Māreto 15.1-15 Ietu i mua ia Pirato

Mahana toru 8 Èperera 2020

Ietu i mua ia Pirato

Ômuaraa.

Teie te tahi parau ia tätou i roto i te haamoriraa, o teie mahana, te pure te parau ia no te Taramo, na tätou ra te reira e faanavaì, no te mau himene na te reira iho ùtuafare e faanaho ma te tiàma.

Himene

Māreto 15.1-15

Ietu i mua ia Pirato

(Mät 27,1-2; 11-14; Ruta èv 23,1-5; Ioane 18,28-38)

1 E poìpoì roa aè ra, ua âpoo iho ra te mau tahuà rarahi, e te feiä paari, e te mau päpaìparau, e te Tuneteri atoà, ua ruuruu iho ra ia Ietu, hopoi atu ra e tuu atu ra ia na ia Pirato ra. 2 Ua ui mai ra Pirato ia na, O te arii änei òe o te âti-Iüta? Ua parau atu ra o ia ia na: Oia mau ta òe e parau mai na. 3 E rave rahi ta te mau tahuà rarahi pariraa mai ia na. 4Ua ui faahou mai ra Pirato ia na: Eita òe e parau noa atu? Inaha te rahi i te mau mea ta rätou e pari mai ia òe nei 5 Aita roa rä Ietu i parau faahou atu, mäere noa iho ra Pirato.

Te faautuà-raa-hia Ietu i te pohe

(Mät 27,15-26; Ruta èv 23,13-25; Ioane 18,39-19,16)

6 Ua mätaro o ia i te reira ôroà i te tuu atu ia rätou ra i te hoê taata täpeàhia, ta rätou i hinaaro ra. 7 Te vai-täpeà-hia ra te hoê taata o Parapa te iòa, o ia e o vëtoofanu i faatupu atoà i te tiàrepu ôrure hau, e i täparahi na hoì i te taata i taua tiàrepuraa ra. 8 Ua pii noa atu ra taua feiä rahi atoà ra i te aniraa atu ia Pirato i ta na i mätaro i te tuu mai ia rätou ra. 9 Ua parau mai ra Pirato ia rätou, nä ô mai ra: O te arii änei o te âti-Iüta nei ta ù e tuu atu ia òutou na? 10 Ua ìte hoì o ia e, no te feìi i tuu mai ai te mau tahuà rarahi ia na. 11 Ua fäfau atu ra rä te mau tahuà rarahi i te taata, e ani ia tuu mai o ia ia Parapa, eiaha ia Ietu. 12 Ua parau faahou mai ra Pirato ia rätou, nä ô mai ra: E aha hoì to òutou hinaaro ia ù, ia Ietu, ta òutou e parau na e: O te Arii o te âti-Iüta ? 13 Ua pii faahou atu ra rätou: E faatätauro atu ia na  14 Ua ui mai ra Pirato ia rätou: I te aha hoì, e aha ta na hara i rave? Rahi roa atu ra rä ta rätou pii: E faatätauro atu ia na.15 E no te mea te hinaaro ra Pirato i te haamauruüru i te taata, ua tuu mai ra ia Parapa ia rätou ra, e oti aè ra Ietu i te papaìhia e ana, ua tuu mai ra ia na ia faatataurohia.

Himene

Manaò

E hoa ìno mā,

I mua i teie parau tei faataahia na tātou no teie mahana, e piti tau manaò rarahi ta te âai e horoà ra i nià i to Ietu ärataìraahia i mua i te aro o Pirato. A tahi : Eita e tià i te âti-Iüta ia faautuà ia Ietu i te utuà pohe, no te mea aita e mana to te ture i horoàhia ia rātou no te faautuà ia Ietu. Te piti : E tià roa ia Pirato ia rave i te mau tïtorotororaa i nià i te mau parau i pärihia ai Ietu, no te mea ua horoàhia ia na te mana no te rave i te reira tāpura òhipa i roto i te tuhaa ôire tē òre e faaterehia ra e te mana o te èmepera rōma. Te auraa, eere na te tiripuna e rave ra i te tïtorotororaa i teie taime nei, ua horoàhia rā te reira tāpura òhipa i roto i te rima o Pirato. No na te tahi parau rahi e tatarahia ra i roto i teie taiòraa. I riro na hoì o ia ei faatere no te tuhaa ôire no Iutea i te ārea mätahiti 26 e tae atu i te 36 i muri mai i te Metia.

