Ioane 11.1-45. Aho.

 

Tāpati 26 no Mäti 2023.

Aho.

Taramo 130

1 Tire a te Moruta. No roto i te vähi hohonu to ù tiàororaa atu ia òe, e te Fatu.

2 E te Fatu, e faaroo mai òe i ta ù reo, e färiu mai i to tarià i ta ù e ani atu.

3 Ahiri òe, e te Fatu, e täpaò na i te mau hara nei, o vai, e te Fatu, te taata e mau?

4 Tei ia òe rä te faaòre i te hara ia mataùhia hoì òe ra.

5 Te tiaì nei au i te Fatu, Ta ù värua teie e tiaì nei, e te tiàturi nei au i ta na parau.

6 Te tiaì nei ta ù värua i te Fatu, e iti to te mau faèhau tiaì i te poìpoì ra; oia ä ia e iti to te mau faèhau tiaì i te poìpoì ra.

7 Ia tiàturi ä Ìteraèra i te Fatu, tei te Fatu hoì te aroha, e tei ia na hoì te ora hau ê ra.

8 E riro o ia i te faaora ia Ìteraèra i ta na atoà ra mau hara.

Ètetiera 37.12-14

12 E teie nei e tohu òe, e nä ô atu ia rätou, Të nä ô mai ra te ATUA ra o te Fatu: Inaha, e au mau taata e, e hüaì au i to òutou mau tänuraa, e ua arataì mai ia òutou mai raro mai i to òutou mau âpoo ra, e ua arataì au ia òutou i te fenua o Ìteraèra.

13 E ìte hoì òutou e, o te Fatu vau, ia heheu vau i to òutou mau âpoo, e au mau taata, e ia arataì mai ia òutou mai raro mai i to òutou mau âpoo.

14 e nä ù e tuu i ta ù aho i roto ia òutou, e e ora ia òutou: e nä ù e haamau ia òutou i to òutou iho fenua: ei reira òutou e ìte ai e, nä ù na te Fatu i parau, e nä ù hoì i rave te parau mai ra te Fatu.

Rōma 8.8-11

8 E teie nei, te feiä i au i ta te tino ra, e òre roa te Atua e mauruüru ia rätou.

9 Aore rä òutou i au i ta te tino ra, te au nei rä i ta te Värua ra, no te mea te pärahi ra te Värua o te Atua i roto ia òutou. Te ère ra rä te hoê taata i te Värua o te Metia ra, eere ia o ia i te taata no na.

10 E tei roto te Metia ia òutou ra, te ora nei ia te Värua i te parau tià, ua pohe mau rä te tino i te hara.

11 Te pärahi ra to na Värua i roto ia òutou to tei faatià ia Ietu i te poheraa ra, o tei faatià i te Metia i te poheraa ra, na na atoà ia e faaora i to òutou mau tino pohe ra i to na Värua i pärahi i roto ia òutou na.

Ioane 11.1-45.

Te poheraa o Rätaro

1 Te pohe ra te hoê taata i te maì o Rätaro te iòa, no Pëtänia no te ôire o Märia e ta na tuaana o Märeta ra.

2 O Märia i faatähinu i te Fatu i te räau noànoà ra, e tei horoi i ta na âvae i to na iho ra rouru, no na te tuaane i pohe i te maì ra o Rätaro.

3 Ua tono atu ra nä tuahine i te veà e faaìte ia Ietu, nä ô atu ra: «E te Fatu, inaha, te taata here na òe ra, ua pohe i te maì.

4 E ìte aè ra Ietu i taua parau ra, ua nä ô aè ra: «E òre te reira maì e riro ei maì pohe; ia haamaitaìhia rä te Atua, e ia haamaitaìhia hoì te Tamaiti a te Atua i te reira.

5 E aroha Ietu ia Märeta e ta na taeaè, e ia Rätaro hoì.

6 Ìte aè ra e ua pohe o ia i te maì, pärahi iho ra Ietu i taua vähi ra e ruì piti.

7 E muri aè ra, ua parau atu ra o ia i ta na mau pipi: «Mai haere ä tätou i Iutea.

8 Ua parau mai ra te mau pipi: «E Rapi, i tïtau iho nei hoì te âti-Iüta ia òe e pëhi i te ôfaì, e te haere faahou nei ä hoì òe i reira?

9 Ua parau atu ra Ietu: «Eere änei hoê àhuru mä piti hora i te ao hoê nei, e ia haere hoì te taata i te ao ra e òre ia e turori, no te mea ua ìte o ia i te märamarama o teie nei ao.

10 Âreà ia haere rä o ia i te ruì ra, e turori ia, no te mea aita e märamarama.

11 I nä reira atu ra o ia, e oti aè ra, ua parau atu ra o ia ia rätou: «Ua taòto to tätou hoa o Rätaro, te haere nei rä vau e faaära ia na.

12 Ua parau mai ra ta na mau pipi: «E te Fatu, te taòto ra o ia e ora ia.

13 No te pohe te parau a Ietu i parau atu ra, i manaò rä rätou e no te taòto mau ta na i parau mai ra.

14 Ua faaìte hua atu ra Ietu ia rätou: «Ua pohe roa Rätaro.

15 Te òaòa nei au ia òutou i te mea aore au i reira ia faaroo hoì òutou. Mai haere rä tätou ia na ra.

16 Ua parau aè ra Toma, oia hoì Titimo ra, i te mau te taeaè pipi no na ra: «Mai haere atoà tätou ia pohe atoà atu  

O Ietu te tiàfaahouraa e te ora

17 E tae atu ra Ietu ra, ìte aè ra o ia e ruì maha atu ra o ia i roto i te âpoo.

18 Tei pïhaì iho i Pëtänia i Ierutarëma, e au i te àhuru mä pae o te tetatia ra.

19 Ua haere mai ra te âti-Iüta e rave rahi ia Märeta räua o Märia ra e haamähanahana ia räua i to räua tuaane i pohe ra.

20 Ìte aè ra Märeta e, te haere mai nei Ietu, haere atu ra o ia e färerei aè ra ia na; âreà Märia, pärahi iho ra ia i roto i te fare.

