Mätaio 13.1-23. Òaìa.

 

Tāpati 16 no Tiurai 2023.

Òaìa

Taramo 65

1 Na te Mënätehe. Taramo, e himene na Tävita.

2 Te tiaì mäite ra te ârue ia òe, e te Atua, i Tiona; e tei èuhehia ra, e horoàhia atu ia ia òe ra,

3 e tei faaroo i te pure ra. E tae atoà mai te taata atoà ia òe ra.

4 ua upootià te ìno ia mätou nei; âreà ta mätou mau hara, ua täpoìhia ia e òe ra.

5 E ao to te taata i haapaòhia e òe, e ua haafätatahia mai e òe ia pärahi i roto i to òe ra mau hëtere. E mauruüru ia mätou i te mau mea maitataì no to òe ra fare, no to òe ra nao moà.

6 Na te mau mea maitaì, e te tià ra, ta òe, ta te Atua e ora ai mätou nei, e parau mai ia mätou nei; o òe o tei tiàturihia e to te mau hopeà o te fenua atoà nei, e te feiä atoà i te ätea ê ra i te moana.

7 O tei haamau i te mau mouà ra i to na ra püai, e ua tätuahia o ia e te mana.

8 O tei haamanino i te haruru o te miti, te haruru o te mau aru ra, e te tiàrepu o te taata nei.

9 To te mau hopeà o te fenua ra, ua roohia anaè e te mataù i ta òe ra mau täpaò. O tei ìteä i te haereà mai i te poìpoì, e te ahiahi, ua faaòaòahia ia e òe ra.

10 Ua hiò mai òe e ua faararirari i te fenua, e ua rahi roa ia i te tupu ia òe i te ânävai a te Atua ra, tei î i te pape: e maitaì aè ra ia òe ra, faatupu iho ra òe i ta rätou tïtona:

11 Ua faarari hua mai rä òe i to na mau âivi rii i te pape, e ua faatahe mai ra òe i te ua i te vähi rii poopoo ra,  ua haamarü mai ra i te reira i te tuäua ra, e ua haamaitaì mai òe i tei tupu ra.

12 Te faatoröna nei òe i te mätahiti i to òe ra maitaì, e te töpata mai ra te maitaì i te mau haereà atoà no òe ra.

13 Te töpata mai ra i nià i te mëtëpara, e te òaòa nei te mau âivi e àti noa aè.

14 Ua àti te fenua i te nana puaa, e ua î te mau peho i te tïtona; te pii nei, e te himene nei i te òaòa.

Ìtaia 55.10-11

10 Mai te ua mau e topa nei, e mai te hiona, no nià mai i te raì ra, e aore i hoì faahou i reira; ua faararirari rä i te fenua ra, e ua faatupu ra, e ua faahotu mai hoì i tä na, i noaa ai hoì te huero i te feiä e ueue, i te mäa i te feiä i àmu ra:

11 oia atoà te parau no roto i to ù nei vaha; e òre e hoì faufaa òre noa mai ia ù nei, e tupu rä tei ôpuahia e au ra; e noaa hoì te mea i faaue atu ai au ra.

Röma 8.18-23

Te hanahana e faaìtehia mai

18 Te parau nei hoì au, e òre teie nei mau pohe e au ia fäito i te maitaì e faaìtehia mai ia tätou nei.

19 Te hinaaro rahi o te mau mea hämanihia nei mä te fäàoào, te tiaì nei ia i te faaìte-raa-hia mai o te tamarii a te Atua.

20 Ua faarirohia hoì te mau mea hämanihia nei ei mea faufaa òre noa, eere rä i te mea hinaaro, na na rä na tei faariro ei mea faufaa òre noa mä te tiaì.

21 E faaorahia hoì te mau mea hämanihia nei i të täpeà ra o te pohe, ia noaa te tiàmä maitaì o te tamarii a te Atua ra.

22 Ua ìte hoì tätou e, te ûuru tahi nei te mau mea atoà i hämanihia nei mä te mäuiui fänau ra e tae roa aè nei i teie nei mahana.

23 Eere hoì o rätou anaè ra, o tätou atoà nei, o tei noaa te huero mätamua a te Värua ra, o tätou iho ä tei ûuru i roto ia tätou iho, i te tatariraa atu i te faa-tamarii-tävai-raa, oia te faaoraraa i to tätou nei tino.

Mätaio 13.1-23.

Te parapore no te Hau

(Mär 4.1; Rut 8.4)

1 I taua mahana ra, haere atu ra Ietu i räpaeàu i te fare, pärahi iho ra i te hiti miti/pae tähatai.

2 E rave rahi ta te tiàa rahi tei putuputu mai ia na ra. Paìùma atu ra o ia i nià i te hoê poti, pärahi iho ra i reira; te tià noa mai ra te tiàa rahi atoà i nià i te pae.

Te ueue huero

(Mär 4.2-9; Rut 8.5-8)

3 E rave rahi ta na parau i parau parapore atu ia rätou, nä ô atu ra: «Inaha, haere atu ra te ueue huero i räpae e ueue i te huero;

4 e te ueue noa ra ia, maìri iho ra e tahi pae/hiti äratià: ia maùe mai te manu, àmuhia/titotitohia iho ra.

5 Maìri iho ra e tahi pae i te vähi ôfäfaì, aita reà e repo to reira; tupu òiòi iho ra ia, no te mea aore i moè reà i raro i te repo;

6 ia hiti mai te mahana: ôriorio iho ra e pohe atu ra, no te mea aore i aahia.

7 Maìri iho ra hoì e tahi pae i roto i te räau taratara, tupu aè ra te räau taratara e apiapi iho ra.

8 Maìri iho ra te tahi pae i te vähi repo maitaì, e höroà mai ra i te mäa: hoê hänere i nià i te tahi huero, e ono àhuru i nià i te tahi, e toru àhuru i nià i te tahi.

9 E tarià tö na ra, ia faaroo ia.

No te aha Ietu i parau parapore ai

(Mär 4.10-12; Rut 8.9-10)

10 Ua haere mai ra te mau pipi, nä ô mai ra ia na: «E aha òe i parau parapore ai ia rätou?

11 Ua pähono atu ra o ia ia rätou: «No te mea, ua höroàhia ia òutou te ìte i te parau àro o te Hau o te raì ra, aita rä i höroàhia ia rätou.

12 E taoà tä na ra, e höroàhia atu ä tä na e ia rahi atu; aita a na ra, e rave-ê-hia ia tä na e tërä atoà e vai ra. 

13 No reira vau i parau parapore atu ai ia rätou, no te mea, te hiò nei rätou, aita rä e ìte ra, te faaroo nei rätou, aita rä e häroàroà ra e e taa/märamarama ra.

14 No rätou i tupu ia teie tohu a Ìtaia, o tei nä ô mai e: E pau ta òutou faaroo, e òre roa atu ihoä òutou e märamarama; e pau ta òutou hiò, e òre roa atu ihoä òutou e ìte.

15 Ua ètaèta roa te âau o teie nei nünaa, ua turi roa to rätou tarià, e ua täpiri/täpö i to rätou mata, o te hiò hoì to rätou mata, o te faaroo hoì to rätou tarià, o te ìte to rätou âau, e o te haafäriuhia mai rätou, ia faaora atu vau ia rätou.

16 Teie rä, e ao to òutou mata, no te mea te ìte ra, e to òutou tarià, no te mea te faaroo ra.

17 Òia mau ta ù e parau atu ia òutou nei: e rave rahi te perofeta e te feiä parau tià i hinaaro i te hiò i te mau mea ta òutou e hiò nei, aita rä rätou i ìte; i hinaaro i te faaroo i te mau mea ta òutou e faaroo nei, aita rä rätou i faaroo.

Te tätararaa o te ueue huero

(Mär 4.13-20; Rut 8.11-15)

18 «E teie nei, a faaroo mai na i te parapore o te ueue huero.

19 Ia faaroo te tahi taata i te parau o te Hau, e aore i märamarama i taua parau ra: e haere mai te värua ìno/hämani ìno, e rave ê atu ra ia i tei ueuehia i roto i to na âau. O te hohoà ia o te huero tei maìri i te pae/hiti äratià ra.

20 O tei maìri i te vähi ôfäfaì ra: o te taata ia tei faaroo i te parau e tei färii òaìa i taua parau ra mä te òaòa;

21 no te mea rä aore i aahia i roto ia na iho, mauraa poto ia to na; ia tae mai te àti e te hämani ìno tei riro hoì te parau ei tumu, mäheaitu atu ra ia o ia.

