Papa Haamori Täpati 22 no Novema 2020. Ïti haìhaì

 

Täpati  22 no Novema 2020.

Papa Haamori

Ïti haìhaì

Ômuaraa.

Nä roto i te mana o te Atua, te rü nei to na here ia tätou. Te pii nei o ia ia tätou tei faaäuhia i te Metia, ia haaparare i te Faaäuraa mä te parau e te òhipa E veà tätou na te Metia mai te mea e, te aò nei te Atua i te taata ia tätou nei, ei ono mätou i te Metia, i te aòraa atu i te taata e, E faaau òutou i te Atua. Ua riro te faaäuraa ei tütia, i pohe ai te hoê no te taata atoà, e pohe to te taata atoà i reira e i pohe hoì te Metia no te taata atoà, ia òre te feiä e ora ra ia haapaò  faahou ia rätou iho i te oraraa nei, ia haapaò rä ia na, tei pohe e tei tià faahou no rätou ra.

 

Taramo 23

Ia faaroo tätou i ta te Taramo parauraa ia tätou i teie mahana. 1 Taramo na Tävita. O te Fatu to ù tiaì, e òre roa vau e ère. 2 Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra.3 E faahoì o ia i ta ù värua. E arataì o ia ia ù nä te èà tïtïàifaro, no te hanahana o to na ra iòa. 4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù: to räau e te tootoo tei haamähanahana mai ia ù. 5 Ua faanahonaho òe i te tahi àmuraa mäa na ù i mua i te aro o ta ù mau ènemi; ua faatävai òe i ta ù upoo; e te î nei ta ù âuà. 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

E tià mai tätou haamaitaì tätou i te Atua i te hoê reo himene.

 

Himene.

Pärahi

 

Ètetiera 34.11-17

Teie te reo o Ètetiera ia tätou i teie mahana haamoriraa na tätou, 11 Te nä ô mai ra hoì te ATUA ra o te Fatu, Inaha, nä ù, nä ù iho nei e ìmi i ta ù mau mämoe, e ia ìteä atu rätou: 12 mai te tiaì e ìmi i ta na nana, tei roto o ia i ta na nana ia purara ê ra; e nä reira atoà vau i te ìmi i ta ù nana, e ua faaora ia rätou i ta mau vähi atoà i purara ai rätou i te mahana i marumaru i te ata e te pöuri. 13 E arataì mai au ia rätou i räpae àu mai i te mau taata ra, e haaputu mai au ia rätou mai te mau fenua mai: e arataì mai au ia rätou i to rätou iho ra fenua mau, a faaàmu ai ia rätou i nià i te mau mouà o Ìteraèra, e te hiti o te mau pape ra, e te pärahiraa atoà o te fenua nei. 14 E faaàmu vau ia rätou i te àmuraa maitaì ra, e ei nià i te mau mouà teitei o Ìteraèra ta rätou âua: ei reira rätou e taòto ai i te âua maitaì ra, e ei roto i te àmuraa e poria ai rätou a àmu ai i nià i te mau mouà o Ìteraèra ra. 15 Nä ù e faaàmu i ta ù nana, e ua faataòto ia rätou i raro të nä reira mai ra te ATUA ra o te Fatu. 16 Nä ù e ìmi i tei moè ra, e ua faahoì mai i tei purara ê, e ua täamu hoì i tei fati ra, e nä ù e faaètaèta i tei maìhia ra; e nä ù e täìri i tei poria e tei ètaèta; e ua faaàmu hoì au ia rätou mä te parau au ra. 17 Âreà òutou, e ta ù nana, te nä ô mai ra te ATUA ra o te Fatu; Inaha, nä ù e hiò i te puaa, i te tahi e te tahi, e te mämoe oni e te puaaniho oni ra. Âmene.

 

Himene tätarahapa.

 

1 Torinetia 15.20-28

Te parau nei o Pauro ia tätou i teie mahana i te naòraa e, 20 Ua tiàfaahou mau rä te Metia i te poheraa ra, e ua riro ei mätamua no te feiä i maìri i te taòto ra. 21 Mai te pohe hoì i noaa i te taata ra, no te taata atoà e noaa ai te tiàfaahou i te feiä i pohe ra. Haamaitaì tätou i te Atua Nui Tumu Tahi no teie parau òaòa e tià ai.

 

Himene òaòa

 

22 Mai te taata i hope i te pohe ia Àtamu, e hope atoà i te faaorahia i te Metia. 23 E haapaòhia rä te taata atoà i to na iho pupu: o te Metia te mätamua, e i muri aè, o to te Metia ia ia fä mai o ia ra. 24 O te hopeà ihoä ia, e püpü atu ai o ia i te Pätireia i te Atua, i te Metua ra; ia hope roa te mau hau, e te mana, e te püai i te faaòrehia e ana: 25 ei ia na hoì te hau, e ia hope roa te mau ènemi atoà i te tuuhia e ana i raro aè i ta na âvae. 26 E taua ènemi hopeà ra o te pohe, e haamouhia ia. 27 Ua tuu hoì o ia i te mau mea atoà i raro aè i ta na âvae. O ta na rä i parau mai ra e, ua tuuhia te mau mea atoà i raro aè ia na, ua ìteä-noa-hia e, te toe ra o ia iho, o tei tuu i te mau mea atoà i raro aè ia na ra. 28 E ia tuu-mau-hia te mau mea atoà i raro aè ia na ra, e i raro atoà aè ia te Tamaiti iho ia na, i tei tuu i te mau mea atoà i raro aè ia na ra, ia riro o te Atua i nià iho i te mau mea atoà i te mau vähi atoà ra. Âmene.

 

Pärahi tätou

Haamaitaì tätou i te Atua i te hoê reo himene.

 

Himene.

Pure

Pure tätou i te Atua, Te hinaaro nei te taata i te tävini no te faatupu ia haatopahia i te mau patu tei faaäpiäpi  te tupuraa te hau e no te ìriti i te ùputa i te oraraa âpï i te iòa o to tätou Atua, o Ietu Metia. O te Värua Maitaì tei arataì mai ia tätou i nià i te èà no te faaäuraa i to na ra iòa. Âmene.

