Ruta èv 10.25-37 Täuaro.

Tāpati 14 no  Tiurai 2019.

Täuaro.

Taramo 19

1 Na te Mënätehe. Taramo na Tävita. 2 Te parau hua nei te mau raì i te hanahana o te Atua E te faaìte nei te reva i te òhipa a ta na rima 3 Te haapii nei te tahi ao i te tahi i te parau, e te faaìte nei te tahi ruì i te tahi i te ìte. 4 Aore e ôrero, aore e parau, aore to rätou reo i ìteä. 5 Ua tae rä to rätou haruru i te mau fenua atoà, e ta rätou faaìteraa i te ôtià o teie nei ao. Ua faatià o ia i to te mahana tiàhapa i roto ia rätou, 6 o tei haere mai mai te täne âpï ra mai roto mai i to na ra piha, e mai te taata püai e òaòa ra ia horo i to na hororaa.7 Mai te tahi pae raì to na haereà mai, e tae noa atu ra i te tahi pae i to na pouraa i raro, e aore roa te hoê mea i ère i to na mähanahana. 8 Oia atoà te ture a te Fatu aita e hapa, i te haafäriuraa i te värua. Te faaìte a te Fatu e mea mau ia, e paari ai te âau o te maùa. 9 Te haapaòraa a te Fatu e mea tià ia, e òaòa ai te âau. Te aò a te Fatu e mea märamarama ia, e märamarama ai te mata nei.10 Te mataù i te Fatu e mea viivii òre ia, e tià ia i te vai-mäite-raa. Te faaäuraa a te Fatu e parau mau ia, e te mea tià anaè. 11 E taoà hinaaro-rahi-hia ia i to te àuro, i te àuro rahi ra e te maitataì. E momona rahi ia i to te meri i te topataraa no roto i te meriterio. 12 Na te reira hoì i haapii mai i to tävini, e tei te haapaò i te reira te utuà rahi. 13 O vai hoì tei ìte i ta na iho ra mau hara? E tämä mai òe ia ù i ta ù mau hara ìteä-òre-hia nei. 14 E täpeà mai òe i to tävini i te hara ìimi, eiaha roa te reira i faahepo mai ia ù, ei reira vau e maitaì ai, aore aè ra te hara rahi. 15 E tiàhia mai te parau a ta ù vaha i reira, e te manaò o ta ù âau, i mua i to aro, e te Fatu, e ta ù haapüraa e ta ù ora.

Teuteronomi 30.10-14

10 ia faaroo òe i te reo o to Atua ra o te Fatu, e ia haapaò i ta na ra mau parau, e ta na ra mau haapaòraa, i päpaìhia i roto i te puta ture nei; e ia färiu òe i to Atua ra i te Fatu, mä to âau atoà, e mä to värua atoà. 11 Eere hoì teie nei parau ta ù e parau atu ia òe i teie nei mahana i te mea ìteä òre e òe ra, eere hoì tei te ätea ê. 12 Aore i nià i te raì, a parau ai òe e, O vai to tätou e haere i nià i te raì, e tii i taua parau ra e hopoi mai ia tätou nei, ia faaroo atu tätou e ia haapaò? 13 Eere hoì tei te tahi pae moana mai a parau ai òe e, O vai to tätou e fano i te moana, e tii i taua parau ra e hopoi mai ia tätou nei, ia faaroo atu tätou e ia haapaò? 14 Tei pïhaì roa iho rä taua parau nei ia òe, tei to vaha, e tei to âau, ia haapaò hoì òe i te reira ra.

Torota 1.15-20

Te huru o te Metia e ta na haa, 15 O te huru mau o ia o te Atua hiò-òre-hia ra, o tei fänau na i te mau mea atoà i hämanihia ra. 16 Na na hoì i hämani i te mau mea atoà nei, o to te raì, e to te fenua nei, o tei ìteä ia hiò ra e tei òre i ìteä, te feiä teröno, e te feiä hau, te hui-arii, e te feiä mana. E mea hämani- anaè-hia ia e ana, e no na anaè. 17 E o mua ä hoì o ia i te mau mea atoà nei, e o ia të mau i te mau mea atoà nei. 18 E o ia hoì te upoo o te tino ra o te Ètärëtia nei o te mätamua o ia, te mätahiapo o te feiä i pohe ra, ia hau ê atu ä o ia i te mau mea atoà nei. 19 E mea tià hoì i te Metua e ei roto ia na te î i te mau mea atoà ra vai mau atu ai. 20 E ia faafaite hoì o ia i te mau mea atoà ra ia na iho i roto ia na ra, i te hau i noaa i te toto o to na ra tätauro; to te raì e to te fenua nei, ia faite ä ia na.

Ruta èv 10.25-37, Te taata Tämäria hämani maitaì

25 E inaha, ua tià mai ra te hoê haapii-ture i nià, ua fäfä mai ra ia na, nä ô mai ra E te Òrometua, e aha vau e noaa ai te ora mure òre. 26 Ua parau atu ra Ietu ia na E aha tei päpaìhia i roto i te ture ra? Te nä hea ra ta òe taiòraa? 27 Ua parau mai ra o ia, nä ô mai ra E hinaaro òe i to Atua i te Fatu mä to âau atoà e mä to värua atoà, e mä to püai atoà, e mä to manaò atoà ia hope, e aroha hoì òe i to taata-tupu mai te aroha ia òe iho na. 28 Ua parau atu ra o ia ia na Ua tià ta òe i parau mai na, e ora òe ia nä reira. 29 Âreà o ia, no te hinaaro i te faatià ia na iho, ua parau mai ra ia Ietu O vai hoì to ù taata-tupu? 30 Ua parau atu ra Ietu ia na, nä ô atu ra Te hoê taata no Ierutarëma i te haereraa i Ierito, roohia iho ra i te nana èiä haru, taratarahia iho ra ta na àhu e rätou, e paruparu iho ra o ia, haere atu ra, faaruè iho ra ia na, ua fätata i te pohe. 31 Ua haere noa mai ra te hoê tahuà nä taua èà ra, e ìte atu ra o ia ia na, faahahau ê atu ra, nä te tahi pae èà atu ra i te haere. 32 E te hoê âti-Revi hoì i te haereà nä taua èà ra, e fätata mai ra taua vähi ra, e ìte atu ra ia na, òhipa ê atu ra nä te tahi pae èà. 33 Te hoê taata rä no Tämäria i haere noa i to na haereà, e tae atu ra i taua vähi ra, e ìte atu ra o ia ia na, aroha atu ra. 34 Haere atu ra i pïhaì iho, ua ninii iho ra i te hinu e te uaina i roto i te mau puta no na ra; vehi iho ra, e haapärahi atu ra ia na i nià i ta na iho puaa, arataì atu ra ia na i te fare tïpaeraa, utuütu atu ra ia na. 35 E ao aè ra, ia haere ê o ia ra, ua rave aè ra o ia i e piti moni veo, tuu atu ra i te taata fare ra, nä ô atu ra ia na E utuütu òe i teie nei taata, e ia riro atoà ta òe ra moni, na ù ia e hopoi atu i te hoo ia òe ia hoì mai au ra. 36 O vai te taata-tupu i to òe manaòraa i taua nä taata tootoru ra, i te taata i roohia i te nana èiä haru ra? 37 Ua parau mai ra o ia O tei aroha ia na ra. Ua parau atu ra Ietu ia na E haere òe, e nä reira atoà.

Manaò.

Teie mau taiòraa o ta tätou e färerei nei i teie mahana haamoriraa mea tià ia haafatatahia te mau manaò, E tämataraa, oia hoì e räveà tei manaòhia i te faaòhipa i nià i te tahi taata ia rave o ia i te tahi òhipa ta na i òre i ôpua. I ô nei, te haaparaparauraa ia ia Ietu i nià i te ora mure òre, oia hoì te tahi parau tei riro te Atua ei tumu hoê roa. Aita Ietu i ôtohe i mua i te tämataraa, aita atoà rä i àro atu i tei tämata mai ia na, ua färii rä i te haere i te vähi tei reira te tämata i te tiaìraa mai ia na, i te vähi ta na i manaò e, tei reira o ia i te paariraa. I roto i ta na pähonoraa, aita Ietu i faaìte i te räveà e roaa ai te ora mure òre, ia au i te hinaaro o te haapii ture, ua haapäpü noa rä o ia, mai te türuì i nià i te ìte o te haapii ture, e ora te taata ia haapaò i te hinaaro o te Atua. Te auraa ra, te Atua noa ihoä te tumu o te ora, e aita ta Ietu e ôpereraa ora mure òre. Te peàpeà o te haapii ture e te mea o ia i onoöno faahou mai ai, to na ia hiroàraa e, na na noa iho i pähono i ta na uiraa. Ua hinaaro o ia ia parau mai  Ietu i to na manaò, ei räveà pariraa atu ia na, e inaha, o na iho ta Ietu i haaparaparau. O te haapotoraa ia ta te mau taiòraa e faaìte nei.

