Hepotoma Moà 2023 Tapati no te mau Âmaa-Täpati no te Tiàfaahouraa.

 

Tapati 02 no Èperera 2023

Faaitoitoraa.

Tapati no te mau Âmaa.

Taiòraa : Mätaio 21,1-11

Te horo nei te tau i to na hororaa, âreà te parau a te Atua te hoì noa mai ra ia e hope atu ia matahiti. E täpati no te mau âmaa teie, oia ia, e tomoraa hanahana no te Fatu i roto i Ierutarëma, âreà te parau i täpeàhia mai no te haamanaòraa i te reira tupuraa òhipa, e âmaa raau ia. E ui na ia tätou, e aha te faufaa o te âmaa, mai te peu e aita e tumu ; inaha hoì no te tumu i parauhia ai to te âmaa, e no te repo fenua i parauhia ai to te tumu, e no te Atua i parauhia ai to te repo fenua.

‘A parau atu i te tamahine o Tiona, Inaha, te haere mai na to Arii ia òe na mä te haèhaa, e mä te pärahi i nià i te âtini, e te pinia, te fanauà o te âtini’.

Teie te haamataraa no te mau taime rii hopeà o te Fatu i roto i teie nei ao, to na tomoraa hanahana i roto i Ierutarema o tei âruehia e te nahoà rahi i âmui mai i taua mahana ra. Hou aè rä te reira taime, teie te faaararaa o ta na i faatae i roto i teie nünaa : …,Inaha, te haere mai na to Arii ia òe na mä te haèhaa,… .

Te haèhaa, te èà ia o ta te Atua i rave no te färereiraa i te taata.

Aita e moèhia ra ia tätou e, te èà o ta te Atua i faaòhipa no te haereraa mai i roto i teie nei ao, o te èà ia o te taata ia pü mai i te ao nei, oia na roto i te fänau. Na roto i teie räveà, te faaìte noa ra te Atua i to na haèhaa, hanahana noa atu ä o ia i roto i to na mana Atua, te reira hoì hanahana e te mana o ta na e mau ra, ua niuhia ia i nià i te parau o te haèhaa. E ia haamanaò hoì tätou i te mau haapiiraa matamua o ta Ietu i horoà i nià i te mouà, te na ô ra to na reo : E ao to të haèhaa te âau, no rätou hoì te Pätireia o te Atua. Tano mau atu ra te maa parau ra e, aita e òhipa ta te Fatu e faaue nei i te taata e rave, tei òre o ia i na mua i te rave. Te auraa, hou o ia a parau ai, hou o ia a faaue ai, ua na mua o ia i te rave e te ora i taua parau ra. Eere mai terä parau ta te Färani e, E rave òe i te mea o ta ù e faaue atu, eiaha rä òe e rave i te mea o ta ù e rave nei. Te parau e te òhipa, mea haere âpipiti raua.

... mä te pärahi i nià i te âtini, e te pinia, te fanauà o te âtini.

E Arii teie e haere mai nei na nià i te âtini. Te auraa, ua horoàhia te täpaò haapäpüraa i te nünaa e ìte ai o ia i to na Arii. Teie hoì peu i ravehia e Ietu, oia te haereraa na nià i te âtini, e peu mätauhia ihoä e teie nünaa,

i te taime ihoä rä e faaariihia ai te tahi taata, e haapärahihia o ia i nià i te âtini. E te reira hoì peu, mai ia Taura mai ia, te arii matamua o Iteraera. E täpaò ihoä paha no te haèhaa, e täpaò atoà ra no te faaìte i te huru o te Atua i mäìti ia na ei arii. Aita Ietu i fifi noa aè i te faaòhiparaa i te peu mätauhia e te nünaa no te färii i te tahi arii. Te riro noa ra te reira huru to Ietu no te haapäpü e, te ora mau ra o ia ite parau ta na i faahiti i te tahi mahana : Aita vau i haere e faaòre, e faatià rä.

E aha te fäito no te haèhaa o të ineine tätou i te rave.

Terä te täpaò ta te Fatu, te Arii, te Tamaiti a te Atua i rave no te faaìteraa i to na haèhaa, e te haèhaa o te Atua. E aha rä te fäito no te haèhaa o të ineine tätou i te rave, no te faaìteraa i te haèhaa o te Atua i mäìti ia tätou ei tävini no na. I mua i to tätou mau àmahamaharaa, to tätou mau peàpeà ùtuäfare, fetii, âmuiraa, paroita, poritita, e rau noa atu ä, teie te hiòraa e te tätauraa ta te Fatu e tuu mai nei i mua ia tätou, faahaèhaa. Faahaèhaa no te mea, terä anaè te räveà e tupu ai te tauàparauraa, terä anaè te èà e färerei ai te tahi i te tahi, terä anaè te räveà e tupu ai te hau i roto i to tätou oraraa. E hau roa atu, teie anaè te èà e färerei ai tätou i to tätou Atua.

Parau mau i teie mau taime ta tätou e ora nei, te ìtehia ra te hepohepo rahi o te nünaa i mua i te maraaraa te hoo o te oraraa änei, te mau òhipa piò e tupu nei i nià i to tätou fenua, te ûànaraa te mau hämani-ìno-raa i te mau vahine e te mau tamarii, te ûànaraa te parareraa o te mau raau taèro i roto i to tätou fenua, te ûànaraa te rauraa o te mau maì i nià i te fenua nei, òmaha tihota, mariri ài taata, rurü, moè te hiroà, haaparuparu (AVC), … Te uiuiraa rä e vai nei i teie taime, aita änei te rahiraa o teie mau àti ta tätou e faaruru nei i teie mahana, e parau mai ra ia tätou e, ua ätea tätou i te Atua? Aita änei e parau mai ra e, e haapae i terä huru teòteò to tätou e e faahaèhaa i mua i te Atua?

Ia riro teie Hepetoma Vaereà marae, Tämäraa ei taime no te patu-faahou-raa i to tätou mau tüàtiàtiraa, na roto i te taura mutu òre no te here e te aroha o te Atua.                    Ia ora na.

 

Tahiarii Opura a Pihaatae Òrometua

 

Mönire 03 no Eperera 2023.

