Mātaio 24.37-44 E teie nei,

Tāpati 1 no Titema  2019.

TIAÌRAA HOÊ

ÔROÀ

E teie nei,

Taramo 122

1 Tire a te Moruta, a Tävita. Òaòa aè ra vau e te feiä atoà i parau mai ia ù e Tätou i nià i te fare o te Fatu 2 Te tià nei to mätou âvae i teie nei i roto i to mau ùputa, e Ierutarëma e. 3 I patuhia Ierutarëma mai te ôire täàtiàti-hua-hia te mau fare ra. 4 I reira te mau ôpü ia paiùma ra, te mau ôpü a te Fatu, ei faaìteraa ia no Ìteraèra, e haamaitaì i te iòa o te Fatu. 5 I reira te mau teröno haavä ra i te haamau-raa-hia, te mau teröno o te ùtuafare o Tävita. 6 E pure ia Ierutarëma ia hau E maitaì to te feiä i hinaaro ia òe ra 7 Ei hau to roto i to òe ra mau patu, e ei maitaì to roto i to òe ra mau fare arii ra 8 No to ù ra mau taeaè e te mau hoa i parau ai au i teie nei Ei hau to roto ia òe ra 9 No te fare o to tätou Atua ra o te Fatu e tämau ai au i te ìmi i te maitaì no òe ra.

Ìtaia 2.1-5

1 Te parau i faaìtehia mai ia Ìtaia a Âmota ra, ia Iüta e ia Ierutarëma E taìruru te mau êtene atoà i Ierutarëma

2 E riro ia tae i te mau mahana hopeà ra, e faatiàhia e te mouà ra o te fare o te Fatu i nià i te tupuaì mouà, e faateiteihia ia i nià aè i te mau âivi; e taìruru atoà mai te mau êtene atoà ra i reira. 3 E rave rahi te taata e haere mä te parau e, E haere mai, e haere tätou i nià i te mouà o te Fatu, i te fare o te Atua o Iatöpa; e na na e haapii mai i ta na haapaòraa, e haere tätou nä te èà tä na e faaìte mai ra. I nä Tiona atu hoì te ture i te revaraa atu, e te parau a te Fatu, i nä Ierutarëma atu ia. 4 Na na e haavä i roto i te mau êtene, e e faataa i te parau i te taata atoà e rave rahi; e tiàpaì rätou i ta rätou òè ei âuri ârote, e ta rätou mau mähae ei tipi tope räau; e òre te hoê fenua e àa mai i te tahi fenua i te òè, e òre hoì rätou e haapii faahou i te tamaì. 5 E te ùtuafare o Iatopa nei, e haere mai òutou, e na te parau märamarama a te Fatu tätou i te haere.

Rōma 13.11-14

Ia ineine no te haereà mai o te Metia, 11 E nä reira hoì tätou, no te mea ua ìte tätou e ua tae roa i te hora äraraa to tätou taòto ua fätata hoì to tätou ora i teie nei, i to tätou faarooraa ra. 12 Ua poto roa te ruì, ua fätata roa te ao e teie nei, e haapae atu tätou i te mau òhipa o te pöuri, e àhu tätou i te àhu o te ao. 13 Ei haere nehenehe to tätou mai te haere ao ra, eiaha mä te hori ra e te faataèro ra, eiaha te parau faufau e te taiàta ra, eiaha te märô e te feìi ra. 14 E tuu rä òutou i ta te Fatu ra ta Ietu Metia i nià iho ia òutou, e eiaha e faaitoito i ta te tino, ia tupu to te tino hinaaro.

Mātaio 24.37-44

37 Mai tei te ànotau ra ia Noa ra, oia atoà te haereà mai o te Tamaiti a te taata nei. 38 Mai tei te ànotau i mua iho i te tiruvi ra, te àmu ra rätou i te mäa e te inu ra, te faaipoipo ra e te höroà ra ia faaïpoïpohia, e tae roa aè ra i te mahana i tomo ai Noa i roto i te poti 39 aore roa i ìte, e roohia noa iho ra rätou e te tiruvi, pau roa atu ra rätou; oia atoà te haereà mai o te Tamaiti a te taata nei. 40 Toopiti puè taata i roto i te âua ra e riro te tahi, e ora atu te tahi. 41 Toopiti puè vahine i te täviriraa i te mure; e riro te tahi, e ora atu te tahi. 42 E teie nei, e ara, aore hoì òutou i ìte i te hora e tae mai ai to òutou Fatu. 43 Ua ìte rä òutou e, àhiri te taata fare i ìte i te hora e tae mai ai te èiä, e riro o ia i te ara, e òre e vaiiho noa i to na fare ia vävähi-noa-hia na. 44 E teie nei, ia pärahi ineine noa òutou; ei te hora manaò-òre-hia e òutou na e tae mai ai te Tamaiti a te taata nei.

Manaò.

E faaineine, e faaineine, te tomo nei te Ètärëtia Porotetani Mäòhi i roto i te mau faanahoraa ia puai te faaìteraa i te parau no te märamarama.

Tei roto te Atua Nui Tumu Tahi i ta na rahu, oia hoì, te Atua e ta na rahu, hoê ä ia, e no te mea te mau atoà ra te rahu i te märamarama o te parau a te Atua, e òhie ai o ia i te tauturu i te taata i te ìteraa i te Atua. I mua i teie fäìraa, mea maitaì tätou e uiui rii i te auraa e horoàhia ra i teie mahana no te tiaìraa mätamua, e haamanaò nei i te fänauraa mai te Parau Maitaì a te Atua, oia te parau e faaìte ra i te Atua, mai te mea e, te mahana atoà ia te Mäòhi i ìte ai i te Atua. Mai te peu na te fenua e to na î i faaìte ra ia tätou i te Atua, Ua tae ia i te tau, e tià i nià, e hoì i te fare metua. Aita änei hoì te mau faanahoraa e haamataùtaù noa nei i te Mäòhi, aita änei e täpeàpeà noa nei ia na ia òre ia tià, ia òre ia parau i to na parau, ia òre ia hoì io na iho, i roto i ta na iho. Te vähi faufaa ta tätou e täpeà mai te parau ia o te märamarama e te pöuri, aore ra te ìte e te matapö, teie manaò e, e vai noa te parau i to na vairaa, te taata të faatano atu ia na i nià i te parau, ia au i te hiòraa no te mahana e te âvaè. I mua i teie hohoà, e tano tätou e parau e, aita e fifi to te hape, to te taata ätearaa, to na òreraa e tanohia i nià i te märamarama, aore ra to na òreraa e färii i taua märamarama ra, hau roa atu, e tano tätou e parau e, te tahi te reira tauturu no te taata, aore ra e noaa i te taata te maitaì no roto i taua hape no na ra, nä roto ihoä rä i te haamanaòraa ia na e, ua ätea o ia i te tano. Te türama nei te haapotoraa o na taiòraa e mäha i teie mau manaò ia au i teie mau parauraa e.

