Ioane 3,16-18 Ao

 

Tāpati 4 no Tiunu 2023.

ÔROÀ

Ao

Taramo 148

1 E haamaitaì i te Fatu E haamaitaì i te Fatu i te mau raì ra, e haamaitaì ia na òutou atoà o tei pärahi i nià ra.

2 E haamaitaì ia na, o òutou atoà, e to na mau merahi, e haamaitaì ia na, o òutou atoà, e te mau nuu ra.

3 E haamaitaì ia na, e te mahana e te märama, e haamaitaì ia na, e te mau fetià märamarama.

4 E haamaitaì ia na, e te raì o te mau raì ra, e o òutou, e te mau pape i nià iho i te mau raì ra:

5 O te reira të haamaitaì i te iòa o te Fatu; ua parau hoì o ia, e oti aè ra rätou i te hämanihia.

6 Ua haamau hoì o ia ia rätou e ia mau e a muri noa atu; ua faaau o ia i te haapaòraa, e aore roa i hapa ia rätou.

7 E haamaitaì i te Fatu i nià i te fenua nei, te mau mea rarahi o te tai ra, e te mau vähi hohonu;

8 te auahi e te ua-paari, te hiona e te òhu ra, te mataì vero ra, e faatupu i ta na ra parau,

9 te mau mouà e te mau âivi, te mau räau mäa ra e te mau âreti,

10 te mau manu e te mau puaa atoà, te mau mea e nee ra e te mau manu pererau,

11 te hui-arii o te fenua nei e te taata atoà, te feiä mana e te mau haavä atoà o te fenua,

12 te mau taata âpï e te mau pötii, te mau taata paari, e te mau tamarii ra:

13 o te reira të haamaitaì i te iòa o te Fatu, to na anaè ra hoì te iòa ia faateitei: tei nià ê to na hanahana i te fenua nei e te mau raì atoà ra.

14 O ia i faateitei i te tara o to na taata, o ia tei haamaitaìhia e ta na mau tävini moà, e to na ra feiä here, e te tamarii a Ìteraèra ra.

Hareruia

Ètoto 34,4-9

4 Ua tarai iho ra o ia i na papa ôfaì e piti, mai tei mütaa iho ra te huru; ua tià aè ra Möte i nià i te poìpoì roa, haere atu ra i nià iho i taua mouà ra o Tinai, ma na papa ôfaì atoà i ta na rima, i ta te Fatu i faaue mai ia na ra. 5 Ua pou mai ra te Fatu nä roto i te ata, tià noa iho ra i reira ra, i pïhaì iho ia na; e ua faaìte mai ra i te iòa ra o te Fatu.

6 Ua haere iho ra te Fatu nä mua ia na, ua parau mai ra, O te Fatu, o te Fatu, e Atua aroha noa, e te hämani maitaì rahi, e te faaòromaì rahi, e te maitaì rahi, e te parau mau;

7 E te vaiiho mäite i te aroha e tautani noa atu te uì; e te faaòre i te parau tià òre, e te hara, e te ìno; e e òre e parau i te taata ìno e e taata ìno òre; i te tähooraa i te hara a te feiä metua i nià i te tamarii, e i nià atoà i te tamarii a taua mau tamarii ra, e tae noa atu i te toru e te maha o te uì ra.

8 Ua rü noa iho ra Möte, ua piò iho ra ta na upoo i raro i te repo, haamori atu ra:

9 E ua nä ô atu ra o ia, Ua tiàhia vau e òe, e ta ù Fatu, teie ta ù parau e haere atoà òe, e ta ù Fatu, i roto atoà ia mätou; ètaèta noa ihoä rätou; e e faaòre mai òe i ta mätou parau tià òre e ta mätou hara, e e rave mai òe ia mätou no òe iho. 

2 Törïnetia 13,11-13

11 E te hopeà o ta ù nei parau, e a ù mau taeaè, ia ora na. Ia maitaì ä, ia mähanahana roa, ia hoê ä âau, e pärahi mä te hau, e tià ia te Atua no na te aroha e te hau i rotopü ia òutou.

12 E aroha òutou ia òutou iho i te hoì moà ra.

Te aroha nei te feiä moà atoà ia òutou.

13 Ei ia òutou atoà na te aroha mau a te Fatu ra a Ietu Metia, e te hinaaro o te Atua, e te au a te Värua Maitaì ra. Âmene.

Ioane 3,16-18

16 I aroha mai te Atua i to te ao, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre.

17 Aore hoì te Atua i tono mai i ta na Tamaiti i te ao nei e faahapa mai i to te ao, ia ora rä to te ao ia na.

18 Tei faaroo ia na ra, e òre o ia e faahapahia; tei òre i faaroo ra, ua faahapa-ê-hia na ia, o ia aore i faaroo i te iòa o te Tamaiti Fänautahi a te Atua ra.

Manaò.

