Märeto 4.35-41 Hau

 

Tāpati 20 no Tiunu 2021.

Hau.

Taramo 107

Mania.

1 E haamaitaì i te Fatu, e maitaì hoì to na, e tià to na aroha i te vai-mäite-raa. 2 Ia nä reira tei faaorahia e te Fatu, tei faaorahia e ana i te rima o të hämani ìno ra, 3 e ua haaputu mai ia rätou mai te mau fenua roa mai mai te hitià-o-te-rä, e mai te tooà-o-te-rä, mai àpatoèrau mai, e mai àpatoà. 4 I ori noa na rätou nä te  mëtëpara, nä te fenua ano, aore i ìteä e rätou te ôire ei pärahiraa ra. 5 Mä te poìa e te poìhä, roohia iho ra rätou i te mata pöuri. 6 Ua tiàoro rä rätou i te Fatu i to rätou àtiraa ra, e ua faaora iho ra o ia ia rätou i to rätou àti. 7 Ua faaìte hoì o ia ia rätou i te èà tià mau ra, e tae atu ra rätou i te ôire i pärahihia e te taata ra. 8 Ia haamaitaì hoì rätou i te Fatu i to na ra aroha, e te òhipa räveà taa ê na na i te tamarii a te taata nei. 9 O tei pohe hoì i te poìhä ra, ua haamähahia ia hiaai; e tei àti i te poìa ra, ua faaîhia ia i te maitaì 10 O tei pärahi i roto i te pöuri e te marupohe, mä te àti rahi e te täpeàhia i te âuri, 11 no te mea ua faaruè rätou i te parau a te Atua, e ua vahavaha i te aò a te Teitei. 12 I tuu haèhaa ai hoì o ia i to rätou âau i te àti, hià iho ra rätou i raro e aore roa e faatià mai.13 To rätou ra ahoahoraa, ua tiàoro rätou i te Fatu, e ua faaora o ia ia rätou i to rätou ra mau àti. 14 Ua arataì mai ra o ia ia rätou mai roto i te pöuri e te maru pohe, e ua ôfati taa ê atu ra i ta rätou mau täpeà.15 Na te reira e haamaitaì i te Fatu i to na ra aroha, e te mau òhipa taa ê na na i te mau tamarii a te taata nei. 16 Ua pararï hoì ia na te mau ôpani veo, e ua täpü-ê-hia e ana te mau teà âuri. 17 Te feiä neneva ra, no ta rätou ra hara i rave, e ta rätou ra parau ìno, i maìhia ai. 18 Te riàrià ra rätou i te mau mäa atoà ra, e te fätata mai ra te ùputa ra o te pohe ia rätou. 19 Ia roohia rä rätou i te ahoaho, ua tiàoro rätou i te Fatu, e ua faaora iho ra o ia ia rätou i to rätou ra mau àti. 20 Ua tuu mai ra o ia i ta na parau, e ua ora iho ra rätou; ora aè ra rätou ia na i to rätou ra pohe. 21 Na te reira e haamaitaì i te Fatu i to na ra aroha, e ta na ra mau òhipa taa ê i te tamarii a te taata nei. 22 E faatütia rätou i te mau tütia haamaitaì, e faaìte rätou i ta na mau òhipa taa ê mä te òaòa. 23 Te feiä i nä tai i te haere i nä nià i te mau pahï ra, tei te moana rahi ra to rätou ra töroà. 24 O rätou të ìte i te òhipa a te Fatu, e ta na mau räveà taa ê i te moana rahi ra 25 Ua faaue anaè hoì o ia, ua tupu mai ra te vero, e teitei roa mai ra te àre. 26 Teitei noa mai ra i nià i te raì, e ua pou faahou i raro i te àputo; tärapape roa aè ra to rätou âau i te ahoaho. 27 Ua tänïnïtö e ua turorirori mai te taata taèro àva ra, e hope roa aè ra ta rätou räveà. 28 E ia roohia rätou e te àti ra, ua pii rätou i te Fatu ra, ua ora iho ra rätou ia na i taua ahoaho no rätou ra.29 Ua faariro o ia i taua vero ra ei mania, e to na ra mau àre, ua haamämühia ia.30 E ua mämü anaè te reira, ua òaòa te ìhitai e ua hopoi o ia ia rätou i to rätou tïpaeraa hinaarohia ra. 31 Na rätou e haamaitaì i te Fatu i to na ra aroha, e ta na ra mau òhipa taa ê i te tamarii a te taata nei. 32 E faateitei rätou ia na i roto i te âmuiraa o te taata ra, e haamaitaì rätou ia na i roto i te âmuiraa o te feiä paari.33 Te faariro nei o ia i te pape puè ei mëtëpara, e te pape pihaa ra ei vähi päpämarô; 34 te fenua maitaì ra ei tiàhami, no te hara a te feiä e pärahi i reira. 35 Te faariro nei o ia i te mëtëpara ei pape hopuna, e te vähi repo marô ra ei pape pihaa. 36 Ua haapärahi o ia i tei pohe i te poìa ra i reira. Ia faanahonaho rätou i te tahi ôire pärahiraa, 37 e ia ueue i te huero i te fenua, e ia tanu i te ôvine, e ia hotu mai te mäa e ia rahi. 38 Ua haamaitaì anaè o ia ia rätou ra, ua rahi roa rätou i reira, e òre hoì ta rätou mau puaa e tuua-noa-hia ia iti. 39 Te iti faahou ra rätou, e ua faahaèhaahia i te hämani ìno, e te àti, e te òto. 40 Ua vahavaha o ia i te hui-arii, e ia hahaere noa na rätou nä te mëtëpara èà tià òre ra. 41 Te faateitei nei rä o ia i te veve mai roto mai i te àti ra, e te faariro nei i to na fëtii mai te nana mämoe atoà ra. 42 E ìte mai te feiä parau tià i teie mä te òaòa, e ôpani hoì te ìno i to na ra vaha. 43 O tei paari ra, e riro o ia i te haapaò i teie nei mau parau e ìte hoì o ia i te aroha hämani maitaì o te Fatu ra.