-Taramo 122, 1 Òaòa aè ra vau e te feiä atoà i parau mai ia ù tätou i nià i te fare o te Fatu.

-Ìtaia 2, 5 E te mau ùtuafare e haere mai, na te parau märamarama a te Fatu i te haere.

-Roma 13, 12 Ua poto te ruì, ua fätata te ao, e haapae te pöuri, e àhu i te àhu o te ao.

-Mataio 24, 42 E teie nei, e ara, aore hoì òutou i ìte i te hora e tae mai ai to òutou Fatu.

To te paroita nei teie ta tätou parau no teie mahana paieti, e i teie atoà täpati e ômua ai te mätahiti Ètärëtia, teie ia te täpati mätamua no te tau tiaìraa tei haamanaò mai ia tätou te arii no te mau arii. Oia hoì te faaora nui o te ao nei. Na teie tau ìrava e faaö ia tätou e to te Ètärëtia i roto i te haamanaòraa i te horoà a te Atua, i te feiä atoà e tiaì nei i te ora horoà noa. Ua faaroo aè nei tätou i teie mau parau, te fatata nei te hope teie mätahiti, te piri mai ra ia te hora ôroà fänau no te faaìte i te taime e tupu ai. Ta tätou ra parau no teie hora paieti Mataio pene 24 i te mau ìrava  37 e tae i te 44, te faaära nei ia te hoìraa mai te Metia, ia au i ta te Parau Mataì faaìteraa, e taime ìteä-òre-hia e te taata, e tae noa atu i te mau merahi o te raì, mau ti ra o te Atua anaè ra tei ìte i taua hora ra. Hora hunahia i te taata, ia pärahi ineine noa ra te taata no taua taime ra. I te mea, ia hoì mai o Ietu, e roohia mai e ana te taata te ora ra mai te ànotau o Noa hou te tiruvi, oia hoì te àmu ra te inu ra, te faaipoipo ra e te horoà ia faaipoipo, te ora i te oraraa matauhia i te mau mahana atoà. No reira ia tae mai te Tamaiti a te taata e ìte o ia i te mau mea atoà i tupu  i te ànotau o Noa ra, e ìte o ia i taua mahana ra, i te mau taata haapaò maitaì e tei ara i te hora manaò-òre-hia. E ìte atoà o ia i te mau taata tei òre i haapaò, tei òre i taua i to na taeraa mai. Tei raro noa to rätou aro e te haapaò noa ra i ta rätou i hinaaro i reira. Aita e tiàturiraa faahou i te hora o te Atua. O ta te ìrava 40 e te 41 ia e faaìte ra, te tävini haapaò maitaì te ora ia, àreà te òre i haapaò e rirohia atu ia. I tià ai, ia Ietu i te faatià  i ta na mau pipi i te parau  no te taata fare e te èia. Te haapäpü nei o Ietu eita te èia e faaära mai i te hora, hoê ra te ära, oia hoì te taata ùtuafare. Hoê tei haapäpühia e ara maori ra o te taata fare, oia atoà ia te taata teretetiano i teie mahana i te tiaìraa i te Fatu e tae mai ra. Ua riro te reira mahana èi haamanaò-noa-raa i to na tae mätamuaraa mai i te ao nei na roto ia i i te Püfenua. E mea maitaì ra te taata i roto i te maru metia, ia vai ära i taua hora. I te mea te riro nei ôroà Fänau o Ietu èi tautururaa ia tätou i roto i te tiaìraa i te hora hoìraa mai te Metia i te ao nei. E teie nei, e ara aore hoì òutou i ìte i te hora e tae mai ai to òutou Fatu, e teie nei, ia pärahi ineine noa òutou. Hohoà rii teie parau i te òhipa a te feiä horo pahï, e faaära-iho-a te raatira i te mau ìhitai, e ara maitaì i te hora täpeàraa hoë, eiaha ia taui, ua ìte ia te mau ìhitai ia tae i ta rätou hora ia vai ineine ia rätou, ia òre ia òhu noa te pahï, i te vahi hoê, e moèhia atu ra e aha te àveià e rave. Hoê-a-atoà ia te taata paieti, i te vai äraraa i te hora o te Atua, aita to na e numera faaìteraa, i te mavaèvaèraa nei o te mahana, i te avatea anei, i te taharaa mahana anei, i te tuìraa pö anei, aita e hora te hora a te Atua e faaìte päpü nei. teie ta Pauro parauraa, Roma 13, 12 Ua poto te ruì, ua fätata te ao, e haapae te pöuri, e àhu i te àhu o te ao. Ta Ietu ra e faaìte nei ia tätou, e tiaì, e ara i te mau taime atoà, i te hora manaò-òre-hia. E tiaì, e ara, i te hora a te Atua, mai te ìhitai e ara nei i nià i te hora no te täpeàraa i te hoë, e te hiòraa i te àveià. Oia atoà ia tätou i te ara ei àvariraa na tätou teie mätahiti ètärëtia e ìriti nei i muri ia tätou. O tätou ia òhipa e to te ètärëtia i te äraraa i te hora no te täpeàraa i te hoë no te pahï o te Atua ia òre ia iri i nià i te àoa. Ia ìte-ä-hia ra te mori türama o te ava, èi märamarama, èi ora no te mau taata atoà e tiaì nei i te hora a te Atua.

            Ìrava òpani, Ìtaia 2, 5 e te ùtuafare o Iatopa nei, e haere mai òutou, e na te parau märamarama a Atua nui Tumu Tahi tätou i te haere.

Teraì òr. Faatura.

