Ruta èv. 10.1-20 Tütähia

 

Tāpati 3 Tiurai 2022.

ÔROÀ

Tütähia

Taramo 66

1 Na te Mënätehe. E Himene, e Taramo. E pii hua i te òaòa i te Atua, e te mau fenua e.

2 E himene ei haamaitaì i to na iòa, e faariro i to na hanahana ei haamaitaìraa ia na.

3 E parau atu i te Atua: «E mau räveà mataùtaù ta òe. No to òe ra mana rahi i auraro mai ai to mau ènemi ia òe ra.

4 E haamori te mau fenua atoà nei ia òe, e himene ia òe, e himene i to òe ra iòa. Tera.

5 E haere mai e hiò i te mau òhipa a te Atua. E mea mataùtaù ta na i rave i te taata nei.

6 Ua faariro o ia i te tai nei ei repo marô, ua nä raro noa rätou nä te moana i te haere, i reira to tätou òaòaraa ia na.

7 Te mana nei o ia i to na püai e a muri noa atu. Te tiàtonu ra to na mata i te mau êtene; eiaha tei haùti ra e faateitei ia rätou iho. Tera.

8 E haamaitaì i to tätou Atua, e te mau taata nei e. Ia ìteä hoì te reo i te haamaitaìraa ia na.

9 O o ia tei tiaì ia tätou e ora ai, e o tei faaitoito i to tätou âvae ia òre ia pähee.

10 Ua tämata-mau-hia mätou e òe, e te Atua e. Ua tämä òe ia mätou mai te ârio i tämähia ra,

11 ua tuu òe ia mätou i roto i te märei, e ua tuu òe i te hopoià teiaha i nià i to mätou tauupu.

12 Na òe i faahoro i te taata nä nià i to mätou upoo, ua nä roto mätou i te auahi e te pape. Ua arataì rä òe ia mätou i te fenua taoà.

13 E tomo vau i to fare mä te tütia-täauahi, e faatupu vau i ta ù mau èuhe ia òe ra,

14 tei parauhia e ta ù vaha, e na ta ù vaha i faaìte i ta ù àtiraa ra.

15 Te tütia-täauahi poria ra ta ù e hopoi atu ia òe ra: te mämoe oni, e te mea noànoà atoà te puaatoro e te puaaniho ta ù e faatütia. Tera.

16 E haere mai, e faaroo, o òutou atoà e mataù i te Atua ra, e na ù e faaìte i ta na i rave i to ù nei värua.

17 Ua pii atu ra ta ù vaha ia na, e ua faateitei ta ù arero ia na.

18 Ahiri rä te faatià ra ta ù âau i te ìno, e òre au e faaroohia mai e te Fatu.

19 Ua faaroo mau rä te Atua ia ù, e ua haapaò mai i ta ù i ani atu.

20 Ia haamaitaìhia hoì te Atua. O ia aore i haapae i ta ù nei pure, e aore hoì i faahoì i to na aroharaa ia ù nei.

Ìtaia 66.10-14

10 E òaòa òutou, e Ierutarëma atoà, e ôuàuà noa i te òaòa ia na, òutou, e te feiä atoà e aroha ia na; ia rahi to òutou òaòa ia na, òutou atoà o tei òto ia na.

11 ia òte òutou e ia fiu, i te ü ra i te haamähanahana nä na ra; ia noaa mai ia òutou i te ü, e ia òaòa i te rahi o to na ra hanahana.

12 Te nä ô mai ra hoì te Fatu: Inaha, te höhora nei au i te maitaì i nià ia na mai te pape ra; e te taoà o te mau fenua mai te pape puè ra: e òte òutou i te ü, e tütähia i te èe; e ei nià i te hümaha òutou e ueuehia ai.

13 Mai tei haamauruüruhia e to na ra metua vahine; o to ù ia haamauruüru ia òutou; ei Ierutarëma hoì òutou e haamauruüruhia ai.

14 E ìte òutou i teie nei mau parau, e òaòa hoì to òutou âau; e ruperupe hoì to òutou mau ivi mai te räau rii âpï ra: e ìteä te rima o te Fatu i to na ra mau tävini, e to na riri i to na ra mau ènemi.

Taratia 6.14-18

14 Eiaha roa rä vau ia ârue, maori rä i te tätauro o to tätou Fatu ra o Ietu Metia, i riro ai teie nei ao ei mea faatataurohia ia ù, e o vau hoì ei mea faatataurohia i teie nei ao.

15 Ia Ietu Metia nei hoì, aore o te peritome, e aore atoà o te peritome òre e faufaa, ei taata âpï rä.

16 E te feiä atoà e haere nä teie nei èà, ei hau to rätou, e te aroha, i nià atoà i te Ìteraèra atoà o te Atua ra.

17 Teie nei, eiaha roa ei taata e haapeàpeà mai ia ù, te vai nei hoì te mau täpaò a te Fatu ra a Ietu i nià i ta ù tino nei.

18 E a ù mau taeaè, ei to òutou värua te aroha mau o to tätou Fatu ra o Ietu Metia ra. Âmene.

Ruta èv. 10.1-20

Te tono-raa-hia te tino hitu àhuru mä piti

1 E muri aè ra, ua haapaò atu ra te Fatu i e hitu àhuru mä piti, e tätoopiti atu ra i te tonoraa ia rätou nä mua ia na, i te mau ôire e te mau vähi atoà ta na i ôpua ra e e haere atoà o ia i reira.

2 Ua parau atu ra o ia ia rätou: «Te rahi mau nei te àuhune tïtona, te iti nei rä te feiä e ôoti. E teie nei, e pure òutou i te Fatu o te òhipa, ia tono ä o ia i te rave-òhipa ei ôoti.

3 A haere, inaha te tono nei au ia òutou mai te ârënio i rotopü i te mau ruto ra.

4 Eiaha ei färii moni e hopoihia, eiaha ei pütë, eiaha ei tämaa hopoi noa, eiaha roa e aroha atu i te taata i te äratià.

5 E te fare ta òutou e tomo ra, e mata na i te parau atu: «Ei hau to teie nei ùtuafare.»

6 E tei reira te hoê tamaiti no te hau, e vai ä taua hau ra i nià iho ia na; aore rä, e hoì mai ia i nià iho ia òutou. 7 Ei taua fare ra pärahi ai, e àmu hoì e e inu i ta rätou e horoà mai ra, e au hoì i te rave-òhipa ta na ra utuà. Eiaha e haere i tërä fare, i tërä fare.

