Ioane 6.51-58 Te pane ora

 

Tāpati 18 no Muriaha/Âtete 2024.

Te pane ora

Mau taiòraa.

Taramo 34

1 E Taramo na Tävita i to na faahuru-ê-raa ia na iho i mua ia Âpïmereta, o tei tiàvaru atu ia na, e ua haere atu ra o ia.

2 E haamaitaì ä vau i te Fatu e òre e faaea. Ia vai tämau mäite ä te haamaitaì ia na i roto i to ù nei vaha.

3 E ârue ta ù âau i te Fatu. Ia ìte mai tei pohe ra i te reira a òaòa atoà ai

4 E haamaitaì tätou i te Fatu, tätou atoà të faateitei i to na iòa.

5 Ua ìmi au i te Fatu, e ua parau mai ra o ia ia ù; e ua faaora ia ù i te mau mea ta ù i mataù ra.

6 Ua hiò atu rätou ia na, e ua haamäramaramahia mai; e aore to rätou mau mata i haamä.

7 Ua pii atu ra taua taata i pohe nei, e ua faaroo mai ra te Fatu; e ua faaora atu ra ia na i to na atoà ra mau àti.

8 Te pätia nei te merahi a te Fatu i te pühapa e àti noa aè i te feiä i mataù ia na, e ua faaora ia rätou.

9 A tämata na ia ìte i te maitaì o te Fatu. E ao to te taata i tiàturi ia na ra.

10 A mataù i te Fatu, òutou te feiä moà no na ra. Aore hoì e èreraa to te feiä i mataù ia na ra.

11 Ua ère te mau riona âpï i te mäa, e te pohe ra i te poìa; âreà tei ìmi i te Fatu ra, e òre roa e ère i te maitaì.

12 A haere mai na, e te mau tamarii na, e faaroo mai ia ù; e haapii au ia òutou ia mataù i te Fatu.

13 O vai ia taata i hinaaro i te ora, tei hinaaro ia ìte i te maitaì i to na puè mahana i te ao nei?

14 A täpeà i to arero i te ìno, e to vaha eiaha ia parau i te parau haavare.

15 E haapae i te ìno, e rave i te maitaì, e ìmi i te hau, e aruaru atu.

16 Tei te feiä parau-tià ra to te Fatu mata, e tei ta rätou pure to na tarià.

17 E mata ê rä to te Fatu i te feiä i rave i te ìno ra, e ia òre roa ia manaòhia i te ao nei.

18 Te tiàoro nei te feiä parau-tià e te faaroo mai ra te Fatu, e te faaora nei o ia ia rätou i to rätou mau àti atoà ra.

19 Te fätata nei te Fatu i te feiä âau paruparu ra, e te faaora nei o ia i te taata âau taiä.

20 E àti rahi to te taata parau-tià ra; e faaorahia rä o ia e te Fatu i taua mau àti atoà ra.

21 Na te Fatu e tiaì i to na ra mau ivi, e òre roa te hoê e ôfatihia.

22 E pohe te paieti-òre i te ìno; e tei riri i te feiä parau-tià ra, e mou ia.

23 E faaora te Fatu i te värua o to na ra mau tävini; e òre hoì te hoê e tiàturi ia na ra e faaruèhia.

Mäteri 9.1-6

Tïtauraa a te Vahine Paari

1 Ua faatià te paari i to na fare: e ua tarai hoì o ia i nä pou nehenehe e hitu nö na ra.

2 Ua pätia o ia i ta na mau puaa e ua ânoìhia ta na uaina; e ua faanahonaho o ia i ta na àmuraa.

3 Te tono nei i ta na mau vahine èi arataì mai i te mau taata; e te pii nei i te mau vähi teitei o te ôire.

4 O tei òre e ìte ra, e färiu mai o ia i ô nei; e te feiä maua ra, te parau atu ra o ia,

5 E haere mai e àmu i ta ù nei mäa, e inu hoì i te uaina ânoìhia e au ra.

6 E faaruè i te maamaa, ia ora; e nä te èà haapaò maitaì i te haere.

Èfetia 5.15-20

15 E tënä na, e ara ia tià to òutou haereà, eiaha mai ta te ìte òre ra, mai ta te feiä ìte rä,

16 mä te faaherehere mäite i te taime, no te mea e ànotau ìno teie.

17 E eiaha to òutou ei manaò òre, ia ìte rä òutou i to te Fatu ra hinaaro.

18 E eiaha ia taèro i te uaina e tupu ai te taiàta ra, ia î rä òutou i te Värua,

19 e te paraparauraa te tahi i te tahi i te taramo, e te himene, e te tire a te Värua ra, i te himeneraa mä te au o te âau i te Fatu ra;

20 i te haamaitaìraa i to tätou Metua ra i te Atua i te mau mea atoà nei mä te faaea òre, i te iòa o to tätou Fatu ra o Ietu Metia;

Ioane 6.51-58

51 O vau te päne ora o tei pou mai mai te raì. O të àmu i teie nei päne, e tià ia i te oraraa. O ta ù päne e horoà atu o to ù ia tino, o ta ù ia e horoà ei ora no to te ao.

52 Ua märo anaè iho ra te âti-Iüta rätou rätou iho, ua nä ô aè ra: «E aha teie taata e tià ai ia horoà mai i to na tino e àmu?

53 Ua parau mai ra Ietu ia rätou: «Âmene, âmene, e parau atu vau ia òutou: ia òre òutou ia àmu i te tino o te Tamaiti a te taata nei, e ia òre hoì ia inu i to na toto, aore ia e ora i roto ia òutou.

54 O të àmu i to ù tino e të inu i to ù toto, e ora-mure-òre to na, e na ù o ia e faatiàfaahou ia tae i te mahana hopeà ra.

55 E mäa mau to ù tino e e inu mau to ù toto.

56 O të àmu i to ù tino e të inu i to ù toto, e tià ia i te àtiraa mai ia ù, e e tià hoì au i te àtiraa atu ia na.

57 Mai te Metua hoì e ora ra, o tei tono mai ia ù nei ra, e te ora nei hoì au i te Metua; oia atoà të àmu ia ù nei, e ora ia ia ù.

58 O te päne teie no te raì mai: e e ère mai te mäna i àmuhia e to òutou hui-metua ra, pohe atu ra hoì rätou. O të àmu i teie päne, e tià ia i te ora-mure-òre ra.

Heuraa Manaò.

Taramo 34, 16 Tei te feiä parau-tià ra to te Fatu mata, e tei ta rätou pure to na tarià.

O Davida te tumu o teie  Taramo 34 e e taramo no te tiàturiraa e no te ârueraa. Teie te hoê mau no te tupuraa teie mau parau èi hiò âmuiraa no teie taramo :

Te àamu.

Na Tavita i päpaì i teie Taramo 34 i te hoê tau ahoaho rahi. Ia au i te upoo parau o te taramo, te faahiti ra te reira i te hoê tupuraa i reira to Tavita faahua maamaaraa i mua ia Iehorama aore ra ia Atite, arii no Tata, no te âpe i te haruraa. Ua päpaìhia teie òhipa i roto i te Tämuera 1 i te pene 21i te mau ìrava 10 e tae i te ìrava 15.

Te huru faanahoraa e te huru faaneheneheraa.

E püòhu ra te Taramo 34, oia hoi, e haamata te ìrava tätaìtahi na roto i te hoê reta no te piapa Hepera, teie parau-atoà-hia èi reo Mäòhi te mataì e te areo te tahi i muri i te tahi. Te vai atoà ra teie pehepehe i roto i te tahi atu mau taramo, mai te Taramo 25. E tauturu te taata päpaì i te tämau-âau-raa e i te faaìte i te nehenehe o te päpaì.

Te mau tumu parau faufaa : Te ârueraa e te mauruüru: Te faaìte ra o Tavita i to na mauruüru i te Atua no to na faaoraraa ia na i to na mau ènemi.

A tiàturi i te Atua: Te faaitoito ra te taramo i te feiä faaroo ia ìmi i te haapüraa i te Atua e ia tiàturi ia Na i roto i te mau tupuraa atoà.

Tià faatere : Te aò nei o Tavita i te feiä haapaò ia ora i roto i te mätaù i te Fatu e ia haapae i te ìno.