PURE NO TE HÖÊRAA O TE NÜNAA MÄÒHI E TE MAU NÜNAA ATOÀ O TE AO NEI

PURE NO TE HÖÊRAA

O TE NÜNAA MÄÒHI

E TE MAU NÜNAA ATOÀ

O TE AO NEI

( Mai te 5 e tae atu i te 12 no Tënuare 2020 )

Te tumu parau :

Te höêraa te Atua, te Rahu, e te Taata

1-E Rumauarii e, ia ara òe i te poìpoì, e haere òe i räpae, e hiò òe i ta ù rima, e rau ùru ia, e hiò òe i te tumu e te maaraa e rua o te räau, o to ù ia tino e to ù nä âvae, e hiò òe i te mäa menemene i nià iho e ùru, o to ù ia upoo. E te hune i roto i taua mäa ra o to ù ia arero.

(Teuira Henry, Tahiti i te pö, àpi 438.)

2-E te àmu ra rätou, ua rave iho ra Ietu i te faraoa, e oti aè ra i te haamaitaì i te Tumu Nui, vävähi iho ra, tuu atu ra i te mau pipi ra, nä ô atu ra : A rave, a àmu o ta ù tino tenä. (Mätaio 26, 26)

Te ômuaraa

Te nä ô ra o Vaitä : ‘ E tino ê to rätou, e tino ê to tätou, höê anaè rä no te Tumu mai ’. Ia hiò-anaè-hia, eere te höêraa i te tahi parau âpï no te Mäòhi. Ua ìte ê na te mau Tupuna e, eere o rätou anaè to roto i teie ao, te vai atoà ra rä, te tahi atu mau nünaa ê atu ia tätou. E i roto i terä mau taa-ê-raa, i te pae o te faanahoraa i te oraraa, te reo, te iho, te hïroà, e te vai atu ra, höê anaè rä tätou, e mau tamarii na te Tumu. E mau tamarii ôpü höê, e mau taeaè, e, e mau tuahine anaè tätou. Te auraa, höê taura e täamu ra ia tätou e o rätou, te here ia e te aroha. Te nä ô ra Ietu, te Tamaiti a te taata i te tahi mahana : ‘Te mea teie e ìte ai te taata atoà e, e pipi òutou na ù, ia aroha òutou ia òutou iho (Ioane 13, 35). E haamata teie höêraa na Mäòhi Nui nei, ia färii, e ia hoì faahou te nünaa i roto i te ôpuaraa a te Atua Tumu Tahi.

Te tumu parau i täpeàhia mai no teie hepetoma teie ia :

‘ Te höêraa te taata e te rahu,

papahia i nià i terä nä parau e piti :

1-E Rumauarii e, ia ara òe i te poìpoì, e haere òe i räpae, e hiò òe i ta ù rima, e rau ùru ia, e hiò òe i te tumu e te maaraa e rua o te räau, o to ù ia tino e to ù nä âvae, e hiò òe i te mäa menemene i nià iho e ùru, o to ù ia upoo. E te hune i roto i taua mäa ra, o to ù ia arero.

(Teuira Henry, Tahiti i te pö, àpi 438.)

2-E te àmu ra rätou, ua rave iho ra Ietu i te faraoa, e oti aè ra i te haamaitaì i te Tumu Nui, vävähi iho ra, tuu atu ra i te mau pipi ra, nä ô atu ra. A rave, a àmu o ta ù tino tenä. (Mätaio 26, 26)

         Te ahuraa o te reva, te viiviiraa te tai e te fenua, te taèro Âtömï tei haamanaò mai e, ua rahi roa te ìno ta te taata e faatupu nei. Eere teie i te àroraa i te ìno, e àroraa rä i te maitaì ia haere faahou i te rahi. Faahoì faahou mai i te ora, ia ûàna te tupuraa o te maitaì, na te reira e haaiti i te ìno. A rave anaè i te mea tià, ia api o Mäòhi Nui i te ora, e ia riro te maitaì ei âruerueraa na tätou nä mua roa haere atu ai i te ao täâtoà.

         Te tïaì mai ra te rahu e te Rahu Nui ia òe e te Mäòhi, o òe te tahi topata o te mau nünaa atoà o te ao nei, te tahi mau topata e vaipuè faahou ai te maitaì, ia pärahi noa ä te mau Tamarii a te Tumu i roto i te uru maitaì. Haamanaò i te ùpu a te mau Tupuna, te nä ô ra:

Ia Atua te Atua,

Ia Fenua te Fenua,

Ia Taata te Taata,

Ua maitaì roa.

TE PAPA HAAMORI 2020

TE PAPA HAAMORI 2020

Faaineineraa

Rautï : E ta ù nünaa iti e, te mau tamarii a te Tumu, ia mä, tamä. E tere haamori to tätou i tae mai ai i teie tahua, a faahau ia òe iho, ia mäteatea to âau no te Atua Nui Tumu Tahi. Haamanaò e, e mata to òe, a hiò mai, e tarià to òe, a faaroo noa mai. Mäuruuru.

Taùraa

Rautï : E taù tatou i te Atua, E tià päatoà tätou :

(tïaì maa taime iti)

E te Atua Nui Tumu Tahi e, to mätou Metua i te raì tuatinitini, mai ia òe i faahinaaro ia mätou, te faahinaaro atoà atu nei mätou ia òe, ma to mätou värua atoà, to mätou âau, e to mätou manaò atoà e hope roa. A haere mai rä, a tomo mai òe, pärahi mai i roto i te haamoriraa nei. Mai te mau rau o te räau e tupu ruperupe noa ra, te nehenehe e te noànoà o te mau ûaa tiare i nià i te tumu, ia nä reira atoà ta mätou haamaitaìraa, e ârueraa, e e faateniteniraa i to iòa moà. E pii âmui ai to mätou reo i te nä ôraa e :

A : No òe anaè te hau, te mana, e te hanahana e a muri noa atu.

(Vaiho i te höê maa taime iti nä roto i te mämü)

Hïmene

Te Atua e te taata

Rautï : E te Atua Metua e, o mätou e o Òe höê ä ia, i parauhia ai to te Mäòhi. E ohi nö roto mai i te Tumu o te mä. E huru e e hohoà no te Tumu Nui. Haapaari mai òe i terä taura o te höêraa, ia òre ia ariari i roto i te fifi e te faahemaraa. Te reo Mäòhi ta òe i hö mai no mätou, te täviri ia e matara ai to mätou parau, e te êà e tae ai mätou i te ìteraa i to òe hinaaro ia mätou nei. Ia türama noa te aroha e te here i to mätou tuuraa âvae, e ia haere mätou nä nià i te êà o te parau mau e te parau tià, ia hanahana to òe iòa moà, e a tau a hiti noa atu.

