Ioane 1.6-8 ; 19-28. TÏAÌRAA TORU Reo

 

Tāpati 13 no  Titema 2020.

TÏAÌRAA TORU

Reo

Ìtaia 61.1-11

To te feiä faaroo òaòaraa

1 Tei nià ia ù te värua o te Fatu ra o te Fatu, no te mea, ua faatähinu mai te Fatu ia ù; ua tono mai o ia ia ù ei faaìte i te parau òaòa i te âau marü ra: ei faaora hoì i te feiä òto; ei faaìte i te ora i te tïtï: e ia matara roa te feiä täpeàhia ra: 2 ei faaìte i te mätahiti hinaarohia e te Fatu; e te mahana tähooraa nä to tätou Atua; e ia haamähanahana i te feiä i mihi ra; 3 ei hopoi atu i te reàreà i te feiä i òto i Tiona; ei höroà atu no rätou i te ùnaùna ei mono i te rehu auahi; e te monoì ra i te òaòa ei mono i te òto: e te àhu pü ra i te haamaitaì ei mono i te âau taiä: e parauhia rätou, o te räau parau tià anaè, e ô nä te Fatu, ia haamaitaìhia o ia. 4 E nä rätou e patu i te mau vähi pararï tahito ra; e patu faahou hoì i te mau vähi i ano i mütaa iho ra, e rave maitaì hoì i te mau ôire i pau ra; te mau pau i te mau uì tahito ra. 5 E na te taata èê e tià mai e faaàmu i ta òutou mau nana; e te mau tamarii o te taata ê ra te riro ei faaàpu, e ei tope vine nä òutou. 6 E parauhia rä òutou, O te mau tahuà nä te Fatu; e maìrihia òutou, O te mau tävini o to tätou Atua. E àmu òutou i te maitaì no te mau fenua nei; e ârue òutou i to rätou ra hinuhinu. 7 E päpitihia mai ta òutou tufaa, ei mono i to òutou haamä; e òaòa rätou i ta rätou tufaa, ei mono i to rätou mäheahea: e päpitihia mai hoì to rätou maitaì i to rätou ra fenua; e riro te òaòa mure òre ia rätou. 8 O vau o te Fatu tei hinaaro i te parau tià ra; o tei òre i hinaaro i te haru e te parau ìno: e nä ù e höroà mau atu i ta rätou utuà, e ei faufaa mure òre tä ù e fäfau atu ia rätou: 9 e faaturahia to rätou huaai i te mau fenua ra; e ta rätou mau tamarii i roto i te taata atoà ra: e parau atoà te feiä e ìte ia rätou e, O te mau tamarii haamaitaìhia mai rätou e te Fatu. 10 E òaòa roa vau i te Fatu; e ôuàuà noa ta ù värua i te òaòa i ta ù Atua. Ua faaàhu mai o ia ia ù i te àhu pü ra i te parau tià: mai te täne âpï e faaùnaùna ia na iho i te poe ra. 11 Mai te fenua nei e faaôteu mai i te räau rii ra, e mai te ô nei e faatupu i ta na huero: na te Fatu ra nä te Fatu atoà e faaôteu mai i te parau tià, e te haamaitaì, i te aro o te fenua atoà ra.

1 Tëtäronia 5.16-24

16 Eiaha e faaea i te òaòa. 17 Eiaha e tuutuu i te pure. 18 E haamaitaì i te Atua i te mau mea atoà ra, o to te Atua ia hinaaro i te Metia nei ia Ietu, ia òutou na. 19 Eiaha e tinai i te Värua ra. 20 Eiaha e haapaò ìno i te aòraa. 21E hiòpoà mäite i te mau mea atoà ra; e tei maitaì ra e täpeà mäite. 22 E haapae atu i te mau mea huru rii ìno ra. 23 E ia haamaitaì hua mai te Atua hau iho ia òutou; e ia tiaìhia mai te taata atoà na, to òutou värua, e te âau, e te tino atoà mä te hapa-òre, e tae noa atu i te haereà mai o to tätou Fatu ra o Ietu Metia. 24 E parau mau ta na, ta tei nömino ia òutou, e na na e rave.

Ruta èv 1.46-54

Te himene haamaitaì a Märia

46 Ua parau atu ra Märia Ua faarahi ta ù värua i te Fatu, 47 e ua òaòa ta ù âau i te Atua o to ù Ora; 48 o ia aore i vahavaha i te haèhaaraa o to na tävini. E teie nei, e parau te mau uì atoà ia ù, e o vau tei maitaì. 49 E räveà rahi hoì ta na ta tei mana ra ia ù nei, e iòa moà to na. 50 E tià to na aroha i te vairaa i te feiä i mataù ia na ra, i tërä uì, i tërä uì. 51 E faaìte o ia i te püai i ta na rima, e haapurara o ia i te manaò teitei o te teòteò. 52 E huri o ia i te feiä mana i raro i to rätou teröno; e faateitei i te feiä haèhaa. 53 E faaî o ia i te feiä i ère i te maitaì; e te feiä taoà rahi ra, e faahoì ia o ia mä te òre. 54 E tauturu o ia i ta na tävini ia Ìteraèra,

Ioane 1.6-8 ; 19-28.

Te Parau a te Atua te Ora.

6 Te vai ra ra te hoê taata tei tonohia mai e te Atua, o Ioane te iòa. 7 I haere mai o ia ei ìte, e faaìte i te märamarama, ia faaroo/tiàturi te taata atoà na roto ia na. 8 Eere o ia i te märamarama, ua haere mai rä o ia no te faaìte i te märamarama.

Te faaìteraa a Ioane päpetito

(Mät 3,1-12; Mär 1,1-8; Ruta èv 3,1-18)

19 Teie te faaìteraa a Ioane, i te taime i tonohia mai ai e te mau âti-Iüta te feiä tahuà e te mau âti-Revi, mai Ierutarëma mai, e ui ia Ioane e: O vai òe?

