Ruta èv 1.1- 4; 4,14-21 Firi Maha

Paroita Pueu.

Firi Maha

Täpati 27 no Tënuare 2018.

Taramo 19

Te faaìte nei te mau òhipa a te Atua i to na hanahana, 1 Na te Mënätehe. Taramo na Tävita. 2 Te parau hua nei te mau raì i te hanahana o te Atua E te faaìte nei te reva i te òhipa a ta na rima 3 Te haapii nei te tahi ao i te tahi i te parau, e te faaìte nei te tahi ruì i te tahi i te ìte. 4 Aore e ôrero, aore e parau, aore to rätou reo i ìteä. 5 Ua tae rä to rätou haruru i te mau fenua atoà, e ta rätou faaìteraa i te ôtià o teie nei ao. Ua faatià o ia i to te mahana tiàhapa i roto ia rätou, 6 o tei haere mai mai te täne âpï ra mai roto mai i to na ra piha, e mai te taata püai e òaòa ra ia horo i to na hororaa.7 Mai te tahi pae raì to na haereà mai, e tae noa atu ra i te tahi pae i to na pouraa i raro, e aore roa te hoê mea i ère i to na mähanahana. 8 Oia atoà te ture a te Fatu aita e hapa, i te haafäriuraa i te värua. Te faaìte a te Fatu e mea mau ia, e paari ai te âau o te maùa. 9 Te haapaòraa a te Fatu e mea tià ia, e òaòa ai te âau. Te aò a te Fatu e mea märamarama ia, e märamarama ai te mata nei. 10 Te mataù i te Fatu e mea viivii òre ia, e tià ia i te vai-mäite-raa. Te faaauraa a te Fatu e parau mau ia, e te mea tià anaè. 11 E taoà hinaaro-rahi-hia ia i to te àuro, i te àuro rahi ra e te maitataì. E momona rahi ia i to te meri i te topataraa no roto i te meriterio. 12 Na te reira hoì i haapii mai i to tävini, e tei te haapaò i te reira te utuà rahi. 13 O vai hoì tei ìte i ta na iho ra mau hara? E tämä mai òe ia ù i ta ù mau hara ìteä-òre-hia nei. 14 E täpeà mai òe i to tävini i te hara ìimi, eiaha roa te reira ia faahepo mai ia ù, ei reira vau e maitaì ai, aore aè ra te hara rahi. 15 E tiàhia mai te parau a ta ù vaha i reira, e te manaò o ta ù âau, i mua i to aro, e te Fatu, e ta ù haapüraa e ta ù ora.

Nehemia  8.1-10

1 E te taata atoà ra ua haaputuputu tahi mai ra i roto i te aroä i pïhaì iho i te ùputa pape ra e ua parau atu ra rätou i te päpaì parau ra ia Ètera, e hopoi mai i te puta ture a Möte, ta te Fatu i parau mai ia Ìteraèra ra. 2 Ua hopoi mai ra te tahuà ra o Ètera i te ture i te aro o taua âmuiraa atoà ra, te täne e te vahine, e te feiä atoà i ìte i te parau ia taiòhia ra, i te mahana hoê i te märama hitu ra. 3 Ua taiò iho ra o ia i taua parau ra i roto i te aroä i mua atu i te ùputa pape ra, mai te poìpoì mai a e avatea noa atu ra, i mua i te aro o te täne e te vahine, e te feiä atoà i ìte ra; faaroo päpü atu ra te tarià o te taata atoà i taua puta ture ra. 4 Te tià noa ra taua päpaì parau ra o Ètera i nià i te hoê tiàraa räau, i hämanihia e rätou no taua taiòraa ra; e tei ta na rima àtau, o Matitia ia te tiàrama, e o Tema, e o Ànaia, e o Ùria, e o Hiritia, e o Maateia; e tei ta na rima àui, o Petaia ia, e o Mitaèra, e o Maretia, e o Hatuma, e o Hatepatana, e o Tëtäria, e o Meturama. 5 Ua heheu aè ra Ètera i taua puta ra i te aro o te taata atoà ra, te teitei ra hoì to na tiàraa i to te taata atoà, e tei te heheuraa o ia i taua puta ra, ua tià anaè mai ra te taata atoà; 6 ua haamaitaì atu ra Ètera i te Atua rahi ra i te Fatu. Ua parau mai ra te taata atoà, mä te hopoi i te rima i nià, Âmene, âmene: ua piò iho ra to rätou upoo i raro, e ua haamori i te Fatu mä te mata i raro i te repo. 7 E o Ietua, e o Pani, e o Terepia, e o Iamina, e o Âtupa, e o Tapetai, e o Hotia, e o Maateia, e o Terita, e o Àtäria, e o Iotapata, e o Hänana, e o Peraia, e te mau âti-Revi; nä rätou i faaìte i te taata i te auraa i taua ture ra te tià noa ra te taata i to rätou ra tiàraa. 8 Taiò märamarama mäite iho ra rätou i te ture a te Atua, e ua faaìte i te auraa, e ìte aè ra rätou i taua parau i taiòhia ra. 9 Ua parau atu ra te tävana ra o Nehemia, e te tahuà päpaì parau ra o Ètera, e te mau âti-Revi, tei haapii i te mau taata ra, E mahana moà teie nä te Fatu to òutou Atua ra, eiaha e auë, eiaha e òto. Ua òto anaè hoì te taata atoà i te ìteraa i taua parau ture ra. 10 Ua parau atu ra o ia ia rätou, A haere, e àmu i te mäa maitaì, e inu i te pape mäàro, a haapaò atu ai i te tahi tufaa nä te feiä eere ra e mahana moà hoì teie no to tätou Fatu. Eiaha e òto, o te òaòa rä no ô ia te Fatu ra, to òutou ia maitaì.