8 E te ôire ta òutou e tomo ra, e i ìte mai rätou ia òutou, e àmu i ta rätou e tuu mai i mua i to òutou aro ra;

9 e faaora hoì i to reira maì, e parau atu hoì ia rätou: «Te fätata mai ra te Pätireia o te Atua ia òutou nei.»

10 Âreà te ôire ta òutou e tomo ra, e aore rätou i ìte mai ia òutou, e haere òutou i te aroä i taua ôire ra, a parau atu ai:

11«Te repo o to òutou ôire e piri mai ia mätou nei, te horoi atu na mätou. Te fätata mai nei rä te Pätireia o te Atua ia òutou, ia ìte hoì òutou.»

12 Teie rä ta ù parau ia òutou: e huru tià aè Totoma ia haamahu ia tae i te reira mahana ra, i te reira ôire.

Te àti o te mau ôire tiàturi òre ia Ietu

(Mät 11,20-24)

13 Âuë òe, e Toratina e, Auë hoì òe, e Petetaita  Ahiri hoì te mau temeio i ravehia i roto ia òrua na, i ravehia i Turia e Titona, ua tätarahapa ê na rätou, ua pärahi i te rehu auahi mä te àhu paau.

14 E huru tià aè ra Turia e Titona ia haamahu ia òrua na, ia tae i te mahana haaväraa ra.

15 E o òe na hoì, e Taperenaumi i faateiteihia i nià i te raì na, e höparahia òe i raro roa i häte.

16 O tei faaroo mai ia òutou na, ua faaroo mai ia ia ù; e o tei vahavaha mai ia òutou na, ua vahavaha mai ia ia ù; e o tei vahavaha mai ia ù ra, ua vahavaha ia ia na i tei tono mai ia ù nei.

Te hoìraa mai te tino hitu àhuru mä piti

17 Ua hoì faahou mai ra taua hitu àhuru mä piti ra mä te òaòa, nä ô mai ra: «E te Fatu, ua vï atoà te mau tëmoni ia mätou i to iòa na.

18 Ua parau atu ra o ia ia rätou: «Ua ìte au ia Tätani i te maìriraa, mai te uira no nià i te raì ra.

19 E inaha, e haamana atu vau ia òutou, ia taahi noa atu i te ôfï, e te pata, e te mana atoà o te ènemi: e aore roa e mea e pohe ai òutou.

20 Eiaha rä e òaòa i te mea ua vï te mau värua ìno ia òutou; e òaòa rä i to òutou iòa i päpaìhia i nià i te raì ra.

Manaò.

Tütähia, e reo Mäòhi teie no te mau i te hoê taata tei paruparu e aore tei fifi i te haere, mauhia teie taata i nià i te tua, te taata i paruparu, e mau i te tumu rei o te taata e amo ra, àreà te taata e amo ra, e mau ia i te hümaha o te taata paruparu e parau atoà nei te tahi pae e kakanua. E òhipa na taata toopiti ia tupu maitaì te haereraa i te vahi i reira te taata paruparu e rapaauhia ai, to na auraa ra na taata toopiti nei na raua e ìmi i te mau raveà atoà ia tupu maitaì te ora, e ia itoito faahou te taata paruparu. Te tütä no te hoê taime poto e tupu teie faanahoraa i nià i te èà, te èà ra e vahi te reira no te haereraa tei faatorohia e te âvae taata e aore na te mau puaa no te aru. Ia faaroo tätou i te reo no te päpaì taramo te haamanaòraa mai e, te haamaitaì ra te mau mea atoà i rahuhia e te Atua, te ârue ra e te faahanahana ra hoì rätou ia na. Te auraa, aita rätou i riro noa ei mauruüruraa na te Atua, te tämau atoà ra rä rätou i te haamaitaì i te Atua, oia hoì te faaìte i to na maitaì. I teie piti o Tiurai e faaìte ûàna ä te Ètärëtia Porotetani Mäòhi i to na manaò peàpeà i te mau òhipa tei òre au i ravehia i Mäòhi Nui te heruraa repo i Makatea e 49 mätahiti, haapaìnaraa päura âtömï i Maururoa 30 mätahiti ua tupu teie mau òhipa i te Tuamotu, e naò ia te manaò i te parauraa e, 79 mätahiti to te nünaa Mäòhi faaòhiparaahia e te mau òna, e tae noa atu i te turu a te mau faatere fenua i tera tau, e hau atu i te reira te haamauraahia te tahi mau ture fenua tei òre e au i te oraraa o te Mäòhi tei faareru i to na oraraa vaamateìnaa, e taahi faahou te nünaa Mäòhi i nià i te puromu no te faaìte i to na mauruüru òre i te naneraahia te rähu a te Atua i tei iòa o te täpïhoo. I mua i teie mau òhipa i tupu te piihia nei tätou ia tià no te faaìte i te hau o te  fenua ma te faahau ia tätou i te fenua i reira noa tätou e maitaì ai no te faatupu i te âparauraa i to tätou mau taeaè mau tuahine tei òre i oti to rätou tärià i te hämanihia. No te tauturu i teie mau manaò, na te haapotoraa o te mau taiòraa no teie mahana e turäma ia tätou. 

-Taramo 66, 12 Na òe i faahoro i te taata nä nià i to mätou upoo, ua nä roto mätou i te auahi e te pape. Ua arataì rä òe ia mätou i te fenua taoà.

-Ìtaia 66, 12 Te nä ô mai ra hoì te Fatu: Inaha, te höhora nei au i te maitaì i nià ia na mai te pape ra; e te taoà o te mau fenua mai te pape puè ra: e òte òutou i te ü, e tütähia i te èe; e ei nià i te hümaha òutou e ueuehia ai.

-Taratia 6, 17 Teie nei, eiaha roa ei taata e haapeàpeà mai ia ù, te vai nei hoì te mau täpaò a te Fatu ra a Ietu i nià i ta ù tino nei.