20 Ua fäì atu ra o ia, aore roa i huna, faaìte hua atu ra: Eere au i te Metia.

21 Ua ani mai ra rätou ia na: O vai ia òe? O Èria änei òe.

Ua parau atu ra o ia: Eere. O te perofeta änei òe? Ua pähono atu ra o ia: Eere.

22 Ua parau mai ra rätou ia na: O vai ia òe, ia höroà atu mätou i te tahi pähonoraa i te feiä i tono mai ia mätou nei. E aha ta òe parau no òe iho?

23 Ua parau atu ra o ia: E reo vau no te hoê tei pii haere i te mëtëpara: E faatïtïàifaro i te èà o te Fatu, mai tei parauhia e te perofeta ra e Ìtaia.

24 No te mau Färitea ra teie feiä i te tonoraahia mai. 25 Ua ani mai ra rätou ia na: E aha ia òe i päpetito ai, ìnaha hoì, eere òe i te Metia, eere hoì Èria, e eere hoì i te perofeta?

26 Ua pähono atu ra Ioane ia rätou: Te päpetito nei au i te pape. Te tià nei rä te hoê i rotopü ia òutou, aore òutou i ìte ia na. 27 E haere mai o ia i muri iho ia ù, o vau nei, eita e tià ia ù ia tätara i te täpeà o to na tïaa/tämaa. 28 Ua tupu te reira i Pëtänia, i tërä pae i Iörïtäna, i reira hoì Ioane i te päpetitoraa.

Manaò.

Tei roto tätou i teie täpati i te toru o te tiaìraa, te haereraa mai te Fatu. Te faaìte nei teie mau taiòraa, i te tupuraa o te hinaaro o te Atua. Ei haapäpüraa i te mau òpuaraa a te Atua, no te parahiraa mai ta na Tamaiti i roto i te mau taata atoà tei riro ei nunaa no na. Te tahi te ìtehia nei ia, te ora o teie mau taiòraa, i to te feia faaroo ìteraa i roto i te mau faanahoraa e horoàhia nei te òaòa i te färiiraa i te mau faufaa e faaärahia ra. E taata te tae mai, mai te Atua ra, no te haere mai e faaìte i te faufaa no te mau hinaaro o te Atua i te taata atoà. E haere mai o ia e Päpetito i te taata i te pape, tei na muri mai ra e Päpetito ia i te auahi. Na roto i teie na parau, te turaì nei te Värua, eiaha te feia tei here i te Atua ia piò i raro, eiaha e haaparuparu. Ia faateitei rä, ia hiò e ia tiàturi i te Atua, no te mea, o ia to tätou täatoàraa. E e òre roa te hoê mea e tià ia faataa ê ia tätou i to na aroha rahi. E tuhaa rahi ta te Värua i roto i te oraraa o te feia faaroo, mai ta Ioane e faaìte, e ère au i te Metia, e ìte ra vau no teie Metia, e reo tei pii i te mëtëpara. O teie te òaòaraa no te veà tono, ei horoàraa i roto i te taata i te hanahana o te Atua, tei heheu ia tätou na roto i ta na Tamaiti here, tei haere mai e Päpetito ia tätou i te auahi, ia riro tätou ei mau tamarii no to na mau hinaaro, tei parauhia te ôpü hoê no te fetii o te Atua. Te òaòa ia i faaìtehia e Maria ia Eritapeta, i te mea ua tae roa te aroha o te Atua i roto i to na ôpu, ei àpu färii i te Arii Nui, e faaìtehia nei e Ioane. Teie ia te haapotoraa no te mau taiòraa.

-Ìtaia 61, 1 Tei nià ia ù te värua o te Fatu ra o te Fatu, no te mea, ua faatähinu mai te Fatu ia ù; ua tono mai o ia ia ù ei faaìte i te parau òaòa i te âau marü ra: ei faaora hoì i te feiä òto; ei faaìte i te ora i te tïtï: e ia matara roa te feiä täpeàhia ra:

-1 Tëtäronia 5, 16 Eiaha e faaea i te òaòa. 17 Eiaha e tuutuu i te pure.

-Ruta Èv 1, 53 E faaî o ia i te feiä i ère i te maitaì; e te feiä taoà rahi ra, e faahoì ia o ia mä te òre.

-Ioane 1, 23 Ua parau atu ra o ia: E reo vau no te hoê tei pii haere i te mëtëpara: E faatïtïàifaro i te èà o te Fatu, mai tei parauhia e te perofeta ra e Ìtaia.

Tätararaa.

I teie mätahiti 2020, ua ö tätou te nünaa Mäòhi i Mäòhi Nui nei i roto i te tähi mau faanahoraa tei òre tätou i mätau ta teie maì i haaviivii i to tätou oraraa, oraraa vaamataèinaa, te oraraa o te fenua, te oraraa faaroo, tei faataupupü te ìmiraa raveà a te mau ùtuafare, e tei faatöpatari roa te tahi mau fatu òhipa no te fenua. Tei faatäui i te tahi mau peu i mätau maitaìhia e tätou i te mau mahana atoà, e te faaöraa ia tätou i roto i te parau no te tämaraa, te pärururaa i te vaha tei haamanaò mai ia, ia tätou e mämü. Te mau ùputa teie e na reira teie maì viivii i te tomo no te faaapi i te tupu maitaìraa o te èa. Te haamanaò nei tätou i roto i to tätou pureraa no teie mahana te mau ùtuafare i roto i te òto i te mea ta rätou i here ua ravehia e teie maì viivii, te haamanaò nei tätou i te mau taata atoà e ämo nei i teie hopoià teimaha no te räpaauraa, no te ütaraa, e tae noa atu te mau taata mäìmi i roto i ta rätou mau tuhaa, oia ia atoà ia to tätou mau tahuà räau e ìmi ra i roto i te fenua te  àihere no te räau e no te faaora ia tätou i teie maì viivii.