 

Taiòraa

 

Mātaio 25.31-46

Te haaväraa

31 Ia tae mai rä te Tamaiti a te taata mä ta na hanahana, e te mau merahi moà atoà ra, ei reira o ia e pärahi ai i nià iho i to na teröno hanahana; 32 e e haaputuhia to te mau fenua atoà i mua i to na aro: e na na e faataa ia rätou mai te tiaì mämoe e faataa i te mämoe i te puaaniho ra. 33 E e tuu o ia i te mämoe i ta na rima àtau, e te puaaniho i te rima àui. 34 Ei reira te arii e parau aè ai i tei ta na rima àtau ra: A haere mai òutou, e te feiä i faaorahia e ta ù Metua, e pärahi i te Hau i haapaòhia no òutou mai te hämaniraa mai o te fenua nei ra. 35 I poìa na hoì au, e ua höroà mai òutou i te mäa na ù; i poìhä na vau e ua faaïnu mai òutou ia ù; e taata ê au, e ua ìte mai òutou ia ù; 36 i veve na vau, e ua faaàhu mai òutou ia ù; i pohe na vau i te maì, e ua utuütu mai òutou ia ù; i roto vau i te täpeàraa, e ua haere mai òutou ia ù ra. 37 Ei reira te feiä parau tià ra e nä ô aè ai te parau ia na: E te Fatu, i nä fea mätou i ìte ai ia òe i te poìaraa, e ua faaàmu ia òe? E te poìhäraa, e ua faaïnu atu ia òe? 38 I nä fea mätou i ìte atu ai ia òe, e e taata ê, e ua ìte atu ia òe? E te veveraa, e ua faaàhu ia òe? 39 I nä fea mätou i ìte atu ai ia òe i te poheraa i te maì, e i roto i te täpeàraa, e ua haere atu ia òe ra? 40 E nä ô aè te arii i te parau ia rätou nä ô aè ra: Oia mau ta ù e parau atu ia òutou nei: o òutou i nä reira i te hoê taeaè iti haìhaì roa i roto i ta ù mau taeaè nei, ua nä reira mai ia òutou ia ù. 41 Ei reira o ia e parau aè ai i tei te rima àui: E haere ê òutou, e te feiä faaìnohia, i roto i te auahi pohe òre i haapaòhia no te tiàporo e ta na ra mau merahi  42 I poìa na hoì au, e aore òutou i höroà mai i te mäa na ù; i poìhä na vau, e aore òutou i faaïnu mai ia ù; 43 e taata ê au, e aore òutou i ìte mai ia ù; i veve na vau, e aore òutou i faaàhu mai ia ù; i maìhia na vau, e i roto vau i te täpeàraa, e aore òutou i haapaò mai ia ù. 44 Ei reira atoà rätou e parau ai ia na, i te nä-ô-raa e: E te Fatu, i nä fea mätou i ìte atu ai ia òe i te poìaraa, e te poìhäraa, e te taata-ê-raa, e te veveraa, e te poheraa i te maì, e i roto i te täpeàraa, e aore i turu atu ia òe? 45 Ei reira o ia e nä ô aè ai i te parau ia rätou: Oia mau ta ù e parau atu ia òutou na: o òutou aore i nä reira i te hoê taeaè iti haìhaì roa i roto i ta ù mau taeaè nei, aore atoà ia i nä reira mai ia ù. 46 O të haere ê ia e rave i te faautuàraa pohe mure òre, âreà te feiä parau tià ra o të rave ia i te ora mure òre.

Na te Atua Nui Tumu Tahi, e haamaitaì mai i te täiòraahia ta na parau.

 

Pure

Pure tätou i te Atua, Ia pihaa te puna vai no te faaäuraa o te aroha e te here o te Atua i teie mahana haamoriraa, ia ìte rahi te taata i te hau e te èà tei turu no te haere i terä vähi e terä vähi. Ia rü te here o te Metia ia tätou, e te mau maru metia e te mau Ètärëtia, ia ora i roto i te faaäuraa e ia topa te mau patu o te âmaharaa. Âmene.

Haamaitaì tätou i te hoê reo himene.

 

Himene.

Faaitoitoraa

Himene.

Parau faaära.

Püpüraa moni

Himene püpüraa moni.

Pure Ärai.

Pure tätou i te Atua,

E te Atua Metua e, te òriò  mata e te pü tarià o te nünaa mäòhi, E tià òe i mua i to mätou mau ùputa rii, aita rä mätou i täuà iti noa aè i ta òe mau pätötöraa. Te pii noa mai ra to òe reo, ua fëàa roa rä to mätou âau i te faaroo-noa-raa i te rauraa o te mau reo e täûu noa ra i te pae o to mätou nei oraraa. Ua hinaaro  òe ia ìriti mätou i te ôpani i tämaumauhia e mätou i roto i to mätou oraraa.

E te Tumu Nui e, tätarahapa atu nei mätou ia  òe, o mätou i haamoè i te haapiiraa a to mätou mau tupuna i te nä ôraa e, eiaha e hiò  mata noa i te taata e haere noa mai nä mua i to  òutou mau fare mä te òre e pii atu e, haere mai, tïpae mai i te fare nei, täma. E hia taime to òe nä mua-noa-raa mai i to mätou fare, e mea rave àtä no mätou i te parauraa atu e,  tïpae mai i te fare nei, ahimäa täua.

Te haamanaò  tämau noa nei  òe ia mätou e, te here te ora ia o te nünaa Mäòhi . Te tïtau noa nei  òe i te taata ia riro te here ei mäa tumu na mätou i te mau mahana atoà ra. Inaha, na te here nei hoì e faatupu i te hoêraa hinaarohia e òe no te mau nünaa atoà ra.

Ua moèhia ia mätou e te Tumu Nui e, te taura o te Here ta  òe i firi na i roto ia  òe e o mätou nei, ua àriàri roa ia i ta mätou rave. Te ani nei mätou ia òe, àhiri e tià e ia faaâpï faahou i teie taura e täamu nei ia tätou mai te taura pito e täamu nei i te tamarii i to na metua vahine.

A haapaari faahou i te reira taura, ia òre mätou ia ätea faahou ia òe, e ia òre atoà mätou ia täiva faahou i to mätou iho fenua, oia to mätou metua vahine faatupu ora. Mätou tahi fenu, te fenua tahi fenu, o  òe hoì te fenu e haapaari nei i te taura o te here i te roaraa o te tau ta mätou e ora nei. Âmene.

Haamaitaì tätou i te Atua i te hoê reo himene âmui e tià päatoà tätou.

 

Himene âmui.

Pure a te Fatu

Âmui to tätou reo i roto i te pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie ta tätou parau faaitoitoraa

Faaitoitoraa.

45 Ei reira o ia e nä ô aè ai i te parau ia rätou: Oia mau ta ù e parau atu ia òutou na: o òutou aore i nä reira i te hoê taeaè ïti haìhaì roa i roto i ta ù mau taeaè nei, aore atoà ia i nä reira mai ia ù.

 

Teie ta tätou parau haamaitaìraa.

Haamaitaìraa.

28 E ia tuu-mau-hia te mau mea atoà i raro aè ia na ra, e i raro atoà aè ia te Tämaïti iho ia na, i tei tuu i te mau mea atoà i raro aè ia na ra, ia riro o te Atua i nià iho i te mau mea atoà i te mau vähi atoà ra. Âmene.

 

Teraì òr. Faatura.

Papa Haamori Tāpati 15 no Novema 2020. Taoà

 

Tāpati 15 no Novema 2020.

Papa Haamori

Taoà

Färiiraa.