Faaitoitoraa.

Taiòraa : Mataio : 26, 69-75

Aore au i ìte o vai tena taata.

E piti òhipa e tupu rä i roto i ta tätou nei taiòraa.

A tahi : ua tapeàhia Ietu e te mau faèhau, e ua ärataìhia i te tahuà rahi rä, ia Taiafa e to nä mau mero no te uiui, ua tuuhia Ietu i mua i te haavaraa.

A tahi roa ia òhipa ä tupu ai, mai teie te huru, to te àpooraa tuneteri faaueraa i te faatereraa hau Roma e haru ia Ietu, e ia arataì mai ia rätou ra.

Te tanoraa mau, ia tià anaè mai te faèhau, no te täpeà ia, i te fëia e faatupu ra i te huehue i roto i te oraraa o te huiraatira, e au ia, ia rätou te haavaraa a te ture tïvira.

Ua haruhia Ietu, teie taata hau, teie taata tei î i te maitaì, tana òhipa tumu, färerei te nünaa, haapii te taata, faaöra i te mau maì o te taata… Aita hoê äè taime te ite-raa-hia te Fatu te faatupu ra i te ôrureraa hau i roto i te oraraa o te nünaa, no te mea e ere te reira to nä tere i te ao nei, te tuhaa o ta nä i räve, o te faaâmuraa ia i te faaroo o te nünaa.  E mea päpü maitaì te tahua òhiparaa ä te Fatu.

No teie mau arataì faaroo Ati Iuta, te ite rä rätou, i mua i te mau òhipa e räve hia ra e Ietu e riro teie taata i te faatupu i te tauiraa i roto i te oraraa o te nünaa, i roto i te oraraa faaroo o te nunaa, o te mea mau ia e haapeàpeàhia rä i teie mau tahuà rahi ia Taiafa mä. E riro Ietu i te faahuru ê i te mau faanahoraa o ta rätou i haamau no te arataìraa i te oraraa o te nünaa. Tera ia te manaò o ta rätou i faaöti e ua tü no te täpeà i te ôpuaraa ä Ietu, tapeà i ta nä òhipa. No te mea te ìte rä te mau tahua rarahi, pae rahi o te nünaa teie e âpee nei i te mau haapiiraa ä te Fatu, ta te märamarama o te parau e faaoraora ra i to rätou faaroo.

I teie taime, tei mua Ietu i to rätou aro, e taime tano teie no rätou e ia haapäpü mai Ietu i te tahi mau pähonoraa e èrehia rä e rätou. E mea rahi te mau ìte tei haere mai no te faahià ia Ietu, teie nei rä, aita to rätou mau manaò e hoê rä, faatiàraa ê ta te tahi faatiàraa ê ta te tahi. Te parau rä tei faatupu i te riri, te ìnoìno i roto i te âau o teie àpooraa, to rätou ia òreraa e faarii i teie tiàraa  Tamaiti ä te Atua, o ta Ietu e haapäpü ra, e to nä pärahiraa tei te rima àtau ia o te Metua, tei roto i te ao Atua, ta tätou  e parau nei e, tei te vähi eita e naeà-hia e te ìno, tei te vähi mä.

Te haavähia ra te Tamaiti ä te Atua, teie nei, aita atoà te mau arataì faaroo Ati Iuta i ìte e, te haavä-atoà-hia mai rä rätou. O rätou tei òre i ämo i te faaötiraa ä te Atua i nià i to nä vairaa, o rätou tei haafifi i te tupuraa o te maitaì o te ôpuaraa faaora ä te Atua, tei haafifi i te tupuraa no te parau tià, o rätou tei nane i te oraraa faaroo o te nünaa, e tei faariro ia rätou mai te mea rä, tei ia rätou rä te parau hopeà no te ora o te taata. E mea itoito maitaì rätou i te hiò e te huaì mai i te üru tïtä i roto i te mata o te tahi, areà to rätou iho, aore ia rätou e ìte ra, tapuni noa ia muri mai i to rätou àhu autahuà, to rätou aàhu pereue. Te vai äteatea noa rä to rätou paruparu, e to rätou mau tüàti òre . 

E au e, te täpunipuni noa rä i muri mai i ta rätou mau ture, huna noa ai to ratou huru e o ta rätou e manaò rä e, e nä ta rätou ture rätou e faaora, faaòhipa i te taime ta no no te faahià i te tahi, mai teie ia Ietu. Te tanoraa mau e tauturu te ture i te oraraa faaroo o te nünaa e tae noa atu i te oraraa no te mau mahana tätaì tahi, mai teie ta te Fatu i haamaitaì, ua faaroo hoì òutou i parauhia mai e te fëia tahito rä e, e niho rä e niho ia, e mata rä e mata ia, o Vau nei rä te parau atu nei au ia òutou o tei riri noa atu i to nä taeaè i roto ia nä iho, e au ia nä te haaväraa. Te auraa, e tauturu rahi teie faaravaìraa ture i te taata, no te mea, e horoàhia ia nä i te tahi taime no te feruri e no te färerei i to nä taeaè ia tupu te parau no te faahauraa. Ia hoì mai te turaraa o te taata, te tumu ia i haamauhia ai te ture. Eiaha rä i nià i terä faaötiraa e, e au ia nä te pohe.

Ia hiò-anaè-hia, aita e ìmiraa raveà i roto i te fëia tei ia rätou ra te faatereraa o te oraraa faaroo, aita e tauàraa parau, nä ô noa ia tätou e, te taata tei mau i roto i to rätou rima, e taata pohe terä  e o te mea mau ia o ta rätou i faaöti e ta rätou i haamana te parau ia no te pohe.

Te piti o te parau :  Te haavare ä Petero.

Teie te tahi raveà ta teie tamaiti i faaòhipa, no te faaora ia nä i mua i te pariraa ä te taata. E aha rä hoì te haavare ; te faaroo nei tätou e, ua haavare o mea ia mea, te nä reira atu rä e te nä reira atu rä. Aita e taata, paarï i mua i teie parau no te haavare, a mätaìtaì na i te parau âpï i roto i te âfata teata, te tahi mau tumu parau, e hape ihoa òe e parau mau teie e faatiàhia nei, ä tae hoì e, te piri mai rä te tau no te mäìtiraa, i reira mau teie raveà e faaòhipa püai hia e. Te haavare, te parau tumu e vare e aore rä e varevare, te tahi hiòraa, ia mäoro anaè te päpë haarï i roto i te möhina, e tö te päpe e varevarehia.