I teie tïaìraa toru, te haapäpü nei ta tätou parau e taata tei tonohia mai, mai te Atua ra o Ioane Päpetito to na iòa, o ia te ìte e faaìte i te märamarama ta na ia òhipa. Ta na räveà i faanaho e haere o ia na te mëtëpara te haamata, te vahi puai te veàveà, te vahi tei reira te tahi mau ànimara te oraraa, i te ànavai päpe no Iörïtäna i te fenua ra o Pëtänia, i reira te tupuraa te mau uiuiraa manaò no roto mai i te mau taata e mau ra i te tiàraa no te nünaa Âti-Iüta, o vai òe, e o vai ia òe, e na rätou iho e pähono i ta rätou mau uiraa, na Ioane èere vau te märamarama, èere vau i te Metia, èere vau o Èria, èere vau i te perofeta. E reo vau no te hoê tei pii haere i te mëtëpara: E faatïtïàifaro i te èà o te Fatu, mai tei parauhia e te perofeta ra e Ìtaia. I teie huru reo no Ioane Päpetito i te mëtëpara te haamanaò nei ia i te òhipa i ravehia e te Atua Nui Tumu Tahi, i te faaàmuraa i to na nünaa i te mëtëpara e 40 mätahiti ma te haapii ia rätou e ua taòto te mau tupuna o Ìteraèra i reira, e na Iotua i ärataì te nünaa âpï o te Atua i te fenua o te tapu. E faatïtïàifaro i te èà o te Fatu, e òhipa teie e faaìtehia mai ra, no te mea àita te àfaro e ìte faahouhia ra ua tïöiöi roa te èà o te Fatu i te rave a te mau faatere faaroo, e te mau faatere tivira i te faateimaharaa i te nünaa o te Atua i te mau hopoià faufaa òre. No te ìte e no te faaìte i te märamarama ua faaòhipa o Ioane Päpetito i te reo ta te Atua i höroà no to na nünaa ia tupu te ora. Te uiraa e aha te reo, e maniania tei tae i roto i te tärià tei faaìte i te hoê auraa no te òhipa e tupu ra. Oia hoì, te reo e fauraò, no te ìte e te paari no te nünaa o ta te Atua Nui Tumu Tahi i maìti, te nünaa Mäòhi, e nünaa mäìtihia to na vauvau o Mäòhi Nui, to na reo, e reo Mäòhi no mai i te Atua ra, to na moana o Moana Nui a Hiva. Tei te tahi manaò i päpaìhia e Turo a Raapoto no te reo, to tätou reo, o te reo ia ta te Atua iho i hinaaro ia riro èi reo no tätou. Èita e tià ia tätou ia faahapahapa e ia haafaufaa òre i taua reo ra. Èita hoì e tià ia tätou ia parau e, e reo moni òre, e reo òhipa òre, e reo ìte-òre-hia i te ao nei, no te mea ta te Atua i haamaitaì ra, ua maitaì ia.

E ara, o te faariro tätou ia tätou iho ei haavä i te Atua e to na mau hinaaro ia tätou. E nünaa tätou no te Atua ra e nünaa ia mä te reo ta na iho i faataa no tätou. Ia òre tätou ia parau, ia òre ia haapii i ta tätou iho mau tamarii, ia riro hoì teie reo èi haamäraa na tätou, te haamä atoà ra ia tätou i te Atua. E here i teie reo, e poihere, e àtuàtu, eiaha e färii ia faaìnohia, e rave i te mau òhipa atoà e au ia ravehia ia tupu o na i te rahi e te ruperupe. Ia riro mau teie reo èi reo tumu no tätou, èi reo atoà rä tei faatumu faahou ia tätou, oia hoì èi reo tei haapii faahou ia tätou i te mau mea faufaa o te oraraa, èi reo hoì tei riro èi fauraò e färerei ai te Atua ia tätou, e èi reo e ûàna ai ta tätou haamaitaìraa i te Atua.

E haamanaò atoà rä tätou e, tei hinaaro i te Atua ra, ua faatupu ia i te hinaaro o te Atua. No reira, ia here tätou i teie reo, èere no to tätou noa manaò taata, no te faatupu rä i  te hinaaro o te Atua.

Ua na reira anaè tätou tei nià te Värua o te Atua ia tätou, ia au i teie reo to Ìtaia, 1 Tei nià ia ù te värua o te Fatu ra o te Fatu, no te mea, ua faatähinu mai te Fatu ia ù; ua tono mai o ia ia ù ei faaìte i te parau òaòa i te âau marü ra: ei faaora hoì i te feiä òto; ei faaìte i te ora i te tïtï: e ia matara roa te feiä täpeàhia ra.

 

Ia maitaì tätou i teie ôroà fänau e te mätahiti âpï tivira.

 

Teraì òr.  Faatura.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Māreto 1, 1-8 TÏAÌRAA PITI Haamataraa

 

Tāpati 6 no Titema 2020.

TÏAÌRAA PITI

Haamataraa

Taramo 85

1 Na te Mënätehe. E Taramo na te tamarii a Tora.2 Ua hämani maitaì mai òe, e te Fatu, i to òe ra fenua; ua faahoì mai òe i te tïtï o Iatöpa ra. 3 Ua faaòre òe i te hara a to mau taata ra, e ua täpoì òe i to rätou ìno. Tera. 4 Ua faaòre òe i to òe ra riri, e ua tïoi ê atu ra òe i te ûàna o to òe ra riri. 5 E teie nei, e haafäriu òe ia mätou, e te Atua e ora ai mätou nei, e ruri ê atu hoì òe i to riri ia mätou nei. 6 E riri mai ä òe ia mätou, e a muri noa atu? E tämau ä òe i to riri e tae noa atu i te mau uì atoà ra. 7 Eita änei òe e faaanaanaea mai ia mätou, ia òaòa to mau taata ia òe ra. 8 E faaìte mai, e te Fatu, i to òe ra aroha, e hö mai i te ora na òe ia mätou nei. 9 E faaroo na vau i ta te Atua ra, ta te Fatu e parau mai. Te faaìte mai ra o ia i te maitaì no to na ra taata, to na ra feiä moà, eiaha rä rätou ia färiu faahou i te ìno ra. 10 Te fätata mai ra te ora na na i te feiä i mataù ia na ra. E faatupu o ia i to na hanahana i to tätou nei fenua.11 O te aroha e te parau mau, ua färerei ia räua; o te parau tià e te hau, ua hohoì räua.12 E tupu mai te parau mau no roto i te fenua, e hiò mai hoì te parau tià mai te raì mai.13 Na te Fatu hoì e horoà mai i te mea maitaì, e hotu mai ä hoì to tätou fenua.14 E nä mua ia na te parau tià i te haere, e na te reira e faaìte mai i to na haereà.

