Ioane 21.1-19 Morohi.

 

Tāpati 1 no Më 2022.

ÔROÀ

Morohi.

Taramo 30

1 E Taramo, e e himene no te haoraa fare o Tävita.

2 E haamaitaì au ia òe, e te Fatu, ua faatià hoì òe ia ù i nià, e aita òe i vaiiho noa atu i ta ù mau ènemi ia òaòa noa na ia ù.

3 E te Fatu, e ta ù Atua, i tiàoro noa na vau ia òe, e ua faaora òe ia ù.

4 Ua faahoì mai òe, e te Fatu i ta ù värua mai häte mai ä, e ua faaora òe ia ù ia òre au ia tae i raro i te âpoo ra.

5 E himene i te Fatu, e te feiä moà e, e ârue i to na maitaì, ei manaòraa.

6 Mai te àmoraa mata nei to na riri i te poto, âreà to na hereraa mai, e tià ia i te vairaa e mure noa atu te aho. Ia täpae noa mai te òto i te ahiahi; e riro rä i te òaòa ia poìpoì.

7 Taua maitaìraa no ù ra, ua parau ä hoì au e: «E òre roa vau nei e âueue.

8 No to hereraa mai, e te Fatu, i haamau päpü ai òe i to ù mouà.» Ua huna iho ra òe i to mata, mäheahea aè ra vau.

9  Ua pure iho ra vau ia òe, e te Fatu, i reira e ua faaìte atu ra vau i ta ù aniraa i te Fatu.

10 «E aha te faufaa ia rave-pohe-roa-hia vau, e ia hopoi-roa-hia vau i raro i te âpoo? E haamaitaì änei te repo ia òe, e faaìte änei ia i te parau mau na òe ra?

11 E faaroo mai, e te Fatu, e aroha mai òe ia ù; e te Fatu, ei tauturu òe ia ù.»

12 Ua faariro òe i te òto no ù ra ei òaòa, e na òe i tätara i te àhu òto no ù ra, e ua faaàhu mai òe ia ù i te àhu òaòa.

13 E teie nei, e haamaitaì au ia òe mä ta ù hinuhinu, e òre roa vau e mämü. E te Fatu, e ta ù Atua, e haamaitaì ä vau ia òe e a muri noa atu.

Òhipa 5.27-41

27 E ia ärataìhia mai rätou ra, tuu atu ra ia rätou i mua i te aro o te Tuneteri ra; ua ui mai ra te tahuà rahi ra ia rätou, nä ô mai ra:

28 «Aore mätou i parau hua atu ia òutou, eiaha òutou e haapii mä teie nei iòa? E inaha, ua î roa Ierutarëma ia òutou i ta òutou parau, e te hinaaro na òutou ia häio mai te toto o teie nei taata i nià ia mätou nei.

29 Ua parau atu ra Pëtero e te mau âpotetoro atoà ra, nä ô atu ra: «O te Atua ta mätou e faaroo e tià ai eiaha te taata.

30 Ua faatià iho nei hoì te Atua o to tätou hui tupuna ra ia Ietu, o ta òutou i täparahi i te pätitiraa i nià i te räau ra.

31 Oia ta te Atua i faateitei aè nei i ta na rima àtau ei Arii e ei Ora, ei horoà mai hoì i te tätarahapa no Ìteraèra, e te matara hoì o te hara.

3 2 Ei ìte hoì mätou no na i taua mau parau nei, e te Värua Maitaì atoà ta te Atua i horoà mai i te feiä i faaroo ia na ra.

33 E ìte aè ra rätou i te reira, putapü atu ra to rätou âau, e feruri noa iho ra i te räveà e pohe ai ia rätou.

34 Ua tià aè ra te hoê Färitea i taua Tuneteri ra i nià, o Tämariera te iòa, e haapii-ture, e taata haamaitaìhia e te taata atoà, ua faaue atu ra e arataì i te mau âpotetoro i räpae e ia roovaù iti aè.

35 Ua parau atu ra ia rätou: «E te mau taata o Ìteraèra nei, e ara ia òutou i ta òutou raveraa atu i tënä na mau taata.

36 Tupu aè nei Teuta i mütaa aè nei, i te faaahaaharaa ia na iho e, e taata rahi o ia; âmui atoà atu ra te taata ia na e maha atoà hänere: taparahihia atu ra o ia, e te feiä atoà i faaroo ia na ra, purara ê atu ra ia, e mou atu ra. 37 I tupu aè nei hoì i muri aè ia na Iüta i Tarirea, i te ànotau päpaìraa iòa ra; e âmui atu ra o ia i te taata e rave rahi i te peeraa atu ia na: e pohe atu ra o ia; e te feiä atoà i pee ia na ra, purara ê atu ra ia.

38 E teie nei, teie ta ù parau ia òutou: eiaha e haùti noa atu i tënä na mau taata, e vaiiho noa atu; na te taata teie parau e teie nei òhipa, e morohi noa ia;

39 na te Atua rä, eita ia e morohi ia òutou; o te riro noa atu hoì òutou ei feiä tamaì atu i te Atua.

40 Ua faatià mai ra rätou ia na, e faahoìhia mai ra e rätou te mau âpotetoro i roto, ua papaì atu ra, parau atu ra ia rätou, eiaha roa rätou e parau mä te iòa o Ietu, tuu atu ra ia rätou.

