Hinamoeùra Cross 1 L'injustice

Māreto 6.7-13. Turutootoo.

 

Tāpati 11 no Tiurai 2021.

Turutootoo.

Taramo 85

1 Na te Mënätehe. E Taramo na te tamarii a Tora. 2 Ua hämani maitaì mai òe, e te Fatu, i to òe ra fenua; ua faahoì mai òe i te tïtï o Iatöpa ra. 3 Ua faaòre òe i te hara a to mau taata ra, e ua täpoì òe i to rätou ìno. Tera. 4 Ua faaòre òe i to òe ra riri, e ua tïoi ê atu ra òe i te ûàna o to òe ra riri. 5 E teie nei, e haafäriu òe ia mätou, e te Atua e ora ai mätou nei, e ruri ê atu hoì òe i to riri ia mätou nei. 6 E riri mai ä òe ia mätou, e a muri noa atu? E tämau ä òe i to riri e tae noa atu i te mau uì atoà ra? 7 Eita änei òe e faaanaanaea mai ia mätou, ia òaòa to mau taata ia òe ra? 8 E faaìte mai, e te Fatu, i to òe ra aroha, e hö mai i te ora na òe ia mätou nei. 9 E faaroo na vau i ta te Atua ra, ta te Fatu e parau mai. Te faaìte mai ra o ia i te maitaì no to na ra taata, to na ra feiä moà, eiaha rä rätou ia färiu faahou i te ìno ra. 10 Te fätata mai ra te ora na Na i te feiä i mataù ia na ra. E faatupu o ia i to na hanahana i to tätou nei fenua. 11 O te aroha e te parau mau, ua färerei ia räua; o te parau tià e te hau, ua hohoì räua.12 E tupu mai te parau mau no roto i te fenua, e hiò mai hoì te parau tià mai te raì mai.13 Na te Fatu hoì e horoà mai i te mea maitaì, e hotu mai ä hoì to tätou fenua. 14 E nä mua ia na te parau tià i te haere, e na te reira e faaìte mai i to na haereà.

Àmota 7.12-15.

12 Ua parau mai ra Àmatia ia Âmota, E tërä ra hiò e, e haere, e maùe ê atu òe i te fenua ra o Iüta, a àmu ai i te mäa i reira, e ei reira a tohu ai. 13 Eiaha rä òe e tohu faahou ia Pëtera nei e vähi moà ia no te arii, e te hiero no te pätireia nei. 14 Ua parau atu ra Âmota, nä ô atu ra ia Àmatia, Eere au i te perofeta, eere atoà hoì au i te tamaiti a te perofeta; e faaàmu puaatoro hoì au, e haaputu tütämino hoì; 15 ua rave mai ra te Fatu ia ù a pee haere ai au i te nana ra, e ua parau mai ra te Fatu ia ù, A haere a tohu i to ù mau taata ia Ìteraèra.

Èfetia 1.3-14

Te hämani maitaì a te Atua mä te Metia

3 Ia haamaitaìhia te Atua te Metua o to tätou Fatu ra o Ietu Metia, o tei haamaitaì mai ia tätou nei, i te mau maitaì atoà o te Värua i te ao ra, i te Metia nei: 4 o ia i mäìti ia tätou i roto ia na hou te tumu o teie nei ao ra, ia riro tätou ei feiä moà e te hapa-òre i mua i ta na aro mä te aroha; 5 e ua haapaò ätea noa ia tätou, ia riro ei tamarii tävai na na iho ia Ietu Metia ra, i te haapaòraa i te hämani maitaì o to na iho ra âau. 6 Ia haamaitaìhia to na aroha mau hanahana ra, i riro ai tätou ia na ei feiä ìtehia mai i roto i ta na Tamaiti here ra. 7 No na i noaa ai te ora ia tätou i to na ra toto, i te hara i faaòrehia nei no te rahi o to na ra aroha mau: 8 o tei faarahi-roa-hia e ana ia tätou nei, mä te paari rahi, e te haapaò maitaì. 9 E ua faaìte mai ia tätou i te parau àro ra o to na ra hinaaro, to na ra manaò hämani maitaì i ôpuahia e ana i roto ia na iho, 10 e ia tae i te tuuraa parau i te hoperaa mau o te mau tau ra, e âmui ai o ia i te mau mea atoà i te Metia ra, to te raì, e to te ao nei, ei ia na. 11 E e tufaa hoì ta mätou i noaa ia na, o mätou i oti i te haapaò-ätea-hia i te ôpua no na no tei rave i te mau mea atoà nei, ia au i te ôpua a to na iho âau. 12 Ia riro mätou nei ei ârueraa i to na ra maitaì, o mätou o tei tiàturi i te Metia i mütaa iho ra. 13 O ta òutou atoà hoì i tiàturi, i te ìteraa aè òutou i te parau mau, i te Èvaneria ra o to òutou ora: e òutou atoà hoì i faaroo, i täpaòhia òutou e ana i te Värua Maitaì i parauhia mai ra, 14 o të faaìte ia i ta tätou tufaa e tae noa atu i te ora mau o to na ra taata i hoohia ra, ia haamaitaìhia to na hämani maitaì.

Māreto 6.7-13.

Te tono-raa-hia te tino àhuru mä piti.

(Mät 9,35; 10,5-15; Ruta èv 9,1-6)

6 vh, Haere atu ra o ia nä roto i te mau ôire rii i reira iho i te haapii haereà. 7 Ua parau atu ra o ia i te tino àhuru mä piti e haere mai ia na ra, tätaìpiti atu ra i te tonoraa ia rätou. Ua tuu atu ra i te mana ia rätou ia vï te mau värua faufau ra; 8 e ua parau atu ra ia rätou: E eiaha roa ei taoà ê e hopoihia i to rätou tere, maori rä o te räau turutootoo ra: eiaha ei pütë, eiaha ei mäa, eiaha ei moni i to rätou hätua. 9 Ei tïaa hoì ta òutou, e eiaha e piti pereue ia àhu. 10 Ua parau atoà atu ra o ia ia rätou: Ia tomo noa atu òutou i roto i te tahi fare ra, e faaea atu i reira e reva noa atu òutou. 11 I te vähi rä aore rätou i färii mai ia òutou, e aore hoì e faaroo mai ia òutou, e ueue atu i te repo o to òutou âvae ia reva òutou ra, ei täpaòraa atu ia rätou. 12 Haere atu ra rätou, aò haere atu ra i te taata ia tätarahapa. 13 E tiàvaru atu ra hoì i räpae i te värua ìno e rave rahi, e ua faaora atu ra i te maì e rave rahi, mä te faatävai ia rätou i te monoì.

 Manaò.

Te parau tià e te parau mau e faahitihia nei i roto i teie fäìraa ta te Taramo, e parau ia no te haaväraa. Eiaha rä tätou e rü noa i te faaoti i te auraa o teie parau i nià i te mea ta tätou i mätau. Mai te peu na te märamarama e faataa ra i te pö i te ao i roto i te rahu a te Atua, na te parau tià  e te parau mau atoà e faataa i teie nei i te taata. No reira, ia parau tätou e, haaväraa, eiaha tätou e manaò i te huru haaväraa mai teie ta tätou i mätau i te ìte. Te auraa o teie taò haavä, teie ia : faataa, tuu i te ärea i roto i te tahi nä taata i roto i te fifi. Te vä, e ärea to na auraa tumu ; te taò atoà teie i maìrihia i te tahi räau e ravehia no te faatano i te ärea e faataa i te tahi nïàu i te tahi i roto i te atoraa fare. Te parau atoà nei to Rapa e haere e haava i te roki, oia hoì e faateatea te huri mikaka ia tupu maitaì te vari taro.