Parau poroì : Te poroì tumu a te Taramo 34, oia hoì, e faaroo i te Atua i te mau tiàororaa a to na haapaò maitaì e e faaora o Ia ia tätou i to tätou mau ahoaho. Te ani manihini nei o Ia i te feiä faaroo ia tamata e ia hiò i te maitaì o te Fatu, e ia ìmi i te haapüraa i roto ia Na i te mau taime fifi.

Òhipa matamehaì : No te feiä faaroo i teie mahana, ua riro te Taramo 34 èi faaitoitoraa e èi tämahanahanaraa. Te faahaamanaò mai nei o ia ia tätou e, noa atu i roto i te mau taime àti rahi, tei pïhaì iho te Atua i te feiä âau òto e e faaora o Ia ia rätou i to rätou mau òto. Mai te peu e e uiraa taa maitaì ta tätou no nià i te tahi mau ìrava aore ra mai te peu e e hinaaro tätou e heru hohonu atu ä i roto i te hoê tuhaa taa-ê, eiaha e haamarirau i te faaite i to òutou manaò, ma te âau hau e te maitaì. E haapohe te pohe i te feiä ìino, e faahapahia te mau ènemi o te feia parau-tià, e faaora rä te Fatu i te ora o ta Na mau tävini atoà, e te feiä e òre roa to rätou haapüraa e faahapahia  ia au i te Taramo 34 i te mau ìrava 22 e te ìrava 23.

E ärataì te mäìtiraa i te ìno i te faaìnoraa o te òre e âpehia. No to na au òre rahi i te maitaì, e ärataì te raveraa i te ìno i te haamouraa o te taata hara. I te tahi aè pae, te taata o te tuu i to na tiàturiraa i nià ia Ietu Metia e o te tütava ra i te ora i te hoê oraraa parau-tià, e ora ia oia. E ìte-atoà-hia teie parau tumu i roto i te Èvaneria, i reira i päpaìhia ai: Te taata e tiàturi ia Ietu, aita ia o ia e faautuàhia, te taata rä aita e faaroo ia Na, ua faahapahia ia o ia no te mea àita o ia i tuu i to na tiàturiraa i nià i te tino o te Tämaïti fänau tahi a te Atua Ioane i te pene 3 ìrava 18.

No reira, teie ia te mäìtiraa tei tuuhia mai i mua i te mau taata atoà i mua ia tätou : ia farii e aore rä, ia pätoì i te Tamaiti fänau tahi a te Atua.

Mäteri 9, 5 E haere mai e àmu i ta ù nei mäa, e inu hoì i te uaina ânoìhia e au ra.

Èi hiòraa.

Ìrava 1: Ua faahohoàhia te paari mai te hoê vahine o tei patu i te hoê fare paari e e hitu pou, o tei faataipe i te tià-roa-raa te fare e tae noa atu i to na oti-roa-raa eo te taatoàraa.

Ìrava 2: Te faaìte ra te faaineineraa i te hoê ôroà e te feiä i täparahihia e te uaina ânoìhia e e püpü mai te paari i te taoà rahi e te taoà faufaa i te faaroo.

Ìrava 3: E tono te paari i ta na mau tävini vahine no te tïtau manihini i te taata, o te faaìte ra i to na hinaaro e tufa i ta na mau haamaitaìraa i te taatoàraa.

Ìrava 4: Te faataehia ra teie tïtau-manihini-raa i te feiä e ère ra i te paari, ma te faaitoito ia rätou ia tomo mai e ia haapiihia.

Ìrava 5: Te àmuraa i te pane e te inuraa i te uaina, e täipe ia no te färiiraa e te faaöraa i te paari i roto i to na oraraa.

Ìrava 6: Te aò ra te ìrava faufaa o teie pene parau i te taata ia faaruè i te maamaa ia ora e ia haere na te èà o te marämarama.

Ìrava faufaa.

Teie te tahi ìrava faufaa, e mea pinepine te ìrava 6 i te hiòhia èi ìrava faufaa : E haere òe na te èà tià, e ora òe, e haere na te èà o te ìte. Te hiòhia nei teie ìrava i te piiraa no te paari ia faaruè i te mau haerea maamaa e ia farii i te hoê oraraa ärataìhia e te marämarama no te marämarama.

Parau poroì.

Te haapäpü ra teie ìrava 6 i te faufaa ia ìmi i te paari e ia faaö i te reira i roto i to tätou oraraa i te mau mahana atoà. Te faaìtehia ra te paari mai te hoê färii manihini höroà maitaì, o tei ineine i te püpü i ta na mau taoà na te feiä o tei ineine i te färii i te reira. Na roto i te färiiraa i teie tïtau-manihini-raa, e ìteä mai i te hoê taata te ora e te marämarama mau. Mea pinepine te paari e te maamaa i te taa-ê i roto i te mau päpaìraa i te faaroo no te faahohoà i te mau haerea e te mau mäìtiraa pätoì. Èi hiòraa, i roto i te Pîpîria, e pinepine te paari i te täaihia i te mataùraa i te Atua, te auraroraa i ta Na mau faaueraa, e te ìmiraa i te parau mau e te parau-tià. I te tahi aè pae, ua täaihia te maamaa i te ìte òre, te faaroo òre, e te täpiraa i te mau hinaaro miimii, mau hinaaro ìino.

Te paari i faahohoàhia: Ua faataahia te paari mai te hoê vahine o tei patu i to na ra fare, o tei faanehenehe i to na na pou e hitu, o tei faaineine i te hoê ôroà, e o tei tono i ta na mau tävini vahine no te tïtau manihini i te taata ia haere mai.

Aniraa : Te parau nei te paari i te feiä òhie e te ite òre ia haere mai i ta na tämaaraa, ma te püpü atu i te maa e te inu na rätou.

Te faaruèraa i te maamaa: Te aò ra o ia i te mau manihini ia haapae i te maamaa e ia haere na nià i te èà o te marämarama. Te haapäpü ra teie ìrava i te faufaa ia ìmi i te paari e ia faaruè i te maamaa no te ora i te hoê oraraa î i te ìte e te marämarama.

Èfetia 5, 19 e te paraparauraa te tahi i te tahi i te taramo, e te himene, e te tire a te Värua ra, i te himeneraa mä te au o te âau i te Fatu ra;

Ua î teie mau ìrava i roto i te Efetia pene 5 i te mau ìrava 15 e tae i te ìrava20 i te mau haapiiraa ôhie no te oraraa Teretetiano. Teie te hoê tätararaa huàhuà no teie mau ìrava:

Efetia pene 5 ìrava 15: E teie nei, e ära ia òutou i to òutou huru oraraa, eiaha ia riro mai te feiä maamaa ra te huru, ia riro rä òutou mai te feiä paari ra te huru.

Poroì: Te aò ra o Pauro i te feiä faaroo ia ora ma te paari e te paari. E faaitoito te reira ia rätou ia fëruri i ta rätou mau òhipa e eiaha èi òhipa ma te fëruri òre.

Efetia pene 5 ìrava 16: A faaruru i te vero, no te mea e mea ìno te mau mahana àti ra.

Poroì: Mea faufaa ia faaòhipa i te taime o te Atua ma te paari, i roto ihoä rä i te hoê ao e te vai ra te ìno. Te auraa ra, e faaòhipa i te mau räveà no te rave i te maitaì e ia haere i mua na roto i te faaroo e te tiàturi i te Atua Nui Tumu Tahi.

Efetia pene 5 ìrava 17 : No reira, eiaha e mätaù, ia ìte rä òutou i te hinaaro o te Fatu.

Poroì: Te haapäpü ra o Pauro i te faufaa ia ìmi i te marämarama i te hinaaro o te Atua i roto i to tätou oraraa, eiaha rä ia ora ma te tumu òre aore ra ma te ärataìraa òre.

Efetia pene 5 ìrava 18: Eiaha ia taèro i te uaina: e faatupu te reira i te taìäta. Ia î na òutou i te Varua.

Parau poroì : Te faaära nei o ia no nià i te taèroraa àva e te mau peu ìno e tupu mai na roto i te reira. E faaitoito rä te reira i te feiä faaroo ia î i te Varua Moà, o te ärataì i te hoê oraraa paieti e te paari.

