Ioane 1.1-18 Ànaana, Pöuri

Mahana toru  25 no Titema 2019.

ÔROÀ FĀNAU

Ànaana, Pöuri

Taramo 98

1 Taramo. E himene i te Fatu i te himene âpï, e mau mea taa ê hoì tei ravehia e ana, no to na iho rima àtau e to na rima moà, i riro mai ai te rë ia na. 2 Ua faaìte mai ra te Fatu i te ora na na, i mua i te mata o te mau êtene atoà ra, te faaìte-raa-hia te parau tià na na ra. 3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua. 4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene. 5 A himene i te Fatu mä te tïnura, mä te tïnura e te reo haamaitaì atoà ra; 6 mä te mau pü e te òto o te tuferi, te harururaa i te haamaitaì i te arii ra, i te Fatu. 7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre.

Ìtaia 52.7-10

7 Te nehenehe o te âvae o te veà i nià i te mouà, o tei hopoi mai i te parau maitaì ra, o tei faaìte hua mai i te parau hau ra o tei hopoi mai i te parau òaòa e te maitaì ra, o tei faaìte hua mai i te ora ra o tei parau mai ia Tiona, Tei to Atua ra te hau 8 E faateitei to mau faèhau i to rätou reo; e ûmere päatoà noa atu to rätou reo; e hiò hoì rätou, te mata e te mata, i to te Fatu faahoìraa mai ia Tiona. 9 Ia püroro noa atu te òaòa; ia ûmere päatoà, e te mau vähi pararï i Ierutarëma ua haamähanahana hoì te Fatu i to na taata; ua faaora oia ia Ierutarëma. 10 Ua faaìte hua te Fatu i ta na rima moà i mua i te mata o te mau êtene atoà ra; e ua ìte i te mau hopeà atoà o te fenua ra i te ora a to tätou Atua.

Hēpera 1.1-6

Te parauraa mai te Atua nä roto i ta na Tamaiti

1 O te Atua, o tei parau riirii mai i mütaa iho, e rave rahi te huru o te parauraa mai i te feiä tupuna i te mau perofeta, 2 o tei parau mai ia ia tätou i teie nei ànotau hopeà i te Tamaiti, o tei haapaòhia e ana ei Fatu no te mau mea atoà nei, e ua hämani hoì o ia i nä ao atoà nei ia na. 3 O te ànaana hoì o ia o to na ra hanahana, e o te hohoà mau ia no na iho, e te mauraa hoì i te mau mea atoà nei i ta na ra parau mana, oti aè ra ta tätou hara i te tämähia e ana ia na iho ra, pärahi iho ra i raro i te rima àtau o te Mana i te vähi teitei ra.

Te Tamaiti tei hau i te mau merahi

4 E maitaì hau ê hoì to na i to te mau merahi, mai te iòa i noaa ia na i hau ê i te maitaì i to rätou ra. 5 O vai hoì to taua mau merahi ra ta te Atua i parau noa atu mai tahito mai ä e O ta ù Tamaiti òe, i naùanei òe i fänauhia ai e au. E ta na hoì i nä ô ra e Ei Metua vau no na, e ei Tamaiti o ia na ù. 6 E ia na hoì i faahoì faahou mai i te mätahiapo i te ao nei, nä ô aè ra o ia: «Ia haamori te mau merahi atoà a te Atua ia na.

Ioane 1.1-18

Te Parau a te Atua te Ora.

1 I vai na te Parau i te mätamua ra, i te Atua ra hoì te Parau, e o te Atua hoì te Parau/o te Parau hoì te Atua. 2 I te Atua ra hoì o ia i te mätamua ra. 3 Na roto ia na i rahuhia ai te mau mea atoà nei, e te mau mea atoà i rahuhia, aore hoê aè tei òre i nä roto mai ia na i te rähuraahia. 4 Tei roto ia na te ora, e te ora, o te märamarama ia o te taata. 5 Te ànaana nei te märamarama i roto i te pöuri, aita rä te pöuri i färii atu ia na. 6 Te vai ra ra te hoê taata tei tonohia mai e te Atua, o Ioane te iòa. 7 I haere mai o ia ei ìte, e faaìte i te märamarama, ia faaroo/tiàturi te taata atoà na roto ia na. 8 Eere o ia i te märamarama, ua haere mai rä o ia no te faaìte i te märamarama. 9 O te Parau te märamarama mau, ua haere mai o ia i te ao nei no te türama/haamäramarama i te mau taata atoà. 10 I te ao nei o ia, e na roto ia na teie nei ao i te rähuraahia; e aita to te ao i ìte atu ia na. 11 I haere mai nei o ia io na iho ra, e aore to na iho ra mau taata i färii atu ia na. 12 I te feiä atoà rä tei färii atu ia na, tei tiàturi i to na ra iòa, ua horoà o ia i te mana ia riro rätou ei mau tamarii na te Atua. 13 Te feiä eere i to te toto i fänau ai ra, eere hoì i to te hinaaro o te tino eere hoì i to te hinaaro o te taata, no te Atua rä. 14 I riro mai nei te Parau ei taata, e ua tiàhapa/pühapa mai io tätou nei, e ua ìte mätou i to na hanahana, mai te hanahana e au i te Tamaiti fänautahi a te Metua, ua î i te maitaì e te parau mau. 15 O na ta Ioane i faaìte mai, ia na i pii ra O ia teie ta ù i parau ra e O të haere mai i muri iho ia ù nei, ua riro ia i mua ia ù, o mua ä hoì o ia ia ù. 16 Oia mau, na roto i to na î, ua noaa ia tätou atoà nei te maitaì e au atoà i to na ra maitaì. 17 Na Möte hoì i tuu mai i te ture, âreà te maitaì e te parau mau, na Ietu Metia ia. 18 Aore e taata i ìte i te Atua, o te Tamaiti fänautahi rä i nià i te ôuma o te Metua ra, o ia tei faaìte mai ia na.

Manaò.

Èi faahanahanaraa na tätou i te ôroà o te Metia mea tià ia tätou ia faaroo mai i ta te päpaì  Taramo e faamanaò ra ia tätou i teie mahana. E himene i te Fatu i te himene âpï, e mau mea taa ê hoì tei ravehia e ana, no to na iho rima àtau e to na rima moà, i riro mai ai te rë ia na. 2 Ua faaìte mai ra te Fatu i te ora na na, i mua i te mata o te mau êtene atoà ra, te faaìte-raa-hia te parau tià na na ra. 3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua. 4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene. 5 A himene i te Fatu mä te tïnura, mä te tïnura e te reo haamaitaì atoà ra; 6 mä te mau pü e te òto o te tuferi, te harururaa i te haamaitaì i te arii ra, i te Fatu. 7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre. Te faamanaò nei te rahu ia tätou te Teitei e te Hanahana no te Atua Nui Tumu Tahi, e ia faaroo tätou i te haapotoraa no na taiòraa e maha,

Taramo 98, 7 Ia haruru te tai to na îraa, te ao atoà e te mau taata.

Ìtaia 52, 10 Ua faaìte te Fatu i ta na rima moà ua ìte te fenua te ora a to tätou Atua.

Hepera 1 Naùanei òe fänauhia ai e au. E ta na i nä ô ra e Metua vau, e Tamaiti na ù.

Ioane 1, 5 Te ànaana nei te märamarama, aita rä te pöuri i färii atu ia na.

Ua fänauhia te tumu o te Märamarama, te Märamarama ra te tumu ia o te ora, e taua ora ra to te taata ia Märamarama.