 No reira, ia au i to te taata färii, aore ra to na färii òre te parau a te Fatu, te riro ra oia mai te òraparaa o te âvaè i tanohia i nià i te ànaana o te mahana, aore ra tei òre i tanohia : ua riro te färiiraa ei täpaò no te märamarama ; âreà te òreraa e färii, e täpaò ia no te pöiri. E hape tätou ia faariro i te märamarama ei fäitoraa taata : te vai ra te feiä märamarama, e te vai ra te feiä pöiri. Eere roa atu te reira, àita e taata pöiri ta te Atua Nui Tumu tahi i hämani, te färiiraa ia Ietu no ta na parau, te mea ia e ìtehia ai te taata i hitihia e te märamarama ; âreà te òre rä e färii i te reira märamarama, ua huritua ia taata i te märamarama.

Aita o Ietu i haere mai e haavä i te taata, oia hoì eere na Na e horoà i te utuà e au i te òhipa ta te taata i rave, na te taata iho rä e faahaere mai i nià ia na i te utuà e au i to na färii, aore ra to na färii òre i te märamarama ta Ietu i âfaì mai. Ta na ia e haapäpü ra ia nä ô mai o ia e : Ia faaroo mai te taata i ta ù parau, e aore i haapaò, eere o vau të faahapa ia na. Mai te parau a te Atua i tuu i te ärea i roto i te pö e te ao, te riro atoà nei Ietu, oia te parau i riro mai ei taata, mai te vä, oia te mea e tuu i te ärea i roto i te taata. Ia faaroo tätou i te haapotoraa o na taiòraa e maha nei te faaìte noa mai ra te reira i te tupuraa òhipa e tià ia haapaò, e ia rave teie ia :

-Taramo 85, 12 E tupu mai te parau mau no roto i te fenua, e hiò mai hoì te parau tià mai te raì mai.

-Àmota 7, 15 ua rave mai ra te Fatu ia ù a pee haere ai au i te nana ra, e ua parau mai ra te Fatu ia ù, A haere a tohu i to ù mau taata ia Ìteraèra.

-Èfetia 1,  6 Ia haamaitaìhia to na aroha mau, hanahana ra, i riro ai tätou ia na ei feiä ìtehia mai i roto i ta na Tamaiti here ra.

-Märeto 6, 8 e ua parau atu ra ia rätou: E eiaha roa ei taoà ê e hopoihia i to rätou tere, maori rä o te räau turutootoo ra: eiaha ei pütë, eiaha ei mäa, eiaha ei moni i to rätou hätua.

Te manaò faufaa roa i roto i teie mau ìrava te fäìraa i te tumu o te tere o Ietu i roto i te ao nei, teie ia parau no te ìte. Aita e òhipa ta te Tamaiti i rave, nä reira hoì te Atua Metua, tei òre te taata i parauhia, ta Ietu i òre i haapii, tei òre i haamäramaramahia, oia hoì tei òre o ia i ìte. Te mea ia ta Ietu i haapäpü i roto i ta tätou no teie mahana Märeto i te pene 6 i te mau ìrava 7 e faaea i te ìrava 13.

Teie ta tätou parau no teie taime haamoriraa e faateiteiraa i te Atua. Teie o Ietu e tono nei i ta na mau pipi, i roto i te mau vahi nohoraa no te taata, i nià i te èà tià e i te mau aroä, no te faaìte i te parau òaòa âpï a te Atua. Hou ra te tonoraa te vai nei te faanahoraa, eiaha te mau pipi e hopoi i te mau mea e fifi ai ta rätou faaìteraa, mauti ra. Hoê raau tootoo, èi faaìteraa e taata tere perenina teie, ma te tëpeta parautià i ta na rima, èi faaìteraa te mana e vai ra i roto i te taata horoà i te parau i te hanahana o te Atua. E te hoê tämaa täui, èi faaìteraa e, e tävini tiàma teie e faaìte nei i te parau òaòa no te patireia o te Atua, e te parau no te tätarahapa.

Eiaha èi pute, a î noa te tuuhia i roto te mau mea e faufaa òre ai te pororaa.

Eiaha èi maa, a pau noa te taime i te faaineineraa, a ïti mai te taime pororaa.

Eiaha èi moni, a manaòhia rätou e te mau taata, e fëia tapi hoo täuihaa, a fifi roa atu ai te pororaa.

Eiaha èi piti pereue, a manaòhia rätou e fëia hoo àhu, a ta fifi te faaìteraa i te mau hinaaro o te Atua.

E faanahoraa päpü teie ta te Metia, èi haapaariraa i ta na mau pipi i roto i te pororaa e te faaìteraa. Te faaära nei O ia, ia haapaò maitaì eiaha te mau mea faufaa no te ao nei ia na mua i ta te Atua, ia na mua ra ta te Atua e tià ai.

Te fare i reira òutou e tomo ai o tei faaroo mai, ma te färii poupou maitaì, e pärahi i reira, te fare ra aore e faaroo i te parau âpï òaòa, e riro ia taua òire ra mai ia Totoma e o Tomora, ia tae i te taime haaväraa.

O te piti teie no te faanahoraa a te Metia, no te tonoraa. Àreà ra te toru o te faanahoraa ia porohia ia te parau no te tätarahapa, tei òre ia tätarahapa ra, ia tätarahapa ia. Te ìte nei ia tätou i ù nei te faanahoraa a Ietu i te tonoraa i ta na mau pîpî. Ma te horoà i te hoê haapiiraa e au no te òhipa, faaìteraa, e te faaoraraa maì. E toru täpura òhipa teie ta Ietu e horoà nei i mua i ta na mau pîpî.

1-Te mau pipi i mua i te tonoraa a Ietu.

2- Ia tätarahapa, ia òre ia riro mai ä Totoma e o Tomora.

3-Te mana faaora a te taata, no te taata, o ta Atua e faatupu.

Teie te tahi mau parau tumu i roto i ta tätou nei taiòraa, o ta Ietu e hinaaro atoà nei e faaìte ia tätou, te tumu o te tonoraa a te Atua i ta na mau tävini. No te mau òhipa, ta te taata i manaò e mea faufaa, i roto i te ao nei, mea faufaa òre ia i mua i te aro o te Atua. E täpaò faaìte teie te mana faaue a te Atua, ia tomo i roto i te mau ùtuafare i to na Iòa. Ua ta toopiti o Ietu i te tonoraa i ta na mau pipi, ia poro haere na te mau aroä, e i roto i te mau ùtuafare. Toopiti rätou i te haereraa e òhipa i te täpura a te Atua, mai te vaa tauàti ra hoì te mau pipi i te tooraa i te parau a te Atua, i te mau vahi e tätarahapa ai te taata nei. Toopiti i te haereraa e faatupu i ta te Atua i faaue no te ùme mai i to te ao i rapae i te hara, no te hoì i nià i te èà no te tiàturiraa. Toopiti i te haereraa i roto i te mau ùtuafare, no te òhipa i ta te Atua mau tïtauraa i te mau ùtuafare tei tiàturi.