Ua hiò te Mäòhi i te fenua mai to na metua vahine te huru, e o na iho te tamarii. Ia vai noa mai to tätou metua vahine, èita ia tätou e òtare, èita hoì e òvere. Ia òre to tätou metua vahine ia riro faahou èi teòteòraa no tätou, ia haamata tätou i te hoo pätë, ia taui hoì i te taihaa, e hanahana faahou änei to te fenua, oia to tätou metua vahine, i reira. Mea tano tätou, nä roto i te parau o te fenua, ia ìte faahou i te auraa o te parau o te here metua, te here o te tamarii i to na  metua.

Taramo 128

A faaroo mai na i te Taramo faateniraa i te parau no te metua vahine, 1 Tire a te Moruta. E ao to te taata atoà i mataù i te Fatu, o tei haapaò i to na ra mau èà. 2 E àmu òe i ta to rima i òhipa ra. E ao to òe e e manuia ta òe. 3 E riro to vahine mai te vine hotu i to òe ra pae fare; e to mau tamarii, mai te ohi ôrive ia, i te haaàtiraa i ta òe ra àmuraa. 4 Inaha, i nä-reira-hia to taua taata ra maitaì, to te taata i mataù i te Fatu ra 5 Na te Fatu òe e haamaitaì, mai ô mai i Tiona ra. E ìte hoì òe i te maitaìraa o Ierutarëma, e hope noa atu to òe ra puè mahana, 6 e ìte òe i te tamarii a to mau tamarii ra. E te hau hoì i nià ia Ìteraèra.

Haamaitaì tätou i te Atua i te hoê reo himene, e tià mai tätou.

 

Himene

Pärahi tätou.

 

Mäteri 31.10-31

Teie te parauraa a te Mäteri no te vahine e te fenua, 10 O vai e taata ua ìteä ia na te vahine maitaì ra. E òre te mau poe nei e au ia na. 11 Te tiàturi ra te âau o ta na täne ra ia na, e òre hoì ta na taoà e faaäni-ê-hia.12 E riro o ia i te hämani maitaì mai ia na e òre e hämani ìno, e mure noa atu to na aho.13 Te ìmi ra i te huruhuru mämoe e te vavai, e te rave ra ta na rima i te òhipa mä te maitaì.14 E au o ia i te pahï a te feiä hoo ra; no te fenua roa mai ta na mäa ia hopoi mai.15 Aore ä i ao maitaì, i tià ai o ia i nià, e ua hopoi i te mäa nä to te ùtuafare, e ua tuu iho ra i te òhipa na te mau tävini vahine. 16 Te manaò ra o ia i te âua e ua hoo; e ua tanu i te ô vine i tei ravehia e ta na rima. 17 Ua tätià i ta na tauupu ei faaètaèta, e te rave ra i te òhipa ei faaètaèta i ta na rima. 18 Te ìte ra o ia e te hinaarohia ra tä na i rave ra; e òre hoì to na mörï e tinaihia i te pö. 19 Te täpeà ra ta na rima i te ferete; e te mau ra ta na àpu rima i te titura. 20 E höhora o ia io na puè rima i te taata rii, e ua faatoro hua i te taata veve ra. 21 E òre o ia e manaònaò i to na fëtii i te tau vero ra, ua tätaìpiti anaè ia i te àhu e àti noa aè rätou ra. 22 Te hämani ra o ia i te àhu taòto nehenehe nö na iho; e tirita hoì to na àhu i rapaauhia i te räau ùteùte. 23 Te ìteä-noa-hia ra ta na täne i roto i te âmuiraa atoà ra; ia pärahi o ia i roto i te hui raatira atoà o te fenua ra. Âmene.

 

Himene tätarahapa.

 

24 Ua hämani o ia i te àhu e ua hoo; e te tätià e ua hoo atu i te feiä hoo ra. 25 Te ètaèta e te tura to na àhu; e òaòa hoì o ia a muri atu. 26 E parau o ia i te parau paari, e te ture ra i te hämani maitaì tei ta na arero. 27 E hiò o ia i te haapaòraa o to na ra ùtuafare, e aore i àmu i te mäa i noaa i te faatau ra. 28 E tià ta na mau tamarii mä te faaora ia na; e ta na täne atoà, mä te haamaitaì ia na. 29 E rave rahi te vahine hämani maitaì, o òe rä tei hau ia rätou atoà ra. 30 E mure ä te nehenehe, e te purotu e mou ia, o te vahine rä e mataù i te Fatu ra, e haamaitaì-rahi-hia ia. 31 E horoàhia atu tei ravehia e ta na rima; e haamaitaì mai tei ravehia e ana i te mau âmuiraa o te taata atoà ra. Haamaitaì tätou i te Atua no teie mau parau e tià ai.

 

Himene òaòa.

 

1 Tëtäronia 5.1-6

Teie te tahi parauraa a Pauro no te Fatu ra te Metia, te Tämaïti fänau tahi a te Atua Metua. 1 Âreà i te taime e te tau, e a ù mau taeaè, eiaha noa atu vau e päpaì atu i te parau ia òutou i te reira. 2 Ua ìte päpü hoì òutou iho, e te haere mai ra taua mahana o te Fatu ra, mai te haereà mai o te èiä i te pö ra. 3 E parau hoì te taata e: E hau, e aita e ìno, ei reira rä rätou e roohia-noa-hia mai ai e te pohe òiòi, mai te vahine hapü ia roohia i te mäuiui ra, e e òre roa rätou e ora. 4 Âreà òutou, e te mau taeaè, aore ia i roto i te pöuri, a roohia mai ai òutou e taua mahana ra mai te èiä ra. 5 E tamarii anaè òutou no te märamarama, e tamarii no te ao. Eere tätou i to te pö, e to te pöuri. 6 E teie nei, eiaha tätou e taòto mai te tahi paeàu ra, e ara rä tätou, e haapaò maitaì. Âmene.

 

Pärahi tätou.

Haamaitaì tätou i te Atua i te hoê reo himene.

 

Himene.

Pure.

 

Pure tätou i te Atua, e te Atua Nui Tumu Tahi i mua i te Parau Maitaì ta mätou e faaineine nei i te taiò e i te faaroo, türama i to mätou âau i te vahi i òre i naeàhia e mätou i te märamarama, ia noaa ia mätou i te tauturu o ta òe e tïtau mai nei ia mätou, a turu mai ia mätou e te Atua Nui Tumu Tahi. Âmene

 

Taiòraa. 