-Ruta èv.10, 19 E inaha, e haamana atu vau ia òutou, ia taahi noa atu i te ôfï, e te pata, e te mana atoà o te ènemi: e aore roa e mea e pohe ai òutou.

Ia hiò tätou i te mau parau e märamarama tätou, e hinaaro atoà to te Atua i te taata, e täpura òhipa atoà ta na i faataa na te taata i nià i te fenua i reira to te Atua haapärahiraa ia na. No te mea e òhipa te taata na te Atua, e òhipa atoà atu ai o ia no te Atua. Mai ta te fenua e faaìte noa ra, te hopeàraa o te òhipa ta te taata e rave atu, eere te taata iho, te Atua rä, ia ìtehia ta na ôpuaraa. Te mea ra e tià ia tätou te haamaitaìraa i to tätou to tätou èà, ua ìte tätou e, e vähi haereraa te èà, e vähi e faaòhie i te tere o te taata. Mai te peu rä te vai ra te haamataraa o te èà, te vai atoà ra te vähi e hope atu ai. No reira, aita e faufaa to te èà mai te peu eita e tae i te tahi vähi. Te maitaì o te hoê èà, eere ia to na âano aore ra to na oaoa, te ìteraahia rä e, e èà, nä reira hoì te vähi e hope atu ai. Te èà hoì i poì i te àihere, e tano änei ia tämau-noa-hia i te parau e, e èà. Oia atoà te èà të òre e haerehia e te taata. Eiaha no te mea te faahepo nei te Atua i te taata ia rave ihoä i te èà e tae atu ai i roto i te ìteraa ia na, e uiraa noa rä teie tei hinaaro atoà i te hiò i te fifi o te hoê èà ia òre te taata ia hinaaro i te haere nä reira. No te mea te faaìte noa mai ra ia te reira peu i te faufaa òre o taua èà ra. Te reira mau änei hoì te mea e tano ia parauhia. I roto i teie tïtauraa ta te Atua i te taata aita o ia e anihia nei e tarai i te tahi èà âpï, mai te mea ra o ia te haamataraa o te mau mea atoà, e ei ia na hoì e haamata ai te parau o te Atua i te äteatea e te riro ei mea märamarama. Te hape rahi ia e ìtehia nei i teie mahana i roto i te taata i te manaòraa te tahi pae e, e èà âpï tei marari ia rätou e òhie ai te taata i te märamarama i te parau a te Atua, e aita e räveà maitaì aè no te taata maoti rä, te raveraa i taua èà i vaere-âpï-hia mai ra. A fifi aè te taata no te rahi o te òhipa tià òre, aore ra no te ûàna o te mau haavïraa, ua ìmi te tahi pae i roto i te parau a te Atua i te vähi e riro i te faatano mai i te rëni òhipa ta rätou e ôpua ra i te rave. A hinaaro hoì te tahi pae e ia ìtehia ta rätou peu tumu, ua ìmi atoà i roto i te parau a te Atua i te vähi ta rätou i manaò e riro ei paèpaè päpü i te rëni òhipa ta rätou i faaoti i te rave e heeuri ai taua peu tumu na rätou ra. Te hape i roto i teie huru arataìraa manaò, te mea ia e, eere te taata teie e haamaitaì nei i te èà o te Fatu, na te Fatu rä e vaere nei i te èà ta te taata i faaoti i te rave, na te Atua atoà rä e päruru nei ia na i mua i te mau faahaparaa e riro i te topa noa mai. Te Parau Maitaì no teie mahana tei nià i te èà to na tupuraa i to Ietu tono âpitipitiraa i na mau pipi e hitu àhuru mä piti, ma te horoà i te mau faanahoraa e au no teie tere, te òire tei òre e färii ia rätou e tutu i te repo i nià i to rätou âvae èi faaìteraa ua tae mai te Parau Maitaì i roto ia rätou tei òre i färiihia. I te mea na te parau noa e faaìte te tumu òhipa, te here e te aroha o te Atua Nui Tumu Tahi. Ia ravehia te tahi hiòraa i te pae no te reo, e nä ô ia tätou e : te vai nei te taò, te auraa o te taò, oia hoì te manaò ta na e faaìte ra, e to na tüàtiraa i nià i te tahi mea e vai ra i roto i te oraraa, e te vai ra hoì ta te taata tämataraa i te faariro i te reira taò ei räveà haamatararaa i to na mau manaò, òre noa atu ai te reira huru manaò e ìtehia ra i roto i taua taò ra. Eiaha atoà rä tätou e huna, i te tahi taime, te fifi atoà nei ihoä tätou i te märamaramaraa i te auraa o te tahi taò, no te mea aita e hope nei ia tätou te hiò i te rahiraa manaò e roaa i te hoê taò i te faaìte, e te täpeà noa mai nei tätou i ta tätou i mätau no te mea te reira ta tätou i pinepine i te faaroo. E tano te reira manaò i nià i teie parau no te haamaitaìraa i to tätou èà ta tätou e tïtau atoà nei i te märamarama. Ei hiòraa : ta ù haamaitaìraa i te tahi fare, te rahiraa òhipa ia ta ù i rave, te rahiraa taime hoì e te rahiraa faufaa ta ù i faataa ia riro te reira fare ei vähi e òaòa ai te âau i te pärahi. Te reira atoà te manaò ia haamaitaì au i te tahi fenua. Ore noa atu ai i parau-roa-hia, ua riro rä teie huru parauraa ei haapäpüraa e, tei roto te fenua i te àihere, aita e mäa i tänuhia, aita e òhipa i ravehia a riro atu ai te reira fenua ei ùmereraa na te âau e ei mätaìtaìraa na te mata.

