Te mau taiòraa : Taramo 3 / Märeto 15, 24-41.

 

Poroì no te mahana pae 29 no mäti 2024 Faraite poheraa & Haapaeraa mäa

 

Te mau taiòraa : Taramo 3 / Märeto 15, 24-41.

 

Poroì : Märeto 15, 38 : « Ua mahae iho ra te päruru o te Hiero ra mai nià mai ä e raro roa »

 

Mäòhi Nui, te Aroha ia rahi. Teie tätou i mua i teie parau no tätou i teie mahana. Eere i te tahi parau âpï teie, e parau rä teie tei mätauhia e to tätou tarià i te faaroo i te mau matahiti atoà. No te mea hoì, e parau mätauhia e tätou i te faaroo, te tanoraa mau e ôhie atoà ia tätou i te märamarama e te taa i te auraa e vai nei i roto i teie parau.

 

Ta te parau ra e faatoro nei ia tätou i teie mahana, teie te Tamaiti a te Atua i mua i te ìno, te tähitohito, te faaino a te taata. Aita ia e òre e, tau minuti noa e toe nei ia Ietu, ö atu ai oia i roto i te rima o te pohe. E aha rä ta te pohe o Ietu e tauturu nei ia tätou i teie mahana, teie ia parau tei faataahia no tätou i teie mahana, o tei nä ô mai e : « Ua mahae iho ra te päruru o te Hiero ra mai nià mai ä e raro roa ».

 

Ua tupu teie parau i muri iti noa aè i te pohe o Ietu, e teie te tahi mau ôhipa i tupu. Te päpü ra ia tätou e, noa atu ua pohe Ietu, eita rä te Atua e faaea i te tauturu e i te haapii i te taata. E te vähi ta te Atua e tauturu nei i teie nünaa, mäoti rä, te vähi ia ta rätou i mätau i te haamori i te Atua, te Hiero ia. Te tanoraa mau, te Hiero, vähi teie tei faataahia no te haamori i te Atua.

 

Ta te parau rä e tauturu nei ia tätou i teie mahana, e au ra e, te vähi e fifihia ra e teie nünaa, o to na ia oraraa faaroo. Te auraa ra, te arataì faaroo ia o teie nünaa teie e faatorohia nei e teie parau nä tätou. Mai te peu, te Hiero, e vähi haamoriraa teie i te Atua, aita ia e manaò to te taata, aita atoà ta te taata e faanahoraa. Te auraa, i roto i te fare pure, mai mua e tae roa i muri, mai nià e tae roa i raro, nö te Atua anaè ia, e nä te Atua anaè te faanahoraa e te parau i roto.

 

E aha rä ta teie ìrava e tauturu nei ia tätou i teie mahana, ia rave hoì tätou i te parau no te päruru o te tahi fare : Te manaò mätämua, te tahi täoà e tauturu nei, ia òre te hihi o te mahana ia tae i roto te fare. Te auraa, nä te paruru o te fare e höroà i te au o te märamarama, aore ia te pöuri e te au o te hihi o te mahana e hinaarohia nei no taua fare ra. Te piti o te manaò, no te päruru ia i te mata o te taata, ia òre te èiä e te mau mea atoà ia haafii i teie fare.

 

Te òhipa atoà ia e ravehia nei e te mau arataì faaroo o te nünaa âti-Iuta, oia hoì te tuuraa i te tahi päruu fare i roto i te fare o te Atua. E au atu ra ia e, eere faahou no te hihi mahana e te mata taata, no te faaìte noa i te nünaa e, o mätou teie, teie te mau arataì, nä mätou te faanahoraa, no mätou te hinaaro i roto i teie fare. Ia märamarama hoì tätou i teie huru tupuraa òhipa, ua faataahia te fare o te Atua e piti tuhaa, te tuhaa no te nünaa e te tuhaa no te mau arataì faaroo. Te auraa ra, eita te nünaa e tano i te vähi i faataahia no te mau arataì, nä reira atoà no te mau arataì, eere atoà ia rätou e tano i te vähi e pärahihia nei e te nünaa, ua tae roa te manaò taata i roto i te fare o te Atua.

 

Na roto i te pohe o te Fatu, te hinaaro nei te Fatu e haamaitaì i teie vähi, aore ia e tauturu i teie vähi e paruparuhia nei. Oia hoì, te fare o te Atua, e vähi te reira e ìtehia ai te hinaaro e te manaò o te Atua. Ua mahae teie päruru, ua topa atoà ia te faanahoraa a te taata i roto i te fare o te Atua. I te tau i faatere noa mai ai te mau arataì faaroo âti-Iuta, e au pai e, tei roto noa te fare pure i te pöuri, nä roto rä i teie òhipa i tupu, ua hiti faahouhia teie fare pure i te märamarama o te Atua. Te auraa ra, aita to te tiàraa i roto i te fare pure o te Atua, aita e tätuhaahia na te fare o te Atua, mai mua e tae roa i muri, mai nià e tae roa i raro, no te Atua, e te vähi ta òe e hinaaro nei i te pärahi, eita te Atua e faahaapa mai ia òe.

 

No reira, e te nünaa Mäòhi, e aha te huru e te fäito o te päruru o ta tätou e tuu nei i roto i ta tätou mau fare pure. E mai te peu, ua api te fare o te Atua i te mau päruru rau faanahohia e te taata, e tano änei e parau e, e fare terä no te Atua ? Faaitoito anaè ia i te faatopa e te haamahae i teie mau päruru rau, ia hoì faahou mai te Atua ei faatere i roto i to na iho fare. E hau roa atu ai, te faahohoà-atoà-hia nei te âau o te taata mai te Hiero ra te huru. Te haapiiraa e matara mai ra i roto i teie parau nä tätou no teie mahana, faaitoito i te tätara i terä mau päruru rau e vai ra i roto i to tätou âau. Faaitoito anaè i te faahoì mai te Atua i roto i to tätou âau, e i reira noa tätou e maitaì ai.

 

Ei ôpaniraa : Të nä ô ra te pure a to tätou hui tupuna e : « Ia Atua te Atua, Ia fenua te fenua, ia taata te taata, ua maitaì roa ». Te Aroha ia Rahi.

 

Taurani, òrometua

Te mau taiòraa : Taramo 13, 2-3 / Märeto 15, 42-47.

 

Poroì no te mahana mäa 30 no mäti 2024

 

Te mau taiòraa : Taramo 13, 2-3 / Märeto 15, 42-47.

Tumu parau : « Tämau mäite i te tiàturi i te Aroha o te Atua. »

 

Aroharaa : Ia pätuatini te Here e te Aroha o te Atua i teie âmuitahiraa i to tätou i teie hepetoma ôroà no te Vaereà Marae. Ei hau, ei hau, ei hau i roto i te papa o to tätou âau. E aroha âpï to te Atua ia tätou i te mau taime atoà. No reira, nä poro e hä no Mäòhi Nui nei, e tae noa atu i te nünaa herehia e te Atua, ia ora na i te aroha o te Fatu. E ia tauturu noa mai ä te Toru Tahi Moà ia tätou e to tätou mau ùtuafare atoà. Te aroha ia rahi !