Ia faaòhipahia e te taata teie parau no te haavare, oia ia te ìmiraa i te mau raveà atoà, ia vare mai, ia tahe to òe manaò, täpiri mai ai te tahi mau peu rii ta òe e faaòhipa, e òiòi mai te manaò i te riro.

Mai teie ta Petero i mua i teie mämä, e toru taime te täpeàraa i tana pähonoraa, aita vau i ìte o vai tena taata. E au atu rä e, aita teie taeaè i òhipa nä e te Fatu, inaha hoì hoê âuà taofe ta räua e te toeà o te mau pipi. Ua huna Petero i to nä tiàraa tävini no te Fatu, no te mataù anei i mua i ta te tuneteri huru haavaraa i te Fatu, ta rätou huru räve ìnoraa i te Fatu.

E te vähi i moèhia i teie tamaiti, te taime ia ä totara ai te moa, nä te reira i haamanaò i to nä hape, to na hunaraa i te Fatu, i roto i terä maa taime poto,ua faatupu atoà i roto ia na te mauiui, ua ìte e ana te Fatu tona paruparu, te auraa nä te Fatu noa i ämo i teie rahiraa parau, teie rahiraa hamani ìno, aita hoê aè taata i tià mai no te päruru i te Fatu. Parau mau, e taime poto, e mea teimaha ra no nä, no te mea e âpee te reira òhipa ia na i te mau vähi atoà, e i roto i to nä oraraa, eita te hau e roaa i roto i te âau, no te mea te taata ta òe i huna, e taata parau tià, e taata tei hinaaro i te maitaì no te nünaa oia hoì te Fatu.  

Aita anei tätou e riro nei, mai ia Petero, hunahuna i te parau mau, täpuni i muri i te parau, täpoìpoì i te mau ôpuaraa faaora ä te Atua. Te viivii àtomi, te mau maì rau, te maraa raa o te miti, terä mau àivanaa no te hiòhiò i to tätou mau roto moana, e te vai noa atura. E hia to tätou i haamämühia, tei täpeàhia i te fare àuri, ia tupu ta rätou parau mau. Ua tae atoà paha te taime i te parau e, ua ravaì, ä tire, te hape rä te âveià, te ô rä te mäòhi i te àpoo no nä iho.

Ta u nünaa here e, ua haapärahihia täua i roto i üru maitaì, ta te papaa i parau nä e, o te parataito, ä hiò nä teie mahana ta tätou huru räve i teie parataito to tätou, ua viìviì, ua maìhia, no reira eiaha e faaea faahou i roto i te mämü, ä tià ä parau, no òe teie fenua, nä òe teie faufaa ä here ia nä ä àtuatu ia nä, to òe terä ora, ä faatura ia nä, ua tae anaè tätou i reira, ua maitaì te Atua ia tätou.

Ia ora nä.

 

Heiotiu a TEHEVINI Òrometua

Mahana piti 04 no Eperera 2023

Faaitoitoraa.

Taiòraa : Mataio 27/ 1- 14.

         Mänaò faaitoito :

         Tei roto tätou i ta tätou nei hepetoma Pure, e te reira faanahoraa pauroa te mau matahiti tätou e rave ai. E rave tätou tera hepetoma Pure, no te tomo atu i roto i tera värua, haamänaòraa te mau mauiui ta Ietu i faaruru hou a tuuhia ai o ia i nià i te Tatauro. I teie mahana, te ômua nei tätou i teie pene parau ta Mataio i te pene 27, ta naò ra paì ta tätou ûpoo parau e, « To Ietu ruuruuraahia e te tuuraahia atu ia Pirato. I te mau matahiti atoà to tätou hiò-noa-raa mai i teie mau taiòraa e i te mau matahiti atoà e haamänaò ai tätou e aore rä, e noaa mai ia tätou te tahi mänaò âpï, no teie mau parau tei tuuhia mai i mua ia tätou. Mai teie, i roto i ta tätou taiòraa e parau ihoa ia na mua roa no Ietu, e parau atoà no Iuta, e e parau no Ponotio Pirato, te vai atoà ra te mau tahuà rarahi, te mau taata paari e te vai atu ra, o rätou ia ta tätou mau taata haaùti i teie mahana i roto i ta tätou nei taiòraa. E mai te peu e, ua âpee maitaì tätou i ta tätou nei taiòraa, ua ìte ia tätou te òhipa e tupu ra. Naò noa ia vau i te parauraa e, i muri mai i te tahi putuputuraa tei i roto i te mau tahuà rarahi e te mau feia paari, ua rave atu ra rätou ia Ietu arataì atu ra e rätou i mua ia Pirato, i te ìteraa mai o Iuta ia Ietu, o Iuta teu haavare, o Ietu tei tuu ia Ietu i mua i te mau tahuà rarahi, ua tatarahapa iho ra i mua i te òhipa ta na i rave, te naò ra tona reo e « Ua hara vau, o vau i tuu i te taata hara òre ». I mua i te reira mänaò to na aita atu ra o ia i hinaaro faahou i te moni àufau tei höroàhia no na, no te tuuraa atu oia ia Ietu i roto i te rima a te mau tahuà rarahi. Ua rave atu ra te mau tahuà rarahi i tera moni no te häere atu e hoo mai i te tahi fenua e mai ta taiòraa e parau mai ra tera òhipa ta te mau tahuà rarahi e rave ra ua tohu aèna hia e te Perofeta ra ia Ieremia. I muri mai i te reira, te naò ra ia ta tätou mau ìrava höpeà no ta tätou taiòraa no teie mahana, tei mua Ietu ia Pirato e te parau nei o Pirato ia Ietu e, o te Arii maori òe o te Âti Iuta, te pari nei te mau tahuà rarahi ia òe, aita òe i faaroo aè i te rahi o te hara ta rätou i pari mai òe. Teie mai ä te haapotoraa o ta tätou nei taiòraa.      

