Märeto 9.2-10 Tämau

 

Tāpati 28 no Fëpuare 2021.

Tämau

Mau taiòraa.

Taramo 116

1 E hinaaro rahi to ù i te Fatu, o tei faaroo mai i ta ù reo e i ta ù i ani atu. 2 No te mea ua färiu mai o ia i ta na tarià ia ù nei, e tiàoro ä vau ia na e mure noa atu to ù nei aho. 3 I haapunihia vau e te märei ra o te pohe; i haaàtihia vau e te ahoaho o häte; i roohia vau e te àti e te mäuiui. 4 Ua tiàoro iho ra vau i te iòa o te Fatu, te pure nei au ia òe: E te Fatu e, e faaora na òe i ta ù värua nei. 5 O te hämani maitaì e te parau tià ta te Fatu, oia ia, ua î to tätou Atua i te aroha. 6 E tiaì mai te Fatu i te feiä haavare òre; i tuu-haèhaa-hia vau, e ua faaora o ia ia ù. 7 E hoì, e ta ù värua, i to òe ra faaearaa, ua hämani maitaì mai te Fatu ia òe. 8 Ua faaora òe i ta ù värua i te pohe, e ta ù mata i te òto, e ta ù âvae ia òre ia hià. 9 E hahaere ä vau i mua i te Fatu i te fenua o te feiä e ora nei.10 Ua tiàturi au i te Fatu i parau ai au: Ua rahi roa iho nei to ù pohe 11 E ua parau hoì au i ta ù rüraa ra: E haavare anaè to te taata atoà nei 12 E aha rä ta ù ia hopoi atu na te Fatu, i te mau hämani maitaì no na ia ù nei? 13 E rave au i te âuà ora e hopoi i nià a tiàoro ai i te iòa o te Fatu. 14 E faatupu vau i ta ù i èuhe i te Fatu, i teie nei i mua i te aro o to na atoà ra mau taata. 15 E mea taoà i te aro o te Fatu te pohe o to na ra mau tävini moà. 16 Oia mau, e te Fatu, no te mea o vau to òe tävini, to tävini e te tamaiti a to tävini vahine Ua matara ia òe to ù nei mau täpeà. 17 E hopoi au i te tahi tütia haamaitaì ia òe, a tiàoro ai au i te iòa o te Fatu. 18 E faatupu vau i ta ù i èuhe i te Fatu, i teie nei i mua i te aro o to na atoà ra mau taata, 19 i roto i te mau àumoa i te fare o te Fatu ra, i rotopü ia òe, e Ierutarëma e. Hareruia.

Tenete 22.1-18

Âperahäma i te tämata-raa-hia e te Atua; to na faaroo i te höroàraa ia Itaata.

1 E muri aè i te reira, ua tämata mai ra te Atua ia Âperahäma, nä ô mai ra ia na, E Âperahäma e. Ua nä ô atu ra o ia, Teie au. 2 Ua parau mai ra o ia, A rave i to tamaiti i tënä na, i to tamaiti hoê ra ia Itaata, ta òe e here na, a haere ai i te fenua ra o Moria, püpü mai ai ia na i reira ei tütia täauahi i nià i te hoê mouà na ù e faaìte atu ia òe. 3 Ua tià aè ra Âperahäma i nià i te poìpoì roa ra, tuu atu ra i te pärahiraa i nià i te âtini na na ra, papaì iho ra i te vahie no taua tütia täauahi ra, arataì atoà atu ra i e toopiti puè taata âpï no na ra, e ta na tamaiti atoà ia Itaata, haere atu ra i te vähi i ta te Atua i parau mai ia na ra. 4 E tae aè ra i te toru o te mahana ra, ua nana aè ra Âperahäma i ta na mata i nià, ìte atu ra i taua vähi ra tei te ätea ê. 5 Ua parau mai ra Âperahäma i nä taata âpï toopiti no na ra, E pärahi ôrua io nei, e te âtini; e haere mäua e te tamaiti nei io aè ra e haamori i te Atua; a hoì mai ai ia ôrua nei. 6 Ua rave iho ra Âperahäma i te vahie no taua tütia täauahi ra, ua tuu atu ra i nià i ta na tamaiti ia Itaata; ua rave iho ra i te auahi e te tipi i ta na rima; haere atu ra räua atoà. 7 Ua parau mai ra Itaata i ta na metua ia Âperahäma, na o mai ra, E ta ù metua. Ua nä ô atu ra o ia, Teie au, e ta ù tamaiti. Ua nä ô mai ra o ia, Inaha te auahi e te vahie: tei hea rä te pinia mämoe ei tütia täauahi ra? 8 Ua parau atu ra Âperahäma, E ta ù tamaiti, na te Atua iho e ìmi i te hoê pinia mämoe ei tütia täauahi. Haere noa atu ra räua atoà. 9 E tae atu ra räua i taua vähi i faaìtehia mai e te Atua ia na ra. Ua patu iho ra Âperahäma i te hoê fata i reira, e ua fata mäite iho ra i te vahie, ua ruuruu atu ra i te tamaiti ia Itaata, ua tuu atu ra ia na i nià i taua fata ra, i nià iho i te vahie ra. 10 Ua faatoro atu ra Âperahäma i ta na rima, ua rave atu ra i te tipi e täparahi i ta na tamaiti; 11 ua tiàoro mai ra te merahi a te Fatu i nià i te raì ia na ra, nä ô mai ra, E Âperahäma, e Âperahäma Ua parau atu ra o ia, Teie au. 12 Ua parau mai ra o ia, Eiaha to rima e rave noa atu i te tamaiti na, eiaha roa o ia e haùti-noa-hia atu e òe: ua ìte atu ra hoì au i teie nei, e e mataù to òe i te Atua, o òe aore i pipiri i to tamaiti, i to tamaiti hoê roa ra, ia ù. 13 Ua nänä aè ra to Âperahäma mata i nià, hiò atu ra, e inaha, e mämoe oni tei roto ü te aru, ua fifi te tara; ua tii atu ra Âperahäma i taua mämoe oni ra, ua püpü atu ra ei tütia täauahi ei ono aè i taua tamaiti na na ra. 14 Maìri iho ra Âperahäma i te iòa i taua vähi ra, o te Fatu-Irae; o ia tei parauhia ra i teie nei e, Ei te mouà te Fatu e ìteä ai. 15 Ua tiàoro faahou mai ra te merahi a te Fatu i nià i te raì, o te piti ia òte piiraa mai ia Âperahäma, 16 nä ô mai ra, Te parau nei te Fatu, Ua tapu vau ia ù iho, no te mea ua nä reira mai òe, e aita aè nei òe i pipiri to tamaiti, i to tamaiti hoê roa ra; 17 e haamaitaì rahi roa vau ia òe na, e faarahi au i to huaai; mai te fetià o te raì ra, e mai te one tähatai ra: e e noaa te ùputa ôire o to rätou mau ènemi i to òe ra huaai; 18 e e maitaì te mau fenua atoà o te ao nei i to òe na huaai; o òe i faaroo mai i ta ù reo nei.

