Ruta 23, 50 – 56 To Ietu tuurahia i roto i te menema

 

Mahana mäa 03 no Eperera 2021

 

Taiòraa : Ruta 23, 50 – 56

 

To Ietu tuurahia i roto i te menema

 

(Aroharaa)

 

E tanuraa maì, e hunaraa maì, e e tuuraa maì, ta tätou parauraa i teie peu ta tätou e rave nei, ia pohe te tahi taata. Te tanuraa maì te mea pinepine tätou i te faaòhipa, ia au ihoä ia i te faaueraa a te Tenete 3, 19 :’E repo òe, e hoì faahou atu ä òe i te repo’, noa atu ia aita i tano roa, te faaòhiparaa o teie parau no terä taime.

 

Te hunaaraa maì, i ravehia na i mua ra, aita rä tätou e rave faahou nei i teie mahana, no te mea, ua ìte tätou tei hea to tätou mau maì i te tanuraahia. Te hunaraa maì, e peu teie i ravehia i roto i te mau pupu, hui arii änei, hui raatira änei, hui tahuà änei, eere pauroa te ö i roto i terä peu. Terä ia vähi faataahia i nià i te marae parauhia, fare vairaa tüpapaù. I reira te tino pohe, e taraìhia ai e ia marö, i reira te mau piimato e rave ai te tino, no te âfaì i roto te mau ana i roto i te mato e vaihoa ai. I hunahia ai teie mau taata mana, tei roto ia i terä tiàturiraa e, eiaha to rätou upoo ia ravehia e te taata, a roaa te mana e te ìte e vai ra i roto ia rätou i te tahi ê. Te auraa, eita te fetii, eita te nünaa e ìte te vähi i reira to rätou i te hunaraahia, te mau piimato anaè rä. No reira ia i roto i te tahi mau päheruraa a te mau papâa, ua ìtehia te tahi mau ivi taata i roto i te mau ana i roto i te mato.

 

Te tuuraa maì, e peu âpï ia tei haamatahia mai i te tahi tau, oia te hämaniraa te vairaa maì i roto i te tïmä, parauhia na roto i te reo o verä mä e, caveau e tiroir. Ua ûàna roa ia te reira peu i teie mahana àti tià aè Mäòhi Nui e ua rau atoà to na faanahoraa.

 

Teie to te Fatu, e tano e parau e, teie toru o te parauraa te mea tano aè, ua tuuhia o ia i roto i te hoê menema i paohia i roto i te mato. Aita o ia i tanuhia e aita atoà i hunahia, no te mea ua ìte te mau vahine i âpee noa na ia na, e ia au i te faatiàraa a Mätaio, ua tuuhia te mau tiaì.

 

Te vai atoà nei rä teie peu âpï i haamata atoà hia mai i te rave e te tahi pae, o ia te pureraa no te rehu. Te tahi ia tumu te tahi òna hinaaro ai e haamau i teie fare tütuìraa taata i o tätou nei. E manaò anaè au, ia au i to tätou hiroà tumu mäòhi, eita tätou e färii i te reira, no te mea e ìmiraa moni to muri. Ua ravaì noa teie mau fare e rapaau nei i to tätou mau maì te taime a pohe ai, mai ia Min Chiu, Vaxellaire, Hapipi, Vonbalu, Tehei, etv… e ìmi moni nei i nià i to tätou mau taata ia pohe. E au atu ra ia hiòhia, mea moni aè te tahi taata ia pohe, i to na taime oraraa. Täpiri mai hoì i pihaì iho i te reira, te mau püpä tiare, te pureraa, te himene, te taata, hapehape anaè te tahi hau atu te toru mahana. Aita e faahaparaa to reira.