Te naò ra rä te mänaò, eaha ta tätou e täpeà mai ei mänaò tauturu ia tätou no teie hepetoma Pure to tätou. A tahi roa, e täpeà mai tätou i tera mau parau no Iuta e a piti e ìriti ia tätou i te tahi mänaò no te reira taime i tuuhia ai Ietu i mua ia Pirato. Tahi mänaò Iuta, ua ìte tätou o Iuta, tahi tei reira taata tei ora mai i pïhaìho ia Ietu aore rä, tahi te reira taata te âpee ia Ietu i roto i ta na mau haaraa, tahi te reira o na pipi àhuru ma piti a Ietu. E mai ta te taiòraa e faaìte mai ra o Iuta, tera ia taata tei faaôhie i te täpeàraahia o Ietu e te mau tahuà rarahi. I te reira taime e tano ia tätou e paparau i nià ia Iuta, eaha ta te huru o Iuta e haapii mai ra ia tätou. Mai tera e parauhia atu, o Iuta te tahi pipi a Ietu e tona tanoraa mau o Iuta te tahi taata o ta tätou e tano e rave ei hiòraa no te tahi taata tiàturi i te Atua no te mea ei pipi o na, ia hiò anaè ra hia èere roa atu o na te tahi taata tei tano e rave ei hiòraa no tätou no te pae àu o te täviniraa. Pipi no atu ei pipi, aita rä tera faanahoraa ta na i rave e tano ra. E au ra e, i te reira mau taime atoà i âpee ai o ia ia Ietu ua âpee matapo noa o na, ua haere noa o na ma te àau pouri, mä te òre e haapaò i te mau òhipa, haapiiraa atoà ta Ietu i rave. Parau no atu paì e, aita hoê aè òhipa i ö mai i roto i to na àau. I te taime noa i ìte ai ia Ietu i roto i te rima o te mau tahuà rarahi, i reira noa to na mata i te àraàra mai ai. I reira o na i te ìteraa atu e, ua hape te òhipa ta na i rave, e ia mänaò anaè vau e ua î roa paha to na àau i te mänaò hepohepo, te haamä, e te tatarahapa rahi roa. E tano ihoa ia ia tätou i te ui atoà aore rä i te hiò atoà i roto ia tätou. Te tiàturi ra rä te mänaò e, èere tätou mai ia Iuta ra te huru, te àraàra noa ra, te vai ara noa ra to tätou mau mata e àau i nià i te mau òhipa atoà tei haapiihia mai e tätou, tei haapiihia ra e tätou, na ato tätou mau metua e aore ra na to tätou fenua. E mau taata tätou e, ia haapii anaèhia tätou i te parau a te Atua aita te reira e vai noa ra i roto i te to tätou mau tärià ua reva roa ra te reira mau haapiiraa i roto i to tätou mau ààu. Ta te mänaò ia e te hiòraa i nià i te parau a Iuta e haapii rä e e tauturu atoà mai ra i tätou.

          Te piti o te mänaò, i mua ia ia Pirato, ua arataìhia Ietu i mua ia Pirato e te uiui nei o Pirato ia Ietu, te tahi paì ia te reira taata tei òre e ìte ra o vai o Ietu, ua tuu ia te mau tahuà rarahi ia Ietu i mua ia na, ia rave ihoa o na i te tahi faaòtiraa no Ietu. I mua i tera mau uiraa te Pirato hoê noa paì pähonoraa ta Ietu, « E parau mau ta òe i parau mai na ». I roto i te hiòraa e ère te reira i te tahi tumu papü no te faaûtuà atu ia Ietu. Ìmi atu ra rä te mau tahuà rarahi i te tahi atu räveà ê, e ia faaûtuà ihoa Pirato ia Ietu.

I mua i te reira, e parau noa paì ia e tauà-parau-raa i roto ia Ietu e o Pirato, te hiòraa aita atu paì ia räveà ta Pirato, no te mea aita o na i ìte o vai mau na Ietu e te hape ta na i rave, aita ihoa ia o na e tano e rave i te tahi faaôtiraa no Ietu. Tera ia, faahoì i te tahi atu taime.

         I roto i ta tätou taiòra no teie mahana e piti paì huru taata e vai ra. A tahi Iuta, i muri ia to na ìteraa ua hape ihoa o na, e piti te tahi mai ia Pirato ra te huru, tei òre i ìte o vai o Ietu, e tei tuu i mua i te nünaa te parau o Ietu, o ta tätou ia e hiò atu i teie mau mahana i muri nei. Te mänaò paha i ô nei, tei hea roa paì tätou i teie mahana, Iuta aore ra Pirato. Ia riro ra teie mau taiòraa o tei haamänaò noa hia mai ai i te mau matahiti atoà, e räveà tautururaa ia tätou i nià i to tätou mau tiàraa tävini a te Atua. te haapaü atoà mai ra paha tei reira mau taiòraa ia tätou e, ua tae atoà paha te taime e àraàra i te mata e faaära i te àau e te värua, i òre tätou ia hema noa.     No reira nünaa ta tätou te reira mänaò faaitoito no teie âruì, ia itoito noa tätou i roto i ta tätou täviniraa e rahi te haamaitaìraa a te Atua i nià ia tätou. Ia ora na. 

Tähei, Maruhua.v a TARA Òrometua

 

Mahana toru 05 no èpërera 2023

Faaitoitoraa.

Taiòraa : Mätaio 27/15-30

E hoa here mä, Käòha Nui tätou paotu. Teie mahana, tei mua tätou i te parau no te faaotiraa, aore rä mäìtiraa a te nünaa i te tahi taata. Iò nei, e mäìti te nünaa i roto ia Parapa aore rä o Ietu. No te tätara mai teie parau i ta tätou e toru tuhaa i manaòhia mai. 