Ta toopiti atu ra i te tonoraa ia rätou ua tuu atu ra i te mana ia rätou ia vi te mau varua faufau ra.   

Teie o Ietu e tuu nei i roto i te mau pipi, te faufaaraa e te manuiraa ta te Atua òhipa. E mana teie e horoàhia nei no te òhipa, e mana faatupu i to te Atua mau hinaaro no te ora e a muri atu. Teie mana ta te taata e moemoeä noa nei ia noaa teie faufaa i te mau taata atoà, o ta te Atua i faataa no na. O ta te Atua atoà i rave na i te perofeta ra ia Àmota i te pene 7 i te mau ìrava 12 e tae i te 15. O ia tei faauehia e te Atua ia haere e tohu i to Ìteraèra, ua horoà te Atua i teie mana no te tohu ia färiu faahou mai to Ìteraèra i nià i te Atua no te maitaì, i te mea ua riro o Pëtera ei hiero moà no te patireia. E taata faaamu puaatoro o Àmota, te hinaaro nei ra te Atua ia Àmota eiaha ei faaamu puaatoro faahou, ei tiaì ra i to na nunaa, ei faaàmuraa i te maa no te fäìraa hara, no te hoìraa i te Atua ra. Teie te mana ta te Atua i horoà i roto i te perofeta. E mana tohu to Âmota, àreà to te mau pipi e mana ia, ia vï te mau värua faufau e haafifi nei te oraraa o te mau taata.

E i teie mahana, e aha te mana ta te Atua i horoà ia tätou?

Mauti ra ia, ia farerei te aroha i te parau mau, e ia hohoì te parau tià e te hau. O ia mau no reira o Âmota i faauehia ai e tohu, e te mau pipi i tonohia ai, te Ètärëtia ia päpetito i te iòa o te Metua, te Tamaiti, e te Varua Maitaì. Ia tupu te färereiraa te aroha e te parau mau, e te parau tià e te hau ia hohoì.

 

O te aroha e te parau mau ua farerei ia raua, o te parau tià e te hau ua hohoì raua. Taramo 85, 10.

 

 

Teraì òr. Faatura

 

 

 

 

 

 

Tāpati 4 no Tiurai 2021.

ÔROÀ

Maere.

Taramo 123

Te tiaìraa a tei faahaamähia

1Tire a te Moruta. Te nänä atu nei au i ta ù mata ia òe, e tei pärahi i nià i te mau raì ra. 2 Inaha, mai te mata o te mau tävini e hiò i te rima o to rätou ra mau fatu, mai te mata o te tävini vahine e hiò i te rima o ta na fatu vahine ra, oia atoà to tätou mata i te hiòraa i to tätou Atua te Atua Nui Tumu tahi ra, e ia aroha mai o ia ia tätou nei. 3 E aroha mai ia mätou, e Fatu, e aroha mai ia mätou Ua faaî-mäite-hia to mätou värua i te parau faaìno ; 4 ua faaî-mäite-hia mätou i te parau faaìno, i te tähitohito a te feiä taoà ra, i te vahavaha o te feiä teòteò hämani ìno ra.

Ètetiera 2.2-5

Tämaïti a te Taata.

2 E ua ö mai ra te värua i roto ia ù, ia na i parau mai ia ù ra, e ua faatià mai ra o ia ia ù i ta ù âvae, e ua faaroo atu ra vau ia na i tei parau mai ia ù ra. 3 E ua nä ô mai ra o ia ia ù : E te tämaïti a te taata na, te tono nei au ia òe i te tamarii a Ìteraèra i te fenua tähito mai, tei tähito mai ia ù ra: o rätou e to rätou mau metua tei faaroo taiàta mai ia ù, e tae roa aè nei i teie nei mahana. 4 Tähito noa ä rätou e te âau faaètaèta, te tono nei au ia òe ia rätou ; e na òe e parau atu ia rätou : Te nä ô mai ra te Fatu ra o Iehova : 5 E o rätou ia hinaaro i te faaroo mai, e ia òre hoì ia faaroo mai e ùtuafare tähito, mai ä rätou e ìte ä rätou e perofeta tei tae atu ia rätou ra.

2 Törïnetia 12.7-10

Paruparu.

7 E ia òre au ia teitei rahi hua i te rahi o tei faaìtehia mai ia ù ra, i tuuhia mai te hoê tara i roto i ta ù tino nei, e merahi na Tätani ei haavï mai ia ù, ia òre au ia teitei rahi hua. 8 E e toru hoì a ù aniraa atu i te Fatu i taua mea ra, ia faataa-ê-hia ia ù. 9 Ua parau mai ra rä o ia ia ù : To ù nei maitaì, a tirë ia ta òe : ei te paruparu e taa maitaì roa ai to ù püai. E i teie nei, e mea òaòa ia ia ù te ârue i to ù nei paruparu, ia vai mäite te püai o te Metia i nià ia ù nei. 10 E i teie nei, e mea tià ia ù te paruparu, e te faaìno, e te àti, e te hämani ìno, e te ahoaho i te Metia nei : ia paruparu hoì au ra, te püai ra ia vau i reira.

Märeto 6.1-6

Eita to Nätareta e faaroo ia Ietu

Mät 13.53-58; Rt Èv 4.16-30

1 Faaruè iho ra Ietu i taua vähi ra, haere atu ra i to na iho fenua, mä ta na mau pipi atoà. 2 E haapii atu ra o ia i roto i to rätou mau tunato i te täpati, ua nä ô aè ra te feiä i faaroo ia na e rave rahi mä te maere : No hea te mau räveà a teie nei taata ? E e aha teie nei paari i höroàhia mai ia na nei, i tià ai teie nei mau temeio rahi i ravehia e ana nei ? 3 Eere änei teie i te tämuta, te tamaiti a Märia ra, te taeaè o Iatöpo ra, e no Iote, e no Iuta, e no Timona ? E eere änei tei io tätou atoà nei tana mau tuahine ? Mäheaitu iho ra rätou ia na. 4 Ua parau atu ra rä Ietu ia rätou : E òre te perofeta, e òre i te haapaòhia, maori rä i to na iho ra fenua, e i to na iho ra fëtii, e i to na iho ra ùtuafare. 5 Aita atu ra i tià ia na ia rave i te temeio i reira, maori rä i vëtoofanu puè maì i faaorahia e ana i te tuuraa i ta na rima i nià ia rätou ra. 6 Maere roa atu ra o ia i to rätou faaroo òre.

Manaò.

Te mau reo i faaroohia e tätou i roto i teie mau taiòraa te faaìtehia nei ia  te mau hinaaro o te Atua Nui Tumu tahi, oia hoì, te mea ta te Atua e tiäì mai ra i te taata ia rave ei rāveà e tupu ai te hau i roto i te oraraa o te taata e mau ra i te Parau tià, eere ia i te parau noa, e òhipa atoà rā, e òhipa âfaro, te tano e te maitaì, tei au i te ôpuaraa a te Atua. Aita to te parau tià e parau i rāpae aè i te vāhi e orahia ra e te taata, i roto i te faatereraa e faanahohia ai to na oraraa, nā reira te feiā na rātou e mau ra i te faatereraa.