Âmui : E te Tumu Nui e, o òe te Atua, e o mätou te nünaa ta òe i mäìti. Ia riro e, o òe i mua, o mätou i muri. Tuu mai i to Värua i nià ia mätou, ia noaa faahou ia mätou te òaòa, te püai, e te itoito i te faatupuraa i to òe Atuaraa i Mäòhi Nui nei. Ia Atua te Atua, ua maitaì roa ia.

Hïmene :

Te Atua e te Rahu

Rautï : E te Atua Nui Tumu Tahi e, mai ia òe i faaìte i te aroha  e te here ia mätou nei, òia atoà te fäìraa a te rahu i te taata nei. Tià maitaì te rahu ia òe, e òre ai e hape ta te Mäòhi parauraa ia òe e, te Atua Rahu Nui. Ârue, haamaitaì mätou ia òe i te mea e, e tiàturiraa päpü ta to mätou mau Tupuna ia òe, i tae roa ai rätou i te parauraa e, te fenua e to na mau î atoà, te Atua iho terä. Terä te papa o te Faaroo Mäòhi mau, te Tai, te Fenua, te Raì, e te mau mea atoà i roto, to na ia ora.   

Âmui : E te Rahu Nui e, ia uruhia te âau o te nünaa o Mäòhi Nui i te tätarahapa, ia hoì faahou mätou e taiò i terä mau haapiiraa e mauhia e te puta ora, te rahu e to na mau î atoà. (Ia Rahu te Rahu, ua maitaì roa ia). 

Hïmene

Te Rahu e te taata

Rautï : I parau òe e te Atua Metua, e ua riro mai ta òe parau mana ei Rahu, o mätou ia i fäì ai e, o Òe e te Rahu, höê ä ia. I parau atoà hoì òe e te Atua Metua, e ua riro mai ta òe parau mana ei taata, o mätou ia i fäì ai e, o Òe e te taata, höê ä ia. To mätou Mäòhiraa, te heiarii ia ta òe i faahei ia mätou, o mätou ia i fäì ai e, o Òe te Tumu, e o mätou te Ohi Mä.

Âmui : E te Atua Nui Tumu Tahi e, to mätou Mäòhiraa, te àhu moà ia ta òe i faaàhu ia mätou, auhia e to òe here metua, faaùnaùnahia i te reo mäòhi, tuituihia i te taura no te iho e te hïroà mäòhi, faaàmuhia i te mau mäa mäòhi rau o te fenua, faararirarihia i te vai haari o te aroha. Ia Mäòhi te Mäòhi, ua maitaì roa ia.

Himene : 

Te parau e te Faaroo

Rautï : E te Atua Nui Tumu Tahi e, a parau mai, te faaroo atu nei to òe nünaa. Ia î to mätou âau i te faatura, te auraro, e te haapaò i ta òe parau e te Atua metua e, a tahitià mai, a tahitià mai.

Pehepehe

Himene :

Taiòraa parau :

Hïmene :

Faaitoitoraa :

Hïmene :

Pure manaò :

Hïmene ôroà :

Ôroà a te Fatu :

Hïmene hopeà :

Faafäiteraa :

Rautï : E to mätou Metua i te raì tuatinitini e, Ènä atu te hei o te here e te aroha, Ènä atu te hinuhinu e te tura o te Mäòhi, Ènä atoà atu te tiàmäraa o te Mäòhi. Mäuururu i to òe âmuiraa mai i te haamoriraa nei, Ia òe i tura ai e i hanahana ai ta mätou nei haamoriraa. Mäuruuru atoà i to òe mau tävini i âpee mai ia òe, to mätou mau Tupuna i te Faaroo, tei âmui mai i roto i teie nei ôroà. Mai ia mätou i ani ia âmui mai òe ia mätou, te faahoì nei mätou ia òe i roto i to òe Hau. Ia maitaì roa to òe hoìraa e te Atua Metua e, ei ia òe te Hau e te Mana, e te Hanahana i te fenua nei mai tei te raì atoà na, ei hau i roto ia mätou te taata nei.

Âmui : No òe te hau, no òe te mana, no òe atoà te hanahana, e a tau a hiti noa atu.

Faaitoitoraa

Rautï : E te mau tamarii a te Tumu e, e haere òutou i teie nei, a haere e a ìte e, te Höêraa, eere ia i te haapaò-noa-raa ia òe iho. Te färiiraa rä e, o òe te tahi, o na te tahi, e o mea te tahi pehaa, e tupu ai te mä, te hau, e te reàreà i roto ia Mäòhi Nui. Haamanaò e, tei nià ia òe te tiàturiraa o te Atua Nui Tumu Tahi nö reira òe i Ohi Mä ai.

Âmui : Ia Atua te Atua, ia fenua te fenua, ia taata te taata, ua maitaì roa. Parau mau e e parau mau.

TE ÔROÀ A TE FATU

TE ÔROÀ A TE FATU

Hou tätou a haamanaò ai i te òhipa i ravehia e to tätou Fatu e Ietu Metia, i te mahana ò ia i faaâpï ai i te Faaauraa mätämua i ravehia e te Atua i roto ia na e te taata, haamanaò tätou e, te ôroà, to te taata ia haamaitaìraa, to na hoì faahanahanaraa i te Atua no to na mau maitaì atoà ta te fenua e faaìte noa nei i te taata.

E te Tumu Nui e, e to mätou Atua, e to mätou uruaìraa, e to mätou tiàturiraa, to mätou Fatu. Haamaitaì mätou ia òe no te Faufaa ora ta òe i hö mai na mätou, no te mau maitaì atoà e faaî nei i to mätou fenua, e te moana e haaàti nei ia mätou. Hö mai ia mätou i te haèhaa o te âau e te päpü o te tiàturiraa, ia ìte mätou e, àita e hereraa ia òe tei òre i riro atoà ei färiiraa i te täpaò no to òe here ta te fenua e faaìte noa nei ia mätou, àita e mahana tuua. Ia faateiteihia to òe iòa moà no teie taime e haamanaò faahou ai mätou i te täpaò no to òe here mutu òre ia mätou, to òe nünaa.