Te tuhaa matamua,  Mataio 27/15-23 : « O vai ta ù e tuu atu ia òutou na. O Parapa aore ra o Ietu te Metia ». E peu mätauhia e teie nünaa e te mau tävana i terä tau, ia tae i te ôroà päta, i te tuu i te hoê taata täpeàhia ia tae i te ôroà päta. E na te tävana e ui i te nünaa e na te nünaa e mäìti. Na te tävana, teie uiraa i te nünaa tei täìruru mai i täua mahana ra. Ua faahoì o ia i te manaò hopeà i te taata e nä na e faaoti mai i te parau o teie tamaiti, ta na iho i ârue, i haamaitaì, i faahötana ë, o te Metia. No Ponotio Pirato, ua päpu te huru o teie na taata toopiti, O Parapa, te hoê ia taata rave hara, o Ietu hoì, te hoê ia taata parau tià. Eaha ta te taata pähonoraa i mua i teie uiraa. « O Parapa ». Ua rave te taata i ta na faaotiraa, tei haapeàpeà i te tävana no te mea aita i ìtehia ia na te hara a Ietu.

Te piti o te tuhaa, Mätaio 27/24-26 : « Ei nià ia mätou to na toto e ei nià i to mātou mau tamarii ». Te tomoraa o Ietu i Ierutarema, ua pii te nünaa : « Hotana i te tamaiti a Tavita (Mataio 21/9). Ua rave te nünaa i ta na faaotiraa oia hoì e faaora ia Parapa na roto i to na ìnoìno e te pouri, e teie atoà ta na parau : « Ei nià ia mätou to na toto e ei nià i to mätou mau tamarii » (Mataio 27/25). Te auraa, i mua i ta na faaotiraa, ua ineine o ia i te mea ë, ta na atoà huaai i te amo i te reira. Te parau fifi teie e apee noa nei i te oraraa o teie nünaa. Teie rä, na hea i te tätara i te reira fifi. Na roto i te Fatu iho o te ora, na roto i te tätarahapa. Ua tuu mai ra te tävana ia Parapa ia rätou ra, tuu atu ra ia Ietu ia faatätaurohia.

         Te toru o te tuhaa Mataio 27/27-30 : « …tuu ihora i te turi i raro i mua ia na ma te tahitohito… » Ua faaära Ietu i te ìno o te taata, te horoàraa i te tamaiti a te taata i te rima o te mau faèhau, te faautuàraa i te pohe, te tähitohito e te faatätauro. Ua färii e ua tuu te Fatu i to täatoà i roto i te rima o te taata. I mua ra i te reira huru ìno, ua ineine hope te tamaiti i te amo i te ôpuaraa faaora a to na Metua o ia hoì ia ora te taata.

         No reira, te ìte ra tätou i te faanahoraa a te tävana ra o Pirato, i roto i ta na ìmiraa räveà no teie tamaiti. Aita rä i manuia, e na te nünaa e faaoti, e faatätauro i te tamaiti a te Atua. Teie fäito ìno o te taata e to na hoì pärupäru i mua i te tahi mau tupuraa òhipa. Na te taata iho e faaoti i to na parau, te mea maitaì aore ia te mea ìno. Na na iho e amo i ta na faaotiraa. Ua mäìti i te ìno, faaitoito ia i te amo i te ìno, ua mäìti i te maitaì, faaitoito atoà i te amo e te àtuàtu i te maitaì. Teie rä te parau hopeà, tei to tätou Atua. Na na te faaotiraa hopeà. 

No reira e aù nünaa iti ë, faaitoito anaè ä i te ìmi e te mäìti i te mea maitaì ia au i ta te Atua ôpuaraa faaora. Ia Atua noa ä te Atua i roto i te taata, ia òre ta tätou parau ia hape, e ia paruparu. A tià, a faaìte i te parau mau e te parau tià. 

Käòha Nui

 

Smylea, Heiau.v a AH-LO Òrometua

   

Mahana maha 06 no Eperera 2023

Faaitoitoraa.

Taiòraa : Mataio 27/ 31- 44.

         Te mau taeaè e te mau tuahine, Ia ora na tätou i roto i te here e te aroha o te Tumu Nui. Ia haamaitaìhia O ia no te mau maitaì atoà ta tätou e fanaò noa nei i te mau mahana atoà o to tätou nei oraraa. No reira ia tauturu e ia faaitoito ä i teie parau ia tätou i roto i te täviniraa i te Atua.

         I te mau matahiti atoà, te rave noa nei tätou i roto i teie hepetoma moà i te haamanaòraa ia i te mau mea atoà ta Ietu i rave i te pae höpeà o ta na òhipa ; oia hoì, mai to na tomoraa i Ierutarema, to na faaìnoraahia, ua haavähia, ua haamäuiuihia, to na poheraa. E i muri mai, e ìte atu tätou ananahi to na tià-faahou-raa. Päpü maitaì ia tätou, aita tätou e haapohe faahou nei i to tätou Fatu. Te haamanaò noa rä tätou i te mau mea atoà ta na i rave no tätou e no te faatupuraa i te hinaaro a to na Metua i pou mai hoì o ia i te fenua nei. E no te faatupu i te ôpuaraa faaora no te taata nei.

         No teie mahana e hiò mai tätou i te tuhaa mai te ìrava 31-44. I roto i to tätou oraraa, mea pinepine tätou e ìte teie huru manaò faatupu i te tahoo. Ia hiò-anaè-hia aita i tiàhia, no Ietu i mua i te mau manaò tähitohito e i mua i to na pohe te mea ta na e haapeàpeà ra i te ìmi-faahou-raa i te tahi ä raveà no te taata. Te vahi i moè ia tätou, ua tuu roa mai te Atua i ta na Tamaiti, ua riro mai Ietu ei taata, eere na Ietu e hinaaro e haere i nià i te Tatauro e patiti na te taata ra. Aita atòa Ietu i färii i te tauturu a te taata i te horoà-raa-hia i te raau e te vineta. Aita atoà Ietu i färii i te parau a te taata « a faaora ia òe e a pou mai i raro » no te mea, ia rave anaè Ietu i te mau òhipa mäere, aita ia te taata e ìte faahou i te teimaha o te hape ta na i rave, i vaiho ai te Atua i te taata ia faatae i ta na òhipa i te hopeà.

