Mātaio 2.1-12 Âfaì-tuta-hia

Tāpati 5 no Tënuare 2020.

ÔROÀ

Âfaì-tuta-hia

Taramo 72

1 Taramo na Toromona. A hö mai na, e te Atua, i te mau parau au na òe ra na te arii, e te parau tià na òe ra na te tamaiti a te arii. 2 E haavä o ia i to mau taata mä te parau tià, e to òe ra mau taata haèhaa mä te parau au. 3 E hopoi mai te mau mouà i te hau i te mau taata, e te mau âivi hoì mä te parau tià. 4 Na na e faaau i te parau i te haèhaa io te mau taata ra; e te tamarii a tei àti i te veve ra, na na e faaora; e e haavï ôfatifati roa o ia i tei hämani ìno ra. 5 E mataù rätou ia òe mai te mahana e te märama e vai nei i te mau uì atoà ra. 6 E riro o ia mai te ua i nià i te àihere motu âpï ra, e mai te tuäua e faararirari i te fenua nei 7 I to na ra tau e tupu roa ai te parau tià, e rahi roa hoì te hau, òi vai aè te märama 8 E riro o ia ei arii mai te tahi miti e tae noa atu i te tahi miti, e mai te pape ra e tae noa atu i te hopeà o te fenua 9 To te mëtëpara ra, e piò ia i raro ia na, e mitimiti to na mau ènemi i te vari.10 E àufau mai te mau arii no Taretita e to te mau fenua rii i te taoà: te mau arii o Tehepa e to Tepa të hopoi mai i te ö.11 E hope roa te mau arii i te tähopu i mua ia na, e hope roa te mau fenua i te auraro ia na. 12 O tei veve ra e ua tiàoro mai ra, na na ia e faaora, e tei àti ra e aita o na e tauturu.13 E faaherehere o ia i tei paruparu ra e tei veve, e faaora hoì o ia i te feiä taoà òre ra. 14 E faaora o ia ia rätou i te haavare e te rave ìno ra, e to rätou toto e riro ei mea taoà na na. 15 E tià o ia i te oraraa E horoàhia mai te àuro o Tehepa ra na na, e pure tämau hoì te taata ia na, e haamaitaì hoì rätou ia na, eita e mahana e tuua 16 E riro hoì e maa tïtona tei te fenua i nià i te tupuaì o te mau mouà ra, e tei tupu ra, e àhehe ia mai te mau räau e tupu i Repanona ra; e ruperupe to te ôire ra mai te räau o te fenua nei 17 E vai ä to na iòa e a muri noa atu E vai ä to na iòa mai te mahana ra E maitaì te taata atoà ia na, e e hope te mau fëtii atoà o te fenua nei i te haamaitaì ia na 18 Ia haamaitaìhia te Atua, te Atua o Ìteraèra, o te Fatu, o ia anaè ra tei rave i te mau mea taa ê ra 19 Ia haamaitaìhia hoì to na iòa hanahana e a muri noa atu Ia faaîhia hoì te mau fenua atoà i to na hanahana  Âmene, e âmene. 20 Te mau pure a te tamaiti a Iete ra a Tävita, ua hope ia.

