Māreto 7.1-23. Âau

 

Tāpati 29 no Âtete 2021.

Âau

Taramo 15

Tärahu

1Taramo na Tävita. O vai, e te Fatu, të tiàhapa i to òe ra tëtene? O vai të pärahi i to mouà moà ra? 2 O te taata haereà piò-òre, o tei haapaò i te parau tià ra, o tei parau i te parau mau i roto i to na ra âau. 3 O tei òre i ôhumu to na arero, o tei òre i hämani ìno i te taata tupu ra, o tei òre i färii i te parau ìno i to na tauà. 4 O tei vahavaha i te taata parau faufau ra, e faatura rä i te feiä i mataù i te Fatu, o tei tapu atu, ìno noa ai o ia iho ra e aore e tähema ra. 5 O tei òre i tuu i ta na moni i te tärahu ra, o tei òre e rave i te tärahu ei faahapa i te taata hara òre ra. O tei nä reira i te rave i taua mau parau nei, e òre roa e âueue.

Teuteronomi 4.1-8

Te Ture

1 E teie nei, e Ìteraèra, e faaroo mai i te mau haapaòraa e te mau ture ta ù e haapii atu ia òutou nei, e e rave ia ora òutou, ia tae òutou i nià iho e ia noaa te fenua, ta te Atua o to òutou mau metua, ta te Fatu e höroà mai no òutou. 2 Eiaha òutou e täati noa mai i te tahi vähi ê i teie nei parau ta ù e parau atu ia òutou, eiaha hoì òutou e haamaìri i te tahi vähi i taua parau nei; ia haapaò hoì òutou i te parau a to òutou Atua ra a te Fatu, ta ù e parau atu ia òutou nei. 3 Ua ìte hoì to òutou mata i ta te Fatu i rave i te hara ia Paara-peora ra; ua hope roa hoì te mau taata atoà i roto ia òutou i pee ia Paara-peora i te pohe i to òutou Atua ra i te Fatu; 4 âreà o òutou o tei àti mäite i to òutou Atua ra i te Fatu, te ora nei òutou atoà i teie nei mahana. 5 Inaha, ua faaìte atu vau ia òutou i te mau haapaòraa e te ture, ta ta ù Atua ta te Fatu i faaìte mai ia ù ra: ei haapaòraa na òutou i te fenua ta òutou, e tii e rave nei ei pärahiraa. 6 E tënä na, e haapaò maitaì i taua parau ra, e e rave; o to òutou ia paari e te haapaò maitaì i mua i te aro o te feiä e ìte i teie nei mau haapaòraa, e riro ia i te parau e, Tiàraa nünaa rahi paari e te haapaò maitaì o taua feiä ra. 7 Tei hea hoì ia fenua rahi e fätata mai to rätou atua ia rätou, mai to tätou Atua ra mai i te Fatu e fätata mai ia tätou nei, ia tiàoro noa atu tätou ia na? 8 E tei hea ia fenua rahi i tià ta na mau haapaòraa e te ture, mai te tià i teie atoà nei ture ta ù e tuu atu i mua i to òutou aro i teie nei mahana?

Iatöpo 1.17-27

Riri

17 Te mau mea maitataì i hö-mai-hia mai, e te mau mea tià roa e maitaì roa ai, no nià ia, mai nià mai ia i te Metua o te märamarama, aore roa e hirohirouri ia na ra, aore hoì e huru-ê-raa e vähi iti noa aè. 18 Na na tätou i fänau i te parau mau ra, no to na iho hinaaro, ia riro tätou mai te òho mätamua o te mau mea i hämanihia e ana ra. 19 E teie nei, e a ù mau taeaè here e, ia rü te taata atoà i te faaroo, ia haere mäine i te parau, ia haere mäine hoì i te riri; 20 e òre hoì te riri o te taata nei e faatupu i te parau tià a te Atua. 21 E tënä na, e tuu ê atu i te mau mea faufau ra, e te mau ìno rarahi atoà ra, a färii mäite ai mä te marü i te parau haamauhia i roto ra, e ora ai to òutou värua. 22 Ei feiä rave hoì òutou i te parau nei, eiaha ei feiä faaroo noa, i te haavare-noa-raa ia òutou iho. 23 O te taata hoì i faaroo noa i te parau, e aore o ia i rave, e au o ia i te taata e hiò noa i to na iho mata i roto i te hiò ra. 24 Te hiò ra hoì o ia ia na iho, e haere atu ra, àromoè noa iho ra to na huru ia na iho i reira ra. 25 O të hiò rä i roto i te ture tià roa o te tiàmä ra, mä te tämau mäite, no te mea eere o ia i te taata e möina noa te parau ia faaroo ra, e taata rave rä o ia i taua òhipa ra, e haamaitaìhia ia o ia i ta na ra raveraa. 26 Te manaò ra te hoê taata i roto ia òutou, e e paieti to na, e aore i täpeà i to na vaha, te haavare ra rä i to na iho âau, e paieti haavare to na. 27 O te paieti mau e te ìno òre i mua i te aro o te Atua, o to tätou Metua ra, o teie ia: o të hämani maitaì i te ôtare e te mau vahine ìvi i to rätou ra àti, e të tiaì maitaì ia na iho, eiaha ia viivii i teie nei ao.

Māreto 7.1-23.

Âau.

1 Ua haere mai ra te mau Färitea, e o e toofanu mau päpaì parau no Ierutarëma mai, ia na ra. 2 E ia hiò mai rätou i te tahi pae pipi a ana ra i te àmuraa i te mäa mä te rima viivii, oia hoì te rima horoi-òre-hia ra, ua faaìno mai ra. 3 E haapaò hoì te mau Färitea e te âti-Iüta atoà i te peu i tuua mai e te feiä tahito ra, e òre e àmu noa i te mäa, e mata na rä i te horoi mäite i te rima. 4 E ia hoì mai rätou mai te hooraa ra, ia òre rätou ia horoi ia rätou iho e òre rätou e àmu. E rave rahi ä ta rätou peu i tuuhia mai ta rätou e haapaò, mai te horoiraa âuà ra, e te päni ra, e te mau âuà veo ra, e te mau àmuraa mäa ra. 5 Ua ui mai ra te mau Färitea e te mau päpaìparau ia na: «E aha to mau pipi nei i òre i haapaò ai i tei tuuhia mai e te feiä tahito ra, i àmu ai hoì i te mäa mä te rima horoi-òre-hia ra? 6 Ua parau atu ra o ia ia rätou, nä ô atu ra: «E te mau haavare e, te au mäite na òutou i ta Ìtaia i parau mai ia òutou na, a nä ô mai ai o ia ra e: «Te faatura mai nei te vaha o teie nei feiä ia ù, âreà to rätou âau ra tei te ätea ê ia. 7 E haamoriraa faufaa òre rä ta rätou ia ù, tei haapii rätou i tei tuuhia mai e te taata anaè ra.» 8 Ua haapae hoì òutou i te parau a te Atua, e te täpeà nei i tei tuuhia mai e te taata, mai te horoiraa päni, e te mau âuà ra, e rave rahi hoì te peu mai te reira te huru ta òutou e rave nei. 9 E ua nä ô atu rä o ia ia rätou: «Faaòre tià ä òutou i ta te Atua ra parau, ia ö mai ta òutou parau i tuuhia mai ra. 10 I parau mai hoì Möte e: «E faatura i to metua täne e to metua vahine», e: «O tei faaìno i te metua täne e te metua vahine ra, e täparahi-pohe-roa-hia ia». 11 Te parau na rä òutou: «Ia parau te taata i ta na metua täne e ta na metua vahine:» Ia Torepana « (oia hoì ia «haamoàhia, ta ù atoà nei taoà e faufaahia ai òe na»), 12 eiaha o ia e turu noa atu i ta na metua täne e ta na metua vahine i reira i ta òutou. 13 I te faaòreraa i te parau a te Atua i ta òutou parau i tuuhia mai i haamauhia e òutou na. E e rave rahi ta òutou mea e rave nei mai te reira te huru.