Te Taramo 148 te tïtau nei i te nünaa ia tiàturi i te aru a te Atua, ia faateiteihia te Atua i faatupu i te rahu na roto i te reo mana i ìtehia ai te ora, ta te vai i färii i te faatiàrepuraa i te Värua Atua, i vai mai ai te märamarama. I fenua ai te fenua, i reva ai te reva, i raì ai te raì, i tiàrama ai te tiàrama, i puaa ai te mau puaa, i ïà ai te mau ïà, i manu ai te mau manu, i taata ai te taata, i parauhia ai te Ao Atua.

-1 E haamaitaì i te Fatu E haamaitaì i te Fatu i te mau raì ra, e haamaitaì ia na òutou atoà o tei pärahi i nià ra.

-2 E haamaitaì ia na, o òutou atoà, e to na mau merahi, e haamaitaì ia na, o òutou atoà, e te mau nuu ra.

-3 E haamaitaì ia na, e te mahana e te märama, e haamaitaì ia na, e te mau fetià märamarama.

-4 E haamaitaì ia na, e te raì o te mau raì ra, e o òutou, e te mau pape i nià iho i te mau raì ra.

O te matahurahura teie no teie nei ao, te òhipa mätamua ta te Atua i rave, te ìritiraa ia i te ùputa o te märamarama e te ora. No te mea i matara ai te ùputa o te märamarama, i pü mai ai te ora, i tomo ai te märamarama, i roto i te pöuri, to te märamarama öraa i roto i te pöuri i parauhia ai to te ao. Tano mau atu ra te mau parau a te Taramo e faateitei ra ia faaauhia i te tahi täviri e ìriti ia tätou i te tahi mau ùputa manaò-òre-hia e tätou. Mai te peu rä e haamoà tätou i te ùputa, oia hoì ia faaoti tätou eiaha e tomo na roto i te ùputa o te märamarama, ua faaoti atoà ia tätou e, eere no tätou te ora e parauhia ra. E aha atu ra ia te auraa o teie parau ta tätou e tähutu noa nei, te auraa ra, te mea faufaa no tätou maoti rä, te tämauraa i te tomo na roto i te ùputa o te ora e te märamarama mai tei horoàhia mai. Naò noa ai i te parauraa e, e fäìraa faaroo mau teie. Areà te haapäpüraa i teie mahana, no te haamanaò noa mai ia i te òhuraa o  te tau, te vai ra te tau i mahemo, i nanahi ra, te vai ra tei òre ä i tae mai, a nanahi ia, e te vai ra, teie mahana. E o te tahi teie fäìraa faaroo no teie mahana, e fäìraa no te mahana tätaì tahi. E paraparauraa teie ia tupu e ia faaâpïhia, te faaroo, te tiàturiraa ia amohia ia faateiteihia te Atua Nui Tumu Tahi. Ia mau âau ia tätou, te tupuraa te mau parau e papa ra i te rahu no te mea na to tätou vaha i maitaì ai te fäìraa faaroo, mai te mahana e hiti ra i te mau mahana atoà, ia riro ia, mai te reira atoà te fäìraa faaroo i te türamaraa i to tätou oraraa, ia färii tätou i te haere i te vähi ta te parau e türama ra, o te reira to tätou tiàmaraa. I te taùraa i te Atua, Te taùraa i te Atua ra, o te aniraa ia i te Atua. No te Atua anaè teie taò. I roto i te mea e parauhia nei e, taù, te vai ra te manaò faatura. No reira, e tià atoà ia tätou ia auraro ia na, ia faatura i to na hanahana. Mea maitaì tätou ia haamanaò e, tei mua tätou, i te parau o te Fatu no te raì e te fenua, te Atua hoì i hämani ia tätou, te Atua no na tätou i Mäòhi ai, e tei riro taua mäòhiraa no tätou ra ei taoà horoà na na ia tätou, eere te ahuahuraa vaa. No reira, mea maitaì atoà tätou ia fäito maitaì i te parau ia parau, ia faaea hoì i te haere mai i mua i te Atua ûtätä noa ai, mai te tamarii tei òaòa i te faaìteraa e, ua mau te parau i horoàhia na na e tämau. A òre o ia a märamarama i te auraa o te mea ta na e parau ra, eere te reira ta na haapeàpeàraa. E tano tätou e uiui e, teie ta tätou e pure nei, te manaò ra änei tätou i te Atua, te ìte ra änei tätou i te auraa o te mea ta tätou e parau atu ra ia na, aore ra mai te tamarii, te haapeepee atoà nei tätou ia pau atu te paraparau o te tahi pure tei mau maitaì ia tätou, e tei riro te amene ei faaìte ia tätou e, ua oti te òhipa i anihia ia tätou. Teie atu ra te haapotoraa no ta tätou parau no teie mahana :

-Taramo 148, 13 o te reira të haamaitaì i te iòa o te Fatu, to na anaè ra hoì te iòa ia faateitei: tei nià ê to na hanahana i te fenua nei e te mau raì atoà ra.

-Ètoto 34, 9 E ua nä ô atu ra o ia, Ua tiàhia vau e òe, e ta ù Fatu, teie ta ù parau e haere atoà òe, e ta ù Fatu, i roto atoà ia mätou; ètaèta noa ihoä rätou; e e faaòre mai òe i ta mätou parau tià òre e ta mätou hara, e e rave mai òe ia mätou no òe iho.

