Mātaio 11.25-30 Maihoà

Tāpati 05 no Tiurai 2020.

ÔROÀ

Maihoà

Taramo 145

1 Taramo haamaitaì na Tävita. E faateitei ä vau ia òe, e ta ù Atua, e te Arii, e haamaitaì ä vau i to òe ra iòa e a muri noa atu. 2 E haamaitaì ä vau ia òe i te mau mahana atoà nei, e ârue au i to iòa e a muri noa atu. 3 E rahi te Fatu, e ia haamaitaì-rahi-hia, oia ä ia, e òre to na rahi e ìteä ia ìmi. 4 Te mau uì atoà të faarahi i ta òe òhipa, e e faaìte hoì i ta òe ra òhipa mana. 5 E parau vau i te tura e te hanahana o to òe ra mana, e te mau räveà taa ê na òe ra. 6 E parau rätou i te mana o ta òe ra mau räveà mataù, e faaìte hoì au i to òe ra mana. 7 E parau ä rätou i te manaòraa o to òe ra maitaì rahi, e himene hua hoì i ta òe ra parau tià. 8 E hämani maitaì e te aroha to te Fatu, e òre e riri vave, e te faaherehere rahi. 9 Hämani maitaì to te Fatu i te taata atoà, e te vai ra to na aroha faaherehere rahi i nià i ta na atoà ra mau òhipa. 10 E ârue anaè ta òe atoà ra mau òhipa ia òe, e te Fatu, e na to mau tävini moà e haamaitaì ia òe. 11 E parau rätou i te hanahana o to òe ra pätireia, e faatià noa hoì i ta òe ra mau räveà püai.12 I te faaìteraa i te tamarii a te taata nei i to na ra mana, e te hanahana e te manaò to na ra pätireia.13 O to òe ra pätireia, e pätireia mure òre ia, e to òe ra mana, e tae ia i te mau uì atoà ra. 13 E Atua mau te Atua e te haavare òre i roto i ta na mau òhipa.14 Te mau ra te Fatu i te feiä e hià ra, e ua faatià i te feiä e piò i raro ra.15 Te hiò nei te mata o te mau mea atoà nei ia òe, e te horoà mai ra òe i te mäa na rätou i te tau mau.16 Te heheu nei òe i to rima, e te haamäha nei i te hiaai o te mau mea ora atoà nei. 17 E parau tià ta te Fatu i ta na atoà ra mau haereà, e te hämani maitaì i ta na atoà ra mau òhipa.18 Te fätata mai ra te Fatu i te feiä e tiàoro atu ia na, i te feiä atoà i tiàoro atu ia na mä te haavare òre. 19 E faatià o ia i te hinaaro o te feiä i mataù ia na, e faaroo mai o ia i ta rätou tiàoro, e e faaora hoì ia rätou.20 Te tiaì nei te Fatu i te feiä i hinaaro ia na, âreà te feiä paieti òre ra, e haamouhia ia e ana. 21 E parau ta ù vaha mä te ârue i te Fatu, e ia haamaitaì te taata atoà i to na ra iòa moà e a muri noa atu.

Tëtäria 9.9-10

Te metia haèhaa e te hau

9 A òaòa hua na òe, e te tamahine o Tiona e a pii na, e te tamahine o Ierutarëma e; ìnaha, te haere mai ra to arii ia òe ra: e parau tià tä na, e o te Ora hoì o ia, haèhaa tö na, i te pärahiraa i nià i te âtini, e te pinia, te fanauà o te âtini.10 E faaòrehia e au te pereoo i Èferaima, e te puaahorofenua i Ierutarëma, e faaòre-atoà-hia hoì te fana tamaì: e nä na e parau i te mau êtene i te parau hau: e riro to na hau mai te miti mai e tae noa atu i te tahi miti, e mai te pape mai e tae noa atu i te mau hopeà o te fenua ra.

Rōma 8.9-13

9 Aore rä òutou i au i ta te tino ra, te au nei rä i ta te Värua ra, no te mea te pärahi ra te Värua o te Atua i roto ia òutou. Te ère ra rä te hoê taata i te Värua o te Metia ra, eere ia o ia i te taata no na. 10 E tei roto te Metia ia òutou ra, te ora nei ia te Värua i te parau tià, ua pohe mau rä te tino i te hara. 11 Te pärahi ra to na Värua i roto ia òutou to tei faatià ia Ietu i te poheraa ra, o tei faatià i te Metia i te poheraa ra, na na atoà ia e faaora i to òutou mau tino pohe ra i to na Värua i pärahi i roto ia òutou na. 12 E teie nei, e te mau taeaè ra, e àmutärahu tätou, eere rä i ta te tino a haapaò atu ai i ta te tino ra. 13 Ia haapaò hoì òutou i ta te tino ra, e pohe ia òutou; ia tinai rä òutou i ta te tino ra i te Värua, e ora ia òutou.

Mātaio 11.25-30

Te Metua e te Tamaiti

(Rut 10.21-22)

25 I taua taime ra, ua parau atu ra Ietu: E haamaitaì au ia òe, e ta ù Metua, e te Fatu o te raì e te fenua, i te mea i huna ê noa òe i teie nei mau òhipa i te feiä paari e i te feiä märamarama, e ua heheu mai i te mau àiü. 26 Oia ia, e ta ù Metua, ua au te reira ia òe. 27 Ua hope roa te mau mea atoà i te püpühia mai e ta ù Metua ia ù nei, e aore roa te hoê i ìte i te Tamaiti, mäori rä o te Metua, aore hoì te hoê i ìte i te Metua, mäori rä o te Tamaiti, e ta te Tamaiti i hinaaro i te heheu atu ia na.

A rave mai i ta ù tuto

28 E haere mai òutou ia ù nei, e te feiä atoà i rohirohi, e tei teiaha i te hopoià, e höroà atu ia òutou i te faaearaa hau. 29 A rave mai i ta ù tuto i nià ia òutou, e ia haapiihia òutou e au, te marû nei hoì au e te haèhaa nei ta ù âau: e e noaa hoì te faaearaa hau i to òutou värua. 30 Te marü nei hoì ta ù tuto e te mämä nei ta ù hopoià.

Manaò.

Eiaha ia moèhia ia tätou te ture a te Atua e haamanaò mai ra te tauturu no roto i to na aroha e to na here. Mäìti-noa-hia ai tätou e te Atua ei àpu färii ora, eita to tätou parau e tano ia faataa-ê-hia i to te fenua no reira tätou i te raveraahia mai. Eiaha atoà rä ia moèhia ia tätou e, eita te parau o te fenua e tano ia faataa-ê-hia i to te raì, no te mea hoê ä àpu to räua : te vai. Ia parau hoì Ietu i te horoà a te fenua e : o ta ù tino tenä : o ta ù toto tenä, aita atu e auraa to teie fäìraa maoti rä, ta na faateniteniraa i te fenua, to na hoì hiòraa i te fenua mai te tahi taata ora ra te huru. Ua tae roa teie faateniteniraa i te òreraa Ietu e haamä e te riroraa ei teòteòraa no na te parauraa ia na e : e Tamaiti na te taata, oia hoì e Tamaiti na te Atamu, e Tamaiti na te fenua. E mai te peu e Tamaiti atoà Ietu na te fenua, ua riro atoà ia te fenua ei metua vahine no na. Te auraa ra, ua haere mai Ietu i roto i te mau tamarii a te taata, oia te mau tamarii a te fenua, aita rä rätou i färii ia na. O Ietu hoì, mai te taata nei, mea fänau-püfenua-hia o ia, oia hoì e mea fänau-fenua-hia mai. No reira, mai te peu ta te Värua i fänau ra, e värua ia, ta te tino e fänau ra, e tino ia. E tano atoà tätou e parau e : ta te fenua e fänau ra, e taata ia. Haamanaò atoà rä tätou e, i roto i te reo mäòhi, te fenua e te püfenua, taua mea nei ä ia, na te faaòhiparaa noa räua i faataa ê. Te fenua mätamua o te taata, oia te fenua no reira o ia i te püraa mai i te ao nei, te vahine ia. Te reira atoà te fenua mätamua o Ietu. O te reira mau te vahi e türamahia ra e na taiòraa e maha, teie te haapotoraa.

-Taramo 145, 9 Hämani maitaì to te Fatu tei to na aroha faaherehere i ta na mau òhipa.