 

Ìtaia 40, 1-11, Te èvaneria i haapiihia e Ioane päpetito ra. 1 E haamähanahana òutou, e haamähanahana i to ù ra mau taata, të nä reira mai ra to òutou Atua. 2 E faaitoito atu òutou ia Ierutarëma, e parau hua atu òutou ia na, ua hope to na tau maì; e ua färiihia te täraèhara i ta na hara; ua noaa hoì ia na i te rima o te Fatu te pohe au rahi roa i ta na ra mau hara. 3 Te pii mai ra te hoê reo i te mëtëpara; a faanehenehe na i te èà o te Fatu, e e faatïtïàifaro na i te fenua marö i te haereà o to òutou Atua. 4 E faaîihia te mau peho, e faahaèhaahia te mouà e te mau âivi; faatïtïàifarohia te piò, e te mau vähi puupuu ra, e faarirohia ia ei vähi päpü; 5 e faaìtehia mai te hanahana o te Fatu, e ìte paatoà te taata i te ora a te Atua: o te vaha hoì o te Fatu tei parau mai. 6 Te nä ô mai ra te hoê reo, A faaìte. Ua parau atu ra vau, E aha tä ù e faaìte? A faaìte, E àihere te taata atoà nei, e to na ùnaùna mai te tiare ia o te fenua nei: 7 te mäehe noa nei te àihere, te mäheahea nei te tiare, ia farara mai te mataì no i te Fatu i nià iho ra: e àihere mau ä te taata nei. 8 Te mäehe nei te àihere, te mäheahea nei te tiare; âreà te parau a to tätou Atua, e tià ia i te vai-mäite-raa. 9 A paiùma i nià i te mouà teitei, e tei hopoi mai i te parau maitaì i Tiona nei; a faateitei na i to reo mä te ûàna, o te hopoi mai i te parau maitaì i Ierutarëma nei. A faateitei na; eiaha e mataù; a parau atu i te mau ôire o Iüta, A hiò na i to òutou Atua. 10 Inaha, te haere mai ra te Fatu ra o te Fatu mä te püai, e nä tö na iho rima e faatupu i tä na. Inaha, tei ia na iho te utuà tä na e hopoi, e te hoo tä na e höroà ra, tei mua ia i ta na aro. 11 E faaàmu o ia i ta na nana mai te tiaì mämoe ra; e haaputu o ia i te mau fanauà rii i roto i ta na rima, e ei roto rätou i ta na ôuma ia hopoi; e arataì rii mäite o ia i te mau maiaa faaòte pinia ra.

 2 Pētero 3, 8-14

8 Eiaha na ia moè ia òutou teie nei parau iti, e a ù mau here e, hoê ä hete i te Fatu te mahana hoê e te mätahiti hoê tautani ra; e te mätahiti hoê tautani ra, hoê ä hete e te mahana hoê. 9 Aore te Fatu i faaroaroa i ta na i parau mai ra, mai ta te tahi pae i parau ra e, e faaroaroa; e faaòromaì rahi rä to na ia tätou, aita roa i hinaaro e ia pohe atu te hoê, ia noaa päatoà rä te tätarahapa. 10 E tae mai rä te mahana o te Fatu mai te èiä i te ruì ra; e pee ê atu ai teie nei raì mä te haruru rahi, e mou hoì te mau mea rii tumu i te veàveà rahi, e te fenua hoì e te mau òhipa i nià iho, e pau ia i te auahi. 11 E teie nei, e mou anaè taua mau mea atoà nei, mai te aha to òutou huru e tià ai tei te haapaò maitaì e te paieti; 12 tei te tiaìraa e te rüraa atu ia tae mai taua mahana o te Atua ra, te mahana e mou ai te raì i te tutuìhia i te auahi, e te tärapape te mau mea rii tumu i te veàveà rahi. 13 Te tätari nei rä tätou i te raì âpï e te fenua âpï ta na i parau mai ra, i te vai mauraa o te parau tià ra. 14 E teie nei, e a ù mau here e, o te reira mau mea ta òutou e tiaì na, e faaitoito, e haapäpü hua tei roohia mai òutou e ana mä te hau, mä te pöraò òre e te hapa-òre.

Māreto 1, 1-8 

Ioane päpetito

(Mät 3.1-6, 11-12; Ruta èv 3.1-6, 15-18)

1 Te haamataraa o te Èvaneria o Ietu Metia, te Tamaiti a te Atua; 2 tei päpaìhia i roto i te puta a te perofeta ra a Ìtaia, Inaha, e tono vau i ta ù veà i mua ia òe, e na na e haamaitaì i to òe èà i mua ia òe. 3 E reo no te hoê i te tiàororaa i te mëtëpara: E haamaitaì òutou i te èà o te Fatu, e faatïtïàifaro i to na haereà. 4 Oia hoì te haereà mai o Ioane i te päpetitoraa i te mëtëpara ra, e te faaìte haereà i te päpetito tätarahapa ia matara te hara. 5 Ua faahope mai ra to te fenua ra o Iutea e to Ierutarëma ia na ra, e päpetitohia iho ra e ana i te pape ra i Iörïtäna, mä te fäì i ta rätou hara. 6 Te àhu ra Ioane i te àhu huruhuru tämera, mä te tätuahia to na tauupu i te ìri puaa; e àtarite e te meri o te fenua àihere ta na mäa. 7 E poro haere atu ra o ia, nä ô atu ra: Te haere mai nei te hoê i muri iho ia ù e mana rahi to na i to ù, o të òre ia e au ia ù ia piò i raro a tätara ai i te täpeà tämaa no na ra. 8 I päpetito noa na hoì au ia òutou i te pape, e päpetito rä o ia ia òutou i te Värua Maitaì.