 

Ia hiò anaè rä hoì tätou to te Fatu, te Tamaiti iho a te Atua, aita e pureraa, aita e himene, aita e püpä tiare, aita e âfata mea ôviri noa i roto i te àhu, tau taa rii noa, mea aroha. Aita e huru e, mai terä rii paì, mai to na haereraa mai i te ao nei, na te ânimara i färii ia na na mua roa, tae mai ai te tahi nau pupu taata i faaarahia e te mau merahi, tirä rä atu ai. E uiui rii atoà ihoä ia tätou e, aita atoà änei tätou i faananea roa i te faanahoraa. Parau mau, te manaò tumu, te tämahanahanaraa ia i te ùtuäfare aore ra te ôpü fetii i topa i roto i te àti.

 

Te uiraa, na vai tämahanahana te àau peàpeà o te Atua, no te pohe o ta na Tamaiti ? Te haapäpü noa mai ra te reira ia tätou e, i roto i te mau faanahoraa atoà ta tätou e rave nei, eita ihoä e tupu hope roa, mai tei faahitihia i roto i te pure i raro nei :

 

‘Eere nā tātou e faanaho i te tau amuri nei

E taime ra, e tuu i te tohe i raro, ei tauturu i te hiò-ātea-raa. Èita te hau o te Atua e tupu nā roto i te puai taata, èita atoà e roaa i te ìte taata.

Te taatoàraa o te òhipa ta te taata e rave i roto i tōna oraraa, e tuhaa iti haìhaì roa ia, ia faaauhia i ta te Atua òhipa. Èita ta te taata òhipa e hope, no te mea, mea ätea ā te hau o te Atua. Èita te parau a te taata e faaìte i te mau mea atoà e au ia parau. Èita te faaroo o te taata e hope i te faaìtehia i roto i te hoê pure.  Èita te fāìraa hara a te taata e faatiàmā hope roa ia na. Èita te tere farerei a te òrometua e tāmāhanahana hope roa i te taata. Aita e faanahoraa e oti hope roa ai te òhipa a te Ètārētia. Èita te mau mea atoà e hope i roto i te tahi noa tau ôpuaraa e te tahi noa mau fā tā te taata e haamau.

Terā te huru o te taata, tō tātou mau terā huru. Te tanu nei tātou i te mau huero e tupu ananahi. Te pīpī nei tātou i te reira ma te tiàturi e tupu e e hotu mau ä rātou. Te haamau nei tātou i te niu o te fare ma te ara e aano atu ā rātou.  Te tuu nei tātou i te hopue e faatupu i te mea rahi atu ä i ta tātou i manaò.

Èita e roaa ia tātou i te rave i te mau mea atoà. Ia fārii tātou i te reira parau, e roaa te manaò tiàmā e te hinaaro e rave i te tahi noa tuhaa iti. E rave pāpū rā i te reira. Èita paha e hope roa, ua haamata rā i te rave. Hoê ia taahiraa i nià i te taìara, e të riro ei ārea i reira te Fatu e tomo mai ai nō te faahope roa i te òhipa ma tō na here, e tō na aroha. Èita paha tātou e ìte i te hopeàraa o te òhipa, aita rā e raveà, no te mea e taaê ihoā te tuhaa a te fatu òhipa i ta te rave òhipa.

E mau rave òhipa noa tātou èere tātou i te fatu òhipa. E mau tävini noa tātou, èere tātou te Metia. E mau perofeta tātou, e te tohu nei tātou no te hoê tau a muri nei, èere i tā tātou.

Ia maitaì tätou i te Atua.

Òrometua Tahiarii a Pihaatae

Märeto 16, 1 - 8 To Ietu Tià-faahou-raa

 

Täpati 04 no Eperera 2007

 

 

         Taiòraa : Märeto 16, 1 - 8

 

To Ietu Tià-faahou-raa

 

(Aroharaa)

 

Ia parau-anaè-hia paì tià faahou te auraa ra, te vai ra ia hoê taime nä mua atu ua faaea ia i te tià. No te mea te vai ra te tià täpiri anaè mai te faahou, te vai ra ia te topa i nä mua atu. Ua topa, e teie nei ua tià faahou. Nä mua atu, mea tià, i muri iho, ua topa. Ua topa ihoä rä, i roto i te hiòraa, i nià i te taata hiò, ua pohe, te auraa, ua ìtehia i te tuuraa i to na värua ; ua ìtehia i te huriraahia i roto i te menema, e ua tuu-anaè-hia te taata i te reira vähi no te mea ia i roto i te manaòraa, ua pohe eita e ora faahou.

