Ruta èv 5.1-11 Ànaanaea

Tāpati 10  no Fëpuare 2019.

Ànaanaea

Taramo 138

1 Na Tävita. E haamaitaì au ia òe, e te Fatu, mä ta ù âau atoà nei, e himene au ei haamaitaì ia òe, i mua i te aro o te mau atua. 2 E haamori tià atu vau i to nao moà ra, a haamaitaì atu ai i to òe iòa, e te Fatu no to òe aroha e ta òe ra parau mau ua faarahi hoì òe i ta òe parau ia hau atu i to iòa atoà ra. 3 I te mahana i tiàoro atu ai au ra, ua parau mai òe ia ù; e ua horoà mai i te itoito i ta ù värua. 4 E hope te mau arii atoà o te fenua nei i te haamaitaì ia òe, e te Fatu, ia ìte rätou i te parau a to vaha 5 E himene rätou i te mau parau a te Fatu E hanahana rahi hoì to te Fatu. 6 Teitei noa ä te Fatu, e haapaò mai ä o ia i tei haèhaa, âreà tei teòteò, ei te ätea ê o ia e hiò mai ai. 7 Ia haere noa vau nä roto i te àti ra, e faaànaànaeahia mai au e òe ra, e na to rima e täpeà i te riri o tei märô mai ia ù ra, e na to rima àtau iho e faaora ia ù. 8 Na te Fatu e nä reira mai ia ù, e tià to òe aroha, e te Fatu, i te vai-mäite-raa; eiaha na òe e faaruè i te òhipa a to rima.

Ìtaia 6.1-8

Te tïtauraahia o Ìtaia

1 I te mätahiti i pohe ai te arii ra o Ûtia, hiò atu ra vau i te Fatu i te pärahiraa i nià i te teröno teitei e te teniteni e ua î hoì te hiero i te hiti àhu roroa no na ra. 2 Te tià noa ra nä teräfi i nià aè  taìono o rätou atoà ra pererau  e piti ra, ei täpoì ia i to na mata, e piti ra, ei täpoì ia i ta na âvae, e piti ra, ei maùeraa ia. 3 Ua pii iho ra rätou te tahi i te tahi, nä ô aè ra, E moà, e moà, e moà, O te Fatu manahope, ua î te fenua atoà nei i to na ra hanahana. 4 Ua turorirori iho ra nä pou i te tomoraa ra i te reo o to rätou piiraa î aè ra hoì te hiero i te au auahi. 5 Ua nä ô aè ra hoì au, Âuë hoì au nei e ua mämü iho nei au e taata vaha viivii hoì au, e tei rotopü hoì au i te mau taata vaha viivii atoà i te pärahiraa ua hiò hoì ta ù mata nei i te arii, i te Fatu manahope ra.

1 Torinetia 15.1-11

Te tiàfaahouraa o te Metia

1 E Faaìte atu rä vau ia òutou e a ù mau taeaè, i te Èvaneria ta ù i parau atu ia òutou na, ta òutou hoì i färii mai ra, e i mau ai hoì òutou na; 2 e e ora ai hoì òutou, ia täpeà mäite ä òutou i ta ù i parau atu ia òutou na, ia òre rä ia riro to òutou faaroo ei faaroo faufaa òre. 3 Ua tuu atu hoì au ia òutou i mütaa iho ra, i tei noaa na ia ù ra, e i pohe te Metia i ta tätou nei hara, mai tei te parau i päpaìhia ra; 4 e i tänuhia hoì o ia, e tiàfaahou mai ra i te ruì toru, mai tei te parau i päpaìhia ra; 5 e i ìteä o ia e Tefa, e i te àhuru mä piti i muri aè. 6 E muri aè ra hoì, i ìteä o ia e te mau taeaè e pae atoà hänere e tiàhapa, hoê ä ìteraa; te ora noa nei ä te rahi o taua feiä ra, ua taòto rä te tahi pae. 7 E muri aè ra hoì, ìteä iho ra o ia e Iatöpo, e i te mau âpotetoro atoà i muri aè. 8 E te hopeà iho ra, ìteä atoà iho ra ia ù, mai te mea e e mahemo vau. 9 E iti hoì au i te mau âpotetoro atoà ra, e òre hoì au e au ia parauhia e, e âpotetoro, no te mea i hämani ìno vau i te Ètärëtia o te Atua. 10 To ù nei rä huru e vai nei, no te here ia o te Atua; e te maitaì na na i horoàhia mai ia ù nei, aore ia i riro ei mea faufaa òre: e òhipa rahi hoì ta ù i rave i ta rätou atoà ra  eere rä vau, o te maitaì rä a te Atua ia ù nei ra. 11 E teie nei, o vau tei aò ra, o vau ia, o rätou ra, o rätou ia, o ta mätou ä ia aò, e o ta òutou ä ia i faaroo.