Te viivii o te taata

(Mät 15,10-20)

14 Ua parau atu ra o ia i taua feiä rahi atoà ra ei pïhaì iho ia na ra, ua nä ô atu ra ia rätou: «A faaroo mai òutou atoà na ia ù ia ìte: 15 Aita roa o räpaeàu nei e viivii ai te taata ia ö i roto. O te mau mea rä no roto mai i te taata, o te mea ia e viivii ai o ia. 16 O te taata e tarià to na ei faarooraa, a faaroo mai o ia. 17 E ia haapaì mai ra o ia i roto i te fare, ia vaiiho atu i taua mau taata ra, ua ui atu ra ta na mau pipi ia na i te auraa i taua parau ra. 18 Ua parau mai ra o ia ia rätou: «Te vai ìte òre atoà na òutou? Aita òutou i ìte e, o to räpaeàu nei ia ö i roto i te taata ra, e òre o ia e viivii i te reira, 19 no te mea aore i ö i roto i te âau manaò, i roto rä i te ôpü i te vähi e taa ai te ìno o te mäa ra e faaruèhia atu ra i räpae? 20 E ua nä ô atu ra o ia: «O te mea no roto mai i te taata ra, o te mea ia e viivii ai te taata. 21 No roto mai hoì i te âau taata te manaò ìno, te faaturi, te poreneia, te täparahi taata, 22 te èiä, te nounou taoà, te feìi, te haavare, te tiàâ, te miimii, te faaìno, te teòteò, e te äoaoa: 23 no roto anaè te reira mau mea ìino, o te mea ia e viivii ai te taata.

Manaò.

E teie nei, e Mäòhi Nui e, e faaroo mai i te mau haapaòraa e te mau ture e haapiihia nei ia tätou, e rave ia ora, ia tae tätou i nià iho e ia noaa te fenua, ta te Atua  i höroà mai no tätou e te Mäòhi. E tënä na, e tuu ê atu i te mau mea faufau, e te mau ìno rarahi atoà ra, a färii mäite ai mä te marü i te parau haamauhia i roto i te ora i ora ai to tätou värua. Ei feiä rave tätou i te parau nei, eiaha ei feiä faaroo noa, i te haavare-noa-raa ia tätou iho. Te manaò ra te taata hoê i roto ia na iho, e faaroo to na, e aore i täpeà i to na vaha, i te haavare rä i to na iho âau, e to na iho värua, e faaroo haavare to na. E haamoriraa faufaa òre rä ta na i te Atua Nui Tumu Tahi, tei haapii ia rätou i tei tuuhia mai e te taata anaè ra. Ua haapae hoì i te parau a te Atua, e te täpeà nei i tei tuuhia mai e te taata, mai te horoiraa päni, e te mau âuà ra, e rave rahi hoì te peu mai te reira te huru i ravehia. I te faaòreraa i te parau a te Atua i te parau i tuuhia mai i haamauhia e ana. E rave rahi te mea e ravehia nei mai te reira te huru. Te viivii o te taata  o te mau mea rä no roto mai i te taata, o te mea ia e viivii ai o ia. O te taata e tarià to na ei faarooraa, a faaroo mai o ia. O te taata i faaroo i te parau, e aore o ia i rave, e au o ia i te taata e hiò noa i to na hohoà i roto i te hiò. Te hiò ra hoì o ia ia na iho, e haere atu ra, àromoè noa iho ra to na huru ia na iho i reira ra. O të hiò i roto i te ture tià o te tiàmä, mä te tämau mäite, no te mea eere o ia i te taata e möina noa te parau ia faaroo ra, e taata rave rä o ia i taua òhipa ra, e haamaitaìhia ia o ia i ta na ra raveraa. Teie te tahi mau parau turu no na taiòraa maha tei haapotohia :

-Taramo 15, 5 O tei òre i tuu i ta na moni i te tärahu ra, o tei òre e rave i te tärahu ei faahapa i te taata hara òre ra. O tei nä reira i te rave i taua mau parau nei, e òre roa e âueue.

-Teuteronomi 4, 7 Tei hea hoì ia fenua rahi e fätata mai to rätou atua ia rätou, mai to tätou Atua ra mai i te Fatu e fätata mai ia tätou nei, ia tiàoro noa atu tätou ia na?

-Iatöpo 1, 20 e òre hoì te riri o te taata nei e faatupu i te parau tià a te Atua.

-Märeto 7, 21 No roto mai hoì i te âau taata te manaò ìno, te faaturi, te poreneia, te täparahi taata,

Te puai o te parau a Ietu i teie mahana teie ia reo, i nià i te mau faatere âti-Iuta, ua faaòre tià rä òutou i ta te Atua ra parau, ia ö mai ta òutou parau i tuuhia mai ra. I parau mai ai o Möte e: «E faatura i to metua täne e to metua vahine», e: «O tei faaìno i te metua täne e te metua vahine ra, e täparahi-pohe-roa-hia ia». Te parau na rä òutou: «Ia parau te taata i ta na metua täne e ta na metua vahine:» ia haamoàhia, ta ù atoà nei taoà e faufaahia ai òe na, eiaha o ia e turu noa atu i ta na metua täne e ta na metua vahine i reira. I te faaòreraa i te parau a te Atua i ta òutou parau i tuuhia mai i haamauhia e òutou na. E rave rahi ta òutou mea e rave nei mai te reira te huru, aore roa i au i te Atua Metua.

Teie atoà te tahi parau puai i faahitihia e Ietu, Ua parau ia rätou, nä ô atu ra: «E te mau haavare e, te au mäite na òutou i ta Ìtaia i parau mai ia òutou na, a nä ô mai ai o ia ra e: «Te faatura mai nei te vaha o teie nei feiä ia ù, âreà to rätou âau ra tei te ätea ê ia. E haamoriraa faufaa òre rä ta rätou ia ù, tei haapii ia rätou i tei tuuhia mai e te taata anaè ra. Te hinaaro nei o Ietu ia faataa maite te taata i ta na mau faanahoraa, ia òre ia hahi i mua i te mau faanahoraa a te Atua.

Te faanahoraa a te taata to na ia ôomoraa i ta na i manaò e hanahana ai te Atua, e hanahana anei te Atua i te horoiraa päni te tämäraa âua, e te horoiraa rima. Te manaò rä o Ietu eiaha ia haamorihia teie mau huru faanahoraa, o te mea ra e rave e faaineine i te tämä te âau o te taata, ia tumuhia te aroha e te here o te Atua Nui Tumu Tahi, i roto i te mea tei reira te parahiraa o te ìno e te maitaì.

I parau ai o Ietu ia faaroo i te mau haapaòraa a te ture ta na i haapii ia ora te taata i faaroo e tei ìte i te hanahana o te Atua i roto, e ia tae i nià i te fenua, ta te Atua i höroà i to na nünaa mäìtihia. Tei hea hoì ia fenua rahi e fätata mai to rätou atua ia rätou, mai to tätou Atua ra mai i te Atua Nui tumu Tahi fätata mai ia tätou nei, ia tiàoro noa atu tätou ia na. E tei hea ia fenua rahi i tià ta na mau haapaòraa e te ture, mai te tià i teie atoà nei ture ta ù e tuu atu i mua i to òutou aro i teie nei mahana.

Ite noa ai tätou i to tätou rara-noa-raa, i teie mahana te Atua iho teie e ani mai nei e hiò i te parau tei au i to na manaò, no te mea ia te ture e arataì ra i te parau, na te ìteraa rä e, te mau haereà o te Tumu Nui, te aroha ia e te parau mau i te feiä i haapaò i ta na parau i faaau, e ta na i faaìte mai , oia te raveraa i te mea e mauruüru ai te Atua. Aita te Atua e hinaaro ra ia riro ta na parau ei haamataìtaìraa na te taata, te vai ra rä te haapiiraa e hinaarohia i te taata ia täpeà mai i muri aè i te reira hiòraa, ia au rii i te aniraa a te Atua i te taata ia hiò i te mea e faaroo mai i te mau haapaòraa e te mau ture ta ù e haapii atu ia òutou nei, e e rave ia ora òutou, ia tae òutou i nià iho e ia noaa te fenua, ta te Atua o to òutou mau metua, ta te Fatu e höroà mai no òutou. Te auraa, e òhipa to muri mai i teie hiòraa, e tuhaa ta te taata, o ia anaè të tano e rave i te reira. Aita te Atua e tämata ra i te huti i te manaò o te taata i te tahi pae, aore ra te tahi. Te faaotiraa ta te taata e rave atu, na na noa ihoä te reira e rave, no te mea rä ua hiò e ua faaroo, e äteatea rii atoà ia to na manaò. Mai te peu te ani ra te Atua e hiò i ta na parau, aita te Atua e parau mai ra, e aha te mea e hiò, te tävini hoì, eere ia i te taata au roa i te faaìteìte ia na, e taata moèmoè roa rä, e te hunahuna hoì ia na. E au maitaì ia na te mea i parauhia i te mätamua e, mämahu, eiaha rä i nià i te manaò e, e taata haamä hänoa e te paraparau òre, ia au rä i te manaò e, e taata haèhaa, te marü, e te hinaaro òre ia riro o ia ei vähi e faatano ai te mata o te taata, ia riro hoì ei täuà-parau-raa na te taata.