         Ua faaìte Ietu i te parau mau e ua faahuru ê i te mau faanahoraa i matau-noa-hia e rätou, i hinaaro ai te mau färitea, te mau tahuà rarahi e te feiä paari e haapohe ia na. Ua moèhia ia rätou, te Atua ta rätou e tävini nei ia au i ta rätou faaìteraa, e Atua here, e Atua aroha noa. Tei hea roa te parau no te here e te aroha i taua taime ra. E maraa anei ia tätou i te amo i te mau hopoià teimaha atoà mai ta Ietu i rave ? Aita, e hau-roa-atu aita o ia i òtohe; no te parau mai ia tätou e noa atu te ìno rahi o te taata ua tià roa ia na i te faatupu i te hinaaro o to na Metua.

         A haamanaò tätou i te tahi Aito ia pouvanaa a Oopa hoê a huru e ìte hia ra, ua tahitohito, ua faaìnohia, ua tapeàhia i te fare auri no to na faaìteraa i te parau mau e o ia tei paruru, faaora e no te faaìteraa i te òhipa tià òre e ravehia rä i nià to na nünaa.

         Te mea faufaa rä no tätou i teie mahana, eere ia i te hiòraa i te parau o Pouvanaa e to Ietu poheraa. Te mea ra e hiò, e haamanaò i te òhipa o ta räua i rave iho no òe e te nünaa Mäòhi o täua teie e tahitohito-hia-ra, täua teie e pohe nei. No reira, ua faaoromaì, ua vaiho räua na te parau e na te Atua e arataì ia räua, a faaea i te taiva, a paruru a here i to òe fenua e a tià a faaìte i te parau mau eiaha e fiu i te parau, a here i te Atua, a faaitoito i te faatià ia òe iho. A haapäpü i to tätou tiàturiraa i te Atua e a faateniteni ia na no te rahi o to na mau maitaì e to na aroha ia tätou. A hoì i te Atua, a hoì i to tätou ora e o te Atua anaè te ora. Ia maitaì tätou i roto i to tätou oraraa e i roto i te täviniraa i to tätou Atua, Ia ora na.

Marcel, Manutahi a TERIINOHO Òrometua.

 

Mahana pae 07 no Eperera 2023

Faaitoitoraa.

Taiòraa : Mataio 27/ 46- 56

Ìrava 46vh : « E ta ù Atua, e ta ù Atua, e aha òe i faaruè mai ai ia ù ».

Ia haamaitaìhia te Tumu Nui, Fatu o te raì e te fenua, te parau i ìriti i te ùputa o teie nei ao.

Ia haamaitaìhia te Tumu Nui, Fatu o te parau. Te parau e ärataì ia tätou i roto i te ìteraa i te hinaaro o te Atua.

Ia haamaitaìhia te Atua Metua no te rahi o to na Here e to na Aroha.

E hoa here mä, Ia ora na i te Here e te Aroha o te Atua Metua.

Taime rii hopeà teie no te Fatu i roto i teie nei ao. Ta na ätoà ia teie parau hopeà i mua i te Atua e te taata, tuu atu ai i to na värua. « E ta ù Atua, e ta ù Atua e aha òe i faaruè mai ai ia ù… » Haapäpü noa maira te reira e, i mua i teie faanahoraa i roto i te oraraa o te taata, tahi ätoà teie huru fäìraa ta te taata i mua i te parau o te pohe e i mua i to na Atua. Piiraa püai e te teimaha, piiraa no roto roa mai i te ôpü o te Fatu. I nià te Fatu i te tatauro, pii ai i to na Atua. Ua mänaò te taata e, te piiraa ra te Fatu ia Eria. Àita roa atu, ta na piiraa no te faatae ia i te Atua ra. Te Atua ia faaroo e ia ìte i to na mauiui.

« E ta ù Atua, e ta ù Atua e aha òe i faaruè mai ai ia ù » No te aha teie piiraa ta te Fatu. No te mea änei, ua rävaì roa i te mamae, àita e roaa faahou i te faaoromaì. E fäito to te faaoromaì. E ôtià to te faaoromaì. « E ta ù Atua, e ta ù Atua… » Piiraa i te Atua. Atua ta te Fatu i here, Atua ta te Fatu i tiàturi, Atua tei tono i teie tamaiti i teie ao ia ora to te ao na roto i te Hau ôtià òre o te Atua. Teie ra hoì taime nei, hinaaro rahi to te Fatu i teie Atua, ia ìte mai ia na i roto i to na fifi « E ta ù Atua, e ta ù Atua… »

« E aha òe i faaruè mai ai ia ù… » Te faaruè e parauhia nei, te òpanipaniraa te ùputa o te tarià, te vaha, te mata e te àau i mua i te tahi huru tupuraa òhipa. Te färiu ê i te parau, te faanahoraa, te fifi e te oraraa o te tahi taata. Ua ätea te tahi i te tahi, ua mutu te taura o te tüàtiraa e te here. Te vai ra te tahi ärea i rotopu i te tahi e te tahi.

Na te ìno rahi o te taata, te rahi o te mauiui e te pohe, e faatupu i te reira mänaò faaruè i rotopu i te taata e te taata. Na hea ra i te taamu faahou i te taura o te Here e te tiàturiraa. Ta te ìno e faatupu, e mamae. Ta te ìno e fänau, e pohe. Na hea ra i te taamu faahou. E aha te pähonoraa a te Atua i mua i teie huru piiraa. Ua haùtiùti te rahu. Ua àueue te mau mea ätoà. Ua huru ê te mänaò o te taata.

« tuu atura i to na värua… » Ua färii te Fatu i to na parau. Ua vaiho te Fatu i to na parau i roto i te rima o to na Atua, e na na e faaoti i te reira. Àita e parau faahou ta te taata i teie nei, na te Atua te parau, ìtehia na roto i te mau òhipa ätoà tei haùti, tei àueue, tei huru ê.  Pähonoraa na te Atua i te piiraa a teie tamaiti, àita te Atua i faaea matapö i mua i teie huru tupuraa òhipa. Àita te tarià o te Atua i turi i mua i teie piiraa ta te tamaiti. I tuu teie tamaiti i to na värua, ua tiàmä ätoà ia o ia i mua i to na Metua. Ua üpootià te ôpuaraa faaora a te Atua Metua. Ia haamaitaìhia te Tumu Nui.