Efetia pene 5 i na ìrava19 e te ìrava 20: A parau ma te taramo, te mau himene, e te mau himene o te âau, ma te himene e ma te ârue ma to òutou värua atoà i te mau ârueraa ia Iehova i te Atua Nui Tumu Tahi; ia haamaitaì atu òutou ma te tuutuu òre i te mau mea atoà i te Atua te Metua ra, na roto i te iòa o to tätou Fatu o Ietu Metia ra.

Parau poroì : Te faaitoito nei Pauro i te hoê oraraa ârue e te mauruüru. Te faaitoito nei o ia i te feiä faaroo ia faaitoito te tahi i te tahi na roto i te mau himene faaòtohia i te puai o te âau e ia haamauruüru i te Atua i roto i te mau huru tupuraa atoà.

Ei faatumuraa, te tïtau ra teie mau ìrava i te mau Teritetiano ia ora ma te paari, ia faaòhipa i to rätou taime ma te paari, ia ìmi i te hinaaro o te Atua, ia haapae i te mau mea tano òre, e ia ora ma te ârue e te mauruüru. E piiraa ia no te hoê oraraa tei täuihia e te Varua Moà, täpaòhia e te paari e te âau mehara. Te auraa mau no te parau ra faaroa i te taime i te faaìteraa a te rata a Pauro i to Efetia pene 5 ìrava 16 o te faaòhipa-maitaì-raa ia i te taime " aore rä " te faaòhipa-rahi-raa i te mau raveà atoà ". I roto i te pîpîria, te faahiti ra te reira e rave rahi mau mea:

A faaòhipa i te taime ma te paari: Te faaitoito ra Pauro i te feiä faaroo eiaha e haamäuà i to rätou taime, ia faaòhipa rä i te reira ma te paari no te rave i te hinaaro o te Atua, te hinaaro o te Atua ia tätou e na te Metua i tono mai ia Ietu no te faaora i teie nei ao.

Te mau raveà : Te ìteraa e te faaòhiparaa i te mau raveà no te rave i te maitaì, no te faaìte i te èvaneria, e no te tupu i te rahi ia hanahana te ôpuaraa faaora a te Atua.

A ära i te mau fifi o te oraraa : E mea poto te oraraa, e e mea pinepine te mau mahana i te î i te mau tämataraa e te mau faahemaraa. Te auraa o te parau ra " te taime faaanaanataeraa " o te oraraa ia ma te hinaaro mau e te päpü, ma te ära maite i te faufaa rahi o te taime tätaìtahi.

Taa ê atu i te mau mahana ìno : Te faahiti nei Pauro e, " e mea ìno te mau mahana ", o te haapäpü nei i te rü e te tïtauraa ia ora ma te viivii-òre e te itoito i roto i te hoê ao tei î i te ìno.

Èi òhiparaa, te " taime vatä " o te hoê ia piiraa ia ora ma te hinaaro mau, ma te faaòhipa i te mau taime atoà no te haere i mua ma te faaroo e no te rave i te mau òhipa o te faahanahana i te Atua.

Te auraa no te parau ra, " ia faaîhia i te Värua ", o te oraraa ia i raro aè i te faaüruraa e te ärataìraa a te Värua Moà. Teie te tahi mau tuhaa faufaa o teie mau manaò:

Te haavïraa e te ärataìraa : Ia î tätou i te Värua, o te vai-iho-raa ia i te Varua Moà ia ärataì i to tätou mau manaò, ta tätou mau òhipa, e ta tätou mau faaotiraa, mai te au i te îraa o te mu ìe o te hoê pähi i te mataì.

Mana e Ìte : E haapüaì te Varua Moà i nià i te feiä faaroo ia ora i te hoê oraraa Teretetiano mau e ia faaìte ma te mataù òre i to rätou faaroo. I teie heiva nui i tupu Paris 2024, teie te fäìraa a te hoê tamahine Marite 21 mätahiti Sydney McLaughlin tamahine horo 400 metera ôuà i nià i te räau tärava, horohia e ana i raro mai i te 52 tetoni tei ia na fetià piru, teie ta na fäìraa, vitiviti noa atu ai te horo a te taata, te hanahana ra o te Atua, e hanahana Mure òre ia. Àita vau e horo ia ìtehia mai au, ia ànaana ra te Hinaaro o te Atua teie nänaòhia i roto i te mato, te ìte nei au i to ù faufaa òre, na roto ra i te haamaitaìraa, e te faaroo Na Ietu ra Höroà te mau mea atoà.   

Täuiraa roto : E tïtau te reira i te hoê täuiraa tämau o to tätou huru e to tätou manaò, ma te faaäu rahi atu ä ia tätou i te hohoà o te Metia. Te haapaòraa i te Parau a te Atua: Ia î tätou i te Varua, o te haereraa atoà ia na roto i te haapaòraa i te Parau a te Atua, ma te vaiiho i te Varua ia haapii e ia faahaamanaò ia tätou i te mau haapiiraa a Ietu.

Te oraraa no te ârueraa e te mauruüru : Mai tei faahitihia i roto i te Efetia pene 5 i te mau ìrava 19 e te ìrava 20, ia î anaè tätou i te Varua e ärataì ia te reira i te hoê oraraa ârue, te himene varua, e te mauruüru i te Atua.

Èi manaònaòraa, ia î tätou i te Värua oia hoì te Aho tei faaâpï, o te oraraa ia i te hoê oraraa tei täuihia e tei ärataìhia e te Värua Moà, täpaòhia e te paari, te mana, tei haapaòhia e te âau mehara.

Ioane 6, 51 O vau te päne ora o tei pou mai mai te raì. O të àmu i teie nei päne, e tià ia i te oraraa. O ta ù päne e horoà atu o to ù ia tino, o ta ù ia e horoà ei ora no to te ao. 

Èi haatumuraa i teie mau ìrava no te Ioane i te pene 6.

Te päne ora : Te faaìte nei o Ietu ia na iho mai te " päne ora " tei pou mai mai te raì mai. Te faataipe ra teie päne i to na tino, i horoàhia no te ora o teie nei ao. Te faahiti ra te reira i ta na tutia i nià i te tätauro, i reira to na horoàraa i to na ora no te ora o te huitaata.

A àmu e a inu : Te mau parau " a àmu i to ù ìò " e " a inu i to ù toto ", e mau faahohoàraa puai roa ia. Te faaìte ra te reira i te hoê täairaa hohonu e te piri roa e o Ietu i te fenua. E mea faufaa roa teie auhoaraa no te färii i te ora mure òre. Te faahohoà atoà ra te reira i te Eufari, i reira te feia faaroo e âpiti ai i roto i te tino e te toto o te Metia.

Te ora mure òre : Ua fäfau mai o Ietu i te ora mure òre i te feiä e âmui mai i roto i teie ôroà. Te haapäpü ra o ia e e ère noa teie oraraa no a muri aè, e haamata rä i teie nei, e te haamata è na no te feiä e tiàturi ra ia na e e ora ra e o Na.

A pärahi i roto ia Ietu: Te àmuraa i to na tino e te inuraa i to na toto, o te faaearaa ia i roto ia Ietu e ia Na i roto ia tätou nei. Ua riro teie täairaa âpï èi pü no te oraraa teretetiano. E tïtau te reira i te hoê täuiraa i roto ia tätou iho e te hoê oraraa ärataìhia e te Varua o Ietu.

Te tahi Ìrava tei faatumu i teie parau no te Ioane pene 6. Te ìrava 51 ia: O vau te päne ora o tei pou mai mai te raì mai o te àmu i teie nei päne, e tià ia i te oraraa e a muri noa atu. O ta ù päne e horoà atu o to ù ia tino, i horoàhia na òutou nei e na reira òutou èi ora no to te ao.

Te faatumu nei teie ìrava i te auraa mau o te parau poroì a Ietu i roto i teie ìrava : o o Ia te päne ora, e na roto i te horoàraa i to na ora e ta na tutia, e färii te feiä faaroo i te ora mure òre.