Röma 8.31-34

Te aroha o te Atua

31 E nä hea hoì tätou i teie nei mau parau? No tätou te Atua ra, e tià ia vai ia märô mai? 32 O tei òre i faaherehere i ta na iho Tamaiti, o tei tuu noa mai rä ia na no tätou atoà nei, e aha hoì o ia e òre e horoà atoà mai ai i te mau mea atoà no tätou? 33 Nä vai e tuu mai i te pariraa i tei mäìtihia e te Atua ra? Na te Atua änei na tei faatià mai? 34 Nä vai e faahapa mai? Na te Metia änei na tei haapohe; e ua tiàfaahou aè nei i nià, e tei te rima àtau o te Atua ra, te tià ra ia tätou?

Märeto 9.2-10

Te faahuru-ê-raa-hia o Ietu

(Mät 17,1-13; Ruta èv 9,28-36; 2 Pët 1,17-18)

2 E ruì ono aè ra, ua arataì atu ra Ietu ia Pëtero, e ia Iatöpo, e ia Ioane, rätou anaè ra i nià iho i te hoê mouà teitei. E faahuru-ê-hia iho ra o ia i mua ia rätou. 3 Ànaàna roa aè ra to na àhu, e te teatea rahi mai te hiona ra, aore roa e tähupe àhu o te ao nei e noaa ai te teatea. 4 E ua fä mai ra hoì Èria räua o Möte, e te paraparau ra räua e o Ietu atoà hoì. 5 Ua parau mai ra Pëtero ia Ietu: E Rapi, e mea maitaì ia pärahi tätou i ô nei. E faatià mätou i te fare autä e toru aè, no òe e tahi, no Möte e tahi, no Èria e tahi. 6 Aore hoì o ia i ìte i ta na parau, e höriri rahi hoì to rätou. 7 E te hoê ata mai ra i te täpoìraa mai ia rätou, e te hoê reo mai ra hoì no roto i taua ata ra, nä ô mai ra: O ta ù Tamaiti here teie, a faaroo ia na 8 Ua nevaneva noa iho ra rätou i reira ra e aore roa e taata i ìteä ia rätou, maori rä o Ietu e o rätou iho hoì. 9 E tei to rätou pouraa mai mai nià mai i taua mouà ra, ua aò atu ra o ia ia rätou eiaha roa e faaìte noa atu i te hoê taata i ta rätou i ìte ra, e ia tià mai te Tamaiti a te taata mai te pohe mai ra. 10 Tämau mäite iho ra rätou i taua parau ra, e ua feruri iho ra rätou rätou iho, i te auraa i taua tiàfaahouraa mai te pohe mai ra.

Manaò

E hoa ìno mä e, ia ora na tätou i te aroha o te Atua Nui Tumu Tahi i to tätou nei färereiraa i teie nei mahana i haamanaòraa na tätou i te mau ùtuafare no te hoê o rätou tei topa i roto i te faanahoraa no teie maì viivii e àtutu noa nei i Mäòhi Nui nei. Teie mai nei te piti o te maì viivii tei faateimaha i te mau faanahoraa no te ärairaa i te ûànaraa te viivii o teie maì. Te mau ìmiraa räveà te pätia ärai, tei haapeàpeà atoà te  tahi pae o te nünaa e tià änei ia pätia e aore àita. Te mea ra e ìtehia ra, tei tupu teie mau pärururaa ia tätou ia au te puai o teie maì viivii. Ua tae roa i roto i te mau taiete òhipa i te mau faatäuiraa te mau tereraa òhipa, e ua ôpani roa te tahi pae no te hoê taime rii a tiaì noa atu ai te roromaraa teie maì viivii. Te tuu nei tätou teie mau òhipa i tupu i roto i te fenua no Mäòhi Nui nei, i roto i ta tätou haamoriraa no teie mahana. Teie te huru no te mau taiòraa turu tei haapotohia,

-Taramo 116, 12 E aha rä ta ù ia hopoi atu na te Fatu, i te mau hämani maitaì no na ia ù nei?

-Tenete 22, 18 e e maitaì te mau fenua atoà o te ao nei i to òe na huaai; o òe i faaroo mai i ta ù reo nei.

-Röma 8, 31 E nä hea hoì tätou i teie nei mau parau? No tätou te Atua ra, e tià ia vai ia märö mai?

-Märeto 9, 10 Tämau mäite iho ra rätou i taua parau ra, e ua feruri iho ra rätou rätou iho, i te auraa i taua tiàfaahouraa mai te pohe mai ra.

Tätararaa.