 

E hoa here mä, e piti tau parau ta tätou e hiò mai i teie färereiraa i to tätou i teie ahiahi ; A tahi : Terä tau puè ìrava mätämua o te Taramo 13, 2-3, e nä ô ra : « Mai te aha ra te mäoro o to ù moè-roa-raa ia òe ? Mai te aha ra te roa o to hunaraa i to mata ia ù nei ? Mai te aha ra te mäoro o to ù feruriraa i roto i to ù nei âau mä te òto i roto i to ù nei värua i te mau mahana atoà ra ? Mai te aha ra te mäoro o to te ènemi faateiteiraa i nià ia ù nei ? », e a piti : Te tahi haapotoraa manaò no terä taiòraa i roto i te Märeto 15, 42-47. Muri mai tätou e hiò atu ai, e e aha te tahi tauturu e roaa mai ia tätou, mai roto mai i teie tau taiòraa, no to tätou oraraa faaroo i teie mahana e no ta tätou täviniraa a nanahi.

 

A tahi : I roto i terä Taramo 13, 2-3, ia faaroo-anaè-hia atu te huru paaìnaraa reo o te noa o te taata taramo i mua i te moà o te Atua, mea huru päteitei ra te taìraa o to na reo : « Mai te aha ra te mäoro … /.. . mai te aha te roa… ». E mau parau rii huru faahapahapa ra teie. Mai te huru e, aita te Atua e täuà mai nei ia na i roto i to na àti, ia au i te fäito teiaha e te paari o te mau taò haa tä na i faaòhipa : « moè / huna i te mata / te òto i roto i te âau e te värua i te mau mahana atoà / te faateiteiraa a te ènemi i nià ia na ». E reo pii ihoä paha teie no te ani i te tauturu i te Atua, ia tae anaè rä te piiraa i te fäito e 4 taime, e auraa ê rii paha ia ta tätou e ìte atu ra i roto. Fätata rii te manaò o teie taata taramo i te manaò o terä mau pipi a Ietu, i terä mahana i tere ai rätou nä te roto o Tarirea, terä e faatiàhia ra i roto i te Märeto 4, 38 : « Te taòto ra o ia i nià i te hoê tuauruà / türuà i te reimuri ra, ua faaara atu ra rätou ia na, nä ô atu ra : E te Òrometua, eita òe e haapaò mai i to mätou nei pohe ? »

 

Ia haamata anaè te taata taramo, e aore ia te mau pipi, i te höroà i te tahi mau uiuiraa mai teie ta tätou i faahiti mai i nià nei, eere paha te reira i te täpaò faaìte i te morohiraa o te faaroo / tiàturiraa, e täpaò rä te reira e te àma faahou ra te tiaìtururaa i roto i te âau o te mau tävini. E pärahi te tävini i roto i te tiaìraa i te tahi pähonoraa, e nä to na tiàturiraa / faaroo e turu i ta na tiaìraa, i parauhia ai e : tiaì -turu-raa. Te mea atoà ia e orahia e te taata taramo e tae noa atu i te mau pipi a Ietu. Parau mau, e manaò e e uiuiraa ihoä ta te taata ia ü anaè mai te fifi i nià i te oraraa, e tarià atoà rä to te Atua no te faaroo i te auë e te autä a ta na mau tamarii, noa atu e aha te fäito roa / mäoro o te huru tupuraa o te reira fifi, e noa atu atoà te faaètaèta a te ènemi i to na àî i nià te mau tamarii a te Atua.

 

Te tahi haapiiraa ta tätou e täpeà mai mai roto mai i teie taramo, eiaha e faaea i te pätötö i te âau o te Atua, eiaha no te ôfati i to na manaò, no terä rä mea e, te pii a te aroha, nä te aroha ihoä ia te reira e pähono. I teie hepetoma no te vaereà marae, te pii atoà mai ra te aroha o te Fatu i te aroha o te mau tävini. Mai teie atu nei, e mata na rä i te ìmi i te mata o te Atua, no te mea, i tei anihia mai te faaroo, ua ineine te Metua i te pähono mai te aroha.

A piti : I roto i terä Märeto 15, 42-47, te faatià ra teie tau puè ìrava i te mau òhipa i tupu i te ahiahi o te mahana faaneheneheraa a te âti-Iuta, hou rätou a tomo roa atu ai i roto i te parau no te haapaòraa i te täpati âti-Iuta. Te auraa, i muri rii noa aè i te 9 o te hora ia au i te taiòraa hora a te âti-Iuta, oia hoì, i muri rii noa aè i te hora 3 i te taharaa mahana i te mahana pae, ia au i te taiòraa hora o teie mahana. Tei mua tätou i teie ahiahi i te parau no to Ietu poheraa e te mau faaineineraa e au ia ravehia no te tuuraa i to na tino pohe i roto i te menema.

E nä roto tätou i teie taiòraa mahana âti-Iuta e të haapaò-atoà-hia ra e te Ètärëtia Âtevenite i te hiò i teie parau i ta tätou no teie ahiahi, ia òre atoà paì ia tätou ia faahapahapa hänoa i te tahi, i te parauraa e : Ta rätou te mea hape roa atu, ta tätou te mea tano roa aè. Eere paha te reira i te parau faufaa roa aè no te haamaitaì i to tätou oraraa faaroo e to tätou tiàturiraa i nià i te Atua ora e no te ora. Mea faufaa roa rä teie mau parau ia faahitihiti-faahou-hia i teie taime, no te tauturu ia tätou i te hiòraa i teie parau i vaiihohia mai e Märeto ia tätou i teie ahiahi. I roto i te mau faatiàraa e höroàhia e te mau päpaì èvaneria, te faaarahia mai ra ia e : I muri aè i to Ietu inuraa i te âuà vineta àvaàva o te hara, ua parau aè ra o ia : Ua oti. Täupe iho ra ta na upoo i raro, tuu atu ra i ta na värua (Ioane 19, 30). 

 

E i muri iti noa iho, ua haere atu ra te taata taoà rahi ra o Iötëfa no Ârïmätaio ia Pirato ra mä te mataù òre e ani i te tino pohe o Ietu, no te mea, ua faataa o ia i te tahi vähi tanuraa i te tino pohe o Ietu tei au i te huru o teie Fatu. Te ìte noa atoà atu ra tätou, nä roto i te manaò maitaì o Iötëfa i te höroàraa i to na menema no to na Fatu, i te veve rahi hopeà o teie Fatu ta tätou e tävini nei. Tià maitaì te veve o teie Tamaiti i te veve o to na Päpä.