Iöpa 38.1, 8-11

Faaea.

1 Ua parau mai ra te Fatu ia Iöpa no roto i te püahiohio, nä ô mai ra:

Te arii o te moana

8 E nä vai i ôpani i te mau ùputa o te moana, a manii mai ai, mai te mea no roto i te ôpü ra; 9 ia ù i faariro i te mau ata ei täpoì i te reira, e te pöuri meùmeù ra ei vähi; 10 ia ù hoì i rave i te vähi i haapaòhia e au no te reira, e ua tuu i te mau teà e te mau ùputa, 11 a parau ai e, E tae òe i ô nei; tïrärä, ei ô nei to àru teòteò ra e faaea ai?

2 Törïnetia 5.14-17

Täpiti.

14 Ua faatià e tahi pae o òutou ia mätou nei, e o mätou hoì to òutou òaòaraa, mai ia òutou atoà hoì e riro ei òaòaraa no mätou ia tae i te mahana o te Fatu ra o Ietu. 15 E no taua ìte nei i hinaaro ai au i te haere atu ia òutou na i mütaa iho, ia täpiti atu i to òutou maitaì; 16 e ia nä ô nä atu vau ia òutou i te haere i Mätetönia, e mai Mätetönia, ia hoì mai ä ia òutou na, e ia ärataìhia vau e òutou i ta ù tere i Iutea ra. 17 E taua ôpuaraa hoì na ù ra, e parau mämä änei ta ù? E te mau mea ta ù e ôpua nei, i ôpua änei au i tei au i te tino ra, a riro ai ta ù ei «oia», «oia», e «aore», «aore «?  

