Papa Haamori. ÔROÀ Tumu Räau Tāpati 02 no Më 2021

 

Tāpati 02  no Më 2021.

Papa Haamori.

ÔROÀ

Tumu Räau

Taùraa.

E taù tätou i te Atua, e tià mai tätou.

2 E ta ù Atua, e ta ù Atua, e aha òe i faaruè mai ai ia ù? E aha òe i faaätea ê atu ai i te tauturu ia ù nei? E te haapaò òre mai i to ù nei ûuru? 3 E ta ù Atua, te tiàoro nei au i te ao, aita rä òe i parau mai; e te ruì hoì, aita rä o ù e mäpuhiraa aho. 4 Òe rä Tei Moà ra, e tei pärahi i roto i te haamaitaìraa o Ìteraèra. 5 I tiàturi na to mätou hui-metua ia òe, ua tiàturi rätou, e ua faaorahia rätou e òe; 6 ua tiàoro rätou ia òe, e ua faaorahia; i tiàturi na ia òe, e aore i mäheahea.

Haamaitaì i te Atua i te hoê reo himene.

 

Himene.

Pärahi tätou

 

Taramo 22

Teie te parauraa a te Taramo ia tätou i teie mahana.

1 Na te Mënätehe, i nià i te Àireta Tahara. Taramo na Tävita. 7 E toè rä vau nei, eere i te taata, e faaìnoraa na te taata, e ta te taata ia tähitohitoraa. 8 Te feiä atoà e hiò mai ia ù nei, te àta tähitohito mai ra ia ù; ua fäita i te ùtu, e ua ueue rätou i te upoo. 9 Te na ô mai ra rätou: Oia nei, te tiàturi nei ia i te Fatu, ia faaora o ia ia na; tii mai o ia e haru ia na. Inaha, e here hoì o ia na na 10 Na òe au i rave mai mai roto i te ôpü, o to ù ia tiàturiraa, a òte ai i te ü o ta ù metua vahine ra. 11 Ua tuuhia atu vau ia òe mai ta ù fänauraa mai ä; o ta ù Atua hoì òe mai te ôpü mai ä o ta ù metua vahine. 12 Eiaha e faaätea ê atu ia ù, ia fätata mai te àti ra; e aita atu e tauturu ia tauturu mai 13 E rave rahi te puaatoro e haaàti mai ia ù nei; te mau puaatoro àito o Pätäna teie e haaàti mai ia ù nei. 14 Te hämama mai ra to rätou mau vaha ia ù, mai te riona ûuru ra ia ìmi i te mäa.15 Mai te pape e niniihia ra vau, e ua paruparu ta ù mau ivi; mai te täpau nei ta ù âau, ua tärapape i roto i ta ù ôpü nei. 16 Ua marô to ù püai mai te àraea a te pötera ra; ua piri ta ù arero i ta ù taa; e ua tuu òe ia ù i raro i te repo pohe ra.17 Ua haaàtihia vau e te ùrï ra; ua haapunihia vau i te âmuiraa taata ìno ra; ua puta o ù puè rima e o ù puè âvae ia rätou. 18 E taiò noa vau i o ù mau ivi. Te hiò mai ra rätou, te tiàtonu mai ra ia ù, 19 ua tufa rätou i ta ù mau àhu ra no rätou, e te haa-maìri-terero nei i ta ù pereue. 20 Eiaha òe, e te Fatu, e faaätea ê atu ia ù nei; e ta ù püai, ia peepee mai òe i te tauturu mai ia ù. 21 E faaora òe ia ù i te òè nei, eiaha vau ia riro i te püai o te ùrï. 22 Ia ora vau i te vaha o te riona, ua faaora hoì òe ia ù i te tara o te reema ra. Ua pähono mai òe ia ù: 23 E faaìte au i to iòa i to ù ra mau taeaè; ei rotopü i te âmuiraa ra e haamaitaì atu ai au ia òe: 24 O òutou o tei mataù i te Fatu ra, e haamaitaì òutou ia na. Òutou atoà te huaai o Iatöpa, o ia ta òutou e faahanahana. O òutou atoà te huaai o Ìteraèra ra, e mataù òutou ia na. 25 aore hoì o ia i vahavaha, aore hoì i faaìno i te àti o te feiä i àti ra; e aore hoì i huna i to na mata ia na, ia tiàoro rä o ia ra, ua faaroo mai ra o ia ia na 26 O òe ta ù e haamaitaì i roto i te âmuiraa rahi ra. E rave au i ta ù i èuhe ra, i te aro o te feiä e mataù ia na ra. 27 E àmu te feiä haèhaa e ia paìa. O tei ìmi i te Fatu ra e haamaitaì rätou ia na, e vai ä te ànaanaea o to rätou âau. 28 To te fenua nei e tae noa atu i te hopeà ra, e riro ia i te manaò e ua färiu mai i te Fatu. E hope te mau fëtii a te ao nei i te haamori i mua ia òe. 29 No te Fatu hoì te Pätireia, e o ia te tävana i te mau fenua atoà. 30 E àmu te feiä taoà o te fenua nei, e e haamori; e te feiä atoà e tae i raro i te repo, e piò ia i mua ia na, e e òre e tià i te hoê ia faaora ia na iho ra. 31 Na te tahi pae huaai e faaroo ia na, e e parauhia ia ei taata no te Fatu: 32 e haere mai hoì rätou e faaìte i ta na ra parau tià i te tahi mau taata èê ra ia fänau mai, na na hoì teie i rave. Âmene.

