Māreto 14.66-72 To Pëtero hunaraa ia Ietu

Mahana piti 7 no Èperera 2020

To Pëtero hunaraa ia Ietu

Ômuaraa.

Teie te tahi parau ia tätou i roto i te haamoriraa, o teie mahana, te pure te parau ia no te Taramo, na tätou ra te reira e faanavaì, no te mau himene na te reira iho ùtuafare e faanaho ma te tiàma.

Himene

Māreto 14.66-72

To Pëtero hunaraa ia Ietu

(Mät 26,69-75; Ruta èv 22,56-62; Ioane 18,15-18; 25-27)

66 Te pärahi noa ra Pëtero i raro i roto i te àumoa, ua haere mai ra te hoê tävini vahine no taua tahuà rahi ra. 67 E ìte atu ra o ia ia Pëtero i te haamähanahanaraa ia na iho, ua tiàtonu atu ra o ia ia na, nä ô atu ra I reira atoà hoì òe ia Ietu i Nätareta ra. 68 Ua huna iho ra rä o ia, nä ô mai ra, Aore au i ìte. Aita atoà hoì au i ìte i ta òe e parau mai na. Haere atu ra o ia i räpaeàu i te ùputa ra. Ua âaoa iho ra te moa. 69 Ua hiò faahou atu ra te tävini vahine ra ia na, e ua parau aè ra i te feiä i tià i pïhaì iho ra, No rätou atoà teie taata 70 Ua huna faahou iho ra o ia. E mäoro iti aè ra, ua parau mai ra te feiä i tià i pïhaì iho ra ia Pëtero No rätou mau ä òe, e taata Tarirea hoì òe na, te au ra hoì to reo. 71 Ua ànatema iho ra o ia i reira ra mä te tapu, nä ô atu ra: «Aore au i ìte i tënä na taata ta òutou e parau na. 72 Ua âaoa iho ra te moa, o te piti ia o te âaoaraa, ua manaò iho ra Pëtero i te parau a Ietu i parau mai ia na ra:«E òre e tae i te piti o te âaoaraa moa, e taìtoru òe hunaraa ia ù. Ua manaò iho ra o ia i te reira mä te òto.

Manaò

E hömä e, ia ora na i te aroha o te Atua, òutou i roto i te mau ùtuafare no teie maì e tupu nei i Mäòhi Nui nei, òutou i roto i te mau fare maì, te mau täote, te mau utuütu maì, to roto i te fare täpeàraa, te mau mutoì, mau tüpohe ahi, e tae noa atu i te mau rave òhipa, e haa ra no te pärururaa i te nünaa. 

Terā mai ta tātou parau no teie mahana, taiò na. I muri aè i to Ietu tiàraa i mua i te Tuneteri, Tiripuna âti-Iuta, ua âpee o Petero i to na Fatu e tae noa atu ra o ia i roto i te âua o te tahuà rahi. I mua i tera huru no Petero, e o mai te manaò e, ua hinaaro Petero i te rave i te tahi òhipa hopeà no to na Fatu. Te auraa, ua ineine o Petero i te pupu i to na oraraa no Ietu, o ta na i âpee i te mau vahi atoà ta Ietu i haere. Eere roa atu te reira i te òhipa i tupu. Aita o Petero i âpee i to na Fatu i roto i teie hora mauiui rahi no na, i te mea e, na te atea noa o ia i te haere, hiò noa ai te mau òhipa e ravehia ra i nià ia Ietu. A taa noa atu te reira, te hiò atoà nei Petero i te mau taata i putuputu mai, i reira te tupuraa ta tātou parau. Ua rave Petero i te hoê òhipa, penei aè i to na manaò e òhipa maitaì ta na i rave, e aore ra aita o ia i ìte i te auraa, ua moè paha to na hiroà, i te huru o te mau òhipa riàrià e tupu ra i nià ia Ietu. Ua huna o Petero i to na Fatu.

No te aha. Ua moè mau anei to na hiroà. Eere anei te taiä tei iri i roto i to na àau. Na te taiä i faatupu i te pöuri i roto i to na feruriraa. Inaha hoì, ua ìte na tātou i te huru o teie pipi o Petero, e taata ièiè, e taata tei vai ineine noa i mua i te mau faaueraa a to na Fatu, te auraa, aita e taiä e vai ra i roto ia Petero. A hiò atoà na i ta na Fäìraa, O te Metia oe, te Tamaiti a te Atua ora. Tera huru parau, èere ia na te hoê taata tei î i te taiä. No reira, e ō te maere i roto ia tātou, no teie täuiraa no te huru o Petero, eita tātou e ìte märamarama i te auraa no te mau òhipa tei tupu i roto i te feruriraa o Petero. Te vai mau ra te tahi mau òhipa o te òre roa tātou e ànaanatae i te hiò, e inaha, taua òhipa te tupu ra, e ìmi tātou i te raveà e paruru ia tātou iho, i te mea e, tei nià ia tätou te fifi; o te auraa ia no te òhipa e tupu ra i roto ia Petero.

Ia ui te mau taata te tane te vahine ia Petero, e taata òe no Tarirea, e hoa rave òhipa âmui òe no Ietu, ua ìte mätou ia òe i te âpeeraa i terā taata e haavahia ra, o Ietu to na iòa. Ua pähono Petero, èere o ia. Eere a tahi roa ra o Petero hunaraa, e piti, penei aè e toru, e na te âaoa moa i faaìte ia Petero, e ua huna o ia i to na Fatu. No reira, a ära i ta tātou mau hunaraa, e mea iti paha ta Petero, e mea huru rahi paha ta tātou, èere paha ia na te moa e faaìte mai, na te taata ihoä ia e parau mai.

Te huru o Petero, èere faahou i tera huru mätamua to na, èere faahou i te tiàraa veà tono  e hohoà ra no te hoê taata tei paruparu, eiaha noa to na faaroo, te taatoàraa o to na feruriraa, no reira o ia i òto ai i te òhipa ìno ta na i rave i nià i to na Fatu. E aha te haapiiraa ta tätou e täpeà mai no teie parau, a riro ai ei tauturu ia tātou i roto i to tātou paruparu. Mai ia Petero, i muri aè i to Ietu tiàfaahouraa, ua faaâpï faahou Ietu ia Petero mai te parau ia na. Te rahi mau ra anei to òe here ia u, a faaàmu i ta ù mau mämoe. No tātou atoà, e mea tià ia tātou ia faatïtïàifaro faahou, te auraa ia ìte faahou tātou i to tātou paruparu, to tātou ìno i nià i to tātou Fatu ia Ietu.