Mea tià ia haamanaòhia te mau òhipa i tupu, to Ietu färiiraa i te päpetitoraa tätarahapa, te faaoraraa i te mau maì, te tiàvaruraa i te mau värua faufau, te haapiiraa i roto i te mau tunato, e te tämataraahia i roto i te mëtëpara e te Tiàporo. E mau faaineineraa teie i rävehia e Ietu, ia tià ia Na ia färii i te mau faanahoraa a to na Metua. Te mau òhipa e tupu i nià ia Ietu ia au ta tätou taiòraa Parau Maitaì, hoê noa taime i roto i to na oraraa, te mau pipi i ìte teie òhipa e toru noa rätou, Pëtero, Iatöpo, Ioane, ua ànaana te àhu, ua teatea mai te hiona, e tähupe àhu, tei faatomo ia Ietu i roto i te hau Atua no te färii i te mau tià no te Faaäuraa Mätamua. O Èria te tià o te mau perofeta, o Mote te tià o te ture, te paraparau rätou i te parau no te tiàfaahouraa mai te pohe mai, tei faatupu te hoê ao âpï o ta Ietu e ärataì i roto i te ora mure òre. Te mau tià no te fenua te faanaho ra ia i te parau hämaniraa fare èi nohoraa no te mau tià e toru e noho ra i roto i te fare Atua. Na te Atua i pähono i teie ôpuaraa a te taata na roto i te hoê ata tei täpoì ia rätou, faaroohia aè ra te hoê reo no roto i taua ata ra: O ta ù Tamaiti here teie, a faaroo ia na. Ua nevaneva i roto ia  rätou aore roa e taata i ìteä ia rätou, maori rä o Ietu e o rätou iho hoì. Te tià ia parauhia i teie huru tupuraa no te âparauraa e òhipa teie i hopoihia mai ia faatupu o Ietu, e ta na mau pipi. Ia faatiàfaahou i te nünaa o te Atua i roto i te hau no te ora. Taua ora nei to te taata ia märamarama ia haere na nià i teie èà e tià ai, tei ärataì ia na, i te ìte e te paari. Ia tupu te tiàturiraa âueue òre i te Atua Metua, no te türuìraa i nià i  te paari o te faaroo i te mea e òhipa faufaa tei tuuhia i nià i te Tämaïti Fänau Tahi a te Atua Nui Tumu Tahi. I mua i te mau òhipa i tupu ua pärahi muhu noa te mau pipi e te maere, i te mau parau ta Ietu i faahiti. 10 Tämau mäite iho ra rätou i taua parau ra, e ua feruri iho ra rätou rätou iho, i te auraa i taua tiàfaahouraa mai te pohe mai ra. Ua oromoo te parau i roto i te âau o na pipi too toru, i te mea ua haamata rätou i te feruri i te parau no te tiàfaahouraa mai roto mai i te pohe. Ua mätau noa teie na pipi e toru i te faaea i roto i te pohe, e na te pohe e faaoti i te parau o te taata, no Ietu te taata ua faataahia e to na Metua no te ora, to Na ia te reira hanahana. Te haapäpü ra te ìrava 10 ia tämau te taata i te parau no te ora, ia fëruri i te parau no te ora e tià ai, ia tiàturi te taata i to na tiàfaahouraa, to na tiàfaahouraa te täviri te reira no  to na tiàmäraa ànanahi. I teie mahana ua faahuruèhia tätou e teie maì viivii, tei haaparuparu, tei haafifi, tei faatöpatari, i te mau täpihooraa o te fenua, te vai ra to tätou ua ère i te òhipa, ua topa i roto i te tärahu, te mea i to oe mai ia  tätou te ora, a tämau tätou i te ora, a fëruri tätou i te ora, no mea te ìte noa ra tätou i te tumu haari e höroà noa ra i te maa, te meià i te pararaa i nià i to na tumu, te ùru i te maoaraa, te faaìte noa mai ra te fenua i to na maitaì, 12 E aha rä ta ù ia hopoi atu na te Fatu, i te mau hämani maitaì no na ia ù nei? Teie nei ra eiaha ia moèhia ia tätou to tätou i reva i roto i te rave a teie maì viivii, èita ra tei teie maì te parau hopeà tei te ora ra. Ia tämau maite tätou i te faatupu i te ora, ia fëruri i te parau no te ora e tià ai. Ia faaroo tätou i te ìrava 10 i te päpaìraa a Märeto i te naòraa e, Tämau mäite iho ra rätou i taua parau ra, e ua feruri iho ra rätou rätou iho, i te auraa i taua tiàfaahouraa mai te pohe mai ra. Teie ìrava te ìriti nei ia i te ùputa no te parau no te tiàfaahouraa e tei haafaufaa-òre i te pohe. Te höroàhia nei ia tätou te puòiraa o te òhipa, i te mau tämauraa i te parau no te tiàturiraa i te mea e parau no te ora teie e tupu nei, i ta Ietu tïtauraa i te taata faaroo.

 

Terai or. Faatura.

 

Papa Haamori Tau Tāpati 21 no Fëpuare 2021.

 

Tāpati 21 no Fëpuare 2021.

Papa Haamori

Tau

Färiiraa.

E te tau e, faaea muhu noa na òe.

A hiti ia mahana a maìri ua pö.

A hiti ia âvaè a maìri ua ao.

Ua puhi te mataì ua vava te rau.

Maìri mai ra te ua, ua haumärü.

 

E tau òe, òhipa noa ai.

Te maniania ra, te faaea muhu nao ra òe.

Tupu noa ai te aru te âpee ra òe.

Hotu noa ai te aru, âi noa ai te taata.

À hope ia àhune, te ara noa ra òe.

 

E tau te tau a tau ai.

Ta  ära i te äraraa te vai ra òe.

Te ära òe ma te tiàruhi òre.

Mätara noa ai te ùputa o te uì

Ruàu noa ai te taata, te âpï noa ra òe.

 

E te tau e, te  mau ra òe i te ora.

E te tau e, te mau ra òe i te pohe.

E te tau e, te mau ra òe i te tiàfaahouraa.

E te tau e, te mau ra òe i te ora mure òre.

I parau ai to òe, e tau to te mau mea atoà.

 

Haamaitaì tätou i te Atua i te hoê reo himene.

 

Himene.

Taramo 25

Teie ta Tävita parauraa ia tätou i teie mahana.

1 Taramo na Tävita. Te faaäraära atu nei au i ta ù värua ia òe, e te Fatu, 2 e ta ù Atua, te tiàturi nei au ia òe. Eiaha vau ia haamä, eiaha ta ù mau ènemi ia teòteò ia ù. 3 Eiaha roa tei tiàturi ia òe ra ia roohia e te haamä. O tei rave haavare noa i te hara ra, ia haamä atu ia. 4 E faaìte mai òe ia ù i to mau èà, e te Fatu, e haapii mai òe ia ù i to mau haereà. 5 E faaìte mai òe ia ù i te parau mau na òe ra, e haapii mai hoì ia ù; o òe hoì te Atua o to ù ora, te tiàturi nei au ia òe i te mau mahana atoà nei. 6 E haamanaò, e te Fatu, i to aroha faaherehere ra, e to hämani maitaì i te mau mahana i maìri aè nei. 7 Eiaha òe e manaò mai i te ìno e te mau hara o ta ù âpïraa ra; manaò mai rä òe ia ù, mä to aroha atoà, no to òe hämani maitaì, e te Fatu ra. 8 Maitaì to te Fatu e te piò-òre: e haapii mai ai o ia i te feiä hara i te èà tià mau. 9 E arataì o ia i te feiä âau marü mä te tià; e haapii mai o ia i te feiä âau marü i to na iho èà. 10 Te mau haereà a te Fatu ra, o te aroha ia e te parau mau, i te feiä i haapaò i ta na parau i faaau e ta na i faaìte mai. 11 Rahi noa iho ä ta ù nei hara, e te Fatu, e faaòre mai ä òe i to òe ra iòa. 12 O vai te taata i mataù i te Fatu? E faaìte o ia ia na i ta na èà ia hinaaro ra.13 E pärahi te reira taata mä te maitaì, e riro te fenua i to na ra huaai. 14 Te parau moè a te Fatu ra, tei te feiä ia i mataù ia na ra; e o rätou ta na e faaìte mai i te parau faaau na na ra. 15 Te tano noa nei ä ta ù mata i te Fatu, no te mea e tià ia na ia ìriti mai i ta ù âvae i te märei ra. 16 Ìte mai ia ù, e aroha mai ia ù, e àti hoì to ù i te moèmoè. 17 Ua rahi iho nei te mäuiui o ta ù âau, e faaora òe ia ù i ta ù mau àti nei. 18 E hiò mai òe i ta ù pohe e ta ù mäuiui, e faaòre mai òe i ta ù mau hara atoà nei.19 A hiò na i ta ù mau ènemi ua rahi, e te ûàna mai ra to rätou riri ia ù. 20 Faaitoito mai òe ia ù, ia ora vau ia òe; eiaha vau ia roohia e te haamä, te tiàturi nei hoì au ia òe 21 Ia ora vau i te parau mau e te parau tià; te tiàturi nei hoì au ia òe. 22 E te Atua e, ia ora Ìteraèra ia òe i to na atoà ra mau àti. Âmene.