Ìtaia 60.1-16

Te hinuhinu o te ètärëtia

1 A tià i nià, ia märamarama òe, ua tae mai to òe märamarama, e ua hiti mai te hanahana o te Fatu i nià ia òe. 2 Inaha, e ua àti hoì te fenua nei i te pöuri; e te mau êtene i te pöuri taòtaò e hiti mai rä te Fatu i nià ia òe, e ìteä noa mai hoì to na hanahana i nià iho ia òe ra. 3 E haere noa mai hoì te mau fenua i to òe ra märamarama; e te mau arii i te ànaana o to òe ra mahana e hiti ra. 4 A nänä na i to mata i nià a hiò e àti noa aè; ua putuputu atoà mai rätou, i haere mai rätou ia òe ra; e tae mai to mau tamarii tamäroa mai te fenua roa mai; e to mau tamähine, e âfaì-tuta-hia mai ia. 5 Ei reira òe e ìte ai, e rahi roa te òaòa; e horuhoru hoì to âau, e horahorahia; ia hopoihia mai te mau taoà no te moana ia òe ra; e ia tae mai te mau taoà no te mau fenua ia òe ra. 6 E api òe i te rahi o te tämera; e te petari no Metai e no Èfa; o rätou atoà to Tepa i te haere mai: mä te àuro e te rïpano i te hopoiraa mai; e mä te himene i te haamaitaìraa i te Fatu. 7 E putuputu atoà mai te mau nana i Tetara ia òe; e riro hoì te mau mämoe oni i Nepaiota ia òe: e tae rätou i nià i ta ù fata mä te ìtehia mai; e ta ù fare ùnaùna, nä ù ä e faaùnaùna. 8 O vai ra teie e pee nei mai te ata e pee ra? E mai te tiàa ûuàiraò e maùe i to rätou mau âpoo ra? 9 E tiaì mai te mau fenua roa ia ù; e te mau pahï o Taretita i mua: i te faahororaa mau i to mau tamarii mai te vähi roa mai, e ta rätou ârio e ta rätou àuro atoà ra: no te iòa o to Atua ra o te Fatu e no Tei Moà i Ìteraèra ra, ua faahanahana hoì oia ia òe. 10 E na te mau tamarii o te taata ê ra e patu i to mau âua, e ìtehia mai òe e to rätou ra hui-arii: i täìri hoì au ia òe i ta ù riri nei, e aroha rä vau ia òe i taua aroha nö ù nei. 11 E vaiiho-noa-hia to òe ra mau ùputa mai te ìritihia; i te ao e te ruì atoà e òre e ôpanihia: ia hopoi mai rätou i te taoà no te mau fenua ra ia òe, e ia haere mai to rätou mau arii mä te âehuehu atoà ra. 12 O taua fenua ra, e taua pätireia ra, e òre e auraro ia òe ra, e mou ia; oia ia, e faaano-roa-hia ia mau fenua. 13 Te ùnaùna o Repanona te tae mai ia òe ra; te räau peruti, e te tetara, e te tatura atoà ra, ei faanehenehe i ta ù vähi moà ra: e ia faaùnaùna vau i ta ù taahiraa âvae. 14 E te mau tamarii a te feiä hämani ìno mai ia òe ra, te haere mai mä te piò i raro i mua ia òe ra; e te feiä atoà i faaruè faafaufau mai ia òe ra, o te tähopu mai ia i to âvae ra: e parau hoì rätou ia òe, O te ôire no te Fatu; o te Tiona o Tei Moà i Ìteraèra nei. 15 O òe hoì o tei faaruèhia ra, aore i âuahia mai, e aore aè ra e taata i haere nä roto ia òe ra; e faariro vau ia òe ei ârueraa tämau; ei òaòaraa no te mau uì atoà e a muri noa atu. 16 E òte òe i te ü no te mau fenua ra: e òte hoì òe i te ü o te hui-arii ra; e ìte hoì òe e, o vau nei to òe ora, o te Fatu; e o tei faaora ia òe ra, o tei Püai Rahi ia io Iatöpa nei.

Èfetia 3.2-6

2 Ua ìte òutou i te tuuraa i te parau ra i te aroha mau a te Atua i hömaihia mai ia ù nei ia òutou na. 3 E na na i faaìte hua mai ia ù i te parau àro ra, i päpaì-poto-hia iho nei e au, 4 e ìte ai hoì òutou i to ù paari i te parau àro o te Metia nei ia taiò ra, 5 o tei òre i faaìtehia i te taata i te mau uì i mütaa iho ra, mai tei faaìtehia mai e te Värua i teie nei, i te mau âpotetoro moà e te mau perofeta na na ra 6 e ei feiä âià atoà te Ètene, ei âmuiraa hoê ä e ia noaa atoà tei parauhia mai e ana i te Metia, i te Èvaneria nei.

