Te piti o te mahana I te faaroo e tupu ai òe i te rahi

Monirē 7 no Tēnuare 2019

Te piti o te mahana

-Tumu parau : I te faaroo e tupu ai òe i te rahi

-Pehepehe

TA Ù NA OE IA

No te rahi o to ù Here ia òe e te Māòhi

I hōroà atu ai au, i ta ù na òe

To te papa raì i nià roa e to te reva, na òe

To nià i te fenua e to roto atoà ia na, na òe

To nià hoì i te moana e to te hohonuraa,

Na òe atoà ia, e aha anaè ā ia e te Māòhi

Inaha o vau, o òe hoì ia, ta ù ra nā òe ia

Eere roa atu òe i te àpu pau

To òe reo tumu ia puroro no te ora

Ta òe peu tumu ia rara àti tià aè te ao

To iho e to hīroà tumu tei faaora ia òe

E tei faatià ia òe i roto i to tura e to tiàmā

Māòhi e, a hiò na e a faaroo i to âau

Inaha o vau, o òe hoì ia, ta ù ra, na òe ia

Eere òe i te tupa e vare noa i te paa tāporo

Ta òe ùpa o tei faatahataha noa ia mahora to âau

Ta òe tārava e faaàraàra ia āraa te navenave o to reo

Ta òe ûtē, ia ûtētē i to tino i te hihi o te rā

Ta òe hivinau ia anaunau i te haumārū o to fenua

Piti o te mahana 21

Māòhi e, ua ìte òe i te mea maitaì Inaha o vau o òe hoì ia, ta ù ra na òe ia Eere roa atu òe i te àihamu e te àimama. Te momona o ta òe ùru ia haumārū to âau Ta òe ià tunu paa, ia tōpāpā to manaò i te hau Ta òe miti haari, ia haamiti to ôpū i te ora Ta òe pape Māòhi, ia mā to haereà i te ao nei Māòhi e, a hiò i mua, ua matara te ùputa ia òe Inaha o vau o òe hoì ia, ta ù ra na òe ia Eere roa atu òe i te tīpee e te tīpara.

To òe pū fenua ia fenuahia òe no te ora To òe marae ia mā aè to haereà no te ora.

To òe Faaroo Māòhi Mau, ia faaroo aè òe no te ora.

Ta òe pure ei ùpu aè na òe no te ora.

Māòhi e, a tià a haere ma te Hau, ua mā to rae. Inaha o vau o òe hoì ia, ta ù ra na òe ia.

Te mau Taiòraa

-Firipi 2/ 6-8 : «Haapae atu ra rā i to na iho, rave atu ra i to te tāvini ra huru..»

-Evaneria Ruta 17/5-10 : «Ahiri to òutou e faaroo mai te huero tïnapi noa iho ā te rahi, e parau noa atu ia òutou i teie nei tutamino, ia mahiti tumu òe, e ia tänuhia òe i raro i te tai, na na e faaroo mai».

Te manaò tauturu

I te taeraa mai te Tamaiti a te Atua i te ao nei, aita o ia i rave noa i te huru o te taata, ua mau rā i te huru o te tāvini no te haafātataraa i te taata o te fenua nei. E huru te reira no te haèhaa e te faariiraa i te tahi e hoê ā. Nā hea atoà paì te âparauraa e tupu ai mai te peu e, to nià te tahi e te tahi to raro ia. Hoê ihoā fāito e tupu ai te tahua no te fārereiraa. Oia mau, i roto i te faaìteraa a te Tamaiti a te Atua i te Hau o te Atua Metua, na roto i te haapiiraa i te taata, te faaoraraa i te taata i to rātou mau maì, te tiàvaruraa i te vārua faufau i rāpae i te taata, faatiàmāraa i te taata, faaora hoì mai te pohe mai. Aita te Tamaiti i huritua i te Atua Metua. E parau pinepine hoì na na i te parauraa e O vau e te Metua hoê ā ia. Te auraa, terā mana e terā òhipa, no ô mai ia i te Atua, te Atua ia te tumu. Terā ia e nounouhia nei e teie mau âpotetoro i te aniraa atu i te Tamaiti a te Atua e Faarahi mai i to mātou faaroo. No te mea, to rātou manaò tumu ia ìtehia mai rātou, tirārā atu ai. Eiaha no te faarahi i te faaroo, e faarahi rā ia rātou, ma te òre e faahoì i te maitaì i te Atua ra, te tumu o te òhipa e te tumu