21 Ua parau atu ra Märeta ia Ietu: «E te Fatu, àhiri òe i ô nei, e òre e pohe ta ù tuaane.

22 Ua ìte rä vau i ta òe e ani atu i te Atua ra, na te Atua ia e horoà mai na òe i teie nei ä.

23 Ua parau mai ra Ietu ia na: «E tiàfaahou mai ia to tuaane.

24 Ua parau atu ra Märeta ia na: «Ua ìte au e, e tiàfaahou mai ä o ia ia tae i te tiàfaahouraa i te mahana hopeà ra.

25 Ua parau mai ra Ietu ia na: «Tei ia ù te tiàfaahouraa e te ora, o të faaroo mai ia ù ra, pohe noa ä o ia e ora ä ia.

26 E te taata ora atoà nei e faaroo ia ù ra, e òre roa atu ia e pohe.

27 Ua faaroo òe i te reira? Ua parau atu ra o ia ia na: «E te Fatu, ê, ua faaroo vau e o òe te Metia te Tamaiti a te Atua o të haere mai i te ao nei ra.

Te òtoraa Ietu

28 E oti aè ra taua parau ra, hoì mai ra o ia e parau atu ra ia Märia i ta na taeaè, ômumu atu ra e: «Terä aè te Òrometua, e te parau mai ra ia òe.

29 E ìte aè ra Märia i te reira, tià aè ra o ia i nià i reira ra, haere atu ra ia na ra.

30 Aore ä Ietu i tae i roto i te ôire, tei te vähi ä i färerei atu ai Märeta ia na ra.

31 E te âti-Iüta i pärahi i roto i te fare i te haamähanahanaraa ia Märia ra, ìte aè ra ia na i te tià-òiòi-raa i nià, e te haereraa atu i räpae, ua pee mai ra ia na, nä ô aè ra: «Te haere atu ra o ia i te menema ra òto ai.»

32 E tae atu ra Märia i taua vähi tei reira Ietu ra, ìte atu ra ia na, haamaìri iho ra o ia i raro i ta na pae âvae, nä ô atu ra ia na: «E te Fatu, àhiri òe i ô nei, e òre ta ù tuaane e pohe.

33 E ìte aè ra Ietu ia na i te òtoraa e te âti-Iüta hoì i haere atoà mai ra, ûuru iho ra o ia e horuhoru atu ra ta na värua,

34 nä ô atu ra: «Tei hea o ia i te vaiiho-raa-hia e òutou? Ua nä ô mai ra rätou ia na: «E te Fatu, a haere mai a hiò.

35 Òto iho ra Ietu.

36 Ua parau iho ra te âti-Iüta: «A hiò na i to na aroha ia na.

37 Ua nä ô aè ra rä te hoê pae o rätou: «E òre änei e tià ia na ia faaora mai i te pohe o teie nei taata, o tei faaora hoì o ia i te taata matapö ra?

Ua ora faahou mai o Rätaro

38 Ua ûuru faahou iho ra Ietu i roto ia na iho, e tae atu ra i te menema ra: e ana, e ôpanihia te ùputa i te hoê ôfaì.

39 Ua parau atu ra Ietu: «A huri ê atu na i te ôfaì. Ua parau mai ra Märeta, te tuahine o taua taata i pohe ra:  «E te Fatu, ua hauà i tënä na, o te ruì maha hoì teie.

40 Ua parau atu ra Ietu ia na: «Aore au i parau atu ia òe e, i faaroo òe ra e ìte òe i te mana o te Atua?

41 Ua huri ê atu ra rätou i te ôfaì i taua vähi i vaiihohia ai tei pohe ra, hiò atu ra te mata o Ietu i nià, e ua parau atu ra: «E ta ù Metua, e haamaitaì au ia òe, o òe i faaroo mai ia ù nei.

42 Âreà vau, ua ìte au e e faaroo mai ä òe ia ù, no teie nei rä mau taata e haaàti mai ia ù nei i parau atu ai au, ia faaroo rätou e na òe au i tono mai.

43 E oti aè ra taua parau ra, ua faateitei aè ra i ta na reo, ua pii atu ra: «E Rätaro, a haere mai i räpae.

44 Ua haere mai ra taua taata i pohe ra i räpae, ua täamuhia nä rima e nä âvae, i vehihia hoì te mata i te àhu. Ua parau atu ra Ietu ia rätou: «A tätara, e tuu atu ia na ia haere na.

45 E te âti-Iüta i haere mai ia Märia ra, o tei ìte i ta Ietu i rave ra, e rave rahi ia tei faaroo ia na.

Manaò.

Te faufaa o te reo o te maniania ia e ö i roto i te tarià, o te fauraò ia no te ìte, te märamarama, te paari, o te nünaa ta te Atua i mäìti. Ta te värua ia o te reo e haamanaò noa nei ia tätou, te hinaaro tumu ia o te Atua Nui Tumu tahi, tei hinaaro i te Atua ra, ua faatupu ia i te hinaaro o te Atua, o tei ìte ia i to na hanahana, tei here i reo Mäòhi èere ia no to tätou noa manaò taata, no te faatupu rä i te hinaaro o te Atua. Ia parauhia no te pohe te faahohoàraa ia i te àroraa tumu e te tuutuu òre ta tätou e ìte nei i roto i to tätou oraraa i te ao nei, te maì / te maì òre, te òaòa/ te peàpeà, te parau tià/ te parau tià òre. E òhuraa te reira no te oraraa o te taata, e tereraa no te oraraa ta na i mätau. I roto rä i te reira faanahoraa, te vai nei te taime e fati roa ai te taata, e òre ai o ia e tià faahou ai, no te mea, aita to na e püai faahou, aita e itoito faahou. E pohe te reira. Mai te taata i fati i mua i te maì, te poìa, te moni, te nä ô nei tätou e : ua pohehia terä taata i te maì ; ua pohe roa te tamarii i te poìa ; ua pohe to na manaò i te moni. Te tahi teie türamaraa no teie taò te pohe, ia märamarama tätou i te faufaa o te ora, te aho i roto ia tätou no te Atua ta Na i haapüaì teie ia e parauhia nei te Mehoi, te Aho o te Atua. No te hoê taata maì, ua riro te taime e faaruê mai ai te maì ia na èi täpaò no to na ora, i te mea e, i reira ra, ua matara mai o na aita o na i mau faahou i roto i te haavïraa a te maì. Èi haapotoraa i te manaò, e na ò noa tätou e, te ora ra mea tià ia, âreà tei pohe ra mea taòto ia. Te ìte ra ia tätou i te mea e hinaarohia ia tätou : ia tià te parau, ia tià te haereà, ia tià te òhipa, ia tià te ora. Te riro atoà nei rä te pohe no te taata tei ìte e, e Atua to na, èi haamanaòraa ia na e, ua faaruè mai te Atua ia na, no te mea, ua faaruè o na i te Atua ; mai te pö tei faaìte mai e, ua moè te ao. O te faaìteraa ia a na taiòraa e maha i faataahia no teie mahana haamoriraa, i roto i na hiòraa e piti e faaìtehia nei te pohe e täpaò faaìte i te mau àti no te taata hoê, e no te hoê nünaa ia faaruru i te mau àti, te pohe ra èi täpaò no te èreraa i te ora. Teie te haapotoraa :

