Ioane 21 : 1 - 19 Ûàna

Tāpati 5 no Mai 2019.

ÔROÀ

Ûàna

Taramo 30

1 E Taramo, e e himene no te haoraa fare o Tävita. 2 E haamaitaì au ia òe, e te Fatu, ua faatià hoì òe ia ù i nià, e aita òe i vaiiho noa atu i ta ù mau ènemi ia òaòa noa na ia ù. 3 E te Fatu, e ta ù Atua, i tiàoro noa na vau ia òe, e ua faaora òe ia ù 4 Ua faahoì mai òe, e te Fatu i ta ù värua mai häte mai ä, e ua faaora òe ia ù ia òre au ia tae i raro i te âpoo ra. 5 E himene i te Fatu, e te feiä moà e, e ârue i to na maitaì, ei manaòraa. 6 Mai te àmoraa mata nei to na riri i te poto, âreà to na hereraa mai, e tià ia i te vairaa e mure noa atu te aho. Ia täpae noa mai te òto i te ahiahi; e riro rä i te òaòa ia poìpoì. 7 Taua maitaìraa no ù ra, ua parau ä hoì au e E òre roa vau nei e âueue. 8 No to hereraa mai, e te Fatu, i haamau päpü ai òe i to ù mouà. Ua huna iho ra òe i to mata, mäheahea aè ra vau. 9 Ua pure iho ra vau ia òe, e te Fatu, i reira e ua faaìte atu ra vau i ta ù aniraa i te Fatu. 10 E aha te faufaa ia rave-pohe-roa-hia vau, e ia hopoi-roa-hia vau i raro i te âpoo? E haamaitaì änei te repo ia òe, e faaìte änei ia i te parau mau na òe ra? 11 E faaroo mai, e te Fatu, e aroha mai òe ia ù; e te Fatu, ei tauturu òe ia ù. 12 Ua faariro òe i te òto no ù ra ei òaòa, e na òe i tätara i te àhu òto no ù ra, e ua faaàhu mai òe ia ù i te àhu òaòa. 13 E teie nei, e haamaitaì au ia òe mä ta ù hinuhinu, e òre roa vau e mämü. E te Fatu, e ta ù Atua, e haamaitaì ä vau ia òe e a muri noa atu.

Òhipa 5.27- 41

27 E ia ärataìhia mai rätou ra, tuu atu ra ia rätou i mua i te aro o te Tuneteri ra; ua ui mai ra te tahuà rahi ra ia rätou, nä ô mai ra 28 Aore mätou i parau hua atu ia òutou, eiaha òutou e haapii mä teie nei iòa? E inaha, ua î roa Ierutarëma ia òutou i ta òutou parau, e te hinaaro na òutou ia häio mai te toto o teie nei taata i nià ia mätou nei 29 Ua parau atu ra Pëtero e te mau âpotetoro atoà ra, nä ô atu ra  O te Atua ta mätou e faaroo e tià ai eiaha te taata. 30 Ua faatià iho nei hoì te Atua o to tätou hui tupuna ra ia Ietu, o ta òutou i täparahi i te  pätitiraa i nià i te räau ra. 31 Oia ta te Atua i faateitei aè nei i ta na rima àtau ei Arii e ei Ora, ei horoà mai hoì i te tätarahapa no Ìteraèra, e te matara hoì o te hara. 32 Ei ìte hoì mätou no na i taua mau parau nei, e te Värua Maitaì atoà ta te Atua i horoà mai i te feiä i faaroo ia na ra. 33 E ìte aè ra rätou i te reira, putapü atu ra to rätou âau, e feruri noa iho ra i te räveà e pohe ai ia rätou. 34 Ua tià aè ra te hoê Färitea i taua Tuneteri ra i nià, o Tämariera te iòa, e haapii ture, e taata haamaitaìhia e te taata atoà, ua faaue atu ra e arataì i te mau âpotetoro i räpae e ia roovaù iti aè. 35 Ua parau atu ra ia rätou E te mau taata o Ìteraèra nei, e ara ia òutou i ta òutou raveraa atu i tënä na mau taata. 36 Tupu aè nei Teuta i mütaa aè nei, i te faaahaaharaa ia na iho e, e taata rahi o ia; âmui atoà atu ra te taata ia na e maha atoà hänere: taparahihia atu ra o ia, e te feiä atoà i  faaroo ia na ra, purara ê atu ra ia, e mou atu ra. 37 I tupu aè nei hoì i muri aè ia na Iüta i Tarirea, i te ànotau päpaìraa iòa ra; e âmui atu ra o ia i te taata e rave rahi i te peeraa atu ia na e pohe atu ra o ia; e te feiä atoà i pee ia na ra, purara ê atu ra ia. 38 E teie nei, teie ta ù parau ia òutou: eiaha e haùti noa atu i tënä na mau taata, e vaiiho noa atu; na te taata teie parau e teie nei òhipa, e morohi noa ia; 39 na te Atua rä, eita ia e morohi ia òutou; o te riro noa atu hoì òutou ei feiä tamaì atu i te Atua. 40 Ua faatià mai ra rätou ia na, e faahoìhia mai ra e rätou te mau âpotetoro i roto, ua papaì atu ra, parau atu ra ia rätou, eiaha roa rätou e parau mä te iòa o Ietu, tuu atu ra ia rätou. 41 Haere atu ra rätou mai te aro atu o te Tuneteri ra mä te òaòa, i te mea no to na iòa i manaòhia ai rätou e au ia rätou taua hämani ìno ra.

Àpotarupo 5.11-14

11 Hiò atu ra vau, e faaroo atu ra i te reo o te mau merahi e rave rahi e àti noa aè taua teröno ra, e te mau mea ora ra, e te mau peretiputero (e to rätou rahiraa ia taiò ra, ua muriati i te muriatiraa, e ua tautani i te  tautaniraa), 12 i te pii-hua-raa te reo e E au te Ârënio taparahihia ra e, ei ia na te mana e te taoà rahi, e te paari, e te püai, e te tura, e te hanahana, e te haamaitaì 13  E faaroo atu ra vau i to nià atoà i te raì ra, e to te fenua nei, e to raro i te repo, e to te moana, e to roto ia rätou atoà ra, i te nä-ô-raa e O te haamaitaì, e te tura, e te hanahana, e te mana, ei ia na ia ei tei pärahi i nià iho i te teröno ra, e ei te Ârënio, e a muri noa atu 14 Ua parau iho ra nä mea ora e maha ra Âmene Ua tïpapa iho ra te mau peretiputero e piti àhuru mä maha ra i raro, e ua haamori ia na i të tià i te oraraa e a muri noa atu.

Ioane 21.1-19.

Te fä-faahou-raa mai Ietu i ta na ra mau pipi

1 E muri aè ra, ua faaìte faahou mai ra Ietu ia na iho i te mau pipi i te roto i Tïpëria ra, i nä ô o ia i te faaìteraa mai. 2 E te putuputu atoà ra Timona Pëtero mä, e o Toma o të parauhia ia Titimo ra, e o Nätanaèra o Tana i Tarirea ra, e nä tamarii hoì a Tepetaio ra, e toopiti hoì puè pipi ä Ietu ra. 3 Ua parau atu ra Timona Pëtero ia rätou. Te haere nei au e ravaai. Ua parau mai ra rätou E haere atoà tätou. Haere atu ra rätou i reira ra i nià i te pahï, aore rä a rätou faufaa i noaa i te reira ruì. 4 E poìpoì aè ra, te tià noa ra Ietu i te pae roto ra; aore rä te mau pipi i ìte e, o Ietu. 5  Ua parau mai ra Ietu ia rätou E te mau tamarii ra, e mäa ta òutou? Ua parau atu ra rätou Aita. 6 Ua parau mai ra Ietu ia rätou A tuu na te ùpeà i te tau ätea o te pahï na, e noaa ia ta òutou. Ua tuu atu ra rätou, e aita aè ra e maraa ia rätou ia ùme i te rahi o te ià. 7 Ua parau atu ra taua pipi herehia e Ietu ra ia Pëtero O te Fatu Faaroo aè ra Pëtero e, o te Fatu tërä. Ua àhu iho ra i ta na àhu i nià iho o tei vaiiho-ê-hia e ana ra, e tätià iho ra hoì e ôuà atu ra o ia i raro i taua roto ra. 8 Nä nià mai ra te hoê pae pipi ra i te poti, mä te ùpeà e te ià i te ùmeraa mai. Aita hoì i mäoro reà i uta, e au i te piti hänere o te tüpiti ra. 9 E tae mai ra rätou i te pae, hiò atu ra rätou i te auahi i te àmaraa, e te ià i nià iho e te päne hoì. 10  Ua parau atu ra Ietu ia rätou A rave mai na i e fanu ià i ta òutou ià i noaa na. 11 Haere atu ra Timona Pëtero i nià i te poti, ua ùme mai ra i te ùpeà i te pae, ua î roa i te ià rarahi, hoê hänere e pae àhuru e toru tiàhapa; aore rä i motumotu te ùpeà i taua ià rarahi ra. 12 Ua parau atu ra Ietu ia rätou A haere mai a àmu. E aore roa te hoê pipi i ui noa atu e O vai òe?, i te mataù, ua ìte hoì rätou, e o te Fatu ia. 13 Ua haere atu ra Ietu, rave iho ra i te päne, ua tuu atu ra ia rätou ra, e te ià atoà hoì.14 O te toru teie i to Ietu faaìteraa mai ia na iho i te mau pipi ra, i muri aè i ta na tiàraa mai te pohe mai ra.

Te töroà o Pëtero

15  E paìa aè ra rätou, ua parau atu ra Ietu ia Timona Pëtero E Timona a Iona e, te rahi na to òe hinaaro ia ù i teie? Ua parau mai ra o ia E te Fatu, ê, ua ìte òe e, te hinaaro atu nei au ia òe. Ua parau atu ra Ietu ia na A faaàmu i ta ù mau ârënio. 16 Ua parau faahou atu ra o ia ia na, o te piti ia o te parauraa atu E Timona a Iona e, te hinaaro na òe ia ù? Ua parau mai ra o ia o ia ia na E te Fatu, ê, ua ìte òe e te hinaaro atu nei au ia òe. Ua parau atu ra Ietu ia na A tiaì i taù mau mämoe. 17 Ua parau faahou atu ra o ia ia na, o te toru ia o te parauraa atu E Timona a Iona e, te hinaaro na òe ia ù? Ua òto iho ra Pëtero i te mea a toru aè ra o na uiraa mai ia na e Te hinaaro na òe ia ù? , e ua parau mai ra ia na E te Fatu, aore roa e mea toe i te ìteä ia òe, ua ìte òe e, te hinaaro atu nei au ia òe. Ua parau atu ra Ietu ia na A faaàmu i ta ù mau mämoe. 18 Âmene, âmene, e parau atu vau ia òe i to âpïraa ra, ua tätià òe ia òe iho, e hahaere iho ra òe i ta òe ra vähi hinaaro; ia ruhiruhiä rä òe, na òe e faatoro i to rima, e na te tahi ê e ruuruu ia òe, e a hopoi atu ai hoì ia òe i te vähi hinaaro-òre-hia e òe ra. 19 Nä reira atu ra o ia ei faaìteraa atu ia na i te huru o to na pohe e maitaì ai te Atua. E oti aè ra taua parau ra, ua parau atu ra o ia ia na A pee mai ia ù.

