noa hoì te hoê taata ia parau mai ia na e, E faaroo to òe, e òhipa hoì ta ù. A faaìte mai na òe i to òe faaroo, aore e òhipa ra, a faaìte atu ai au ia òe i to ù faaroo i ta ù nei òhipa.

Märeto 8,27-35

Te fäìraa Pëtero ia Ietu ei Metia

(Mät 16,13-20; Ruta èv 9,18-21)

27  Haere ê atu ra Ietu e ta na mau pipi atoà i te mau ôire rii i Taitarea Firipi ra, ua ui atu ra o ia i ta na mau pipi i te èà tià, nä ô atu ra ia rätou O vai au nei i ta te taata nei parauraa. 28 Ua nä ô mai ra rätou O Ioane päpetito ta vëtahi, o Èria ta vëtahi, e o te hoê i te mau perofeta ra ta vëtahi. 29 Ua parau atu ra o ia ia rätou O vai rä vau nei i ta òutou parau Ua parau mai ra Pëtero ia na, nä ô mai ra O te Metia ia òe. 30 Ua aò atu ra o ia ia rätou, e eiaha roa e faaìte i te taata i taua parau no na ra.

Te faaäraraa Ietu i to na pohe e to na tiàfaahouraa

(Mät 16,21-28; Ruta èv 9,22-27)

31 Ua tämata atu ra o ia i te faaìte ia rätou e  E rave rahi to te Tamaiti a te taata pohe, e e faaruèhia e te feiä paari, e te mau tahuà rarahi, e te mau päpaìparau, e e täparahi-pohe-roa-hia, e ua ruì toru anaè e tiàfaahou ai i nià. 32 I parau faaìte hua atu ra o ia i taua parau nei. Ua rave atu ra Pëtero ia na ôpaì aè ra i te hiti, ua aò atu ra ia na. 33 Ua färiu mai ra rä o ia, ua hiò mai ra i ta na mau pipi, ua àvau mai ra ia Pëtero, nä ô mai ra E haere ê òe, Tätani e, aore hoì òe i au i ta te Atua ra, o ta te taata nei rä ta òe i au. 34 Ua parau atu ra o ia i te mau taata atoà, e ta na ra mau pipi, nä ô atu ra o ia ia rätou. Te taata i hinaaro i te pee mai ia ù, e faaruè o ia ia na iho, e rave i ta na tätauro, a pee mai ai ia ù. 35 O tei hinaaro hoì i te täpeà i to na ora, eere ia i te ora; e o tei tià ia na i te tuu i to na ora ia ù e te Èvaneria nei, e ora ia to na.

Manaò.

Te vaamataèinaa e faaäu i to na parau i te aa o te tumu raau, te vai ra te aa e toro i te àoào, te vai ra te aa e âfaro tià noa i raro, teie aa e parauhia i te tirioe, e aa ìmi päpe ia vai haumi noa te fenua tei horoà i te itoito te ruperupe, te hotu i te tumu raau. Te türamaraa ia e faaàmahia nei e na taiòraa e maha ia òre te nünaa ia ihu i roto i to na tiàturiraa, mai te mau faatïanianiraa tei tärehua i to na feruriraa e aore ra tei haapöirihia e te pee aore noa i to na èà, ma te tumu òre. Ia haere ra ma te nevaneva òre, ma te ôtohe òre, e ma te faaroo òre, ia ìte to na ora i roto i te parau no te vaamataèinaa i te fenua i hii mai ia na. Ia òre te nünaa ia aniania i te mau haavare i te hanahana tura òre, aore e mëharo oia hoì, te vähi i roto i te âau i reira te taata e haaputu ai i te mau mea atoà ta na i ora mai, ta na i ìte mai, aore e mëhara te huru ia o te taata të òre e moèhia ia na te maitaì i ravehia no na eiaha rä ia e maerehia. E manaò mai änei te mau âmaa e mono i te aa tirioe eere i to na, te faahoì nei teie parau i te toàpü e ôfaì teie i roto i te moana ta te taata e tïtau ia ora oia atoà te hiroà oi vaivai aè te ora e te märamarama o te nünaa, Te fenua, te iho tumu, e te Atua, te ora ia o te nünaa. Ta teie ia mau ìrava e faaìte nei,

-Taramo  116, 12 E aha rä ta ù ia hopoi atu na te Fatu, i te mau hämani maitaì no na ia ù nei.

