Ruta èv. 12.32-48 Ruta èv.

 

Tāpati 7 no Âtete 2022.

Ôroà

Mäìtihia 

Taramo 33.

1 E òaòa i te Fatu, e te feiä parau tià e. E au te haamaitaì i te feiä parau tià.

2 E haamaitaì i te Fatu i te tïnura, e himene ia na i te näpara aho àhuru ra.

3 E himene ia na i te himene âpï, faaòto maitaì na mä te òaòa e te au mäite.

4 E parau tià ta te Fatu, e te haavare òre hoì ta na atoà ra mau òhipa.

5 Hinaaro o ia i te parau tià e te au, te î nei te fenua i te maitaì a te Fatu.

6 Na te parau a te Fatu i oti ai te mau raì, e to rätou atoà ra i te aho o to na vaha.

7 Ua haaputu o ia i te moana ra o te tai ei puèà, e ua vaiiho o ia i te moana i roto i te fare vairaa.

8 Ia mataù te mau fenua atoà i te Fatu; e ia höriri to te ao atoà nei ia na.

9 Ua parau hoì o ia, e oti aè ra; ua faaue o ia, e ua mau atu ra.

10 Te faaòre nei te Fatu i te âpooraa a te mau êtene, te faariro nei i tei ôpuahia e te mau taata ra ei mea faufaa òre.

11 Tei faaauhia e te Fatu ra, e tià ia i te vai-mäite-raa, e tei manaòhia e ta na âau e tae noa atu i te mau uì atoà ra.

12 E ao to te fenua, o te Fatu to rätou Atua; e te mau taata i mäìtihia e ana ei tufaa na na.

13 O te Fatu tei hiò mai nä nià mai i te raì, te hiò mai ra i te mau tamarii atoà a te taata nei.

14 Te vähi i pärahihia e ana ra, ta na ia hiòraa mai i to te ao atoà nei.

15 O ia anaè rä tei haafäito i to rätou âau, e o ia tei hiòpoà mai i ta rätou mau räveà.

16 Aore e arii i ora i te rahi o ta na nuu, aore e taata püai i ora i te rahi o te püai.

17 E mea faufaa òre te puaahorofenua ei haapüraa, aore e taata e ora i to na püai rahi.

18 Inaha, tei nià to te Fatu mata i te feiä i mataù ia na, i nià i te feiä i tiàturi i to na ra aroha,

19 e faaora ia rätou i te pohe, e ia ora hoì rätou i te oè ra.

20 Te tiaì nei to mätou värua i te Fatu; o to mätou ia tauturu, e to mätou ia päruru.

21 Te òaòa nei to mätou âau ia na; te tiàturi nei hoì mätou i to na ra iòa moà.

22 Ia vai mäite mai ä to aroha, e te Fatu, i nià ia mätou, mai ia mätou nei e tiàturi atu ia òe ra.

Ètetiera 33.10-16

10 E o òe atoà, e te tamaiti a te taata na, e parau atu i te ùtuafare o Ìteraèra; Te vai nei ta mätou mau hara, e ta mätou nei mau parau ìno i nià ia mätou nei, e ua roohia mätou i te ìno i te reira, e aha iho ra hoì mätou e ora ai?

11 E parau atu ia rätou te nä ô mai ra te ATUA ra o te Fatu te ora nei au ra, aore roa o ù e mauruüruraa i te pohe o te taata ìno ra; ia färiu mai ra te taata i ta na parau ìno ia ora: e färiu mai òutou, e färiu mai òutou, i ta òutou mau parau ìno ra; e aha hoì òutou i hinaaro ai i te pohe, e te ùtuafare o Ìteraèra e?

12 E parau atoà atu òe, e te tamaiti a te taata na, i te mau tamarii a to mau taata ra, E òre te taata parau tià e ora i ta na ra parau tià i te mahana e hara ai o ia ra; e te parau ìno hoì a te taata parau ìno ra, e òre o ia e hià i te reira i te mahana e färiu mai ai o ia i te parau ìno nä na ra; e òre atoà e ora te taata parau tià i te mahana e hara ai o ia i ta na ra parau tià.

13 Ia parau vau i te taata parau tià ra, E ora mau o ia; e ua tiàturi iho ra o ia i ta na iho parau tià, e ua rave hoì i te parau ìno, e òre e manaòhia te mau parau tià atoà nä na ra, no ta na ra parau tià ìno tä na i rave ra, e pohe o ia i te reira.

14 E mai reira hoì, ia parau atu vau i te taata parau ìno ra, E pohe mau ä òe na; e ua färiu mai o ia i ta na parau ìno, e ua rave i te mea au e te mea tià ra;

15 e ua faahoì mai ra taua taata parau ìno ra i te mauhaa, e ua hopoi mai i tä na i haru ra, e ua haapaò i te parau ora mau ä o ia, e òre ia e pohe.

16 Te mau hara atoà tä na i rave ra, e òre ia e manaò-faahou-hia ei hara nä na; ua rave o ia i te mea au e te parau tià: e ora mau ä o ia ra.