 

E teie tià faahou, te haere mai ra ia e haapäpü e, noa atu i roto i te manaò o te taata, noa atu e i te tahi taime te vai ra te mau mea e haapäpü  ra i te manaò o te taata e, ua oti, no te reira te manaò i te täfifi, ua oti, ua hope, ua faufaa òre i teie nei, pärahi noa ai i roto i te peàpeà tiaì noa atu ai i te taime e pürara atu ai rätou. E inaha, ua tià faahou, taime poto ua tià faahou ; eere rä teie tià-faahou-raa e, o Ietu anaè terä e tià mai ra, te täàtoàraa rä no te mau òhipa ta na i rave terä e tià mai ra; te täàtoàraa no te mau tohu terä e tià faahou ra; te täàtoàraa o te ôpuaraa faaora a te Atua terä e tià faahou ra;  Aita i faufaa òre, ua tià faahou; ua tià faahou terä ôpuaraa faaora ta te Atua, te haere faahou ra i mua, eita e mau.

 

Tei ìtehia, te pohe te mea i täpeà i te ôpuaraa a te taata;  te mea e täpeà i te itoito o te taata;  te mea e täpeà i te mau òhipa atoà o ta te taata e rave, nä te pohe ihoä e täpeà, ua pohe,  te hopeàraa ihoä ia.  E ua täpiri-anaè-hia mai teie tià faahou, no te faaìte ia e, aita i ü, eita e ü i te pohe, eita e mau i te pohe i te täpeà. Noa atu ia i te tahi taime, ua manaò te taata e, ua oti tenä ta òe mäa, aita ta òe e parau faahou, eita òe e haere faahou mai, e faahuehue i te nünaa nä roto i ta òe mau haapiiraa, eita òe e haere faahou mai e haapeàpeà ia mätou te feiä faatere i te ètaretia, i terä tau, nä roto i te mau parau ta òe e poro ra, ua oti.

 

Terä rä, ua tià faahou, te auraa, eita e faaea te manaò ta Ietu i haapii :  Te ìmiraa i te räveà ia tupu te Hau o te Atua, te ìmiraa i te räveà ia ìtehia te hinaaro o te Atua, ia tupu te parau tià. Mai te peu terä tià-faahou-raa no te faatupu i te parau tià, te auraa ra, mai teie atu nei nä Ietu te àroraa.  O na tei àrohia na, terä ua tià faahou, nä na ia te àroraa, o na ia te haere e faatupu i te parau tià.

 

I mua ra, e aha te huru o Ietu ia hiòhia, te täpunipuni ra, te horo ra, te âfaìhia atu ra e te mau pipi i te tahi vähi moèmoè, ia òre te hämani-ìno-raa ia tae roa mai i nià ia na.  Teie nei, ua tià faahou, te auraa ra, teie nei, ua faaìtehia mai to te taata faufaa òre i roto i ta na mau tamataraa atoà i te haafifi i ta te Atua ôpuaraa.  I reira e tano ai te tahi òhipa o tei tupu i nià i te mau pipi, ia au i te faaìteraa a terä taata paari o Tamariera : Mai te peu nä te taata, e morohi noa ia, e faufaa òre;  mai te peu rä nä te Atua, haapaò maitaì a riro òutou ei feiä tei àro atu i te Atua ( Ohipa 5,39). Te feiä i àro i te Atua, te feiä i àro ia Ietu, te ìte ra rätou i teie nei, nä roto i teie tià-faahou-raa mai to Ietu, ua faufaa òre ta rätou òhipa. O rätou i teie nei te faaruru i te àroraa a te Fatu.