I te matahurahura o teie nei ao, ua tanu òe i te mau räau maitataì atoà ia hiò e tei au ei mäa. Ia àmu mätou i te räau ta òe i hömai ei ora no mätou, e ìte ia mätou i te maitaì e te hau. Ia òre rä mätou e färii i te reira, o te peàpeà ia, te hepohepo, e te ìno ta mätou tuhaa. Höroà mai ia mätou i te haèhaa o te âau, ia färii mätou i te ora ta te fenua e faaìte noa nei, ia pärahi mätou e ta mätou huaai i roto i te hau, ta òe i hinaaro ei faufaa mutu òre na mätou. E te Tumu Nui e, faatupu òe i te reira parau i teie mahana.

I mua i te mau maitaì atoà i faatupuhia e te mana o ta òe parau. Teie to òe reo i te taata : A hiò i tei au ei mäa, a rave a àmu. E to mätou Atua, to mätou Fatu e te Tumu Nui e, teie te mau maitaì o te fenua ta mätou i rave mai, ei haamanaòraa i te faaauraa mana ta òe i rave i roto ia mätou to òe nünaa e o òe e to mätou Atua.

Teie te ùru (te taro, te uto …) ta te fenua i faatupu mai.

Teie te vai haari (vai o te reva …) ta te fenua i höroà mai.

Ia haamaitaìhia òe no ta òe faaauraa ora. Haamoà òe i te faaauraa ta òe i rave i roto ia mätou to òe nünaa e o òe to mätou Atua.

Haamanaò tätou i teie nei, i te òhipa i ravehia e to tätou Fatu e Ietu Metia i to na faaâpïraa i te faaauraa i ravehia e te Atua Metua :

E te tämäa ra rätou, ua rave iho ra Ietu i te faraoa, e ia oti aè ra te haamaitaì i te Atua, vävähi iho ra, tuu atu ra ia rätou ra, nä ô atu ra : A rave a àmu, o ta ù tino tenä. Ua rave iho ra ò ia i te âuà, e ia oti te haamaitaìraa i te Atua, tuu atu ra ia rätou ra, e ua inu iho ra rätou atoà. Ua nä ô atu ra ò ia ia rätou : O ta ù toto tenä no te faaauraa âpï i haamaniihia no te taata e rave rahi. E parau atu vau ia òutou : Teie au a òre a inu faahou i to roto i te vine, e tae noa atu i te mahana e inu ai au i te mea hou i te Hau o te Atua ra.

E te Tumu Nui e, a ìriti i te ùputa o to mätou âau, ia ìte mätou e ia färii e, eere te tino taata, eere hoì te toto taata ta òe e ani nei ia mätou ia àmu e ia inu. No te mea rä, ua riro mai ta òe parau ei taata, i rave ai to mätou Fatu o Ietu Metia i te hotu o te fenua ta òe i rave i roto i ta òe Faaauraa ora. Mai ia òe i parau i te taata e : A hiò i te au ei mäa, a rave a àmu, te faaâpi nei ò ia i te reira i te parauraa mai e : A rave a àmu, o ta ù tino tenä ; a rave a inu o ta ù toto tenä.

Tuu i te marü i to mätou âau, ia òre mätou ia onoono i te manaòraa e, te Faaauraa i faaâpïhia e to mätou Fatu, e parau ia no te faraoa e te  uaina. Te mea ta òe i hinaaro ia àmu mätou e ia inu hoì, te mea ta te Fatu i haere mai e haamanaò, ia rave mätou, ia àmu e ia inu i te täpaò no to òe aroha e to òe here, ta te fenua e faaìte noa nei, ia hiò mätou i tei au ei mäa, ia rave hoì e ia àmu.

Ia haamaitaìhia òe e te Tumu Nui, no ta òe parau tei ìriti ia mätou i te ùputa o te märamarama i ìte ai mätou e, ua î to mätou fenua i te täpaò no to òe aroha e to òe here. Te ani noa nei òe ia mätou ia hiò i tei au ei mäa, ia rave e ia àmu mai te täuruuru òre te manaò.

E te nünaa o te Atua e, òutou atoà i âmui mai i teie mahana i roto i te fare o to tätou Atua, òutou atoà i tiàturi e, na te faaroo i te Tumu Nui e faaora ia tätou, òutou atoà i tiàturi i ta na Tamaiti ei faaora no tätou, e haere päâtoà tätou i mua i te Atua, e färii i te täpaò no to na aroha e to na here ia tätou te taata nei.

Haere anaè mai, ua ineine te mau mea atoà.

Ârue tätou i to tätou Atua i te reo hïmene âmui.

IA OTI TE ÔROÀ :

E pure tätou i te Atua (te Pure a te Fatu).

Mahana mätämua Täpati 05 no Tënuare 2020

Mahana mätämua

Täpati 05 no Tënuare 2020

Te tumu parau : Te Rahu Nui e te Höêraa

Te pehepehe : TE ÀIHERE

Àihere, te huruhuru o te Atua Taaroa.

Àihere, te àhu o te fenua.

Tei roto ia òe te ora o te Mäòhi.

O òe tei hii i te Mäòhi,

Na òe i haapii ia na e,

Àita e hoo to te ora,

No te mea àita e hoo to te àihere,

Àita e hoo to te here i te taata

Èiaha e hoo i te ora höroà noa a Taaroa.

Te taiòraa : Tenete 1 ; Ioane 17, 20-26

Te manaò tauturu

Ia haamaitaihia te Atua Tumu Tahi, Puna no te ora mau, haapüraa no te Here e no te Aroha Metua, Metua faatupu ora no te mau nünaa atoà tei ìriti ia tätou te ùputa no teie nei hepetoma no te höêraa no te nünaa faaroo.

Te haamanaò noa mai ra te puta Tenete i te parau no to te Atua rahuraa i teie nei ao, rahuhia i roto i te Here e te Aroha Metua, rahuhia i roto i te manaò höê e te faatura, rahuhia i roto i te faaroo ora e te faaroo parau tià, rahuhia i roto i te manaò hau e te manaò haèhaa, rahuhia i roto i te mana o te parau e i roto i te arataìraa a te Rahu Nui.