Hēpera 11.1-19

Te faaroo

1 E teie nei, o te faaroo nei, o te tiàturi ia i te mau mea e tiaìhia nei, e te ìte i te mau mea aore e hiòhia nei.

2 No te reira hoì i noaa ai te roo maitaì i te feiä tahito ra.

3 No te faaroo i ìte ai tätou e, no te parau a te Atua nä ao nei i hämanihia ai, eere hoì te mau mea e hiòhia nei i to te hoê mau mea i ìteä ra.

4 No te faaroo i maitaì roa ai ta Àpera tütia i püpü i te Atua i ta Taina; i parauhia mai ai o ia e, e taata parau tià, o te Atua i faatià mai i taua taoà horoà na na ra; e teie nei, pohe noa ä o ia, te parau noa mai ra ia, i taua faaroo ra.

5 No te faaroo i tähitihia ai Ènoha ia òre o ia ia ìte i te pohe; e aita ra o ia, no te mea ua tähitihia o ia e te Atua; hou hoì o ia i tähitihia ai i ìte ai o ia e, te mauruüru ra te Atua ia na.

6 Aore e faaroo ra e òre roa o ia e mauruüru: o te haamori i te Atua ra, e faaroo o ia e, e Atua, e tià ai, e o o ia të faautuà i te feiä i ìmi päpü ia na ra.

7 No te faaroo hoì to Noa, a faaìtehia mai ai o ia e te Atua i te mau mea aore ä i ìteä mai ra, e roohia iho ra e te mataù, i tarai ai i te pahï ia ora to na fëtii; faahapa iho ra i to te ao, e riro atu ra o ia ei fatu i te parau tià e noaa i te faaroo ra.

8 No te faaroo i haapaò ai Âperahäma, a parauhia mai ai o ia e, e haere i te hoê vähi e noaa mai ia na a muri atu ei âià; e haere atu ra o ia mä te ìte òre i taua fenua i haerehia e ana ra.

9 No te faaroo i purutia noa ai o ia i taua fenua i parauhia mai ra, mai te mea e, e fenua ê ra; i te pärahi-noa-raa i roto i te tiàhapa ra, rätou atoà o Ìtaata, e o Iatöpa; o nä taata âià atoà ia e o ia atoà i tei parauhia mai ra. 10 Te tïtau ra hoì o ia i taua ôire niu mau ra, o te Atua te faaau e te faatià ra.

11 No te faaroo atoà i noaa ai ia Tara iho te maitaì i tö ai ra, e fänau mai ra ta na tamaiti, hope noa ai to na tau mau ra, no te mea i manaò o ia e e parau mau ta na ta tei parau mai ra.

12 I fänau mai ai ta te taata hoê ra, e mai te taata pohe hoì te huru, mai te fetià o te raì ra te rahi, e mai te one tähatai eita e hope ia tataù ra.

13 I pohe anaè atu ra taua feiä ra mä te faaroo, aita i noaa tei parauhia mai ra, ua hiò rä rätou i taua mau mea ra i te ätea ê, e ua faaroo päpü e ua färii mäite, e ua fäì hua e, e taata èê rätou e te purutia i teie nei ao.

14 O te feiä hoì i nä reira mai, ua faaìte hua ia e, te ìmi ra rätou i te fenua mau.

15 Àhiri hoì rätou i nounou i taua fenua no reira mai rätou ra, e tià noa ia ia rätou ia hoì.

16 Ua hinaaro rä rätou i te fenua maitaì roa ra, oia hoì te ao ra: i òre ai te Atua i haamä ai ia rätou ia parauhia o ia e e Atua no rätou; ua haapaò hoì o ia i te hoê ôire no rätou.

17 No te faaroo i püpü ai Âperahäma ia Ìtaata, a tämatahia ai o ia ra; e te taata i noaa ia na te parau i parauhia mai ra, ua püpü ia i ta na tamaiti fänau tahi,

18 no na te parau i parauhia ra e: «Ei ia Ìtaata to òe ra huaai e noaa ai.»

19 I parau hoì o ia e, e tià i te Atua ia faatià faahou mai ia na mai te pohe mai ra; e mai te mea hoì e mai te pohe mai ra te noaa-faahou-raa ia na.

Ruta èv. 12.32-48

Te mau taoà i nià i te raì

(Mät 6,19-21)

32 «Eiaha e mataù, e ta ù nana iti e. E mea hinaaro na to òutou Metua i te horoà mai i te Pätireia no òutou.

33 E hoo i ta òutou taoà, a horoà noa atu ai; ei pütë marau òre ta òutou, ei taoà pau òre i te ao ra; i te vähi e òre e taeà e te èiä, e òre hoì e pau i te huhu.

34 Te vähi hoì i vai ai ta òutou taoà, tei reira atoà ia to òutou âau.

Te mau tävini e vai ara nei

35 «Ia tätuahia to òutou tauupu, e ia vai àma ä ta òutou rämepa.

