Ioane 9.1-41 Mata tià.

 

Tāpati 19 no Mäti 2023.

Mata tià.

 

Taramo 23

1 Taramo na Tävita. O te Fatu to ù tiaì, e òre roa vau e ère.

2 Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra.

3 E faahoì o ia i ta ù värua. E ärataì o ia ia ù nä te èà tïtïàifaro, no te hanahana o to na ra iòa.

4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù:   to räau e te tootoo tei haamähanahana mai ia ù.

5 Ua faanahonaho òe i te tahi àmuraa mäa na ù i mua i te aro o ta ù mau ènemi; ua faatävai òe i ta ù upoo; e te î nei ta ù âuà.

6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

1 Tämuera 16.1-13.

Faatähinuhia.  

1 Ua parau mai ra te Fatu ia Tämuera, E òto ä òe ia Taura, tei faaruèhia o ia e au eiaha o ia ei arii no Ìteraèra? A faaî na i to färii i te monoì, e haere ia Iete i Peterehëma ra, te tono nei hoì au ia òe; ua noaa hoì te tahi arii na ù i roto i te mau tamarii na na ra.

2 Ua parau atu ra Tämuera, e aha vau e tià ai ia haere? Ua ìte anaè Taura ra, e pohe au ia na. Ua parau mai ra te Fatu, E pütö atoà i te tahi puaatoro oni âpï, a parau atu ai e, I haere mai au e hopoi i te tütia na te Fatu.

3 A parau atu ai ia Iete e haere atoà mai i taua tütia ra, e na ù e faaìte ia òe i ta òe e rave: e o tä ù e faaìte atu ia òe i te iòa ra, ta òe ia e faatävai na ù.

4 E ua nä reira hoì Tämuera i ta te Fatu i faaue mai ra, e ua haere o ia i Peterehëma: e ua haere iho ra i te feiä rarahi o taua ôire ra i taua haereà mai nö na ra, e ua nä ô mai ra, E tere hau to òe?

5 ua nä ô atu ra o ia, E tere hau: i haere mai au e hopoi i te tütia i te Fatu ra: a faataa na ia òutou, e haere atoà i teie nei tütia. Ua faataa iho ra o ia ia Iete e ta na mau tamarii, e ua parau ia rätou e haere mai i taua tütia ra.

6 E tae mai ra rätou, ua hiò atu ra o ia ia Èriapa, e ua nä ô aè ra, O ta te Fatu mau paha teie i haapaò ra, tei mua i ta na aro:

7 ua nä ô mai rä te Fatu ia Tämuera, Eiaha e hiò i to na mata, e to na huru i te teitei, no te mea, aore o ia i tiàhia e au; e òre hoì ta te Fatu hiòraa e au; e i ta te taata; e hiò hoì te taata i te huru i räpae àu aè, âreà te Fatu, e hiò ia i to âau.

8 Ua parau atu ra Iete ia Àpinatapa, e ua tuu mai ra ia na i mua ia Tämuera: ua nä ô aè ra rä o ia, Aita atoà te Fatu i hinaaro i teie.

9 Ua tuu mai ra Iete ia Tama; ua nä ô aè ra rä o ia, Aita atoà te Fatu i hinaaro i teie.

10 E ua nä reira Iete i te tuu mai i ta na mau tamarii toohitu atoà i mua ia Tämuera; ua nä ô atu ra rä Tämuera ia Iete, Aita te Fatu i hinaaro ia rätou.

11 E ua nä ô atu ra Tämuera ia Iete, ua hope roa mai nei ta òe puè tamarii tamäroa? Ua parau mai ra o ia, Te toe nei te hopeà, e inaha, te tiaì ra i te mau mämoe: ua parau atu ra Tämuera ia Iete, E tono i te taata e tii ia na, ia tae mai hoì o ia e pärahi ai tätou i raro.

12 Ua tono atu ra o ia i te taata, e ua arataì mai ia na i roto. E taata ùteùte, e te mata maitaì, e te huru maitaì: e ua parau mai ra te Fatu ia Tämuera, A tià, a faatävai ia na, o ia hoì tënä.

13 Ua rave iho ra Tämuera i taua färii monoì ra, e ua faatävai atu ra ia na i röpü atoà i ta na mau tuaana ra: e mai taua mahana mai ra te värua o te Fatu i te taeraa mai i nià ia Tävita. Ua tià aè ra Tämuera i nià, e ua hoì mai ra i Rama.

Èfetia 5.8-14

8 I pöuri na hoì òutou i mütaa iho ra, i teie nei rä, ua märamarama òutou i te Fatu, ia au to òutou haereà i te tamarii märamarama.

9 (Ta te Värua i faatupu ra, oia te mau mea maitataì atoà ra, e te parau tià, e te parau mau.)

10 Ia ìteä ia òutou te mea au i te Fatu ra.

11 E eiaha roa ei âmuiraa i te feiä parau faufaa òre o te pöuri ra, e aò atu rä.

12 E mea haamä hoì ia parau noa atu i te mau mea i rave-huna-hia e rätou ra.

13 Te mau mea atoà rä i ìteä ra, i ìteä ia i te märamarama, o te märamarama hoì tei faaìte mai i te mau mea atoà nei.

14 I parau mai ai te Värua e: «A ara mai na, e tërä ra taata taòto, a tià mai i nià, e tënä na pohe, e na te Metia e horoà mai i te märamarama ia òe.»

Ioane 9.1-41

Te faaora-raa-hia te hoê taata matapö mai te fänauraa mai ä

1 E te haere noa ra o ia ra, e ìte atu ra o ia i te hoê taata matapö mai te fänauraa mai ä.

2 Ua ui mai ra ta na mau pîpî ia na, nä ô mai ra: «E Rapi, nä vai te hara, na na iho änei, e na nä metua änei, i fänau matapö mai ai o ia?

3 Ua parau atu ra Ietu: «Eere i to te hara a teie nei taata e te hara a nä metua ra, no te mea rä ia ìteä te òhipa a te Atua ia na nei.

4 E rave au i te òhipa a tei tono mai ia ù nei ra, òi vai aè te ao. Te fätata mai nei hoì te ruì, aore roa e taata e òhipa i reira.

5 Te pärahi nei au i te ao nei, o vau te märamarama o teie nei ao.

6 I nä reira atu ra o ia i te parauraa atu, e ua tufa iho ra i te huare i raro i te repo, ua oi iho ra i ta na huare i te repo; ua parai atu ra i te repo i te mata o taua taata matapö ra.

7 Ua parau atu ra ia na: «A haere, a horoi i to mata i te pape ra i Tiroama (oia hoì «Tonohia»). Haere atu ra o ia, horoi iho ra, e haere mai ra hoì mä te ìte.