-2 Torinetia 13, 12 E aroha òutou ia òutou iho i te hoì moà ra.

-Ioane 3, 16 I aroha mai te Atua i to te ao, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre.

E reo tïtau teie e vai nei i roto i na ìrava e toru i päpaìhia e Ioane, èi faaìteraa i te huru faanahoraa o te ao i roto i te ano. I Aroha mai ai te Atua i te Ao nei, na roto i te höroàraa mai i ta na Tamaiti Fänautahi ia tià i te faaroo i te ora-mure-òre. Teie tiàororaa no te faaìte ia ua faaïtihia te Atua i roto i to na ao ua faarahihia te taata i nià i te ao faatupu ora a te Atua. I tono mai ai te Atua i ta na Tamaiti ia faaora i teie nei ao, ia faaroo i to na iòa ia ora. Ia au i teie mau parau te faaìte noa mai ra te reira ia tätou te tupuraa o te mau òhipa o te ao nei, no te mea e ao faataahia teie e te Atua e ao-mure-òre. I manaò ai te manaò e, e faatumu te manaò i nià i te parau no te Ao, e taò teie tei faahiti tämauhia i roto i te mau Taramo, e o ta Ietu i faahiti atoà na no te hoê oraraa vaamataeinaa i ta na parauraa e :

3 E ao to tei haèhaa te âau, no rätou hoì te Hau o te raì.

4 E ao to tei òto, e faaòaòahia hoì rätou.

5 E ao to tei marü; e riro hoì ia rätou te fenua.

6 E ao to tei hiaai e tei poìhä i te parau tià, e faaîhia hoì rätou.

7 E ao to tei aroha ia vëtahi ê ra, e aroha-atoà-hia hoì mai rätou.

8 E ao to tei mä te âau, e ìte hoì rätou i te Atua.

9 E ao to tei faatupu i te parau hau ra, e parauhia hoì rätou i te tamarii na te Atua.

10 E ao to tei hämani-ìno-hia no te parau tià ra, no rätou hoì te Hau o te raì.

11 E ao to òutou ia faaìno mai, e ia hämani ìno mai, e ia pari haavare noa mai te taata ia òutou i te mau huru ìno atoà nei, no ù. 

12 A òaòa, e ia ôuàuà noa i te òaòa; e utuà rahi hoì ta òutou i te mau raì ra: i nä reira hoì rätou i te hämani ìno i te mau perofeta tei nä mua ia òutou.

Te ao e faaìtehia nei e parau ia no te märamarama tei faatupu i te ora i te mau vahi atoà ia hanahana te Atua Nui Tumu Tahi, e parau âano te ao e türama ia matara te mau ôtià i manaòhia i reira e mau ai. Te mau nei te ao i te ata, te ata ra ta te Atua i faaòhipa i te parauraa i ta na Tamaiti, o ta ù Tamaiti Here teie a faaroo ia Na, e taò teie tei faaìte i te märamarama te ora ia o te taata. Ua faanaìnaìhia ra te ao i te parauraa a te taata, ua vähihia i te faanahoraa a te taata, i te naòraa e te reo o te nunaa, te reo ia o te Atua, no roto mai teie parau i reo Ratino Vox Populi, vox Dei, no te faaìte te vai ra te pae ïti, ia faaroo tätou i teie mau reo e parau ra :

16 I aroha mai te Atua i to te ao, e ua tae roa i te horoà mai i ta na Tamaiti Fänautahi, ia òre ia pohe te faaroo ia na ra, ia roaa rä te ora-mure-òre.

17 Aore hoì te Atua i tono mai i ta na Tamaiti i te ao nei e faahapa mai i to te ao, ia ora rä to te ao ia na.

18 Tei faaroo ia na ra, e òre o ia e faahapahia; tei òre i faaroo ra, ua faahapa-ê-hia na ia, o ia aore i faaroo i te iòa o te Tamaiti Fänautahi a te Atua ra.   