22 O tei maìri i roto i te räau taratara ra: o te taata ia i faaroo i te parau; no te mau manaònaòraa rä o teie nei ao e te faatïaniani/haavarevare a te taoà, apiapi iho ra te parau, e aita aè ra i hotu mai.

23 Âreà tei maìri i te vähi repo maitaì ra, o te taata ia tei faaroo e tei märamarama i te parau; hotu mai ra tä na, hoê hänere i nià i te tahi huero, e ono àhuru i nià i te tahi, e toru àhuru i nià i te tahi.

Manaò.

Te Atua, ua faaite te Atua i to na huru na roto i te parau tei riro mai ei fenua. Ua parau, ua tupu, ua parau, ua ìtehia. Te Atua te Fatu o te raì e te fenua. Te taata, o te òhipa ia o ta na i hämani. E i mua i te taata o ta na i hämani, teie te parauraa a te Taramo i te ôpuaraa faaora a te Atua ;  E ao to te taata i haapaòhia e òe, e ua haafätatahia mai e òe ia pärahi i roto i to òe ra mau hëtere. E mauruüru ia mätou i te mau mea maitataì no to òe ra fare, no to òe ra nao moà. Te auraa ; te riro ra teie parau mai te tahi ìteraa e te farii atoàraa hoì, te vai ra tera peu no te maa ta te taata e rave ra, ua ìte te Atua i te reira. Täpiri noa mai ra rä te Atua i teie manaò ; e ao to te taata i haapaò, te vai ra te na e te vai ra teie. I ô nei, aita te Atua e tià ra i nià i to na tiàraa Atua, faautaraa i ta na parau ia au i tera huru ìtehia i te tau o Mote, i te parauraa e, « eiaha roa to òe e Atua ê atu i mua i ta ù aro… » Aita, e faatureraa. Te parauraa, eita te manào o te taata e o, hoê anaè parau ; eiaha tera  eiaha tera. E i ô nei, aita, aita te Atua e faauta ra, i te huru o te taata, 6 Na te mau mea maitaì, e te tià ra, ta òe, ta te Atua e ora ai mätou nei, e parau mai ia mätou nei; o òe o tei tiàturihia e to te mau hopeà o te fenua atoà nei, e te feiä atoà i te ätea ê ra i te moana. Te auraa ; te vai ra te hinaaro o te taata e te vai ra te hinaaro o te Atua. Aita te Atua e parau ra, ua hape te taata, te vaiiho ra rä te Atua na te taata e ìte mai. E hinaaro to te Atua, e manào to te Atua i mua i te parau no te fenua e hotu i te maa. Parau mau, te vai ra ihoä ia tera mau haapäpüraa mai tera ta Ìtaia e haapäpü ra, ia parau te Atua e, « e ère to ù manào mai to òutou e ère to ù haereà mai to òutou a hiò na i te raì, te teiteiraa o te raì mai tera te taaêraa i roto i to òutou manào e to ù manào e te Atua i parau i tera parau, aita ò na e hiò faahou ra i tera area e faataaê ra ia na i nià i to na tiàraa Atua e te taata, o ò na tera e haafatata ra i te taata i te parauraa atu e, « e ère anei teie mai te tahi taata o tei naò ra, a hiò mai na òe i teie manào, a hiò atoà mai na òe i teie manào, te vai ra ihoä tera ta òe i mätau, a hiò atoà mai na òe i teie, e ère anei hoì teie i te huru tano aè …no ù teie manào, a hiò atoà mai na òe… Tera faahaèhaaraa te Atua ia na i mua i te taata i te parauraa, a hiò atoà mai na òe i to ù manào. I mua i te mau parau o te mau taiòraa e au no teie mahana te vai ra ihoä te reira, te vai atoà ra rä teie ta ù, na òe ra e hiò mai. E aha te huru o te Atua o ta tätou e hiò nei. E Atua tei ìte i te taata i roto i to na taaêraa, aita te Atua e haafaufaa-òre ra te taata, aita te Atua e faarahi ra i te paruparu e te faufaa-òre o te taata, Aita roa. Te hinaaro ra te Atua i te manào o te taata, horoà atoà mai te taata i to na manào. Ua farii ê na te Atua i te manào o te taata. E Atua, hou to na faahaèhaaraa mai ia na, pärahi-roa-raa mai i roto i te taata, ua faahaèhaa ê na te Atua ia na i mua i te taata i teie reo e a hiò atoà mai na òe i teie. E ère anei teie o te manaò tumu no te hinaaro o te Atua. Te vai ra te hinaaro o te Atua, aita a te Atua i hinaaro nei i te faauta, aita ; a hiò atoà mai na òe i teie.., e ère anei teie i te huru tano aè i nià i ta ù e tiäì ra ia òe ia rave mai, na òe ra hoì te reira vahi e faaoti mai. Tera te rahi o te Atua, tei roto i to na haèhaa, te raveraa i te taata ei täuàparauraa na na, a hiò atoà mai na òe…I roto i te Tenete, te ôpuaraahia te taata, i roto i te âpooraa a te mau Atua, hämani tätou i te taata, e ua ui i teie taata o ta na i hämani, « a hiò atoà mai na òe i teie manào, e ère anei teie o ta ù e hinaaro ra. Te rahi o te Atua, tei roto i to na haèhaa, te färiiraa e täuàparau, färiiraa i te ìte, faaroo i te manào o te taata i mua i te tahi parau faufaa roa. Inaha, ia parau anaè tätou faanaho, to te taata te reira tiàraa atu i mua i te Atua, e inaha, i roto i tera faahaèhaaraa te taata i roto i te parau o te faanahoraa i mua i te Atua, o te Atua atoà iho teie e faahaèhaa mai nei. A hiò atoà mai na òe i teie, e ère anei teie i te mea huru tano aè. Tera te hohoà o te Atua. I ô nei rä, te ani ra e ère anei. I roto i te parauraa e ère, ia faaòhipa anaè i tera taò, no te faaìte ia, ua hape, e ère i tera. Na vai i rave i tera òhipa, E ère na ù. E riro te e ère mai te tahi täpüraa, e ère, i ô ua oti te parau. E anei, te vai ra ia te manào no te uiuiraa, te vai ra te päpü-òre, ua naò anaè tätou « päpü-òre » te haere ra ia te manào, te feâa ra, tei roto i te tahi manào aore ra te tahi. Te auraa ; te vai ra ta te taata e te vai ra ta te Atua. I roto i tera e piti, te naò ra te Atua, e ère anei tei ta ù e hinaaro », mea òhie roa no te Atua i te parauraa e, « teie ta ù e hinaaro, aita ra te Atua e na reira ra. Te vaiiho atoà ra te Atua te taata i roto i to na tiàmaraa, te ìte atoà ra te Atua i te taata i roto i ta na ìmiraa, e te hinaaro ra te Atua ia ìmi te taata, ia feruri rii, ia uiui rii, ia färii atoà te taata i te tahi taime i te vaiiho, ia faataime i ta na hiòraa. Teie te tahi tautururaa i te manaò i roto i teie mau ìrava e haapoto nei i te mau taiòraa no teie mahana :

-Taramo 65, 9 To te mau hopeà o te fenua ra, ua roohia anaè e te mataù i ta òe ra mau täpaò. O tei ìteä i te haereà mai i te poìpoì, e te ahiahi, ua faaòaòahia ia e òe ra.

 -Ìtaia 55, 10 Mai te ua mau e topa nei, e mai te hiona, no nià mai i te raì ra, e aore i hoì faahou i reira; ua faararirari rä i te fenua ra, e ua faatupu ra, e ua faahotu mai hoì i tä na, i noaa ai hoì te huero i te feiä e ueue, i te mäa i te feiä i àmu ra.

-Röma 8, 23 Eere hoì o rätou anaè ra, o tätou atoà nei, o tei noaa te huero mätamua a te Värua ra, o tätou iho ä tei ûuru i roto ia tätou iho, i te tatariraa atu i te faa-tamarii-tävai-raa, oia te faaoraraa i to tätou nei tino.

-Mätaio 13, 20 O tei maìri i te vähi ôfäfaì ra: o te taata ia tei faaroo i te parau e tei färii òaìa i taua parau ra mä te òaòa.

Teie taò òaìa, e taata tei färii i te parau tei itoito i te faatupuraa i te vahi i reira te parau te faahitiraahia, o ta na noa i ìte mau ti rä te òaòa, te mau haaäpiäpiraa e faaea noa o ia i roto i te òaòa, te òaòaraa to na ia oraraa.  Tei roto o Ietu i te tuhaa no Tarirea, I taua mahana ra, haere atu ra Ietu i räpaeàu i te fare i te hiti no te roto no Tïpëria, i rotopü i te mau taata e rave rahi tei haaàti mai ia na e tei pee noa ia na. Te hinaaro nei rätou i te hiò i te mau temeio e te ìte i ta na parau. No te rahi  te taata, te paiùma nei Ietu i nià i te hoê poti.