-Tëtäria 9, 10 E riro to na hau mai te miti, mai te pape e tae i te mau hopeà o te fenua.

-Roma 8, 12 E teie nei, e àmutärahu tätou, eere i ta te tino a haapaò atu ai i ta te tino ra.

-Mätaio 11, 29 A rave mai i ta ù tuto i nià ia òutou, e ia haapiihia òutou e au, te marû nei hoì au e te haèhaa nei ta ù âau: e e noaa hoì te faaearaa hau i to òutou värua. 

Ia faaroo  tatou  i teie  reo to Ietu, e haamanaò tatou i te parau  tohu a te perofeta ra a Tetaria  i te pene 9 i te ìrava 9 i te parauraa A òaòa hua na òe e te tamahine a Tiona e, a pii na, e te tamahine a Ierutarëma e, inaha te haere mai ra  to Arii ia  òe ra, e parau tià ta na, e o te ora hoi o ia, haehaa to na, i te parahiraa i nià i te âtini e te pinia te fanauà o te âtini. E teie te reo no Ioane Päpetito i te naòraa e à hiò na i te Arenio a te Atua tei hopoi è atu i te hara o te ao.

E tià ia tätou i te  parau e, teie na ìrava  e täipe  ia  no ta tätou parau no teie mahana. I te mea te âtini e ànimara amo tuto, ei haamamaraa i te hopoià a te taata, o te fauraò ia te reira o Ietu, èi faaìteraa  i to na  marü, e te haehaa. Areà ra te Arenio e tutia maitaì  ia ei haamamaraa i te hopoià  o te hara.

Ta tätou  ra pene  parau Mataio 11, 25-30, e himene àià ia  tei Iupiri  i te parau a te Atua i roto pü  i te taata. Tei faaite i te tahi mau parau  tei hunahia  i te feia paari. Oia hoi  teie feia, e feia  àravihi  ia  i nià  i te parau  no te Ture. Te haamaitaìraa ia a te Tämaïti  i te Metua, no te tïtauraa  i te mau taata  atoà  tei teimaha i te hopoià ia tiàturi i te mau òhipa maere a te Atua tei faatupuhia  e Ietu  i te mau vahi atoà  tei ère  i te ora. I hunahia ai  te  mau  parau  no te ìteraa  i te Atua, i te feia mata î oia hoi i te feia paari, te mau haapii ture, e te tohu. Eita ra teie i te parapore ta Ietu e faatià nei, te hinaaro nei  ra O ia  ia färiu te feia  e tïtau  nei i te ìteraa i te Atua, i nià  i te tiàturiraa o te Ture a te Atua, ei haamäruraa te tuto, eiaha ia riro mai te hoê  faautuàraa, ia riro ra mai te hoê arataìraa, haapiiraa e aore faaâpïraa i te reni no te èà e tae ai i te Atua  ra. No reira  o Ietu  i haapäpü maitaì ai e, ua hope  te mau mea atoà i te püpühia i roto ia na, o tei faatupuhia na roto i te faaoraraa e te upootiàraa  i nià i te pohe. Oia hoi, ua ìte o Ietu i te Atua, to te ao nei ra aita ia i ìte o  Ietu  e, e tamaiti na te Atua, ua ìte te Atua ia  Ietu, to te ao nei ra, aita ia i ìte i te Atua e Metua ia no Ietu. Teie te tahi o te mau parau i hunahia i te feiä paari o ta tätou nei taiòraa, èi haapotoraa ua ateä teie mau taata i te ôpuaraa faaora a te Atua. Ta Ietu ra e ani nei, ia ìte-ä-hia, te aroha mau no te patireia parau tià o te Atua. Na roto te haereraa i mua ia na noa  atu te huru o te teimaha te hopoià, e tià ia na ia faaora. Ma te haapaò i te teimaha no te mau haapiiraa a te Evaneria, ia noaa te ora i te Varua. O teie noa ia ta Ietu e hinaaro nei e faaìte i te feiä e rave rahi, e tiàturi nei i ta te Atua  haamaitaìraa. No te ìteraa e, te Ture a te Atua, mai te hoê ia taura tävaha, te ärataì  i te puaahorofenua i te vahi e au ia täpae. O te huru atoà  ia te ìteraa i te Atua, ia mau te taura tävaha o te Evaneria, i reira e maru ai te mau  tuto teimaha, i reira atoà e mama ai te mau hopoià, mai te vavai ra te huru i roto i te reva. 29 A rave mai i ta ù tuto i nià ia òutou, e ia haapiihia òutou e au, te marû nei hoì au e te haèhaa nei ta ù âau: e e noaa hoì te faaearaa hau i to òutou värua.  Aita o Ietu  e faaite nei i ù nei i to na paruparu, te haapäpü  nei ra O ia i to na puai ei faaìteraa i te mau taata e rave rahi, o te tahi teie raveà. E ära atoà ra te vai nei te maru e faatupu nei i te faatau. Te maru ra ta Ietu e parau nei, te haamäharaa rohirohi ia, i te teimaha  o te mau òhipa. Oia mau  tei roto i te maru e ìtehia ai te puai o te Atua, e mama  ai te mau hopoià atoà. Ua faaòhipa anei te Atua  i to na puai tahoo i nià i te mau ènemi o to na nunaa aita  roa, ua here O ia  ia rätou no te mea tei roto  rätou i  ta na òpuaraa. E aha ia ta Ietu e tïtau nei na roto i teie reo?

Ia haamorihia ia, ia haamaitaìhia ia, ia faahanahanahia ia, te Atua, na roto i te mau pureraa e te mau òhipa o te faaroo, ia riro ia ei haamaitaìraa i te Atua no to na mau maitaì, e noaa nei ia tätou i te mau mahana ta täìtahi  ma te faahanahana i to na Ioa. I reira e ìtehia ai te huru mau o te Atua tei haapii e tei tïtau i to na nunaa. Ia tupu teie mau faaueraa e ìtehia ai te rima aroha o te Atua, tei faatià, tei paruru, e tei faaora, tei maìri i raro aè i te tuto o ta Ietu ia tïtauraa i te mau taata paieti atoà ia faaitoito i te pure tei reira te marüraa te mau tuto, tei roto i te Metia tei tiàfaahou, e no te mau hopoià eita ia e riro faahou ei mea teimaha, e riro ra ei mea mama. Te marû nei hoì au e te haèhaa nei ta ù âau: e noaa hoì te faaearaa hau i to òutou värua. 

E reo tïtau ä teie no Ietu ia tätou ia haapaò i te mau òhipa ta te Atua e faaue nei ia aroha, i te mea O ia tei aroha mai ia tätou na mua roa. I hau ai O ia, i maru ai no te faataui i te taata hara ei taata tiàma, te taata paieti òre, ei taata paieti, te taata paruparu, ei taata puai, te òhipa teimaha, ei òhipa mama, te hopoià ei upootiàraa  no te òhipa, e te vai atu ra....

O te huru ia teie, no te reo tïtau o Ietu, tei tämahanahana i te feia rave òhipa a te Atua, tei ìte i te maru, e te mama te òhipa ia tiàturi päpü i te Atua.

Te tuto, e raau teie  tei  taraihia haamenemene a tuuhia atu ai i nià i te àî o te âtini e aore i nià i to te puaahorofenua, to te puaatoro. I nià  teie raau e täamuhia ai  te mau taura no te hutiraa i te ârote.

O ta Ietu e faaau nei  i te mau täpura òhipa e tià i te mau taata faaroo ia haapaò, i te âroteraa i te mau vahi i reira e ueuehia te mau huero o te Evaneria. I te tuuraa tätou i to tätou tiàturiraa i roto i te Metia i reira te tupuraa teie reo, te maru nei  hoi ta ù tuto, no te mea ua rave atoà tätou i ta tätou  tuhaa òhipa  ei faaìteraa i to tätou täamuraa i nià i to na mau hinaaro; e te mama nei ta ù hopoià, no te mea  te haapaò atoà ra tätou  i ta tätou tuhaa, na roto ia i te haamoriraa, e te haamaitaìraa i te Metua tei aroha mai i to te ao nei. E na roto  i teie mau òhipa  e ravehia nei e tätou  e mama ai te mau hopoià.