E ui ia tätou i teie nei e, te reira atoà änei te manaò ia parau tätou e, haamaitaì i te Atua, aore ra ia parau tätou e, haamaitaì i te èà o te Fatu. E aha mau ta tätou e parau ra. E maraa änei ia tätou te parauraa e, e tuhaa atoà ta tätou i roto i te maitaì o te Atua, e no tätou atoà o ia i maitaì ai. Eita e òre e, te hiroàroà rii ra tätou  i te fifi o teie huru manaò. Eere teie uiuiraa i te tahi haafaufaa-òre-raa i te taata e te òhipa e oti atoà ia na i te rave. E parau mau, te hinaaro nei te Atua i te taata no te faatupuraa i ta na ôpuaraa, no te mea rä na na te ôpuaraa, e tano atoà ai tätou e parau mai ta Tämuera i parau e : E parau mai, te faaroo nei to tävini (1 Tämuera 3, 10). Aita atu ihoä e mea faufaa roa hou te mau òhipa atoà a ravehia ai maoti rä, te mämüraa e te horoàraa i te tarià i te mea e faauehia mai ra. Te auraa, mai te peu te vai ra te rave, te vai atoà ra te ìteraa i te òhipa e rave, e te huru raveraa hoì e tupu ai te mauruüru o te Fatu òhipa. Ua ìte atoà rä tätou e, aita e òhipa ta te Atua e ani nei i te taata tei òre o ia i nä mua i te rave, e no te mea o te Atua iho teie e parau nei e : A haamaitaì i te èà o te Fatu, ua ìte atoà ia tätou e, eere na te taata e tarai i te èà o te Fatu, te mea noa e anihia nei ia na, te ìmiraa ia i te räveà ia ìtehia te maitaì e vai ra, eere rä na te taata e faaineine i te èà o te Fatu, mai te mea ra o te tumu ia i taere ai te haereà mai o te Fatu. Te mau mea atoà e òre e tià i te taata nei, e tià i te Atua. I mua rä i te fifi o te reo ta tätou e färerei nei, aita atu paha e òrometua maitaì aè e tano tätou e tiàoro maoti rä, te rahu iho a te Atua : 12 Na òe i faahoro i te taata nä nià i to mätou upoo, ua nä roto mätou i te auahi e te pape. Ua arataì rä òe ia mätou i te fenua taoà. Te märamarama ra ia tätou e, te haamaitaìraa ta te Atua e tiaì mai nei i te taata ia rave, te faateiteiraa ia i to na iòa, te faahanahanaraa ia na, te ìteraa hoì e te färiiraa i te tiàraa Atua o te Atua. I manuia ai te pororaa a na pipi e hitu àhuru mä piti, te mau taò ta rätou i faaòhipa no te haamäramarama i te ôpuaraa faaora a te Atua. A rahu ai te Atua i te raì e te fenua, e to rätou atoà ra, ua faaìte mai te mau mea atoà ta te Parau i faatupu i te maitaì ta rätou e mau ra, te maitaì hoì i faatupu i te mauruüru o te Atua. E no te mea te Atua te tumu o te maitaì ta rätou e faaìte noa ra, i tämau noa ai rätou i te haamaitaìraa i te Atua, oia hoì te faahoìraa i te maitaì i te Atua ra. Te märamarama atoà ra ia tätou e, i ani ai te Atua i te taata ia haamaitaì i te èà o te Fatu, eere ia no te tahi tumu ê atu maoti rä, te faaìteraa i te maitaì e vai ra, oia te maitaì o te Atua tei òre te taata i ìte faahou no te apiapi-roa-raa to na feruriraa i ta na iho mau faanahoraa. Ia moè rä te maitaì o te Atua, eere änei e, o te Atua atoà ia terä e moè ra, e a moè te Atua, e hoì faahou te fenua i to na huru hou te Parau, oia hoì i roto i te pöiri e te ano. ua ìte ia tätou e, te taata, te tahi ia fenua e anihia nei ia faahoì-faahou-hia i roto i te rima o te Fatu, ia riro ei vähi haereraa no te Fatu, ei vähi hoì e hotu ùmu ai te aroha e te here tei riro ei täpaò e ìtehia ai te mau taata o te Atua i te mau taata eere i to te Atua, te mau taata i haerehia e te Fatu i te mau taata tei òre i haerehia e te Fatu, oia hoì te mau taata tei faataa i te èà o te Fatu i roto i to rätou âau, i te mau taata tei òre i faataa i te tahi haereraa no te Fatu. E tano te märamaramaraa i teie parau ia faaauhia i ta te taata märamaramaraa i te pure a te Fatu i te vähi e nä ô ra e : Ia tae mai to òe Hau. Ua rahi roa te taata e manaò noa nei e, na te Atua iho e haere mai e haamau i to na Hau i te fenua nei. I teie nei rä, ia òre te Atua ia hau, oia hoì ia òre o ia ia mana i roto i te âau o te taata, nä hea o ia e mana ai i nià i te fenua, nä hea to na Hau e mau mai ai. No te mea hoì aita to te Atua e pärahiraa i roto i te âau o te taata, i òhie ai te taata i te haere e haamau i te hau o te taata, mana atu ra te taata i nià i te fenua nei e i roto i te âau o te taata iho. Te tämau noa nei ihoä te taata i te parau i te Atua e : Ia tae mai to òe Hau, te manaò rä, na te Atua iho ia te reira òhipa e rave, e aita roa atu ta na e tuhaa i reira. Te tahi haapäpüraa e, aita te Atua i hau e aita hoì to na parau i rahi i roto i te âau o te taata, te mea ia e, ua tae roa te tahi pae i te haapeàpeàraa i te Atua no te òreraa e vai iho noa mai ia rätou ia haapaò na i to rätou hinaaro, ia haere na hoì nä mua e haamau i te hau o te taata, ia oti, hoì mai ai e haapaò i te Hau o te Atua. A ui atu ai ia tätou e : to vai te èà e haamaitaìhia nei. No reira atoà paha te taata i te òhie i te färii i te manaò e, no Ioane teie faaueraa e haamaitaì i te èà o te Fatu, eere rä no te taata. Te auraa ra, eita ia rätou e naeàhia i te faahaparaa no te òreraa i haapaò e i rave i te òhipa i faataahia na te tahi atu e rave. No te mea eere te òhipa na te taata, e tano ai te taata e haere e rave i te òhipa tei au i to na manaò. E tämataraa noa rä te reira i te àpe i te parau. E au rii paì i te tahi tamarii tei faaroo i to na iòa i te tuöraahia e tei ani faahou mai e, o na mau änei terä e tuöhia ra. E nä ô noa tätou e, mai te peu e, no Ioane teie parau : e reo no te hoê i te tiàororaa i te mëtëpara …, o Ioane ihoä paha terä e tiàoro ra, o ia terä e tuö ra, no te mea rä eita o Ioane e tano e tuö ia na iho, te taata ihoä ia ta na e tuö ra ; e i haere mai ai hoì to Iutea e to Ierutarëma (Märeto 1, 5), no te mea ia ua faaroo i ta Ioane tiàororaa. Ua ìte atoà rä tätou e, te faufaa o te parau, eere no te mea ua parauhia, no te mea rä ua faaroohia, e aita atu hoì e täpaò hau aè i te maitaì ei haapäpüraa e, ua faaroohia te tahi parau maoti rä, ia ìtehia te tupuraa o taua mea i parauhia ra. Ta Ietu e parau nei e, 19 E inaha, e haamana atu vau ia òutou, ia taahi noa atu i te ôfï, e te pata, e te mana atoà o te ènemi: e aore roa e mea e pohe ai òutou.