Te Märamarama ta te ìrava e faaìte nei, e Märamarama ia tei  hau ätu  i te mau märamarama ta tätou e faanaò noa nei. Ua hau ätu o ia i te ànaana mahana, e te puai no te mau mori o te ao nei. E Märamarama teie i färereihia e Tauro i nià i te èà no Tamateto, tei puta roa i roto i te vahi hohonu no to na huru, topa iho ra o ia mai nià mai i ta na puaahorofenua, e vai noa iho ra o ia e toru mahana ma te ìte òre te òhipa i tupu i nià ia na iho. Riro roa ätu ra o ia mai te hoê tamarii ra te huru, tiihia mai ra o ai e Anania ia au te tonoraa a te Varua Maitaì, no te ìriti faahouraa i te hoê èà àpi i mua ia na. Te òpuaraa tià òre ta Tauro i faaoti i roto ia na no te hämani-ìno-raa i te Ètärëtia a Ietu-Metia. Ua mou ia i mua i teie Märamarama, ua rave te Atua e faataui i teie òhipa ei faaìteraa i te mana no to na Märamarama. Oia mau e Märamarama taa ê mau teie e faaìtehia nei e Ioane Päpetito, e Märamarama tei arataì i te taata mai roto i te tïtïraa no te hara i roto i te faatiàmaraa i mua i te hara. Te vahi faufaa i roto i te faaìteraa a Ioane Päpetito, i teie Märamarama, te haapäpü nei o ia e, E  ERE  AU  TE  METIA,  E  ERE  AU  O  ERIA,  E  ERE  ATOA  I  TE  PEROFETA. Oia hoì eita o ia taua Märamarama, e mauhaa noa ra o ia i roto i te rima no te Atua, no te faaìteraa. No Ioane Päpetito eita i te mea faufaa roa ia ìtehia o ia, ta na atoà ia e hinaaro nei e faaìte i te mau taata atoà. E ère tätou i te märamarama o teie nei ao o te Metia ra. Oia mau, i te mau taime atoà tätou e tiàturi ai e, e matara ia tätou te mau fifi atoà, e i te mau taime atoà tätou e manaò ai e, e tei ia tätou ra te faaotiraa e aha ta te taata e tià ia manaò e ia tiàturi, e riro te faaroo Teretetiano ei faaroo tei haavï e tei faatïtï. O te Metia änaè te Märamarama, e ua tïtauhia tätou te hui-faaroo ia pärahi i roto i te pure ma te haehaa e ma te äni ia ärataìhia tätou e taua Märamarama ra. E tià  i te  Ètärëtia, na roto i te aroha  te  o te Atua Nui Tumu Tahi, ia riro ei faaìteraa i te Märamarama o te Atua tirärä ätu ai. Mai te mea noa ätu ra e faariro tätou ia tätou iho e o taua ia Märamarama ra, ei reira mau tätou e ätea ai e e tapu roa ai i to tätou tüàtiàtiraa i te Puna mau o te Märamarama. O ta Ioane Päpetito ia e faaìte nei, ia faaroo te taata atoà ia na. 

2) Ia faaroo te taata atoà ia na, eita e ore teie atoà te tahi täpura òhipa fifi tei òhipahia e Ioane Päpetito oia hoì te ìmiraa i te mau raveà ia faaroo te taata i te Tama no te Märamarama. Ia hiò änaè tätou i ta te papaì Parau Maitaì faaìteraa i te mau täpura òhipa tei ravehia e Ioane Päpetito, e ìte-iho-a  tätou i te tüàtiraa i roto i te FAAITERAA E TE FAAROORAA. No te mea i faite ai o Ioane Päpetito i te taata i te haereraa mai o te Märamarama, ia roaa–ihoä i te taata i te tiàturiraa i taua Märamarama ra. Te auraa, te fa o te faaìteraa a Ioane Päpetito, ia faaroo te taata, i te Metia.

I mua i te òhipa i ravehia e Ioane Päpetito, te ìte noa ra tätou e tuhaa rahi ta na i nià i te haereraa mai o te Fatu. E te riro nei o ia ei hiòraa na tätou i teie mahana. Ua päpu atoà ia tätou, e na tätou te mau maru metia no teie tau e rave i te òhipa i haamatahia mai e Ioane Päpetito. Mai te peu te fäito o Ioane Päpetito è ère te mea au-roa-hia e tätou, ta na ra faaìteraa aore ra ta na täviniraa ua riro mau te reira ei hiòraa na tätou. Te roo o te Metia teie ta Ioane Päpetito e faaìte nei ia faaroo te mau taata atoà.

I roto i teie tau no te Tiaìraa, aita ätu e parau faufaa roa ta tätou e faahiti oia hoì o te faaararaa i to te ao, na roto i te pure, na roto i te àrueraa e te haere mai nei te Faaora o te ao, te Märamarama mure òre o tei faaìte mai i te hinaaro o te Atua e faaora i to na nunaa i roto i teie mau tau àrepurepu e te hepohepo mau. Ia tauturu mai te Märamarama Nui ia tatou i roto i teie ôroà Fänau.

Teraì òr. Faatura.       

Mātaio 1.18-25 Ôtohe

Tāpati 22  no  Titema 2019.

TIAÌRAA MAHA

Ôtohe

Taramo 24

1 Taramo na Tävita. No te Fatu te fenua e te î atoà i nià iho, te mau fenua o te ao nei, e te feiä atoà e pärahi i reira. 2 Na na ia i faatïnana i te reira i te miti, e ua haamau o ia i te reira i te moana. 3 Nä vai e paiùma i te mouà o te Fatu? O vai të tià i to na ra vähi moà? 4 Te taata rima mä ra e te âau maitaì; o tei òre e faahiti i to na värua i te parau haavare, aore hoì i tapu mä te haavare. 5 To na te maitaì e noaa mai no ô i te Fatu ra, e te parau tià no ô i te Atua o to na ra ora. 6 Oia te feiä i ìmi ia na; o tei ìmi i to mata, e te Atua o Iatöpa. Tera. 7 E faateitei na ia òutou, e te mau ùputa e, e ia faateitei-atoà-hia òutou, te mau ôpani vaiiho taìàtä e, ia ö atu te arii hanahana i roto na 8 O vai teie nei arii hanahana? O te Fatu ia o tei mana e te püai; o te Fatu ia e mana i te àroraa ra. 9 A faateitei na ia òutou, e te mau ùputa e, e ia faateitei-atoà-hia òutou, e te mau ôpani vaiiho taìàtä e, ia ö atu te arii hanahana i roto na 10 O vai teie nei arii hanahana? O te Fatu manahope ia, o ia taua arii hanahana ra. Tera.

Ìtaia 7.10-16

Te täpaò o Èmanuera

10 Ua parau faahou mai ra te Fatu ia Âhata, nä ô mai ra, 11 E ani òe i te tahi täpaò i to Atua ra, i te Fatu; e ani i raro roa ra, e aore ra, ei nià roa. 12 Ua parau atu ra Âhata, E òre au e ani, e òre hoì au e faaoôo atu i te Fatu. 13 E ua parau mai ra o ia E faaroo mai, e te ùtuafare o Tävita; e mea iti änei òutou i faahaumani i te taata, e faahaumani atoà òutou i ta ù Atua? 14 E tënä na, nä te Fatu iho e höroà i te tahi täpaò no òutou inaha e tö te paretenia, e e fänau i te tamaiti, e maìrihia hoì to na iòa o Èmanuera. 15 E àmu o ia i te päta e te meri, ia ìte anaè o ia i te haapae i te mea ìno, e te rave i te mea maitaì. 16 E òre hoì teie nei tamaiti e ìte i te haapae i te ìno, e te rave i te mea maitaì, e faaruèhia ai taua fenua nei, e taua nä arii i àti ai òe na.  

Rōma 1.1-7

Aroharaa

1 Pauro, e tävini no Ietu Metia, i faarirohia ei âpotetoro, ia faataahia no te Èvaneria a te Atua 2 o tei faaìtehia mai i mütaa iho e ta na mau perofeta i roto i te Parau moà i päpaìhia ra , 3 no ta na Tamaiti no to tätou Fatu ra no Ietu Metia, o tei fänau mai i te huaai o Tävita, i te haapaòraa i te tino ra 4 i täpaò-faaìte-hia rä i te mana, e o te Tamaiti ia a te Atua, i ta te Värua Maitaì ra, i te tiàfaahouraa mai te pohe mai ra 5 no na mai to mätou maitaì i noaa ai, e te töroà âpotetoro i te mau êtene atoà no to na ra iòa, ia noaa ia rätou te haapaò faaroo ra; 6 no rätou atoà hoì òutou, o tei haapaòhia e Ietu Metia ra. 7 I te feiä atoà i herehia mai e te Atua i Röma na, i haapaòhia ei feiä moà ei ia òutou te aroha mau e te hau no ô mai i te Atua i to tätou Metua ra, e no ô hoì i to tätou Fatu ia Ietu Metia ra.