Te mama nei ta  tätou  mau  hopoià, i te  mea o te  Fatu teie  i pïhaìiho ia tätou ei  faaitoitoraa ia tätou. O ta Ietu  e hinaaro  nei ia mama te tuto  a te feiä  e tiàturi nei  i ta na mau òpuaraa. I tuuhia ai te tuto i nià i te àî, o te haapäpü te tähiraa âvae i nià i te fenua, na te fenua e höroà i te puai i te täatoàraa o te tino, ia mau te ârote i roto i te fenua i reira e maitaì ai te paì no te ueueraa i te huero maa. Ta tätou te mäòhi e maihoà tei amohia e te paùfifi, e faaòhipa-atoà-hia no te huti i te mau täuihaa  teimaha, na te âvae atoà e haapaari i nià i te fenua ia tià i te fenua ia tauturu ia noaa te puai. E naò ia tätou i te parauraa i teie mahana, A rave mai i ta ù maihoà i nià ia òutou, e ia haapiihia òutou e au, te marû nei hoì au e te haèhaa nei ta ù âau: e e noaa hoì te faaearaa hau i to òutou värua.    

Teraì òr. Faatura.

Mätaio 10, 37-42 Utuà

Tāpati 28 no Tiunu 2020.

Utuà.

Taramo 89

1 Matetira a Ètana te âti-Ètera ra. 2 E tämau ä vau i te himene i te aroha o te Fatu, e na ta ù vaha e faaìte i te parau mau na òe, i tërä uì i tërä uì. 3 I parau hoì au e: E tià to aroha i te vai-mäite-raa, tei te mau raì ra to parau mau i te haamau-raa-hia. 4 Ua parau òe: Ua fafauhia e au te faufaa i tei haapaòhia e au ra, ua tapu vau i ta ù tävini ra, ia Tävita: 5 E haamau ä vau i to òe ra huaai e a muri noa atu, e patu vau i to òe ra teröno e tae noa atu i te mau uì atoà ra. Tera. 6 Ia haamaitaì te mau raì i ta òe ra räveà mana, e te Fatu, e te âmuiraa o te feiä moà ra, i ta òe ra parau mau 7 O vai hoì to te mau raì ra e au i te Fatu. O vai tei au i te Fatu i roto i te mau tamarii a tei mana ra. 8 E Atua mataù-roa-hia i te âmuiraa o te feiä moà ra, e ia faahanahanahia e te feiä atoà i pïhaì iho ia na ra. 9 E te Atua manahope, e te Fatu, o vai tei au ia òe ra? E mana rahi to òe, e te Fatu, e te haapunihia ra òe e ta òe ra parau mau.10 O òe hoì tei mana i te ûànaraa o te miti ra, e ia tupu to na àre, na òe e haamania. 11 Ua ôfatifati òe ia Rähapa mai te mea ua paruparu ê na, e na to rima ètaèta i haapurara i to mau ènemi. 12 Na òe te mau raì nei, e na òe atoà te fenua; te ao e to te ao atoà ra, na òe ä i hämani. 13 O àpatoèrau e o àpatoà, na òe i hämani; o Täpora e o Heremona tei himene hua i to òe ra iòa. 14 E rima püai to òe, ètaèta tei to rima, e te teitei roa ra to rima àtau. 15 O te parau-tià ra e te au, o te tumu ia o to òe ra teröno. O te aroha ra e te parau mau, tei nä mua ia i to mata. 16 E ao to te mau taata i ìte i te reo òaòa ra E hahaere ä rätou, e te Fatu, i te märamarama o to mata ra. 17 Te òaòa ra rätou i to iòa e mure noa atu te mahana, e ua teitei rätou i te parau tià na òe ra. 18 O òe hoì te hanahana o to rätou püai, e na te here na òe ra i teitei ai to mätou tara.19 O te Fatu mau ä to mätou tauturu, e tei moà i Ìteraèra nei, o to mätou ia arii. 20 I reira ta òe parau ôramaraa mai i to taata moà ra, e ua nä ô mai ra: Ua tuu vau i te tauturu i nià i tei mana ra, ua faateitei au i te hoê i haapaòhia no roto i te mau taata nei. 21 Ua ìteä ia ù ta ù tävini o Tävita, e ua faatähinu vau ia na i ta ù monoì moà ra. 22 Na to ù iho rima o ia e haamau, e na to ù iho rima o ia e faaètaèta. 23 E òre roa o ia e vï i te ènemi, e òre hoì o ia e ìno i te taata parau ìino ra. 24 E täìrihia e au to na mau ènemi i mua i to na mata, e täìrihia e au te feiä i riri mai ia na ra. 25 Ei ia na te parau mau na ù, e ta ù aroha vai ai e teitei hoì to na tara i to ù nei iòa. 26 E tuu vau i ta na rima àui i raro i te tai, e ta na rima àtau i raro i te pape. 27 E na na e pii mai ia ù e: O ta ù metua òe, e ta ù Atua. E ta ù pare e ora ai au ra. 28 E faariro vau ia na ei mätahiapo na ù, e ia teitei o ia i te mau arii atoà o te fenua nei. 29 E vai ä ta ù hämani maitaì ia na, e ta ù faufaa ia na ra e päpü ia. 30 E haamau vau i to na ra huaai e a muri noa atu, e vaiiho taiàta hoì to na teröno mai te mau raì atoà nei. 31 Ia faaruè ta na mau tamarii i ta ù ture, e aore i haapaò i ta ù ra parau au; 32 ia faahapa rätou i ta ù ra haapaòraa, e aore i faaroo i ta ù ra parau: 33 e papaì au ia rätou i ta rätou ra hara i te papaì, e to rätou ìno i te täìri. 34 O to ù rä hämani maitaì, e òre ia e hopoi-ê-hia ia na, e òre hoì te parau mau na ù ra e haamaìrihia. 35 Ta ù faufaa ra e òre e faaòrehia e au, e òre hoì e ruri ê i tei nä roto mai i to ù nei vaha. 36 Hoê aè nei a ù nei täpuraa i to ù iho ra moà: e e òre au e haavare ia Tävita. 37 E vai ä to na huaai e a muri noa atu, e to na teröno, mai te mahana ia i mua ia ù ra, 38 e tià ia i te vai-mäite-raa, mai te märama ra, e mai te ìte haavare òre i nià i te raì ra. Tera. 39 I teie nei rä, ua faaruè òe e ua haaveùveù; ua riri òe i ta òe i faatähinu ra. 40 Ua faaòre òe i te faufaa i to tävini nei, ua haaviivii òe i to na toröna i raro i te repo. 41 Ua vävähi òe i te mau âua na na, e ua huri-tumu-hia e òe to na mau haapüraa ètaèta. 42 Te haruhia ra o ia e te feiä atoà i haere nä te èà, e ua riro o ia ei faaìnoraa na to na ra mau taata-tupu. 43 Ua faateitei òe i te rima àtau o tei märô mai ia na, e ua faaòaòa òe i to na atoà ra mau ènemi. 44 Ua haamemu òe i te mata o ta na òè,  e aita atu ra o ia e mau i te àroraa ra. 45 Ua faaòre òe i to na ùnaùna, e ua huri òe i to na teröno i raro i te repo. 46 Ua haamure òe i te mau mahana o to na ra âpïraa, e ua vehi òe ia na i te haamä. Tera. 47 Mai te aha ra te mäoro, e te Fatu, o to òe haamoèraa? E vaiiho noa änei i to riri ia àma noa na mai te auahi e a muri noa atu? 48 E haamanaò i te poto o to ù nei taime. E e aha òe i hämani ai i te mau tamarii atoà a te taata nei ei mea faufaa òre ra? 49 O vai te taata e ora e eita e ìte i te pohe, a ora ai to na värua i te rima o häte? Tera. 50 Tei hea, e te Fatu, to mau hämani maitaì tahito ra, ta òe i haamau i te parau mau na òe ia Tävita ra? 51 E haamanaò, e te Fatu, i te faaìno i faaìnohia ai to mau tävini nei, e tei nià i taù ôuma te tähitohito o te taata nei e rave rahi. 52 Ta to mau ènemi i faaìno mai, e te Fatu, o tei faaìno mai i te haereà o tei faatähinuhia e òe ra. 53 Ia haamaitaìhia te Fatu e a muri noa atu. Âmene, e Âmene.