-Taramo 19, 13 O vai tei ìte i ta na iho mau hara? Tämä i ta ù mau hara ìteä-òre-hia nei.

Teuteronomi 30, 14 Tei pïhaì taua parau ra ia òe, tei to vaha, to âau, haapaò òe i te reira.

Torota 1, 20 E ia faafaite hoì o ia i te mau mea atoà ra ia na iho i roto ia na ra,

Ruta Èv. 10, 27 Parau mai ra o ia, E hinaaro òe i to Atua i te Fatu mä to âau, mä to värua, mä to püai, mä to manaò  ia hope, aroha òe i to taata-tupu mai te aroha ia òe iho na.

Te uiraa e tià e  faahiti, O vai ia to ù täuaro : Te tanoraa mau, ia au i to na tiàraa haapii ture, e roaa noa i teie taata te pähono i ta na iho uiraa. Te hinaaro nei rä o ia e huri i te reira hopoià i nià ia Ietu, no te mea, mea òhie aè te pari i te taata i nià i te manaò ta na i parau, i te faahapa i te taata tei òre i parau i to na manaò. I ô nei atoà, aita Ietu i pätoì i te aniraa a te haapii ture, ua faatià rä o ia i te tahi parau, mai te tuu mai i te mau taata tiàraa i roto i te Faaroo, e tae noa atu i te taata tiàraa òre. Ua tuuhia teie nä taata too toru i mua i te tahi fifi. Na te hiòpoàraa i te òhipa ta rätou i rave, aore ra ta rätou i òre i rave, e tauturu i te haapii ture i te ìteraa i te pähonoraa e au i ta na uiraa. I to òe manaò... I ô nei, te tïtau faahou nei Ietu i te pähonoraa a teie haapii ture. Ua roaa faahou ia Ietu i te faariro i te taata ui, ei taata pähono i ta na iho uiraa. Eiaha rä tätou e hiò i te òhipa ta Ietu i rave mai te tahi täpaò faaìte i to na paari, i te huriraa i te fifi i nià i te taata i ìmi mai te fifi ia na. E haapäpüraa noa teie i te taata e, i roto i te oraraa, eiaha e tiàturi e, te vai ra te pähonoraa oti noa. I te mau taime atoà rä, tei te taata tätaì tahi te raveraa i te faaotiraa tei au i to na manaò, aore ra tei au i te mea ta na i märamarama. Te mea ia Ietu i ani ai i te manaò o teie taata. Te pähonoraa ta Ietu e horoà, ua au noa ia no na, eita rä te reira e au no te tahi taata ê atu. Eere atoà rä teie i te faatanoraa i te mau huru manaò atoà e nä roto mai i te taata. Te pähonoraa maitaì, te pähonoraa ia ta te märamaramaraa o te parau i faatupu i roto i te taata. I roto i te hiòraa ta Ietu e tuu nei i mua i te Haapii ture, te vai ra te tahi tītauraa i te taata ia haamätau i te hiòpoà i te tereraa o te oraraa, te tütonu i nià i te tupuraa o te mau mea tei riro o ia ei ìte, no te mea na te reira atoà e faaòhie ia na i te märamaramaraa i te auraa o te mau mea e tupu noa nei. I teie huru parauraa a te päpaì Taramo, 13 O vai hoì tei ìte i ta na iho ra mau hara? E tämä mai òe ia ù i ta ù mau hara ìteä-òre-hia nei. Tei hau roa atu rä i te faufaa, teie ia vähi e nä ô ra e to òe manaò. E au teie parau no te taata hoê, e au atoà rä no te hoê nünaa, no te hoê fenua, i roto i to na huru, ta na peu, to na reo, to na hiroà. Te riro atoà ra ia teie ei haapäpüraa na Ietu e, i roto i te pähonoraa tei tïtauhia tätou ia pähono i te Atua, eita e tià ia tätou ia huna, ia haamoè, ia faariro ei mea faufaa òre teie hoìraa i roto ia tätou iho, ta tätou faufaa tupuna, to tätou hiroà taata no te fenua, no te mea e tupuraa te reira no te hinaaro o te Atua. Te auraa, ta te Atua i horoà na tätou, ta na e tïtau mai. Eiaha tätou e haamoè e, te hinaaro o te Haapii ture i tià mai ai i mua ia Ietu, e te mea hoì Ietu i faatià atu ai i te parau o te taata i roohia i te èiä, te räveà ia e roaa ai ia na te ora mure òre. No reira, mea faufaa ihoä paha te ìteraa i te parau a te Atua, oia te mea i päpaìhia, aita rä Ietu e haafaufaa òre ra i te ìteraa i to na iho parau, oia te räveà e tano ai te tahi e faaìte i to na manaò. Ia faaroo tätou te parau e faahitihia ra e te Teuteronomi te naò ra, 14 Tei pïhaì roa iho rä taua parau nei ia òe, tei to vaha, e tei to âau, ia haapaò hoì òe i te reira ra. Te haapiiraa e vai ra i roto i te parau ta Ietu i faatià i te Haapii ture, teie ia Eere na ù e mäìti i to ù täuaro, eere na ù e faaoti i te taata ta ù e färii i te tauturu e të òre au e tauturu, tano noa atu ai to ù manaò, maitaì noa atu ai ta ù mau tatararaa. No te mea i reira ra, e tauturu noa ia vau i tei au mai ia ù, mai te òre e täuà atu i tei òre i au mai ia ù. Aore ra, e tauturu vau i te taata ta ù i ìte e, e riro o ia i te faahoì mai i ta ù i rave no na, âreà te taata të òre e faahoì mai i ta ù e rave no na ra, ua òhie ia vau i te tuu i to na parau i te hiti. Mea taa ê ta Ietu hiòraa i teie parau, no na, ua riro te fifi ta te taata e färerei nei ei räveà e ìtehia ai te tupuraa e te òreraa e tupu i te taata te parau o te täuaro. Eere atu ra na ù e faaoti i te taata e au ia täuturuhia, na te taata rä i roto i te fifi e haapäpü mai i to ù riroraa ei täuaro, e te òreraa hoì te reira parau i maraa ia ù i te faatupu. Te fifi e vai ra i muri mai i te uiraa a te Haapii ture, te òhieraa ia tätou i te topa i roto i te mäìtiìti taata e te manaò pae. Te haapiiraa ta teie parau e heheu mai nei ia tätou, teie ia i roto i te faatupuraa i te hinaaro o te Atua, eiaha tätou e ani i te Atua ia faaìte mai i te òhipa ta tätou e rave, na te here rä o te taata i te Atua e faaìte ia na i te mea e au ia na ia rave ia hanahana te Atua. I roto hoì i te òhipa ta te taata i faaoti i te rave e ìtehia ai te tupuraa e te òreraa e tupu te hinaaro o te Atua. No reira, no te mea eere na te tahi e parau mai ia òe i te òhipa e au ia òe ia rave, ia färii ia òe i te tuu ia òe i mua ia òe iho, ia riro e, o òe iho ta òe hiòraa, ta òe tütonuraa, te vähi hoì e roaa ai ia òe te pähonoraa maitaì aè e ìtehia ai te tupuraa e te òreraa e tupu te hinaaro o te Atua. Te auraa, o òe iho to òe täuaro mätamua roa. Ia òre òe ia färii i te faafäite ia òe iho, oia hoì ia òre òe ia färii ia òe, ia òre ia faatupu i te hau e te here i roto i to òe âau, e mata ê noa ihoä ia òe ia òe iho, e faariro noa ihoä ia òe i te manaò o te tahi ei pähonoraa na òe, oia hoì e tämau noa òe i te vai iho e na te tahi aè e manaò mai no òe. E inaha, ia au i te haapiiraa ta Ietu e horoà nei, te pähonoraa ta te tahi e horoà, ua au noa ia no na iho, no te mea o na iho ta na i tuu i roto i ta na parau, te auraa ra, aita ia to òe e parau i reira. Ia au rä i ta tätou i parau na, e au teie òe no te taata hoê, aore ra no te hoê nünaa. Ta  Pauro ia parauraa i to Torota, 20 E ia faafaite hoì o ia i te mau mea atoà ra ia na iho i roto ia na ra, I roto i te pähonoraa mätamua ta Ietu i pähono atu i te Haapii ture, te nä ô atu ra o ia e, E aha tei päpaìhia i roto i te ture, te nä hea ra te taiòraa ; i roto i te piti o te pähonoraa, te ômua ra Ietu i te nä ôraa e : I to òe manaò..., te auraa, eita atoà te märamarama o te taata e roaa òhie noa i roto i te mea i päpaìhia, e e mea faufaa atoà no na te hiòraa i to na iho manaò, te hiòraa i roto i to na parau, i roto i to na iho hiroà taata tei papahia i nià i te tahi fenua, no te mea no te fenua atoà i parauhia ai to te taata, e aita hoì ta te taata e parau maoti rä, ta te fenua i haapii ia na. E no te mea no te Atua te fenua e te î atoà i nià iho, e nä roto atoà ia te Atua i te fenua i te haapii mai i te taata, i te horoàraa ia na i te pähonoraa e roaa i to na märamarama i te heheu mai. I roto i te tïtauraa a Ietu, o òe te taata faufaa, no te mea no òe te parau, ta òe pähonoraa terä e hinaarohia mai ra. Mai te peu rä aita òe i färii ia òe, aita òe i here ia òe, mai te peu e rahi aè to òe vahavaha e te tähitohito ia òe, eita ia e roaa ia òe te faatupu i te tïtauraa a Ietu. No Ietu, eere òe i te âfaì parau na te tahi, mai te peu e, o te reira ra, aita ihoä ia òe. Te ìte ra tätou i te faufaa no teie parau no te faafäiteraa ia na iho, oia te faahauraa e te färiiraa ia na iho ei räveà e tupu ai te hinaaro o te Fatu. Tätou e manaò nei e, mea faufaa òre to tätou manaò, ta tätou huru hiòraa, oia te hiòraa ta te fenua, te peu tumu, e te hiroà tumu i haapii ia tätou, e eita te reira e au ia ravehia i mua i te Atua, no te faatupu i te hinaaro o te Atua, te Tamaiti iho a te Atua teie e faaìte mai nei i te hape o te reira huru hiòraa. Ia parau mai Ietu e : to òe manaò, eita ia te reira parau e tupu mai te peu aita òe, mai te peu e taata ê të parau mai, nä roto noa mai ai te reira parau ia òe, eere ihoä rä no òe te reira manaò. Mai te peu aita ä tätou i matara i mua i teie tïtauraa ta Ietu, e i mua i teie parau no te faafäìteraa i te Atua, haamanaò noa tätou e, ua hämani te Atua i te taata ia au i to na huru e to na hohoà. Te auraa, te huru e te hohoà ta tätou e mau ra, te huru hoì e te hohoà ta te fenua i nanaò i nià ia tätou, e mea hinaarohia ia e te Atua, e ua au hoì te reira i te Atua. I teie nei rä eere te taata i te âfaì hohoà noa no te Atua, e täuaro rä o ia no te Atua, oia hoì te tahi taata tei färii i te tià mai i mua i te aro o te Atua, te tahi taata tei òre i mataù i te parau i te Atua i to na hinaaro, e tei ineine i te pähono i te Atua i te taime te Atua hinaaro mai ai ia na. Te parauraa i to na iho manaò, te tiàmäraa te reira ta te Atua i horoà no te taata. No te taata rä, mea òhie aè no na te tià i muri mai i te parau a te tahi, i muri mai i te ture, te faanahoraa, aore ra te mau mea atoà e òre ai o ia e roohia ai i te faahaparaa ia òre ta na pähonoraa ia tano. No reira, te faafäiteraa i te Atua e haamata ia nä nià i te ìteraa e te färiiraa i te Atua, mai te ìte maitaì atoà rä e, aita e ìteraa i te Atua të òre e riro atoà ei ìteraa e ei färiiraa ia na iho ei tupuraa no te ôpuaraa a te Atua. Ia nä reira tätou i te hiò i to tätou parau, e märamarama atoà ai tätou i te ture a te Atua ta Ietu i haamanaò mai e : here i te Atua, here i te täuaro. Ore noa atu ai rä te taata i ìte i te Atua, ua riro te faatupuraa i te parau o te here ei täpaò e ìtehia ai te mau taata tei fänauhia e te Atua, e tei òre i fänauhia e te Atua. I roto i nä èà e piti ta Ietu e faatoro ra i mua i te taata ei räveà e roaa ai ta na pähonoraa i mua i ta na tïtauraa i te ora, te vai ra te märamaramaraa i te parau a te Atua, te vai atoà ra rä te märamaramaraa i to na iho parau ei räveà e roaa ai ta na pähonoraa. Te auraa, e tano te taata e faatupu i te hinaaro o te Atua mai te ìte òre i ta na parau, eere rä no te ìteraa te taata i te parau a te Atua e tupu atoà ai to na hinaaro. No te mea aita to te taata e parau i räpae aè i te Atua, e to te Atua hoì te hinaaro e tïtauhia nei ia na ia faatupu, ia faafäite atoà o ia ia na iho i te Atua, te auraa, ia färii atoà o ia i te Atua ia vai noa mai ia i mua ia na ei tütonuraa tämau na na. No reira, mea faufaa no te taata te tuuraa i te hau i roto ia na e te Atua. Aita te taata i àifäito i te Atua, e Atua ihoä te Atua, e taata ihoä te taata, teie fäite e parauhia nei, to te taata ia färiiraa e, aita to na e parau i räpae aè i te Atua, aita atoà rä to na e parau i räpae aè i te fenua. Aita atu rä e vähi e matara ai te parau o te täuaro maoti rä, i roto i te here. Ei haapotoraa : here i te Atua, here ia òe iho, te räveà ia e roaa ai i te taata te ora.