 

I te aniraa a Iötëfa ia Pirato no te tino pohe o Ietu, ua faatupu te reira i te ui mäere i roto ia Pirato : E aha te òhipa i tupu i pohe vave Ietu ? E no terä mea e, aita te manaò o Pirato e hau roa ra, e ani ia i te raatira i te tahi haapäpüraa, pëneiaè e roaa mai te tahi pähonoraa huru märamarama aè. I te pae rä o Iötëfa, ua faaìte mai o ia nä roto i te òhipa i ravehia i te tahi huru täviniraa, tei riro ei haamanaòraa e ei faatau-aroha nä na no te maitaì rahi ta teie Fatu i faaìte mai ia na. Te uiraa noa i teie nei : Tei hea roa te toeà o te mau pipi, terä nau pipi 11 ? Tei hea roa o Pëtero, te àuvaha parau o teie pupu ! No te aha rätou i vaiiho mai ai i te òhipa e nä teie taata ê e faaoti, noa atu e ua faariro-atoà-hia o ia ei pipi nä Ietu ? 

 

I te faatiàraa a Ioane, ua âmui atoà atu o Nïtötemo ia Iötëfa (Ioane 19, 39). E nau pipi ômoèmoè teie i roto i to räua oraraa, ta räua rä täviniraa, ua hau aè ia i ta te mau pipi a te Fatu iho. Terä mataì veàveà o te pohe i farara i nià ia Ietu i roto i te àti tä na i faaruru, ua ü tià atu te reira i nià i teie tau pipi. Eere räua i nä taata mätaìtaì noa i te àti o te tahi, teie ihoä rä i to Ietu. I roto i ta tätou taiòraa, nä Iötëfa i viri i te tino pohe o Ietu i roto i te tahi àhu parupape / paruai maitaì, e àhu maitaì, viivii òre e te mä, tuu atu ra ia na i roto i te tahi menema âpï, türaì atu ra i te ôfaì i te ûputa o te menema, e haere atu ra. Aita teie pipi i hiò mata noa i te òhipa, ua rave rima rä i ta na täviniraa. Te auraa, ua parau ta na òhipa, e ua òhipa ta na parau. 

 

Ia reva atu Iötëfa, te vai nei teie tau puè vahine, o Märia i Mätatara e o Maria, te metua vahine o Iöte, te hiò noa mai ra te vähi i vaiihohia ai o to räua Fatu, no te rave i ta räua tuhaa haamanaòraa & täviniraa. Âreà te tahi puèraa pipi ra, n’a plus ia quelqu’un, ua horo ! Te vai atoà ra ihoä ia te reira huru e te reira hohoà pipi, ia tupu te vero i nià i te ìhitai i röpü i te moana uri paò, e tià noa atu o ia nä te pae tahatai, mätaìtaì noa atu ai i terä puèraa e faaü ra i te mätäàre, te âvaavaa o te moana e te püai o te mataì. Te mata to tai, te rima rä, tei roto ia i te pütë piripou. Aita paì ia i manaò rii noa aè e i haamanaò rii noa aè. E mau pipi terä tei pohe to rätou tiàturiraa i roto i te menema o te tiàturi òre, ua tahe to rätou itoito i mua i te àti o to rätou Fatu. 

 

I te tahi aè pae, i mua i te pohe o te Fatu, e tano e parau e, aita te mata o Iötëfa e terä tau mämä i tütonu noa i nià i te tätauro, ua òi rä to rätou mata nià i terä taata i te pätitiraahia i nià iho. Mai terä rii tau taata tei tià i mua i te tahi tumu vï, e tei parau e : Mea hotu terä aè tumu vï ! Te òi o to räua mata, aita to nià i te tumu vï, tei nià rä i te mäa vï, aita rä räua i haapaò rii noa aè e, i rahi ai te hotu o terä tumu vï, no te mea ia, e taata to raro aè i te tumu vï e ûtaru ra, e tämä ra. Ia mä anaè o raro aè, e hotu o nià. Te reira te tahi haapiiraa ta Iötëfa e ta teie tau mämä i vaiiho mai ia tätou i teie mahana, oia hoì, i raro aè i to tätou mau tumu vï rii, aita te Atua e faaea nei i te ûtaru, i te tämä e i te hutihuti i terä mau àihere putaputa o to tätou âau teòteò, te ètaèta e teitei. Terä te mea i moèhia e te mau pipi a Ietu i terä mahana, ua poaiàhia to rätou poro mata i mua i te àti o to rätou Fatu. E aha te huru o te poro mata o ta tatou täviniraa i teie mahana ? 

 

Te tahi noa maa manaò iti hopeà roa, ei faaitoitoraa e ei haamanaòraa nä tätou i to tätou Fatu, teie ia : Nä te riri i faatätauro i to tätou Fatu ; nä te here i tanu i to tätou Fatu ; e nä te aroha e faatià faahou i to tätou Fatu. Ta tätou ia parau a nanahi. Ia ora na.

 

 

                                                               Taùhere a Teipoarii, òrometua 

Te mau taiòraa : Taramo 118 / Märeto 16, 1-8.

 Poroì no te täpati 31 no mäti 2024

 Ôroà Tiàfaahouraa

 

Te mau taiòraa : Taramo 118 / Märeto 16, 1-8. 

 

Poroì : Märeto 16, 6 : « … te ìmi nei òutou ia Ietu i Nätarëta i faatätaurohia nei, ua tià ia o ia i nià, aore o ia i ô nei, a hiò i te vähi ta rätou i vaiiho ia na ra. »   

 

E te nünaa herehia e te Atua, ia ora na. I teie nei täpati, te haamanaò nei tätou i to te Fatu tiàfaahouraa mai te pohe mai, tei haapäpü mai e, eere tei te pohe te parau hopeà o te taata, tei te ora rä, tei riro noa hoì te tiàfaahouraa o te Fatu ei papa no te tiàturiraa e te tiaìtururaa maru-metia. 

 

I teie hepetoma, ua ora mai ia tätou i roto i te haamanaòraa i te mau mäuiui o te Fatu, to na faatätauroraahia e tae noa atu i to na poheraa. Te pohe o te Fatu, e ôpuaraa tià òre ia tei ravehia e te mau arataì faaroo o terä tau, no te mea, ua haere mai Ietu e faahoì i te arataìraa i nià i tä te Atua. Tauturu maitaìhia teie ôpuaraa ìno e te mau faatere o te fenua, e hau roa atu te nünaa iho ia. No te mataù hoì i te tià atu i mua i te mau mana faatere no te òhipa i tupu i nià i te Fatu, i ôpanipani ai te mau pipi ia rätou iho i roto i te tahi piha. Mai te mea ra ia e, tei roto atoà te mau pipi i te rüpehu o te pohe i te oraraa. 