Te taahi faahou nei tätou i teie 2 no Tiurai no te faaìte te ora hau noa ra te Mäòhi i nià i to na fenua ia Mäòhi Nui,

 

 

Teraì òr. Faatura.  

 

 

Haamanaò 2 No Tiurai

 

la France a effectué en tout 193 essais nucléaires en Polynésie entre 1966 et 1996. dont: – 41 essais atmosphériques réalisés malgré le traité d’interdiction des expériences dans l’atmosphère, signé en 1963 par les Etats-Unis, l’URSS et le Royaume-Uni. – 140 essais souterrains réalisés dans le sous-sol des atolls de Moruroa et Fangataufa,

Ruta èv. 9.51-62 Ârote.

 

Tāpati 26 no Tiunu 2022.

Ârote.

Taramo 16

1 Mitetäma na Tävita. E faaoraraa ia ù, e te Atua, te tiàturi nei au ia òe.

2 Te parau nei au i te Fatu e: «O ta ù Fatu òe, aita a òe e faufaa i to ù nei maitaì.»

3 Âreà te feiä moà i te fenua nei, o te feiä maitataì rätou o ta ù e pöpou nei.

4 E faarahihia to rätou mäuiui tei rü i te hoì i muri. Ta rätou tütia-inu toto ra, e òre au e hopoi, e òre hoì ta ù vaha e faahiti noa atu i to rätou iòa.

5 O te Fatu, o ta ù ia tufaa e ta ù âuà, o òe tei haapaò mai i to ù nei terero.

6 Ua maìri aè nei to ù terero i te vähi maitaì; e te maitaì nei au i ta ù nei tufaa.

7 E haamaitaì ä vau i te Fatu o tei haapii mai ia ù ra: te aò mai ra taù manaò âau ia ù i te ruì.

8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue.

9 I òaòa ai ta ù âau, e te òaòa nei ta ù värua; e taòto atoà ta ù tino nei mä te tiaì.

10 E òre hoì òe e vaiiho i ta ù värua i häte, e òre hoì òe e tuu i te taata moà ra ia ìte i te tähuti.

11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu.

1Te mau Arii 19.16-21

16 e faatähinu hoì òe ia Iehu a Nimeti, ei arii no Ìteraèra; e faatähinu hoì òe ia Êrïtaia a Täfata, no Âpere-mehora, ei perofeta ei mono ia òe ra.

17 E o tei ora i te òè a Hataera ra, nä Iehu ia e täparahi; e o tei ora i to òè a Iehu ra, Èritaia e täparahi.

18 E vaiiho rä vau i e hitu tautani taata o Ìteraèra no ù iho, o tei òre i tuu i te turi i raro ia Paara, e tei òre i hoì atu te vaha ia na.

19 Haere atu ra o ia; e ìte atu ra ia Èritaia a Täfata, roohia atu te ârote ra, hoê àhuru mä piti âpitiraa puaatoro i mua ia na, tei ia na hoì te mä piti: haere noa atu ra Èria ia na ra, e ua huri aè ra i to na àhu i nià iho ia na.

20 Ua faaruè iho ra o ia i taua mau puaatoro ra, e ua aùaù atu ra ia Èria, ua parau atu ra E haere na vau e hoì i ta ù metua täne e ta ù metua vahine, a pee atu ai au ia òe. Ua parau mai ra o ia ia na, A haere, c hoì: e aha atu hoì au ia òe?

21 Ua hoì atu ra o ia, ua rave iho ra i e piti puaatoro, ua tüpaì iho ra, e ua tunu iho ra, no nià te puaatoro te räau ei vahie e ua hopoi na te mau taata, e ua àmu iho ra rätou. Ua tià aè ra o ia, ua pee atu ra ia Èria, àti atu ra ia na.  

Taratia 5.1-18

Te tiàmäraa e te aroha èvaneria

1 E tënä na, e täpeà tämau mäite na i te tiàmä ta te Metia i faatiàmä mai ia tätou nei, e eiaha ia mau faahou i te tuto tävini ra.

2 Inaha, o vau teie o Pauro e parau atu ia òutou ra: e i peritomehia òutou, eita roa ia a òutou faufaa e noaa i te Metia.

3 E te faaìte faahou atu nei au i te taata atoà i peritomehia ra, e àmutärahu ia o ia e ia hope roa te ture atoà ra i te rave.

4 O òutou atoà o tei tïtau ia tiàhia i te ture ra, ua taa ê ia òutou i te Metia; ua faaruè ia òutou i te aroha mau.

5 No te Värua rä hoì i tiaì ai mätou nei i te hinaaro ra i te parau tià ia noaa i te faaroo.

6 I te Metia nei hoì ia Ietu, aore o te peritome faufaa, aore hoì to te peritome òre, o te faaroo rä e faatupu i te hinaaro ra.

7 I horo maitaì na hoì òutou, nä vai òutou i ärai i òre òutou i haapaò ai i te parau mau?

8 Eere tënä na manaò i to na, to tei haamau ia òutou na.

9 «E höpue te puèà atoà ra i te faahöpue iti haìhaì ra.»

10 E manaò maitaì rä to ù i te Fatu nei ia òutou, e e òre to òutou e riro ei manaò ê. Âreà i tei haapeàpeà mai ia òutou, ei ia na iho ia ta na utuà, eita e haapaòhia to na huru.