Teraì òr. Faatura.

Ruta èv 10.1-20 Tere

Tāpati 7  no Tiunu 2019.

ÔROÀ

Tere

Taramo 66

1 Na te Mënätehe. E Himene, e Taramo. E pii hua i te òaòa i te Atua, e te mau fenua e. 2 E himene ei  haamaitaì i to na iòa, e faariro i to na hanahana ei haamaitaìraa ia na. 3 E parau atu i te Atua E mau räveà mataùtaù ta òe. No to òe ra mana rahi i auraro mai ai to mau ènemi ia òe ra. 4 E haamori te mau fenua atoà nei ia òe, e himene ia òe, e himene i to òe ra iòa. Tera. 5 E haere mai e hiò i te mau òhipa a te Atua E mea mataùtaù ta na i rave i te taata nei. 6 Ua faariro o ia i te tai nei ei repo marô, ua nä raro noa rätou nä te moana i te haere, i reira to tätou òaòaraa ia na. 7 Te mana nei o ia i to na püai e a muri noa atu. Te tiàtonu ra to na mata i te mau êtene; eiaha tei haùti ra e faateitei ia rätou iho Tera. 8 E haamaitaì i to tätou Atua, e te mau taata nei e Ia ìteä hoì te reo i te haamaitaìraa ia na. 9 O o ia tei tiaì ia tätou e ora ai, e o tei faaitoito i to tätou âvae ia òre ia pähee. 10 Ua tämata-mau-hia mätou e òe, e te Atua e Ua tämä òe ia mätou mai te ârio i tämähia ra, 11 ua tuu òe ia mätou i roto i te märei, e ua tuu òe i te hopoià teiaha i nià i to mätou tauupu. 12 Na òe i faahoro i te taata nä nià i to mätou upoo, ua nä roto mätou i te auahi e te pape. Ua arataì rä òe ia mätou i te fenua taoà. 13 E tomo vau i to fare mä te tütia-täauahi, e faatupu vau i ta ù mau èuhe ia òe ra, 14 tei parauhia e ta ù vaha, e na ta ù vaha i faaìte i ta ù àtiraa ra. 15 Te tütia-täauahi poria ra ta ù e hopoi atu ia òe ra te mämoe oni, e te mea noànoà atoà te puaatoro e te puaaniho ta ù e faatütia. Tera.16 E haere mai, e faaroo, o òutou atoà e mataù i te Atua ra, e na ù e faaìte i ta na i rave i to ù nei värua. 17 Ua pii atu ra ta ù vaha ia na, e ua faateitei ta ù arero ia na. 18 Ahiri rä te faatià ra ta ù âau i te ìno, e òre au e faaroohia mai e te Fatu. 19 Ua faaroo mau rä te Atua ia ù,  e ua haapaò mai i ta ù i ani atu. 20 Ia haamaitaìhia hoì te Atua O ia aore i haapae i ta ù nei pure, e aore hoì i faahoì i to na aroharaa ia ù nei.