O vai ma teie nei mau taata ?

O te feia atoà ia ta na i faaora i to rätou mau maì, ta na i faaòre i ta rätou mau hara, ta na i tämahanahana i to rätou mau àti. E ère ra e o rätou anaè, te vai atoà nei ra te tahi pae tei haere noa mai no te mataìtaì noa e no te ìmi atoà hoì i te mau raveà no te haamämüraa atu ia na, oia hoì te feiä tei òaòa, e te feiä tei òre i òaòa ia Ietu e i ta na òhipa. I roto i teie mau taata o tätou atoà e faaroo ra i teie mau parau ta Ietu e faatià parapore nei, ia ìte atoà tätou e, e tuhaa ta tätou i roto i teie mau parau èi faatupuraa i te ora e hau i te fenua nei.  

Ua riro teie pene 13 i päpaìhia e Mataio èi faaìte i te mau taata tei putuputu mai, ta na  iho mau pipi e ia tätou atoà i te huru no ta Ietu mau haapiiraa e no to na manaò. Te haapiiraa a Ietu te parau rahi i roto, maori ra te parau ia no te Aroha e te Here. Te faaìte nei Ietu e, teie mai nei te Hau o te Atua, ua tae mai nei e tei pïhaì iho roa i te taata nei, e te haapii nei Ietu i te parau no taua hau ra, na roto i to na parau paraporeraa. I roto i ta na aòraa i nià i te mouà, ua haapii Ietu na roto i te raveraa i te mau parau no te Faaüraa Mätamua tei matauhia e te taata i te faaroo. I ò nei ra, e mea taaê roa ia, aita O ia i ìriti faahou mai te mau parau no te Faaüraa Mätamua, ua ìriti mai ra O ia i te tahi parapore ta Mataio i haaputuputu maite, ei täpaò faaìte e, aita o Ietu i rave  mama noa nei i ta na òhipa, ua ìte ra O ia i te vahi ta na e haere nei, ua ìte O ia i te haapii te rave i te temeio na roto i te mana no to na Metua. Te raveà a Ietu te faaòhiparaa i te parau no te taata ueue i te huero maa i nià i te mau vahi no te fenua e tei vaiiho na te reira iho huero e faaìte i to na iho maitaì.

E aha hoì te parapore ?

O te hoê ia parau faaau, oia hoì te raveraa o Ietu i te faufaa no te aru, tei hiòhia e te mata ei faaauraa no te Patireia o te Atua. A hiò na i te parapore no te taata ueue huero. Te haapii nei o Ietu i te taata na roto mai i te tahi mau mea fatata roa i te taata, ìtehia e te taata i roto i to na oraraa i te mau mahana tätaì tahi, matarohia e te taata i te rave. E aha hoì o Ietu i na reira ai, e aha hoì O ia i parau parapore ai ? Teie ei faaìteraa ia i te feia ìte-òre i te auraa hohonu no te tupuraa no to na Patireia, ia òhie to rätou manaò e ta rätou tiàturiraa, e to rätou atoà ìteraa i te mau raveà faaora na na e ère o te reira anaè, ei hunaraa atoà ra i te feia i ìte i taua parau ra, aore ra rätou i hinaaro e i haapaò. Te ìriti nei i ta na haapiiraa na roto i te parapore no te taata ueue huero. Te ueue e maa tei nià e topa e pöfaìhia, e päfaìhia, te ueue e huero îita i roto i te rima i reira e hue ai i nià i te fenua.

Te auraa o te parapore.

Te tatara nei o Ietu iho i te reira. Te huero ra, o te parau ia no te Patireia, oia hoì, te mau haapiiraa. Ua ueue o Ietu i taua mau parau ra i roto i teie nei ao tei reira te mau huru repo atoà. Ua ueue O ia i te huru o te vahi e maìrihia e taua huero ra, mai te tiäì i te taime e hotu mai ai taua huero ra. Ua hotu mai te huero tei maìri i te vahi repo maitaì, àreà ra tei maìri i roto i te àihere, i nià i te vahi papa, e i te äratià aita ia. Te faaauraa no na repo e maha nei, ua faaäuhia ia i nià i te huru e maha o te taata nei tei maìri i te pae äratià, oia te taata tei faaroo i te parau o te Patireia e aore i haapaò, ua haere mai taua mea ìno ra, rave ê atu ra i tei ueuehia i roto i to na ra âau, te huru ia no te taata hupehupe, e te faatau. Tei maìri i nià i te papa, oia tei färii i te parau no te Patireia ma te òaòa no te mea ra aore i aahia i roto ia na, ia tupu te hoê fifi, te pohe nei te faaroo i te hämani-ìno-raa, mäheaitu atu ra o ia. Te huru teie no te taata teòteò, to na manaòraa oia anaè te mea faahiahia aè i te tahi atu. Tei maìri i te vahi àihere, oia te taata tei faaroo i te Patireia, e o tei òhene taua parau ra i roto na roto i te tïtau-noa-raa i to teie nei ao e te mau mea haavare, aita atu ra taua parau ra i hotu mai. No te mea ua rahi aè to na hinaaroraa ia pohe te tumu o te maitaì, eiaha ra ia ìtehia te ùnaùna o te ora. Àreà ra tei maìri i te vahi repo maitaì, oia te taata tei faaroo i te parau o te Patireia, e ua haapaò maite atu ra i te reira, ua hotu mai ra te reira e ua parare taua parau ra i te mau vahi atoà. Tupu mau atu ra te parau a te Atua, i nià i ta Ìtaia faaìteraa i te pene 55 i te ìrava 11 O ia atoà  te parau no roto i to ù nei vaha, e òre e hoì faufaa òre noa mai ia ù nei, e tupu ra tei ôpuahia e au ra, e noaa hoì te mea faaue atu ai au ra. O te Fatu atoà ia hinaaro ia tätou, ia riro atoà tätou ei mau taata ueue huero no te parau mau no Ietu Metia, i roto ia tätou, i roto i to tätou mau ùtuafare e i roto i teie nei ao. Oia hoì te tiàturi mai nei te Atua ia tätou, te taata tataì tahi aita roa te hoê i roto ia tätou i ère i te topahia e teie huero no te Parau Maitaì a te Atua. O te taata ia tei faaroo e tei märamarama i te parau; hotu mai ra tä na, hoê hänere i nià i te tahi huero, e ono àhuru i nià i te tahi, e toru àhuru i nià i te tahi.

 

Teraì òr. Faatura.

Mätaio 11.25-30. Hopoià

 

Tāpati 9 no Tiurai 2023.

Hopoià

Taramo 145

1Taramo haamaitaì na Tävita. E faateitei ä vau ia òe, e ta ù Atua, e te Arii, e haamaitaì ä vau i to òe ra iòa e a muri noa atu.

2 E haamaitaì ä vau ia òe i te mau mahana atoà nei, e ârue au i to iòa e a muri noa atu.

3 E rahi te Fatu, e ia haamaitaì-rahi-hia, oia ä ia, e òre to na rahi e ìteä ia ìmi.

4 Te mau uì atoà të faarahi i ta òe òhipa, e e faaìte hoì i ta òe ra òhipa mana.

5 E parau vau i te tura e te hanahana o to òe ra mana, e te mau räveà taa ê na òe ra.

6 E parau rätou i te mana o ta oe ra mau räveà mataù, e e faaìte hoì au i to òe ra mana.

7 E parau ä rätou i te manaòraa o to òe ra maitaì rahi, e himene hua hoì i ta òe ra parau tià.

8 E hämani maitaì e te aroha to te Fatu, e òre e riri vave, e te faaherehere rahi.

9 Hämani maitaì to te Fatu i te taata atoà, e te vai ra to na aroha faaherehere rahi i nià i to na atoà ra mau òhipa.

10 E ârue anaè ta òe atoà ra mau òhipa ia òe, e te Fatu, e na to mau tävini moà e haamaitaì ia òe.

11 E parau rätou i te hanahana o to òe ra pätireia, e faatià noa hoì i ta òe ra mau räveà püai.

12 I te faaìteraa i te tamarii a te taata nei i to na ra mana, e te hanahana e te manaò to na ra pätireia.

13 O to òe ra pätireia, e pätireia mure òre ia, e to òe ra mana, e tae ia i te mau uì atoà ra.

13 bis(E Atua mau te Atua e te haavare òre i roto i ta na mau òhipa.)