36 E ia au òutou i te feiä i tiaì i to rätou fatu i te hoìraa mai, mai te faaipoiporaa mai ra; ia haere mai rä o ia e pätötö mai ra, ia ìriti rätou i te ôpani ia na i reira ra.

37 E ao to te reira mau tävini, i te roohiaraa mai e to rätou fatu, te ara ra. Oia mau ta ù e parau atu ia òutou na, e riro o ia i te tätua ia na iho, a tuu atu ai ia rätou i te àmuraa mäa ra, a raverave ai i te mäa na rätou.

38 E ia tae mai o ia i te piti o te äraraa, e te toru hoì, roohia mai te nä reira ra, e ao to te reira mau tävini.

39 Ua ìte hoì òutou e: àhiri i ìte na te taata fare i te hora e tae mai ai te èiä, e ära ia o ia, e òre e vaiiho noa i to na fare ia vävähi-noa-hia na.

40 E teie nei, ia vai ineine ä òutou, no te mea ei te hora manaò-òre-hia e òutou na e tae mai ai te Tamaiti a te taata nei.

Te tävini haapaò maitaì e te tävini haapaò òre

(Mät 24,45-51).

41 Ua parau mai ra Pëtero ia na: «E te Fatu, i parau tià mai änei òe i tënä na parapore ia mätou anaè nei, e i te taata atoà nei änei?

42 Ua parau atu ra te Fatu: «O vai hoì te tïàau haavare òre e te haapaò maitaì, i ta te fatu e tuu i nià iho i to na atoà ra mau tävini, ei tuu atu i ta rätou tufaa mäa i te tufaraa mau ra?

43 E ao to te reira tävini, to tei roohia mai e to na ra fatu te nä reira ra.

44 Oia mau ta ù e parau atu ia òutou nei, e faariro ia o ia ia na ei mau i te mau taoà atoà na na ra.

45 Âreà te tävini e parau noa i roto ia na iho e: «E òre ta ù fatu e tae vave mai», papaì iho ra i te mau tävini täne, e te mau tävini vahine, àmu iho ra i te mäa, e inu faataèro iho ra i te àva;

46 e tae mai ia te fatu o taua tävini ra i te mahana manaò-òre-hia e ana, e i te hora-ìteä-òre-hia e ana ra, e e täpüpü atu ia na, a tuu atu ai i ta na tufaa i roto i te feiä haapaò òre atoà ra.

47 E te tävini i ìte i te hinaaro o to na ra fatu, e aita i faaineine ia na iho, aore hoì i rave i ta te fatu i hinaaro ra, e papaìhia ia e rave rahi te täìriraa.

48 Âreà tei òre i ìte ra, rave atu ra rä i te parau e au ia na te päpaì, e täìriraa iti ia to na: o tei tuuhia atu te mea rahi ra, e mea rahi atoà të tïtauhia atu; e ta te taata hoì i tuu atu i te mea rahi ra, e mea rahi atoà ia të anihia atu ia na ra.

Manaò.

I te nünaa mäìtihia e te Atua Nui Tumu tahi, te hiti noa nei te mau maitaì o te aru i roto i te tau tuatau te tere nei i to na tereraa, te tupu nei te àihere, i to na tupuraa, te hotu nei te mau hotu i to rätou mau hoturaa. Te vava nei te mau ànavai i roto i te mau vao, no te faaìte i te heeùri o te fenua, te pïnaì nei te vai i nià i te mato, te horo nei te vai i te muri a vai, i reira e färerei ai i te fati miti, tei fati tuatau i nià i te aau te mau papa e te mau pari. Te faahoì nei i te ànaana o te miti i nià i te tuaraì, tei mauhia e te mau tiàrama, tei èpahia i roto i te reva, o ta te mau ata e faaìte nei i na âpoo mataì àhuru mä ono no te ao o Mäòhi Nui. No te faaìte i te mau hororaa ôpape i roto ia Moana Nui a Hiva, te Hiva e nuu atua no te moana, i te mea te hiòraa a te feiä ära pö, i te pö ra, hoê noa moana uri paò i to rätou tiàturiraa, na te mau ôpape e faafarerei i te mau fenua i raro i te moana, ta rätou aroharaa, te naò nei ia ora na to raro i te moana tei fäno mai, mai te moana uri paò ; no te faaìte ia hoê teie nünaa no te Tumu mai o te fenua, i faaroohia na teie huru parauraa ia tae i te mau taime ôroà tumu o te fenua, ia âmui te mau fenua atoà i te vahi hoê no te heiva.