Mātaio 25.14-30

Te mau täreni

(Rut 19.12-27)

14 E au hoì te Tamaiti a te taata nei i te hoê taata i ôpua i to na tere, e ua parau atu ra i to na iho mau tävini, tuu atu ra i ta na taoà ia rätou. 15 Tuu atu ra o ia i ta te tahi, e pae ia täreni, e piti ta te tahi, hoê ta te tahi; i tei au atoà i taua nä taata ra; reva atu ra i to na tere. 16 Haere atu ra tei rave i nä täreni e pae ra, hoo haere atu ra i taua nä täreni ra, e noaa mai ra nä täreni ê e pae. 17 Mai te reira atoà tei rave i nä täreni e piti ra, e noaa mai ra nä täreni ê e piti. 18 Âreà tei rave i te hoê ra, haere atu ra ia, heru atu ra i te repo, huna iho ra i te moni a to na fatu. 19 E mäoro aè ra, hoì mai ra te fatu o taua mau tävini ra, faaau mai ra i te parau ia rätou. 20 Ua haere mai ra tei rave i nä täreni e pae ra, hopoi atoà mai ra i nä täreni ê e pae, nä ô mai ra: E ta ù fatu, e pae a òe täreni i tuu mai ia ù; inaha, teie ia, e nä täreni ê hoì e pae i noaa ia ù nei. 21 Ua nä ô atu ra ta na fatu ia na: Ua tià roa, e teie nei tävini maitaì e te haavare òre; o òe i haapaò maitaì i tënä nä taoà iti haìhaì, e faatïàau atu vau ia òe i nià iho i te mea rahi: e haere òe i roto i te ôroà òaòaraa a to fatu. 22 Ua haere atoà mai ra tei rave i nä täreni e piti ra, nä ô mai ra: E ta ù fatu, e piti a òe täreni i tuu mai ia ù; inaha, teie ia, e nä täreni ê hoì e piti i noaa ia ù nei. 23 Ua nä ô atu ra ta na fatu ia na: Ua tià roa, e teie nei tävini maitaì e te haavare òre, ua haapaò maitaì òe i tënä nä taoà iti haìhaì, e faatïàau atu vau ia òe i nià iho i te mea rahi: e haere òe i roto i te ôroà òaòaraa a to fatu. 24 Ua haere mai ra hoì tei rave i te täreni hoê ra, nä ô mai ra: E ta ù fatu, ua ìte au e e taata ìriä òe, eere i ta òe i tanu ra e ôoti ä òe, eere hoì i ta òe i ueue ra e haaputu ä òe; 25 mataù aè ra vau haere atu ra, huna iho ra vau i te täreni na òe i raro i te repo: inaha, i faahoì mai nei ä vau i ta òe iho. 26 Ua parau atu ra ta na fatu ia na, nä ô atu ra: E teie nei tävini ìno e te faatau. Ua ìte òe e eere i ta ù i tanu ra e ôoti ä vau, e eere i ta ù i ueue ra e haaputu ä vau? 27 Eiaha hoì òe e hopoi i ta ù moni i te hooraa ra, e ia tae mai au ra noaa iho ra ta ù mä te hoo? 28 A rave mai i ta na täreni a hopoi atu ai i te taata auàhuru a ana täreni ra. 29 E taoà ta na ra, e höroàhia atu ä ta na e ia rahi; aita a ana ra, e hopoi-ê-hia ia ta na. 30 E huri atu i taua tävini faufaa òre nei i roto i te pöuri i räpaeàu ra, tei reira te òto e te àuàuraa niho ra.

Na te Atua Nui Tumu Tahi, e haamaitaì i te täiòraahia ta na parau.

 

Pure.

Pure tätou i te Atua, mauruüru no teie Parau Maitaì i taiòhia e mätou e i faaroohia e mätou, te tià e tauturu ia mätou i roto i te faufaa no te täviniraa ia nui to mätou faaroo e te Tumu nui e. Âmene.

Haamaitaì tätou i  te Atua i te hoê reo himene.

 

Himene.

Faaitoitoraa

Himene.

Parau faaära

Himene pupuraa moni

 

Pure Ärai.

Pure tätou i te Atua, E te Atua Metua e mea faahiahia mau te òhipa e tupu ra i roto i te faaäuraa a Ietu no te Tämaïti a te Taata tei tiàturi i to na mau tävini e faahotu i ta na faufaa, ia âpï te Fatu òhipa e ia âpï atoà te to na tävini, âreà tei huna i to na Fatu ua pau ia te Fatu, e ua topatari te tävini te faahaparaa ua hurihia i räpae i te ôpuaraa faaora a te Atua.

No reira e te Atua Nui Tumu Tahi te mea faufaa no mätou i teie mahana i roto i teie maì e ûàna nei i Mäòhi Nui nei e i roto i te ao nei te ìmi tämauraa ia i te èà e färerei ai tätou i te Atua, te oraraa i te hoê oraraa e pärahi mai ai te Atua Nui Tumu Tahi i pïhaì ia tätou. Èita rä tätou e fätata i te Atua, eita hoì te Atua e fätata mai ia tätou, mai te peu e, eita tätou e färii, eita tätou e fäì e, e tamarii tätou na te Atua, e o Ia to tätou Metua. Ia na reira tätou te âmui ra ia te puai o to tätou faaroo i te faatiöraa e te faaòre-roa-raa i teie maì e haaviivii nei e haapohe nei ia tätou e te nünaa Mäòhi i Mäòhi Nui nei.

-I teie âmuiraa o to tätou faaroo, no te mau tahuà räau ia i roto i te mau mäìmiraa i te räau no te faatiöraa e te faaòre-roa-raa i teie maì viivii, oia atoà i te mau taata e òhipa nei no te ärai ia òre-roa-atu teie maì ia parare-roa-atu i te mau vahi atoà, e ia itoito atoà te mau taata i roohia i teie maì ia faaea i te fare ia au te ôtià mahana i faataahia.

-I teie âmuiraa o to tätou faaroo, ia itoito te Hau Mäòhi, e te mau tävana i te amoraa  i ta rätou mau hopoià, no te faatiöraa e te faaòre-roa-raa i teie maì e haaviivii nei i te nünaa.

-I teie âmuiraa o to tätou faaroo, ia itoito te mau Ètärëtia i te pure no te faatiöraa e te faaòre-roa-raa i teie mai e haaviivii nei i to òe nünaa e te Atua Nui Tumu Tahi.

E te Atua Nui Tumu Tahi e, a ìte mai i te teimaha no te hopoià e fautuahia nei e to òe mau tävini, aita mätou e hinaaro nei e huna i ta mätou mau täreni, to Òe âpï, to mätou atoà âpï, ta Òe ôpuaraa faaora, to mätou ia ora, o Òe to mätou ôriò mata, o Òe to mätou pütarià. Âmene.

Haamaitaì tätou i te Atua i te hoê reo himene âmui e tià mai tätou.

 

Himene âmui.

 

Amui to tätou reo i roto i te pure a te Fatu.

Pure a te Fatu

Âmui to tätou reo i roto i te pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Faaitoitoraa.

Teie ta tätou faaitoitoraa

29 E taoà ta na ra, e höroàhia atu ä ta na e ia rahi; aita a ana ra, e hopoi-ê-hia ia ta na. 

Haamaitaìraa.

Teie ta tätou haamaitaìraa.

E ao to te taata atoà i mataù i te Fatu, o tei haapaò i to na ra mau èà. 2 E àmu òe i ta to rima i òhipa ra. E ao to òe e e manuia ta òe.

Teraì òr. Faatura.

 

 

Mātaio 25.14-30 Tuu

 

Tāpati 15 no Novema 2020.