Ia hiòhia te tupuraa mau no teie òhipa, o Pirato ia te tumu hoê roa i faautuàhia ai Ietu, o tā na i faariro mai te tahi taata tei faaturori i te manaò o te taata e tei faahuehue i te arataìraa poritita a te Hau Rōma i roto i teie ôire no Iutea. Aita hoì Ietu i àro noa aè i te faatereraa poritita a te Hau Rōma, e no te aha paì ia aita te feiā i âpee noa na ia na i faautuà-atoà-hia. Aita roa atu tātou e pāpū ra i te tuhaa a te mau faèhau rōma i roto i teie òhipa. Te vāhi noa i pāpū, na te mau tahuà rarahi, na te feiā paari, na te mau pāpaì parau e te tuneteri i ärataì ia Ietu ia Pirato ra, i ta rātou pariraa, e taata faahuehue teie, te hara mau te reira e au ai ia na teie pohe.

Te manaò noa rā o ta tātou e tāpeà mai i nià ia Pirato ia au i te faatiàraa a Māreto, eere o Pirato i te tahi taata ìno roa, eere atoà rā i te taata maitaì roa, eere atoà rā hoì i te mea ôhie no Pirato te faatereraa i te tahi nūnaa i roto i te ârepurepu o te oraraa. No rātou i rave ai o Pirato i teie huru täuiui noa tō na. Ua riro noa rā o ia mai te tahi hinere i rotopū i te faaotiraa a te mau ärataì o te nūnaa e faatätauro ia Ietu e te faaòhiparaa i taua faaotiraa ra.

Te òhipa e ravehia ra e Māreto i teie nei, o te tuuraa ia i te taata tätaì tahi i mua i te parau no teie taata e haavahia ra, tei faaruè-roa-hia e te tāatoà. Faaruèhia e ta na iho mau pipi aita rātou i pïhaì iho ia Ietu i te taime a tupu ai teie òhipa. Faaruèhia e te mau ärataì o te nūnaa, i roto ia i ta rātou ôpuaraa e haapohe ia Ietu. Faaruè-atoà-hia e Pirato, no te mea aita o ia e māramarama ra, e aita atoà hoì o ia e taa ra nā hea te tatara i teie fifi. Faaruèhia e te nūnaa, no te mea aita e pāpū ra ia rātou i tei hea pae horoà ai i te manaò. Faaruèhia e te mau faèhau, no to rātou ihoā ia hinaaro faatere, ia rahi atu to rātou mana e ia faatura-noa-hia rātou e te nūnaa. Faaruè-atoà-hia e Parapa, no te mea ua ora mai o ia i teie pariraa i faautahia i nià ia Ietu. To na ora, tei nià ia i te àti o Ietu. Teie rā, ua riro te parau no to Ietu ärataìraahia i mua ia Pirato ei hiò-hipa no te tatara i te parau e te huru o te mau taata i âmui i taua mahana ra, e te feiā atoà e taiò ra i teie parau. Tei mua atoà ia Ietu i to tātou parau i teie mahana, i mua i te huru o te mau pipi tei huna i to rātou Fatu, e i mua atoà hoì i te huru ìno o teie nei ao i nià i ta te Atua i tono mai no te faaora i to te ao. Ua riro atoà teie parau mai te tahi hiòpoàraa na te maru-metia tätaì tahi no teie mahana e no ànanahi i to na parau i mua i te àti e te pohe o Ietu, e te märamaramaraa i te huru o te ao i mua i teie òhipa i ravehia i nià ia Ietu.