Manaò.

Teie te tahi mau tumu parau i ìritihia mai, mai roto mai i na taiòraa e maha nei e te mau türamaraa a te mau ìrava e ärataì ra i te mau tuatua o te mau parau.

Taramo       30                                  Te Atua te Faaora.

Òhipa                   5 : 27 -  41                      Te  Ioa o Ietu.

Àpotarupo  5: 11 - 14                       Te feia i faaroo.

Ioane          21: 1 - 19                       Te peeraa ia Ietu.

Ei manaò tuatäpapa.

Taramo 30.

Te faaìte nei teie Taramo i te òhipa i ravehia i nià ia Tavita, i to te Atua faaoraraa i to na maì teimaha, E ua faahoìhia mai to na varua, tei tae i hate. Teie ia ta Tavita e pehepehe nei i ta te Atua òhipa i faatupu. Ta na ia e haapäpü nei i to na tiàturiraa i te Atua, ma te oaoa, ei ia himene te feia moà atoà i te haamaitaì i te Atua. Te haamanaò atoà nei ra o Tavita i roto i teie Taramo, te huru o te Atua i mua i te taata, ua rahi aè to te Atua haamaitaìraa i te taata, i te faahapa ta na i here. Te faatià atoà nei o ia i te mau hape ta na i rave i mua i te Atua. Te parau ia e faahitihia ra  i te ìrava 5 Mai te àmoraa mata nei to na riri i te poto, àreà to na hereraa mai, e tià ia i te vairaa e mure noa atu te aho. To na auraa, te pärahi nei te Atua i roto i te moàraa ma te taui ore, aita roa e parau ìno e ìtehia nei i roto i ta Na mau faaoraraa. E Atua parau tià ra O ia, e o tei aroha i te mau taata atoà. Te hinaaro nei ra te Atua ia vai tuàti noa te taata ia Na. O teie te tahi mau tuhaa ta Tavita e haamaitaì nei i te Atua, ma te haapäpü i to na mau manaò tei riro mai te hoê fäîraa faaroo ra te huru. I te parauraa e, e ore roa vau e mämü, e, e Atua Nui Tumu Tahi, e ta ù Atua. O te Atua te Metua no te mau taata atoà, na roto i to na Mana hope te mau nei te Atua i te mau mea atoà i raro aè i ta na mau faanahoraa. i tià ai ia Tavita i te parau teie huru parau no te Atua i te mea te ìte nei o ia i te maitaì i noaa ia na na roto i to na faaoraraahia e te Atua. No reira, ia òre te taata ia färii i te Atua mai te hoê hoa päpü o te tano ia na ia tiàturi, e vai noa o ia i roto i te fifi e eita atoà te âparauraa e tupu faahou, eita hoi te mau mea atoà i ôpuahia e täpae i te hopeà. Te here o te Atua i to na nunaa, e ore ia e aueue. Ia ateä noa atu tätou i te Atua, na te aroha fäito-ore o te Atua e patu faahou i to tätou hoêraa ia Na i roto pü i to na nunaa. Ua faatupu hope te Atua i te reira na roto i ta na faaauraa âpï e tätou ma te manaò hohonu i ta na ture i roto i to tätou âau. Te òhipa ta te Atua i rave i nià ia Tavita i te faaoraraa, to na auraa te faatoro nei e te hohora nei te Atua Metua i to na rima Aroha ia tätou te taata nei. Te òhipa ia e tupu nei i roto i te puta.

Òhipa 5 : 27 - 41 Te ûànaraa te Ioa o Ietu.

Tei mua te mau Âpotetoro i te Tuneteri, no te òhipa rahi ta rätou e rave ra, ei faaìteraa i te Ioa o Ietu i te mau taata no Ierutarëma, i te Iòa o Ietu ia au te faaìteraa a te mau Âpotetoro. No te mau Tuneteri, aita roa e tià nei teie òhipa e tupu ra, i te mea no rätou te Tamaiti a te Atua ua pohe, eita e tià faahou ia faahitihia to na Ioa. No te mea te pohe o Ietu ua tià ia, i te hoê taata tei rave i te hoê òhipa tià ore i mua i to na nunaa, i pätitihia ai O ia i nià i te tätauro, taua pohe ra mea faaìnohia ia e te Atua i to rätou tiàturiraa. Ia au ihoä i te faanahoraa Âti-iuta, i te faaìteraa a te Teuteronomi i te pene 21 mai te ìrava 22 e te 23. Ia rave te taata i te hara pohe roa ra, e ua ri atu ra òe ia na i nià i te raau, eiaha to na tino e vaiihohia i nià i taua raau ra e ia ao te ruì ra, ei taua mahana ra òe e tänu ai ia na, ia òre ia viivii to fenua, ta to Atua ta Iehova e horoà mai no òe ei parahiraa o te taata  atoà hoì i rihia i nià i te raau ra ua katarahia ia e te Atua.

Teie te parau ta te Tuneteri e täpeà nei, ma te ìte ore e o rätou atoà to roto i teie parau, i te mea aita e faaìtehia ra te tumu o te hara, e tià ai ia rihia te hoê taata i nià i te raau. Areà ra no Ietu te vai nei ia te tahi vahi e taaê ai i te feia rave hara. I te mea aita e parau faahou ta rätou i muri mai i te utuà pohe, tei pohe ra, ua pohe ia. No Ietu ra eita roa ia mai te reira, te pohe no Ietu te haamataraa ia te hoê òhipa no te hoê tau âpï, te òhipa veà tono. Teie ia ta te mau Âpotetoro e faaìte nei, oia hoì te mau taata atoà e tiàturiraa to rätou no te faaroo i te maniania no te parau âpï oaoa. E tià ia rätou ia riro ei ìte no Ietu Metia tei faatätaurohia, oia atoà te Tuneteri e tià ia rätou ia riro ei ìte no te Iòa o Ietu. Teie ra ia faaàhuhia rätou i te hanahana o te Varua Maitaì, e tià mau ai e faafaite i te ora a te Atua i te mau taata atoà. Oia ia te manaò i puta pu i roto ia Tämariera, te faaäraraa o ia i te Tuneteri ia haapaò maitaì i te òhipa e ravehia nei no te ìmiraa e haapohe i te mau Âpotetoro ma te tumu òre. I faatià ai o ia i te òhipa i ravehia e Teuta i to na ra tau, tei hinaaro ia riro o ia maite hoê metia ra te huru, e e maha hänere taata tei pee ia na, aita ra i tupu maitaì, e rave rahi tei haapohehia, e ua purara atu ra, i te mea aita teie pupu i haamauhia i nià i te iòa o te Atua, e morohi atu ra. Oia atoà ia o Iuta i Tarirea, tei faatupu i te hoê pupu ei pätoìraa i te hau Roma e faatere ra i teie mau pae fenua. Aita atoà teie òhipa i manuia, i te mea eita na te Atua i faaue ia rätou e faatupu i teie òhipa, e ua morohi atoà. Teie na hiòraa, aita roa ia e tüàtiraa i te manaò ta Tämariera e feruri ra, maite mea eita na te Atua ra e morohi ia, e ôpuaraa ra na te Atua, eita ia e morohi, e vai ia i to na vairaa i roto i te mau ui atoà. Mataù iho ra te Tuneteri i teie mau parau a Tämariera, tuu atu ra i te mau Âpotetoro i rave na i ta rätou òhipa. E òaòa aè ra te mau Âpotetoro, i te mea ua tià atoà ia rätou i te faaìte i te Iòa o Ietu i te vahi eita e tià i te taata i te faaroo i mua i te mau ènemi o Ietu. Aita atu ra i morohi teie faaìteraa a te mau Âpotetoro i te Iòa o Ietu i te vahi ta rätou e hinaaro nei. Tei ìtehia ra te ûànaraa ia te iòa o Ietu i Ierutarëma. Te ôrama ia e ìtehia nei e Ioane, i te faaìteraa a te..........

Àpotarupo 5: 11 - 14 Te feia i faaroo.

Te mau reo, te mau piiraa, te mau haamaitaìraa, te mau pororaa a te mau merahi, tei faahaèhaa nei rätou  i mua i te ârenio tei taparahihia. E òre roa ia e tià ia taiòhia to rätou rahiraa, ua raeàhia te numera i to na hopeà, eita e tià ia taiòhia.

I roto i ta tätou parau te ìte nei ia tätou i te faanahoraa a te Atua, no te hoê oraraa âmui no te feia tei tiaì i te tiaìtururaa i te arii hanahana tei pärahi i nià i to na teröno. I ù nei te tupu hoperaa te òhipa a te Atua i rave i nià i ta na Tamaiti no to te ao nei. Te ìteraa i te òhipa hanahana i ravehia e te Atua, te ìte-atoà-raa ia i ta na Tamaiti. Te tupu nei ia i ù nei te àvariraa no to na Patireia. I reira na ora e maha i te parauraa e ÂMENE. Oia hoì e parau mau teie e faaìtehia nei.

                        1) To nià i te raì.

                        2) To nià i te fenua.

                        3) to raro i te repo.

                        4) to roto i te moana.

Te àmui nei te mau rahu a te Atua, ei haamaitaìraa i te àrenio, tei pärahi i nià i to na teröno hanahana. Oia ia teie e faaìtehia nei te tupuraa i roto i te .................

Ioane 21 : 1 - 19  Te peeraa ia Ietu.

I roto i teie taiòraa e tià ia tätou ia parau e, te vai ra te mau ìrava tumu tei faaìte päpü i te tupuraa no teie fä faahouraa mai o Ietu i ta na mau pipi.

Ìrava 1)                       Te faaìte faahouraa o Ietu ia na i te roto no Tïpëria.

Ìrava 2)                       Tei reira o Timona Petero e te mau tamarii a Tepetaio.

Ìrava 3)                       To Timona Petero, haereraa e ravaai, e to na peeraahia e te täatoà o te mau pipi. E te manuia-òre-raa te täutai i taua ruì ra.

Ìrava 4vm)                  E i te poìpoì roa teie o Ietu e tià noa nei i te hiti roto ma te    parau atu e, E te mau tamarii e maa ta òutou.

Ìrava 6-13)                  Te faaueraa ia a te Fatu ia tuu i te ùpeà i te tau atea o te pahï, oia hoì i te pae àtau. Manuia iho ra te täutai i reira, eita hoì i te vahi atea roa i te pae, ua î roa te ùpeà i te ià, ma te faaìte atoà i te numera, 153 rahiraa aita te ùpeà i motumotu. Teie numera, e täpaò faaìte i te âmuiraa o te taata Teretetiano i roto i te mau tau atoà. O tatou ia i faaroo aè nei i te mau faaìteraa a te Àpotarupo teie rahiraa taata e       ìtehia nei e Ioane. Oia hoì te tahi tatararaa no teie numera te 100, eita e hope ia taiò te nunaa o te Atua, te 50 te mahana Penetetöte, te ôroà no te Värua Maitaì, te 3, te iòa o te Metua, Te Tamaiti, e te Varua Maitai. Te ïà ra i te tau o Ietu, e täpaò ia te reira no te taata Teretetiano.

IXTHUS. I te reo Herëni.

I           Iesous              Ietu

X         Xristos            Metia

TH      Teos                Atua

U         Uios                Tamaiti

S          Soter               Faaora

Ìrava 14 vm)               O te toru teie o te taime to Ietu faaìteraa mai ia na i ta na mau pipi mai to na tiàraa mai, mai te pohe mai.