1 Torinetia 12.12-30

Hoê tino e te mero e rave rahi

12 Mai te tino hoì hoê nei, e rave rahi to na mero, e te mau mero atoà no taua tino hoê ra, rahi noa ä rätou, hoê ä ia tino, oia atoà hoì te tino o te Metia. 13 I päpetitohia hoì tätou e te Värua hoê i roto i te tino hoê ra, te âti-Iüta e te Herëni, te tävini e te tiàmä, e ua faainuhia tätou i ta te Värua hoê ra. 14 Eere hoì te tino nei i te mero hoê, e rave rahi rä. 15 Ia parau hoì te âvae e Eere au i to te tino, no te mea eere au i te rima, eere mau änei o ia i to te tino i reira 16 Ia parau hoì te tarià e Eere au i to te tino, no te mea eere au i te mata, eere mau änei o ia i to te tino i reira 17 Ahiri e mata anaè te tino atoà nei, e aha iho ra te faarooraa Ahiri hoì e faarooraa anaè te tino nei, e aha iho ra te hoìraa 18 I teie nei rä, ua haamauhia e te Atua te mau mero o te tino nei i ta na vähi hinaaro ra. 19 Ahiri hoì rätou atoà e mero hoê ra, tei hea iho ra te tino i reira 20 I teie nei rä, e rave rahi te mero, hoê roa rä tino. 21 E òre hoì te mata e tià ia parau i te rima e Òre noa atu ä òe ia ù nei E te upoo hoì ia parau i te âvae e Òre noa atu ä òrua ia ù nei  22 Eiaha atu ä ia, o te mau mero huru paruparu o te tino nei, eita roa atu ia e tià ia òre. 23 E te mau mero o te tino ta tätou e manaò nei e, aore e maitaì reà, te haaàti nei tätou i te reira i te maitaì rahi; e to tätou mau vähi nehenehe òre ra, te hau nei te reira i te nehenehe. 24 To tätou mau vähi nehenehe ra hoì, òre noa atu ia. Ua täàti mäite rä te Atua i te tino atoà, e ua tuu i te maitaì rahi i te vähi i ère ra. 25 Ia òre roa te au òre i te tino nei, ia fäito atoà rä to te mau mero haapaò ia rätou iho. 26 Ia mäuiui te hoê mero ra, e mäuiui atoà te mau mero atoà ra; e ia faateiteihia te hoê mero ra, e òaòa ia te mau mero atoà ra.  27 E teie nei, o te tino òutou no te Metia, e e mero anaè òutou e àti noa aè. 28 E ua tuu hoì te Atua i te âpotetoro i roto i te Ètärëtia, o mua ia, e te piti ra, e perofeta ia, te toru ra, e haapii ia, e te rave täpaò, e te faaora maì, e te tauturu, e te faaìte, e te parau èê. 29 E âpotetoro anaè änei? E perofeta anaè änei? E haapii anaè änei? E rave täpaò anaè änei? 30 Ua ìte paatoà änei i te faaora maì? E parau paatoà änei i te parau èê? E faaìte paatoà änei i te parau èê? 31 Te nounou na òutou i te mau toroà rahi ra. E faaìte atu rä vau ia òutou i te èà maitaì rahi roa ra.

Ruta èv 1.1- 4

1 No te mea e rave rahi aè nei tei tämata i te tuatäpapa i te papaa parau i faatupu-mau-hia i roto ia tätou nei, 2 ia rätou i tuu mai ia tätou nei, ta tei ìte mau to rätou mata mai te mätamua mai ä, e e òrometua hoì no taua parau ra i muri aè; 3 o vau atoà hoì, no te mea ua ìteä-päpü-hia e au te mau parau atoà mai te mätamua mai ä, manaò aè nei e mea tià ia päpaì tuatäpapa atu i taua parau ra ia òe na, Teofiro tüiroo; 4 ia ìte päpü òe, e parau mau te mau parau i haapiihia atu ia òe na. 

 4.14 - 21

Te haamataraa Ietu i ta na òhipa i Tarirea

(Mät 4,12-17; Mär 1,14-15)

14 Ua hoì mai ra Ietu i Tarirea mä te mana o te Värua, tuì atu ra to na roo e àti noa aè taua fenua ra. 15 Haapii atu ra o ia i roto i to rätou mau tunato, mä te haamaitaì-paatoà-hia. Aita to Nätareta i tiàturi ia Ietu

(Mät 13,53-58; Mär 6,1-6)

16 E tae mai ra o ia i Nätareta i te vähi i paari ai o ia ra, ua tomo mai ra o ia i roto i te tunato i te täpati, o ta na ä ia peu, e ua tià aè ra i nià e taiò i te parau. 17 Ua tuu mai ra rätou i te puta a te perofeta ra a Ìtaia i ta na rima, e ia hohora aè ra o ia i taua puta ra, ìte iho ra o ia i te vähi i päpaìhia ra 18 Tei nià iho ia ù te Värua o te Fatu, o ia i faatähinu mai ia ù ei poro haere i te parau maitaì i te taata rii, ua tono mai o ia ia ù ei faaora i te feiä âau òto, ei poro haere i te ora no te tïtï, e ia hiò faahou te matapö, e ei tuu hoì i te feiä i paruparu, 19 ei poro haere i te mätahiti e ìtehia mai ai e te Fatu ra. 20 E ôtaro aè ra i taua puta ra, ua tuu atu ra i te tävini ra, pärahi iho ra i raro. Ua tiàtonu mai ra te mata o to te tunato atoà ia na. 21 Ua parau atu ra o ia ia rätou Teie nei parau i päpaìhia ta òutou i faaroo iho nei, ua tupu ia i teie nei mahana.

Manaò.