 

Himene tätarahapa

 

Tenete 9.8-15

Teie te faaìteraa a te puta Tenete ia tätou i te tau no Noa,

8 Ua parau mai ra hoì te Atua ia Noa, e ta na mau tamarii atoà ra, nä ô mai ra, 9 O vau nei inaha, te fäfau nei au i ta ù nei faufaa ia òutou, e to òutou huaai a muri atu; 10 e te mau mea ora atoà i ô na ia òutou na, i te mau manu pererau ra, e te mau puaa ra, e te mau manu âvae maha atoà o te fenua; i te mau mea ora atoà o te fenua mai roto atoà mai i te pahï, e o òutou atoà na. 11 Te fäfau nei au i ta ù nei faufaa ia òutou, e e òre roa e hope faahou te mau mea ora i te pohe i te pape tiruvi; e òre hoì e tiruvi-faahou-hia e pohe roa atu ai te fenua ra. 12 Ua parau mai ra hoì te Atua, Teie te täpaò o te faufaa ta ù e tuu nei ei täpaò no ù, e no òutou na, no te mau uì atoà a muri noa atu: 13 O ta ù anuanua i roto i te ata ra ta ù ia e haapaò nei, ei täpaò no te faufaa na ù i to te ao atoà na. 14 E ia faatupu vau i te ata i nià aè i te fenua nei, e ua ìteä te anuanua i roto i taua ata ra; 15 ei reira vau e manaò ai i ta ù faufaa nei, o vau te tahi pae, e o òutou te tahi, e te mau mea ora atoà e rave rahi te huru; e e òre roa te pape e riro faahou ei tiruvi, e hope ai te mau mea ora i te pohe ra:

Haamaitaì tätou i te Atua no teie mau parau e tià ai.

 

Himene òaòa.

 

1 Pëtero 3.18-22

Teie ta tätou faaìteraa parau ia au ta Pëtero faahitiraa,

18 I pohe na hoì te Metia iho no te hara hoê poheraa, te taata parau tià no te feiä parau tià òre, ia tae tätou ia na i te Atua ra, i täparahi-pohe-mau-hia o ia i te tino ra, i faaorahia rä e te Värua: 19 o ta na ia i aò atu i te mau värua e vai i roto i te täpeàraa i teie nei; 20 o tei òre i faaroo i mütaa iho ra, i te faaòromaìraa roa o te Atua a tiaì ai i te ànotau ia Noa ra, i te tärairaa i te pahï ra, i ora ai e toofanu puè taata i te moana, oia hoì nä taata toovaù ra. 21 E o tei au i te reira ra, o te päpetito ia, e ora ai tätou atoà i teie nei eiaha i te haapaeraa atu i te viivii o te tino nei, i te parau rä i te âau hapa-òre i te Atua, i te tiàfaahouraa o Ietu Metia ra: 22 o tei reva aè nei i nià i te raì, e tei te rima àtau o te Atua ra; e ua tuuhia te mau merahi, e te feiä mana, e te feiä hau, i raro aè ia na.

Pärahi tätou

Haamaitaì tätou i te Atua i te hôe reo himene.

 

Himene.

Pure.

Pure tätou i te Atua Nui Tumu Tahi, ua ineine mätou i te taiòraa ma te faaroo i te faufaa o te mau  parau e vai ra i roto i te mau tïtauraa e türama i to mätou âau, e te Atua e aroha mai ia mätou te taata hara nei. Âmene.

 

Taiòraa.

Märeto 1.12-15

To Ietu tämataraahia i te mëtëpara

(Mät 4.1-11; Ruta èv 4.1-13)

12 I reira ra te Värua i te tonoraa ia na i te mëtëpara ra. 13 E e piti täau o nä ruì i te mëtëpara ra, mä te rämähia mai e Tätani; i rotopü i te mau puaa taehae ra; e ua poihere mai ra te mau merahi ia na.

To Ietu pororaa i te Èvaneria i Tarirea

(Mät 4.12-17; Ruta èv 4.14-15)

14 Ia täpeàhia rä Ioane, haere atu ra Ietu i Tarirea, i te parau haereà i te Parau Maitaì o te Pätireia o te Atua. 15 Na ô atu ra: Ua tae i te tau, te fätata mai nei te Pätireia o te Atua  A tätarahapa, a faaroo mai i te Èvaneria nei.

Na te Atua e haamaitaì i te täiòraahia ta Na Parau

 

Pure

Pure tätou i te Atua, ua taiò iho nei mätou i ta òe Parau Maitaì, a tauturu mai ia mätou te mau vahi tei òre i naeàhia e mätou i te ìte i te märamarama e te paari. Âmene.

Haamaitaì tätou i te Atua i te hoê reo himene.

 

Himene

Parau Faaära

Himene püpüraa moni.

Pure Ärai

Pure tätou i te Nui Tumu Tahi, ua tae i te tau te tiàoro nei to Tämaïti te fätata mai nei te Pätireia o te Atua  a tätarahapa e faaroo mai i te Èvaneria nei. I teie tau ta mätou e ora nei, i te haafifiraa a teie maì viivii e faataupupü roa nei to mätou oraraa vaamataèinaa, tei tuu roa te mau ùtuafare o ta òe mau tamarii no Mäòhi Nui nei i roto i te èreraa, e te òhipa òre. I te mea ua ö mätou i roto i te ôpape no te täpihooraa, tei ôpape tei faatea ia mätou i roto i te hoê oraraa tei reira te topatari, to mätou ia öraa i roto i te tärahu. Teie tärahu tei faarehu i to mätou feruriraa. Te mätau ra te tahi pae i te reira rehu, âreà te tahi pae, te perehahu rii noa ra. Ua pärahi roa te tahi pae, aita e tiàturiraa faahou, aita e tiaìraa. E au ra e, i mua i te maitaì e te ìno, aita e maitaì aita e ìno,  no te mea aita e òhipa e faahitimahuta faahou ra i to na värua. Ua manunu roa o na i te manunu pohe. Mai te mau taata atoà ia ihu, te hape nei o na i te èà maitaì e, e èà ìno, e te èà ìno ra e èà maitaì ia. te horo püpara noa nei te taata i te àveià òre.

Ua tae i te tau e tätarahapa te hinaaro nei i te Atua, ia òre hoì tätou ia riàrià i te ìno, e te parau-tià-òre, te haavare, te manaò ìno, aore ia e vai iho noa tätou ia tupu ruperupe noa na taua mau ìno atoà ra, ia òre hoì tätou ia horoà i to tätou püai no te haapaò i te reira mau mea atoà e nahea ia te Atua e riro faahou ai, ei Atua no tätou, e nahea ia tätou e riro mau ai ei tamarii atoà nä na. E nahea ta na parau e riro ai ei parau maitaì no te arataì ia tätou i nià i te èà e tupu ai te hau, te maitaì e te ora. Âmene.