 

Inaha, i teie poìpoì âpï, ia au i tätou taiòraa, mai te mea ra e, te pee marü noa atu ra te pöiri, e teie te rä e hiti mai nei. Täpaò faaìte ia e, te haamata faahou nei te tahi tau âpï, no te tahi oraraa âpï. Te auraa, te pee marü atu ra te rüpehu o te pohe no te ora, ei haapäpüraa mai, e Aroha te Atua.  

 

No teie mau vahine, i teie poìpoì, o rätou i pee noa na ia Ietu i roto i to na mau tere, ua noaa ia rätou te püai no te haere mai i räpae, no te rave i te òhipa e au no te tahi tino pohe, ia au i te peu tumu o taua tau ra. E haapäpüraa te reira, e ua pohe mau ä te Fatu ia au i terä fäìraa tä na i nià i te tätauro e : « ua oti ». Ei tino ihoä ia e tupu ai te faatävairaa i te räau noànoà. 

 

Te räveà e tae ai rätou i pïhaì iho i te tino o te Fatu, ia türaìhia ia te ôfaì rahi e ôpani ra i te ûputa tomoraa. O te mea ia i uiui ai te manaò o teie mau vahine i nià i te èà. Oia hoì : nä hea i te tomoraa i roto i te menema, no te mea, e ôfaì rahi teie e ôpani ra i te ûputa tomoraa, të òre roa atu hoì e maraa ia rätou. 

 

Ahiri paha teie mau pipi i âpee mai i teie mau vahine, pëneiaè e tere hau noa ia teie  mau mämä, no te mea, nä teie ia mau täne e tauturu ia rätou. Aita rä hoì : täponi noa ia i te fare.

 

Te mea rä i ìtehia atu e to rätou mata, ua huri-ê-hia na te ôfaì, e aita rä e tino i ìtea ia rätou. Te tahi ä ia manaò uiui, te mataù e te mäere hoì. Teie rä te reo o te veà a te Atua ia rätou : « … te ìmi nei òutou ia Ietu i Nätarëta i faatätaurohia nei, ua tià ia o ia i nià, aore o ia i ô nei, a hiò i te vähi tä rätou i vaiiho ia na ra. »  E haapäpüraa teie, ua tiàfaahou Ietu mai te pohe mai. E teie te Fatu e tiaì mai ra i ta na mau pipi i Tarirea no te tahi haamataraa òhipa âpï. 

 

Te mea rä e tano e parau, te riro nei ia teie mau vahine ei ìte no te tiàfaahouraa. Oia hoì, ei ìte no te haamataraa o te tahi tau âpï e no te ora âpï ta te Atua e ìriti nei no tätou. Noa atu rä to rätou iti, i roto rä ia rätou to te Atua tuu-faahou-raa i te huero no te tahi tiaìtururaa âpï, tei riro teie mau vahine ei veà faaìte. Parau mau, e mero paruparu ihoä paha te vahine i tä tätou hiòraa, ua maìti rä te Atua ia rätou ei veà, e te tïtauraa i te mau pipi ia färii i teie faaìteraa. Mea papü rä, te färii e te färii òre i teie parau, tei Tarirea to te Fatu tiaìraa mai i ta na mau pipi. 

 

Tarirea hoì, te vähi ia i haamata ai to rätou parau e te vähi atoà hoì i tïtauhia ai rätou e Ietu ei pipi, e ei hoa rave òhipa nö na. Te auraa, e hoì i te vähi haamataraa, ia märamarama rätou i te mau parau tä te Fatu i haapii na ia rätou. Oia hoì, e hoì i roto i to rätou Mëharo, te vähi e òre e moè ai te mau mea atoà ta rätou i Hiòhiò e i Tütonu mäite, e ta rätou hoì i tuu i roto i te Manaò no te mau òhipa tä te Fatu i haapii ia rätou. Teie hoìraa no te mau pipi i Tarirea, no te tii atoà ia i te püai âpï no teie haereraa âpï i roto i te tau âpï o te òhipa e tiaì mai ra ia rätou, oia te täviniraa i te nünaa o te Atua. 

 

Parau mau atoà rä, te täviniraa i te Atua, eere ia no te arataì i te nünaa i roto i te menema, aore ia i roto i te tahi âfata, ôpanipani atu ai ia na i roto. E arataì rä ia na i räpae, mai roto mai i to na mau pohe e rave rahi e to na pohe vareà taòto, no te tià faahou rä, e ia ora i te tiàmäraa ta te Atua i faaherehere no te taata.  

 

No reira, te tiàfaahouraa o te Fatu, e tiàfaahouraa ia no te faaroo o te taata tei tiàturi i te Atua ei ora nö na. Oia hoì, ei faatiàraa i te mau òhipa maitaì ia itoito e ia àma faahou te faaroo o te taata. Te auraa,  faatià faahou i te faaroo o te taata i te Atua ra, te tumu hoê roa o to na parau. 

 

Aita atu ia e räveà e hitihia ai tätou e te hihi o te märamarama o tei tiàfaahou, ia ìriti e ia türaì i te mau ôfaì tä tätou i tuu mai i te ûputa o to tätou âau. E ìriti atoà i te mau ôfaì e täumiumi tuätau noa nei i te turaraa o te nünaa o te Atua. E ara ia tätou te mau faatere, i te arataì tätou i te nünaa i te tahi vähi ê, aita te Atua i reira i te tiaìraa mai. Òi parau atoà mai te veà a te Atua ia tätou e : « Aore o ia i ô nei.. ».

 

A faaitoito anaè ia, no te mea, o tätou ta te Atua i mäìti e tä na i faaàito / faatoa no te faatià faahou i to na hinaaro i te fenua nei. Të nä ô ra te parau a Pauro ia Tïmöteo e : « e òre tei haere i te tamaì ra e haafifi ia na iho i te peu rii o teie nei ao, ia haamäuruuru o ia i tei mäìti ia na ei àito ». E te poroì atoà mai ra te Arii Nui e : « … tei ia òe ra te pohe e te ora o te taata ». Ia maitaì tätou i teie mahana faatiàraa i te faaroo o te taata. Ia ora na. 

 

                                             Terahimonoarii vahine a HATITIO, òrometua 

Märeto 11.1-10 Fänauraa te ôpü Atua.

 

Tāpati 24 no Pipiri/Mäti 2024.

Ôroà no te mau ÂMAA

Fänauraa te ôpü Atua.

 

Mau taiòraa.

Taramo 22

1 Na te Mënätehe, i nià i te Àireta Tahara. Taramo na Tävita.

2 E ta ù Atua, e ta ù Atua, e aha òe i faaruè mai ai ia ù? E aha òe i faaätea ê atu ai i te tauturu ia ù nei? E te haapaò òre mai i to ù nei ûuru?