Te faaìte nei te mau rähu a te Atua i to na hanahana i roto i te fare Atua i ta te  mau raì parauraa i te hanahana  Atua e te reva i te òhipa a ta na rima, te ao nei te haapii ra ia i te parau, e te faaìte nei te ruì i te tahi i te ìte. Te ôrero ua mou, te parau ua mämü, te reo i ìteä ua muhu. Ua tä rä to rätou haruru i te mau fenua atoà, e ta rätou faaìteraa i te ôtià o teie nei ao. Ua faatià o ia i to te mahana tiàhapa i roto ia rätou,  o tei haere mai e täàti i to te ao nei mai te täne âpï ra mai roto mai i to na ra piha, e mai te taata püai e òaòa ra ia horo i to na hororaa. Te haere mai nei mai te tahi hiti o te raì, e tae noa atu ra i te tahi pae i to na pouraa i raro, e aore roa te hoê mea i ère i to na mähanahana. Oia atoà te ture a te Atua Nui Tumu Tahi aita e hapa, i te haafäriuraa i te värua. Te faaìte a te Atua e mea mau ia, e paari ai te âau o te maùa. Te haapaòraa a te Atua e mea tià ia, e òaòa ai te âau. Te aò a te Atua e mea märamarama ia, e märamarama ai te mata nei. Te mataù i te Atua e mea viivii òre ia, e tià ia i te vai-mäite-raa. Te mau faaauraa a te Atua e parau mau ia, e te mea tià anaè. E taoà hinaaro-rahi-hia ia i to te àuro, i te àuro rahi ra e te maitataì. E momona rahi ia i to te meri i te topataraa no roto i te meriterio. Na te reira hoì i haapii mai i to tävini, e tei te haapaò i te reira te utuà rahi. O vai hoì tei ìte i ta na iho ra mau hara, E tämä mai òe ia mätou i ta mätou nei mau hara ìteä-òre-hia nei. E mau mai òe i to mau tävini i te hara ìimi, eiaha roa te reira ia faahepo mai ia mätou, ei reira mätou e maitaì ai, aore aè ra te hara rahi. Te faaìteraa ia a na taiòraa e maha no teie nei täpati,

-Taramo 19, 15 E tiàhia mai te parau a ta ù vaha i reira, e te manaò o ta ù âau, i mua i to aro e te Fatu, e ta ù haapüraa e ta ù ora.

-Nehemia 8, 10 Eiaha e òto, o te òaòa rä no ô ia i te Fatu ra, to òutou ia maitaì.

-1 Torinetia 12, 13 I päpetitohia hoì tätou e te Värua hoê i roto i te tino hoê ra,

-Ruta èv 1, 20 E ôtaro aè ra i taua puta ra, ua tuu atu ra i te tävini ra, pärahi iho ra i raro.

