Ioane 9, 1 - 41 Märamarama

Tāpati 22 Mati 2020.

Märamarama

Taramo 23

1 Taramo na Tävita. O te Fatu to ù tiaì, e òre roa vau e ère. 2 Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra. 3 E faahoì o ia i taù värua. E arataì o ia ia ù nä te èà tïtïàifaro, no te hanahana o to na ra iòa. 4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù to räau e te tootoo tei haamähanahana mai ia ù. 5 Ua faanahonaho òe i te tahi àmuraa mäa na ù i mua i te aro o taù mau ènemi; ua faatävai òe i taù upoo; e te î nei taù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

1Tāmuera 16.1-13

Faatahinuraa ia Tavita.

1 Ua parau mai ra te Fatu ia Tämuera, E òto ä òe ia Taura, tei faaruèhia o ia e au eiaha o ia ei arii no Ìteraèra? A faaî na i to färii i te monoì, e haere ia Iete i Peterehëma ra, te tono nei hoì au ia òe; ua noaa hoì te tahi arii na ù i roto i te mau tamarii na na ra. 2 Ua parau atu ra Tämuera, e aha vau e tià ai ia haere? Ua ìte anaè Taura ra, e pohe au ia na. Ua parau mai ra te Fatu, E pütö atoà i te tahi puaatoro oni âpï, a parau atu ai e, I haere mai au e hopoi i te tütia na te Fatu. 3 A parau atu ai ia Iete e haere atoà mai i taua tütia ra, e na ù e faaìte ia òe i ta òe e rave: e o ta ù e faaìte atu ia òe i te iòa ra, ta òe ia e faatävai na ù. 4 E ua nä reira hoì Tämuera i ta te Fatu i faaue mai ra, e ua haere o ia i Peterehëma: e ua haere iho ra i te feiä rarahi o taua ôire ra i taua haereà mai nö na ra, e ua nä ô mai ra, E tere hau to òe? 5 ua nä ô atu ra o ia, E tere hau: i haere mai au e hopoi i te tütia i te Fatu ra a faataa na ia òutou, e haere atoà i teie nei tütia. Ua faataa iho ra o ia ia Iete e ta na mau tamarii, e ua parau ia rätou e haere mai i taua tütia ra. 6 E tae mai ra rätou, ua hiò atu ra o ia ia Èriapa, e ua nä ô aè ra, O ta te Fatu mau paha teie i haapaò ra, tei mua i ta na aro 7 ua nä ô mai rä te Fatu ia Tämuera, Eiaha e hiò i to na mata, e to na huru i te teitei, no te mea, aore o ia i tiàhia e au; e òre hoì ta te Fatu hiòraa e au; e i ta te taata; e hiò hoì te taata i te huru i räpae àu aè, âreà te Fatu, e hiò ia i to âau. 8 Ua parau atu ra Iete ia Àpinatapa, e ua tuu mai ra ia na i mua ia Tämuera ua nä ô aè ra rä o ia, Aita atoà te Fatu i hinaaro i teie. 9 Ua tuu mai ra Iete ia Tama; ua nä ô aè ra rä o ia, Aita atoà te Fatu i hinaaro i teie. 10 E ua nä reira Iete i te tuu mai i ta na mau tamarii toohitu atoà i mua ia Tämuera; ua nä ô atu ra rä Tämuera ia Iete, Aita te Fatu i hinaaro ia rätou. 11 E ua nä ô atu ra Tämuera ia Iete, ua hope roa mai nei ta òe puè tamarii tamäroa? Ua parau mai ra o ia, Te toe nei te hopeà, e inaha, te tiaì ra i te i te mau mämoe ua parau atu ra Tämuera ia Iete, E tono i te taata e tii ia na, ia tae mai hoì o ia e pärahi ai tätou i raro. 12 Ua tono atu ra o ia i te taata, e ua arataì mai ia na i roto. E taata ùteùte, e te mata maitaì, e te huru maitaì e ua parau mai ra te Fatu ia Tämuera, A tià, a faatävai ia na, o ia hoì tënä. 13 Ua rave iho ra Tämuera i taua färii monoì ra, e ua faatävai atu ra ia na i röpü atoà i ta na mau tuaana ra e mai taua mahana mai ra te värua o te Fatu i te taeraa mai i nià ia Tävita. Ua tià aè ra Tämuera i nià, e ua hoì mai ra i Rama.

Èfetia 5.8-14

8 I pöuri na hoì òutou i mütaa iho ra, i teie nei rä, ua märamarama òutou i te Fatu, ia au to òutou haereà i te tamarii märamarama. 9 Ta te Värua i faatupu ra, oia te mau mea maitataì atoà ra, e te parau tià, e te parau mau. 10 Ia ìteä ia òutou te mea au i te Fatu ra. 11 E eiaha roa ei âmuiraa i te feiä parau faufaa òre o te pöuri ra, e aò atu rä. 12 E mea haamä hoì ia parau noa atu i te mau mea i rave-huna-hia e rätou ra. 13 Te mau mea atoà rä i ìteä ra, i ìteä ia i te märamarama, o te märamarama hoì tei faaìte mai i te mau mea atoà nei. 14 I parau mai ai te Värua e A ara mai na, e tërä ra taata taòto, a tià mai i nià, e tënä na pohe, e na te Metia e horoà mai i te märamarama ia òe.

Ioane 9, 1-42.

Te faaora-raa-hia te hoê taata matapö mai te fänauraa mai ä 1-12

Ioane

1 E te haere noa ra o ia ra, e ìte atu ra o ia i te hoê taata matapö mai te fänauraa mai ä. 2 Ua ui mai ra ta na mau pipi ia na, nä ô mai ra

Mau pipi

E Rapi, nä vai te hara, na na iho änei, e na na metua änei, i fänau matapö mai ai o ia?

Ioane

3 Ua parau atu ra Ietu

Ietu

Eere i to te hara a teie nei taata e te hara a nä metua ra, no te mea rä ia ìteä te òhipa a te Atua ia na nei. 4 E rave au i te òhipa a tei tono mai ia ù nei ra, òi vai aè te ao. Te fätata mai nei hoì te ruì, aore roa e taata e òhipa i reira. 5 Te pärahi nei au i te ao nei, o vau te märamarama o teie nei ao.

Ioane

6 I nä reira atu ra o ia i te parauraa atu, e ua tufa iho ra i te huare i raro i te repo, ua oi iho ra i ta na huare i te repo; ua parai atu ra i te repo i te mata o taua taata matapö ra. 7 Ua parau atu ra ia na A haere, a horoi i to mata i te pape ra i Tiroama (oia hoì Tonohia. Haere atu ra o ia, horoi iho ra, e haere mai ra hoì mä te ìte.

Ioane

8 Ua parau iho ra to reira iho, e te feiä i ìte ia na i mütaa iho i te vai-matapö-raa ra

Te fëia i ìte e matapö

 Eere änei teie i te taata i pärahi noa, ani ai i te taoà ra.

Ioane

9 Ua parau mai ra vëtahi

Vëtahi

O ia hoì teie.

Ioane

Nä ô mai ra vëtahi:

Vëtahi ä

Mai ia na mau nei ä hoì te huru.

Ioane

Ua parau mai ra o ia iho

Matapö

O vau hoì ia

Ioane

10 Ua ui atu ra rätou ia na

Rätou

I aha tià to mata i àraàra ai?