Ia ora na

Himene

Taramo 41

1 Na te Mënätehe. Taramo na Tävita. 2 E ao to tei haapaò mai i te taata rii aroha ra, e faaorahia o ia e te Fatu i te taime ahoaho ra.3 Na te Fatu o ia e tiaì e ua faaora hoì ia na, e fänaò to na pärahiraa i te ao nei; e òre hoì òe e tuu ia na i te hinaaro o to na mau ènemi. 4 Na te Fatu e faaètaèta mai ia na i ta na roì maì ra; e na òe e heheu i to na roì i te maì-raa-hia ra. 5 Ua parau hoì au E te Fatu, aroha mai ia ù; e faaora ia ù, ua hara hoì au ia òe ra. 6 E parau ìno ta ta ù mau ènemi ia ù i teie nei A fea rä o ia nei e pohe atu ai, e mou atu to na iòa. 7 E ia haere mai te hoê e hiò ia ù ra, ua haapaìà noa mai ta na parau; te haaputu ra ta na âau i te ìno ia na iho; e ia reva ê o ia ra, e parau ai 8 Te feiä atoà i riri mai ia ù ra, te ôhumu atoà ra ia ù; te ìmi ra i te räveà e ìno ai au ra. 9 Te nä ô ra rätou, E ìno rahi teie e maìri noa mai i nià ia na e tënä na vähi ta na i taòto ra, e òre ia e tiàfaahou mai. 10 E o ta ù hoa here nei hoì i tiàturihia e au ra, tei àmu atoà i ta ù nei mäa, o tei faateitei i to na poro âvae ia ù nei. 11 O òe rä, e te Fatu, e aroha mai ia ù, e faatià ia ù i nià, ia tähoo atu vau ia rätou. 12 O te mea teie i ìte ai au e, ua here mai òe ia ù, o ta ù ènemi nei aore ä o ia i ûmere mai i nià ia ù. 13 Âreà vau nei, e tauturu mai òe ia ù i ta ù nei hapa-òre; e tuu hoì òe ia ù nei i mua i to aro e a muri noa atu.14 Ia haamaitaìhia te Atua o Ìteraèra ra, o te Fatu, mai tahito mai ä e a muri noa atu. Âmene, e âmene.

Himene

Pure a te Fatu.

Mahana piti 7 no Èperera 2020

To Pëtero hunaraa ia Ietu

Ômuaraa.

Teie te tahi parau ia tätou i roto i te haamoriraa, o teie mahana, te pure te parau ia no te Taramo, na tätou ra te reira e faanavaì, no te mau himene na te reira iho ùtuafare e faanaho ma te tiàma.

Himene

Māreto 14.66-72

To Pëtero hunaraa ia Ietu

(Mät 26,69-75; Ruta èv 22,56-62; Ioane 18,15-18; 25-27)

66 Te pärahi noa ra Pëtero i raro i roto i te àumoa, ua haere mai ra te hoê tävini vahine no taua tahuà rahi ra. 67 E ìte atu ra o ia ia Pëtero i te haamähanahanaraa ia na iho, ua tiàtonu atu ra o ia ia na, nä ô atu ra I reira atoà hoì òe ia Ietu i Nätareta ra. 68 Ua huna iho ra rä o ia, nä ô mai ra, Aore au i ìte. Aita atoà hoì au i ìte i ta òe e parau mai na. Haere atu ra o ia i räpaeàu i te ùputa ra. Ua âaoa iho ra te moa. 69 Ua hiò faahou atu ra te tävini vahine ra ia na, e ua parau aè ra i te feiä i tià i pïhaì iho ra, No rätou atoà teie taata 70 Ua huna faahou iho ra o ia. E mäoro iti aè ra, ua parau mai ra te feiä i tià i pïhaì iho ra ia Pëtero No rätou mau ä òe, e taata Tarirea hoì òe na, te au ra hoì to reo. 71 Ua ànatema iho ra o ia i reira ra mä te tapu, nä ô atu ra: «Aore au i ìte i tënä na taata ta òutou e parau na. 72 Ua âaoa iho ra te moa, o te piti ia o te âaoaraa, ua manaò iho ra Pëtero i te parau a Ietu i parau mai ia na ra:«E òre e tae i te piti o te âaoaraa moa, e taìtoru òe hunaraa ia ù. Ua manaò iho ra o ia i te reira mä te òto.

Manaò

E hömä e, ia ora na i te aroha o te Atua, òutou i roto i te mau ùtuafare no teie maì e tupu nei i Mäòhi Nui nei, òutou i roto i te mau fare maì, te mau täote, te mau utuütu maì, to roto i te fare täpeàraa, te mau mutoì, mau tüpohe ahi, e tae noa atu i te mau rave òhipa, e haa ra no te pärururaa i te nünaa. 

Terā mai ta tātou parau no teie mahana, taiò na. I muri aè i to Ietu tiàraa i mua i te Tuneteri, Tiripuna âti-Iuta, ua âpee o Petero i to na Fatu e tae noa atu ra o ia i roto i te âua o te tahuà rahi. I mua i tera huru no Petero, e o mai te manaò e, ua hinaaro Petero i te rave i te tahi òhipa hopeà no to na Fatu. Te auraa, ua ineine o Petero i te pupu i to na oraraa no Ietu, o ta na i âpee i te mau vahi atoà ta Ietu i haere. Eere roa atu te reira i te òhipa i tupu. Aita o Petero i âpee i to na Fatu i roto i teie hora mauiui rahi no na, i te mea e, na te atea noa o ia i te haere, hiò noa ai te mau òhipa e ravehia ra i nià ia Ietu. A taa noa atu te reira, te hiò atoà nei Petero i te mau taata i putuputu mai, i reira te tupuraa ta tātou parau. Ua rave Petero i te hoê òhipa, penei aè i to na manaò e òhipa maitaì ta na i rave, e aore ra aita o ia i ìte i te auraa, ua moè paha to na hiroà, i te huru o te mau òhipa riàrià e tupu ra i nià ia Ietu. Ua huna o Petero i to na Fatu.