 

Himene Tätarahapa.

Òhipa 9.26-31

Teie te parau o Tauro i tae i Ierutarëma.

26 E tae atu ra Tauro i Ierutarëma, ua tämata atu ra o ia i te täàti atu i te mau pipi ra, mataù anaè iho ra rätou ia na, aore i faaroo e, e pipi o ia. 27 Ua rave aè ra Paranapa i ta na rima, arataì atu ra ia na i te mau âpotetoro ra, ua faaìte atu ra ia rätou i to na ìteraa i te Fatu i te äratià ra, e ta na parauraa mai ia na ra, e ta na aòraa i Tamateto mä te iòa o Ietu aore roa i mataù ra. 28 Âmui atu ra o ia ia rätou i te haereraa atu i räpae, e te hoìraa mai i roto, i Ierutarëma ra. 29 E aò atu ra o ia i te iòa o te Fatu ra o Ietu mä te mataù òre, märô atu ra o ia i te mau Herëni ra, te tïtau mai ra hoì rätou ia na e täparahi. 30 E ìte aè ra te mau taeaè ra, arataì atu ra ia na i Taitarea, e ua tono atu ra hoì ia na i Tareto. 31 E hau atu ra to te mau Ètärëtia ra i reira e àti noa aè Iutea atoà e Tarirea, e Tämäria hoì; itoito atu ra, e te mataù hoì i te Fatu i to rätou haereà, e mä te aò hoì a te Värua Maitaì, rahi atu ra rätou.

Haamaitaì tätou i te Atua i teie parau òaòa e tià ai.

 

Himene òaòa.

 

1 Ioane 3.18-24

Teie ta tätou fäìraa i te parau no te faaroo.

18 E a ù mau tamarii ra, eiaha to tätou te aroha vaha anaè e te aroha arero, ei aroha rave rä, ei mea mau.

Te âau hau i mua i te Atua

19 O te mea teie e ìte ai tätou e, no te parau mau tätou, e e mahoru ai to tätou âau i mua ia na ra. 20 Ia faahapa mai hoì to tätou âau ia tätou, e rahi te Atua i to tätou âau, e ua ìte o ia i te mau mea atoà nei. 21 E a ù mau here e, ia òre to tätou âau ia faahapa mai ia tätou ra, aore o tätou taiäraa i reira i te Atua ra. 22 E ta tätou e ani atu ia na ra, e noaa ia ia tätou, no te mea, te haapaò nei tätou i ta na parau, e te rave nei i te mau mea e mauruüru ai o ia ra. 23 Teie hoì ta na parau: e faaroo tätou i te iòa o ta na Tamaiti o Ietu Metia, e e aroha tätou ia tätou iho, mai ta na hoì i poroì mai ra. 24 E tei haapaò i ta na ra parau, te àti rä ia o ia ia na, e te àtihia mai ra o ia e ana. Teie te mea i ìte ai tätou e te àti mai ra o ia ia tätou, o te Värua ta na i horoà mai ia tätou nei.