14 Te mau ra te Fatu i te feiä e hià ra, e ua faatià i te feiä e piò i raro ra.

15 Te hiò nei te mata o te mau mea atoà nei ia òe, e te horoà mai ra òe i te mäa na rätou i te tau mau.

16 Te heheu nei òe i to rima, e te haamäha nei i te hiaai o te mau mea ora atoà nei.

17 E parau tià ta te Fatu i ta na atoà ra mau haereà, e te hämani maitaì i ta na atoà ra mau òhipa.

18 Te fätata mai ra te Fatu i te feiä e tiàoro atu ia na, i te feiä atoà i tiàoro atu ia na mä te haavare òre.

19 E faatià o ia i te hinaaro o te feiä i mataù ia na, e faaroo mai o ia i ta rätou tiàoro, e e faaora hoì ia rätou.

20 Te tiaì nei te Fatu i te feiä i hinaaro ia na, âreà te feiä paieti-òre ra, e haamouhia ia e ana.

21 E parau ta ù vaha mä te ârue i te Fatu, e ia haamaitaì te taata atoà i to na ra iòa moà e a muri noa atu.

Tätäria 9.9-10

Te metia haèhaa e te hau

9 A òaòa hua na òe, e te tamahine o Tiona e; a pii na, e te tamahine o Ierutarëma e; inaha, te haere mai ra to arii ia òe ra: e parau tià tä na, e o te Ora hoì o ia, haèhaa tö na, i te pärahiraa i nià i te âtini, e te pinia, te fanauà o te âtini.

10 E faaòrehia e au te pereoo i Èferaima, e te puaahorofenua i Ierutarëma, e faaòre-atoà-hia hoì te fana tamaì: e nä na e parau i te mau êtene i te parau hau: e riro to na hau mai te miti mai e tae noa atu i te tahi miti, e mai te pape mai e tae noa atu i te mau hopeà o te fenua ra.

Röma 8.9-13

9 Aore rä òutou i au i ta te tino ra, te au nei rä i ta te Värua ra, no te mea te pärahi ra te Värua o te Atua i roto ia òutou. Te ère ra rä te hoê taata i te Värua o te Metia ra, eere ia o ia i te taata no na.

10 E tei roto te Metia ia òutou ra, te ora nei ia te Värua i te parau tià, ua pohe mau rä te tino i te hara.

11 Te pärahi ra to na Värua i roto ia òutou to tei faatià ia Ietu i te poheraa ra, o tei faatià i te Metia i te poheraa ra, na na atoà ia e faaora i to òutou mau tino pohe ra i to na Värua i pärahi i roto ia òutou na.

12 E teie nei, e te mau taeaè ra, e àmutärahu tätou, eere rä i ta te tino a haapaò atu ai i ta te tino ra.

13 Ia haapaò hoì òutou i ta te tino ra, e pohe ia òutou; ia tinai rä òutou i ta te tino ra i te Värua, e ora ia òutou.

Mätaio 11.25-30.

Te Metua e te Tamaiti

(Rut 10.21-22)

25 I taua taime ra, ua parau atu ra Ietu: «E haamaitaì au ia òe, e ta ù Metua, e te Fatu o te raì e te fenua, i te mea i huna ê noa òe i teie nei mau òhipa i te feiä paari e i te feiä märamarama, e ua heheu mai i te mau àiü. 26 Oia ia, e ta ù Metua, ua au te reira ia òe.

27 Ua hope roa te mau mea atoà i te püpühia mai e ta ù Metua ia ù nei, e aore roa te hoê i ìte i te Tamaiti, mäori rä o te Metua, aore hoì te hoê i ìte i te Metua, mäori rä o te Tamaiti, e ta te Tamaiti i hinaaro i te heheu atu ia na.

A rave mai i ta ù tuto

28 E haere mai òutou ia ù nei, e te feiä atoà i rohirohi, e tei teiaha i te hopoià, e höroà atu vau ia òutou i te faaearaa hau.

29 A rave mai i ta ù tuto i nià ia òutou, e ia haapiihia òutou e au, te marû nei hoì au e te haèhaa nei ta ù âau: e e noaa hoì te faaearaa hau i to òutou värua.

30 Te marü nei hoì ta ù tuto e te mämä nei ta ù hopoià.

Manaò.

Ia faahiti atu vau i teie huru parau ia tätou i teie mahana, e Atua faahou ä nei ra to te taata i teie mahana. E âueue te fenua i to òutou faarooraa i teie huru parauraa, e te riri atoà. Nähea te Atua i te faaruê i te taata. Teie Atua tei faaìte mai i to  na tiàraa Metua na roto i te höroàraa mai i ta na Tämaïti ia pohe no te faaora i teie nei ao i te hara, ia noaa te ora mure òre. Eiaha ra tätou ia mäheaitu i roto i to òutou âau i teie huru parauraa. I te mea aita tätou e fatu i te Atua, ua ìte rä te Atua i te hiò i to na mau taata teie te parauraa na Ìtaia i te pene 1, i te mau ìrava 16 e tae i te 17, e horoi ia òutou, e ia mä òutou, e faataa ê òutou i te ìno ta òutou e rave ra i mua i to ù nei aro, a tirä na i te rave i te ìno, e haapii rä i te parau maitaì, e ìmi i te mea tià, tei roto atoà te taata parau i teie huru parauraa, oia te matamehaì. Hou ra tätou a uiui ai to tätou mau manaò, mea tià atoà ia taa maitaì tätou i te mea ta tätou e hinaaro ra. Àhiri, o vai teie Atua ta tätou e parau nei, te Atua änei o Ietu Metia, tei hinaaro i te ora o to te ao, aore ra, te Atua ta tätou i hämani èi Atua no tätou. Te hoê Atua pohe ta tätou i àuvaha i te mau hinaaro atoà, te hoê Atua tei faatano noa i ta tätou mau òhipa tià òre, te hoê Atua tei òre i haapeàpeà mai i te hau o to tätou âau ia haavare tätou i te taata, e ia piti noa atu te fatu ta tätou e tävini, te hoê Atua tei mauruüru e tei höroà i to na mau tävini, te mau Tiàtono, te Òrometua, te Haapii Èvaneria, i te parau faatià no te haere e haaviivii te òhipa porotita, e faahepo hoì i te taata ia mäìti i ô, eiaha ra i ô, oia hoì, ia tävini i te atua pohe, te haavare ia tupu noa te pae ïti e te pae rahi. Te reira Atua, èita e faaruê ia tätou, no te mea na tätou i hämani, e ora o na i ta tätou haavare, e to na ora ra, no te faaora atoà ia ia tätou, e no te faaravaì rii i ta tätou hopeà âvaè. No te mea na tätou o na i hämani, e faatura o na ia tätou e i to tätou mau hinaaro atoà. Te paari o teie Atua, tei to na rave-atoà-raa i te huru e te Parau a te Atua o Ietu Metia, òre noa atu ä te hinaaro o Ietu Metia e täuàhia. Ia au ra i te mau taiòraa i faataahia no teie mahana, te tïtau mai nei ia tätou e raveà te vai nei i te Atua ra, i te faatororaa i to tätou âau no te täpeà i te rima faaora o te Atua te Tumu o te mau maitaì atoà e òre ai òe e ìte faahou ai i te ahoaho. E Atua ora to tätou, tei hinaaro mai i te faaora ia tätou e te nünaa ta na i mäìti èi nunaa no na. Te tumu ia tätou e tià ai te nünaa faaroo i Mäòhi Nui nei, i te mea tei pïhaì iho to tätou Atua ia tätou, to tätou mau Tupuna, to tätou Fenua ia tätou. E aha ta tätou e taiä nei a mau i te ora ia ora tätou. Te reira te hinaaro o te Atua Nui Tumu Tahi, to na here ia tätou mai te miti e fäti tuatau nei i nià i aau, ta tätou e faaroo noa nei mai te mau taì pahu, toère, hakete, ùkarere, e òto ra i roto i te mau heiva, o ta te Atua ia faaìteraa i to na here tei firihia i na fenu e toru. Faaroo mai na rä te haapotoraa no ta tätou mau taiòraa no teie mahana :

-Taramo 145, 19 E faatià o ia i te hinaaro o te feiä i mataù ia na, e faaroo mai o ia i ta rätou tiàoro, e e faaora hoì ia rätou.

-Tëtäria 9, 10 E faaòrehia e au te pereoo i Èferaima, e te puaahorofenua i Ierutarëma, e faaòre-atoà-hia hoì te fana tamaì: e nä na e parau i te mau êtene i te parau hau: e riro to na hau mai te miti mai e tae noa atu i te tahi miti, e mai te pape mai e tae noa atu i te mau hopeà o te fenua ra.