No te aha. Ua moè mau anei to na hiroà. Eere anei te taiä tei iri i roto i to na àau. Na te taiä i faatupu i te pöuri i roto i to na feruriraa. Inaha hoì, ua ìte na tātou i te huru o teie pipi o Petero, e taata ièiè, e taata tei vai ineine noa i mua i te mau faaueraa a to na Fatu, te auraa, aita e taiä e vai ra i roto ia Petero. A hiò atoà na i ta na Fäìraa, O te Metia oe, te Tamaiti a te Atua ora. Tera huru parau, èere ia na te hoê taata tei î i te taiä. No reira, e ō te maere i roto ia tātou, no teie täuiraa no te huru o Petero, eita tātou e ìte märamarama i te auraa no te mau òhipa tei tupu i roto i te feruriraa o Petero. Te vai mau ra te tahi mau òhipa o te òre roa tātou e ànaanatae i te hiò, e inaha, taua òhipa te tupu ra, e ìmi tātou i te raveà e paruru ia tātou iho, i te mea e, tei nià ia tätou te fifi; o te auraa ia no te òhipa e tupu ra i roto ia Petero.

Ia ui te mau taata te tane te vahine ia Petero, e taata òe no Tarirea, e hoa rave òhipa âmui òe no Ietu, ua ìte mätou ia òe i te âpeeraa i terā taata e haavahia ra, o Ietu to na iòa. Ua pähono Petero, èere o ia. Eere a tahi roa ra o Petero hunaraa, e piti, penei aè e toru, e na te âaoa moa i faaìte ia Petero, e ua huna o ia i to na Fatu. No reira, a ära i ta tātou mau hunaraa, e mea iti paha ta Petero, e mea huru rahi paha ta tātou, èere paha ia na te moa e faaìte mai, na te taata ihoä ia e parau mai.

Te huru o Petero, èere faahou i tera huru mätamua to na, èere faahou i te tiàraa veà tono  e hohoà ra no te hoê taata tei paruparu, eiaha noa to na faaroo, te taatoàraa o to na feruriraa, no reira o ia i òto ai i te òhipa ìno ta na i rave i nià i to na Fatu. E aha te haapiiraa ta tätou e täpeà mai no teie parau, a riro ai ei tauturu ia tātou i roto i to tātou paruparu. Mai ia Petero, i muri aè i to Ietu tiàfaahouraa, ua faaâpï faahou Ietu ia Petero mai te parau ia na. Te rahi mau ra anei to òe here ia u, a faaàmu i ta ù mau mämoe. No tātou atoà, e mea tià ia tātou ia faatïtïàifaro faahou, te auraa ia ìte faahou tātou i to tātou paruparu, to tātou ìno i nià i to tātou Fatu ia Ietu.

Ia ora na

Himene

Taramo 41

1 Na te Mënätehe. Taramo na Tävita. 2 E ao to tei haapaò mai i te taata rii aroha ra, e faaorahia o ia e te Fatu i te taime ahoaho ra.3 Na te Fatu o ia e tiaì e ua faaora hoì ia na, e fänaò to na pärahiraa i te ao nei; e òre hoì òe e tuu ia na i te hinaaro o to na mau ènemi. 4 Na te Fatu e faaètaèta mai ia na i ta na roì maì ra; e na òe e heheu i to na roì i te maì-raa-hia ra. 5 Ua parau hoì au E te Fatu, aroha mai ia ù; e faaora ia ù, ua hara hoì au ia òe ra. 6 E parau ìno ta ta ù mau ènemi ia ù i teie nei A fea rä o ia nei e pohe atu ai, e mou atu to na iòa. 7 E ia haere mai te hoê e hiò ia ù ra, ua haapaìà noa mai ta na parau; te haaputu ra ta na âau i te ìno ia na iho; e ia reva ê o ia ra, e parau ai 8 Te feiä atoà i riri mai ia ù ra, te ôhumu atoà ra ia ù; te ìmi ra i te räveà e ìno ai au ra. 9 Te nä ô ra rätou, E ìno rahi teie e maìri noa mai i nià ia na e tënä na vähi ta na i taòto ra, e òre ia e tiàfaahou mai. 10 E o ta ù hoa here nei hoì i tiàturihia e au ra, tei àmu atoà i ta ù nei mäa, o tei faateitei i to na poro âvae ia ù nei. 11 O òe rä, e te Fatu, e aroha mai ia ù, e faatià ia ù i nià, ia tähoo atu vau ia rätou. 12 O te mea teie i ìte ai au e, ua here mai òe ia ù, o ta ù ènemi nei aore ä o ia i ûmere mai i nià ia ù. 13 Âreà vau nei, e tauturu mai òe ia ù i ta ù nei hapa-òre; e tuu hoì òe ia ù nei i mua i to aro e a muri noa atu.14 Ia haamaitaìhia te Atua o Ìteraèra ra, o te Fatu, mai tahito mai ä e a muri noa atu. Âmene, e âmene.

Himene

Pure a te Fatu.

E to mätou Metua i te ao ra.

Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Na te Atua Nui Tumu Tahi e haamaitaì mai ia tätou.

Teraì òr. Faatura.

Māreto 14.53-65 Ietu i mua i Tuneteri

Monirē 6 no Èperera 2020.

Ietu i mua i Tuneteri

Teie tahi faanahoraa no te pureraa no teie Monirë,  na òutou te mau himene e haapaò mai, te pure te taiòraa Taramo e tiàmaraa to tätou i te faanavaì mai faaitoito.

Himene

Māreto 14.53-65

Ietu i mua i Tuneteri

(Mät 26,57-68; Ruta èv 22,54-55; 63-71; Ioane 18,13-14;19-24)