Mātaio 1.18-25

Te faaararaa ia Iotëfa

18 Teie te huru o te fänauraa o Ietu Metia. Te momoàhia ra ta na metua vahine o Märia ia Iotëfa aore ä räua i täati i hapü ai o ia i te Värua Maitaì. 19 E taata parau tià rä ta na täne o Iotëfa, aore rä i hinaaro i te faaìte hua ia Märia, manaò aè ra e haapae huna noa ia na. 20 E te feruri noa ra o ia i taua ôpuaraa ra, e inaha, ua fä mai ra te merahi a te Fatu, faaheitaòto mai ra ia na, nä ô mai ra E Iotëfa a Tävita ra, eiaha e mataù i te arataì mai i to vahine ia Märia i to fare na, no te Värua Maitaì hoì i hapü ai o ia. 21 E te tamaiti tä na e fänau, o ta òe ia e topa atu i te iòa ia Ietu; e faaora hoì o ia i to na nünaa i ta rätou hara. 22 Tupu mau atu ra te mau mea atoà i parauhia mai e te Fatu i te perofeta, a nä ô mai ai e 23 Inaha, e hapü te pötii, a e fänau mai o ia i te hoê tamaiti, e maìrihia to na iòa ia Èmanuera, Te Atua io tätou nei, ia ìritihia ra. 24 E ara aè ra Iotëfa, haapaò atu ra i ta te merahi a te Fatu i parau mai ia na, tii atu ra e arataì mai i ta na vahine io na ra. 25 Aita rä o ia i rave atu ia na e fänau noa mai ra i te hoê tamaiti, maìri atu ra i te iòa o Ietu.

Manaò.

Taramo 24, 10 O vai teie arii hanahana O te Fatu manahope ia.

Ìtaia 7, 14 inaha e tö te paretenia, e fänau i te tamaiti, e maìrihia to na iòa o Èmanuera.

Röma 1, 1 Pauro, tävini no Ietu Metia, i faarirohia ei âpotetoro, no te Èvaneria a te Atua

Mätaio 1, 25 Aita rä o ia i rave ia na e fänau mai ra te hoê tamaiti, maìrihia te iòa o Ietu.

I roto i te Mau taime ta tätou i haere mai e i roto i te mau täpati no teie tau faaineineraa no te haamanaòraa i te fänauraa te Metia, ua tuuhia i mua ia tätou te tahi mau parau no roto mai i te mau papaìraa a te mau taata tiàturi Atua, no te faaineineraa ia tätou ia noaa mai te tahi mau manaò âpï no te âmui- roa- atu i te òaòa mau no te fänauraa o te Metia a hiò atoà ai ia tätou i te rahi e te hohonu no te here e te aroha o te Atua ia tätou. Teie te täpati hopeà no te tau no te tiaìraa hou tätou a ö atu ai i roto i te ôroà Fänau i teie hepetoma âpï o ta tätou e haere atu nei. E no reira, i teie täpati, te arataì nei ta tätou taiòraa ia tätou i nià i te parau no te huru no te fänauraa no te àiü o te Fenua, e taua òhipa ra, ua tupu ia i roto i te ùtuafare no Iotëfa e no Maria.

Te faaìte nei na taiòraa e maha nei, i te faufaa no te tupuraa te parau no te fänauraa mai, te hoê tama taa ê i roto i te mau tama atoà o te ao nei, tei tohu atea- hia e te mau perofeta. E parau teie tei tae i roto i te perofeta ra ia Ìtaia, ei faaineineraa i te nünaa no te taeraa mai teie àiü. E ia topahia to na iòa ia Emanuera, oia hoì, o te täpaò ia teie i to te Atua pärahi tämauraa i pïhaìiho i to na nünaa, o tei parau- atoà- hia te Atua i ö tätou nei. Eita ra teie mau parau e faaea noa i roto i teie faanahoraa, e tupu ra oia i te àanoraa, i roto i te tiàturiraa o te mau taata atoà. Tei faaìte i te mana o te Atua, i te parauraa a to na mau tävini, tei ora i roto i tera tau e tera tau. Ia faaroo tätou i te manaò o Tavita i roto i te Taramo 24, te faahoì nei o ia i te mau maitaì atoà i nià i te Atua, i te mea o te Atua te tumu no te fenua e te î atoà e vai ra i roto ia na. Ma te horoà i te tahi mau uiraa, ei haapäpüraa i te huru no teie àiü e parauhia nei. Ta  Tavita pähonoraa i teie mau uiraa teie ia, ‘’ Te taata rima mä ra e te âau maitaì ; o tei òre e faahiti i to na värua i te parau haavare, aore hoì i täpü ma te haavare, to na te maitaì e noaa mai no ò  ia Te Atua Nui Tumu Tahi ra, e te parau tià no ò i te Atua o to na ra ora’’ (Taramo 24 : 4- 5). 10 O vai teie arii hanahana O te Fatu manahope ia.

Eita ra teie parau e faaea noa i roto i te faaäuraa mätamua, e tae roa ra i roto i te faaäuraa âpï. Ma te faaìte i te huru no te hanahana te òhipa i ravehia e te Atua i roto i to na mau tävini. Te hiòraa  a te âpotetoro a Pauro tei nià ia i te tiàraa Atua o Ietu, oia hoì, fänau iòhia mai o Ietu,’’ e täpaò faaìte i te mana  o te Tamaiti a te Atua, i ta te Värua Maitaì ra faaäraraa, i te tià- faahou- raa mai te pohe mai ra’’ (Roma 1 : 4). O ta Pauro ia e faaìte nei i te mau taata atoà tei òre a i na eàhia atu ra i teie mau parau. Ia noaa i te mau taata atoà ia faatura  na roto i te tiàturiraa i teie mau parau, no te Tamaiti a te Atua tei pärahi mai i rotopü i te mau taata, ei ia aurarohia ma te âau haehaa, ma te haapäpü e, 1 Pauro, tävini no Ietu Metia, i faarirohia ei âpotetoro, no te Èvaneria a te Atua.

Àreà ra ta Mataio faaìteraa, te horoà nei ia tätou, i te ìteraa te tupuraa te mau parau tohu no teie àiü, tei fänau pü fenuahia mai. Tei faaòhipa i na taata toopiti ia Iotëfa e o Maria, o raua te mauahaa a te Atua no teie òpuaraa. E faanaho te Atua teie òhipa ia au i to na hinaaro, eiaha  ra ia au i te hinaaro o te taata e ta na faanahoraa.

No reira te tahi manaò tumu e vai nei i roto i teie mau taiòraa mauti ra ia, TE PARAU FAFAU A TE ATUA. Na teie tumu parau e täamu i ta tätou na taiòraa e maha, o te ìtehia i roto i te manaò o te faatupu te fänauraa o teie àiü. O ta te merahi ia i parau ia Iotëfa i te taime o ia a faaheitaotohia ai, ‘’ E TE TAMAITI TA NA E FÄNAU, O TA ÒE IA E TOPA ATU IA IETU, E FAAORA HOÌ O IA I TÖ NA TAATA I TA RÄTOU HARA’ (Mataio 1 : 21). 25 Aita rä o ia i rave ia na e fänau mai ra te hoê tamaiti, maìrihia te iòa o Ietu.

Taiòraa  Mataio 1, 18 – 25.

Ìrava tumu, ìrava 21 E te tämaïti ta na e fänau, ta òe ia e topa atu ia Ietu, e faaora hoì o ia i to na taata i ta rätou hara. 25 Aita rä o ia i rave ia na e fänau mai ra te hoê tamaiti, maìrihia te iòa o Ietu.