o to rātou parau. Te tumu mau ia te Tamaiti a te Atua i pāhono atu ai ia rātou e Ahiri to òutou e faaroo mai te huero tïnapi noa iho ā te rahi, e parau noa atu ia òutou i teie nei tutamino, ia mahiti tumu òe, e ia tänuhia òe i raro i te tai, na na ia e faaroo mai . Ia parau hoì Ietu i ô nei e Ahiri te auraa, Aita. Aue hoì te peàpeà, aita atoà i noaa iti aè i te fāito naìnaì roa aè o te huero o teie nei ao, teie huero e parauhia nei «te tïnapi». Te auraa ra, aita to te rahi o te faaroo, terā mea iti ua navaì no te faatupu i te temeio. Haapāpū noa mai ra te reira ia tātou e, i roto i te tāviniraa i te Atua  o te Atua te haere i te rahi, no te Atua te parau e no na atoà ia te hanahana. Te auraa, to te Atua te hinaaro e faatupu. E mai te peu, te faaäuhia nei te faaroo i te tahi huero, te auraa, aita e taata i faaèrehia i te faaroo, tei roto te reira i te taata. Toe noa i te taata i te faatupuraa i ta te Atua, i reira te huero o te faaroo e māiha mai ai. E huero hoì tei tänuhia e te Atua i roto i te fenua i reira òe i te pūraa mai i teie nei ao, te fenua i hii ia òe, to tātou metua vahine faatupu ora. Na reira i te hiòraa e te faatupuraa i te hinaaro o te Atua i te fenua i reira te Atua i te haapārahiraa ia òe. A fārii e, e Māòhi òe  Haamanaò noa i terā māa parau e O tei haamā ia ù ra e haamā atoà vau ia na, e o tei huna ia ù ra e huna atoà vau ia na i mua i te aro o ta ù Metua». No reira, eiaha e haamā i to tātou Māòhiraa, eiaha atoà e huna. E hōroà hoì te reira na te Atua ia tātou nei i parauhia ai tātou e nūnaa Māòhi. No te mea ia e, e fenua to tātou, e reo, e peu ta tātou, e hīroà atoà hoì. A haapae i to tātou manaò taata e terā hinaaro taata, a rave anaè i te huru o te tāvini, tei faatupu i te hinaaro o te fatu òhipa, oia hoì, te Atua Nui Tumu Tahi. E Māòhi ra e Māòhi ia, e tupuraa te reira no te hinaaro o te Atua. E faateniteniraa te reira na tātou i te Atua, te tumu o to tātou Māòhiraa, te tumu ia o te Ora. Inaha, te faaroo, to te taata ia tiàturiraa i te Atua, te tumu o to na parau na te Atua e faaora i te taata i roto i to na oraraa. Aita atu ia e poroì maoti rā i te faaroo e tupu ai tātou i te rahi. No reira, a ora i to tātou faaroo Māòhi mau. Ia ora na.