No tätou ta te Mäòhi hiòraa, nä roto i teie taò ao, e rave rahi te manaò ta tätou e parau nei. Te vai ra te fenua, oia te vähi e orahia e te taata : Ua tere rätou e faaàti i te ao nei ; I parau atu na vau ia òutou i te parau o teie nei ao oia te fenua nei, e aore òutou i faaroo, e aha òutou e faaroo ai ia parau atu vau ia òutou i te parau o te raì Ioane pene 3 ìrava 12 ; I aroha mai te Atua i to te ao, e ua tae roa i te horoà i ta na Tamaiti fänau tahi, ia òre ia pohe tei faaroo ia na, ia noaa rä te ora mure òre Ioane pene 3 ìrava 16 ; I haere mai nei au i te ao nei, ia tupu te parau tià …Ioane pene 9 ìrava 39. Te vai ra te märamarama ta te ànaana o te mahana i faatupu mai tei riro atoà ei täpaò faataa ê i te pö i te ao : A tià i nià, ua ao ; E piti pö, e piti ao to mätou päinu-noa-raa ; Ia pö, e haere au e täià, ia ao, e haere au i roto i te faaàpu. Te vai atoà ra te òaòa, te maitaì, e te fänaò : E ao to te taata i noaa ia na te paari Mäteri 3, 12 ; E ao to te taata aore i faaau i to na haereà i te aò a te paieti òre Taramo 1, 1 ; E ao to te feiä aore i ìte ia ù a faaroo mai ai Ioane 20, 29. E faaìte atoà teie taò ao i te manaò no te ora, aore ra te oraraa, mai teie ta tätou e faaroo nei i te taata ia parau e : Mäuà te ao i terä huru taata ; No ta na aupuru ia ù i ìte mai ai au i te ao ; Ua paari òe i roto i te ao fänaò, eita ia òe e taa mai i to mätou mau fifi ; E ao hepohepo teie e te mauiui aita e faaearaa. Taa noa atu ai te manaò o te märamarama, eiaha te märamarama o te mahana, te ànaana rä aore ra te märamarama mai tei ìtehia i nià ia Ietu i to na faahuru-ê-raahia Mätaio pene 17 ìrava 2, täpiri mai i te reira, te vai ra te manaò no te vähi faaearaa o te Atua. Ta tätou ia e ìte ra ia faahitihia te parau no te pätireia o te Atua, aore ra te pätireia o te ao : Te fätata mai nei te pätireia o te ao Mätaio pene 3 ìrava 2 ; E ao to tei haèhaa te âau, no rätou te pätireia o te ao Mätaio pene 5 ìrava 3 ; E au te pätireia o te ao i te hoê taata i ueue i te huero maitaì i roto i ta na ra âua Mätaio pene 13 ìrava 24 ; Aue òutou e te mau päpaì parau e te mau Färitea, e haavare òutou, te ôpani nei òutou i te pätireia o te ao i te taata nei, e òre òutou iho e tomo, e te feiä e tomo ra, te täpeà nei òutou Mätaio pene 23  ìrava 13. Parau mau, i roto i teie mau hiòraa, aita ihoä hoê vähi i ìtehia ai teie märamarama i te àmaraa, te vähi rä i päpü, te täpaò te reira o te Atua : Ua parau iho ra te Atua : ei märamarama, ua märamarama iho ra Tenete pene 1 ìrava 3 ; Inaha, ua hohora o ia i te märamarama e àti aè ra te reira ra, e ua täpoì i te tumu o te moana Iöpa 36, 30 ; No òe te ao, no òe atoà te ruì, na òe iho hoì i rave i te märamarama e te mahana Taramo 74 ìrava 16 ; Te feiä i haere noa nä te pöuri ra, e märamarama rahi tei ìteä ia rätou ; te feiä i pärahi i roto i te maru pohe, ua ànaana mai te märamarama i nià ia rätou Ìtaia pene 9 ìrava 2. Te vai ra hoê taò ta tätou tei püòhu i teie manaò , te faaearaa o te Atua, tei nià ia i te raì tei parauhia te aoraì. Ua faanaìnaì-roa-hia rä e tätou to na auraa i nià i te fare o te taata, e ua haamata mai te reira peu i te tau o te mau arii tei faahua faaatua atoà ia rätou, faaoti atu ra rätou e, no te taata rii te fare, âreà to te arii, e aoraì ia.

Te vai ra te tahi manaò hopeà ta tätou e faahiti atoà nei no teie taò ta tätou e hiò nei, teie ia manaò no te hau, oia hoì te huru faanahoraa i te faatereraa o te fenua. Hou mai te Papaâ io tätou nei, ua faataa-mäite-hia to tätou mau fenua i roto i nä hau e piti, tei parauhia Te ao uri e Te ao tea. I roto i Te ao uri, te vai ra o Huahine, o Maiào, o Moorea, o Tahiti, e o Tuhaa Pae, tei parauhia : Te ao uri o te faatauaroha. I roto i Te ao tea, te vai ra o Tahaa, Popora, Rarotoà, o Rotuma, e Te ao tea roa o te Maori, tei täatihia rätou i roto i Te ao tea o te faatauaroha.  Teie nä hau e piti, aore ra teie nä ao e piti, e tià to räua pärahiraa tämau i Taputapuätea, o Päòa uri to te tahi, o Päòa tea to te tahi, tei maìrihia to räua iòa, o Tiaì hau ätea, no te mea tei te ätea te rahiraa o te mau fenua e ö i roto i teie nä hau. Te ìte ra tätou e, i roto i teie taò e ao, ia parau tätou e : Ia aroha mai te Atua i to te Ao, teie ia te rahiraa manaò ta te reo i haaputu i nià i teie taò : ao. Èi faaotiraa teie te tähi maa pehepehe no te Tumu :

Te Tumu

 

No to hinuhinu e te ao nei

I täiva ai au ia òe

E ta ù Atua e

Aore òe i tahoo mai

I mata ê mai ia ù

I aroha mai ra òe

I te aroha Metua.