-Taramo 130, 6 Te tiaì nei ta ù värua i te Fatu, e iti to te mau faèhau tiaì i te poìpoì ra; oia ä ia e iti to te mau faèhau tiaì i te poìpoì ra.

-Ètetiera 37, 14 e nä ù e tuu i ta ù aho i roto ia òutou, e e ora ia òutou: e nä ù e haamau ia òutou i to òutou iho fenua: ei reira òutou e ìte ai e, nä ù na te Fatu i parau, e nä ù hoì i rave te parau mai ra te Fatu.

-Roma 8, 11 Te pärahi ra to na Värua i roto ia òutou to tei faatià ia Ietu i te poheraa ra, o tei faatià i te Metia i te poheraa ra, na na atoà ia e faaora i to òutou mau tino pohe ra i to na Värua i pärahi i roto ia òutou na.

-Ioane 11, 42 Âreà vau, ua ìte au e e faaroo mai ä òe ia ù, no teie nei rä mau taata e haaàti mai ia ù nei i parau atu ai au, ia faaroo rätou e na òe au i tono mai.

Te parau e färereihia nei e tätou, e parau ia no Rätaro ta te värua o te iòa e faaìte ra ua manaò mai te Atua, e maì te haamataraa te parau i tae i roto ia Ietu, te parau no te maì ra te vai ra ia te raveà. Teie ra te iòa e te huru o te maì to na tupuraa tei èrehia ai i roto i te faaìteraa a te päpaìraa a Ioane. E naò noa ia i te parauraa e maì teimaha teie i tae ai te parau i roto ia Ietu taata ta òe i here te maìhia ra. No Ietu e maì ora teie ia haamaitaìhia rä te Atua, e ia haamaitaìhia hoì te Tamaiti a te Atua i te reira. Tei te òire ra no Petepara o Ietu e ta na mau pipi i tae ai te parau peàpeà e te maìhia ra, to na hoa o Rätaro ta na i here. Ua färii aè ra o Ietu i taua parau ma te ru òre i te täpapa, faaea faahou atu ra rätou i reira e piti ruì. I taua maì ra pohe roa iho o Rätaro, e maha ia mahana i muri aè to Ietu taeraa  i Pëtänia te òire tei reira te àti, i te ùtuafare o na tuahine o Märeta e o Maria. Tei teie vahi te tupuraa ta tatou parau.

Te mau pipi i mua i teie parau e hoi faahou rätou i Pëtänia, te peàpeà nei rätou i te mea ua ìmi na te mau Âti-Iuta e pëhi ia Ietu i te ôfaì. I te mau òhipa tià i ravehia e Ietu i reira, i to na parauraa e, O VAU TE MÄRAMARAMA O TE AO NEI, O VAU TE TIAI MAMOE MAITAI. No te mau Âti-Iuta hoê noa te tià e parau i teie mau parau, o te Atua anaè a-ti-ra atu ai. Teie ra aita te mau Âti-Iuta e ìte nei i roto ia Ietu te òhipa faaora a te Atua. Eita ra o Ietu e paruparu i mua  i teie mau manaò, e faatupu ra O ia  i te mau òhipa atoà e ìtehia ai te AHO o te Atua.

Märeta e o Maria, ua ìte raua e te vai nei te ORA i roto i te Fatu ra ia Ietu, i te vai oraraa o to raua tuàne. Teie nei ra ua pohe o ia, aita ia e raveà faahou ua hauà, ua tahe, oia hoi, tei roto i te hoê faanahoraa eita e tià ia rapaauhia. To na auraa ra e tiaì ia i te tau hopeà i reira e faatià faahouhia ai. Teie àti i färereihia                                                                                                                                                                                                    e raua na te mau hoa ia i tämahanahana, ua pühapa roa te tahi pae i reira i te òtoraa, ia au i te peu Âti-Iuta.  Ietu i mua i te pohe o Rätaro e rave O ia i te hoê òhipa mätau-òre-hia e te taata i te hiò i te mau mahana atoà. Ma te faaìte atoà i to na òto i mua i te pohe o te hoa ta na i here. Ia faaroo tätou i te mau reo o Ietu i roto i ta tätou taiòraa te faaìte ra ia e, te vai nei te hoê ORA, i o mai i te pohe, e a òre ra i o mai i to tätou mau menema. Teie taua mau reo no Ietu ra,

ir.11 ua taòto to tatou hoa o Rätaro, te haere nei ra vau e faaära ia na,

ir.15 te òaòa nei au ia òutou, i te mea a òre au i reira ia faaroo hoi òutou,

ir.25 tei ia ù te tiàfaahouraa e te ora, o te faaroo mai ia ù ra, pohe noa oia e ora a ai,

ir.26 e te taata ora atoà nei e faaroo ia ù ra,

ir.39 a huri ê atu i te ôfaì,

ir.41 e ta ù Metua, e haamaitaì au ia oe, o òe i faaroo mai ia ù nei,

ir.43 ua pii atu ra, e Rätaro, a haere mai i rapae.