Mātaio 2.1-12

Te tere färerei o te mau taata paari

1 E ia fänau Ietu i Peterehëma i Iütea, i te tau o te arii o Herota, inaha, e mau taata paari no te hitià-o-te-rä tei tae mai i Ierutarëma, 2 e ua ui mai ra Tei hea te arii fänau âpï o te âti-Iüta. Ìte aè nei hoì mätou i to na fetià i te hitià-o-te-rä, i haere mai hoì mätou e tähopu ia na. 3 E faaroo aè ra te arii ra o Herota i taua parau ra, âehuehu roa aè ra o ia e to Ierutarëma atoà. 4 E haaputuputu mai ra o ia i te mau tahuà rarahi e te mau päpaì parau o te nünaa, no te ui ia rätou i te vähi e fänau ai te Metia. 5 Ua parau mai ra rätou ia na I Peterehëma i Iütea, ia au i tei päpaìhia e te perofeta ra: 6 E o òe hoì, e Peterehëma, i te fenua o Iüta nei, eere òe i te mea iti roa i roto i te mau ôire pü o Iüta, e nä roto mai rä ia òe te hoê tiaì, e nä na e arataì i to ù nünaa ia Ìteraèra. 7 Ua tïtau huna atu ra Herota i te mau taata paari, no te haapäpü i te tau e fä mai ai taua fetià ra. 8 Ua tono atu ra o ia ia rätou i Peterehëma, nä ô atu ra A haere a mäìmi mäite i te mau parau i nià i taua tamaiti ra; e ia ìteä ia òutou, e faaära mai òutou ia ù, ia haere atoà vau e tähopu i mua ia na. 9 I to rätou faarooraa i te mau parau a te arii, haere atu ra rätou; e inaha, të nä mua atu ra ia rätou te fetià ta rätou i ìte i te hitià-o-te-rä, e tae roa atu ra i nià aè i te vähi tei reira te tamaiti, faaea iho ra. 10 Rahi roa atu ra to rätou òaòa i te ìteraa i taua fetià ra. 11 E ia tomo atu rätou i roto i te fare, ìte atu ra rätou i te tamaiti ra e to na metua vahine o Märia; topa turi iho ra rätou i raro, tähopu atu ra i mua ia na: ua ìriti aè ra i ta rätou vairaa taoà, püpü atu ra i te àuro, te täpau rïpano e te mura ei ö nä na. 12 E no te mea, ua faaheitaòtohia rätou e te Atua, eiaha e hoì ia Herota ra, hoì atu ra i to rätou iho fenua nä te tahi èà ê.

Manaò.

Taramo 72, 7 I to na ra tau e tupu  ai te parau tià, e rahi te hau, òi vai aè te märama.

Ìtaia 60, 4 A nänä na to mata e putuputu mai to mau tamarii tamäroa mai te fenua roa mai; e to mau tamähine, e âfaì-tuta-hia mai ia.

Efetia 3, 6 E feiä âià te Ètene, ei âmuiraa hoê tei parauhia mai e ana i te Metia, i te Èvaneria nei.

Mataio 2,  11 E ia tomo rätou i roto i te fare, ìte atu i te tamaiti ra e to na metua vahine o Märia; topa turi iho ra rätou i raro, tähopu atu ra i mua ia na: ua ìriti aè ra i ta rätou vairaa taoà, püpü atu ra i te àuro, te täpau rïpano e te mura ei ö nä na.

I teie täpati mätamua no teie mätahiti, te ìritihia nei ia te parau a te Atua, na roto i te parau no te fetià. Tei ìtehia i te hitià-o-te rä, no te faaìteraa te ômuahia nei te hoê faanahoraa no ò mai i te Atua ra. No te mea i teie atoà täpati e faahanahanahia ai te parau no te arii. Te arii fänau âpï, tei ìtehia to na fetià i te hitià-o-te rä, tei parauhia te epifania e reo Herëni teie to na auraa te FAAFAAÏTERAA. Oia hoì, to te Atua faahauraa i ta na Tamaiti i te mau taata atoà o teie nei ao. No reira te mau ùtuafare i te täpati mätamua o te mätahiti âpï, e hämani ai i te färaoa monamona ma te tuu i te tahi täupoo arii i roto, te taata tei ia teie tuhaa färaoa, oia ia te arii no te mätahiti.

I roto i te Mataio ta tätou i faaroo aè nei i te täiòraahia, te ìte nei tätou te parau no te feiä paari, tei parau-atoà-hia te mau mätoi. I te 4 o te tënetere, ua faanahohia te huru o teie mau mätoi e toru, hoê e taata âpï, te  piti e taata huru paari, e te toru ra e taata paari-roa-ia. No reira e faaäuraa teie no te mau uì atoà e vai i roto i te tau. Aita roa te hoê uì taata i faaèrehia, i te fänauraa no te tamaiti a te Atua. No te mea te hinaaro te Atua, i te mau taata atoà, ia riro èi nunaa no to na patireia. E tià atoà ia tätou ia parau e, ua âmuihia te huru atoà o te nunaa no te färiiraa i te arii fänau âpï, tei haere mai èi tävini no teie nei ao.

Teie mau mätoi o te hiòraa faahiahia roa ia no te taata no te mau tau atoà, oia hoì te taata e to na manaò ânoì, no te parau mau e te haavare, te taata märamarama e te pöuri, te taata faaroo e te faaroo òre.