Ioane

11 Ua parau mai ra o ia, nä ô mai ra:

Matapö

I oihia te repo e te hoê taata o Ietu te iòa, e ua parai mai ra i ta ù mata, e nä ô mai ra ia ù: A haere i te pape ra i Tiroama horoi ai i to mata, haere atu ra hoì au horoi iho ra, e ìte atu ra.

Ioane

12 Ua ui atu ra rätou ia na:

Rätou

Tei hea taua taata ra.

Ioane

Ua parau mai ra o ia:

Matapö

Aore au i ìte.

Te tïtorotororaa a te mau Färitea 13-34

Ioane

13 Ua arataì atu ra rätou i te taata i matapö na i te mau Färitea ra. 14 E täpati te mahana i oi ai Ietu i te repo i te faaoraraa i ta na mata ra.

Färitea

15 Ua ui atoà mai ra te mau Färitea ia na i te oraraa ta na mata ra.

Ioane

Ua parau atu ra o ia

Matapö

I parai mai o ia i te repo i ta ù mata; e horoi iho ra hoì au, e te ìte nei au.

Ioane

16 Ua nä ô aè ra te hoê pae o taua mau Färitea ra

Färitea

Eere teie taata i to te Atua, aore hoì o ia i haapaò i te täpati.

Ioane

Ua nä ô aè ra te tahi pae:

Te tahi pae

E aha e tià ai i te taata hara ia rave i te täpaò mai teie nei?

Ioane

Ua àmaha iho ra rätou. 17 Ua ui faahou mai ra rätou i taua taata matapö ra:

Faritea

E aha ta òe na parau ia na, o ia i faaora i to mata na?

Ioane

Ua parau atu ra o ia:

Matapö

E perofeta ia o ia.

 Ioane

18 Aita rä te âti-Iüta i faaroo e matapö to taua taata ra, e ua faaorahia hoì ta na mata, ia tii rä rätou i nä metua o taua taata i faaorahia te mata ra. 19 E ua ui atu ra rätou ia räua, nä ô atu ra

Âti-Iüta

O ta òrua tamaiti teie i parau ra e, i fänau matapö mai o ia. E aha hoì o ia i ìte ai i teie nei?

Ioane

20 Ua parau mai ra nä metua no na ra ia rätou, nä ô mai ra

Na metua

Ua ìte mäua, na mäua mau teie nei tamaiti, e matapö mau o ia mai te fänauraa mai ai. 21Âreà rä te mea i ìte ai o ia i teie nei, aore ia mäua i ìte, e tei faaora hoì i ta na mata, aore atoà ia mäua i ìte. A ui atu na ia na, ua paari hoì o ia iho e na na iho e parau mai.

Ioane

22 I nä reira atu ra nä metua no na ra, no te mea te mataù ra räua i te âti-Iüta, ua faaau na hoì te âti-Iüta i ta rätou iho parau, e te taata i nä ô ra e o ia te Metia, e tuuhia ia i räpae i te tunato ra. 23 I parau atu ai nä metua no na ra e

Na metua

Ua paari o ia, a ui atu na ia na iho.

Ioane

24 Ua parau faahou atu ra rätou i taua taata matapö ra, nä ô atu ra ia na.

Âti-Iüta

E haamaitaì i te Atua. Ua ìte hoì mätou e, e taata hara teie nei taata.

Ioane

25 Ua parau mai ra o ia, nä ô mai ra

Matapö

Aore au i ìte e, e taata hara o ia. Hoê roa a ù parau i ìte, e matapö to ù i mütaa iho, e teie nei te ìte nei au.

Ioane

26 Ua parau faahou atu ra rätou ia na

Âti-Iüta

I aha mai o ia ia òe? I nä hea o ia i te faaoraraa i to mata na?

Ioane

27 Ua parau mai ra o ia ia rätou

Matapö

Ua fäì atu hoì au ia òutou, aore òutou i faaroo. E aha rä hoì òutou i hinaaro faahou ai i te faaroo? Ei pipi änei òutou atoà na na?

Ioane

28 Ua faaìno atu ra rätou ia na, nä ô atu ra

Âti-Iüta

O òe ta na pipi, âreà mätou e pipi ia na Möte. 29 Ua ìte mätou e, ua parau mai te Atua ia Möte. Âreà teie nei taata, aore mätou i ìte i te vähi no reira mai o ia ra.

 Ioane

30 Ua parau mai ra taua taata ra ia rätou, nä ô mai ra

Matapö

E mea huru ê hoì tënä aore òutou i ìte i te vähi no reira mai o ia, e inaha, ua faaora hoì o ia i ta ù mata nei. 31 Ua ìte hoì tätou e, e òre te Atua e faaroo i te feiä hara, o te taata rä e haamori i te Atua, e o tei haapaò i to na ra hinaaro, o ta na ia e faaroo. 32 Aore i ìteä te matapö fänau nei i te oraraa i te taata mai te mätamua mai ä o te fenua nei. 33 Ahiri teie nei taata eere i to ô i te Atua ra, eita roa ta na räveà e tià.

Ioane

34 Ua parau atu ra rätou ia na, nä ô atu ra

Âti-Iüta

I fänau mai òe mä te hara, e haapii mai hoì òe ia mätou?

Ioane

Ua tuu atu ra rätou ia na i räpaeàu.

Te matapö värua 35-41

Ioane

35 Ìte aè ra Ietu e ua tuuhia o ia e rätou i räpae, e färerei aè ra hoì o ia ia na, ua parau atu ra ia na

Ietu

Ua faaroo òe i te Tamaiti a te Atua?

Ioane

36 Ua parau mai ra o ia, nä ô mai ra

Matapö

E te Fatu, o vai o ia ia faaroo atu vau ia na?

Ioane

37 Ua parau atu ra Ietu ia na

Ietu

Ua hiò hoì òe ia na, e o ia hoì teie e parau atu ia òe nei.

Ioane

38 Ua parau mai ra o ia

Matapö

E te Fatu, ua faaroo vau. E ua tïpapa iho ra i raro i mua i ta na aro.

Ioane

39 Ua parau atu ra Ietu

Ietu

I haere mai nei au i te ao nei ia tupu te parau tià, ia ìte te feiä ìte òre ra, e ia riro te feiä ìte ra ei matapö.

Ioane

40 Te faaroo mai ra e toofanu mau Färitea i reira atoà iho i taua parau ra, e ua parau mai ra ia na

Färitea

E matapö atoà nei mätou nei?

Ioane

41 Ua parau atu ra Ietu:

Ietu

Ahiri òutou e matapö ra, aita a òutou hara, te parau mai na rä òutou e: Ua ìte mätou, te vai na ia ta òutou hara.

Manaò

Taramo 23, 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

I Tämuera 16, 12 Ua tono atu ra o ia i te taata, e ua arataì mai ia na i roto. E taata ùteùte, e te mata maitaì, e te huru maitaì e ua parau mai ra te Fatu ia Tämuera, A tià, a faatävai ia na, o ia hoì tënä.

Efetia 5, 14 I parau mai ai te Värua e A ara mai na, e tërä ra taata taòto, a tià mai i nià, e tënä na pohe, e na te Metia e horoà mai i te märamarama ia òe.

Ioane 9, 39 Ua parau atu ra Ietu I haere mai nei au i te ao nei ia tupu te parau tià, ia ìte te feiä ìte òre ra, e ia riro te feiä ìte ra ei matapö.

EI HIÒRAA  ÂMUI.