8 Ua parau iho ra to reira iho, e te feiä i ìte ia na i mütaa iho i te vai-matapö-raa ra: «Eere änei teie i te taata i pärahi noa, ani ai i te taoà ra?

9 Ua parau mai ra vëtahi: «O ia hoì teie. (Nä ô mai ra vëtahi:) «Mai ia na mau nei ä hoì te huru. Ua parau mai ra o ia iho: «O vau hoì ia.

10 Ua ui atu ra rätou ia na: «I aha tià to mata i àraara ai?

11 Ua parau mai ra o ia, nä ô mai ra: «I oihia te repo e te hoê taata o Ietu te iòa, e ua parai mai ra i ta ù mata, e nä ô mai ra ia ù: «A haere i te pape ra i Tiroama horoi ai i to mata», haere atu ra hoì au horoi iho ra, e ìte atu ra.

12 Ua ui atu ra rätou ia na: «Tei hea taua taata ra? Ua parau mai ra o ia: «Aore au i ìte.

Te tïtorotororaa a te mau Färitea

13 Ua arataì atu ra rätou i te taata i matapö na i te mau Färitea ra.

14 E täpati te mahana i oi ai Ietu i te repo i te faaoraraa i ta na mata ra.

15 Ua ui atoà mai ra te mau Färitea ia na i te oraraa ta na mata ra. Ua parau atu ra o ia: «I parai mai o ia i te repo i ta ù mata; e horoi iho ra hoì au, e te ìte nei au.

16 Ua nä ô aè ra te hoê pae o taua mau Färitea ra: «Eere teie taata i to te Atua, aore hoì o ia i haapaò i te täpati. Ua nä ô aè ra te tahi pae: «E aha e tià ai i te taata hara ia rave i te täpaò mai teie nei? Ua àmaha iho ra rätou.

17 Ua ui faahou mai ra rätou i taua taata matapö ra: «E aha ta òe na parau ia na, o ia i faaora i to mata na?

Ua parau atu ra o ia: E perofeta ia o ia.

18 Aita rä te âti-Iüta i faaroo e e matapö to taua taata ra, e ua faaorahia hoì ta na mata, ia tii rä rätou i nä metua o taua taata i faaorahia te mata ra.

19 E ua ui atu ra rätou ia räua, nä ô atu ra: «O ta òrua tamaiti teie i parau ra e, i fänau matapö mai o ia. E aha hoì o ia i ìte ai i teie nei?

20 Ua parau mai ra nä metua no na ra ia rätou, nä ô mai ra: «Ua ìte mäua, na mäua mau teie nei tamaiti, e matapö mau o ia mai te fänauraa mai ai.

21 Âreà rä te mea i ìte ai o ia i teie nei, aore ia mäua i ìte, e tei faaora hoì i ta na mata, aore atoà ia mäua i ìte. A ui atu na ia na, ua paari hoì o ia iho: e na na iho e parau mai.

22 I nä reira atu ra nä metua no na ra, no te mea te mataù ra räua i te âti-Iüta, ua faaau na hoì te âti-Iüta i ta rätou iho parau, e te taata i nä ô ra e o ia te Metia, e tuuhia ia i räpae i te tunato ra.

23 I parau atu ai nä metua no na ra e: «Ua paari o ia, a ui atu na ia na iho».

24 Ua parau faahou atu ra rätou i taua taata matapö ra, nä ô atu ra ia na: «E haamaitaì i te Atua. Ua ìte hoì mätou e, e taata hara teie nei taata.

25 Ua parau mai ra o ia, nä ô mai ra: «Aore au i ìte e, e taata hara o ia. Hoê roa a ù parau i ìte, e matapö to ù i mütaa iho, e teie nei te ìte nei au.

26 Ua parau faahou atu ra rätou ia na: «I aha mai o ia ia òe? I nä hea o ia i te faaoraraa i to mata na?

27 Ua parau mai ra o ia ia rätou: «Ua fäì atu hoì au ia òutou, aore òutou i faaroo. E aha rä hoì òutou i hinaaro faahou ai i te faaroo? Ei pîpî änei òutou atoà na na?

28 Ua faaìno atu ra rätou ia na, nä ô atu ra: «O òe ta na pîpî, âreà mätou e pîpî ia na Möte.

29 Ua ìte mätou e, ua parau mai te Atua ia Möte. Âreà teie nei taata, aore mätou i ìte i te vähi no reira mai o ia ra.

30 Ua parau mai ra taua taata ra ia rätou, nä ô mai ra: «E mea huru ê hoì tënä aore òutou i ìte i te vähi no reira mai o ia, e inaha, ua faaora hoì o ia i ta ù mata nei.

31 Ua ìte hoì tätou e, e òre te Atua e faaroo i te feiä hara, o te taata rä e haamori i te Atua, e o tei haapaò i to na ra hinaaro, o ta na ia e faaroo.

32 Aore i ìteä te matapö fänau nei i te oraraa i te taata mai te mätamua mai ä o te fenua nei.

33 Àhiri teie nei taata eere i to ô i te Atua ra, eita roa ta na räveà e tià.

34 Ua parau atu ra rätou ia na, nä ô atu ra: «I fänau mai òe mä te hara, e haapii mai hoì òe ia mätou? Ua tuu atu ra rätou ia na i räpaeàu.

Te matapö värua

35 Ìte aè ra Ietu e ua tuuhia o ia e rätou i räpae, e färerei aè ra hoì o ia ia na, ua parau atu ra ia na: «Ua faaroo òe i te Tamaiti a te Atua?

36 Ua parau mai ra o ia, nä ô mai ra: «E te Fatu, o vai o ia ia faaroo atu vau ia na?

37 Ua parau atu ra Ietu ia na: «Ua hiò hoì òe ia na, e o ia hoì teie e parau atu ia òe nei.

38 Ua parau mai ra o ia: «E te Fatu, ua faaroo vau. E ua tïpapa iho ra i raro i mua i ta na aro.

39 Ua parau atu ra Ietu: «I haere mai nei au i te ao nei ia tupu te parau tià, ia ìte te feiä ìte òre ra, e ia riro te feiä ìte ra ei matapö.

40 Te faaroo mai ra e toofanu mau Färitea i reira atoà iho i taua parau ra, e ua parau mai ra ia na: «E matapö atoà nei mätou nei?

41 Ua parau atu ra Ietu: «Àhiri òutou e matapö ra, aita a òutou hara, te parau mai na rä òutou e: «Ua ìte mätou», te vai na ia ta òutou hara.