Tuu  

Mau taiòraa.

Taramo 128

1 Tire a te Moruta. E ao to te taata atoà i mataù i te Fatu, o tei haapaò i to na ra mau èà. 2 E àmu òe i ta to rima i òhipa ra. E ao to òe e e manuia ta òe. 3 E riro to vahine mai te vine hotu i to òe ra pae fare; e to mau tamarii, mai te ohi ôrive ia, i te haaàtiraa i ta òe ra àmuraa. 4 Inaha, i nä-reira-hia to taua taata ra maitaì, to te taata i mataù i te Fatu ra 5 Na te Fatu òe e haamaitaì, mai ô mai i Tiona ra. E ìte hoì òe i te maitaìraa o Ierutarëma, e hope noa atu to òe ra puè mahana, 6 e ìte òe i te tamarii a to mau tamarii ra. E te hau hoì i nià ia Ìteraèra.

Māteri 31.10-31

10 O vai e taata ua ìteä ia na te vahine maitaì ra. E òre te mau poe nei e au ia na. 11 Te tiàturi ra te âau o ta na täne ra ia na, e òre hoì ta na taoà e faaäni-ê-hia.12 E riro o ia i te hämani maitaì mai ia na e òre e hämani ìno, e mure noa atu to na aho.13 Te ìmi ra i te huruhuru mämoe e te vavai, e te rave ra ta na rima i te òhipa mä te maitaì.14 E au o ia i te pahï a te feiä hoo ra; no te fenua roa mai ta na mäa ia hopoi mai.15 Aore ä i ao maitaì, i tià ai o ia i nià, e ua hopoi i te mäa nä to te ùtuafare, e ua tuu iho ra i te òhipa na te mau tävini vahine. 16 Te manaò ra o ia i te âua e ua hoo; e ua tanu i te ô vine i tei ravehia e ta na rima. 17 Ua tätià i ta na tauupu ei faaètaèta, e te rave ra i te òhipa ei faaètaèta i ta na rima. 18 Te ìte ra o ia e te hinaarohia ra tä na i rave ra; e òre hoì to na mörï e tinaihia i te pö. 19 Te täpeà ra ta na rima i te ferete; e te mau ra ta na àpu rima i te titura. 20 E höhora o ia io na puè rima i te taata rii, e ua faatoro hua i te taata veve ra.21 E òre o ia e manaònaò i to na fëtii i te tau vero ra, ua tätaìpiti anaè ia i te àhu e àti noa aè rätou ra. 22 Te hämani ra o ia i te àhu taòto nehenehe nö na iho; e tirita hoì to na àhu i rapaauhia i te räau ùteùte. 23 Te ìteä-noa-hia ra ta na täne i roto i te âmuiraa atoà ra; ia pärahi o ia i roto i te hui raatira atoà o te fenua ra. 24 Ua hämani o ia i te àhu e ua hoo; e te tätià e ua hoo atu i te feiä hoo ra. 25 Te ètaèta e te tura to na àhu; e òaòa hoì o ia a muri atu. 26 E parau o ia i te parau paari, e te ture ra i te hämani maitaì tei ta na arero. 27 E hiò o ia i te haapaòraa o to na ra ùtuafare, e aore i àmu i te mäa i noaa i te faatau ra. 28 E tià ta na mau tamarii mä te faaora ia na; e ta na täne atoà, mä te haamaitaì ia na. 29 E rave rahi te vahine hämani maitaì, o òe rä tei hau ia rätou atoà ra. 30 E mure ä te nehenehe, e te purotu e mou ia, o te vahine rä e mataù i te Fatu ra, e haamaitaì-rahi-hia ia. 31 E horoàhia atu tei ravehia e ta na rima; e haamaitaì mai tei ravehia e ana i te mau âmuiraa o te taata atoà ra.

1 Tëtäronia 5.1-6

1 Âreà i te taime e te tau, e a ù mau taeaè, eiaha noa atu vau e päpaì atu i te parau ia òutou i te reira. 2 Ua ìte päpü hoì òutou iho, e te haere mai ra taua mahana o te Fatu ra, mai te haereà mai o te èiä i te pö ra. 3 E parau hoì te taata e: E hau, e aita e ìno, ei reira rä rätou e roohia-noa-hia mai ai e te pohe òiòi, mai te vahine hapü ia roohia i te mäuiui ra, e e òre roa rätou e ora. 4 Âreà òutou, e te mau taeaè, aore ia i roto i te pöuri, a roohia mai ai òutou e taua mahana ra mai te èiä ra. 5 E tamarii anaè òutou no te märamarama, e tamarii no te ao. Eere tätou i to te pö, e to te pöuri. 6 E teie nei, eiaha tätou e taòto mai te tahi paeàu ra, e ara rä tätou, e haapaò maitaì.

Mātaio 25.14-30

Te mau täreni

(Rut 19.12-27)

14 E au hoì te Tamaiti a te taata nei i te hoê taata i ôpua i to na tere, e ua parau atu ra i to na iho mau tävini, tuu atu ra i ta na taoà ia rätou. 15 Tuu atu ra o ia i ta te tahi, e pae ia täreni, e piti ta te tahi, hoê ta te tahi; i tei au atoà i taua nä taata ra; reva atu ra i to na tere. 16 Haere atu ra tei rave i nä täreni e pae ra, hoo haere atu ra i taua nä täreni ra, e noaa mai ra nä täreni ê e pae. 17 Mai te reira atoà tei rave i nä täreni e piti ra, e noaa mai ra nä täreni ê e piti. 18 Âreà tei rave i te hoê ra, haere atu ra ia, heru atu ra i te repo, huna iho ra i te moni a to na fatu. 19 E mäoro aè ra, hoì mai ra te fatu o taua mau tävini ra, faaau mai ra i te parau ia rätou. 20 Ua haere mai ra tei rave i nä täreni e pae ra, hopoi atoà mai ra i nä täreni ê e pae, nä ô mai ra: E ta ù fatu, e pae a òe täreni i tuu mai ia ù; inaha, teie ia, e nä täreni ê hoì e pae i noaa ia ù nei. 21 Ua nä ô atu ra ta na fatu ia na: Ua tià roa, e teie nei tävini maitaì e te haavare òre; o òe i haapaò maitaì i tënä nä taoà iti haìhaì, e faatïàau atu vau ia òe i nià iho i te mea rahi: e haere òe i roto i te ôroà òaòaraa a to fatu. 22 Ua haere atoà mai ra tei rave i nä täreni e piti ra, nä ô mai ra: E ta ù fatu, e piti a òe täreni i tuu mai ia ù; inaha, teie ia, e nä täreni ê hoì e piti i noaa ia ù nei. 23 Ua nä ô atu ra ta na fatu ia na: Ua tià roa, e teie nei tävini maitaì e te haavare òre, ua haapaò maitaì òe i tënä nä taoà iti haìhaì, e faatïàau atu vau ia òe i nià iho i te mea rahi: e haere òe i roto i te ôroà òaòaraa a to fatu. 24 Ua haere mai ra hoì tei rave i te täreni hoê ra, nä ô mai ra: E ta ù fatu, ua ìte au e e taata ìriä òe, eere i ta òe i tanu ra e ôoti ä òe, eere hoì i ta òe i ueue ra e haaputu ä òe; 25 mataù aè ra vau haere atu ra, huna iho ra vau i te täreni na òe i raro i te repo: inaha, i faahoì mai nei ä vau i ta òe iho. 26 Ua parau atu ra ta na fatu ia na, nä ô atu ra: E teie nei tävini ìno e te faatau. Ua ìte òe e eere i ta ù i tanu ra e ôoti ä vau, e eere i ta ù i ueue ra e haaputu ä vau. 27 Eiaha hoì òe e hopoi i ta ù moni i te hooraa ra, e ia tae mai au ra noaa iho ra ta ù mä te hoo. 28 A rave mai i ta na täreni a hopoi atu ai i te taata auàhuru a ana täreni ra. 29 E taoà ta na ra, e höroàhia atu ä ta na e ia rahi; aita a ana ra, e hopoi-ê-hia ia ta na. 30 E huri atu i taua tävini faufaa òre nei i roto i te pöuri i räpaeàu ra, tei reira te òto e te àuàuraa niho ra.