E mau taiòraa teie e faaìte nei te tumu no te märamarama e vai i te Atua ra. Te riro nei teie tumu parau èi reni arataì no te mau manaò o te Atua, o ta na e horoà i to na  mau tävini èi faaìteraa i to na pärahi tämauraa i roto i ta na i maìti. E ua maìti Ò ia i ta na i ìte te hau e vai i roto i taua tino ra. Aita te Atua i hiò noa te maitaì o te mata e te nehenehe o te tino, maite mäìtiraa puroturu ra te huru, hau roa atu ai te mäìtiraa a te Atua mauti ra ia e hiò atoà te nehenehe o te âau o te reira taata. Ua maitaì anaè te âau, e maitaì ai te mau mea atoà i reira e noaa ai i te taata mäìtihia te märamarama o te Värua no o mai i te Atua ra.

Te märamarama, o te òhipa mätamua ia ta te Atua i pii i roto i te mau maitaì atoà o ta na i rahu. Ua märamarama, märamarama iho ra. Na teie tiàraa i faataa i te pöuri i to na vairaa. No te faufaa teie òhipa ta te Atua i rave i tià ai, ia tätou i te haere na nià i teie èà, tei türamahia e te ànaana no te märamarama o te Värua Moà. Teie ia ta Ietu e parau nei e, O VAU TE MÄRAMARAMA O TEIE NEI AO. E parau ia teie ta Ietu i faahiti i roto i te taiòraa no te Èvaneria i päpaìhia e Ioane i te pene 9 ìrava 5. E parau atoà ra tei faaìte  i te taatoàraa no te huru o te tupuraa o teie nei pene parau tei haamata ma te ìrava 1 e tae i te ìrava 41. E tià ra ia haapotohia teie taiòraa e haamata i te ìrava 25 e tae i te ìrava 33. No te mea tei roto i teie tuhaa te püairaa te matapö i te faaìteraa e ua ora to na mata i te hoê taata, ta na i òre i mätau.                                                                                                                                                                         

EI MANAÒ TATARA.

Te reo o ta Ietu e parau nei e, O VAU TE MÄRAMARAMA O TEIE NEI AO. No roto mai ia i te hoê uiraa a te mau pipi i te ìrava 2, e Rapi, na vai te hara  na na iho anei, e na na metua anei, i fänau matapö mai ai ò ia?

Ia au i te uiraa e faatupu ta tätou taiòraa, i te hoê täpura òhipa faahiahia i ravehia i mua i te mau taata e rave rahi. I to Ietu faaìteraa e Ò ia te märamarama o teie nei ao. Na teie tumu parau e arataì ta tätou pene parau, ma te ìrava 1 e tae i te ìrava 41, no te Ioane pene 9. E tià ra ia tätou ia tuha teie pene parau 10 aè tuhaa.

                                   1)         ir.1 - 5             te matapö i faaorahia e Ietu.

                                   2)         ir.6 - 7             te huare, te repo, te pape te raveà ia a Ietu.

                                   3)         ir.8 - 14           ta te taata hiòraa i te ora a Ietu.

                                   4)         ir.15-16           ta te Faritea hiòraa i te ora a Ietu.

                                   5)         ir.17-18           te faaìteraa a tei faaorahia, Ietu e perofeta.

                                   6)         ir.19-23           te manaò o na metua i te ora o teie tämaïti.

                                   7)         ir.24-28           èi ìte tei faaorahia no Ietu.

                                   8)         ir.29-34           te haapäpüraa o Ietu te tumu o te ora.

                                   9)         ir.35-38           te fäìraa parau tià a tei märamarama.

                                   10)       ir.39-41           Ietu e te hara a te mau Faritea.

           

Te faaìte nei teie mau tumu parau o Ietu teie e arataì nei i te taata i nià i te òhipa ta na i rave, i nià i te tämaïti fänau matapöhia mai. Te mau maröraa parau e tupu, e haamata te reira mai roto mai i te mau taata e rave rahi. I te maere i te ìteraa i teie tämaïti i te ori haere-noa-raa mai te mau taata atoà, te òre-raa e perehahu i te èà ia haere ò ia. To rätou manaòraa ra ua haavare matapö na ò ia, aita ra teie mau taata e ìte nei e te ora o teie tämaïti no o mai ia i te Atua ra. Te pöuri nei teie mau taata i te òhipa ta te Atua i rave na roto i teie tämaïti. E  i te tahi aè pae te mau Faritea ia, e ta rätou hiòraa, i te ora o teie tämaïti.

Eita to rätou manaòraa e tià ia rave i teie òhipa, i te mea e taata hara ò ia. Te auraa  ra, èita o Ietu i te tämaïti na te Atua, e te òhipa ta na e rave ra, èita ia no o mai i te Atua ra Te mohimohi nei te mata o te mau Faritea, i te ìteraa i te mana o te Atua te tupuraa na roto ia Ietu. Ua vai noa rätou i roto i to rätou ao pöuri, türama-òre -hia e te hihi no te märamarama o te Èvaneria. Àreà ra i te tahi pae te na metua ia, na raua teie tämaïti fänau matapöhia mai, e vaiiho ra na metua i te tiàmaraa i te pähonoraa i te tämaïti. Eiaha ra i roto i te manaò èi faateäraa i ta raua tämaïti, i tera ra manaò e ò ia anaè tei ìte, i te òhipa ta Ietu i rave i nià ia na, i àraara ai to na mata.

Te mau manaò i faaroohia aè nei e tätou, e mau haapäpüraa ia i te òhipa maere i faatupuhia e Ietu. A faaroo na ra tätou i te mau fäìraa parau tià a teie tämaïti i mua i te mau taata e rave rahi, i mua i te mau Faritea, e i mua ia Ietu.

- Te parau nei ò ia, i oihia te repo e te hoê taata o Ietu te iòa. (Ìr. 11).

- Ma te parau atoà, àore au i ìte. (Ìr. 12).

- E te haapäpü nei e, i parai mai ò ia i te repo i ta ù mata, e horoi iho ra hoì au, e te ìte nei au. ( ìr. 15).     

- E horoà teie tämaïti i te tiàraa o Ietu, e Perofeta Ò ia. (Ìr 17).

- I teie manaò e, aore au i ìte e, e taata hara o ia, hoê roa a ù parau i Ìte, matapö to ù i muta iho, e teie nei te     ìte nei au. (Ìr. 25).

- Ua fäì atu hoì au ia òutou, aore òutou i faaroo, e aha ra hoì òutou i hinaaro faahou ai i te faaroo? Èi pipi anei òutou atoà na na? (ir.27).

- E mea huru ê hoì te na aore òutou i ìte i te vahi no reira mai O ia, e ìnaha, ua faaora hoì ò ia i ta ù mata nei. (Ìr. 30).

- Ahiri teie taata e ère i to ô i te Atua ra, èita roa ta na raveà e tià. (Ìr. 33).

- E te Fatu, o vai ò ia ia faaroo atu vau ia na ? (Ìr. 36).

- E te Fatu, ua faaroo vau. (ir.37).

O teie te huru no te taata ia naeàhia i te märamarama o te Èvaneria e tià ia na ia fäì i te parau tià ma te âau tiàma i mua i te mau taata atoà. Ua òhipa te märamarama o te Atua i roto ia na i òre ai ò ia e ôtohe i  mua i te mau haamataùraa a te mau Faritea. Ia parauhia e o Ietu e taata hara, puai faahou atu ò ia i te faaìteraa e te taata ia i türama te mori i roto i to ù mata. Eita na Mote, èita atoà na te mau tahuà no Ierutarëma, hoê noa ra taata mauti ra ia o Ietu to na iòa.