Manaò

E aha te hara, te faaroo nei tätou ia parauhia e, harahara i te ïà, aore ra, i te niho, pïhara i te räau. Te tumu i roto i teie mau faaòhiparaa ra, o te manaò ia o te täpüraa. Te reira atoà te manaò e vai ra i roto i te hara. Te hara ra, te huru ia o te òhipa ta te hoê taata i rave e tei täpü ia na i te toeà o te taata no te ìno rahi o taua òhipa ra no te oraraa hau o te tahi aè pae taata.

Te hoê taata e ora o na anaè i nià i to na maa motu iti, aore ra, te hoê taata tei faaätea ê mai ia na i te oraraa taata, e hara änei ia taata. Èita. No te aha. No te mea, i nià noa ia na e vai ai te maitaì e te ìno o ta na òhipa, o na iho te haavä ia na iho, mai ia na hoì i riro èi päruru no na iho.

E hiò mai rä tätou i te parau o te hara i roto i te oraraa o te hoê pupu taata, e hoê nünaa, aore te hoê taata, te hoê hoì nünaa i mua i to na Atua.

No te mea te vai ra to na täuaro, oia hoì te taata e tià mai, aore ra, te taata e tau mai i mua i te aro o te tahi, e tano ai ia faahitihia te parau o te hara. I roto i te parau o te hara, te vai ra te parau o te tahi faanahoraa moà. Teie rä, aita te parau o te moà, mai te peu aita e Atua. No reira, i te ômuaraa ihoä o te oraraa o te taata, i te mau vähi atoà e pärahihia e te taata i te ao nei, ua ìte o na e, te vai ra te tahi taura täàmu ia na i te Atua, te vai ra te mau hinaaro, e te mau tïtauraa a te Atua i taua taata ra, no na iho i mua i te Atua, aore ra, no na i mua i te tahi atu mau taata. Taua tïtauraa na te Atua ra, o te parau ia no te ora. Ua tuu te Atua i te ora i roto i te taata, e taua ora te marämarama, o te hohoà ia no te Atua Nui Tumu Tähi. I roro i teie faanahoraa, te riro nei te taata tätaì tahi èi veà na te Atua i mua i to na täuaro, no te haamanaò e, o te Atua te tumu, e o na te faahopeà i roto i te oraraa o te taata. Ua hämani hoì te Atua i te taata ia au i to na hohoà. Taua huru e taua hohoà no te Atua ra tei tïtauhia ia tätou ia faaìte i te mau taata atoà. Te hara, te taime ia te taata e hinaaro ai i te täpü i teie taura e täàmu ia na i te Atua. Te taime te taata e hinaaro ai ia na iho ia riro èi tumu e èi faahopeà no to na iho ora, ua haapae ia o ia i te ora a te Atua. Te ôpuaraa a te Atua i te taata tätaì tahi, te faariroraa ia ia na èi moihaa no te faatupuraa i te parau tià a te Atua, a riro atu ai te ao nei mai te hoê hiò hipa e faaìte mai te hohoà o te Atua e to na hanahana. Mai ia tätou e parau nei ia ìte anaè i te hoê tamarii e, e tià maitaì òe i to òe metua, ia riro atoà to tätou oraraa èi faaìteraa e, e tamarii tätou na te Atua. Ua hara tätou i te Atua ia täpü tätou i teie taura e täàmu nei ia tätou ia Na e i to Na mau hinaaro atoà ia tätou. Ua hara atoà rä tätou i te Atua ia haavare tätou i to tätou mau täuaro e, te vai täàmu noa ra tätou i nià i te Atua, a rave noa ai i te mau òhipa tià òre atoà të òre e faaìte i to Na hanahana. Te hinaaro nei te Atua ia tätou ia faatupu e ia faahotu i ta na parau tià i roto i to tätou oraraa. No te ètaèta e te täiva o te taata, i tono roa mai ai te Atua i ta na Tämaïti here i roto i teie nei ao no te faahotu-faahou-raa i te parau tià a to na Metua. Te hinaaro atoà nei rä te Atua ia faaìte tätou i te huru e hohoà ta na i hinaaro no tätou. No reira, e hara na tätou, ia faariro tätou i te parau o te Mäòhi èi peu no te tau. Èere roa atu te reira. Ia faatupu tätou i te parau o te Mäòhi, te faatupu ra ia tätou i te hinaaro o te Atua, inaha, ua hämani o ia ia tätou ia au i to na huru e i to na hohoà, ia au i ta na i hinaaro ia riro èi huru e èi hohoà no tätou. Ia òre tätou ia färii i te reira rä, te faaìte ra ia tätou e, àita ta te Atua e parau ia tätou, na tätou iho rä e faaoti i te mea e au ia tätou e, aita ta te Atua e parau ia tätou, na tätou iho rä e faaoti i te mea e au ia tätou ia rave. Ia nä reira tätou ra, ua hara ia, oia hoì, ua täpü i te Atua i to oraraa. Ia täpü hoì tätou i te taura e täàmu ia tätou i te Atua, nä hea ia te Atua e faataa faahou mai ai ia tätou, e o tätou hoì, nä hea ia tätou e ìte faahou ai i te Atua e to na mau hinaaro moà.

E te nünaa Mäòhi, a hoì i to òe Atua ra, vai iho ia òe na èi moihaa no ta na parau tià, no reira hoì òe i mäìtihia ai. Tiàturi ia òe, tiàturi i to òe Atua, ia tupu te ora taa ê ta te Atua i hinaaro ia riro èi tuhaa na òe. Teie atu ra te haapotoraa no te mau taiòraa no teie mahana :                        

-Taramo 23, 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

-1 Tämuera 16 12 Ua tono atu ra o ia i te taata, e ua arataì mai ia na i roto. E taata ùteùte, e te mata maitaì, e te huru maitaì: e ua parau mai ra te Fatu ia Tämuera, A tià, a faatävai ia na, o ia hoì tënä.

-Èfetia 5, 14 I parau mai ai te Värua e: «A ara mai na, e tërä ra taata taòto, a tià mai i nià, e tënä na pohe, e na te Metia e horoà mai i te märamarama ia òe.»

-Ioane 9, 39 Ua parau atu ra Ietu: «I haere mai nei au i te ao nei ia tupu te parau tià, ia ìte te feiä ìte òre ra, e ia riro te feiä ìte ra ei matapö.