 

Aita te Atua e hinaaro ra e àro i te taata, no te haamou; te àroraa ta te Atua e hinaaro ra i te taata, ia tupu ia ta na parau tià, ia märamarama e ia färii te taata ia na, no reira o ia i tià faahou mai ai.  No te faaìte e, eiaha, eiaha e pätoì, te hinaaro ra vau e faaora, ua tamata òutou i te haafifi, i te haafaufaa òre, e inaha ua tià faahou mai; e inaha eita te aroha o te Atua e vï i te ìno o te taata, no reira i te tià faahou mai;  faahou eita e faaea i te faahou-noa-raa.

 

I te haamataraa mai, hoê noa taata, hoê taata e te tahi tau taata rii tei âpee ia na.  E terä tau taata rii, ua haere i te rahi.  E terä tià-faahou-raa, aita i tià noa, ua tae atoà rä i te mau fenua atoà.  Mai te peu e, ua tià faahou mai, eiaha ia tätou i ô nei e tamata i te faatopa, te haafifi mai terä i ravehia e te Ati-Iuta i to rätou tau;  e òaòa rä tätou i terä tià-faahou-raa, e òaòa rä no te mea, e ö atoà tätou i roto i terä ôpuaraa faaora a te Atua. Eiaha terä ôpuaraa e faaora ia tätou, te ôpuaraa rä e faaìte i te ora o ta te Atua i faaineine no te taata, o tei riro te fenua e o Ietu iho ei ìte. Te reira te ôpuaraa faaora ta teie tià-faahou-raa e haamanaò mai nei i te taata, ua tià faahou.

 

No reira, i te mau taime atoà e topa ai, i te mau taime atoà e ü ai i te fifi, e maemae te ôpuaraa a te taata; e haamanaò rä e, mai te peu e nä te Atua te òhipa e ravehia ra eita e mau.  No reira, eiaha e haaparuparu, e tià faahou;  ua tià faahou te Fatu, te auraa ra, eiaha ia te feiä e rave ra i ta na òhipa i teie mahana ia parahi noa;  eiaha ia ia àrohia mai e ôtohe, e mohi mai te uà e mohi i roto i to na àpu, e horo.

 

No reira, te tià-faahou-raa o te Fatu, terä te püai o te taata; terä te püai o te feiä atoà o tei hinaaro e rave i ta na òhipa; no te mea, te òhipa a te Atua terä e faatià-faahou-hia ra.  Eere te hinaaro o te taata terä e hinaarohia ra ia ìtehia.

 

Faatià, ia ìtehia te hanahana o te Atua, ia ìtehia e aita e mea e mau ai te aroha e te here o te Atua no te taata.  Te reira te parau no te faatià faahou, te reira te parau e tano i teie mahana, e tähoê i te püai o te taata i roto i ta rätou àroraa, àro ia mau te Hau no te aroha e te here i nià i teie fenua. Te mana ia no te tätara i te fifi o te taata. Te reo ia o te Fatu i roto i te tahi mahana : O òutou i horoà noa atu i te tahi äuà päpe nä te hoê i roto i to ù nei mau taeaè rii, ua nä reira mai ia òutou ia ù.

 

Te faatupuraa i te aroha, te here e te parau tià o te tapura òhipa ia o ta te Fatu tei tià faahou, e faaue mai ra ia tätou e faatupu. Ei faahoperaa, te tahi hiòraa âmui no to tätou oraraa i teie mahana i roto i teie nei ao:

 

Te taaêraa o tō tātou anotau

 

Ua riro tō tātou oraraa i teie mahana ei tataùraa – E tataùraa ia riro ei òna mirioni rahi roa aè,  ei taata maitaì roa aè, ei taata tuiroo roa aè, ei taata rahi roa aè…

Mea taaê mau tō tātou anotau :  ei mau fare teitei e te rarahi tā tātou i patu, areà rā tō tātou mau manaò, e mea poto roa ïa ;
E mau purumu ààno tā tātou i faatoro, areà rā tā tātou huru hiòraa i te oraraa, e mea oaoa roa ïa ;

Mea rahi tā tātou mau haamauàraa, mea iti roa rā tē noaa mai nei ia tätou. Mea rahi te mau mea tā tātou e hoo nei, mea iti rā te òaòa tā tātou e fanaò.