I mua i te Fäìraa parau tià a teie tämaïti, e àmaha te nunaa, e te mau Faritea, e tiàturi te tahi pae, èita te tahi pae e tiàturi. Òia hoì, e faaea noa te tahi i raro aè i te faanahoraa a te pöuri tei tutauhia e te hara. Tei fäì ra e, E TE FATU, UA FAAROO VAU, ua naeàhia ia ò ia i te märamarama no te faaòreraa hara. O teie mau te hinaaro o Ietu ia tätou atoà, ia riro tätou e mau tämarii no te märamarama, èi türamaraa i te hihi o te Èvaneria i te mau vahi atoà. E märamarama ora teie ta te Fatu e parau nei, tei horoà i te òaòa i roto i te feiä atoà tei färii i taua maitaì ra. Te maitaì o teie märamarama, noa atu te faahemaraa, te mau faaöoöoraa, te mau faahaparaa, e te mau tiàvaruraa, èita rätou e ôtohe. I te mea te ora ra te märamarama o te Atua i roto ia na, e ò ia to na arataì. Ia pohe anaè ra teie märamarama i reira e o mai ai, te faariri, te ìmi peàpeà, te faatau e te vai atu ra. Ia i te ra tätou i teie märamarama e ìmi  ò ia i te mau taime atoà, te hau, te aroha, te here e te faaòromaì. I tïtauhia ai tätou i te mau tämarii no te märamarama i te patireia o te Atua.

Te märamarama i te faaìteraa a Ioane, te ìmiraa i te mau raveà atoà ia ìte te taata e o vai rä Ietu. Oia hoì, o te Tämaïti ia a te Atua. E ère e no te mea, tei pïhaì iho ò ia i to na mau taeaè e òhie ai rätou te ìte i te reira parau. Te auraa, ìte noa ai te mata, aita rä te âau e räveà e ìte ai, aita e räveà e färii ai i te ora a te Atua i haere roa mai mä te huru o te taata.

Te Tämaïti a te Atua ta na e hinaaro nei i te faaìte, o te märamarama iho ia o teie nei ao, i te parauraa e, O VAU TE MÄRAMARAMA O TEIE NEI AO,

I roto i teie reo no Ietu, te vai nei to na tüàtiraa, te märamarama e te ora o te taata, no te mea ua faatupu te märamarama i te òhipa i roto i teie nei ao, i to tätou ìteraa i te nehenehe no te mau rahu a te Atua. O ia atoà teie maì e tupu nei i ö ätou nei, ia marämarama tätou e noaa ia tätou i te ärai, i te mea te märamarama to na auraa e ora.

                                                                      

Terai or. Faatura.

Ioane 4.5-42 Päpe.

Tāpati 15 no Mati 2020.

Päpe.

Taramo 95

1 Tätou e himene i te Fatu, e himene hua tätou i te mato e ora ai tätou nei. 2 E haere tätou i mua i ta na aro mä te haamaitaì, e mä te taramo e himene hua atu ai ia na. 3 E Atua rahi hoì te Fatu. E arii rahi i nià i te mau atua atoà ra. 4 Tei ta na rima te vähi hohonu o te fenua nei, e te teiteiraa o te mau mouà ra, no na ia. 5 Na na te tai, na na hoì i hämani, e na ta na rima i hämani i te repo marô. 6 E haere mai tätou, e haamori mä te piò i raro, e tuu i to tätou turi i te aro o tei hämani ia tätou nei, i te Fatu. 7 O ia hoì to tätou Atua, o tätou hoì te nana no ta na ra âua, te mau mämoe i ärataìhia e ta na rima.  Ia tià ia òutou, i teie nei mahana i te faaroo i ta na reo 8 Eiaha e faaètaèta i to òutou âau mai tei Meripa ra, e mai tei te mahana i Mata, i te mëtëpara ra, 9 i ta to òutou mau metua i faaoôo mai ia ù ra, e ua àa mai ia ù, ìte noa ai rätou i ta ù ra mau òhipa. 10 A maha aè ra àhururaa o ù mätahiti i te oôoraa i te reira uì, e ua nä ô aè ra vau: E feiä âau hapa rätou, e aore i haapaò i ta ù ra parau, 11 o tei tapuhia e au i ta ù ririraa ra, e eiaha roa rätou ia ö i to ù ra faaearaa.

Ètoto 17.3-7

3 Ua poìhä rä te taata i reira i te pape òre; e ua amuamu hoì te taata ia Möte, e ua nä ô mai ra, E aha òe i arataì mai ai ia mätou mai Àifiti mai ia pohe mätou, e ta mätou mau tamarii, e ta mätou mau puaa atoà, i te poìhä? 4 Ua tiàoro atu ra Möte i te Fatu, nä ô atu ra, E aha vau i teie nei feiä. Rooaù aè rätou ua tuì mai ia ù i te ôfaì. 5 Ua parau mai ra te Fatu ia Möte, E haere òe nä mua i taua mau taata nei, o òe e te tahi pae o te hui mätahiapo o Ìteraèra ra, e hopoi atoà i te räau ta òe i täìri i te pape ra i to rima, a haere ai. 6 E inaha, ei nià vau i te mato i Hörepa tià atu ai i mua ia òe na; e na òe e papaì i taua mato ra, e e tahe mai te pape no roto mai ei inuraa na te taata. E ua nä reira hoì Möte i mua i te aro o te hui mätahiapo o Ìteraèra ra. 7 Maìri iho ra o ia i te iòa o taua vähi ra ia Mata, e ia Meripa, no te àvau a te tamarii a Ìteraèra, e no te mea ua faatiò rätou i te Fatu, i te nä-ô-raa e, Tei roto änei te Fatu ia tätou, e aore änei?  

Rōma 5.1-8

Te hau a te Atua

1 E teie nei, ua tiàhia tätou i te faaroo, e hau to tätou i te Atua ra, i to tätou Fatu ia Ietu Metia ra; 2 no na hoì tätou i ö ai i te faaroo i roto i teie nei maitaì i pärahihia e tätou nei, e te òaòa nei i te tiaìraa i te maitaì o te Atua. 3 Eere hoì te reira anaè ra, te òaòa atoà nei rä tätou i te mau àti nei; ua ìte hoì tätou e, na te pohe e faatupu i te faaòromaì; 4 e na te faaòromaì e faatupu i te ìte; na te ìte e faatupu i te tiaì. 5 E òre hoì te tiaì e faahaamä mai, no te mea ua niniihia mai te hinaaro o te Atua i roto i to tätou âau e te Värua Maitaì i horoàhia mai ia tätou nei. 6 I to tätou vai-paruparu-raa ra hoì i pohe ai te Metia i te tau mau ra, no te feiä paieti òre ra. 7 E òre hoì te hoê e haapohe no te tahi taata parau tià, e faaòromaì rä paha te hoê taata atu i te pohe no te taata maitaì.

Ioane 4.5-42

Âpoo päpe

5 E tae atu ra o ia i te hoê ôire i Tämäria, o Titara te iòa, tei pïhaì iho i te maa fenua a Iatöpa i horoà atu no ta na tämaïti ra no Iotëfa. 6 Tei reira te âpoo pape a Iatöpa ra. E rohirohi aè ra Ietu i te haereà, pärahi iho ra i te hiti i taua âpoo päpe ra. Ua tae i te ono o te hora ra.

Vahine Tämäria

7 Ua haere mai ra te hoê vahine Tämäria e huti i te pape; ua parau atu ra Ietu ia na

Ietu

Hö mai na e inu.