41 Haere atu ra rätou mai te aro atu o te Tuneteri ra mä te òaòa, i te mea no to na iòa i manaòhia ai rätou e au ia rätou taua hämani ìno ra.

Àpotarupo 5.11-14

11 Hiò atu ra vau, e faaroo atu ra i te reo o te mau merahi e rave rahi e àti noa aè taua teröno ra, e te mau mea ora ra, e te mau peretiputero (e to rätou rahiraa ia taiò ra, ua muriati i te muriatiraa, e ua tautani i te tautaniraa),

12 i te pii-hua-raa te reo e: «E au te Ârënio taparahihia ra e, ei ia na te mana e te taoà rahi, e te paari, e te püai, e te tura, e te hanahana, e te haamaitaì »

13 E faaroo atu ra vau i to nià atoà i te raì ra, e to te fenua nei, e to raro i te repo, e to te moana, e to roto ia rätou atoà ra, i te nä-ô-raa e: «O te haamaitaì, e te tura, e te hanahana, e te mana, ei ia na ia ei tei pärahi i nià iho i te teröno ra, e ei te Ârënio, e a muri noa atu.»

14 Ua parau iho ra nä mea ora e maha ra: «Âmene. «Ua tïpapa iho ra te mau peretiputero e piti àhuru mä maha ra i raro, e ua haamori ia na i të tià i te oraraa e a muri noa atu.

Ioane 21.1-19

Te fä-faahou-raa mai Ietu i ta na ra mau pipi

1 E muri aè ra, ua faaìte faahou mai ra Ietu ia na iho i te mau pipi i te roto i Tïpëria ra, i nä ô o ia i te faaìteraa mai.

2 E te putuputu atoà ra Timona Pëtero mä, e o Toma o të parauhia ia Titimo ra, e o Nätanaèra o Tana i Tarirea ra, e nä tamarii hoì a Tepetaio ra, e o e toopiti hoì puè pipi ä a Ietu ra.

3 Ua parau atu ra Timona Pëtero ia rätou: «Te haere nei au e ravaai. Ua parau mai ra rätou: «E haere atoà tätou. Haere atu ra rätou i reira ra i nià i te pahï, aore rä a rätou faufaa i noaa i te reira ruì.

4 E poìpoì aè ra, te tià noa ra Ietu i te pae roto ra; aore rä te mau pipi i ìte e, o Ietu.

5 Ua parau mai ra Ietu ia rätou: «E te mau tamarii ra, e mäa ta òutou? Ua parau atu ra rätou: «Aita.

6 Ua parau mai ra Ietu ia rätou: «A tuu na te ùpeà i te tau ätea o te pahï na, e noaa ia ta òutou. Ua tuu atu ra rätou, e aita aè ra e maraa ia rätou ia ùme i te rahi o te ià.

7 Ua parau atu ra taua pipi herehia e Ietu ra ia Pëtero: «O te Fatu Faaroo aè ra Pëtero e, o te Fatu tërä. Ua àhu iho ra i ta na àhu i nià iho (o tei vaiiho-ê-hia e ana ra), e tätià iho ra hoì e ôuà atu ra o ia i raro i taua roto ra.

8 Nä nià mai ra te hoê pae pipi ra i te poti, mä te ùpeà e te ià i te ùmeraa mai. (Aita hoì i mäoro reà i uta, e au i te piti hänere o te tüpiti ra.)

9 E tae mai ra rätou i te pae, hiò atu ra rätou i te auahi i te àmaraa, e te ià i nià iho e te päne hoì.

10 Ua parau atu ra Ietu ia rätou: «A rave mai na i e fanu ià i ta òutou ià i noaa na.

11 Haere atu ra Timona Pëtero i nià i te poti, ua ùme mai ra i te ùpeà i te pae, ua î roa i te ià rarahi, hoê hänere e pae àhuru e toru tiàhapa; aore rä i motumotu te ùpeà i taua ià rarahi ra.

12 Ua parau atu ra Ietu ia rätou: «A haere mai a àmu. E aore roa te hoê pipi i ui noa atu e: «O vai òe?», i te mataù, ua ìte hoì rätou, e o te Fatu ia.

13 Ua haere atu ra Ietu, rave iho ra i te päne, ua tuu atu ra ia rätou ra, e te ià atoà hoì.

14 O te toru teie i to Ietu faaìteraa mai ia na iho i te mau pipi ra, i muri aè i ta na tiàraa mai te pohe mai ra.

Te töroà o Pëtero

15 E paìa aè ra rätou, ua parau atu ra Ietu ia Timona Pëtero: «E Timona a Iona e, te rahi na to òe hinaaro ia ù i teie? Ua parau mai ra o ia: «E te Fatu, ê, ua ìte òe e, te hinaaro atu nei au ia òe. Ua parau atu ra Ietu ia na: «A faaàmu i ta ù mau ârënio.

16 Ua parau faahou atu ra o ia ia na, o te piti ia o te parauraa atu: «E Timona a Iona e, te hinaaro na òe ia ù? Ua parau mai ra o ia o ia ia na: «E te Fatu, ê, ua ìte òe e te hinaaro atu nei au ia òe. Ua parau atu ra Ietu ia na: «A tiaì i ta ù mau mämoe.