Ua mäìtihia tätou no te ära, no te haapaò maitaì, no te tiàau tià, i nià i te mau faufaa tumu o te fenua to nià iho e to raro aè, te moana, e to roto, te reva, e to toro. E teie mau faufaa, e faufaa tuatau, ta te mau òna i haere mai e èia teie mau faufaa tei paèpaèhia i nià i te moni te heruraa repo i Makatea 49 mätahiti ua topatari te tià noa mai ra o Makatea noa atu te mau rahiraa âpoo e vai mai ra e tae mai i teie mahana, Maururoa, Fangataufa, Tureia, Hao, 30 mätahiti te òhiparaahia teie mau fenua no te mau haapaìnaraa âtömï, ua faaruè mai i teie mau fenua, i te mea ua naeàhia i te fenua Färani te fäito puai no te uira âtömï e numera piti o Färani no teie ito, e te hoohia nei i roto i te ao atoà. I teie mahana te tupu noa nei teie mau òhipa piò, tei paèpaèhia i nià i te parau no te faahoturaa òhipa, e hau atu i te reira ua faarirohia o Mäòhi Nui èi papa no te mau mä ìmiraa i te mau faufaa tumu o te fenua, te moana, e te reva. E haere mai rätou e ta rätou moni, e pau te moni i te huhu e te pë, i te mea e òhipahia te moni èi haamämüraa i te fëia rave òhipa i reira e reru ai te hiroà o te taata. E haere atoà mai teie mau òna, e ta rätou mau täpu àuri, täpu raau te àpi punu, no faanehenehe te ìmiraa moni i reira tätou e parau ai e, e òhipa maraa òre teie ia tätou o te reira to tätou hape, e te hape noa nei tätou teie mau täuihaa e pau i te huhu e te pë. Heruhia Makatea i te iòa o te moni topatari, haapaaìnahia te pau ra âtömï i te iòa o te moni topatari, te tahi faufaa tumu o te fenua e tumu haari te vai noa ra, te mäoa noa ra te ùru, te para noa ra te meià, i teie mahana i roto i ta tätou haamoriraa, e tauturu te mau taiòraa ia tätou ia au i teie parauraa, Ua mäìtihia tätou no te ära, no te haapaò maitaì, no te tiàau tià :     

-Taramo 33, 12 E ao to te fenua, o te Fatu to rätou Atua; e te mau taata i mäìtihia e ana ei tufaa na na.

-Etetiera 33, 16 Te mau hara atoà tä na i rave ra, e òre ia e manaò-faahou-hia ei hara nä na; ua rave o ia i te mea au e te parau tià: e ora mau ä o ia ra.

-Hepera 11, 1 E teie nei, o te faaroo nei, o te tiàturi ia i te mau mea e tiaìhia nei, e te ìte i te mau mea aore e hiòhia nei.

-Ruta èv.12, 32 «Eiaha e mataù, e ta ù nana iti e. E mea hinaaro na to òutou Metua i te horoà mai i te Pätireia no òutou.

Te parau maitaì i haapaòhia no teie mahana i te päpaìraa a Ruta èv. I te pene 12 i te mau ìrava 32 e moti i te ìrava 48, te faaìte nei :

-Te mau taoà i nià i te raì, te faaitoito mai nei ia tätou i teie reo no Ietu 32 «Eiaha e mataù, e ta ù nana iti e. E mea hinaaro na to òutou Metua i te horoà mai i te Pätireia no òutou. E hoo i roto i te âpï, ia vai mai te tumu o te faufaa, te tumu te aa e mauhia ra e te fenua. A horoà ia ìtehia te faufaa tumu o te fenua, te moana te reva, i reira te pütë e òre ai e marau, te mau taoà tumu a Mäòhi Nui e òre e pau i te ao; i te mea te vähi e mauhia ra e òre e taeàhia e te èiä, e òre hoì e pau i te huhu e te pë. Te tiàturi nei au teie reo to Ietu e parau ra e, 34 Te vähi hoì i vai ai ta òutou taoà, tei reira atoà ia to òutou âau. I mäìtihia ai tätou, èi nünaa no te Atua Nui Tumu Tahi.

-Te mau tävini e vai ara nei

I mua i teie mau parau, ia tätuahia to tätou tauupu, e ia vai àma ä ta tätou mau rämepa. Ia au tätou i te tiaì mata ära i to tätou fenua i te ìteraa i to na nehenehe, to na ùnaùna mai te tane e te vahine faaipoipo ra; ia haere mai e pätötö i te ùputa o to tätou âau, ia ìriti tätou i te ôpani ma te hau e te maitaì. E ao to te reira mau tävini, ia roohia ia rätou, te mau faufaa tumu ma te ara i nià iho. Oia mau, ia na reira tätou i te tätua i ta tätou hopoià e î noa ta tätou àiraa mäa e òre e pau. Ia tämau maite i te ära, e ao to te reira mau tävini, i mua i te mau faanahoraa ìte-òre-hia, e färerei o ia i te feiä èiä, e òre o ia e vaiiho noa i to na fare ia vävähi-noa-hia na. Ia vai ineine rä tätou, i te mau hora manaò-òre-hia e tae mai ai te Tamaiti a te taata nei. I te mea e nünaa mäìtihia tätou :

-Te tävini haapaò maitaì

Teie ta Ietu parauraa no teie huru tävini :

-O vai hoì te tïàau haavare òre e te haapaò maitaì, i ta te fatu e tuu i nià iho i to na atoà ra mau tävini, ei tuu atu i ta rätou tufaa mäa i te tufaraa mau ra?