53 Ua arataì atu ra rätou ia Ietu i te tahuà rahi ra, ua putuputu hoì te mau tahuà rarahi atoà, e te feiä paari, e te mau päpaìparau i reira. 54 Ua pee atu ra Pëtero ia na i muri ê atu, e tae atu ra i te àumoa i te fare o te tahuà rahi ra. Pärahi iho ra e te mau tävini atoà, i te haamähanahanaraa ia na iho i te auahi.55 Te ìmi ra te mau tahuà rarahi, e to te Tuneteri atoà i te ìte ia Ietu ia faahapa atu rätou ia na ia pohe; aita rä i ìteä. 56 E rave rahi hoì tei tuu mai i te parau haavare ia na, aore rä ta rätou parau i tià. 57 Ua tià aè ra e toofanu, ua tuu mai ra i te parau haavare ia na, nä ô mai ra. 58 Ua ìte mätou ia na i te parauraa e, E vävähi au i teie nei hiero i hämanihia e te rima nei, e ua ruì toru anaè ua faatià ia vau i te tahi aore i hämanihia e te rima. 59 E aita atoà ta rätou parau i tià i reira. 60 Ua tià aè ra te tahuà rahi ra i röpü, ua ui mai ra ia Ietu, nä ô mai ra, Eita òe e parau mai i ta teie nei mau taata e parau ia òe nei. 61 Te mämü noa ra rä o ia, aore roa i parau noa atu. Ua ui faahou mai ra te tahuà rahi ia na, nä ô mai ra, O te Metia änei òe, te Tamaiti a tei haamaitaìhia ra 62 Ua parau atu ra Ietu O vau ia, e ìte òutou i te Tamaiti a te taata i te pärahiraa i te rima àtau o te Atua mana, e te haereraa mai nä roto i te ata o te raì ra. 63 Ua hahae iho ra taua tahuà rahi ra i to na àhu, nä ô atu ra, E aha atu ä to tätou ìte? 64 Ua ìte aè nei òutou i ta na faainaina Atua. E aha to òutou na manaò. Ua parau faahapa mai ra rätou atoà ia na, e e au ia na te pohe. 65 Ua tufa atu ra te tahi pae i te huare i nià ia na; haapüroù atu ra te tahi pae i ta na mata e ua moto atu ra ia na, nä ô atu ra. A faaìte mai na i tei moto ia òe na. Ua pöàra atu ra te mau tävini i te päpärià.

Himene

Manaò.

Na te haavare i ärataì te feruriraa a te Tuneteri, no te faahapa ia Ietu, na te riri o te tahuà i faaoti te pohe o Ietu.  Te reo o Ietu, O vau ia, e ìte òutou i te Tamaiti a te taata i te pärahiraa i te rima àtau o te Atua mana, e te haereraa mai nä roto i te ata o te raì ra. Ua tià te parau a Ietu, i riri ai te tahuà rahi i te parau mau, ua tufa mai ra te tahi pae i te huare, ua püroù i ta na mata, ua moto mai ra, pöàra mai ra ta na päpärià. Te manaò ra te Tuneteri e te mau tuhuà, te mau ra rätou i te parau no te faahapa e no te haapohe ia parau te hoê taata, e tämaïti o ia na te Atua Nui Tumu Tahi. Te Tämaïti a te taata na na iho o na i parau i teie tiàraa, no te faaìte ia i te türamaraa a te fenua, i te vahi no reira mai te taata i taata ai i te repo fenua. 

I mua i te mau parau e faahitihia ra te tahi fifi ta Ietu e faaìte i te taata ia au te päpaìraa a Ioane i te pene 5 i te mau ìrava 39 e te 40, te ìmi na òutou i te parau i päpaìhia ra no te mea te manaò na òutou, e noaa te ora mure òre i reira ; te faaìte ra te reira mau parau ia ù, eita rä hoì òutou e haere mai ia ù nei, ia noaa te ora mure òre. Mai te peu te faufaa o te parau, te faatupuraa ia i te märamarama, mai te peu te reira märamarama tei te tahi vähi ê atu i ta te taò e parau ra, te päpü atoà ra ia tätou e, te taata e faaea noa i nià i te taò, ua ère ia i te märamarama e te ora tei riro taua märamarama ra ei faaìte. Mai te peu te parau a te Atua, oia te parau i päpaìhia, te faaìte ra ia Ietu, eita te reira parau e hope noa i reira. O Ietu iho hoì të nä ô ra e  ia ìte to te ao e, na òe au i tono mai Ioane i te pene 17 i te ìrava 23. Te auraa, te hopeàraa o te parau o Ietu, eiaha te ôtià o to na parau, te taime rä e tupu ai te täatoàraa o te täpura òhipa no reira o ia i tonohia mai ai i te ao nei, oia hoì i roto i to na nünaa Ioane pene 1 ìrava 11, te faaìteraa ia i te Atua. Te au noa ra teie huru to Ietu i te mea ta Ioane Päpetito e parau ra no na iho i mua ia Ietu  E tupu o ia i te rahiraa, e hoì rä vau i te ïtiraa Ioane pene 3 ìrava 30. I haamoè ai o Ioane ia na, ei räveà ia e ìtehia ai te rahi o Ietu. Te òhipa atoà ia ta Ietu i rave no te Atua Metua. I mua i te tahi parau, te mea faufaa, eere to tätou manaò, to tätou tüàti òre, to tätou färii òre, to tätou rä ineine i te haere i te vähi ta te parau e faaìte ra, e te faatupuraa i te mea tei hinaarohia tätou ia rave. Ia pätoì tätou i te ôpuaraa a te Atua, e riro te reira i te faatupu i te riri o te Fatu mai ta na i faaìte i te mahana o ia i tamaì ai ia Pëtero tei tämata i te pätoì i to na pohe Mätaio  pene 16  ìrava 23. E riro to tätou mau manaò faaapiapi i te ôpuaraa a te Atua i te faariro ia tätou ei ènemi no te Atua. Mai te ôfaì i faaruèhia e te feiä patu Taramo 118 ìrava 22), ua faariro te Atua i te ano e te faufaa òre o te fenua ei färii, ei àpu no ta na ôpuaraa faaora, ua tähiti o ia i te pöuri e täpoì ra i te fenua ei vähi tupuraa no te märamarama, oia hoì ei vähi e òhipa atu ai te Värua o te Atua no te faatupuraa mai i te täpaò no to na aroha e to na here. Ia ora na.

