Mātaio 5.1-12 E ao

Mahana toru 1 no Tënuare 2020

Pureraa Mätahiti Âpī Tivira

ÔROÀ

E ao

Taramo 34

1 E Taramo na Tävita i to na faahuru-ê-raa ia na iho i mua ia Âpïmereta, o tei tiàvaru atu ia na, e ua haere atu ra o ia. 2 E haamaitaì ä vau i te Fatu e òre e faaea. Ia vai tämau mäite ä te haamaitaì ia na i roto i to ù nei vaha, 3 E ârue ta ù âau i te Fatu. Ia ìte mai tei pohe ra i te reira a òaòa atoà ai 4 E haamaitaì tätou i te Fatu, tätou atoà të faateitei i to na iòa. 5 Ua ìmi au i te Fatu, e ua parau mai ra o ia ia ù; e ua faaora ia ù i te mau mea ta ù i mataù ra. 6 Ua hiò atu rätou ia na, e ua haamäramaramahia mai; e aore to rätou mau mata i haamä.

7 Ua pii atu ra taua taata i pohe nei, e ua faaroo mai ra te Fatu; e ua faaora atu ra ia na i to na atoà ra mau àti. 8 Te pätia nei te merahi a te Fatu i te pühapa e àti noa aè i te feiä i mataù ia na, e ua faaora ia rätou. 9  A tämata na ia ìte i te maitaì o te Fatu, E ao to te taata i tiàturi ia na ra 10 A mataù i te Fatu, òutou te feiä moà no na ra. Aore hoì e èreraa to te feiä i mataù ia na ra. 11 Ua ère te mau riona âpï i te mäa, e te pohe ra i te poìa; âreà tei ìmi i te Fatu ra, e òre roa e ère i te maitaì. 12 A haere mai na, e te mau tamarii na, e faaroo mai ia ù; e haapii au ia òutou ia mataù i te Fatu. 13 O vai ia taata i hinaaro i te ora, tei hinaaro ia ìte i te maitaì i to na puè mahana i te ao nei 14 A täpeà i to arero i te ìno, e to vaha eiaha ia parau i te parau haavare. 15 E haapae i te ìno, e rave i te maitaì, e ìmi i te hau, e aruaru atu. 16 Tei te feiä parau-tià ra to te Fatu mata, e tei ta rätou pure to na tarià. 17 E mata ê rä to te Fatu i te feiä i rave i te ìno ra, e ia òre roa ia manaòhia i te ao nei.18 Te tiàoro nei te feiä parau-tià e te faaroo mai ra te Fatu, e te faaora nei o ia ia rätou i to rätou mau àti atoà ra. 19 Te fätata nei te Fatu i te feiä âau paruparu ra, e te faaora nei o ia i te taata âau taiä. 20 E àti rahi to te taata parau-tià ra; e faaorahia rä o ia e te Fatu i taua mau àti atoà ra. 21 Na te Fatu e tiaì i to na ra mau ivi, e òre roa te hoê e ôfatihia. 22 E pohe te paieti-òre i te ìno; e tei riri i te feiä parau-tià ra, e mou ia. 23 E faaora te Fatu i te värua o to na ra mau tävini; e òre hoì te hoê e tiàturi ia na ra e faaruèhia.

Mātaio 5.1-12

1 E ìte atu ra Ietu i te tiàa rahi, haere atu ra o ia i nià i te mouà, pärahi iho ra i raro, e ua haere mai ra ta na mau pipi ia na ra. 2 Hämama aè ta na vaha, haapii atu ra ia rätou, nä ô atu ra:

E ao

(Rut 6.20-26)

3 E ao to tei haèhaa te âau, no rätou hoì te Hau o te raì  

4 E ao to tei òto, e faaòaòahia hoì rätou  

5 E ao to tei marü, e riro hoì ia rätou te fenua  

6 E ao to tei hiaai e tei poìhä i te parau-tià, e faaîhia hoì rätou

7 E ao to tei aroha ia vëtahi ê ra, e aroha-atoà-hia hoì mai rätou  

8 E ao to tei mä te âau, e ìte hoì rätou i te Atua

9 E ao to tei faatupu i te parau hau ra, e parauhia hoì rätou i te tamarii na te Atua  

10 E ao to tei hämani-ìno-hia no te parau-tià ra, no rätou hoì te Hau o te raì  

11 E ao to òutou ia faaìno mai, e ia hämani ìno mai, e ia pari haavare noa mai te taata ia òutou i te mau huru ìno atoà nei, no ù.

 12A òaòa, e ia ôuàuà noa i te òaòa; e utuà rahi hoì ta òutou i te mau raì ra: i nä reira hoì rätou i te hämani ìno i te mau perofeta tei nä mua ia òutou.

Manaò.

Ia ora na i te mätahiti âpï, te ìriti nei tätou te mätahiti tivira ma te ìte òre tätou i to na huru, e to na faanahoraa, te haere âmui nei tätou na nià i teie èà ma te nevaneva te tahi mau taime, ma te hiò i muri, e aore ra ma te hiò i mua, te vai ra mea vitiviti, mea taere. Te tiàturi nei ra tätou i te haamaitaìraa a te Atua Nui Tumu Tahi, i ta na ärataìraa ia tätou i te mau vahi e tupu ai ta na ôpuaraa faaora.

Ia faaroo tätou i teie reo to Taramo, 23 E faaora te Fatu i te värua o to na ra mau tävini; e òre hoì te hoê e tiàturi ia na ra e faaruèhia. Èia faaroo tätou te mau manaò o to tätou Fatu i te päpaìraa a Mataio i te pene 5, i te mau ìrava 1 e tae i te ìrava 12 Te aòraa i nià i te mouà

(Mär 3.13; Ruta èv 6.12-13,20)

1 E ìte atu ra Ietu i te rahi o te taata, haere atu ra o ia i nià i te mouà, pärahi iho ra i raro. E ua haere mai ra ta na mau pipi i pïhaì iho ia na.

2  Ua parau atu ra ta na vaha, haapii atu ra ia rätou, nä ô atu ra:

Te mau pëätiu

(Ruta èv 6.20-26)

3 E ao to tei haèhaa te âau, no rätou hoì te Pätireia ra o te ao.

4 E ao to tei òto, e faaòaòahia hoì rätou.

5 E ao to tei marü; e riro hoì ia rätou te fenua.

6 E ao to tei hiaai i te maitaì, e faaîhia hoì rätou.

7 E ao to tei aroha ia vëtahi ê ra, e aroha-atoà-hia mai rätou.

8 E ao to tei mä te âau, e ìte hoì rätou i te Atua.

9 E ao to tei faatupu i te parau hau ra, e parauhia rätou i te tamarii na te Atua.

10 E ao to tei hämani-ìno-hia i te parau tià ra, no rätou hoì te Pätireia ra o te ao.

11 E ao to òutou ia faaìno mai, e ia hämani ìno mai, e ia pari haavare noa mai te taata ia òutou i te mau ìno atoà nei, no ù. 12 A òaòa, e ia ôuàuà noa i te òaòa; e utuà rahi hoì ta òutou i te ao ra i nä reira hoì rätou i te hämani ìno i te mau perofeta ra, o mua ia ia òutou.

E tià ia parauhia i roto i teie taiòraa, i faaroohia e tätou e toru tumu òhipa teie e tïtauhia mai nei e haapaò.

1- Te faatupu i te maitaì.

2- Te tupuraa o te aroha.

3- Te faufaa o te hau.

Te haamaitaì nei tätou i te Atua i te itoito o Mataio i te päpaìraa i teie mau manaò o Ietu, tei riro mai te hoê tumu raau tei ora maitaì i roto i te tau, tei farerei i te tahi mau haafifiraa rau, ma te hià òre i mua i te mau haataupupuraa o te huru oraraa i raterehia mai, e teie mau tïtauraa a te Fatu, no te oraraa maitaì no te vaamataèinaa.

E Faaineineraa na Ietu teie, no te mea te hoì faahou ra tätou, hoì faahou ra tätou i roto i ta te Atua faanahoraa, ta Ietu ia e haamanaò ra, no te mea e haamanaòraa teie na Ietu, ia parau hoì tätou e haamanaò, te tahi mea tei parauhia, eiaha no te mea hoê noa parauraahia, e riro e mea pinepine o Ietu i te faahiti i teie parau e te faahopeàraa teie ia reo ta tätou e ìte nei, teie reo to Ietu e parau nei e, e AO, te färiiraa ia te taaata, i te òaòa noo mai i te Atua ra.

E tano atoà ia  parauhia eita te puai no teie mau manaò no Ietu i te piiraa, ia tiàturi maitaì e ora, ìnaha te nä ô ra teie reo i te ìrava 11 e te 12, 11 E ao to òutou ia faaìno mai, e ia hämani ìno mai, e ia pari haavare noa mai te taata ia òutou i te mau ìno atoà nei, no ù. 12 A òaòa, e ia ôuàuà noa i te òaòa; e utuà rahi hoì ta òutou i te ao ra: i nä reira hoì rätou i te hämani ìno i te mau perofeta ra, o mua ia ia òutou.