I roto i te faaineineraa aore ra i te faatäviniraa i te tāvini o te Atua, tē vai ra te tuhaa a te taata, e tano e parau e, ta na te tuhaa rahi aè, te mea ta te Atua e ta Ietu e haamanaò pinepine noa ra : Eiaha e mataù. Tē vai atoà ra rā te tuhaa a te Atua, oia te òreraa e faaruè ia na. E ia au i te reira manaò, ia paruparu te tāvini, eere no te mea e pūai aè te ènemi, no te mea rā, ua haaparuparu ê na te tāvini ia na, ua hiò ê na ia na i roto i te pau, e aita i haamanaò faahou e, no te mea na te Atua te òhipa ta na e rave ra, tei pīhaì noa ia te Atua ia na. Ua tuu ihoā paha te Atua i to na Vārua i nià i teie taata, mai te peu rā ua apiapi ê na to na âau i te mataù, nā hea ia te Vārua o te Atua e òhipa ai i roto ia na.

Te vāhi faufaa i roto i teie mau parau, te parau ia o te tāvini ta te Atua e ani nei ia tātou e hiò, te mea ia e, na te Atua iho i faatävini ia na. E te tävini ra, e taata ia tei faaineinehia no tē haere i nià i te tahua òhiparaa. Eiaha tātou e manaò e, tē vai ra te tahi faaineineraa taa ê ta te Atua e rave no to na tāvini. Teie noa te haapāpūraa ta te Atua e hōroà mai nei ia au i te haapotoraa o te mau taiòraa :

-Taramo 123, 2 Inaha, mai te mata o te mau tävini e hiò i te rima o to rätou ra mau fatu, mai te mata o te tävini vahine e hiò i te rima o ta na fatu vahine ra, oia atoà to tätou mata i te hiòraa i to tätou Atua te Atua Nui Tumu tahi ra, e ia aroha mai o ia ia tätou nei.

-Ètetiera 2, 3 E ua nä ô mai ra o ia ia ù : E te tämaïti a te taata na, te tono nei au ia òe i te tamarii a Ìteraèra i te fenua tähito mai, tei tähito mai ia ù ra: o rätou e to rätou mau metua tei faaroo taiàta mai ia ù, e tae roa aè nei i teie nei mahana.

-2 Törïnetia 12, 10 E i teie nei, e mea tià ia ù te paruparu, e te faaìno, e te àti, e te hämani ìno, e te ahoaho i te Metia nei : ia paruparu hoì au ra, te püai ra ia vau i reira.

-Märeto 6, 6 Maere roa atu ra o ia i to rätou faaroo òre.

Tatararaa

E reo maere rahi mau teie no Ietu, te òreraa te perofeta e färiihia i ö na iho, te òreraa te mau fetii e ìte atu i te mau òhipa e tupu ra no te maitaì e te ora, e te òreraa te ùtuafare e àfaro. Aita to Nätareta e färii nei i ta na iho tamarii, ua mau to rätou tiàturiraa, i te mea o Ietu mea matauhia e rätou i te hiò i te mau mahana atoà. E tamarii, tei mätau maitaìhia e te mau tamarii no to na iho òire, no rätou aita o Ietu tamarii i taa-ê-atu i te Ietu e poro nei i te patireia o te Atua, e, e haapii nei i roto i te mau tunato. O Ietu teie, te tamaiti a te tämuta, a Maria, te taeaè no Iatöpo, o Iote, o Iuta, e o Timona. E taata o Ietu mai te mau taata atoà e ta na òhipa, e mau òhipa maere anaè ia e te maere rahi.

No te mau òhipa maere i ìtehia no te mau taime mätamua e te fëia no to na òire, te ui nei rätou, nohea te mau raveà a teie nei taata ? E uiraa teie, tei faaìte i te âau arahuta o te mau taata no to na iho àià. To na àià te vahi O ia i paari ai, i te faanahoraa a to na na metua, aita rätou e ìte nei ia Ietu ei tamaiti na te Atua, aita rätou e ìte nei ia Ietu ei Metia, aita rätou e ìte nei ia Ietu ei perofeta.

Ua fifi to Nätareta ìteraa e o Ietu teie te tämaïti a te Atua, tei tonohia mai no te ora, no te hau, e no te aroha. I vai ai to rätou faaroo i nià i te tiàturi òre, e te maere rahi, oia hoì, e tämaïti o Ietu na te tämuta, eita ia o Ietu e tià ia faatupu i te mau temeio, na te mau tahuà noa te reira e rave, e aore ra, eita e tià ia Ietu ia haapii i te mea, eita O ia i te papaì parau. E maheaituraa rahi to te fenua iho ia Ietu, e ta te Atua i faatupu, te ora nei te mau maì na roto i te tuuraa rima, te täpeàraa i te hiti àhu, e tei faatià i tei pohe. Te ìte nei o Ietu i ù nei te täiroiro te tiàturiraa o to na iho nunaa. I parau ai O ia e, E òre te perofeta, e òre i te haapaòhia, maori rä i to na iho ra fenua, e i to na iho fetii, e i to na iho ra ùtuafare. O Ietu i mua i teie huru parauraa ia Na iho e ta na e tohu nei i to na pohe, e, te faamanaò atoà nei O ia te huru no te ùtuafare tahito no te nünaa Ìteraèra, i te faaroo taìäta, oia hoì te faaö àta te parau maitaì i roto i te âau. I vai tiàturi òre noa na to Ìteraèra i te mau perofeta a te Atua, ma te faaroo òre i te mau faaararaa. Noa atu ra teie huru no te nünaa o te Atua, aita te Atua e faaruè nei i ta na i ôpua, E ìteä rätou e perofeta tei tae atu ia rätou ra, ia au ia i te faaìteraa a Etetiera i te pene 2 i te ìrava 5vh. Ua mou ia perofeta e ta te Atua faaìteraa parau, ua mou ia perofeta e ta te Atua faaitoitoraa, ua mou ia perofeta e ta te Atua aòraa, ua mou ia perofeta e ta te Atua horoàraa i te ora. Aita ra ta te Atua mau ôpuaraa i mou, ua ûàna faahou ra, na roto ia Ietu, e ta na mau âpotetoro. E ìteä rätou e perofeta tei tae atu ia rätou ra.

Te tiaìtururaa ia o te Atua i ta na i tono i te ao nei, no te faaìte i te parau poupou no te tätarahapa. O Ietu perofeta i to na iho fenua, i to na iho fetii, e i to na iho ùtuafare, te riro nei ia O ia mai te mau perofeta mätamua no Ìteraèra, tei òre i haapaòhia ta te Atua i tono mai. Aita-atu-ra ia o Ietu i rave i te hoê temeio i reira, no to rätou faaroo òre, ua täpeàhia e Ietu te ora a te Atua i mua i te mata no to na iho nünaa, ua faaìtehia i te fëia tei tïtau i te ora mure òre.