3 E ta ù Atua, te tiàoro nei au i te ao, aita rä òe i parau mai; e te ruì hoì, aita rä o ù e mäpuhiraa aho.

4 Òe rä Tei Moà ra, e tei pärahi i roto i te haamaitaìraa o Ìteraèra.

5 I tiàturi na to mätou hui-metua ia òe, ua tiàturi rätou, e ua faaorahia rätou e òe;

6 ua tiàoro rätou ia òe, e ua faaorahia; i tiàturi na ia òe, e aore i mäheahea.

7 E toè rä vau nei, eere i te taata, e faaìnoraa na te taata, e ta te taata ia tähitohitoraa.

8 Te feiä atoà e hiò mai ia ù nei, te àta tähitohito mai ra ia ù; ua fäita i te ùtu, e ua ueue rätou i te upoo.

9 Te na ô mai ra rätou: «Oia nei, te tiàturi nei ia i te Fatu, ia faaora o ia ia na; tii mai o ia e haru ia na. Inaha, e here hoì o ia na na.»

10 Na òe au i rave mai mai roto i te ôpü, o to ù ia tiàturiraa, a òte ai i te ü o ta ù metua vahine ra.

11 Ua tuuhia atu vau ia òe mai ta ù fänauraa mai ä; o ta ù Atua hoì òe mai te ôpü mai ä o ta ù metua vahine.

12 Eiaha e faaätea ê atu ia ù, ia fätata mai te àti ra; e aita atu e tauturu ia tauturu mai

13 E rave rahi te puaatoro e haaàti mai ia ù nei; te mau puaatoro àito o Pätäna teie e haaàti mai ia ù nei.

14 Te hämama mai ra to rätou mau vaha ia ù, mai te riona ûuru ra ia ìmi i te mäa.

15 Mai te päpe e niniihia ra vau, e ua paruparu ta ù mau ivi; mai te täpau nei ta ù âau, ua tärapape i roto i ta ù ôpü nei.

16 Ua marö to ù püai mai te àraea a te pötera ra; ua piri ta ù arero i ta ù taa; e ua tuu òe ia ù i raro i te repo pohe ra.

17 Ua haaàtihia vau e te ùrï ra; ua haapunihia vau i te âmuiraa taata ìno ra; ua puta o ù puè rima e o ù puè âvae ia rätou.

18 E taiò noa vau i o ù mau ivi. Te hiò mai ra rätou, te tiàtonu mai ra ia ù,

19 ua tufa rätou i ta ù mau àhu ra no rätou, e te haa-maìri-terero nei i ta ù pereue.

20 Eiaha òe, e te Fatu, e faaätea ê atu ia ù nei; e ta ù püai, ia peepee mai òe i te tauturu mai ia ù.

21 E faaora òe ia ù i te òè nei, eiaha vau ia riro i te püai o te ùrï.

22 Ia ora vau i te vaha o te riona, ua faaora hoì òe ia ù i te tara o te reema ra, Ua pähono mai òe ia ù:

23 E faaìte au i to iòa i to ù ra mau taeaè; èi rotopü i te âmuiraa ra e haamaitaì atu ai au ia òe:

24«O òutou o tei mataù i te Fatu ra, e haamaitaì òutou ia na. Òutou atoà te huaai o Iatöpa, o ia ta òutou e faahanahana. O òutou atoà te huaai o Ìteraèra ra, e mataù òutou ia na.

25 aore hoì o ia i vahavaha, aore hoì i faaìno i te àti o te feiä i àti ra; e aore hoì i huna i to na mata ia na, ia tiàoro rä o ia ra, ua faaroo mai ra o ia ia na

26 O òe ta ù e haamaitaì i roto i te âmuiraa rahi ra. E rave au i ta ù i èuhe ra, i te aro o te feiä e mataù ia na ra.

27 E àmu te feiä haèhaa e ia paìa. O tei ìmi i te Fatu ra e haamaitaì rätou ia na, e vai ä te ànaanaea o to rätou âau.

28 To te fenua nei e tae noa atu i te hopeà ra, e riro ia i te manaò e ua färiu mai i te Fatu. E hope te mau fëtii a te ao nei i te haamori i mua ia òe.

29 No te Fatu hoì te Pätireia, e o ia te tävana i te mau fenua atoà.

30 E àmu te feiä taoà o te fenua nei, e e haamori; e te feiä atoà e tae i raro i te repo, e piò ia i mua ia na, e e òre e tià i te hoê ia faaora ia na iho ra.

31 Na te tahi pae huaai e faaroo ia na, e e parauhia ia èi taata no te Fatu:

32 e haere mai hoì rätou e faaìte i ta na ra parau-tià i te tahi mau taata èè ra ia fänau mai, na na hoì teie i rave.

Ìtaia 50.4-7

4 Ua höroà mai te Fatu ra o te Fatu ia ù i te arero o te feiä ìte, ia haru mai i parau atu i te parau au i tei rohirohi ra. Te faaära nei o ia i tërä poìpoì, i te poìpoì, te faaära nei o ia i ta ù tärià, ia haapaò vau mai te taata e haapii ra.

5 Ua haafätata te Fatu ra o te Fatu i ta ù tärià, e aore hoì au i pätoì atu; aore hoì au i ôraì tià i muri.

6 Ua tuu noa atu vau i ta ù tua i te feiä i täìri mai; e ta ù päpärià i te feiä i hühuti i te ùmiùmi; aore hoì au i huna ê atu i te vahavaha e te tufatufa haere.

7 E tauturu mai ä te Fatu ra o te Fatu ia ù; i òre ai au i haamä ai; i haamau ai au i ta ù mata mai te ôfaì ra; ua ìte hoì au, e òre au e haamä.

Firipi 2.6-11

6 O te huru ia o ia no te Atua, e aore o ia i parau e haru töroà ia fäito atoà o ia i te Atua.

7 Haapae atu ra rä i to na iho, rave atu ra i to te tävini ra huru, i te fänauraa mai mä te huru o te taata nei.

8 E no te mea o ia i ìteä mai te taata nei i te huru, ua faahaèhaa o ia ia na iho, i te haapaò-mäite-raa e tae noa atu ra i te pohe, i te pohe tätauro ra.

9 I faateitei roa atu ai te Atua ia na, e ua horoà hoì i te iòa i hau ê roa i te mau iòa atoà nei no na;

10 ia tuu te mau turi atoà i raro, to te raì, to nià i te fenua e to raro aè i te fenua, i te iòa o Ietu ra;

11 e ia fäì te mau vaha atoà, e o Ietu Metia te Fatu, e hanahana atu te Atua Metua ra.  