Ua Ôtohe o Iotëfa i mua i te ôpuaraa faaora a te Atua, E tano tätou e tatara i te ôtoheraa mai teie i muri nei : Te òhipa ta te taata e rave, aore ra te parau ta na e parau, ei faatanoraa i to na hinaaro òre i te rave i te òhipa e tiaìhia ra ia rave o ia. Te vai atoà ra ihoä ia te tahi atu auraa, oia to te taata haere-ôtua-raa. Te taata e ôtohe, aita to na mata e hiò ra i te vähi ta na e tuu ra i to na âvae. Hiò noa ai to na mata i mua, te faaätea rii mäite noa ra to na âvae ia na i te vähi ta na e hiò ra. Aita o mua, oia te vähi ta te mata e hiò ra, i riro ei vähi ta te âau e tïtau ra, ua riro noa rä ei taime ìmiraa na te manaò i te faatano e te faaòhie i teie hinaaro faaätea ê mai. Aita tätou i parau e, teie haereraa i muri, no te mea te riro ra ia te muri i reira ei vähi e tïtauhia ra ; âreà i teie, te vähi e tïtauhia ra, te àperaa ia i te mea e hiòhia ra, te ìmiraa hoì i te räveà ia òre ia tae i reira, aore ra ia òre ia haamanaòhia mai te mea ta te taata e àpe ra, ta na e òre e hinaaro ra i te ìte. Ia haapotohia, te haamanaò noa mai ra te ôtoheraa i te manaò färii òre o te taata, e no te mea aita i färii, i òhie ai i te ìmi i te ôtoheraa. Eiaha rä tätou e manaò e, i te mau taime atoà, ua riro te ôtoheraa ei pähonoraa i te mea tei òre te manaò i färii.

Te faufaa ra e vai ra i roto i te taiòraa i faaroohia  e tätou, te huru ia no to te Atua òhiparaa i roto i te ùtuafare. E ùtuafare teie tei momoàhia, oia hoì te faaineinehia ra e täati, i tae mai ai te parau a te Atua  i roto i teie na tämarii, o Maria te iòa o te vahine, e te tane o Iotëfa ia.

Te ìte-atoà- hia nei ra te huru o te tane, i nià i te tupuraa teie òpuaraa, ua vai te tahi manaò, tei faatupu i te tahi faanahoraa no te here o te tane ia ta na vahine. Ua ö i roto i te âau o Iotëfa, te tahi manaò tei òre e tuàti i nià i te òpuaraa a te Atua. Teie huru no Iotëfa, e huru ia no te hoê tane, tei hinaaro e haapäpü i te puai o to na here, i ta na i momoàhia. I tupu ai ta te Atua faahei taòtoraa ia  Iotëfa, i tià ai i te Merahi, ia faatae te poroìraa a te Atua i roto ia Iotëfa, no teie òpuaraa,  i  parau ai te reo o te ìrava i te naòraa e, E tämaïti ta na e fänau, ta òe ia e topa atu ia Ietu, e faaora hoì o ia i to na taata i ta rätou hara. 25 Aita rä o ia i rave ia na e fänau mai ra te hoê tamaiti, maìrihia te iòa o Ietu.

Te ìte nei tätou te hinaaro o te Atua, no te faatupuraa i ta na òpuaraa faaora, i ta tätou ia tautururaa. Te tiàturi atoà mai ra te Atua ia tätou, no te faatupu i ta na mau faanahoraa. Te taata tei ìte e òpuaraa o ia na te Atua, e òhie te reira taata i te färii i te hinaaro o te Atua, mai te peu o na ta te Atua e hinaaro ra.

O te parau ia ta tätou e farerei nei i roto i te Mataio i te pene 1, mai te ìrava 18 e tae i te 25, ua mäìti te Atua i te tahi na taata no te färii i ta na òpuaraa. E teie na taata tei roto ia i te haamauraa, i te hoê ùtuafare âpï. E ia parau-anaè-hia e ùtuafare âpï, te auraa ra tei te haamataraa ia raua no teie huru oraraa. I tö ai o Maria i te Värua Maitaì, teie òhipa i ravehia e te Atua, èita ia no te haafifi i teie ùtuafare âpï. No te faaìte ra i te taata, èita e tià ia na ia pärahi i räpae i te faanahoraa a te Atua. No te mea tei nià i te taata te mau faanahoraa atoà a te Atua, i täpaòhia ai tätou i te iòa o te toru tahi. I tià ai i te veà i te faaära ia Iotëfa i teie parau, E te tämaïti ta na e fänau, ta òe ia e topa atu ia Ietu, e faaora hoì o ia i to na taata i ta rätou hara, 25 Aita rä o ia i rave ia na e fänau mai ra te hoê tamaiti, maìrihia te iòa o Ietu. Teie parau a te Atua, e parau ia tei tauturu ia Iotëfa i te märamaramaraa i te òhipa i tupu i nià ia Maria, ia òre o ia ia manaò ìno i ta na i here. No te mea e òpuaraa faaora teie na te Atua, aita te Atua i hinaaro ia fifi teie na taata. Ua ìmi ra te Atua i te mau räveà atoà ia tupu teie òpuaraa, ma te òre e faatupu i te fifi i roto i na taata e amo i ta na tämaïti. Te haapäpü ra teie parau i te faanahoraa ta te Atua i rave no te faafänauraa  i ta na tamaiti i o te taata nei. i roto i teie faaäraraa a te Atua, te tiàturi atoà ra te Atua e färii o Iotëfa i teie òpuaraa ta na ta te parau e faaära ra. Te mea fifi no Iotëfa èere te färiiraa i teie parau a te Atua, te hiòraa ra i te òhipa i tupu i nià ia Maria, mai te tahi òpuaraa na te taata. O vai atoà ia tane e òre e huru ê i teie faanahoraa. Ia tiàturi anaè o ia e hinaaro teie no te Atua, te mea noa e tïtauhia ra ia na te färiiraa i te òpuaraa a te Atua e te òaòaraa, i te mea ua mäìti te Atua ia räua no ta na òpuaraa. Aita atu e mea e tïtauhia ra ia räua, te haamauruüruraa i te Atua, o na i mäìti ia raua no ta na òpuaraa faaora. Te taata tei färii i te òpuaraa a te Atua, e taata haamaitaìhia te reira. Te taata tei täuturu i te Atua i roto i ta na òpuaraa, e taata ia tei faateiteihia.

Teie òpuaraa a te Atua aita o Iotëfa e o Maria i faaèrehia i te hoê maitaì. Ta räua ra e faanaò, te reira te mea e manaònaò-noa-hia ra e te taata tei tiàturi e tei tävini i te Atua, oia hoì te haamaitaìraa a te Atua, to na mäìtiraa i te taata no ta na mau òpuaraa. I te reira vahi, e tiàmaraa te reira no te Atua i te mäìtiraa i te taata o ta na i hinaaro.

No reira te Atua i tïtau ai i te taata, ia âmui i roto i ta na òhipa, no te faatupuraa i ta na mau òpuaraa. No te mea te Tamaiti e fänauhia, o Ietu to na iòa, no te faaora ia i te mau taata atoà tei ìte i te teimaha no te hara. Àreà ra tei òre a i ìte atu ra i te teimaha o te hara, te tïtauhia nei ia, ia rätou ia ìte i te reira. Te òhipa ia e vai ra i roto i teie Tamaiti, e faaora i to na mau taata i te hara. Tei roto noa o Ietu i te püfenua, i faaìtehia ai ta na täpura òhipa, e te tumu i Fänau mai ai i o tätou nei.

Oia mau, mai roto mai e piti na tämarii tei òre i ineine, tei òre i paari, tei òre i àravihi, i te mau faanahoraa o te oraraa ùtuafare, i tae ai i te parau tïtauraa a te Atua, ia färii i te haafänauraa i te Arii o teie nei ao.

Oia atoà ia tätou te hinaaro mai ra te Atua ia tätou èi haafänauraa i ta na mau òhipa i te fenua nei, i roto anei to tätou mau ùtuafare, ta tätou paroita, te âmuiraa, e tae noa atu i roto i te mau tomite òhipa. E aha ta teie haafänauraa e haapii mai nei ia tätou i roto i te tiaìraa maha. Mauti ra ia, te parau ta Pauro i papaì ia Tito i te pene 2 i te ìrava 11, e te 12, i te naòraa e, O te aroha mau o te Atua, e ora ai te taata atoà ra, ua ìteä mai nei ia. I te faaìteraa mai ia tätou e, e haapae tätou i te paieti òre, e te hinaaro i teie nei ao e ia pärahi tätou ma te haapaò maitaì, e te parau tià, e te paieti, i teie nei ao.      

Maitaì i te Fänau e te Mätahiti âpï



Teraì òr. Faatura.

Mātaio 11.2-11 Turori

Tāpati 15 no Titema 2019.