Märeto 4.35-41

Te faaòre-raa-hia te vero

(Mät 8,23-27; Ruta èv 8,22-25)

35 E ahiahi atu ra taua mahana ra, ua parau mai ra o ia ia rätou: «E fano tätou i tërä paeàu. 36 E ia tuu ê atu rätou i taua feiä rahi ra, tei nià o ia i te pahï fano atu ra rätou e o e fanu puè pahï rii èê ä hoì. 37 Ua tupu mai ra te hoê maa mataì rahi, fati mai ra te àre i nià i te pahï e î roa aè ra. 38 Te taòto ra o ia i nià i te hoê tuauruà i te reimuri ra, ua faaära atu ra rätou ia na, nä ô atu ra: «E te Òrometua, eita òe e haapaò mai i to mätou nei pohe? 39 Ua tià aè ra o ia i nià, àvau atu ra i te mataì, e ua nä ô atu ra i te àre: «A faaea, a mania, Pohe iho ra te mataì, mania roa atu ra. 40 Ua parau mai ra o ia ia rätou: «E aha òutou i mataù hua ai? E aha te mea i òre ai to òutou faaroo? 41 Rahi roa atu ra to rätou mataù, e ua nä ô aè ra rätou rätou iho: «O vai hoì teie o tei faaroo te mataì e te moana atoà ia na?

Manaò.

Te taata i mua i te mau tupuraa o te aru a te Atua Nui Tumu Tahi, te aru e vahi i reira te taata e faanaò ai i te mau maitaì o ta te fenua e höroà noa nei i te täpaò no te Aroha e te Here, ia òaòa tämau te taata i roto i te hau. Tei parauhia te ao mure òre, e täno tätou i te parau e, te ao ia tei òre e mure, oia hoì te ao të òre e moè. E mai te peu e, èita te reira ao e moè ra, e vai noa mai ia e a muri noa atu. Te auraa ra, e ao tei räpae i te ôtià o te tau, e ao hoì aita o na e tüàtiraa i nià i te mau mea i mätauhia. Te ao mure òre, e vähi ia no te marämarama hope òre, e vähi no te hanahana hope òre. Te huru ia o te ao o te Atua, te Tumu o te mau maitaì atoà.

Mai te peu e tütonu to tätou mata i nià ia tätou i te ao ta tätou e ora nei i teie mahana, te mea paha e haapeàpeà noa ra ia tätou, o te òreraa ia e noaa mai te hau. No te mute òre taua peàpeà ra no tätou ra, i hinaaro ai tätou i te tahi oraraa ê atu, ei oraraa rä e haamanaò atoà ia tätou, mai te mau mea atoà i hämanihia, i te faahanahana i te Atua, a riro atu ai te reira èi òaòaraa hope òre no tätou.

E täno tätou e haapoto i te manaò i te parauraa e te aru a te Atua Nui Tumu Tahi, e ao no te hau, no te ora, no te hanahana, e te òaòa. Teie ia te tahi haapotoraa no na taiòraa e maha no teie mahana :    

-Taramo 107, 29 Ua faariro o ia i taua vero ra ei mania, e to na ra mau àre, ua haamämühia ia.

-Iöpa 38, 11 a parau ai e, E tae òe i ô nei; tïrärä, ei ô nei to àru teòteò ra e faaea ai?

-2 Törïnetia 5, 15 E no taua ìte nei i hinaaro ai au i te haere atu ia òutou na i mütaa iho, ia täpiti atu i to òutou maitaì.

-Märeto 4, 39 Ua tià aè ra o ia i nià, àvau atu ra i te mataì, e ua nä ô atu ra i te àre: «A faaea, a mania, Pohe iho ra te mataì, mania roa atu ra.

Te Tumu.

Te parau e färereihia nei e tätou ua tupu ia i roto i te aru tei parauhia i teie mahana te nätura, e vero teie e tupu ra. E ahiahi te tupuraa teie òhipa te fano nei rätou i te tahi paeàu. Ua tupu mai ra te hoê  mataì rahi, fati mai ra te àre i nià i te pahï e î roa aè ra. Te taòto ra te Fatu i nià i te hoê tuauruà i te reimuri, ua faaära mai ra rätou ia na, nä ô atu ra: «E te Òrometua, eita òe e haapaò mai i to mätou nei pohe. Ua tià mai ra o Ietu, àvau atu ra i te mataì, e ua nä ô atu ra i te àre: A faaea, a mania, Pohe iho ra te mataì, mania roa atu ra. Parau mai ra o Ietu i ta na mau pipi: E aha òutou i mataù hua ai? E aha te mea i òre ai to òutou faaroo? Rahi roa atu ra to rätou mataù, e ua nä ô aè ra rätou rätou iho: O vai hoì teie o tei faaroo te mataì e te moana atoà ia na.