 

Te tïpapa atu nei au

Te Tätarahapa atu nei au

E ta ù Atua e

A ìriti na òe, te ìno te teòteò

I to ù âau tuu mai ra òe

Te Aroha te here i to ù värua

E niu no to ù oraraa.

 

E Ietu e, ârue mätou ia òe

E haamaitaì to mätou vaha ia òe

Haamori mätou ia òe i te haavare òre

Ia faufaahia ta mätou mau ârueraa

Fänau tävinihia òe, no te tävini

Ia ìte atoà mätou i te faufaa o te täviniraa.

 

Ua faatià òe i te ture èi àveià

Ta te Aroha âau e faatumu

Ia mämü te Aroha vaha

Te pii noa nei te mau àti i te ao nei

Te feiä hara te ìmi nei i te èà

Faaitoito tätou a tià a haere e a täuturu.

 

 

Teraì òr. Faatura.

 

Ioane 20,19-23. Aho.

 

Tāpati 28 no Më 2023.

ÔROÀ no te REO.

Aho.

Taramo 104

1 E haamaitaì i te Fatu, e ta ù värua E ta ù Atua, e te Fatu, òe tei rahi roa. Ua vehihia òe i te hanahana e te mana,

2 i te faaàhuraa ia òe iho i te märamarama mai te àhu ra, e te hohoraraa i te mau raì ra mai te päruru;

3 i te vauvauraa i to na ra mau piha i te pape. E te raveraa i te mau ata ei pereoo no na, i te hahaereraa nä nià i te pererau ra o te mataì,

4 i te faariroraa i te mau merahi no na mai te mataì ra, e te mau tävini no na mai te auahi ura ra.

5 Na òe i haamau i te tumu o te fenua, ia òre roa ia âueue.

6 Ua täpoì hoì òe ia na i te àputo, mai te àhu ra, te teitei ra te pape i te mau mouà.

7 Ia aòhia e òe ra, maùe atu ra; i te haruru o to pätiri ra, ua haapeepee atu ra i te haere.

8 Ua aè rätou i te mau mouà, ua pou rätou i te mau peho, i te vähi i haapaòhia e òe no rätou ra.

9 E ôtià tei haapaòhia e òe, e òre ia e maìri ia rätou, e òre e hoì faahou mai e haanïnä i te fenua.

10 Ua tuu mai o ia i te pape pihaa ei vai matätia, o tei tahe haere nä roto i te ärea o te mau mouà ra:

11 i reira te mau puaa o te fenua nei i te inuraa, e te mau âtini ôviri i te haamäharaa i to rätou hiaai.

12 I pïhaì iho te mau manu o te reva i te pärahiraa o tei òto i roto i te mau âmaa rii.

13 Te faararirari nei o ia i te âivi rii no roto i to na ra mau piha; e te î nei te fenua i ta òe i faahotu mai.

14 Te faatupu nei o ia i te àihere na te mau puaa, e te räau rii na te taata. E te roaa nei te mäa ia na no roto i te fenua:

15 e te uaina e òaòa ai te âau o te taata nei e te monoì i hinuhinu ai to na mata, e te päne e itoito ai te âau taata nei.

16 Te mau räau a te Fatu ra, ua paari ia, te mau âreti i Repanona ra, ta na i tanu ra,

17 e tei ôfaahia e te mau manu ra. Te mau peruti ra to te hetite ra ùtuafare.

18 Te mau mouà teitei ra, no te puaaniho ôviri ia; e te mau mato ra, e haapüraa ia no te täfana.

19 Ua hämani o ia i te märama no te mau tau i haapaòhia ra, ua ìte hoì te mahana i to na maìriraa.

20 Na òe i hopoi mai i te pöuri, e ua ruì iho ra, ei reira te mau taehae o te ururäau ra e haere ai,

21 te mau riona âpï i te ûâ-haere-raa i te mäa, i te ìmiraa i te mäa i te Atua ra.

22 Ua hiti anaè te mahana ra, ua hoì rätou, e ua taòto faahou i roto i to rätou mau âpoo.

23 Ua haere iho ra te taata i te òhipa na na, ta na i rave ra, e ahiahi atu.

24 Aita te huru rau o ta òe ra òhipa, e te Fatu. E mau räveà paari anaè ä ta òe. Ua î te fenua nei i ta òe ra taoà.

25 E tënä na hoì miti rahi e te âano, tei reira te mau mea e nee haere, eita e hope ia taiò: te mau mea rii ra e te mea rarahi atoà ra.

26 Tei reira te mau pahï i te tere-haere-raa; tei reira te Reviatana ta òe i hämani i te haùti haereà.

27 Te tiaì anaè ra te reira ia òe ra, ia noaa ta rätou mäa i te taime mau ra.

28 O ta òe i horoà ra, o ta rätou ia i rave; ua heheu òe i to rima ra, ua îî anaè ia rätou i te maitaì.

29 Ua püroù òe i to mata ra, e àti ia to rätou Ua rave mai òe i to rätou aho, ua pohe ia rätou, e ua hoì faahou i to rätou ra repo.