Te pure

Te Atua Nui Tumu Tahi, te Fatu o te raì e te fenua, te tumu o to mātou Māòhiraa, haamaitaì mātou ia òe no te ora ta òe i hōmai. Haamaitaì mātou ia òe no to mātou metua vahine faatupu ora, te papa o to mātou ora. Ua haapārahi òe e te Atua ia mātou i roto i te uru maitaì, ta mātou e fānaò nei. Teie metua vahine faatupu ora, tei faaàmu ia mātou, tei räpaau ia mātou, tei riro atoà hoì ei vāhi haapiiraa ia mātou eiaha noa i to mātou anaè parau, i to oè atoà rā parau e te Atua Nui Tumu Tahi e. Inaha, te Fenua te titeà mata ia o te ìte. Ei ìte i to òe Here e to òe Aroha no te mea e hōroà faatau aroha te reira na òe e te Atua i te taata nei. Teie rā e to mātou Atua, pinepine mātou i te huritua ia òe e te òreraa e faatupu i to òe hinaaro. Ua tiàturi noa mātou i nià i to mātou pūai taata, to mātou atoà hoì māramarama. E hau roa atu, te haafaufaa òre nei mātou i ta òe hōroà. Ua haamere mātou i to mātou Māòhiraa. E inaha hoi no òe e te Atua Nui Tumu Tahi i Māòhi ai mātou. E hara rahi ia ta mātou ia òe e te Atua e. Te Atua Nui Tumu Tahi e, i mua i to òe moà e to òe hanahana, ia tiàhia i to òe hinaaro  a fārii mai ia mātou. E ma te rötahi o te âau o to òe mau tāvini, te ani atu nei mātou ia òe, ia tauturu mai òe ia mātou i te fārii-hope-raa i to mātou parau ei Māòhi, ia tià ia mātou atoà ia tià atu i mua i to òe aro ia au i te huru e te hohoà ta òe i hōroà mai no mātou i parauhia ai mātou ei nūnaa Māòhi. Oia mau, i te faaroo anaè ia òe e te Atua Nui Tumu Tahi e, e ora ai mātou nei e te mau nūnaa atoà e vai i roto i teie nei ao. E i te faaroo anaè e tupu ai mātou i te rahi, e hanahana ai òe e te Atua i roto i ta mātou faaìteraa. Amene.

Te toru o te mahana E hāmani maitaì e te aroha to te tumu nui

Mahana piti 8 no Tēnuare 2019

Te toru o te mahana

-Tumu parau : E hāmani maitaì e te aroha to te tumu nui

-Pehepehe

TO ÒE ORA

Ua ihu te fenua,

Ua tārehua te feruriraa o te mau faatere,

Ua pee aore noa te nūnaa i to na èà,

I to na haereà tumu òre e te tītauraa tumu òre,

E òre e neva, e òre e ôtohe, e òre e faaroo.

Ua ihu te nūnaa, ua manunu i te tiàturiraa òre,

Mai te ià i hei i nià i te ùpeà i haapuni ia na,

Eie ua parau i to na pohe e, to na ia ora,

Ua vahavaha i te fenua i hii mai ia na.

E òre e neva, e òre e ôtohe, e òre e faaroo.

Ua aniania te mau faatere i te hanahana tura òre,

Aore e mēharo, aore e mēhara.

Eiaha rā ia e maere,

E manaò mai ānei te ômii i te îtere eere i to na,

Ua tapihoohia òe no te haapori ia rātou.

Toru o te mahana 27

Ua rapu, ua reru, ua rara te mau mea atoà,

A hoì i te toàpū o to òe hīroà

Oi vaivai aè te ora e te māramarama,

Eiaha e onoöno, ua ihu ra, e hoì ia.

Te fenua, te iho tumu, e te Atua, to òe ia ora.

Te mau taiòraa : -Taramo : 145/8-13

-Mātaio : 1/1-7

Te manaò tauturu

Ta te reo ia o te taramo e hinaaro nei i te haamanaò mai ia tāua i teie mahana, tāua e te nūnaa Māòhi, tāua e ta tāua nei fāìraa i to tāua faaroo, tei patuhia i nià i to na here, to na aroha, ta te mau tupuna i fāì e, Te Atua te fatu o te raì e te fenua. Teie nei haamanaòraa, no te haapāpū-noa-raa mai e, te vai nei tāua e to tāua nei faaroo, teie faaroo te riro nei èi teòteòraa no tāua, inaha hoì, te reira to tāua faaìteraa i to tāua here e to tāua tiàturiraa i to tāua Atua, ta tāua atoà i pii na e, pāpā, te metua i te raì e māmā, te fenua faatupu ora ia. I mua i teie fāìraa na te Māòhi, aita te vahine i faarirohia ei mea haìhaì i roto i to tāua nei oraraa, ei Metua rā, metua faatupu ora, tei amo i te ora, e tei hii i ta na i fānau, i parau ai tāua e, te metua vahine e « māmā ». Te reira te fāìraa faaroo a te Māòhi, e te reira fāìraa, no roto roa mai ia i te hōhonuraa o te ôpū, tei Pīhaa mai, e tei riro ei parau mau na teie nūnaa i Māòhi nui nei.