11 E o vau nei hoì, e a ù mau taeaè, te aò haere nei ä vau i te peritome, e aha vau i hämani-ìno-hia mai ai ä? Ua òre hoì te mäheaitu o te tätauro i reira.

12 Te hinaaro nei au ia faataa-ê-hia taua feiä i tiàrepu ia òutou na !

13 I parauhia atu hoì òutou, e te mau taeaè, ia noaa te tiàmä. Eiaha rä taua tiàmä ra ei faatupu i ta te tino, ei auraro aroha rä to òutou ia òutou iho.

14 Ua hope roa hoì ta te ture i te parau hoê nei, oia te parau ra e: «E aroha òe i to taata-tupu mai to aroha ia òe iho na.»

15 Ia faaoôo rä e ia hämani ìno òutou òutou iho, e ara, o te mou hoì òutou ia òutou iho.

Ia ärataìhia e te Värua

16 Teie rä ta ù parau: e haapaò i ta te Värua ra, e eiaha e faatupu i to te tino ra hinaaro.

17 Hinaaro ê hoì to te tino i to te Värua, e to te Värua ra i to te tino; e òre hoì räua e au; i òre i tià ai ia òutou ia rave i ta òutou i hinaaro ra.

18 Te ärataìhia ra òutou e te Värua, aore ia òutou i raro aè i te ture.

Ruta èv. 9.51-62

Aita te hoê ôire no Tämäria i färii ia Ietu

51 E fätata aè ra te mau mahana i te hope e reva ai o ia i nià, ua ôpua mäite iho ra o ia e haere i Ierutarëma. 52 E ua tono atu ra i te veà nä mua ia na, e tomo atu ra rätou i roto i te hoê ôire rii o to Tämäria e faanehenehe i te hoê täpaeraa no na.

53 Aita aè ra rä rätou i färii mai ia na, no te mea te haere tià ra o ia i Ierutarëma.

54 Ìte aè ra nä pipi na na ra, o Iatöpo räua o Ioane i te reira, ua nä ô mai ra räua: «E te Fatu, e tià änei ia òe ia parau mäua i te auahi ia maìri mai no nià i te raì, ia pau atu rätou, mai ta Èria ra?

55 Ua färiu atu ra rä o ia, àvau atu ra ia räua, nä ô atu ra:

«Aore òrua i ìte i te huru o to òrua âau.

56 Aore hoì te Tamaiti a te taata nei i haere mai e täparahi i te taata, i haere mai rä e faaora.

Haere atu ra rätou i te tahi ôire iti.

Te peeraa ia Ietu

(Mät 8,19-22)

57 E te haere noa ra rätou nä te èà tià, ua parau mai ra te hoê taata ia na: «E te Fatu, e pee atu vau ia òe i to òe mau haereà atoà.

58 Ua parau atu ra Ietu ia na: «E ana to te ârope, e tauraa to te manu o te reva, âreà te Tamaiti a te taata nei, aita o na tuäroì.

59 Ua parau atu ra o ia i te hoê: «A pee mai ia ù. Ua nä ô mai ra o ia: «E te Fatu, a tuu aè na ia ù e haere au e tanu i ta ù metua täne.

60 Ua parau atu ra Ietu ia na: «E vaiiho atu na i tei pohe e tanu i to rätou i pohe ra; e haere rä òe e poro haere i te Pätireia o te Atua.

61 Ua parau atoà mai ra hoì e tahi: «E te Fatu, e pee atu vau ia òe; e tuu na rä òe ia ù, e poroì na vau i to ù ra fëtii.

62 Ua parau atu ra Ietu ia na: «O te taata e tuu i te rima i nià i te ârote a hiò ai i muri, e òre ia e au i te Pätireia o te Atua.

Manaò.

Te parau e färereihia nei e tätou i teie mahana, tei tuu ia i te taata i mua i ta na iho hopoià e ta na faaotiraa i te fautua i te mau faanahoraa e au ia na ia faatupu ia puai te hotu o te maitaì e àua haaàti ra ia na i te vahi i reira o ia i te oraraa. Oia iho te ârote, èi haamarü te mau vahi paari o to na âau ia tià i te huero no te aroha e te here ia tupu maitaì, tei faahau ia na, i te mea te vai rii noa ra te tahi mau vahi i roto i to tätou âau, ua toro aahia i te hepohepo, tei haapitaataa te parau no te tiàmäraa, i fänau tiàmähia ai tätou i te mea e âià to tätou o Mäòhi Nui tei türamahia i te parau märamarama o to tätou hïroà Mäòhi, èi taata, èi vahine, èi tamäroa, èi tamähine, èi àiü, no Mäòhi Nui. I parauhia ai to te ârote, e mauhaa teie na te taata faaàpu, i muri ïti noa aè i te vaereraa i te vahi e tänuhia, i reira e faaòhipa ai teie mauhaa, no te haamarü i te repo, i reira te taata faaàpu e ìte ai e vahi ôfäfaì, mai te mea e vahi ôfäfaì te rä ia te mäa tano, vahi vari te rä ia, vahi repo märö te rä ia, vahi one te rä ia. Ia oti i te tänu e ùtaru ia ore ia paruparu te tupu o te mäa, mä te pipi i te päpe. I faahiti atu ai au i teie mau manaò no te huru tupuraa o ta tätou mau  taiòraa no teie mahana, mai te räau, e aore ra ma te àuri ârote i te faarapüraa i roto i to tätou âau. I te mea e repo fenua te taata nä mua roa, no reira e òre ai e tano ia faataa-ê-hia to na parau i to te fenua tei riro ei vähi i reira to te Atua òhiparaa atu, e to na hoì faaìteraa ia na, ei vähi hoì tei faatupu i te mauruüru o te Atua. Te auraa ra, te vähi atoà te reira e òhipa atu ai te taata ei faatupuraa i te mauruüru o te Atua. Mai te Atua i ìte i te tupuraa o te maitaì i roto i te mau òhipa atoà ta na i rahu, te hinaaro atoà nei o ia i te taata ia faatupu atu i te maitaì, te maitaì rä e mauruüru ai te Atua, aita e òhipa ta te Atua e ani nei i te taata, tei òre o ia i nä mua i te rave. Ua horoà ê mai na te Atua i te hiòraa, ua faaìte ê mai na i te èà ta te taata e pee atu. E te tau hoì tei riro ei fatimaùuraa na te taata, e ta te taata hoì i hiò mai te mea ra, o to na ia ènemi, to na paha te reira tauturu maitaì aè, e ta te taata hoì utuà, ta na haamauruüruraa. O teie te haapotoraa o na taiòraa e maha no teie mahana :

-Taramo 16, 5 O te Fatu, o ta ù ia tufaa e ta ù âuà, o òe tei haapaò mai i to ù nei terero.