Maha tumu parau teie e faaìte nei te tupuraa no te ôpuaraa faaora a te Atua Nui Tumu Tahi tei toro te mau aa i te mau vahi i reira e noaa ai te ora. Tei haamanaò ia tätou i te parau o te fenua e te mau faufaa ta na e mau ra, e pähono te fenua i te hinaaro o te taata ma te òre e faahuru ê, ia tänuhia te maa e pähono mai te fenua i te maa, ia tänuhia i te tiare, e pähono mai te fenua i te tiare, ia òre rä i reira te àihere, e ài ai i te here o te fenua e huehia atu ai te pö, te àihere ia ta tätou e parau nei e pohue. E parau firi maha ta tätou e färerei nei i teie mahana, te âau, te maitaì, te hoê, te ôtaro, teie mau taò e maha ua faaìtehia to rätou mau parau i roto i te mau tau atoà, ma te âpeehia i te hinaaro o te Atua. Ta te päpaì Taramo ia e faaìte ra, 15 E tiàhia mai te parau a ta ù vaha i reira, e te manaò o ta ù âau, i mua i to aro e te Fatu, e ta ù haapüraa e ta ù ora. O tätou ia i haaputuputuhia i roto i te fare o te Atua i pïhaì iho i te ùputa o te parau. Ia tià ia tätou ia faaroo i te mau tïtauraa a te Atua mai roto mai i te mau parau i päpaìhia, i te päpaìraa a te rähu a te Atua. Te taiò nei tätou i taua mau parau ra i te mau mahana atoà, tei faaìte i te hanahana mure òre o te Atua, te parau nei tätou te maitaì o te maa e to na ìno, te parau nei tätou te nehenehe o te mau tiare e to na mau faanahoraa, te ua, te mataì, te mahana, te mau ôfaì e mau papaìraa teie a te rahu no te fare Atua, tei mua  tätou i to na aro i te mau mahana atoà, e puta papaì òre hia e te rima taata, na te Atua rä. E mahana moà teie no te Fatu to tätou Atua, i teie parauraa ta Ieremia e faaìte ra, 10 Ua parau atu ra o ia ia rätou, A haere, e àmu i te mäa maitaì, e inu i te pape mäàro, a haapaò atu ai i te tahi tufaa nä te feiä eere ra e mahana moà hoì teie no to tätou Fatu. Eiaha e òto, o te òaòa rä no ô ia te Fatu ra, to òutou ia maitaì. I teie huru parauraa te taata tei faaea fätata e tei ora tämau i roto i te parau, ua horoà te parau ia na i te haapiiraa e tano atoà ai o ia e taiò i te mau mea të òre te mata o te tahi atu e ìte. Mai te reira atoà te tarià. Ia taì te manu i te pö, ua ìte roa te tahi e, e taata të haere atu ia na ra ia poìpoì aè ; âreà te tahi ra, e âhoahoa roa ia to na tarià i te reira maniania, aita rä o ia e hiroà ra e, te vai ra te tahi faaäraraa i roto i te mea i faaroohia. E tano ia parauhia e, nä roto i te fenua, te haapii noa nei te Atua i te taata i te ora. Te vähi ta te taata i hiroà, te haapiiraa ia e te ìte e noaa mai ra ia na no roto i te fenua. Te toe ra rä i te taata te haapäpüraa i te tüàtiraa e vai ra i roto i te fenua e te Atua. Tei haapaò i te haapiiraa e horoàhia ra e te fenua, e rahi te ìte e te paari e noaa ia na ; tei òre rä i haapaò, te taata vaha maniania roa aè ia e te faahapahapa, fätata e, i te vähi aita e parau, e parau noa ta na. Te tanoraa mau, aita e ôtià to te ìte, aore ra aita tätou i ìte i to na ôtià. Ia parau o Pauro e, 13 I päpetitohia hoì tätou e te Värua hoê i roto i te tino hoê ra, E fäìraa faaroo teie na Pauro i te parau no te tumu o te tino o te taata i ta te Atua i hämani, e Parau te Atua, e no roto te mau mea atoà e vai nei i te parau i te püraa mai, ta tätou ia e parau nei e, te rahu a te Atua. E no te mea no roto mai te reira mau mea i te parau, ua ìte ia tätou i te parau, inaha e parau tätou, te parau te reira a te Atua. Te reira te parau mätamua ta te Atua i parau e ta na i päpaì, i raro i te tai, i nià i te fenua, i roto hoì i te reva, e ua ìte atoà tätou i te huru parau e hanahana ai te Atua. Ia òre tätou ia fifi i mua i te märamaramaraa o te mea ta tätou e parau nei, e faataa maitaì tätou i te räveà ta te taata e faaòhipa nei no te faaìteraa i to na manaò, e ta na iho huru parauraa, tei taa ê i ta te tahi atu pupu taata ta te Atua i haapärahi i nià i te tua o te fenua. Mai teie puta i taiòhia e Ietu i roto i te tunato no Nätareta Ua tuu mai ra rätou i te puta a te perofeta ra a Ìtaia i ta na rima, e ia hohora aè ra o ia i taua puta ra, ìte iho ra o ia i te vähi i päpaìhia ra Tei nià iho ia ù te Värua o te Fatu, o ia i faatähinu mai ia ù ei poro haere i te parau maitaì i te taata rii, ua tono mai o ia ia ù ei faaora i te feiä âau òto, ei poro haere i te ora no te tïtï, e ia hiò faahou te matapö, e ei tuu hoì i te feiä i paruparu,  ei poro haere i te mätahiti e ìtehia mai ai e te Fatu ra. 20 E ôtaro aè ra i taua puta ra, ua tuu atu ra i te tävini ra, pärahi iho ra i raro. Ua tiàtonu mai ra te mata o to te tunato atoà ia na. Ua parau atu ra o ia ia rätou Teie nei parau i päpaìhia ta òutou i faaroo iho nei, ua tupu ia i teie nei mahana. Te taata tei färii ia hitihia o ia e te märamarama o te parau, ua ineine ia taata i te färiiraa i te ora. I pärahi ai o Ietu i mua i teie mau taata tei faaroo i te mau parau i faahitihia, e Ietu no Na. I ôtaro ai i te puta no te haapäpü O ia tei tonohia mai no te ärataì i te nünaa o te Atua i roto i te ora. Te mea ia ta tätou e tiàturi nei, e ta tätou e faì nei i te faaroo i te tumu hoê no te ora mure òre. Te haapii noa mai ra te Parau a te Aua ia tätou i te ora, ia faaruè tätou i te horoà a te Atua, e faaruè atoà te maitaì e te hau ia tätou. Te tanoraa mau, eere tätou terä e faaruè ra, o tätou rä terä e faaruèhia mai ra. No te mea rä e täpaò te parau a te Atua no te Here, mai te Aroha atoà, te mea noa te reira e horoà faahou i te taata i te ora, eiaha nä roto noa i te faarooraa, nä roto rä i te hoì-roa-raa i te vähi no reira mai teie Parau, oia hoì te hoìraa i te fenua ra. No Ietu, eita e ravaì noa i te reira, te mea e hinaarohia ra i te taata te fänau-faahou-raa ia, oia to te taata färiiraa i ta te fenua faaâpïraa i te taata. Ia haapotohia, teie ia to na faaauraa  ua hinaaro òe i te ora, e hoì i roto i te tumu o te ora. No reira e au mau teie faaäuraa no te firi mäha, hoê fenu na te Atua, ta te Tämaïti, ta te Värua Maitaì, ta te Taata, te auraa te hoê nei tätou i roto i te ôpuaraa faaora a te Atua Nui Tumu Tahi.

Teraì òr. Faatura.

Ioane 2, 1-12 Ueue

Tāpati  20  no Tënuare 2019.

Ueue

Taramo 96

1 E himene i te Fatu i te himene âpï, e himene i te Fatu, e te mau fenua atoà nei. 2 E himene i te Fatu, e haamaitaì i to na iòa, e faaìte i te ora na na eiaha ei mahana tuua. 3 E faaìte i to na hanahana i roto i te mau êtene, e ta na ra mau òhipa taa ê i roto i te taata atoà ra. 4 E rahi hoì te Fatu, e ia rahi hoì te haamaitaì ia na e ia rahi hoì to na mataù-raa-hia i te mau atua atoà ra. 5 Te mau atua atoà o te mau êtene, îtoro faufaa òre ia, âreà o te Fatu na na i hämani i te mau raì ra. 6 Te tura e te mana tei mua i ta na aro. Te püai e te nehenehe tei to na ra ia vähi moà. 7 Hö atu i te Fatu, e te mau fëtii o te taata atoà nei, hö atu i te Fatu i te hanahana e te püai. 8 Hö atu i te Fatu i te hanahana e au i to na ra iòa, ei ö te hopoi mai ia tomo i to na ra mau hëtere. 9 E haamori i te Fatu mä te tura moà ra, ia rürütaina òutou ia na, e te fenua atoà ra. 10 A parau na i rotopü i te mau êtene e O te Fatu te arii, e haamauhia te fenua e òre roa e âueue. Te haavä nei hoì o ia i te mau taata mä te parau tià.11 Ia reàreà te mau raì ra, e ia òaòa te fenua, ia haruru te tai e to na îraa atoà ra 12 Ia ôuàuà te mau ô e to roto atoà ra E ia himene hua mai te mau räau o te vähi ururäau ra 13 i te aro o te Fatu, te haere mai ra hoì o ia, te haere mai ra o ia e haavä i te fenua. E haavä o ia i te ao nei mä te parau tià, e te mau taata atoà ra mä te parau mau.