-Roma 8, 11 Te pärahi ra to na Värua i roto ia òutou to tei faatià ia Ietu i te poheraa ra, o tei faatià i te Metia i te poheraa ra, na na atoà ia e faaora i to òutou mau tino pohe ra i to na Värua i pärahi i roto ia òutou na.

-Mätaio 11, 28 E haere mai òutou ia ù nei, e te feiä atoà i rohirohi, e tei teiaha i te hopoià, e höroà atu vau ia òutou i te faaearaa hau.

Te pure nei o Ietu i to na Metua, ma te haamaitaì i to na Metua, te Fatu o te raì e te fenua, te mau mea i hunahia e te feiä paari e i te feiä märamarama, e ua heheuhia mai i te mau àiü.  E ta ù Metua, ua au te reira ia òe. I faaìte ai o Ietu i to na tiàraa i mua i te Metua,  e aore roa te hoê i ìte i te Tamaiti, mäori rä o te Metua, aore hoì te hoê i ìte i te Metua, mäori rä o te Tamaiti, e ta te Tamaiti i hinaaro i te heheu atu ia na. Teie te äniraa a Ietu i te mau taata, A rave mai i ta ù tuto, no te feiä i rohirohi, tei teiaha i te hopoià, e höroà o Ietu te faaearaa hau.  Ia haapiihia rä, te marü te haèhaa o te âau ia noaa te faaearaa hau i te värua. Te marü nei hoì ta ù tuto e te mämä nei ta ù hopoià.

Te parau no te tuto, e täno ia täpirihia i te parau no te tätauro. Te feia i faautuàhia, eita e anihia to rätou manào, na rätou ihoä e amo te täuihaa tei riro ei pohe no rätou. Te auraa, na rätou ihoä e amo i to rätou tätauro. E ia au i te reira peu, te parau atoà ra Ietu, i te taata e hinaaro e haere mai na muri iho ia na, a rave mai i tona iho.

Te tuto, e peu atoà te reira i roto i te òhipa faaàpu, e i roto atoà i te parau no te mau tîtî te ìte-atoà-hia ra. Te faaòhipa atoà nei ra o Ietu i te reira parau, mai te parau atoà atu e, a rave, a rave i te tuto o ta na e tuu ra, eiaha ra i ô nei, mai te mea ra e te tahi teie utuà e faautahia ra i nià i te taata. Te parauhia ra, a rave, No te mea, te tuto, i nià i te puaatoro, eita te manào o te puaatoro e anihia atu, i nià i te tîtî, eita atoà to na manào e anihia atu, te parau ra Ietu, a rave.

Te auraa ; e hopoià ihoä tera.

Te taata e rave i ta na òhipa, e ère i te tahi mea mama, e ère i te tahi tere e ori haere, e ère i te tere mätaìtaì, e raveà atoà rä te reira hopoià e âfaro ai te èà o te taata, no te mea, aita atu o ta na, te faaotiraa i te òhipa no reira o na i färii ai teie hopoià i nià ia na.

Mea mama ra no te mea na te âau i färii, e ère i te mea faautahia. Te taata i faaèrehia i te maa, mea teiaha, e roaa te ìnoìnoraa, te taata ra i färii i te faaère ia na no te tahi tumu, aita te reira mea e riro ra ei mea teiaha, no te mea na na i hinaaro, e, e ôpuaraa ta na e tïtau ra. Te hoê metua ia tae i te tau fifi, aita o na e peàpeà ia ère o na, ia ìte ra o na i ta na tamarii te tämaa ra. Te reira, e ère i te mea teiaha no na, mea mama no na te reira faaèreraa ia na. No reira, ua parau anaè Ietu e, « a rave i ta ù tuto », i roto ihoä i te parau, te vai ra te haapäpüraa e, eiaha e manào e, te taata e rave i ta ù òhipa, e tere ori haereraa teie, mea teiaha ihoä, e taumi ihoä tera mea ia òe. No te mea ra, na òe i hinaaro, ua ìte ia òe, eita te reira mea e riro ei mea teiaha mai te ra e faautahia ra i nià i te tîtî, aore ra, mai te ra e faautahia ra i nià i te puaatoro. No te mea, na òe e farii ra, i nià noa i te ra reni i faataahia mai, eiaha ra, i nià atu i te tahi vahi ta òe e faahinaaro ra i te haere, aore ra, te tahi atu. Mai te ra pai parau e parauhia ra ia Petero, tera âpïraa òe na òe noa ihoä òe e tätua, paari anaè òe, aita, e taata ê te haere mai e täamu te reira mea i nià ia òe, ta òe, te haere noa. Hou òe a färii ai, e haere òe i te vahi o ta òe e hinaaro mai ta òe e hinaaro, ia färii anaè ra òe i te ra, ua ìte atoà òe e, te vai atoà ra te haavïraa, te manào faaèreraa. No te mea ra, na òe i hinaaro eita te reira e riro ei mea teiaha, mea mama te reira. Te tuto, te tahi ihoä te reira mea e taumi ihoä o na ia òe, te täviniraa i te Fatu, mea teiaha ihoä, no te mea ra ua ìte òe no te aha e ua färii òe, eita e riro faahou ei mea teiaha.

« ….haere mai òutou ia ù, na ù òutou …… »

Teie nei ra, mea puai teie parauraa a Ietu, « tei tamaha te hopoià… », Eiaha e manào e, na Ietu e amo, e ère pai tätou e mea haere e huri atu ai i nià ia na a rave atu. Na ô noa na i te hiò, e rave au hoê hapaina pape, mea î, pape veàveà, rave faahou hoê hapaina pape, pape toètoè, ia manii au i te ra pape toètoè i roto i te ra hapaina päpe veàveà, päpü maitaì, te ra pape veàveà, e manii ò na, no te mea, mea î, e päpe âpï tera e haere atu nei i roto, e haere ò na i rapae, o vai tei toètoè, o vai tei veàveà.