Te feruriraa a te taata iho

Te tïtau mai ra teie ìrava ia fëruri i nià i to tätou täairaa e o Ietu. Nahea tätou ia ora i teie huru oraraa i pïhaì iho ia na i roto i to tätou oraraa i te mau mahana atoà. Te rave hope ra anei tätou i te òhipa i roto i te oraraa o te Ètärëtia e i roto i te oraraa Vaamataèinaa ? E mau uiraa faufaa roa teie no te faahohonu i to tatou faaroo e ta tätou fafauraa i to tätou tiàturiraa. Ua riro te päne e te uaina èi mau täipe faufaa roa i roto i te hau marü metia, tei mätau-atoà-hia mai te Eufari. Teie te hoê tätararaa no teie mau täpaò :

Te faraoa. Te täipe o te ora: E pinepine te faraoa i te faarirohia èi maa tumu, faufaa roa no te oraraa i te mau taime atoà. I roto i te Pîpîria, te faahitihia nei te reira èi " maa hinaarohia " ta tatou e ani i te Atua i te faaìteraa a Mataio i te pene 6 ìrava 1. Te faahohoà nei te reira i te maa e te haamaitaìraa hanahana.

Te tino o te Metia : I te Tämaaraa Hopeà, ua rave o Ietu i te päne, vävähi iho ra, e na ô aè ra, " O ta ù tino teie, i horoàhia na òutou nei " Ruta èv. Pene 22 ìrava 19. E riro ia te päne èi täipe no te tino o te Metia, tei püpühia èi tutia no te ora o te mau taata atoà nei. Na roto i te àmuraa i teie päne, te âpiti nei te feiä faaroo i roto i te oraraa e te poheraa o Ietu.

Te uaina. Te täipe o te òaòa e te here: E pinepine te uaina i te täaihia i te òaòa e te faahanahanaraa. I roto i te Pîpîria, ua faahitihia te reira èi täpaò no te haamaitaìraa e no te òaòaraa i te faaìteraa a te Taramo 104 ìrava 15.

Te toto o te Metia : I te Tämaaraa Hopeà, ua rave o Ietu i te hoê âuà uaina e ua parau, " O to ù ia toto, te toto no te faufaa âpï, i haamaniihia no te taata e rave rahi i te faaìteraa a Märeto pene 14 ìrava 24. Te faataipe ra te uaina i te toto o Ietu, haamaniihia èi faaòreraa hara. Na roto i te inuraa i teie uaina, e haamanaò te feiä faaroo i te tutia o Ietu e te faufaa âpï i haamauhia e to na toto.

Te tähoêraa e te âmui-tahi-raa. Te faataipe ra te päne e te uaina, tei àmu-âmui-hia i roto i te Eufari, i te hau o te feiä faaroo e te Metia i te taata tätaìtahi. Te haamanaò nei tätou i te hoêraa o te tino o te Metia, te Ètärëtia, e te piiraa ia ora ma te au maite e te here te tahi i te tahi.

Òhipa te faaroo.

Te raveraa i te òhipa no te faaroo, e òhipa ia no te tiàturiraa e no te haamanaòraa. E taime teie no te feiä tiàturi ia haamanaò i te tutia a Ietu Metia, ia faaâpï i ta tätou fäfauraa ia Na, e ia faaàmuhia i te faaroo i mua i to Na aro. E taime atoà no te fëruriraa e nafea rätou e ora ai i to rätou faaroo i te mau mahana atoà e to rätou täairaa e te tahi atu mau mero no te mau püpü Teretetiano.

Mau ìrava turu.

-Taramo 34, 16 Tei te feiä parau-tià ra to te Fatu mata, e tei ta rätou pure to na tarià.

-Mäteri 9, 5 E haere mai e àmu i ta ù nei mäa, e inu hoì i te uaina ânoìhia e au ra.

-Èfetia 5, 19 e te paraparauraa te tahi i te tahi i te taramo, e te himene, e te tire a te Värua ra, i te himeneraa mä te au o te âau i te Fatu ra;

-Ioane 6, 51 O vau te päne ora o tei pou mai mai te raì. O të àmu i teie nei päne, e tià ia i te oraraa. O ta ù päne e horoà atu o to ù ia tino, o ta ù ia e horoà èi ora no to te ao.

Faaitoitoraa.

Taramo 34 ìrava16

Ua färiu ê te Fatu i to na mata i nià i te feiä ìino, no te tapu ê i to rätou haamanaòraa i te fenua nei.

Faaitoitoraa: Te haapäpü ra teie ìrava i te parau-tià a te Atua. E färiu ê o ia i te feiä ìino e e tümä o ia i to rätou mehara i nià i te fenua.

Faaòhiparaa : Te faahaamanaò mai nei teie ìrava ia tätou i te faufaa no te oraraa parau-tià e te färiu-ê-raa atu i te ìno. Te faaitoito ra o ia ia tätou ia ìmi i te färii maitaì a te Atua na roto i te peeraa i to Na mau èà.

Mäteri pene 9 ìrava 5

A haere mai, a àmu i ta ù päne, e a inu i te uaina ta ù i ânoì ra ;

E tïtau te paari i te taata ia haere mai e àmu i ta na faraoa e ia inu i ta na uaina, èi täpaò no te aniraa ia färii i te paari e te haapiiraa.

Faaòhiparaa : Te ani nei teie ìrava ia tätou ia ìmi i te paari o te Atua e ia faaàmu i to tätou fëruriraa i te mau haapiiraa a te Atua. Te faaitoito nei o ia ia tätou ia vaiiho i te maamaa i muri e ia haere na te èà o te marämarama.

Efetia pene 5 ìrava 19

A himene e a ârue i te Fatu ma to òutou âau atoà;

Faaitoitoraa : Te nei o Pauro i te feiä faaroo ia paraparau te tahi i te tahi na roto i te mau himene, te mau ârueraa, e ia himene ma to rätou âau atoà i te Fatu.

Faaòhiparaa: Te faaitoito nei teie ìrava ia tätou ia faaö i te ârueraa e te haamoriraa i roto i to tätou oraraa i te mau mahana atoà. Te faahaamanaò mai nei te reira ia tätou i te faufaa rahi no te tiàraa huiraatira e te faaitoitoraa na roto i te pehe e te mau himene ia itoito te faaroo.

Ioane pene 6 ìrava 51

O vau te päne ora tei pou mai mai te raì mai. Mai te mea e àmu te hoê taata i teie nei päne, e ora ia o ia e a muri noa atu; e te päne ta ù e horoà atu, o to ù ia tino, o ta ù e horoà atu èi ora no to te ao.

Te faaìte ra o Ietu ia na iho mai te päne ora i pou mai mai te raì mai. Te feiä e àmu i teie päne, e ora ia rätou e a muri noa atu. O to na ia tutia no te ora o te ao nei.

Faaòhiparaa: Te tïtau ra teie ìrava ia tätou ia faatupu i te hoê täairaa hohonu e o Ietu. Na roto i te raveraa i te ôroà moà, e haamanaò tätou i ta na tutia e e färii tätou i te ora mure òre. Te ani manihini mai nei o ia ia tätou ia ora i pïhaì iho ia na e ia faaàmu i to tätou faaroo i to na ra aro.

Parau poroì no te faaòhiparaa

Te horoà mai ra teie mau ìrava, tei rave-àmui-hia, i te mau haapiiraa faufaa roa:

Te parau-tià e te oraraa parau-mau : Te tütavaraa ia ora mai te au i te mau haerea o te Atua e te àperaa i te ìno (Taramo 34 ìrava16).

Te ìmiraa i te paari: Te faaàmuraa i to tätou fëruriraa i te paari o te Atua e te vaiihoraa i te maamaa i muri (Mäteri pene 9 ìrava 5).

Te ârueraa e te haamoriraa : Te faaöraa mai i te ârueraa i roto i to tätou oraraa i te mau mahana atoà e te faaitoitoraa ia vëtahi ê na roto i te mau himene ia itoito te varua (Efetia pene 5 ìrava 19).

Te tià-faahou-raa e te Metia : Te âmuiraa atu i roto i te metia e te oraraa i pïhaì iho ia Ietu, ma te haamanaò i ta Na tutia no to tätou faaoraraahia (Ioane pene 6 ìrava 51).