Te tämäaraa i faaineinehia e Ietu no ta na mau pipi, ei täpaò faaìte e, e tià atoà ia Na ia àmu i te maa. To na tino aita ia i tähuti, ua tià hoê ä haereraa i rapae i te menema e to na Varua. Teie maa ta Ietu i faanaho no te àvari ia i to na tiàraa Atua.

Ei hiò âmuiraa i na taiòraa e mäha.

E tià ia parauhia ua ûàna tei iòa o Ietu i Ierutarëma, ua tae roa i roto i te feia faatere i te pae faaroo Àti Iuta, e i te pae tivira no te hau Roma. Ia hiòhia mea maitaì aè i te oraraa o Ietu i pïhaì iho i ta na mau pipi i to na oraraa ra. Aita ia te mau pipi e parau rahi nei i te iòa o Ietu i te mau vahi taata. Ia tià mai ra o Ietu mai te pohe mai, te ìtehia nei to te mau pipi-òre-raa e faaea i te parau i te iòa o Ietu. To na auraa ra e òhipa rahi teie e ravehia nei e te mau pipi, i te haamauraa i te mau faanahoraa no teie tiàturiraa âpï. Tei faatupuhia e te tiàfaahouraa o Ietu, i teie reo tei parauhia i nià ia Timona a Iona,   

                                   1) A faaàmu i ta ù mau àrenio,

                                   2) A tiaì i ta ù mau mämoe,

                                   3) A faaàmu i ta ù mau mämoe,

4) Na òe e faatoro i to rima, e na tetahi ê e ruuruu ia òe, e a hopoi atu ai hoi ia òe i te vahi hinaaro-ore-hia e òe ra,

                                   5) A pee mai ia ù.

Na teie mau parau ta te Fatu i nià ia Timona a Iona, e haapäpü nei, i te täpura òhipa ia ravehia e te mau pipi. O te tià ia, ia tätou ia hiò i roto i te Èvaneria a Ioane i te pene 21 i te mau ìrava 1 e tae i te ìrava 19, ei hiòraa na tätou mea nahea to Ietu taeraa i nià i na manaò e 5 nei.

Ei haatumuraa i te manaò Ioane 21: 1 - 19.

Tae roa mai i teie nei, te mau färaa no Ietu tei faatiàhia i roto i teie Èvaneria, ei haapäpüraa ia i te pipi i te òhipa rahi ta te Fatu i rave no to na upootiàraa i nià i te pohe. Ua faaineinehia hoì rätou no te hoê àroraa rahi. E riro i teie nei, ua î roa rätou i te òaòa e te horo haere ra na roto i te mau aroä no Ierutarëma ma te pii e, ua tiàfaahou o Ietu, Aita roa. Ua paruparu roa rätou, aita e ìte faahou nei e, e haere i hea, aita to rätou e arataì faahou. E no te mea, aita ta rätou e raveà faahou, te faatiàhia nei rätou i roto i teie parau e, te haere nei te mau pipi e ravaai. O rätou tei faaineinehia no te àfaì i te hoê parau faufaa o tei faaaueue i teie nei ao, te haere nei e ravaai. Te òhipa ta rätou i faaruè i te mau taime i maìri, te hoì faahou nei rätou i reira, o te huru anei teie no te mau veà o te hau, e ua faufaa-ore anei te òhipa tei ravehia e te Fatu ? Aita ! Ua tià i te Fatu ia hoì faahou rätou i ta rätou òhipa mätamua, te òhipa ravaai. I te hiti hoì no teie nei roto, e i nià i ta rätou òhipa ravaai to te Fatu tïtauraa ia rätou ia pee mai ia Na. No te mea ra, ua fatata te hora e haamata ai rätou i te òhipa âpï i tïtauhia ai rätou, te hinaaro nei te Fatu e horoà i te hoê haapiiraa hopeà ia rätou no ta rätou òhipa. E ei raveà e òhie ai to rätou märamaramaraa e te ìteraa i te auraa no taua òhipa ra, ua faahoì te Fatu ia rätou i roto i teie nei roto, i nià i ta rätou ùpeà i faaruè aè nei, no te mea, teie nei roto e te òhipa ravaai ta rätou i mätau, o te parapore ia no to rätou toroà âpotetoro i roto i teie nei ao. E na roto i teie täutai temeio e haapii märamarama ai O ia ia rätou i ta rätou òhipa. Eiaha e manaò e, e täpitiraa teie no te täutai temeio tei faatiàhia, i te pae mätamua no te òhipa a te Fatu, e mea ê te täutai mätamua, e mea ê teie.

E piti haapiiraa ta te Fatu  e horoà nei i te mau âpotetoro, na roto i teie nei täutai temeio:

1) E mau ravaai taata rätou. Te faamanaò nei te Fatu ia rätou na roto i teie täutai i ta na tïtauraa ia rätou, "a pee mai ia ù e faariro vau ia òutou ei ravaai taata." Ua tae i taua hora ra, e faaruè rätou i teie ùpeà, e teie roto. E rave rätou i te hoê ùpeà âpï e haere rätou i roto i te hoê roto rahi atu i teie. I mua ra, o Ietu iho te ravaai tei täora i ta na ùpeà i nià ia rätou e ua hei rätou i roto i taua ùpeà ra. I teie nei rä, o rätou te feia ravaai, e rave rätou i taua ùpeà a te Fatu ra e e haere rätou na roto i teie nei ao e faariro i te mau fenua atoà ei pipi na na. Mai te feia ravaai e farerei pinepine i te mau fifi, te mataì puai, te manuia òre, e farerei atoà rätou i te reira. E ravaai taata ra rätou, e eita e tià ia rätou ia ôtohe i mua i te mau fifi e te mau àti e rave rahi te huru. Te ïà tei hei i nià i te ùpeà, e ïà pohe ia, te varua taata rä tei hei i roto i te ùpeà no te Evaneria, ua noaa ia, ia rätou i te ora turuhia e te parau a te Atua. No reira, na roto i teie òhipa faaora, eiaha rätou ia ôtohe, ia faaòromaì rä i te mau mea atoà. I mua i teie nei parau, a haamanaò atoà tätou i to tätou tïtauraahia. Ua pähono tätou no te färii i te tïtauraa, ua faaitoitohia tätou, ua faaàhuhia i te haana tämaì e ua tonohia mai te mau âpotetoro. Na roto ia rätou, ua parauhia mai teie parau i te ÈTÄRËTIA. Eiaha roa ia moè i te Ètärëtia e, ua mäìtihia oia ei ravaai taata. Te parau tei fafauhia i te mau âpotetoro, e parau ia te fafauhia mai i te Ètärëtia iho, e o ta na e haapaò e tae noa atu i te hopeà.

2) Aita roa e mea e tià ia rätou anaè. Te òhipa ravaai taata ta rätou e rave i roto i teie nei ao, e òhipa faufaa-ore ia, ia tiàturi noa rätou ia rätou iho. Ua tuu rätou i ta rätou ùpeà i taua po ra i tera vahi e i tera vahi no te roto, ua ao te po e aita roa e faufaa. E te poìpoì, te tià nei  o Ietu i te hiti roto, e te ani nei ia rätou "e maa ta òutou"? Ua hinaaro te Fatu i te tahi maa, e aita roa ta rätou e maa ïti no te horoà atu na na. Ua haa rätou e ua ao te po, aita e faufaa. I teie taime, ua ìte rätou i te faufaa ore, te faaue nei te Fatu" a tuu i te ùpeà i te tau atea o te pahï. Ua tuu rätou, e ua î roa te ùpeà i te ïà rarahi. No taua òhipa maere ra, ua ìte òiòi rätou e, o te Fatu teie. Oia mau, na roto i teie òhipa, te faaìte nei o Ietu ia rätou e, "aita e mea e tià ia òutou, e ore òutou e tià e ravaai". No te mea rä, ua tiàfaahou mai au e ua püpühia mai hoi te mau mea atoà e ta ù Metua i roto i to ù rima, e tià ia òutou na roto i te faaroo ia ù, ia rave i te mau òhipa rarahi. A hiò i to òutou paruparu e a ìte òutou e, aita e mea e tià ia òutou, no òutou iho e no vëtahi ê hoi. Ia hiò mai ra òutou ia ù e ia tiàturi i te faufaa rahi tei riro mai ia ù, e horoà ia vau i te mau mea atoà ia òutou. I roto i teie nei ao tei tiàturi i te taoà o te puai, e feia veve òutou e te paruparu. E ao ra to òutou e te feia veve, te tävini nei òutou i te hoê Fatu taoà rahi. E ao to òutou e te feia paruparu, te tävini nei òutou i te hoê Fatu mana hope, Tei ia ù te mau mea atoà, e eita e riro faahou ia vëtahi ê. I muri aè i teie temeio, teie te òhipa hopeà ta te Fatu e rave nei, te faaàmuraa ia rätou i te maa. No te mea ua ìte rätou i teie nei i te auraa no te òhipa ta rätou e rave, te faaàmu nei O ia ia rätou ia noa to rätou itoito. E hohoà teie nei àmuraa maa, no te ôroà ta te Fatu i vaiiho mai i ta na ÈTÄRËTIA. E na roto i taua ôroà ra e horoà mai ai te Fatu i te itoito i ta na ÈTÄRËTIA no te òhipa ta na e rave i roto i teie nei ao. Tae roa mai i teie nei, o ta na mau pipi tei haapaò i te òhipa no te maa, i teie nei ra, O ia iho tei horoà i te maa ia rätou, hou rätou e haamata ai i te òhipa.

Ei manaò hopeà.

Teie mau manaò ta òutou i faaroo aè nei, hoê teie o te mau tuatapaparaa e vai nei i roto i te rauraa. E aha atu ra ia te tahi auraa ta teie mau taiòraa e tià e faaära ia tätou i roto i te täviniraa. Te horoà nei te Fatu ia tatou tätaì tahi i te hoê òhipa, e taua òhipa ra, o te ùmeraa te taata ia Ietu ra. Teie ra, e ere o tätou tei ùme mai i te taata, o te Atua iho ra na roto ia tätou. Ta tätou tuhaa o auraro noa ia ia na e te vai-iho-raa ia tätou ia ärataìhia e Ietu. I te vahi tei reira tätou, a rave tätou i te òhipa ta na i faaue. E horoà mai O ia i to na mau tävini i te mau mea atoà e tià ai ia rätou ia faatupu i te mau òhipa ta na i faaue mai.

Terai or.

Mau puta turu manaò.

Claude molla, le quatrième Evangile Editions Labor et Fides, Genève.

L. Bonnet A. Schroeder, Bible Annotée NT2 Jean Actes. AT6 Psaumes.

André Chouraqui, L’Univers de la Bible, les quatre Evangiles Editions Lidis, Paris. Feu nouveau, Mars, Avril, Mai 1998 n°3.

Ioane 20.19-31 Papaì

Tāpati 28  no  Èperera  2019.