E haapiiraa rahi ta te Atua e türama mai ra ia tätou te mau tävini no teie nei mahana, òia hoì, to te Atua höêraa i te mau rahu atoà i roto i ta na faanahoraa e ta na rëni arataìraa. Te Atua te Niu e te Papa o taua höêraa, te Atua te haamataraa e te faahoperaa i te parau no te höêraa. To te raì, to te fenua e to te tai e te mau î atoà, to rätou faatura i te Atua, to rätou haèhaa, to rätou faaroo, to rätou hau no te mea, te Atua to rätou päruru. Ua î rätou te ìte e te paari no ô mai i te Atua ra. E te reira te mänaònaòraa rahi na Ietu i roto i ta na pure, e ta Ioane e faahiti ra. Te mänaònaòraa i te nünaa faaroo e te mau tävini atoà tei fäì i to rätou faaroo, mai ta te Fatu e faahiti ra : « Ia höê rätou mai ia täua, ia höê rätou i roto ia täua, ia riro rätou ei höê. »

Te höêraa no te Atua e to na mau tävini, te höêraa no te Metua e ta na mau tamarii, te höêraa no te ùtuäfare, te höêraa no te tïaì e ta na ra mau mämoe, te höêraa no te parau tià e te parau mau, te höêraa no te faatura e te haèhaa, te höêraa no te hau e te faaòromai rahi. O te reira te poroìraa rahi no tätou i roto i te roaraa no teie nei hepetoma. Ua rave te Metua, te Tamaiti e te Värua i ta rätou tuhaa. Ua rave atoà te rahu i ta na tuhaa. Te toe ra ta òe tärëni e te taata nei, a faaitoito i te faaìte e te haapäpü i te reira. Ua ìriti te Atua ia òe i te ùputa âpï no teie nei matahiti âpï 2020 e teie nei hepetoma faufaa mau.

Ia vai te hau e te haamaitaìraa a te Atua i nià i to òe ra ùtuäfare, Ia ora na.

Pure

E to mätou Atua Manahope, te Metua faatupu ora, tei î i te Here e te Aroha, te haamaitaì nei e te faateniteni nei mätou ia òe, o òe i ìriti faahou ia mätou i te ùputa no teie nei matahiti âpï 2020, o òe e âpiti atoà ia mätou i roto i teie nei hepetoma no te höêraa no te nünaa faaroo. Te haamaitaì faahou nei mätou ia òe, no te mau räveà maitataì atoà ta òe e türama faahou nei ia mätou, te nünaa faaroo no teie nei mahana, no te ìte-faahou-raa i te faufaa no te höêraa i rotopü i te Atua, te taata e te rahu. Te haamaitaì faahou nei mätou ia òe, o òe e türama faahou nei ia mätou i te faufaa no te haèhaa, te faatura, te parau tià, te tätarahapa, te hau e te höêraa i roto i te faaroo mau. A aroha mai ia mätou te taata hara nei.

Te faahaèhaa nei mätou päâtoà i mua i to òe Here e to òe Aroha Metua, tei arataì tämau ia mätou i roto i to mätou oraraa, noa atu to mätou huru faateitei, te vahavaha e te täiva rahi ia òe. Te faahaèhaa nei mätou i mua i to òe Haèhaa Metua, ta òe e türama nei ia mätou nä roto i ta òe Parau Maitaì : te faufaa no te höêraa. Te faahaèhaa faahou nei mätou i mua i to òe tiàraa Metua faatupu ora e te haèhaa, tei òre i morohi i roto i te tau, e ta òe e faaitoito nei, e ta òe e poroì ra ia mätou, te mau tävini no teie nei mahana. A aroha mai ia mätou te taata hara nei.

Te ani haèhaa nei mätou päâtoà ia òe, a höroà mai ia mätou te ìte, te paari, te faatura, te faaroo haèhaa e te faaòromai rahi no ô mai ia òe na, no te ora-hau-raa, e no te ora-òaòa-raa i roto i teie nei hepetoma no te höêraa. A haapii faahou ia mätou i te haèhaa e te höêraa, arataìhia e ta òe parau maitaì. A haapii faahou ia mätou i te faaturaraa i te Tiàmäraa e te höêraa o terä nünaa e terä nünaa. A haapii faahou ia mätou i te haapae i to mätou mau manaò taata : te teitei, te faatura òre, te haavare. A haapii faahou ia mätou i te faatupuraa i te hau, te höêraa, te parau tià, te tätarahapa e te faaòromai rahi.

Te Atua Metua e, a Aroha mai ia mätou te taata hara nei, Amene.

Piti o te mahana Monirë 06 no Tënuare 2020

Piti o te mahana

Monirë 06 no Tënuare 2020

Te tumu parau : Te Rahu te papa ia o te oraraa

Te pehepehe : TO ÒE FENUA

E ta ù tamahine, e ta ù tamaiti,

A hiò i nià, a hiò i raro,

A hiò i tai, a hiò i uta,

A hiò i te hitiraa o te rä,

A hiò i te toparaa o te rä :

Èrä to òe fenua,

Na to òe tupuna i vai iho mai no òe.

Te taiòraa :

1-Tenete 1, 28-30

2-TE RAHU NUI

Ua taò atu ra Taaroa : « E Tumu Nui e, a nee mai a faatäne, ei täne aè na teie Vahine, na Papa-raha-raha ».

E reo mau to te Tumu Nui i te nä ôraa e : «  E òre au e nee atu, e Tumu vau no te Fenua nei ».

Ua taò atu ra Taaroa : « E te Papa-raha-raha e, a nee mai òe ei Vahine na teie Täne ia Tumu Nui ».

E reo mau to taua Papa ra i te parauraa atu e : «  E òre au e nee atu, e Papa vau no te Fenua nei ». A ueue te huruhuru a Taaroa, òia te tumu räau. Òia te räau torotoro, òia te fëì pü, òia te ruperupe i nià i te Fenua.