Haamaitaì tätou i te Atua e tià mai tätou.

 

Himene âmui.

Pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie te parau faaitoitoraa

Faaitoitoraa.

15 Na ô atu ra: Ua tae i te tau, te fätata mai nei te Pätireia o te Atua  A tätarahapa, a faaroo mai i te Èvaneria nei.

Haamaitaìraa.

12 Ua parau mai ra hoì te Atua, Teie te täpaò o te faufaa ta ù e tuu nei ei täpaò no ù, e no òutou na, no te mau uì atoà a muri noa atu: 13 O ta ù anuanua i roto i te ata ra ta ù ia e haapaò nei, ei täpaò no te faufaa na ù i to te ao atoà na.

 

Teraì òr. Faatura.

 

Māreto 1.12-15 Tau

 

Tāpati 21 no Fëpuare 2021.

Tau

Taramo 25

1 Taramo na Tävita. Te faaäraära atu nei au i ta ù värua ia òe, e te Fatu, 2 e ta ù Atua, te tiàturi nei au ia òe. Eiaha vau ia haamä, eiaha ta ù mau ènemi ia teòteò ia ù. 3 Eiaha roa tei tiàturi ia òe ra ia roohia e te haamä. O tei rave haavare noa i te hara ra, ia haamä atu ia. 4 E faaìte mai òe ia ù i to mau èà, e te Fatu, e haapii mai òe ia ù i to mau haereà. 5 E faaìte mai òe ia ù i te parau mau na òe ra, e haapii mai hoì ia ù; o òe hoì te Atua o to ù ora, te tiàturi nei au ia òe i te mau mahana atoà nei. 6 E haamanaò, e te Fatu, i to aroha faaherehere ra, e to hämani maitaì i te mau mahana i maìri aè nei. 7 Eiaha òe e manaò mai i te ìno e te mau hara o ta ù âpïraa ra; manaò mai rä òe ia ù, mä to aroha atoà, no to òe hämani maitaì, e te Fatu ra. 8 Maitaì to te Fatu e te piò-òre: e haapii mai ai o ia i te feiä hara i te èà tià mau. 9 E arataì o ia i te feiä âau marü mä te tià; e haapii mai o ia i te feiä âau marü i to na iho èà. 10 Te mau haereà a te Fatu ra, o te aroha ia e te parau mau, i te feiä i haapaò i ta na parau i faaau e ta na i faaìte mai. 11 Rahi noa iho ä ta ù nei hara, e te Fatu, e faaòre mai ä òe i to òe ra iòa. 12 O vai te taata i mataù i te Fatu? E faaìte o ia ia na i ta na èà ia hinaaro ra.13 E pärahi te reira taata mä te maitaì, e riro te fenua i to na ra huaai. 14 Te parau moè a te Fatu ra, tei te feiä ia i mataù ia na ra; e o rätou ta na e faaìte mai i te parau faaau na na ra. 15 Te tano noa nei ä ta ù mata i te Fatu, no te mea e tià ia na ia ìriti mai i ta ù âvae i te märei ra. 16 Ìte mai ia ù, e aroha mai ia ù, e àti hoì to ù i te moèmoè. 17 Ua rahi iho nei te mäuiui o ta ù âau, e faaora òe ia ù i ta ù mau àti nei. 18 E hiò mai òe i ta ù pohe e ta ù mäuiui, e faaòre mai òe i ta ù mau hara atoà nei.19 A hiò na i ta ù mau ènemi ua rahi, e te ûàna mai ra to rätou riri ia ù. 20 Faaitoito mai òe ia ù, ia ora vau ia òe; eiaha vau ia roohia e te haamä, te tiàturi nei hoì au ia òe 21 Ia ora vau i te parau mau e te parau tià; te tiàturi nei hoì au ia òe. 22 E te Atua e, ia ora Ìteraèra ia òe i to na atoà ra mau àti.

Tenete 9.8-15

8 Ua parau mai ra hoì te Atua ia Noa, e ta na mau tamarii atoà ra, nä ô mai ra, 9 O vau nei inaha, te fäfau nei au i ta ù nei faufaa ia òutou, e to òutou huaai a muri atu; 10 e te mau mea ora atoà i ô na ia òutou na, i te mau manu pererau ra, e te mau puaa ra, e te mau manu âvae maha atoà o te fenua; i te mau mea ora atoà o te fenua mai roto atoà mai i te pahï, e o òutou atoà na. 11 Te fäfau nei au i ta ù nei faufaa ia òutou, e e òre roa e hope faahou te mau mea ora i te pohe i te pape tiruvi; e òre hoì e tiruvi-faahou-hia e pohe roa atu ai te fenua ra. 12 Ua parau mai ra hoì te Atua, Teie te täpaò o te faufaa ta ù e tuu nei ei täpaò no ù, e no òutou na, no te mau uì atoà a muri noa atu: 13 O ta ù anuanua i roto i te ata ra ta ù ia e haapaò nei, ei täpaò no te faufaa na ù i to te ao atoà na. 14 E ia faatupu vau i te ata i nià aè i te fenua nei, e ua ìteä te anuanua i roto i taua ata ra; 15 ei reira vau e manaò ai i ta ù faufaa nei, o vau te tahi pae, e o òutou te tahi, e te mau mea ora atoà e rave rahi te huru; e e òre roa te pape e riro faahou ei tiruvi, e hope ai te mau mea ora i te pohe ra:

1 Pētero 3.18-22

18 I pohe na hoì te Metia iho no te hara hoê poheraa, te taata parau tià no te feiä parau tià òre, ia tae tätou ia na i te Atua ra, i täparahi-pohe-mau-hia o ia i te tino ra, i faaorahia rä e te Värua: 19 o ta na ia i aò atu i te mau värua e vai i roto i te täpeàraa i teie nei; 20 o tei òre i faaroo i mütaa iho ra, i te faaòromaìraa roa o te Atua a tiaì ai i te ànotau ia Noa ra, i te tärairaa i te pahï ra, i ora ai e toofanu puè taata i te moana, oia hoì nä taata toovaù ra. 21 E o tei au i te reira ra, o te päpetito ia, e ora ai tätou atoà i teie nei eiaha i te haapaeraa atu i te viivii o te tino nei, i te parau rä i te âau hapa-òre i te Atua, i te tiàfaahouraa o Ietu Metia ra: 22 o tei reva aè nei i nià i te raì, e tei te rima àtau o te Atua ra; e ua tuuhia te mau merahi, e te feiä mana, e te feiä hau, i raro aè ia na.

Māreto 1.12-15

To Ietu tämataraahia i te mëtëpara

(Mät 4.1-11; Ruta èv 4.1-13)

12 I reira ra te Värua i te tonoraa ia na i te mëtëpara ra. 13 E e piti täau o nä ruì i te mëtëpara ra, mä te rämähia mai e Tätani; i rotopü i te mau puaa taehae ra; e ua poihere mai ra te mau merahi ia na.