Märeto 11.1-10

Te tomoraa Ietu i roto ia Ierutarëma

(Mät 21,1-11; Ruta èv 19,28-40; Ioane 12,12-19)

1 E fätata mai ra Ierutarëma ia rätou, tae atu ra i Petefäte e Pëtänia i te mouà ra i Òriveta, ua tono aè ra o ia i e toopiti puè pipi a na ra,

2 nä ô atu ra ia räua: «A haere na òrua i tërä aè ra ôire ïti, e ia tomo òrua i roto ra, e ìte òrua i te hoê pinia âtini, ua fëtiihia, aore ä i pärahihia e te taata; e tätara e pütö mai i ô nei.

3 E ia parau noa mai te hoê taata ia òrua: «E aha òrua i rave ai?», e parau atu: «No te Fatu teie e tià ai, e na na ia e tuu noa mai i reira ra».

4 Haere atu ra räua e ìte atu ra i taua pinia âtini ra, te fëtiihia ra i räpaeàu mai i te pae ùputa, i te tiàatiraa i nä èà tià e piti ra, ua tätara iho ra räua.

5 Ua nä ô mai ra te hoê pae o te feiä i tià noa i pïhaì iho ra: «E aha òrua e tätara ai i tënä na pinia?

6 Ua parau atu ra räua ia rätou i ta Ietu i parau mai ia räua ra; ua tuu noa mai ra rätou ia räua ia rave noa na. 7 Ua pütö mai ra räua i taua pinia ra ia Ietu ra, tuu atu ra i to räua àhu i nià iho, pärahi iho ra o ia i nià iho.

8 E e rave rahi tei hohora i to rätou àhu i te èà tià; ôoti atu ra hoì e tahi pae i te âmaa rii räau, vauvau atu ra i te äratià.

9 E ua ûmere iho ra te feiä i haere nä mua e tei pee mai i muri iho, nä ô aè ra: «Hötana Ia ora o ia tei haere mai mä te iòa o te Fatu.

10 Ia maitaì te pätireia o to tätou metua ra o Tävita e fätata mai nei mä te iòa o te Fatu ra Hötana i te raì teitei ra.

Mau ìrava turu.

E faufaa mau teie e vai nei i roto i te mau taiòraa i faataahia no teie mahana te faahithia nei te parau, no te hoê perofeta-arii. Te faaìte nei teie mau parau mai te pehepehe ra te huru i te mauiui e te òto o te Arii. Teie te tahi mau manaò faufaa o teie huru parauraa, te haamoriraa e te tiàturiraa, e haamata teie mau manaò na roto i te hoê uiraa hohonu, i teie parauraa e e ta ù Atua, e ta ù Atua, e aha oe i faaruè mai ai ia ù ? I muri noa iho, ua haapäpü i to na tiàturiraa i te Atua : E mea moà òutou, o òutou o te pärahi i te ârueraa i te nünaa paieti nei. Te faaìte ra teie mau parau e, noa atu te mau taime fifi, tei reira te Atua e te faaroo nei o Ia i te mau pure a te feiä tei tiàturi ia na e tei ìmi tämau i te faatupuraa i te ora, no te ora. E manaò te taata manaò e ua faaruèhia oia e aita e tiàturiraa, te faaìte ra te perofeta-arii i to na huru mai teie te huru, te feia atoà e ìte mai ia ù, e àta mai rätou ia ù, e ueue rätou i to rätou upoo. Teie rä, te tïtau ra o ia i te òhipa a te Atua, A ara mai na E aha òe i taòto ai, e te Fatu noa atu te mau huru oraraa pöuri, te vai nei te hoê poroì no te tiàturiraa, Tei pïhaì iho òutou ia ù ; e faaora òe ia ù ; E faateitei òe i to ù hanahana. E parau teie no te faatupu i te àanoraa i te pae värua, e poroì tiàturiraa i te feia faaroo. Te faaìte ra te reira i te marämarama i te Atua i to tätou mauiui e to tätou hepohepo. Te vai ra te tumu parau o teie tïtauraa na te ao atoà nei, te täaihonoraa i rotopü i te Atua e te huitaata, te tiàturiraa i to Na vairaa mai i roto atoà i te mau tau pöuri roa. Te faahaamanaò mai ra teie parau ia tätou e tei reira noa te Atua, ua ineine o ia i te tauturu ia tätou i roto i to tätou mau tämataraa. I reira noa te òto e te upootiàraa, e haamata ai i te tupu na roto i te pii puai e, E ta ù Atua, e ta ù Atua, e aha òe i faaruè mai ai ia ù, mai te himene ia tärava ia òto, e ia faahoì no te haamäraa faahou. Te faaite ra te reira i te hohonuraa o te hepohepo, e riro atoà rä te reira èi faaìteraa i te upootiàraa hopeà o te perofeta-arii. E parau ûàna teie i roto i te mau maru metia, i te faahitiraa ra teie mau parau i te mau àroraa e te mau manaò hohonu o te faataa-ê-raa ia na i te Atua. Ua täai-atoà-hia te reira i nià i  to Ietu parau i nià i te tätauro, o te höroà i te auraa hohonu i te parau i te mau maru metia. Naò  ia tätou i te parauraa e te haamäramarama ra te tätararaa o teie mau parau i te mauiui i faaruèhia ta te mau parau e faaìte nei ia ìte, o tei riro èi faaìteraa no nià i te faaoraraa e te ârueraa a te Atua. Te haapäpü ra te perofeta-arii i te huru o te feiä e faaruru ra i te hoê ä mau àti.  Te haamanaò noa mai ra teie mau tïtauraa i te mau taime hepohepo atoà, te vai noa ra te haapaò maitaì o te Atua. Mea maitaì atoà ia hiòhia i te faaìteraa a Ìtaia i te pene 50 i te mau ìrava 5 e tae i te 7,  ua tätara-pinepine-hia èi tuhaa no te mau himene a te tävini i roto i te puta a Ìtaia. Teie te mau manaò faufaa o teie ìrava, te tiàraa pipi te faaìte nei te tävini e mea nahea to te Fatu höroàraa ia na i te hoê arero päpü no te päturu i te feiä tei rohirohi. Ua haamata te Atua i te hämani faahou i te tärià o te tävini hou a ìriti ai i te ùputa o te tärià o te tävini, o tei òre i pätoì e aore rä, i faaruè i te mau tämataraa, ua faaruru te tävini i te haavïraa ûàna, mai te täparahiraa taata e te parau ìno, ma te huna òre aore rä ma te paruru òre ia na iho. Te tiàturiraa i te Atua, noa atu te mauiui, te rohirohi e tiàturi te tävini i te Fatu no te ani i te haapäpüraa e te tautururaa. Te haamataraa ra o teie mau parau i te haapaò maitaì e te itoito o te tävini i mua i te àti, a täpeà noa ai i te tiàturiraa i te Atua. Pinepine te mau maru metia i te tätara i teie mau parau èi töhuraa i te mauiui e te täviniraa a te Metia, o Ietu te Metia. Teie te huru no te faaòhiparaa i teie parau. I te taa-ê-raa i te hinaaro o te Metia, Te ìte nei te mau maru metia i roto i te faataaraa o te tävini e mauiui ra i te hoê faahohoàraa o te mau mauiui o Ietu i te roaraa o to na mau hepohepo rahi. Teie te tahi hiòraa no te faaroo e te tämau-maite-raa, ua riro teie mau parau èi hiòraa no te mau maru metia e nafea ia faaruru i te àti e te mauiui ma te faaroo e te tiàturi i te Atua. E faauru te feiä faaroo ia färii i te mau tämataraa o te oraraa ei mau raveà no te âpiti atu i roto i te mauiui o te Metia e no te faaìte i to rätou faaroo. Te Haapiiraa e te Tämahanahanaraa, Te faaòhipa nei te mau òrometua i teie mau parau no te haapii i te auraa o te mauiui i roto i te oraraa maru metia e no te tämahanahana i te feiä i roto i te tämataraa. Te haamanaò mai ra te reira e, i te mau tävini, e tïtauhia te mau maru metia ia riro èi pipi o te faaroo e o te haapii no ô mai i te Atua ra, i roto atoà i te mau taime fifi. Te mau manaò e te mau feruriraa, E taiò-pinepine-hia teie mau parau i roto i te hepetoma moà, i te pö Mahana Toru Moà ihoä rä, no te fëruri hohonu i nià i te mauiui e te haapaò o te Metia. E faaòhipa-atoà-hia te reira i roto i ta tätou iho pure e te fëruri-hohonu-raa èi raveà no te haafatata ia tätou i te pae varua i te ìteraa i te Metia. Te mau maru metia èi tumu no te fëruri-hohonu-raa i nià i te mauiui e te täviniraa, èi faahohoàraa i te oraraa e te òhipa a Iesu Metia.