 

Manaò

I teie mätahiti 2020, ua färerei tätou te nünaa Mäòhi i Mäòhi Nui nei i te hoê àti maì tei faatäui i to tätou oraraa vaamataèinaa, to tätou oraraa faaroo, e tae noa atu te oraraa ùtuafare. Tei haapii faahou ia tätou i te òhipa no te tämaraa i to tätou mau rima, pärururaa i to tätou vaha e te ihu te vahi e na reira teie maì i te tomo e te faaapiapi te tupu maitaìraa to tätou èa. Te haamaò nei tätou i to tätou mau taata paari, e te mau ùtuafare i topa i roto i te òto, te peàpeà tei ravehia e teie maì. I teie täpati tiaìraa piti tamata tätou i te ìmi i te tauturu i roto i te mau taiòraa i faanahohia no tätou, teie te haapotoraa.

-Taramo 85,  8 E faaìte mai, e te Fatu, i to òe ra aroha, e hö mai i te ora na òe ia mätou nei.

-Ìtaia 40, 11 E faaàmu o ia i ta na nana mai te tiaì mämoe ra; e haaputu o ia i te mau fanauà rii i roto i ta na rima, e ei roto rätou i ta na ôuma ia hopoi; e arataì rii mäite o ia i te mau maiaa faaòte pinia ra.

-2 Petero 3, 14 E teie nei, e a ù mau here e, o te reira mau mea ta òutou e tiaì na, e faaitoito, e haapäpü hua tei roohia mai òutou e ana mä te hau, mä te pöraò òre e te hapa-òre.

-Märeto 1, 8 I päpetito noa na hoì au ia òutou i te pape, e päpetito rä o ia ia òutou i te Värua Maitaì.

Ei manaò tatara.

I roto i teie taiòraa tei faataahia na tätou no teie mahana faaineineraa na tätou i roto i te tiaìraa i te haereraa mai o to tätou Fatu, te haamanaò-noa-hia mai ra i reira, e ua haamata o Märeto i te faahiti i te parau no Ietu i roto roa i te tahi tau ätea. Inaha hoì, aita te Papaì Evaneria i ômua mai i te àai o te Metia, i nià i te parau no to na fänauraahia i roto i teie nei ao, e aore ia, i nià i te parau no Ioane Päpetito e ta na òhipa i roto i te mëtëpara, ua hoì roa o ia i roto i te mau moemoeä a te mau perofeta. Te äuraa, i roto roa i te parau no to te Atua faaineineraa i ta na Tämaïti no ta na ôpuaraa ora no teie nei ao.

Te reira te fä, i reira to te Atua faaineineraa ia Ioane Päpetito no te haamaitaì i te èà o te Fatu, ia au i te parau i tohu-ateä-hia e te perofeta ra e Marati i te pene 3 i te ìrava 1.  ’’INAHA E TONO  VAU  I TA Ù  VEÀ,  E  NA NA  E  HAAMAITAI  I  TE  ÈÀ  I  MUA  IA  Ù  RA  E  TE  FATU  TA  ÒUTOU  E  ÌMI  NA,O  TE  TAE  VAVE  MAI  IA  I TO  NA  RA  HIERO,TE  VEÀ  A  TE  FAUFAA  TA  ÒUTOU  I  ÒAÒA  NA, ÌNAHA,O TE  TAE  MAI  IA,TE PARAU  MAI  RA  IEHOVA  TAPAOTA  RA.’’

I te tau o Marati, ua ìtehia i reira te tahi vahi paruparu, i te mea e, aita te mau tahuà i rave päpu i te mau täpura òhipa i püpühia i roto i to rätou rima, i nià i te parau no te püpüraa tutia e tae noa ätu i te parau no te haamoriraa i roto i te hiero. O teie te tahi tumu mau, i tïtauhia ai te veà a te Atua ia tama hou tei faatähinuhia e te Atua e tae mai ai. Ia hiòhia, e au ra e, te tere o te Metia i roto i teie nei ao, e tere tama ia i te oraraa o te taata, haamanina i te mau vahi puupuu, faaîi i te mau vahi âpoopoo e te vai ätu ra.........e te tïtauhia nei te täatoà no teie nei ao ia fänaò i te reira tämaraa. O te tuhaa rahi mau ia e änihia nei i roto i te mau faaìteraa Parau Maitaì, no te tama i te taèro e te viivii e haafifi noa nei i te oraraa o te taata, tei tärai hoì i te tahi huru taata tei òre i au i te hohoà e te huru o te taata ta te Atua iho hoì i hämani i te repo fenua, i to na hohoà e to na huru.

E taua täpura òhipa ra, ia ravehia ia, na roto i te päpetitoraa tätarahapa. I mua i teie parau, ua märamarama maitaì te àti Iuta e, è ère teie parau no rätou, o rätou hoì e haapaò tämau noa nei i taua mau peu ra, no te feiä ra tei òre a i färii i te hinaaro o te Atua, oia hoì, no te mau ètene. No rätou, no te tomo i roto i te faaroo àti Iuta, e änihia ia rätou ia färii i na tïtauraa e 3 no te haapäpüraa i to rätou pärahiraa i roto pü i te mau taata no te Atua.

-A tahi, te parau no te peritome, tei riro ei täpaò no te riroraa ei mero no te nünaa mäìtihia e te Atua.

-A piti, te parau no te püpüraa tutia, tei riro ei täpaò no färiiraa i te faaòreraa hara a te Atua.

-A toru, te parau no te päpetitoraa, tei riro ei täpaò no te tämaraa i te mau mea tei haaviivii noa na i roto i to na oraraa. O te tumu rahi ia te taata e päpetitohia ra e täumi-roa-hia i raro i te pape, no te tahi fänauraa àpi e no te âmui ätoà i roto i te pohe e te tiàfaahouraa o te Metia.