Na roto i teie na reo e 7 no Ietu, te haapäpü nei ia  O ia  i te òhipa ta te Atua e rave i mua i te mau taata atoà e àua haaàti nei i te menema o Rätaro .Te parau e tià, ia parauhia i o nei, eita na te pohe e faaäpiäpi te òhipa a te Atua, o te Atua ra te tumu o te AHO. Te riro nei te menema o Rätaro e vahi òtoraa na te fetii, e te mau hoa, e na Ietu iho. Te òto atoà nei o Ietu eiaha no te pohe o Rätaro, no te mau taata atoà ra te òre e tiàturi nei i te AHO a te Atua e horoà nei i te mau vahi atoà. Ta Ietu ia e òto nei i mua i teie pohe i te mea, te fatata atoà mai ra te hora e aro ai O ia ia hate. Na vai ia te reira e faaìte ia tätou, na to na ia huru i mua i te menema o Rätaro,

ir.33 ùuru iho ra o ia e horuhoru atu ra ta na varua, te faaìte nei ia o Ietu i to na täpaò mauruüru òre i mua i te feia e òto nei no to rätou paruparu i mua i te pohe. Aita ia rätou e tiàturi nei e, te parau hopeà eita ia tei te pohe, tei te Atua ra.

ir.35 òto iho ra o Ietu, no te mea te pohe o Rätaro, o to na iho ia pohe. Te òto atoà nei ra O ia  no te faaroo tutaperepere o to na mau hoa fatata ia na. Te faaìte atoà nei ra o Ietu i te tahi huru taata to na, ma te tiàturi i te òhipa ta to na Metua e faatupu i roto i ta na aniraa.

ir.38 ua ùuru faahou iho ra Ietu i roto ia na iho, i to na tiàraa i mua i te menema o to na hoa, ma te täpeà i to na òto  i roto i to na àau, e to na mauruüru òre i te mau Âti-Iuta i to rätou faaroo  päpu òre, i te òhipa ta te Atua e faatupu i mua i to rätou mata, I faaìte roa ai o Ietu i to na hoêraa, e te faaea tämauraa mai to na Metua i roto ia na .

Na teie na täpaò e toru e faaìte ia tätou e, te ûàna nei te òto o te Atua i to te ao nei. I ani roa ai o Ietu i to na Metua e, E TA U  METUA  E  HAAMAITAI  AU  IA  OE O OE  I  FAAROO  MAI IA  U.

I faaroohia ai teie reo to Ietu i te piiraa e, E RÄTARO, HAERE MAI  I  RAPAE, oia hoì eiaha e faaea faahou i te vahi no te pohe e haere mai ra i te vahi no te feia  ORA. Te mau vahi atoà tei reira o Ietu i te piiraa ia tätou, e tià ia parauhia e, e ORA to reira. O teie ia ta Ietu e faaìte nei i mua i te mau Âti-Iuta, e ia tätou i teie mahana. Te pii atoà nei o Ietu ia tätou ia haere atoà tätou i rapae i te mau òhipa e haafifi ra ia tätou te tupuraa no to tätou faaroo. E reo teitei teie no Ietu ia ìte tätou e te hinaaro atoà mai ra o Ietu ia tätou no te faatupu i te mau òpuaraa a te Atua. E taua òpuaraa ra to tätou ia faaìteraa i te paari o to tätou faaroo i mua i te tïtauraa a te fatu, no te haereraa i mua. I te mea te reo o ta Ietu e parau nei e, e ta ù Metua, o to tätou atoà ia teie parauraa i mua i te Atua. O te tià ia e faaìte e te rahi mau nei to tätou faaroo i te Atua. Tupu atu ra te òhipa a te Atua i te rahi, i te mea e rave rahi tei tiàturi i to Ietu faatià faahouraa tei pohe i roto i te Aho. Oia atoà ia tätou, te faatià atoà nei o Ietu ia tätou.

 

Teraì or. Faatura.

 

 

Ioane 9.1-41 Mata tià.

 

Tāpati 19 no Mäti 2023.

Mata tià.

 

Taramo 23

1 Taramo na Tävita. O te Fatu to ù tiaì, e òre roa vau e ère.

2 Te faataòto nei o ia ia ù i te mau âua heeuri ra, te arataì nei o ia ia ù nä pïhaì iho i te pape atatià ra.

3 E faahoì o ia i ta ù värua. E ärataì o ia ia ù nä te èà tïtïàifaro, no te hanahana o to na ra iòa.

4 E ia haere noa atu vau nä te peho ra o te maru pohe, e òre ä vau e mataù i te ìno, tei pïhaì-atoà-iho òe ia ù:   to räau e te tootoo tei haamähanahana mai ia ù.

5 Ua faanahonaho òe i te tahi àmuraa mäa na ù i mua i te aro o ta ù mau ènemi; ua faatävai òe i ta ù upoo; e te î nei ta ù âuà.

6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

1 Tämuera 16.1-13.

Faatähinuhia.  

1 Ua parau mai ra te Fatu ia Tämuera, E òto ä òe ia Taura, tei faaruèhia o ia e au eiaha o ia ei arii no Ìteraèra? A faaî na i to färii i te monoì, e haere ia Iete i Peterehëma ra, te tono nei hoì au ia òe; ua noaa hoì te tahi arii na ù i roto i te mau tamarii na na ra.

2 Ua parau atu ra Tämuera, e aha vau e tià ai ia haere? Ua ìte anaè Taura ra, e pohe au ia na. Ua parau mai ra te Fatu, E pütö atoà i te tahi puaatoro oni âpï, a parau atu ai e, I haere mai au e hopoi i te tütia na te Fatu.

3 A parau atu ai ia Iete e haere atoà mai i taua tütia ra, e na ù e faaìte ia òe i ta òe e rave: e o tä ù e faaìte atu ia òe i te iòa ra, ta òe ia e faatävai na ù.

4 E ua nä reira hoì Tämuera i ta te Fatu i faaue mai ra, e ua haere o ia i Peterehëma: e ua haere iho ra i te feiä rarahi o taua ôire ra i taua haereà mai nö na ra, e ua nä ô mai ra, E tere hau to òe?