O taua huru taata ra, taua huru taata no te mau mahana atoà, e no te mau tau atoà o ta te Atua e tïtau nei, e arataì nei i pïhaì iho i te Metia. Te färii nei te Atua ia na noa atu to na huru, no te mea aita o Ietu i tae mai, no te feiä maitaì anaè, e aore ra no te feiä teretetiano noa, ua tae mai ra o Ietu no te mau taata atoà.

Teie mau mätoi, tei ìte i te fetià i te hitià-o-te-rä o tei faatupu ia i te tohu a Päraama te ìte nei au i teie fetià èita ra e tupu vave. Ia tae ra i te tau mau ra te ìtehia nei teie fetià e te feiä paari, te haere nei rätou i Ierutarëma i te òire o Herota te arii i te taime a tupu ai teie mau òhipa. Aita ra i ìteähia e rätou i reira, i te mea ua vaiihohia e rätou i te fetià täpaò i te tihiti. Tupu atu ra to rätou färereiraa i te Arii Herota, no te òhipa e tupu ra i roto i to na òire. E aita atoà o ia i ìte teihea te vairaahia teie Arii fänau âpï. E tià ia parauhia e, aita te Arii, no te mau Arii i ìteähia i to rätou anaè puai, e to rätou märamarama, ua hiò ra rätou i roto i te Pipiria tei haapii ia rätou e, ‘’ E ITI A ÒE E PETEREHEMA EFERATA IA ÀMUI ATOÀ I ROTO I TE MAU TAUTINI  ATOÀ  I IUTA RA.  E TAE MAI  RA TE HOÊ IA Ù NEI.  MAI ROTO MAI ÒE RA O TE RIRO  ÈI TAVANA I ITERAÈRA NEI’’

Ìte aè nei mätou i to na fetià i te hitià-o-te rä.

I te haumaruraa o te ruì i fänauhia ai te fetià o te Ora Mure Òre.

I te vahi maniania òre i fänauhia ai te fetià o te here e te aroha.

I te vahi o te ànimara i fänauhia ai te fetià o te hanahana no te rahuraa.

I te roto i te vahi nohoraa o te taata i fänauhia ai te fetià o te hau.

Tei roto i te hoê vahi, e au no te hoê arii tävini te vairaahia teie àiü, tähopu mai ra teie feiä ia na.

E riro O ia te tumu o te faufaa, tei faaäuhia e te auro.

E riro O ia te tumu o te maitaì, tei faaäuhia e te tapau ripano.

E riro O ia te tumu o te noànoà, tei faaäuhia e te mura.

Ua färii ariihia te Metia, ua faariro ra O ia iho ia na èi tävini no te faatiàmaraa i te mau taata atoà tei tiàturi i te ôpuaraa faaora a te Atua Nui Tumu Tahi. Mai teie ta Ìtaia pene 60 te ìrava 4 e faaìte ra A nänä na to mata e putuputu mai to mau tamarii tamäroa mai te fenua roa mai; e to mau tamähine, e âfaì-tuta-hia mai ia. Te tuta e ämo i te hoê taata i nià i te tua, ia tae atoà teie taata paruparu, tei rohirohi i te vahi e hinaarohia ra i te haere e te mau taata tei tïtau i  te tupuraa o te ora.

Mau taeaè, e te mau tuahine, te haapii mai nei ta tätou parau ia tätou i teie täpati mätamua, te hoê tau no te faatupuraa i te tïtauraa a te Atua. O te faaìtehia mai ia tätou mai te hitià-o-te rä, oia hoì o te haamataraa te reira no te hoê mahana âpï, e te hoê ruì âpï. Te hitià-o-te ra, te faaìte ra te reira i te hanahana no te tiàfaahouraa no te mau rahu a te Atua, tei haapihauhauhia e te mataì maoaè.  Te tooà-o-te rä, te faaìte ra te reira i te hanahana o te märamarama no te mau tiàrama naìnaì, tei faatohiohiohia e te mataì ra o aine. Te àpatoe rau, te faaìte nei ia i te haumärü, o te hau o te Atua tei puhihia e na àpoo mataì e toru, o märaamu, o toà, e o ârue. Àreà ra o àpatoà, o te haamähanahana ia te reira, tei faahaùtihia e na mataì e toru, faarua, o toèrau, e o parapu

No reira te horoà mai nei teie mau parau ia tätou i te ìteraa i te puai o te Atua i ta na i faanaho no tätou. E to tätou ìteraa i te fetià täpaò noo mai i te Atua ra. E teie fetià, e ànaana oia i te ruì, e ànaana atoà oia i te ao. Te parau ia ta te Atua i parau ia Âperahäma, e riro to huaai mai te fetià o te raì.

Teraì òr. Faatura.