Manaò.

Te mau parau ta te aroha e te here o te Atua Nui Tumu Tahi i färii ia ìte tätou i teie mahana, e mau parau moè ia, e mau parau àro. O ätou i te ao tino nei, o te ìte anaè o te pae tino nei tei horoàhia i to tätou märamarama ia àpo mai, âreà te mau mea o te ao värua ra, mai te mea ìteä-òre-hia e te mata taata nei, ua riro ia èi mataùraa na tätou. Teie te tahi haapotoraa no taiòraa e maha nei.

-Taramo 128, 1 E ao to te taata atoà i mataù i te Fatu, o tei haapaò i to na ra mau èà.

Materi 31, 27 E hiò o ia i te haapaòraa o to na ra ùtuafare, e aore i àmu i te mäa i noaa i te faatau ra.

I Tëtäronia 5, 6 E teie nei, eiaha tätou e taòto mai te tahi paeàu ra, e ara rä tätou, e haapaò maitaì.

Mätaio 25, 15 Tuu atu ra o ia i ta te tahi, e pae ia täreni, e piti ta te tahi, hoê ta te tahi; i tei au atoà i taua nä taata ra; reva atu ra i to na tere.

 

Te Èvaneria a Mätaio, te faaìte nei i te Parau Maitaì i nià ia Ietu Metia, te Faaora tei fäfauhia mai e te Atua no te faatupu-hope-raa i te mau parau i o tei faaìtehia i te mau nünaa i roto i te Faaäuraa Mätamua. Teie Parau Maitaì ua päpaìhia e Mätaio ia au i to na tiàturiraa e te puai o to na faaroo i te Faaora, riro atu ra teie mau Parau Maitaì èi haafänauraa i te taata i roto i te hoê tiàturiraa päpähia i nià i te ora o ta Ietu e faaìte na roto i te mau haapiiraa o te fenua, te taata, te nünaa no te täatoàraa  o teie nei ao.

Te Èvaneria a Mätaio, ua faanaho-maitaì-hia ia. Te haamata nei teie Èvaneria nä nià i te fänauraa o Ietu, te tätara nei hoì i te parau no to na päpetitoraahia e tae noa atu i to na tämataraahia, e tae noa atu i nià i ta na òhipa no te faaìteraa, haapiiraa, e faaoraraa maì i Tarirea. I muri aè i te reira, te faatià atoà ra te Èvaneria i te tere o Ietu mai Tarirea atu e tae atu i Ierutarëma e te mau òhipa i tupu i te hepetoma hopeà o Ietu i te ao nei, tei hope na roto i to na faatätauroraahia e to na tiàfaahouraa.

Te faaìte atoà mai ra teie Èvaneria ia Ietu mai te tahi Òrometua tei hau i te rahi, tei ia na hoì te mana no te tätara i te Ture a te Atua, e te haapii ra hoì i te parau no te Hau o te Atua. Ua haaputuhia te mau tumu parau o ta na haapiiraa i roto i nä tuhaa e pae,

1) Te Aòraa i nià i te Mouà, tei faaìte mai i te huru, te òhipa, te fänaò e te oraraa o te feiä tei faataahia no te Hau mai te pene 5 e tae i te pene 7.

2) Te mau haapiiraa i höroàhia i nä pipi hoê àhuru mä piti pene 10.

3) Te mau parapore no te Hau o te raì pene 13.

4) Te haapiiraa i nià i te aura no te riroraa èi pipi pene 18.

5) Te haapiiraa i nià i te hopeà o teie tau e te haereà mai no te Hau no te raì mai, pene 24 e tae i te 25.

 

Ta tätou parau tei te tuhaa 5 ia, tei roto i te mau haapiiraa hopeà, nahea i te haafaufaaraa i te tuhaa òhipa a te Atua i roto i te nünaa. E aore rä, e nahea te Atua e âpï ai ia ù.

Teie parapore te faatupu nei te maere i roto ia ù i to ù täiòraa i teie tuhaa no te mau haapiiraa a Ietu. Òia mau, tei mätauhia e ìmi i te mau räveà atoà i te märamaramaraa, e parau ia tätou e, o te Atua teie e höroà nei i te faatereraa o ta na mau òhipa i roto i to na mau tävini, ia oti e hoì mai te Fatu o te òhipa e faaàfaro, ua tupu maitaì änei te faaòhiparaa. Ia au i teie manaò, ua täno te toru o te tävini i te parau i te ìrava 24  E ta ù fatu, ua ìte au e taata ìriä òe, e ère i ta òe i tanu ra e ôoti ä òe, e ère hoì i ta òe i ueue ra e haaputu ä òe te ìrava 25 mataù aè ra vau haere atu ra, huna iho ra vau i te täreni na òe i raro i te repo, ìnaha, i faahoì mai nei ä vau i ta òe iho.

Mai te mea e färii tätou i te haapaò maitaì i to Mätaio faaòhiparaa i te mau taò, e tià ia tätou ia märamarama maitaì te huru o teie Fatu, e ua parau atu ra i to na iho mau tävini, tuu atu ra i ta na taoà ia rätou, te tuu e ö mai te tiàmä, te höroà, e òhipa te tupu i roto i teie taò e tuu.

Na tävini mätamua e piti, ua faaòhipa i ta räua täreni i teie taime tätou e ìte ai te faahiahia o teie Fatu, i te parauraa i teie na tävini e piti, te mea haìhaì i tuuhia ia räua, ua tupu ia i te rahi, e ua faatiàauhia räua i nià i täua mau fäufaa ra, te vahi maere i teie faaâfaroraa, àita te Fatu òhipa i äni i ta na tuhaa, i roto i te âpï, ua parau rä ia räua e haere i roto i te ôroà òaòaraa a te Fatu.