Te taata tei teimaha te hopoià… ; mai te peu e faaea noa ò na oia anaè, ua î ia ò na i te peàpeà, ia färii ra ò na i te parau, na te reira parau e turaì tera mau fifi to na i rapae e riro atu ai ei mea mama. Färii i te parau, e manii ia tera mea i rapae. Mai te peu, eita òutou e färii i te parau, e î noa ihoä òutou i to òutou ìnoìno, to òutou peàpeà e to òutou mauiui. Ia ö anaè ra te parau e manii tera mea, e mama roa, aita faahou i roto. Eiaha tätou e faanavenave ia tätou i te naòraa e, vaiiho na te tamaiti ra e rave, aita. Mea naò ta na ia tatara, färii òe i te parau e haere ia tera mea i rapae. Te tahi haapiiraa ta tätou i hiò mai, ua parau ihoä ra hoì o Ietu; « te mau mea atoà o tätou e ani ma to ù nei iòa, e horoàhia mai. » Mea maitaì atoà ra ia ìte, ua na reira anaè, inaha ua parau mai Ietu  « e roaa », e haapaò te taata i to na hinaaro, eita te taata e haapaò faahou i te hinaaro o te Atua. E ara maitaì atoà, te vai ra te ôtià o te parau. Aita tätou e haapaò nei te parau, no te mea atoà ra hoì ua paari maitaì te mau haapiiraa. Te vai ra ihoä te auraa i matauhia no te ahoaho ; hepohepo. Ia ahoaho anaè ua rahi ia te hepohepo. E te hepohepo ; o te huru ia o te taata i roto i te fifi, aita e taa faahou e, e färiu ra i hea, i hea e roaa mai ai te tauturu e mama rii ai òna. Ahoaho ; horo hanoa, aita e taa faahou e nahea ra. Te auraa mätamua ia. Te piti o te auraa no te ahoaho ; ia au i te faaòhiparaa ; te faaèreraa, te faaearaa te taata i àmu i te maa, e parau atoàhia, te ahoaho ra. Teie nei, ia hiò anaèhia te arataìraa o te parau, te taata i roto i te hepohepo rahi ; eita atoà ihoä ta na maa e topa. Teie nei ra, no te fifi ò na i òre ai e àmu i te maa, te reira te haamataraa o te parau. I muri iho ra, ua parau te taata, e ahoaho, òre noa atu ai to na e fifi, i nià i tera manào e, te faaoti ra ò na eiaha e àmu i te maa, te ahoaho ra. No te mea, ia haere anaè te parau, te vai ra to na haamataraa, e te vai ra te taime ò na e täui ai, e mau te parau. Te auraa no te ahoaho, ei haapae, mea na roto mai ò na i tera manào mätamua, rahi te hepohepo, eita e àmu i te maa. E tera manào, eita e àmu i te maa, te riro atu ra èi auraa no te hepohepo, mau mai nei ei auraa atoà ae no tera parau no te haapaeraa. I reira raua e tuàti mai ai, te haamataraa rä no tera parau no te ahoaho, e ère ia e, e haapaeraa maa, te auraa rä te reira o ta na i rave mai i muri mai. Ua mau te parau i nià i tera manào e, ia naò anaèhia e, te ahoaho ra ; e faaotihia paì, e hinaarohia, areà i te tahi, aita te taata e hinaaro i te fifi, ua o anaè ra i roto i te fifi e te hepohepo rahi, eita ihoä te maa e topa faahou. No te mea, te parau, te vai ra ihoä to na tumu, te vai ra ihoä tona haamataraa e te vai ra te täuiraa i roto i te faaòhiparaa, e tae i te tahi taime, e mau faahou te parau. Tera ia, tera mauraa, tei nià i tera manào e, haapae. O te tahi atoà tura te reira faaòhiparaa no tera parau, haapae, e ahoaho. Te vai atoà ra hoì te tahi auraa ta tätou i faahiti mai, tei roto i tera taiòraa i nià i tera manào no te faahaèhaa. Petero 8, 21. Te reira atoà te tahi faaòhiparaa, te tahi atoà auraa e horoàhia ra i roto i tera parau. Te toru ia o te auraa. Te ite ra tätou e, tera mau parau, e ère i te mea pinepine i te faaòhipahia, aita te taata e parau nei mai tera, ua moè, auaè ra, te vai ra te tahi mau täpaò rii e faaite mai ra, aita, ua parau atoàhia na tera, e tera te auraa e parauhia ra. Na te reira noa e faaora faahou mai i te reira mau parau. Te auraa ; e naò ia tätou, e faaäraraa atoà tera ia tätou, ia ui anaèhia mai, e ère paì no te mea te vai ra te tahi auraa no te tahi taò e aita tätou i mätau i naò ai tätou e, aita. Te vai ra ihoä te tahi mau parau e aita tätou e ìte ra, no te mea, e ère i te mea pinepine i te faaòhipahia. Ua faahiti anaèhia mai ra, e ère atoà e, mea haapaò parau noa, e horoà ia i te tahi auraa âpï, aita tätou e hämani i te tahi reo âpï, te rave noa ra tätou i te mea e vai ra, e tamata i te faaora faahou i tera mau parau. I teie parauraa na Ietu ia tätou i teie mahana, 28 E haere mai òutou ia ù nei, e te feiä atoà i rohirohi, e tei teiaha i te hopoià, e höroà atu vau ia òutou i te faaearaa hau.

 

Teraì òr. Faatura.

 

 

Mätaio 10.37- 42. Âreà.

 

Tāpati 2 no Tiunu 2023.

ÔROÀ

Âreà.

Taramo 89

1 Matetira a Ètana te âti-Ètera ra.

2 E tämau ä vau i te himene i te aroha o te Fatu, e na ta ù vaha e faaìte i te parau mau na òe, i tërä uì i tërä uì.

3 I parau hoì au e: E tià to aroha i te vai-mäite-raa, tei te mau raì ra to parau mau i te haamau-raa-hia.

4 Ua parau òe: «Ua fafauhia e au te faufaa i tei haapaòhia e au ra, ua tapu vau i ta ù tävini ra, ia Tävita:

5 E haamau ä vau i to òe ra huaai e a muri noa atu, e patu vau i to òe ra teröno e tae noa atu i te mau uì atoà ra. Tera.

6 Ia haamaitaì te mau raì i ta òe ra räveà mana, e te Fatu, e te âmuiraa o te feiä moà ra, i ta òe ra parau mau.

7 O vai hoì to te mau raì ra e au i te Fatu? O vai tei au i te Fatu i roto i te mau tamarii a tei mana ra?

8 E Atua mataù-roa-hia i te âmuiraa o te feiä moà ra, e ia faahanahanahia e te feiä atoà i pïhaì iho ia na ra.

9 E te Atua manahope, e te Fatu, o vai tei au ia òe ra? E mana rahi to òe, e te Fatu, e te haapunihia ra òe e ta òe ra parau mau.

10 O òe hoì tei mana i te ûànaraa o te miti ra, e ia tupu to na àre, na òe e haamania.

11 Ua ôfatifati òe ia Rähapa mai te mea ua paruparu ê na, e na to rima ètaèta i haapurara i to mau ènemi.

12 Na òe te mau raì nei, e na òe atoà te fenua; te ao e to te ao atoà ra, na òe ä i hämani.

13 O àpatoèrau e o àpatoà, na òe i hämani; o Täpora e o Heremona tei himene hua i to òe ra iòa.

14 E rima püai to òe, ètaèta tei to rima, e te teitei roa ra to rima àtau.

15 O te parau tià ra e te au, o te tumu ia o to òe ra teröno. O te aroha ra e te parau mau, tei nä mua ia i to mata.

16 E ao to te mau taata i ìte i te reo òaòa ra. E hahaere ä rätou, e te Fatu, i te märamarama o to mata ra.

17 Te òaòa ra rätou i to iòa e mure noa atu te mahana, e ua teitei rätou i te parau tià na òe ra.

18 O òe hoì te hanahana o to rätou püai, e na te here na òe ra i teitei ai to mätou tara.

19 O te Fatu mau ä to mätou tauturu, e tei moà i Ìteraèra nei, o to mätou ia arii.

20 I reira ta òe parau-ôrama-raa mai i to taata moà ra, e ua nä ô mai ra: «Ua tuu vau i te tauturu i nià i tei mana ra, ua faateitei au i te hoê i haapaòhia no roto i te mau taata nei.

21 Ua ìteä ia ù ta ù tävini o Tävita, e ua faatähinu vau ia na i ta ù monoì moà ra.

22 Na to ù iho rima o ia e haamau, e na to ù iho rima o ia e faaètaèta.

23 E òre roa o ia e vï i te ènemi, e òre hoì o ia e ìno i te taata parau ìino ra.

24 E täìrihia e au to na mau ènemi i mua i to na mata, e täìrihia e au te feiä i riri mai ia na ra.

25 Ei ia na te parau mau na ù, e ta ù aroha vai ai e teitei hoì to na tara i to ù nei iòa.

26 E tuu vau i ta na rima àui i raro i te tai, e ta na rima àtau i raro i te pape.

27 E na na e pii mai ia ù e: «O ta ù metua òe, e ta ù Atua. E ta ù pare e ora ai au ra.

28 E faariro vau ia na ei mätahiapo na ù, e ia teitei o ia i te mau arii atoà o te fenua nei.

29 E vai ä ta ù hämani maitaì ia na, e ta ù faufaa ia na ra e päpü ia.

30 E haamau vau i to na ra huaai e a muri noa atu, e vaiiho taiàta hoì to na teröno mai te mau raì atoà nei.

31 Ia faaruè ta na mau tamarii i ta ù ture, e aore i haapaò i ta ù ra parau au;

32 ia faahapa rätou i ta ù ra haapaòraa, e aore i faaroo i ta ù ra parau:

33 e papaì au ia rätou i ta rätou ra hara i te papaì, e to rätou ìno i te täìri.

34 O to ù rä hämani maitaì, e òre ia e hopoi-ê-hia ia na, e òre hoì te parau mau na ù ra e haamaìrihia.

35 Ta ù faufaa ra e òre e faaòrehia e au, e òre hoì e ruri ê i tei nä roto mai i to ù nei vaha.

36  Hoê aè nei a ù nei täpuraa i to ù iho ra moà: e e òre au e haavare ia Tävita.

37 E vai ä to na huaai e a muri noa atu, e to na teröno, mai te mahana ia i mua ia ù ra,

38  e tià ia i te vai-mäite-raa, mai te märama ra, e mai te ìte haavare òre i nià i te raì ra. Tera.