-Taramo 22, 11 Ua tuuhia atu vau ia òe mai ta ù fänauraa mai ä; o ta ù Atua hoì òe mai te ôpü mai ä o ta ù metua vahine.

-Ìtaia 50, 6 Ua tuu noa atu vau i ta ù tua i te feiä i täìri mai; e ta ù päpärià i te feiä i hühuti i te ùmiùmi; aore hoì au i huna ê atu i te vahavaha e te tufatufa haere.

-Firipi 2, 10 ia tuu te mau turi atoà i raro, to te raì, to nià i te fenua e to raro aè i te fenua, i te iòa o Ietu ra;

-Märeto 11, 9 E ua ûmere iho ra te feiä i haere nä mua e tei pee mai i muri iho, nä ô aè ra: «Hötana Ia ora o ia tei haere mai mä te iòa o te Fatu.

Te auraa e täpaò teie Täpati no te âmaa tämara, te raau haari i te tomoraa o Ietu Metia i Ierutarëma, i reira o ia e haapöpouhia ai e te hoê nahoà taata e tärape ra i te mau âmaa tämara e e tuu ai i te mau àhu a haere noa ai o ia. Te faatiàhia ra teie àamu i roto i na Evaneria moà e maha. Te haamanaò atoà ra te reira i te Hinaaro o te Metia, to na poheraa i nià i te tätauro, e to na täpeàraahia i roto i te fare. No reira o ia i parau-atoà-hia ai e, te faahanahanaraa i te Täpati e te pohe, e te tiàfaahouraa o te Metia. I roto i te peu tumu Âti Iuta, e faatupu te mau àmaa tämara e te taò ra Hötana i te ôroà ôotiraa, i te faahitiraa èi reo Hepera Sukkot, tei faahitihia i roto i te Revitito. Te faaìte mai ra te mau Èvaneria e na mua ïti noa aè i te ôroà Pata, ua faaoti o Ietu e tomo i Ierutarëma ma te hanahana. E na te ùputa mouà o Ietu i te tomo o ia i nià i te hoê mouà haehaa hoê fanauà e e faaìte o ia i mua i te taata ia na iho mai te Metia e tiaìhia ra e te mau âti Iuta. E aroha te nahoà ia na na roto i te tähirihiriraa i te mau âmaa i täpühia i nià i te mau tumu raau aore ra te mau âmaa raau. Te faahanahanaraa e topa te Täpati e hitu mahana na mua aè i te Täpati Pata e e 39 mahana i muri aè i te Mahana Toru. E haere te feiä haapaò maitaì i te mau ôroà rarahi e e âpiti atu rätou i roto i te mau haereraa moà e te raau, te mau âmaa òrive aore ra tärona. I te tahi mau vahi, e parau-atoà-hia te reira e, te Täpati e aore rä, te Täpati Pata. E täpaò te Täpati no te mau âmaa Tamara i te tomoraa o Ietu i roto i te upootiàraa i Ierutarëma e te haamataraa o te Hepetoma Moà, o te hope i te Täpati Pata. Te mau täpaò i faaòhipahia te mau âmaa òrive aore ra te tärona i roto i te mau ôroà. Te faataipe ra te reira i te färii-popou-raa òaòa o Ietu i Ierutarëma e te faahaamanaò ra te reira i te ôroà ôotiraa âti Iuta, oia hoì te Sukkot. Te auraa o te taò ra Hötana, tuöhia e te nahoà taata a tomo mai ai Ietu, oia hoì, Faaora, te täparu atu nei au ia oe na roto i te reo Hepera. Ua riro teie mahana èi taime no te fëruri i nià i te oraraa, te poheraa e te tià-faahou-raa o Ietu, e na te reira e ìriti i te èà e tae atu ai i te Metua ra. Te faahitiraa ia a Pauro i to Firipi i te pene 2 i te mau ìrava 6 e tae i te ìrava 11 o te hoê ia päpaìraa tumu i roto i te Faaäuraa Âpï o te parau no te haehaa e te faateiteiraahia o Ietu Metia. Teie te poroì mätamua e nehenehe e ìtehia  i roto i teie mau päpaìraa a Pauro. Te haehaa o te Metia Noa atu to na huru Atua, aita o Ietu i hiò i to na àifaitoraa e te Atua mai te hoê mea e tià ia faaòhipahia no to na iho maitaì. Ua haapae rä o ia ia na iho, ma te rave i te huru o te hoê tävini e ma te riro mai te taata ra te huru. Te Haapaò e te Tutia, ua faahaèhaa o Ietu ia Na iho e ua haapaò e tae noa atu i te pohe, eiaha noa i te pohe, i te pohe atoà rä i nià i te tätauro. Ua riro teie òhipa haèhaa e te auraro èi tumu no te faaroo maru metia e ua riro te reira èi tutia hopeà no te faaoraraa i te nünaa o te Atua. Te faateiteiraa o te Atua, no te pähono  i to na haehaa e to na tutia, ua faateitei te Atua ia Ietu i te vahi teitei roa aè e ua häroà ia na i te iòa tei hau i te mau iòa atoà. E no reira, i te iòa o Ietu, e fati ai te mau turi atoà i raro, i te raì, i nià i te fenua, e i raro aè i te fenua nei, e e fäì ai te mau arero atoà e, o Ietu Metia te Fatu, èi faahanahanaraa i te Atua te Metua. E faaòhipa-pinepine-hia teie mau parau no te haapii i te faufaaraa o te haehaa e te täviniraa i roto i te oraraa Teretetiano, ma te pee i te hiòraa o te haereà o Ietu. E faahaamanaòraa e puai atoà te reira no te tiàturiraa Teretetiano i te hanahana o Ietu e i ta Na òhipa èi Faaora. Ua päpaì te âpotetoro o Pauro no nià i te haehaa o te Metia ia au te faaìteraa i to  Firipi i te pene 2 i te mau ìrava 6 e tae i te 11 no te tahi mau tumu faufaa i te hiòraa no te oraraa maru metia. Ua faaitoito o Pauro i te mau maru metia no Firipi ia pee i te hoê ä huru e to Ietu, o tei mäìti, noa atu to na huru atua, ia faahaèhaa ia na iho e ia tävini ia vëtahi ê. Ua hinaaro o ia ia ora te feiä faaroo ma te here e te haehaa, ma te pee i te hiòraa o te Metia. Te niu i teie no te faaroo, te haamau nei teie mau parau i te hoê niu päpü no te faaroo no nià i te huru e te òhipa a te Metia, ma te haapäpü i to Na huru atua e to Na riroraa èi tävini. Te haapäpü nei o Pauro e, ua riro te haèhaa o te Metia èi tumu no te parau poroì no te èvaneria e no te faaoraraa. Te tumu teie no te Hoêraa o te Ètärëtia Ua ìte maitaì o Pauro i te mau fifi e te mau âmahamaharaa i roto i te püpü maru metia i Firipi. Na roto i te haapäpüraa i te haèhaa o te Metia, ua ìmi o ia i te faatupu i te hoêraa e te au-maitai-raa i rotopü i te feia faaroo. Èi pähonoraa i te höroà maitaì i te rata i to Firipi, o te pähonoraa atoà ia Pauro i te tauturu pae moni ta na i färii no ô mai i te ètärëtia i Firipi. Ma te haapäpü i te haèhaa o te Metia, te haamauruüru ra Pauro i to Firipi no to rätou âau höroà maitaì, o te faaìte i te huru o te Metia. Ua päpaì o Pauro no nià i te haèhaa o te Metia no te haapii e no te faaitoito i te mau maru metia ia ora ia au i te mau parau tumu o te èvaneria, ma te haapäpü i te aroha i te here, te täviniraa e te hoêraa.