TIAÌRAA TORU

Turori

Taramo 146

1 E haamaitaì i te Fatu  A haamaitaì i te Fatu, e ta ù värua 2 E haamaitaì au i te Fatu, òi vai aè to ù ora; e himene au i ta ù Atua, òi vai aè au nei. 3 Eiaha e tiàturi i te hui arii, e te taata atoà, aita hoì o na e ora. 4 Te reva nei hoì to na värua, te hoì nei o ia i to na ra repo, mou roa atu ra ta na i ôpua i taua mahana ra. 5 E ao to na tei te Atua o Iatöpa te tauturu ia na, e tei to na Atua, tei te Fatu to na tiàturiraa 6 O tei hämani i te mau raì e te fenua, te tai e te mau mea atoà i roto ra o tei haapaò i te parau mau na na e a muri noa atu. 7 O tei faatià mai i te feiä i hämani-ìno-hia, e ua horoà mai i te mäa na tei poìa ra. O te Fatu tei tätara i tei täpeàhia ra, 8 o te Fatu tei faaàraàra i te mata o tei matapö ra, o te Fatu tei faatià i të faahaèhaahia ra, o te Fatu tei hinaaro i te feiä parau-tià ra. 9 Te faaora nei te Fatu i te mau taata èê ra, te tauturu nei o ia i te ôtare e te vahine ìvi ra âreà te haereà o te paieti-òre ra, e huri-ê-hia ia. 10 E vai arii mai ä te Fatu e a muri noa atu. O to Atua, e Tiona, e tae noa atu i te mau uì atoà ra. Hareruia.

 Ìtaia 35.1-10

Te tupu-maitaì-raa to te Metia pätireia.

1 E reàreà te mëtëpara e te vähi päpämarô ra no rätou; e òaòa hoì te fenua àihere e e ruperupe hoì mai te tiare ra 2 e ruperupe rahi ia, e ôuàuà noa mä te òaòa e te himene, te ùnaùna o Repanona te höroàhia mai nö na; te nehenehe o Taremera e o Tärona; e ìte te reira i te hanahana o te Fatu, e te manu o to tätou Atua. 3 e E faaètaèta na òutou i te rima paruparu, e tauturu òutou i te turi turorirori. 4 E parau atu òutou i te âau taiä, Ia itoito òutou eiaha e mataù; inaha hoì to òutou Atua. E faaìtehia mai ä te riri; te tähoo a te Atua ra o ia iho te haere hua mai e faaora ia òutou. 5 Ei reira e faaaraarahia ai te mata o te matapö ra, e àmaha hoì e te tarià o te feiä tarià turi ra 6 ei reira te piriòì e ôuàuà noa ai mai te àiri, e himene mai hoì te vaha o te taata vävä ra: e püpü mai hoì te pape na te mëtëpara, e te pape tahe i te fenua marô ra. 7 E riro te one veàveà ra ei pape hopuna, e te repo marô ra ei pape pihaa anaè: e ei te pärahiraa o te teni ra e tupu ai te âretu, e te âèho, e te tima ra. 8 Ei reira hoì te hoê èà rahi, e e èà hoì; e maìrihia hoì te reira, o te èà moà: aore e taata viivii e nä reira i te haere: ei pïhaì iho ra te Atua ia rätou, i te haereraa nä taua èà ra, e òre hoì te taata ìte òre e hapa i te reira èà. 9 Aore ia o reira e riona; aore hoì e puaa taehae e tae mai i reira; e òre roa te hoê e ìteä atu i te reira vähi: o tei faaorahia rä tei nä reira i te haere. 10 Oia ia, o tei hoohia e te Fatu tei hoì mai e haere mai rätou i Tiona mä te ûmere; e faatorönahia to rätou upoo i te òaòa vaiiho taiàta. E noaa ia rätou te reàreà e te òaòa; e te òto ra, e te mihi ra, e maùe ê atu ia.

Iatöpo 5.7-10

Te faaòromaì e te pure

7 E teie nei, e faaòromaì, e a ù mau taeaè, e ia tae mai te Fatu ra. Inaha hoì te faaàpu ra, te tiaì mäite ra o ia i te mäa maitaì o te fenua nei, te faaòromaì mäite ra hoì i te reira, e ia noaa mai te ua mätamua, e te ua hopeà ra. 8 E faaòromaì atoà hoì òutou, e faaitoito na i to òutou âau; ua fätata roa taua haereà mai o te Fatu ra. 9 Eiaha e täiroiro te tahi i te tahi, e a ù mau taeaè, o te faahapahia mai òutou. Inaha, te tià noa mai ra te haavä i te ùputa 10 E rave, e a ù mau taeaè, i te mau perofeta, o tei parau mai mä te iòa o te Fatu ra, ei hiòraa i te haamahuraa i te ìno e te faaòromaì.

Mātaio 11.2-11

Te uiraa a Ioane e te faaìteraa manaò o Ietu

(Rut 7.18-35)

2 E faaroo aè ra Ioane i roto i te täpeàraa ra i te mau òhipa a te Metia, ua tono atu ra o ia na roto i ta na mau pipi e ui ia Ietu e 3 O òe änei të tae mai, e aore ia, e tiaì atu änei tätou i te tahi ê atu? 4 Ua parau atu ra Ietu ia rätou A haere, a faaìte atu ia Ioane i ta ôrua e faaroo nei e e ìte nei 5 te ìte faahou nei te matapö, te haere nei te piriòì, ua tämähia te rëpera, te faaroo nei te turi e te tiàfaahou nei te feiä pohe, e ua porohia te parau maitaì i te feiä veve. 6 E ao tö na, o të òre e turori ia ù 7 E ia reva atu rätou, ua parau atu ra Ietu i te parau o Ioane i te tiàa rahi I haere òutou i te mëtëpara e hiò i te aha? I te âèho i ueuehia e te mataì? 8 I haere rä òutou e hiò i te aha? I te taata i te àhuraa i te àhu marû/nehenehe? Inaha, te feiä e àhu i te àhu marû/nehenehe ra, tei te mau fare ia o te mau arii. 9 I haere mau rä òutou e hiò i te aha? I te perofeta? Oia ia, e parau atu vau ia òutou: e rahi atu ia o ia i te perofeta. 10 No na hoì i päpaìhia ai teie parau e Inaha, e tono vau i ta ù veà i mua ia òe e nä na e haamaitaì i to èà i mua ia òe na. 11 Òia mau ta ù e parau atu ia òutou nei: i ta te vahine i fänau ra, aita hoê aè i hau ia Ioane päpetito. O tei iti roa rä i te Hau o te raì ra, e rahi aè ia ia na.

Manaò.

Taramo 146, 7 O tei faatià i te feiä i hämani-ìno-hia, e ua horoà i te mäa na tei poìa ra.

Ìtaia 35, 10 Oia ia, tei hoohia e te Fatu  E noaa  te reàreà te òaòa te òto, te mihi, e maùe ê.

Iatöpo 5, 10 E rave, tei parau no te iòa o te Fatu,  te haamahuraa te ìno e te faaòromaì.

Mataio 11, 6 E ao tö na, o të òre e turori ia ù.

O te toru teie no te täpati no te tiaìraa, i te haereraa mai te Atua i roto i te Atua pühapa ai. Èi faaìteraa i te täpaò faahiahia no to na Aroha e to na here i te taata, tei tiàturi i ta na mau òpuaraa no te ora. Mai teie e faaìtehia nei e Ìtaia i te pene 35 ma te ìrava 1 e tae i te ìrava 10. E tià ia parauhia te faatupu nei te Atua i te òaòa  i roto i to na nunaa. Ma te horoà i mua i to na nunaa, i te mau täpaò no te ora e te hau. Ia turuhia te feiä paruparu, e ìte te mau matapö, e faaroo te turi, e òuàòuà te piriòì, e himene te mau vava. Te mau vahi päpämarô o te fenua e hopuna te päpe, e ruperupe te mau tiare o te fenua i te maitaì o te Atua.

Te auraa o teie mau òhipa e tupu nei, te Atua tera e haere mai ra ia tätou ra. No te faahoì i to na nunaa i nià i te fenua ta na i täpu no te mau taata tei tiàturi i to na mana. E faaâpïraa teie ta te Atua Nui Tumu Tahi e rave nei i to na nunaa. Ia tià i te nunaa o te Atua, ia haere i te vahi i reira e tupu ai te òaòa. Te faufaa o teie òaòa, o te Atua iho teie i roto, èi haamähanahanaraa i ta na mau tamarii. Te haere mai nei te Atua i pïhaì iho ia rätou, èi haapäpüraa i to na tiàraa Metua. Èi tïtau faahouraa ia rätou ia hoì i nià i te èà moà. I reira e tupu ai te färereiraa i te parau tià  e te hau.