Eita anei teie i te hoê parau peàpeà no Ietu, oia tei òre i haapaòhia, i to na iho fenua ? E aha ia te tïtauraa a Ietu no to na fenua, no to na fetii, e to na ùtuafare ? Te tïtau nei o Ietu, ia färiihia te aroha o te Atua ma te âau tätarahapa mau, eiaha ia ui maere faahou, e ère anei teie i te Tämaïti a te tämuta ? Ò ia, eiaha ra no Nätareta noa, no te mau vahi atoà ra, e färii nei i te parau ora a te Atua, e tei tätarahapa. E Tamaiti na te tämuta, te tämuta tei pii i te Ètärëtia i roto i te ora, te here e te aroha. Te Atua ua tämuta O ia i te ao nei, ma te horoà i to na tiàturiraa, àreà o Ietu te tämuta nei ia te haapaò-òre, ia haapaò, tei òre i färii, ia färii, tei òre i tätarahapa, ia tätarahapa.

E tamaiti na te tämuta, eiaha ra mai tei matauhia i te ìte i te mau mahana atoà i roto i to tätou oraraa, o te tämuta ra tei faatïtïàifaro te tiàturiraa ia färiu i nià i te maitaì no te oraraa poupou, ta te Atua i horoà i te mau taata e rave rahi.

E hoa here ma e,

6 Maere roa atu ra o ia i to rätou faaroo òre.

Peàpeà rahi to Ietu i roto i teie reo to na i te mea aita O ia i färiihia i roto ia ö na iho. Aita o Ietu e färiihia nei mai te hoê perofeta, te ìtehia nei ra O ia mai te hoê tämaïti no te fenua iho, eiaha mai te hoê perofeta, tei faaära i te parau a te Atua, e aore ra mai te hoê perofeta tei ärataì i te nunaa i roto i te hanahana o te Atua. I ù  nei te tïtau faahou nei o Ietu i to na fenua, to na nünaa, to na fetii, to na ùtuafare, ia färii i te parau àro no te Patireia o te Atua. I te mea O ia te tämuta no te èà o te Patireia, e O ia atoà te tämuta no te ora mure òre. Tei òre i färii i te tämuta no te faaäuraa âpï, e òre atoà  ia e färii i te tämuta o te faaäuraa mätamua.

E toru tau tumu parau ta Ietu e faahiti nei i roto i ta tätou parau no teie mahana, a tahi te fenua, a piti te fetii, a toru te ùtuafare. E mau vaehaa anaè ia teie e orahia ai, e, e nohohia ai e te mau taata i reira atoà e tupu ai te parau no te färiiraa. E aha to na huru i teie mahana ? Te färiiraa i to na fenua, te färiiraa i to na iho fetii, te färiiraa i to na iho ùtuafare. Na tumu ra rahi teie, no roto i to tätou oraraa taata teretetiano i roto i te Ètärëtia Porotetani Mäòhi e te vaamataèinaa. I te mea te fenua o te Atua tumu ia parau ai tätou i teie mahana te Tumu Nui, ia ohihia te fetii, no te patu i te hoê ùtuafare faaroo, tiàturi, färii i te parau no te aroha o te Atua. Ua maere o Ietu i to rätou faaroo-òre, e aha te maere te huru tupuraa ia  ìtehia rä i roto i te taata, ta na parau e ta na òhipa i nià i te parau tià e to na auraa tei turäma ia na.

Teie ta tätou parau no teie mahana e tauturu faahou nei i to  tätou faaroo, no te färiiraa i ta Ietu perofeta e faaìte nei ia haapaò i te fenua ia riro ei ìte, i roto i te âmuiraa fetii e te ùtuafare. Te hinaaro nei o Ietu i te haapii faahou i to na nunaa e i te Ètärëtia ia ara i roto i te färiiraa, ia färii ma te here, ia färii ma te hau, ia färii ma te haapaò e te aroha. O tei färii i ta Ietu mau òhipa maere, ua färii atoà ia i te fäìraa hara, o tei haapaò i to Ietu tiàororaa no te tätarahapa, ua färii ia i te fäìraa faaroo.

Ia itoito ia tätou i roto i to tätou oraraa, e ia haamaitaì mai te Atua i to tätou fenua, ia riro ei fenua faaroo, to tätou mau fetii ia riro, ei fetii teretetiano, e to tätou mau ùtuafare, ei ùtuafare tiàturi i ta te Atua e faatupu no te Ètärëtia i Mäòhi Nui nei.

 

Teraì òr. Faatura.

 

 

 

 

 

Märeto 5.21-43 Àhu

 

Tāpati 27 no Tiunu 2021.

Àhu

Taramo 30

Òto ei òaòa.

1 E Taramo, e e himene no te haoraa fare o Tävita. 2 E haamaitaì au ia òe, e te Fatu, ua faatià hoì òe ia ù i nià, e aita òe i vaiiho noa atu i ta ù mau ènemi ia òaòa noa na ia ù. 3 E te Fatu, e ta ù Atua, i tiàoro noa na vau ia òe, e ua faaora òe ia ù. 4 Ua faahoì mai òe, e te Fatu i ta ù värua mai häte mai ä, e ua faaora òe ia ù ia òre au ia tae i raro i te âpoo ra. 5 E himene i te Fatu, e te feiä moà e, e ârue i to na maitaì, ei manaòraa. 6 Mai te àmoraa mata nei to na riri i te poto, âreà to na hereraa mai, e tià ia i te vairaa e mure noa atu te aho. Ia täpae noa mai te òto i te ahiahi; e riro rä i te òaòa ia poìpoì.7 Taua maitaìraa no ù ra, ua parau ä hoì au e: «E òre roa vau nei e âueue. 8 No to hereraa mai, e te Fatu, i haamau päpü ai òe i to ù mouà.» Ua huna iho ra òe i to mata, mäheahea aè ra vau. 9 Ua pure iho ra vau ia òe, e te Fatu, i reira e ua faaìte atu ra vau i ta ù aniraa i te Fatu. 10 «E aha te faufaa ia rave-pohe-roa-hia vau, e ia hopoi-roa-hia vau i raro i te âpoo? E haamaitaì änei te repo ia òe, e faaìte änei ia i te parau mau na òe ra? 11 E faaroo mai, e te Fatu, e aroha mai òe ia ù; e te Fatu, ei tauturu òe ia ù.» 12 Ua faariro òe i te òto no ù ra ei òaòa, e na òe i tätara i te àhu òto no ù ra, e ua faaàhu mai òe ia ù i te àhu òaòa. 13 E teie nei, e haamaitaì au ia òe mä ta ù hinuhinu, e òre roa vau e mämü. E te Fatu, e ta ù Atua, e haamaitaì ä vau ia òe e a muri noa atu.

Ètetiera 18.21-32

Färiu.