Pärahi tätou.

Haamaitaì ätou i te Atua i te hoê reo himene.

 

Himene.

Pure.

Pure tätou i te Atua, e te Atua e ua ärataì ta òe parau ia mätou mai ômuaraa o te haamoriraa tei faaìte ia mätou i to Aroha e to Òe Here ia mätou, i teie taime ua ineine mätou i te taiòraa i te Parau Maitaì o to Tämaïti to mätou faaora. Âmene.

 

Taiòraa

Ioane 15.1-8

1 O vau te vine mau, e o ta ù Metua te faaàpu. 2 E te mau âmaa hotu òre atoà i roto ia ù nei ra, na na ia e täpü ê atu: e te mau âmaa hotu atoà ra, na na ia e tope ia maitaì, ia rahi atu ä te hotu. 3 Ua mä rä òutou i tënä na, i te parau ta ù i haapii atu ia òutou na. 4 A àti mai ia ù, e na ù e àti atu ia òutou: mai te âmaa eita e hotu noa o ia anaè ra, ia òre ia àti mai i te vine ra; e òre atoà òutou ia òre ia àti mai ia ù ra. 5 O vau te vine, o òutou te âmaa. O të àti mai ia ù ra, e o të àti atu vau ia na ra, o ia të hotu rahi. I taaê atu òutou ia ù ra, aore roa ia e mea e tià ia òutou. 6 O te taata e òre e àti mai ia ù ra, e faaruèhia ia mai te âmaa ra e marô atu ra ia. O të haaputuhia ia ei vahie e tähuhia atu ra. 7 I àti mai òutou ia ù ra, e ia vai mäite ta ù parau i roto ia òutou na, e ani noa ia òutou i ta òutou i hinaaro ra, e e horoàhia ia ia òutou. 8 O te mea ia e maitaì ai ta ù Metua, ia rahi to òutou hotu: e riro ia òutou ei pipi na ù i reira.

Na te Atua Nui Tumu Tahi e haamaitaì mai te täiòraahia ta na parau.

 

Pure.

Pure tätou i te Atua, e te Atua e mauruüru i te töperaa ia mätou i teie poìpoì ia rahi to mätou hotu. Âmene.

 

Faaitoitoraa.

Himene.

Parau Faaära

 

Himene Püpüraa moni.

 

Pure Ärai

Mai ta Ietu hoì, to tātou Faaora e ani ra, fārii òe ia mātou ia àti ia na, ia riro e, na te tāpau ora o ta na Parau e faaora ia tātou, e ia hotu ùmu noa to tātou faaroo Mäòhi mau i te māa e au i to òe hanahana. Tahitià mai ia mātou e te Fatu o te raì e te fenua, tahitià mai, mau i to mātou mau fenua rii e to mātou nūnaa i roto i to òe àpu rima metua, e a arataì ia mātou i nià i te êà o te ora. No òe te Hau, e te Mana, e te Hanahana, mai teie nei e a muri noa atu. Âmene.

 

Himene ôroà

Ôroà.

Pure a te Fatu

Amui to tätou reo i roto i te pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie te faaitoitoraa.

Faaitoitoraa.

1 O vau te vine mau, e o ta ù Metua te faaàpu.

 

Teie te haamaitaìraa.

Haamaitaìraa.

5 O vau te vine, o òutou te âmaa. O të àti mai ia ù ra, e o të àti atu vau ia na ra, o ia të hotu rahi. I taaê atu òutou ia ù ra, aore roa ia e mea e tià ia òutou. Âmene.

 

 

Teraì òr. Faatura.