2 Te mau Arii 4.8-16

8 E tae aè ra i te hoê mahana, te haere ra Èritaia i Tünema, tei reira te hoê vahine taoà; e ua märô mai ra o ia ia na e àmu i te mäa. E muri aè ra, ua haere anaè o ia nä reira ra, ua täpae o ia e ua àmu i te mäa. 9 Ua parau atu ra o ia i te täne, Inaha te ìte nei au i teie nei taata e haere pinepine mai i ô nei, taata moà ia na te Atua. 10 Täua e hämani i te tahi piha ïti nö na i nià i te patu nei; a tuu ai täua i te tahi roì nö na, e te tahi àmuraa, e te tahi pärahiraa, e te tahi rämepa, e ia tae noa mai o ia i ô nei, a täpae mai o ia. 11 E tae aè ra i te hoê mahana, ua haere mai ra o ia i reira, e ua täpae aè ra i roto i taua piha ra, e ua taòto iho ra. 12Ua parau atu ra o ia i te tävini ia Tehati, A pii atu na i te vahine Tünema. E oti aè ra i te piihia e ana, ua tià noa mai ra i mua ia na. 13 Ua parau atu ra o ia ia na, E parau atu òe ia na e, Inaha, i faaitoito noa na hoì òe ia mäua i tënä na faaitoitoraa; e nä hea atu ra mäua ia òe? Ia parauhia atu änei òe i te arii, e te raatira o te nuu nei ? Ua nä ô mai ra o ia, Te pärahi nei au i roto i to mätou iho nei. 14 Ua nä ô mai ra o ia, E nä-hea-hia atu ra o ia? Ua parau atu ra Tehati, Aita a na e tamaiti, e ua ruhiruhiä hoì te täne. 15 Ua parau mai ra o ia, a pii atu na. E oti aè ra o ia i te piihia atu, te tià noa mai ra i te ùputa. 16 Ua parau atu ra o ia, Mai teie nei, i te tau i haapaòhia ra, e tamaitihia ta òe. Ua parau mai ra o ia, Eiaha, e ta ù fatu, e te taata o te Atua ra, eiaha na òe e haavare mai i to tävini nei.

Rōma 6.3-11

3 Aita ä òutou i ìte o tätou atoà tei päpetitohia i roto i te Metia ra ia Ietu, ua päpetitohia ia i roto i to na ra pohe? 4 E teie nei, ua tänuhia tätou e o ia atoà, i te päpetito-raa-hia i roto i to na ra pohe; mai te Metia i faatiàhia e te mana o te Metua i te poheraa ra, ia haapaò atoà tätou i te haereà e au i te ora âpï. 5 I âpiti-atoà hia hoì tätou ia na i te huru o to na ra pohe, e âpiti-atoà-hia ia tätou i te huru o to na ra tiàfaahouraa i nià. 6 Ua ìte hoì e ua faatataurohia to tätou taata tahito e o ia atoà hoì, ia paruparu te tino o te ìno, ia òre tätou ia faaroo tävini faahou i te ìno nei. 7 O te taata hoì i pohe ra, ua matara ia o ia i te ìno nei. 8 I pohe na hoì tätou e te Metia atoà, ua ìte hoì tätou e, e ora tätou e o ia atoà hoì. 9 Ua ìte hoì tätou e, o te Metia i faatiàhia i te poheraa ra, e òre ia e pohe faahou, e òre hoì e mana faahou te pohe ia na. 10 O ia hoì i pohe ra, i pohe ia i te hara, hoê roa rä poheraa; o ia rä i ora ra, i ora ia i te Atua. 11 E manaò atoà hoì òutou ia òutou iho, e ua pohe mau i te ìno ra, ia ora rä òutou i te Atua, i to tätou Fatu ra ia Ietu Metia.

Mātaio 10.37-42

Te haapaeraa ia na iho no te pee ia Ietu

(Mär 8.34-35; Rut 14.26-27; 9.23-24)

37 O tei rahi to na hinaaro i ta na metua täne, e aore ia, i ta na metua vahine, iti ia ù, aita o ia i au ia ù, e o tei rahi aè to na hinaaro i te tamaiti, e aore ia, i te tamahine, iti ia ù, aita o ia i au ia ù. 38 E o të òre e rave i to na tätauro a pee mai ai ia ù, aita o ia i au ia ù. 39 O tei ìte i to na ora, e ère ia i te ora; âreà tei ère i to na ora no ù nei, e ìteä ia ia na te ora.

Tei färii mai ia òutou, ua färii mai ia ia ù

(Mär 9.37, 41; Rut 9.48; 10.16; Ioa 13.20)

40 O tei ìte/färii mai ia òutou na, ua ìte/färii ia ia ù, e o tei ìte/färii mai ia ù nei, ua ìte/färii ia i tei tono mai ia ù nei ra. 41 O tei ìte/färii mai i te perofeta, no te mea e perofeta, e noaa ia ia na ta te perofeta ra utuà; e o tei ìte/färii mai i te taata parau tià, no te mea e taata parau tià, e noaa ia na ta te taata parau tià ra utuà. 42 E o të höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà.

Manaò.

Na taiòraa e maha tei haapaòhia no tätou no teie täpati, e piti parau e ärataì ra te tahi manaò ia au i te rahiraa o te mau parau e vai ra e to rätou faufaa. Na parau ra e piti tei haapaòhia mai teie, Te Haapae, e te Färii. Te haapae to tätou ia tuuraa i te hiti i te mau mea atoà e haaäpiäpi te tupuraa o te hoê òhipa e faaìteraa i te maitaì, no te ärairaa i te ìno. Te Färii, te tupuraa ia no te hoê òhipa e faaìte ra i te maitaì. Ia au i te haapotoraa o na taiòraa e maha nei.

-Taramo 89, 7 O vai te mau raì e au i te Fatu, i roto i te mau tamarii a tei mana ra.

-2 Mau Arii 4, 16 E tamaitihia òe, eiaha na òe e haavare mai i to tävini nei.

-Roma 6, 11 E manaò, ia ora òutou i te Atua, i to tätou Fatu ra ia Ietu Metia.

-Mätaio 10, 42 E o të höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà.

Te faaìteraa ia a te Parau Maitaì ia tätou i teie mahana i te päpaìraa a Mätaio i te pene 10 i te mau ìrava 37 e tae i te ìrava 42, oia hoì, Te haapaeraa ia na iho no te pee ia Ietu, ìrava 37 e tae i te ìrava 39, Tei färii mai ia òutou, ua färii mai ia ia ù ìrava 40 e tae i te ìrava 42. Ia au i na parau e piti nei te manaò e ärataì ra mauti ra, ia haapae te taata i ta na, no te färii i ta te Atua Nui Tumu Tahi, oia hoì, na Mua ta te Atua e tià ai, ia oti ta te Atua haapaò atu ai te taata i ta na. Te auraa teie manaò, na te Parau a te Atua e ärataì e faanaho te ôpuaraa faaora o te fenua e to te raì. Ia faaroo tätou te manaò o te päpaì Taramo 7 O vai hoì to te mau raì ra e au i te Fatu. O vai tei au i te Fatu i roto i te mau tamarii a tei mana ra. Ua ineine to te raì i te täuturu i te taata i roto i te mau tamarii o te fenua nei. Ia na reira tätou i te färii te ìteraa i te mau faufaa o te raì, e to te fenua e au tätou i te Atua, e ìte tätou i te höroà i te hoê âuà päpe na te mau taata rii no te mea e pipi o ia na Ietu, e òre roa o ia e ère i te utuà. Te faaìte nei o Ietu i te tumu o to na tere i te ao nei, ia au i teie mau reo, i roto i ta tätou taiòraa no teie mahana. Te haere mai nei O ia i te ao nei ia tupu te parau tià, ia haapaòhia te taata riirii. Ia òre te taata ia faaea noa i roto i te tau no te pö mutu òre, te matara nei te ùputa o te märamarama e te ora. Nä roto ia Ietu, ua riro mai te reira märamarama ei taata, ua hiti mai i roto i te oraraa o te taata e ua faatupu atoà i te mau täuiraa rarahi. Te täuiraa e tupu nei to te taata ia ìteraa i te hinaaro, no te faatae i te mau ôpuaraa i roto i to na ötiraa. I te mea ua toe te òhipa tei òre i tae i nià i to na mau faanahoraa i parau ai o Ietu i te Au, tei Au i to na ùtuafare, to na fëtii, aore ia i Au ia Ù, te manaò o Ietu i ù nei, ua ère teie pupu taata i te haapiiraa a te Atua e ta te fenua, aore rätou e ìte nei i roto i te fenua, e te raì, te aroha e te here o te Atua Nui Tumu Tahi, te Au to te taata ia tüàtiraa i te faufaa o te òhipa e tupu ra tei tae roa i roto i to na âau, e to na värua. No reira te taata, tei roto to na parau i to na rima, e tiàmäraa to na no te färii e no te òreraa e färii i te märamarama o te parau, e tiàmäraa to na no te hinaaro i te märamarama, aore ra te pöuri. Nä roto rä i teie öraa mai te märamarama i roto i te öraraa o te taata, teie te mau täuiraa e ìtehia atu, te feiä i faaèrehia na i te ìte, o rätou të ìte i teie nei ; e te feiä i faariro na i te ìte ei faufaa e hau ai rätou i nià i te taata, o rätou të haapöirihia, a riro atu ai mai te matapö ra te huru. Te mea ta Ietu e parau ra e, tei färii mai ia òutou, O vau ta rätou e färii nei. E parau tià teie e faahitihia nei i roto i teie fäìraa ta Ietu, e parau ia no te utuà. Eiaha rä tätou e rü noa i te faaoti i te auraa o teie parau i nià i te mea ta tätou i mätau. Mai te peu na te märamarama e faataa ra i te pö i te ao i roto i te rahu a te Atua, na te parau tià e utuà mai i teie nei i te taata. No reira, ia parau tätou e, utuà, eiaha tätou e manaò i te huru utuà mai teie ta tätou i mätau i te ìte. Te auraa o teie taò utuà, e mauruüru ta tätou noa ra i mätau i te parau e faahapa, aita o Ietu e faahapa nei tei färii i te mau perofeta, te mauruüru nei ra, te utuàhia nei rätou no te mea ua ìte rätou i te hoê taata rii e pipi na Ietu, tei höroà i te hoê âuà päpe toètoè. No reira, ia au i to te taata färii, aore ra to na färii òre i te parau a te Fatu, te riro ra o ia mai te òraparaa o te âvaè i tanohia i nià i te ànaana o te mahana, aore ra tei òre i tanohia, ua riro te färiiraa ei täpaò no te märamarama ; âreà te òreraa e färii, e täpaò ia no te pöiri. E hape tätou ia faariro i te märamarama ei fäitoraa taata, te vai ra te feiä märamarama, e te vai ra te feiä pöiri. Eere roa atu te reira. Inaha o Ietu te märamarama o teie nei ao, te färiiraa ia Ietu no ta na parau, te mea ia e ìtehia ai te taata i hitihia e te märamarama.