30 Ua tono mai ra òe i to värua, ua hämanihia rätou. E ua rave faahou òe i te aroä o te fenua.

31 E vai ä te hanahana o te Fatu e a muri noa atu. Te òaòa nei te Fatu i ta na iho ra òhipa.

32 Ua hiò anaè o ia i te fenua, ua rürü ia; ua faatiàià anaè o ia i te mau mouà ra, ua pee te auahi i nià.

33 Te ora nei au ra, e himene ä vau i te Fatu; te vai nei au ra, e himene au ei haamaitaì i ta ù Atua.

34 E mauruüru ä to ù manaòraa ia na; e òaòa hoì au i te Fatu.

35 Te feiä rave hara ra, e mou ia i te fenua nei; e te feiä parau ìno ra, e òre roa ia.

E haamaitaì i te Fatu, e ta ù värua e. Hareruia.

Òhipa 2.1-11

Te haereà mai o te Värua Maitaì

1 E tae mau atu ra i te mahana Penetetöte, ua taìruru mäite aè ra rätou atoà i te vähi hoê mä te hinaaro hoê.

2 E aore i mähia, o te haruru mai ra no nià mai i te raì mai te mataì rahi ûàna ra, î roa aè ra te fare i pärahihia e rätou ra.

3 Ua fä mai ra te arero mäa ia rätou ra mai te ahi ra te huru, e faaea iho ra i nià iho ia rätou atoà ra,

4 e î aè ra rätou atoà i te Värua Maitaì, ua parau iho ra i te parau èê, i ta te Värua i horoà mai i te parau ia rätou ra.

5 E te pärahi ra te taata âti-Iüta paieti i Ierutarëma, no te mau fenua atoà i raro aè i teie nei raì.

6 E parare atu ra taua roo ra, ua ruru mai ra te taata atoà, e mäere iho ra, no te mea i faaroo atu ra taua mau taata atoà ra i ta rätou iho parau mau i te parau-raa-hia mai ra.

7 Faahiahia atu ra rätou atoà mä te pöpou, nä ô iho ra rätou rätou iho: «Inaha, eere änei rätou e parau nei i to Tarirea anaè?

8 E aha rä hoì teie i ìte ai tätou atoà nei i to tätou iho reo mau i te parau-raa-hia mai?

9 To Paretia, e te âti-Mëtai, e te âti-Èrama, e te feiä e pärahi i Metopotamia, e Iutea, e te Tapatotia, e to Ponoto, e to Àtia,

10 e to Ferutia, e to Pamafuria, to Àifiti, e to Rupi i te pae i àti mai i Turene ra, e te taata èê hoì no Röma, te âti-Iüta, e te peroteruto,

11 to Tereta, e to Âräpia, i te faarooraa atu tätou ia rätou i te parauraa mai i te peu taa ê a te Atua i ta tätou iho nei mau parau mau.  

1 Törïnetia 12.3-13

3 E teie nei, e faaìte atu vau ia òutou, aore roa e taata na te Värua o te Atua ta na parau, e parau ia Ietu e: «Ua ànatemahia», aore roa e taata e tià ia parau e: «o Ietu te Fatu», maori rä o tei parau i ta te Värua Maitaì ra.

4 E rave rahi te huru o te mau mea i horoàhia, hoê rä Värua.

5 E rave rahi ä hoì te töroà, hoê rä Fatu.

6 E rave rahi ä hoì te òhipa, hoê rä Atua e òhipa i te mau mea atoà i roto i te taata atoà.

7 Ua horoàhia ta te Värua faaìte i te taata atoà, ia maitaì päatoà.

8 I horoàhia mai te parau paari e te Värua, i te hoê ra; e i horoàhia mai e taua Värua ra te parau e noaa ai te ìte, i te hoê.

9 Ta te tahi ra, o te faaroo ia, na taua Värua ra; ta te tahi ra, o te ìte ia i te faaora maì na taua Värua ra.

10 Ta te tahi ra, o te rave täpaò ia; ta te tahi ra, o te tohu ia; ta te tahi ra, o te ìte värua ia; ta te tahi ra, o te parau èê ia; ta te tahi ra, o te faaìte parau èê ia.

11 Na taua Värua hoê ra i òhipa i taua mau mea atoà nei, i te ôpere-mäite-raa i ta te taata atoà i ta na i hinaaro ra.

Hoê tino e te mero e rave rahi

12 Mai te tino hoì hoê nei, e rave rahi to na mero, e te mau mero atoà no taua tino hoê ra, rahi noa ä rätou, hoê ä ia tino, oia atoà hoì te tino o te Metia.

13 I päpetitohia hoì tätou e te Värua hoê i roto i te tino hoê ra, te âti-Iüta e te Herëni, te tävini e te tiàmä, e ua faainuhia tätou i ta te Värua hoê ra.

Ioane 20,19-23.

Te färaa mai Ietu i ta na ra mau pipi.