Ua Fenua aè ra te Fenua, e ua paari te täpeà o te Fee Nui, O Tumu-Raì-Fenua. Tahi ave i Apatoà, tahi i apatoèrau, tahi i Hitià-o-te-rä, e tahi i tooà-o-te-rä. A täpeà i te Fenua e te Raì Piri i raro nei. Nä Taaroa te mau mea atoà. (Teuira, Henry. Tahiti aux temps anciens, (Musée de l’homme : Paris 2004), 345-346)

Te manaò Tauturu

Te mea ta tätou e parau nei e, te « Rahu, te Papa ia o te Oraraa » te parau ia e tauturu nei ia tätou i te ìteraa i te « Höêraa o te Taata e te Rahu ». No te mea eìta te parau o te taata e tano ia faataa-ê-hia i to te fenua. Te fenua hoì ra, te parau ia a te Rahu Nui i riro mai ei rahu, ei fenua e ei Taata. Te auraa ra, te Rahu, e hinaaro ia no te Atua, o täua atoà ia e te taata, e tupuraa täua no te hinaaro o te Atua. No te mea te Rahu e te Taata, no roto mai ia i te ôpuaraa faaora a te Atua, te here e te aroha ia o te Atua.

Ia tae rä te manaò e te manava o te Fatu i te nä ôraa e : « I parau atu na vau ia òutou i te parau o te Fenua, e aore òutou i faaroo, è aha òutou e faaroo ai ia parau atu vau ia òutou i te parau o te raì », te haapäpü noa mai ra teie reo to te Fatu e, àita ò ia i haere e haapii i te taata i te parau o te raì, te vähi te reira e ìtehia ai te parau o te Atua. Ua haere mai rä ò ia e haapii faahou i te taata, i te parau o te Fenua, te vähi ta te Atua i haapärahi ia na, te vähi ta na e ora ra, no te mea i reira noa e noaa ai ia na i te märamaramaraa i te hinaaro o te Atua e ta na ôpuaraa faaora. No te mea hoì, ua tonohia mai te tahi taata no te raì mai, e haapii i te taata o te fenua nei i to na iho parau. Te auraa, ua ätea te taata i to na parau e te fifi ra te tüàtiraa o te taata e te rahu. Inaha hoì, te Rahu, te taura pito ia e nati nei i te taata e te Atua. Ia rave mai hoì tätou i te hohoà o te höê metua vahine e ta na tama, i roto i to na ôpü, te mea noa e faatüàti nei ia na i ta na tama maoti ra, te taura pito ia. Nä roto ia na te ora ta teie tama e fänaò nei, ia fifi rä te taura pito, fifi atoà te tamarii.

Àita atu e mea e tïtauhia nei i te taata, òia hoì, faahoì faahou i to na manaò i te ômuaraa o to na parau. Ia iho faahou mai ia na te hinaaro e te ôpuraa faaora a te Atua no na. I roto i ta tätou taiòraa Tenete, te haapäpühia ra te tiàraa o te taata i mua i te rahu. Àita rä te Atua i parau e, te taata te Fatu o te reira mau mea. Na òe rä e te taata e àtuàtu, e haamaitaì, e poihere i te reira mau maitaì, no te mea te räveà, ua höroàhia e te Atua i roto i to òe rima.

I teie mahana, àita te taata i faaòhipa i te reira « Mana » no te haamaitaì i te Rahu a te Atua. Ua faaòhipa rä ò ia i te reira « Mana » no te tüìno i te Rahu, no te tüìno i te papa o to na ora, nä roto i ta na mau räveà, to na manaò, ta na peu e ta na mau ôpuaraa ìino. Moè-roa-hia atu i te taata e, o na iho ta na e rave-ìno-nei. Inaha, te taata, o te tahi ia tuhaa ta te Atua i rave, mai roto mai i te Rahu. Òia hoì, mai roto mai i te fenua. Moè-atoà-hia e te taata i te fäito hope o te haèhaa ta te Atua i rave no na. Haamanaò na tätou i to te Atua rahuraa i te taata. Ua tuu te Atua i to na turi i nià i te repo o te fenua, no te hämani te taata. E àita i ravaì i reira, ua haere roa te upoo o te Atua i nià i te repo o te fenua no te tuu i te aho ora i roto ia òe e te taata. Te auraa ra, àita to òe parau e te taata mai te peu àita te Rahu. Òe e te Rahu, höê ä ia. È aha rä te tumu òe i vahavaha ai i te fenua, aore ia, è aha te tumu òe i vahavaha ai ia òe iho, o òe e te fenua höê ä ia.

Nö reira e te nünaa Mäòhi, a ara, àraàra to òe mata, faaara i to òe manava. Te rahu, te papa ia o to òe oraraa ta Taaroa Nui Atua i höroà no òe, e ora no òe. Ia òre te papa ia paari, e fifi te oraraa o te Mäòhi. A tià i teie nei, a tätarahapa i mua i te Tumu Nui, i mua i te Rahu Nui e i mua i te Faaora Nui, no te mea o rätou te papa o to òe oraraa, e na rätou i arataì mai i to òe parau, i parauhia ai òe i teie mahana e, e Mäòhi. Te Mäòhi hoì, e taata mä ia teie i mua i te aro o te Toru-Tahi-Nui. Ia tauturu mai rä te Toru-Tahi-Nui ia Tätou i roto i to tätou oraraa.

Pure

Haamaitaì mätou ia òutou e te Toru-Tahi-Nui, te Tumu Nui, Te Rahu Nui e te Faaora Nui. Ua päpü ia mätou i teie nei e, te Papa o to mätou oraraa, o te Rahu ia. Àita e tano ia mätou ia faataa ê i to mätou parau i to te Rahu, no te mea te àpu te reira e höroà tämau nei ia mätou i te ora. Àita e tano ia mätou ia faataa ê i to mätou parau i to te Rahu, no te mea no òe te hinaaro, eere rä no mätou te taata nei. E mai te peu, ua hahi roa mätou i to òe hinaaro, Aroha mai òe ia mätou. Tano roa atu ai te parau a ta òe Tamaiti i te nä ôraa e : « E ta ù Metua, e faaòre mai òe i ta rätou hara, aore hoì rätou i ìte i ta rätou e rave nei ».

Nö reira, haapii faahou ia mätou i te ìteraa, o mätou, no roto mai ia i te Rahu. O mätou, höê ä ia e te Rahu. O mätou, höê ä ia e te fenua. Tano roa atu ai te reo o to mätou mau Tupuna i te pii-hua-raa ia òutou e : « Ia Atua te Atua, Ia fenua te Fenua, Ia Taata te Taata, Ua Maitaì roa ia ». Tahitià mai ra i ta mätou ùpu, i te iòa o ta òe Tamaiti, i te iòa o to mätou mau tupuna, i pure atu ai mätou ia òe, Tongia.