Ruta èv 5.1-11

Te tïtau-raa-hia nä pipi mätamua

(Mät 4,18-22; Mär 1,16-20)

1 E te tià noa ra o ia i te hoê mahana i te hiti roto i Tenetareta ra, ua neneì noa mai ra te taata atoà e rave rahi ia na ra, e faaroo i te parau a te Atua. 2 Hiò atu ra o ia i e piti puè pahï i te tïpae-noa-raa i te hiti roto, âreà te feiä ravaai, tei uta ia te uhi ra i ta rätou ùpeà. 3 Haere atu ra o ia i nià iho i te hoê i taua nä pahï ra, i ta Timona ra, ua parau atu ra ia na e tute i tai iti aè. Pärahi iho ra o ia i raro, e ua haapii mai ra i nià i te pahï i taua feiä rahi ra. 4 E oti aè ra ta na parauraa, ua parau atu ra o ia ia Timona Hö atu i te vähi moana, e tuu i ta òutou ùpeà i te hoê häroà. 5 Ua parau mai ra Timona ia na, nä ô mai ra E te Fatu, i haa noa na mätou e ao noa aè nei te ruì, e aore roa i noaa, e tuu rä vau i te ùpeà o òe i parau mai na. 6 E ia tuu iho ra rätou, ua àti aè ra ia rätou te ià e rave rahi, motumotu iho ra ta rätou ùpeà. 7 Ua täpare atu ra rätou i to rätou i nià i te hoê pahï ra, ia haere atoà mai rätou e rave. Ua haere mai ra hoì rätou, ua faaî iho ra i nä pahï e piti atoà, e ua fätata roa i te tomo. 8 E ia hiò iho ra Timona Pëtero i te reira, tïpapa iho ra o ia i raro i te pae turi o Ietu, i te nä-ô-raa atu e E haere ê òe, e te Fatu, e taata hara hoì au 9 Roohia iho ra o ia e rätou atoà i te mäere rahi mataù, i taua häroà ià i noaa ia rätou ra. 10 O Iatöpo atoà hoì e o Ioane, nä tamarii a Tepetaio ra, ua âmui atoà räua ia Timona. Ua parau mai ra Ietu ia Timona Eiaha e mataù, i teie nei, e taata ta òe e noaa.11 E tae mai ra to rätou puè pahï i tähatai, faaruè anaè iho ra rätou, e ua pee mai ra ia na.

Manaò.

I to tätou färereiraa i teie mau taiòraa te tupu nei te faahiahia i te faarooraa, te faahiahia te tahi ia mea hau ê i te maitaì, te tahi mea hiòhia e te mata, aore ra te tahi mea faaroohia e te tarià no te reira maitaì, ua tupu te faahinaaro i roto i te âau, oia te taime riro roa ai te manaò, te âau, e te värua o te taata i te parau, mai te mea atu ra e, aita o ia i faaroo noa, ua ö roa atoà rä i roto i te parau, e ua amohia e te reira parau. No te mea rä aita to te taata e täamuraa päpü faahou i to na fenua i teie mahana, aita to na hiroà tumu e riro faahou ra ei uruaìraa no na, no te mea aita o ia e ìte ra i te faufaa ia haapäpü faahou e, o vai mau rä o ia, e no hea mai o ia, e aita atoà hoì o ia e te ìte ra i te faufaa i te ìteraa i te reira, riro atu ra te parau a te Atua Nui Tumu Tahi ei parau e tano i te tarià tamarii. Te fifi rahi roa atu rä o te Mäòhi, to na ia tiàturi òre ia na iho, to na färii òre i to na parau, mai te mea e, e parau to na no te tau tahito, eere i te tahi parau no teie tau, e no te mea i roto i to na manaò, eita te mea tahito e te mea âpï e tano ia tuuhia i roto i te àpu hoê, te färii hoê, te mea ia o ia iho i tatahi noa ai i to na parau ei Mäòhi. Te mea tahito, e mea pohe te reira, e aita e faufaa ia faaora faahou mai i te mea pohe. Oia ia. No te ätearaa te Mäòhi i te fenua, te mea ia o ia i fifi ai i te märamaramaraa i te haapiiraa a te fenua ia täpühia te tahi räau, e pohe ihoä paha te reira räau, e räau ê rä të tupu mai i te vähi i tupuhia e te räau mätamua, e na to na pera e faaora i teie räau âpï, no te mea eita te fenua e färii i te ano e te pohe. E au ra ia hiòhia e, ua mutu te here i roto i te Mäòhi e to na fenua, te here e riro noa ai te tahi ei pütarià e ei ôriò mata no te tahi. O te mea ia e haamanaòhia mai ra ia tätou i au te haapotoraa o na taiòraa e maha nei,