I mua i teie mau manaò i faahitihia, ua märamarama maitaì te àti Iuta i te reira, e aita hoì e faufaa ia haamanaò-noa ia rätou i te reira. Te haapäpü faahou nei ra o Ioane e, te riroraa ei mau tamarii na te Atua, è ère i te riro-noa-raa ei àti Iuta, te farii ätoà ra i te tämäraa hara a te Atua. Te auraa, mea tià roa i te àti Iuta i teie nei ia päpetito faahouhia, e ia fäì faahou i to rätou faaroo i te Atua, oia hoì, ia âpitihia te päpetitoraa i te parau no fäìraa hara e te fäìraa faaroo.                                                                                                    

-A tahi, te fäìraa faaroo na mua roa. Ia täpö te taata i to na mata i mua i te mau mea ta na e òre e hinaaro e hiò, te parau ihoä ra no ta na mau hara, mai te taata te hiò ia na i roto i te hiò hipa, e tei parau ätu i to na ata e, mea reporepo mau òe i teie poìpoì. O te huru parau ätoà ia i faaroohia i roto i te vaha no tera tamaiti tei haere i te fenua ätea e pühara i te faufaa metua. Ua ìte o ia i te fifi rahi i färereihia e ana i taua fenua ra, no te öè  rahi i tupu i taua fenua ra, tei òre i tuàti i te maitaì rahi e vai ra i te ùtuafare metua. Ua faanaho iho ra o ia i te tahi fäìraa hara e te tahi fäìraa faaroo na na, ei raveà no te tatara faahou i te ùputa no te here e te aroha o te ùtuafare metua. E te raveà mätamua roa hoì no te faatupu i te parau no te tätarahapa, o te fäìraa ia ta tatou mau hara i mua i te Atua e i mua ätoà i te taata i hara ai tatou.

-A piti, te fäìraa ätoà i te ìno i ravehia e te tahi taata, i nià i te tahi ätu taata. E ère i te mea faufaa, mai te mea e, e rave noa i te fäìraa hara, e aore ia, te fäìraa faaroo i mua i te Atua, mai te mea e, e aita te reira i faatupu hope-rao-hia i roto i te oraraa o te taata. E ère i te mea faufaa te reni noa i te tahi èà i te Atua ra, mai te peu e, eita te patu faataaê i roto pü i te taata e te taata e vävähihia. Oia mau, mea ôhie roa te faanaho i te tahi fäìraa hara, e aore ia, te tahi fäìraa faaroo i mua i te aro o te Atua, i te faatupu i te reira na mua roa i mua i te aro o te taata. Teie ra, aita e faaòreraa hara, mai te peu e, aita e faahaèhaaraa, e aore ia, aita e fäìraa hara.

-A toru, mea tia roa i te taata ia faaìte i ta na fäìraa hara, e aore ia, ta na fäìraa faaroo i mua i te aro o te Atua. Te pohe o te manaò faateitei, o te fänauraa ia no te faaòreraa hara. Te auraa, i te taime e noaa i te taata te puai no te fäì i ta na hara, i reira ätoà ia te Atua e parau mai e, ua faaòrehia ta òe hara, mai te àamu no te taata hara tei pure ätu i te Atua e, Aroha mai ia ù te taata hara nei. Âreà te tahi ra te haava ra ia i to na taeaè, i roto i ta na pure, ma te parau haapuai, ia faaroo te mau taata ätoà.

Teie te papa no te faaìteraa Èvaneria a Ioane Päpetito, e ta na poroì è ère ia tei te ùtu noa te päpairaahia, te papa ätoà ra te reira no to na oraraa täatoà. A hiò noa na tätou i te huru vahi ta na i mäìti ei tahua faaineineraa na na i te tonoraa i tïtauhia ai o ia e te Atua. Te vahi mau ra te reira tei au maitaì no te faaroo i te reo o te Atua ia faanaho mai i ta na ôpuaraa ora no teie nei ao.

A hiò ätoà na tätou i te fäito no to na àhu, e huruhuru tämera noa e tahi maa hätua ïti. Te hohoà mau teie no te mau òrero i te parau a te Atua e te mau perofeta no tera ra tau, mai te ìte-ätoà-hia i te tau o Eria ia au i te faaìteraa a te mau Arii II i te pene 1 ìrava 8 ‘’UA  PARAU  MAI  RA  RÄTOU  IA  NA, E  ÀHU  HURUHURU  TO NA, E  UA  TÄTUAHIA  TO  NA  TAUUPU  I  TE  TAURA  IRI  PUAA. Te àhu nei o Ioane Päpetito i te àhu tei au maitaì i ta na ra òhipa.

A hiò ätoà na tätou i te huru no ta na maa, è ère i te mea faahiahia roa ia au i te hiòraa a te taata i teie mahana. E matara mai ihoä te hohoà o te feia riirii i roto i teie huru faanahoraa, e ua  na reira ra hoì te Atua i te haamaamaa i te mau puai ätoà o teie nei ao. No roto mai i teie huru oraraa i noaa ai ia Ioane te puai i roto i ta na faaìteraa, e ta na Èvaneria e faaìte nei, o te huru oraraa ia ta na e ora ra, tei puta roa i nià i te raì e i nià ätoà i te tino o te fenua nei. O te tumu mau ia te taata i faaroo ai i ta na parau, no te mea, na to na huru e horoà mai ra i ta na parau. Èita ra te reira huru e faahoì mai  i te hohoà o Ioane Päpetito, e hihi märamarama noa te reira no te türama i te parau no te haereà mai o te Metia, te tahi taata tei hau ätu ia na, o te òre e tià ia Ioane ia tätara i te tämaa i ta na âvae.

Auaa ätoà to na haehaa i roto i ta na òhipa, i faufaa-ätoà-hia ai te hiòraa a te taata e te Atua ia na. Te tïtauraa rahi roa ra i roto ia Ioane, ia faatoro ia o ia i to na rima e ta na faaìteraa, eiaha i nià iho ia na, i nià ra i tera e haere mai ra, oia hoì, o te Metia ra o Ietu. Te reira ätoà ta tatou faatororaa i teie tau ta tätou e haere ätu nei.