Tei teie vahi te ìteraahia te maitaì o te Atua, te òhipa ta na i faatupu èi tururaa ia i te taata i mua i te faufaa no te aroha e te here e vai ra i roto i to na huru faaora i te mau taata atoà. Teie huru to te Atua èi ìritiraa ia, te hoê tau âpï ia tià i te mau òhipa ora atoà ia haamaitaì i te Atua. Noa atu a ia te fifi e färereihia, e taata faaroo, ia ìte o ia e, eita te Atua e faatea ia na. E pärahi fatata ra te Atua i pïhaì iho ia na. Ia tià ra ia na i roto i teie òhipa e tupu nei, ia noaa ia na te faaòromaì. Te faaòromaì, e faatupu oia i te mau òhipa taaê, te tià e faaitoito faahou i te àau paruparu. E faufaa rahi teie, ia tupu i roto i te oraraa o te taata  faaroo. Na teie parau e natinati faahou te tahi i te tahi. Ia òre ia tupu te mau âmahamaharaa i te tahi e te tahi. Te huru ia ta Ìtaia faaìteraa i te mau hinaaro o te Atua, i to na nunaa. Te naò nei o Ìtaia, i te pene 35 i te ìrava 10 i te vahi hopeà 10 Oia ia, tei hoohia e te Fatu  E noaa  te reàreà te òaòa te òto, te mihi, e maùe ê. ta Iatöpo ra, i te pene 5 i te ìrava 10 i te vahi hopeà 10 E rave, te parau no te iòa o te Fatu,  te haamahuraa te ìno e te faaòromaì. E i roto i te Parau Maitaì,  Mataio i te pene 11 i te ìrava 6 vahi mätamua, 6 E ao tö na, o të òre e turori ia ù.  E tià ia parauhia i roto i na manaò e toru nei, te haapäpüraa ia e, te haere mai ra te Atua. Èita na tätou e haere atu ia na ra, na te Atua e haere mai ia tätou nei. Ia au i teie manaò o na pipi a Ioane Päpetito, O òe anei te tae mai, e e tiaì atu anei tätou i te tahi ê.

Na roto i te äniraa a na pipi a Ioane Päpetito i te Metia. Te pähono nei o te Metia e, e haere òrua e faaìte ia Ioane, o te òre e turori ia ù nei e ao to na.

Ua riro o Ioane Päpetito, èi perofeta hopeà tei òpani i te faufaa tahito, e èi perofeta mätamua, tei tohu i te mau parau no Ietu Metia, a taaê noa atu ai te faaìteraa a Ìtaia. E ua parauhia O ia te na mua no te Metia ei àvariraa i te Parau Maitaì no te patireia mure òre o te Metia.

I muri aè to Ietu Metia tonoraa i ta na mau pipi 12, ua haere o ia e haapii na roto i te mau òire rii, e ua rave hoì i reira i te mau temeio e te mau òhipa mana. I te reira taime, tei roto ia o Ioane Päpetito i te fare täpeàraa. No to na faaìteraa i te parau tià a te Atua i tuuhia ai o ia i teie vahi. Ia faaroo ra o ia i te roo no te mau òhipa o ta Ietu e rave ra, ua tono atu ra o ia e too piti no ta na mau pipi. Te hinaaro o Ioane Päpetito, ia ìte o ia e, o te Metia mau ra anei tera e rave ra i taua mau òhipa mana ra. Oia  mau ra anei teie i Päpetitohia i te päpe i Iörïtäna. Te uiraa o na pipi, O òe anei te tae mai, e e tiaì atu anei tätou i te tahi ê. Te pähonoraa a Ietu èita i te AITA, èita atoà i te E, teie ra e haere e faaìte ia Ioane ta òrua i faaroo e ta òrua e hiò nei.

Ø  Ua faaorahia te matapö

Ø  Ua haere te piriòì

Ø  Ua faaroo te turi

Ø  Ua tämähia te rëpera

Ø  Ua faatiàhia te pohe

Ø  Ua parauhia, te parau òaòa i te mau taata riirii

Ø  E o tei òre i turori ia ù nei ra, e ao to na.

E hitu pähonoraa teie ta Ietu e horoà nei i nià i te uiraa a teie na pipi a Ioane. Èi haapäpüraa e, e O ia iho te Metia, te Metia tei faaora, e tei faatiàma, te Metia tei räpaau e tei täma. Na teie atoà mau pähonoraa e faaìte e, ua oti te hororaa a Ioane, e faaea o ia i teie nei, e i roto o ia i te fare täpeàraa e faahope ai ta na pororaa i te patireia o te Atua. Te püòi  nei ia o Ietu i teie nei, ma te puai e te itoito. I färiu o Ietu i nià i te feiä e rave rahi i taua mahana ra, ma te parau e,

Ø  I haere òutou i te mëtëpara e hiò i te aha ?

Ø  I te âèho ueuehia e te mataì ?

Ø  I haere na òutou e hiò i te aha ?

Ø  E hiò i te taata i te àhuraa i te àhu märu ?

Ø  I haere mau ra òutou e hiò i te aha ?

Ø  I te perofeta ? 

Oia mau e perofeta te tià na i roto i te päpe no Iörïtäna, i te faaìteraa i te mau hinaaro o te Atua, ia hoì te taata i te tumu no te ora. I roto o ia i te mëtëpara no Iutea, i te tiaìraa ia Ietu, i nià i ta na tahua òhiparaa. I reira te tupuraa te òhipa faahiahia i rotopü i teie na taata, èi faaìteraa e, teie mai nei te Tamaiti a te Atua, i ö i  te taata. Ua vetea–iho ra te raì  i te taime mau a päpetitohia ai o Ietu e Ioane, o teie te parau ta Ietu e hinaaro nei e faamanaò i te mau taata atoà i taua mahana ra i te päpe no Iörïtäna.

E ôrama rahi faahiahia tei ìteähia ua vetea te raì, tupu mau atu ra te parau tohu a Ìtaia i te pene 64, i te ìrava 1 i te naòraa e, àhiri òe e hahae mai i te raì a pou mai ai, no te hara hoì  i au òre ai to te raì e to te fenua, no te Metia nei ra, ia au faahou ai te raì e te fenua. Te piti o te täpaò te ûupa i te pouraa mai i nià ia Ietu, e täpaò ia no to te Atua horoàraa mai i te Varua Maitaì, i nia i ta na Tamaiti, o ta te Atua i tono mai na, o ta te Atua ä e parau, ta na e parau ra e, aore te Atua i horoà riirii mai i te  Varua no na, ia au i te faaìteraa a te Ioane pene 3, i te ìrava 34. E te toru o te täpaò, te reo o te Atua èi haamanaraa i te òhipa ta Ioane i faatupu. Ta ù Tamaiti here teie, ua mauruüru roa vau ia na. Na teie reo i faaìte ia Ioane e, te hoì ra o ia i te ïtiraa, e te tupu ra o Ietu i te rahi.

E aha te òhipa ta tätou e ìte nei, to Ioane ia  ôpaniraa i te parau no te faufaa tahito, e to Ietu ìritiraa i te parau no te faaäuraa âpï. Te mätara nei ia te parau no te Parau Maitaì na roto i to Ietu haapäpüraa e o Ioane Päpetito e perofeta o ia no te mau perofeta o ia te na mua i te Metia.

E aha ta tätou uiraa ia Ietu i teie mahana, e ui anei tätou e, e aha te maoro no to òe hoìraa mai ? Èita paha ia e òre, e ui atoà mai o Ietu e no te aha ia te maoro, e òre ai te taatoàraa e faatupu i te hinaaro o te Atua, i te parau no te tätarahapa. E aore ra e pähono mai o Ietu, faaòto atu na mätou i te vivo, aita ra òutou i òri mai, pehe atu ra mätou i te pehe òto, aita ra òutou i òto mai, ia au te faaìteraa a te Mataio i te 11, i te ìrava 17. E aore ra e pähono mai o Ietu  i ta tätou uiraa e, o òutou te miti o te fenua, Mataio pene 5, ìrava 13, o òutou te märamarama o teie nei ao, e òire faatiàhia i nià i te mouà ra èita ia e moè Mataio pene 5, ìrava 14. Te mau taata ua aèhia i teie mau parau, e òre roa rätou e turori.