Teie te reo märamarama o Ietu ia tätou i teie mahana, 42 E o të höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà.

Ia ora na.

Teraì òr. Faatura.

Tāpati 21 no Tiunu 2020.

Mataù.

Päpä haamori.

Färiiraa.

Te hinaaro nei teie manaò, e faaìte i to ù täpaò faatura e te haèhaa i mua ia òutou, te faatura no te mau parau ia e faaroohia e tätou i roto i te haamoriraa i ta òutou märamaramaraa, e ta ù märamaramaraa. Te haèhaa no te puai ia o te mau parau e päpä ra te parau no te haamoriraa no teie mahana, na te  Taramo 69 e haamata tei faaìte i te peàpeà o te taata tiàturi Atua tei rehuhia to na faaroo, i ta na tärahu i mua i te Atua Nui Tumu Tahi, te na ò ra e, 1 Na te Mënätehe i nià i te Totanima. Taramo na Tävita. 2 E faaora òe ia ù, e te Atua Nui Tumu Tahi e, te paremo nei au i te pape. 3 Ua tae au i te vari reva, aore roa e tiàraa. Ua tae au i te pape moana roa, e ua roohia vau e te pape puè. 4 Ua pau ta ù aho i te òtoraa, ua marô ta ù àrapoà, ua poopoo ta ù mata i te tiaìraa i ta ù Atua. 5 E iti te iò rouru i to ù nei upoo i te feiä i riri hara òre noa mai ia ù nei. E te mana nei ta ù mau ènemi haavare i tïtau mai ia ù nei ia pohe. E tei ia ù te faahoì i tei òre i ravehia e au ra. 6 E te Atua e, ua ìte òe i to ù nei äoaoa, e ta ù nei mau hapa, aore ia i moè ia òe. 7 E tënä na, eiaha rätou ia haamä no ù, tei hiò atu ia òe, e te ATUA Nui Tumu Tahi e te Manahope, e te Fatu. Eiaha rätou ia roohia e te mäheahea no ù, tei ìmi ia òe, e te Atua Nui Tumu Tahi. 8 No òe mau i faaòromaì ai au i te faaìno, e no òe i püroùhia ai ta ù mata i te haamä. 9 Ua riro vau ei taata ê i ta ù mau taeaè nei, e mai te taata ìteä òre i te mau tamarii a ta ù metua vahine ra. 10 No te mea ua riro roa vau i te itoito i to fare, te faaìno a te feiä i faaìno ia òe ra, ua iri mai ia i nià ia ù. 11 Ia òto vau ra, e ia faahaèhaa i ta ù värua mä te haapae i te mäa, ua faarirohia ia ei faaìnoraa ia ù. 12 E ia àhu vau i te àhu òto ra, ua riro vau ei parauraa na rätou.

E tià mai tätou, haamaitaì tätou i  te hoê reo himene.

Himene

Pure

Pure tätou i te Atua, 13 Te feiä i pärahi i te ùputa ra, tei parau faaìno mai ia ù, e ua faarirohia vau ei peheraa na te mau taèro àva.14 Te pure nei rä vau i ta ù pure ia òe, e te Fatu, i te taime e ìtehia mai ai ra. E faaroo mai òe ia ù, e te Atua, i te aroha rahi no òe ra, i te parau mau o te ora na òe ra.15 E ìriti òe ia ù i te vari nei ia òre au ia paremo; e ia ora hoì au i te feiä i riri mai ia ù nei, ia ora vau i teie nei pape hohonu. 16 Eiaha te pape puè ia tahe nä nià iho ia ù, e eiaha vau ia horomiihia e te moana, eiaha te âpoo ia ôpani i to na vaha ia ù nei. 17 E faaroo mai, e te Fatu, e mea tià roa hoì te hämani maitaì na òe ra. E färiu mai ia ù i te aroha rahi no òe ra. 18 Eiaha e huna i to mata i to tävini nei. Ua roohia vau e te àti, ia peepee òe i te faatià mai ia ù. Âmene.

Pärahi tätou.

Te manaònaò

19 E haafätata mai i ta ù värua ia ora; ia ora hoì au i to ù nei mau ènemi. 20 Ua ìte òe i tei faaìno mai ia ù, ta ù haamä e te vahavaha ia ù nei; te vai noa ra hoì ta ù mau ènemi i mua i to aro. 21 Ua paruparu ta ù âau i te faaìno. Ua àti au i te pohe. I ìmi hoì au i tei aroha mai, e aore roa. E të haamähanahana mai, e aore roa i ìteä e au. 22 Ua hopoi mai rätou i te âuà àvaava ei mäa na ù, e ta ù poìhäraa ra, ua hopoi mai i te vineta e inu. 23 E riro ta rätou àmuraa mäa ra ei märei no rätou, e to rätou maitaìraa ei ùpeà. 24 E mohimohi to rätou mata e òre e tià ia hiò. E roohia i te rürü tämau to rätou tauupu. 25 Ninii mai i to riri tähoo ra i nià ia rätou, e ia roohia-noa-hia mai rätou e to riri rahi ra. 26 E riro to rätou mau fare i te ano, e aore roa e taatahia to rätou mau tiàhapa, 27 te hämani ìno nei rätou i tei täìrihia e òe ra, e te faarahi nei i to na òto to tei paruparu ia òe ra 28 E tuu noa òe ia âpiti noa te hara i ta rätou ra hara, e eiaha roa rätou ia tiàhia mai e òe ra. 29 Ia päraihia to rätou iòa i te parau o te feiä e ora nei, e eiaha ia päpaìhia i roto i te feiä parau tià ra. 30 Âreà vau nei, haèhaa noa ai e te pohe hoì, na te ora na òe, e ta ù Atua, e hopoi ia ù i nià.

Tätarahapa.