17 Ua parau faahou atu ra o ia ia na, o te toru ia o te parauraa atu: «E Timona a Iona e, te hinaaro na òe ia ù?

Ua òto iho ra Pëtero i te mea a toru aè ra o na uiraa mai ia na e: «Te hinaaro na òe ia ù?», e ua parau mai ra ia na: «E te Fatu, aore roa e mea toe i te ìteä ia òe, ua ìte òe e, te hinaaro atu nei au ia òe. Ua parau atu ra Ietu ia na: «A faaàmu i ta ù mau mämoe.

18 Âmene, âmene, e parau atu vau ia òe: i to âpïraa ra, ua tätià òe ia òe iho, e hahaere iho ra òe i ta òe ra vähi hinaaro; ia ruhiruhiä rä òe, na òe e faatoro i to rima, e na te tahi ê e ruuruu ia òe, e a hopoi atu ai hoì ia òe i te vähi hinaaro-òre-hia e òe ra.

19 Nä reira atu ra o ia ei faaìteraa atu ia na i te huru o to na pohe e maitaì ai te Atua. E oti aè ra taua parau ra, ua parau atu ra o ia ia na: «A pee mai ia ù.

Manaò.

Ia faaroo tätou i te mau parau e haaparehia nei i roto i te mau faaäraraa parau âpï, te ìtehia nei te pïtaataaraa o te mau fenua i mua i te mau faanahoraa faatîtî a te mau fenua e manaò ra te mau ra rätou i te mana hope o te hoê nünaa. Manaò iho ra teie mau faatere fenua e tià ia rätou ia rave i te mau faanahoraa e au i ta rätou e manaò ra, ma te haapae i te feiä e tütava nei ia matara i räpae i te haafifiraa rau no te oraraa. Na teie mau huru faanahoraa e haafänau nei te mau ârepurepuraa i roto i te oraraa  vaamateìnaa, eiaha atoà ra ia àramoinahia tei tahi pae o te nünaa ua topa i roto i te täparu, te hupehupe, te faatau ma te òre e tiàturi i ta na iho raveà, e ta te fenua höroà faatupu ora. Ia tae te nünaa i nià i teie huru faanahoraa, e tià ia parauhia e ua haapaehia e te mau tià i mäìtihia e faatere i te fenua i ta rätou hopoià èi faatupuraa i te àifaitoraa no te oraraa vaamateìnaa. Teie mana tei roto i te mau tià mäìtihia e te nünaa, ta te Ètärëtia e ära nei i nià i te faaroo o te nünaa ma te haapii e ora o ia i to na faaroo e ia tiàturi i te fenua te metua vahine faatupu ora. Teie parau no te fenua faatupu ora tei roto ia i te mau fenua atoà, ta te tahi parauraa te Metua vahine faatupu maa. Ta te Ètärëtia ia e ära nei te oraraa hau o te nünaa i nià i to na fenua, mai ia tätou te nünaa Mäòhi, i Mäòhi Nui nei ia mau maite tätou i to tätou faaroo i te fenua e ia hau. Teie te tahi manaò i nià i te mau taiòraa i faanahohia no teie mahana, teie te haapotoraa :  

-Taramo 30, 5 E himene i te Fatu, e te feiä moà e, e ârue i to na maitaì, ei manaòraa.

-Òhipa 5, 39 na te Atua rä, eita ia e morohi ia òutou; o te riro noa atu hoì òutou ei feiä tamaì atu i te Atua.

-Àpotarupo 5, 14 Ua parau iho ra nä mea ora e maha ra: «Âmene. «Ua tïpapa iho ra te mau peretiputero e piti àhuru mä maha ra i raro, e ua haamori ia na i të tià i te oraraa e a muri noa atu.

-Ioane 21, 19 Nä reira atu ra o ia ei faaìteraa atu ia na i te huru o to na pohe e maitaì ai te Atua. E oti aè ra taua parau ra, ua parau atu ra o ia ia na: «A pee mai ia ù.

E morohi anei teie reo to Ietu i nià i ta na Ètärëtia, te ètärëtia e nünaa no te Metia tei tïtauhia, e tane, e vahine, taureàreà, tamaroa, tamahine, e tamarii, e àiü, o te niu teie tei papa i te ora e hanahana ai te Atua Nui Tumu Tahi. Ia parau o Ietu ia Petero e toru taime ua here mau òe ia Ù, te pähono nei o Petero e toru taime E, te tïtauraa a Ietu, A tiaì i ta ù mau mämoe, A faaàmu i ta ù mau ârënio, A faaàmu i ta ù mau mämoe. E mau reo faatupu ora teie tei òre i morohi i roto i te tau, o ta te fenua e mau ra. Ia parau o Ietu a pee mai ia Ù, no te mea e täpura òhipa te rave, taua òhipa ra to te taata ìteraa e, e taata faatiàfaahouhia o ia e te Metia, tei faatiàhia e te Metia ra e taata tei uruaì i to na faaroo i nià i te fenua. Te parau mätamua ta tätou i ite i nià i te fenua, terä ia ta te päpaì Tenete e faahiti ra i te nä ôraa e : Ua rahu te Atua i te raì e te fenua i te mätamua ra. Te vai ano noa ra te fenua, aore e faufaa, e te pöuri hoì i nià iho i te ìriatai, e ua faaàrepurepu iho ra te Värua o te Atua i nià iho i te moana (Tenete 1, 1-2).