Òia mau, te tae ra änei teie mau parau i roto i te tarià, aita rä te tarià i färii, aita teie mau parau i riro mai èi òhipa, òhipa ìtehia e te täpaò, ua hinaaro ia i te ora, no te mea i roto i te faanahoraa a te Atua, te faaroo ta te taata ia pähonoraa i te here o te Atua, e ia parauhia ä ai, tei roto te ora i te parau no te òaòa, teie ihoä parau ta te Fatu terä e faahapa ra ia tätou no te mea te nä ô ra te Fatu, nä fea paì e noa ai i te taata i te faaroo ia parau vau, i te parau A òaòa, e ia ôuàuà noa i te òaòa , te auraa te horoàhia atu nei te räveà no ô mai i te Atua ra, te räveà e noaa ai i te taata te ora, te tuu atoà mai nei te taata i ta na, te parau ia no te faaäpiäpi i te òaòa a te Atua, tamata noa mai ra o Ietu i te parau i te taata, faaea paha te nä räpae, faaea  i te faanaho i te òhipa a te Atua na nià noa i to tätou manaò, na nià noa i te mea te au ia tätou, e hoì i nià i ta te Fatu e parau ra, e aha te faufaa ia parau te taata ia Ietu e, e Fatu , terä rahiraa parau ta na, aita e räveà tätou e färiiraa ai. E parau atu na vau ia òutou i te parau A òaòa, e ia ôuàuà noa i te òaòa, te taa ra ia tätou, tirarä paha, faaea paha te haere noa e te horo haere noa, haere i terä vähi e ìmi i te räveà e roaa ai te ora te nä ô mai ra te Fatu ua parauhia, teie mahana te parau-faahou-hia nei tätou, parau atu na vau ia òutou i te parau o te A òaòa, e ia ôuàuà noa i te òaòa, te parau o te fenua, ua ìte maitaì tätou, e aha te auraa terä parau, no te mea to tätou parau tei ô, to tätou tiàraa tei ô, to tätou ora tei ô, eiaha te ora no te faaî noa te ôpu i te mäa, no te haapaari atoà i to tätou feruriraa ia roaa ia tätou te hiroà, terä te vähi e hiroà ai ia tätou, te rahi te ôpuaraa faaora a te Atua ia tätou, e vähi atoà e ìte ai tätou e ua ätea tätou i te Atua, ia rahi te àti, ia rahi te fifi, ia rahi te mauiui, i reira e parau ai e aita tätou i täuà i te parau o te fenua, aita atoà rä tätou i täuà i teie haamanaò-faahou-raa a te Fatu e ia parau anaè te Fatu te haamanaò ra, te ìte ra ia tätou i to tätou haapaò òre, e te reira haapaò òre ua tae roa mai i teie mahana, te fenua e vähi vahavahahia e tätou, ua tae te tahi pae i te parauraa e aha e ora te taata i te fenua. Te Fatu teie e parau nei, ua parau atu vau ia òutou aita òutou i faaroo mai, èita òutou e hinaaro i te faaroo mai, te auraa ra, èita òutou e färii i te ora ; no Ietu teie reo e haamanaò faahou mai nei ia tätou, i te mea ta na i parau na i to na tau, tei riro atoà èi parau na tätou i teie mahana, e täpiri mai teie reo, to Itaia te faahiò ra ia tätou i te raì, e te fenua, te raì, teitei rahi to na i to te fenua, mai te reira atoà te mana o te Atua, mai te reira atoà te haereà o te Atua, èita e naeàhia e tätou ia tïtau, eere tätou te haere i te Atua ra, te Atua tei haere mai ia tätou ra, e aha ia ta tätou e ìmi faahou ra i te Atua i te vâhi aita tätou i ìte i te hoê aè faanahoraa, aita hoì tätou i ìte aè i te parau no te raì, te hämani noa ra tätou i te tahi ao no tätou.

Ia ora na i te Mätahiti âpï

Teraì òr. Faatura.

Ìtaia 55.1-13 Hiò hipa

Mahana piti 31 Titema 2019.

Pö Mätahiti.

Hiò hipa

Taramo 42

1 Na te Mënätehe Matetira na te tamarii a Tora. 2 Mai te àiri e hiaai i te pape rii tahe ra, oia atoà ta ù värua ia òe, e te Atua e. 3 Te poìhä nei ta ù värua i te Atua, i te Atua ora ra. A fea rä vau e tae atu ai a faaìte atu ai i mua i te aro o te Atua? 4 Ta ù roimata nei ta ù mäa, i te ruì e te ao, i parau mai ai rätou i te mau mahana atoà nei Tei hea to Atua na? 5 Te manaò nei au i taua mau mahana ra, e te ninii nei i ta ù värua i roto ia ù nei, ia ù hoì i haere mä te taata atoà ra, e ua haafätata atu mätou i te fare o te Atua ra mä te haruru i te òaòaraa o te haamaitaì i te Atua, mä te rahi atoà o te taata i te haapaòraa i te ôroà moà ra. 6 E aha òe i taiä ai, e ta ù värua?

E aha òe i tiàrepu ai i roto ia ù nei? E tiàturi i te Atua, e haamaitaì ä vau ia na, no te ora i mua i to na ra aro 7 Ua taiä ta ù värua i roto ia ù nei, e ta ù Atua, no te mea te manaò nei au ia òe mai te fenua mai ra mai Iörïtäna, mai ô i to Heremona, e te mouà ra o Mitara. 8 Te tiàoro nei te tahi moana i te tahi moana, i te haruru o to mau ureuretiàmoana to mau àre e to mau aru ra, ua nä nià iho ia ia ù. 9 E faaue mai rä te Fatu i to na hämani maitaì i te ao, e i te ruì ra, ei ia ù nei ia ta na ra himene; e ta ù nei pure, ei te Atua ia e ora ai au nei. 10 Te parau nei au i te Atua, e ta ù haapüraa, E aha òe i haamoè ai ia ù nei? E aha vau i òto haere ai i te hämani ìno o te ènemi nei? 11 Mai te ôfatifatiraa o to ù nei mau ivi, te faaìno o ta ù mau ènemi nei, i parau noa mai ai rätou i te mau mahana atoà: Tei hea to Atua na? 12 E aha òe i taiä ai e ta ù värua? E aha òe i tiàrepu ai i roto ia ù nei? E tiàturi i te Atua: e haamaitaì ä vau ia na, ei ora ia no ù, e ei Atua no ù.

Ìtaia 55.1-13

Te aò mai nei te perofeta i to te ao ia faaroo i te Metia.

1 E te feiä atoà i hiaai ra e, e haere mai i te pape nei e te feiä ârio òre ra, a haere mai, e hoo e e àmu, oia ia, e haere noa mai, e hoo noa eiaha ei ârio, e eiaha ei hoo, i te uaina hoì e te ü. 2 E aha òutou i horoà ai i te ârio i te mea mäa òre, e ta òutou òhipa i te mea paìa òre? A haapaò maitaì mai na ia ù, a àmu ai i te mea maitaì; e mauruüru ia òutou i te mäa maitataì roa ra. 3 E faafäriu mai to òutou tarià, a haere mai ai ia ù nei; e faaroo mai, e ora ia òutou; i te mau maitaì i faaìtehia ia Tävita ra, i te mea haavare òre ra. 4 Inaha, ua horoà vau ia na ei ìte no te taata nei; ei arataì, e ei faaau ture na te fenua nei. 5 Inaha, te fenua ìte-òre-hia e òe ra, na òe ia e parau atu; e te fenua aore i ìte ia òe ra, te horo mai ia ia òe ra, no to Atua no te Fatu; e no Tei Moà i Ìteraèra nei, o òe hoì tä na i faateitei. 6 E ìmi òutou i te Fatu, òi ìteä aè o ia, e tiàoro òutou ia na, òi fätata mai o ia. 7 e faaruè te paieti-òre i to na haereà, e te taata parau tià òre i to na manaò a hoì oia i te Fatu, e nä na o ia e aroha mai; e hoì i to tätou Atua, te rahi ra hoì ia na te faaòre i te hara. 8 Eere hoì to ù ra manaò i to òutou ra manaò; eere hoì to òutou ra haereà i to ù ra haereà, të nä reira mai ra te Fatu. 9 Mai te raì nei hoì e teitei rahi tö na i to te fenua; oia atoà to ù ra haereà, e teitei ia i to òutou haereà, e to ù ra mau manaò i to òutou ra mau manaò. 10 Mai te ua mau e topa nei, e mai te hiona, no nià mai i te raì ra, e aore i hoì faahou i reira; ua faararirari rä i te fenua ra, e ua faatupu ra, e ua faahotu mai hoì i tä na, i noaa ai hoì te huero i te feiä e ueue, i te mäa i te feiä i àmu ra 11 oia atoà te parau no roto i to ù nei vaha; e òre e hoì faufaa òre noa mai ia ù nei, e tupu rä tei ôpuahia e au ra; e noaa hoì te mea i faaue atu ai au ra. 12 E reva òutou mä te òaòa; e ärataìhia òutou mä te hau e haapüroro noa mai te mau mouà e te mau âivi i te himene òaòa nä mua ia òutou; e te mau räau atoà o te aru ra, e papaì ia i to rätou rima. 13 E monohia te räau taratara, i te pureti; e monohia hoì te tätarämoa, i te heteta: e riro hoì ei manaòraa nä te Fatu; e ei täpaò vaiiho-tämau-hia, o tei òre roa e faaòrehia ra.