Pehepehe

Te pane ora

I nià i te raì, ua pou mai te hoê faraoa,

Te hoê horoà moà, no tätou paatoà, püpühia mai,

To na tino, no te ora o teie nei ao, ua horoàhia mai ia,

Te hoê here hopeà òre, te hoê parau àro i heheuhia mai.

 

E marö te taata, èita e häroàroà,

Nafea teie pane e riro ai èi tino iò

Ua faataa mai rä Ietu, ma te marü,

Tei roto ia na te ora mure òre.

 

A àmu i ta ù tino, a inu i to ù toto,

Te hoê täamuraa hohonu, te hoê täamuraa moà,

E pärahi òe i roto ia ù nei, e na ù e pärahi i roto ia òe na,

Tähoêhia e a muri noa atu, na roto i teie maa haamaitaìhia.

 

To ù tino, te maa mau,

To ù toto, te inu mau,

Te taata e àmui atoà mai i roto i teie ôroà,

E ora vau i roto ia ù nei, e i roto ia na, aore e hopeàraa.

 

Mai ta te Metua i tono mai ia ù,

E te ora nei au i pïhaì iho ia na,

Te taata e färii ia ù, e ora atoà ia o ia,

Na roto ia ù nei, e a muri noa atu.

 

E ère teie faraoa mai te mäna,

A àmu ai e a pohe ai te mau metua,

O oia o te àmu i teie faraoa ora,

E ora ia e a muri noa atu, mai te au i te reira.

 

Teraì òr. Faatura.

Ioane 6.24-35 E aha te òhipa.

 

Tāpati 4 no  Muriaha/Âtete 2024.

ÔROÀ

E aha te òhipa.

Mau taiòraa.

Taramo 78

1 Matetira. Na Âtafa. E faaroo mai, e a ù mau taata, i ta ù ra ture, e färiu mai to òutou tarià i te parau a ta ù vaha.

2 E parau ta ù vaha i te parau taa maitaì, e faaìte au i te parau a manaò tahitohia ra.

3 O ta tätou hoì i faaroo e ua ìteä, e ua faaìte mai to tätou mau metua ia tätou.

4 E òre te reira e hunahia e tätou i ta rätou mau tamarii, e faaìte faahou rä tätou i te tahi uì, i te haamaitaìraa i te Fatu, e to na mana, e te òhipa taa-ê i ravehia e ana ra.

5 Ua tuu mai o ia i te parau na Iatöpa e ua haapaò i te ture na Ìteraèra, ta na i faaue mai i to tätou mau tupuna ra, ia faaìte atu rätou i ta rätou ra mau tamarii.

6 Ia ìte te uì i pïhaì atu, te mau tamarii e fänau mai, e ia tupu, ia faaìte atu rätou i ta rätou mau tamarii,

7 ia tiàturi rätou i te Atua, e eiaha e haamoè i ta na ra òhipa, e haapaò rä rätou i ta na parau.

8 E eiaha rätou ia fäito i to rätou ra mau metua, èi uì ètaèta e te haapaò òre, èi uì âau mau òre, e aore to rätou âau i haapaò i te Atua.

9 Te mau tamarii a Èferaima, mai te mau taata e fana te mauhaa ra, e ua hoì mai ra i muri i te mahana àroraa ra:

10 aore rätou i haapaò i te faufaa a to rätou ra Atua, e aore aè ra i haapaò i ta na ra ture,

11 haamoè atu ra rätou i ta na ra mau òhipa, e te mau mea i maerehia ta na i faaìte ia rätou.

12 Te mau mea taa ê i ravehia e ana i mua i te aro o to rätou ra mau metua, i te fenua ra i Àifiti, e te vähi ra i Tiona:

13 ua vähi o ia i te miti ia taeà ia rätou ia haere, e ua haapuè o ia i te moana mai te puèà ra.

14 I te ao ra, ua arataì o ia ia rätou i te ata ra, e te ruì ra e ao noa aè, i te marämarama auahi ia.

15 Ua haapararï o ia i te mato i te mëtëpara, e ua tuu mai ra i te päpe na rätou mai te moana te rahi.

16 Ua faatahe mai o ia i te päpe no roto i te mato ra, e ua tahe mai ra mai te mau ânävai ra.

17 Ua tämau rä rätou i te rave i te hara ia na, i te faaririraa atu i Tei Teitei i te mëtëpara ra.

18 Ua faaöoöo to rätou âau i te Atua, i te aniraa i te mäa ta rätou i hiaai ra.

19 Ua parau ìno hoì rätou i te Atua, ua nä ô aè ra: «E tià änei i te Atua  ia hohora mai i te àmuraa mäa i te mëtëpara nei?

20 Inaha, ua täìri o ia i te mato, e ua hï noa mai ra te pape, e ua tahe mai ra mai te vai puè ra. E tià atoà änei ia na ia horoà mai i te mäa ra? E noaa änei ia na te înaì na to na nei taata?»

21 Ìte aè ra te Fatu i te reira, ua riri iho ra, àma aè ra te auahi ia Iatöpa, tupu aè ra te riri ia Ìteraèra,

22 no te mea aore rätou i faaroo i te Atua, aore hoì i tiàturi i te ora na na.

23 Ua faauehia rä e ana te mau ata i nià ra, e ua ìritihia e ana te mau ùputa o te raì ra,

24 e ua haamaìri noa mai ra i te mäna ei mäa, e te tïtona no te mau raì ra tei horoàhia mai e ana na rätou.

25 Ua àmu te taata atoà i te mäa a te feiä mana; e ua navaì roa te mäa ta na i hopoi mai ra.

26 Ua haafarara mai ra o ia i te maoaè mai te raì mai, e na to na püai i haafarara mai i te märaamu,

27 ua haamaìri mai ra i te înaì i nià ia rätou mai te huà rii repo ra, e te manu pererau mai te one tähatai ra.

28 Ua haamaìri mai ra o ia i te reira i rotopü i to rätou pühapa, e àti noa aè to rätou ra pärahiraa.

29 Ua àmu iho ra rätou e paìa aè ra rätou, ua hopoi mai hoì o ia i ta rätou i hiaai ra.

30 E aita aè ra rätou i paìa maitaì, e te vai noa ra ta rätou mäa i to rätou vaha,

31 i roohia mai ai rätou i te riri o te Atua. Pohe iho ra te feiä poria o rätou ra ia na, e täìrihia iho ra te taata maitataì o Ìteraèra ra.

32 Te rave noa rä rätou i te hara, e aore i faaroo i te mau òhipa taa ê na na ra.

33 I haamäuà noa ai o ia i to rätou puè mahana èi mea faufaa òre, e to rätou mau mätahiti i te fatimaùu.

34 Ia täìri o ia ia rätou ra, ua ìmi iho ra ia na, e ua färiu e ua uiui i te Atua.

35 Ua manaò aè ra rätou e, o te Atua to rätou haapüraa, e o te Atua, o Tei Teitei ra, to rätou ia Ora.

36 Ua haapaìà ra to rätou vaha ia na, e ua haavare ia na to rätou arero:

37 aore hoì to rätou âau i tià ia na, aore hoì rätou i haapaò maitaì i ta na parau.

38 O ia rä, no te î i te aroha, ua faaòre aè ra i ta rätou hara, e aore aè ra i rave pohe roa ia rätou; ua faahoì pinepine rä o ia i te riri, e aore to na riri i faahope-hua-hia:

39 ua manaò hoì o ia ia rätou e e taata, e mataì e pee noa ra e e òre e hoì mai.

40 Te pinepine o ta rätou faaöoöoraa atu ia na i te fenua moèmoè ra e. E te pinepine hoì o ta rätou faaririraa atu ia na i te mëtëpara.

41 Oia ia, ua nä nià iho, ua nä nià iho rätou i te faaöoöo i te Atua, e ua àa atu i Tei Moà i Ìteraèra nei.



42 Aore rätou i manaò i te òhipa i ravehia e ta na rima, i te mahana i faaora ai o ia ia rätou i te ènemi.

43 Te mau temeio ta na i rave i Àifiti, e te mau òhipa taa-ê ta na i rave i taua vähi ra i Tiona:

44 i te faariroraa i ta rätou päpe èi toto, e te päpe rii matätia ra, e aita atu ra e tià ia inu.