Ìtaia 66.10-14

10 E òaòa òutou, e Ierutarëma atoà, e ôuàuà noa i te òaòa ia na, òutou, e te feiä atoà e aroha ia na; ia rahi to òutou òaòa ia na, òutou atoà o tei òto ia na. 11 ia òte òutou e ia fiu, i te ü ra i te haamähanahana nä na ra; ia noaa mai ia òutou i te ü, e ia òaòa i te rahi o to na ra hanahana. 12 Te nä ô mai ra hoì te Fatu Inaha, te höhora nei au i te maitaì i nià ia na mai te pape ra; e te taoà o te mau fenua mai te pape puè ra e òte òutou i te ü, e tütähia i te èe; e ei nià i te hümaha òutou e ueuehia ai. 13 Mai tei haamauruüruhia e to na ra metua vahine; o to ù ia haamauruüru ia òutou; ei Ierutarëma hoì òutou e haamauruüruhia ai. 14 E ìte òutou i teie nei mau parau, e òaòa hoì to òutou âau; e ruperupe hoì to òutou mau ivi mai te räau rii âpï ra e ìteä te rima o te Fatu i to na ra mau tävini, e to na riri i to na ra mau ènemi.  

Taratia 6.14-18

14 Eiaha roa rä vau ia ârue, maori rä i te tätauro o to tätou Fatu ra o Ietu Metia, i riro ai teie nei ao ei mea faatataurohia ia ù, e o vau hoì ei mea faatataurohia i teie nei ao. 15 Ia Ietu Metia nei hoì, aore o te peritome, e aore atoà o te peritome òre e faufaa, ei taata âpï rä. 16 E te feiä atoà e haere nä teie nei èà, ei hau to rätou, e te aroha, i nià atoà i te Ìteraèra atoà o te Atua ra. 17 Teie nei, eiaha roa ei taata e haapeàpeà mai ia ù, te vai nei hoì te mau täpaò a te Fatu ra a Ietu i nià i ta ù tino nei. 18 E a ù mau taeaè, ei to òutou värua te aroha mau o to tätou Fatu ra o Ietu Metia ra. Âmene.

Ruta èv 10.1-20

Te tono-raa-hia te tino hitu àhuru mä piti

1 E muri aè ra, ua haapaò atu ra te Fatu i e hitu àhuru mä piti, e tätoopiti atu ra i te tonoraa ia rätou nä mua ia na, i te mau ôire e te mau vähi atoà ta na i ôpua ra e e haere atoà o ia i reira. 2 Ua parau atu ra o ia ia rätou Te rahi mau nei te àuhune tïtona, te iti nei rä te feiä e ôoti. E teie nei, e pure òutou i te Fatu o te òhipa, ia tono ä o ia i te rave-òhipa ei ôoti. 3 A haere, inaha te tono nei au ia òutou mai te ârënio i rotopü i te mau ruto ra. 4 Eiaha ei färii moni e hopoihia, eiaha ei pütë, eiaha ei tämaa hopoi noa, eiaha roa e aroha atu i te taata i te äratià. 5 E te fare ta òutou e tomo ra, e mata na i te parau atu Ei hau to teie nei ùtuafare. 6 E tei reira te hoê tamaiti no te hau, e vai ä taua hau ra i nià iho ia na; aore rä, e hoì mai ia i nià iho ia òutou. 7 Ei taua fare ra pärahi ai, e àmu hoì e e inu i ta rätou e horoà mai ra, e au hoì i te rave òhipa ta na ra utuà. Eiaha e haere i tërä fare, i tërä fare. 8 E te ôire ta òutou e tomo ra, e i ìte mai rätou ia òutou, e àmu i ta rätou e tuu mai i mua i to òutou aro ra; 9 e faaora hoì i to reira maì, e parau atu hoì ia rätou Te fätata mai ra te Pätireia o te Atua ia òutou nei. 10 Âreà te ôire ta òutou e tomo ra, e aore rätou i ìte mai ia òutou, e haere òutou i te aroä i taua ôire ra, a parau atu ai 11 Te repo o to òutou ôire e piri mai ia mätou nei, te horoi atu na mätou. Te fätata mai nei rä te Pätireia o te Atua ia òutou, ia ìte hoì òutou. 12 Teie rä ta ù parau ia òutou e huru tià aè Totoma ia haamahu ia tae i te reira mahana ra, i te reira ôire.

Te àti o te mau ôire tiàturi òre ia Ietu

(Mät 11,20-24)

13 Âuë òe, e Toratina e Auë hoì òe, e Petetaita Ahiri hoì te mau temeio i ravehia i roto ia òrua na, i ravehia i Turia e Titona, ua tätarahapa ê na rätou, ua pärahi i te rehu auahi mä te àhu paau. 14 E huru tià aè ra Turia e Titona ia haamahu ia òrua na, ia tae i te mahana haaväraa ra. 15 E o òe na hoì, e Taperenaumi i faateiteihia i nià i te raì na, e höparahia òe i raro roa i häte. 16 O tei faaroo mai ia òutou na, ua faaroo mai ia ia ù; e o tei vahavaha mai ia òutou na, ua vahavaha mai ia ia ù; e o tei vahavaha mai ia ù ra, ua vahavaha ia ia na i tei tono mai ia ù nei.

Te hoìraa mai te tino hitu àhuru mä piti, 17 Ua hoì faahou mai ra taua hitu àhuru mä piti ra mä te òaòa, nä ô mai ra E te Fatu, ua vï atoà te mau tëmoni ia mätou i to iòa na 18 Ua parau atu ra o ia ia rätou Ua ìte au ia Tätani i te maìriraa, mai te uira no nià i te raì ra. 19 E inaha, e haamana atu vau ia òutou, ia taahi noa atu i te ôfï, e te pata, e te mana atoà o te ènemi e aore roa e mea e pohe ai òutou. 20 Eiaha rä e òaòa i te mea ua vï te mau värua ìno ia òutou; e òaòa rä i to òutou iòa i päpaìhia i nià i te raì ra.

Manaò.

I te matararaa mai o Ìteraèra mai Aifiti mai, mai te fenua o te tïtïraa, ua tià i te Atua i te faaàmahia i te moana, nä nià noa atu ra o Ìteraèra i te repo marö i te haere, mai te tahi hiti e te tahi. Areà te nuu püai o Aifiti, riro atu ra ia i te pape ei pohe no na. Mai ta te Atua i faaìte i te matahurahura o teie nei ao, e tià noa i te Atua ia täpeà i te pape ei räveà faaòhie i te tupuraa o te ora mai ta te Atua atoà rä i faaìte mai i to na nïnäraa i te fenua nei, e riro atoà te hara e te ìno o te taata ei tumu e vave mai ai te pohe o te taata ta taua pape nei ä e faatupu. Teie hiòraa èita ei faatupuraa i te riàrià i roto i to tätou âau i mua i te pape, e haamanaòraa rä i te faufaa rahi o te pape të òre roa to na parau e tano ia faataa-ê-hia i to te fenua. Teie ta te päpaì Taramo e parau nei e, 5 E haere mai e hiò i te mau òhipa a te Atua E mea mataùtaù ta na i rave i te taata nei. 6 Ua faariro o ia i te tai nei ei repo marô, ua nä raro noa rätou nä te moana i te haere, i reira to tätou òaòaraa ia na. Mai te peu i roto i te rahu a te Atua, mea tüàti noa te parau o te pape i to te fenua, e aita hoì te tahi parau i faataa-ê-hia i to te tahi, i roto i te òhipa ta te Tamaiti i rave, aita atoà o ia i faataa ê i te parau o te pape i to te fenua, te mea mau rä te reira ta na i rave ei faaìteraa i te ôpuaraa faaora a te Atua. Teie ia e faaìtehia nei ia au te haapotoraa no na taiòraa e maha.

-Taramo 66, 4 E haamori te mau fenua atoà nei ia òe, e himene ia òe, e himene i to òe ra iòa.

-Ìtaia 66, 14 E ìte òutou i teie nei mau parau, e òaòa hoì to òutou âau;

-Taratia 6, 16 Te feiä e haere nä teie èà, e hau, e aroha, i Ìteraèra i te Atua ra.