Te huru taata mau te reira e au i ta Pauro e parau ra : Na na tätou i fänau i te parau mau ra, no to na iho hinaaro, ia riro tätou mai te òho mätamua o te mau mea i hämanihia e ana ra. Te auraa, eita o ia e ìmi i te mata e te tarià o te taata. Te huru te reira o te taata e moè i te vähi taata, eiaha mai te mea e, e täpunipuni noa o ia, aita rä hoê mea e haru ai te mata taata i nià ia na ; eita atoà hoì o ia e ìmi i te räveà ia haapaòhia atu o ia, nä roto änei i ta na huru àta püai, te rarahi o to na vaha, aore ra te tahi huru peu no te huti i te mata o te taata i nià ia na. Te huru taata ia ta te Taramo e haapäpü ra e : O te taata haereà piò-òre, o tei haapaò i te parau tià ra, o tei parau i te parau mau i roto i to na ra âau. Mea maitaì atoà rä to tätou manaò e faataa maitaì : te vai ra te moèmoè, e te vai ra te moè roa. Nä ô paì ia tätou, te taata vaha rarahi, eita o ia e moè iho, eere rä hoì te reira i te huru tei au i te Atua, eere te reira te huru ta te Atua e horoà ra ei hiòraa na te taata. I te tahi aè pae, eiaha atoà tätou e manaò e, te taata të òre roa atu te vaha e hamama rii noa aè, ua hau atu ia i te maitaì. Te tanoraa mau, ia ìte ia te taata i te parau i te taime parauraa, ia ìte hoì i te mämü i te taime mämüraa. Mai te peu aita e maitaì to roto i te tuoro e te pii hua, aita atoà e maitaì to roto i te mämü hua ; âreà te mämahu, oia te marü e te haèhaa, te huru mau ia e au i te tävini o te Atua.

 

Teraì òr. Faatura.

 

Ioane 6.60-69 Tae

 

Tāpati 22 no Âtete 2021.

Tae

Taramo 34.16-23

Tiàoro

16 Tei te feiä parau tià ra to te Fatu mata, e tei ta rätou pure to na tarià. 17 E mata ê rä to te Fatu i te feiä i rave i te ìno ra, e ia òre roa ia manaòhia i te ao nei. 18 Te tiàoro nei te feiä parau tià e te faaroo mai ra te Fatu, e te faaora nei o ia ia rätou i to rätou mau àti atoà ra. 19 Te fätata nei te Fatu i te feiä âau paruparu ra, e te faaora nei o ia i te taata âau taiä. 20 E àti rahi to te taata parau tià ra; e faaorahia rä o ia e te Fatu i taua mau àti atoà ra. 21 Na te Fatu e tiaì i to na ra mau ivi, e òre roa te hoê e ôfatihia. 22 E pohe te paieti-òre i te ìno; e tei riri i te feiä parau tià ra, e mou ia. 23 E faaora te Fatu i te värua o to na ra mau tävini; e òre hoì te hoê e tiàturi ia na ra e faaruèhia.

Iotua 24.1-18

Parau fäfau. 

1 Ua haaputuputu faahou mai ra Iotua i te mau ôpü atoà o Ìteraèra i Tetema; e ua parau atu ra i te feiä paari o Ìteraèra ra, e to rätou hui tävana, e to rätou mau haava, e to rätou feiä töroà atoà ra; ua tià noa mai ra rätou i mua i te aro o te Atua. 2 Ua parau atu ra Iotua i taua feiä atoà ra, Të nä ô mai ra te Atua o Ìteraèra nei o te Fatu, Tei te tahi pae pape to òutou hui-metua i te pärahiraa i mütaa iho ra, o Tera, te metua no Âperahäma, e te metua hoì no Nahora; e ua haamori rätou i te mau atua èê ra. 3 E nä ù hoì i rave mai i to òutou metua ia Âperahäma mai te tahi pae pape mai ra, e ua arataì au ia na nä roto atoà i te fenua atoà nei o Tanaana, e ua faarahi au i to na ra huaai; e ua höroà hoì au i tö na, o Îtaata. 4 E ua höroà hoì au i ta Îtaata, o Iatöpa, e o Ètau; e ua höroà hoì au i te mouà ra o Teira no Ètau ei taoà nä na; haere atu ra rä Iatöpa e ta na mau tamarii i raro i Àifiti; 5 e ua tono atu ra vau ia Möte räua o Âarona, täìri atu ra hoì au ia Àifiti i ta ù i faatupu i roto ia rätou ra, e i muri aè ra, arataì mai au ia òutou i räpae. 6 E ua arataì mai au i to òutou mau metua mai Àifiti mai; e tae mai ra rätou i tähatai; e ua aùaù mai to Àifiti i to òutou mau metua mä te pereoo e te puaahorofenua e tae roa mai ra i te tai ùteùte. 7 E ia rätou i pii i te Fatu ra, ua tuu iho ra o ia i te pöuri i röpü ia rätou e to Àifiti, e ua hopoi mai ra i te miti i nià iho i to Àifiti, täpoì atu ra ia rätou; ua ìte hoì to òutou mata i ta ù i rave i to Àifiti ra. E mäoro aè ra to òutou pärahiraa i te mëtëpara ra. 8 Ua arataì mai au ia òutou i te fenua o te âti-Àmori, tei pärahi i te tahi pae Iörïtäna ra: e ua àro mai rätou ia òutou na, e ua höroà atu vau ia rätou i roto i to òutou rima, e pau roa aè ra rätou ia ù i mua i to òutou aro, ia noaa to rätou fenua ia òutou. 9 Ua tià mai ra Parata a Tipora, arii no Moäpi ra, e tamaì mai ia Ìteraèra, e ua tono atu ra i te veà e tii ia Päraama a Peora, ei tuhi ia òutou: 10 aore rä vau i faaroo ia Päraama; faaora noa atu rä o ia ia òutou, ua ora iho ra òutou ia ù i ta na rima. 11 Haere mai ra hoì òutou i te tahi pae Iörïtäna, e tae mai ra i Ierito; e ua àro mai ra to Ierito ia òutou, e ua àro mai hoì te âti-Àmori, e te âti-Pereti, e te âti-Tanaana, e te âti-Heta, e te Teretati, e te âti-Hevi, e te âti-Ieputi; e ua tuu atu vau ia rätou i roto i to òutou rima. 12 E ua tono vau i te manu pätia nä mua ia òutou, e hee iho ra nä arii toopiti o te âti-Àmori i te reira i mua ia òutou; aore hoì rätou i pau i ta òutou ra òè, e ta òutou ra fana. 13 E ua höroà vau i te fenua no òutou, aore i òhipahia e òutou ra; e te pärahi na òutou i roto i te ôire, aore i patuhia e òutou; e te àmu na òutou i te mäa o te ô vine e te ô ôrive, aore i tänuhia e òutou ra.14 E tënä na, e mataù òutou i te Fatu, e e haamori hoì ia na mä te haavare òre, mä te parau mau: e faaruè e atu i te mau atua a to òutou hui metua i haamori i te tahi pae pape ra, e i Àifiti hoì; e e haamori i te Fatu anaè ra. 15 E e mea ìno ia òutou ia haamori i te Fatu, e faataa na òutou i teie nei mahana i ta òutou e haamori; e o te mau atua änei a to òutou mau metua i haamori i te tahi pae pape ra, e te mau atua änei o te âti-Àmori nei no rätou te fenua ta òutou e pärahi nei? Âreà vau e to ù atoà ra ùtuafare, e haamori ia mätou i te Fatu. 16 Ua parau mai ra taua mau taata ra, nä ô mai ra, Eiaha roa ia parau ia mätou i te faaruè i te Fatu e te haamori i te mau atua èê; 17 o te Fatu hoì to mätou Atua; o ia tei arataì mai ia mätou e to mätou feiä metua mai te fenua mai ra mai Àifiti, mai te ùtuafare i tävini ai ra, o tei rave hoì i taua mau temeio rarahi ra i mua i to mätou mata, o tei tiaì mai hoì ia mätou i te mau haereà atoà i haerehia e mätou ra, e i roto i te mau êtene atoà i ta mätou i haere nä roto ra. 18 E ua tiàvaru te Fatu i te taata atoà i nä mua ia mätou, i te âti-Àmori atoà ra o tei pärahi i ìeìe nei fenua; o te Fatu atoà hoì ta mätou e haamori; o ia hoì to mätou Atua.