Himene

Taramo 35

1 Taramo na Tävita. Faatià mai òe ia ù, e te Fatu, i te feiä i märô mai ia ù nei; tamaì tià atu òe i te feiä i tamaì mai ia ù nei. 2 A rave na i te päruru e te metena, a tià mai ai i nià a tauturu mai ai ia ù. 3 A rave na i te mähae, ia ora vau i te feiä e tii mai e hämani ìno mai ia ù ra, e parau mai òe ia ù e O vau to òe ora. 4 Ia mäheahea e ia haamä te feiä i tïtau mai ia ù ia pohe; ia faahoìhia mä te haamä e ia hepohepo te feiä i ôpua i te ìno no ù 5 Ia riro rätou mai te ota i te aro o te mataì ra; e na te merahi a te Fatu e haapuehu ia rätou 6 Ia pöuri to rätou èà tià, e te paìà; e na te merahi a te Fatu e aùaù atu ia rätou.7 Aore hoì e hara i tuu ai rätou i te märei ia ù i raro i te âpoo; aore hoì e hara i ô ai rätou i te âpoo ia pohe au. 8 E roohia o ia e te pohe manaò-òre-hia ra: o o ia iho te fifi i te märei ta na i tuu ra; o to na ia pohe mau e roohia mai. 9 E òaòa rä taù värua i te Fatu, e òaòa vau i te ora na na. 10 E riro taù mau ivi atoà ra i te parau e, E te Fatu, o vai tei au ia òe? O tei faaora i tei àti ra i te taata püai hau i to na ra, i tei haèhaa e te veve ra i te rima o te haru ra. 11 E mau ìte haavare i tià mai i nià ia ù ra, e te pari mai ra ia ù i tei òre i ìteä e au ra. 12 Te tähoo mai nei rätou i te ìno i te maitaì na ù ra ia faaèrehia vau. 13 O vau nei rä, ia rätou i pohe i te maì ra, ua àhu vau i te àhu òto; ua faahaèhaa vau mä te haapae i te mäa, ua hoì mai ra rä ta ù nei pure i roto i to ù iho nei âau 14 Mai te tauà ra, e mai te taeaè ra ta ù haapaòraa; mai tei mihi i ta na metua vahine, i piò ai au i raro mä te òto. 15 Taua òtoraa no ù ra, te òaòa ra rätou e ua âmui aè ra. E ua âmui te feiä faaìno ia ù, e aore au i ìte; e ua hahae mai rätou ia ù nei e aore i faaea. 16 I rotopü i te mau taata taiàta tähitohito ra, te âàtiraa mai to rätou poà ia ù. 17 E te Fatu, mai te aha ra te mäoro o to òe tià matäteà mai ia ù? Faaora òe i taù värua i te pohe ta rätou i ôpua ra, ta ù värua i tënä na mau riona âpï ra. 18 E haamaitaì au ia òe i roto i te âmuiraa rahi ra i reira; e ârue au ia òe i te aro o te taata atoà e rave rahi. 19 Eiaha te mau ènemi haavare ia ù ra ia òaòa ia ù; eiaha tei riri hara òre noa ia ù nei e faahipahipa i te mata ia ù 20 Aore roa hoì a rätou e parau hau ia parau, te ìmi ra rä rätou i te haavare i te feiä pärahi noa i te fenua ra. 21 Ua hämama hua to rätou vaha ia ù, e ua nä ô Àitoa, àitoa. Ua ìte atu ra to mätou mata i ta mätou i hinaaro. 22 Ua hiò mai òe, e te Fatu, eiaha e mämü noa; e te Fatu, eiaha òe e faaätea ê atu ia ù nei. 23 A ara, e taù Atua, e faatià mai ia ù; e faaaraara òe, e te Fatu, i ta ù nei parau. 24 E hiò mai òe ia ù, e te Atua, e te Fatu, i te parau-tià na òe ra, e eiaha ta ù mau ènemi ia òaòa ia ù. 25 Òi parau rätou i roto i to rätou âau e Àitoa Ua noaa to mätou hinaaro, òi parau hoì rätou e. Ua pau o ia i te horomiihia e mätou. 26 E roohia-atoà-hia e te haamä e te hepohepo tei òaòa i to ù nei pohe; e vehihia rätou i te haamä e te faaìno tei faateitei ia rätou iho ia ù nei. 27 E ûmere rä e  òaòa tei faatià i te parau tià na ù nei. E òre hoì rätou e faaea i te parau e. Ia faarahihia te Fatu, o tei mauruüru i te maitaì o ta na tävini. 28 Ei reira taù vaha e parau ai i te parau-tià na òe, e ua tämau mäite i te ârue ia òe.

Himene

Pure a te Fatu.

E to mätou Metua i te ao ra.

Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Na te Atua Nui Tumu Tahi e haamaitaì mai ia tätou.

Mātaio 21.1-11 O vai teie Pureraa no te täpati 05 no Èperera 2020

Tāpati 5 Èperera 2020.

MAU ÂMĀA

O vai teie

Ôroà

Ômuaraa

Ia ora na, teie te tahi haamoriraa i roto i te ùtuafare, e täpati ôroà teie naò noa ia tätou e, i ta tätou tämäaraa avatea, haamanaò noa ai tätou te maa i faaineinehia e tätou ua haamaitaìhia e te Atua i roto i ta na Rähu ta tätou ia ôroà. Te toru teie no te täpati te ôpaniraa ta tätou mau fare pure a te Ètärëtia Porotetani Mäòhi, no teie maì e tupu nei i roto ia Mäòhi Nui nei, e teie ao.

E täpati teie no te mau âmaa, e parau ia te haamanaò mai ia tätou i te hoê òhipa tei tupu na i roto i te oraraa o te taata, ta tätou e faanaho nei e vaù mahana, no te taiòraa i te pipiria, no te faarooraa i te mau parau no Ietu te Metia, te Tämaïti a te Atua Nui Tumu Tahi. I te faraite poheraa te haapaeraa maa ia, haapae te maa, te päpe, te àvaava, e faaapiapi i te tupuraa te mau hinaaro e te mau tïtauraa a te Atua i roto ia tätou ia tupu ra to na hau. No te tahi noa maa taime ïti te haapae, hora vaù i te poìpoì e àvari i te hora piti i te taharaa mahana. I te täpati no te tiàfaahouraa, te haamanaò mai ra te reira ia tätou ua upootià te ora i nià i te pohe ua fäti to na tara i te puai Mana o te Atua Nui Tumu Tahi. Na te mau taiòraa e maha no teie mahana e ärataì ta tätou haamoriraa. No te mau himene tiàmaraa to tätou, ia faanaho te mau himene e au ia òutou.

Himene F

Ietu te mäama

Ietu a toko mai

Ia mätou tei tihe mai

I te nei pure ia

Te mäama, Tane : te mäama

No òe e Ietu, Tane : òe e Ietu

No òe mätou

I tihe mai ai (x2)

            A kaòha mai.