Ia ora na

Teraì òr. Faatura. 

Mātaio 3.1-12 Faahotu

Tāpati 8 no Titema 2019.

TIAÌRAA PITI

Faahotu

Taramo 72

1 Taramo na Toromona. A hö mai na, e te Atua, i te mau parau au na òe ra na te arii, e te parau tià na òe ra na te tamaiti a te arii. 2 E haavä o ia i to mau taata mä te parau tià, e to òe ra mau taata haèhaa mä te parau au. 3 E hopoi mai te mau mouà i te hau i te mau taata, e te mau âivi hoì mä te parau tià. 4 Na na e faaau i te parau i te haèhaa io te mau taata ra; e te tamarii a tei àti i te veve ra, na na e faaora; e e haavï ôfatifati roa o ia i tei hämani ìno ra. 5 E mataù rätou ia òe mai te mahana e te märama e vai nei i te mau uì atoà ra. 6 E riro o ia mai te ua i nià i te àihere motu âpï ra, e mai te tuäua e faararirari i te fenua nei 7 I to na ra tau e tupu roa ai te parau tià, e rahi roa hoì te hau, òi vai aè te märama 8 E riro o ia ei arii mai te tahi miti e tae noa atu i te tahi miti, e mai te pape ra e tae noa atu i te hopeà o te fenua 9 To te mëtëpara ra, e piò ia i raro ia na, e mitimiti to na mau ènemi i te vari.10 E àufau mai te mau arii no Taretita e to te mau fenua rii i te taoà te mau arii o Tehepa e to Tepa të hopoi mai i te ö. 11 E hope roa te mau arii i te tähopu i mua ia na, e hope roa te mau fenua i te auraro ia na. 12 O tei veve ra e ua tiàoro mai ra, na na ia e faaora, e tei àti ra e aita o na e tauturu. 13 E faaherehere o ia i tei paruparu ra e tei veve, e faaora hoì o ia i te feiä taoà òre ra. 14 E faaora o ia ia rätou i te haavare e te rave ìno ra, e to rätou toto e riro ei mea taoà na na. 15 E tià o ia i te oraraa E horoàhia mai te àuro o Tehepa ra na na, e pure tämau hoì te taata ia na, e haamaitaì hoì rätou ia na, eita e mahana e tuua 16 E riro hoì e maa tïtona tei te fenua i nià i te tupuaì o te mau mouà ra, e tei tupu ra, e àhehe ia mai te mau räau e tupu i Repanona ra; e ruperupe to te ôire ra mai te räau o te fenua nei 17 E vai ä to na iòa e a muri noa atu E vai ä to na iòa mai te mahana ra E maitaì te taata atoà ia na, e e hope te mau fëtii atoà o te fenua nei i te haamaitaì ia na 18 Ia haamaitaìhia te Atua, te Atua o Ìteraèra, o te Fatu, o ia anaè ra tei rave i te mau mea taa ê ra 19 Ia haamaitaìhia hoì to na iòa hanahana e a muri noa atu Ia faaîhia hoì te mau fenua atoà i to na hanahana Âmene, e âmene. 20 Te mau pure a te tamaiti a Iete ra a Tävita, ua hope ia.

Ìtaia 11.1-10

Te âmaa no roto i te tumu no Iete.

1 E tupu te hoê ohi no roto i te tumu ra o Iete; e riro te hoê aveave no roto i to na aa i te hotu rahi. 2 E vai ä te värua o te Fatu i nià ia na; te värua o te paari e no te ìte; e värua faaaò e no te püai te värua no te ìte, e no te mataù i te Fatu; 3 e rahi hoì to na ìte i te mataù i te Fatu; e òre hoì ta na parau e faaäuhia i tei ìteä e ta na mata; e òre hoì o ia e aò i ta to na tarià i faaroo ra 4 e haavä rä o ia i te taata rii mä te parau tià ra; e tuu hoì o ia i te parau au i te feiä mämahu o te fenua nei e täìri o ia i te fenua nei i te papaì ra o ta na vaha; e pohe paieti-òre ia na i te mataì o to na vaha. 5 E te parau tià ra, o te tätua ia o ta na tauupu; e te parau ra o te ruuruu ia o ta na ôpü. 6 Ei reira te ruto e pärahi atoà ai räua o te ârënio; e te nëmera e te pinia mämoe, e âpiti atoà ia i te taòtoraa; e te fanauà puaatoro, e te riona âpï, e te puaatoro haaporia ra, hoê ä âmuiraa mai, e na te hoê tamaiti iti e arataì. 7 Te puaatoro âpï ra, e te täpa maiaa ra, hoê ä ia àmuraa, e hoê ä taòtoraa to te fanauà. E àmu hoì te riona i te àihere mai te puaatoro atoà ra. 8 E haùti noa hoì te tamarii àiü i te âpoo o te âtepi, e te tamaiti no maìri àre te ü ra, e tuu ia i te rima i rià i te püpuniraaa o te tefo ra. 9 E òre rätou e haùti, e òre e rave ìno, i to ù atoà nei mouà moà, të nä reira mai ra te Fatu; e î hoì te fenua i te ìte i te Fatu, mai te vairaa miti e î i te miti ra. 10 E ia tae i taua mahana ra, e ìteä mai ai te hoê no te tumu ra o Iete, e tià i nià ei reva no te taata, e ìmi hoì te mau fenua atoà ia na; e maitaì mäite to na faaearaa.

Rōma 15.4-9

4 Te mau parau atoà hoì i päpaìhia i mütaa iho ra, i päpaìhia ia ia ìte tätou ia noaa to tätou tiaìraa, i te faaòromaì e te mähanahana o te parau i päpaìhia ra. 5 E teie nei, ia haafäito mai te Atua no na te faaòromaì e te mähanahana i to òutou âau, òutou òutou iho, ia au i te hinaaro o te Metia ra o Ietu. 6 Ia haamaitaì òutou i te Atua, i te Metua o to tätou Fatu ra o Ietu Metia, mä te âau hoê, e te vaha hoê.

No te mau nünaa atoà te Èvaneria

7 E teie nei, e färii òutou ia òutou iho mai te Metia i färii mai ia tätou nei ra, ia maitaì te Atua. 8 Teie ta ù parau, e tiàtono Ietu Metia no te peritome ia ìteä te parau mau a te Atua, e ia tupu te parau i parauhia mai i te feiä tupuna ra. 9 E ia haamaitaì te Ètene i te Atua i to na ra aroha, oia hoì tei päpaìhia ra e No reira vau e haamaitaì ai ia òe io te Ètene,

e e himene hoì i to òe ra iòa.»

Mātaio 3.1-12

Ioane päpetito

(Mär 1.2-6; Rut 3.1-6; Ioa 1.19-23)

1 I taua mau mahana ra, ua tià mai ra Ioane päpetito, mä te poro haere i te mëtëpara no Iütea 2 A tätarahapa, te fätata mai nei hoì te Hau o te raì 3 O ia teie ta te perofeta Ìtaia i parau na e E reo no te hoê tei tiàoro i te mëtëpara A faaineine i te èà o te Fatu, e faatïtïàifaro i to na mau haereà/ara/taìara. 4 Huruhuru tämera to Ioane àhu, i tätuahia to na tauupu i te hätua ìri puaa, àtarite/vïvï e te meri o te fenua àihere/meri ôviri ta na mäa. 5 Haere atu ra to Ierutarëma ia na ra, to Iütea atoà e to te tuhaa fenua täatoà o Iörïtäna 6 e päpetito atu ra o ia ia rätou i roto i te pape i Iörïtäna, mä te fäì i ta rätou hara.