-Ruta èv. 10, 3 A haere, te tono nei au ia òutou mai te ârënio i rotopü i te mau ruto ra.

Te parau o teie täpati, to Ietu tonoraa na pipi e 70, i te mau vahi atoà no te o òire no Ierutarëma e tae noa atu i te mau fenua atoà. I teie nei mahana te tävevo noa teie reo to Ietu i te ìrava 3 i te naòraa e, À HAERE, ÌNAHA TE TONO NEI AU IA ÒUTOU MAI TE ÀRENIO I ROTOPU I TE MAU RUTO RA.

E piti teie tau ànimara i roto i tätou taiòraa.

1- Te àrenio, ànimara maru, haehaa, mauhaa òre no te paruru ia na i te mau taime fifi, òia hoì, aita ta na e raveà i mua i to na mau ènemi.                                                                                                                                                     ‑

2 ‑ Te ruto, ànimara taehae, àravihi, taiä òre i te mau taime àroraa, no te mea te vai ra ta na mauhaa.

Te ìte ra ia tätou i to raua taa – ê - raa e to raua tuàti-òre-raa. Te paruparu o te hoê e te puai e te àravihi o te tahi.­                                                                                                                                                                                     vihi o te tahi.

O te huru atoà ia o Ietu te Tamaiti here a te Atua i te haereraa mai i roto i teie nei ao. Ua rave mai oia i te huru no te tävini haehaa. Oia mau, ua rave mau o Ietu i te huru o te àrenio e tae noa atu ra i te hopeà òia hoi i te taime a täparahi pohe-roa-hia ai. Te faaìte ra Ìtaia Ua rave-ìno-hia ò ia, ua faahaèhaahia, aita ra to na vaha i parau. i ärataìhia ò ia mai te fanauà mämoe i te täparahiraa ra, e mai te mämoe e mämü i te aro o te fëia e paòti i to na ra huruhuru aita to na vaha i parau. Ìtaia 53, 7.

E nahea e noaa ai te itoito i te mämoe?

Te parau nei Ietu, ia paari òutou mai te òfi e te hapa òre mai te ùuàiraò. Mat. 10, 16.

Teie hoì te auraa, eiaha òutou ia teòteò i te mea ua vi ia òutou te mau tëmoni, e òaòa rä i to òutou iòa i papaìhia i nià i te raì ra. Eiaha atoà òutou ia teòteò i te mea e na te Fatu òutou i tono mai; E ara ra, o te reo ia o Ietu i nià i ta na mau pipi. E ara ia òutou i te mau taata i te tuu ia òutou i te haavare. E papaì hoì rätou ia òutou i roto i te tunato, eiaha ra òutou e taiä ia rätou, ia haamanaò maite ra òutou e tei pïhaì iho vau ia òutou i to òutou tere. Te hinaaro nei o Ietu e na roto i teie tere ia ìtehia to rätou haehaa e to rätou faaòromaì, ia haere rätou ma te mauhaa òre e te veve rahi; Eiaha rätou ia rave i te mau mea e fifi ai rätou, ia haamanaò maite ra rätou e, te mau mea atoà no ô mai ia, ia na ra. E noaa hoì ia rätou te mau mea atoà i roto i te mau ùtuafare e färii mai ia rätou. Ua haamäramarama Ietu ia rätou ma te faaìte ia rätou e aita ò ia e tono ia rätou i te mau vahi ìteä-òre-hia e rätou. Eiaha rätou ia haama i te tomo i roto i te mau fare tei färii ia rätou no te mea e tià ia Ietu ia haamaitaì mai i taua mau fare. E mea tià roa ia faaìtehia na mua roa teie mau parau i te ùtuafare no Ìteraèra, ia au te parau a Pauro i roto i te puta Òhipa i te pene 2, 22. Teie rä, maite peu aita o Ìteraèra i färii i taua mau parau òaòa eiaha roa ia rätou e märo atu, e ère ia o te ora te noaa mai ia rätou, o te pohe ia, tei hau roa atu ia i te riàrià, o täpeàhia ia te Patireia o te Atua ia rätou, e horoàhia i te nunaa tei färii.

No reira te parau no te tonoraa e aore ia te parau no te haereraa na roto i teie nei ao, mai te àrenio te huru, e ère roa tu ia i te mea òhie. Te tumu, ua riro teie nei ao èi haapüraa no te mau ruto. Tei roto i teie nei ao te mau raveà rau atoà e fifi ai te òhipa faaìteraa i te parau âpï òaòa no te taeraa mai no te patireia o te Atua. Noa atu rä taua mau peu ra, ua ìte päpü o Ietu i te mau fifi e färereihia e ta na mau pipi i horoà ai òia i te hohoà no teie na ànimara e piti nei. No reira òia i parau ai, èita vau e vaiiho òtare noa ia òutou, e hoì mai ä vau ia òutou nei. Ioane 14, 18. Na te faaaò ra, na te Varua Maitaì o ta te Metua e tono mai ma to ù nei iòa ra nana e haapii mai ia òutou i te mau parau atoà ta ù i parau atu ia òutou ra. Ioane 14, 26.                                                                                                                                                      

Te tonohia nei te àrenio te hoê mero paruparu i mua i te hoê mero puai. Riro atu ai teie parau èi parau faufaa rahi i te mea e, na roto i te mero paruparu e faufaahia ai te òpuaraa faaora a te Atua, mai te parau no te upootiàraa no te maitaì i nià i te ìno, e te upootiàraa no te ora i nià i te pohe. Na roto i te paruparu e ìtehia ai te puai, riro noa ai èi mämoe i te hiòraa rapae, ua paari mai te òfi ra te huru e te hapa òre mai te ùuàiraò. No reira te hinaaro nei tätou i te Atua, ia òre hoì tätou ia riàrià i te ìno, te parau-tià-òre, te haavare, te manaò ìno, aore ia e vaiiho noa tätou ia tupu ruperupe noa na taua mau ìno atoà ra, ia òre hoì tätou ia horoà i to tätou püai no te haapaò i te reira mau mea atoà e nahea ia te Atua e riro faahou ai, ei Atua no tätou, e nahea ia tätou e riro mau ai ei tamarii atoà nä na. E nahea ta na parau e riro ai ei parau maitaì no te arataì ia tätou i nià i te èà e tupu ai te hau, te maitaì e te ora. Te ìtehia nei e toru vahi faufaa i roto i teie parau ta tätou i teie mahana èi faaitoitoraa, 1-Te Faaroo e te Faaìteraa, 2 -Te Parau tià e te Täviniraa, 3 -Te Haapiiraa e te Faaâpïraa.

Ia itoito tätou i te Aroha e te Here o te Atua Nui Tumu Tahi.

Teraì  òr. Fatura.

Ruta èv 9.51-62 Mua

Tāpati 30 no Tiunu 2019.

Mua

Taramo 16

1 Mitetäma na Tävita. E faaoraraa ia ù, e te Atua, te tiàturi nei au ia òe. 2 Te parau nei au i te Fatu e O ta ù Fatu òe, aita a òe e faufaa i to ù nei maitaì. 3 Âreà te feiä moà i te fenua nei, o te feiä maitataì rätou o ta ù e pöpou nei. 4 E faarahihia to rätou mäuiui tei rü i te hoì i muri. Ta rätou tütia inu toto ra, e òre au e hopoi, e òre hoì ta ù vaha e faahiti noa atu i to rätou iòa. 5 O te Fatu, o ta ù ia tufaa e ta ù âuà, o òe tei haapaò mai i to ù nei terero. 6 Ua maìri aè nei to ù terero i te vähi maitaì; e te maitaì nei au i ta ù nei tufaa.7 E haamaitaì ä vau i te Fatu o tei haapii mai ia ù ra te aò mai ra ta ù manaò âau ia ù i te ruì. 8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue. 9 I òaòa ai ta ù âau, e te òaòa nei ta ù värua e taòto atoà ta ù tino nei mä te tiaì. 10 E òre hoì òe e vaiiho i ta ù värua i häte, e òre hoì òe e tuu i te taata moà ra ia ìte i te tähuti. 11 E riro òe i te faaìte mai ia ù i te èà ora. E te îraa o te òaòa i mua i to aro na, te maitaì e vai i to rima àtau e a muri noa atu.