Taramo 22

1 Na te Mënätehe, i nià i te Àireta Tahara. Taramo na Tävita. 2 E ta ù Atua, e ta ù Atua, e aha òe i faaruè mai ai ia ù? E aha òe i faaätea ê atu ai i te tauturu ia ù nei? E te haapaò òre mai i to ù nei ûuru? 3 E ta ù Atua, te tiàoro nei au i te ao, aita rä òe i parau mai; e te ruì hoì, aita rä o ù e mäpuhiraa aho. 4 Òe rä Tei Moà ra, e tei pärahi i roto i te haamaitaìraa o Ìteraèra. 5 I tiàturi na to mätou hui-metua ia òe, ua tiàturi rätou, e ua faaorahia rätou e òe; 6 ua tiàoro rätou ia òe, e ua faaorahia; i tiàturi na ia òe, e aore i mäheahea. 7 E toè rä vau nei, eere i te taata, e faaìnoraa na te taata, e ta te taata ia tähitohitoraa. 8 Te feiä atoà e hiò mai ia ù nei, te àta tähitohito mai ra ia ù; ua fäita i te ùtu, e ua ueue rätou i te upoo. 9 Te na ô mai ra rätou: Oia nei, te tiàturi nei ia i te Fatu, ia faaora o ia ia na; tii mai o ia e haru ia na. Inaha, e here hoì o ia na na. 10 Na òe au i rave mai mai roto i te ôpü, o to ù ia tiàturiraa, a òte ai i te ü o ta ù metua vahine ra. 11 Ua tuuhia atu vau ia òe mai ta ù fänauraa mai ä; o ta ù Atua hoì òe mai te ôpü mai ä o ta ù metua vahine. 12 Eiaha e faaätea ê atu ia ù, ia fätata mai te àti ra; e aita atu e tauturu ia tauturu mai 13 E rave rahi te puaatoro e haaàti mai ia ù nei;  te mau puaatoro àito o Pätäna teie e haaàti mai ia ù nei. 14 Te hämama mai ra to rätou mau vaha ia ù, mai te riona ûuru ra ia ìmi i te mäa.15 Mai te pape e niniihia ra vau, e ua paruparu ta ù mau ivi; mai te täpau nei ta ù âau, ua tärapape i roto i ta ù ôpü nei. 16 Ua maro to ù püai mai te àraea a te pötera ra; ua piri ta ù arero i ta ù taa; e ua tuu òe ia ù i raro i te repo pohe ra. 17 Ua haaàtihia vau e te ùrï ra; ua haapunihia vau i te âmuiraa taata ìno ra; ua puta o ù puè rima e o ù puè âvae ia rätou. 18 E taiò noa vau i o ù mau ivi. Te hiò mai ra rätou, te tiàtonu mai ra ia ù, 19 ua tufa rätou i ta ù mau àhu ra no rätou, e te haa-maìri-terero nei i ta ù pereue.  20 Eiaha òe, e te Fatu, e faaätea ê atu ia ù nei; e ta ù püai, ia peepee mai òe i te tauturu mai ia ù. 21 E faaora òe ia ù i te òè nei, eiaha vau ia riro i te püai o te ùrï. 22 Ia ora vau i te vaha o te riona, ua faaora hoì òe ia ù i te tara o te reema ra. Ua pähono mai òe ia ù: 23 E faaìte au i to iòa i to ù ra mau taeaè; ei rotopü i te âmuiraa ra e haamaitaì atu ai au ia òe: 24 O òutou o tei mataù i te Fatu ra, e haamaitaì òutou ia na. Òutou atoà te huaai o Iatöpa, o ia ta òutou e faahanahana. O òutou atoà te huaai o Ìteraèra ra, e mataù òutou ia na 25 aore hoì o ia i vahavaha, aore hoì i faaìno i te àti o te feiä i àti ra; e aore hoì i huna i to na mata ia na, ia tiàoro rä o ia ra, ua faaroo mai ra o ia ia na 26 O òe ta ù e haamaitaì i roto i te âmuiraa rahi ra. E rave au i ta ù i èuhe ra, i te aro o te feiä e mataù ia na ra. 27 E àmu te feiä haèhaa e ia paìa O tei ìmi i te Fatu ra e haamaitaì rätou ia na, e vai ä te ànaanaea o to rätou âau. 28 To te fenua nei e tae noa atu i te hopeà ra, e riro ia i te manaò e ua färiu mai i te Fatu. E hope te mau fëtii a te ao nei i te haamori i mua ia òe. 29 No te Fatu hoì te Pätireia, e o ia te tävana i te mau fenua atoà. 30 E àmu te feiä taoà o te fenua nei, e e haamori; e te feiä atoà e tae i raro i te repo, e piò ia i mua ia na, e e òre e tià i te hoê ia faaora ia na iho ra. 31 Na te tahi pae huaai e faaroo ia na,  e e parauhia ia ei taata no te Fatu: 32 e haere mai hoì rätou e faaìte i ta na ra parau-tià i te tahi mau taata èê ra ia fänau mai, na na hoì teie i rave.

Himene Ruàu. G

Aroha mai òe ia ù e, te Atua e (x2)

(Faahoì.)

Aroha mai i

Aroha mai òe ia ù te Atua e

Tei raro aè mätou

To marü pererau e.

Ua ineine roa ta ù âau e

Te tiaìraa atu ia òe (x2).

Ìtaia 50.4-7

4 Ua horoà mai te Fatu ra o te Fatu ia ù i te arero o te feiä ìte ia, e haru mai i parau atu i te parau au i tei rohirohi ra. Te faaära nei o ia i tërä poìpoì, i te poìpoì, te faaära nei o ia i ta ù tarià, ia haapaò vau mai te taata e haapii ra. 5 Ua haafätata te Fatu ra o te Fatu i ta ù tarià, e aore hoì au i pätoì atu; aore hoì au i ôraì tià i muri. 6 Ua tuu noa atu vau i ta ù tua i te feiä i täìri mai; e ta ù päpärià i te feiä i huhuti i te ùmiùmi; aore hoì au i huna ê atu i te vahavaha e te tufatufa haere. 7 E tauturu mai ä te Fatu ra o te Fatu ia ù; i òre ai au i haamä ai; i haamau ai au i ta ù mata mai te ôfaì ra; ua ìte hoì au, e òre au e haamä.

Himene C

Sur ce chemin de douleur et de pleur

Ton cœur ton corps mon Seigneur

A fouler la terre

Jusqu’à verser ton sang

Précieux trésor

Vie nouvelle pour nous rebelle

Inu cao manylo

Cao manylo, cao manylo

Inu cao manylo, cece waein

I nià i te èà

No te roimata

Ua ìte au ia òe

E ta ù Fatu

Te toto tei manii

No ta ù mau hara

E ora âpï

No te hämani maitaì

Ia òe te Fatu

Òe te Fatu, Òe te Fatu

Te tura e te hanahana rahi

Firipi 2.6-11

6 O te huru ia o ia no te Atua, e aore o ia i parau e haru töroà ia fäito atoà o ia i te Atua. 7 Haapae atu ra rä i to na iho, rave atu ra i to te tävini ra huru, i te fänauraa mai mä te huru o te taata nei. 8 E no te mea o ia i ìteä mai te taata nei i te huru, ua faahaèhaa o ia ia na iho, i te haapaò-mäite-raa e tae noa atu ra i te pohe, i te pohe tätauro ra. 9 I faateitei roa atu ai te Atua ia na, e ua horoà hoì i te iòa i hau ê roa i te mau iòa atoà nei no na; 10 ia tuu te mau turi atoà i raro, to te raì, to nià i te fenua e to raro aè i te fenua, i te iòa o Ietu ra; 11 e ia fäì te mau vaha atoà, e o Ietu Metia te Fatu, e hanahana atu te Atua Metua ra.