Àreà te toru o te tävini ua mätaù i to na Fatu i tuu ia na hoê täreni, ua huna ma te ô i te âpoo tuu atu ra i roto, ua ère teie tävini i te ôroà òaòaraa i to na mätaù, ua tuuhia ta na täreni i na tävini mätamua. Te tupu faahou nei te maere i roto i tätou parau no teie mahana, teie Fatu, àita i räve i te täreni i òre i faaòhipahia ua tuuhia i roto i te tävini i faaòhipa.

E hoa here mä e, Ua tuu mai te Atua tei Rähu i te mau mea atoà i ta na fäufaa i roto ia tätou, mai te taoà höroà e te tïtau mai ra ia tätou ia riro èi taata tiàmä i roto i te mau faatupuraa òhipa, ia ìtehia te tupu maitaìraa te huru e te hohoà o te Atua. Àita roa hoê taime to te Atua faariroraa ia tätou mai te tïtï ra te huru, ua faariro ra ia tätou e mau tämarii, e èi fatu fäufaa i roto i to na mau hinaaro, o ta Pauro ia faaìteraa i to Taratia i te pene 4, i te mau ìrava 4 e tae i te ìrava 7, ìrava 4 Ia tae roa aè nei rä i te tau mau ra, ua tono mai ra te Atua i ta na Tämaïti na te vahine i fänau, i fänau i raro aè i te ture, te ìrava 5 èi faaora i to raro aè i te ture ra, ia noaa ia tätou te maitaì ra e tamarii tävai. Te ìrava 6 E no te mea e tamarii òutou na, ua tuu mai te Atua i te Värua o ta na Tämaïti i roto i to òutou âau, i te taùraa e, Àpa, E ta ù Metua, te ìrava 7 E tënä na, e ère atu ra òe i te tävini, e tämaïti rä e tämaïti ra, e taata âià ia na te Atua i te Metia nei.

 

 

Terai òr. Faatura.

 

 

 

Papa Haamori Rämepa. Tāpati 8 no Novema 2020.

 

Tāpati 8 no Novema 2020.

Papa Haamori

Rämepa.

Ômuaraa.

Ei hau, ei hau, ei hau i roto i te âau o te taata tätaìtahi. Ei hau i roto ia tätou iho. Ei hau i  roto i te âmuiraa taata nei. Ei tere hau to tätou ia taahi mai i roto i te fare nei. Ei manaò hoê to tätou i roto i te haamoriraa nei. A tuu mai i te parau no te here, e aita atu hoì e ö maitaì roa aè e au ia püpühia i te Atua Nui Tumu tahi mäoti rä, te parau mau e te parau tià, te mea ia e hanahana ai te Tumu Nui e.

Haamaitaì tätou i te Atua i te hoê reo Himene, e tià mai tätou.

 

Himene.

Pärahi tätou.

 

Taramo 63

I teie taime e faaroo mai tätou i te mau faahitiraa manaò ta te puta Taramo 63 e faahiti ra, 1 E Taramo na Tävita, ia na i pärahi i te mëtëpara i Iüta ra. 2 E te Atua, o òe hoì ta ù Atua, e ìmi vave au ia òe, te poìhä nei ta ù värua ia òe. Te feàa nei ta ù tino ia òe, mai te fenua marô nei, e te poìhä, e te pape òre. 3 Ia ìte au i to òe ra mana e te hanahana mai ta ù ä hoì i ìte ia òe i te vähi moà ra, 4 e maitaì rahi tei to hämani maitaì i tei te ora. E teie nei, e haamaitaì ta ù vaha ia òe. 5 E nä reira vau i te haamaitaì ia òe i to ù nei oraraa; e hopoi au i o ù puè rima i to òe ra iòa.6 E mäha hoì ta ù värua mai tei te töâhua e te meî ra. E haamaitaì hoì ta ù vaha ia òe mä te òaòa. 7 Ia manaò vau ia òe i nià i ta ù roì, e ia ìmi ia òe i te mau äraraa ra. 8 O òe hoì tei tauturu mai ia ù ra. E teie nei, e òaòa vau i roto i te maru o to pererau ra. 9 Te àti atu nei ta ù värua ia òe, e te mauhia nei au e to rima àtau ra.10 O  te feiä rä i tïtau mai ia ù ia pohe ra, e reva ia rätou i raro roa i te fenua ra. 11 E maìri rätou i te òè, e riro rätou ei tufaa na te ârope 12 E òaòa rä te arii i te Atua E te feiä atoà i tapu ia na ra, e òaòa ia E te vaha o te haavare ra, e ôpanihia ia. Âmene.

 

Himene Tätarahapa.

 

Mäteri 8.12-20

Te vauvau nei te Paari i ta na mau tumu parau, 12 O vau nei o te paari, e tià vau i ô te haapaò ra i te pärahiraa, e te roaa nei te ìte i te mau atoà ra. 13 Mataù to ù i te Fatu, e te riàrià nei au i te ìno. Te teòteò, te faarahi, e te parau a te feiä taiàta, e te vaha märô ra, o tä ù ia e riàrià nei. 14 Tei ia ù nei te parau e te paari mau: tei ia ù te haapaò, tei ia ù te püai. 15 No ù i arii ai te mau ârio, e ia faatupu ai te hui-arii ra i te parau tià. 16 No ù i noaa ai te hau i te hui-arii ra, te feiä mana atoà, e te mau haavä atoà o te fenua nei.17 Te hinaaro nei au i te feiä i hinaaro mai ia ù ra, e te ìmi vave mai ia ù ra, e ìte ia rätou ia ù. 18 Tei àiü te taoà rahi e te tura: te taoà vaiiho taiàta e te parau tià. 19 E maitaì rahi tei ia ù i to te àuro e to te àuro maitaì roa ra, e ta ù nei taoà i te ârio mä maitaì ra. 20 Te arataì nei au na te èà parau tià ra,

32-36

E ao to tei faaroo i te Paari, 32 E tënä na, e faaroo mai ia ù, e te mau tamarii e, e ao hoì to te feiä e haapaò mai i ta ù nei parau. 33 E faaroo mai i te aò ia paari, eiaha roa e òhipa ê i te reira. 34 E ao to te taata e faaroo mai ia ù ra, o tei ara mäite i te mau mahana atoà i te mau ùputa nö ù ra, o tei tiaì mäite i nä ùputa nö ù ra 35 Ua ìteä hoì au ia na ra, ua ìte ia te èà i te ora, e herehia mai hoì o ia e te Fatu. 36 O tei hara ê rä ia ù nei, ua hämani ìno ia i to na iho värua; e tei ôre atoà i hinaaro mai ia ù nei, ua hinaaro ia i te pohe. Haamaitaì tätou i te Atua Nui Tumu Tahi e tià ai.

 

Himene òaòa.