Parau i haapaòhia no tätou i teie mahana e ärataì ia tätou i roto i te hoê faanahoraa vaamataèinaa, i nià i te èà e haere tià rä i Ierutarëma te tupuraa ia ta tätou parau i reira,

-Te faaora-raa-hia te hoê taata matapö mai te fänauraa mai ä ìte atu ra o Ietu i teie taata matapö mai te fänauraa mai ä. Te mau pîpî i roto i to rätou ao, i te parauraa e, E Rapi, nä vai te hara, na na iho änei, e nä metua änei, i fänau matapö, e turäma o Ietu Èere i to te hara a teie nei taata e te hara a nä metua ra, no te mea rä ia ìteä te òhipa a te Atua ia na nei. Ta tei tono mai ia Ietu, òi vai aè te ao. Te fätata mai nei hoì te ruì, aore roa e taata e òhipa i reira. Tei te ao nei au, o vau te märamarama o teie nei ao. E ua tufa iho ra i te huare i raro i te repo, ua oi iho ra i ta na huare i te repo; ua parai atu ra i te repo i te mata o taua taata matapö ra. A haere, a horoi i to mata i te pape ra i Tiroama, horoi iho ra, e haere mai ra hoì mä te ìte. Te feiä i ìte ia na i mütaa iho i te vai-matapö-raa ra: «Eere änei teie i te taata i pärahi noa na, ani ai i te taoà ra, O ia hoì teie, ua huruê vëtahi, Mai ia na mau nei ä hoì te huru. Ua parau mai ra o ia iho: «O vau hoì ia. I aha tià to mata i àraara ai, I oihia te repo e te hoê taata o Ietu te iòa, e ua parai mai ra i ta ù mata, e nä ô mai ra ia ù: «A haere i te pape ra i Tiroama horoi ai i to mata», haere atu ra hoì au horoi iho ra, e ìte atu ra. Tei hea taua taata ra, Ua parau mai ra o ia: «Aore au i ìte, teie ia te òhipa i tupu :

-Te tïtorotororaa a te mau Färitea

Ärataìhia atu ra te taata i pö na te mata i mua i te mau Färitea, e teie mahana e täpati te täpati âti-Iuta i oi ai Ietu i te repo i te faaoraraa i ta na mata. Ua ìmi te mau Färitea i te oraraa ta na mata. I parai mai o ia i te repo i ta ù mata; e horoi iho ra hoì au, e te ìte nei au. Èere teie taata i to te Atua, aore hoì o ia i haapaò i te täpati. Te tahi pae, E aha e tià ai i te taata hara ia rave i te täpaò mai teie nei, Ua àmaha iho ra rätou. E aha ta òe na parau ia na, o ia i faaora i to mata na, E perofeta ia o ia. Tiihia nä metua o taua taata ra i faaorahia te mata. O ta òrua tamaiti teie i parau ra e, i fänau matapö mai o ia. E aha hoì o ia i ìte ai i teie nei. Ua ìte mäua, na mäua mau teie nei tamaiti, e matapö mau o ia mai te fänauraa mai ai. Ua mohi teie na metua i roto i te taa òre, A ui atu na ia na, ua paari hoì o ia iho, ua ö te mataù ia räua i te âti-Iüta, ua faaau na hoì te âti-Iüta i ta rätou iho parau, e te taata i nä ô ra e o ia te Metia, e tuuhia ia i räpae i te tunato ra. Ua paari o ia, a ui atu na ia na iho. Ìmi iho ra te mau Faritea e haaparuparu te tiàturiraa o teie tamaiti i faaàraàrahia te mata e Ietu, i te parauraa a te mau Faritea, E haamaitaì i te Atua. Ua ìte hoì mätou e, e taata hara teie nei taata. Teie mai nei te fäìraa a teie tamaiti, Aore au i ìte , e taata hara, Hoê roa a ù parau i ìte, e matapö to ù i mütaa iho, e teie nei te ìte nei au. I aha mai o ia ia òe, I nä hea o ia i te faaoraraa i to mata na. Ua fäì atu hoì au ia òutou, aore òutou i faaroo. E aha rä hoì òutou i hinaaro faahou ai i te faaroo, Ei pîpî änei òutou atoà na na? O òe ta na pîpî, âreà mätou e pîpî ia na Möte, ua pärahi noa te mau Faritea i roto i to rätou ao te maì o te taata o te Atua te tumu. E mea huru ê hoì tënä aore òutou i ìte i te vähi no reira mai o ia, e inaha, ua faaora hoì o ia i ta ù mata nei. Noa atu teie mau faahitiraa manaò, òre te Atua e faaroo i te feiä hara, o te taata rä e haamori i te Atua, e o tei haapaò i to na ra hinaaro, o ta na ia e faaroo. Te matapö i fänauhia e òre e ora i te taata mai mätamua mai ä o te fenua nei. Te itoito e te puai o teie tamaiti e haapäpü faahouhia i teie parauraa  Àhiri teie nei taata eere i to ô i te Atua ra, eita roa ta na räveà e tià. I teie parauraa tuuhia atu ra oia i räpaeàu i te oraraa vaamataèinaa, ìte noa ai te mata, ua pö ra :

Te mata värua

I te färereiraa o Ietu i teie taata ma te parau e, Ua faaroo òe i te Tamaiti a te Atua, E te Fatu, o vai o ia ia faaroo atu vau ia na. Ua hiò hoì òe ia na, e o ia hoì teie e parau atu ia òe nei. E te Fatu, ua faaroo vau. E ua tïpapa iho ra i raro i mua i ta na aro. I haere mai nei au i te ao nei ia tupu te parau tià, ia ìte te feiä ìte òre ra, e ia riro te feiä ìte ra ei matapö. E toofanu mau Färitea tei faaroo, ua parau mai ra ia na: «E matapö atoà nei mätou nei. Àhiri òutou e matapö ra, aita a òutou hara, te parau mai na rä òutou e: «Ua ìte mätou», te vai na ia ta òutou hara. E mata tià o teie tamaiti i mua i te òhipa i ravehia e Ietu i nià ia na te ìte nei i te mau ù o te mau aru, te ìte nei i te ànaana o te mahana, e te ìte nei i te hohoà o to na nä metua, e to na mau hoa. Haapäpüraa, e huare, e repo, e päpe, tei ìriti i te ùputa o te marämarama i roto i to na oraraa âpï, te tahi reo no Pauro, Èfetia 5, 14 I parau mai ai te Värua e: «A ara mai na, e tërä ra taata taòto, a tià mai i nià, e tënä na pohe, e na te Metia e horoà mai i te märamarama ia òe.»

 

 

Teraì òr. Faatura. 

 

Ioane 4.5-42 Päpe.

 

Tāpati 12 no Mäti 2023.

Päpe.