5 ua nä ô atu ra o ia, E tere hau: i haere mai au e hopoi i te tütia i te Fatu ra: a faataa na ia òutou, e haere atoà i teie nei tütia. Ua faataa iho ra o ia ia Iete e ta na mau tamarii, e ua parau ia rätou e haere mai i taua tütia ra.

6 E tae mai ra rätou, ua hiò atu ra o ia ia Èriapa, e ua nä ô aè ra, O ta te Fatu mau paha teie i haapaò ra, tei mua i ta na aro:

7 ua nä ô mai rä te Fatu ia Tämuera, Eiaha e hiò i to na mata, e to na huru i te teitei, no te mea, aore o ia i tiàhia e au; e òre hoì ta te Fatu hiòraa e au; e i ta te taata; e hiò hoì te taata i te huru i räpae àu aè, âreà te Fatu, e hiò ia i to âau.

8 Ua parau atu ra Iete ia Àpinatapa, e ua tuu mai ra ia na i mua ia Tämuera: ua nä ô aè ra rä o ia, Aita atoà te Fatu i hinaaro i teie.

9 Ua tuu mai ra Iete ia Tama; ua nä ô aè ra rä o ia, Aita atoà te Fatu i hinaaro i teie.

10 E ua nä reira Iete i te tuu mai i ta na mau tamarii toohitu atoà i mua ia Tämuera; ua nä ô atu ra rä Tämuera ia Iete, Aita te Fatu i hinaaro ia rätou.

11 E ua nä ô atu ra Tämuera ia Iete, ua hope roa mai nei ta òe puè tamarii tamäroa? Ua parau mai ra o ia, Te toe nei te hopeà, e inaha, te tiaì ra i te mau mämoe: ua parau atu ra Tämuera ia Iete, E tono i te taata e tii ia na, ia tae mai hoì o ia e pärahi ai tätou i raro.

12 Ua tono atu ra o ia i te taata, e ua arataì mai ia na i roto. E taata ùteùte, e te mata maitaì, e te huru maitaì: e ua parau mai ra te Fatu ia Tämuera, A tià, a faatävai ia na, o ia hoì tënä.

13 Ua rave iho ra Tämuera i taua färii monoì ra, e ua faatävai atu ra ia na i röpü atoà i ta na mau tuaana ra: e mai taua mahana mai ra te värua o te Fatu i te taeraa mai i nià ia Tävita. Ua tià aè ra Tämuera i nià, e ua hoì mai ra i Rama.

Èfetia 5.8-14

8 I pöuri na hoì òutou i mütaa iho ra, i teie nei rä, ua märamarama òutou i te Fatu, ia au to òutou haereà i te tamarii märamarama.

9 (Ta te Värua i faatupu ra, oia te mau mea maitataì atoà ra, e te parau tià, e te parau mau.)

10 Ia ìteä ia òutou te mea au i te Fatu ra.

11 E eiaha roa ei âmuiraa i te feiä parau faufaa òre o te pöuri ra, e aò atu rä.

12 E mea haamä hoì ia parau noa atu i te mau mea i rave-huna-hia e rätou ra.

13 Te mau mea atoà rä i ìteä ra, i ìteä ia i te märamarama, o te märamarama hoì tei faaìte mai i te mau mea atoà nei.

14 I parau mai ai te Värua e: «A ara mai na, e tërä ra taata taòto, a tià mai i nià, e tënä na pohe, e na te Metia e horoà mai i te märamarama ia òe.»

Ioane 9.1-41

Te faaora-raa-hia te hoê taata matapö mai te fänauraa mai ä

1 E te haere noa ra o ia ra, e ìte atu ra o ia i te hoê taata matapö mai te fänauraa mai ä.

2 Ua ui mai ra ta na mau pîpî ia na, nä ô mai ra: «E Rapi, nä vai te hara, na na iho änei, e na nä metua änei, i fänau matapö mai ai o ia?

3 Ua parau atu ra Ietu: «Eere i to te hara a teie nei taata e te hara a nä metua ra, no te mea rä ia ìteä te òhipa a te Atua ia na nei.

4 E rave au i te òhipa a tei tono mai ia ù nei ra, òi vai aè te ao. Te fätata mai nei hoì te ruì, aore roa e taata e òhipa i reira.

5 Te pärahi nei au i te ao nei, o vau te märamarama o teie nei ao.

6 I nä reira atu ra o ia i te parauraa atu, e ua tufa iho ra i te huare i raro i te repo, ua oi iho ra i ta na huare i te repo; ua parai atu ra i te repo i te mata o taua taata matapö ra.

7 Ua parau atu ra ia na: «A haere, a horoi i to mata i te pape ra i Tiroama (oia hoì «Tonohia»). Haere atu ra o ia, horoi iho ra, e haere mai ra hoì mä te ìte.

8 Ua parau iho ra to reira iho, e te feiä i ìte ia na i mütaa iho i te vai-matapö-raa ra: «Eere änei teie i te taata i pärahi noa, ani ai i te taoà ra?

9 Ua parau mai ra vëtahi: «O ia hoì teie. (Nä ô mai ra vëtahi:) «Mai ia na mau nei ä hoì te huru. Ua parau mai ra o ia iho: «O vau hoì ia.

10 Ua ui atu ra rätou ia na: «I aha tià to mata i àraara ai?

11 Ua parau mai ra o ia, nä ô mai ra: «I oihia te repo e te hoê taata o Ietu te iòa, e ua parai mai ra i ta ù mata, e nä ô mai ra ia ù: «A haere i te pape ra i Tiroama horoi ai i to mata», haere atu ra hoì au horoi iho ra, e ìte atu ra.

12 Ua ui atu ra rätou ia na: «Tei hea taua taata ra? Ua parau mai ra o ia: «Aore au i ìte.

Te tïtorotororaa a te mau Färitea

13 Ua arataì atu ra rätou i te taata i matapö na i te mau Färitea ra.

14 E täpati te mahana i oi ai Ietu i te repo i te faaoraraa i ta na mata ra.

15 Ua ui atoà mai ra te mau Färitea ia na i te oraraa ta na mata ra. Ua parau atu ra o ia: «I parai mai o ia i te repo i ta ù mata; e horoi iho ra hoì au, e te ìte nei au.