Himene C

T : IE IE IE IE, HO

A : Faaroo aè au

To òe reo ïti

Na roto i ta ù

Ôrama ïti e

E ta ù here ïti e Ietu e

Haere mai, haere mai E he he

T : TU  TU A

V : tiaì nei  au

T : TU TU A

Tiaì nei au

T ; TU TU E

A : E ta ù here ïti e Ietu e

Haere mai, haere mai E he he

Mātaio 21.1-11

To te Metia tomoraa i roto ia Ierutarëma

(Mär 11.1-11; Rut 19.28-40; Ioa 12.12-16)

1 E fätata mai ra Ierutarëma ia rätou, ia tae rätou i Petefäte, i te mouà ra o Òriveta, ua tono aè ra Ietu i e toopiti puè pipi a ana ra, 2 nä ô atu ra: E haere ôrua i tërä aè ra ôire ïti i mua ia ôrua, e e ìte ôrua i te hoê âtini ufa, ua fëtiihia, e te fanauà i pïhaì iho; e tätara e pütö mai i ô nei ia ù nei. 3 E ia parau noa mai te tahi taata ia ôrua, e parau atu ôrua: Tei hinaarohia mai ra e te Fatu, e na na ia e tuu noa mai i reira ra. 4 Ia tupu te parau a te perofeta ra i nä-reira-hia ai, o tei nä ô mai ra e: 5 A parau atu i te tamahine o Tiona: Inaha, te haere mai na to arii ia òe na mä te haèhaa, e mä te pärahi i nià i te âtini ufa, e te pinia, te fanauà o te âtini. 6 Haere atu ra nä pipi, nä reira atu ra mai ta Ietu i faaue mai ia räua ra, 7 pütö mai ra i te âtini e te fanauà atoà, tuu iho ra i to räua àhu i nià iho i taua nä âtini ra, e ua pärahi iho ra Ietu i nià iho. 8 Höhora iho ra te tiàa rahi i to rätou àhu i te èà tià; ôoti aè ra hoì te tahi pae i te âmaa räau, vauvau iho ra i nià i te èà tià. 9 Te pii noa mai ra te tïàa rahi i haere nä mua ra, e tei pee mai nä muri, nä ô mai ra: Hötana i te Tamaiti a Tävita  Ia haamaitaì o ia o tei haere mai mä te iòa o te Fatu  Hötana i te raì teitei 10 E ia tomo o ia i Ierutarëma, âueue iho ra taua ôire atoà ra, e te taata atoà i te uiraa e O vai teie? 11 Ua parau atu ra taua tïàa rahi ra: O te Perofeta ra o Ietu, no Nätareta i Tarirea.

Manaò

Teie te huru no te haapotoraa ta tätou mau taiòraa, èi àvariraa na tätou i te hepetoma moà, ta te mau taiòraa e haamanaò mai nei ia tätou te mau òhipa i tupu i nià i te Tämaïti a te Atua Nui Tumu Tahi. To na faatupuraa i te parau no te ôpuaraa faaora ia ö te mau taata atoà i roto i te faanahoraa ia hanahana te Atua. Teie hoì te parau e haamanaò mai nei ia tätou i te täpati no te mau âmaa.

-Taramo 22, 29 No te Fatu hoì te Pätireia, e o ia te tävana i te mau fenua atoà.

-Ìtaia 50, 5 Ua haafätata te Fatu ra i ta ù tarià, aore au i pätoì, aore au i ôraì tià i muri.

-Firipi 2,  11 ia fäì te mau vaha atoà, o Ietu Metia te Fatu, e hanahana atu te Atua Metua ra.  

-Mätaio 21, 10 Ietu i tomo i Ierutarëma, âueue te ôire, e te taata i te uiraa e O vai teie?