Papaì

Taramo 118.21-29

21 E haamaitaì au ia òe, ua faaroo mai hoì òe ia ù, e ua riro ei ora no ù. 22 Te ôfaì i faaruèhia e te feiä i patu ra, tei riro iho nei ei ôfaì tihi. 23  O ta te Fatu teie i rave e mea maerehia hoì i mua i to tätou nei mata 24 O te mahana teie i faaäuhia e te Fatu e òaòa tätou, e e fänaò i teie nei mahana 25 Ia ora i teie nei, e te Fatu, te ani atu nei au, ia ora i teie nei, te ani atu nei au. E haamaitaì mai ia mätou i teie nei, e te Fatu e 26 Ia ora o ia o tei haere mai mä te iòa o te Fatu Te faaora atu nei mätou ia òutou mai roto atu i te fare o te Fatu. 27 O te Atua mau ra o te Fatu ia, o tei haamäramarama mai ia tätou nei. A ruuruu na i te tütia àmu i te taura i nià i te mau tara o te fata nei. 28 O ta ù Atua òe, e haamaitaì ä vau ia òe, o ta ù Atua òe, e faateitei ä vau ia òe. 29 E haamaitaì i te Fatu, e maitaì hoì to na,  e tià hoì to na aroha i te vai-mäite-raa.

Apotarupo 1.9-19

Te ôrama o te Metia

9 O vau nei, o Ioane, o to òutou taeaè, e te au hoì i te àti, i te Pätireia e te faaòromaì o Ietu Metia ra, i te fenua vau i parauhia ra e, o Pätamo, no te parau a te Atua, e no ta ù ra faaìteraa ia Ietu Metia ra. 10 I riro vau i te Värua i te mahana o te Fatu ra, e faaroo aè ra vau i te hoê reo rahi i muri aè ia ù ra, mä te òto pü ra, 11 i te nä-ô-raa mai e  O vau te Ârefa e te Ômeta, te mätamehaì e te faahopeà; e ta òe e ìte nei, e päpaì i roto i te hoê puta, a häpono atu ai i nä Ètärëtia e hitu i Àtia ra  i tei Èfetia ra, e Temurina, e Peretamo, e Tuatira, e Tarati, e Firaterefia, e Raotitea ra. 12 Ua färiu aè ra vau e hiò i taua reo i parau mai ia ù ra. E tei taua färiuraa no ù ra, ìte atu ra vau i e hitu rämepa àuro ra; 13 e te hoê mai te Tamaiti o te taata te huru, i rotopü i taua nä rämepa e hitu ra, te àhu ra i te àhu e raro roa i te âvae, e ua tätuahia te ôuma i te tätua àuro. 14 E te rouru i ta na upoo ra mai te vavai ra ia i te teatea, e mai te hiona e mai te ura auahi ra o na mata 15 e mai te veo maitaì ia àma i te tura ra o na âvae; e to na reo mai te haruru ia o te miti rahi ra. 16 Te täpeà ra ta na rima àtau i nä fetià e hitu ra; e te hoê òè òoi mata piti ra mai roto atu i to na vaha; e to na mata mai te mahana ra ia e ànaana mai i te avatea ra. 17 E ta ù hiòraa atu ia na ra, hià iho ra vau i raro i ta na pae âvae, mai te taata pohe roa ra. Ua tuu mai ra i ta na rima àtau i nià iho ia ù, e ua nä ô mai ra ia ù Eiaha e mataù  O vau te mätamehaì e te faahopeà. 18 O vau teie e ora nei. Pohe noa ai au, e inaha, e tià vau i te oraraa e a muri noa atu. Âmene. E tei ia ù te täviri o te pohe e to häte. 19 E tënä na, e päpaì òe i te mau mea ta òe i ìte iho nei, e te mau mea e vai nei, e te mau mea e tupu a muri nei.  

Òhipa 5.12-16

Te mau täpaò e rave rahi

12 E rave rahi te täpaò  e te temeio i ravehia e te rima o te mau âpotetoro ra i röpü i te taata atoà e taìruru aè ra rätou atoà i roto i te Poretito o Toromona ra. 13 Âreà te hoê pae ra, aore roa ia i te hoê i âmui tià mai ia rätou i te mataù; ua âruehia rä rätou e te taata. 14 Te feiä rä i faaroo i te Fatu ra, e rave rahi roa atu ra ia tei âmui mai ia rätou ra, te täne e te vahine atoà hoì. 15 E hopoi mai ra rätou i te feiä maì i räpae i te mau aroä ra, tuu iho ra i nià i te roì e te roì rii hopohopoi ra, peneiaè o te àèa vëtahi e te ata o Pëtero ia haere nä reira iho ra. 16 E rave rahi hoì to te mau ôire ra i haere mai e àti noa aè, i te hopoiraa mai i te feiä maì e te feiä i peàpeà i te värua faufau i Ierutarëma e faaora-anaè-hia iho ra rätou atoà.

Ioane 20.19-31

Te färaa mai Ietu i ta na ra mau pipi

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou Ia ora na òutou. 20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra. 21Ua parau faahou mai ra Ietu ia rätou Ia ora na òutou  Mai ta ù Metua hoì i tono mai ia ù nei ra, e tono atoà hoì au ia òutou na. 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra A färii i te Värua Maitaì 23 Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia. 24 E te hoê o te Àhuru mä piti ra, o Toma, o të parauhia ia, ia Titimo ra, aore rä ia ia rätou ra a tae mai ai Ietu ra. 25 Ua parau atu ra te mau pipi ra ia na Ua ìte aè nei mätou i te Fatu Ua parau mai ra o ia ia rätou I òre au i ìte i te puta âuri i ta na rima ra, e aore i tuu i taù rima i taua puta âuri ra, e aore hoì ta ù rima i tuu i ta na àoào ra, e òre roa ia vau e faaroo. 26 E ruì varu aè ra, tei roto faahou atu ra te mau pipi i te fare, e o Toma atoà hoì, ua haere mai ra Ietu, ua ôpanihia nä ôpani, ua tià mai ra o ia i röpü, ua parau mai ra Ia ora na òutou  27 Ua färiu mai ra ia Toma, ua parau mai ra A faatoro mai na to rima, e a hiò mai na hoì i ta ù rima nei; e a faatoro mai na hoì i to rima e fäfä i ta ù àoào. Eiaha e faaroo taìàtä, e faaroo rä  28 Ua parau atu ra Toma ia na, nä ô atu ra E ta ù Fatu, e ta ù Atua 29 Ua parau mai ra Ietu ia na No te mea te hiò mai nei òe ia ù, e Toma, i faaroo ai òe? E ao to te feiä aore i ìte ia ù a faaroo mai ai. Tei ia na te Tamaiti ra, tei ia na ia taua ora ra 30 E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta. 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Manaò

Te haapäpü nei na taiòraa e maha nei o Ietu te Metia a te Atua Nui Tumu Tahi te Mana o te ora, te Mana no te ora mure òre, tei haafaufaa òre te mau ôpuaraa tei òre  e au no te here e te Aroha. Aore i moèhia i roto i na parau e maha nei te parau no te here o te Atua e täamu ra i te taata,  e ta te taata faateiteiraa ia hanahana te ôpuaraa faaora a te Atua, maite hoê taura nape ra tei firi  mahahia. Tei  mua teie mau parau ia tätou, tei roto i to na märamaramaraa ia parau tätou i te hinaaro e au i te hinaaro o te Atua te faaìte noa ra tätou e, o tätou atoà te hoê fenu tei firi i nià i te ora to tätou manaò, to tätou âau i nià ia i te Atua faatupu ora. No reira, e mau fäìraa parau teie ta tätou e faaìte nei i mua i te Atua e i mua ia tätou, o ta tätou ia haapäpüraa i to tätou hinaaro ia riro ei märamarama tei türama i te oraraa. To tätou te reira faaìteraa i te tahi i te tahi  no te faatupu i te òhipa e tiaìhia ra ia tätou. Oia hoì, nä roto i to te tahi färiiraa i te tuu mai i te àma i roto ia ù, te fäì ra o ia e ua ineine atoà o ia i te färii i te àma ta ù e tuu atu i roto ia na, ia riro e, mai teie atu, o na te märamarama o to ù oraraa, mai ia na i färii ia ù ei märamarama no to na oraraa. Ahiri, ia tupu te märamarama, e roaa änei ia tätou ia faataa i te parau o te àma, i to te ùiti, eere änei e, e parau hoê to räua i teie nei. Teie märamarama ta tätou e parau nei, te tahi ia märamarama ta tätou i tiàturi e, e riro ei märamarama vai tämau, e türama i te täatoàraa o te oraraa. Mai teie e faaìtehia ra ia au te haapotoraa o na taiòraa e mahana nei,

Ø  Taramo 118, 28 O ta ù Atua òe, e haamaitaì ä vau ia òe, o ta ù Atua òe, e faateitei ä vau ia òe.

Ø   Àpotarupo 1,  19 E tënä na, e päpaì òe i te mau mea ta òe i ìte iho nei, e te mau mea e vai nei, e te mau mea e tupu a muri nei.  

Ø  Òhipa 1, 14 Te feiä rä i faaroo i te Fatu ra, e rave rahi roa atu ra ia tei âmui mai ia rätou ra, te täne e te vahine atoà hoì.