Te faaìte ra teie reo no Ietu a pee mai ia Ù i te huru o taua èà ra hou te Atua a faaìte mai ai i te täpaò o to na aroha e to na here. Te nä ô faahou ra te reo o Ietu, e te mau tamarii e maa ta òutou, Aita o Ietu i hinaaro i te tuu i te mau pipi i roto i te ano, te faufaa òre, e te pöuri. No te mea e aroha te Atua, teie te täpaò mätamua no taua aroha no te Metia ra, ia hitihia te mau pipi i te  märamarama, e te maitai. Ia haamanaò tätou i te  mau parau tei ìriti i teie ùputa no te ora. Te reira te mea e faaòhie ia tätou i te ìteraa i to tätou èà. E nä reira tätou i te hiò i teie parau no te märamarama ta te Ietu i tuu mai, oia hoì : te tahi mea e faaòhie ia tätou i te ìteraa i to tätou èà. Mai te peu rä e hiò tätou i te märamarama mai te tahi mörï e àma i roto i te pöiri, aita ia ta te taata e òhipa faahou, e eita o ia e ìmi faahou. Teie peeraa e parauhia nei, te tahi ia mea hinaarohia e te taata, ta na te reira pähonoraa i te hinaaro o te Atua. No reira, e tuhaa ta te taata tätaì tahi i roto i te parau no te peeraa i te Atua ra, ta na atoà te reira pähonoraa i te here o te Atua. Ia au  i te huru o te here, eita te taata e ätea i te Atua ta na i here, te mea mau rä te reira e ûàna ai te manaò pee e te haafätata i te Atua. Te auraa, eere teie peeraa i te räveà e noaa ai i te taata te tahi mea ta na e ère ra, e täpaò faaìte noa rä i to na here i te Atua, te òhipa a te taata tei ìte ua tïtauhia o ia i te mana o te parau a te Atua Nui Tumu Tahi, e òre ia e morohi.

 

Teraì òr. Faatura.

 

Ioane 20.19-31 Fänaò

 

Tāpati 24 no Èperera 2022.

Fänaò

Taramo 118

1 E haamaitaì i te Fatu, e maitaì hoì to na, e tià to na aroha i te vai-mäite-raa.

2 Ia nä reira te ùtuafare o Ìteraèra i teie nei: e e tià to na aroha i te vai-mäite-raa.

3 I a nä reira te ùtuafare o Àarona i teie nei: e e tià to na aroha i te vai-mäite-raa.

4 Ia nä reira te feiä i mataù i te Fatu i teie nei: e e tià to na aroha i te vai-mäite-raa.

5 Ia ù i roohia e te àti ra, ua tiàoro vau i te Fatu, e ua ìte mai ra te Fatu ia ù, e ua tuu mai ia ù i te vähi ätea.

6 Tei pïhaì iho te Fatu ia ù ra, e òre au e mataù: e aha ta te taata ia rave mai ia ù ra?

7 Tei pïhaì iho te Fatu ia ù ei tauturu ia ù ra, e ìte au i te hiàraa o te feiä i riri mai ia ù ra.

8 E mea maitaì te tiàturi i te Fatu, i te tiàturi i te taata nei.

9 E mea maitaì te tiàturi i te Fatu, i te tiàturi i te huiarii ra.

10 Ua haapuni mai te mau êtene atoà ia ù; no te iòa rä o te Fatu, pau iho ra ia ia ù.

11 Ua nä nià iho hoì, e ua nä nià iho i te haapuni ia ù, no te iòa rä o te Fatu, pau iho ra ia ia ù.

12 Ua haapuni mai rätou ia ù mai te tepure ra, mai te auahi àihere ra, aore aè ra e mähia, mou iho ra, no te iòa hoì o te Fatu, pau iho ra ia ia ù.

13 Ua neneì hua mai hoì òe ia ù ia hià vau, ua tauturu mai rä te Fatu ia ù.

14 O to ù ia ètaèta e o ta ù ia himene o te Fatu, ua riro mai hoì o ia ei ora no ù.

15 Te reo òaòa e te ora tei roto i te mau tiàhapa o te feiä parau tià ra: «E räveà itoito tei te rima àtau o te Fatu,

16 e teitei to te rima àtau o te Fatu, e räveà itoito tei te rima àtau o te Fatu.

17 E òre au e pohe, e ora mau ä vau, e parau faahou ä vau i te òhipa a te Fatu.

18 Ua aò hua mai ä hoì o ia ia ù nei, aita rä o ia i faaruè noa ia ù no te pohe.

19 A ìriti na ia ù i te mau ùputa parau tià ra, e tomo vau nä reira mä te haamaitaì i te Fatu ra.

20 O te ùputa teie na te Fatu, e nä reira te feiä parau tià i te tomo.

21 E haamaitaì au ia òe, ua faaroo mai hoì òe ia ù, e ua riro ei ora no ù.

22 Te ôfaì i faaruèhia e te feiä i patu ra, tei riro iho nei ei ôfaì tihi.

23 O ta te Fatu teie i rave. E mea maerehia hoì i mua i to tätou nei mata.

24 O te mahana teie i faaauhia e te Fatu; e òaòa tätou, e e fänaò i teie nei mahana

25«Ia ora i teie nei, e te Fatu, te ani atu nei au, ia ora i teie nei, te ani atu nei au. E haamaitaì mai ia mätou i teie nei, e te Fatu e»

26 Ia ora o ia o tei haere mai mä te iòa o te Fatu, Te faaora atu nei mätou ia òutou mai roto atu i te fare o te Fatu.

27 O te Atua mau ra o te Fatu ia, o tei haamäramarama mai ia tätou nei. A ruuruu na i te tütia àmu i te taura i nià i te mau tara o te fata nei.

