Märeto 15.42-47 Te tuu-raa-hia Ietu i roto i te menema Mahana māa 11 no Èperera 2020

Mahana māa 11 no  Èperera 2020

Te tuu-raa-hia Ietu i roto i te menema

Ômuaraa.

I teie ahiahi tei roto o Ietu i te menema, ia au i te faanahoraa no te hoê taata pohe. Te rave nei te taata i ta na faanahoraa no te faaìteraa i teie vahi te tänuraahia te tino o Ietu te Metia. A riro atu ai mai te mau menema atoà i te faahoìraa i to repo i raro i te repo, ma te tiaì i te mahana o te tiàfaahouraa.

Himene.

Märeto 15.42-47

Te tuu-raa-hia Ietu i roto i te menema

(Mät 27,57-6; Ruta èv 23,50-56; Ioane 19,38-42)

42 E ahiahi iho ra, no te mea e mahana faaneheneheraa, oia hoì te mahana i muri mai i te täpati ra. 43 Ua haere mai ra Iotëfa i Àrimataio e taata tuneteri e te mana hoì; o tei tiaì atoà ia i te Pätireia o te Atua, e haere atu ra ia Pirato ra mä te mataù òre, e ua ani atu ra i te tino o Ietu. 44 Ua mäere iho ra Pirato i te mea o ia i pohe vave, ua tii atu ra i te raatira ua ui atu ra ia na, e ua pohe ê na änei. 45 E ìte aè ra o ia i taua raatira ra, ua horoà mai ra i te tino ia Iotëfa ra. 46 Ua hoo atu ra o ia i te àhu maitaì, tuu iho ra ia na i raro, viri iho ra i taua àhu ra, tuu atu ra i roto i te hoê menema i paohia i roto i te mato, huri atu ra i te hoê ôfaì i te ùputa o taua menema ra. 47 Te hiò mai ra Märia i Matätara ra e o Märia te metua vahine o Iote ra i to na vaiiho-raa-hia.

Himene

Manaò.

Ua pohe Ietu i teie nei. To na täpaò, ua tuuhia to na tino i roto i te hoê menema i paohia i roto i te mato, hurihia atu ai te hoê ôfaì i te ùputa o taua menema ra. Ahiri to na tino aore i tuuhia i roto i te menema, e nahea e tià ai ia tatou ia tiàturi e, ua pohe mau o ia.

I taaê ai ta tätou tätauro i ta vëtahi  tei nià noa o Ietu i te tätauro ta vëtahi, areà ta tätou, aita faahou Ietu i nià i te tätauro, ua reva rä i nià i te raì i muri aè i to na tiàfaahouraa mai, mai te pohe mai. I ô e tano ai te poroì a Ietu i ta na mau pipi e, e tiàfaahou mai o ia i te toruraa o te mahana i muri aè i to na poheraa. Te toe, o to te mau pipi ia tiàturiraa i taua poroì ra.

Te na ô atoà nei rä o Märeto e, te poheraa o Ietu, ua riro ia ei òhipa o tei turaì ia Iotëfa i Arimataio ia òre ia mataù i te faaìte ia Pirato i to na tiàturi ia Ietu mai te hoê veà tonohia mai, mai te raì mai no te faaìte i te taata i te haamataraa no te hoê tau âpï. Àhiri e, aita taua tiàturiraa ra i roto ia na, e aha ia o ia e haereraa ai e ani i te tino o Ietu, mai te peu e, i muri aè i taua tere no na ra ia Pirato, e riro o ia i te haruhia e i te faautuà-atoà-hia mai ia Ietu.

No reira,  o ia i haere atu e ani i te tino pohe o Ietu ma te mataù ore oia hoì ma te manaònaò-ore i te òhipa fifi e tupu mai i nià ia na, e hape anei tätou ia manaò e, i vai noa na i roto i to na âau te hoê mea puai roa o te òre e maraa faahou ia na ia täpeà noa i roto i to na âau maori rā ia faaìtehia i te vahi märamarama oia hoi te parau o to na here ia Ietu. E tau to te mau mea atoà, oia ia, e taime atoà rä to te faarooraa.

No reira, eiaha tätou e ui e, no te aha o Iotëfa i Arimataio i tiaì roa ai ia pohe Ietu i reira o na e faaìte ai i to na here e aore ia i to na faaroo ia Ietu. E ui rä tatou e, aita anei o Ietu i tiàfaahou mai, mai te pohe mai e tiaì noa ra ia tatou ia faaìte atoà i to tätou faaroo i mua i te tupuraa o te hoê mau òhipa e faaìno ra i te hohoà o to tätou oraraa vaamataeinaa i teie mahana.

Te na ô atoà ra o Märeto e, ua maere o Pirato, o Ietu i pohe e ono hora i muri aè i to na faatätauroraahia. No Pirato, te auraa, e poto roa tera e ono hora, àhiri i hau atu o to na ia tanoraa mau. Ua manaò hoì o Pirato e, ia rahi anaè to oe ìno i nià i te taata no te täparahi ia na e maoro mai ia te oraraa o taua taata ra i mua ia òe e aore ia i nià i te fenua nei.

Ia here òe i te taata e maoro ai to te hoê taata tiàraa mai i mua ia òe, eiaha rä ia òre oe ia here ia na, e poto mai to na ora e to na atoà tiàraa mai i mua ia oe i reira. No te ìno o te taata i pohe ai Ietu e no te puai o to na ìno i pohe òiòi ai o Ietu. E te reira parau, ua ìte o Maria i Matatara, no te mea tei reira raua i te taime i faaìte ai te taata i nià i te Tämaïti a te Atua i te puai o to na ìno. No te pohe anei tätou i hämanihia ai e te Atua e aore ia no te ora.

Ia huri anaè o Iotëfa i Arimataio i te ôfaì i te ùputa o te menema, e au ra ia e, te parau mai ra te pohe ia tätou e, e mea puai aè o na i te ora. Oia mau anei. No te mea te poroì a Ietu i ta na mau pipi, èere, e pohe o na, e pohe rā o na no te tiàfaahou mai i te toru o te mahana. O te reira poroì ta tätou e tiàturi.

Himene

Taramo 130

1Tire a te Moruta. No roto i te vähi hohonu to ù tiàororaa atu ia òe, e te Fatu. 2 E te Fatu, e faaroo mai òe i ta ù reo, e färiu mai i to tarià i ta ù e ani atu. 3 Àhiri òe, e te Fatu, e täpaò na i te mau hara nei, o vai, e te Fatu, te taata e mau? 4 Tei ia òe rä te faaòre i te hara ia mataùhia hoì òe ra. 5 Te tiaì nei au i te Fatu, Ta ù värua teie e tiaì nei, e te tiàturi nei au i ta na parau. 6 Te tiaì nei ta ù värua i te Fatu, e ïti to te mau faèhau tiaì i te poìpoì ra; oia ä ia e ïti to te mau faèhau tiaì i te poìpoì ra. 7 Ia tiàturi ä Ìteraèra i te Fatu, tei  te Fatu hoì te aroha, e tei ia na hoì te ora hau ê ra. 8 E riro o ia i te faaora ia Ìteraèra  i ta na atoà ra mau hara.

Pure a te Fatu.

E to mätou Metua i te ao ra.

Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

Na te Atua Nui Tumu Tahi e haamaitaì mai ia tätou.

Teraì òr. Faatura.