21 Ia färiu mai ra te taata parau ìno i te mau parau ìno atoà nä na ra, e ua haapaò i ta ù ra mau haapaòraa, e ua rave i te parau au e te mea tià, e ora ia o ia, e òre ia e pohe. 22 Te mau hara atoà ta na i rave ra, e òre ia e manaò-faahou-hia atu ei hara nä na: i te parau tià ta na i rave ra, e ora ia o ia i te reira. 23 Huru mauruüru iti aè änei tö ù i te pohe o te taata ìno të nä reira mai ra te ATUA ra o te Fatu e eiaha o ia ia färiu mai i ta na èà ia ora? 24 Ia färiu ê rä te taata parau tià e ua faaruè i te parau tià nä na, e ua rave iho ra i te parau ìno, e ua rave i te mau parau faufau atoà i ravehia e te taata ìno ra, e ora änei o ia? te mau parau tià atoà i ravehia e ana ra, e òre ia e manaòhia: o ta na ra hapa i hapa ai o ia ra, e ta na hoì parau ìno ta na i rave ra, e pohe ia o ia i te reira. 25 E te parau na hoì òutou e, Aore te parau a te Fatu nei i au. E faaroo mai na, e te ùtuafare o Ìteraèra nei, O ta ù änei te parau aore i au? Eere änei o ta òutou te parau aore i au? 26 Ia faaruè te taata parau tià i te parau tià nä na ra, e ua rave i te parau ìno ra, e pohe hoì o ia i te reira; i te parau ìno i ravehia e ana ra e pohe ai o ia. 27 E ia färiu mai hoì te taata parau ìno i ta na ra parau ìno, i ravehia e ana ra, e ua rave i te mea au, e te parau tià, e ora ia o ia. 28 No te mea, ua manaò o ia, e ua färiu ê mai i te mau hapa tä na i rave ra, e ora ia o ia, e òre o ia e pohe. 29 E te parau mai ra te ùtuafare o Ìteraèra, Aore te parau a te Fatu ra i au. E te ùtuafare o Ìteraèra e, o ta ù änei te parau aore i au? Eere änei ta òutou te parau aore i au? 30 E teie nei, e haavä atu vau ia òutou, e te ùtuafare o Ìteraèra, i te taata atoà ra i ta òutou mau parau, të nä reira mai ra te ATUA ra o te Fatu. A tätarahapa, e färiu mai i ta òutou atoà ra mau hara: e eiaha òutou ia hià i ta òutou mau parau ìno ra. 31 E faaruè ê atu òutou i to òutou mau ìno atoà ra, i hara ai òutou na: e faaâau âpï e te värua âpï: e aha hoì òutou i hinaaro ai i te pohe, e te ùtuafare o Ìteraèra? 32 Aore roa hoì o ù e mauruüruraa i te pohe o te taata e pohe ra te parau mai ra te ATUA ra o te Fatu: e tënä na, e färiu mai ia ora.

2 Törïnetia 8.7-15

Fäito.

7 E teie nei, te vai hua na te mau mea atoà nei ia òutou na, i te faaroo ra, i te parau ra, i te ìte ra, e te itoito rahi ra, e to òutou aroha rahi ia mätou nei, e rohi ia rahi atoà teie nei maitaì i roto ia òutou. 8 Eere rä ta ù i te parau faaue, no te itoito rä o te tahi pae ra, e ei tämataraa atu i te haavare òre o to òutou hinaaro. 9 Ua ìte hoì òutou i te aroha mau o to tätou Fatu ra o Ietu Metia: e e taoà rahi ta na, no òutou rä, riro mai nei o ia ei veve, ia rahi ta òutou taoà i taua veve no na ra. 10 Teie hoì to ù manaò i taua mea nei: teie te mea tià ia òutou, i te feiä i haamata i mütaa iho i te rave, eere hoì te reira anaè ra, ua rü rä òutou mai te tahi mätahiti mai ä. 11 E teie nei, e faahope hua i te rave i taua mea ra. Mai te ôpuaraa i tià ra, ia tupu atoà hoì te rave hua, no roto i ta òutou taoà i noaa na. 12 Te vai ra hoì te tià i te âau, e färiihia ia i ta te taata i noaa eiaha i tei òre i noaa ia na ra. 13 Eiaha hoì ia mämä te tahi pae e ia teimaha òutou: 14 ia fäito rä, ia riro ta òutou taoà rahi ei turu atu i to rätou veve i teie nei, e ia turu mai rätou ia òutou i ta rätou taoà rahi i to na atu mahana, ia fäito. 15 Mai tei päpaìhia ra e: «O tei noaa te mea rahi ra aita ta na i rahi, e tei noaa te mea iti ra aita ta na i iti.»

Märeto 5.21-43

Te tamahine a Iaeiro

E te vahine i täpeà i te àhu o Ietu

(Mät 9,18-26; Ruta èv 8,40-56)

21 E ia hoì faahou Ietu i te tahi paeàu nä nià i te poti, e feiä rahi tei taìruru mai i te hiti ä o taua roto ra. 22 E inaha, ua haere mai ra te hoê tävana o te tunato ra, o Iaeiro te iòa; e ìte mai ra o ia ia na, ua haamaìri iho ra i ta na pae âvae, 23 täparu hua mai ra ia na, nä ô mai ra: «Ua fätata roa ta ù tamahine iti i te pohe ; haere mai òe e tuu i to rima i nià iho ia na ia ora o ia i reira. 24 Haere atu ra Ietu räua atoà, e rave rahi taata tei âpee ia na e tei nëneì atu ia na. 25 E te hoê vahine hoì, hoê àhuru e ma piti mätahiti i te poheraa i te täpahi: 26 e mauiui rahi to na i te mau räpaauraa a te mau täote e rave rahi, e ua pau roa ta na faufaa e aore e ora i noaa, te rahi noa atu ra rä to na maì. 27 Faaroo aè ra o ia i te parau i nià ia Ietu, ua nä muri mai ra i te haere nä roto mai i te nahoà rahi taata, täpeà atu ra i to na àhu, 28 ua nä ô aè ra hoì o ia: «Ia täpeà anaè au i to na àhu, e ora ia vau.» 29 Òre roa iho ra taua täpahi no na ra i reira, ìte iho ra o ia i roto ia na iho e, ua ora o ia i taua maì no na ra. 30 Ìte aè ra Ietu i roto ia na iho, e mana tei matara/püpü atu no roto ia na. i reira ra. Ua färiu aè ra i roto i taua feiä i neneì mai ra, nä ô aè ra: «O vai tei täpeà mai i ta ù àhu nei? 31 Ua parau atu ra ta na mau pipi ia na: «Te ìte mai nei hoì òe i teie nei feiä rahi i te neneìraa atu ia òe, e e parau mai hoì òe: «O vai tei täpeà mai ia ù?» 32 Ua hiò atu ra Ietu e àti noa aè, ia ìte o ia i te taata i nä reira mai ia na ra. 33 Ua haere mai ra taua vahine mä te mataù e te rürütaina, ua ìte iho ra i te huru ê i tupu i roto ia na ra, ua tïpapa iho ra i raro i mua ia na, ua faaìte fäì mai ra i te parau mau. 34 Ua parau atu ra rä o ia ia na: «E ta ù tamahine, i ora òe i to faaroo. A haere mä te hau, e ia ora roa òe i to maì. 35 E aita i hope roa taua parau na na ra, o te veà mai ra, mai te ùtuafare mai o te tävana o te tunato ra, e ua parau mai ra: «Ua pohe roa to tamahine, e aha òe i haapeàpeà atu ai ä i te òrometua? 36 Aita ra o Ietu i tauà noa atu i taua parau ra, ua nä ô atu ra i te tävana o te tunato ra: «Eiaha e mataù, e faaroo noa mai.» 37 E aore roa o ia i faatià i te taata ia pee mai ia na, maori rä o Pëtero, o Iatöpo, e o Ioane, te taeaè o Iatöpo ra. 38 E tae atu ra rätou i te fare o te tävana o te tunato ra, e ìte aè ra o ia i te huehueraa, te òtoraa e te hevaraa o/a te taata. 39 E ia tomo atu o ia i roto i te fare, ua parau atu ra o ia ia rätou: «No te aha òutou i huhue noa ai e i òto ai hoì? Aore taua tamahine nei i pohe, ua taòto rä. 40 Ua vahavaha / faaoôo mai ra rätou ia na. Ua tuu atu ra rä o ia ia rätou atoà i räpae, arataì atu ra i te metua täne e te metua vahine o taua tamahine ra e te feiä i pee mai ia na ra, tomo atu ra i roto i te piha i te vairaa o taua tamahine ra. 41 Ua rave atu ra i te rima o taua tamahine ra, nä ô atu ra: «Tarita tumi /Talita Kumi Te auraa : «E teie nei tamahine, te faaue atu nei au ia òe, a tià ») 42 Ua tià mai ra taua tamahine ra i nià i reira ra, hahaere iho ra, hoê àhuru ma piti hoì o na mätahiti, mäere roa atu ra rätou. 43 Ua aò hua atu ra o ia ia rätou e eiaha roa e faaìte noa atu i te hoê taata. Ua faaue atu ra o ia e hopoi mai i te mäa na taua tamahine ra.