Manaò.

Teie pö ia au i te mätahiti tivira e moti ai te mau märama e ôtarohia ai te mau mahana i roto i te mau parau tei maìri, a riro atu ai èi mau parau tei maìri, aore ra èi haamanaòraa i te mau òhipa tei tupu, tei oti, e aore ra tei òre i oti. I teie atoà pö e mätutu ai te tahi pae i to na oraraa ta na i fänaò, e aore ta na i òre i fänaò teie tuhaa na te fenua te reira e pähono, te fenua to tätou teie hoa e ärataì nei ia tätou i te mau taime atoà o to tätou oraraa, e maìri ia tau, e topa ia uì, e fenua noa te fenua, e faatupu noa te fenua i te àihere i te vahi  òhipa-òre-hia e te taata, täfifi noa te pohue i nià i te mau tumu räau, i to tätou hueraa i te mau pö tänuraa. Faaìte tämau noa ra te fenua i te huru o te taata maite hoê hiò hipa ra te huru, teie tahi himene i päpaìhia e Faite Serge òrometua i te naò ra,

Hiò hipa

To ù tià noa raa i mua  te hiò hipa  

Faahoì mai nei te hiò i to ù hohoà     

To na mata a a to ù mata

To ù rima a a  to na rima

Hiò atu, hiò mai

Riri atu, riri mai

Àta mai, àta atu vau,

To ù  hohoà

Hohoà a a a  Mäòhi i i i

To ù tià noa raa i mua i te hiò hipa

Faahoì mai nei te hiò i to ù huru mau 

To na reo, to ù reo

To ù hiroà, to na hiroà

Hiò atu, hiò mai

Riri atu, riri mai

Àta mai, àta atu vau

To ù huru mau

Tou Hohoà a a a 

To ù huru u u u                      

To ù tià noa raa i mua  te hiò hipa

Faahoì mai nei te hiò i to ù hohoà

To na mata, to ù mata

To ù rima, to na rima

Hiò atu, hiò mai

Riri atu, riri mai

Àta mai, àta atu vau,

To ù  hohoà

To u Hohoà a a a no te Atua 

To ù huru u u u  no te Atua

Eiaha tätou e faaìno noa

To tätou huru

Te taata e faaìno noa i to na hohoà

Ua faaìno atoà ò ia he he he i te Atua

Hohoà a a a Mäòhi iii

Hohoà a a a Mäòhi iii

E faaìte noa te fenua i te hohoà, te huru o te taata e nünaa hupehupe e te faatau e öè ia te fenua, èita ra te fenua e faaea i te faatupu i te àihere, e te täfifi o te pohue.

Teie te parau a te Taramo, 12 E aha òe i taiä ai e ta ù värua? E aha òe i tiàrepu ai i roto ia ù nei? E tiàturi i te Atua: e haamaitaì ä vau ia na, ei ora ia no ù, e ei Atua no ù. E teie ta Ìtaia e faaìte ra, 10 Mai te ua mau e topa nei, e mai te hiona, no nià mai i te raì ra, e aore i hoì faahou i reira; ua faararirari rä i te fenua ra, e ua faatupu ra, e ua faahotu mai hoì i tä na, i noaa ai hoì te huero i te feiä e ueue, i te mäa i te feiä i àmu ra 11 oia atoà te parau no roto i to ù nei vaha; e òre e hoì faufaa òre noa mai ia ù nei, e tupu rä tei ôpuahia e au ra; e noaa hoì te mea i faaue atu ai au ra. Na parau teie e au ia tätou no teie mätahiti âpï ta tätou e fatata nei i te tomo èi haamaitaìraa na tätou i te Atua Nui Tumu Tahi. Te piiraa ai e piihia nei ia tätou i teie pö. E te feiä atoà i hiaai ra, e haere mai i te pape nei e te feiä ârio òre ra, a haere mai, e hoo e  àmu, e haere noa mai, e hoo noa eiaha ei ârio, e eiaha ei hoo, i te uaina hoì e te ü. E aha òutou i horoà ai i te ârio i te mea mäa òre, e ta òutou òhipa i te mea paìa òre A haapaò maitaì i te aroha e te here o te Atua, a àmu ai i te mea maitaì; e mauruüru ia tätou i te mäa maitataì ra. E faafäriu mai te tarià, a haere mai e faaroo, e ora ia tätou; i te mau maitaì i faaìtehia i Mäòhi Nui nei, Inaha, ua horoàhia mai te ìte no te taata ei arataì, e ei faaau ture na te fenua nei. Te fenua ìte-òre-hia e òe ra, na òe ia e parau atu; e te fenua aore i ìte ia òe ra, te horo mai ia ia òe ra, no to Atua no te Fatu; e no Tei Moà i Mäòhi Nui nei, o òe hoì tä na i faateitei. E ìmi i te Fatu, òi ìteä aè o ia, e tiàoro ia na, òi fätata mai o ia. E faaruè te paieti-òre i to na haereà, e te taata parau tià òre i to na manaò a hoì oia i te Fatu, e nä na o ia e aroha mai; e hoì i to tätou Atua, te rahi ra hoì ia na te faaòre i te hara.  Eere hoì to ù ra manaò i to òutou ra manaò; eere hoì to òutou ra haereà i to ù ra haereà, të nä reira mai ra te Fatu.  Mai te raì nei hoì e teitei rahi tö na i to te fenua; oia atoà to ù ra haereà, e teitei ia i to òutou haereà, e to ù ra mau manaò i to òutou ra mau manaò. Haere âmui anaè tätou e to tätou Atua, te Atua Nui Tumu Tahi i teie mätahiti tivira 2020, 11 oia atoà te parau no roto i to ù nei vaha; e òre e hoì faufaa òre noa mai ia ù nei, e tupu rä tei ôpuahia e au ra; e noaa hoì te mea i faaue atu ai au ra.

Ia ora na i te mätahiti âpï.

Terai òr. Faatura.

Mātaio 2.13-15+19-23 Faaheitaòto

Tāpati 29  no Titema 2019.

Faaheitaòto

Taramo 128

1 Tire a te Moruta. E ao to te taata atoà i mataù i te Fatu, o tei haapaò i to na ra mau èà 2 E àmu òe i ta to rima i òhipa ra. E ao to òe e e manuia ta òe 3 E riro to vahine mai te vine hotu i to òe ra pae fare; e to mau tamarii, mai te ohi ôrive ia, i te haaàtiraa i ta òe ra àmuraa. 4 Inaha, i nä-reira-hia to taua taata ra maitaì, to te taata i mataù i te Fatu ra 5 Na te Fatu òe e haamaitaì, mai ô mai i Tiona ra E ìte hoì òe i te maitaìraa o Ierutarëma, e hope noa atu to òe ra puè mahana, 6 e ìte òe i te tamarii a to mau tamarii ra. E te hau hoì i nià ia Ìteraèra.

 Māteri 23.15-26

Mau àoraa a te metua täne 15 E ta ù tamaiti e, ua paari anaè to òe ra âau, e òaòa ia ta ù âau, to ù iho nei ä. 16 E òaòa ta ù âau, ia parau to vaha i te parau tià. 17 Eiaha to âau ia feìi i te feiä rave hara; ia tämau rä i te mataù i te Fatu eiaha ei mahana tuua. 18 Te vai ra hoì te utuà mau a muri atu, e òre hoì ta òe e tiàturi ra e faaòrehia. 19 E faaroo mai, e ta ù tamaiti, ia paari òe; e e arataì i to âau i te äratià. 20 Eiaha òe e âmui atoà i te feiä i taèro i te uaina ra; i roto i te feiä òehamu tiàâ ra; 21 o te taèro àva hoì e te òehamu tiàâ ra, e veve ia; e na te tiàruhe e faaàhu mai i te àhu motumotu. 22 E faaroo mai i to metua täne i fänau ai òe ra, e eiaha e vahavaha i to metua vahine, ia ruhiruhiä ra.23 E hoo i te parau mau, e eiaha roa e hoo-faahou-hia atu; e te paari, e te aò, e te ìte atoà hoì. 24 E òaòa te metua o te taata parau tià ra; e te metua o te tamaiti paari ra e òaòa atoà te metua ia na 25 o ia ia, e òaòa to metua täne e to metua vahine atoà; to metua vahine tei fänau ia òe ra, e òaòa ia. 26 Hö mai na i to âau ia ù nei, e ta ù tamaiti e, e hiò mäite hoì to mata i to ù nei mau èà.