Mau pipi

8 Ua reva atu ra hoì ta na mau pipi i roto i te ôire e hoo i te mäa.

Vahine Tämäria

 9 Ua parau mai ra taua vahine Tämäria ra ia na : E aha òe te âti-Iüta na i ani mai ai ia ù, i te vahine Tämäria nei, i te pape. Eita hoì te âti-Iüta e au maitaì atu i to Tämäria.

Ietu

10 Ua parau atu ra Ietu ia na, nä ô atu ra: Ahiri òe i ìte na i ta te Atua i horoà mai ra, e tei parau atu ia òe na e : Hö mai na e inu, ua ani mai ia òe ia na, e ua horoà o ia i te pape ora no òe.

Vahine Tämäria

11 Ua parau mai ra taua vahine ra ia na : E te Fatu, aita a òe pätete, e âpoo hohonu teie. I hea ta òe pape ora e noaa ai? 12 E rahi änei òe ia Iatöpa i to mätou metua ra, o tei horoà mai na mätou i teie nei âpoo pape, e ua inu o ia iho, e ta na mau tamarii, e te mau puaa?

Ietu

13 Ua parau atu ra Ietu ia na, nä ô atu ra : O të inu i tënä na pape, e poìhä faahou ä ia. 14 Âreà të inu i te pape e horoàhia atu e au nei, e òre roa ia o ia e poìhä faahou, e riro rä taua pape e horoàhia atu e au na, ei pape pihaa i roto ia na iho, e tià i te pihaaraa e tae noa atu i te ora-mure-òre ra.

Vahine Tämäria

15 Ua parau mai ra taua vahine ra ia na: E te Fatu, hö mai na i taua pape ra na ù, ia òre roa vau ia poìhä faahou, e ia òre hoì ia haere mai i ô nei e huti.

Ietu

16 Ua parau atu ra Ietu ia na: A haere, a tii i to täne, e a hoì mai ai.

Vahine Tämäria

17 Ua parau mai ra taua vahine ra, nä ô mai ra: Aita a ù täne.

Ietu

Ua parau atu ra Ietu ia na: E parau-tià ta òe i parau mai nei e: «Aita a ù täne». 18 A toopae aè nei hoì a òe täne, e tënä na ta òe e taòto na, eere ia i te täne na òe. E parau mau ta òe i parau mai nei.

Vahine Tämäria

19 Ua parau mai ra taua vahine ra ia na: E te Fatu, e perofeta òe nei, te ìte nei au. 20 I haamori na hoì to mätou hui-metua i nià i teie nei mouà, e te parau nei òutou, tei Ierutarëma te vähi e tià ai ia haamori te taata.

Ietu

21 Ua parau atu ra Ietu ia na: A faaroo mai na, e teie nei vahine, ua fätata te hora e òre e tae mai ai òutou i teie nei mouà, e e òre hoì e haere i Ierutarëma, haamori ai i te Metua. 22 Aore òutou i ìte i ta òutou e haamori nei, ua ìte mätou i ta mätou e haamori nei, no te âti-Iüta mai te ora. 23 Ua fätata rä, e teie nei hoì taua hora, e haamori ai i te Metua te feiä haamori mau ra, mä te värua e te parau mau o te huru ia o te feiä haamori ta te Metua e tïtau nei. 24 E Värua te Atua, e te feiä e haamori ia na ra, e haamori ia mä te Värua e te parau mau e tià ai.

Vahine Tämäria

25 Ua parau mai ra taua vahine ra ia na: Ua ìte au e, te haere mai na te Metia o tei Faatähinuhia ra ia. E ia tae mai o ia ra, na na ia e faaìte mai ia mätou i te mau parau atoà ra.

Ietu

26 Ua parau atu ra Ietu ia na: O vau ia e parau atu ia òe na.

Pipi

27 I reira te taeraa mai ta na mau pipi, e mäere noa iho ra, o ia i paraparau atu i taua vahine ra; aita rä te hoê i parau atu e: E aha ta òe e ui na?, e: E aha òe i paraparau atu ai ia na?

Vahine Tämäria

28 Vaiiho iho ra taua vahine ra i ta na färii pape, haere atu ra i roto i te ôire, ua parau atu ra i te taata 29 Mai haere na e hiò i te taata i faaìte mai ia ù i ta ù mau peu atoà nei. Eere änei tërä aè te Metia. 30 Haere atu ra rätou ia na ra, mai roto mai i te ôire ra.

Pipi

31 Ua parau na ta na mau pipi ia na, nä ô atu ra: E Rapi, a àmu.

 Ietu

32 Ua parau mai ra o ia ia rätou: E mäa ta ù ia àmu aita òutou i ìte.

Pipi

33 Ua parau iho ra te mau pipi rätou rätou iho: I hopoi mai änei te taata i te mäa na na?

Ietu

34 Ua parau mai ra Ietu ia rätou: Teie ta ù mäa, o të haapaò i to na hinaaro o to tei tono mai ia ù nei, e të faaoti i ta na òhipa. 35 Eere te parau nei òutou, E maha märama toe e àuhune ai? Ìnaha, e parau atu vau ia òutou, e faateitei i to òutou mata, e hiò i te mau âua ra, ua teatea ia i teie nei ua àuhune. 36 E te taata e ôoti ra, e utuà ta na, e ua haaputu i te maitaì no te ora-mure-òre ra, ia òaòa âpipiti, o të ueue e o të ôoti. 37 Ua tupu iho nei hoì te maa parau ra e: Na te hoê e ueue, e na te tahi ê e ôoti. 38 E tono vau ia òutou ei ôoti i tei òre i òhipahia e òutou na, na vëtahi ê i òhipa, e te faaö atu nei òutou i roto i ta rätou òhipa.

Ôire.

39 E rave rahi mai ra i taua ôire ra to Tämäria i faaroo ia na i te parau a te vahine i parau atu ra e, Ua faaìte mai o ia ia ù i te mau peu atoà na ù nei 40 E tae mai ra to Tämäria ia na ra, ua täpeà mai ra rätou ia na e pärahi io rätou ra, ua pärahi iho ra o ia i reira ia piti ruì. 41 E rave rahi hoì tei faaroo i ta na iho parau. 42 Ua parau aè ra rätou i taua vahine ra: Eere atu ra i to te parau ta òe i parau mai ra i faaroo ai mätou, ìte hua aè nei mätou ia na iho; ua ìte atu ra mätou e o te Ora mau teie o to te ao, o te Metia.

Manaò.

Taramo 95, 1 E himene hua tätou i te mato e ora ai tätou nei.

Ètoto 17, 3 Ua poìhä, ua amuamu ia Möte, E aha òe i ärataì mai  ai ia pohe mätou.

Röma 5, 5 E òre faahaamä, ua niniihia mai te hinaaro o te Atua i te Värua Maitaì.

Ioane 4, 42 ìte hua aè nei mätou, ua ìte ra mätou e o te Ora mau teie o to te ao, o te Metia.

Parau

Te taiòraa e tià ia ravehia no teie täpati, teie ia i roto i te Parau Maitaì, i te mea te  tupu nei i te hoê òhipa taaê roa i roto ia Ietu e te vahine Tämaria, tei haafarëreihia e te päpe.