-E ao to te reira tävini, to tei roohia mai e to na ra fatu te nä reira ra.

-Oia mau ta ù e parau atu ia òutou nei, e faariro ia o ia ia na ei mau i te mau taoà atoà na na ra.

Te tävini haapaò òre  

 -E òre ta ù fatu e tae vave mai», papaì iho ra i te mau tävini täne, e te mau tävini vahine, àmu iho ra i te mäa, e inu faataèro iho ra i te àva;

-e tae mai ia te fatu o taua tävini ra i te mahana manaò-òre-hia e ana, e i te hora-ìteä-òre-hia e ana ra, e  täpüpü atu ia na, a tuu atu ai i ta na tufaa i roto i te feiä haapaò òre atoà ra.

-E te tävini i ìte i te hinaaro o to na ra fatu, e aita i faaineine ia na iho, aore hoì i rave i ta te fatu i hinaaro ra, e papaìhia ia e rave rahi te täìriraa.

-Âreà tei òre i ìte ra, rave atu ra rä i te parau e au ia na te päpaì, e täìriraa iti ia to na: o tei tuuhia atu te mea rahi ra, e mea rahi atoà të tïtauhia atu; e ta te taata hoì i tuu atu i te mea rahi ra, e mea rahi atoà ia të anihia atu ia na ra.

Teie te tahi mau tumu e tïtauhia nei i te nünaa mäìtihia, ia faatïtïàifaro faahou i to na oraraa, ia tiàturi faahou ia na, ia rave faahou e ia àtuàtu i te mau maitaì ta te Atua Nui Tumu Tahi i höroà mai èi faufaa tumu i Mäòhi Nui ia ora te mau Mäòhi atoà. Ua tae i te taime no te faaora faahouraa ia tätou, na tätou iho e tiàau i te mau faufaa tumu o te fenua, te moana, te reva, tei roto tätou i te rima faaora o te Atua Nui Tumu Tahi, e rave i ta tätou iho, e tänu i ta tätou iho ia òre tätou ia àihamu, i teie mahana e a tau hiti noa atu. I ìmi nao na tätou te âpï i roto i te pau, i teie nei e ìmi tätou te âpï i roto i te mau faufaa tumu no te ao Mäòhi i Mäòhi Nui nei, ma te èiä òre, te täparu òre, e te haavare òre. Ia niu faahou tätou i to tätou oraraa i nià i te here e aroha ia tupu mau te hau i Mäòhi Nui nei.

 

Teraì òr. Faatura.    

 

 

 

 



 

Ruta èv. 12.13-21 Maamaa

 

Tāpati 31 no Tiurai 2022.

Maamaa

Taramo 90

1 Te pure a te taata o te Atua ra, a Möte. E te Fatu, o òe to mätou haapüraa, i tërä uì, i tërä uì.

2 Aore te mau mouà nei i fänau, e aore hoì te fenua e te ao atoà nei i hämanihia e òe ra, te vai ra òe, e te Atua, mai tahito mai ä e a muri noa atu.

3 O te taata nei rä, te faariro faahou nei òe ei repo, te parau ra hoì òe: «A hoì, e te tamarii a te taata na.»

4 Ia òe rä hoì, hoê tautani noa atu i te mätahiti e au i te mahana hoê i mahemo ra, e mai te äraraa hoê i te ruì ra.

5 Te riro nei rätou ia òe mai te riro pape puè ra, e mai te vareà taòto ra rätou. I te poìpoì ra, mai te àihere e tupu ra rätou,

6 o tei ôteu e tei tupu i te poìpoì ra, e ua ahiahi anaè ra, ua täpühia e ua ôriorio atu ra.

7 Oia teie, ua pau mätou i to òe ra riri, e ua riàrià mätou i ta òe ra mäinaina.

8 Ua tuu òe i ta mätou hara i mua ia òe, e ta mätou hapa moè i roto i te märamarama o to mata ra.

9 Ua mou aè nei to mätou mau mahana i to òe ra riri, ua pau to mätou mau mätahiti mai te manaò âau e pee ra.

10 To mätou puè mahana i te oraraa nei, e hitu ia àhuru i te mätahiti, e ia tae i te vaù i te àhuru i te mätahiti i te ètaèta, e riro rä taua ètaèta ra ei rohirohi e ei taiäraa. E òre hoì e mähia motu ê atu ra, maùe atu ra mätou.

11 O vai rä tei haapaò i te püai o to òe ra riri? E ta òe ra täiroiro, mai te mataù e au ia òe ra?

12 E haapii mai ia mätou i te taiò i to mätou puè mahana, ia riro to mätou âau i te haapaò maitaì.

13 E färiu mai ia mätou e te Fatu: a hea ra ia? A faite mai òe i to mau tävini nei.

14 A haamauruüru vave mai òe ia mätou i to òe ra aroha, ia reàreà mätou e ia òaòa i to mätou nei puè mahana toe.

15 A faaòaòa mai ia mätou e ia fäito i te mau mahana i àti ai mätou ra, e te mau mätahiti i faaòromaì ai mätou i te ìno ra.