Te haamanaò noa mai nei te parau no teie nūnaa, te vai nei te turaraa i roto i te tāne e te vahine, ei metua faatupu ora, aita te faaroo Māòhi mau e faataa ê nei teie nā tiàraa, i mua i to na parau, tāne noa atu ā vahine noa atu ā, no te tumu nui ihoā teie nā tino too piti. I roto i te mau hau e âua faaàti nei ia tāua, ua rau te mau faaauraa no te faaroo, te reira hau i ta na faaauraa, te reira hau e ta na fāìraa faaroo, te reira i to na huru e ta na hiòraa. Te riro nei paha te tahi i te faarahi ia na, e te tāpeàraa i te parau no te ora mure òre, te reira tei au ia i tā rātou nei hiòraa. Te mea pāpū no tāua e te nūnaa Māòhi, ua pāpaìhia to tāua parau i nià i to tāua fenua, e te pii noa mai ra ia tāua, e papa i to tātou nei faaroo i nià i to tāua Māòhiraa, te vāhi no reira mai tāua, i ìte ai tāua i to tāua parau, aita te manaò e faahapa nei i ta te tahi fāìraa faaroo, no te faatura rā i ta te tahi i fāì ai au i to ù faaroo Māòhi. Mai te tahi ohi âpī ra hoì tāua, e tupu nei i nià i teie nei fenua, i pīhaì iho i te tumu Mā, i raro aè i te hanahana o te hihi mahana, tei faaìte noa mai nei ia tāua e, te vai nei òe, te vai nei au, te vai nei tātou. E hāmani maitaì hoì e te aroha o te Tumu Nui ia tāua e te nūnaa nei e. No reira tāua i Māòhi ai. A ora i to òe faaroo Māòhi mau. Ia ora na

Te pure

E te tumu nui e, te òriòri nei te vārua, no te mauruüru i to òe ìteraa mai ia mātou, ei mau tamarii na òe. Ua faaàtihia mātou i to hanahana, ta te rahu e faaìte noa mai nei, ma te haapii mai e, tei au te reira i to òe here i teie nei nūnaa. Mauruüru e te Tumu Nui, no teie mau maitaì, to te fenua, to te tai e tae noa atu i to te raì, tei riro ei haamanaòraa i teie nūnaa i to òe here rahi ia na. Mauruüru e te Tumu Nui, mai to mātou faaroo e vai nei i roto i ta mātou nei mau himene tārava, ruàu, ûtē, ia âruehia e ia himenehia tō òe maitaì. Teie mai nei to mau tama, tama no te fenua Māòhi nui nei, tama no te here Atua, tei fānauhia, mai roto mai i te ôpū o teie fenua, i Māòhi nui nei. A oha mai i to aro, mai te oharaa o te metua tāne i ta na mau tama, arataì òe e a ìriti ia mātou i to parau, ia noaa faahou ia mātou, i te taiòraa i to mātou parau i roto i tā òe rahu. E te Tumu Nui e, a faaàmu mai òe i to mātou faaroo, tei riro ei paparaa no to mātou Māòhiraa. A oha mai e te Tumu Nui e, a oha mai i to aro na i nià ia mātou nei. E te Tumu Nui e, te fatu o te raì e te fenua, te papa o ta ù nei fāìraa faaroo, te tumu hoê o to ù ora, te haamaitaì nei e te faateitei nei to mau tamarii ia òe. Mai ta te rahu e faahoì noa nei i ta na haamaitaìraa ia òe, te tuu nei to mātou aro, i mua i to òe rahi e to òe hanahana. E Atua òe tei hau i te mau atua atoà, e Metua òe tei hau i te mau metua atoà, e te Atua Nui i te raì tuatinitini e. A fārii mai i to mau tama, te tama Māòhi nei.

Ia ora na.