Èfetia 5.21-32

Mero.

21 mä te auraro mäite hoì òutou ia òutou iho mä te mataù i te Atua.

Te mau vahine e te mau täne faaipoipo

22 E te mau vahine ra, e auraro òutou i ta òutou iho ra mau täne, mai ta tätou i auraro i te Fatu ra. 23 O te täne hoì to te vahine ra upoo, mai te Metia atoà ra ei upoo ia no te Ètärëtia, e o te ora hoì o ia o te tino ra. 24 E teie nei, mai te Ètärëtia e auraro i te Metia nei, ia nä reira atoà te mau vahine i ta rätou iho mau täne i te mau mea atoà nei. 25 E te mau täne ra, e aroha òutou i ta òutou mau vahine, mai te Metia atoà i aroha i te Ètärëtia, e ua horoà ia na iho ei taui. 26 Ia haamaitaì e ia tämä o ia ia na, i te horoiraa pape, e te parau i aòhia ra, 27 ia tuu o ia ia na i mua i ta na aro, ei Ètärëtia hinuhinu, mä te pöraò òre, e te miòmiò òre, e te mau mea atoà mai te reira te huru: ia moà rä, e te ìno òre. 28 E aroha atoà te mau täne i ta rätou iho mau vahine e tià ai mai ta rätou i aroha i to rätou iho tino ra. O tei aroha i ta na iho vahine, ua aroha ia ia na iho. 29 Aore roa hoì e taata i riri i to na iho tino, âreà e faaàmu, e te faaherehere mäite, mai ta te Fatu i te Ètärëtia nei. 30 E mero hoì tätou no to na tino, no to na ìò, e to na ivi. 31« E no reira e faaruè ai te taata nei i ta na metua täne e te metua vahine, a àti atu ai i ta na vahine, e e riro räua ei hoê.» 32 E parau moè rahi teie, no te Metia rä ta ù e parau nei, e no te Ètärëtia.

Ioane 6.60-69

Tae

60 E rave rahi ta na mau pipi i faaroo i taua parau nei, i nä ô e: «E parau riàrià teie. E ìteä ia vai? 61 Te ìte ra Ietu i roto ia na iho e te ômumu ra ta na mau pipi i taua parau ra, ua parau mai ra ia rätou: «Te mäheaitu ra òutou i te reira? 62 Ahiri paha òutou e ìte na i te Tamaiti a te taata i te hoì-faahou-raa atu i nià i te vähi ta na i pärahi i mütaa iho ra? 63 No te Värua te ora, aita o te tino faufaa. Te parau ta ù i parau atu ia òutou nei, e värua ia, e ora tei reira. 64 Aita rä te hoê pae o òutou nei i faaroo. Ua ìte hoì Ietu mai te mätamua mai ä i te feiä aore i faaroo, e te taata e haavare ia na ra. 65 Ua parau atu ra hoì o ia: «I parau atu ai au ia òutou e, e òre roa te taata e tae mai ia ù nei, ia òre ia horoàhia mai te tae e ta ù Metua ra. 66 Faaruè mai ra te hoê pae rahi pipi a ana i reira ra, aita mai ra i pee faahou ia na. 67 Ua parau mai ra Ietu i te Àhuru mä piti ra: «E haere atoà änei òutou? 68 Ua parau atu ra Timona Pëtero ia na: «E te Fatu, e haere tià mätou ia vai ra? Tei ia òe hoì te parau o te ora-mure-òre ra. 69 Ua faaroo aè nei hoì mätou, e ua ìte hoì mätou e, o òe te Metia, te Tamaiti a te Atua Ora ra.

Manaò.

Ua ateä te taata i te Atua Nui Tumu Tahi, àita e Atua faahou to te taata e tià ia parauhia ua purara, ua rara, e ua faaruè ia faaroo tätou i teie huru parau, èita tätou e färii e tupu mai to tätou riri. Oia mau, eiaha ra ia e mäheaitu i te mea ua ìte te Atua i te hiò i to na mau taata, te vai noa ra ta Na ture e ta na tïtauraa tämau i te taata. Ua tae roa tätou i te hämaniraa i te atua e au ia tätou e ia au i to tätou hinaaro. Ua tae atoà tätou i te haafänau i te hoê Ietu, ia au i ta tätou faanahoraa, eiaha ra ia au i te ôpuaraa faaora a te Atua Metua, teie huru faanahoraa ua papahia i nià i te pohe. A tià anaè, tei pïhaì iho to Atua Nui Tumu Tahi ia òe, tei pïhaì iho atoà to tätou mau Tupuna ia tätou, e i to na mau tävini. Eiaha e mätaù, a mau i te ora, tei reira te hinaaro o te Atua Metua. E faaàraàra te Parau a te Atua i te mata o te taata, eita e faataòto, eita e haamämü, e faatupu ra i te hau, te aroha e te here. E faaòromaìraa roa to te aroha e te hämani maitaì. Ia tuu tätou i to tätou puai i roto i te ôpuaraa faaora a te Atua, ia Atua faahouhia te Atua Nui Tumu Tahi i Mäòhi Nui nei, èi Atua no teie nünaa Mäòhi. Te faufaa ia o teie mau ìrava i ìritihia mai, mai roto mai na taiòraa e maha :

- Taramo 34, 18 Te tiàoro nei te feiä parau tià e te faaroo mai ra te Fatu, e te faaora nei o ia ia rätou i to rätou mau àti atoà ra.

- Iotua 24, 15 E e mea ìno ia òutou ia haamori i te Fatu, e faataa na òutou i teie nei mahana i ta òutou e haamori; e o te mau atua änei a to òutou mau metua i haamori i te tahi pae pape ra, e te mau atua änei o te âti-Àmori nei no rätou te fenua ta òutou e pärahi nei? Âreà vau e to ù atoà ra ùtuafare, e haamori ia mätou i te Fatu.

- Èfetia 5, 30 E mero hoì tätou no to na tino, no to na ìò, e to na ivi.

- Ioane 6, 65 Ua parau atu ra hoì o ia: «I parau atu ai au ia òutou e, e òre roa te taata e tae mai ia ù nei, ia òre ia horoàhia mai te tae e ta ù Metua ra.