-1Te mau Arii 19, 21 Ua hoì atu ra o ia, ua rave iho ra i e piti puaatoro, ua tüpaì iho ra, e ua tunu iho ra, no nià te puaatoro te räau ei vahie e ua hopoi na te mau taata, e ua àmu iho ra rätou. Ua tià aè ra o ia, ua pee atu ra ia Èria, àti atu ra ia na.

-Taratia 5, 13 I parauhia atu hoì òutou, e te mau taeaè, ia noaa te tiàmä. Eiaha rä taua tiàmä ra ei faatupu i ta te tino, ei auraro aroha rä to òutou ia òutou iho.

-Ruta èv 9, 62 Ua parau atu ra Ietu ia na: «O te taata e tuu i te rima i nià i te ârote a hiò ai i muri, e òre ia e au i te Pätireia o te Atua.

I te tau hou o Âperahäma mä, ua naeà-roa-hia i te taata te 900 mätahiti (Tenete 5, 5), ua topa noa mai rä te reira e, inaa nei. Te faaìte noa mai ra te reira e, te taata tei faatupu i te hinaaro o te Atua, eita te tau e riro ei ahoahoraa no na. Eere änei e, i roto i te ture ta na i horoà, te haapäpü ra te Atua e, e here i te metua täne e te metua vahine ia haamaorohia te mahana i te ao nei (Etoto 20, 12). Areà te Tohereta, te faaitoito ra ia i te taata âpï ia haafaufaa i te reira âpïraa to na no te ìmi i te Atua, e ia òre ia tiaì i te tau fifi, a autä noa ai (Tohereta 12, 1).  E ia faahiti mai hoì te Tamaiti i te parau o te ora mure òre, eere änei te reira i te haapäpüraa e, te utuà faahiahia roa aè ta te Atua i faaherehere na te taata, te matara-roa-raa ia i räpae i te ôtià o te tau.

I roto i te parau no te faahuru-ê-raahia Ietu ta Mätaio e faatià ra, ua tià mai o Möte räua o Eria, e ua paraparau mai ia Ietu (Mätaio 17, 3). E faahohoàraa teie nä tià no te tau o te ture e te tau o te mau perofeta tei täpaò i te oraraa o te nünaa Ìteraèra ; âreà Ietu, ua haamanaò noa mai ia e, aita te ôpuaraa faaora a te Atua i täôtiàhia i nià i te nünaa hoê, ua faahoìhia rä i nià i te taata, oia te âtamu, te repo fenua.

Tahi teie haapäpüraa ta Ietu e ìmi ra i te räveà ia märamarama mai te taata. Te piti, te tiàraa mau ia o Ietu. Eere no te mea te onoöno ra Ietu i te parauraa e, e Tamaiti o ia na te taata, e onoöno atoà ai tätou, ia au i te faanahoraa a te taata, i te haamau atoà i to na paparaa tupuna. Haamanaò na tätou e, e rave rahi tei ìte i roto ia Ietu i te tamaiti a Tävita, âreà o ia iho, te parau noa ra ia i te mau taime atoà e, e Tamaiti o ia na te taata. Hau roa atu, o ia atoà iho tei faahapa i teie manaò to te taata e hinaaro ra i te haamau i te auraa fëtii i roto ia na e o Tävita. Te nä ô ra o ia e, nä hea e tano ai e parau ia na e, e tamaiti na Tävita, inaha o Tävita iho tei faahiti e : Ua parau te Fatu i ta ù Fatu e pärahi i to na rima àtau. Mai te peu te parau ra Tävita ia na e, Fatu, nä hea o ia e riro ai ei tamaiti na Tävita (Märeto 12, 36-37). No reira, mai te peu te vai ra ta te taata hiòraa i te Fatu, eiaha te taata e haamoè i ta te Fatu iho hiòraa i to na parau, te reira te mea faufaa aè.

Täpiri mai i te reira, te vai atoà ra teie parau here-roa-hia e te taata, i te hinaaroraa e parau ia Märia e, o te metua vahine ia o Ietu, aore ra te metua vahine o te Atua, mai ta te tahi pae e parau nei. Ta te taata noa rä te reira faaturoriraa i te manaò, âreà Ietu aita hoê aè taime o ia i parau ai ia Märia e, e metua vahine no na, ua hiò noa rä o ia ia Märia mai te tahi noa vahine. Eere änei e, teie te reo pinepine o Ietu ia parau atu ia na : E teie vahine (Ioane 2, 4 ; Ioane 19, 26), mai te mea ra e taata ê roa, tei òre to na parau i taa ê atu i to te tahi mau taata. Mai te peu e òhipa ta te Atua i horoà na na e rave, ua riro o ia ei tävini i reira, eere rä no te reira òhipa e parau-atoà-hia ai ta na i nià i te Atua, e e tano ai hoì e faahuru ê e hoê iti aè, i te ôpuaraa a te Atua no reira Ietu i tonohia mai ai. Haamanaò atoà na tätou i te àhuru-mä-piti-raa to Ietu mätahiti, i muri aè i te mau ôroà päta, ua moè o ia e ua ìmi o Märia räua o Iotëfa ia na, e i te ìteraahia atu, tei Ierutarëma, tei roto i te hiero, i rotopü i te mau òrometua, te nä ô atu ra o Märia : E ta ù tamaiti, e aha òe i nä reira ai ia mäua. Teie te reo o Ietu i te pähonoraa atu ia räua : E  aha òrua i ìmi ai ia ù, aita òrua i ìte e ia haapaò vau i ta ta ù  Metua e tià ai (Ruta 2, 39-40). Nä roto i teie pähonoraa, te hinaaro nei Ietu ia haamanaò o Märia räua o Iotëfa e, mai teie atu, ua oti ta räua òhipa. Eere no te mea o Märia tei mäìtihia ei ôpü färii ia Ietu, e parau atoà ai ta na i nià ia Ietu. 