 

Ia maitaì tätou i te ôroà fänau e te mätahiti âpï tivira.

 

Teraì òr. Faatura.

 

 

Papa Haamori. Tāpati 6 no Titema 2020.

 

Tāpati 6 no Titema 2020.

Papa Haamori.

ÔROÀ

TÏAÌRAA PITI

Haamataraa

Ômuaraa.

Teie tïaìraa piti, te haamanaò nei tätou i te maitaì no te Parau a te Atua, e te Parau o te Atua. E haava te Parau a te Atua ia tätou, e faahapa o na ia tätou, e täìri atoà hoì. E au atoà rä o na i te monoì tei tämarü i to tätou mau pëpë, e tei horoà ia tätou i te parau e i to tätou haereà i te noànoà o te parau tià. Tei mau i te Parau a te Atua ra, eita e maraa ia na te färii noa i te ìno i te mau mahana atoà, e àro rä o ia i te reira no te hanahana o to na Atua.

Ta te Taramo 85 ia e faaìte nei ia tätou,  1 Na te Mënätehe. E Taramo na te tamarii a Tora.2 Ua hämani maitaì mai òe, e te Fatu, i to òe ra fenua; ua faahoì mai òe i te tïtï o Iatöpa ra. 3 Ua faaòre òe i te hara a to mau taata ra, e ua täpoì òe i to rätou ìno. Tera. 4 Ua faaòre òe i to òe ra riri, e ua tïoi ê atu ra òe i te ûàna o to òe ra riri. 5 E teie nei, e haafäriu òe ia mätou, e te Atua e ora ai mätou nei, e ruri ê atu hoì òe i to riri ia mätou nei. 6 E riri mai ä òe ia mätou, e a muri noa atu? E tämau ä òe i to riri e tae noa atu i te mau uì atoà ra. 7 Eita änei òe e faaanaanaea mai ia mätou, ia òaòa to mau taata ia òe ra. 8 E faaìte mai, e te Fatu, i to òe ra aroha, e hö mai i te ora na òe ia mätou nei. 9 E faaroo na vau i ta te Atua ra, ta te Fatu e parau mai. Te faaìte mai ra o ia i te maitaì no to na ra taata, to na ra feiä moà, eiaha rä rätou ia färiu faahou i te ìno ra. 10 Te fätata mai ra te ora na na i te feiä i mataù ia na ra. E faatupu o ia i to na hanahana i to tätou nei fenua.11 O te aroha e te parau mau, ua färerei ia räua; o te parau tià e te hau, ua hohoì räua.12 E tupu mai te parau mau no roto i te fenua, e hiò mai hoì te parau tià mai te raì mai.13 Na te Fatu hoì e horoà mai i te mea maitaì, e hotu mai ä hoì to tätou fenua.14 E nä mua ia na te parau tià i te haere, e na te reira e faaìte mai i to na haereà.

Haamaitaì tätou i te Atua i te hoê reo himene e tià mai tätou,

 

Himene

Pärahi tätou

 

Teie ta Ìtaia faaìteraa i te pene 40 i te mau ìrava 1 e tae i te ìrava 11, Te èvaneria i haapiihia e Ioane päpetito ra. 1 E haamähanahana òutou, e haamähanahana i to ù ra mau taata, të nä reira mai ra to òutou Atua. 2 E faaitoito atu òutou ia Ierutarëma, e parau hua atu òutou ia na, ua hope to na tau maì; e ua färiihia te täraèhara i ta na hara; ua noaa hoì ia na i te rima o te Fatu te pohe au rahi roa i ta na ra mau hara. 3 Te pii mai ra te hoê reo i te mëtëpara; a faanehenehe na i te èà o te Fatu, e e faatïtïàifaro na i te fenua marö i te haereà o to òutou Atua. 4 E faaîihia te mau peho, e faahaèhaahia te mouà e te mau âivi; faatïtïàifarohia te piò, e te mau vähi puupuu ra, e faarirohia ia ei vähi päpü; 5 e faaìtehia mai te hanahana o te Fatu, e ìte paatoà te taata i te ora a te Atua: o te vaha hoì o te Fatu tei parau mai. 6 Te nä ô mai ra te hoê reo, A faaìte. Ua parau atu ra vau, E aha tä ù e faaìte? A faaìte, E àihere te taata atoà nei, e to na ùnaùna mai te tiare ia o te fenua nei: 7 te mäehe noa nei te àihere, te mäheahea nei te tiare, ia farara mai te mataì no i te Fatu i nià iho ra: e àihere mau ä te taata nei. 8 Te mäehe nei te àihere, te mäheahea nei te tiare; âreà te parau a to tätou Atua, e tià ia i te vai-mäite-raa. 9 A paiùma i nià i te mouà teitei, e tei hopoi mai i te parau maitaì i Tiona nei; a faateitei na i to reo mä te ûàna, o te hopoi mai i te parau maitaì i Ierutarëma nei. A faateitei na; eiaha e mataù; a parau atu i te mau ôire o Iüta, A hiò na i to òutou Atua. Âmene.

 

Himene Tätarahapa.

 

10 Inaha, te haere mai ra te Fatu ra o te Fatu mä te püai, e nä tö na iho rima e faatupu i tä na. Inaha, tei ia na iho te utuà tä na e hopoi, e te hoo tä na e höroà ra, tei mua ia i ta na aro. 11 E faaàmu o ia i ta na nana mai te tiaì mämoe ra; e haaputu o ia i te mau fanauà rii i roto i ta na rima, e ei roto rätou i ta na ôuma ia hopoi; e arataì rii mäite o ia i te mau maiaa faaòte pinia ra.

Haamaitaì tätou i te Atua no teie mau parau òaòa e tià ai.

 

Himene òaòa.