Torota 3.12-21

12 E tënä na, e faaâau aroha noa, e te hämani maitaì, e te haèhaa, e te marü, e te faaòromaì rahi, mai te feiä moà e te herehia i mäìtihia e te Atua ra. 13 E faaòromaì te tahi i te tahi, e e faaòre te tahi i ta te tahi hapa, ia pari-raa-hia ta te tahi i te tahi; mai te Metia atoà i faaòre i ta òutou na, e nä reira atoà òutou. 14 E ei nià roa iho i taua mau mea atoà nei, o te aroha o taua tätua nehenehe roa ra ia. 15 E ei te hau a te Atua ra te mana i roto i to òutou âau, i parauhia ai hoì òutou ei tino hoê; e ia mauruüru roa òutou i te Atua. 16 Ia vai hua na te parau a te Metia i roto ia òutou mä te ìte päpü atoà ra; i te haapiiraa e te aòraa te tahi i te tahi, mä te taramo, e te himene, e te tire a te Värua, mä te haamaitaì i roto i to òutou âau i te Fatu. 17 E te mau mea atoà ta òutou e rave ra, i te òhipa e te parau a rave anaè ia mä te iòa o te Fatu ra o Ietu, mä te haamaitaì i te Atua ra i te Metua ia na ra. I mua i to te ao 18 E te mau vahine ra, e auraro mäite òutou i ta òutou mau täne, o te mea au ia i te Fatu nei. 19 E te mau täne ra, e aroha òutou i to òutou mau vahine, e eiaha e ìriä atu ia rätou. 20 E te mau tamarii ra, e faaroo i to òutou mau metua i te mau mea atoà nei, e mea mauruüru hoì te reira i te Fatu nei. 21 E te mau metua ra, eiaha e faariri atu i ta òutou tamarii, o te taiä hoì rätou.

Mātaio 2.13-15+19-23

Te hororaa i Àifiti

13 I muri aè i te revaraa o te mau taata paari, ua fä mai ra te merahi a te Fatu, faaheitaòto mai ra ia Iotëfa, nä ô mai ra A tià, a rave i te tamaiti e to na metua vahine, a horo i Àifiti, ei reira pärahi ai e tae noa atu i te taime e parau faahou atu ai au, no te mea, te ìmi ra Herota i te tamaiti no te haapohe. 14 Ua tià aè ra Iotëfa, rave iho ra i te tamaiti e te metua vahine i te ruì, haere atu ra i Àifiti. 15 Pärahi atu ra i reira e tae noa atu ra i te poheraa o Herota. Ia tupu ta te Fatu i parau mai i te perofeta I Àifiti to ù piiraa i ta ù tamaiti.

Te hoìraa nä Àifiti atu e te pärahiraa i Nätareta

19 I muri aè i te poheraa o Herota, ua fä mai ra te merahi a te Fatu, faaheitaòto mai ra ia Iotëfa i Àifiti, 20 nä ô mai ra A tià, a rave i te tamaiti e te metua vahine, a hoì i te fenua o Ìteraèra; ua pohe hoì te feiä i ôpua e täparahi i te tamaiti iti. 21 Ua tià aè ra Iotëfa, rave iho ra i te tamaiti e te metua vahine, tomo atu ra i te fenua o Ìteraèra. 22 Ia ìte rä o ia e o Àreherau te arii i nià ia Iütea, tei mono atu i to na metua täne ia Herota, mataù iho ra o ia i te haere i reira: i faaheitaòtohia mai rä o ia e te Atua, ôpaì atu ra o ia i Tarirea 23 e tae atu ra i te hoê ôire o Nätareta te iòa, pärahi iho ra i reira, ia tupu te parau a te mau perofeta E parauhia o ia e Nätirea/Nätorea.

Manaò.

Teie te reo o te Paari i te faaìteraa a te  Māteri pene 23 te mau ìrava 15 e tae i te ìrava 26, te mau àoraa a te metua täne, E ta ù tamaiti e, ua paari anaè to òe ra âau, e òaòa ia ta ù âau, to ù iho nei ä. E òaòa ta ù âau, ia parau to vaha i te parau tià. Eiaha to âau ia feìi i te feiä rave hara, ia tämau rä i te mataù i te Fatu eiaha ei mahana tuua. Te vai ra hoì te utuà mau a muri atu, e òre hoì ta òe e tiàturi ra e faaòrehia. E faaroo mai, e ta ù tamaiti, ia paari òe e arataì i to âau i te äratià. Eiaha òe e âmui atoà i te feiä i taèro i te uaina ra; i roto i te feiä òehamu tiàâ ra, o te taèro àva hoì e te òehamu tiàâ ra, e veve ia; e na te tiàruhe e faaàhu mai i te àhu motumotu. E faaroo mai i to metua täne i fänau ai òe ra, e eiaha e vahavaha i to metua vahine, ia ruhiruhiä ra. E hoo i te parau mau, e eiaha roa e hoo-faahou-hia atu; e te paari, e te aò, e te ìte atoà hoì. E òaòa te metua o te taata parau tià ra; e te metua o te tamaiti paari ra e òaòa atoà te metua ia na, e òaòa to metua täne e to metua vahine atoà; to metua vahine tei fänau ia òe ra, e òaòa ia. Hö mai na i to âau ia ù nei, e ta ù tamaiti e, e hiò mäite hoì to mata i to ù nei mau èà. Ia faaroo tätou i te haapotoraa o na taiòraa e maha nei teie atu ra ia,

-Taramo 128, 4 Inaha, i nä-reira-hia te taata maitaì, te taata i mataù i te Fatu.

-Materi 23, 26 Hö mai to âau ia ù, e ta ù tamaiti, e hiò mäite to mata i to ù nei mau èà.

-Torota 3, 12 E tënä na, e faaâau aroha, te hämani maitaì, te haèhaa, te marü, te faaòromaì.

-Mataio 2, I faaheitaòtohia mai rä o ia e te Atua, ôpaì atu ra o ia i Tarirea.

Te faaìte nei te Parau Maitaì, i te òhipa i faanahohia e te Atua Nui Tumu Tahi i nià i na metua no tei àiü tei fänauhia, ia matara i rapae i te mau faanahoraa o te mau faatere Àti Iuta e tae noa atu i te mau faatere Roma. Te tae nei te poroì a te Atua i te metua tane na roto i te faaheitaòtoraa, te faaheitaòto e parau no te pö tei faaära i to te ao i te tahi parau e tupu, tei faaroohia to na reo mai roto mai i te pö, e rave taua òhipa ra ma te ìte e o te Atua tei parau àfaro mai i te taata. Te tupu nei te hororaa i Aifiti. I roto i te Faaäuraa mätamua, te puta Etoto te faatià ra ia, mea nä hea te fenua Aifiti ei fenua no te tïtïraa, e no te mau òhipa hämani-ìno-raa taata no te mau àti Iuta ihoä rä. Tei roto i teie fenua, teie vähi to Ietu pärahiraa. Mai to Möte faaoraraa, arataìraa i te mau àti Iuta i räpae ia Àifiti, e faaora atoà Ietu i to na nünaa mai roto mai i te tïtïraa no te hara. E mai te peu, ua arataì o Möte i to na nünaa, oia ho i te nünaa Ìteraèra i te fenua no te tapu, Ietu rä e arataì o ia i to na nünaa i roto i te pätireia o to na Metua.

Te mau ìrava 19 e tae 23  na te Atua te ôpuaraa. Te haereraa mai e färerei i to na mau taata, na roto i te mau merahi. Mai ô nei ia Iotëfa, ta te merahi i haere mai. Na roto i te tahi ùmau moemoeä, oia hoì e faaheitaòto. Eita e òre i roto i to tätou oraraa, ua tupu ê na terä òhipa i nià ia tätou, to tätou mau hoa Terä te vai ra te tahi aita tätou i ìte na hea ia tatara. Aore ra, aita tätou e färii ra i te moemoeä.

E piti taime te faaheitaòtoraahia  a Iotëfa, ia au i te arataìraa a te Atua, ua tià, ua rave i teie àiü fänau api e to na Metua vahine no te horo i Aifiti fenua no te titi (Etoto 20, 2), ua riro ei fenua täpuniraa no Iotëfa ma. No te horo i te òhipa tià òre a Herota. Oia hoì to na hinaaro e haamou i te mau tamarii tamaroa. Tamarii faataahia e te Atua, ia au i te tïtauraa a te Atua iho, no teie taime, e ora o ia i roto i teie òire iti no Nätareta. Te mea âua haaàti ra i teie òire, te mau räau, te tïtona e te vai atu ra. E òire räpae i te mau mea Na metua e piti o Ietu, oia hoì te Atua e o Iotëfa, te ara ra i nià i teie àiü.