28 O ta ù Atua òe, e haamaitaì ä vau ia òe, o ta ù Atua òe, e faateitei ä vau ia òe.

29 E haamaitaì i te Fatu, e maitaì hoì to na, e tià hoì to na aroha i te vai-mäite-raa.  

Òhipa 5.12-16

Te mau täpaò e rave rahi

12 E rave rahi te täpaò e te temeio i ravehia e te rima o te mau âpotetoro ra i röpü i te taata atoà: e taìruru aè ra rätou atoà i roto i te Poretito o Toromona ra.

13 Âreà te hoê pae ra, aore roa ia i te hoê i âmui tià mai ia rätou i te mataù; ua âruehia rä rätou e te taata.

14 Te feiä rä i faaroo i te Fatu ra, e rave rahi roa atu ra ia tei âmui mai ia rätou ra, te täne e te vahine atoà hoì. 15 E hopoi mai ra rätou i te feiä maì i räpae i te mau aroä ra, tuu iho ra i nià i te roì e te roì rii hopohopoi ra, peneiaè o te àèa vëtahi e te ata o Pëtero ia haere nä reira iho ra.

16 E rave rahi hoì to te mau ôire ra i haere mai e àti noa aè, i te hopoiraa mai i te feiä maì e te feiä i peàpeà i te värua faufau i Ierutarëma: e faaora-anaè-hia iho ra rätou atoà.

Àpotarupo 1.9-19

Te ôrama o te Metia

9 O vau nei, o Ioane, o to òutou taeaè, e te au hoì i te àti, i te Pätireia e te faaòromaì o Ietu Metia ra, i te fenua vau i parauhia ra e, o Pätamo, no te parau a te Atua, e no ta ù ra faaìteraa ia Ietu Metia ra.

10 I riro vau i te Värua i te mahana o te Fatu ra, e faaroo aè ra vau i te hoê reo rahi i muri aè ia ù ra, mä te òto pü ra,

11 i te nä-ô-raa mai e: O vau te Ârefa e te Ômeta, te mätamehaì e te faahopeà; e ta òe e ìte nei, e päpaì i roto i te hoê puta, a häpono atu ai i nä Ètärëtia e hitu i Àtia ra: i tei Èfetia ra, e Temurina, e Peretamo, e Tuatira, e Tarati, e Firaterefia, e Raotitea ra.

12 Ua färiu aè ra vau e hiò i taua reo i parau mai ia ù ra. E tei taua färiuraa no ù ra, ìte atu ra vau i e hitu rämepa àuro ra;

13 e te hoê mai te Tamaiti o te taata te huru, i rotopü i taua nä rämepa e hitu ra, te àhu ra i te àhu e raro roa i te âvae, e ua tätuahia te ôuma i te tätua àuro.

14 E te rouru i ta na upoo ra mai te vavai ra ia i te teatea, e mai te hiona; e mai te ura auahi ra o na mata:

15 e mai te veo maitaì ia àma i te tura ra o na âvae; e to na reo mai te haruru ia o te miti rahi ra.

16 Te täpeà ra ta na rima àtau i nä fetià e hitu ra; e te hoê òè òoi mata piti ra mai roto atu i to na vaha; e to na mata mai te mahana ra ia e ànaana mai i te avatea ra.

17 E ta ù hiòraa atu ia na ra, hià iho ra vau i raro i ta na pae âvae, mai te taata pohe roa ra. Ua tuu mai ra i ta na rima àtau i nià iho ia ù, e ua nä ô mai ra ia ù: Eiaha e mataù, O vau te mätamehaì e te faahopeà.

18 O vau teie e ora nei. Pohe noa ai au, e inaha, e tià vau i te oraraa e a muri noa atu. Âmene. E tei ia ù te täviri o te pohe e to häte.

19 E tënä na, e päpaì òe i te mau mea ta òe i ìte iho nei, e te mau mea e vai nei, e te mau mea e tupu a muri nei.

 Ioane 20.19-31

Te färaa mai Ietu i ta na ra mau pipi

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou: Ia ora na òutou

20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra.

21 Ua parau faahou mai ra Ietu ia rätou: Ia ora na òutou. Mai ta ù Metua hoì i tono mai ia ù nei ra, e tono atoà hoì au ia òutou na.

22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra:

A färii i te Värua Maitaì.

23 Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia To Toma ìte-roa-raa i te Fatu

24 E te hoê o te Àhuru mä piti ra, o Toma, o të parauhia ia, ia Titimo ra, aore rä ia ia rätou ra a tae mai ai Ietu ra.

25 Ua parau atu ra te mau pipi ra ia na: «Ua ìte aè nei mätou i te Fatu Ua parau mai ra o ia ia rätou: «I òre au i ìte i te puta âuri i ta na rima ra, e aore i tuu i ta ù rima i taua puta âuri ra, e aore hoì ta ù rima i tuu i ta na àoào ra, e òre roa ia vau e faaroo.