I teie parau na Ietu ua faaruè mai te rahiraa pipi, aita mai ra i pee faahou ia na, ua toe noa mai hoê àhuru mä piti, Ua parau mai ra Ietu i te Àhuru mä piti ra: «E haere atoà änei òutou, te reo mai ra o Timona Pëtero ia na: «E te Fatu, e haere tià mätou ia vai ra? Tei ia òe hoì te parau o te ora-mure-òre ra. Ua faaroo aè nei hoì mätou, e ua ìte hoì mätou e, o òe te Metia, te Tamaiti a te Atua Ora ra. I mua i teie fäìraa faaroo na Petero, te tupu nei te haafatataraa i pïhaì iho i te mau manaò e haatumuhia nei e Ietu ia ora te taata. I te mea ua ômumu te mau pipi ia na e ua mätaù, i to Ietu faaìteraa i te parau no te ora mure òre. Ua höroàhia mai te tae ia tätou na roto i teie mau parau e faahitihia nei e Ietu, ua Aroha mai te Atua Nui Tumu tahi ia tätou, no te mau àti e faaruruhia nei e tätou i teie mahana, ua tae roa to tätou òto i roto i te värua o to tätou tino, e te mau puòiraa ivi. Te hinaaro nei te Atua Nui Tumu Tahi ia faatïtïàifaro faahou te Mäòhi i to na oraraa, ia tiàturi faahou ia na, ia rave faahou e ia àtuàtu i te mau maitaì atoà ta te Atua i höroà mai èi maitaì èi ora no na, e ia faatupu faahou te hinaaro mau o te Atua ia na. Ua tae i te tau no te faaoraraa, eiaha ia tarià turituri, ia faaea i te ètaèta, te hinaaro o te Atua Nui Tumu Tahi e faatià faahou ia òe. Tei roto noa to òe ora i te rima o te Atua e i te faatupuraa i to na hinaaro. Aita ta òe e tuhaa i te tahi vähi ê atu i to òe fenua. No reira e te Mäòhi, a rave ta òe iho, a tiàturi ia òe, a tiàturi i te Atua Nui Tumu Tahi, e a faatupu i to Na hinaaro ia ora òe. No reira, te mau parau e faahitihia e Ietu, èi roto noa i te fäìraa faaroo e märamarama ai tätou i te tae i roto i to na auraa e to na faufaa. E tino tätou no te here, e ìò tätou no te aroha, e ivi tätou no te värua, e tamarii ia tätou na te Atua Nui Tumu Tahi, te faataa-è-hia i te ìno ma te faatiàmähia i te reo Mäòhi, ta te fenua e faaìte noa ra ia tätou. E ara ra ia tätou i te huru tatararaa ta tätou e horoà nei i te tae, te faataaê, e te tiàmä, te reira atoà te tahi tumu e hahi ai to tätou manaò, mai te mea te tae mea na roto i te ômumu, te mäoro, e ateä noa te tahi i te tahi, e aha te tae, teie te tahi manaò o te toroèà ia ta te âau e faatoro ia ìtehia te maitaì no na iho, e tei riro èi faahiahiaraa no na o ta na ia raveà e tae o ia i roto i te faataa-ê-raa, ia tiàmä to na hiroà e ta na fäìraa faaroo. Ia òre au ia tae i roto i ta ù fäìraa faaroo Mäòhi mau, e tià anei ia ù ia faataaê i te ìno e àtutu nei i roto i to ù fenua e i roto i te nünaa, te vai faahou rä anei to ù tiàmaraa i te àparau i to ù mau taeaè to mau tuahine, i te ìno e parare nei i nià i to ù fenua e i roto i to ù nünaa. Ia òre tätou ia färii i te Mäòhi èi nünaa herehia e te Atua Nui Tumu Tahi i roto i to na huru, to na hohoà, ta na peu, i mäòhi ai o ia, e ìnaha hoì e ua parau te Atua ua maitaì roa, e aha ia e tià ai ia tätou ia haafaufaa òre i te faaotiraa a te Atua Nui Tumu Tahi. Teie te tahi parauraa na Iotua, 15 E e mea ìno ia òutou ia haamori i te Fatu, e faataa na òutou i teie nei mahana i ta òutou e haamori; e o te mau atua änei a to òutou mau metua i haamori i te tahi pae pape ra, e te mau atua änei o te âti-Àmori nei no rätou te fenua ta òutou e pärahi nei? Âreà vau e to ù atoà ra ùtuafare, e haamori ia mätou i te Fatu. Teie ta Pauro parauraa, 30 E mero hoì tätou no to na tino, no to na ìò, e to na ivi.

 

Teraì òr. Faatura.

Ioane 6.52-59 Märö

 

Tāpati 15 no Âtete 2021.

Märö

Taramo 34.10-15

Mata

10 Ua ère te mau riona âpï i te mäa, e te pohe ra i te poìa ; âreà tei ìmi i te Atua Nui Tumu Tahi, e òre roa e ère i te maitaì. 11 A haere mai na, e te mau tamarii na, e faaroo mai ia ù. E haapii au ia òutou ia mataù i te Atua Nui Tumu Tahi. 12 O vai ia taata i hinaaro i te ora, tei hinaaro ia ìte i te maitaì i to na puè mahana i te ao nei ? 13 A täpeà i to arero i te ìno, e to vaha eiaha ia parau i te parau haavare. 14 E haapae i te ìno, e rave i te maitaì, e ìmi i te hau, e aruaru atu. 15 Tei te feiä parau tià ra to te Atua Nui Tumu Tahi mata, e tei ta rätou pure to na tarià.

Māteri 9.1-6

Te tïtauraa a te paari

1 Ua faatià te paari i to na fare : e ua tarai hoì o ia i nä pou nehenehe e hitu nö na ra. 2 Ua pätia o ia i ta na mau puaa e ua ânoìhia ta na uaina ; e ua faanahonaho o ia i ta na àmuraa. 3 Te tono nei i ta na mau vahine ei arataì mai i te mau taata ; e te pii nei i te mau vähi teitei o te ôire. 4 O tei òre e ìte ra, e färiu mai o ia i ô nei ; e te feiä maua ra, te parau atu ra o ia, 5 E haere mai e àmu i ta ù nei mäa, e inu hoì i te uaina ânoìhia e au ra. 6 E faaruè i te maamaa, ia ora ; e nä te èà haapaò maitaì i te haere.

Èfetia 5.15-20

Haereà.

15 E tenä na, e ara ia tià to òutou haereà, eiaha mai ta te ìte òre ra, mai ta te feiä ìte rä, 16 mä te faaherehere mäite i te taime, no te mea e ànotau ìno teie. 17 E eiaha to òutou ei manaò òre, ia ìte rä òutou i to te Fatu ra hinaaro. 18 E eiaha ia taèro i te uaina e tupu ai te taiàta ra. Ia î rä òutou i te Värua, 19 e te paraparauraa te tahi i te tahi i te taramo, e te himene, e te tire a te Värua ra, i te himeneraa mä te au o te âau i te Fatu ra ; 20 i te haamaitaìraa i to tätou Metua ra i te Atua i te mau mea atoà nei mä te faaea òre, i te iòa o to tätou Fatu ra o Ietu Metia.

Ioane 6.52-59

Faatià faahou

52 Ua märö anaè iho ra te Âti-Iuta rätou rätou iho, ua nä ô aè ra : E aha teie taata e tià ai ia höroà mai i to na tino e àmu ? 53 Ua parau mai ra Ietu ia rätou : Âmene, âmene, e parau atu vau ia òutou, ia òre òutou ia àmu i te tino o te Tamaiti a te taata nei, e ia òre hoì ia inu i to na toto, aore ia e ora i roto ia òutou. 54 O të àmu i to ù tino e të inu i to ù toto, e ora mure òre to na, e na ù o ia e faatià faahou ia tae i te mahana hopeà ra. 55 E mäa mau to ù tino e e inu mau to ù toto. 56 O të àmu i to ù tino e të inu i to ù toto, e tià ia i te àtiraa mai ia ù, e e tià hoì au i te àtiraa atu ia na. 57 Mai te Metua hoì e ora ra, o tei tono mai ia ù nei ra, e te ora nei hoì au i te Metua ; oia atoà të àmu ia ù nei, e ora ia ia ù. 58 O te päne teie no te raì mai. Eere mai te mäna i àmuhia e to òutou hui metua ra, pohe atu ra hoì rätou. O të àmu i teie päne, e tià ia i te ora mure òre ra. 59 I roto i te hoê tunato te parauraa o ia i taua parau nei i te haapiiraa i Täperenaumi ra.

Manaò.

Te Atua iho teie e faahiti nei i te mau parau no te taata, te mata teie e te tärià teie e tītauhia mai ra, no te mea, e Vārua te Atua, e te feiā e haamori ia na ra, e haamori ia ma te vārua e te parau mau e tià ai. Te māramarama noa ra ia tātou e, eere to tātou mata e to tätou tärià ta te Atua e tītau ra, to tātou rā vārua e to tātou âau, e aha ra ia te huru te vārua tē ìte noa ra nei i te mea maitaì, e aore ra, ua paruparuhia i te māa òre. Ia paruparu hoì te taata ra e tïtau ò ia i te mau faufaa e noaa ia na i te itoito, e tïtau-atoà-hia ra ia na ia faaitoito i to na värua no te haapuai i te faaroo, i te mea ta rätou pure tei te tärià ia o te Atua Nui Tumu Tahi.

