Märeto 9.30-37 Ìte

Täpati 23 no Tetepa 2018.

Ìte

Taramo 54

1 Na te Mënätehe nä nià i te Netinota. Matetira. Taramo na Tävita. 2 I te haereraa atu to Tifa ra ia Taura, i te nä-ô-raa atu e Eere änei o Tävita tei faatäpuni ia na iho io mätou ra. 3 E faaora mai òe ia ù, e te Atua, i to òe ra iòa, e faatià mai hoì òe ia ù i to òe ra püai. 4 E te Atua e, e faaroo mai i taù pure, e färiu mai to tarià i te parau a to ù nei vaha.5 Ua tià mai hoì te mau taata èê e rave ia ù, e te tïtau mai ra te feiä hämani ìno ra ia ù ia pohe. Aore rätou i tuu i te Atua i mua ia rätou. Tera. 6 Inaha, o te Atua të tauturu mai ia ù, tei rotopü hoì te Fatu i te feiä atoà tei faatià mai ia ù.7 E faahoì mai i to rätou ìno i nià i ta ù mau ènemi E ia täpü-ê-hia rätou e òe, i ta òe ra parau mau. 8 E hopoi noa vau i te tütia ia òe, e haamaitaì ä vau i to òe ra iòa, e te Fatu, e maitaì hoì te reira. 9 ua faaorahia rä vau e ana i te mau àti atoà nei, e ua hiò vau i te poheraa o to ù nei mau ènemi.

Ieremia 11,18-20

Ua haafifihia o Ieremia e te mau taata o to na ùtuafare

18 Ua faaìte mai ra te Fatu ia ù, e ìte aè ra vau; ua faaìte mai òe ia ù ì ta rätou räveà. 19 Mai te pinia mämoe rata ra vau ia ärataìhia e täparahi; aore hoì i ìte e ua ôpua rätou e rave ia ù, i te nä-ô-raa e, e tapu tätou i te räau mä te mäa atoà i nià iho; e faataa ê atu tätou ia na i te fenua o te taata ora nei ia òre ia manaò-faahou-hia atu to na iòa. 20 O òe rä, e te Fatu manahope ra, to òe te manaò tià ra, o tei hiòpoà hua i te manaò e te âau ra, e faaìte mai òe ia ù i to riri ia rätou; ua faaìte-hua-hia e au ta ù parau ia òe ra.

Iatöpo 3,16- 18

16 Te vai ra hoì te feìi e te märô, tei reira atoà te ârepurepu, e te mau parau ìino atoà ra. 17 Âreà te paari no nià mai ra, e mea ânoì-òre-hia ia, e te mämahu, e te marü, e te faaroo ôhie, ua î i te aroha e te hämani maitaì, e òre e faahuru ê i te taata, e òre hoì e haavare. 18 E ueuehia te parau-tià mä te hau e te feiä e faatupu i te parau hau ra.

4,1-3

Te hereraa i te ao nei

1 No hea te tamaì e te märô i roto ia òutou na, Eere änei no ô na no to òutou hinaaro tià òre ra, o tei tamaì noa i roto i to òutou tino na? 2 Te nounou na òutou, e aore ä i noaa; te täparahi na òutou i te taata, e te tïtau hua na, e aita i noaa ta òutou e tïtau na; te tamaì na, te àro na, e aita, no te mea aore òutou i ani. 3 Te ani ra hoì òutou, e aore a òutou i noaa, no te mea te hapa na ta òutou aniraa, ia pau i te pühurahia e òutou i to òutou hinaaro tià òre ra. 4 E te mau faaturi täne, e te mau faaturi vahine, aore òutou i ìte e, o te hinaaro i teie nei ao, e tauà au òre ia i te Atua ra? E teie nei, o tei tïtau e ei tauà o ia no teie nei ao, ua taa mäite ia o ia, e e ènemi ia no te Atua.

Märeto 9.30-37

Te faaära-faahou-raa Ietu i to na pohe e to na tiàfaahouraa

(Mät 17,22-23; Ruta èv 9,43-45)

30 Faaruè iho ra rätou i taua vähi ra, haere atu ra nä Tarirea. Te hinaaro ra hoì o ia e eiaha roa te taata ia ìte.31 Te haapii ra hoì o ia i ta na mau pipi, te nä ô atu ra ia rätou Ua tuuhia te Tamaiti a te taata nei i te rima o te taata, e e täparahi pohe roa rätou ia na; e ia oti i te taparahihia ra, e tiàfaahou ia o ia i nià i te ruì toru ra. 32 Aita rä rätou i ìte i te auraa i taua parau ra, e i mataù hoì ia ui atu ia na.

