Te toru o te mahana E hāmani maitaì e te aroha to te tumu nui

Mahana piti 8 no Tēnuare 2019

Te toru o te mahana

-Tumu parau : E hāmani maitaì e te aroha to te tumu nui

-Pehepehe

TO ÒE ORA

Ua ihu te fenua,

Ua tārehua te feruriraa o te mau faatere,

Ua pee aore noa te nūnaa i to na èà,

I to na haereà tumu òre e te tītauraa tumu òre,

E òre e neva, e òre e ôtohe, e òre e faaroo.

Ua ihu te nūnaa, ua manunu i te tiàturiraa òre,

Mai te ià i hei i nià i te ùpeà i haapuni ia na,

Eie ua parau i to na pohe e, to na ia ora,

Ua vahavaha i te fenua i hii mai ia na.

E òre e neva, e òre e ôtohe, e òre e faaroo.

Ua aniania te mau faatere i te hanahana tura òre,

Aore e mēharo, aore e mēhara.

Eiaha rā ia e maere,

E manaò mai ānei te ômii i te îtere eere i to na,

Ua tapihoohia òe no te haapori ia rātou.

Toru o te mahana 27

Ua rapu, ua reru, ua rara te mau mea atoà,

A hoì i te toàpū o to òe hīroà

Oi vaivai aè te ora e te māramarama,

Eiaha e onoöno, ua ihu ra, e hoì ia.

Te fenua, te iho tumu, e te Atua, to òe ia ora.

Te mau taiòraa : -Taramo : 145/8-13

-Mātaio : 1/1-7

Te manaò tauturu

Ta te reo ia o te taramo e hinaaro nei i te haamanaò mai ia tāua i teie mahana, tāua e te nūnaa Māòhi, tāua e ta tāua nei fāìraa i to tāua faaroo, tei patuhia i nià i to na here, to na aroha, ta te mau tupuna i fāì e, Te Atua te fatu o te raì e te fenua. Teie nei haamanaòraa, no te haapāpū-noa-raa mai e, te vai nei tāua e to tāua nei faaroo, teie faaroo te riro nei èi teòteòraa no tāua, inaha hoì, te reira to tāua faaìteraa i to tāua here e to tāua tiàturiraa i to tāua Atua, ta tāua atoà i pii na e, pāpā, te metua i te raì e māmā, te fenua faatupu ora ia. I mua i teie fāìraa na te Māòhi, aita te vahine i faarirohia ei mea haìhaì i roto i to tāua nei oraraa, ei Metua rā, metua faatupu ora, tei amo i te ora, e tei hii i ta na i fānau, i parau ai tāua e, te metua vahine e « māmā ». Te reira te fāìraa faaroo a te Māòhi, e te reira fāìraa, no roto roa mai ia i te hōhonuraa o te ôpū, tei Pīhaa mai, e tei riro ei parau mau na teie nūnaa i Māòhi nui nei.

Te haamanaò noa mai nei te parau no teie nūnaa, te vai nei te turaraa i roto i te tāne e te vahine, ei metua faatupu ora, aita te faaroo Māòhi mau e faataa ê nei teie nā tiàraa, i mua i to na parau, tāne noa atu ā vahine noa atu ā, no te tumu nui ihoā teie nā tino too piti. I roto i te mau hau e âua faaàti nei ia tāua, ua rau te mau faaauraa no te faaroo, te reira hau i ta na faaauraa, te reira hau e ta na fāìraa faaroo, te reira i to na huru e ta na hiòraa. Te riro nei paha te tahi i te faarahi ia na, e te tāpeàraa i te parau no te ora mure òre, te reira tei au ia i tā rātou nei hiòraa. Te mea pāpū no tāua e te nūnaa Māòhi, ua pāpaìhia to tāua parau i nià i to tāua fenua, e te pii noa mai ra ia tāua, e papa i to tātou nei faaroo i nià i to tāua Māòhiraa, te vāhi no reira mai tāua, i ìte ai tāua i to tāua parau, aita te manaò e faahapa nei i ta te tahi fāìraa faaroo, no te faatura rā i ta te tahi i fāì ai au i to ù faaroo Māòhi. Mai te tahi ohi âpī ra hoì tāua, e tupu nei i nià i teie nei fenua, i pīhaì iho i te tumu Mā, i raro aè i te hanahana o te hihi mahana, tei faaìte noa mai nei ia tāua e, te vai nei òe, te vai nei au, te vai nei tātou. E hāmani maitaì hoì e te aroha o te Tumu Nui ia tāua e te nūnaa nei e. No reira tāua i Māòhi ai. A ora i to òe faaroo Māòhi mau. Ia ora na

Te pure

E te tumu nui e, te òriòri nei te vārua, no te mauruüru i to òe ìteraa mai ia mātou, ei mau tamarii na òe. Ua faaàtihia mātou i to hanahana, ta te rahu e faaìte noa mai nei, ma te haapii mai e, tei au te reira i to òe here i teie nei nūnaa. Mauruüru e te Tumu Nui, no teie mau maitaì, to te fenua, to te tai e tae noa atu i to te raì, tei riro ei haamanaòraa i teie nūnaa i to òe here rahi ia na. Mauruüru e te Tumu Nui, mai to mātou faaroo e vai nei i roto i ta mātou nei mau himene tārava, ruàu, ûtē, ia âruehia e ia himenehia tō òe maitaì. Teie mai nei to mau tama, tama no te fenua Māòhi nui nei, tama no te here Atua, tei fānauhia, mai roto mai i te ôpū o teie fenua, i Māòhi nui nei. A oha mai i to aro, mai te oharaa o te metua tāne i ta na mau tama, arataì òe e a ìriti ia mātou i to parau, ia noaa faahou ia mātou, i te taiòraa i to mātou parau i roto i tā òe rahu. E te Tumu Nui e, a faaàmu mai òe i to mātou faaroo, tei riro ei paparaa no to mātou Māòhiraa. A oha mai e te Tumu Nui e, a oha mai i to aro na i nià ia mātou nei. E te Tumu Nui e, te fatu o te raì e te fenua, te papa o ta ù nei fāìraa faaroo, te tumu hoê o to ù ora, te haamaitaì nei e te faateitei nei to mau tamarii ia òe. Mai ta te rahu e faahoì noa nei i ta na haamaitaìraa ia òe, te tuu nei to mātou aro, i mua i to òe rahi e to òe hanahana. E Atua òe tei hau i te mau atua atoà, e Metua òe tei hau i te mau metua atoà, e te Atua Nui i te raì tuatinitini e. A fārii mai i to mau tama, te tama Māòhi nei.

Ia ora na.