E hoì i te vähi fänauraa, i reira e paari ai i te mau haapiiraa a te metua tane, e tämuta o Iotëfa e taata ia tei ìte i te faaàfaro te mau täuihaa tei fefe, tei puupuu tei tïöiöi i roto i teie vahi o Ietu e paari ai. I teie taime e moè ai te parau o Ietu e moè  o ia hoê àhuru mä hoê mätahiti. Te parauhia ra ua haapaò mai te na metua i te haapiiraa ia Ietu i te faufaa no te faaroo, e te oraraa i te mau mahana atoà tei pärahi fatata noa i te mau ôpuaraa faaora a te Atua Nui Tumu Tahi. E naò ia tätou i te parauraa e, e faaâau aroha noa e te hämani maitaì, e te haèhaa, e te marü, e te faaòromaì rahi, mai te feiä moà i herehia mai ia au te mäìtiraa a te Atua. No te faatupu i te faaòromaì te tahi i te tahi, e faaòre te tahi i ta te tahi hapa, ia pari-raa-hia te tahi i te tahi; mai te Metia atoà i faaòre i ta tätou na, ia nä reira atoà tätou. Ei nià iho taua mau mea atoà nei, i te aroha o taua tätua nehenehe roa ra. Ei  hau a te Atua ra te mana i roto i to tätou âau, i parauhia ai hoì tätou ei tino hoê; e ia mauruüru tätou i te Atua. Ia vai hua te parau a te Metia i roto ia tätou mä te ìte päpü; i te haapiiraa e te aòraa te tahi i te tahi, mä te parau âpï, e te himene, e te tire a te Värua, mä te haamaitaì i roto i to tätou âau i te Fatu. E te mau mea atoà ta tätou e rave, i te òhipa e te parau a rave anaè ia mä te iòa o te Fatu ra o Ietu, mä te haamaitaì i te Atua ra i te Metua ia na ra. I mua i to te ao.

I teie täpati hopeà no teie mätahiti 2019, ua ìte tätou i te mau vahi i horohia e tätou, e tae noa atu i te hoìraa i te vahi i haamata ai tätou i te horo. Teie huru oraraa to tätou te vai nei te tahi mau reo to Ietu e varovaro noa ra i roto ia tätou i teie mau parauraa, I to Ietu faaìteraa i te tumu o to na tere i te ao nei, teie to na reo I haere mai nei au i te ao nei ia tupu te parau tià, ia ìte te feiä ìte òre, e ia riro te feiä ìte ei matapö ia au te faaìteraa a te Ioane pene 9, i te ìrava 39. E tano te faufaa o teie parau ia faaäuhia i te faufaa o te òhipa i tupu i te matahurahura o teie nei ao hou to te Atua haamataraa i ta na òhipa. Te haapäpüraa mätamua e horoàhia mai ra e te päpaì Tenete, no te faaìte mai ia i te huru o te fenua : Te vai ano noa ra te fenua aore e faufaa, e te pöuri hoì i nià iho i te ìriatai Tenete pene 1 ìrava 2. E i muri iti noa mai, te reo mai ra o te Atua Ei märamarama. Ua märamarama iho ra Tenete pene 1 ìrava 3.

Teraì òr. Faatura.

Ioane 1.1-18 Ànaana, Pöuri

Mahana toru  25 no Titema 2019.

ÔROÀ FĀNAU

Ànaana, Pöuri

Taramo 98

1 Taramo. E himene i te Fatu i te himene âpï, e mau mea taa ê hoì tei ravehia e ana, no to na iho rima àtau e to na rima moà, i riro mai ai te rë ia na. 2 Ua faaìte mai ra te Fatu i te ora na na, i mua i te mata o te mau êtene atoà ra, te faaìte-raa-hia te parau tià na na ra. 3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua. 4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene. 5 A himene i te Fatu mä te tïnura, mä te tïnura e te reo haamaitaì atoà ra; 6 mä te mau pü e te òto o te tuferi, te harururaa i te haamaitaì i te arii ra, i te Fatu. 7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre.

Ìtaia 52.7-10

7 Te nehenehe o te âvae o te veà i nià i te mouà, o tei hopoi mai i te parau maitaì ra, o tei faaìte hua mai i te parau hau ra o tei hopoi mai i te parau òaòa e te maitaì ra, o tei faaìte hua mai i te ora ra o tei parau mai ia Tiona, Tei to Atua ra te hau 8 E faateitei to mau faèhau i to rätou reo; e ûmere päatoà noa atu to rätou reo; e hiò hoì rätou, te mata e te mata, i to te Fatu faahoìraa mai ia Tiona. 9 Ia püroro noa atu te òaòa; ia ûmere päatoà, e te mau vähi pararï i Ierutarëma ua haamähanahana hoì te Fatu i to na taata; ua faaora oia ia Ierutarëma. 10 Ua faaìte hua te Fatu i ta na rima moà i mua i te mata o te mau êtene atoà ra; e ua ìte i te mau hopeà atoà o te fenua ra i te ora a to tätou Atua.

Hēpera 1.1-6

Te parauraa mai te Atua nä roto i ta na Tamaiti

1 O te Atua, o tei parau riirii mai i mütaa iho, e rave rahi te huru o te parauraa mai i te feiä tupuna i te mau perofeta, 2 o tei parau mai ia ia tätou i teie nei ànotau hopeà i te Tamaiti, o tei haapaòhia e ana ei Fatu no te mau mea atoà nei, e ua hämani hoì o ia i nä ao atoà nei ia na. 3 O te ànaana hoì o ia o to na ra hanahana, e o te hohoà mau ia no na iho, e te mauraa hoì i te mau mea atoà nei i ta na ra parau mana, oti aè ra ta tätou hara i te tämähia e ana ia na iho ra, pärahi iho ra i raro i te rima àtau o te Mana i te vähi teitei ra.

Te Tamaiti tei hau i te mau merahi

4 E maitaì hau ê hoì to na i to te mau merahi, mai te iòa i noaa ia na i hau ê i te maitaì i to rätou ra. 5 O vai hoì to taua mau merahi ra ta te Atua i parau noa atu mai tahito mai ä e O ta ù Tamaiti òe, i naùanei òe i fänauhia ai e au. E ta na hoì i nä ô ra e Ei Metua vau no na, e ei Tamaiti o ia na ù. 6 E ia na hoì i faahoì faahou mai i te mätahiapo i te ao nei, nä ô aè ra o ia: «Ia haamori te mau merahi atoà a te Atua ia na.

Ioane 1.1-18

Te Parau a te Atua te Ora.

1 I vai na te Parau i te mätamua ra, i te Atua ra hoì te Parau, e o te Atua hoì te Parau/o te Parau hoì te Atua. 2 I te Atua ra hoì o ia i te mätamua ra. 3 Na roto ia na i rahuhia ai te mau mea atoà nei, e te mau mea atoà i rahuhia, aore hoê aè tei òre i nä roto mai ia na i te rähuraahia. 4 Tei roto ia na te ora, e te ora, o te märamarama ia o te taata. 5 Te ànaana nei te märamarama i roto i te pöuri, aita rä te pöuri i färii atu ia na. 6 Te vai ra ra te hoê taata tei tonohia mai e te Atua, o Ioane te iòa. 7 I haere mai o ia ei ìte, e faaìte i te märamarama, ia faaroo/tiàturi te taata atoà na roto ia na. 8 Eere o ia i te märamarama, ua haere mai rä o ia no te faaìte i te märamarama. 9 O te Parau te märamarama mau, ua haere mai o ia i te ao nei no te türama/haamäramarama i te mau taata atoà. 10 I te ao nei o ia, e na roto ia na teie nei ao i te rähuraahia; e aita to te ao i ìte atu ia na. 11 I haere mai nei o ia io na iho ra, e aore to na iho ra mau taata i färii atu ia na. 12 I te feiä atoà rä tei färii atu ia na, tei tiàturi i to na ra iòa, ua horoà o ia i te mana ia riro rätou ei mau tamarii na te Atua. 13 Te feiä eere i to te toto i fänau ai ra, eere hoì i to te hinaaro o te tino eere hoì i to te hinaaro o te taata, no te Atua rä. 14 I riro mai nei te Parau ei taata, e ua tiàhapa/pühapa mai io tätou nei, e ua ìte mätou i to na hanahana, mai te hanahana e au i te Tamaiti fänautahi a te Metua, ua î i te maitaì e te parau mau. 15 O na ta Ioane i faaìte mai, ia na i pii ra O ia teie ta ù i parau ra e O të haere mai i muri iho ia ù nei, ua riro ia i mua ia ù, o mua ä hoì o ia ia ù. 16 Oia mau, na roto i to na î, ua noaa ia tätou atoà nei te maitaì e au atoà i to na ra maitaì. 17 Na Möte hoì i tuu mai i te ture, âreà te maitaì e te parau mau, na Ietu Metia ia. 18 Aore e taata i ìte i te Atua, o te Tamaiti fänautahi rä i nià i te ôuma o te Metua ra, o ia tei faaìte mai ia na.

Manaò.