No tätou nei ra i teie mahana, haapiiraa rahi ta teie parau ia tätou. Tauturu rahi ta te Fatu ia tätou i te ìteraa e, i ô mai i te mamae e te pohe, te vai ra te parau o te tiàfaahouraa. No reira, ia haamaitaìhia te Atua Metua, no to na here e to na aroha. Ia haamaitaìhia te Tamaiti, te faaora o to te ao. Ia haamaitaìhia te Värua, tei tauturu i te tupuraa o te ôpuaraa faaora a te Tumu Nui.

Ei te Atua anaè ra te tura e te hanahana.               IA ORA NA.

 

Repeta, Temeharo.v a MAIARII Òrometua

 

Mahana maa 08 no Eperera 2023

Faaitoitoraa.

Taiòraa : Mataio 27/ 57- 66

Taramo 31

         Ia hakamaitaki-hia te Atua Metua ki to kätou farereiraa i teie haga âpï. Mauruuru maitaki i te Atua no to na Here e to na Aroha ia tätou, òia tei ärataì ia tätou i roto i to tätou oraraa ùtuafare e to tätou oraraa faaroo.

         E te haga makui a te Atua, aita i täpeàhia mai i te tahi ìrava papa no tätou, ua ravehia ra te manaò faufaa i roto nä taiòraa e 2, mai to Ietu Metia e to Tavita fakakiteraa i to räua tiàturiraa i te Atua Metua. Noatu te mau hämani ìnoraa a te taata e te mau faahemaraa rau o te ao nei, ua üpootià te ora i nià i te pohe, e ua tupu te Here e te Aroha o te Atua.

         O ta Mätaio ia e türama maira ia tätou. To Ietu Metia, tororaa i to na tarià, te faahaehaaraa i to na âau, te faaturaraa i to na Metua e te horoàraa i to na täatoàraa no te faatupu i te hinaaro o to na Metua täne, o te Atua. Òia hoì, ua pohe e ua tià faahou te Tamaiti ôtahi o Ietu Metia.

         Ua faaära ätea-hia ia, i te mau pïpï e Ietu ; “ia tae i te ruì 3 e tià faahou mai oia” e ua tupu. Noa atu te raveà a te mau Tahuà rarahi, te mau Päpaì parau e te Arataì o te faaroo òia te mau Tavini o te Atua ia tuuhia i te faèhau i mua i te ùputa o te menema o Ietu ia kòre ra rätou ia naeàhia i te parau e te nunaga. Òia hoì, o ta te Tamaiti i fakakite mai, e o ta rätou i huna i te Atua.

         Mai ia Tavita, i roto i ta tätou nei Taramo. Maöti i to na tiàturiraa i te Atua Metua, e ta na mau pure tuutuu òre i mua i te mau ôpuaraa ìno a te taata i ora ai òia.

         Ua faaroohia mai i ta na piiraa e te Atua Metua. Na te parau a te Atua i päruru ia na, i faaitoito faahou ia na, i tauturu e i ärataì ia na i roto i to na oraraa ùtuafare e to na faaroo. E ua òre roa te parau no te òto e te peàpeà i teie taime i roto i tona âau. E taime ra no te Òaòa, e e taime no te Maitaì e te Hau.

         Te ìte ra ia tätou e, no Tävita, ua mau päpu i to na tiàturiraa i te Atua Metua. Ua tuu òia i to na ora i roto i te rima o te Atua, ia fanaò atoà òia i ta na mau maitai. Mai ta te Atua i faafanaò i ta na mau pipi, ua fakakìte Tavita i to na òaòa rahi i te Atua no ta na mau hamani maitaki ia na i te mau taime atoà o to na oraraa.

         Âreà, no Ietu Metia, aita te tiàturiraa i to na Metua Täne i àueue noa aè, ua faatupu òia i te hinaaro o to na Metua. Ua haapäpü òia i to na taahiraa âvae i nià i te èà o to na faaora.

         No tätou, ua ara e ua kìte maitaki tätou a tau matahiti i teie nei, i teie mau parau. Eaha atu ä ia ta tätou e tïtau ra i te Atua i teie mahana. E ìnaha, ta te Rahu e faaìte noa nei ia tätou eere i te haavare o te parau mau ia e te parau tià. Hou roa atu ai o te Here e te Aroha o te Atua, to tätou Metua täne.

         E te tämau noa nei tätou i te haavarevare e te haavare ia tätou iho, e i te Atua. Teie ia, e tiaì ia tätou aore e faaitoito tätou i te faaìte, i te faaòhipa i to tätou tiàturiraa i te Atua noa atu te mau fifi e âua haati nei ia tätou i teie mahana. A mau tuutuaau ânaè tätou i to tätou faaroo i nià to tätou faaora, òia hoì ia Ietu Metia.

Rarani, Vaitu.v a REHUA Pipi Òrometua

 

Täpati no te Tiàfaahouraa 9 no èperera 2023

Taiòraa Ioane 20, 1-9

Irava tumu : 8vh « ìte iho ra o ia, e faaroo atu ra »

Ia ora na roa i te aroha e te here fäito òre o te Atua i teie täpati haamanaòraa i te tiàfaahouraa o to tätou Fatu mai te pohe mai.

O te hoê teie o te papa tumu mau o to tätou faaroo i roto i te Etärëtia. No to Ietu faaroo i te Metua, i tià roa ai i te Metua i te faatiàfaahou ia na, ia tupu ta na i ôpua, oia hoì, ia ora te mau taata atoà. Aita e haamanaòraa i te tiàfaahouraa mai te peu eita tätou e haamanaò i te mau òhipa ta Ietu i rave, mai te mau haapiiraa, te faaoraraa i te mau taata, no te maì, tei uruhia e te värua faufau, te mau temeio ta na i rave, e tona iho huru i mua i te taata. No te reira mau tumu i tià ai ia tätou ia faahiti i te parau o tona tiàfaahouraa. Te märamarama ra ia tätou e, aita e tiàfaahouraa mai te peu e, e àpe tätou i te mau èà ta te Fatu i haere mai, e aore ia eita tätou e faaroo ia na.