Ìtaia 62,1-5

To te perofeta hinaaro rahi ia tupu te ètärëtia.

1 No Tiona nei i òre ai au e mämü noa ai; e no Ierutarëma nei i òre ai au e pärahi noa ai; e ia püroro atu ta na parau tià mai te märamarama rahi; e te ora nä na, mai te rama e ura ra. 2 E ìte te mau fenua i te parau tià na òe ra; e te mau arii atoà i to òe ra hanahana e maìrihia òe i te tahi iòa âpï, na te vaha o te Fatu e maìri i nià ia òe ra. 3 E riro hoì òe ei toröna ùnaùna i te rima o te Fatu; ei hei arii i te rima o to Atua ra. 4 E òre òe e parau-faahou-hia atu, E tei faaruèhia e e òre hoì to fenua e parau-faahou-hia, E tei ano e e parauhia rä òe e, E te mea hinaarohia e au e, e to fenua, Te fenua faaïpoïpohia nä te Fatu hoì e au atu ia òe, e e faaïpoïpohia to fenua. 5 Mai te taata âpï e faaïpoïpo i te paretenia nei, e faaipoipo atoà to tamarii tamäroa ra ia òe; e mai te täne âpï e òaòa i ta na vahine; e òaòa atoà to Atua ra ia òe.

1 Torinetia 12,4-11

4 E rave rahi te huru o te mau mea i horoàhia, hoê rä Värua. 5 E rave rahi ä hoì te toroà, hoê rä Fatu. 6 E rave rahi ä hoì te òhipa, hoê rä Atua e òhipa i te mau mea atoà i roto i te taata atoà. 7 Ua horoàhia ta te Värua faaìte i te taata atoà, ia maitaì paatoà. 8 I horoàhia mai te parau paari e te Värua, i te hoê ra; e i horoàhia mai e taua Värua ra te parau e noaa ai te ìte, i te hoê. 9 Ta te tahi ra, o te faaroo ia, na taua Värua ra; ta te tahi ra, o te ìte ia i te faaora maì na taua Värua ra. 10 Ta te tahi ra, o te rave täpaò ia; ta te tahi ra, o te tohu ia; ta te tahi ra, o te ìte värua ia; ta te tahi ra, o te parau èê ia; ta te tahi ra, o te faaìte parau èê ia. 11 Na taua Värua hoê ra i òhipa i taua mau mea atoà nei, i te ôpere-mäite-raa i ta te taata atoà i ta na i hinaaro ra.  

Ioane 2,1-12.

Te pape i faarirohia ei uaina, 1 E ruì toru aè ra, e faaipoiporaa tei Tana i Tarirea ra, i reira atoà te metua vahine o Ietu. 2 E parauhia mai ra Ietu e ta na mau pipi atoà e haere i taua faaipoiporaa ra. 3 E pau aè ra te uaina, ua parau mai ra te metua vahine o Ietu ia na iho Aita a rätou uaina. 4 Ua parau atu ra Ietu ia na E aha ta òe ia ù nei, e teie nei vahine. Aore ä i tae i to ù ra hora. 5 Ua parau atu ra ta na metua vahine i te mau tävini ta Na e faaue mai ia òutou na, e nä reira òutou. 6 Te vai ra nä hue pape ôfaì e ono, e piti pato e ö i te hue hoê, e e toru hoì, i vaiihohia i reira no te peu o te tämäraa a te âti-Iüta. 7 Ua parau atu ra Ietu ia rätou A faaî na i te mau hue i te pape. Ua faaî iho ra rätou, e tae roa aè ra i te àuvaha. 8 Ua parau atu ra o ia ia rätou A faatahe na, e hopoi atu i te tävana o te ôroà nei ra. Ua hopoi atu ra hoì rätou. 9 E ia tämata iho ra te tävana o te ôroà i taua pape i faarirohia ei uaina ra, no te mea aore o ia i ìte i te noaaraa mai (âreà te mau tävini i faatahe mai i taua pape ra, ua ìte ia), ua parau atu ra te tävana i taua täne âpï ra, 10 nä ô atu ra O te uaina maitaì ta te taata atoà e tuu mai i te mätamua ra, e ia inu te taata e ia rahi, ei reira te mea ìno aè, vaiiho iho nei rä òe i te uaina maitaì, e i teie nei i hopoihia mai ai 11 I Tana i Tarirea i te raveraa Ietu i teie nei täpaò mätamua, i te faaìteraa i to na hanahana, e ua faaroo aè ra ta na mau pipi ia na. 12 E i muri aè i te reira, haere atu ra o ia i Taperenaumi, o ia, e ta na metua vahine, e ta na vai taeaè, e ta na mau pipi. Aita reà rä o rätou puè mahana i reira.

Manaò

Ua haere mai tätou mai roto mai i te fare Atua hämani-òre-hia i te rima taata, i roto i te fare hämanihia e te taata, no te haamori i te Atua Nui Tumu Tahi, te tere ia i tae mai ai tätou nei no te haamori e no te haamaitaì. Ua rau ta tätou mau äniraa, e to tätou mau hinaaro, hoê anaè ra horoà ta te Atua te Aroha e te Here ia noaa te maitaì i reira mau e tupu ai to tätou tere i tae mai ai tätou. Eiaha tätou e pure, èi pure tävaha ia riro ra èi pure mau ta tätou e äni ia faaroo tätou i ta tätou äniraa e faaroo atoà mai o Ietu. E te mau tävini, e te mau hoa, e ueue tätou i ta na parau e haamata i te poìpoì roa e ruì noa atu te mahana, e ueue tei ia Na te hopeà e te manuiraa ia toro aa te parau ora i te mau vahi atoà ia àti mai te maitaì ia ôtohe te ìno. E ueue tätou na te hiti èà, na te vahi ôfäfaì, i roto i te âau ma te haamanaò i to te raì i te feiä tei faaroo mai e faaìte tätou i te Metia. Oia atoà ia faaroo tätou te haapotoraa a na taiòraa e maha nei,  

-Taramo 96, 11 Ia reàreà te mau raì ra, e ia òaòa te fenua, ia haruru te tai e to na îraa atoà ra.