Te paruparu o Märia, te mea ia o ia i òre i ìte  i to na ôtià,   o ia i hinaaro i te faaö mai i te Atua i roto i te faanahoraa a te taata, âreà te tanoraa mau, aita ia to na e parau i räpae aè i ta te Atua faanahoraa. Mai ta Ietu e parau ra no Tävita, e  tävini noa atoà o Märia, e räveà faatupu i te hinaaro o te Atua, eita Ietu e riro ei tamaiti na na, inaha  to na ia Fatu.

E paruparu atoà rä to te taata i te onoönoraa i te faanahoraa atu i te parau o te Atua. Te haapäpü ra Ietu e, tei rave i ta na òhipa, na to na Metua e faautuà mai ia na (Ioane 12, 26).  Ua maraa roa rä i te taata te monoraa i te Atua i te hinaaroraa e, na na aè e faautuà ia Märia. Aita ia feiä i ìte e, te täpiti noa ra rätou i te hara a Atamu i te hinaaroraa e haru i te tiàraa o te Atua. Aita i mauruüru i te hinaaroraa e haru i te täviri o te Pätireia o te Atua, ua haru atoà i to na tiàraa Atua.

Te haapäpü ra Ietu e : I haere mai nei au i te ao nei ia tupu te parau tià, ia ìte te feiä ìte òre, e ia riro te feiä ìte ra ei matapö (Ioane 9, 39). Te märamarama atoà ra ia tätou e, te vähi ta tätou e haapeàpeà, eere te raì âpï e te fenua âpï, te raì rä e te fenua ta tätou e pärahi nei, no te mea te reira atoà te manaònaòraa rahi o te Atua e te tumu o ia i tono mai ai i ta na Tamaiti i te ao nei. Te ìte ra tätou e, te parau o Märia, te tahi atoà ia vähi e tano ia faatupuhia te parau tià, ei räveà e hoì mau ai te tiàturiraa o te taata i nià i te Atua e ia na anaè. Mai te peu e ôpuaraa ta te Atua, no teie ia ao ta na i rahu, e e hinaaro hoì to na ra, ia riro ia e, te ao täatoà nei të haapaò i taua hinaaro no na ra. Te auraa ia o te parau tei riro o Ioane ei ômuaraa : E reo no te hoê i te poro haereà i te mëtëpara : A haamaitaì i te èà o te Fatu, a faatïtïàifaro i to na haereà. Ia hope te peho i te faaîhia, ia hope te mouà e te mau âivi i te haapäpühia, ia faatïtïàifarohia te èà piò, e ia haamaitaìhia te èà puupuu, ia ìte te taata atoà i te ora a te Atua (Ruta 3, 4-6).

No te mea i parau te Atua i ìtehia ai e, te vai ra te Atua, no te mea rä aita te taata i tütonu i nià i te parau i òre ai i ìte i te hinaaro o te Atua, te mea ia te Tamaiti i tonohia  mai ai no te faaìte i te èà o te parau tià o teie nei ao, te èà tei ani-atoà-hia te taata e rohi ia ìte to te ao atoà e, e ora te Atua Nui Tumu Tahi.

Eiaha tätou e hiò i teie parau mai te mea e, o te täpura òhipa ia a Ioane, te haapäpüraa rä teie e, aita atu e hinaaro to te Atua maoti rä, ia tae te taata i roto i te ìteraa i te èà e tae atu ai i te Atua ra, te tumu o te ora.

Ua hiò mai tätou e, ua faaìte atoà na te fenua, oia te Parau i riro mai ei fenua, i te ora a te Atua, te häroàroà rii atoà ra rä tätou e, aita atu ta te Parau i riro mai ei taata e tïtauraa ê atu maoti rä, ia ìte te taata i te ora a te Atua. Te vähi ia ta tätou e tütonu i teie nei, i to Ietu faatupuraa i te ora ia au i teie mau manaò, Aita te hoê ôire no Tämäria i färii ia Ietu, aita to Tämäria i färii mai ia na, no te mea te haere tià ra o ia i Ierutarëma.

Ua riri o Iatöpo räua o Ioane i teie òhipa i tupu, ua nä ô aè ra: «E te Fatu, e tià änei ia òe ia parau mäua i te auahi ia maìri mai no nià i te raì, ia pau atu rätou, mai ta Èria ra? Ua àvau atu ra Ietu ia räua, nä ô atu ra: «Aore òrua i ìte i te huru o to òrua âau. Aore hoì te Tamaiti a te taata nei i haere mai e täparahi i te taata, i haere mai rä e faaora. Haere atu ra rätou i te tahi ôire iti, i reira o Ietu i te haapiiraa te i te peeraa ia Na :

-E te haere noa ra rätou nä te èà tià, ua parau mai ra te hoê taata ia na: «E te Fatu, e pee atu vau ia òe i to òe mau haereà atoà.

-Ua parau atu ra Ietu ia na: «E ana to te ârope, e tauraa to te manu o te reva, âreà te Tamaiti a te taata nei, aita o na tuäroì.

-Ua parau atu ra o ia i te hoê: «A pee mai ia ù. Ua nä ô mai ra o ia: «E te Fatu, a tuu aè na ia ù e haere au e tanu i ta ù metua täne.

-Ua parau atu ra Ietu ia na: «E vaiiho atu na i tei pohe e tanu i to rätou i pohe ra; e haere rä òe e poro haere i te Pätireia o te Atua.

-Ua parau atoà mai ra hoì e tahi: «E te Fatu, e pee atu vau ia òe; e tuu na rä òe ia ù, e poroì na vau i to ù ra fëtii.

-62 Ua parau atu ra Ietu ia na: «O te taata e tuu i te rima i nià i te ârote a hiò ai i muri, e òre ia e au i te Pätireia o te Atua.

 E o òe, e vaiiho anei òe ia ârotehia to òe i te hinaaro o te Atua Nui Tumu Tahi ?

 

Teraì òr. Faatura.