Ia hiò maitaì anaè tātou i te tāpura taata ta Māreto e tuu nei i te ômuaraa no teie pene 15,1, te haapāpū maitaì mai ra te reira e aita e taata e ora i rāpae aè i teie parau. E ō atoà te mau Fāritea e te mau Herotiani i roto i teie tāpura, no te mea na rātou i rave i te faaotiraa i ravehia, ia tupu mau ihoā te manaò i ôpuahia. E taua faaotiraa ra, eita ia e tano e na te tahi taata ê atu e rave, maoti te tahi mana faatere no roto mai i te Hau Rōma, òia hoì mai ia Pirato ra te huru, e mai tei rave-atoà-hia e Herota i nià ia Ioane Päpetito. I roto i ta tātou taiòraa no teie mahana, na te mau ärataì o te nūnaa e pūpū nei ia Ietu i roto i te rima o Pirato, e na rātou atoà e rave nei i te faaotiraa no te haapohe roa ia Ietu. Te auraa, te mau ärataì o te nūnaa te tumu hoê roa no teie ôpuaraa e faatätauro ia Ietu.

Te mea faufaa rā ta tātou e hiò mai i teie nei, o to Ietu ia faahoìraa i te parau ia Pirato ra, no te rave i te faaotiraa tā na i hinaaro. O Pirato iho te fatu i ta na pāhonoraa i mua ia Ietu. Te riro mau ra Pirato i ô nei mai te tahi haavä i rotopū ia Ietu e te feiā e pari ra ia na. Te faahepo atoà ra o Pirato ia Ietu ia faahiti i te tahi manaò a roaa atu ai te tahi faahaparaa. Te mea ta tātou i ìte, aita hoê aè pāhonoraa i horoàhia ia Pirato ra, i mua i te aro o te mau ärataì o te nūnaa. Te huru mäere o Pirato i mua i te māmū o Ietu, te faaìte noa mai ra te reira i to na àravehi-òre no te faaoti hope roa i teie òhipa, e te hopoià hoì a te mau ärataì o te nūnaa i roto i teie òhipa.

I haapāpū ai o Pirato i te ìrava 14, e aita ta Ietu e hara. Teie rā, noa atu teie parau tā na, ua tuu o ia ia Ietu ia rātou ra ia faatätaurohia, mai te òhipa atoà ia i ravehia e te mau arataì o te nūnaa tei hopoi atu ia Ietu ia Pirato ra. Te tahi faahaparaa o tē tano ia tātou ia tuu i nià ia Pirato, o terā ia manaò e faahitihia ra i roto i te ìrava 15  no te haamauruüru i te taata. Mai ia Ietu i tuuhia i roto i te rima o te taata, i roto atoà i te rima o te mau ètene o ia e haamauiuihia ai, e e pohe ai.

Himene

Taramo 2

1 E aha te mau êtene i ârepurepu-noa-hia ai, E te mau taata nei i ìmi ai i te mea faufaa òre. 2 Te tiàtià ra te hui-arii o te fenua nei i nià, e te âmui atoà ra te hui raatira e märô i te Fatu, e ta na i faatähinu ra. 3 Te nä ô ra, Tätou e hahae i ta räua täpeà e taa ê atu, e faaruè ê atu tätou i to räua tuto ra. 4 O tei pärahi i nià i te mau raì ra të àta mai; e tähitohitohia rätou e te Fatu. 5 Ei reira o ia e parau mai ai ia rätou mä te riri, e âehuehu roa aè ra rätou ia na i to na riri rahi. 6 Te nä ô mai ra o ia, Ua faatähinu vau i ta ù arii i nià i ta ù mouà moà ra, ia Tiona. 7 E faaìte atu vau i te parau faaau na te Fatu, ua parau mai o ia ia ù e, O ta ù tamaiti òe. I naùanei òe i haafänauhia ai e au. 8 A ani mai ia ù, e na ù e horoà atu ia òe i te mau êtene ei tufaa na òe, e te mau fenua hopeà atoà ei taoà na òe. 9 E pararï rätou ia òe i te päpaì âuri, e huàhuà roa ia òe mai te âuà a te pötera ra.10 E tënä na, e te hui-arii ra, ia paari òutou. E färii i te aò, e te mau haavä o te fenua nei. 11 E haamori i te Fatu mä te mataù, e òaòa i mua ia na mä te rürütaina.12 A hoì na i te tamaiti ra, o te riri hoì o ia, pohe iho ra òutou i te èà ra, e òre hoì to na riri e roroa ua tupu. E ao to te feiä e tiàturi ia na i reira.

Himene

Pure a te Fatu.

E to mätou Metua i te ao ra.

Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Na te Atua Nui Tumu Tahi e haamaitaì mai ia tätou.

Teraì òr. Faatura.