Ø  Ioane 20, 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

E au ra, ua päpaìhia teie mau parau i te ìnita pau òre, i nià i te àpi parau marau òre, tei òre roa i miòmiò, e tei òre roa i motumotu i roto i roaraa o te tau. Na roto i teie  mau päpaì te tävevo nei te reo o te taata tei tiàturi e tei faaroo, i ta te värua o te parau faaìteraa, 19 E tënä na, e päpaì òe i te mau mea ta òe i ìte iho nei, e te mau mea e vai nei, e te mau mea e tupu a muri nei. Mea maitaì teie reo to te päpaì Àpotarupo ia tävevo noa i roto i to tätou âau, ia ìte tätou i to tätou ätearaa e ta tätou haafaufaa-òre-raa i te faahiahia hau ê o te òhipa ta te Atua i rave no tätou. Te auraa o te päpaì, na te taata taiò iho e ìmi i te pähonoraa i te mea ta na i òre i märamarama. Te maitaì o te parau, te mea ia e, e tano e täpiti, aore ra e tätoru i te ui, te rahiraa taime atoà e pähonohia mai ai. Te maitaì o te päpaì, te mea ia e, mea vai noa te päpaì, e tano i te hoì noa mai i te mau taime atoà ta te manaò i hinaaro. Te fifi rä, ia hape te taiòraa, ia hape hoì te faatomaraa, e hape atoà te märamaramaraa i te parau. No te mea hoì, o òe anaè e te parau, e riro atoà òe i te pärahi noa i  roto i to òe taa òre. Te räveà noa e matara rii ai òe, te mea ia ta Ioane e faaìte ra, 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa. To na rä tano-roa-raa, ia au i te parau ta tätou e hiò nei, e nä ô ia tätou e ia rahi te ui e päpü ai tei päpaìhia. E ara maitaì rä tätou, eita te päpaì e hope i nià ia na iho, aore ra eere te päpaì te hopeàraa o te mea i päpaìhia, a parau atu ai tätou e, tei päpaìhia ra, ua päpaìhia ia. Te hopeàraa, aore ra te tumu o te päpaì, mai te parau atoà, te faatupuraa ia i te märamarama. Te auraa, i te mau taime atoà, e tïtauhia tätou ia tähiti i te mea i päpaìhia, oia hoì ia ìmi i ô mai i te taò, te ìrava, te manaò i hinaarohia i te parau, ia òre, e riro te taa òre i te faatupu mai i te fifi. Ua färerei atoà mai Ietu i te reira huru fifi i te mahana o ia i parau ai i ta na mau pipi e, Ia ora na, Ia ora na i te ahiahi o taua mahana mätamua o te hepetoma ra, Ua faatupu teie huru parau i te mataù i roto i ta na mau pipi, ua ôpanihia nä ôpani i te mataù i te âti-Iüta ra, tià noa iho ra o Ietu i röpü ia rätou, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra. Mai ta ù Metua hoì i tono mai ia ù nei ra, e tono atoà hoì au ia òutou na. Ua haapüaì mai ra i te aho i nià ia rätou ra, e ua parau mai ra A färii i te Värua Maitaì. Ta òutou i faaòre i ta rätou hara ra, ua faaòrehia ia; e ta òutou hoì i vaiiho i ta rätou hara ra, ua vaiihohia ia. Ia ora na,  te reo ä o Ietu i ta na mau pipi e o Toma i te vaù o te ruì ua färiu mai ra ia Toma, ua parau mai ra A faatoro mai na to rima, e a hiò mai na hoì i ta ù rima nei e a faatoro mai na hoì i to rima e fäfä i ta ù àoào. Eiaha e faaroo taìàtä, e faaroo rä. Te parau a Toma, E ta ù Fatu, e ta ù Atua. Ua parau mai ra Ietu ia na te hiò mai nei òe ia ù, e Toma, i faaroo ai òe. E ao to te feiä aore i ìte ia ù a faaroo mai ai. Tei ia na te Tamaiti ra, tei ia na ia taua ora ra. O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Teie te tahi parau faufaa e faaìtehia nei no Ietu i tiàfaahou tei horoàhia nei no tätou tei òre i fänaò i te fafa ia na e to na mau puta, e roaa atoà te ora ia tätou. I o nei te faaìte nei te Fatu e eita te ora âpï ta te tiàfaahouraa e horoà nei i täôtià-noa-hia no te feiä tei hiò mata roa, tei fafa roa, ia Ietu ua faanaho-atoà-hia te ora âpï no te feiä tei faaroo noa aita ra i ìte. E parau hohonu teie, mea faaroo noa ua tiàturi. Ia hiòhia e mea iti roa te feiä tei ìte ia Ietu tei Tiàfaahou, e nunaa rahi ra tei faaroo e ua tiàturi. A hiò na i te mau Ètärëtia ta Pauro i haamau i to na tau e tei tupu noa i muri mai, te taatoàraa mea faaroo noa ua tiàturi. E tano ia parau e te tauiraa ta te tiàfaahouraa i faaìte e haere roa te reira i roto i te parau e ìtehia to na mana i nià noa i te parau, e farerei atoà ai ia Ietu. No reira te mea e tïtauhia nei te färiiraa te taata i te parau ora a te Atua tei faaìte mai e ua tiàfaahou Ietu, te hinaaro nei O ia e ùme i te taata i roto i te òaòa no tera Parau Âpï. E ère anei o te tumu ia i papaì ai o Ioane i ta na Èvaneria ia faaroo to te ao e o Ietu te Metia te tamaiti a te Atua. Te faaìte atoà nei teie parau e ua matara te ùputa o te raì na roto i te tiàfaahouraa o Ietu eiaha ra tätou e òpani te mau ùputa o te fenua.

Teraì òr. Faatura.



Ruta èv 24.1-12 Ohi

Tāpati  21 No  Èperera 2019.

ÔROÀ TIÀFAAHOURAA

Ohi

 Taramo 118.1-20

1 E haamaitaì i te Fatu, e maitaì hoì to na, e tià to na aroha i te vai -mäiteraa. 2 Ia nä reira te ùtuafare o Ìteraèra i teie nei e e tià to na aroha i te vai -mäiteraa. 3 Ia nä reira te ùtuafare o Àarona i teie nei e e tià to na aroha i te vai-mäite-raa. 4 Ia nä reira te feiä i mataù i te Fatu i teie nei e e tià to na aroha i te vai mäiteraa. 5 Ia ù i roohia e te àti ra, ua tiàoro vau i te Fatu,  e ua ìte mai ra te Fatu ia ù, e ua tuu mai ia ù i te vähi ätea. 6 Tei pïhaì iho te Fatu ia ù ra, e òre au e mataù  e aha ta te taata ia rave mai ia ù ra 7 Tei pïhaì iho te Fatu ia ù ei tauturu ia ù ra, e ìte au i te hiàraa o te feiä i riri mai ia ù ra. 8 E mea maitaì te tiàturi i te Fatu, i te tiàturi i te taata nei 9 E mea maitaì te tiàturi i te Fatu, i te tiàturi i te hui-arii ra 10 Ua haapuni mai te mau êtene atoà ia ù; no te iòa rä o te Fatu, pau iho ra ia ia ù. 11 Ua nä nià iho hoì, e ua nä nià iho i te haapuni ia ù,  no te iòa rä o te Fatu, pau iho ra ia ia ù.12 Ua haapuni mai rätou ia ù mai te tepure ra, mai te auahi àihere ra, aore aè ra e mähia, mou iho ra, no te iòa hoì o te Fatu, pau iho ra ia ia ù. 13 Ua neneì hua mai hoì òe ia ù ia hià vau, ua tauturu mai rä te Fatu ia ù. 14 O to ù ia ètaèta e o ta ù ia himene o te Fatu, ua riro mai hoì o ia ei ora no ù.  15 Te reo òaòa e te ora tei roto i te mau tiàhapa o te feiä parau-tià ra E räveà itoito tei te rima àtau o te Fatu,  16 e teitei to te rima àtau o te Fatu, e räveà itoito tei te rima àtau o te Fatu. 17 E òre au e pohe, e ora mau ä vau, e parau faahou ä vau  i te òhipa a te Fatu. 18 Ua aò hua mai ä hoì o ia ia ù nei, aita rä o ia i faaruè noa ia ù no te pohe. 19 A ìriti na ia ù i te mau ùputa parau-tià ra, e tomo vau nä reira mä te haamaitaì i te Fatu ra. 20  O te ùputa teie na te Fatu,  e nä reira te feiä parau-tià i te tomo.

1 Torinetia 5.6-8

6 Eere to òutou faaahaaha i te mea maitaì. Aita òutou i ìte e, e höpue te puèà atoà i te faahöpue iti haìhaì ra? 7 E teie nei, a tämä na i te faahöpue tahito ra, ia riro òutou ei puèà âpï, ia òre te faahöpue ia òutou na  o te Metia hoì ta tätou Päta, i taparahihia ia na tätou. 8 E teie nei, e haapaò tätou i taua ôroà ra, eiaha mä te faahöpue tahito ra, eiaha atoà mä te faahöpue täiroiro e te ìno, mä te mäa faahöpue-òre-hia rä, o te haavare òre e te parau mau.

Òhipa 10.34-43

To Pëtero ôreroraa i mua ia Torenerio mä

34 Ua parau atu ra te vaha o Pëtero Ua ìte mau atu ra vau e òre te Atua e haapaò i te huru o te taata. 35 O tei mataù rä ia na, e o tei rave i te parau-tià i te mau fenua atoà ra, o të ìtehia mai ia e ana. 36 Ua ìte hoì òutou i te parau ta na i häpono mai i te tamarii a Ìteraèra ra, i te parau-haereraa i te Parau Maitaì i te hau ra ia Ietu Metia o te Fatu no te mau mea atoà ra. 37 O te parau i parauhia nä Tarirea mai ra e àti noa aè Iutea atoà ra, i muri aè i te päpetito i parau-haerehia e Ioane ra 38 ia Ietu o Nätareta, o tei faatähinuhia mai e te Atua i te Värua Maitaì e te mana ra; o tei hämani maitaì haere ra, e te faaoraraa i te feiä atoà i neìneìhia e te tiàporo ra, tei ia na ra hoì te Atua. 39 O mätou nei hoì të ìte i te mau peu atoà ta na i rave i Ierutarëma ra, e te fenua atoà hoì o te âti-Iüta ra; e ua täparahi hoì rätou e faauta atu ra ia na i nià i te räau. 40 Oia hoì ta te Atua i faatià aè nei i nià i te ruì toru ra, e ua faaìte ia na i te vähi ätea ra; 41 eiaha rä i te taata atoà ra, i te feiä rä i haapaòhia e te Atua ei ìte ra, oia hoì mätou nei, o tei àmu atoà e tei inu hoì e o ia atoà, i muri aè i ta na tiàraa mai mai te pohe mai ra. 42 E ua poroì iho o ia ia mätou e, e parau haere mätou i te taata, e faaìte hua atu hoì e o ia tei haapaòhia e te Atua ei haavä i tei ora e tei pohe ra hoì. 43 Oia hoì ta te mau perofeta atoà i parau mai ra e, o të faaroo ia na ra, e matara ia ta rätou hara i to na ra iòa.

Ruta èv 24.1-12

Te tiàfaahouraa o Ietu

(Mät 28,1-10; Mär 16,1-8; Ioane 20,1-10)

1 Tae aè ra rä i te mahana mätamua o te hepetoma ra, haere atu ra rätou e o vëtoofanu puè vahine èê hoì i te menema ra i te poìpoì roa, mä te räau noànoà ta rätou i putu ra  2 roohia atu e rätou ua faataa-ê-hia te ôfaì i te menema ra 3 e tei to rätou tomoraa i roto ra, aita rä te tino o te Fatu ra o Ietu. 4 E te mäere noa ra rätou i taua mea ra, inaha te tià noa mai ra e toopiti puè taata i pïhaì iho ia rätou mä te àhu ànaana. 5 E rahi roa aè ra te mehameha o taua mau vahine ra, piò iho ra to rätou mata i raro i te repo, ua parau mai ra räua E aha òutou i ìmi ai i tei ora i te vairaa o te pohe. 6 Aore o ia i ò nei, ua tià ia i nià. A haamanaò i ta na i parau mai ia òutou ia na i pärahi i Tarirea ra, 7 a nä ô mai ai ra e, E tuuhia te Tamaiti a te taata nei i te rima o te feiä rave hara, e faatataurohia, e e tiàfaahou ia tae i te ruì toru ra. 8 Ua manaò iho ra rätou i taua parau na na ra. 9 E hoì mai ra rätou mai te menema mai ra, faaìte mai ra i taua mau parau ra i te tino àhuru mä hoê ra, e te tahi pae atoà hoì. 10 O Märia i Matätara, e o Ioana, e o Märia te metua vahine o Iatöpo ra, e taua puè vahine ê atoà ra, o tei faaìte mai ia i te mau âpotetoro i taua mau parau ra. 11 Aita rä rätou i faaroo, mai te parau vavi noa ra ia parau ia rätou. 12 Ua tià aè ra rä Pëtero, horo atu ra i te menema ra piò iho ra i raro, ìte atu ra i te àhu i te vai-noa-raa; hoì mai ra mä te mäere i roto ia na iho i taua mea ra.

Manaò.