E tià ia parauhia ua âmui te mau puai o te rahu èi faaìteraa te mau òhipa e tupu nei ia au i te mau tumu parau e haapäpü ra i te mau hinaaro o te taata i te Atua Nui Tumu Tahi. E ìtehia te tupuraa teie òhipa i roto i ta tätou taiòraa no te Parau Maitaì no Ietu i te päpaìraa a Mätaio i te pene 21 i te mau ìrava 1 e tae i te ìrava 11.   Mai teie te huru to na tupuraa to Metia ia tomoraa i roto ia Ierutarëma, E fätata mai ra Ierutarëma ia rätou, ia tae rätou i Petefäte, i te mouà ra o Òriveta i reira to Ietu faaineineraa i ta na mau pipi no teie tere, ua tono aè ra Ietu e piti puè pipi a ana ra, nä ô atu ra, E haere ôrua i tërä aè ra ôire ïti i mua ia ôrua, e ìte ôrua i te hoê âtini ufa, ua fëtiihia, e te fänauà i pïhaì iho, e tätara e pütö mai i ô nei ia ù nei. E ia parau noa mai te tahi taata ia ôrua, e parau atu ôrua. Tei hinaarohia mai ra e te Fatu, e na na ia e tuu noa mai i reira ra. Ia tupu te parau a te perofeta ra i nä-reira-hia ai, o tei nä ô mai ra e. A parau atu i te tamähine o Tiona, Ìnaha, te haere mai na to arii ia òe na mä te haèhaa, e mä te pärahi i nià i te âtini ufa, e te pinia, te fänauà o te âtini. Haere atu ra nä pipi, nä reira atu ra mai ta Ietu i faauë mai ia räua ra, pütö mai ra i te âtini e te fänauà atoà, tuu iho ra i to räua àhu i nià iho i täua nä âtini ra, e ua pärahi iho ra Ietu i nià iho. Höhora iho ra te tiàa rahi i to rätou àhu i te èà tià, ôoti aè ra hoì te tähi pae i te âmaa räau, vauvau iho ra i nià i te èà tià. Te pii noa mai ra te tïàa rahi i haere nä mua ra, e tei pee mai nä muri, nä ô mai ra, Hötana i te Tämaïti a Tävita Ia haamaitaì ò ia o tei haere mai mä te iòa o te Fatu, Hötana i te raì teitei. E ia tomo ò ia i Ierutarëma, âueue iho ra täua ôire atoà ra, e te taata atoà i te uiraa e, O vai teie. Ua parau atu ra täua tïàa rahi ra, O te Perofeta ra o Ietu, no Nätareta i Tarirea. Ua âueue te ôire te ìte òre te taata o te Tämaïti teie a te Atua te tumu o te ora, eie te taata e faahotana nei te taata pohe o Tävita, e tae noa atu i te perofeta, ma te ui e O vai teie. Te tuu nei te taata i te tahi ärea i ropu ia na e o Ietu, oia hoì, te faatupu nei i te hiò-ê-raa i te ôpuaraa faaora a te Atua Nui Tumu Tahi. O vai Teie. I roto i teie reo, teie uiraa i te tahi taime, te ìtehia nei te tahi mau taò, hoê noa to rätou parauraa, eere rä hoê anaè vähi faaòhiparaa, eere hoì hoê manaò ta rätou e faaìte ra. Te uiraa e tano ia uihia, teie ia, hoê noa änei teie mau taò, aore ra mea ê ihoä te tahi i te tahi, e te parauraa noa terä e tähoê ra ia rätou. E au atoà teie hiòraa no te vai, inaha e vai te uiraa e hinaaro ra i te ìte i te iòa o te tahi taata, te tahi vähi o vai to òe iòa ; o vai terä mouà e vai hoì te parau e faaìte ra i te huru tumu e te taui òre o te tahi mea, te tahi taata te vai âpï noa ra o ia  te vai maitaì noa ra te tino e vai atoà te parau e ìtehia ra i te faufaa ta te tahi e mau ra, aore ra te täamuraahia te parau o te tahi taoà i nià i te tahi taata te vai ra ta na räau, te vai ra to rätou fenua na te vai e ìte ra i te tiàraa o te tahi mea i te tahi vähi, aore ra i roto i te tau  te vai ra terä mäa io mätou te vai ra te mahana. Naò noa ia tätou i te parauraa e, tei iòa tera e hinaarohia i te ìte, eiaha ra te nohoraa e te tiàraa, O te Tämaïti a nei teie na Atua Nui Tumu Tahi, te Faaora o teie ao. I roto i te Faaäuraa mätamua i te faaìteraa a te puta Ètoto i te pene 3 i te ìte ìrava 14, teie te parauraa a te Atua no to na iòa Te Vai nei au o vau e Vai nei. E i roto i te Ioane pene 1, i vai na te parau i te  mätamua ra, ia au te faaòhiparaa teie mau vai, àita to na tüàtiraa i te päpe. I teie hepetoma e haamanaò ai tätou i te mau òhipa e tupu i nià i to Tätou faaora, ia au i te mau taiòraa pipiria i faataahia te haamoriraa.

Himene. G (valses)

No roto mai te teröno

E päpe tei tahe mai

E päpe mau e te moà

No te täma i te hara.

Ref.

A tama mai ia mätou nei

E to Väruaraa e

Tama, tama, tama mai,

Tama mai ia mätou

Ia ïnu to ètärëtia

I teie päpe ora

E päpe mau e te moà

No te täma i te hara.

Pure.

Te Atua Nui Tumu Tahi, ua ui na te taata e, O vai teie, te parau nei ia mätou e o te Faaora Nui o teie nei ao, te Tämaïti i fänau püfenuahia mai, mai roto mai i ta òe ôpuaraa faaora. Te haamanaò noa mai ra teie fänauraa i te parau no te pito fenua o Mäòhi Nui e täpaò te reira no to Òe aroha e to òe here ia mätou. I teie mahana ua mämü te mau oe o te mau fare pure a te Ètärëtia Porotetani Mäòhi, ua pure noa mätou i roto i te mau ùtuafare, no teie maì e tupu nei i roto ia Mäòhi Nui e i to te ao nei. E maì teie e faatupu nei te mätaù i roto i te mau fenua atoà i te mau vahi tei reira te taata i te oraraa. E te Atua Nui Tumu Tahi e, te faahaèhaa nei mätou i mua ia Òe, ia noaa ia mätou i te itoito i te ìteraa i ta Òe tïtauraa ia mätou. Te faaìte noa mai ra Òe ia mätou na roto i ta Òe Rähu i te mau maitaì o ta Òe i faatupu. I roto i teie mau maitaì ta Òe i horoà mai ia mätou i te ìteraa te mau àihere, te mau tumu räau to rätou mau faufaa, ia noaa ia mätou i te hämani i te räau, räpaau i teie maì e tupu noa nei i Mäòhi nei e i teie ao. Te äni nei mätou ia Òe, no te mau täote, no te mau utuütu maì, e te mau täote mäìmi höroà ia rätou te ìte, te marämarama, te paari, ia itoito rätou, e tae noa atu te faatereraa fenua hau Mäòhi e te mau taata e òhipa ra i pïhaì iho ia rätou. E te Atua Nui Tumu Tahi, mai te mea ua rehuhia to mätou tiàturiraa, a faaòre mai ta mätou tärahu, mai te mea ua hapahia mätou a faaòre mai ta mätou hara. Âmene.

       

Himene. Fa

Te mätamua o te paari

Te faatura te Tumu Nui

To ù ora

Ua î te fenua te paari

Ua î te moana te ïà

Te tähei nei te haruru miti te fenua

Te  tärapape nei te âau

I  te hoà uira o te raì  tuatinitini

Àhee

A hii te fenua

A here a paruru

Färii to òe mäòhiraa

To òe ora

Metua Metua te ora

Te Vai  Nei Au

Pure a te Fatu

Âmui

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Haamaitaìraa.

25 aore hoì o ia i vahavaha, aore hoì i faaìno i te àti o te feiä i àti ra; e aore hoì i huna i to na mata ia na, ia tiàoro rä o ia ra, ua faaroo mai ra o ia ia na 26 O òe ta ù e haamaitaì i roto i te âmuiraa rahi ra. E rave au i ta ù i èuhe ra, i te aro o te feiä e mataù ia na ra.  Âmene. (Taramo 22.)

Faaitoito i te noho i te ùtuafare.

Terai or. Faatura.