16 A faaìte mai i ta òe ra òhipa i to mau tävini nei, e to òe ra hanahana i ta rätou ra tamarii.

17 Ia vai mai ä te here o to mätou nei Atua, o te Fatu, i nià ia mätou nei, e te òhipa a to mätou nei rima, e haamau òe, oia ia, o te òhipa a to mätou rima i rave ta òe e haapäpü.

Tohereta 1.2

2 Te nä ô nei te Òrometua, e faufaa òre rahi teie; e mea faufaa òre rahi roa. E mea faufaa òre anaè a aita i toe

2.21-23.

21 Te òhipa ra hoì te tahi mä te paari, e te ìte, e te àravihi; o te tahi rä o tei òre i nä reira i te rave, tä na ia e vaiiho ei tufaa nä na. E mea faufaa òre atoà te reira e te ìno rahi.

22 E aha iho ra ta te taata i ta na atoà ra mau òhipa, e te taiä o to na ra âau, i rave noa ai o ia i te òhipa i raro aè i te mahana nei?

23 E òto anaè tei to na atoà ra mau mahana, e te taiä i ta na ra mau òhipa, e i te pö atoà ra e òre to na âau e maitaì i te taòto. Te ìte nei hoì au, e faufaa òre atoà tei te reira.

Torota 3.1-11

1 E tënä na, ua faatiàhia òutou i nià e te Metia atoà ra, e tïtau i te mau mea i nià ra, i te vähi e pärahihia e te Metia i te rima àtau o te Atua ra.

2 E haamau i to òutou âau i te mau mea i nià ra, eiaha i to teie nei ao ra.

3 I pohe na hoì òutou, e tei ô te Metia ra to òutou ora, tei te Atua.

4 Ia fä mai te Metia, tei ia na to tätou ora i te vairaa ra, ei reira atoà òutou e ìteä-atoà-hia ai, e o ia atoà i te ao ra.

Te taata tahito e te taata âpï

5 E tënä na, ûumi iho i to òutou mau mero i te mau mea o teie nei ao, mai te faaturi, te parau faufau ra, te paìà ra, te hinaaro tià òre ra, e te nounou taoà, e haamori îtoro ia.

6 No taua mau mea ra e roohia mai ai te tamarii faaroo òre i te riri o te Atua ra.

7 O ta òutou ä ia parau i haapaò i mütaa iho ra, ia òutou i pärahi i roto ia rätou ra.

8 I teie nei rä, e haapae atoà òutou i taua mau parau atoà nei, i te riri, te täiroiro, te feìi, te faaìno, e te parau-tiàâ i to òutou vaha.

9 Eiaha e haavare te tahi i te tahi, ua haapae hoì òutou i te taata tahito e ta na atoà ra mau parau;

10 e ua faa-taata-âpï, o tei faahouhia i te ìte ra, mai te huru atoà o tei hämani ia na ra.

11 Aita e Herëni e te âti-Iüta; aore e peritome e te peritome òre; aore e Pareparo e te Tetute; aore e tävini e te tiàmä: o te Metia anaè rä e i roto i te feiä atoà i faaroo ra.

Ruta èv. 12.13-21.

Te parapore o te maamaa taoà rahi

13 Ua parau mai ra te hoê i taua feiä rahi ra ia na: «E te Òrometua, parau na òe i ta ù tuaana, e tufa o ia i ta mäua taoà.

14 Ua parau atu ra rä o ia ia na: «E tërä ra taata e, nä vai au i faariro ei tufa taoà, ei àuvaha io òutou nei?

15 E ua parau atu ra o ia ia rätou: «E ära ia òutou i te nounou taoà, rahi noa iho hoì ta te taata nei taoà, eere hoì tei taua taoà na na ra to na ora.

16 Ua parau atu ra o ia i teie nei parapore, nä ô atu ra: «E fenua mäa hotu to te hoê taata taoà rahi.

17 Ua nä ô iho ra o ia i te feruri i roto ia na iho: «E aha rä vau, aita hoì a ù e vairaa e ö ai ta ù mäa?»

18 Ua nä ô iho ra: «E nä ô vau: e vävähi au i ta ù mau fare vairaa mäa nei, a faatià ai ei fare rahi, ei reira puè ai ta ù taoà e ta ù mäa.

19 A parau ai au i ta ù värua e:»E ta ù värua, e taoà rahi ta òe, ua puè i te vairaa no te mau mätahiti a muri nei e rave rahi; e faaea mäite, e àmu, e inu, e ia reàreà mäite.

20 Ua parau mai ra rä te Atua ia na: «E tërä ra maamaa e. Ei teie nei ä ruì e tiihia mai ai to òe värua. Nä vai iho ra tënä na mau taoà i haaputuhia e òe na?