Na parau e maha nei te faaìte noa ra, i te mau parau no te tiaìtururaa no te tiàfaahouraa o Ietu te Metia e te mau raveà e tae ai i te Ora Mure Òre. Tei mataù i ta na mau hara, e òre o ia e mataù i te fäì ta na hara ia fatata o ia i te aroha o te Atua Nui Tumu Tahi te tumu o te ora. I te mea tei pïhaì iho te Fatu ia na, e òre o ia e mataù i ta te taata ia parau mai e tupu mai ra te tauturu ia na, i ta na tuhaa i roto i te faaìteraa e ta na hopoià i roto i te täviniraa. I mua i teie mau parau tei faaìte i te hanahana  o te Atua, ia ìte te taata faaroo e au ia na teie mau parau, te vai ra  ta te Atua tuhaa, te vai ra ta te taata parau, e ta na faanahoraa i te reira parauraa, eiaha ia moèhia e, te vai ra te nünaa, oia hoì te fenua e te taata tei reira te ora o te parau no ta na faaìteraa i te tahua i reira te tävini e òhipa ai ia hanahana te ôpuaraa faaora a te Atua. Te mata o te Atua tei nià ia tätou, ia rätou, ia òutou, ia mätou, Oia atoà to na tärià, aita hoê mea e moèhia i to na mata e manaò atoà ra to na i nià i ta tätou mau  parau. Ia au i na taiòraa e maha nei tei paèpaè i te parau no te tiàfaahouraa o te Metia.

Taramo 118, 20  O te ùputa teie na te Fatu, e nä reira te feiä parau-tià i te tomo.

1 Torinetia 5, 7 o te Metia hoì ta tätou Päta,

Òhipa, 10, 43 o të faaroo ia na ra, e matara ia ta rätou hara i to na ra iòa.

Ruta Èv. 24, 6 Aore o ia i ò nei, ua tià ia i nià.

Ua tià mau te Fatu, te faaìteraa ia a na èvaneria e maha, te vahi i tuuhia te tino ua matara te ùputa, ma te tino òre i roto. Te mau vahine, te mau pipi, tei  manaò e faaoti i ta rätou òhipa no te miriraa i te  tino  o Ietu tei pohe. Te mea ta rätou i ìte te hoê ia òhipa  mätau-òre-hia  e  rätou i taua poìpoì  ra. Te mea i ìtehia te ora e vai ra i te vahi o te pohe i te manaòraa a te taata, i reira te merahi i te tiaìraa mai i te mau taata o te fenua, no te haapäpü ua tiàfaahou o Ietu, àita O ia i te vahi o te pohe. Aore i òhie i te mau taata o te fenua i te färii i teie parau âpï  òaòa, no te mau vahine ua hitimahuhata ua haavitiviti i te faaära i te mau âpotetoro. O  Petero tei horo vave i te menema, ma te maere rahi i te ìteraa te òhipa tei tupu tei turäma i te mau Päpaì, e te mau Parau a Ietu  i to na oraraa ra. Ia ua i teie mau òhipa i tupu ua hinaaro o Ruta e tuatäpapa teie mau parau ia au i te pene 1 i te ìrava 3 teie taua parau ra, o vau atoà hoì, no te mea ua ìteä-päpü-hia e au te mau parau atoà mai te mätamua mai ä, manaò aè nei e mea tià ia päpaì tuatäpapa atu i taua parau ra ia òe na, Teofiro tüiroo. Te tiàfaahouraa o Ietu te niu ia o te faaroo teretetiano teie parau òaòa no te âpee ia te faahauraa a te raì  e te fenua no  te fänauraa te ôroà Pata. Na te Atua Nui Tumu Tahi i faatià ia Ietu mai roto i te pohe,  te tiàfaahouraa o Ietu mea tià ia haapäpühia na roto na haapäpüraa e toru nei.

1) Haapäpüraa a te mau e faahitihia ra na te Atua i faaära ia Ietu tei faatätaurohia, tei haapohehia i te mea O ia te mätamehaì no te Ora Mure Òre. Aita te Atua i färii i te haaväraa a te taata, ua färiiraa i te haèhaa o Ietu i mua i te taata. No reira te tiàfaahouraa o Ietu o te Atua Nui Tumu Tahi te tumu, eita ra te temeio.

2) Haapäpüraa a te mau Parau  Maitaì, e te mai èpitetore ua tänuhia, i te toru o te mahana  ua ära mai, ia au i te värua o te faaroo.

3) Haapäpüraa i te tupu mauraa  i roto i te ao âpï, no te feiä faaroo, no te Metia, te ora nei o ia no te feiä pohe e te feiä ora, ta Pauro i päpaì i roto i ta na mau rata e ora te taata i to na faaroo èi faaìteraa i te hanahana o te Atua.

Teie mau haapäpüraa, te päpä ia o te faaroo ia Ietu, te faaitoitohia nei te taata faaroo ia parau e ia faaìte, i  te faufaa no te Tiàfaahouraa o te Metia tei haafänau te ôpuaraa faaora a te Atua na roto i te ora mure òre. Te here teie e te aroha o te Atua ta tätou e  fänaò  nei. E parau teie, e aha rä te auraa o teie parau, tei riro ei mea märamarama no te tahi, e tei haapeàpeà i te  âau o te tahi no to na fifi i te öraa i roto i te parau. I te mea e tupu te parau o Ietu i te rahi e te âano e òre e mou. Te puai teie o te here o Te Atua i to te ao nei, tei òre i marau i roto i te tau, mai te  mahana e hiti ra, i te hiti-ä o te rä, e topa atu i te tooà  o te rä, oia atoà ia te aroha fäito òre o te Atua. Te Atua te Tumu no te Tiàfaahouraa o te Metia,  te riro nei ia tätou èi ohi  mai te peu te tumu, e here, te tanoraa mau, e hotu atoà mai ia te ohi i te here tei au i te tumu metua. Te hotu nei ihoä teie mau ohi, aita rä e hotu nei i te mäa e au i te tumu metua. Ua faaroo te tahi mau ohi i te parau o te tumu metua, aita rä i manaò e, e auraa to rätou i nià i te reira tumu, e te vai ra hoì te hinaaro o te reira tumu ia rätou. Te tahi atu mau ohi, aita ia i hinaaro i te faaroo i te parau o te reira tumu, e ua manaò e, ua ravaì noa rätou i nià i te ìmiraa i te räveà ia maitaì to rätou tupu, e ia hotu mai rätou i te mäa e au i ta rätou tütavaraa. E tano tätou e parau e, e piti èà, aore ra e piti ùputa e tano te taata e rave e tae ai o ia i roto i te ìteraa i to na täamuraa i nià i te Atua o te here, e te vai nei ä hoì te toru.

Teraì òr Faatura.

Ruta èv 19.28-40 Tomo

Tāpati 14 no Èperera 2019.

NO TE MAU ÂMAA

Tomo

Taramo 22

1 Na te Mënätehe, i nià i te Àireta Tahara. Taramo na Tävita. 2 E ta ù Atua, e ta ù Atua, e aha òe i faaruè mai ai ia ù. E aha òe i faaätea ê atu ai i te tauturu ia ù nei. E te haapaò òre mai i to ù nei ûuru? 3 E ta ù Atua, te tiàoro nei au i te ao, aita rä òe i parau mai e te ruì hoì, aita rä o ù e mäpuhiraa aho. 4 Òe rä Tei Moà ra, e tei pärahi i roto i te haamaitaìraa o Ìteraèra. 5 I tiàturi na to mätou hui-metua ia òe, ua tiàturi rätou, e ua faaorahia rätou e òe 6 ua tiàoro rätou ia òe, e ua faaorahia i tiàturi na ia òe, e aore i mäheahea. 7 E toè rä vau nei, eere i te taata, e faaìnoraa na te taata, e ta te taata ia tähitohitoraa. 8 Te feiä atoà e hiò mai ia ù nei, te àta tähitohito mai ra ia ù ua fäita i te ùtu, e ua ueue rätou i te upoo. 9 Te na ô mai ra rätou Oia nei, te tiàturi nei ia i te Fatu, ia faaora o ia ia na tii mai o ia e haru ia na Inaha, e here hoì o ia na na 10 Na òe au i rave mai mai roto i te ôpü, o to ù ia tiàturiraa, a òte ai i te ü o ta ù metua vahine ra. 11 Ua tuuhia atu vau ia òe mai ta ù fänauraa mai ä o ta ù Atua hoì òe mai te ôpü mai ä o ta ù metua vahine. 12 Eiaha e faaätea ê atu ia ù,

ia fätata mai te àti ra e aita atu e tauturu ia tauturu mai 13 E rave rahi te puaatoro e haaàti mai ia ù nei, te mau puaatoro àito  o Pätäna teie e haaàti mai ia ù nei. 14 Te hämama mai ra to rätou mau vaha ia ù, mai te riona ûuru ra ia ìmi i te mäa. 15 Mai te pape e niniihia ra vau, e ua paruparu ta ù mau ivi mai te täpau nei ta ù âau, ua tärapape i roto i ta ù ôpü nei. 16 Ua marô to ù püai mai te àraea a te pötera ra; ua piri ta ù arero i ta ù taa e ua tuu òe ia ù i raro i te repo pohe ra. 17 Ua haaàtihia vau e te ùrï ra; ua haapunihia vau i te âmuiraa taata ìno ra; ua puta o ù puè rima e o ù puè âvae ia rätou. 18 E taiò noa vau i o ù mau ivi. Te hiò mai ra rätou, te tiàtonu mai ra ia ù, 19 ua tufa rätou i ta ù mau àhu ra no rätou, e te haa-maìri-terero nei i ta ù pereue. 20 Eiaha òe, e te Fatu e faaätea ê atu ia ù nei; e ta ù püai, ia peepee mai òe i te tauturu mai ia ù. 21 E faaora òe ia ù i te òè nei, eiaha vau ia riro i te püai o te ùrï. 22 Ia ora vau i te vaha o te riona,  ua faaora hoì òe ia ù i te tara o te reema ra Ua pähono mai òe ia ù 23 E faaìte au i to iòa i to ù ra mau taeaè; ei rotopü i te âmuiraa ra e haamaitaì atu ai au ia òe 24 O òutou o tei mataù i te Fatu ra, e haamaitaì òutou ia na. Òutou atoà te huaai o Iatöpa, o ia ta òutou e faahanahana. O òutou atoà te huaai o Ìteraèra ra, e mataù òutou ia na 25 aore hoì o ia i vahavaha, aore hoì i faaìno i te àti o te feiä i àti ra; e aore hoì i huna i to na mata ia na, ia tiàoro rä o ia ra, ua faaroo mai ra o ia ia na 26 O òe ta ù e haamaitaì i roto i te âmuiraa rahi ra. E rave au i ta ù i èuhe ra, i te aro o te feiä e mataù ia na ra. 27 E àmu te feiä haèhaa e ia paìa  O tei ìmi i te Fatu ra e haamaitaì rätou ia na, e vai ä te ànaanaea o to rätou âau 28 To te fenua nei e tae noa atu i te hopeà ra, e riro ia i te manaò e ua färiu mai i te Fatu E hope te mau fëtii a te ao nei i te haamori i mua ia òe 29 No te Fatu hoì te Pätireia, e o ia te tävana i te mau fenua atoà. 30 E àmu te feiä taoà o te fenua nei, e e haamori e te feiä atoà e tae i raro i te repo, e piò ia i mua ia na, e e òre e tià i te hoê ia faaora ia na iho ra. 31 Na te tahi pae huaai e faaroo ia na, e e parauhia ia ei taata no te Fatu 32 e haere mai hoì rätou e faaìte i ta na ra parau tià i te tahi mau taata èê ra ia fänau mai, na na hoì teie i rave.