1 Te mau Arii 19.16-21

16 e faatähinu hoì òe ia Iehu a Nimeti, ei arii no Ìteraèra ; e faatähinu hoì òe ia Êrïtaia a Täfata, no Âpere-mehora, ei perofeta ei mono ia òe ra. 17 E o tei ora i te òè a Hataera ra, nä Iehu ia e täparahi ; e o tei ora i to òè a Iehu ra, Èritaia e täparahi. 18 E vaiiho rä vau i e hitu tautani taata o Ìteraèra no ù iho, o tei òre i tuu i te turi i raro ia Paara, e tei òre i höì atu te vaha ia na. 19 Haere atu ra o ia ; e ìte atu ra ia Èritaia a Täfata, roohia atu te ârote ra, hoê àhuru mä piti âpitiraa puaatoro i mua ia na, tei ia na hoì te mä piti haere noa atu ra Èria ia na ra, e ua huri aè ra i to na àhu i nià iho ia na. 20 Ua faaruè iho ra o ia i taua mau puaatoro ra, e ua aùaù atu ra ia Èria, ua parau atu ra E haere na vau e höì i ta ù metua täne e taù metua vahine, a pee atu ai au ia òe. Ua parau mai ra o ia ia na, A haere, e höì e aha atu hoì au ia òe. 21 Ua hoì atu ra o ia, ua rave iho ra i e piti puaatoro, ua tüpaì iho ra, e ua tunu iho ra, no nià te puaatoro te räau ei vahie e ua hopoi na te mau taata, e ua àmu iho ra rätou. Ua tià aè ra o ia, ua pee atu ra ia Èria, àti atu ra ia na.

Taratia 5.1-18

Te tiàmäraa e te aroha èvaneria

1 E tënä na, e täpeà tämau mäite na i te tiàmä ta te Metia i faatiàmä mai ia tätou nei, e eiaha ia mau faahou i te tuto tävini ra. 2 Inaha, o vau teie o Pauro e parau atu ia òutou ra e i peritomehia òutou, eita roa ia a òutou faufaa e noaa i te Metia. 3 E te faaìte faahou atu nei au i te taata atoà i peritomehia ra, e àmutärahu ia o ia e ia hope roa te ture atoà ra i te rave. 4 O òutou atoà o tei tïtau ia tiàhia i te ture ra, ua taa ê ia òutou i te Metia; ua faaruè ia òutou i te aroha mau. 5 No te Värua rä hoì i tiaì ai mätou nei i te hinaaro ra i te parau tià ia noaa i te faaroo. 6 I te Metia nei hoì ia Ietu, aore o te peritome faufaa, aore hoì to te peritome òre, o te faaroo rä e faatupu i te hinaaro ra. 7 I horo maitaì na hoì òutou, nä vai òutou i ärai i òre òutou i haapaò ai i te parau mau? 8 Eere tënä na manaò i to na, to tei haamau ia òutou na. 9 E höpue te puèà atoà ra i te faahöpue iti haìhaì ra. 10 E manaò maitaì rä to ù i te Fatu nei ia òutou, e e òre to òutou e riro ei manaò ê. Âreà i tei haapeàpeà mai ia òutou, ei ia na iho ia ta na utuà, eita e haapaòhia to na huru. 11 E o vau nei hoì, e a ù mau taeaè, te aò haere nei ä vau i te peritome, e aha vau i hämani-ìno-hia mai ai ä. Ua òre hoì te mäheaitu o te tätauro i reira. 12 Te hinaaro nei au ia faataa-ê-hia taua feiä i tiàrepu ia òutou na. 13 I parauhia atu hoì òutou, e te mau taeaè, ia noaa te tiàmä. Eiaha rä taua tiàmä ra ei faatupu i ta te tino, ei auraro aroha rä to òutou ia òutou iho. 14 Ua hope roa hoì ta te ture i te parau hoê nei, oia te parau ra e, E aroha òe i to taata tupu mai to aroha ia òe iho na. 15 Ia faaoôo rä e ia hämani ìno òutou òutou iho, e ara, o te mou hoì òutou ia òutou iho.

Ia ärataìhia e te Värua

16 Teie rä ta ù parau e haapaò i ta te Värua ra, e eiaha e faatupu i to te tino ra hinaaro. 17 Hinaaro ê hoì to te tino i to te Värua, e to te Värua ra i to te tino ; e òre hoì räua e au; i òre i tià ai ia òutou ia rave i ta òutou i hinaaro ra. 18 Te ärataìhia ra òutou e te Värua, aore ia òutou i raro aè i te ture.

Ruta èv 9.51-62

Aita te hoê ôire no Tämäria i färii ia Ietu

51 E fätata aè ra te mau mahana i te hope e reva ai o ia i nià, ua ôpua mäite iho ra o ia e haere i Ierutarëma. 52 E ua tono atu ra i te veà nä mua ia na, e tomo atu ra rätou i roto i te hoê ôire rii o to Tämäria e faanehenehe i te hoê täpaeraa no na. 53 Aita aè ra rä rätou i färii mai ia na, no te mea te haere tià ra o ia i Ierutarëma. 54 Ìte aè ra nä pipi na na ra, o Iatöpo räua o Ioane i te reira, ua nä ô mai ra räua E te Fatu, e tià änei ia òe ia parau mäua i te auahi ia maìri mai no nià i te raì, ia pau atu rätou, mai ta Èria ra ? 55 Ua färiu atu ra rä o ia, àvau atu ra ia räua, nä ô atu ra. Aore òrua i ìte i te huru o to òrua âau. 56 Aore hoì te Tamaiti a te taata nei i haere mai e täparahi i te taata, i haere mai rä e faaora. Haere atu ra rätou i te tahi ôire iti.

Te peeraa ia Ietu

(Mät 8,19-22)

57 E te haere noa ra rätou nä te èà tià, ua parau mai ra te hoê taata ia na. E te Fatu, e pee atu vau ia òe i to òe mau haereà atoà. 58 Ua parau atu ra Ietu ia na E ana to te ârope, e täuraa to te manu o te reva, âreà te Tamaiti a te taata nei, aita o na tuäroì. 59 Ua parau atu ra o ia i te hoê A pee mai ia ù. Ua nä ô mai ra o ia E te Fatu, a tuu aè na ia ù e haere au e tanu i ta ù metua täne. 60 Ua parau atu ra Ietu ia na E vaiiho atu na i tei pohe e tanu i to rätou i pohe ra e haere rä òe e poro haere i te Pätireia o te Atua. 61 Ua parau atoà mai ra hoì e tahi E te Fatu, e pee atu vau ia òe ; e tuu na rä òe ia ù, e poroì na vau i to ù ra fëtii. 62 Ua parau atu ra Ietu ia na O te taata e tuu i te rima i nià i te ârote a hiò ai i muri, e òre ia e au i te Pätireia o te Atua.

Manaò.

E itoito mäua to te taata faaroo i te ìteraa i te faaoraraa a te Atua Nui Tumu Tahi, tei tiàturi i teie faufaa no te ora. Ma te parau e, e ta ù Fatu e o ta ù Fatu òe, e faufaa rahi ta òe i to ù nei maitaì. Te feiä e tävini nei i te fenua nei, o te feiä maitataì ia e haapöpou nei i to òe hanahana. Te faarahihia nei rätou i te itoito tei rü ia tupu te ôpuaraa faaora i faanahohia no te mau taata e rave rahi. Te mau püpüraa ö e au i te Atua ta te fenua ia e faaìte noa ra na roto i ta na i rähau i reira hoì te vaha o te Atua e faahiti ai i to tätou mau iòa. No te mea tei Atua ra, to tätou tufaa tei haapaò mai ia tätou nei no te Aroha e te here. I te vähi maitaì tätou i te hämaniraahia e maitaì ai tätou. E haamaitaì ä tätou i te Atua Nui Tumu Tahi o tei haapii mai ia tätou ra i te maitaì ta to tätou manaò âau e faaìte noa ra i te mau taime atoà i te ao e te ruì. Ta tätou ia e tuu nei te Fatu i mua ia ätou, tei ärataì ia tätou ma to na rima, e òre tätou e âueue. I òaòa ai to tätou âau, e te òaòa nei to tätou värua e ia taòto to tätou ra tino nei mä te tiaìhia e te Fatu. Te taata tei òre e âueue te faaroo, e òre te Fatu e vaiiho i to na värua i häte, e òre hoì o ia e tuu i to na tävini ia ìte i te tähuti. E riro ra te Fatu i te faaìte mai ia tätou i te èà ora. E te îraa te òaòa i mua i to na aro, te maitaì e vai i te rima o te Fatu e a muri noa atu. Teie atu ra te huru no te haapotoraa no te mau taiòraa i faanahohia no teie mahana paieti.

-Taramo 16, 8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue.