To Ietu pororaa i te Èvaneria i Tarirea

(Mät 4.12-17; Ruta èv 4.14-15)

14 Ia täpeàhia rä Ioane, haere atu ra Ietu i Tarirea, i te parau haereà i te Parau Maitaì o te Pätireia o te Atua. 15 Na ô atu ra: Ua tae i te tau, te fätata mai nei te Pätireia o te Atua  A tätarahapa, a faaroo mai i te Èvaneria nei.

 

Manaò

Te autä nei te nünaa : no te òaòa änei, aore ra no te teimaha o te àti ta na e faaruru nei. Rahi noa atu ä rä te autä o te nünaa, rahi noa atoà atu ä te haafaufaa-òre-raahia to na parau. Ua faaroo mai rä te Atua, e ua aroha mai i te nünaa ta na i mäìti no na. No reira e ta ù nünaa, haapae roa atu na  i tenä ìno ta òe e hopuhopu noa na, faaroo na i te reo o to òe Atua Nui Tumu Tahi, te reira anaè to òe ora e aita atu. To òe änaè Atua tei ìte i te here ia òe. O na anaè tei ìte ite mau mea ta òe e hinaaro ra. Tämä atu na i tenä ìno maenuenu rahi, a ùanei mai to òe Faaroo, ua tae i te tau, teie te faaìteraa a te mau taiòraa turu tei haapotohia mai.

 

-Taramo 125, 16 Ìte mai ia ù, e aroha mai ia ù, e àti hoì to ù i te moèmoè.

-Tenete 9, 15 ei reira vau e manaò ai i ta ù faufaa nei, o vau te tahi pae, e o òutou te tahi, e te mau mea ora atoà e rave rahi te huru; e e òre roa te pape e riro faahou ei tiruvi, e hope ai te mau mea ora i te pohe ra:

-1 Petero 3, 22 o tei reva aè nei i nià i te raì, e tei te rima àtau o te Atua ra; e ua tuuhia te mau merahi, e te feiä mana, e te feiä hau, i raro aè ia na.

-Märeto 1, 15 Na ô atu ra: Ua tae i te tau, te fätata mai nei te Pätireia o te Atua  A tätarahapa, a faaroo mai i te Èvaneria nei.

 

Èi haamataraa.

I roto i teie nei täiòraa Märeto i te pene 1, i te mau ìrava 12 e tae i te 15, te faaìtehia nei ia e toru tuhaa faufaa roa no te öraa te Tamaiti a te Atua i roto i te ao no te hara, i te vahi i reira O ia e àro ai, ia tätarahapa te taata, no te faatupu i te mau parau fäfau no te hau. Taua na tuhaa e toru nei,                                                          

1) Te päpetitoraa päpe, tei haapäpü e ua farii O ia i te hara a te ao nei, i nià i to na täpano. (ir.11).

2) Te vaiihoraa ia Na i roto i te ärataìraa a te Varua Maitaì, e te ìteraahia te faufaa òre o Tätani i te rämäraa e  maha àhuru mahana te maoro i roto i te mëtëpara.

3) O Ioane i roto i te fare täpeàraa.

Na tuhaa e toru nei e toru ia manaò taaê no te ärataìraa parau, teie ra ua haapoto-noa-hia e Märeto teie mau parau, o Mataio ra e ö Ruta tei faatià päpü i teie parau no to Ietu päpetitoraahia, e te faahaereraahia i roto i te mëtëpara. Te hoê ra vahi o tei tià ia haapaò maitehia tei òre i moè ia Märeto i te faatià teie ia parau i te ìrava 11 i te vahi hopeà, O TA U TAMAITI HERE OE, UA MAURUURU ROA VAU IA OE.

           

UA TAE I TE TAU, UA POIHERE MAI RA TE MAU MERAHI IA NA.

Teie o Ietu i nià i te èà no te òhiparaa, ua roaa te puai no te faaòromaì, te haehaa, e te faaroo päpü i te mau reo tono o te Metua. Te haamata nei i te pii haere i te mau taata, i te tumu òhipa i tonohia mai ai O ia. Ia faaìte O ia i te parau no te PATIREIA O TE ATUA, E TE PARAU NO TE TÄTARAHAPA. Na tumu parau teie, tei hoì pinepine mai i roto i te mau aòraa a te Metia, tei tätarahapa ra ua ìte ia i te ètaèta o to na âau i te täno òre, ua turaì ia i to na täno òre i rapae, no te farii i te tiàturiraa no te parau ora a te Atua. Oia hoì, te hau aueue òre no te Patireia o te Atua, te tae mai, e tei hoì faahou mai ia tae i te tau mau ra. O Ietu teie e poihia nei e te mau merahi, te äuraa o teie parau, ua oti te taime no te faaineineraa, te haapäpü nei te Metia no te Atua o ia, e ta na òhipa e faatupu i roto i te mau taata e rave rahi. Ua fänau mai O ia, mai roto mai i te mau rämäraa rau a Tätani, e òre O ia  e pohe, i te mea o te here mau teie a te Atua, i poiherehia ai O ia e te mau merahi. TE POIHIA NEI O IETU MAITE TIARE NO TE HOÊ MAA HOTU, TEI Ü I TE MAU VERO VAVAHI, E TEI MANUIA I ROTO I TAUA VERO RA.RIRO ÂTU RA TAUA MANAUIARAA EI OAOARAA NO TEI TÄTARAHAPA, E TEI TIÀTURI. Te òhipa ia e tupu nei i roto i ta tätou ìrava nei, te parau tütuu a te mau tamarii a Iatopa, o te parauhia no na patereareha hoê àhuru mä piti, a taaê noa atu ai o Âperahäma, Itaata, e o Iatopa. Te naò nei taua parau tütuu ra, MAITE PEU TE FAATUPU NEI ÒUTOU I TE MAITAI, E HAAMAITAI MAI IA TE MAU TAATA, E TE MAU MERAHI IA ÒUTOU, I REIRA TE ATUA E HANAHANA AI I ROTO I TE MAU NUNAA ÄTOA, E O TÄTANI I REIRA E HORO Ê AI, E TE MAU ANIMARA TAHAE E MATAU AI, E I REIRA E ITEHIA AI TE HERE O TE ATUA, I TE POIHERERAA MAI, TE MAU MERAHI IA OUTOU.(Na Nafatari teie parau tütuu).

Teie o Ietu ua poiherehia e te mau merahi a te Atua, tei upootià i nià i te ènemi rahi o te ao nei, teie o ia ua àua faaàtihia, mai te hoê faèhau tei hoì mai, mai te àroraa rahi tei mau i te perapaio no te ora mure òre, e tei ôfati i te tara o te pohe mure òre. E täpaò ia teie no te ora, e täpaò teie no te Tämaïti a te Atua, e täpaò ia teie no te Metia parau tià, e täpaò ia teie, o te tià i te taata ia tätarahapa i mua i te aro o te Atua. O te täpaò ia no te anuanua, no na ùnaùna e 7, oia hoì te fana a te Atua tei faautahia i nià i te vairaa no te hau. 