45 Ua tuu atu ra i te popoti i rotopü ia rätou, e pau iho ra, e te rana e pohe atu ra rätou.

46 Ua horoà hoì o ia i ta rätou mäa na te hë, e ta rätou i òhipa ra na te àrape.

47 Ua täìri iho ra o ia i ta rätou mau vine i te ua-paari, e ta rätou mau tütämino i te toètoè.

48 Ua horoà o ia i ta rätou mau puaa i te ua-paari, e ta rätou mau nana mämoe i te uira.

49 Ua huri noa mai ra i to na riri rahi i nià ia rätou, te riri rahi, e te täiroiro, e te riri faaûàna, i te tonoraa mai i te mau veà parau ìno ra.

50 Ua rave o ia i te èà no to na riri, ua tuu noa atu o ia ia rätou no te pohe, ua horoà noa atu o ia ia rätou no te maì pohe ra.

51 Ua täìri o ia i te mau mätahiapo no Àifiti, te mätamehaì o to rätou püai i te mau tiàhapa o Hama ra.

52 Ua arataì rä o ia i to na iho ra taata mai te mämoe ra, e ua tiaì o ia ia rätou mai te nana i te mëtëpara ra.

53 Ua arataì o ia ia rätou mä te ora e aore rätou i mataù; ua pau hoì to rätou mau ènemi i te horomiihia e te miti ra.

54 Ua arataì o ia ia rätou i to na ra Vähi Moà, i teie nei mouà i noaa i ta na rima àtau.

55 Ua tiahi o ia i te mau êtene i mua ia rätou, e ua tufa i te fenua èi pärahiraa; e ua haapärahi i te mau ôpü o Ìteraèra i to rätou ra mau tiàhapa.

56 Ua faaöoöo rä rätou e ua faariri i te Atua teitei, e aore i haapaò i ta na ra parau.

57 Ua täiva ä rätou, e ua haavare mai to rätou mau metua ra, ua hoì faahou i te huru tahito ra mai te fana i tärahia te hua ra.

58 Ua faariri rätou ia na i ta rätou mau vähi teitei ra, e ua faaöoöo atu ia na i to rätou mau îtoro taraihia ra.

59 Ia hiò mai rä te Atua i te reira ua riri iho ra, e ua haafaufau roa ia Ìteraèra.

60 E ua faaruè iho ra i te tiàhapa i Tiro ra, i te tëtene ta na i pärahi i roto i te taata nei.

61 Ua tuu atu ra o ia i te âfata o to na püai ei tïtï, e to na hanahana i te rima o te ènemi.

62 Ua tuu atu hoì o ia i to na iho mau taata no te òè, e riri aè ra hoì o ia i ta na ra tufaa.

63 Pau iho ra to rätou mau taata âpï i te auahi, e aore ta rätou pötii i faaïpoïpohia ra.

64 Ua maìri ta rätou mau tahuà i te òè, e aore ta rätou mau ìvi vahine i òto.

65 Mäoro aè ra rä, ua ara mai ra te Fatu mai te ara taòto ra, e mai te taata itoito e pii i te uaina ra.

66 E ua täìri iho ra i ta na mau ènemi i muri ra, e ua tuu atu ra i te haamä vaiiho taiàta ia rätou.

67 Ua faaruè hoì o ia i te tiàhapa o Iotëfa, e aore hoì i hinaaro i te ôpü o Èferaima,

68 i hinaaro aè ra rä i te ôpü o Iüta, te mouà ra o Tiona ta na i hinaaro ra.

69 Ua patu iho ra i ta na vähi moà ra mai te fare teitei ra, e ua haamauhia mai te fenua i haamau-roa-hia nei.

70 I hinaaro aè ra rä i ta na tävini ia Tävita, ta na i rave mai mai te âua mämoe ra;

71 ua arataì mai o ia ia na mai te peeraa i te mämoe i faaòte i te ü ra, ia faaàmu o ia i to na taata, i te mau huaai o Iatöpa, e te mau tamarii a Ìteraèra ta na ra tufaa.

72 Ua faaàmu o ia ia rätou mä te âau haavare òre, e ua arataì o ia ia rätou i te àravihi o to na ra rima.

Ètoto 16.2-15

2 Ua amuamu iho ra taua âmuiraa atoà o te tamarii a Ìteraèra ra ia Möte räua Àarona i taua mëtëpara ra;

3 I nä ô mai te tamarii a Ìteraèra ia räua, Âhiri mätou i pohe i te rima o te Fatu i Àifiti e a pärahi ai mätou i pïhaì iho i te mau färii puaa, e ua àmu hoì i te mäa e ua paìa roa; i arataì mai nei hoì ô rua ia mätou i teie nei âmuiraa atoà i te poìa.

4 Ua nä ô mai ra hoì te Fatu ia Möte, Inaha, e haamaìri atu vai i te mäa no nià i te raì nei na òutou; e na te taata e haere noa i räpae i te mau mahana atoà ra a òhi ai i te mäa e navaì ai i taua mahana ra, èi tämataraa atu na ù ia rätou, i ta rätou haapaòraa i ta ù nei ture, e te òreraa.

5 Âreà ia tae i te mahana ono ra, e rave maitaì rätou i ta rätou e hopoi mai i roto ra, ia piti mai ia färii, i te färii ta rätou e òhi no te mau mahana atoà ra.

6 Ua nä ô iho ra Möte räua o Àarona i te mau tamarii atoà a Ìteraèra, Âùanei òutou e ìte ai ia ahiahi, e na te Fatu òutou i arataì mai, mai te fenua mai ra mai Àifiti.

7 Ia poìpoì hoì òutou e ìte ai i te hanahana o te Fatu; ua faaroo hoì o ia i ta òutou amuamu i te Fatu; e aha hoì ta mäua ia amuamu mai òutou ia mäua?

8 E ua nä ô aè ra hoì Möte, E ìte hua òutou ia ahiahi, ia höroà mai te Fatu i te înaì na òutou e àmu, e ia höroà mai hoì i te mäa ia poìpoì, e ia paìa roa òutou; te ìte ra hoì te Fatu ia òutou amuamu, ta òutou e amuamu ia na: e aha hoì ta mäua nei? E ère ta òutou i te amuamu ia mäua nei, i te Fatu rä.

9 Ua parau aè ra Möte ia Àarona, A parau na òe i te âmuiraa atoà o te tamarii a Ìteraèra nei, A haafätata mai òutou i mua i te aro o te Fatu: ua ìte hoì o ia i ta òutou amuamu.

10 Te parau ra Àarona i taua âmuiraa atoà o te tamarii a Ìteraèra ra, ua hiò tià atu ra rätou i te pae i te mëtëpara ra, e inaha, ua ìteä te hanahana o te Fatu ra i roto i te ata.

11 Ua parau mai ra te Fatu ia Möte, nä ô mai ra,

12 Ua faaroo aè nei au i te amuamu a te tamarii a Ìteraèra: e parau iho na òe ia rätou, a nä ô atu ai, Ia ahiahi òutou e àmu ai i te înaì, e ia poìpoì òutou e paìa ai i te mäa; e e ìte òutou e o vau to òutou Atua o te Fatu.

13 E ahiahi iho ra o te tïàa manu pererau mai ra, e moè roa iho ra taua tiàhapa ra; e ao aè ra, ua maìri mai ra te hau e àti noa aè taua tiàhapa ra.

14 E pee aè ra taua hau i maìri ra, inaha, e mea rii menemene te vai noa ra i raro i te repo i taua mëtëpara ra mai te töpata hau te rarahi.

15 E ìte aè ra te tamarii a Ìteraèra i taua mea ra, ua nä ô aè ra rätou rätou iho, E aha teie? Aore hoì rätou i ìte i te reira. Ua nä ô aè ra Möte ia rätou, O taua mäa ra teie ta te Fatu e höroà mai na òutou e àmu.  

Èfetia 4.17-24

Te oraraa âpï i roto i te Metia.

17 E teie nei, teie ta ù parau, ta te Fatu ta ù e faaìte hua atu nei: a tirë roa òutou i te haere i ta te tahi pae Ètene haereà, i te haapaòraa i te parau maamaa a to rätou âau,

18 mä te manaò haapöurihia, e te taa-ê hoì i te ora a te Atua i te ìte òre i roto ia rätou, e no te ètaèta o to rätou âau;

19 e no te ìte òre i te haamä, ua horoà noa ia rätou iho i te mau peu taiàta ra, èi rave i te mau parau faufau atoà mä te rü rahi.