Toru o te mahana Mahana piti 07 no Tënuare 2020

Toru o te mahana

Mahana piti 07 no Tënuare 2020

Te tumu parau : Te faatereraa i te faufaa ora a te Atua

Te pehepehe : PARAPARAU

È aha te paraparau i teie mahana :

Ia täviri i te manimani, eìta e paìa ;

Ia paè i te taa, e horo te värua i räpae.

È aha te paraparau i teie mahana :

Te tïaì mai ra te repo i to òe rima ;

Te tärava ra te aau, te taata i ta na tautai.

Faaea i te ui e :

È aha te paraparau i teie mahana.

Te taiòraa : Tenete 1, 26-27 ; Taramo 24, 1-2

Te manaò tauturu

Tamata na tätou i te haauiui, e tano änei i te taata e faatere i te tahi faufaa ora, aore ra, te tano ra änei ta te taata faatereraa i te faufaa a te Atua. No te tautururaa i te manaò : Àita e òre, i mua i te reira huru to te taata, no ta na ia huru märamaramaraa i te parau o ta na i haatano e au no na, ma te nänä òre te mäuruuru ra änei te Atua i te reira. E tano änei e parau, ua moèhia i te taata i to na tiàraa tamarii e to na tiàraa tauaro i te Atua, ia tupu te ôpuaraa faaora, ma te rave i te rahu ei hiòraa, no te mea ò ia te tauaro mätämua no na, nä roto i te ora ta na e höroà nei no te taata, ei haamanaòraa i te haamataraa o te parau o te taata.

To na tanoraa mau, mai te peu na òe te faufaa, eere ia na te tahi e faatere, na òe iho. Teie, te haere hape noa ra tätou. I mua i te reira hape, àita tätou e ìte faahou ra i to tätou tiàraa tiàau. Te auraa, e haapii faahou ia tätou i te färiiraa i te mea ta te rahu e höroà nei, ei ora no tätou, nä roto i te òaòa e te hau. E te ìte-faahou-raa i to tätou tiàraa tauaro no te òhipa ta te Atua e hinaaro nei.

Te nä ôraa hoì te Atua i nià i te nünaa Ìteraèra « Ua ìte te puaatoro i to na Fatu, e te âtini i ta te Fatu ra vairaa mäa, àita rä Ìteraèra i ìte ia ù, aore hoì to ù ra mau taata e haamanaò » (Ìtaia 1, 3). I nä reira anaè te parau a te Atua no te tähape i te manaò o te taata, mea ìte aè ò ia, no te faaìte i te taata, mea ìte aè te ânimara, te faatereraa tano teie ta rätou e mau ra, o te haapii noa nei ia tätou, i te tiàraa ta te Atua i haataa no tätou. Àita òe e parauhia ra, e haapuaatoro ia òe aore ra e haapuaa ia òe. E mau rä i te haapiiraa ta rätou e faaìte nei. Ia vaiiho tätou i te Atua, ei faatere no ta na iho faufaa, ia mau faahou ä te Atua i to na tiàraa arataì i te oraraa o teie ao i teie mahana.

Mea päpü, e hoì faahou mai te parau o te hau i roto i te mau nünaa atoà. No terä mea, te ûàna noa atu ra te parau tià òre, te rahi noa atu ra te òhipa ìno, te veve, te àti tamaì. Te ahu noa atu ra te reva i te rave a te taata. Te rahi noa atu ra te pohe o te taata nei nä roto i te raveraa a te mau hau rarahi. E hau roa atu i te haapaòraa òre, te pohe nei te nünaa Mäòhi i te taèro âtömï. E te manaò noa nei te taata ia na, e faatere maitaì. Ua ìno roa ia te faufaa ora, te pohe marü noa ra.

Haamanaòhia atu ra te haapiiraa o te ià Tahiti manahune i te pö ra. Aria nei o Tahiti i ômii ai. E ià maere rä te ià hou nei, E tino ê to te ômii, e tino ê to te îtere, E ià ê te ômii, e ià ê te îtere. Tei mua ihoä te ômii, tei muri ihoä te îtere. Na te ômii e feruri i te vähi e haere. Na te îtere rä e tü ra, e täpae atu ai. E pohe te rahu ia taui te huru o te ômii. Àita e mea ìno i roto i te faanahoraa a te ômii. Ia òre rä ia ìno te ômii, e maitaì änei te îtere. E nä roto mai ihoä te taèro o te ià i te ômii. Àita änei te ômii e haavare noa nei i te îtere.

Teie ia to na auraa, O òe e te Mäòhi te îtere, te mana faatere fenua te ômii. Àita änei te ômii i taui i te hohoà. Te arataì nei te ômii ia tätou i hea. Te tano noa ra te êà ta tätou e haere pöiri nei, te haamanaò noa nei te päpaì Taramo ia tätou, no te Atua te mau mea atoà, te mau î atoà. Noa atu rä te reira mau haamanaòraa, àita ihoä tätou e ìte nei, àita ta te taata tuhaa i roto i te faatereraa a te Atua, ta òe (îtere) tuhaa, te färiiraa i te faatereraa (ômii) a te Atua. A ora i te reira nä roto i te hau, no te pähonoraa i te haauiuiraa i tuuhia i te ômuaraa o teie parau. I reira, tano roa ai, O vai au nei te taata i manaò ai òe ia ù. A faahoì i te Atua i nià i to na tiàraa ômii, faaea noa mai tätou ei îtere. Ia ora na

Pure

Haamaitaì mätou ia òe e te Atua Metua i te mea, àita ta òe faatereraa i taui rii noa aè, arataìhia te reira e te here e te aroha, te parau mau e te parau tià. Te faahaèhaa atu nei mätou i mua i to òe teitei, òe i mäìti i te rahu, ei tauaro no mätou no te haapii-faahou-raa ia mätou, i te huru oraraa e au i ta òe faatereraa. Ia roaa i te taata, i te ora hau i roto i to na nünaa taata. E te ani nei mätou ia òe, a tauturu mai na ia mätou i te färiiraa i ta òe anaè faatereraa. Ia hoì faahou mai te hau, te òaòa, e te maitaì i roto i te oraraa täâtoà o te nünaa Mäòhi. Ia maitaì noa mätou Amene.