Taramo 95

1 Tätou e himene i te Fatu, e himene hua tätou i te mato e ora ai tätou nei.

2 E haere tätou i mua i ta na aro mä te haamaitaì, e mä te taramo e himene hua atu ai ia na.

3 E Atua rahi hoì te Fatu E arii rahi i nià i te mau atua atoà ra.

4 Tei ta na rima te vähi hohonu o te fenua nei, e te teiteiraa o te mau mouà ra, no na ia.

5 Na na te tai, na na hoì i hämani, e na ta na rima i hämani i te repo marô.

6 E haere mai tätou, e haamori mä te piò i raro, e tuu i to tätou turi i te aro o tei hämani ia tätou nei, i te Fatu.

7 O ia hoì to tätou Atua, o tätou hoì te nana no ta na ra âua, te mau mämoe i ärataìhia e ta na rima. Ia tià ia òutou, i teie nei mahana i te faaroo i ta na reo.

8 Eiaha e faaètaèta i to òutou âau mai tei Meripa ra, e mai tei te mahana i Mata, i te mëtëpara ra,

9 i ta to òutou mau metua i faaoôo mai ia ù ra, e ua àa mai ia ù, ìte noa ai rätou i ta ù ra mau òhipa.

10 A maha aè ra àhururaa o ù mätahiti i te oôoraa i te reira uì, e ua nä ô aè ra vau: E feiä âau hapa rätou, e aore i haapaò i ta ù ra parau,

11 o tei tapuhia e au i ta ù ririraa ra, e eiaha roa rätou ia ö i to ù ra faaearaa.

Ètoto 17.3-7

3 Ua poìhä rä te taata i reira i te pape òre; e ua amuamu hoì te taata ia Möte, e ua nä ô mai ra, E aha òe i ärataì mai ai ia mätou mai Àifiti mai ia pohe mätou, e ta mätou mau tamarii, e ta mätou mau puaa atoà, i te poìhä?

4 Ua tiàoro atu ra Möte i te Fatu, nä ô atu ra, E aha vau i teie nei feiä? Rooaù aè rätou ua tuì mai ia ù i te ôfaì.

5 Ua parau mai ra te Fatu ia Möte, E haere òe nä mua i taua mau taata nei, o òe e te tahi pae o te hui mätahiapo o Ìteraèra ra, e hopoi atoà i te räau ta òe i täìri i te pape ra i to rima, a haere ai.

6 E inaha, ei nià vau i te mato i Hörepa tià atu ai i mua ia òe na; e na òe e papaì i taua mato ra, e e tahe mai te pape no roto mai ei inuraa na te taata. E ua nä reira hoì Möte i mua i te aro o te hui mätahiapo o Ìteraèra ra.

7 Maìri iho ra o ia i te iòa o taua vähi ra ia Mata, e ia Meripa, no te àvau a te tamarii a Ìteraèra, e no te mea ua faatiò rätou i te Fatu, i te nä-ô-raa e, Tei roto änei te Fatu ia tätou, e aore änei?

Rōma 5.1-8

Te hau a te Atua

1 E teie nei, ua tiàhia tätou i te faaroo, e hau to tätou i te Atua ra, i to tätou Fatu ia Ietu Metia ra;

2 no na hoì tätou i ö ai i te faaroo i roto i teie nei maitaì i pärahihia e tätou nei, e te òaòa nei i te tiaìraa i te maitaì o te Atua.

3 Eere hoì te reira anaè ra, te òaòa atoà nei rä tätou i te mau àti nei; ua ìte hoì tätou e, na te pohe e faatupu i te faaòromaì;

4 e na te faaòromaì e faatupu i te ìte; na te ìte e faatupu i te tiaì.

5 E òre hoì te tiaì e faahaamä mai, no te mea ua niniihia mai te hinaaro o te Atua i roto i to tätou âau e te Värua Maitaì i horoàhia mai ia tätou nei.

6 I to tätou vai-paruparu-raa ra hoì i pohe ai te Metia i te tau mau ra, no te feiä paieti-òre ra.

7 E òre hoì te hoê e haapohe no te tahi taata parau tià, e faaòromaì rä paha te hoê taata atu i te pohe no te taata maitaì.

8 Ua faarahi rä te Atua i to na aroha ia tätou nei, i te mea te vai taata hara noa nei ä tätou, i pohe ai te Metia no tätou nei.

Ioane 4.5-42

Ìrava 5-6, Te Apoo Pape a Iatopa i Titara no te fenua ra o Tämaria

5 E tae atu ra o ia i te hoê ôire i Tämäria, o Titara te iòa, tei pïhaì iho i te maa fenua a Iatöpa i horoà atu no ta na tamaiti ra no Iotëfa.

6 Tei reira te âpoo pape a Iatöpa ra. E rohirohi aè ra Ietu i te haereà, pärahi iho ra i te hiti i taua âpoo pape ra. Ua tae i te ono o te hora ra.

Ìrava 7-15, Te Poiha o Ietu e te poiha o  te Vahine Tämaria

7 Ua haere mai ra te hoê vahine Tämäria e huti i te pape; ua parau atu ra Ietu ia na: «Hö mai na e inu.

8 Ua reva atu ra hoì ta na mau pipi i roto i te ôire e hoo i te mäa.

9 Ua parau mai ra taua vahine Tämäria ra ia na: «E aha òe te âti-Iüta na i ani mai ai ia ù, i te vahine Tämäria nei, i te pape? Eita hoì te âti-Iüta e au maitaì atu i to Tämäria.

10 Ua parau atu ra Ietu ia na, nä ô atu ra: «Àhiri òe i ìte na i ta te Atua i horoà mai ra, e tei parau atu ia òe na e: «Hö mai na e inu», ua ani mai ia òe ia na, e ua horoà o ia i te pape ora no òe.

11 Ua parau mai ra taua vahine ra ia na: «E te Fatu, aita a òe pätete, e âpoo hohonu teie. I hea ta òe pape ora e noaa ai?

12 E rahi änei òe ia Iatöpa i to mätou metua ra, o tei horoà mai na mätou i teie nei âpoo pape, e ua inu o ia iho, e ta na mau tamarii, e te mau puaa?

13 Ua parau atu ra Ietu ia na, nä ô atu ra: «O të inu i tënä na pape, e poìhä faahou ä ia.

14 Âreà të inu i te pape e horoàhia atu e au nei, e òre roa ia o ia e poìhä faahou, e riro rä taua pape e horoàhia atu e au na na ra, ei pape pihaa i roto ia na iho, e tià i te pihaaraa e tae noa atu i te ora-mure-òre ra.

15 Ua parau mai ra taua vahine ra ia na: «E te Fatu, hö mai na i taua pape ra na ù, ia òre roa vau ia poìhä faahou, e ia òre hoì ia haere mai i ô nei e huti.