20 E ère rä mai te reira ta òutou i ìte aè nei i te Metia ra.

21 Ua faaroo hoì òutou i ta na, e ua haapiihia òutou e ana, tei ia Ietu hoì te parau mau,

22 e e haapae òutou i ta òutou parau i mütaa iho ra, i te taata tahito i tei ìno i te hinaaro haavare ra;

23 e ia faahouhia òutou i to òutou värua ra i te âau;

24 e ia faataata âpï hoì òutou, o tei hämanihia ia au i te Atua ra, i te parau-tià e te maitaì mau ra.

Ioane 6.24-35

24 E ia hiò aè ra taua mau taata ra e aore Ietu e ta na mau pipi atoà i reira, paìùma atoà atu ra rätou i nià i te pahï, hoe atu ra i Taperenaumi i te ìmiraa atu ia Ietu. O Ietu te päne ora.

25 E ìte atu ra rätou ia na i te tahi paeàu i taua roto ra, ua parau atu ra rätou ia na: «E Rapi, i nä fea mai òe i ô nei?

26 Ua parau mai ra Ietu ia rätou, nä ô mai ra: «Âmene, âmene, e parau atu vau ia òutou: e ère rä no te mea ua ìte òutou i te mau täpaò ra, te ìmi nei rä òutou ia ù, no te mea i àmu òutou i te mäa ra e paìa aè ra.

27 Eiaha e òhipa i te mäa tähuti noa, i te mäa rä e tià i te vairaa e tae noa atu i te ora mure-òre-ra, o ta te Tämaïti a te taata e horoà mai na òutou na: oia hoì tei haapaòhia e te Atua e ta na Metua ra.

28 Ua ui atu ra rätou ia na: «E aha ta te Atua òhipa i hinaaro ia rave mätou?

29 Ua parau mai ra Ietu ia rätou, nä ô mai ra: «Teie ta te Atua òhipa hinaaro, ia faaroo òutou ia na i ta na i tono mai.

30 Ua parau atu ra rätou ia na: «E aha ta òe täpaò e rave, ia hiò atu mätou a faaroo atu ai mätou ia òe? E aha ta òe räveà?

31 I àmu na to mätou hui-metua i te mäna i te mëtëpara ra, o tei päpaìhia ra e: «I horoà mai na o ia i te päne o te raì na rätou ei àmuraa.»

32 Ua parau mai ra Ietu ia rätou: «Âmene, âmene, e parau atu vau ia òutou: aore Möte i horoà mai i te päne o te raì na òutou, ua horoà mai rä ta ù Metua i te päne mau o te raì no òutou.

33 Terä ta te Atua päne, o tei pou mai mai te raì ra, e o të horoà i te ora no to te ao ra.

34 Ua parau atu ra rätou ia na: «E te Fatu, eiaha òe e faaea i te horoà mai i taua päne ra na mätou.

35 Ua parau mai ra Ietu ia rätou: «O vau te päne ora. O të haere mai ia ù nei, e òre roa ia e poìa, e të faaroo mai ia ù nei, e òre roa ia e poìhä.

Manaò turu.

Taramo 78, 19 Ua parau ìno hoì rätou i te Atua, ua nä ô aè ra: «E tià änei i te Atua  ia hohora mai i te àmuraa mäa i te mëtëpara nei?

Ètoto 16, 12 Ua faaroo aè nei au i te amuamu a te tamarii a Ìteraèra: e parau iho na òe ia rätou, a nä ô atu ai, Ia ahiahi òutou e àmu ai i te înaì, e ia poìpoì òutou e paìa ai i te mäa; e e ìte òutou e o vau to òutou Atua o te Fatu.

Èfetia 4, 21 Ua faaroo hoì òutou i ta na, e ua haapiihia òutou e ana, tei ia Ietu hoì te parau mau,

Ioane 6, 29 Ua parau mai ra Ietu ia rätou, nä ô mai ra: «Teie ta te Atua òhipa hinaaro, ia faaroo òutou ia na i ta na i tono mai.

Ua pähono o Ietu i te nahoà taata e ani ra ia na e aha te òhipa a te Atua te tià ia mätou ia rave.

E mea òhie roa e te puai te pähonoraa a Ietu : " Te òhipa a te Atua, maori rä, ia tiàturi òutou ia Na o ta Na i tono mai. Te faaìte päpü nei i te reira na roto i te iòa o Ietu Metia, Oia hoì, te faaroo ia Ietu, o te òhipa faufaa roa ia ta te Atua e tiaì ra ia tätou. E mea na roto i te faaroo tätou e faaàmuhia ai i te pae värua e e ìtehia ai te ora mure òre.

Te Ioane pene 6 i te mau ìrava 24 e tae i te ìrava 35. Teie te hoê hiòraa:

I roto i te mau ìrava e faahitihia ra:

I muri aè i te faarahiraa o Ietu i te päne e te ïà, ua haere mai te mau taata, ua ìmi rätou ia na. Ua ìte atu ra rätou ia na i Taperenaumi e ua ani atu ra ia na e, ahea oia i tae mai ai i reira.

Te pähonoraa a Ietu :

Te haapäpü ra o Ietu i te mea e mauruüru ai rätou i te päne temeio, eiaha rä i te marämaramaraa i te mau täpaò. Ua aò oia ia rätou ia rave i te òhipa eiaha no te maa ìno, oia hoì te maa tähuti no te ora mure ore rä. Te òhipa a te Atua o te tiàturiraa ia i te taata ta Na i tono mai.

Te tahi ìrava tumu i roto i teie Ioane i te pene 6 ìrava 35 : Ua parau o Ietu e: "O vau te päne ora. Te taata e haere mai ia ù nei, e ore roa o ia e poìa faahou, e te taata e tiàturi ia ù, e ore roa o ia e poiha faahou. » O Iesu te päne ora no te faaroo, e te maa mau o te tiàturiraa ia Na. Ua hau atu te reira i te faraoa hämanihia e te rima taata, na te päne no te raì mai e na te reira e arataì ia tätou i te ora mure ore. Te päne ora o te hoê ia manaò varua e ìtehia i roto i te mau ìrava no te Ioane pene 6 i te ìrava 35. Teie te tahi auraa : Te faataa ra o Ietu ia  na iho mai te päne ora. Ua hau atu te reira i te faraoa hämanihia i te fare èuraa.

Te faataipe ra te päne ora i te maa varua, te faaroo ia Ietu. Te taata e haere mai ia Ietu ra e o te tiàturi ia Na, eita ia o ia e ìte faahou i te poìa e aore rä, i te poiha. Te faahohoà nei te päne ora i te auraa e o Ietu, o te haamäha i to tätou mau hinaaro e o te arataì ia tätou i te ora mure òre. No te faaàmu ia tätou i te pane ora, e mea tià ia marämarama tätou e te püpü ra o Ietu ia na iho èi tumu no te ora o te faaroo. Teie te tahi mau taahiraa no te faaàmu ia tätou i teie päne :

Te Faaroo ia Ietu :

E tiàturi anaè tätou ia Ietu èi Faaora e ei Fatu no tätou. E mata na tätou i te färii i to na maitaì e to na here.

Te pure e te feruri-hohonu-raa:

E rave anaè i te taime no te pure e no te feruri i te Parau a te Atua i te faatiàraa a te Pîpîria, e te faaìteraa a te fenua, te vai, te reva, e te mau maitaì atoà i roto i te Rähu. Ma te ìmi-tämau-raa i te ìte hohonuraa i nià ia Ietu.

Te mau päpaìraa moà:

E âmui anaè tätou i roto i te Àmuraa maa ahiahi a te Fatu i reira te päne e te uaina e faataipe ai i te tino e te toto o Ietu. E mata na tätou i te faahanahana i teie ôroà moà ma te faaroo e te mauruüru.

Te oraraa i roto i te Metia :

E mata na tätou i te ora mai te au i te mau haapiiraa a Ietu. E here anaè na tätou i to tätou taata tupu, to tätou täuaro e faaìte anaè tätou i te here o te Atua. Na roto i te faaòhiparaa i teie mau taahiraa, e faaàmu tätou ia tätou iho i te pane ora e e paari ai tätou i te oraraa i to tätou mau taata tätaìtahi.