I mua i teie mau parau te ìte nei tätou e, e mau taata tätou tei rehuhia e te tärahu, e tei faahapahia e te hara, 31 E haamaitaì au i te iòa o te Atua i te himene, e faarahi au ia na i te haamaitaì. 32 E mea au rahi to te reira i te Fatu, i to te puaatoro oni-âpï-tara-hia ra, e tei maiùuhia ra. 33 E ìte tei àti ra i te reira mä te òaòa. E to rätou âau, to tei ìmi i te Atua ra, e faaànaànaeahia mai ia. 34 E faaroo mai hoì te Fatu i te feiä haèhaa ra, e aore hoì e vahavaha i to na taata täpeàhia ra. 35 Na te mau raì e na te fenua e haamaitaì ia na, te moana e te mau mea atoà e tere haere i reira. 36 E faaora hoì te Atua ia Mäòhi Nui, e na na e patu faahou i te mau ôire o te Mäòhi. E pärahi faahou hoì rätou i reira ia riro ia rätou. 37 E riro ia i te huaai o to na ra mau tävini, e te feiä i hinaaro i to na ra iòa te pärahi i reira. Âmene.

Himene tätarahapa.

Teie te reo o Ieremia, Ieremia i te pene 20 i te mau ìrava 10 e tae i te ìrava 13 10 Ua faaroo hoì au i te vavi-noa-raa o te taata atoà e rave rahi, e parau haamataùtaù e àti noa aè. Te nä ô mai ra rätou e parau na òutou e nä mätou e parau atoà atu: te tiaì anaè mai ra ta ù mau hoa atoà ra ia ù i te faaearaa; te nä ô ra rätou, peneiaè o ia o te täpae ê noa i te haavare, a noaa atu ai o ia ia tätou, a tähoo atu ai tätou ia na, teie rä, e pärahi fätata noa o ia ia rätou 11 Tei ia ù rä te Fatu, ei àito riàriàhia ia; e riro te mau hämani ìno ia ù ra i te turori, e òre roa hoì ta rätou e tupu; ua haamä roa rätou, no te mea aore to rätou hinaaro i tupu; ei haamä vaiiho-tämau-hia e te mure òre to rätou, eita e moè ra.12 E te Fatu manahope ra, tei tämata i te feiä parau tià o òe ra.13 E himene òutou i te Fatu, e haamaitaì òutou i te Fatu, no te mea ua faaora o ia i te rima o te feiä hämani ìno ra, i te värua o te taata haèhaa ra.

No te maitaì o teie mau parau, e tià mai tätou no te faaìte i to tätou òaòa i te Atua Nui Tumu Tahi.

Himene òaòa.

Na te èpitetore a Pauro i to Roma i te pene 5 i te mau ìrava 12 e tae i te ìrava 15 e ärataì ia tätou i roto i te Aroha e te Here o te Metia mai ia Àtamu e tae mai i te Metia. 12 E teie nei, no te taata hoê ra i ö mai ai te ìno i te ao nei, e no te ìno hoì te pohe; e ua taeà-atoà-hia te taata atoà e te pohe i te mea ua hara päatoà. 13 I vai na hoì te hara i te ao nei e tae roa aè nei i te ture nei; e òre rä te hara e haapaòhia i te ture òre. 14 I mana na rä te pohe mai ia Àtamu mai ä e tae roa aè nei ia Möte, e i te feiä atoà aore i rave i te hara mai te hara a Àtamu ra, e hohoà o ia no të tae mai. 15 Eita rä tei horoà-noa-hia mai e au i taua hara ra. E rave rahi tei pohe i te hara a te taata hoê ra, e rahi atu hoì te aroha o te Atua, e tei horoàhia mai e taua aroha ra, i te tae i te taata e rave rahi, ia Ietu Metia i te taata hoê ra.

Pärahi tätou, haamaitaì tätou i te Atua i te himene.

Himene.

Pure  no te taiòraa

E te Atua Nui Tumu Tahi, ua ineine mätou i te faaroo i te Parau Maitaì o ta òe Tämaïti i päpaìhia e Mätaio i te pene 10 i te mau ìrava 26 e tae i te ìrava 33, a parau riirii mai na òe i roto i to mätou âpoo tarià ra, o ta mätou ia e parau hua i nià iho i to mätou mau taeaè, mau tuahine tei pärahi moèmoè noa ia mätou. Âmene.

Ta tätou taiòraa no teie mahana ia au i te Parau Maitaì päpaìhia e Mätaio i te pene 10 i te mau ìrava 26 e tae i te ìrava 33 te naò nei te tumu o te taiòraa, Eiaha e mataù.

(Mär 8.38; Rut 9.26; 12.2-9)

26 Eiaha òutou e mataù i te taata. Aore roa hoì e mea täpoìhia/hunahia e toe i te faaìtehia; aore roa e mea moè e toe i te ìteä. 27 Ta ù e parau atu ia òutou i roto i te pöuri nei, o ta òutou ia e faaìte hua i te märamarama; e tei parau riiriihia i roto i to òutou tarià ra, o ta òutou ia e parau hua i nià iho i te mau fare. 28 Eiaha e mataù i tei täparahi mai i te tino nei, eita rä e tià ia rätou ia täparahi i te värua; e mataù rä òutou ia na i të tià ia na ia rave pohe roa i te tino e te värua atoà i tehena/i roto i te auahi pohe òre. 29 Eere änei taìpiti manu rii ia hoo i te moni veo/raera hoê nei? E òre rä te hoê e maìri i raro i te repo mä te tià-òre-hia e to òutou Metua. 30 No òutou, ua hope atoà rä te rouru o to òutou upoo i te taiòhia. 31 Eiaha mäori òutou e mataù, ua hau aè òutou i te rahiraa o te mau manu rii 32 E teie nei, o tei fäì ia ù i mua i te aro o te taata nei, e fäì atoà vau, e no ù o ia, i mua i te aro o ta ù Metua i te raì ra. 33 O tei huna rä ia ù i mua i te aro o te taata nei, e huna atoà vau ia na i mua i te aro o ta ù Metua i te raì ra.

Pure.

Pure tätou i te Atua nui Tumu Tahi, ua parau riirii mai Ò e i roto i to mätou mau âpoo  tärià, no te mea pütarià mätou no ta Òe ôpuaraa faaora. Âmene.

Haamaitaì tätou i te Atua i te Himene.

Himene.

Manaò.

Tei roto noa ä tätou i te rupehu no teie maì viivii piri fee e àtuàtu noa nei i roto i to tätou fenua ia Mäòhi Nui, ua haapitaataa te oraraa vaamataèinaa o te mau ùtuafare e te mau faanahoraa ua fänau te mataù i roto i te âau o te taata tätaìtahi, ua tupu mai te tahi mau faanahoraa tei òre i matauhia e tätou, o te raveà ia no teie mau taime èi pärururaa ia tätou i to te taata hoê haapaòraa i ta na iho hopoià i mua i teie maì e haaviivii nei i te taata. Oia hoì te haafaufaahia nei te parau o te Taata hoê, to na ìte, to na märamarama, to na paari, i te mea ua rahi aè o ia i te mau manu rii. Te päpä ia o ta tätou haamoriraa no teie mahana, tei päpähia i nià i na taiòraa e maha no teie täpati 21 no te märama no Tiunu 2020. A faaroo mai na ra te tahi haapotoraa no ta tätou mau taiòraa.

-Taramo 69, 35 Na te raì, na te fenua e haamaitaì ia na, te moana e te mau ora atoà.

-Ieremia 20, 13 E himene, haamaitaì i te Fatu ua faaora o ia i te taata haèhaa ra.

-Roma 5, 15 E rave rahi tei pohe i te hara, e rahi atu hoì te aroha o te Atua i te taata.

-Mätaio 10, 31 Eiaha mäori òutou e mataù, ua hau aè òutou i te rahiraa o te mau manu rii.

E rave rahi mau parau faufaa e vai nei ia au i teie mau taiòraa, ta te manaò ra i täpeà mai teie ia reo to Ietu e parau nei e, 31 Eiaha mäori òutou e mataù, ua hau aè òutou i te rahiraa o te mau manu rii.

Ei hiòraa âmui.