O vai tei hau i te rahi?

(Mät 18,1-5; Ruta èv 9,46-48)

33 E tae atu ra o ia i Taperena, ua ui atu ra o ia ia rätou i roto i te fare E aha ta òutou i märô noa ia òutou iho i te èà tià ra 34 Mämü noa iho ra rä rätou, i märô na hoì rätou iho i te äratià ra i to rätou e hau i te rahi. 35 Pärahi iho ra o ia i raro, ua parau atu ra i te tino àhuru mä piti ra, nä ô atu ra ia rätou O te taata i hinaaro e ei mua o ia, ei hopeà roa o ia e tià ai, e ei tävini no rätou atoà.36 Ua rave atu ra o ia i te hoê tamaiti iti, ua tuu atu ra i röpü ia rätou; ua rave atu ra hoì e ua hii iho ra nä ô atu ra ia rätou 37 O të ìte mai i te hoê tamaiti iti mai teie nei no to ù nei iòa, ua ìte mai ia ia ù e o të ìte mai ia ù ra, eere ia o vau anaè ra ta na i ìte mai ra, o ia atoà rä o tei tono mai ia ù nei ra.

Manaò.

I to tätou taiòraa e faarooraa i to tätou iho reo mai te mea ra e, e hinaaro taata i roto i te hinaaro Atua, no te faatupu i te puai, te hiòpoà, parau tià, e te ìte. E mau parau teie no te faatupuraa i te ôpuaraa faaora a te Atua Nui Tumu Tahi, o ta te taata e  mau nei èi hopoià i ta na pororaa i te hau ia hanahana te Atua. Te faufaa o teie mau parau ia faaäuhia i te faufaa o te òhipa i tupu i roto i na taiòraa e maha te ìmiraa raveà a te taata. Te vähi ra e taa ê rii rä, te mea ia e, e parau nahonaho ta te Atua i te faaäuraa mätamua, âreà te taata, tei roto to na parau i to na rima, e tiàmäraa to na no te färii e no te òreraa e färii i te märamarama o te parau, e tiàmäraa to na no te hinaaro i te märamarama, aore ra te pöuri. Nä roto rä i te tautooraa i reira te taata e ö ai i roto i te oraraa o te märamarama, tei faariro na i te ìte ei faufaa e hau ai o ia i nià tei haapöirihia, a riro atu ai mai te matapö ra te huru. Te mau parau e faahitihia nei i roto i teie mau tumu parau mai te hoê fäìraa parau no te faaìte ia to te taata ätearaa i te hinaaro e faatupu ra i te ora. Te auraa te vai nei te tahi ärea tei faataa i te Atua e te taata, no reira, ia au i to te taata färii, aore ra to na färii òre i te parau a te Atua, te riro ra o ia mai te òraparaa o te âvaè i tanohia i nià i te ànaana o te mahana, aore ra tei òre i tanohia, ua riro te färiiraa ei täpaò no te märamarama ; âreà te òreraa e färii, e täpaò ia no te pöiri. Faaroo mai na ra i te tahi mau ìrava tumu o na taiòraa,

-Taramo 54, 3 E faaora mai òe ia ù, e te Atua, i to òe ra iòa, e faatià mai hoì òe ia ù i to òe ra püai.

-Ieremia 11, 20 O òe rä, e te Fatu manahope ra, to òe te manaò tià ra, o tei hiòpoà hua i te manaò e te âau ra, e faaìte mai òe ia ù i to riri ia rätou; ua faaìte-hua-hia e au ta ù parau ia òe ra.

-Iatöpo 3, 18 E ueuehia te parau tià mä te hau e te feiä e faatupu i te parau hau ra.

- Märeto 9, 37 O të ìte mai i te hoê tamaiti iti mai teie nei no to ù nei iòa, ua ìte mai ia ia ù e o të ìte mai ia ù ra, eere ia o vau anaè ra ta na i ìte mai ra, o ia atoà rä o tei tono mai ia ù nei ra.