26 E ruì varu aè ra, tei roto faahou atu ra te mau pipi i te fare, e o Toma atoà hoì, ua haere mai ra Ietu, ua ôpanihia nä ôpani, ua tià mai ra o ia i röpü, ua parau mai ra: «Ia ora na òutou

27 Ua färiu mai ra ia Toma, ua parau mai ra: «A faatoro mai na to rima, e a hiò mai na hoì i ta ù rima nei; e a faatoro mai na hoì i to rima e fäfä i ta ù àoào. Eiaha e faaroo taìàtä, e faaroo rä.

28 Ua parau atu ra Toma ia na, nä ô atu ra: «E ta ù Fatu, e ta ù Atua.

29 Ua parau mai ra Ietu ia na: «No te mea te hiò mai nei òe ia ù, e Toma, i faaroo ai òe? E ao to te feiä aore i ìte ia ù a faaroo mai ai. Tei ia na te Tamaiti ra, tei ia na ia taua ora ra

30 E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta.

31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Manaò.

I muri aè i te tau o te pö mutu òre, te matara nei te ùputa o te märamarama e te ora. Nä roto ia Ietu, ua riro mai te reira märamarama ei taata, ua hiti mai i roto i te oraraa o te taata e ua faatupu atoà i te mau täuiraa rarahi. E tano tätou e faaäu i te reira i te òhuraa o te âvaè i nià i te mahana, te vähi e tanohia i nià i te ànaanaraa o te mahana, tei roto ia i te märamarama, e te vähi të òre e tano i nià i te ànaanaraa o te mahana, ua moè ia i roto i te pöiri. Te vähi taa ê rä, te mea ia e, e parau nahonaho to te òhuraa o te âvaè i nià i te mahana. Eita te âvaè e tano e faaoti e, i teie hepetoma e faaea o ia i te òhu ; âreà te taata, tei roto to na parau i to na rima, e tiàmäraa to na no te färii e no te òreraa e färii i te märamarama o te parau, e tiàmäraa to na no te hinaaro i te märamarama, aore ra te pöuri. Ia faaroo tätou i te mau parau no teie mahana teie ia te mau e turu nei i te parau tumu :

-Taramo 118, 24 O te mahana teie i faaauhia e te Fatu; e òaòa tätou, e e fänaò i teie nei mahana.

-Òhipa 5, 16 E rave rahi hoì to te mau ôire ra i haere mai e àti noa aè, i te hopoiraa mai i te feiä maì e te feiä i peàpeà i te värua faufau i Ierutarëma: e faaora-anaè-hia iho ra rätou atoà.

-Àpotarupo 1, 18 O vau teie e ora nei. Pohe noa ai au, e inaha, e tià vau i te oraraa e a muri noa atu. Âmene. E tei ia ù te täviri o te pohe e to häte.

-Ioane 20, 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

 

Te ora o tei faaroo.

Te parau tei àtutu.

Aita te òhipa a te Atua i faaea noa i te ùtu no te menema o te tiàfaahouraa. Ua riro ra teie vahi, ei ômuaraa i te hoê tau âpï no ta na mau òhipa, i te mea ua haafaufaa – òre - hia, te mau mea rii tei haafifi i te tupu maitaìraa, ta te Atua faaìteraa i to na puai e to na mana faaòreraa hara. No reira ua î te Atua i te aroha, ua haapunihia e ana ta na Tamaiti i te märei o te pohe, no te arataì ia na i nia i te fenua no te feiä ora, i reira O ia e faatupu ai i te eufe no te ORA MURE ÒRE. Ia tià ia Ietu tei tiàfaahou mai ia faateitei te âuà no te ora, o ta te Atua e tiaì nei na roto i te Fäîraa to te ao e o Ietu - Metia e Tamaiti ia na te Atua ora.

Te faanahoraa o te taiòraa.

Ta tätou ra taiòraa, e tià ia parauhia e maha tuhaa ra rahi teie e vai nei.

1) To Ietu hinaaroraa e heheu ia na iho i ta na mau pipi (Ir.19-23).

2) Na pipi 10, e te faaroo òre o Toma.                           (Ir. 24-25).

3) Te to Ietu färaa mai, e o Toma.                                  (Ir. 26-29).

4) Te ôpaniraa e te fä o teie Èvaneria.                            (Ir. 30-31).

Tuatapaparaa.

Ua tupu teie parau i te mahana ihoä no to Ietu tiàraa mai, mai te pohe. Te haere nei Ò ia e färerei i to na mau taeaè tei täpu i to rätou tuàtiraa e te mau taata, e au ra e, ua faatea rätou i to te ao.

I roto i tera taime to Ietu heheuraa ia na iho i ta na mau pipi, e färereiraa mätamua roa teie no na i muri aè i to na tiàfaahouraa. Te haafaufaahia nei te parau no te taime, e aore ra te parau no te mahana, e ère atu ra i te täpati Ati - Iuta, te mahana mätamua ra no te hepetoma te täpati teretetiano. Oia hoì e faaea te täpati tahito, no te faatura i teie tau âpï e matara nei.