E au atu ra ua ätea te taata i te Atua ua vai te tahi areä, i to na vai-noa-raa ei areä, eita e haafifi rahi roa i te tereraa o te òhipa, no te mea e roaa òiòi te reira i te tätäìhia. Ia rahi ra te areä, ei reira e riro ai ei äteä. I ô te fifi e haamata ai, ia tupu terä äteä. E ua tae hoì i te fäito, e ätea, aita ia e faaauraa faahou, ua rahi roa ia te ìno i te tupu mai. Tei nià noa tätou i te taò, te vähi rä e anihia ra ia tätou ia hiò, te oraraa ia, e orahia nei e tätou i teie mahana. Àita nei tätou i äteä i te Atua e i to na here e to na aroha.Te auraa, eiaha tätou e faarahi i te parau o te äteä. Mai te peu e, te vai ra, eiaha rä e faarahi i to na parau. Te parau o te ora të faarahi. No reira, aita e tumu e faatano ra ia tätou i te faarahiraa i te parau o te äteä. Mea tano tätou e tütonu i nià i teie mau ìrava tei haapoto i ta tätou taiòraa no teie mahana:

- Taramo 39, 15 Tei te feiä parau tià ra to te Atua Nui Tumu Tahi mata, e tei ta rätou pure to na tarià.

- Materi 9, 5 E haere mai e àmu i ta ù nei mäa, e inu hoì i te uaina ânoìhia e au ra.

- Èfetia 5, 15 E tenä na, e ara ia tià to òutou haereà, eiaha mai ta te ìte òre ra, mai ta te feiä ìte rä,

- Ioane 6, 54 O të àmu i to ù tino e të inu i to ù toto, e ora mure òre to na, e na ù o ia e faatià faahou ia tae i te mahana hopeà ra.

Te mea faufaa, te mea ia e, i mua i te parau no te tino e te toto, rau noa atu ai te nünaa i âmui ua faaroo te taata tätaì tahi mai te mea ra, no na te parau e parauhia mai ra, e parau e tano ia na e to na nünaa. Te auraa, ua nä roto te taata tätaì tahi i to na hiroà tumu i te faaroo e te märamarama i te parau ta te Atua i hinaaro i te parau ia na e te feiä atoà i au mai ia na, eiaha mai te tahi parau tei hurihia, tei àuvahahia, mai te mea rä o rätou iho ta te Atua i hinaaro i te parau i te reira rä mahana. Tano maitaì ai teie reo e faahitihia nei e te päpaì taramo e tei haamanaò mai ia tätou : 15 Tei te feiä parau tià ra to te Atua Nui Tumu Tahi mata, e tei ta rätou pure to na tarià. Te märamarama ra tätou e, i te mau vähi atoà e taiòhia ai teie parau ta Ietu e faahitihia nei, e faaroo mai te taata mai te mea, no na te parau e faahitihia ra, o na ta te Atua e hinaaro ra i te parau, i märö ai te mau âti-Iuta i teie mau parauraa na Ietu, i te mea te ìte ra rätou i te äteäraa i te mau tïtauraa a te Atua. Eiaha atoà rä tätou e hitimahuta, eere teie i te peu âpï i roto i te taata, i mua i te mau parau maitaì atoà, aita te tähitohito i ätea roa atu, mai terä rii ihoä e tupu ra i teie mahana te mau âti-Iuta i te parauraa e : E aha teie taata e tià ai ia höroà mai i to na tino e àmu nä roto i teie reo o te mau âti-Iuta i âmui e i faaroo. E tià ia parauhia ua matara te ùputa o te fenua no te faatià faahouraa ia tae i te mahana hopeà.

Ia parau o Ietu e, 54 O të àmu i to ù tino e të inu i to ù toto, e ora mure òre to na, e na ù o ia e faatià faahou ia tae i te mahana hopeà ra. Te àmu e parau no te maa tei mätauhia e tätou i te faaroo i te mau taime atoà. Ia parau ra tätou àamu e parau faaue teie ia àmuhia te maa e vai ra i nià i te àiraa maa. Te parau atoà nei tätou e àamu, e parau ia no te tahi taata ta tätou e faatià nei, to na huru i te òhipa i tupu. Ia parau o Ietu mai teie te huru e àmu i to ù tino, e inu i to ù toto, te aroha e te here, e inu i te parau tià ia tià faahou tätou. I te mea ua faataahia te taata e Ietu no te Ora Mure Òre, ta Na e faatià faahou ia tä ia tae i te mahana hopeà. Ia parau o Ietu e mahana hopeà, èita ànanahi i teie mahana, i teie täpati aita tätou e parau ua hope ia mahana, aita e parau no te pohe i roto i teie reo no Ietu, e parau ra no te ora no te faatià-faahou-raa. Ia märö te taata i te parau, ua tiàrepu ia te reo i roto i te âau i te ìmiraa i te faufaa o te auraa o teie parau, e täpaò faaìte ia e mau taata ora teie e faaroo mai ra. Èita te âau o te taata pohe e tiàrepu ua taòto ra ua piri te mau ùputa atoà no te färiiraa i te parau e no te faarooraa.

Te nä ô ra ta tätou ìrava : 54 O të àmu i to ù tino e të inu i to ù toto, e ora mure òre to na, e na ù o ia e faatià faahou ia tae i te mahana hopeà ra. No te mea te vai ra te tahi mau tauiraa ta Ietu e  hinaaro nei i te faaö mai i roto i te oraraa o te taata i te märamaramaraa o teie parau, i hinaaro ai o Ietu i teie nei ä e faatoro i te èà, oia hoì e faaìte i te vähi e nä reira tätou i te haere i roto i te tuatäpaparaa no te faatià-faahou-raa ia Mäòhi Nui, i te mea e hotu mure òre ta te Atua Nui Tumu Tahi i roto i teie fenua.

Te värua teie o te parau e räveà teie no te haamataratara i te märamaramaraa o te parau, i te mea ia te manaò i faahiti ai teie parau no te toro èà ; e a haamata atu ai te manaò i te hiò i teie parau, ua toro ê na te èà. Mea maitaì atoà rä ia haapäpühia e, te èà ta te manaò e faatoro nei, to tätou iho âvae të taahi nä reira. Eiaha tätou e manaò e, e tämau noa tätou i te haere nä nià i te tahi èà tei marari ê na i te tahi pae, e faatoro rä tätou i to tätou iho èà. To òe färiiraa i to òe parau, te èà atoà ia ta òe e rave atu ; to òe hoì färii òre i to òe parau, te faatoro atoà ra ia i te èà ta òe e rave atu. I te mau taime atoà, tei roto noa to tätou parau i to tätou rima. No te mea eere na ù e haere no te tahi, eere hoì na te tahi e haere no ù, eiaha vau e faatano i to ù haereà i nià i te pöàra âvae o te taata tei òre i färii i to na parau, eiaha hoì tei òre i färii i to na parau ia faatano i to na haereà i nià i te pöàra âvae o te taata i färii i to na parau, o te riro räua ei haavare. Te mea noa e anihia ra ia tätou, ia vai iho ia i te märamarama ia rave na i ta na òhipa, ia òre ia rave peu-noa-hia i te faarooraa i te Atua.

Te vai nei i ö tätou te tahi räau ïti paari tei parauhia te TOROÈÀ, e hohoà rii i te taofe e àufau maitaì no te pätia òura. Te vähi ta tätou e täpeà mai, eere te räau, te taò rä, no te tähiti i te manaò e parauhia ra, oia hoì no te tïtau i te tahi manaò e tupu ai i roto i te âau i te parauraa a Ietu e 54 O të àmu i to ù tino e të inu i to ù toto, e ora mure òre to na, e na ù o ia e faatià faahou ia tae i te mahana hopeà ra.

E haamauruüru tätou i to tätou Fatu ia Ietu, tei haamanaò mai ia tätou i teie mahana, e tino Mäòhi to tätou ia àmu ia tätou i te maa Mäòhi no te fenua o Mäòhi Nui, e ia inu i te vai Mäòhi, no te mau ànavai no te Mäòhi Nui nei. E mau maitaì ora mure òre teie no te faatià faahou ia tätou i teie mahana e a muri noa atu.

 

Teraì òr. Faatura.

 

 

 

Ioane 6.41-51. Ôhumu.

 

Tāpati 8 no Âtete 2021.