 

Na te rata a  Pētero 2 i te pene 3 i te mau ìrava 8 e tae i te ìrava 14 e ärataì ia tätou i roto i te fäìraa faaroo, 8 Eiaha na ia moè ia òutou teie nei parau iti, e a ù mau here e, hoê ä hete i te Fatu te mahana hoê e te mätahiti hoê tautani ra; e te mätahiti hoê tautani ra, hoê ä hete e te mahana hoê. 9 Aore te Fatu i faaroaroa i ta na i parau mai ra, mai ta te tahi pae i parau ra e, e faaroaroa; e faaòromaì rahi rä to na ia tätou, aita roa i hinaaro e ia pohe atu te hoê, ia noaa päatoà rä te tätarahapa. 10 E tae mai rä te mahana o te Fatu mai te èiä i te ruì ra; e pee ê atu ai teie nei raì mä te haruru rahi, e mou hoì te mau mea rii tumu i te veàveà rahi, e te fenua hoì e te mau òhipa i nià iho, e pau ia i te auahi. 11 E teie nei, e mou anaè taua mau mea atoà nei, mai te aha to òutou huru e tià ai tei te haapaò maitaì e te paieti; 12 tei te tiaìraa e te rüraa atu ia tae mai taua mahana o te Atua ra, te mahana e mou ai te raì i te tutuìhia i te auahi, e te tärapape te mau mea rii tumu i te veàveà rahi. 13 Te tätari nei rä tätou i te raì âpï e te fenua âpï ta na i parau mai ra, i te vai mauraa o te parau tià ra. 14 E teie nei, e a ù mau here e, o te reira mau mea ta òutou e tiaì na, e faaitoito, e haapäpü hua tei roohia mai òutou e ana mä te hau, mä te pöraò òre e te hapa-òre. Âmene.

 

Pärahi tätou.

Haamaitaì tätou i te Atua i te hoê reo himene.

 

Himene.

Pure.

Pure tätou i te Atua nui Tumu Tahi, ua ineine mätou i te taiò i ta Òe parau e i te faaroo, a höroà mai ia mätou i te ìte i te faufaa o to Òe mau hinaaro,  a türama ia mätou i te märamaramaraa no o na mai ia o na. Âmene.

 

Taiòraa

Tätou taiòraa no teie mahana, tei roto ia i te Parau Maitaì no Ietu i päpaìhia e,

Māreto 1.1-8 

Ioane päpetito

(Mät 3.1-6, 11-12; Ruta èv 3.1-6, 15-18)

1 Te haamataraa o te Èvaneria o Ietu Metia, te Tamaiti a te Atua; 2 tei päpaìhia i roto i te puta a te perofeta ra a Ìtaia, Inaha, e tono vau i ta ù veà i mua ia òe, e na na e haamaitaì i to òe èà i mua ia òe. 3 E reo no te hoê i te tiàororaa i te mëtëpara: E haamaitaì òutou i te èà o te Fatu, e faatïtïàifaro i to na haereà. 4 Oia hoì te haereà mai o Ioane i te päpetitoraa i te mëtëpara ra, e te faaìte haereà i te päpetito tätarahapa ia matara te hara. 5 Ua faahope mai ra to te fenua ra o Iutea e to Ierutarëma ia na ra, e päpetitohia iho ra e ana i te pape ra i Iörïtäna, mä te fäì i ta rätou hara. 6 Te àhu ra Ioane i te àhu huruhuru tämera, mä te tätuahia to na tauupu i te ìri puaa; e àtarite e te meri o te fenua àihere ta na mäa. 7 E poro haere atu ra o ia, nä ô atu ra: Te haere mai nei te hoê i muri iho ia ù e mana rahi to na i to ù, o të òre ia e au ia ù ia piò i raro a tätara ai i te täpeà tämaa no na ra. 8 I päpetito noa na hoì au ia òutou i te pape, e päpetito rä o ia ia òutou i te Värua Maitaì.

Na te Atua hau i te raì teitei e haamaitaì mai te täiòraahia ta na parau,  haamaitaì tätou i te Atua i te hoê reo Himene.

 

Himene.

Pure

Pure tätou i te Atua, te Atua e i faaroo aè nei mätou i ta òe ôpuaraa faaroo. Âmene.

Himene.

Parau faaära

Himene püpüraa moni.

 

Pure Ärai.

E te Atua Metua, te ani atu nei mātou ia òe, a tauturu mai ia mātou i te tāmāraa i ta mātou mau hara, e tià atu i mua ia òe ma te tiàmā. Tauturu mai òe to mātou faaroo, ia papahia te reira i nià i te faufaa no te ora, te riro hoì te rahu ei ìte, e ei tāpaò. Ia aa-faahou-hia ta òe parau tei mau-māite-hia mai e te mau tupuna i roto i to mātou mau âau, ia tià faahou ia mātou ia faariro i te rahu ei täuaro no mātou. I teie mahana, eere te rahu noa terā e fifi ra, o mātou atoà rā. Ta mātou peu, te iho, te hīroà tumu e to mātou iho reo, ua riro atoà ia i roto i te ôpape o teie tau hepohepo ; o mātou iho hoì te tumu. Te òaòa nei rā te âau, no te faaroo o te feiā e pātoì noa nei ia òre te turaraa o te taata no Māòhi Nui nei ia taataahihia. E te Atua Metua e, a faariro ia mātou ei mauhaa no te faatupuraa i ta òe ôpuaraa no te ora o teie nūnaa i Māòhi Nui nei, a fārii mai i ta mātou pure. Amene.

 

Himene ôroà.

Ôroà a te Fatu.

 

Himene âmui.

Pure a te Fatu.

Âmui to tätou reo i roto i te pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie ta tätou parau faaitoitoraa

Faaitoitoraa.

8 I päpetito noa na hoì au ia òutou i te pape, e päpetito rä o ia ia òutou i te Värua Maitaì.

 

Teie ta tätou parau haamaitaìraa.

Haamaitaìraa.

9 E faaroo na vau i ta te Atua ra, ta te Fatu e parau mai. Te faaìte mai ra o ia i te maitaì no to na ra taata, to na ra feiä moà, eiaha rä rätou ia färiu faahou i te ìno ra. 10 Te fätata mai ra te ora na na i te feiä i mataù ia na ra. E faatupu o ia i to na hanahana i to tätou nei fenua. Âmene.

 

Teraì òr. Faatura.