-Taramo 138, 7 Ia haere noa vau nä roto i te àti ra, e faaànaànaeahia mai au e òe ra, e na to rima e täpeà i te riri o tei märô mai ia ù ra, e na to rima àtau iho e faaora ia ù.

-Ìtaia 6, 5 Ua nä ô aè ra hoì au, Âuë hoì au nei e ua mämü iho nei au e taata vaha viivii hoì au,

-1 Torinetia 15, 2 e e ora ai hoì òutou, ia täpeà mäite ä òutou i ta ù i parau atu ia òutou na, ia òre rä ia riro to òutou faaroo ei faaroo faufaa òre.

-Ruta èv. 5, 8 E ia hiò iho ra Timona Pëtero i te reira, tïpapa iho ra o ia i raro i te pae turi o Ietu, i te nä-ô-raa atu e E haere ê òe, e te Fatu, e taata hara hoì au.

I to tätou faarooraa i te haapotoraa o na taiòraa e maha nei te hinaaro nei te taata ia ànaana i mua i te aro no te Atua, teie ia taò faaànaananaea e parau puai teie tei faaìte i te ànaana, te hinuhinu, ia hanahana te Atua, ta te rahu e faaìte noa ra i te mau taime atoà. Tei turämahia e te märamarama o te parau ia tupu te ora e tïtauhia ra, ia òhie tätou i te tomo i roto i te parau ta te tärià i faaroo e ta te mata i hiò. E tano ai tätou e parau e, vai noa mai ai te ora, aita te ùputa o te maitaì i piri te ora te maitaì mätamua ia e fänaòhia nei e te taata atoà, ta na te reira faufaa tumu. Ia au i teie parauraa a te Taramo, 7 Ia haere noa vau nä roto i te àti ra, e faaànaànaeahia mai au e òe ra, e na to rima e täpeà i te riri o tei märô mai ia ù ra, e na to rima àtau iho e faaora ia ù.