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou: Ia ora na òutou

20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra.

21 Ua parau faahou mai ra Ietu ia rätou: Ia ora na òutou. Mai ta ù Metua hoì i tono mai ia ù nei ra, e tono atoà hoì au ia òutou na.

22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì.

23 Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia.

Manaò.

Tei te pae àhuraa no te mahana i to Ietu niuraa i te parau no te nünaa tei piihia ia amo i te hopoià no te faafäiteraa i te Atua Nui Tumu Tahi, i ta Na Rähu, i te aru, i te taata èi ia pïhauhau tämau noa te Värua faatupu ora. O ta te aru e faaìte noa ra ia tätou i te mau mahana atoà, te ôteu noa ra te tiare Maurua, te mäoa noa ra te ùru, te para noa ra te meià, te ài noa ra te here, te täfifi noa ra te pöhue, te ìte noa nei tätou teie mau faufaa, ia tere haere tätou, ia haere tätou na pïhaì iho, no te huru ra o to tätou oraraa i teie mahana i te haapaòraa i te mau hopoià no te oraraa ùtuafare, te tïtau noa mai ra teie mau faufaa i te tahi maa taime no rätou i te haapoupouraa i teie mau maitaì. Te mahana, te ua, te mataì, teie e miri nei i te faufaa o te fenua, tei höroà i te ù i roto i te mau vao, te mau faaàpu, i reira te mau manu no te reva, e himene ai i roto i te mau âmaa räau, èi hämaniraa i to rätou mau ôfaaraa. Te hoê nei teie mau faufaa no te faaìte i te puai mana hope no te reo aroha e te here no te Atua Nui Tumu Tahi. Te Moana Nui a Hiva, te märae moà no te Atua o Taaroa Nui Tumu Tahi, tei faaòhu i te mau ôpe èi natiraa i te mau fenua te fauraò no te mau ìnaì o te moana uri paò. Tei haamahu i te anu o te vai miti ta te rä e türama ra i te mau ù o te hanahana o te Atua, tei faaìte ua hau te fenua i te hohoà o te Atua, ta Na i faahuri i ta na fana no te faatoro i te èà o te mau nuu atua, ta na i faaìte ia Noa te anuanua, e ta na atoà i faaìte ia tätou te Mäòhi to na aroha, to na here, e te hau ta na päpaì i roto i te raì èi taiòraa tämau na tätou, èi manaòraa tämau na tätou :

-Te ùoùo : te hohoà ia o te merahi, te tura, e te tiàmäraa.

-Te nïnamu : te raì ia, te tähei o teie nei ao, oia te ao o te Atua.

-Te matie : te fenua ia e to na î, nä reira hoì te mau mauà.

-Te ùteùte : te toto ia, te àti e te hara.

-Te reàreà : te hau ia, te märamarama, e te ìte.

Ua haapae te Atua i te èere i roto i te anuanua e täpaò no te pohe e te haaväraa, ia ìte maitaìraa tätou e te anuanua e täpaò no te aroha e te here fäito òre o te Atua. I mua i te aroha e te here o te Atua Nui Tumu Tahi,  e haamaitaì tätou i te Fatu,  tei vehihia ia tätou i te hanahana e te mana, i te faaàhuraa ia tätou i te märamarama mai te àhu ra, e te hohoraraa i te mau raì ra mai te päruru, i te vauvauraa i te mau ata ei fauraò, i te hahaereraa nä nià i te pererau ra o te mataì. Te faariroraa i te mau merahi no na mai te mataì ra, e te mau tävini no na mai te ahi ura ra. Tei haamau i te tumu o te fenua, ia òre roa ia âueue, ua täpoìhia te fenua, mai te àhu ra, te teitei ra te pape i te mau mouà, te haruru ra te pätiri, ua haapeepee i te haere. Te aè nei tätou i te mau mouà, te pou nei tätou i te mau peho, i te vähi i haapaòhia no tätou ra, tei faahau ia tätou i te fenua. Te pihaa noa nei te pape ei vai matätia, o tei tahe haere nä roto i te ärea o te mau mouà ra, i reira te mau puaa o te fenua nei i te inuraa, e te mau puaa taetaevao i te haamäharaa i to rätou hiaai. I pïhaì iho i te mau manu o te reva i te pärahiraa o tei òto i roto i te mau âmaa rii. Te pïnaì nei te mau âivi  no roto mai i to na mau piha; e te î nei te fenua i te heeuri te faahotu nei. Te faatupu nei i te àihere na te mau puaa, e te räau rii na te taata. E te roaa nei te mäa ia na no roto i te fenua. Teie atu ra te manaò haapoto i te mau taiòraa :  

-Taramo 104, 15 e te uaina e òaòa ai te âau o te taata nei e te monoì i hinuhinu ai to na mata, e te päne e itoito ai te âau taata nei.

-Òhipa 2, 8 E aha rä hoì teie i ìte ai tätou atoà nei i to tätou iho reo mau i te parau-raa-hia mai?