-Ìtaia 50, 7 E tauturu mai ä te Fatu ra o te Fatu ia ù.

-Iatöpo 2, 18 A faaìte mai na òe i to òe faaroo, aore e òhipa ra, a faaìte atu ai au ia òe i to ù faaroo i ta ù nei òhipa.

-Märeto 8, 34 Te taata i hinaaro i te pee mai ia ù, e faaruè o ia ia na iho, e rave i ta na tätauro, a pee mai ai ia ù.

E mau ora teie e tupu nei i roto i te vaamataèinaa, hopoi, tauturu, òhipa, pee, e mau taò tämahana teie e färereihia nei i te mau taime atoà. I roto i na taiòraa e maha taime roa te mau täuàparauraa e te mau märöraa,  te ìtehia nei, te mau manaò te tià e faatïtïàifaro nä roto i te hoê Faaora Nui. Mai te mea ra te tütonu nei te manaò i nià i te Metia e ta na ôpuaraa no te faaäuraa, ei pü no te faaroo. Te faufaa ia e ìtehia nei i roto i te mau parau i te faahitiraa a te Taramo 12 E aha rä ta ù ia hopoi atu na te Fatu, i te mau hämani maitaì no na ia ù nei. Ei hopoi na te Atua no te täatoàraa o ta na rahu. I roto i te Atua Nui Tumu Tahi Te pii nei o ia i te mau taata atoà ia haaparare i te mea tià e ia ìte i te hämani maitaì. Te hinaarohia nei te taata i te tävini ei hopoiraa i te mea maitaì no te faatupu i te hau e no te ìriti i te ùputa i te oraraa âpï i te iòa o te Atua. Tei ärataìhia e te Värua Maitaì i nià i te èà no te hämani maitaì i to na ra iòa, i te mea e parau rü teie. Te hämani maitaì i teie parauraa te riroraa ia te òhipa i ravehia i taua tau ra ei räveà e tiàmä ai te taata tätaì tahi i te pae o to na feruriraa, te paeàu o ta na faaìteraa i to na manaò, e i te paeàu o ta na oraraa i te hinaaro o te Atua Nui Tumu Tahi ia na. Oia atoà ia teie parauraa a Ìtaia 7 E tauturu mai ä te Fatu ra o te Fatu ia ù. E parau maitaì teie, i roto i te tupuraa o te ôpuaraa a te Atua Nui Tumu Tahi, te auraa, i roto noa i te òhipa i oti i te ravehia e roaa ai to tätou märamarama i nià i ta te Atua huru arataìraa i ta na òhipa. Te paari o teie parau tauturu, te mea ia i òre i märö i òre i onoöno  i te Atua, i te tïtauraa i te tahi pähonoraa, te tahi tatararaa, ei tämarü te peàpeà, te mea atoà e òre i faahapa i te Atua i te faaruèraa i roto i te àti. Eere änei e, e teitei rahi to te raì i to te fenua, e ärea rahi të faataa ê nei i te manaò taata i te mea tei au i te ôpuaraa a te Atua. Te mea mau rä te reira i orahia mai, i te färiiraa e, te vai ra te mea të òre e roaa i te manaò i te haamahorahora. Mai te mea atu ra e, te faaruèhia nei te oraraa i roto i te rima o te Atua, tei òre i faanaìnaì i te taata i teie huru parauraa, i te manaòraa e, eita e tiàhia i mua i te rahi o te Atua, no reira, mea maitaì aè teie huru parauraa e tauturu. Oia mau, ia taiò tätou i teie papaìraa a Iatöpo, 18 A faaìte mai na òe i to òe faaroo, aore e òhipa ra, a faaìte atu ai au ia òe i to ù faaroo i ta ù nei òhipa. Teie huru parauraa te feraòraò nei te âau o te taata i to na faaroo e ta na òhipa, e teie atoà parauraa e, Oia atoà te faaroo, aore e òhipa ra, e mea pohe ia, i te mea te vai hoê noa ra. E tano tätou ia parau e, te mau àti te tià e haaparuparu, e tià, e riro mai ei püai tei horoà i te itoito no te haereraa i mua, e te òreraa e pärahi i roto i te peàpeà. Mai te peu e ôpuaraa ta te Atua, e tuhaa atoà ta te taata i roto i te tupuraa o te reira ôpuaraa. Ore noa ai te taata e märamarama i te auraa e te tumu te àti i täìri noa na i te taata, nä roto i te färiiraa i te haere i mua, aore ra te òreraa e faatautau, ua faaòhie te reira i te tupuraa o te ôpuaraa a te Atua. Mai te paruparu o te pape tei ü i nià i te tahi ôfaì, te tahi patu, e tei tere i te vähi ta te patu i türaì ia na mai te mea e, to na ihoä ia tereraa mau, mai te reira atoà teie parau faaìte mai e faaìte atu vau i te tanoraa i nià i te patu o te pohe tei faahuru ê i te tereraa o te oraraa. Aita te pape i pahü, aita e haruru i faaroohia, e inaha, èrä e àhehe atu, mai te neva òre mai. Te huru mau ia o teie faaìte mai faaìte atu tei täpeàhia i roto i te òhipa tei tere, tei ìritihia te mea tei riro ei òaòaraa no te faaroo, tei òre rä i faaea. Ia parau o Ietu e, 34 Te taata i hinaaro i te pee mai ia ù, e faaruè o ia ia na iho, e rave i ta na tätauro, a pee mai ai ia ù. Te faaruè e parauhia nei te mau mea ia e faateimaha ra i te raveraa