21 O te huru ia o te taata i haaputu i te taoà na na iho, e aita i rahi ta na taoà i te Atua ra.

Manaò.

Te mau parau e färereihia nei e tätou i teie mahana to te taata ìmiraa ia puai te ora i nià i te pohe, e te parau no te taata maamaa, o ta tätou àroraa tumu e te tuutuu òre i roto i to tätou oraraa i te ao nei, i roto i te maì e te maì òre, te òaòa e te peàpeà, te parau tià e te parau tià òre, te hau e te riri, te aroha e te tahoo, E òhuraa teie no to tätou oraraa, e tereraa no to tätou oraraa i matauhia e tätou. i roto i teie huru faanahoraa, te vai nei te taime e fati roa nei tätou i roto, e òre ai tätou e tiàfaahou, no te mea àita to tätou puai faahou, àita e itoito faahou. E pohe te reira e te maamaa o te taata. Mai te taata i fati i mua i te maì, te poìa, te moni, te naò nei tätou e : ua pohehia terä taata i te maì, ua pohe roa terä tamarii i te poìa, ua pohe to na manaò i te moni, ua pohe teie taata i te maa, i maamaa hia ai. Eita rä tätou e märamarama rä i te auraa o te pohe e te maamaa, mai te peu èita tätou e ìte i te faufaa o te ora. No te hoê taata maì, ua riro te taime a faaruê mai ai te maì ia na èi täpaò no to na ora, i te mea e, i reira rä ua matara mai o na, àita i mau faahouhia i roto i te haavïraa a te maì. Ei haapotoraa no te manaò, e nä ò noa tätou e, te ora ra, mea tià ia, âreà te pohe ra mea piò ia, e te maamaa e faanaho ia i te mea e òre e tià i te Atua. Te ìte ra ia tätou i te mea e hinaarohia ia tätou : ia tià te parau, ia tià te haereà, ia tià te òhipa, ia tià te ora. Te riro atoà nei te pohe no te taata tei ìte e, e Atua Nui Tumu Tahi to na, ei haamanaòraa ia na e, ua faaruè mai te Atua ia na, no te mea, ua faaruè o na i te Atua, mai te maamaa, mai te pö tei faaìte mai e, ua moè te ao. A hiò ra tätou i te pohe i roto i nä huru e piti i muri nei. A tahi : te pohe èi täpaò faaìte i te mau àti ta te hoê taata, te hoê nünaa e faaruru ; a piti te pohe èi täpaò no te èreraa i te ora, te maamaa ra ua nounou i te mau mea e òre e au i to na oraraa, ma te haere tiàma i roto i te pohe. Eiaha ra ia moèhia ia tätou ua maìti te Atua i te mau mea maamaa o te ao nei ei faahaparaa atu i te feiä paari. Te vai nei te mau pohe të òre roa e noaa ia tätou ia tinai, no te mea, tei roto te reira i te paruparu o to tätou tino. Ua riro rä te reira mau pohe èi haapiiraa ia tätou i te tärani ia tätou, e aore ra, i te àtuàtu i to tätou tino. Mai te reira te maì, te rohirohi, te taòto, te poìa, te poìhä. Mai te peu e, e huru tumu te reira no tätou, ia ìte atoà ra tätou i te haavï ia tätou. Te auraa ia o te haapae. E raveà hoì te reira te reira no te haapüai faahou i to tätou manaò, to tätou värua, e to tätou atoà tino. Mai ia Ietu tei haapae pinepine, e tià atoà tätou ia faariro i te reira raveà no te faatano-faahou-raa i to tätou oraraa i nià i te Atua Nui Tumu Tahi. Te haapae, e taime atoà te reira, mai ta Ietu atoà i haapii mai, no te pure i te Atua ia höroà mai ia tätou i te püai e te itoito. Eiaha ia moèhia ia tätou e, i roto i to tätou mau pohe, te Atua te Fatu o te ora, ia òre tätou ia maamaahia. Teie atu ra  te haapotoraa no ta tätou mau taiòraa no teie mahana :     

-Taramo 90, 17 Ia vai mai ä te here o to mätou nei Atua, o te Fatu, i nià ia mätou nei, e te òhipa a to mätou nei rima, e haamau òe, oia ia, o te òhipa a to mätou rima i rave ta òe e haapäpü.

-Tohereta 2, 22 E aha iho ra ta te taata i ta na atoà ra mau òhipa, e te taiä o to na ra âau, i rave noa ai o ia i te òhipa i raro aè i te mahana nei?

-Torota 3, 3 I pohe na hoì òutou, e tei ô te Metia ra to òutou ora, tei te Atua.

-Ruta èv 12, 20 Ua parau mai ra rä te Atua ia na: «E tërä ra maamaa e. Ei teie nei ä ruì e tiihia mai ai to òe värua. Nä vai iho ra tënä na mau taoà i haaputuhia e òe na?