Te  tahi  tumu parau e tià ia riro  ei hiò âmuiraa no  na taiòraa e maha nei mauti ra ia teie reo no Ietu i roto i te Parau Maitaì päpaìhia e Mataio i te pene 10 i te mau ìrava 31 Eiaha mäori òutou e mataù, ua hau aè òutou i te rahiraa o te mau manu rii. Ua taìpiti au i te faahitiraa atu i te tumu o te parau tei manaòhia mai, no te faufaa te parau o te Taata i mua i te mataù e to na faarahi-raa-hia i  mua i te mau manu. O te òhipa ia i tupu i roto i na taiòraa e maha, to te nunaa mataùraa i te pohe e fatata nei ia rätou. Teie huru no te nunaa ua vai ia rätou i roto i te tiàturi òre i te mau òhipa ta te Atua Nui Tumu Tahi e rave no rätou. I roto i to rätou  mataù ua faanaho te Atua i te hoê  òhipa  naeà-òre-hia  e to rätou mau  märamarama. I to te Atua vahiraa i te miti ùteùte i riro mai nei ei èà no te faaora i to na nunaa i te pohe e fatata mai ra ia rätou. Area ra no te nuu o Faraò riro  iho nei ra ei  menema no rätou. Eita ra te Atua e faaea i reira e faaite-ä O ia i to na puai no roto i te Parau tei riro mai te hoê ahi ra te huru te àmaraa i roto i te âau o te taata. Ei faaìteraa i te mana te òhipa ta na e faatupu ra na roto i to na Aroha tei tïtau i te taata ia ora i ta na e faatupu nei. Ia au i teie mau poroìraa  aita te Atua e haamataù  mai nei ia tätou, te faaìte mai nei ra e, e Atua hinaaro rahi O ia e tauturu i te taata  tei tiàturi i ta na i faaoraraa.

Ei manaò tatara.

Te reo o Ietu i roto  i ta tätou taiòraa nei tei te ìrava   31 Eiaha mäori òutou e mataù, ua hau aè òutou i te rahiraa o te mau manu rii. E toru taime to Ietu faahitiraa teie parau i roto i ta tätou taiòraa, i te ìrava 26, 28, e te ìrava 31. E täpaò faaite te reira i te faufaa no te òhipa ta Ietu e hinaaro nei e faaìte i ta na mau pipi e tae noa atu i te mau taata e faaroo nei ia na. Te hinaaro nei  o Ietu ia noaa i ta na mau pipi i te hoê puai taaê, ia tià ia rätou ia na nià aè i to rätou mau mataù. I te mea na te reira e faaitoito ia rätou i te haaparareraa i te parau tià  no te patireia o te Atua i te mau vahi atoà tei reira te oraraa te taata. Tei teie  vahi  atoà  te mau ènemi  o te Atua i te rahiraa, o rätou  teie e ìmi nei i te tapoìraa  i te mau maitaì a te Atua, tei faaea noa i roto i te faatîtîraa o te pöuri, ma te pärahi  tämau i raro i te rehu no te tärahu, e te pärahi tämauraa atoà i raro aè i te mato o te hara. O rätou ta Ietu e parau  nei  i roto i ta tätou nei taiòraa, e tae atoà rätou i te hämani ìno i ta na mau pipi, ma te täparahi  haapohe roa ia rätou. Teie ra e tià ia rätou  ia täparahi i te tino areà te Varua  eita e tià ia rätou ia haamou  i te reira, o te Atua te fatu i teie faufaa. E tia i te taata ia haamou i teie ora, i nià ra i te parau no te ORA MURE ORE, aita ia to te taata mana i reira no te tinai, no te mea o te Atua Nui Tumu Tahi anaè te mana ra i nià iho.

Te parau ta Ietu e parau nei e, Eiaha mäori òutou e mataù, no na iho teie parau ta na e faahiti nei, e tupu teie parau na na i roto i te ô no Tetemane, ua mataù o Ietu i te âuà e fatata  mai ra ia na, i to na ìteraa eita e tià ia na ia àpe, parau atu ra e ta ù Metua ia tià to oè hinaaro, inu iho ra  o Ietu i taua âuà  maramara ra. E i nià i te tätauro tuu atu ra O ia i to na Varua i te Atua. To na auraa teie òhipa i tupu ua upootià tei hämani-ìno-hia, ua fifi ra tei hämani ìno. Ua mau ia rätou i te täpeà te tino o Ietu i nià i te tätauro, areà ra te Varua  aita roa ia. Tei  teie  vahi tätou e ìte ai te puai o Ietu, oia hoì, eita  na te mataù e faaapiapi  i te mau òhipa ta na e faatupu nei, e, e faaite nei.

Ia faaroo  anaè  tätou  i te mau  manaò  o Ietu, aita  ia e haaparuparu  nei  i te mau pipi i te raveraa i te  òhipa a te Atua. Te parau nei o Ietu e, eiaha  e mataù i te taata, te mau òhipa e täpoìhia e faaìtehia ia, te mau parau e faahitihia i te vahi pöuri, e haapurorohia ia i te vahi märamarama. E te mau parau e topa i roto i te hohonuraa o te tarià, ia poro haerehia ia te reira i te vahi maitaì o te âau o te taata. Eiaha  e mataù  e mea faufaa aè te taata i te  manu rii e hoohia hoê moni veo, e ua taio-atoà-hia to òutou ìo rouru, tei upoo rouru òre èita ia te Atua e òhipa rahi ia taiò. Te haapäpü  nei teie parau te huru  no to te Atua haapaòraa i te taata  ia au i ta na faanahoraa. No reira  eita e tià i te mau pipi ia mataù i te faaìteraa i te mau hinaaro o te Atua, i te mea e Atua  hinaaro rahi teie i te ora o te mau taata atoà. To na maitaì eita e tià i te taiò, e ao ra to te feia i haapaò i te parau a te Atua tei tämau maite i te parau tià, eita e faaea. Te parau a te Atua ia vai i roto i te âau o te tävini, e riro ia mai te hoê àveià, tei turaì i te tiàturiraa i nià i te tumu mau no te ora.

O ta Ietu ia e parau nei e eiaha e mataù, oia hoì  eiaha e mataù i te ora a te Atua teie ora, to na utuà e ORA MURE ORE. Te ora ra aita i niuhia i nià i te Atua, to na utuà ra te pohe mure ore ia. No  reira eita ia e tià  i te mau tävini  ia mataù, i te mau faaìnoraa e faanahohia no rätou, ia  tià  ra ia rätou ia faaìte i te puai o te Atua ia farerei rätou i teie mau òhipa. Ia  haamanaò ia rätou  e o te Fatu iho teie e na reira-hia-ra, to na ia reo i  nià i ta na mau pipi ia au i te faaìteraa a Mataio i te 5 i te ìrava 11, i te naòraa e, e ao to òutou ia faaìno mai, e ia hämani ìno mai, e ia pari haavare noa mai te taata ia òutou i te mau ìno atoà, no ù. E manaò faaitoito teie no Ietu i to na mau tävini, ma te ìte atoà  e tupu teie mau òhipa i nià ia rätou. I muri aè i to Ietu revaraa i nià i te raì, e i muri aè i te mahana penetetöte, e i te taime te mau âpotetoro a tere ai, i to rätou mau tere veà tono ua färerei rätou, i teie mau fifi, e te vai nei tei pohe roa i te täparahihia i te iòa o Ietu. Na te mau òhipa tià ore i tupu i nià  i te mau âpotetoro, i horoà faahou i te puai i te mau taata tei päpetitohia ia täpeà tämau i to rätou tiàturiraa i te Metia  tei mana i nià i te pohe. Eita i te mea òhie te parau no te haamoriraa i te tau no te mau âpotetoro, ta vëtahi i roto i te ana pure ai e aore ra i roto i te mau menema ia òre rätou ia noaahia i te mau ènemi o te Atua.