Ìrava 16-26 Ia haamorihia te Atua ma te Pure

16 Ua parau atu ra Ietu ia na: «A haere, a tii i to täne, e a hoì mai ai.

17 Ua parau mai ra taua vahine ra, nä ô mai ra: «Aita a ù täne. Ua parau atu ra Ietu ia na: «E parau tià ta òe i parau mai nei e: «Aita a ù täne».

18 A toopae aè nei hoì a òe täne, e tënä na ta òe e taòto na, eere ia i te täne na òe. E parau mau ta òe i parau mai nei.

19 Ua parau mai ra taua vahine ra ia na: «E te Fatu, e perofeta òe nei, te ìte nei au.

20 I haamori na hoì to mätou hui-metua i nià i teie nei mouà, e te parau nei òutou, tei Ierutarëma te vähi e tià ai ia haamori te taata.

21 Ua parau atu ra Ietu ia na: «A faaroo mai na, e teie nei vahine, ua fätata te hora e òre e tae mai ai òutou i teie nei mouà, e e òre hoì e haere i Ierutarëma, haamori ai i te Metua.

22 Aore òutou i ìte i ta òutou e haamori nei, ua ìte mätou i ta mätou e haamori nei, no te âti-Iüta mai te ora. 23 Ua fätata rä, e teie nei hoì taua hora, e haamori ai i te Metua te feiä haamori mau ra, mä te värua e te parau mau: o te huru ia o te feiä haamori ta te Metua e tïtau nei.

24 E Värua te Atua, e te feiä e haamori ia na ra, e haamori ia mä te Värua e te parau mau e tià ai.

25 Ua parau mai ra taua vahine ra ia na: «Ua ìte au e, te haere mai na te Metia o tei Faatähinuhia ra ia. E ia tae mai o ia ra, na na ia e faaìte mai ia mätou i te mau parau atoà ra.

26 Ua parau atu ra Ietu ia na: «O vau ia e parau atu ia òe na.

Ìrava 27-38, Te  mau pipi hoìraa mai ma te maa, e te maere i te paia o Ietu.

27 I reira te taeraa mai ta na mau pipi, e mäere noa iho ra, o ia i paraparau atu i taua vahine ra; aita rä te hoê i parau atu e: «E aha ta òe e ui na?», e: «E aha òe i paraparau atu ai ia na?»

28 Vaiiho iho ra taua vahine ra i ta na färii pape, haere atu ra i roto i te ôire, ua parau atu ra i te taata:

29 «Mai haere na e hiò i te taata i faaìte mai ia ù i ta ù mau peu atoà nei. Eere änei tërä aè te Metia?

30 Haere atu ra rätou ia na ra, mai roto mai i te ôire ra.

31 Ua parau na ta na mau pipi ia na, nä ô atu ra: «E Rapi, a àmu

32 Ua parau mai ra o ia ia rätou: «E mäa ta ù ia àmu aita òutou i ìte.

33 Ua parau iho ra te mau pipi rätou rätou iho: «I hopoi mai änei te taata i te mäa na na?

34 Ua parau mai ra Ietu ia rätou: «Teie ta ù mäa, o të haapaò i to na hinaaro o to tei tono mai ia ù nei, e të faaoti i ta na òhipa.

35 Eere te parau nei òutou: «E maha märama toe e àuhune ai? «Inaha, e parau atu vau ia òutou, e faateitei i to òutou mata, e hiò i te mau âua ra, ua teatea ia i teie nei ua àuhune.

36 E te taata e ôoti ra, e utuà ta na, e ua haaputu i te maitaì no te ora-mure-òre ra, ia òaòa âpipiti, o të ueue e o të ôoti.

37 Ua tupu iho nei hoì te maa parau ra e: «Na te hoê e ueue, e na te tahi ê e ôoti.»

38 E tono vau ia òutou ei ôoti i tei òre i òhipahia e òutou na, na vëtahi ê i òhipa, e te faaö atu nei òutou i roto i ta rätou òhipa.

Ìrava 38-42, Te Fäîraa Faaroo a to Tämaria. Ua ìte atu ra matou e, o te Ora mau teie o to te ao o te Metia.

39 E rave rahi mai ra i taua ôire ra to Tämäria i faaroo ia na i te parau a te vahine i parau atu ra e: «Ua faaìte mai o ia ia ù i te mau peu atoà na ù nei.»

40 E tae mai ra to Tämäria ia na ra, ua täpeà mai ra rätou ia na e pärahi io rätou ra, ua pärahi iho ra o ia i reira ia piti ruì.

41 E rave rahi hoì tei faaroo i ta na iho parau.

42 Ua parau aè ra rätou i taua vahine ra: «Eere atu ra i to te parau ta òe i parau mai ra i faaroo ai mätou, ìte hua aè nei mätou ia na iho; ua ìte atu ra mätou e o te Ora mau teie o to te ao, o te Metia.

Manaò.

Te reo te hinaaro ia o te Atua i te taata ; i roto i teie tuatäpaparaa i te parau o te pape, ua ìte mai tätou e, a pähee te pape, a vai mai te fenua. I mua rä i te parau o te fenua, ua faaìte mai te reo e, te metua te reira o te taata. Ia färii hoì te taata i te here i to na metua, i te fenua, te mea ia o ia e ìte ai i to na Metua i te raì. Ietu te Tamaiti a te Atua o te raì, aita o ia i täuruuru noa aè i te parauraa e, e Tamaiti o ia na te taata, oia hoì e tamaiti na te fenua, ei räveà e ìte ai te taata i te èà o te Metua i te raì. No reira, eiaha tätou e tiaì e ia täpoì faahou te pape i te fenua, a moè roa atu ai te mea i päpaìhia i nià i te fenua, te parau hoì o te ora ta te Atua i huna i roto i te fenua. E te Atua Metua i te raì e, tei ia òe na te parau mau, a horoà mai ia mätou i te haèhaa o te âau e te òaòa o te tiàturiraa ia färii mätou i to mätou fenua ei metua no mätou, e ei arataì ia mätou ia ìte mätou i te èà e tae atu ai ia òe ra, te Tumu o te ora. A aroha mai ia mätou ta òe mau tamarii.