39 I teie nei rä, ua faaruè òe e ua haaveùveù; ua riri òe i ta òe i faatähinu ra.

40 Ua faaòre òe i te faufaa i to tävini nei, ua haaviivii òe i to na toröna i raro i te repo.

41 Ua vävähi òe i te mau âua na na, e ua huri-tumu-hia e òe to na mau haapüraa ètaèta.

42 Te haruhia ra o ia e te feiä atoà i haere nä te èà, e ua riro o ia ei faaìnoraa na to na ra mau taata-tupu.

43 Ua faateitei òe i te rima àtau o tei märô mai ia na, e ua faaòaòa òe i to na atoà ra mau ènemi.

44 Ua haamemu òe i te mata o ta na òè, e aita atu ra o ia e mau i te àroraa ra.

45 Ua faaòre òe i to na ùnaùna, e ua huri òe i to na teröno i raro i te repo.

46 Ua haamure òe i te mau mahana o to na ra âpïraa, e ua vehi òe ia na i te haamä. Tera.



47 Mai te aha ra te mäoro, e te Fatu, o to òe haamoèraa? E vaiiho noa änei i to riri ia àma noa na mai te auahi e a muri noa atu?

48 E haamanaò i te poto o to ù nei taime. E e aha òe i hämani ai i te mau tamarii atoà a te taata nei ei mea faufaa òre ra?

49 O vai te taata e ora e eita e ìte i te pohe, a ora ai to na värua i te rima o häte? Tera.

50 Tei hea, e te Fatu, to mau hämani maitaì tahito ra, ta òe i haamau i te parau mau na òe ia Tävita ra?

51 E haamanaò, e te Fatu, i te faaìno i faaìnohia ai to mau tävini nei, e tei nià i ta ù ôuma te tähitohito o te taata nei e rave rahi.

52 Ta to mau ènemi i faaìno mai, e te Fatu, o tei faaìno mai i te haereà o tei faatähinuhia e òe ra.

53 Ia haamaitaìhia te Fatu e a muri noa atu Âmene, e Âmene.  

2 Te mau Arii 4.8-16.

Tiàfaahouraa.

8 E tae aè ra i te hoê mahana, te haere ra Èritaia i Tünema, tei reira te hoê vahine taoà; e ua märô mai ra o ia ia na e àmu i te mäa. E muri aè ra, ua haere anaè o ia nä reira ra, ua täpae o ia e ua àmu i te mäa.

9 Ua parau atu ra o ia i te täne, Inaha te ìte nei au i teie nei taata e haere pinepine mai i ô nei, taata moà ia na te Atua.

10 Täua e hämani i te tahi piha iti nö na i nià i te patu nei; a tuu ai täua i te tahi roì nö na, e te tahi àmuraa, e te tahi pärahiraa, e te tahi rämepa, e ia tae noa mai o ia i ô nei, a täpae mai o ia.

11 E tae aè ra i te hoê mahana, ua haere mai ra o ia i reira, e ua täpae aè ra i roto i taua piha ra, e ua taòto iho ra.

12 Ua parau atu ra o ia i te tävini ia Tehati, A pii atu na i te vahine Tünema. E oti aè ra i te piihia e ana, ua tià noa mai ra i mua ia na.

13 Ua parau atu ra o ia ia na, E parau atu òe ia na e, Inaha, i faaitoito noa na hoì òe ia mäua i tënä na faaitoitoraa; e nä hea atu ra mäua ia òe? Ia parauhia atu änei òe i te arii, e te raatira o te nuu nei änei? Ua nä ô mai ra o ia, Te pärahi nei au i roto i to mätou iho nei.

14 Ua nä ô mai ra o ia, E nä-hea-hia atu ra o ia? Ua parau atu ra Tehati, Aita a na e tamaiti, e ua ruhiruhiä hoì te täne.

15 Ua parau mai ra o ia, a pii atu na. E oti aè ra o ia i te piihia atu, te tià noa mai ra i te ùputa.

16 Ua parau atu ra o ia, Mai teie nei, i te tau i haapaòhia ra, e tamaitihia ta òe. Ua parau mai ra o ia, Eiaha, e ta ù fatu, e te taata o te Atua ra, eiaha na òe e haavare mai i to tävini nei.

Röma 6.3-11

3 Aita ä òutou i ìte o tätou atoà tei päpetitohia i roto i te Metia ra ia Ietu, ua päpetitohia ia i roto i to na ra pohe?

4 E teie nei, ua tänuhia tätou e o ia atoà, i te päpetito-raa-hia i roto i to na ra pohe; mai te Metia i faatiàhia e te mana o te Metua i te poheraa ra, ia haapaò atoà tätou i te haereà e au i te ora âpï.

5 I âpiti-atoà-hia hoì tätou ia na i te huru o to na ra pohe, e âpiti-atoà-hia ia tätou i te huru o to na ra tiàfaahouraa i nià.

6 Ua ìte hoì e ua faatataurohia to tätou taata tahito e o ia atoà hoì, ia paruparu te tino o te ìno, ia òre tätou ia faaroo tävini faahou i te ìno nei.

7 O te taata hoì i pohe ra, ua matara ia o ia i te ìno nei.

8 I pohe na hoì tätou e te Metia atoà, ua ìte hoì tätou e, e ora tätou e o ia atoà hoì.

9 Ua ìte hoì tätou e, o te Metia i faatiàhia i te poheraa ra, e òre ia e pohe faahou, e òre hoì e mana faahou te pohe ia na.

10 O ia hoì i pohe ra, i pohe ia i te hara, hoê roa rä poheraa; o ia rä i ora ra, i ora ia i te Atua.

11 E manaò atoà hoì òutou ia òutou iho, e ua pohe mau i te ìno ra, ia ora rä òutou i te Atua, i to tätou Fatu ra ia Ietu Metia.

Mätaio 10.37- 42.

Te haapaeraa ia na iho no te pee ia Ietu

(Mär 8.34-35; Rut 14.26-27; 9.23-24)

37 O tei rahi to na hinaaro i ta na metua täne, e aore ia, i ta na metua vahine, iti ia ù, aita o ia i au ia ù, e o tei rahi aè to na hinaaro i te tamaiti, e aore ia, i te tamahine, iti ia ù, aita o ia i au ia ù.

38 E o të òre e rave i to na tätauro a pee mai ai ia ù, aita o ia i au ia ù.

39 O tei ìte i to na ora, e ère ia i te ora; âreà tei ère i to na ora no ù nei, e ìteä ia ia na te ora.

Tei färii mai ia òutou, ua färii mai ia ia ù

(Mär 9.37, 41; Rut 9.48; 10.16; Ioa 13.20)

40 O tei ìte/färii mai ia òutou na, ua ìte/färii ia ia ù, e o tei ìte/färii mai ia ù nei, ua ìte/färii ia i tei tono mai ia ù nei ra.

41O tei ìte/färii mai i te perofeta, no te mea e perofeta, e noaa ia ia na ta te perofeta ra utuà; e o tei ìte/färii mai i te taata parau tià, no te mea e taata parau tià, e noaa ia na ta te taata parau tià ra utuà.

42 E o të höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà.

Manaò.

Te faateitei nei tätou i te Atua Nui Tumu Tahi, o ia i faatumu i ta na ôpuaraa faaora i roto ia Mäòhi Nui, tei faaìte i te hana o te fenua. Ma te ìte atoà ra i te huru no te faanahoraa o te taata, tei hinaarohia e a na iho o ta na i manaò e au no to na oraraa.Te ao e faanaòhia nei e tätou. Ua papahia i nià i teie mau parau no te mau taiòraa i faanahohia no teie mahana. Ia ù i taiò e i faaroo te mau ìrava i höroàhia mai, te ìtehia ra te tahi mau tià, i roto i teie parau, mai te mea ra, e fäìraa faaroo teie. I parauhia to te fäìraa faaroo, ta te tahi ia taata faaìteraa i to na tiàturiraa i te Atua. No te mea, te fäìraa, e faaìteraa.Te faaìte noa mai ra te mau taiòraa te mau manaò e tià i te tauturu ia tätou ia au i teie mau turämaraa. Te mau vähi ta te manaò e faatoro ra, te haere nei tätou na reira, te vähi tätou e pärahi, e nohoraa no te Atua. Te faahitihia ra te parau no te Atua i roto i te rau, e naò noa ia teie manaò i te parauaraa  te Atua e faahitihia ra ia au i te mau taiòraa no teie mahana, o to tätou atoà ia Atua. I te mea te nä mua rä te parau o te fenua, te nünaa teie e haapäpü-noa-hia mai ra ia tätou te hanahana o te  Atua. Te haamataraa o ta tätou mau taiòraa, te nä ô ra, E tämau ä vau i te himene i te aroha o te Fatu, e na ta ù vaha e faaìte i te parau mau na òe, i tërä uì i tërä uì. Te märamarama noa ra tätou e, te hinaaro o te Atua i te taata, ia tauturu ia o ia i te Atua i te faatupuraa i to na hinaaro. E tano tätou e parau e, ia ìte òe i te Atua, ua ìte atoà òe e, e tuhaa ta òe i te Atua ra. E haapae roa tätou i te manaò e, e Atua faaueue te Atua e te hinaaro faatina i te taata i nià i te òhipa. Ia haapäpü mai hoì te Atua e : Ta ù mau i ìmi ra, te reira të tupu ; e ta ù i ôpua ra, te reira të mau  Itaia pene 14 ìrava 24, no te haamanaò ä ia i te taata e, eita te Atua e taui i ta na parau. No reira, haere noa ai te fëtii taata no na te parau ta tätou e hiò nei i to na haereà, rave noa ai i te faaotiraa ta na i manaò e mea maitaì no na, faaruru noa ai hoì i te fifi, te ö noa ra te reira i roto i te ôpuaraa a te Atua. Mai te taheraa pape rii e faarari ra i te taha mato e tei âmui i roto i te ânävai, mai te reira atoà te mau fifi atoà i färereihia e teie fëtii taata i te öraa i roto i te ôpuaraa a te Atua ; mai ia tätou rä e òre e ìte ra i te tüàtiraa e vai ra i roto i te pape e faarari ra i te tahamato, e te pape e tahe ra i roto i te ânävai, nä reira hoì te huru ta te pape e rave atu i nià i to na èà, oia atoà tätou i mua i te tupuraa o te hinaaro o te Atua, aita atoà tätou i ìte i te huru ta te reira parau e rave atu. Rave na tätou ei hiòraa na tätou te òhipa a teie pü hiòpoà i te huru o te reva, e mea pinepine roa tätou i te ìte i ta rätou mau tohu i te òreraa e tupu. Ia faaara mai rätou e, e maitaì te mahana a nanahi, inaha te ua mai nei ; aore ra, e ua a nanahi, e inaha te maitaì mai nei te mahana. Aita teie feiä i haavare, ua faaìte noa mai te paruparu o ta rätou mau tohuraa, te vai ra te ôtià o te taata i mua i te tupuraa o te tahi mea të òre e noaa ia na ia faanaho. I parau ai teie mau haapotoraa i te naòraa e:

-Taramo 89, 16 E ao to te mau taata i ìte i te reo òaòa ra. E hahaere ä rätou, e te Fatu, i te märamarama o to mata ra.

-2 Te mau Arii 4, 16 Ua parau atu ra o ia, Mai teie nei, i te tau i haapaòhia ra, e tamaitihia ta òe. Ua parau mai ra o ia, Eiaha, e ta ù fatu, e te taata o te Atua ra, eiaha na òe e haavare mai i to tävini nei.

-Röma 6, 5 I âpiti-atoà-hia hoì tätou ia na i te huru o to na ra pohe, e âpiti-atoà-hia ia tätou i te huru o to na ra tiàfaahouraa i nià.  

-Mätaio 10, 39 O tei ìte i to na ora, e ère ia i te ora; âreà tei ère i to na ora no ù nei, e ìteä ia ia na te ora.

Te haapaeraa ia na iho no te pee ia Ietu, ma te faahiti i te parau no ïti, ia ïti i te hinaaro i te Metia aita o ia i au i te Metia. Ia rave i to na tätauro no te pee ia Ietu, te tuuhia nei te taata faaroo i mua i te täpura òhipa e tià ia ravehia,  âreà ra tei ère i to na ora no ù nei, e ìteä ia ia na te ora, Tei färii mai ia òutou, ua färii mai ia ia ù tei ìte e tei färii mai ia ia ù ra. Tei ìte e tei färii mai ia ù, ua ìte e ua färii tei tono mai ia ù nei ra. Tei ìte e tei färii  i te perofeta, no te mea e perofeta, e noaa ia na ta te perofeta ra utuà; tei ìte e tei färii i te taata parau tià, no te mea e taata parau tià, e noaa ia na ta te taata parau tià ra utuà te utuà e faahitihia ra te mauruüru i te Atua. Âreà tei höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà, oia hoì i te mauruüru. Mai ia tätou i parau noa mai na e, aita e haereraa i mua, tei òre i riro atoà ei haereraa i muri, eiaha te ôtoheraa, te haereraa rä i te vähi tei reira to òe parau, te vähi no reira mai òe, ua ìte atoà ia tätou e, ia parau mai te Atua e, 39 O tei ìte i to na ora, e ère ia i te ora; âreà tei ère i to na ora no ù nei, e ìteä ia ia na te ora, aita tätou e änihia ra e tütonu noa i mua, aita hoì tätou i ìte i te mea e hiò, e ia maoro te hiò-noa-raa i te tahi vähi, e riro te mata i te mohimohi, e te òre e päpü faahou te mea e hiòhia ra. Ia hiò òe i te tahi mea, eiaha ia moèhia ia òe e, o òe terä e hiò ra, e i roto i te reira hiòraa, te ìte rii noa atoà ra òe ia òe, to òe mau vähi paruparu, te ärea e vai ra i roto ia òe e te mea ta òe e hiò ra, e täuturu te reira ia òe i te ìteraa i te mea e hinaarohia ra ia òe ia ìte. Mai te fefe tei haamanaò mai i te âfaro, te teiaha tei haamanaò mai i te mämä, eiaha mai te mea e, e ìno anaè to tätou parau, no te pinepine rä tätou i te haapae i ta te Atua, no te rave mai i ta tätou, ua ìte atoà ia tätou e, te mau mea atoà ta tätou i faariro ei mea fäufaa, e riro e, mea taa ê ta te Atua e tiaì mai ra ia tätou ia rave. Te fifi te reira e pinepine i te tupu ia òre te taata ia faaea noa i nià i te mea i änihia ia na, e ia faahaere i ta na hiòraa, to na manaò i mua, aore ra ia faariro i te mea ta na e hiò ra ei faatänoraa ia na. Eiaha atoà rä tätou e manaò e, ua täôtià tätou i te hoìraa i muri ta tätou i parau mai na i nià i te mau vähi paruparu atoà ta tätou e àtuàtu noa nei, ua riro rä teie manaò mai te tahi faaitoitoraa i te taata ia tiàturi ia na iho, ia au i te manaò e, te rave nei ihoä päha o ia i te ìno, ua ìte atoà rä o ia i te mea maitaì. No reira, i roto i te mau òhipa atoà tei änihia te taata e rave, o na ihoä päha to na fifi mätamua roa, o na atoà rä to na täuturu maitaì aè. Mea maitaì te taata ia faaea rii i te faanaìnaì noa ia na, ia haamätau atoà i te uruaì i nià ia na iho, ia tiàturi hoì ia na iho. Inaha te fenua, te ùputa ia o te raì, oia te vähi te taata e märamarama ai i te parau o te Atua, e fenua hoì te taata, e riro te tiàturiraa ia na iho e i te fenua, i te täuturu ia na i te ìteraa i te auraa o teie äniraa a Ietu ia ìteähia to na Metua. Te upoo parau ta tätou i täpeà mai ei haapotoraa i ta tätou tumu parau, no roto mai ia i ta Ietu parauraa i ta na mau pipi 42 E o të höroà i te hoê âuà pape toètoè na te hoê o teie nei mau taata rii, no te mea e pipi o ia na ù, òia mau ta ù e parau atu ia òutou nei, e òre roa o ia e ère i ta na utuà. Parau noa ai rä te Atua e 16 Ua parau atu ra o ia, Mai teie nei, i te tau i haapaòhia ra, e tamaitihia ta òe. Ua parau mai ra o ia, Eiaha, e ta ù fatu, e te taata o te Atua ra, eiaha na òe e haavare mai i to tävini nei, i te mau taime atoà, te tärià o te taata terä e änihia ra ia haapaò i te parau, e i roto hoì i te mea e parauhia ra e ìte ai te taata i te mea e hinaarohia ra ia na. Te faahiroàroà noa mai ra te reira ia tätou e, i roto i te faatupuraa i te hinaaro o te Atua, eita te ìte e täno ia faataa-ê-hia i te faaroo, oia te mea i parauhia. Hiò noa ai te mata, na te parau e ärataì ra i te taata i te ìteraa i te mea ta te Atua e hinaaro ra ia ìte o ia. No te mea e Värua te Atua, te märamarama noa ra tätou e, eere te mata o te taata ta te Atua e tïtau ra, to na rä värua, e to na âau, ia òre te taata ia hämani i te tahi hohoà no te tävini. Aita atu mea e änihia ra ia na mäoti rä, ia vai iho ia na ia ärataìhia na e te parau, mai te ìte maitaì e, eere to na parau ta na e ìte atu, e riro rä te reira parau i te täuturu ia na i te haere-atoà-raa i te vähi ta te parau e ärataì ra ia na.

 

Teraì òr. Faatura.