Te tumu ia o Ietu i parau ai e Eiaha mäori òutou e mataù, ia tià ra i te mau taata faaroo atoà ia fäì i to rätou faaroo i mua i te Atua. I te mea, eita  e tià ia hunahia te faaroo parau tià e mahuti-iho ra te reira i te mau vahi atoà. Na teie mau òhipa e faaite te upootiàraa te Atua i roto i ta tätou fäìraa parau e to tätou manuiaraa, to te Atua ia òaòaraa. Eiaha e mataù, to na auraa, eiaha tätou ia àueue i mua i te mau òhipa tià ore e âua haaàti  nei  ia tätou. Ia päpü  mai te ra i te faaìteraa i te faaroo  i mua i teie mau òhipa, e tià e faaturori  te mau manaò. Te aniraa ia ta Ietu e faaitoito nei i ta na mau pipi, e tae noa atu i te mau taata i faaroo i teie mau parau. Te faaroo teie  ta Ietu e faaitoito nei ia  òre ia mau i roto i te here pata no te paruparu, e te hupehupe, noa atu e tupu te mau faahaparaa e te mau hämani-ìno-raa. E tià ra i te faaroo ia faaòre te reira mau faaìteraa tià òre. Ia òre anaè e tupu mai teie te huru, e täpaò faaìte e, aita te parau no te èvaneria ia aahia i roto i te âau. Ua topa ia te huero o te èvaneria i nià i te èà tià taataahihia  iho ra e te àvae taata, e haere mai ra te mau manu o te reva àmu iho ra, e aita aè ra i tupu. Topa iho ra vëtahi i nià i te mau mato, paapaa aè ra i te mahana pohe atu ra, e ta tahi mau huero rii topa iho ra i roto i te mau àihere hoène noa iho ra to na tupuraa, âreà ra te tahi mau huero topa iho ra i nià i te repo maitaì, to rätou tupu, e te hotu ua horoà i te mau maa nehenehe mau. O te hohoà mau teie ta Ietu e faahiti nei i roto i ta tatou nei taiòraa. E färerei te mau taata faaroo i te mau fifi rau, eita ra na te reira e haamataù ia rätou i te fäìraa i to rätou faaroo i mua i te taata e te Atua. Eihea taata tei ère e aore ra tei paruparu to rätou faaroo i teie mahana, i te mea aita rätou e fäì faahou nei i to rätou faaroo. Te fäìraa faaroo, o to te taata ia haapäpüraa i to na tiàturiraa i mua i te mau hinaaro o te Atua. Ma te heheu i te hohonuraa o to na âau i te parau tià tei faatià faahou ia na i te itoito ta te Atua i faataa no na. Ei haapotoraa i te parau mau  a te Atua e horoà nei i te mau taata atoà, o ta te mau teretetiano ia e faaìte nei e tae roa mai i teie nei mahana. Na te täpaò o te fäìraa faaroo e faataaê i te taata paieti i te paieti òre. Te manaò tumu ia ta Ietu e parau nei e, eiaha e mataù, aita o Ioane Päpetito i mataù i te fäìraa i to na faaroo i te naòraa e, e ere au te Metia, à hiò na i te àrenio a te Atua tei hopoi ê atu i te hara a to  ao, Ioane pene 1 ìrava 20 e te ìrava 29. Mai ia Aneterea ua ìteä ia maua te Metia Ioane pene 1 ìrava 40 e te ìrava 41; Mai ia Natanaera e Rapi, o te Tämaïti òe a te Atua, o te Arii o oe no Ìteraèra Ioane pene 1 i te ìrava 49; Mai ia Toma e ta ù Fatu, e ta ù Atua Ioane pene 20 i te ìrava 28; Mai ia Petero, o te Metia òe, te Tämaïti  a te Atua ora ra Mataio pene 16 i te ìrava 16.O te òhipa ia e tià e rave i teie mahana  ia fäì te mau taata atoà e, o Ietu Metia te Fatu, e hanahana ai te Atua Metua ra.

E na roto i to tätou fäìraa i to tätou faaroo Mäòhi mau, e riro ai tätou ei hoa rave òhipa na Ietu, no ta na mau raveà perofeta. Ua noaa hoì i to tätou Fatu taua toroà ra, no te haamäramarama i te feia atoà e tiàturi nei, i te ìte mauraa i te Metua, no te haapii ia tätou i teie mahana, i te parau mau, e no te faariro ia tätou, ei mau  tävini haapaò maitaì no te Atua, e ia Fäì i te faaroo i te Faaora ta na i horoà mai. Te faufaahia nei tätou na roto i teie reo no Ietu eiaha e mataù, no te mea te faaära nei O ia ia tatou ma te Arai i te mau fifi atoà e tupu. Na te Metia hoi i faaìte ia tätou i te Atua, to na Metua, tei riro ei Metua atoà no tätou. Na roto ia Ietu, e tae ai tätou i pïhaìiho i te Metua, no te faaìte ia tätou i mua i to na aro, no te pupu ia tätou e te mau mea atoà na tätou, ei tutia no te haamaitaì i te Atua. I tià atoà ai ia tätou ia pure i te Atua no to tätou mau taeaè. Te riro  nei tätou  i reira, èi hoa no te faaìteraa i to te Atua mau hinaaro i to tätou mau taeaè atoà. Ta te Hepera ia e faaite nei i te pene 9 i te ìrava 24, e te pene 10 i te ìrava 10 e te ìrava 14 i te naòraa e, aita ae nei hoi te Metia i tomo i roto i na vahi moà i hämanihia e te rima ra, i te hohoà no te vahi moà mau ra, tei te raì mau ra O ia ia faaìte Ia na iho i mua i te aro o te Atua no tätou i teie nei. No taua hinaaro ra i moà ai tätou nei, i te pupuraa hoê i te tino o Ietu Metia ra. Ua maitaì roa hoì e a muri noa atu te feiä  haamoàhia e ana ra.

Te faatiàma nei O ia i to tätou ture âau, e te horoà nei ia tätou i te mau taoà värua  a te Metia, ia tià ia tätou ia ora mai teie atu nei, i roto i te mataù òre. Te horoà nei ia tätou i te mana no te haavïraa i te mau òhipa tià òre e hara ai tatou nei, i te hinaaro o te tino e no teie nei ao tei riro ei mau ènemi no to tatou mau värua hema haere noa. Te haapäpü nei O ia ia tätou, e mana tätou e te Metia atoà i nià i te mau mea atoà i hämanihia. Te riro nei tätou na roto i taua òhipa ra, èi mau tävini no te Hau Arii, na roto i te âpitiraa atu tätou i te Metia. Ia mau päpü ia tätou i te tiàma ta te Metia i faatiàma ia tätou e òre ia e tià ia tätou ia mataù. O te raveà hoê roa ia no te fäìraa i te faaroo i mua i te Atua Metua i te raì ra.  Ia ora na.

Haamaitaì tätou i te Atua i te hoê reo himene.

Himene.

Parau faaära

Püpüraa moni.

Pure ärai.

E te Atua Nui Tumu Tahi e, te Tumu o te raì e te fenua, te Tumu o to mätou mäòhiraa, mai te raì nei, e teitei rahi to na i to te fenua, to mätou atoà ia ätearaa ia òe e i te fenua ta òe i horoà i te mana no te haapii ia mätou i te ora, e no te arataì ia mätou ia òe ra, ia riro òe ei Atua no mätou, e o mätou te nünaa ta òe e arataì. I mua i te reo o Ietu e parau ra e : Tei faaroo i te Tamaiti ra, e ora mure òre to na ; tei òre i faaroo i te Tamaiti ra, ua ère ia i te ora, e tei nià te riri o te Atua ia na. Te faahaèhaa nei mätou i mua i to òe Teitei, to òe Tura, e to òe Hanahana, no te mea te ìte nei mätou ia òe, ua hara mätou ia òe, o mätou i òre i faatupu i to òe hinaaro, ua faariro rä i ta òe òhipa ei vähi e maitaì ai mätou i nià i to mätou hinaaro taata, o mätou hoì i ruri ê i to òe hanahana ei hanahana no mätou, e aore i haamanaò e, o òe te Atua, e o mätou te tävini, no te mea no òe te Hau, e te Metua, e te Hanahana e a muri noa atu. Âmene.

Pure a te Fatu.

E to mätou Metua i te raì tua tinitini

Ia faateiteihia to òe iòa moà

Ia tae mai to òe hau

Ia haapaòhia to òe hinaaro i te fenua nei, mai tei te raì atoà na

Ho mai i te mäa na mätou i teie mahana

Faaòre mai i ta mätou tärahu,

mai ia mätou e faaòre nei i ta rätou i tärahu ia mätou nei

Eiaha e faaruè ia mätou ia fati i mua i te ènemi,

Faaora rä ia mätou i te ìno

No òe te hau, te mana, e te hanahana

E a tau e a hiti noa atu, amene.

Faaitoitoraa.

Eiaha mäori òutou e mataù, ua hau aè òutou i te rahiraa o te mau manu rii.

Haamaitaìraa.

E rave rahi tei pohe i te hara, e rahi atu hoì te aroha o te Atua i te taata. Âmene.

Teraì òr. Faatura.

Faaitoito i te òhipa.