Te uiraa nahea i te faatupu i te ìte o tei tono mai ia ù nei ra. E tano tätou e tatara i te faatupu ìte, te òhipa ia ta te taata e rave, aore ra e parau ta na e parau, ei faatanoraa i to na hinaaro i te rave i te òhipa e tiaìhia ra ia rave o ia e ia ìte. Te taata e faatupu, to na mata e hiò ra i te vähi ta na e tuu ra i ta na òhipa. Hiò noa ai to na mata i mua, te faaätea rii mäite noa ra to na âvae ia na i te vähi ta na e hiò ra. Aita o mua, oia te vähi ta te mata e hiò ra, i riro ei vähi ta te âau e tïtau ra, ua riro noa rä ei taime ìmiraa na te manaò i te faatano e te faaòhie i teie hinaaro faaätea ê mai. Aita tätou i parau e, teie haereraa i muri, no te mea te riro ra ia te muri i reira ei vähi e tïtauhia ra âreà i teie, te vähi e tïtauhia ra, te àperaa ia i te mea e hiòhia ra, te ìmiraa hoì i te räveà ia òre ia tae i reira, aore ra ia òre ia haamanaòhia mai te mea ta te taata e àpe ra, ta na e òre e hinaaro ra i te ìte. Ia faaroo tätou i te reo o te Taramo e parau ra, 3 E faaora mai òe ia ù, e te Atua, i to òe ra iòa, e faatià mai hoì òe ia ù i to òe ra püai.

Ia haapaòhia, te haamanaò noa mai ra te püai i te manaò färii o te taata, e no te mea i färii i òhie ai i te ìmiraa i te puai no te ìte. Eiaha rä tätou e manaò e, i te mau taime atoà, ua riro te püai ìte ei pähonoraa i te mea ta te manaò i färii. I te tahi taime, aita e iòa ta te taata i tuu i nià i te òhipa ta na e rave ra, na te ìteraa i te òhipa e tiaìhia mai ra ia na ia rave, i haapäpü i taua färii no na ra.

Mai te mea atu ra e, te tahi mea aita to na e iòa i mua ra, ua riro mai i teie nei ei ìteraa i te püai te auraa, e iòa to na i teie nei. Ia faaäuhia i nià i ta tätou parau, e nä ô ia tätou e, te feiä no rätou te parau ta Ieremia e faahiti nei, no te mea ua ìte rätou i te hinaaro o te Atua ia rätou i teie parauraa e, 20 O òe rä, e te Fatu manahope ra, to òe te manaò tià ra, o tei hiòpoà hua i te manaò e te âau ra, e faaìte mai òe ia ù i to riri ia rätou; ua faaìte-hua-hia e au ta ù parau ia òe ra.

Ia hiòpoà  tämauhia te manaò âau i roto i te puai  e te ìte ; aore ra no te mea i roto i te oraraa, te reira ihoä te haa, ua haere noa mai te ìteraa i te hinaaro o te Atua e haapäpü i te tahi mea i vai noa na i roto ia tätou mai te ìte òre tätou i te auraa e te iòa o taua mea ra. Ia püai te taata i roto i te òhipa parau tià, te nä ô nei tätou e, ua topa i roto i te ìte. Te haamanaò noa mai ra te reira taò i te tahi tauiraa tei ìtehia i roto i te tiàraa e te vairaa o taua taata ra. I mua ra, tei nià, e i teie nei, tei raro, inaha ua topa. E au i te tumu täporo tei topa feretau noa te maa täporo i tänuhia i te pö ia Mutu. Ia päpaì o Iatöpo i te taata faaroo mai teie te huru, 18 E ueuehia te parau tià mä te hau e te feiä e faatupu i te parau hau ra. Na te taata teie tuhaa ia riro ei ìteraa ei òhipa tämau na na, aita roa atu o ia e hiò ra i to na parau mai teie. Te taata e tano teie parau e òre roa e mäemäe o to roto i to na oraraa e òre atoà e faaäuhia i te tahi âmaa täporo tei täpühia i te poìpoì, vai noa atu ai i te pae tumu. Ia hamama to na vaha no  te ueue ia te parau tià e te hau, no te tope te mau âmaa märo no te faaitoito-faahou-raa i te tumu metua ia tiàtiàfaahou te mau rauère, ia tupu i te rahi. Ta Ietu ia e parau nei i ta na pipi e ia tätou, 37 O të ìte mai i te hoê tamaiti iti mai teie nei no to ù nei iòa, ua ìte mai ia ia ù e o të ìte mai ia ù ra, eere ia o vau anaè ra ta na i ìte mai ra, o ia atoà rä o tei tono mai ia ù nei ra.

Teraì òr. Faatura.