 

1 Tëtäronia  4.13-18

Teie te parauraa a Pauro ia tätou i teie mahana. Te haereà mai o te Fatu, 13 E teie nei, e te mau taeaè, aita vau i hinaaro e ia òre òutou ia ìte i te parau i te feiä i maìri i te taòto nei, ia òre hoì òutou ia taiä, mai te tahi pae aore o rätou tiaìraa ra. 14 Ua faaroo hoì tätou e, i pohe Ietu e tiàfaahou aè ra i nià, oia atoà te feiä e taòto i roto ia Ietu nei, na te Atua ia e faahoì mai e o ia atoà ra.15 Teie ta mätou e parau atu ia òutou, i ta te Fatu ra parau, o tätou o te feiä e ora o te toe i te ao a roohia mai ai e te Fatu ra, e òre e nä mua i te feiä e taòto nei. 16 O te Fatu iho hoì të pou mai mai te raì mai, mä te ûmere, mä te reo o te merahi rahi, e mä te pü a te Atua; e te feiä i pohe i roto i te Metia ra, o të tià mai na ia i nià. 17 E muri aè ra, o tätou o te feiä ora e toe ra, e rave-atoà-hia mai ia e rätou atoà ra i reira, âfaìhia ai i nià i roto i te ata, ia färerei atu i te Fatu i roto i te reva nei ra; a pärahi mau atu ai tätou i pïhaì atoà iho i te Fatu e a muri noa atu. 18 E tënä na, e haamähanahana òutou ia òutou iho i teie nei mau parau. Âmene.

Pärahi tätou, haamaitaì tätou i te Atua i te hoê reo himene.

 

Himene.

 

Pure

Pure tätou i te Atua, E te Here Nui e, Te Atua Nui Tumu Tahi i faaî i to mätou fenua i te ora, O  òe mau ä te Puna o te Here e te ora o te nünaa Mäòhi. Te parau i ìriti i te ùputa o teie nei ao. Te Metua i te raì hamama noa. Ârue, faateniteni mätou i to Òe iòa moà e te tura. Mai ta  òe i faahei ia mätou i to tura e to hinuhinu, ia faahei atoà atu mätou ia  òe, i ta mätou reo haamaitaì no roto i te taiòraa ta mätou e faaineine, nä roto i teie maa reo iti. Faaroo mai rä, e ia tomo i roto ia mätou to märamarama. Âmene.

 

Taiòraa

E Parau  Maitaì no Ietu i te päpaìraa a,

Mätaio 25.1-13

Nä pötii tino àhuru, 1 E au te Hau o te raì i na pötii tino àhuru i reira, tei rave i ta rätou mau rämepa e haere atu ra ia färerei i te täne faaipoipo âpï ra. 2 E feiä paari e toopae, e maamaa hoì e toopae. 3 O te feiä maamaa ra, i hopoi atu ra i ta rätou mau rämepa, aita rä i hopoi atoà i te mörï. 4 Âreà te feiä paari ra, ua hopoi i ta rätou mau rämepa mä te mörï atoà i roto i ta rätou mau färii. 5 Te mäoro ra rä taua täne faaipoipo âpï ra, tiàruhe paatoà iho ra rätou e maìri iho ra te taòto. 6 E tae aè ra i te tuìraa pö ra, o të pii mai ra: Inaha, te haere mai nei te täne faaipoipo âpï nei, e haere òutou ia färerei atu ia na. 7 Ua tià aè ra te mau pötii atoà ra i nià, ua faanehenehe iho ra i ta rätou mau rämepa. 8 Ua parau atu ra te feiä maamaa ra i te feiä paari: Hö mai i te tahi vähi i ta òutou mörï na, te pohe nei hoì ta mätou mau rämepa. 9 Ua parau mai ra rä te feiä paari, nä ô mai ra: Eiaha, o te òre hoì o te navaì ia ôpere na tätou atoà; e haere rä òutou i te feiä hoo ra hoo atu ai i ta òutou iho. 10 E te haere atu ra rätou e hoo ra, tae mai ra taua täne faaipoipo âpï ra, e te feiä i ineine ra, haere atu ra ia e o ia atoà i roto i te ôroà faaipoiporaa, e ôpanihia iho ra te ùputa. 11 E muri aè ra, ua haere mai ra te tahi pae pötii ra, ua nä ô mai ra: E te fatu, e te fatu, a ìriti aè na ia mätou 12 Ua parau atu ra rä o ia, nä ô atu ra: Aore au i ìte ia òutou, oia mau ta ù e parau atu ia òutou na. 13 E teie nei, e ara, aore hoì òutou i ìte i te mahana e te hora atoà e tae mai ai te Tamaiti a te taata.

Na te Atua Nui Tumu tahi, e haamaitaì te täiòraahia ta na parau i mua ia na e ia tätou atoà.

 

Pure

Pure tätou i te Atua, Te ìte noa nei hoì mätou i te mau mahana atoà o to mätou oraraa i te rahi e te î o to Aroha Metua. Te fäì nei rä mätou i to mätou paruparu i te faatupuraa i to òe mau hinaaro ta te parapore e türama nei ia mätou. Âmene.

Haamaitaì tätou i te Atua i te hoê reo himene.

 

Himene.

Faaitoitoraa.

Himene.

Parau faaära

Pupuraa moni.

Pure Ärai

Te Atua te tumu no märamarama, te Metua, te Tamaiti, te Värua Maitaì, Ua faaìte mai  òe ia mätou nei ei Metua e ei Rahu Nui, ei Tamaiti hoì e ei Faaora, inaha hoì, Ôtahi noa hoì òe. Te ôfati nei  òe i ta mätou mau täôtiàraa taata nei e te faaâpï nei òe ia mätou. Höroà mai na ia mätou i te âau âpï, ia noaa ia mätou i te faaätea i te mau mea atoà e faataupupü nei i to mätou hoêraa atu i roto ia  òe e i roto ia mätou atoà nei hoì. Mauruüru rä ia  òe e te Atua e,  òe i  òre i faaruè roa ia mätou, noa atu to mätou huru ètaèta e te faaètaèta-tià- òre i roto i ta  òe Ètärëtia. Òe hoì aore i faariro i to mätou huru ìno ei parau tämau na  òe i te mau mahana atoà nei. Te parau mai nei ta òe Tämaïti ia mätou, e ara, aore hoì òutou i ìte i te mahana e te hora atoà e tae mai ai te Tamaiti a te taata. Âmene.

Haamaitaì tätou i te Atua i te hoê reo himene âmui e tià päatoà tätou.

 

Himene âmui.

Pure a te Fatu.

Âmui to tätou reo i roto i te pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie ta tätou parau faaitoitoraa.

Faaitoitoraa.

13 E teie nei, e ara, aore hoì òutou i ìte i te mahana e te hora atoà e tae mai ai te Tamaiti a te taata.

Tei ta tätou parau haamaitaìraa.

Haamaitaìraa.

18 E tënä na, e haamähanahana òutou ia òutou iho i teie nei mau parau. Âmene.

 

 

Teraì òr. Faatura.