Èi faahanahanaraa na tätou i te ôroà o te Metia mea tià ia tätou ia faaroo mai i ta te päpaì  Taramo e faamanaò ra ia tätou i teie mahana. E himene i te Fatu i te himene âpï, e mau mea taa ê hoì tei ravehia e ana, no to na iho rima àtau e to na rima moà, i riro mai ai te rë ia na. 2 Ua faaìte mai ra te Fatu i te ora na na, i mua i te mata o te mau êtene atoà ra, te faaìte-raa-hia te parau tià na na ra. 3 To na aroha e ta na parau mau, ua manaòhia e ana i te ùtuafare o Ìteraèra. Ua ìte te mau hopeà atoà o te fenua i te ora a to tätou Atua. 4 Ia pïnaì te haamaitaì i te Fatu e àti noa aè te fenua, ia puroro te reo òaòa, ia ûmere mä te haamaitaì i te himene. 5 A himene i te Fatu mä te tïnura, mä te tïnura e te reo haamaitaì atoà ra; 6 mä te mau pü e te òto o te tuferi, te harururaa i te haamaitaì i te arii ra, i te Fatu. 7 Ia haruru te tai e to na îraa, te ao atoà e to na ra mau taata. 8 Ia paìpaì te mau pape i to rätou rima, e ia ûmere tahi te mau mouà atoà, 9 i te aro o te Fatu, te haere mai ra hoì o ia e haavä i te fenua. E haavä o ia i to te ao mä te parau tià, e te mau taata mä te piò-òre. Te faamanaò nei te rahu ia tätou te Teitei e te Hanahana no te Atua Nui Tumu Tahi, e ia faaroo tätou i te haapotoraa no na taiòraa e maha,

Taramo 98, 7 Ia haruru te tai to na îraa, te ao atoà e te mau taata.

Ìtaia 52, 10 Ua faaìte te Fatu i ta na rima moà ua ìte te fenua te ora a to tätou Atua.

Hepera 1 Naùanei òe fänauhia ai e au. E ta na i nä ô ra e Metua vau, e Tamaiti na ù.

Ioane 1, 5 Te ànaana nei te märamarama, aita rä te pöuri i färii atu ia na.

Ua fänauhia te tumu o te Märamarama, te Märamarama ra te tumu ia o te ora, e taua ora ra to te taata ia Märamarama.

Te Märamarama ta te ìrava e faaìte nei, e Märamarama ia tei  hau ätu  i te mau märamarama ta tätou e faanaò noa nei. Ua hau ätu o ia i te ànaana mahana, e te puai no te mau mori o te ao nei. E Märamarama teie i färereihia e Tauro i nià i te èà no Tamateto, tei puta roa i roto i te vahi hohonu no to na huru, topa iho ra o ia mai nià mai i ta na puaahorofenua, e vai noa iho ra o ia e toru mahana ma te ìte òre te òhipa i tupu i nià ia na iho. Riro roa ätu ra o ia mai te hoê tamarii ra te huru, tiihia mai ra o ai e Anania ia au te tonoraa a te Varua Maitaì, no te ìriti faahouraa i te hoê èà àpi i mua ia na. Te òpuaraa tià òre ta Tauro i faaoti i roto ia na no te hämani-ìno-raa i te Ètärëtia a Ietu-Metia. Ua mou ia i mua i teie Märamarama, ua rave te Atua e faataui i teie òhipa ei faaìteraa i te mana no to na Märamarama. Oia mau e Märamarama taa ê mau teie e faaìtehia nei e Ioane Päpetito, e Märamarama tei arataì i te taata mai roto i te tïtïraa no te hara i roto i te faatiàmaraa i mua i te hara. Te vahi faufaa i roto i te faaìteraa a Ioane Päpetito, i teie Märamarama, te haapäpü nei o ia e, E  ERE  AU  TE  METIA,  E  ERE  AU  O  ERIA,  E  ERE  ATOA  I  TE  PEROFETA. Oia hoì eita o ia taua Märamarama, e mauhaa noa ra o ia i roto i te rima no te Atua, no te faaìteraa. No Ioane Päpetito eita i te mea faufaa roa ia ìtehia o ia, ta na atoà ia e hinaaro nei e faaìte i te mau taata atoà. E ère tätou i te märamarama o teie nei ao o te Metia ra. Oia mau, i te mau taime atoà tätou e tiàturi ai e, e matara ia tätou te mau fifi atoà, e i te mau taime atoà tätou e manaò ai e, e tei ia tätou ra te faaotiraa e aha ta te taata e tià ia manaò e ia tiàturi, e riro te faaroo Teretetiano ei faaroo tei haavï e tei faatïtï. O te Metia änaè te Märamarama, e ua tïtauhia tätou te hui-faaroo ia pärahi i roto i te pure ma te haehaa e ma te äni ia ärataìhia tätou e taua Märamarama ra. E tià  i te  Ètärëtia, na roto i te aroha  te  o te Atua Nui Tumu Tahi, ia riro ei faaìteraa i te Märamarama o te Atua tirärä ätu ai. Mai te mea noa ätu ra e faariro tätou ia tätou iho e o taua ia Märamarama ra, ei reira mau tätou e ätea ai e e tapu roa ai i to tätou tüàtiàtiraa i te Puna mau o te Märamarama. O ta Ioane Päpetito ia e faaìte nei, ia faaroo te taata atoà ia na. 

2) Ia faaroo te taata atoà ia na, eita e ore teie atoà te tahi täpura òhipa fifi tei òhipahia e Ioane Päpetito oia hoì te ìmiraa i te mau raveà ia faaroo te taata i te Tama no te Märamarama. Ia hiò änaè tätou i ta te papaì Parau Maitaì faaìteraa i te mau täpura òhipa tei ravehia e Ioane Päpetito, e ìte-iho-a  tätou i te tüàtiraa i roto i te FAAITERAA E TE FAAROORAA. No te mea i faite ai o Ioane Päpetito i te taata i te haereraa mai o te Märamarama, ia roaa–ihoä i te taata i te tiàturiraa i taua Märamarama ra. Te auraa, te fa o te faaìteraa a Ioane Päpetito, ia faaroo te taata, i te Metia.

I mua i te òhipa i ravehia e Ioane Päpetito, te ìte noa ra tätou e tuhaa rahi ta na i nià i te haereraa mai o te Fatu. E te riro nei o ia ei hiòraa na tätou i teie mahana. Ua päpu atoà ia tätou, e na tätou te mau maru metia no teie tau e rave i te òhipa i haamatahia mai e Ioane Päpetito. Mai te peu te fäito o Ioane Päpetito è ère te mea au-roa-hia e tätou, ta na ra faaìteraa aore ra ta na täviniraa ua riro mau te reira ei hiòraa na tätou. Te roo o te Metia teie ta Ioane Päpetito e faaìte nei ia faaroo te mau taata atoà.

I roto i teie tau no te Tiaìraa, aita ätu e parau faufaa roa ta tätou e faahiti oia hoì o te faaararaa i to te ao, na roto i te pure, na roto i te àrueraa e te haere mai nei te Faaora o te ao, te Märamarama mure òre o tei faaìte mai i te hinaaro o te Atua e faaora i to na nunaa i roto i teie mau tau àrepurepu e te hepohepo mau. Ia tauturu mai te Märamarama Nui ia tatou i roto i teie ôroà Fänau.

Teraì òr. Faatura.       

Mātaio 1.18-25 Ôtohe

Tāpati 22  no  Titema 2019.

TIAÌRAA MAHA

Ôtohe

Taramo 24

1 Taramo na Tävita. No te Fatu te fenua e te î atoà i nià iho, te mau fenua o te ao nei, e te feiä atoà e pärahi i reira. 2 Na na ia i faatïnana i te reira i te miti, e ua haamau o ia i te reira i te moana. 3 Nä vai e paiùma i te mouà o te Fatu? O vai të tià i to na ra vähi moà? 4 Te taata rima mä ra e te âau maitaì; o tei òre e faahiti i to na värua i te parau haavare, aore hoì i tapu mä te haavare. 5 To na te maitaì e noaa mai no ô i te Fatu ra, e te parau tià no ô i te Atua o to na ra ora. 6 Oia te feiä i ìmi ia na; o tei ìmi i to mata, e te Atua o Iatöpa. Tera. 7 E faateitei na ia òutou, e te mau ùputa e, e ia faateitei-atoà-hia òutou, te mau ôpani vaiiho taìàtä e, ia ö atu te arii hanahana i roto na 8 O vai teie nei arii hanahana? O te Fatu ia o tei mana e te püai; o te Fatu ia e mana i te àroraa ra. 9 A faateitei na ia òutou, e te mau ùputa e, e ia faateitei-atoà-hia òutou, e te mau ôpani vaiiho taìàtä e, ia ö atu te arii hanahana i roto na 10 O vai teie nei arii hanahana? O te Fatu manahope ia, o ia taua arii hanahana ra. Tera.