I roto i te rahi o te àti ta te taata e faaruru mämü noa nei, mea maitaì o ia e haamata i te tïtau ia hoì mai te faufaa o te ora, eiaha no na noa, no ta na atoà rä mau tamarii e tià mai i muri ia na. Ia òre te uì tama ia òvere i roto i ta na iho faufaa tumu, ia reo faahouhia i roto i to na vaha èi parauraa na na ànanahi. Ia ìte mai tätou, aita e taata e maitaì mai te peu aita e tiàturiraa e paèpaè ra i to na oraraa. Aita atu hoì mea e tià faahou mai ai te nünaa maoti rä, ia haapäpü faahou o ia i to na parau, ia haapäpü faahou i to na faaroo mäòhi mau, oia hoì ia haapäpü faahou o ia i to na tiàturiraa i to na fenua, to na reo, to na hiroà, ta na mäa, e ta na räau ei räpaau i to na mau maì. Mai teie ta Ìtaia e parau nei e, 5 Ua nä ô aè ra hoì au, Âuë hoì au nei e ua mämü iho nei au e taata vaha viivii hoì au, Te mea noa ia e tau faahou mai ai te hau i nià ia tätou, te mea noa ia e ìte faahou ai tätou i te hau i roto i to tätou tino. Te here rä hoì, eere ia mai te àihere ìno, e tupu hänoa, aita e àtuàturaa, aita e pïpïraa, na na noa e tupu, taime poto òe i te òreraa e haapaò atu, èrä ua àere. Eere roa atu te reira. E räau rä teie e hinaaro i te rima ia àtuàtu noa ia na, hinaaro atoà teie räau ia paraparau-noa-hia o ia, te mea noa te reira e maitaì ai to na tupu. E räau noànoà roa ia rave-maitaìhia, e poe nehenehe hoì i nià i te taata, ia rave maitaì òe, eita teie poe e mäemäe, eita e ôriorio noa aè. A faaroo mai na ra i teie reo no Pauro i to Torinetia, 2 e e ora ai hoì òutou, ia täpeà mäite ä òutou i ta ù i parau atu ia òutou na, ia òre rä ia riro to òutou faaroo ei faaroo faufaa òre.  No reira, mai te peu e hinaaro no te Atua te faaroo o te mau nünaa, e hinaaro atoà no te Atua te faaroo mau te hiòraa a te reira mau nünaa ia na. E aha ia te mea e haamiòmiò nei i to tätou âau, e aha tätou e òre e faatura ai i te hinaaro o te Atua, e aha te mea e onoöno noa ai tätou i te ôrure i te Hau o te Atua. Aita atu e tumu i horoà ai te Atua i te reo no te mau nünaa atoà maoti rä, ia òhie te nünaa tätaì tahi, i roto i to na iho hiroà, i te märamaramaraa, te färiiraa, e te auraroraa i te hinaaro o te Atua. Ia parau mai te Atua e, no ù te mau nünaa atoà, e aha ta tätou òhipa ia haere e hiò i te parau o terä nünaa e terä nünaa, i te nä ôraa e, eiaha e haamoè i terä, eiaha e tatahi i terä. Haamanaò na tätou i te òhipa i tupu i te mahana i tonohia mai ai te Värua Maitaì i nià i te mau pipi, ua parau te reira e te reira pipi i te reo ta te Värua i horoà ia na i te parau , ua taa mai te nünaa tätaì tahi i to na reo, e aita hoê taata i tià mai no te parau e, eiaha e ìnoìno mai e hömä, eiaha òutou e parau noa i to ù anaè reo, haamanaò e, te vai atoà ra i ô nei terä nünaa, terä nünaa, e terä nünaa. Aita atu mea faufaa roa no rätou i te reira taime maoti rä, te färiiraa i te parau ta te Värua o te Atua e parau atu ra ia rätou, te reira i roto i to na reo, te reira i roto i to na reo. Te ia ta Pëtero i ìte i te haapiiraa a Ietu i te hiti no te roto no Tenetareta ia au i te päpaìraa a Ruta èvaneria, E ia hiò iho ra Timona Pëtero i te reira, tïpapa iho ra o ia i raro i te pae turi o Ietu, i te nä-ô-raa atu e E haere ê òe, e te Fatu, e taata hara hoì au. Ua ànaanaea te haapiiraa i roto ia Pëtero, i tïpapa ai i mua i te aro o Ietu ma te fäì i ta na hara ta te  parau i turäma ia märamarama i te maitaì e te ora. Te ànaanaea, te huru ia o te taata e rave i ta na òhipa mä to na âau atoà, to na manaò, e to na püai. Aita rä e taata e tano e ànaana i te hinaaro o te Atua mai te peu aita o ia i ìte i te mea ta te Atua i hinaaro mai ia na ia rave, e mai te peu aita o ia i here i te Atua. Te here te mätamua i roto i te faatupuraa i te hinaaro o te Atua, ia òre, e rave noa te taata mai ta na e ànaana ra i te parau a te Atua. I roto i te ànaanaraa i te hinaaro o te Atua, ia ara atoà tätou, o te manaò tätou i to tätou au òre, to tätou tüàti òre i te tahi mau parau e, te tüàti òre atoà ia o te Atua, e te ìmiraa i te räveà ia òre te taata ia pee i te mea tei òre i au i to tätou manaò, te faatupu ra ia tätou i te hinaaro o te Atua. Te reira huru taata, no rätou te parau ta Ietu e faahiti ra ua parau atu ra o ia ia Timona Hö atu i te vähi moana, e tuu i ta òutou ùpeà i te hoê häroà, i roto i te raveà òre a te taata e raveà ta te Atua, ia ànaana ra i te hinaaro o te Atua Nui Tumu Tahi.

Teraì òr. Faatura.