Ua ateä i te fenua e vai anaè teie e àua haaàti nei ia rätou, no Ietu o te tahi taime teie i reira o ia e haamäha ai  i to na rohirohi ua maìti o ia i te vahi paari o te pahï i reira o ia e taòto ai, ma te haapeàpeà òre. Teie roto o Ietu i to na ao, te ao no te hau, ma te tiàturi i te fatu o te pahï e faaruru i te vero e färereihia ra e rätou. No te mau pipi ua ahoaho rätou i te vero, e te mau àre e fati ra i roto i to rätou pahï. No te mau pipi ua faaea noa rätou i roto i te ao tei haapeàpeà i to rätou âau, e tei haafifi i to rätou faaroo.

Te vahi faufaa o te parau no teie mahana te huru o Ietu i mua i te vero, e, i te huru o te taata i mua i te vero. E piti parau ta Ietu, e faahiti no te taata teie ia, E aha òutou i mataù hua ai? E aha te mea i òre ai to òutou faaroo? Te hinaaro nei o Ietu e faaìte ia tätou e raveà te vai ra i roto ia tätou, to tätou faaroo eiaha ia paremo, eiaha ia pee i te mataì, na teie raveà e faatupu i te hau i roto i te âau. Te mea ia i nià atu i te fäito i manaòhia, aore ra i te ôtià i horoàhia. Te oraraa fifi òre e te peàpeà òre hoì, te reira atoà te parau no te huru o te hoê taata e te oraraa ta na e ora ra. Oia atoà te faatere o te hoê fenua, te reira atoà te parau e faaòhipahia no te fenua iho i roto i te huru faatereraa ta na e mau ra. E parau-atoà-hia te päpe e tau i nià i te àihere o te fenua i te pö e hau.

E tià tätou ia parau e, i roto i te ao o te Atua Nui Tumu Tahi, oia hoì, i roto i to na hau, ta tätou e parau nei e, to na Pätireia, i raro aè i to na mana hope, te vähi mau te reira tei òre i tämaruhia, tei òre i faarumahia e te mau peàpeà ta tätou i mätau. Te oraraa te reira i nià roa atu, tei ätea roa atu i tei mätauhia e tätou te taata nei. I reira, ua mania, ua mänina te mau fifi atoà e ua mou roa anaè. Eita te âau e hitahita, eita e tärapape, eita e fetoìtoì faahou, eita e faaôneneva faahou ia tätou, mai te mau pipi i nià i te pahï. E aha te mea e faaàrepu i te âau i raro aè i te mana e te hau o te Atua Nui Tumu Tahi, ua riro roa te âau mai te mataì e te miti tei töpä roa : e hau puupuu òre ia, e hau maoro, e hau mure òre, ia au i te huru o te Atua no na te ao ta tätou e tomo atu, no na te ora ta tätou e ora atu, no na hoì te òaòa te òaòa ta tätou e òaòa atu.

Teie te Hau e hinaarohia nei ia tätou ia tïtau, teie te Hau i tïtau-manihini-atoà-hia, teie te hau i tomohia atu e te hui Aito, nä reira hoì te hui Tupuna, o rätou i faatupu i te hinaaro o te Atua. E vai iho rä tätou i te Hau o te Atua ia ärataì na ia tätou, e vai iho ia na ia heheu mai na ia tätou i to na hinaaro, a riro atu ai ei rima faatupu i to na Hau i te fenua nei no te hanahana o to na iòa, i Mäòhi Nui nei.

 

Teraì òr. Faatura.

 

(Puta turu, Poroì i te nünaa mäìtihia e te Atua.)