No reira, ia òre te Värua o te Atua ia faatupu i te märamarama i roto i te âau o te taata, mai ia Nitotemo, eita atoà te taata e ìte i te auraa o teie fänauraa e parauhia nei, no te mea aita e fänauraa tei òre i nä roto mai i te fenua e te pape i te pü mai i roto i te märamarama e te ora. E tano tätou e haamaitaì i te Atua, mai te Tamaiti e haamaitaì ra i te nä ôraa e : E haamaitaì au ia òe e ta ù Metua, e te Fatu o te raì e te fenua, i te mea i huna ê noa na òe i teie nei mau parau i te feiä paari e te ìte, e ua faaìte mai i te tamarii nei Mätaio 11, 25. E tano atoà rä tätou e täpiri noa mai i te manaò o Pauro e parau ra e : Ua mäìti te Atua i te mau mea maamaa o te ao nei, ei faahaamä atu i te feiä paari ; e ua mäìti hoì te Atua i te mea paruparu o te ao nei, ei faahaamäraa atu i te feiä püai ; e te mau mea haèhaa o te ao nei, e te mau mea vahavahahia ra, e te mau mea aore ra, tei mäìtihia ia e te Atua, ei faaòre i te mau mea e vai nei 1 Torinetia 1, 27-28. Te mau tïtauraa ia e vai nei i roto i te mau taiòraa turu no ta tätou parau i teie mahana haamoriraa na tätou. Teie te haapotoraa no te mau taiòraa :

-Taramo 95, 7 O ia hoì to tätou Atua, o tätou hoì te nana no ta na ra âua, te mau mämoe i ärataìhia e ta na rima. Ia tià ia òutou, i teie nei mahana i te faaroo i ta na reo.

-Ètoto 17, 7 Maìri iho ra o ia i te iòa o taua vähi ra ia Mata, e ia Meripa, no te àvau a te tamarii a Ìteraèra, e no te mea ua faatiò rätou i te Fatu, i te nä-ô-raa e, Tei roto änei te Fatu ia tätou, e aore änei?

-Roma 5, 5 E òre hoì te tiaì e faahaamä mai, no te mea ua niniihia mai te hinaaro o te Atua i roto i to tätou âau e te Värua Maitaì i horoàhia mai ia tätou nei.

-Ioane 4, 42 Ua parau aè ra rätou i taua vahine ra: «Eere atu ra i to te parau ta òe i parau mai ra i faaroo ai mätou, ìte hua aè nei mätou ia na iho; ua ìte atu ra mätou e o te Ora mau teie o to te ao, o te Metia.

No te faufaa o ta tätou parau no teie mahana mea tià roa ia tätou ia tütonu maite i nià i te tupuraa o teie färereiraa no teie vahine Tämaria e o Ietu, i roto ihoä i ta raua âparauraa e te mau uiuiraa manaò. I roto i ta raua âparauraa na Ietu i ìriti i te ùputa ma te äni hömai na e inu, te auraa o teie reo a inu òe na mua ia maha to òe hiaai, hömai ai òe I teie töparaa reo i tomo ai te vahine Tämaria i roto i te aniraa a Ietu, i te mea te ìte nei teie vahine i roto ia Ietu i te tauturu ia na i roto i to na oraraa o te tià i te faahauraa i to na âau. Ma teie atu ra te tupuraa o ta tätou parau :   

Mau tuhaa o te taiòraa.

1-Ìrava 5-6, Te Apoo Pape a Iatopa i Titara no te fenua ra o Tämaria.

2-Ìrava 7-15, Te Poiha o Ietu e te poiha o  te Vahine Tämaria

3-Ìrava 16-26 Ia haamorihia te Atua ma te Pure

4-Ìrava 27-38, Te  mau pipi hoìraa mai ma te maa, e te maere i te paia o Ietu.

5-Ìrava 38-42, Te Fäîraa Faaroo a to Tämaria. Ua ìte atu ra matou e, o te Ora mau teie o to te ao o te Metia.

Te Tuatua o te taiòraa.

Te parau no te haamoriraa, Eiaha tätou e manaò e, E pae tane ta teie vahine, e pae ra atua ta na e haamori nei. E mau atua teie no Atura, tei  taìtaìhia mai, mai Päpuronia mai.

1) TUTOTA-PENOTA   E atua teie no te mau fare o te mau pötii

2) TUTA-NERETARA  Na atua ê atoà teie tei òre i päpu te auraa, te parauhia ra e na atua teie.

3) HAMATA-ATIMA   tiäì i te vahi o te pohe.

4) AVA-NIPEHATA     Teie na atua hoê no te  ruì, e hoê no te paruru….II Arii 17 : 24 – 31…

5) TARATATA

 

 

Teie to mau tane ra a te Vahine Tämaria.

E tià ia parauhia 158 mätahiti te maoro te vai-noa-raa to Tämaria mai teie te huru, i te au-òre-raa i te Àti Iuta. Te tumu no nià ia i te oraraa faaroo, ua tutuìhia te fare pureraa a to Tämaria i nià i te faaueraa a te mau tahuà no Ierutarëma, ia au te mau tuatäpaparaa. O Teretima te mouà i faatiàhia teie fare pure i te 332 hou o Ietu Metia. E i te mätahiti 128 hou o Ietu Metia i tutuìhia ai. Na roto i teie mau ìrava 16 e faaea i te 26, ua mäheu te parau no te haamoriraa îtoro a te nunaa Tämaria, na roto i teie vahine. Ta rätou vahi haamoriraa i nià i te mouà, ua faa-òre-roa-hia, i te mea aita te reira i au i te mau tahuà no Ierutarëma.