Ìtaia 50.4-7

4 Ua horoà mai te Fatu ra o te Fatu ia ù i te arero o te feiä ìte, e ia haru mai i parau atu i te parau au i tei  rohirohi ra. Te faaära nei o ia i tërä poìpoì, i te poìpoì, te faaära nei o ia i ta ù tarià, ia haapaò vau mai te taata e haapii ra. 5 Ua haafätata te Fatu ra o te Fatu i ta ù tarià, e aore hoì au i pätoì atu; aore hoì au i ôraì tià i muri. 6 Ua tuu noa atu vau i ta ù tua i te feiä i täìri mai; e ta ù päpärià i te feiä i huhuti i te ùmiùmi, aore hoì au i huna ê atu i te vahavaha e te tufatufa haere. 7 E tauturu mai ä te Fatu ra o te Fatu ia ù, i òre ai au i haamä ai; i haamau ai au i ta ù mata mai te ôfaì ra ua ìte hoì au, e òre au e haamä.

Firipi 2.6-11

6 O te huru ia o ia no te Atua, e aore o ia i parau e haru toroà ia fäito atoà o ia i te Atua. 7 Haapae atu ra rä i to na iho, rave atu ra i to te tävini ra huru, i te fänauraa mai mä te huru o te taata nei. 8 E no te mea o ia i ìteä mai te taata nei i te huru, ua faahaèhaa o ia ia na iho, i te haapaò-mäite-raa e tae noa atu ra i te pohe, i te pohe tätauro ra. 9 I faateitei roa atu ai te Atua ia na, e ua horoà hoì i te iòa i hau ê roa i te mau iòa atoà nei no na; 10 ia tuu te mau turi atoà i raro, to te raì, to nià i te fenua e to raro aè i te fenua, i te iòa o Ietu ra; 11 e ia fäì te mau vaha atoà, e o Ietu Metia te Fatu, e hanahana atu te Atua Metua ra.

Ruta èv 19.28-40

To Ietu tomoraa i roto ia Ierutarëma

(Mät 21,1-11; Mär 11,1-11; Ioane 12,12-19)

28 E oti aè ra taua parau nei, nä mua atu ra Ietu i te haereraa atu i Ierutarëma. 29 E fätata mai ra Petefäte e Pëtänia ia na, i te mouà i parauhia ra, Òriveta, ua tono aè ra o ia i e toopiti puè pipi a na ra, 30 nä ô atu ra

E haere òrua i tërä ra ôire iti; e ia tomo òrua i roto ra, e ìte òrua i te hoê fanauà âtini i te fëtiiraahia, aore ä i pärahihia e te taata i nià iho  e tätara e pütö mai. 31 E ia ui mai te hoê taata ia òrua E aha òrua i tätara ai? E nä ô atu òrua ia na No te mea e au teie i te Fatu. 32 Haere atu ra räua o tei tonohia ra, e roohia atu o ia mau atu ra ta na i parau atu ia räua ra. 33 E tei te tätararaa räua i taua fanauà âtini ra, ua parau mai ra te feiä fatu ia räua ra E aha òrua i tätara ai i te fanauà âtini ra. 34 Ua parau atu ra räua E au teie i te Fatu. 35 Ua pütö mai ra räua i taua âtini ra ia Ietu ra ua tuu iho ra i to rätou àhu i nià iho i taua fanauà ra, haapärahi iho ra ia Ietu i nià iho. 36 Ua vauvau iho ra te taata i to rätou àhu i te äratià i taua haereà no na ra. 37 E fätata mai ra te ôire ia na, i te tumu o te mouà ra Òriveta, ua pii noa iho ra taua tïàa rahi pipi atoà ra i te haamaitaìraa i te Atua, i te mau temeio atoà ta rätou i ìte ra, 38 nä ô aè ra Ia ora na te Arii i te haereà mai mä te iòa o te Fatu ra  Ei hau to te raì, e te haamaitaì i te vähi teitei  39 Ua parau mai ra e toofanu puè Färitea no roto i taua tïàa rahi ra ia na E te Òrometua, e aò aè na òe i to mau pipi nei. 40 Ua parau atu ra o ia ia rätou, nä ô atu ra Teie ta ù parau ia òutou, ia mämü noa rätou  nei, ua pii noa mai ia te mau ôfaì nei.

Manaò.

Parau mau teie e parauhia nei, ta te taata änei, aore ra ta te Atua. Mai te peu ta te Atua, e färii atoà ia tätou e, e tiàturi rahi e te here rahi to te Atua i te taata. No reira, tei vahavaha i te taata ua vahavaha ia i te hohoà o te Atua. E parau araaraa roa no tätou te parau e nä ô ra e, te ìteä nei te räau i to na iho ra mäa no te mea te mau ra te aa o te tumu i te repo fenua ta te taata e fänaò ra, e aha rä o ia i òre i hotu atoà ai i te hotu o te fenua, oia te here tei au i te huru o te Atua. Te au noa ra te manaò ta te Fatu i parau na no te fenua e te tiàturiraa o te taata, i te mea te fenua, te ùputa ia o te raì. Inaha ua tuu te Atua i to na Värua i roto i te fenua, te färiiraa i te fenua, ua riro ia ei färiiraa i te Atua, e te òreraa hoì e färii i te fenua, te au atoà ra ia i te òreraa e färii i te Atua. E aha tätou i hinaaro noa ai i te tatahi i te Atua i räpae i te fenua, e aha tätou i hinaaro noa ai i te faaätea i te Atua i te fenua, ia pärahi noa atu o ia i nià i te raì tua tinitini. Ta tätou änei ia rave i te Fatu o te raì e te fenua.  I tanu ai te taata tanu, no te tiàturi ia e, e tupu mai te mea ta na i tanu ; i faarari ai te taata faarari, no te hinaaro ia ia päpü te tupu o te mea i tänuhia, räua too piti atoà, te tiàturi ra e, e tauturu mai te fenua, e e haamaitaì mai i ta räua i rave, no te mea eita te parau o te tupu e tano ia faataa-ê-hia i to te fenua. Ia faaroo tätou te haapotoraa o ta tätou mau taiòraa,

Taramo 22, 10 Na òe au i rave mai mai roto i te ôpü,

Ìtaia 50, 7 i haamau ai au i ta ù mata mai te ôfaì ra ua ìte hoì au, e òre au e haamä.

Firipi 2, 10 ia tuu te mau turi i raro, to te raì, to te fenua to raro aè i te fenua, i te iòa o Ietu ra;

Ruta èv 19, 40 Teie ta ù parau ia òutou, ia mämü noa rätou nei, ua pii noa mai ia te mau ôfaì nei.

Te tomo nei o Ietu i roto i te òire no Ierutarëma, no te mea ua tomo te òire i te hara e ua paremo i roto i te haavare. Te ìte nei te fatu âtini i te Mana o te parau a te Fatu na roto i te reo o na pipi, te hötana nei, te hörue nei te mau taata i te tiàraa Mana o te mau tupuna i roto ia Ietu. Âreà te mau faatere fenua, te mau faatere faaroo Âti-iuta te parau nei ia, ia Ietu e haamämü i te reo o te fenua, 40 Teie ta ù parau ia òutou, ia mämü noa rätou nei, ua pii noa mai ia te mau ôfaì nei. O vai te tià e haamämü te reo o te fenua, e o vai te tià e haamämü i te reo o te nünaa, aore roa no te mea o te Hohoà rätou, e Huru rätou, e Aho rätou no te Atua Nui Tumu Tahi, ia faaea te taata i te faaìte i te tumu no te Aroha e te here, na te ôfaì e pii mai oia hoì te papa no te ôpuaraa faaora a te Atua Nui Tumu Tahi. O te mea ia, i ìtehia i roto  i to tätou tuatua tupuna i to Taaroa Nui Tumu Tahi piiraa i te päpä ia nee mai, i te mea aore roa e reo i faaroohia mauti ra te reo tei Rähu ia Mäòhi Nui, tei päpähia i nià i te Here e te Aroha motu òre o te Fenua. Te mau taata e pii nei ua ìte rätou i te mau òhipa maere i ravehia e Ietu, tei ìte i te täpaò no te hau o te fenua, e to nià i te vahi teitei te reo ia o Pauro i to Firipi, 10 ia tuu te mau turi i raro, to te raì, to te fenua to raro aè i te fenua, i te iòa o Ietu ra, E piti na ùputa teie e parauhia nei, te ùputa o te raì, te ùputa o te fenua. I mua i teie täpura òhipa, mea maitaì te taata ia ìte e, te anihia nei ia ana e tatara, tei roto hoì te reira i te parau no to na hämaniraahia. Ia òre ia matara ia na te ùputa mätamua, oia te parau o te fenua, eita atoà te piti e matara. Eiaha rä o ia e manaò e, e matara ia na ia tatara i terä nä ùputa i te taime hoê, eiaha atoà o ia e manaò e, mea faufaa aè ia tatara i te ùputa o te raì no te mea tei reira te ora. Ia nä reira o ia i te hiò, te haapäpü noa ra o ia e, aita ä o ia i märamarama i te faufaa o te parau o to na hämaniraahia e to na hinaaro òre i te ìte i te òhipa ta te Atua i rave no na, ia faaroo tätou i te reo o te Taramo 22, 10 Na òe au i rave mai mai roto i te ôpü, te haapäpü noa mai ra te reira ta te Atua e haafänau no te ìte ia i te märamarama, ia parau te hoê taata e, te niàraa o te tumu räau te vähi faufaa, no te mea te vähi te reira i roto i te märamarama, te vähi hoì e horoà mai i te mäa e ora ai te taata. Aita ia taata i märamarama e, te ora ta te räau e faaìte ra i nià, no raro i te repo fenua te faaineineraahia mai,  a maitaì te fenua, a maitaì atoà te tupu o te räau ; a òre rä te fenua a horoà i te ora, a òre atoà te ùnaùna e te hotu o te vähi e toro tià atu ra i nià i te raì. Tei roto ihoä paha i te märamarama, no te mea rä aita to na e ora, e mea faufaa òre ia, no te mea eita o ia e ìte i taua märamarama ra, eita hoì e fänaò i te maitaì no roto mai ia na. Ia parau te Atua i te  faaìteraa a Ìtaia mai teie te huru 7 i haamau ai au i ta ù mata mai te ôfaì ra ua ìte hoì au, e òre au e haamä. Te  auraa te ùputa mätamua te ìmi i te raveà no te tatara ta te fenua e faaìteraa i te maitaì o te Atua. I teie hepetoma e haamanaò ai tätou i te  mau àti, te mau mäuiui o te Fatu te Metia to na pohe e to na tiàfaahouraa, eiaha e mämü a tomohia to tätou âau i te mau hara  tei  haaviivii  i to tätou faaroo.

Teraì òr. Faatura.



Ioane 8.1-11. ta ù

Tāpati 7 No Èperera  2019.

ÔROÀ

ta ù

Taramo 126

I te faaòre-raa-hia e te Fatu te tïtïraa o Tiona, e au tätou i te feiä moemoeähia. 2 Î aè ra to tätou vaha i te àta i reira, e to tätou mau arero i te òaòa. Ua naô aè ra to roto i te êtene ra E òhipa rahi ta te Fatu i rave ia rätou nei 3 E òhipa rahi ta te Fatu i rave ia mätou nei, i òaòa ai mätou nei. 4 E faahoì mai ä, e te Fatu, i to mätou ra mau tïtï,  mai ta òe ä i faahoì mai i te pape tahe i àpatoà ra. 5 O tei ueue mä te roimata ra, e ôoti ia mä te òaòa. 6 O tei haere hoì e ueue i te huero mä te òto ra, e hoì faahou mai ä ia mä te òaòa, e mä te hopoi atoà mai i ta na ra mau ruru.