I te mahana mätamua no te hepetoma to Ietu haereraa i to na mau taeaè ra. Ia hiòhia e ère teie Ietu e haere nei mai tera Ietu mätamua. E Ietu ra teie tei ö roa i roto i te huru Atua ìnaha  aita e paruru no te tapeà ia na. Aita to te taata e mana faahou i nià ia na. Noa atu ua täpirihia te òpani fare aita te reira i riro ei fifi no na no te haere e hiò i te mau pipi. Mai te pohe tei òre i täpeà i to na tino tähuti, aita atoà te ùputa fare i täpirihia i riro e täpeà ia Ietu i roto i ta na òpuaraa. Aita anei ra teie hiòraa e turaì nei i te manaò i nià i te tahi atu manaò, òia hoì mai te mea, aita e òhipa e tià ia täpeà ia Ietu ia haere i te vahi ta na i ôpua e roaa anei i te taata ia paruru, ia täpeà ia Ietu ia tomo mai i roto i te àau o te taata ta na i hinaaro i te tomo.

I roto i teie färereiraa mätamua no Ietu e ta na mau pipi ia hiòhia te faaòhipa nei Ietu i te reo e te parau no te tiàfaahouraa, IA ORA NA OUTOU... o ta na ia parau mätamua. E peu mätauhia teie òhipa e te Ati - Iuta, èi faaìteraa i te täpaò  no te HAU, i te mau taime atoà e farerei ai te tahi i te tahi taata, eita ra te tahi taata pohe e aroha i te taata ora. Teie ra ia faaäuhia te reira òhiparaa mätauhia e teie ta Ietu e horoà nei e taa-ê-raa rahi roa to na òhiparaa no te mea te hinaaro mau ra te mau pipi i te hau e no te mea atoà hoì te hau ta Ietu e manaò ra e horoà, ua roaa ia te reira ia na na roto i to na tiàfaahouraa. No reira i to na färaa mai i teie nei e ère ia no te vai iho noa i te mau pipi i roto i te huru ta rätou i mätau noa, te mataù anei, te feà anei, te peàpeà anei, te paruparu anei, te haere mai nei ra o Ietu no te ùme atoà i te mau pipi i roto i to na tiàfaahouraa e te mau hotu atoà e manii mai na roto i taua parau ra .IA ORA NA OUTOU, e aore ra èi IA OUTOU TE HAU, o te tahi parau âpï teie e faahuruê i te oraraa o te mau pipi. E toru taime to Ietu faahitiraa i teie parau IA ORA NA. No te horoà faahou i te hoê tiàturiraa päpu maitaì i roto i te mau pipi e o Ietu mau teie i roto ia rätou ia hiòhia, aita te parau i ravaì noa. Ua âpeehia ra te parau no te hau e te mau täpaò hiòhia e te mata òia hoì, te rima e te àoào o te Fatu .Te rima e te àoào o ta Ietu e faaìte nei i te mau pipi o na täpaò ia tei faa-iho-faahou mai i te mau òhipa atoà i tupu i nià i te Fatu. Teie rima e teie àoào e ère i te mea puta noa i te faufaa òre, ua puta ra no te òhipa. Ahiri paha aita te rima e te àoào o Ietu i puta e tiàturi anei te mau pipi e o Ietu ihoä teie i roto ia rätou. I teie taime no te paruparu no te tiàturiraa o te mau pipi e ò Ia ihoä ua tiàfaahou mai o Ietu, te riro nei te täpaò èi mea faufaa, te riro nei hoì èi turu ia rätou. Te auraa o teie mau täpaò èi faaìteraa ia e, ua matara te ùputa no te patireia o te Atua, i te feiä atoà tei tiàturi i te tiàfaahouraa o Ietu-Metia. I te taime e päpu ai i te mau pipi e o Ietu teie tei manaòhia  e ua pohe-roa, te riro nei to rätou ìte faahouraa ia Ietu mai te hoê märamarama rahi tei hiti mai no te turäma i te hoê pupu taata tei parahi i raro aè i te maru pohe. Teie märamarama tei hiti mai te faahoì faahou mai nei te reira i te tahi mea e hiaai-noa-hia ra e rätou, òia hoì te òaòa i to rätou âau. Mai te òpani tei òre i täpeà ia Ietu òia atoà te mataù e vai ra i roto i te âau o te mau pipi aita te reira i riro èi täpeà i te òaòa ta Ietu e horoà nei i te mau pipi ra, tano atu ai tera reo e: òaòa aè ra te mau pipi i te ìteraa atu i to rätou Fatu, e tano ia parauhia na Ietu taua òaòa ra e hopoi mai nei. Te òaòa tei hoì faahou mai o te hiòraa faufaa rahi te reira o te riro ei täpaò no te tauiraa e roaa nei i te mau pipi na roto ia Ietu. Tera täuiraa te faaineine nei te reira i to rätou tonoraa e to rätou färiiraa i te horoà a te Atua.

Te faufaa o te parau.