16 Ua nä ô aè ra te hoê pae o taua mau Färitea ra: «Eere teie taata i to te Atua, aore hoì o ia i haapaò i te täpati. Ua nä ô aè ra te tahi pae: «E aha e tià ai i te taata hara ia rave i te täpaò mai teie nei? Ua àmaha iho ra rätou.

17 Ua ui faahou mai ra rätou i taua taata matapö ra: «E aha ta òe na parau ia na, o ia i faaora i to mata na?

Ua parau atu ra o ia: E perofeta ia o ia.

18 Aita rä te âti-Iüta i faaroo e e matapö to taua taata ra, e ua faaorahia hoì ta na mata, ia tii rä rätou i nä metua o taua taata i faaorahia te mata ra.

19 E ua ui atu ra rätou ia räua, nä ô atu ra: «O ta òrua tamaiti teie i parau ra e, i fänau matapö mai o ia. E aha hoì o ia i ìte ai i teie nei?

20 Ua parau mai ra nä metua no na ra ia rätou, nä ô mai ra: «Ua ìte mäua, na mäua mau teie nei tamaiti, e matapö mau o ia mai te fänauraa mai ai.

21 Âreà rä te mea i ìte ai o ia i teie nei, aore ia mäua i ìte, e tei faaora hoì i ta na mata, aore atoà ia mäua i ìte. A ui atu na ia na, ua paari hoì o ia iho: e na na iho e parau mai.

22 I nä reira atu ra nä metua no na ra, no te mea te mataù ra räua i te âti-Iüta, ua faaau na hoì te âti-Iüta i ta rätou iho parau, e te taata i nä ô ra e o ia te Metia, e tuuhia ia i räpae i te tunato ra.

23 I parau atu ai nä metua no na ra e: «Ua paari o ia, a ui atu na ia na iho».

24 Ua parau faahou atu ra rätou i taua taata matapö ra, nä ô atu ra ia na: «E haamaitaì i te Atua. Ua ìte hoì mätou e, e taata hara teie nei taata.

25 Ua parau mai ra o ia, nä ô mai ra: «Aore au i ìte e, e taata hara o ia. Hoê roa a ù parau i ìte, e matapö to ù i mütaa iho, e teie nei te ìte nei au.

26 Ua parau faahou atu ra rätou ia na: «I aha mai o ia ia òe? I nä hea o ia i te faaoraraa i to mata na?

27 Ua parau mai ra o ia ia rätou: «Ua fäì atu hoì au ia òutou, aore òutou i faaroo. E aha rä hoì òutou i hinaaro faahou ai i te faaroo? Ei pîpî änei òutou atoà na na?

28 Ua faaìno atu ra rätou ia na, nä ô atu ra: «O òe ta na pîpî, âreà mätou e pîpî ia na Möte.

29 Ua ìte mätou e, ua parau mai te Atua ia Möte. Âreà teie nei taata, aore mätou i ìte i te vähi no reira mai o ia ra.

30 Ua parau mai ra taua taata ra ia rätou, nä ô mai ra: «E mea huru ê hoì tënä aore òutou i ìte i te vähi no reira mai o ia, e inaha, ua faaora hoì o ia i ta ù mata nei.

31 Ua ìte hoì tätou e, e òre te Atua e faaroo i te feiä hara, o te taata rä e haamori i te Atua, e o tei haapaò i to na ra hinaaro, o ta na ia e faaroo.

32 Aore i ìteä te matapö fänau nei i te oraraa i te taata mai te mätamua mai ä o te fenua nei.

33 Àhiri teie nei taata eere i to ô i te Atua ra, eita roa ta na räveà e tià.

34 Ua parau atu ra rätou ia na, nä ô atu ra: «I fänau mai òe mä te hara, e haapii mai hoì òe ia mätou? Ua tuu atu ra rätou ia na i räpaeàu.

Te matapö värua

35 Ìte aè ra Ietu e ua tuuhia o ia e rätou i räpae, e färerei aè ra hoì o ia ia na, ua parau atu ra ia na: «Ua faaroo òe i te Tamaiti a te Atua?

36 Ua parau mai ra o ia, nä ô mai ra: «E te Fatu, o vai o ia ia faaroo atu vau ia na?

37 Ua parau atu ra Ietu ia na: «Ua hiò hoì òe ia na, e o ia hoì teie e parau atu ia òe nei.

38 Ua parau mai ra o ia: «E te Fatu, ua faaroo vau. E ua tïpapa iho ra i raro i mua i ta na aro.

39 Ua parau atu ra Ietu: «I haere mai nei au i te ao nei ia tupu te parau tià, ia ìte te feiä ìte òre ra, e ia riro te feiä ìte ra ei matapö.

40 Te faaroo mai ra e toofanu mau Färitea i reira atoà iho i taua parau ra, e ua parau mai ra ia na: «E matapö atoà nei mätou nei?

41 Ua parau atu ra Ietu: «Àhiri òutou e matapö ra, aita a òutou hara, te parau mai na rä òutou e: «Ua ìte mätou», te vai na ia ta òutou hara.

Manaò

E aha te hara, te faaroo nei tätou ia parauhia e, harahara i te ïà, aore ra, i te niho, pïhara i te räau. Te tumu i roto i teie mau faaòhiparaa ra, o te manaò ia o te täpüraa. Te reira atoà te manaò e vai ra i roto i te hara. Te hara ra, te huru ia o te òhipa ta te hoê taata i rave e tei täpü ia na i te toeà o te taata no te ìno rahi o taua òhipa ra no te oraraa hau o te tahi aè pae taata.

Te hoê taata e ora o na anaè i nià i to na maa motu iti, aore ra, te hoê taata tei faaätea ê mai ia na i te oraraa taata, e hara änei ia taata. Èita. No te aha. No te mea, i nià noa ia na e vai ai te maitaì e te ìno o ta na òhipa, o na iho te haavä ia na iho, mai ia na hoì i riro èi päruru no na iho.