Ietu e te vahine Tämäria,

Ua faahiti mai na tätou i teie manaò e, i roto i te rahu, aita e taime i faahitihia ai e, ua riro mai te parau ei pape, no te mea rä i faanaho te Atua i te vairaa o te pape, i vairaa-atoà-hia ai to te mau mea atoà ta te parau i faatupu atu. I roto i te Taramo, nä reira hoì te Ieremia, te faaauhia ra te taata i haapaò i te hinaaro o te Atua, i te hoê räau i tupu i te pae pape, tei heeuri e tei hotu i te tau mau ra : Tei hinaaro i te ture a Te Tumu Nui e tei ta na ture to na manaò i te ruì e te ao, e au ia i te räau i tänuhia i te hiti ânävai, tei hotu i to na ra tau mau, e tei òre roa i mäheàheà to na rau, ta na atoà e rave ra, te maitaì ra ia Taramo 1, ìrava 2 e te 3 ; E ao to te taata i tiàturi i Te Atua Nui Tumu tahi, to na ia uruaìraa mau i Te Tumu Nui. E riro hoì o ia mai te räau i tänuhia i pïhaì iho i te pape ra, tei faatoro i to na aa nä te hiti o te pape, aita i ìte i te veàveà i te tupuraa mai, te vai èreere tämau noa ra to na rau, e òre e haapaò i te mätahiti ua òre ra, e òre hoì e faaea i te hotu i te mäa Ieremia 17, ìrava 7 e te 8. Ia tae mai tätou i nià ia Ietu, te faaau ra o ia i ta na parau i te òè Mätaio 10, 34, i te auahi Ruta 12, 49, te faaau atoà ra o ia i ta na parau i te pape, te pape rä e òre ai te taata e poìhä faahou ai Ioane 4, ìrava 13 e te 14. No te òreraa te vahine Tämäria i horoà òhie noa i te pape na na, na te âti Iuta tei poìhä roa i te veàveà o te mahana, i faahiti ai Ietu i teie huru parau. Aita Ietu e haafaufaa òre nei i te pape ta teie vahine i haere mai e huti, ua riro noa te òhipa i tupu ei taime no Ietu no te faaìte-faahou-raa i te ora no reira te Metua i tono mai ai ia na. Te parau ra Ietu i teie vahine : Àhiri òe i ìte i ta te Atua i horoà mai ra, e tei parau atu ia òe na e, ho mai na e inu, ua ani mai ia òe ia na, e ua horoà o ia i te pape ora na òe Ioane 4, 10. Teie te manaò e ômuahia ra e teie taò Àhiri : te vai ra te tupuraa o te tahi òhipa tei òre i ìtehia te maitaì, te tämata ra rä te taata parau i te hiò i te tahi tupuraa taa ê atu i teie, ei räveà e matara ai te parau o teie maitaì. Te auraa, i te haamataraa ihoä, te haapäpü ra Ietu e, aita teie vahine e taa mai ra i te auraa o teie pape ta na e parau atu nei. Ia ìte atoà mai rä tätou e, aita i roto ia Ietu te manaò haamoemoeä i te taata, i te ìmiraa i te räveà ia ö i roto ia na te tahi tiàturiraa të òre roa atu e ìtehia to na tupuraa. Te tahi teie fäìraa të òhie i te märamaramahia ia färii te taata i te hiò i te auraa o te parau i te tahi vähi ê atu i ta te taò e faaìte ra. No te pape ihoä te parau ta Ietu e faahiti nei, te manaò rä, aore ra te värua o te parau, no te huru ia o te pape. Mai te pape e horoà nei i te ora i te taata e i te rahu a te Atua, oia atoà te parau tei riro Ietu ei veà. E pape ihoä te tahi, e parau ihoä te tahi. Mai te ora rä të òre roa to na parau e tano ia faataa-ê-hia i to te pape e te Parau, oia atoà te ora ta Ietu e faaìte nei, eita atoà ia e tano ia faataa-ê-hia i to te Parau no reira o ia i tonohia mai ai. Mai te peu rä, e mou te raì e te fenua Mätaio 24, 35, te haapäpü ra Ietu e, e òre roa te parau e mou, no te mea no roto mai te mau mea atoà i te parau, e o te Atua iho hoì te Parau. E peu tumu na Ietu i roto i ta na mau haapiiraa, te raveraa i te mau parau no roto mai i te oraraa o te taata, ei räveà e òhie ai te taata i te märamarama i te parau e te hinaaro o te Atua. I tae ai rä Ietu i te faaauraa i te parau a te Atua i te Pape, no te faufaa hau ê ia o te pape i roto i te ôpuaraa faaora a te Atua.

Ia au i teie mau manaò ua faainuhia te vahine Tämaria i te pape no roto mai i te värua o te  parau, pihaa iho ra, horo atu ra e faaìte i to na nunaa ua ìteähia te perofeta, tupu te färereiraa i te nunaa Tämaria, e ua tiàturi ma te parau e 42 Ua parau aè ra rätou i taua vahine ra: «Eere atu ra i to te parau ta òe i parau mai ra i faaroo ai mätou, ìte hua aè nei mätou ia na iho; ua ìte atu ra mätou e o te Ora mau teie o to te ao, o te Metia. Na te faufaa tupuna i haafärerei ia Ietu i te vahine Tämaria, na te Pape e te Parau i faatupu i te ôpuaraa faaora a te Atua, i tiàturi ai te nunaa no Tämaria, ma te fäì e ìte hua aè nei mätou ia na iho; ua ìte atu ra mätou e o te Ora mau teie o to te ao, o te Metia. Te hua e parauhia nei i roto i te ìrava, ua î to rätou tino, te värua, te fëruriraa i te Parau ua hau to Tämaria i te faaìteraa parau a Ietu.

No te mau pipi,

e faaìte o Ietu te tumu no te òhipa, i teie parauraa, E Rapi, a àmu, E mäa ta ù i àmu aita òutou i ìte. I hopoi mai änei te taata i te mäa na na, Teie ta ù mäa, o të haapaò i to na hinaaro o to tei tono mai ia ù nei, e të faaoti i ta na òhipa. E maha märama toe e àuhune ai, Inaha, e faateitei i to òutou mata, e hiò i te mau âua ra, ua teatea ia i teie nei ua àuhune. E te taata e ôoti ra, e utuà ta na, e ua haaputu i te maitaì no te ora-mure-òre ra, ia òaòa âpipiti, o të ueue e o të ôoti. Na te hoê e ueue, e na te tahi ê e ôoti. E tono vau ia òutou ei ôoti i tei òre i òhipahia e òutou na, na vëtahi ê i òhipa, e te faaö atu nei òutou i roto i ta rätou òhipa. Te ìriti nei o Ietu i te ùputa no te haapiiraa, i te mau taata atoà e tiàturi nei i teie tonoraa na Ietu, e i te mau nunaa atoà, tei naeàhia i teie mau parau. O te tahi ìhi haapiiraa teie e au no tätou ia faanaho o te mea i faanaho-noa-hia mai nei e tätou tei òre ä i färiihia atu ra e te tahi pae no te nunaa. Te parau no te mau hui Àito, te mau hui Tupuna, te Marae, o Taaroa Nui Tumu Tahi, te Reo Mäòhi, ua oti aè nei te tau no te Hinapaarae, èie tätou i roto i te tau no te Nuu Atua. Ia märamaramahia teie färereiraa no Ietu e te Vahine Tämaria i te âpoo pape a Iatopa to raua tupuna :

-Ua âparau i te parau no to raua tupuna ia Iatopa.

-Te faufaa o te pape e te auraa.

-Te haamoriraa.

-Te fäìraa faaroo.

Te tupuraa te parau hoê tei märamarama, e nunaa tei tiàturi ma te fäì i te faaroo, ua ìte atu ra mätou e o te Ora mau teie o to te ao, o te Metia. Maru roa, E pape noa te rave.

 

Teraì òr. Faatura.

  

Ìrava 38-42, Te Fäîraa