E mau fare rārahi tā tātou e patu nei, areà rā tō tātou mau utuafare, mea naìnaì roa ïa. Ua rahi roa te mau faaànaànataeraa, ua iti roa rā te taime no te ùtuäfare.

Ua rahi roa tā tātou mau parau pūìte, ua iti roa rā tō tātou ìte : mea rahi roa tā tātou mau rāau, te rahi noa atoà atu ra rä te fifi o tō tātou ea. Mea rahi roa te mau àivanaa, te rahi noa atu ā rā te fifi.

Ua iti roa tā tātou àta, ua iti roa te paho o tā tātou àtaore, ua iti tā tātou tauahiahiraa, ua iti tā tātou taiòraa puta, areà te pure, e, ua iti roa atu ia tā tātou taime pureraa. Ua faarahi tātou i tā tātou mau faufaa, ua iti rā tō tātou haapaò i tā tātou mau peu tumu.

Ua rahi roa tā tātou parauparau, ua iti roa tō tātou tororaa i te tarià nō te faaroo i te tahi. Ua iti roa tō tātou here i te tauaro, mea ūàna aè tō tātou hae i te taata.

Ua haapii tātou i te faanaho i tō tātou oraraa, te ère nei rä tätou i te ora. Ua faarahi tātou i te matahiti i tō tātou oraraa, aita rā i faarahi i te ora i tō tātou mau matahiti.

Ua reva roa tātou i nià i te āvaè e ua hoì mai,  areà rā te haereraa e farerei i te tauaro i pīhaì noa iho i tō tātou fare, èita roa atu ia te manaò e fārii !

Ua rahi aè tā tātou tuatāpaparaa i te tuaraì atea, āreà to tätou rotoraa, àita roa ïa tātou e tauà ra.

E òhipa rahi tā tātou i rave, èere rā te òhipa maitaì hau ê ; ua tāma tātou i te aho reva, ua viivii roa rā tō tātou manava.

Ua roaa ia tātou i te vävähi i te àuri, aita rā i roaa i te faaòre i te manaò ìno i roto ia tātou. Ua rahi roa tā tātou māa, mea ìti roa rä te māa maitaì ta tätou e àmu nei..

Ua rahi roa tā tātou mau faatuàtiraa na roto i te niuniu parauparau, ua iti roa rā tō tätou färereiraa e aro e aro te tahi i te tahi! E tau teie no te mau fare nehenehe roa, e mau ùtuafare pararï rā te ora ra i roto.

Mea rahi roa te puta tā tātou e taiò nei, mea iti roa rä tō tātou ìte. Aroharoha aè te mau tupuna, te rahu a Taaroa Nui Tumu Tahi ta rätou puta i taiò na, ei arataì i to rätou oraraa. E tau taaê mau ä to tätou.

 

Ia haamaitaìhia te Atua, te Tumu o te ora, mauruuru.

 

Òrometua Tahiarii a Pihaatae

 

 

 

Papa Haamori E ta ù Metua. Tāpati 21 no Mati 2021.

 

Tāpati 21 no Mati 2021.

Papa Haamori

E ta ù Metua.