Àita o Ietu i ö i roto i te faanahoraa a te taata, i mua i te parau no te nounou taoà te haapäpü ra o Ietu, èita tei te rahi o te taoà, e rahi ai te ora. I teie huru parauraa te hinaaro nei o Ietu e tauturu i te taata ia òre ia topa i roto i te mau faanahoraa e ateä ai i te Aroha e te Here o te Atua Nui Tumu Tahi. Te haamanaò noa mai ra teie parau ia tätou mai te mea ua maamaahia tätou i to tätou fenua ia Mäòhi Nui, mai ia ta tätou i maamaahia i ta tätou vahine, te tane. Tei teie vahi to Ietu türaìraa i ta tätou parau i teie mahana, mai te mea ua pohe to tätou tino i te òhipa, i te itoito, i te puai, e ua maamaahia tätou i te òhipa faatupu, faahotu, i to tätou fenua i te maa ta te Atua i faataa èi maa na te Mäòhi e te mau taata atoà i here i teie fenua, tei faarirohia ei mau tamarii faaàmu na teie püfenua. Ia na reira tätou i te faatupu i te ora, e ïti te mau âfata âuri i te tae mai i ö tätou nei. Teie te tahi pohe e tämoemoe noa nei ia tätou te rima tautau, e te rima tärere, nä reira atoà te rima faautaraa upoo. Haamanaò tätou te mau taata atoà tei here i teie fenua e tei parau e, e parataito, e tei ìte i to na faufaa, ia ìte mai tätou e, èita te Atua e faaherehere ia tätou i ta tätou mau hapa, e ta tätou mau hara, ia rahi to tätou faaruèraa i te Atua, e rahi atoà ta Na pohe e höroà. No reira, e ìmi tämau i te Atua, e to na mau hinaaro tumu ia tätou, ia heeùri, e ia ruperupe te ora e ia faaruè mai te pohe hupehupe ia tätou, e te pohe täparu. Te vai nei te tahi mau Taramo nehenehe roa, mai te Taramo 90 no teie mahana, tei päpaìhia e te mau taata tei tuu i to rätou tiàturiraa i te Atua. I roto i te mau mea atoà ta te Atua i hämani, e tiàraa ta na i faataa no te taata. Tei te taata anaè te manaòraa i te hoê oraraa taa ê atu  i ta na e ora nei. Èere ra o ia mai te tiare noa, e mäemäe ia topa atu i te mahana, e hiaai ora rä to roto ia na. I teie reo faaäu o Ietu ia tätou i teie mahana i te parau no te taata taoà tei haaputu i te maa na to na värua, te värua ra o te aho ia o te Atua, te mea ta tätou e parau nei i te reo Mäòhi e Mehoi, no reira mai te mau hotu o te fenua, te reva, te ànavai, e to te moana, i te tuuraahia i roto i te aru. Te tïtauraa a Ietu i roto i teie parau faaäu ia ìte tätou te Mehoi tei roto i te taata atoà tei fänau püfenuahia, ia haaputu o ia i te maa no to na tino, ia itoito to na tino. I te mea e faaàraàra te Parau a te Atua i te mata o te taata, èita e faataòto, èita e haamämü, e faatupu ra i te hau, te aroha e te here : ia faaroo tätou i teie reo no Pauro te naò nei : 1 E tënä na, ua faatiàhia òutou i nià e te Metia atoà ra, e tïtau i te mau mea i nià ra, i te vähi e pärahihia e te Metia i te rima àtau o te Atua ra. 2 E haamau i to òutou âau i te mau mea i nià ra, eiaha i to teie nei ao ra. 3 I pohe na hoì òutou, e tei ô te Metia ra to òutou ora, tei te Atua. 4 Ia fä mai te Metia, tei ia na to tätou ora i te vairaa ra, ei reira atoà òutou e ìteä-atoà-hia ai, e o ia atoà i te ao ra. I teie mahana e tià ia parauhia, ua ihu tätou i nià i te mau parau tei faareru, tei haamataù, ua ö roa te tahi pae i roto i te mätau, âreà ra te tahi pae te perehahu noa ra, e te tahi pae ua pärahi roa no te täahoa. No te mea ua mohimohi te mata i te hiòraa i te àveià, ua manunu roa i te manunu pohe ora noa ai, ma te manaò e te èà maitaì, te èà ìno ia, e te èà ìno ra, te èà maitaì ia. No reira ia vai tämau te Aroha e te Here i roto i to tätou âau, ia tupu tuatau te parau tià, e te parau mau i Mäòhi Nui nei. Ia riro te parau no te here fenua èi haapii, èi haamanaò ia tätou e, to tätou Metua i te raì, te ära noa ra i nià ia tätou, e te tià noa ra i to tätou reo pii ia Na :E te Atua Nui Tumu Tahi e, faaora mai ia mätou ta òe mau tamarii nei, te hoì atu nei mätou ia òe ra, ia raa to òe iòa, e ia tupu to ò hanahana i nià i te fenua nei i mua i te aro o to te ao atoà nei.

 

Teraì òr. Faatura.