-Ìtaia 62, 4 Te fenua faaïpoïpohia nä te Fatu hoì e au atu ia òe, e e faaïpoïpohia to fenua.

-I Torinetia 12, 11 Na taua Värua hoê ra i òhipa i taua mau mea atoà nei, i te ôpere-mäite-raa i ta te taata atoà i ta na i hinaaro ra. 

-Ioane 2, 5 Ua parau atu ra ta na metua vahine i te mau tävini ta Na e faaue mai ia òutou na, e nä reira òutou.

Te parau e täamu ra na taiòraa e maha nei Ueue, ua tomo tätou i roto i te tau no tïtauraa, e tau ia no te ueueraa i te parau Ora a te Atua Nui Tumu Tahi, i te mau vaamataèinaa atoà tei reira te taata i te nohoraa. E aha te Ueue, e taò mäòhi teie e òhipahia i nià i te hoê âmaa o te tumu raau e ueuehia e faahaùti tämau ia purehu te maa tei òre ia noaahia i te pöfaì ia topa i nià i te fenua, oia atoà te taata faaàpu, e  parau atoà  nei tätou e ueue te tino e haere e ârearea. I täpeàhia mai ai teie taò te ìtehia nei te puai e te värua e tupu ra i roto i te òhipa i te vahi reira e topa ai te parau. E ueue i te poìpoì roa e tae noa atu i te ruì na te Atua te reira e faatupu, ei faaìteraa i te iòa o Ietu Metia. Mai teie ta te päpaì Taramo e faaìte ra 11 Ia reàreà te mau raì ra, e ia òaòa te fenua, ia haruru te tai e to na îraa atoà ra. No te mea te ueuehia ra te parau ora a te Atua Nui Tumu Tahi ma te òaòa, ma te ìte òre i te rohirohi noa atu te paari o te repo, e tämau ä i te faatupu i te hinaaro o te Atua Nui Tumu Tahi ia noaa te maitaì i roto i te tau ueueraa no te haafänau te fenua ia ìteähia te ruperupe e to na heeùri e rohi ra tätou ta te reira hopoià, ta te reira utuà, ta te reira faaìteraa ia òaòa  te nünaa. I reira noa e tupu ai teie parau ta te perofeta Ìtaia no Tiona nei au i òre ai e mämü, no Ierutarëma i òre ai e pärahi noa ai. Te poto nei te tau e te roa noa atu ra te èà no te tere faaìte i te parau òaòa no te hau Atua ta te fenua e mau ra, i teie parauraa atoà a Ìtaia, 4 Te fenua faaïpoïpohia nä te Fatu hoì e au atu ia òe, e e faaïpoïpohia to fenua. E parau faatupu ora teie no te here, tei here i ta na òhipa e poupouraa te reira na te Fatu òhipa o ta Ietu ia e mau ra i roto i te aroha. I reira te ìno e taaê ai i te âau ma te haapaò i te mau haapiiraa ma te tütonu ia Ietu here. E òre e tupu mai te peàpeà e te mau àti, i roto ueueraa i te parau ora a te Atua, o Ietu te ra e haamarü ra ia tätou i roto i te mauiui. Ta Pauro ia e parau nei i to Torinetia, 11 Na taua Värua hoê ra i òhipa i taua mau mea atoà nei, i te ôpere-mäite-raa i ta te taata atoà i ta na i hinaaro ra. Tei hinaaro ra haere mai, e ueue anaè tätou mai i ò nei atu e tae roa i te ùtuafare i roto i te mau aroä e te mau vahi atoà tei reira te mau tamarii a te Atua i te nohoraa to tähatai e to uta. I te mea ua àua haaàtihia tätou i te mau maitaì o te aru, tei faaìte tämau noa ia tätou te nehenehe o Mäòhi Nui mai te ùnaùna no te hoê ôroà faaipoiporaa tei faaineinehia mai te mea o te Rähu atoà teie e âmui nei ia tupu te òaòa. Te òhipa mau ia i tupu i Tana i Tarirea. Tei roto te mau manihini i te òaòa te ârearea ra, ua pau te uaina ua haafatata te metua vahine i ta na tämaïti no te faaìte ua pau te uaina. E parau atu ra O ia, e aha ta òe ia ù nei aore ä i tae i to ù hora, te hora e täati ai te Metia te ao nei i roto i te ora mure òre. 5 Ua parau atu ra ta na metua vahine i te mau tävini ta Na e faaue mai ia òutou na, e nä reira òutou. Ûàna faahou atu ra te ârearea te òaòa i roto i te mau manihini e tae noa atu te tävana  o te ôroà, o te mau pipi anaè tei ìte i te òhipa i ravehia e Ietu i riro mai ai te päpe e uaina, i roto i te pau ua faarahi o Ietu i te òaòa o te taata, ta tätou i roto i te pau e faarahi ta tätou i te peàpeà, te òto o te taata. Tei teie vahi to tätou tïtauraahia ia ueue te parau ora i te vahi ua pau to tätou nünaa e faaitoito tätou i te ueue i te hinaaro o te Atua Nui Tumu Tahi.

Teraì  òr Faatura





Pureraa Tau 2019 IRAVA TUMU - (Ìtaia 53, 2)

IRAVA TUMU - (Ìtaia 53, 2)

I mua i te Tumu Nui, mai te ohi âpī ra hoì o ia

i te tupuraa, e mai te aa i te repo marō ra : aita o na

huru e te nehenehe, ia haapaò atu tātou ia na, aita hoì

o na e hohoà hinaaro atu ai tātou ia na.