Ua haapüaì mai ra o Ietu te aho ora i nià ia rätou ma te parau e a färii mai i te Värua maitaì. Mai te Metua i tono mai ia Ietu te na reira atoà nei ò Ia i te mau pipi. E au atu ra e, e tonoraa na te Atua iho teie; e ère mai te mau tonoraa i ìtehia hou te tiàfaahouraa mea huruê rii teie, ìnaha teie Ietu e tono nei o Ietu ia tei upootià i nià i te pohe o tei riro èi ùputa tei faatiàma i te mau haavïraa atoà e te mau ìno atoà. Te tonohia nei te mau pipi no te faaìte i te tahi parau ta rätou i ìte e ua tupu, no te rave atoà i te parau no te faatiàmaraa i te taata i te mana faatîtî o te hara ta Ietu e parau nei e, ta òutou e faaòre ua faaòrehia ia ....ta òutou i vai iho....ua vai-iho-hia ia .Teie ra ia hiòhia ua àpeehia teie parau e te aho o te Atua òia hoì te Värua Maitaì o te turu i te mau pipi i roto i ta rätou faaotiraa òhipa. Mea faufaa teie parau eita e maoro roa te tuuhia nei te mau pipi i mua, i te hoê taeaè tei faaruè i te mau haaputuputuraa. Ua haere teie taeaè i hea.....aita tätou i ìte. Tätou ra e ìte nei ua tuuhia na pipi hoê àhuru i mua ia Toma tei vai noa ò ia anaè iho i to na pae. I nià ia Toma ua haamata te parau no te faaìteraa. Te faaìteraa i ò nei ua niuhia i nià i te parau no te Fatu ta te tahi pae pipi i ìte e ua tiàfaahou. Te parau tumu e hinaarohia nei ia faaroo o Toma. Teie ra aita teie taeaè i färii i taua faaìteraa ra. Te vahi maere o Toma anaè i to na pae hoê àhuru pipi i to rätou pae aita ihoä o Toma i täui mea maere roa. O Toma anei tera e fifi ra aore ra, te feiä faaìte tei paruparu. Teie huru e ìtehia nei i roto ia Toma e to na mau taeaè pipi o te tahi ihoä ia huru tei ìte pinepinehia i roto i te àai o te tupuraa o te Ètärëtia òia hoì, te faatäuiraa i te hoê taata e ère te òhipa òhie no te mea i te rahiraa o te taime te tïtau nei te taata i te tahi täpaò aore ra i te tahi mau òhipa e àpee i te parau e te faaìteraa. No Toma eita o ia e tiàturi mai te mea eita ò ia  e ìte i te täpaò.

I teie vahi, e i mua hoì i teie huru tïtauraa e hope ai te òhipa a te taata e tano atu ai ia parau e, o Ietu anaè iho te tano ia pähono ia Toma. Ia tae ra i te piti no te täpati, òia hoì te vaù o te mahana, ua hoì - faahou mai o Ietu i ropu i ta na mau pipi, e i te reira taime te tuuhia nei o Toma i mua i to na Fatu. Eita paha e òre e ua hoì mai o Ietu no teie mamoe ua hoì mai ia tupu to Toma tiàturiraa päpu ia Ietu tei tiàfaahou. Mai ta Ietu i faaìte i to na rima e to na àoào i te tahi pae o te mau pipi te na reira atoà nei o ia i nià ia Toma.

Ia Toma ra ua parau roa ia o Ietu ia faatoro o Toma i to na rima no te fafa i to Ietu mau puta. E fafa o Toma i te vahi i niuhia te ùputa no te patireia o te Atua, ma te faaìte atoà e te hinaaro nei te Atua i fafahia to na âau e Toma. Teie te raveà i manii mai ai na roto i te vaha o Toma te hoê fäìraa faaroo nehenehe roa E TA U FATU E TA U ATUA. I muri aè i teie Fäîraa faaroo e tano anei ia parau e, e au o Toma i te feiä atoà tei atea i te èà tei hinaaro ra ia turuhia rätou ia amohia to rätou paruparu ia ìte faahou rätou i te faaroo. Nahea i te turu i te feiä tei feà no teie tau ìnaha hoì aita faahou o Ietu mai ta Toma täpeàpeà i tera tau. Te horoà nei o Ietu i te pähonoraa i teie uiraa, E AO TO TE FEIA AORE I ÌTE IA Ù A FAAROOO AI.

Teie te parau faufaa ta Ietu i tiàfaahou e horoà nei no tätou tei òre i fänaò i te fafa ia na e to na mau puta, e roaa atoà te ora ia tätou. I o nei te faaìte nei te Fatu e eita te ora âpï ta te tiàfaahouraa e horoà nei i täôtià-noa-hia no te feiä tei hiò mata roa, tei fafa roa, ia Ietu ua faanaho-atoà-hia te ora âpï no te feiä tei faaroo noa aita ra i ìte. E parau hohonu teie, mea faaroo noa ua tiàturi. Ia hiòhia e mea iti roa te feiä tei ìte ia Ietu tei Tiàfaahou, e nunaa rahi ra tei faaroo e ua tiàturi. A hiò na i te mau Ètärëtia ta Pauro i haamau i to na tau e tei tupu noa i muri mai, te taatoàraa mea faaroo noa ua tiàturi ra. E tano ia parau e te täuiraa ta te tiàfaahouraa i faaìte e haere roa te reira i roto i te parau e ìtehia to na mana i nià noa i te parau, e färerei atoà ai ia Ietu. No reira te mea e tïtauhia nei te färiiraa te taata i te parau ora a te Atua tei faaìte mai e ua tiàfaahou Ietu, te hinaaro nei O ia e ùme i te taata i roto i te òaòa no tera Parau Âpï. E ère anei o te tumu ia i papaì ai o Ioane i ta na Èvaneria ia faaroo to te ao e o Ietu te Metia te tamaiti a te Atua ora.

Te faaìte atoà nei teie parau e ua matara te ùputa o te raì na roto i te tiàfaahouraa o Ietu eiaha ra tätou e òpani te mau ùputa o te fenua.

Terai or. Faatura.