-1 Törïnetia 12, 13 I päpetitohia hoì tätou e te Värua hoê i roto i te tino hoê ra, te âti-Iüta e te Herëni, te tävini e te tiàmä, e ua faainuhia tätou i ta te Värua hoê ra.

-Ioane 20, 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì.

Haapüaì i te aho, e tià ia parauhia e toru noa taime faahitiraahia teie tao i roto i te pîpîria, te faahiti mätamuaraahia tei roto i te Tenete pene 2, ìrava 7 A hämani ai te Atua ra o te Fatu i te taata i te repo fenua nei, ua haapüaì iho ra o ia i te aho ora i roto i ta na âpoo ihu ra, riro aè ra te taata ei taata ora. Piti Ètetiera 37,9 Ua parau mai ra o ia ia ù, E tohu òe i te aho, e tohu, e te tamaiti a te taata na, e parau atu òe i te aho ra, Të nä ô mai ra te ATUA ra o te Fatu; E haere mai, e te aho e, mai nä mataì mai e maha ra, e haapüaì mai i nià i te feiä i pohe nei ia ora rätou. Te toru teie e faahitihia nei e Ioane pene 20, ìrava 22 e ua haapüaì mai ra i te aho i nià ia rätou ra, e ua parau mai ra: A färii i te Värua Maitaì.

I roto i teie fare te hämani faahouhia nei te mau pipi, i te mea ua matara te ùputa o te fenua e te ùputa no te raì. I tià ai i te mau âpotetoro i te faahiti i te reo o te mau nünaa i putuputu mai i taua mahana ra i tonohia mai ai te Värua Maitaì mai te arero maa ra, mai te ahi ra i nià i te mau taata päpetitohia atu ra rätou e rave rahi. Te färiiraa i te Värua Maitaì, te aho ia e höroà nei te itoito i roto ia tätou no te faaìteraa i te hanahana o te Atua Nui Tumu Tahi. No te huru oraraa e färereihia nei e tätou i teie manaha te rahi o te mau àti i nià i te fenua, ua rahi te maì, te pohe, e te oè, ua ìte tätou, ua ìte atoà te nünaa , ua rahi te hara i nià i te fenua, ua rahi te hara a te taata i mua i te Atua, te taime atoà te reira e faanahohia ai te vaereà marae, oia te tämäraa i te marae, tämä i te taura pito, tämä i te fenua, oia te färii ora mai reira mai te aho. I mua i te rahi o te fifi e färereihia nei e te Etärëtia, eita tätou e tano e parau e, aita e hapa ta tätou e tämä, no te mea eita te tupuraa o te òhipa e haavare. Teie faaruè rahi te taata ia tätou i teie mahana, e täpaò faaìte anaè te reira e, ua tae i te taime no te Etärëtia no te tämäraa ia na ia ora te nünaa faaroo. Te feiä atoà e pätoì i teie aniraa, te feiä atoà ia e hinaaro ra e huna i te parau mau. A ìtehia te taata e mauiui noa e aita to na e maì. E vaereà marae ta te mau Tupuna, ei tämäraa ia rätou ia ora te nünaa. No tätou nei rä, aita atu e räveà e matara ai tätou i to tätou mau fifi atoà maoti rä, ia färii te Etärëtia i te tämä ia na, ia tämä hoì te mau tävini o te Atua ia rätou, te mea noa ia e tiàturi faahou mai ai te nünaa faaroo i to na mau arataì. Te mea noa ia e faaora i te Etärëtia. Ia hiòhia tätou, i te tahi taime, ua faariro roa tätou i te Atua mai te mea ra, e Atua matapö, te tarià turi, e te vävä, mai te tahi tii të òre e ìte mai i te mau òhipa ìno e rave-noa-hia nei e to na mau tävini : te taiàta, te àmu moni, te inu àva, te parau ìno …, e te vai noa atu ra. No te òreraa te Etärëtia e hinaaro ia parauhia teie mau ìno e tupu noa nei i roto ia na, no to na ìmiraa i te räveà täpoìpoì i te reira, hiòhia atu ra mai te mea ra ua färii atoà o ia i te reira mau ìno, e ua âmui atoà hoì i roto i te reira haaviiviiraa e rave-noa-hia nei i te iòa o te Atua. Teie hoì mau parau ta tätou e faahiti nei, eere te mau parau no te raì, e mau parau anaè rä no te fenua ; eere te mau parau no tahito ra, e mau parau rä ta tätou e ìte noa nei i te tupuraa i mua i to tätou mata e tei tae roa mai te varovaro i roto i to tätou tarià, e mau parau hoì e täpiri ia tätou i te ùputa o te raì ia òre ia ìmihia te räveà tätäì i te reira, ia maitaì ta tätou täviniraa i te Atua, e ia hanahana to na iòa i nià i to tätou fenua iti, i roto i to tätou nünaa. Te vai aho noa nei tätou, e raveà faahou ta tätou, ua tämahia tätou e Ietu i to na haapüaìraa i te aho i nià i tätou, a färii i te Värua Mataì.

 

Teraì òr. Faatura.