-I Mau Arii 19, 21 Ua tià aè ra o ia, ua pee atu ra ia Èria, àti atu ra ia na.

-Taratia 5, 18 Te ärataìhia ra òutou e te Värua, aore ia òutou i raro aè i te ture.

-Ruta Èv. 9, 62 Ua parau atu ra Ietu ia na O te taata e tuu i te rima i nià i te ârote a hiò ai i muri, e òre ia e au i te Pätireia o te Atua.

Te tähi tumu no na taiòraa e maha nei mauti ra ia te Mua, e faaòhipahia nei i roto i te tau, e tei faaòhipa-atoà-hia i roto i te haere e te tere. Ia parauhia ei Mua, te vai ra ia te muri, te àoào, te nià te raro te auraa e parau tumu teie tei faatoro i te òhipa e manaòhia ra ia tupu. Ia faaroo tätou i teie reo to Ietu i te naòraa e, 62 Ua parau atu ra Ietu ia na O te taata e tuu i te rima i nià i te ârote a hiò ai i muri, e òre ia e au i te Pätireia o te Atua. Te türamaraa o teie reo aita e taime no te hiòraa i muri e tämau ra i te hiò i Mua, mai te ànavai e tahe ra èita e hoì i muri a tae atu i te muriavai, i reira e âmui ai i tähatai. Oia atoà no te mau tiàrama ia hiti èita e hoì i muri no te feiä taere, e te faatarere òhipa e tere noa ra i Mua. Mai te vai e tahe ra i roto i te tähora päpe e parau teie no te ora, e haapäpüraa teie e, aita e parau o te ora i räpae aè i te Atua na na te parau i ìriti i te ùputa o te ora. Ia faahiti rä hoì tätou i te parau o te ìritiraa, ua ìte ia tätou e, tei roto atoà ia na te täpiriraa. I mua i te auraa o te parau ta te Metua e heheu mai nei, te pinaìnaì noa ra teie reo to te Tamaiti O te taata e tuu i te rima i nià i te ârote a hiò ai i muri, e òre ia e au i te Pätireia o te Atua. Te auraa, te mau mea atoà no roto mai i te parau, e riro te reira i te mou atu, âreà te parau tei riro ei tumu i pü mai ai rätou i te ao nei, eita te reira e mou, no te mea o te Atua iho te reira. Oia hoì, mai te peu te vai ra te fenua, o te mea ia e vai ra i Mua, ta te mata e ìte ra, eita to na parau e hope i nià ia na iho. I parauhia ai to te fenua, no te faaìte ia i te Atua na na te parau i fenua ai te fenua i vai ai te Mua, i Mua ra i vai na te Atua. E ia òre hoì te taata ia ìte i te faatura e te haapaò i te ôpuaraa a te Atua tei riro te fenua ei tupuraa hanahana, e riro te pape i te täpiri faahou i te ùputa o te ora ta te parau i ìriti. Te ìriti nei te Mua i te parau mau, ìno noa ai te fenua i te rave a te taata, te fenua terä e ìno ra ia na, eita rä te Atua na na te parau i horoà i te ora o te fenua e naeàhia i te òhipa a te taata. Eiaha rä ia moèhia ia tätou e, te ârue ra, te haamaitaì ra, e te faahanahana ra te mau mea atoà i rahuhia, i te rahi o te Atua, e ia òre te taata ia färii i te haapiiraa e te tïtauraa ta te fenua e faaìte noa ra ia na, e riro te mau mea atoà i rahuhia i te täpeà i te ora ta rätou e horoà tuutuu òre noa ra, e ta te taata e fänaò ra, inaha ei tävini anaè hoì rätou no te Atua ora. Te vähi rä ta tätou e tütonu maitaì, teie ia i Mua i te rahuraa te Atua i te raì e te fenua, aita te parau o te päpe i faataa-ê-hia i to te raì e te fenua, e no te noaaraa te pape i te faataa, i parauhia ai to te nià e te raro, te tai e te uta. E tano ai tätou e parau e, te raì aore ra te fenua, te vähi ia ta te päpe i faaruè ei pähonoraa i te hinaaro o te Atua, i Mua ra te vai ra te parau. Naò ia tätou i te parauraa e, i Mua ra no roto mai te raì e te fenua i te pape i te noaaraa mai. Ia fänau te hoê taata i ta na tama, riro noa ai teie tama ei mea ora, e hinaaro ä o ia i to na metua ei haapäpü e ei àtuàtu i te ora paruparu ta na e mau ra. Oia atoà te fenua, riro noa ai ei puna no te ora, e hinaaro ä o ia i te pape ei haapäpüraa i te ora ta na e horoà tuutuu òre noa ra. 8 Ua tuu vau i te Fatu ei mua ä ia ù, tei ta ù rima àtau o ia, e òre au e âueue. E no te mea i roto i te parau o te Mua e parau atoà  no te pape e te fenua, te faahiti atoà nei tätou i te parau o te taata, e tano tätou e parau e, ua riro te taata ei haapotoraa no te parau i Mua i te fenua, oia te rahu a te Atua, e aita atu e vähi e märamarama ai tätou i to na parau maoti rä, i roto i te päpe. Naò noa ia tätou i te parauraa e, te Mua te mata ia no te òhipa âpï, tei haamanaò tämau te püna o te ora i te mätamua ra.

Teraì òr. Faatura.

Ruta èv 9.11-17 Ôpere

Tāpati 23 no  Tiunu 2019.

Ôpere

Taramo 110

1 Taramo na Tävita. Ua parau atu ra te Fatu i ta ù Fatu E pärahi òe i ta ù rima àtau nei, e ia faarirohia e au to mau ènemi ei taahiraa âvae no òe. 2 E faatae atu ä te Fatu i te tëpeta ra o to òe mana mai Tiona atu nei E arii hoì òe i rotopü i to mau ènemi ra. 3 E tià rahi roa to òe ra mau taata, i te mahana e faaìtehia ai to òe ra mana  mä te tura moà ra; to òe ra huaai, mai te hau ia no te ôpü ra o te poìpoì. 4 Ua tapu te Fatu, e òre e tätarahapa E tahuà òe e a muri noa atu, ia au i te parau ia Merehiteteta. 5 Na te Fatu i to rima àtau ra, e täìri i te hui arii ia tae i te mahana e riri ai o ia ra 6 e haavä o ia io te mau êtene ra; e ia î noa atu te fenua i te taata pohe; e täìri hoì i te feiä rarahi no te mau fenua e rave rahi. 7 E inu hoì o ia i te pape e tahe nä te pae èà tià, e no reira o ia e faateitei ai i te upoo i nià.

Tenete 14.18-20

18 E ua hopoi atu ra hoì te arii o Tärema o Merehiteteta, i te päne, e te uaina; e no te mea e tahuà o ia na te Atua teitei, 19 ua haamaitaì atu ra o ia ia na, nä ô atu ra, Ia haamaitaìhia Âperäma e te Atua teitei, e te Fatu o te raì e te fenua nei 20 e ia haamaitaìhia hoì te Atua teitei o tei tuu mai i to mau ènemi i to rima na. Ua tuu mai ra o ia i te àhuru i taua mau taoà atoà o te pau ra no na.

1 Torinetia 11.23-26

(Te haamauraa i te àmuraamäa a te Fatu (Mät 26,26-29; Mär 14,22-25; Ruta èv 22,14-20)

23 I noaa hoì ia ù i te Fatu ra ta ù i tuu atoà atu ia òutou na, e Ua rave te Fatu ra o Ietu i te päne i te ruì i haavarehia mai ai o ia ra, 24 e oti aè ra ia na te haamaitaì i te Atua, vävähi iho ra, nä ô atu ra A rave mai, a àmu o ta ù tino teie e ôfatihia no òutou nei. E nä reira òutou ei manaòraa ia ù. 25 E ua nä reira atoà hoì i te âuà, ia oti aè ta na àmuraa, nä ô atu ra Teie nei âuà, o te faufaa âpï ia i to ù nei toto, e nä reira òutou ia inu ei manaòraa ia ù. 26 Ua àmu anaè òutou i teie nei päne, e ua inu anaè i teie nei âuà, ua faaìte ä ia òutou i te pohe o te Fatu, e tae noa mai o ia ra.