Te tïtauraa a Ioane ia tätarahapa

(Rut 3.7-9)

7 Ia ìte atu rä Ioane päpetito i te rahi o te mau Färitea e te mau Tätutea i te haereraa mai ia päpetitohia rätou, ua parau atu ra o ia ia rätou E te mau fanauà ôfï e Nä vai i faaära ia òutou e horo ê i te pohe e fätata mai nei 8 A faahotu na i te mäa e au i te tätarahapa; 9 eiaha òutou iho e manaò e O Âperahäma to mätou. E parau atu hoì au ia òutou, e tià i te Atua ia faatupu no roto mai i teie mau ôfaì i te mau tamarii na Âperahäma. 10 Ua ineine ê na te ôpahi no te täpü i te mau tumu räau i nià i te aa te mau tumu räau atoà aore i hotu mai i te mäa maitaì, e täpühia ia e e hurihia i roto i te auahi.

Te päpetitoraa pape e te päpetitoraa auahi

(Mär 1.7-8; Rut 3.15-18; hiò Ioa 1.24-28)

11 O vau nei, te päpetito nei au ia òutou i te pape ia tupu te tätarahapa; o ia rä, o të haere mai i muri iho ia ù nei, e mana rahi aè tö na i tö ù, e òre e tano ia ù ia tätara i to na tämaa/tïaa; e päpetito o ia ia òutou i te Värua Maitaì e i te auahi. 12 Tei to na rima ta na tähiri/pätia, e tämä mäite o ia i ta na vähi papaìraa tïtona, e haaputu o ia i ta na tïtona i roto i te vairaa tïtona, âreà te ota e tütuì o ia i te reira i te auahi pohe òre.

Manaò.

I teie tiaìraa piti te faaìte nei na taiòraa e mäha te puai  te parau no te rähau a te Atua Nui Tumu Tahi, ta te fenua e türama ra to na mau faufaa. Te päpüraa o te mau parau ta tätou e hiò nei, teie ia ua haere mai o Ietu e parau i te taata i te parau o te fenua ; aita ra o ia i haere mai e faatià i te taata i te oraraa o te Atua e te mau merahi, e faaitoito rä i te taata i te hiòraa i te parau o te vähi ta na e ora ra, no te mea i reira noa e noaa ai ia na te märamarama i te hinaaro o te Atua e ta na ôpuaraa faaora. Teie huru parau, te tupu noa nei ia i te mau mahana atoà i nià i te fenua nei. Aita roa o reira e parau värua, aita hoì e parau no te Atua. No te mea rä ua hämanihia te taata i te huru e te hohoà o te Atua, ta te Atua tïtauraa i te taata, ia faaìte ia o ia i roto i to na huru oraraa, i te vähi ta te Atua i haapärahi ia na, i taua huru e taua hohoà no te Atua ra. Aita roa o reira e paraparau värua, e parau noa rä no te huru o te taata i roto i te oraraa, te vähi atoà rä te reira e ìtehia ai te tupuraa, aore ra te òreraa e tupu te hinaaro o te Atua i te taata.  E ia hinaaro o Ietu i te haapii i te taata i te parau o te pätireia o to na Metua, oia te pätireia o te ao, te faaau nei oia te tahi peu mätau-maitaì-hia e te taata, te tahi hoì parau e faanaho nei i te oraraa o te taata. E rave rahi atu ä ta Ietu faahohoàraa i te parau o te pätireia, te täatoàraa rä, e mau parau anaè ia no te fenua nei, no te tahi mau òhipa no roto i te oraraa o te taata. Te haapotoraa ia e vai nei i roto i na taiòraa e mäha nei i teie mau parauraa.

-Taramo 72, 16 E riro hoì e maa tïtona e àhehe ia ruperupe mai te räau o te fenua nei.

-Ìtaia 11, 1 E tupu te hoê ohi no roto i te hoê aveave no roto i to na aa i te hotu rahi.

-Roma 15, 9 E haamaitaì i te Atua i to na aroha tei päpaìhia ra i te Ètene,

-Mataio 3, 8 A faahotu na i te mäa e au i te tätarahapa.

Te vai faahou atu ra änei ia parau huru fenua aè i teie,  i te faaauraa i te taata i te räau, e te ua hoì,  i te aroha e te here o te Atua. Ia ìte atoà rä hoì tätou e, te ua, te mea ta tätou e tiaì nei ia tuuhia mai e te Atua mai te raì mai, ua tuu-ê-hia mai na te reira, tei roto ê na i te fenua. E aha atu ra te auraa o ta tätou tiaìraa i te tahi mea tei horoà-ê-hia mai na. Te ua, oia hoì te päpe no te raì mai, e te päpe e mauhia ra e te fenua, taua mea nei ä ia. Te auraa, aita ä tätou i ani, ua pähono ê mai na te Atua. Te vähi taa ê noa, te mea ia e, te päpe e mauhia ra e te fenua, te mea fätata aè ia ia tätou, âreà te päpe no te raì mai, aita ta tätou e parau i reira. Ua tià i te Atua i te horoà ra, ua horoàhia mai ia, e aita ra, aita ihoä ia. Te parauraa ia e faahitihia nei e Ioane Päpetito 8 A faahotu na i te mäa e au i te tätarahapa. Te varovaro ra teie reo to Ioane Päpetito faahotu i te mäa te mau taata o te fenua teie parauhia nei, aita to na e tüàtiraa i nià i te fenua ta te Tenete e faaìte ra. I faahanahana ai rä o Ione Päpetito i te fenua, no te mea ia, te fenua te mätamua i färii i te maitaì o te parau a te Atua, te fenua hoì tei riro ei ìte e ei faaìte i te rahi o te hanahana o te Atua.  Eere rä no te mea te faahiti nei tätou i teie mau manaò i riro ai te reira ei mea òhie i te färii-atoà-hia e te taata. No roto ihoä paha te fenua i te pöuri i te raveraahia mai e te Atua, te fenua atoà rä te mätamua i ànaànahia e te märamarama o te Parau a te Atua, e ia fäì te Atua i te maitaì o te märamarama, ia ìte ia tätou e, eere no te märamarama anaè te reira maitaì, no te fenua atoà rä i faahoì mai i te maitaì o taua märamarama ra. Te auraa vai noa te fenua i roto i te märamarama e te türamaraa a te parau a te Atua, vai noa atoà mai te maitaì ei huru no te fenua. Te maitaì o teie märamarama, te mea ia e, aita o ia i türama noa i te fenua mai te tahi mea i nä nià mai i te tau i raro, ua nä roto atoà mai rä i te fenua, nä roto i te mau täpaò ora ta te fenua i faaìte mai e tei riro ei mauruüruraa na te Atua. Teie ta te päpaì Taramo e faahiti nei, 16 E riro hoì e maa tïtona tei te fenua i nià i te tupuaì o te mau mouà ra, e tei tupu ra, e àhehe ia mai te mau räau e tupu i Repanona ra; e ruperupe to te ôire ra mai te räau o te fenua nei.

Te mea ia te Mäòhi i tanu ai i te püfenua i roto i te fenua. Mai te peu te ìte noa ra tätou e, teie räau ta päpaì Taramo e parau nei, te taata ia, te märamarama noa atoà ra ia tätou e, aita to te taata e parau, aita to na e ora i räpae aè i te fenua. Eita te taata e tano e haapae i te fenua, eita o ia e tano e haamere, eita hoì e tano e huna e, eere o ia i te fenua. Mai te fenua i vai ano noa na e te faufaa òre i roto i te pö uri paò, maoti te Värua o te Atua e ta na Parau i riro mai ai te fenua ei puna no te ora, oia atoà te taata, maoti te aho ora ta te Atua i haapüaì i roto i to na paoà ihu, i riro mai ai o ia ei taata ora. Te mea rä e toe ra i te taata, te färiiraa ia i te Parau. No reira e òre ai e tià i te taata ia vahavaha i to na parau, aita atu mea e tià ia na ia rave maoti rä, te haamaitaìraa i te Atua, mai ta te fenua e rave noa ra aore e mahana tuua, te fenua te mätamua i färii i te Parau a te Atua. Ua ìte maitaì tätou e, te räau e hotu, ua riro ia ei mauruüruraa na te Fatu ; te räau rä e hotu mai i te mäa të òre e faatupu i te mauruüru o te Fatu, e riro ia räau i te täpühia, e te hurihia atu i roto i te auahi. E haapiiraa rahi roa ta te fenua e horoà mai nei i te taata no te haèhaa, te âau mëhara, e te hinaaro faateniteni i te Tumu mau o te ora.

Teraì òr. Faatura.