1) Te aroha.

2) Te here.

3) Te hau.

4) Poroiraa.

5) Te tiàturiraa.

6) Te faaìteraa.

7) Te Atua i roto.

E täpaò teie ua tae i te tau, no te faaòreraa hara, o ta te Atua e faatupu nei na roto i te hau. Areà ra ta te taata no te tämaì ia, i parau ai o Ietu e a tätarahapa te fatata mai ra te patireia o te Atua. I te mea UA TAE I TE TAU, ia poiherehia te mau hinaaro o te Atua, èi ia ìteähia te tumu no te fäìraa hara, e te fäìraa faaroo.

UA TAE I TE TAU, te tahi auraa no teie parau te haapäpüraa ia i te òhipa tumu e ravehia, ma te ìte taui, te tià e taui ia na i te faanahoraa. Ma te faaite e, te ora ra taua ôpuaraa ra i te mau taime ätoà, e i te mau mahana ätoà. Te tau no te Metia e tià ia parauhia,ua tuhahia i roto na tuhaa e 4,

Te tau no te fänauraa, oia hoì o noëra.

Te tau no te tïtauraa, oia hoì te piiraa.

Te tau no te mau àti, e te pohe o te Metia, oia hoì te tapati no te mua àmaa.

Te tau no te tiàfaahouraa, oia hoi te ôroà pata.

To òe pohe e to ù nünaa ïti, ua rau to na iòa e to na faaùnaùna.

To òe rä ora, hoê anaè ia to na iòa: te Atua Nui Tumu Tahi.

 

Teraì òr. Faatura.

 

 

 

Tāpati 14 no Fëpuare 2021. Papa Haamori Mä

 

Tāpati 14 no Fëpuare 2021.

Papa Haamori

Mä

Färiiraa.

Na te parau o te Taramo e ìriti to tätou haamori i teie mahana.

Taramo 102

1 E pure na te taata e òto ra ia roohia o ia e te àti rahi, e te ninii ra i ta na parau taiä i mua i te aro o te Fatu. 2 E te Fatu e, e faaroo mai i ta ù pure, e ia tae atu hoì ta ù reo ia òe ra. 3 Eiaha òe e huna i to mata ia ù ia tae i te mahana e àti ai au ra. E färiu mai i to tarià ia ù nei ia tae i te mahana e tiàoro atu ai au ra, e faaroo ènaèna mai òe ia ù. 4 Ua mou o ù nei puè mahana mai te au auahi ra, e ua viu o ù nei puè ivi mai te ômoì ra.5 Ua täìrihia ta ù âau mai te àihere ôriorio ra, e te moè noa nei ia ù ta ù nei àmuraa mäa. 6 Ua piri ta ù mau ivi i to ù nei ìri i to ù autä-noa-raa.7 Mai te tata o te mëtëpara ra vau, e mai te tuta o te vähi ano ra. 8 Te tiaì nei au, e mai te manu iti ra vau, mai te manu iti o ia anaè ra i nià i te fare. 9 Te faaìno mai nei ta ù mau ènemi ia ù e pö noa atu te mahana; e no te rahi o te riri, ua tapu rätou ia ù. 10 No te mea te àmu nei au i te rehu auahi mai te mäa ra, e ua ânoì i ta ù e inu nei i te roimata.11 No to òe rä mäinaina e te riri, ua hopoi hoì òe ia ù i nià, e ua faaruè òe ia ù i raro.12 Mai te maru ata e pee ra to ù nei puè mahana, e ua riro vau mai te àihere e mae ra. 13 Âreà òe, e te Fatu, e tià ia i te vai-mäite-raa e a muri noa atu, e te manaòraa ia òe e ia hope noa atu te mau uì atoà ra.14 E riro òe i te tià mai i nià e aroha ia Tiona. Ua tae hoì i te tau, te ànotau mau e ìtehia mai ai o ia ra. 15 Te pöpou nei hoì to mau tävini i te mau ôfaì atoà no na nei, e te aroha nei ia na e tae noa atu i te repo ra. 16 Ei reira te mau êtene e mataù ai i te iòa ra, o te Fatu, e te hui-arii atoà o te ao nei i to òe ra hanahana 17 Ia patu faahou te Fatu ia Tiona, e ìteä mai o ia mä to na iho ra hanahana, 18 e haapaòhia e ana te pure a tei àti ra, e e òre o ia e vahavaha faahou i ta rätou i ani ra. 19 E päpaìhia teie no te tahi uì atu, e e haamaitaì te feiä e fänau ra i te Fatu, 20 no te mea ua hiò mai o ia i raro i to na vähi moà teitei ra; i nià i te raì to te Fatu hiòraa mai i te fenua nei, 21 e faaroo i te autä o te feiä i täpeàhia ra, e ia tuu hoì i te feiä i haapaòhia no te pohe. 22 Ia faaìtehia to te Fatu iòa i Tiona, e ia haruru faahou te haamaitaì ia na i Ierutarëma, 23 ia âmui atoà mai te taata atoà ra, e te mau pätireia e haamori i te Fatu. 24 Ua faaòrehia ta ù püai i te èà tià ra, ua haamure o ia i o ù puè mahana. 25 Ua parau hoì au e: E ta ù Atua, eiaha vau e hopoi-ê-hia i röpü i to ù nei puè mahana, e vai ä hoì to òe ra mätahiti e hope roa aè te mau uì atoà ra. 26 Na òe i haamau i te fenua, e te Fatu, i tahito ê ra, e te mau raì hoì na to òe rima ia i hämani. 27 E riro rä te reira i te mou, e toe ä òe. E e marau rätou mai te àhu e marau ra, e e haapaehia rätou e òe mai te àhu ra. 28 Haapae noa ä iho rätou, o òe ä òe, e òre roa to òe ra mätahiti e hope. 29 E haamauhia te mau tamarii a to mau tävini, e to rätou ra huaai e haapäpühia ia i mua ia òe ra.

Haamaitaì i te Atua i te hoê reo himene.

Himene.

Faaroo mai tätou i te reo o Atua i nià ia Mote i te faaìteraa a te puta Revitito.

Revitito 13.1-2 e te ìrava 45-46

1 Ua parau mai ra hoì te Fatu ia Möte räua o Àarona, nä ô mai ra, 2 E uiui to te hoê taata, e te paa, e te vähi iti teatea i nià i to na iri, mai te maì ra e rëpera te huru i nià i to na ìri; e ärataìhia te reira taata i te tahuà ra ia Àarona, e aore ra, i te hoê tamaiti tahuà na na ra 3 e na te tahuà e hiò i taua maì ra i to na ra ìri, e te teatea te huruhuru i taua maì ra, e te hohonu ra taua maì ra i raro ia hiò, aore i te ìri anaè ra, o taua maì ra ia e rëpera; e na te tahuà e hiò ia na ra e parau ia na e, ua viivii.