Na te Tuhaa 4 i faaineine ta tātou puta.

Te âpaparaa

Àpi 1 -Te tahi mau tätararaa poto no te mau tiàraa ta tätou e parau nei no te Atua

Àpi 3 -Te ômuaraa

Àpi 7 -Te papa haamori

Àpi 13 -Te ôroà a te Fatu

Àpi 15 -Te mahana mätämua

-Tāpati 6 no Tënuare 2019

Àpi 20 -Te piti o te mahana

-Monirē 7 no Tēnuare 2019

Àpi 26 -Te toru o te mahana

-Mahana piti 8 no Tēnuare 2019

Àpi 30 -Te maha o te mahana

-Mahana toru 9 no Tēnuare 2019

Àpi 33 -Te pae o te mahana

-Mahana maha 10 no Tēnuare 2019

Àpi 37 -Te ono o te mahana

-Mahana pae 11 no Tēnuare 2019

Àpi 42 -Te hitu o te mahana

-Mahana māa 12 no Tēnuare 2019

Àpi 47 -Te vaù o te mahana

-Tāpati 13 no Tēnuare 2019

Te tahi mau tätararaa poto no te mau tiàraa ta tātou e parau nei no te Atua.

Te Tumu Nui : Aita te Māòhi i parau aè nei e, te iòa o te Atua, o te Tumu Nui ia. I vai noa na ihoā te reira parauraa i roto i te mau tupuna, eiaha rā no tē faaiòa i te Atua. Inaha, eita te vaha taata e tià ia parau i te iòa o te Atua, no to na moà. I roto i te pīpīria, te parau atoà ra te âti-iuta i te Atua, te Fatu, te manahope, te mure-òre, te teitei nui e te vai noa atu ra. E te parau nei te Māòhi i te Atua, te Rahu Nui, te Tumu Nui, te Atua Nui Tumu Tahi e te vai noa atu ra. Hoê noa rā te reira huru parauraa e terā ta te âti-iuta.

Teie te mau tātararaa i muri nei.

1-Te Tumu Nui. Ta te taata te reira hiòraa e ta na fāìraa i to na parau i mua i te Atua. E ohi te taata, o te Atua te Tumu. Te huru o te Tumu, te huru atoà ia o te ohi. Te mā o te Tumu, te mā atoà ia o te ohi. Te taata ia i parau ai ia na iho e, e ohi mā. No te haamaitaìraa i te parauraa, i faaòtuì ai tātou i te parauraa i nià òhi. Māòhi. Âreà te Tumu, o te Atua iho ia. E no te mea, i nià e i roto i te Atua iho, ua hope te mau mea atoà e ora ai te taata, tātou ia i tuu atu ai teie Nui i pīhaì iho i te Tumu. Teie atu ra te auraa o teie parauraa e, Te tumu Nui. I roto i te Atua, aita e mea e èrehia e te taata. Ua hope te mau mea atoà no te tāatoàraa o to na ora. (Taramo 22).

2-Te Rahu Nui. E parauraa atoà teie na te âti-iuta. Ua riro roa rā, ei parauraa na te Māòhi. No tē haapāpū mai ia tātou e, a taa noa atu ai te parau no te taata e te puaa, te tāatoàraa rā o te mau mea âua haaàti nei ia tātou, e o tē faaora ra ia tātou, na te mana anaè te reira o te parau a te Atua i faatupu mai. No te mea e, aita e mea eere na te mana o te Parau a te Atua i faatupu mai, i parau ai te Māòhi e, « Te Rahu Nui ».

3-Te Atua Nui Tumu Tahi. Tē haamanaò mai nei teie parauraa ta tātou, a tahi : i te rahi, te teitei, te manahope o te Atua.

E te piti : Te ôtahiraa  o te Atua. O na noa ihoā to na Tumu, aita atu, e Atua tupu ôivi noa O Ia. Aita O Na e tītau i te tahi mea no rāpae Ia Na no tē faaora Ia Na. I roto i to na rahi, to na î, to na teitei, to na manahope, hoê noa ihoā O Na.