Ruta èv 9.11-17

To Ietu faaàmuraa i nä taata e pae tautani

(Mät 14,13-21; Mär 6,30-44; Ioane 6,1-14)

10 E hoì mai ra te mau âpotetoro, ua faaìte mai ra ia Ietu i te mau mea atoà ta rätou i rave ra. Ua rave aè ra o ia ôpaì huna atu ra o ia e rätou atoà, i te mëtëpara i taua ôire i Petetaita ra. 11 E ìte aè ra te rahi o te taata atoà ra, ua pee mai ra rätou ia na. E ua färii atu ra o ia ia rätou, e ua parau atu ra i te parau o te Pätireia o te Atua, e faaora atu ra i te feiä maì. 12 E tapetape roa atu ra te mahana, ua parau mai ra te tino àhuru mä piti ra ia na, nä ô mai ra. E tuu atu i te mau taata nei, ia haere na i te mau ôire rii, e te mau fare fätata nei, ia noaa te mäa na rätou, e te taòtoraa e mëtëpara hoì teie ta tätou e pärahi nei. 13 Ua parau atu ra o ia ia rätou Na òutou e hopoi atu i te mäa na rätou Ua parau mai ra rätou E pae roa a tätou päne, e piti hoì ià tirä rä. Âreà e haere mätou e hoo i te mäa na teie nei feiä rahi? 14 E pae hoì tautani o te taata. Ua parau atu ra o ia i ta na mau pipi A faataòto pupu na ia rätou i raro, ia taìpae àhuru i te pupu hoê. 15 Ua nä reira atu ra rätou, faataòto atu ra ia rätou atoà i raro. 16 Ua rave iho ra o ia i nä päne e pae e nä ià e piti ra, hiò aè ra i nià i te raì, haamaitaì atu ra i te Atua i taua mäa ra, vävähi iho ra, tuu atu ra i te mau pipi e tuu i mua i te aro o taua feiä rahi ra. 17 Àmu anaè iho ra rätou, e paìa aè ra. Òhihia iho ra te toeà mäa, e î aè ra nä ète rarahi hoê àhuru mä piti.

Manaò

Taramo 110, 3 i te mahana e faaìtehia to mana to tura moà, to huaai, mai te hau o te ôpü o te poìpoì.

Tenete 14, 18 Ua hopoi te arii o Tärema o Merehiteteta, te päne, te uaina; na tahuà o te Atua teitei,

1 Torinetia 11, 24 Ia oti  te haamaitaì i te Atua, vävähi iho ra, nä ô atu ra A rave mai, a àmu o ta ù tino teie e ôfatihia no òutou nei. E nä reira òutou ei manaòraa ia ù.

Ruta èv 9, 16 Ua rave  nä päne e pae  nä ià e piti, hiò aè ra i nià i te raì, haamaitaì atu ra i te Atua i taua mäa ra, vävähi iho ra, tuu atu ra i te mau pipi e tuu i mua i te aro o taua feiä rahi ra.

Ia au te haapotoraa o te mau taiòraa te ìtehia nei te mau faufaa e vai ra i roto i te päpaìraa a Ruta no te mau òhipa i ravehia e Ietu i mua i te nahoà taata i putuputu i taua mahana ra. Teie atu ra te faanahoraa o te pene parau, ia haapäpühia i te hiò teie pene parau, te faufaa e ìtehia oia hoì te mau numera e faahitihia nei e Ruta.

Te ìrava 11, ua färii o Ietu i teie rahiraa taata, e ua faaìte i te parau no te patireia o te Atua.

Te ìrava 12, 12 pipi,

Te ìrava 13, E pae färaoa, E piti  ïà

Te ìrava 13vh, E 5000 paha rahiraa taata

Te ìrava 14, e haapüpü, 50 taata i te püpü hoê 100 ia püpü i te rahiraa

Te ìrava 15, faataòto iho ra

Te ìrava 16, haamaitaì iho ra na pane e pae, e i na ïà e piti.

Te ìrava 17, ua toe mai e 12 ète î maitaì.

A tahi roa ra tätou a farerei ai te taiòraa mai teie te huru, ua pinepine te faahitihia te mau numera. Te mau tuatapaparaa i rave-noa-hia na, ua haamauhia ia i nià i te numera 12, tei faaäuhia i na ôpu 12 no te nunaa Ìteraèra, e na 12 ète tei toe mai, tei î maitaì i te mau toeà. O te tahi ia teie tatararaa, i rave-noa-hia na, e inaha te vai atoà te tahi mau numera e faahitihia nei, mai te pae färaoa e piti ïà, ia âmuihia e moà mai ia te numera 7, teie numera te faaìte nei ia i te moàraa o te Atua, e te ôtià òre no to na maitaì. E 5000 paha rahiraa taata, tei haapüpühia e 50 i te püpü hoê, aita nei te numera e haamanaò mai ra ia tätou i te parau no te ôroà penetetöte, ia penetetöte-noa te taata, i roto i te òaòaraa no te Varua Maitaì. E ua toe mai 12 ète î maitaì, te faaìte mai nei ia teie numera, eita te maitaì o te Atua e pau i te taata. 

Te faufaa ia e vai nei i roto i tätou parau no teie mahana, o ta te ìrava 17 ia  e faaìte nei, àmu anaè iho ra rätou, e paia aè ra, òhihia iho ra te toeà maa, e î aè ra na ète rarahi hoê àhuru mä piti.

O teie te tahi hiòraa i nià i te òhipa o ta Ietu i rave i mua i ta na mau pipi, e te rahiraa taata o ta na i färii, i taua ahiahi ra. Tei tupu na roto i to na haamaitaìraa i na maa e piti, te färaoa e te ïà, oia hoì te rahu o te fenua, e te rahu o te moana. Ua âmuihia te reira e Ietu, i mua i te aro o te Atua, ia faarahihia mai, ia òre hoê ia ère i teie na maitaì. Te faarahiraa i ravehia e te Atua, no te faaâpï ia i te parau no to na aroha, e to na here i te mau taata atoà, tei poia, e te poiha i ta na maa. Mea na roto i teie òhipa i ravehia e Ietu, te ìteraahia e,  eita te maitaì o te Atua e pau i te taata. Ia haapaò ra te taata e ia àtuàtu i te faufaa o te rahu, mai reira mai teie mau maitaì. Te horoà mai nei ia teie mau parau ia tätou i te faaitoitoraa, no te ìteraa i te tiàraa Metua o te Atua, tei òre e hinaaro i ta na mau tamarii, ia pohe i te poia. Teie maitaì e faanaòhia nei e teie rahiraa taata, e haapäpüraa ia te reira, te òreraa te Atua e ta ôtià, i ta na mau òpuaraa no te ora o te mau taata atoà.

No te aha i tupu ai teie òhipa faahiahia, no te mea ia ua fäì o Ietu, i te faufaa no te parau o te fenua, mai reira te noaaraa mai te färaoa, te pape, mai reira te noaaraa mai tei ïà. Tei teie na vahi to te Atua haaputuraa i to na mau maitaì, ôtià òre, e i roto i te reva.

No reira e hoa here mä e,     

Ia fäì tätou e, o te Atua te fatu o te fenua, te pape, te taï, te reva, te haapäpü ra ia tätou e o te Atua te haamatara e te faahopeàraa o te fenua, e tei ia na anaè te parau e tupu mau ai te maitaì te ora i te fenua nei, te pape, te taï, e te reva. Oia mau, e parau päpü teie, no te Atua i faufaahia ai te taata. E ôpuaraa no to na hinaaro i ìtehia ai e i vai mai ai te fenua, o ta na i faatupu nä roto i ta na parau mana. No reira, te ìte ra tätou e, aita to te fenua e parau i rapae aè i te Atua. Ahiri aita te Atua i ôpua, àhiri aita o ia i hinaaro, e àhiri aita o ia i parau, aita atoà ia to te fenua e parau. E täamuraa päpü to te fenua i te Atua. Ia faahitihia te parau o te fenua, e faahoì ihoä te reira ia tätou i nià i te parau o te Atua.

Mai te peu, o te Atua te Fatu o te Maitaì, to na hinaaro tumu maoti, ia vai noa to na Hau i nià i te reira, o ia hoì ta na anaè ia te faatereraa e mana ra i nià iho. O teie ia e ìtehia ra i roto i ta tätou parau no teie mahana, àmu anaè iho ra rätou, e paia aè ra, òhihia iho ra te toeà maa, e î aè ra na ète rarahi hoê àhuru mä piti. O ia atoà ia te faaìteraa a te Taramo 110, 3 i te mahana e faaìtehia to mana to tura moà, to huaai, mai te hau o te ôpü o te poìpoì.

No te mea, eita e pau te maitaì o te Atua i te taata.

Teraì òr. Faatura.