 

Naò noa tätou i te parauraa e, Te päne ora : I ô mai i te mau temeio materia "

E au mau taeaè, e au mau tuahine here e,

I teie mahana, te tuatäpapa nei tätou i te Parau Maitaì i päpaìhia e Ioane, i te pene 6, te mau ìrava 24 e tae atu i te ìrava 35. Te horoà mai ra teie mau ìrava i te hoê feruriraa hohonu no nià i te faaroo, te maa varua, e te täaihonoraa e o Ietu.

Te mau ìrava e faatumu nei:

I muri aè i te faarahiraa o Ietu i te mau päne, ua haere atu ra Iesu i nià i te mouà no te pure. Te ìmi ra te nahoà ia na, ua hinaaro rä o Ietu e na nià aè i te mau täpaò ìte matahia oia hoì, te mau òhipa maere.

Te mäìmiraa i te pae materia:

Ua ìte mai ra te nahoà taata ia na e ua ui mai ra, " Ahea òe i te haereraa mai i ô nei ? "

Ua pähono atu ra o Ietu e : " Àita òutou i ìmi ia ù nei no te temeio, i te mea rä e, ua àmu òutou i te päne ".

Te òhipa a te Atua:

Ua heheu mai Iesu i te mea faufaa rahi : " O te òhipa a te Atua ta òutou e rave, o to òutou ia faaroo ia na o ta na i tono mai ". Taa ê atu i te mau täpaò, mea faufaa roa te faaroo ia Ietu.

Te päne ora:

Ua parau Ietu e : " O vau te päne ora ".

Te taata e haere mai ia na ra, e ore roa ia oia e poìa faahou, e te taata e tiàturi ia na, e ore roa ia oia e poiha faahou. Ua hau aè te päne ora i te maa materia. Te ani nei o Ia ia tätou ia tiàturi ia Ietu, ia faaàmu ia tätou i te maa varua, e ia ìmi i te ora mure òre.

 

E haaûàna o Ietu i ta na haapiiraa, ia òre te hinaaro mätamua, ia hoì mai i te feiä i faaroo ia na i roto i te mau âparauraa faufaa òre. Ma te parau " E aha ta òe òhipa ? " ta rätou ia uiraa. E ère te mau temeio e rave rau, te mau faaoraraa, te haapiiraa a Ietu i te mea faufaa no rätou? E hämanihia te mau täairaa. Ua faaruè mai te tahi mau pipi ; o te Tino Àhuru Mä Piti anaè tei faaea, ma te tiàturi i to rätou Fatu. Ua ìte tätou e aha tei tupu i muri aè i te reira. E haamauhia ia te mau püpü; Tei te feiä mana faaroo ra te parau hopeà. E tomo atu te perofeta tei tiaìhia i roto i te fare i te tapati, e pätoìhia o ia, e pärihia o ia, e haapohehia o ia. E faaruè atoà ta na mau pipi piri roa aè ia na. E feruri anaè i te hunaraa o Petero. E faahemahia tätou ia parau e: "Nahea e nehenehe ai i te feiä hämani ìno ia Ietu ia pätoì ia na i muri aè i te mau heheuraa ta na i horoà atu ia rätou? No haapäpü noa atu ra oia ia rätou e e veà o ia na te Atua, e na roto ia na e noaa ai te ora ia rätou. E aita hoê aè mea i roto i teie mau mea atoà? I te tahi mau taime, ia taiò-faahou-hia te mau Èvaneria, èita anei tätou e hema i te hee i rotopü i te feiä e faaroo ra ia Ietu, ma te ineine i te pii hua i to tätou faaroo, ta tätou ûmere? Auë! Àhiri vau i tae atu i reira, e täpeà ia vau ia na ia òre ia täpeàhia, e tuu ia vau ia na. Àita ia e Tätauro..... Auë ia teòteò maamaa, o te hinaaro nei ia riro èi mea puai aè i te mau parau tohu no mütaa iho ra.

Mea tià atoà ia tätou i te faatumu i te tahi manaò i nià i teie taò e òhipa. Ua parau o Ietu i te feia e faaroo ra ia na : E tià ia òe ia faaitoito i te rave i te òhipa ia noaa te ora mure òre. Pähono atu ra to na mau hoa : E aha te tià ia tätou ia rave no te faatupu i te mau òhipa a te Atua ? " Te pähonoraa a Iesu : " O te òhipa a te Atua o te faaroo ia i ta na i tono mai ". " E aha ta òe òhipa ? " Ta rätou ia uiraa. Te vai ra te mau reni arataì ; Hoê ä anei auraa to te taò " òhipa " tei te huru anei o te parauraa a te Fatu e aore rä a te feia e faaroo mai ra ia Na ? E au ra ia ù e tei roto i te mau parau a Ietu te mea faufaa rahi : " O te òhipa a te Atua o te faaroo ia i ta na i tono mai ". I teie mahana te vai noa nei teie uiraa, E aha ta òe òhipa ? Tei hea tätou i teie mahana ? Faaitoitohia e te Parau, ua ite noa anei tätou e nafea ia faaòhipa e ia faaite i te reira? I te mau tau i maìri i te haapäpüraa te EPM, i ta na faaìteraa i nià i te huru oraraa no te nünaa Mäòhi i Mäòhi Nui, ua faahiti te tahi mau tià porotita no te fenua nei i te parauraa, E aha e òhipa ta te mau òrometua e horoà na te nünaa. I teie mahana ua òre te tämatamataraa päura âtömï, ua topatari te tahi mau hötera, te haere nei ta tätou feiä âpï i te ara e ìmi i te òhipa no te haamaitaì i te oraraa. Ua riro te èreraa i te òhipa èi tautooraa na te mau taata e rave rahi i teie mahana, o teie ra e tià e parau te tauturu mai teie uiraa no te òhipa ia tätou i te uiraa e, E aha ta ù hopoià e tià ia ù ia rave no to ù fenua i Mäòhi Nui nei. 

Ia faaroo tätou i te âpotetoro Pauro i te aniraa i to Efetia " ia àhu i te àhu o te taata âpï ra, i hämanihia i ta te Atua ra ma te parau-tià e te moà no roto mai i te parau mau ra ". I roto i te hoê taime poto e ôpere ai tätou i te päne e te uaina no te Tämaaraa Hopeà. O te päne ora mau ia tei horoàhia mai no tätou i nià i te Tätauro, tei püpühia mai ia tätou nei na roto i te hoê ä here mai tei matarohia. O te toto ia o te Metia, i haamaniihia no te matararaa hara. E mata na tatou ia ìte e, nahea ia färii i te reira ma te âau mehara, na roto i te varua no te faaìte e no te here.

A faaroo mai na rä i te parau no te hopoià a Faeta, Faeta, te Aito Nui no Anau: E hopoià na Faeta, e taata tamaì marämarama e te riàrià, no Anau no Bora Bora, ta Na òhipa te pärururaa i te motu i roto i to na täatoàraa. E 2,50 metera te roa, e te itoito. Ta na mauhaa tamaì, te haaputuputuraa, no te faatupu i te âmahamaharaa i rotopü i to na mau ènemi na roto i te âparauraa.

Ia täpiriraa te hoê nuu ènemi rahi, faaòhipa o Faeta i te hoê raveà àravihi te oe a Hiro no te haamataù ia rätou. Auaa to na itoito, ua fänaò oia i te tiàraa teitei roa aè e ua riro mai oia èi tiaì arii.

Nohea mai te iòa ra "Bora Bora ":

Ia au i te àai, o Bora Bora te motu mätamua, i muri aè ia Raiatea, o tei fäura mai mai roto mai i te mau päpe maoti te mau atua. To na iòa tumu o "Pora-Pora ", oia hoì, " fänau-mätamua-hia ".

Hämanihia e te mau Atua: Hou te taeraa mai o te mau taata Nane, ua piihia teie motu e " Vavau ", " Motu tapu ora ", e aore rä, " Mai Te Pora " hämanihia e te mau atua.

 

Teraì òr ; Faatura.