IOANE 4 : 5 - 42

TE APOO PAPE A IATOPA

TE VAHINE TAMARIA

TE ANIRAA A IETU 1 TE PAPE

TE PAPE ORA A IETU

IETU E TE VAHINE TAMARIA

TE POIHA O IETU, E TE VAHINE TAMARIA                                                              

TE POIA O TE MAU PIPI

TE FAAITERAA A TE VAHINE TAMARIA

IETU TE ORA O TE AO

Te ìte nei tätou i te roa o teie taiòraa, te âparauraa o Ietu e te Vahine Tämaria. Tei haamata na roto i to Ietu aniraa i te päpe i teie vahine. Te ìtehia nei i roto i teie âparauraa, te faufaa rahi o teie vahine, noa atu ä ia te tahi mau pätoìraa, mau faataaêraa, mau hunaraa. Ua tae ra teie âparauraa i nià i te hoê fäito e ìte ai teie vahine  ta na e faatià parau nei o ta te Atua ia i faatahinu. Teie ra e tià ia tätou ia haapoto i teie taiòraa ma te rave noa i te mau ìrava i muri nei, mai te 13 e tae i te 26. Tei roto i teie tuhaa te vairaa no te hohonuraa to raua mau manaò. Teie ra te tuatapaparaa te taatoàraa ia o te taiòraa.

Te päpe ta teie vahine e huti nei e poiha faahou  ä ia o ia,

Te päpe ta Ietu e horoà e òre ia e poiha faahou,

Te vahi e haamori ai i te Atua, èita tei nià i te mau mouà atoà, ia haamorihia ra te Atua ma te Värua e te parau tià, 

Hoê noa Atua te haamori èita e pae,

Te vahine Tämaria ìteraa o te Metia teie, tei rahi ia Iatopa,

Te mau pipi ua poìa, ua paìa o Ietu,

Te riroraa te vahine Tämaria èi Haapii Parau Maitaì i roto ia Titara,

Te tiàturiraa to Titara o Ietu te Ora o teie ao.

Teie te huru no te âparauraa a Ietu e te Vahine Tämaria, e âparauraa tei manuia maitaì, i te mea ua riro teie vahine, èi rave òhipa atoà na Ietu te haaparari i te mau patu faataa ê i ropu i te mau Àti Iuta e to Tämaria.

Ei haapotoraa i ta tatou parau

1) Te poiha päpe,

2) Te haamoriraa ma te varua parau  tià,

3) Te poìa o te mau pipi,

4) TE faaìteraa a te vahine Tämaria,

5) Ietu te Ora o teie ao.

* TE TATUHAARAA O TE PENE PARAU *

*************************************

Ìrava 5 – 6.      Te Apoo Päpe a Iatopa i Titara no te fenua ra o Tämaria

Ìrava 7 – 15     Te Poiha o Ietu e te poiha o  te Vahine Tämaria

Ìrava 16 – 26   Ia haamorihia te Atua ma te Pure

Ìrava 27 – 38   To te  mau pipi hoìraa mai ma te maa, e te maere i te paìa o Ietu.

Ìrava 39 – 42   Te Fäìraa Faaroo a to Tämaria. Ua ìte atu ra mätou e, o te Ora mau teie o to te ao o te Metia

Ia hiò maitaì anaè tätou i teie tätuhaaraa, e ìtehia te hoê täuiraa e vai ra i roto i te âparauraa a Ietu e te Vahine Tämaria e tae noa atu i te mau pipi. Teie färereiraa i pïhaìiho i te ùtu no te àpoo pape a Iatopa ta na i horoà na ta na tämaïti o Iotëfa. I reira mau te ômuaraa ta tätou parau. Na te pätete òre a Ietu i faatupu teie äniraa e horoà mai ia inu au. E tià ia tätou ia parau e na teie pätete i ìriti te ùputa no te tauàraa parau. Te poiha o Ietu i te päpe e haamahahia ò ia na roto i to na tïtauraa i teie vahine e färiu i nià i te Atua tei horoà i te Ora. E to na poìa e haamahahia ia e te maa varua, o ta teie vahine i tiàturi.

Òre roa aè ra te poiha o te vahine Tämaria i te pape täpatete, inu iho ra i te pape täpatete òre. E riro aè ra ò ia e ìte no te Atua i roto i to na nunaa, tiàturi iho ra rätou o Ietu te Metia.

 TE TUATAPAPARAA - IOANE 4 : 5 - 42

* Ìrava 5 - 7 v.m.

E tae atu ra Ò ia i te hoê òire i Tämaria o Titara te iòa tei pïhaìiho i te maa fenua o Iatopa i horoà atu no ta na tämaïti ra no Iotëfa tei reira te àpoo päpe a Iatopa ra ; e rohirohi aè ra o Ietu i te haereraa, pärahi iho ra i te hiti i taua àpoo päpe ra, ua tae i te ono o te hora ra (12) ua haere mai ra te hoê vahine Tämaria e huti i te pape.

 TE APOO PAPE

Ia taiò maitaì anaè tätou i teie tuhaa, e ìte tätou i te àravihi o Ioane i te päpaìraa te òhipa e tupu nei i roto i te hoê tau atea, te tau no Iatopa, te tau, no Iotëfa, te tau no Ietu, e tae mai i teie mahana. Te horoà mai nei o Ioane i te hoê hohoà ora, no te òhipa e tupu ra i te hiti no teie àpoo päpe. Te horoà nei teie àpoo päpe  i te hau no tei poiha i roto i te mau taata atoà tei rohirohi, e  tae noa atu i te mau ànimara. E teie àpoo päpe te vai noa mai ra e tae roa mai i teie mahana.

E rohirohi to Ietu i te haere-noa-raa i raro aè i te hoê mahana puai, mai te poìpoì o na e ta na mau pipi te haere-noa-raa, ua tae i te avatea, te taime puai o te mahana. Ua poìa rätou, ua poiha, èita e tano faahou ia haere i mua, e faaea rii rätou i reira, e aita ta rätou e pätete hutiraa i te päpe, e àpoo hohonu hoì teie tei naeàhia e 32 metera.

Teie mai nei te hoê vahine no taua vahi ra no Tämaria, ta na färii päpe i nià i ta na upoo, e ta na pätete e te taura i ta na rima. Ua mätau maitaì teie vahine i te haere i teie hora, te taime taata òre, e i taua mahana ra te vai ra te hoê taata i reira tei òre roa ò ia i mätau ia na. E taata âpï i roto i to na òire no Titara, tei äni atu ia na i te päpe.

* Ìrava 7 v.h. - 10

Ua parau atu ra Ietu ia na, ho mai na e inu. (Ua reva atu ra hoì ta na mau pipi i roto i te òire e hoo i te maa) ua parau mai ra taua vahine Tämaria ra, ia na, e aha oe te Àti Iuta na i äni mai ai ia ù i te vahine Tämaria nei i te päpe, èita hoì te Àti Iuta e au maitaì atu i to Tämaria.

TE ANIRAA A IETU

Ietu te taata tiàma, aita to na e ènemi ua ènemihia ra Ò ia. Teie Ò ia e vävähi nei te patu e faataa ê nei te Àti Iuta e to Tämaria. To Tämaria e feiä ia tei faataa ê ia rätou tei naeàhia e vaù ui taata i maìri a tae atu ai o Ietu i reira. Ta rätou haamoriraa o te mau atua Ìtoro ia. Èita hoì e tià ia àparau te taata Tämaria e te Àti Iuta.

No Ietu ra, aita Ò ia e faariro nei teie mau fifi èi fifi, o ta na ra e hinaaro nei ia marua teie patu e faataa ê nei. I tià ai i teie vahine i te parau atu ia Ietu.