Taùraa

Taù tätou i te Atua Nui Tumu Tahi, E horoi hua mai òe ia mätou i to mätou nei ìno, tämä hua mai ia mätou i ta mätou nei hara. Te fäì nei hoì mätou i ta mätou nei mau hara, e te vai noa nei ä to mätou ìno i pïhaì iho ia mätou. I mua i to aro, to òe anaè ra, i hara ai mätou nei, e i mua i to mata i rave ai mätou i teie nei ìno. Inaha, i fänauhia mai mätou mä te hara, e i töhia mätou mä te ìno. E huna ê atu òe i to mata i ta mätou nei mau hara, e parai hua mai i to mätou nei mau ìno. E i reira mätou e haapii ai i te feiä rave hara i ta òe parau, e e haafäriuhia mai te rave parau ìno ra ia òe. O të nounou i to na ora, ua ère ia i te ora, e të òre e hinaaro i to na ora i teie nei ao, ei ora-mure-òre ia to na i te ao a muri nei. Ua horuhoru roa to mätou värua i teie nei. Ei teie nei e faahapahia ai teie nei ao, ei teie nei e hee ai te arii o teie nei ao.

Haamaitaì i te Atua, e tià mai tätou.

Himene.

E faaroo tätou i teie i te parau no te Taramo,

Taramo 51

1 Na te Mënätehe. Taramo na Tävita. 2 I te haereà mai o te perofeta ra o Nätana ia na ra i muri aè i to na haereraa atu ia Pätetepa ra.3 E aroha mai òe ia ù, e te Atua e, i taua hämani maitaì no òe ra, e no te rahi o to òe ra hämani maitaì: e parai òe i ta ù nei mau hara. 4 E horoi hua mai òe ia ù i to ù nei ìno, tämä hua mai ia ù i ta ù nei hara. 5 Te fäì nei hoì au i ta ù nei hara, e te vai noa nei ä to ù ìno i pïhaì iho ia ù. 6 I mua i to aro, to òe anaè ra, i hara ai au nei, e i mua i to mata i rave ai au i teie nei ìno. Ia faatiàhia hoì ta òe parau, e eiaha e faahapahia ia parauhia ra.7 Inaha, i fänau mai au mä te hara, e i töhia vau e ta ù metua vahine mä te ìno. 8 Inaha, o te parau mau no roto ra ta òe e hinaaro. E haapii mai òe ia ù i te haapaò maitaì i te vähi moè ra. 9 E tämä mai òe ia ù i te hïtopa e ia mä roa vau, e horoi òe ia ù, e ùoùo roa aè ra vau i to te hiona. 10 E faaìte mai òe ia ù i te òaòa e te reàreà, ia òaòa te mau ivi i ôfatihia e òe ra. 11 E huna ê atu òe i to mata i ta ù nei mau hara, e parai hua i to ù nei mau ìno. 12 E faaau na òe i te âau mä i roto ia ù nei, e ta ù Atua. E faahou na hoì òe i te âau manaò tià i roto ia ù nei.13 Eiaha e faaârue ia ù i mua i to aro nei, eiaha hoì e rave ê atu i to Värua Maitaì ia ù nei. 14 E faahoì mai òe i te òaòa i te ora na òe ra, e ia täuturuhia mai au e te âau tiàmä ra. 15 E i reira vau e haapii ai i te feiä rave hara i ta òe parau, e e haafäriuhia mai te rave parau ìno ra ia òe. 16 Ia ora vau ia òe i te hara toto ra, e te Atua e, te Atua e ora ai au nei; e na ta ù vaha e himene pii hua i to òe ra aroha. 17 E vëvete na òe, e te Fatu, i ta ù vaha, e na ta ù vaha e ârue ia òe.18 Eere hoì i te tütia ta òe i hinaaro, àhiri o te reira, ua horoàhia ia e au, aore hoì òe e au i te tütia-täauahi. 19 O ta te Atua tütia hinaaro ra, o te âau paruparu ra ia. O te âau paruparu ra e te òto ra, e òre roa te Atua e vahavaha i te reira. 20 Ei hämani maitaì to òe ia Tiona; e patu hoì òe i te âua i Ierutarëma nei. 21 Ei reira òe e mauruüru ai i te tütia parau tià e te tütia-täauahi täatoà mau ra; ei reira te puaatoro e hopoihia ai i nià i ta òe ra fata. Âmene.