Ìtaia 43.16-21

16 Te nä ô mai ra te Fatu manahope ra o tei rave i te èà nä raro i te tai ra, e te haereà na te moana rahi ra; 17 o tei arataì mai i te puaahorofenua e te taata i nià iho, te nuu, e te papaupea rahi atoà ra; taòto anaè iho ra rätou, e pohe atu ra mai te vavai ra. 18 E aha e manaòhia tei a mütaa iho ra mau parau; e tei tahito ra mau peu, eiaha e haapaòhia atu. 19 Inaha, te rave nei au i te mea âpï; e teie nei hoì e tupu ai; e òre änei òutou e haapaò i te reira? Oia ia, ei èà tià tä ù e rave i te mëtëpara e tuu hoì au i te pape tahe na te fenua marô ra. 20 Na te mau taehae o te aru e haamaitaì mai ia ù te mau teni, e te mau tamähine o te ione ra no te mea ua höroà vau i te pape i te vähi päpämarô, e te pape tahe i te mëtëpara ra, ei pape nä to ù ra mau taata, i tei haapaòhia e au ra. 21 Ua haapaòhia e au teie nei mau taata nö ù iho; nä rätou e haamaitaì mai ia ù.

Firipi 3.8-14

8 Oia mau ia e mea faufaa òre atoà te mau mea atoà nei ia ù, i te maitaì rahi ra i te ìte i te Metia i ta ù Fatu ra ia Ietu e faaruè ai au i te mau mea atoà ra, e e âua ia ia ù, ia noaa ia ù te Metia. 9 Ia riro vau ei taata no na, eiaha mä te parau tià na ù iho i te ture ra, o tei noaa mai rä i te faaroo o te Metia ra, o te parau tià a te Atua i te faaroo ra 10 ia ìte hoì au ia na, e te püai o to na tiàfaahouraa, e te âpiti-atoà-raa atu i to na mau àti, i te faaauraa atu i to na ra pohe; 11 ia roaa noa atu ä ia ù te tiàfaahouraa mai te pohe mai ra.

Te hororaa o te taata faaroo

12 Eita vau e parau e, ua noaa ia ù e ua oti nehenehe roa to ù hororaa i teie nei, te tïtau nei rä vau, peneiaè o te noaa ia ù te mea i roohia mau ai au nei e te Metia ra e Ietu. 13 E a ù mau taeaè, aore au i manaò ia ù iho nei, e ua noaa, hoê roa a ù mea e rave nei, i te haamoèraa i te mau mea i muri ra, e te tïtauraa atu hoì i tei mua, 14 te neneì tià atu nei au i te täpaò, ia noaa te perapeio i te parauraa a te Atua no nià mai ra i te Metia nei ia Ietu.

 Ioane 8.1-11.

Te vahine i faatiàmähia

1 Haere atu ra Ietu i te mouà ra i Òriveta. 2 E i te poìpoì roa ra, ua hoì faahou mai ra o ia i roto i te hiero ra, e ua haere atoà mai ra te taata ia na ra, pärahi iho ra o ia i raro, e haapii atu ra ia rätou ra. 3 Ua arataì mai ra te mau päpaì parau e te mau Färitea ia na ra i te hoê vahine i roohia i te rave-raa-hia ra, ua tuu atu ra rätou ia na i röpü. 4 Ua parau mai ra rätou ia na E Rapi, roohia atu ra teie nei vahine te rave-mau-hia ra. 5 I parau mai hoì Möte i roto i te ture ra e, e pëhi i te reira i te ôfaì. E aha rä ta òe na parau, 6 I nä reira mai ra rätou i te rämäraa mai ia na, ia noaa ta rätou pariraa mai ia na. Ua piò iho ra Ietu i raro, ua päpaì iho ra ta na rima i te parau i nià i te repo. 7 Ua tämau mäite mai ra rätou i te uiraa mai ia na, ua tià aè ra o ia i nià, ua parau atu ra ia rätou ra Na te taata hara òre i roto ia òutou na e täora atu na i te ôfaì mätamua ia na.8 Ua piò faahou iho ra o ia i raro, päpaì faahou iho ra i nià i te repo. 9 E ìte aè ra rätou i taua parau ra, faahapahia iho ra e to rätou iho âau, ua unuhi tätaìtahi noa atu ra rätou, o te taata paari tei nä mua na e tae noa atu ra i te taata hopeà, toe iho ra o Ietu anaè ra e taua vahine ra i te tià-noa-raa i röpü. 10 Ua tià aè ra Ietu i nià, e ìte atu ra aore roa e taata, maori rä o taua vahine anaè rä, ua parau atu ra o ia ia na E teie nei vahine, tei hea te feiä i pari mai ia òe nei? Aore roa e taata i faautuà mai ia òe na? 11 Ua parau mai ra o ia Aore roa, e ta ù Fatu. Ua parau atu ra Ietu ia na, Eita atoà vau e faautuà atu ia òe. A haere, eiaha rä ia hara faahou.

Manaò.

E tià ia parauhia te varovaro noa ra teie mau reo i roto ia tätou i to tätou faarooraa i te mau parau e faahitihia ra  no te Atua Nui Tumu Tahi. I faamanaò mai i te mau òhipa i tupu i te hinaaro o te Atua i  te taata i te parau o te fenua, no te mea ia, te fenua te mätamua i färii i te maitaì o te parau a te Atua, te fenua hoì tei riro ei ìte e ei faaìte i te rahi o te hanahana o te Atua. Eere rä no te mea te faahiti nei tätou i teie mau manaò i riro ai te reira ei mea òhie i te färii-atoà-hia e te taata. No roto ihoä paha te fenua i te pöuri i te raveraahia mai e te Atua, te fenua atoà rä te mätamua i ànaànahia e te märamarama o te Parau ia a te Atua, e ia fäì te Atua i te maitaì o te märamarama, ia ìte ia tätou e, eere no te märamarama anaè te reira maitaì, no te fenua atoà rä i faahoì mai i te maitaì o taua märamarama ra. Te auraa  vai noa te fenua i roto i te märamarama e te türamaraa a te parau a te Atua, vai noa atoà mai te maitaì ei huru no te fenua. Te maitaì o teie märamarama, te mea ia e, aita o ia i türama noa i te fenua mai te tahi mea i nä nià mai i te tau i raro, ua nä roto atoà mai rä i te fenua, nä roto i te mau täpaò ora ta te fenua i faaìte mai e tei riro ei mauruüruraa na te Atua. I te mea e au no te fenua e au atoà ia no te taata. Tei faaìte te mau nei i te fenua i te parau  no te tiàmaraa, te auraa, eita e tano ia faataaêhia i te tiàmaraa i te Parau, oia atoà  te märamarama èita e tano ia faataa-ê-hia i te Parau, èita hoì te ora e tano ia faataa-ê-hia te tiàmaraa i te märamarama ta te reira Parau i faatupu mai. No reira e òre ai e tià ia tätou ia faaea noa i nià i te mea i parauhia, aore ra te mea i päpaìhia mai te òre e tïtau i te märamarama. No reira ia faaroo tätou i te haapotoraa o na taiòraa tei haapaòhia no tätou te naò ra ia, te faahitiraa.

-Taramo 126, 5 O tei ueue mä te roimata ra, e ôoti ia mä te òaòa.

-Ìtaia 43, 21 Ua haapaòhia e au teie nei mau taata nä rätou e haamaitaì mai ia ù.

-Firipi 3, 14 te neneì au i te täpaò, o te perapeio i te parau a te Atua noo mai i te Metia ra.

-Ioane 8, 11  e ta ù Fatu.

E tano tätou e päpä te manaò i nià i te reo o teie vahine, e ta ù Fatu no te mea na te fenua e faatiàma i teie vahine i te päpaìraa a Ietu no te turäma i teie mau tane i hinaaro ia topa o Ietu i roto i ta rätou märei aore ra i tupu mai te reira no te mea ua ànaana te märamarama o te fenua i roto ia rätou tei faaìte e ua rahi aè ta rätou peu tià òre i ta teie vahine, ua faaruè te ôfaì i to rätou rima ua haavaravara, ma te haamoè ia rätou. Te reo o teie vahine, e ta ù Fatu. Ua parau atu ra Ietu ia na, Eita atoà vau e faautuà atu ia òe. A haere, eiaha rä ia hara faahou. Te parau o te fenua, te parau ia o te taata tei täpaòhia e te fenua i to na hana e to na värua, e parau atoà rä no te taata ei ôpuaraa na te Atua, e ei tupuraa no to na hinaaro. E tupuraa hoì te taata no te hinaaro o te Atua, no te mea ia, na te Atua iho i hinaaro ia tupu mai tätou i nià i terä fenua, i roto i terä nünaa, mä to na reo, ta na peu, to na iho tumu, ta na mäa, e te faufaa ta te Atua i hinaaro ei faufaa na te reira taata. Teie te parau ta Ietu i hinaaro i te taata ia ora hope roa, e ia òaòa hoì i te oraraa atu i te reira. Te mea mau atoà rä te reira e fätata ai tätou i te Atua. Te taata e manaò ra e, mea faufaa aè te parau o te raì, ua ère ia i te reira parau, ua haafaufaa òre hoì i te ôpuaraa a te Atua, e ua ère atoà i te ora. Ia piò e ia päpaì o Ietu i nià i te fenua no te faatiàma i te mau taata ma te täpaò i taata ia noaa ia na te perapeio i te parau a te Atua. Ia parau o Ietu e Eita atoà vau e faautuà atu ia òe. A haere, eiaha rä ia hara faahou. Ia ìte mai tätou, e piti vähi e naeàhia ai tätou i te faahaparaa. A tahi no te òreraa e faaroo i te Fatu ; e a piti no te òreraa e faaroo i te fenua. E riro paha tätou i te fifi i mua i teie huru taìraa reo tei òre tätou i mätau i te faaroo, e inaha te parau noa nei te fenua. Eere ihoä paha hoê ä reo to na e to tätou, aita rä te reira i horoà ia tätou i te tiàmäraa no te parau e, no te taata noa te reira parau, e te vähi atoà ia i hau ai te taata i te mau mea atoà ta te Atua i rahu e ta na i hämani. E ia faaroo tätou i teie reo to Ietu e parau ra e, E teie nei vahine, tei hea te feiä i pari mai ia òe nei?. Te haapäpü noa mai ra teie reo e, e tiàmäraa to te taata i te färiiraa e te òreraa e färii i te Fatu no ta na parau, te ìteraa hoì e te òreraa e hinaaro e ìte ia na ei Fatu, na te taata atoà rä e faaoti ra i to na parau, i te riroraa ei taata no te Atua, aore ra ei taata tei haapae i te Atua, oia hoì tei haapae i te ora. Te ìteraa e te òreraa e ìte ia Ietu, eere te parau no te òhieraa, aore ra te fifiraa te taata i te färii i te tahi, aore ra te täatoàraa o ta na mau haapiiraa, e tae noa atu i to na iho parau ei Tamaiti na te Atua, e parau rä no te ora e te pohe. Ia piò o Ietu i nià i te ora ta te fenua i horoà mai, te faaìte noa mai ra o ia e, te ora e mauhia ra e te fenua, mai te ora ta na e faaìte ra, e horoà ia na te Atua, i teie parauraa e ta ù Fatu.

Teraì òr.Faatura.