Te faaite nei te Märeto i te pene 11 i te mau ìrava 1 e tae i te ìrava 10 i te tomoraa hanahana o Ietu i Ierutarëma i nià i te hoê fanauà âtini, o te faatupu i te parau tohu a Tetaria i te pene 9 i te ìrava 9. Te faataipe nei teie òhipa i to na taeraa mai èi arii haèhaa e te hau, taa ê atu i te mau tïtauraa a te hoê àito e te hoê arii upootià i te tämaì. Ua färii poupou te nahoà taata ia Ietu ma te raau haari, àmaa tämara e te òaòa, ma te ìte i roto ia na te Faaora i tohuhia ra, o te haere mai ma te iòa o te Fatu. E täpaò teie òhipa i te haamataraa o te Ao Moà a te Metia, o tei ärataì i te mau òhipa i tupu i te faatätauroraahia e te tià-faahou-raa o Ietu, no te Ora Mure Òre. Te parau o tei haere mai na roto i te iòa o te Fatu o te hoê ia fäìraa i te mana moà e te tiàraa Metia o Ietu. I roto i te mau parau i faahitihia, te auraa ia e haere mai Ietu ma te mana e te haamaitaìraa a te Atua. E tïtauraa farii-poupou-hia teie no te hoê arii e aore rä, no te hoê metia, tei ìtehia mai te au i te tonoraa a te Atua no te haapaò i to Na hinaaro. Ua täai-pinepine-hia teie mau ìrava i to Ietu tomoraa atu i Ierutarëma, i reira oia e färii-popou-hia ai èi arii Metia, èi arii Tävini, èi arii Perofeta, te huaai o Tavita, o te haere mai ma te hau no te faaora e no te faatere i te nuu Atua. No roto mai te parau ra Hötana i te taò Hepera ra "hoshiya na ", oia hoì, " Faaora, a oaoa " E pii ia te reira no te ahoaho i te Atua. I te roaraa o te tau, ua täui to na auraa ei tïaìraa e èi òaòaraa, èi faaìteraa i te faaoraraa tei tae mai e aore rä, tei fatata roa i te tupu. I roto i te parau no te tomoraa o Ietu i Ierutarëma, ua riro mai te Hötana èi faahanahanaraa i te taeraa mai o te Metia, te Tamaiti a Tavita, èi taata o te hopoi mai i te faaoraraa. No reira, ua riro te Hötana i roto i te Ao Teitei ei ârueraa no te faaoraraa hanahana, e tae noa atu i te ani-manihini-raa i te mau merahi ia âmui mai i roto i teie faahanahanaraa.

 

Pehepehe

Âmaa Räau.

I roto i te monamona o te hoê puè tau faatupuraa raau,

E ruru te mau âmaa raau i raro aè i te mahana.

Amohia e te rima o te mau tamarii, te mau tane, te mau vahine,

Te faaìte ra te reira i te mau täpaò o te hau e te tähiri i roto i te reva.

 

Hötana E himene anei rätou, i roto i te püpü himene puai,

Te maraa märu noa ra te mau mäfatu, te mahanahana märu noa ra te mau värua.

Te mau poìpoì nehenehe, te mau täpaò no te tiàturiraa e te upootiàraa,

Te faatià ra i te àamu o te hoê arii, no nià i te hoê tomoraa i roto i te hanahana.

 

Fafauraa fafauraa no te faaâpïraa mure ore,

Ua riro te rauère tätaìtahi èi pure, èi piiraa.

Ia Na o te haere mai, ma te haèhaa i to na haereà,

Te òha ra te mau àmaa, ma te faahanahana i te Atua.

 

I roto i te haereraa moà, e tupu mai te hoê ôhumu,

Mai te mataì e puhi ra i te parau âpï o te moemoeä.

Te feiä e färii nei, a faaìte mai.

Te parau nei te Arii no te Hau, na roto i to na iòa

 

Hötana i te vahi teitei roa aè.

Te mau àmaa raau, i teie mahana faufaa rahi,

E mau ìte àueue òre anei no te faaroo e tiàturi nei,

Te here o te faaora, o te marämarama ia o te Rama.

 

Teraì òr. Faatura.