Te parau i täpeàhia no teie täpati, teie faaìteraa a te Evaneria a Ioane e nä ô ra « ìte iho ra o ia, e faaroo atu ra » (8vh). E parau teie no Ioane, te pipi herehia e Ietu tei horo atu e o Timona i te menema i muri aè i te faaìteraa a Märia i te òhipa o ta na i ìte i roto i te vairaa o te tino pohe o te Fatu. I to na haereraa atu i taua poìpoì ra, ua matara te ùputa o te menema. Ua faataahia te ôfaì e aore e tino faahou tö roto. No Märia, ua haere mai o ia e hiò i te hoê tino pohe, no te faaoti hope i te òhipa e au ia ravehia no na. To na tere, no te haere ia e haapäpü roa i te parau o te pohe o te Fatu i te tatauro, e ta na hoì i ìte i roto i teie âpoo. E tano e parau e, te haereraa i te menema, aita e parau to te tiàfaahouraa i roto i to na feruriraa. E te riro nei te moèraa o te tino o te Fatu, mai te tahi parau tei faatupu i te uiuiraa i roto ia na, e parau maere roa hoì teie i tupu.

O vai tei rave i teie òhipa ? Tei hea roa te tino o Ietu ? E aha te òhipa e rave e haere e ìmi i teie tino pohe. Penei aè, e riro teie menema ei haamanaòraa nä te mau uì i muri.

No to tätou Fatu, eita tätou e haamanaò ia na tei pohe, ta te ôfaì e aore ia te tahi atu mau täpaò haamanaò mai ia tätou. Noa atu te rahi o te here o Märia i to na Fatu, ua faaea noa o ia i nià i terä Fatu tei pohe i te ìno o te taata. No Ioane, tei horo atu i te menema, te riro nei te moèraa o te tino o Ietu ei tumu i haamanaò ai o ia i te mau parau ta te Metia i faahiti na i mua ia rätou. Te parau no to na pohe e to na tiàfaahouraa ia tae i te toru o te ruì. Na te moèraa o te tino, i ìriti ia na te märamarama o te mau parau a Ietu. Eita atoà e òre, i to räua Timona faarooraa i te faaararaa a Märia, ua haamata atoà te uiuiraa i te fä mai i roto ia Ioane. Eere änei, ua tiàfaahou Ietu ia au mai ta na i parau mai ia rätou ?

No reira, ua òhie o ia i te tomo i roto i teie parau âpï. No te haapäpü i to na manaò, ua tiaì o ia ia Pëtero ia tomo na mua i roto i te menema. Ua tiaì o ia i te hiòraa a Petero, to rätou matahiapo. E noaa änei te tahi manaò no roto mai ia na ? e tauturu mai änei Petero i ta na feruriraa ? I mua i te òhipa ta na i ìte teie te mea ta te Evaneria e faaìte ra : « ìte iho ra o ia, e faaroo atu ra ».

E aha rä ta na i ìte i faaroo ai o ia ? e mea päpü i roto i te faaìteraa a Ioane, hoê ä òhipa ta na i ìte, ta Petero hoì e ta Märia atoà. Aita e mea e faataa ra i ta rätou hiòraa i roto i teie menema. Te mea e tano e ui, e aha ta rätou too toru i haere mai e hiò ? I ìmi na Märia i te tino pohe o Ietu, âreà o Petero, ua haere mai ia e hiò i te tanoraa o te mau parau a Märia a feruri atu ai i te auraa o teie tupuraa òhipa. No Ioane, ua haere mai ia e ìmi i te tupuraa o te mau parau a te Fatu no to na tiàfaahouraa. Aore e tino faahou, te mau täpaò noa no to na tuuraahia i roto i te menema tei toe mai. E tano teie mau uiuiraa no tätou atoà i teie mahana. E aha ta tätou i haere mai e hiò ? No Ioane, aita o ia i peàpeà te moèraa te tino o to na Fatu. Ua riro te reira ei tauturu ia na i roto i to na faaroo. Ua tauturu i ta na ìteraa i te tupuraa o te parau a te Atua. Te « ìte » ta te Evaneria e parau nei, eere ia i te ìte i te tahi mea i to na mata.

Mai te mea te « ìte » e òhipa ia na te mata. Ta Ioane « ìteraa » e tuhaa ta te âau i faatupu. Ta te âau hoì i färii, ua tià mau te Fatu, òre noa atu to na mata e ìte i te Fatu i te tiàfaahouraa. Nä te reira huru « ìteraa » i tauturu i to na faaroo i mua i teie òhipa. Te auraa, aita te « ìteraa » a Ioane i faaea noa i nià i te tuhaa a te mata, ua faaòhipa atoà rä o ia i ta to na âau huru « ìteraa » i te mau haapiiraa i noaa ia na mai roto mai i to na Fatu. O te hoê teie o te mau tïtauraa ta te Fatu e tïtau nei i ta na Etärëtia. Te faarooraa, òre noa atu ai i ìte te tupuraa o te mau òhipa. Te faaroo i te Fatu, o te hoê teie horoà na te Atua i te taata. Tei ia tätou te färiiraa i te reira huru horoà, ta tätou te reira òhiparaa i nià ia tätou iho na mua roa. Aita te Atua i tiaì mai i ta tätou mau òhipa maitataì no te horoà mai i te reira ö faufaa rahi no tätou. Ua horoà noa mai o ia mai te tahi taoà horoà i te taata atoà. E tano rä e ui e, no te aha te taata i onoono noa ai i te pätoì i teie ö hoo òre a te Atua, a tiàturi noa ai e noaa ia na te faaroo nä roto i to na iho püai, nä roto i to na àravihi. E inaha i nä reira mai na te mau uì taata e aore e faaroo i noaa. Teie ta tätou parau âpï : « ua tiàfaahou mai te Fatu » ; « ua tiàfaahou mai to tätou Fatu Ietu ». E horoà teie na te Atua, e horoà hoo òre na na i te taata. Na Ietu, to tätou Fatu i hoo faahou mai ia tätou nä roto i to na pohe e to na tiàfaahouraa. Ia haamaitaì mai te Fatu tei faatiàfaahou ia tätou.

 

Tehuiarii a PIFAO Òrometua