 

Himene tätarahapa.

 

Teie te faaauraa âpï i te faaìteraa a Ieremia,

Ieremia 31.31-34

31 Te parau mai ra te Fatu inaha, te fätata mai ra te ànotau, e faaau ai au i te ùtuafare o Ìteraèra e te ùtuafare o Iüta i te tahi faaauraa âpï; 32 eiaha mai te faufaa ta ù i faaau atu i to rätou ra mau metua, i te mahana i rave atu ai au i to rätou rima, ia arataì mai au ia rätou mai te fenua ra i Àifiti; e ua ìno iho ra ta na faufaa nä ù ra ia rätou, i haapaò noa ai au ia rätou mai te täne ra të nä reira mai te Fatu, 33 Teie rä te faufaa ta ù e faaau atu i te ùtuafare o Ìteraèra; te nä ô mai ra te Fatu, ia oti aè te reira ànotau, e tuu vau i ta ù pure i roto ia rätou, e päpaì au i te reira i roto i to rätou âau; e e riro vau ei Atua no rätou, e ei taata hoì rätou nö ù. 34 E òre hoì rätou e haapii faahou, o te taata o to na iho taata tupu, o te taata a to na iho taeaè, i te nä-ô-raa atu e, ia ìte hoì òutou i te Fatu; e ìte päatoà hoì rätou ia ù, o tei haèhaa e o tei rahi te parau mai ra te Fatu; e faaòre hoì au i ta rätou hara, e òre au e manaò faahou i ta rätou ìno.

Haamaitaì tätou i te Atua e tià ai

 

Himene òaòa

 

 

 

 

Teie te tahi parauraa na Pauro no te Metia,

Hēpera 5.7-9

7 Ua püpü hoì o ia i te pure i ta na oraraa ra, i te aniraa atu ia na mä te òto rahi e te roimata, i tei tià ia faaora ia na mai te pohe mai ra, ei faaroohia o ia i ta na i mataù ra. 8 E Tamaiti noa ä iho hoì o ia, i ìte o ia i te auraro i to na ra mau pohe. 9 E no te mea ua haamoà-roa-hia o ia, riro atu ra o ia ei tumu no te ora mure òre no te feiä atoà e faaroo ia na ra. Âmene.

Haamaitaì tätou i te Atua i te hoê reo himene.

 

Himene.

Pure

Pure tätou i te Atua, te faaìte noa ra te rähu i te faatupuraa ora no mätou te taata ta mätou e faanaò noa nei i te mau taime atoà o to mätou oraraa. A türama ia mätou i to mau hinaaro ia hanahana òe i to  mätou taiòraa e i te faarooraa te mau parau no to Tämaïti here to mätou faaora. Âmene.

 

Taiòraa.

Ioane 12.20-33

Te hora o te tätauro

20 E taua feiä i haere mai e haamori i te Atua i te ôroà ra, e Herëni ia te hoê pae. 21 Ua haere mai ra rätou ia Firipa o Petetaita i Tarirea ra, ua parau mai ra ia na, na ô mai ra: E hoa, te hinaaro nei mätou ia ìte mätou ia Ietu. 22 Ua haere atu ra Firipa, faaìte atu ra ia Àneterea, ua parau mai ra hoì Àneterea räua o Firipa ia Ietu. 23 Ua parau atu ra Ietu ia rätou, nä ô atu ra: Ua tae i te hora e haamaitaìhia ai te Tamaiti a te taata nei. 24 Âmene, âmene, e parau atu vau ia òutou: ia tuuhia te hoê huero tïtona i raro i te repo, ia òre rä ia pohe ra, ua vaiiho hoê noa ia; ia pohe rä, rahi roa atu ra ia te hotu. 25 O të nounou i to na ora, ua ère ia i te ora, e të òre e hinaaro i to na ora i teie nei ao, ei ora-mure-òre ia to na i te ao a muri nei. 26 O te taata i hinaaro ei tävini no ù ra, a pee mai ia ia ù, e te vähi ta ù e pärahi ra, ei reira atoà ia ta ù tävini; e ia tävini mai te taata ia ù ra, na ta ù Metua ia e utuà mai ia na.