E hiò mai rä tätou i te parau o te hara i roto i te oraraa o te hoê pupu taata, e hoê nünaa, aore te hoê taata, te hoê hoì nünaa i mua i to na Atua.

No te mea te vai ra to na täuaro, oia hoì te taata e tià mai, aore ra, te taata e tau mai i mua i te aro o te tahi, e tano ai ia faahitihia te parau o te hara. I roto i te parau o te hara, te vai ra te parau o te tahi faanahoraa moà. Teie rä, aita te parau o te moà, mai te peu aita e Atua. No reira, i te ômuaraa ihoä o te oraraa o te taata, i te mau vähi atoà e pärahihia e te taata i te ao nei, ua ìte o na e, te vai ra te tahi taura täàmu ia na i te Atua, te vai ra te mau hinaaro, e te mau tïtauraa a te Atua i taua taata ra, no na iho i mua i te Atua, aore ra, no na i mua i te tahi atu mau taata. Taua tïtauraa na te Atua ra, o te parau ia no te ora. Ua tuu te Atua i te ora i roto i te taata, e taua ora te marämarama, o te hohoà ia no te Atua Nui Tumu Tähi. I roro i teie faanahoraa, te riro nei te taata tätaì tahi èi veà na te Atua i mua i to na täuaro, no te haamanaò e, o te Atua te tumu, e o na te faahopeà i roto i te oraraa o te taata. Ua hämani hoì te Atua i te taata ia au i to na hohoà. Taua huru e taua hohoà no te Atua ra tei tïtauhia ia tätou ia faaìte i te mau taata atoà. Te hara, te taime ia te taata e hinaaro ai i te täpü i teie taura e täàmu ia na i te Atua. Te taime te taata e hinaaro ai ia na iho ia riro èi tumu e èi faahopeà no to na iho ora, ua haapae ia o ia i te ora a te Atua. Te ôpuaraa a te Atua i te taata tätaì tahi, te faariroraa ia ia na èi moihaa no te faatupuraa i te parau tià a te Atua, a riro atu ai te ao nei mai te hoê hiò hipa e faaìte mai te hohoà o te Atua e to na hanahana. Mai ia tätou e parau nei ia ìte anaè i te hoê tamarii e, e tià maitaì òe i to òe metua, ia riro atoà to tätou oraraa èi faaìteraa e, e tamarii tätou na te Atua. Ua hara tätou i te Atua ia täpü tätou i teie taura e täàmu nei ia tätou ia Na e i to Na mau hinaaro atoà ia tätou. Ua hara atoà rä tätou i te Atua ia haavare tätou i to tätou mau täuaro e, te vai täàmu noa ra tätou i nià i te Atua, a rave noa ai i te mau òhipa tià òre atoà të òre e faaìte i to Na hanahana. Te hinaaro nei te Atua ia tätou ia faatupu e ia faahotu i ta na parau tià i roto i to tätou oraraa. No te ètaèta e te täiva o te taata, i tono roa mai ai te Atua i ta na Tämaïti here i roto i teie nei ao no te faahotu-faahou-raa i te parau tià a to na Metua. Te hinaaro atoà nei rä te Atua ia faaìte tätou i te huru e hohoà ta na i hinaaro no tätou. No reira, e hara na tätou, ia faariro tätou i te parau o te Mäòhi èi peu no te tau. Èere roa atu te reira. Ia faatupu tätou i te parau o te Mäòhi, te faatupu ra ia tätou i te hinaaro o te Atua, inaha, ua hämani o ia ia tätou ia au i to na huru e i to na hohoà, ia au i ta na i hinaaro ia riro èi huru e èi hohoà no tätou. Ia òre tätou ia färii i te reira rä, te faaìte ra ia tätou e, àita ta te Atua e parau ia tätou, na tätou iho rä e faaoti i te mea e au ia tätou e, aita ta te Atua e parau ia tätou, na tätou iho rä e faaoti i te mea e au ia tätou ia rave. Ia nä reira tätou ra, ua hara ia, oia hoì, ua täpü i te Atua i to oraraa. Ia täpü hoì tätou i te taura e täàmu ia tätou i te Atua, nä hea ia te Atua e faataa faahou mai ai ia tätou, e o tätou hoì, nä hea ia tätou e ìte faahou ai i te Atua e to na mau hinaaro moà.

E te nünaa Mäòhi, a hoì i to òe Atua ra, vai iho ia òe na èi moihaa no ta na parau tià, no reira hoì òe i mäìtihia ai. Tiàturi ia òe, tiàturi i to òe Atua, ia tupu te ora taa ê ta te Atua i hinaaro ia riro èi tuhaa na òe. Teie atu ra te haapotoraa no te mau taiòraa no teie mahana :                        

-Taramo 23, 6 E riro ä te maitaì e te aroha i te pee mai ia ù i te mau mahana atoà o to ù nei oraraa. E pärahi ä vau i roto i te fare o te Fatu e mäoro noa atu o ù puè mahana.

-1 Tämuera 16 12 Ua tono atu ra o ia i te taata, e ua arataì mai ia na i roto. E taata ùteùte, e te mata maitaì, e te huru maitaì: e ua parau mai ra te Fatu ia Tämuera, A tià, a faatävai ia na, o ia hoì tënä.

-Èfetia 5, 14 I parau mai ai te Värua e: «A ara mai na, e tërä ra taata taòto, a tià mai i nià, e tënä na pohe, e na te Metia e horoà mai i te märamarama ia òe.»

-Ioane 9, 39 Ua parau atu ra Ietu: «I haere mai nei au i te ao nei ia tupu te parau tià, ia ìte te feiä ìte òre ra, e ia riro te feiä ìte ra ei matapö.