ÔMUARAA NO TE PURE TAU

Te faaroo Māòhi mau, te ora ia o te nūnaa Te taiò nei te taata i teie mahana i te mau pāpaìraa atoà ei tautururaa e te haapāpūraa i te vairaa o to na manaò. Hau roa atu ia parau tātou e, e feiā faaroo aore ra e taata faaroo, aita atu ia e pāpaìraa taiò-rahi-roa-hia aè, na reira hoì te mau haapiiraa tei tuu-atoà-hia mai i roto ia tātou, terā ia e vai ra i roto i te pīpīria. E aita atu e manaò tumu no te reira mau pāpaìraa, e mau parau moà anaè, no te mea te feiā i pāpaì i terā mau papaa parau, mea uruhia ia e te Vārua moà, mea moà atoà ia te mea tei parauhia ia rātou e pāpaì. Âreà Ietu, te na ô noa mai ra ia e, te ìmi nei òutou i te ora i roto i te pāpaì, teie rā hoì te ora i rāpae aè i te reira mau pāpaìraa, eita rā hoì òutou e haere mai ia ù nei ei ora no òutou… (Ioane 5/35-40). No te mau tupuna, aita atu e pāpaìraa aore ra e ìrava tei ìte rātou i te taiò, te pāpaìraa ia tei riro te rahu ei puta matara noa. Te reira ta rātou i ìte ei pāpaìraa moà, te faaìteraa a te rahu ia rātou i te vairaa o te ora e te Tumu o taua ora ra. I te parauraa e te rahu, o na te pāpaìraa moà, i te mea ia te mau ra te rahu i te mā tei au i te hinaaro o te Atua, e no te mea aita atu ta te rahu faaìteraa, te hinaaro ia o te Atua, te auraa te mau atoà ra te rahu i te mā tei au i te Atua, e no te mea e moà te Atua, te mau atoà ra ia te rahu i te moà tei au i te hinaaro o te Atua, i maraa ai ia rātou i te faaìte i te parau a te Atua ma to na mau e to na tià, i parauhia ai to te Parau Mau e to te Parau Tià. Te mea ia i tauturu i te mau tupuna i te oraraa i to rātou faaroo e to rātou tiàturiraa i te Atua. Te tumu atoà ia i pärahi fātata noa ai rātou i te Atua, ìte i te taiò i ta te rahu faaìteraa, ìte atoà rā i te faatura e te auraro i te tāpaò no te here o te Atua Nui Tumu Tahi tei riro ei ora tūatau no te taata. E no te mea e tupuraa atoà te Māòhi no te ôpuaraa e te hinaaro o te Atua, tei ia tātou ia te ìteraa e te faariiraa i taua ora tūatau ta te Atua e hōroà noa nei i te Māòhi. Te vāhi noa e anihia ra i te Māòhi, ia ìte i te taiò e te tītau hoì i te auraa e te Vārua e vai ra i roto i te mau ìrava ta na e taiò ra tei riro te rahu ei faaìte. Te auraa, aita atu e vāhi e roaa ai i te Māòhi te tauturu ia na i te ìteraa i te hinaaro o te Atua maoti rā i roto i ta te Atua Parau tei riro mai ei rahu, oia hoì, te fenua e to na î, te moana e to na î, te reva e to na î e tae roa atu i te raì e to na î, te mea ia e tauturu ia na i mua i te parau o te faaroo. Te Rahu, te vāhi ia e hinaarohia ra i to teie nūnaa ia papa ei faaroo e ei tiàturiraa no na i te Atua, no te mea, aita atu e vāhi e ìte ai te Māòhi i te Atua, i roto ia i te rauraa o te mau mea atoà tei haamanaò mai i te parau o te Ora ta te Atua Nui Tumu Tahi i faaineine ei ora no te mau nūnaa atoà o te ao nei. Te auraa, te Rahu no te Māòhi, eere noa ia i te î o te fenua, te î o te reva e to te miti, te mea mau rā te reira e haamanaò tāmau noa mai ra i to teie nūnaa i te Atua, tāpaò te reira no te haèhaa o te âau e te pūai o te tiàturiraa ta te Māòhi e tuu ra i nià i te Atua. Ta tātou tuhaa i teie mahana e te mau tāvini o te Atua, i roto i te âehuehu o te oraraa ta tātou e ora nei, te haamanaò tāmauraa ia i to teie nūnaa tei âhure-roa-hia to na faaroo e to na tiàturiraa e te mau peu rau e manii vai puè noa mai nei na rāpae mai, te haamanaò-noa-raa ia na e, ia parau anaè o na i te Rahu, eere noa ia i te î o terā mau mea atoà ta te mana o te parau a te Atua i faatupu, te Atua ihoā rā ta te Rahu e faaìte noa mai ra. E no te rahi o ta tātou tīpee i te mau mea i na vaho mai, eiaha ihoā ia e maere ia pārahi noa tātou i roto i te autā i teie mahana, e inaha, ê na te Atua i te tatararaa i te ano, te pōuri e te faufaa òre. E au ra ia hiòhia i teie mahana, te mea mau ta te Atua i faaòre, te mea mau ia ta te taata i tii ei rāveà paparaa na na i to na faaroo. E aha atu ra te auraa no terā reo to Ietu e nā ô ra e, O vau te māramarama o teie nei ao, e te feiā atoà tei pee i te māramarama, e òre ia e haere noa i te pōuri e māramarama ora ia to na. Tāpaò faaìte te reira e, ua ātea te taata i te Atua, ua ātea i te ora e te taamino noa nei i roto i te ano, te pōuri e te faufaa òre. Mai te ohi âpī ra hoì o ia i te tupuraa… E parau teie i tāpeàhia mai ei papa i te parau o te nūnaa, oia hoì aita e parau to te nūnaa Māòhi i rāpae aè i te parau o te fenua, i rāpae aè i te parau o ta na i fāì e, te fenua to na metua vahine faatupu ora. Mai te pāpā e te māmā tei fānau mai ia tātou, tei faaàmu, tei aupuru e tei pāruru ia tātou, oia atoà te fenua i te hiiraa ia tātou ta na tamarii, ia tupu tātou i roto i te rahi o to tātou heeuri i te here e te aroha tei au i to tātou metua vahine faatupu ora e i to tātou Atua i te Raì Tua Tinitini. Ta teie ia taiòraa e faaauraa i te parau o te taata i to te rāau. Te parau o te rāau, te vāhi mau ia i papahia e te nūnaa Māòhi ei tauturu i to na parau, te parau o te taata. E parau atoà rā te reira tei haamanaò mai e, aita e parau to na tei òre i mau to na aa i te repo o te fenua, te auraa, aita e parau to te tahi nūnaa e aita to na aa i mau i raro i te repo. E mai te peu i tumuhia ai to na, no te haamanaò noa atoà mai ia e, te Atua te tumu o parau, te auraa, aita atoà ia to na e parau i rāpae aè i te Atua no reira i parauhia ai to te ohi. Aita atoà e parau to teie rāau tei òre o na e hōroà mai i te hotu tei au i te huru o to na Vārua. E vī ra e vī ia, e ùru ra e ùru ia. E no te Atua i parauhia ai to teie rāua e taata, e tei hau roa atu, no te Atua i parauhia ai to te Māòhi, ia hotu mai ihoā ia te Māòhi i te māa, eiaha tei au i to na haapaò òre, tei au rā i te here fāito òre o te Atua i parauhia ai to te Māòhi. E tano ai ia parauhia i to teie nūnaa e, Māòhi, a here i to òe Māòhiraa, e tupuraa te reira no te hinaaro o to òe Atua i Māòhi ai òe. A ora i to òe faaroo māòhi mau. Tirā rā parau…