Ìtaia 7.10-16

Te täpaò o Èmanuera

10 Ua parau faahou mai ra te Fatu ia Âhata, nä ô mai ra, 11 E ani òe i te tahi täpaò i to Atua ra, i te Fatu; e ani i raro roa ra, e aore ra, ei nià roa. 12 Ua parau atu ra Âhata, E òre au e ani, e òre hoì au e faaoôo atu i te Fatu. 13 E ua parau mai ra o ia E faaroo mai, e te ùtuafare o Tävita; e mea iti änei òutou i faahaumani i te taata, e faahaumani atoà òutou i ta ù Atua? 14 E tënä na, nä te Fatu iho e höroà i te tahi täpaò no òutou inaha e tö te paretenia, e e fänau i te tamaiti, e maìrihia hoì to na iòa o Èmanuera. 15 E àmu o ia i te päta e te meri, ia ìte anaè o ia i te haapae i te mea ìno, e te rave i te mea maitaì. 16 E òre hoì teie nei tamaiti e ìte i te haapae i te ìno, e te rave i te mea maitaì, e faaruèhia ai taua fenua nei, e taua nä arii i àti ai òe na.  

Rōma 1.1-7

Aroharaa

1 Pauro, e tävini no Ietu Metia, i faarirohia ei âpotetoro, ia faataahia no te Èvaneria a te Atua 2 o tei faaìtehia mai i mütaa iho e ta na mau perofeta i roto i te Parau moà i päpaìhia ra , 3 no ta na Tamaiti no to tätou Fatu ra no Ietu Metia, o tei fänau mai i te huaai o Tävita, i te haapaòraa i te tino ra 4 i täpaò-faaìte-hia rä i te mana, e o te Tamaiti ia a te Atua, i ta te Värua Maitaì ra, i te tiàfaahouraa mai te pohe mai ra 5 no na mai to mätou maitaì i noaa ai, e te töroà âpotetoro i te mau êtene atoà no to na ra iòa, ia noaa ia rätou te haapaò faaroo ra; 6 no rätou atoà hoì òutou, o tei haapaòhia e Ietu Metia ra. 7 I te feiä atoà i herehia mai e te Atua i Röma na, i haapaòhia ei feiä moà ei ia òutou te aroha mau e te hau no ô mai i te Atua i to tätou Metua ra, e no ô hoì i to tätou Fatu ia Ietu Metia ra.

Mātaio 1.18-25

Te faaararaa ia Iotëfa

18 Teie te huru o te fänauraa o Ietu Metia. Te momoàhia ra ta na metua vahine o Märia ia Iotëfa aore ä räua i täati i hapü ai o ia i te Värua Maitaì. 19 E taata parau tià rä ta na täne o Iotëfa, aore rä i hinaaro i te faaìte hua ia Märia, manaò aè ra e haapae huna noa ia na. 20 E te feruri noa ra o ia i taua ôpuaraa ra, e inaha, ua fä mai ra te merahi a te Fatu, faaheitaòto mai ra ia na, nä ô mai ra E Iotëfa a Tävita ra, eiaha e mataù i te arataì mai i to vahine ia Märia i to fare na, no te Värua Maitaì hoì i hapü ai o ia. 21 E te tamaiti tä na e fänau, o ta òe ia e topa atu i te iòa ia Ietu; e faaora hoì o ia i to na nünaa i ta rätou hara. 22 Tupu mau atu ra te mau mea atoà i parauhia mai e te Fatu i te perofeta, a nä ô mai ai e 23 Inaha, e hapü te pötii, a e fänau mai o ia i te hoê tamaiti, e maìrihia to na iòa ia Èmanuera, Te Atua io tätou nei, ia ìritihia ra. 24 E ara aè ra Iotëfa, haapaò atu ra i ta te merahi a te Fatu i parau mai ia na, tii atu ra e arataì mai i ta na vahine io na ra. 25 Aita rä o ia i rave atu ia na e fänau noa mai ra i te hoê tamaiti, maìri atu ra i te iòa o Ietu.

Manaò.

Taramo 24, 10 O vai teie arii hanahana O te Fatu manahope ia.

Ìtaia 7, 14 inaha e tö te paretenia, e fänau i te tamaiti, e maìrihia to na iòa o Èmanuera.

Röma 1, 1 Pauro, tävini no Ietu Metia, i faarirohia ei âpotetoro, no te Èvaneria a te Atua

Mätaio 1, 25 Aita rä o ia i rave ia na e fänau mai ra te hoê tamaiti, maìrihia te iòa o Ietu.

I roto i te Mau taime ta tätou i haere mai e i roto i te mau täpati no teie tau faaineineraa no te haamanaòraa i te fänauraa te Metia, ua tuuhia i mua ia tätou te tahi mau parau no roto mai i te mau papaìraa a te mau taata tiàturi Atua, no te faaineineraa ia tätou ia noaa mai te tahi mau manaò âpï no te âmui- roa- atu i te òaòa mau no te fänauraa o te Metia a hiò atoà ai ia tätou i te rahi e te hohonu no te here e te aroha o te Atua ia tätou. Teie te täpati hopeà no te tau no te tiaìraa hou tätou a ö atu ai i roto i te ôroà Fänau i teie hepetoma âpï o ta tätou e haere atu nei. E no reira, i teie täpati, te arataì nei ta tätou taiòraa ia tätou i nià i te parau no te huru no te fänauraa no te àiü o te Fenua, e taua òhipa ra, ua tupu ia i roto i te ùtuafare no Iotëfa e no Maria.

Te faaìte nei na taiòraa e maha nei, i te faufaa no te tupuraa te parau no te fänauraa mai, te hoê tama taa ê i roto i te mau tama atoà o te ao nei, tei tohu atea- hia e te mau perofeta. E parau teie tei tae i roto i te perofeta ra ia Ìtaia, ei faaineineraa i te nünaa no te taeraa mai teie àiü. E ia topahia to na iòa ia Emanuera, oia hoì, o te täpaò ia teie i to te Atua pärahi tämauraa i pïhaìiho i to na nünaa, o tei parau- atoà- hia te Atua i ö tätou nei. Eita ra teie mau parau e faaea noa i roto i teie faanahoraa, e tupu ra oia i te àanoraa, i roto i te tiàturiraa o te mau taata atoà. Tei faaìte i te mana o te Atua, i te parauraa a to na mau tävini, tei ora i roto i tera tau e tera tau. Ia faaroo tätou i te manaò o Tavita i roto i te Taramo 24, te faahoì nei o ia i te mau maitaì atoà i nià i te Atua, i te mea o te Atua te tumu no te fenua e te î atoà e vai ra i roto ia na. Ma te horoà i te tahi mau uiraa, ei haapäpüraa i te huru no teie àiü e parauhia nei. Ta  Tavita pähonoraa i teie mau uiraa teie ia, ‘’ Te taata rima mä ra e te âau maitaì ; o tei òre e faahiti i to na värua i te parau haavare, aore hoì i täpü ma te haavare, to na te maitaì e noaa mai no ò  ia Te Atua Nui Tumu Tahi ra, e te parau tià no ò i te Atua o to na ra ora’’ (Taramo 24 : 4- 5). 10 O vai teie arii hanahana O te Fatu manahope ia.

Eita ra teie parau e faaea noa i roto i te faaäuraa mätamua, e tae roa ra i roto i te faaäuraa âpï. Ma te faaìte i te huru no te hanahana te òhipa i ravehia e te Atua i roto i to na mau tävini. Te hiòraa  a te âpotetoro a Pauro tei nià ia i te tiàraa Atua o Ietu, oia hoì, fänau iòhia mai o Ietu,’’ e täpaò faaìte i te mana  o te Tamaiti a te Atua, i ta te Värua Maitaì ra faaäraraa, i te tià- faahou- raa mai te pohe mai ra’’ (Roma 1 : 4). O ta Pauro ia e faaìte nei i te mau taata atoà tei òre a i na eàhia atu ra i teie mau parau. Ia noaa i te mau taata atoà ia faatura  na roto i te tiàturiraa i teie mau parau, no te Tamaiti a te Atua tei pärahi mai i rotopü i te mau taata, ei ia aurarohia ma te âau haehaa, ma te haapäpü e, 1 Pauro, tävini no Ietu Metia, i faarirohia ei âpotetoro, no te Èvaneria a te Atua.

Àreà ra ta Mataio faaìteraa, te horoà nei ia tätou, i te ìteraa te tupuraa te mau parau tohu no teie àiü, tei fänau pü fenuahia mai. Tei faaòhipa i na taata toopiti ia Iotëfa e o Maria, o raua te mauahaa a te Atua no teie òpuaraa. E faanaho te Atua teie òhipa ia au i to na hinaaro, eiaha  ra ia au i te hinaaro o te taata e ta na faanahoraa.

No reira te tahi manaò tumu e vai nei i roto i teie mau taiòraa mauti ra ia, TE PARAU FAFAU A TE ATUA. Na teie tumu parau e täamu i ta tätou na taiòraa e maha, o te ìtehia i roto i te manaò o te faatupu te fänauraa o teie àiü. O ta te merahi ia i parau ia Iotëfa i te taime o ia a faaheitaotohia ai, ‘’ E TE TAMAITI TA NA E FÄNAU, O TA ÒE IA E TOPA ATU IA IETU, E FAAORA HOÌ O IA I TÖ NA TAATA I TA RÄTOU HARA’ (Mataio 1 : 21). 25 Aita rä o ia i rave ia na e fänau mai ra te hoê tamaiti, maìrihia te iòa o Ietu.

Taiòraa  Mataio 1, 18 – 25.