Manaò.
E haamaitaì mätou ia òe, e te Fatu, ua faatià hoì òe ia mätou i nià, e aita òe i vaiiho noa atu i to mätou mau ènemi ia òaòa noa na ia mätou. E to mätou Atua Nui Tumu Tahi, i tiàoro noa na mätou ia òe, e ua faaora òe ia mätou. Ua faahoì mai òe, e te Fatu i to mätou värua mai te vahi o te pohe mai, e ua faaora òe ia mätou ia òre mätou ia tae i raro i te âpoo. E te feiä moà e, e ârue i to na maitaì, ei manaòraa. No to hereraa mai,  i haamau päpü ai òe i to mätou mau mouà i Mäòhi Nui nei. Eiaha e huna i to mata, ia mäheahea  mätou. E te Fatu, i reira e ua faaìte atu ra mätou i ta mätou aniraa. E teie nei, e haamaitaì mätou ia òe mä to mätou tiàturi, e òre roa mätou e mämü. E te Fatu, e to mätou Atua, e haamaitaì ä mätou ia òe e a muri noa atu.

Ia färiu mai ra te taata parau ìno i te mau parau ìno atoà nä òe ra, e ua haapaò i ta ù ra mau haapaòraa, e ua rave i te parau au e te mea tià, e ora ia o ia, e òre ia e pohe.  E te parau na hoì òutou e, Aore te parau a te Fatu nei i au. E ia färiu mai hoì te taata parau ìno i ta na ra parau ìno, i ravehia e ana ra, e ua rave i te mea au, e te parau tià, e ora ia o ia. No te mea, ua manaò o ia, e ua färiu ê mai i te mau hapa tä na i rave ra, e ora ia o ia, e òre o ia e pohe. E te parau mai ra te ùtuafare o Mäòhi Nui e, Aore te parau a te Fatu ra i au. E te ùtuafare o Mäòhi Nui e, o ta ù änei te parau aore i au? Eere änei ta òutou te parau aore i au?

E teie nei, e haavä atu vau ia òutou, e te ùtuafare o Mäòhi Nui, i te taata atoà ra i ta òutou mau parau, të nä reira mai ra te ATUA ra o te Fatu. E teie nei, te vai hua na te mau mea atoà nei ia òutou na, i te faaroo ra, i te parau ra, i te ìte ra, e te itoito rahi ra, e to òutou aroha rahi ia mätou nei, e rohi ia rahi atoà teie nei maitaì i roto ia òutou. Eere rä ta ù i te parau faaue, no te itoito rä o te tahi pae ra, e ei tämataraa atu i te haavare òre o to òutou hinaaro. E teie nei, e faahope hua i te rave i taua mea ra. Mai te ôpuaraa i tià ra, ia tupu atoà hoì te rave hua, no roto i ta òutou taoà i noaa na. Te vai ra hoì te tià i te âau, e färiihia ia i ta te taata i noaa eiaha i tei òre i noaa ia na ra. E te vahine i täpeà i te àhu o Ietu Ua aò hua atu ra o ia ia rätou e eiaha roa e faaìte noa atu i te hoê taata. I faaìte ai te parau no te haapotoraa no na taiòraa e maha teie taua mau ìrava nei :

-Taramo 30, 12 Ua faariro òe i te òto no ù ra ei òaòa, e na òe i tätara i te àhu òto no ù ra, e ua faaàhu mai òe ia ù i te àhu òaòa.

-Ètetiera 18, 32 Aore roa hoì o ù e mauruüruraa i te pohe o te taata e pohe ra te parau mai ra te ATUA ra o te Fatu: e tënä na, e färiu mai ia ora.

-2 Törïnetia 8, 14 ia fäito rä, ia riro ta òutou taoà rahi ei turu atu i to rätou veve i teie nei, e ia turu mai rätou ia òutou i ta rätou taoà rahi i to na atu mahana, ia fäito.

-Märeto 5, 41 Ua rave atu ra i te rima o taua tamahine ra, nä ô atu ra: «Tarita tumi /Talita Kumi Te auraa : «E teie nei tamahine, te faaue atu nei au ia òe, a tià.

 

Ei manaò tatara.

Ìrava 30 vh. O vai tei faatiàià mai i ta ù àhu.

Te piti te ìrava 34 E ta ù tamahine i ora òe i to faaroo e haere ma te hau, e ma te ora i to maì.

Te toru te ìrava 41 vh. E teie nei tamahine, te faaue atu nei au ia òe, a tià.

Teie ta tätou parau no teie hora paieti, te ìrava 30 vahi hopeà, te 34, e te 41 vahi hopeà. No roto mai ia teie mau tumu parau i te taiòraa o tei taiòhia atu i mua i te Atua, e i mua atoà ia tätou i te pene 5.

No teie taime haamoriraa, àrueraa e faateiteiraa na tätou i te Atua. Ei faaìteraa i to tätou faaroo, e to tätou tiàturiraa i ta te Atua i faatupu i te ora horoà noa, te hau tei faatupu i te haehaa, te here tei faatupu i te òaòaraa, i roto i tera taeaè, tera tuahine, te âmuiraa, e tera ùtuafare. O ta teie na ìrava e toru e hinaaro nei e heheu i te âau o te fëia paieti.

Ei ômuaraa.

Ua tupu teie parau i muri noa aè i te hoê tere àrepurepu mau no te mau pipi i ropu i te roto no Tarirea, te roto i faahoì faahouhia ai te tiàturiraa o te mau pipi, e te ìteraa te mau taata o te pahï, i ta te Atua i faafaìte na roto i te puai o te mana o te parau.