Mai te peu te hiò nei tätou i te parau o te hinaaro, te faaruè ia na iho, a rave, a pee mai mea maitaì tätou ia päpü rii atoà i te auraa o te mau taò ta tätou e faaòhipa nei, ei räveà e araära rii atoà ai i roto i to tätou manaò te òhipa e rave ei faatupuraa i te reira parau. Ua ìte tätou e, e moè te uru haari i muri mai i te haari hoê, eita änei te hinaaroraa e moè atoà i muri mai i te hinaaro  eita änei ta tätou hiòraa i te hinaaro e haamoè atoà i te faufaa o te hinaaroraa. Hoê ä paha tumu to teie nä taò, eere rä hoê ä manaò ta räua e faaìte ra, eita hoì te tahi e tano e mono i te tahi. E tumu hoê te uiraa a Ietu i ta na mau pipi, ua moè  o Ietu i te mau pähonoraa a te mau taata no roto i te vaamataèinaa, e ua moè atoà te Atua Nui Tumu Tahi. Ta Pëtero o te Metia òe, i teie parauraa e tämata o Ietu e faaìte i te tahi mau parau no to na mau àti to na pohe e to na tiàfaahouraa e haapeàpeà teie mau parau ia Pëtero. Ìriti o Ietu i te ùputa no te parau o te taata e hinaaro e pee ia na, e rave i ta na tätauro. E parau ia tätou e, te tätauro e tupuraa òhipa ia òreraa tätou i hinaaro i te haere i mua, nä roto i to tätou faaearaa mai, na te tätauro e faaî i te ärea i vai mai i mua ia tätou, a riro atu ai te reira ei ärai ia tätou i te ìteraa i te here o te Atua. Te märamarama ra ia tätou e, nä roto i te faaotiraa ta tätou e rave i te haere i mua, na tätou e faaî i te ärea i vai-iho-hia mai e te feiä ta tätou i here, aita atu ra te pohe e täpoì i to tätou mata.

Teraì òr. Faatura.