To Ietu faaìteraa i to na pohe

27 Ua horuhoru roa ta ù värua i teie nei. E e nä hea vau? E nä ô änei: E ta ù Metua, e faaora ia ù i teie nei hora? I haere mai ai rä vau no teie nei hora. 28 E ta ù Metua, e haamaitaì i to iòa. Ua ìteä mai rä te hoê reo no nià i te raì i te nä-ô-raa mai: Ua haamaitaì au, e e haamaitaì faahou atu ä vau. 29 Ua ìte hoì te mau taata i pïhaì iho ra i te haruru, e ua parau aè ra: E pätiri  Ua nä ô aè ra hoì te hoê pae: E merahi të parau mai ra ia na. 30 Ua parau atu ra Ietu, nä ô atu ra: Eere no ù i tae mai ai taua reo nei, no òutou rä. 31 Ei teie nei e faahapahia ai teie nei ao, ei teie nei e hee ai te arii o teie nei ao. 32 Âreà ia hopoihia vau i nià ra, e ùmehia mai ia e au te taata atoà ia ù nei. 33 I nä reira atu ra o ia i te faaìteraa atu i te huru o to na pohe ia pohe ra.

Na te Atua Hau i te raì tuatinitini e haamaitaì mai i te mau parau i taiòhia i mua ia na e i mua ia tätou.

 

Pure

 

Pure tätou i te Atua, i to mätou faarooraa i te mau parau no to Tämaïti Here, te ìte nei mätou i ta òe tïtauraa ia mätou no te faatupu i te ora, èi ia hanahana òe e te Metua Maitaì roa ra. Âmene.

Haamaitaì tätou i te Atua i te hoê reo himene.

 

Himene.  

Faaitoitoraa.

Himene.

Parau faaära.

Himene püpüraa moni.

Pure Ärai.

Haamaitaì mätou ia òe e te Atua Nui Tumu Tahi i te mea, te haamanaò mai nei òe ia mätou e, te faataa-ê-raa, ta òe ia ôpuaraa faaora i te nünaa Mäòhi e faaruru noa nei i te mau faatïtïraa rau i teie mahana ; tahi hoì te reira huru tupuraa no ta òe faatiàmäraa ia tiàmä te nünaa Mäòhi. Te faahaèhaa atu nei mätou i mua i to òe here rahi e ta òe faaherehere rahi ia mätou, o mätou i mataù noa na e i haamataù noahia na i te parau no te faataa-ê-raa. E te ani atu nei mätou ia òe, ia arataì faahou òe i to mätou nünaa iti i te tähiti faahouraa i roto i te tau no te Hinapaarae. A tuu mai i ta òe faatereraa tiàmä i te feiä e faatere nei i to mätou fenua iti, ia TIÀ MÄ te faatereraa, e TIÀMÄ atoà te nünaa Mäòhi. Amene.

 

Himene âmui.

 

Pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie te parau faaitoitoraa

Faaitoitoraa.

9 E no te mea ua haamoà-roa-hia o ia, riro atu ra o ia ei tumu no te ora mure òre no te feiä atoà e faaroo ia na ra.

Haamaitaìraa.

28 E ta ù Metua, e haamaitaì i to iòa. Ua ìteä mai rä te hoê reo no nià i te raì i te nä-ô-raa mai: Ua haamaitaì au, e e haamaitaì faahou atu ä vau.

 

Teraì òr. Faatura.