Ôhumu.

Taramo 34.1-9

Ârue

1 E Taramo na Tävita i to na faahuru-ê-raa ia na iho i mua ia Âpïmereta, o tei tiàvaru atu ia na, e ua haere atu ra o ia. 2 E haamaitaì ä vau i te Fatu e òre e faaea. Ia vai tämau mäite ä te haamaitaì ia na i roto i to ù nei vaha. 3 E ârue ta ù âau i te Fatu. Ia ìte mai tei pohe ra i te reira a òaòa atoà ai 4 E haamaitaì tätou i te Fatu, tätou atoà të faateitei i to na iòa. 5 Ua ìmi au i te Fatu, e ua parau mai ra o ia ia ù; e ua faaora ia ù i te mau mea ta ù i mataù ra. 6 Ua hiò atu rätou ia na, e ua haamäramaramahia mai; e aore to rätou mau mata i haamä. 7 Ua pii atu ra taua taata i pohe nei, e ua faaroo mai ra te Fatu; e ua faaora atu ra ia na i to na atoà ra mau àti. 8 Te pätia nei te merahi a te Fatu i te pühapa e àti noa aè i te feiä i mataù ia na, e ua faaora ia rätou. 9 A tämata na ia ìte i te maitaì o te Fatu. E ao to te taata i tiàturi ia na ra.

1 Te mau Arii 19.4-8.

Haere.

4 haere atu ra ra o ia iho na te mëtëpara e hoê aè ra mahana; haere atu ra e ua pärahi iho ra i raro aè i te hoê räau rëtama: ua ani atu ra i te pohe; nä ô aè ra, A tirë; e teie nei, e te Fatu, a rave mai o ia ia ù; aita hoì o ù maitaì i hau i to ta ù mau metua ra. 5 Te taòto noa ra o ia i raro aè i taua rëtama ra, ua rave noa mai ra te hoê merahi ia na, nä ô mai ra, A tià, a àmu. 6 Ua hiò iho ra o ia, e inaha, te vai mai ra te hoê päne iti, tei te pae türuà, ua tunuhia i nià i te àrahu, e te hoê färii pape. Ua àmu iho ra e ua inu, e ua taòto atu ra i raro. 7 Ua hoì faahou mai ra te merahi a te Fatu, ua faatiàià faahou mai ra, o te piti Ia, e ua nä ô mai ra, A tià, a àmu, no te mea, e vähi mäoro tei haapaòhia na òe. 8 Ua tià aè ra o ia, ua àmu, e ua inu, e ua haere atu ra i te itoito o taua mäa ra, e e piti taau aè ra te mahana, e piti taau hoì âruì, e tae atu ra i Hörepa i te mouà o te Atua ra.  

Èfetia 4,30-32

Marü

30 E eiaha e faariri i te Värua Maitaì o te Atua ra i täpaòhia ai òutou e tae noa atu i te mahana oraraa ra. 31 Ia haapae-roa-hia te mämahu òre, e te ìriä, e te riri, e te àvau, e te faaìno, e te täiroiro, eiaha roa atoà ia. 32 Ia hämani maitaì òutou ia òutou iho, mä te âau marü aroha noa, mä te faaòre hoì i te hara te tahi e te tahi, mai ta te Atua i faaòre mai i ta òutou i te Metia ra.

5, 1-2

Te haereà o te mau tamarii a te Atua

1 E teie nei, ei pee òutou i te Atua mai te tamarii herehia ra. 2 Ei haereà aroha to òutou, mai te Metia i aroha mai ia tätou nei, e ua horoà ia na iho ei perotefora, e ei tütia taruru i te Atua ra no tätou.

Ioane 6.41-51.

41 Ua ôhumu iho ra te âti-Iüta ia na, o ia i parau mai e: O vau te päne no te raì mai. 42 Ua nä ô aè ra rätou: Eere änei teie ia Ietu i te tamaiti a Iotëfa ra, tei ìte atoà hoì tätou i ta na metua täne e ta na metua vahine ra? E aha hoì o ia i parau mai ai e: «I pou mai nei au mai te raì mai 43 Ua parau mai ra Ietu ia rätou, nä ô mai ra : Eiaha na òutou e ôhumu noa. 44 E òre roa te taata e tae mai ia ù nei, maori rä ia faatae mai te Metua o tei tono mai ia ù nei ia na, o ia ta ù e faatiàfaahou ia tae i te mahana hopeà ra. 45 Ua päpaìhia hoì i roto i te mau perofeta ra e: E haapii-anaè-hia rätou e te Atua. E teie nei, o tei faaroo e tei haapiihia e te Metua ra, o të tae mai ia ù nei. 46 Aita rä e taata i ìte i te Metua, maori rä o to ô mai i te Atua ra ua ìte o ia i te Metua. 47 Âmene, âmene, e parau atu vau ia òutou: o tei faaroo ia ù nei, e ora-mure-òre to na. 48 O vau te päne e ora ai. 49 I àmu na to òutou hui-metua i te mäna i te mëtëpara ra e pohe atu ra. 50 O te päne teie no te raì mai, ia àmu noa te taata e ia òre roa ia pohe. 51 O vau te päne ora o tei pou mai mai te raì. O të àmu i teie nei päne, e tià ia i te oraraa. O ta ù päne e horoà atu o to ù ia tino, o ta ù ia e horoà ei ora no to te ao.

Manaò.

Te taata e ôtohe, aita to na mata e hiò ra i te vähi ta na e tuu ra i to na âvae. Hiò noa ai to na mata i mua, te faaätea rii mäite noa ra to na âvae ia na i te vähi ta na e hiò ra. Aita o mua, oia te vähi ta te mata e hiò ra, i riro ei vähi ta te âau e tïtau ra, ua riro noa rä ei taime ìmiraa na te manaò i te faatano e te faaòhie i teie hinaaro faaätea ê mai. Aita tätou i parau e, teie haereraa i muri, no te mea te riro ra ia te muri i reira ei vähi e tïtauhia ra ; âreà i teie, te vähi e tïtauhia ra, te àperaa ia i te mea e hiòhia ra, te ìmiraa hoì i te räveà ia òre ia tae i reira, aore ra ia òre ia haamanaòhia mai te mea ta te taata e àpe ra, ta na e òre e hinaaro ra i te ìte. Ia haapotohia, te haamanaò noa mai ra te ôtoheraa i te manaò färii òre o te taata, e no te mea aita i färii, i òhie ai i te ìmi i te ôtoheraa. Eiaha rä tätou e manaò e, i te mau taime atoà, ua riro te ôtoheraa ei pähonoraa i te mea tei òre te manaò i färii. I te tahi taime, aita e iòa ta te taata i tuu i nià i te òhipa ta na e rave ra, na te ìteraa i te òhipa e tiaìhia mai ra ia na ia rave, i haapäpü i taua färii òre no na ra. Mai te mea atu ra e, te tahi mea aita to na e iòa i mua ra, ua riro mai i teie nei ei ôtoheraa ; te auraa, e iòa to na i teie nei. Ia faaäuhia i nià i ta tätou parau no teie mahana, e nä ô ia tätou e, te feiä no rätou te parau ta Atua e faahiti nei, no te mea ua ìte rätou i te hinaaro o te Atua ia rätou, i horo ai i roto i te ôtoheraa e te ôhomuraa ; aore ra no te mea i roto i te oraraa, te reira ihoä te haa, ua haere noa mai, ma te ìte i te hinaaro o te Atua e haapäpü i te tahi mea i vai noa na i roto ia rätou mai te ìte òre rätou i te auraa e te iòa o taua mea ra. Te faaìteraa ia o na taiòraa e maha no teie mahana, ia au i te haapotoraa :

- Taramo 34, 3 E ârue ta ù âau i te Fatu. Ia ìte mai tei pohe ra i te reira a òaòa atoà ai

- 1 Te mau Arii 19, 8 Ua tià aè ra o ia, ua àmu, e ua inu, e ua haere atu ra i te itoito o taua mäa ra, e e piti taau aè ra te mahana, e piti taau hoì âruì, e tae atu ra i Hörepa i te mouà o te Atua ra.  

- Èfetia 4, 32 Ia hämani maitaì òutou ia òutou iho, mä te âau marü aroha noa, mä te faaòre hoì i te hara te tahi e te tahi, mai ta te Atua i faaòre mai i ta òutou i te Metia ra.