* Ìrava 11 - 15

Ua parau mai ra taua vahine ra ia na, e te Fatu, aita ta òe e pätete, e àpoo hohonu teie, e aha ta òe päpe ora e noa ai, E rahi anei òe ia Iatopa i to mätou metua ra, o tei horoà mai na mätou i teie nei àpoo päpe, e ua inu o ia iho, e ta na mau tämarii e te mau puaa. Ua parau atu ra Ietu ia na, na o atu ra o te inu i te na na päpe, e poiha faahou a ia. Àreà te inu i te päpe e horoàhia atu e au nei, e òre roa ia ò ia e poiha faahou, e riro ra taua päpe e horoàhia atu e au na, èi pape pihaa i roto ia na iho, e tià i te pihaaraa e tae noa atu i te ora mure òre. Ua parau mai ra taua vahine ra ia na e te Fatu, ho mai na i taua päpe ra na ù ia òre roa vau ia poiha faahou e ia òre hoì ia haere mai i o nei e huti.

TE ANIRAA A TE VAHINE TAMARIA

Te faaroo ra o Ietu i te manaò mätamua o teie vahine, òre roa aè ra to na poiha e to na poìa. I te mea o ta na e tiaì ra ua parauhia mai ia e teie nei vahine, e àpoo päpe teie  na to mätou metua o Iatopa. Päpü maitaì atu ra ia Ietu èita ò ia i te taata ê i teie nei vahine, e teie àpoo päpe e tià atoà ia na ia inu i reira.

Te päpe i ta Ioane faaìteraa e täpaò ia no te ora, e, e horoà hoì te reira na te Atua.

Te pape ora o te hohoà mau ia te reira no te Atua, ia au te faaìteraa a,  Ieremia 2 : 13 ; Ìtaia 12 : 3, 55 : 1 ; Etetiera  47 : 1; Tetaria 14 : 8...

Te pape tei tauihia èi uaina te ôroà faaipoiporaa Tana... Ioane 2 : 7...

Te pape hopu no Peteteta... Ioane 5

Te pape tei faaora no Tiroama... Ioane 9 : 7...

Te pape ora no roto mai la  Ietu... Ioane 7 : 38

Tei fänau i te päpe e te Värua te parauhia ia Nitotemo. ..Ioane 3 : 5...

Te päpe tei manii mai, mai te àoào o Ietu... Ioane 19 : 34……

Teie te päpe ora pihaa e vai nei i roto i te âau o Ietu, te òre roa e pau.

No te vahine Tämaria te ìte nei ò ia te hohonuraa no te parau a Ietu e, TE INU I TE NA NA PÄPE E POIHA FAAHOU A IA, AREA TE INU I TE PÄPE TA Ù E HOROA ATU E ÒRE ROA IA E POIHA FAAHOU. O te piti ia o te manaò o teie vahine te äniraa ia Ietu e ho mai na i taua päpe ra, teie päpe èita i te mea täpatete, èita atoà e 32 metera te hohonu, èita atoà i te mea ta taura. Te pätete no teie päpe ta Ietu o te âau ia o te taata, te taura huti te Faaroo ia ua oti atu ai, e te àpoo èita atoà i te mea hohonu roa, i roto i te mau taata faaroo atoà te vai ra taua päpe pihaa ra i te taime a päpetitohia òia.

* Ìrava 16 - 26

Ua parau atu ra Ietu ia na a haere, a tii to tane, e a hoì mai ai, ua parau mai ra taua vahine ra na o mai ra aita à ù e tane. Ua parau atu ra Ietu ia na, e parau tià ta òe i parau mai nei e, aita à ù e tane. A toopae aè nei hoì a òe tane e te na na ta òe e taòto na e ère ia i te tane na òe, e parau mau ta òe i parau mai nei. Ua parau mai ra taua vahine ra ia na, e te Fatu, e perofeta òe nei, te ìte nei au. I haamori na hoì to mätou hui metua i nià i teie nei mouà e te parau nei òutou tei Ierutarëma te vahi e tià ai ia haamori te taata. Ua parau atu ra Ietu ia na, a faaroo mai na, e teie vahine, ua fatata te hora e òre e tae mai ai òutou i teie nei mouà, e  òre hoì e haere i Ierutarëma, haamori ai i te metua. Aore òutou i ìte i ta òutou e haamori nei, ua ìte mätou i ta mätou e haamori nei no te Àti Iuta mai te ora. Ua fatata rä e teie nei hoì taua hora, e haamori mau ra ma te Värua e te Parau mau o te huru ia o te feiä haamori ta te metua e tïtau nei. E Värua te Atua, te feiä e haamori ia na ra e haamori ia ma te Värua e te parau mau e tià ai. Ua parau mai ra taua vahine ra ia na, ua ìte au e, te haere mai na te Metia (o te faatähinuhia ra ia). E ia tae mai ò ia ra, na na ia e faaìte mai ia mätou i te mau parau atoà ra. Ua parau atu ra Ietu ia na o vau ia e parau atu ia òe na.

TE HAAMORIRAA Eiaha tätou e manaò e, E pae tane ta teie vahine, e pae ra atua ta na e haamori nei. E mau atua teie no Atura, tei  taìtaìhia mai,  mai Päpuronia mai.

1) TUTOTA – PENOTA      E atua teie no te mau fare o te mau pötii

2) TUTA - NERETARA        Na atua ê atoà teie tei òre i päpü te auraa, te parauhia ra e na atua teie

3) HAMATA - ATIMA        Tiaì i te vahi o te pohe.

4) AVA - NIPEHATA          Teie na atua hoê no te ruì, e hoê no te paruru….II Arii 17 : 24 – 31…

5) TARATATA                     Teie to mau tane ra a te Vahine Tämaria.

E tià ia parauhia 158 mätahiti te mäoro te vai-noa-raa to Tämaria mai teie te huru, i te au-òre-raa i te Àti Iuta. Te tumu no nià ia i te oraraa faaroo, ua tutuìhia te fare pureraa a to Tämaria i nià i te faaueraa a te mau tahuà no Ierutarëma, ia au te mau tuatapaparaa. O Teretima te mouà i faatiàhia teie fare pure i te 332 hou o Ietu Metia. E i te mätahiti 128 hou o Ietu Metia i tutuìhia ai. Na roto i teie mau ìrava 16 e faaèa i te ìrava 26, ua mäheu te parau no te haamoriraa ìtoro a te nunaa Tämaria, na roto i teie vahine. Ta rätou vahi haamoriraa i nià i te mouà, ua faa-òre-roa-hia, i te mea aita te reira i au i te mau tahuà no Ierutarëma.

Te parau nei ra o Ietu, i teie vahine e haamori i te Atua ma te Parau mau e tià ai. Èita i te mea tià ia haamorihia te Atua na roto i te rave peu-noa-raa. E ua ìte teie vahine, e perofeta o Ietu, e Metia. Te poiha o teie vahine ua haamahahia, te veàveà o te mahana, ua haahaumaruhia e Ietu. Te päpe ta te Vahine Tämaria i hinaaro e poiha faahou a  ia ò ia, te päpe ora i noaa ia na, èita ia e tano ia tuuhia i roto i te pätete e naìnaì roa te färii, hoê noa färii to teie pape maoti ra ia to tätou âau .Te haapäpü nei o Ietu i te reira, o vau ia e Parau atu ia oe na.