Parau i haapaòhia no tätou i teie mahana e ärataì ia tätou i roto i te hoê faanahoraa vaamataèinaa, i nià i te èà e haere tià rä i Ierutarëma te tupuraa ia ta tätou parau i reira,

-Te faaora-raa-hia te hoê taata matapö mai te fänauraa mai ä ìte atu ra o Ietu i teie taata matapö mai te fänauraa mai ä. Te mau pîpî i roto i to rätou ao, i te parauraa e, E Rapi, nä vai te hara, na na iho änei, e nä metua änei, i fänau matapö, e turäma o Ietu Èere i to te hara a teie nei taata e te hara a nä metua ra, no te mea rä ia ìteä te òhipa a te Atua ia na nei. Ta tei tono mai ia Ietu, òi vai aè te ao. Te fätata mai nei hoì te ruì, aore roa e taata e òhipa i reira. Tei te ao nei au, o vau te märamarama o teie nei ao. E ua tufa iho ra i te huare i raro i te repo, ua oi iho ra i ta na huare i te repo; ua parai atu ra i te repo i te mata o taua taata matapö ra. A haere, a horoi i to mata i te pape ra i Tiroama, horoi iho ra, e haere mai ra hoì mä te ìte. Te feiä i ìte ia na i mütaa iho i te vai-matapö-raa ra: «Eere änei teie i te taata i pärahi noa na, ani ai i te taoà ra, O ia hoì teie, ua huruê vëtahi, Mai ia na mau nei ä hoì te huru. Ua parau mai ra o ia iho: «O vau hoì ia. I aha tià to mata i àraara ai, I oihia te repo e te hoê taata o Ietu te iòa, e ua parai mai ra i ta ù mata, e nä ô mai ra ia ù: «A haere i te pape ra i Tiroama horoi ai i to mata», haere atu ra hoì au horoi iho ra, e ìte atu ra. Tei hea taua taata ra, Ua parau mai ra o ia: «Aore au i ìte, teie ia te òhipa i tupu :

-Te tïtorotororaa a te mau Färitea

Ärataìhia atu ra te taata i pö na te mata i mua i te mau Färitea, e teie mahana e täpati te täpati âti-Iuta i oi ai Ietu i te repo i te faaoraraa i ta na mata. Ua ìmi te mau Färitea i te oraraa ta na mata. I parai mai o ia i te repo i ta ù mata; e horoi iho ra hoì au, e te ìte nei au. Èere teie taata i to te Atua, aore hoì o ia i haapaò i te täpati. Te tahi pae, E aha e tià ai i te taata hara ia rave i te täpaò mai teie nei, Ua àmaha iho ra rätou. E aha ta òe na parau ia na, o ia i faaora i to mata na, E perofeta ia o ia. Tiihia nä metua o taua taata ra i faaorahia te mata. O ta òrua tamaiti teie i parau ra e, i fänau matapö mai o ia. E aha hoì o ia i ìte ai i teie nei. Ua ìte mäua, na mäua mau teie nei tamaiti, e matapö mau o ia mai te fänauraa mai ai. Ua mohi teie na metua i roto i te taa òre, A ui atu na ia na, ua paari hoì o ia iho, ua ö te mataù ia räua i te âti-Iüta, ua faaau na hoì te âti-Iüta i ta rätou iho parau, e te taata i nä ô ra e o ia te Metia, e tuuhia ia i räpae i te tunato ra. Ua paari o ia, a ui atu na ia na iho. Ìmi iho ra te mau Faritea e haaparuparu te tiàturiraa o teie tamaiti i faaàraàrahia te mata e Ietu, i te parauraa a te mau Faritea, E haamaitaì i te Atua. Ua ìte hoì mätou e, e taata hara teie nei taata. Teie mai nei te fäìraa a teie tamaiti, Aore au i ìte , e taata hara, Hoê roa a ù parau i ìte, e matapö to ù i mütaa iho, e teie nei te ìte nei au. I aha mai o ia ia òe, I nä hea o ia i te faaoraraa i to mata na. Ua fäì atu hoì au ia òutou, aore òutou i faaroo. E aha rä hoì òutou i hinaaro faahou ai i te faaroo, Ei pîpî änei òutou atoà na na? O òe ta na pîpî, âreà mätou e pîpî ia na Möte, ua pärahi noa te mau Faritea i roto i to rätou ao te maì o te taata o te Atua te tumu. E mea huru ê hoì tënä aore òutou i ìte i te vähi no reira mai o ia, e inaha, ua faaora hoì o ia i ta ù mata nei. Noa atu teie mau faahitiraa manaò, òre te Atua e faaroo i te feiä hara, o te taata rä e haamori i te Atua, e o tei haapaò i to na ra hinaaro, o ta na ia e faaroo. Te matapö i fänauhia e òre e ora i te taata mai mätamua mai ä o te fenua nei. Te itoito e te puai o teie tamaiti e haapäpü faahouhia i teie parauraa  Àhiri teie nei taata eere i to ô i te Atua ra, eita roa ta na räveà e tià. I teie parauraa tuuhia atu ra oia i räpaeàu i te oraraa vaamataèinaa, ìte noa ai te mata, ua pö ra :

Te mata värua

I te färereiraa o Ietu i teie taata ma te parau e, Ua faaroo òe i te Tamaiti a te Atua, E te Fatu, o vai o ia ia faaroo atu vau ia na. Ua hiò hoì òe ia na, e o ia hoì teie e parau atu ia òe nei. E te Fatu, ua faaroo vau. E ua tïpapa iho ra i raro i mua i ta na aro. I haere mai nei au i te ao nei ia tupu te parau tià, ia ìte te feiä ìte òre ra, e ia riro te feiä ìte ra ei matapö. E toofanu mau Färitea tei faaroo, ua parau mai ra ia na: «E matapö atoà nei mätou nei. Àhiri òutou e matapö ra, aita a òutou hara, te parau mai na rä òutou e: «Ua ìte mätou», te vai na ia ta òutou hara. E mata tià o teie tamaiti i mua i te òhipa i ravehia e Ietu i nià ia na te ìte nei i te mau ù o te mau aru, te ìte nei i te ànaana o te mahana, e te ìte nei i te hohoà o to na nä metua, e to na mau hoa. Haapäpüraa, e huare, e repo, e päpe, tei ìriti i te ùputa o te marämarama i roto i to na oraraa âpï, te tahi reo no Pauro, Èfetia 5, 14 I parau mai ai te Värua e: «A ara mai na, e tërä ra taata taòto, a tià mai i nià, e tënä na pohe, e na te Metia e horoà mai i te märamarama ia òe.»

 

 

Teraì òr. Faatura.