- Ioane 6, 43 Ua parau mai ra Ietu ia rätou, nä ô mai ra : Eiaha na òutou e ôhumu noa.

Te parau ta tatou e farerei nei i teie mahana, to Ietu ia faarooraa i te mau manaò ôhumu mai roto mai i te mau taata ta na i faaàmu temeio na, e te mau taata ta na i aroha.Te ôhumu nei rätou O ia i parau e, O vau te pane o te raì mai, ua vai noa te mau manaò o te mau Ati Iuta i nià i te huru parauraa e faahitihia nei. Eiaha ra i nià i tera manaò, e tuatapapa i te huru no te parauraa a Ietu. Te täòtià nei te mau taata ôhumu i to rätou manaò i nià i te oraraa o Ietu, e tamaiti na Iotefa e na  Maria.

I mua i te mau parau tià òre ta na e faaroo ra, e pii o Ietu i teie feia e ôhumu ra, eiaha na e rave i teie òhipa. Oia hoì a faaea na i te parau noa i te mau manaò aöaöa e te ìte òre, to na auraa. E òhipa apî teie e tupu nei i te faaìteraa a Ietu, e aita e färiihia nei teie parau  te pane no te rai mai.Te manaòraa o te mau Ati Iuta, eita e tià ia Ietu ia faahiti i teie huru parau. Eiaha ra tätou ia manaò e, a tahi roa ra teie òhipa a tupu ai, i te tau no Mote ua rave na te mau metua o te mau Ati Iuta i teie òhipa, no te pape e te maa òre i roto i te metepara ( Etoto 16:7;17:3 Numera 11:1). I te mato no Meripa, to te Atua ia horoàraa i te pape, faaea iho ra te ôhumu a te nünaa, e i te Metepara te mäna ia. Noa atu ra teie mau òhipa e tupu nei, e puai faahou o Ietu i te faaìteraa i te mau hinaaro o te Atua. Eita o Ia e haaparuparu, e aroha nei ra o Ia, i te feia e ôhumu noa nei ia na. I to Ietu faarooraa i teie mau parau rahi roa atu ra to na haapäpüraa e o Ia iho te tumu  no te faatià i te mau taata ia tae i te mahana hopeà.Te mau taata ta Ietu e parau nei, mauti ra ia tei faataehia mai ia e to na Metua ia tiàturi i te òpuaraa e faatupuhia nei no te maitaì e te ora. I te mea i te tau o te mau perofeta, e mau taata haapiihia rätou e te Atua, o tei faaroo e tei färii i taua mau haapiiraa, e ìte ia rätou i te faufaa no te faaâpïraa e ravehia nei e Ietu. Eita ra ia e tupu i te ôhumuraa faufaa òre, tei ôhumu ra, aita ia i maramarama i te faaâpïraa e titauhia nei e te Tamaiti a te Atua.Te tuu nei o Ietu i to na mau manaò i nià i te hoê faito ia ìtehia te parau a te Atua, i ta na faaiteraa. Ia tià i te mau taata e faaroo ia na, ia riro atoà ei pärahiraa tumu no te mau hinaaro o te Atua. No te mea o Ia tei ìte i te Metua, e no o mai o Ia i te haereraa mai, no te faatià i te mau taata i roto i te ora mure òre. E ia fäî ia te mau taata atoà e, o Ia te pane e ora ai. E taua pane ra mauti ra ia to na ia tino.Teie parau ta Ietu, eita ia i te hoê manaò faaäu i te âau taata, te hoê ra tïtauraa i te taata ia tiàturi, tei tiàturi ra e faatià- faahou-hia rätou i te mahana hopeà ra.Te faufaa ia e noaa i te mau taata ia färii e, o Ietu te pane ora no te rai mai. Teie pane eita ia i te mono i te mäna i horoàhia e te Atua i te mau hui tupuna o Iteraera i te  metepara, e pohe atu rätou, ma te ite òre te fenua no te tapu.

Te hinaaro tumu o Ietu i roto i te mau manaò ta na e faaìte nei, ia tià ia Na ia faatià-faahou i to na nunaa i roto i te maitaì no te ora. Eiaha ratou ia faaea noa i nià i te parau no te mäna, te mäna eita ia e arataì ia ratou i roto i te ora mure òre.Area rä te pane ta Ietu e parau nei e aratai ia, ia ratou i roto i te  tiàfaahouraa e te ora mure òre.Te ìte nei o Ietu i te paruparu o to na nünaa i mua i teie parau, e te faaitoito nei ra O ia i to rätou tiàturiraa.

I te tau o Eria a ani ai o ia i te pohe i mua i te aro o te Atua, i te turituri o  to na nunaa e te haapaò òre.Aita te Atua i färii i teie aniraa.Te ani nei o Eria i te pohe, te parau nei o te Atua ia na a tià a àmu, i te mea e vahi maoro tei haapaòhia no òe.Te päpü nei ia, ia tätou e, te hinaaro o te taata te pohe ia, àreà ra to te Atua hinaaro te ora ia o te taata tei tiàturi Ia na.

Oia atoà ia  te òhipa ta Ietu  e faaite nei i roto i ta tätou nei taioraa,TE FAATIAFAA- HOU-RAA, i to na nunaa, mäìtihia.

Te horoà nei o Ietu e piti raveà e TIAFAAHOU tei paruparu,

1) Te ìteraa ia i te haapiiraa a te Atua.

2) Te färiiraa ia e o Ietu te pane no te raì mai.

Te faufaa e noaa mai i roto i na raveà e piti nei, mauti ra ia te ORA MURE ORE. E parau teie no te färiiraa i te ora ta te fenua e höroà noa nei i te nünaa maìtihia e te Atua Nui Tumu Tahi.

TE TIAFAAHOURAA, E TE ORA MURE ORE, O TE PARAU MAITAÌ IA TE REIRA NO TE HAU O TE ATUA.

Mea araaraa maitaì te manaò ta Ietu e heheu ra i mua ia tätou i teie mahana.Te vai ra te ìteraa i te parau tei riro o ia ei veà, e te vai ra te tiàturiraa i te Metua i tono mai ia na. Mai te peu e faaea noa te taata i nià ia Ietu Metia no ta na parau, aita to na e ora, i tupu ai te ôhumu a te mau Ati-Iuta.Te ìte i te parau tei òre i faatupu i te tiàturiraa i te Metua, e ìte faufaa òre ia.Te tiàturiraa hoì i te Atua, eere ia te fäì-noa-raa e, te vai ra te Atua, te tiàturi-atoà-raa rä i te mau mea atoà ta te parau a te Atua i faatupu, ua horoà mai o Ia i te mäna, no te faaitoito ia i te tino o te nunaa Iteraera. E ua horoà atoà mai ra o Ia i te pane no te raì mai, ei FAATIA-FAAHOU-RAA IA, te mau taata atoà e tiàturi nei i te ORA MURE ORE. No te mea te reira te täpaò mätamua roa ta te Atua i hinaaro i te taata ia ìte o ia, te reira te täpaò hanahana o te maitaì o te Atua, te täpaò no to na aroha e to na here. Ia parau o Ietu e, O ta ù päne e horoà atu o to ù ia tino, o ta ù ia e horoà ei ora no to te ao.

I teie huru faaòhiparaa na Ietu i te parau no te faaìte ia i te here e te aroha o te Atua Nui Tumu Tahi i te taata, te tïtau atoà nei o ia i ta na mau pipi no terä tau e no teie mahana, ia haamanaò nä roto i te hotu o te fenua, te tïtona änei, te ùru änei, te taro änei, te mäniota änei, te pape vine änei, te vai haari änei, te vai mäòhi noa änei, etv… i te ôpuaraa faaora a te Atua no te taata e te rahuraa, e ia ìte te âmuitahiraa maru-metia, e nä roto atu i teie mau täpaò e riro ai te Atua ei Atua  Metua no rätou, e rätou hoì ra, e nünaa ia e mau tamarii ia nä te Atua. Teie te faaauraa ta Ietu i haere mai e faaâpï, tei riro noa te hotu o te fenua ei täpaò faaìteraa i te rahi no te here e te aroha o te Atua i te taata e te rahu.

 

                                                                                                         

Terai òr. Faatura.