Ìrava tumu, ìrava 21 E te tämaïti ta na e fänau, ta òe ia e topa atu ia Ietu, e faaora hoì o ia i to na taata i ta rätou hara. 25 Aita rä o ia i rave ia na e fänau mai ra te hoê tamaiti, maìrihia te iòa o Ietu.

Ua Ôtohe o Iotëfa i mua i te ôpuaraa faaora a te Atua, E tano tätou e tatara i te ôtoheraa mai teie i muri nei : Te òhipa ta te taata e rave, aore ra te parau ta na e parau, ei faatanoraa i to na hinaaro òre i te rave i te òhipa e tiaìhia ra ia rave o ia. Te vai atoà ra ihoä ia te tahi atu auraa, oia to te taata haere-ôtua-raa. Te taata e ôtohe, aita to na mata e hiò ra i te vähi ta na e tuu ra i to na âvae. Hiò noa ai to na mata i mua, te faaätea rii mäite noa ra to na âvae ia na i te vähi ta na e hiò ra. Aita o mua, oia te vähi ta te mata e hiò ra, i riro ei vähi ta te âau e tïtau ra, ua riro noa rä ei taime ìmiraa na te manaò i te faatano e te faaòhie i teie hinaaro faaätea ê mai. Aita tätou i parau e, teie haereraa i muri, no te mea te riro ra ia te muri i reira ei vähi e tïtauhia ra ; âreà i teie, te vähi e tïtauhia ra, te àperaa ia i te mea e hiòhia ra, te ìmiraa hoì i te räveà ia òre ia tae i reira, aore ra ia òre ia haamanaòhia mai te mea ta te taata e àpe ra, ta na e òre e hinaaro ra i te ìte. Ia haapotohia, te haamanaò noa mai ra te ôtoheraa i te manaò färii òre o te taata, e no te mea aita i färii, i òhie ai i te ìmi i te ôtoheraa. Eiaha rä tätou e manaò e, i te mau taime atoà, ua riro te ôtoheraa ei pähonoraa i te mea tei òre te manaò i färii.

Te faufaa ra e vai ra i roto i te taiòraa i faaroohia  e tätou, te huru ia no to te Atua òhiparaa i roto i te ùtuafare. E ùtuafare teie tei momoàhia, oia hoì te faaineinehia ra e täati, i tae mai ai te parau a te Atua  i roto i teie na tämarii, o Maria te iòa o te vahine, e te tane o Iotëfa ia.

Te ìte-atoà- hia nei ra te huru o te tane, i nià i te tupuraa teie òpuaraa, ua vai te tahi manaò, tei faatupu i te tahi faanahoraa no te here o te tane ia ta na vahine. Ua ö i roto i te âau o Iotëfa, te tahi manaò tei òre e tuàti i nià i te òpuaraa a te Atua. Teie huru no Iotëfa, e huru ia no te hoê tane, tei hinaaro e haapäpü i te puai o to na here, i ta na i momoàhia. I tupu ai ta te Atua faahei taòtoraa ia  Iotëfa, i tià ai i te Merahi, ia faatae te poroìraa a te Atua i roto ia Iotëfa, no teie òpuaraa,  i  parau ai te reo o te ìrava i te naòraa e, E tämaïti ta na e fänau, ta òe ia e topa atu ia Ietu, e faaora hoì o ia i to na taata i ta rätou hara. 25 Aita rä o ia i rave ia na e fänau mai ra te hoê tamaiti, maìrihia te iòa o Ietu.

Te ìte nei tätou te hinaaro o te Atua, no te faatupuraa i ta na òpuaraa faaora, i ta tätou ia tautururaa. Te tiàturi atoà mai ra te Atua ia tätou, no te faatupu i ta na mau faanahoraa. Te taata tei ìte e òpuaraa o ia na te Atua, e òhie te reira taata i te färii i te hinaaro o te Atua, mai te peu o na ta te Atua e hinaaro ra.

O te parau ia ta tätou e farerei nei i roto i te Mataio i te pene 1, mai te ìrava 18 e tae i te 25, ua mäìti te Atua i te tahi na taata no te färii i ta na òpuaraa. E teie na taata tei roto ia i te haamauraa, i te hoê ùtuafare âpï. E ia parau-anaè-hia e ùtuafare âpï, te auraa ra tei te haamataraa ia raua no teie huru oraraa. I tö ai o Maria i te Värua Maitaì, teie òhipa i ravehia e te Atua, èita ia no te haafifi i teie ùtuafare âpï. No te faaìte ra i te taata, èita e tià ia na ia pärahi i räpae i te faanahoraa a te Atua. No te mea tei nià i te taata te mau faanahoraa atoà a te Atua, i täpaòhia ai tätou i te iòa o te toru tahi. I tià ai i te veà i te faaära ia Iotëfa i teie parau, E te tämaïti ta na e fänau, ta òe ia e topa atu ia Ietu, e faaora hoì o ia i to na taata i ta rätou hara, 25 Aita rä o ia i rave ia na e fänau mai ra te hoê tamaiti, maìrihia te iòa o Ietu. Teie parau a te Atua, e parau ia tei tauturu ia Iotëfa i te märamaramaraa i te òhipa i tupu i nià ia Maria, ia òre o ia ia manaò ìno i ta na i here. No te mea e òpuaraa faaora teie na te Atua, aita te Atua i hinaaro ia fifi teie na taata. Ua ìmi ra te Atua i te mau räveà atoà ia tupu teie òpuaraa, ma te òre e faatupu i te fifi i roto i na taata e amo i ta na tämaïti. Te haapäpü ra teie parau i te faanahoraa ta te Atua i rave no te faafänauraa  i ta na tamaiti i o te taata nei. i roto i teie faaäraraa a te Atua, te tiàturi atoà ra te Atua e färii o Iotëfa i teie òpuaraa ta na ta te parau e faaära ra. Te mea fifi no Iotëfa èere te färiiraa i teie parau a te Atua, te hiòraa ra i te òhipa i tupu i nià ia Maria, mai te tahi òpuaraa na te taata. O vai atoà ia tane e òre e huru ê i teie faanahoraa. Ia tiàturi anaè o ia e hinaaro teie no te Atua, te mea noa e tïtauhia ra ia na te färiiraa i te òpuaraa a te Atua e te òaòaraa, i te mea ua mäìti te Atua ia räua no ta na òpuaraa. Aita atu e mea e tïtauhia ra ia räua, te haamauruüruraa i te Atua, o na i mäìti ia raua no ta na òpuaraa faaora. Te taata tei färii i te òpuaraa a te Atua, e taata haamaitaìhia te reira. Te taata tei täuturu i te Atua i roto i ta na òpuaraa, e taata ia tei faateiteihia.

Teie òpuaraa a te Atua aita o Iotëfa e o Maria i faaèrehia i te hoê maitaì. Ta räua ra e faanaò, te reira te mea e manaònaò-noa-hia ra e te taata tei tiàturi e tei tävini i te Atua, oia hoì te haamaitaìraa a te Atua, to na mäìtiraa i te taata no ta na mau òpuaraa. I te reira vahi, e tiàmaraa te reira no te Atua i te mäìtiraa i te taata o ta na i hinaaro.

No reira te Atua i tïtau ai i te taata, ia âmui i roto i ta na òhipa, no te faatupuraa i ta na mau òpuaraa. No te mea te Tamaiti e fänauhia, o Ietu to na iòa, no te faaora ia i te mau taata atoà tei ìte i te teimaha no te hara. Àreà ra tei òre a i ìte atu ra i te teimaha o te hara, te tïtauhia nei ia, ia rätou ia ìte i te reira. Te òhipa ia e vai ra i roto i teie Tamaiti, e faaora i to na mau taata i te hara. Tei roto noa o Ietu i te püfenua, i faaìtehia ai ta na täpura òhipa, e te tumu i Fänau mai ai i o tätou nei.

Oia mau, mai roto mai e piti na tämarii tei òre i ineine, tei òre i paari, tei òre i àravihi, i te mau faanahoraa o te oraraa ùtuafare, i tae ai i te parau tïtauraa a te Atua, ia färii i te haafänauraa i te Arii o teie nei ao.

Oia atoà ia tätou te hinaaro mai ra te Atua ia tätou èi haafänauraa i ta na mau òhipa i te fenua nei, i roto anei to tätou mau ùtuafare, ta tätou paroita, te âmuiraa, e tae noa atu i roto i te mau tomite òhipa. E aha ta teie haafänauraa e haapii mai nei ia tätou i roto i te tiaìraa maha. Mauti ra ia, te parau ta Pauro i papaì ia Tito i te pene 2 i te ìrava 11, e te 12, i te naòraa e, O te aroha mau o te Atua, e ora ai te taata atoà ra, ua ìteä mai nei ia. I te faaìteraa mai ia tätou e, e haapae tätou i te paieti òre, e te hinaaro i teie nei ao e ia pärahi tätou ma te haapaò maitaì, e te parau tià, e te paieti, i teie nei ao.      

Maitaì i te Fänau e te Mätahiti âpï



Teraì òr. Faatura.