I te hiti roto no Tatara, te vahi i tipaehia e to rätou pahï, te tupu faahou nei ia te tahi òhipa, o ta Ietu ä i faatupu no te ora a te Atua, ma te tiàvaru i te varua faufau  tei haafifi i te òpuaraa a te Atua. Aita ra te reira ei taupupuraa no Ietu, ua riro ra te reira ei pororaa na Ietu  i te varua faufau ma te faaìte, o te Atua te tumu o te taata, na te Varua Moà i faatià mai i te taata mai te repo mai. Te tià nei o Ietu i roto i teie pororaa na na, ei taata  faaroo päpü ma te ära i te mau mahana atoà i ta te ènemi òpuaraa. I faaìte ai te reo o te paari i te naòraa e, e ao to te taata e faaroo mai ia ù ra o tei ara maite i te mau mahana atoà i te mau ùputa no ù ra (Materi 8, 34). 

O Ietu, tei ära i te ùputa no te ora, ia òre te ora ia fati i raro aè i te pohe.

O Ietu, tei ära i te ùputa no te hau, ia òre te hau ia fati i raro aè i te àmahamaha.

O Ietu, tei ära i te ùputa no te mataù, ia òre ia tupu te faateäraa, e te òre o te faaroo.

Ta tätou ra parau no teie hora paieti tei mua ia o Ietu i na àti maì e piti nei, hoê te tamahine a te tävana no te tunato tei maìhia e pohe-roa-atu ra manaò iho ra to te ùtuafare e aita e raveà faahou, ua pohe tei te pohe ra ia. Te piti te vahine ia tei maìhia i te täpahi, tei nià o Ietu i te èà no te haere i te ùtuafare o te tävana  no te tunato. Te faarooraa teie vahine teie mai nei o Ietu, i roto i te rahiraa taata, te ìteraa o Ietu e mana tei püpü atu no roto ia na i reira ra, e hiti àhu noa tei faatiàiàhia, e aore ra tei haruhia, oia hoì ua haru teie vahine i te ora, te ora tei haere i te mau vahi atoà, tei pärahi i pïhaì iho i te mau pipi, tei ora i ropu i te rahiraa taata.

E piti tau maì teie, tei faafäriuhia te tiàturiraa i nià ia Ietu e ta na òhipa. I ui ai o Ietu i te ìrava 30 O vai tei faatiàià mai i ta ù àhu? O tei hinaaro i te ora, oia mau i te mea noa atu ua àua haaàtihia o Ietu e te mau taata, no te itoito te vahine täpahi i te tïtau i te ora i te haereraa na nià i te èà, ua itoito atoà i te faaö-haere- raa noa atu te apiapi o te èà. E puai rahi to teie vahine i te mau taata atoà i taua mahana ra, ua faatiàià roa atu o ia i te hiti àhu o Ietu, ma te tiàturi päpü i te ora a te Atua, ora iho ra te maì o taua vahine ra i reira. I te ora faaroo, o ta Ietu ia faaoraraa, o ta te ìrava 34 ia e faaìte nei. E ta ù tamahine i ora òe i to faaroo e haere ma te hau, e ma te ora i to maì. Te haapäpü nei ia o Ietu, te ora o teie vahine ma te horoà i te ora, te hau, i roto i to na faaroo na te maì i haafatata i pïhaì iho i te Atua ma te ìmi i te mau raveà. Tei nià i te èà to Ietu faaoraraa i teie vahine.

Àreà ra te piti o te maì, te tamahine ia a Iaeiro, te faaroo nei o Ietu te manaò òto, te peàpeà no te ùtuafare, e te ahoaho o te fetii, ua fati te tino o teie pötii i raro aè i te pohe, ua atea te ora i to na tino, ua vai ei tino tähuti. Eiaha e mataù e faaroo noa mai. Te reo o Ietu i nià i te veà no te ùtuafare àti. E reo tei faaìte te vai ra te hoê tiaìtururaa o ta te Atua e faatupu no teie ùtuafare. Te manaò o Petero, o Iatöpo, o Ioane, te fetii, e na metua, ua pohe teie pötii ua taere roa o Ietu. Te manaò ra o Ietu aita i pohe, ua taòto ra. Aue ia reo mahanahana e, e te poupou. Ietu i mua i te pohe, mea faufaa-òre ia te pohe i te ora a te Atua. Teie mai nei o Ietu i roto i te ùtuafare àti, no te faaära tei taòto e tià mai, e tià ma te ora. Te ìte nei ia tätou i roto i teie taiòraa e piti vaehaa ta Ietu i faaora i te maì.

1-i nià i te èà no te vahine täpahi ia.

2-Te tamahine a Iaeiro i roto i te ùtuafare.

E täpaò faaìte teie e, te ora a te Atua eita o ia e maìti nei te vaehaa, ua itoito te vahine täpahi i te tïtau, ua itoito atoà o Iaeiro i te ani. Oia hoì te ora tei haruhia i nià i te èà , e te ora tei tomo i roto i te ùtuafare.

E hoa here ma e,

Te riro nei te maì i roto i ta tätou taiòraa ei faaìteraa te ora o te faaroo i roto i te Atua. E faaoraraa ta Ietu, eiaha te maì tino noa, te räpaau atoà nei ra O ia i te varua ia tiàturi, ua ora òe i to faaroo haere ma te hau. Eita anei teie i te mea òaòa no te taata faaroo, aita nei te taata paieti e tano nei, i te tano ora, e tano to te taata teretetiano i ta te Atua i ôpua. Ia faaära o Ietu i tei pohe, e täpaò te reira no te tiàfaahouraa no te taata, i roto i te Metia. E òhipa rahi teie i ravehia e Ietu, te naò nei to na reo i te ìrava 30 vh, o vai tei faatiàià mai i ta ù àhu ? i te ìrava 34 e ta ù tamahine ia ora òe i to faaroo e haere ma te hau, e ora i to maì. E i te ìrava 36 vh, eiaha e mataù e faaroo noa mai.

E mau reo teie, o tei au atoà ia tätou i teie mahana, te faaitoito mai nei ia i te Ètärëtia. Ia itoito i te faatiàià-noa -raa i te ora a te Atua. Ia itoito te oraraa i te faaroo ma te hau. Ia itoito te faaroo-noa-raa ma te mataù-òre.

Ia itoito ia te Ètärëtia i te pororaa i te ora a te Atua i teie mahana i Mäòhi Nui nei, no te faaroo, te hau, no te faatupu i te hoê ora poupou e te maitaì i roto i ta te Atua i faanaho no te ao nei. Ietu te tumu ia te reira no te ora, Ietu te tumu ia tei reira no te faaroo, Ietu te tumu ia te reira no te hau, eita nei te reira i te mea hanahana ia ìte i te faaora a te Atua i nià i te èà, e i roto i te ùtuafare. No reira mea tià-roa-ia i te taata paieti ia haamaitaì, ia ârue i te Atua i te mea e tià to na aroha i te vai mäiteraa.

-No te faaìte i te ora, te ora a te Atua.

-No te faaitoito i te faaroo, te tiàturiraa i te Atua.

-No te poro haere i te hau, te hau a te Atua.

Ua vai mai te hau te ora, te faaroo, te hau i roto i teie òhipa ta Ietu i rave, no reira i teie mahana e na tumu parau ia teie, te au no tätou, no te Ètärëtia e to tätou mau ùtuafare.

 

Ei ôpaniraa, tei roto ia ta tätou ìrava i te Hapatuta pene 2, 3vh, o tei tiàhia ra i te faaroo ra, e ora ia.

 

 

 

Terai òr. Faatura.