45-46

45 E te taata i pohe i te rëpera ra, e pii noa o ia, Ua viivii, ua viivii, ma te ahu mähae, e te täupoo òre, e ma te täpoìhia to na taa; 46 e taua poheraa atoà no na i te rëpera, e parauhia o ia e, ua viivii o ia o ia anaè ra i to na pärahiraa; ei räpaeàu mai i te pühapa o ia e pärahi ai.

E te Atua Nui Tumu Tahi aroha mai ia mätou nei te taata hara nei. Âmene.

 

Himene Tätarahapa.

 

E riro te Atua i te tià mai e aroha mai ia tätou. Ua tae hoì i te tau, te ànotau mau e ìtehia mai ai O ia ra. Te pöpou nei hoì tätou i te mau ôfaì atoà no na nei, e te aroha nei ia na e tae noa atu i te repo ra. Ei reira te mau taata e mataù ai i to na iòa ra, o te Fatu, e te mau taata atoà o te ao nei i to na ra hanahana. Ia patu faahou te Fatu ia Mäòhi Nui, e ìteä mai o ia mä to na iho ra hanahana, e haapaòhia e ana te pure a tei àti ra, e e òre o ia e vahavaha faahou i ta rätou i ani ra.

Haamaitaì i te Atua Nui Tumu Tahi e tià ai.

 

Himene òaòa.

 

Teie ta tätou fäìraa parau i te faaìteraa a Pauro.

 

1 Törïnetia 10.31- 33 ; e te 11, i te ìrava 1.

31 E teie nei, te àmu ra e te inu ra hoì, e te mau mea atoà ta òutou e rave na, e rave ia mä te haamaitaì i te Atua. 32 Eiaha òutou ei türoriraa, i te âti-Iüta, e te Herëni, e te Ètärëtia atoà a te Atua. 33 Mai ia ù atoà e haamauruüru i te taata atoà i te mau mea atoà nei, aore au i ìmi i te maitaì no ù iho, no te taata atoà rä e rave rahi, ia ora rätou.

11.1

1 Ei pee mai òutou ia ù mai ia ù atoà e pee i te Metia nei. Âmene.

 

Pärahi tätou.

Haamaitaì tätou i te Atua i te hoê reo himene.

 

Himene.

Pure

Pure tätou i te Atua, ua ineine mätou i te faarooraa i te Parau Maitaì a to Tämaïti to mätou faaora, höroà mai ia mätou i te färiiraa, ia riro teie taiòraa no mätou èi haapiiraa e èi faaitoitoraa i to mätou faaroo, e te haapaòraa i te poroìraa, e poroìhia nei ia mätou. Âmene.

 

Taiòraa.

Märeto 1.40-45

Te tämäraahia te hoê taata rëpera

(Mät 8,1-4; Ruta èv 5,12-16)

40 Ua haere mai ra te hoê rëpera ia na ra, tuu mai ra i te turi i raro i mua ia na, mä te parau maitaì mai ia na, nä ô mai ra: Ia tià ia òe ra, e mä vau ia òe. 41 Aroha aè ra Ietu ia na, faatoro atu ra i te rima, faatiàià atu ra ia na, nä ô atu ra: Ua tià ia ia Ù, ia mä òe. 42 E tei te parauraa atu o ia ra, pee atu ra te rëpera o taua taata ra i reira ra, mä atu ra o ia. 43 Ua aò hua atu ra Ietu ia na, e tuu atu ra ia na ia haere na; 44 nä ô atu ra ia na: Eiaha roa òe e parau noa atu i te hoê taata. E haere rä e faaìte ia òe iho i te tahuà, e hopoi atu no te tämäraa ia òe i te mau mea ta Möte i parau mai ra, ei faaìte atu i te taata. 45 Haere atu ra rä taua taata ra, faaìte haere atu ra i taua parau ra, e haaparare haere atu ra. Aita atu ra e tià ia haere o Ietu e faaìte i taua ôire ra, pärahi noa iho ra rä i te mau vähi moèmoè ra, e ua haere mai ra rätou ia na ra no te mau vähi atoà e àti noa aè.

Na te Atua Nui Tumu Tahi, e haamaitaì mai te täiòraahia ta na parau.

 

Pure  

Pure tätou i te Atua, te mau parau ta mätou i faaroo no te tauturu ia, ia mätou i te tiàturiraa i te mau òhipa e faatupuhia nei e to mätou Faaora. Âmene.

 

Haamaitaì tätou i te Atua i te hoê reo himene.

 

Himene.

Parau faaära.

Himene püpüraa moni

Pure Ärai.

Pure tätou i te Atua Nui Tumu Tahi, mea tià atoà ia Ietu i te parau mai ia tätou te taata ta tätaì tahi, ua tià ia Ù ia moe òe, i to mätou vahi ìtehia, e te vahi ìte-òre-hia ia òre ia noaa ia mätou te mataùraa i mua i te mau maì e àua haaàti noa ra ia mätou. Mea tià ia tätou ia pärahi te tahi taime no te faaroo i te rahu a te Atua, te fenua, te mataì, te ànavai, te reva, ta rätou e faaìte ra i te hanahana o te ao Atua. Te hinaaro nei hoì mätou i te ìteraa e te märamaramaraa no to mätou huru oraraa i teie mahana, i te mea ua taamino noa te mau parau faaära no teie maì e haaviivii nei i to mätou oraraa i Mäòhi Nui nei, i te mea ua viivii atoà te mau parau faaära e faaìtehia rä mai te hoê pehe puta ra te huru. Ia parau o Ietu ia mätou e, E tià ia Ù, no to Na ia Here i to na nünaa, e no to na aroha rahi i te hiòraa i te mau àti atoà ta na e faaruru ra, no reira te Atua i tono mai ai ta na Tämaïti no te rave i te mau òhipa atoà e au ia ravehia no te haamänina i teie mau fifi tei riro èi herepata tei täumiumi noa i te taata i roto i te pohe. I te mea e nünaa mäìtihia tätou e te Atua, e òhipa ia ta tätou no te faatiàraa i te mau faaueraa e faauehia nei ia tätou i Mäòhi Nui nei, eiaha huna i ta te Atua faatiàmaraa ia tätou i Mäòhi ai tätou. Âmene.

Haamaitaì tätou i te Atua i te reo himene âmui e tià mai tätou.

 

Himene âmui.

Pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie te parau faaitoitoraa

Faaitoitoraa.

41 Aroha aè ra Ietu ia na, faatoro atu ra i te rima, faatiàià atu ra ia na, nä ô atu ra: Ua tià ia ia ù, ia mä òe.

 

Haamaitaìraa.

1 Ei pee mai òutou ia ù mai ia ù atoà e pee i te Metia nei. Âmene.

 

Teraì òr. Faatura.