* Ìrava 27 - 30

I reira te taëraa mai ta na mau pipi, e maere noa iho ra, ò ia i paraparau atu i taua vahine ra ; aita ra te hoê i parau atu e, e aha ta òe e ui na ? E aha òe i paraparau atu ai ia na ? Vai iho atu ra i taua vahine ra i ta na färii pape haere atu ra i roto i te òire, ua parau atu ra i te taata mai haere na e hiò i te taata i faaìte mai ia ù i ta ù mau peu atoà nei, e ère änei tera aè te Metia, Haere atu ra rätou ia na ra mai roto mai i te òire.

 TE MAERE O TE MAU PIPI, TE FAAITERAA A TE VAHINE TÄMARIA

No te mau pipi te uiui nei ia rätou te òhipa a Ietu e rave nei. Te âparauraa i teie vahine èita i te mea tià ia au te faanahoraa a te peu Àti Iuta. Aita ra rätou i ui noa atu. No te vahine Tämaria ua vai iho ò ia i ta na pätete i pïhaì iho i te àpoo päpe, te mea ta na i mätau i te rave i te mau mahana atoà, ua hoì ò ia i te òire ma te pätete òre, tei roaa ra ia na te päpe ora ia noo mai i te Atua ra, te hoê päpe tei òre roa ò ia e mätau i te inu. E päpe tei faaora ia na, i tià ai ia na i te haere i te òire no te faaìte i ta na i ìte i roto ia Ietu, ma te parau e, E ÈRE ANEI TERA AÈ TE METIA ?

E òaòa i te rahi to te Vahine Tämaria to na ìteraa i to na hape, i roto i te mau parau ta Ietu i faaìte no na. E ua riro te reira èi parau òaòa. Pii haere atu ra ò ia i teie parau òaòa, MAI HAERE NAÈ E HIÒ I TE TAATA. Ua faaìte o Ietu i te mea tano no teie vahine, e ua färii ò ia, haere mai ra to Tämaria e hiò ia Ietu.

* Ìrava 31 - 38

Ua parau atu ra ta na mau pipi ia na, na o atu ra, E Rapi, a àmu. Ua parau mai ra o ia ia rätou e maa ta ù i àmu aita òutou i ìte. Ua parau iho ra i te mau pipi rätou rätou iho. I hopoi mai nei te taata i te maa na na ? Ua parau mai ra Ietu ia rätou, teie ta ù maa, O TE HAAPAÒ I TO NA HINAARO O TO TEI TONO MAI IA Ù NEI E TE FAAOTI I TA NA ÒHIPA. E ère te parau nei òutou, e maha märama toe e àuhune ai ? Ìnaha, e parau atu vau ia òutou, e faateitei i to òutou mata, e hiò i te mau àua ra, ua teatea ia i teie nei, ua àuhune. E te taata e ôoti ra, e utuà ta na, e ua haaputu i te maitaì no te ora mure òre ia òaòa âpitipiti o te ueue, e o te ôoti. Ua tupu iho nei hoì te maa parau ra e, na te hoê e ueue e na te tahi ê, e ôoti. E tono vau ia òutou èi ôoti i tei òre i òhipahia e òutou na vëtahi ê i òhipa, e te faaö atu nei òutou i roto i ta rätou òhipa.

TE ÒOTIRAA

Aita te Vahine Tämaria i pïhaì iho ia rätou, ua haere e faaìte i ta na i ôoti mai roto atu i te Fatu o te faaàpu. Te mau pipi ra te poìa ra ia, pii atu ra ia Ietu ia tämaa âmui rätou. Riro atu ra teie reo, èi reo no te faaìte i te mau pipi e maa tei àmuhia e Ietu. Eita ra mai te maa ta rätou i tii na i te òire, e maa ra tei faatupu i te hinaaro o te Atua. Òia hoì te òaòaraa i te täviniraa i tei tono mai e faaoti te òhipa. Te manaò tumu o Ietu i ù nei, mea ru teie òhipa, aita e taime no te tämaa, aita e taime no te faaea noa, te rahi nei te àuhune. Te poto nei te taime no te ôotiraa. Teie parau te ôotiraa tei roto i te faaüraa  âpï e te faaüraa mätamua, e hohoà ia no te hora o te haaväraa, e hora no te haamaitaìraa. No te nunaa Tämaria te piri mai ra taua hora ra no te taata ôoti. I te mea e faaàpu atoà teie na te Atua i ueue i te huero maitaì, ua tae ra i te hora ôotiraa o ta te Vahine Tämaria ia i rave i o na iho. No te mau pipi ra te toe rahi noa nei te faaàpu a te Atua tei òre a i ôotihia atu ra, o ta Ietu e hinaaro nei ia ìte atoà te mau pipi i te reira, o rätou atoà te haere e ôoti e mea ru, eiaha e faataerehia, i tonohia mai ai o Ietu e te Metua, o ta na atoà ia e tono nei i ta na mau pipi e ia tätou i teie mahana.

·         Ìrava 39 - 42 :

E rave rahi mai ra i taua òire ra to Tämaria i faaroo ia na i te parau a te Vahine i parau atu ra e, ua faaìte mai òia ia ù i te mau peu atoà na ù nei. E tae mai ra to Tämaria ia na ra, ua täpeà mai ra rätou ia na e pärahi i o rätou ra, ua pärahi iho ra ò ia i reira ia piti ruì. E rave rahi hoì tei faaroo i ta na iho parau. Ua parau aè ra rätou i taua vahine ra, e ère atu ra i to te parau ta òe i parau mai ra i faaroo ai mätou, ìte hua aè nei mätou ia na iho : ua ìte atu ra mätou e. O te ora mau teie o to te ao o te Metia.

NA RUÌ E PITI O IETU I TÄMARIA E TA RÄTOU FÄÌRAA FAAROO.

Te mau tuatapaparaa ta tätou i hiò mai, aita aè i te hoê taataahiraa àvae o ta Ioane i haapou ia tätou i roto i teie àpoo päpe e 32 taahiraa. O ta Ietu i horoà ia tätou i te hoê òhipa maere rahi e te moè i mua i to tätou tiàturiraa. Te òhipa ra ta Ietu i rave te ìriti nei ò ia i mua i to Tämaria te hoê òhipa tei òre roa teie nunaa e ìte e, e tupu. Òia hoì to rätou ìteraa e o Ietu te Metia, tei ìte i roto i te hohonuraa o te âau o te taata, mai teie Vahine Tämaria. Eita ra i te faaìteraa a teie vahine i tiàturi ai to Tämaria, i to Ietu ra faaeraa i reira e piti ruì i tiàturi ai to Tämaria, teie Metia ta rätou e ìte nei, o te Fatu âpï ia noo roa mai i te Atua ra. Tei haapihaa i te päpe ora i roto i to rätou âau. E taua pihaa päpe ra ua tupu ia i roto i te âau o to Tämaria i te parauraa ia Ietu e, o te Ora mau teie o to te ao o te Metia. Te riro nei teie parau èi Fäìraa Faaroo àmui na te nunaa Tämaria. Hoê Fäìraa tei huri i te mau mea tähito i raro, teie Metia o ta rätou i faaìte hua i to rätou tiàturiraa, tei haapihaa i te ora âpï ia riro mau rätou èi ìte no te mau òhipa atoà a Ietu i rave e piti ruì i ropu ia rätou. Te vahi faahiahia i roto i teie nei Fäìraa Faaroo, aita to Tämaria i Fäì noa, no rätou, no to te ao atoà ra.

 ... Ia pihaa te Puna Ora i roto ia tatou ...

Terai òr. Faatura.