Mätaio 25, 1-13 Rämepa.

 

Tāpati 8 no Novema 2020.

Rämepa.

Mau taiòraa.

Taramo 63

1 E Taramo na Tävita, ia na i pärahi i te mëtëpara i Iüta ra. 2 E te Atua, o òe hoì ta ù Atua, e ìmi vave au ia òe, te poìhä nei ta ù värua ia òe. Te feàa nei ta ù tino ia òe, mai te fenua marô nei, e te poìhä, e te pape òre. 3 Ia ìte au i to òe ra mana e te hanahana mai ta ù ä hoì i ìte ia òe i te vähi moà ra, 4 e maitaì rahi tei to hämani maitaì i tei te ora. E teie nei, e haamaitaì ta ù vaha ia òe. 5 E nä reira vau i te haamaitaì ia òe i to ù nei oraraa; e hopoi au i o ù puè rima i to òe ra iòa.6 E mäha hoì ta ù värua mai tei te töâhua e te meî ra. E haamaitaì hoì ta ù vaha ia òe mä te òaòa. 7 Ia manaò vau ia òe i nià i ta ù roì, e ia ìmi ia òe i te mau äraraa ra. 8 O òe hoì tei tauturu mai ia ù ra. E teie nei, e òaòa vau i roto i te maru o to pererau ra. 9 Te àti atu nei ta ù värua ia òe, e te mauhia nei au e to rima àtau ra.10 O  te feiä rä i tïtau mai ia ù ia pohe ra, e reva ia rätou i raro roa i te fenua ra. 11 E maìri rätou i te òè, e riro rätou ei tufaa na te ârope 12 E òaòa rä te arii i te Atua E te feiä atoà i tapu ia na ra, e òaòa ia E te vaha o te haavare ra, e ôpanihia ia.

Māteri 8.12-20

Te vauvau nei te Paari i ta na mau tumu parau, 12 O vau nei o te paari, e tià vau i ô te haapaò ra i te pärahiraa, e te roaa nei te ìte i te mau atoà ra. 13 Mataù to ù i te Fatu, e te riàrià nei au i te ìno. Te teòteò, te faarahi, e te parau a te feiä taiàta, e te vaha märô ra, o tä ù ia e riàrià nei. 14 Tei ia ù nei te parau e te paari mau: tei ia ù te haapaò, tei ia ù te püai. 15 No ù i arii ai te mau ârio, e ia faatupu ai te hui-arii ra i te parau tià. 16 No ù i noaa ai te hau i te hui-arii ra, te feiä mana atoà, e te mau haavä atoà o te fenua nei.17 Te hinaaro nei au i te feiä i hinaaro mai ia ù ra, e te ìmi vave mai ia ù ra, e ìte ia rätou ia ù. 18 Tei àiü te taoà rahi e te tura: te taoà vaiiho taiàta e te parau tià. 19 E maitaì rahi tei ia ù i to te àuro e to te àuro maitaì roa ra, e ta ù nei taoà i te ârio mä maitaì ra. 20 Te arataì nei au na te èà parau tià ra,

32-36

E ao to tei faaroo i te Paari, 32 E tënä na, e faaroo mai ia ù, e te mau tamarii e, e ao hoì to te feiä e haapaò mai i ta ù nei parau. 33 E faaroo mai i te aò ia paari, eiaha roa e òhipa ê i te reira. 34 E ao to te taata e faaroo mai ia ù ra, o tei ara mäite i te mau mahana atoà i te mau ùputa nö ù ra, o tei tiaì mäite i nä ùputa nö ù ra 35 Ua ìteä hoì au ia na ra, ua ìte ia te èà i te ora, e herehia mai hoì o ia e te Fatu. 36 O tei hara ê rä ia ù nei, ua hämani ìno ia i to na iho värua; e tei ôre atoà i hinaaro mai ia ù nei, ua hinaaro ia i te pohe.

1 Tëtäronia  4.13-18

Te haereà mai o te Fatu, 13 E teie nei, e te mau taeaè, aita vau i hinaaro e ia òre òutou ia ìte i te parau i te feiä i maìri i te taòto nei, ia òre hoì òutou ia taiä, mai te tahi pae aore o rätou tiaìraa ra. 14 Ua faaroo hoì tätou e, i pohe Ietu e tiàfaahou aè ra i nià, oia atoà te feiä e taòto i roto ia Ietu nei, na te Atua ia e faahoì mai e o ia atoà ra.15 Teie ta mätou e parau atu ia òutou, i ta te Fatu ra parau, o tätou o te feiä e ora o te toe i te ao a roohia mai ai e te Fatu ra, e òre e nä mua i te feiä e taòto nei. 16 O te Fatu iho hoì të pou mai mai te raì mai, mä te ûmere, mä te reo o te merahi rahi, e mä te pü a te Atua; e te feiä i pohe i roto i te Metia ra, o të tià mai na ia i nià. 17 E muri aè ra, o tätou o te feiä ora e toe ra, e rave-atoà-hia mai ia e rätou atoà ra i reira, âfaìhia ai i nià i roto i te ata, ia färerei atu i te Fatu i roto i te reva nei ra; a pärahi mau atu ai tätou i pïhaì atoà iho i te Fatu e a muri noa atu. 18 E tënä na, e haamähanahana òutou ia òutou iho i teie nei mau parau.

Mātaio 25.1-13

Nä pötii tino àhuru, 1 E au te Hau o te raì i na pötii tino àhuru i reira, tei rave i ta rätou mau rämepa e haere atu ra ia färerei i te täne faaipoipo âpï ra. 2 E feiä paari e toopae, e maamaa hoì e toopae. 3 O te feiä maamaa ra, i hopoi atu ra i ta rätou mau rämepa, aita rä i hopoi atoà i te mörï. 4 Âreà te feiä paari ra, ua hopoi i ta rätou mau rämepa mä te mörï atoà i roto i ta rätou mau färii. 5 Te mäoro ra rä taua täne faaipoipo âpï ra, tiàruhe paatoà iho ra rätou e maìri iho ra te taòto. 6 E tae aè ra i te tuìraa pö ra, o të pii mai ra: Inaha, te haere mai nei te täne faaipoipo âpï nei, e haere òutou ia färerei atu ia na. 7 Ua tià aè ra te mau pötii atoà ra i nià, ua faanehenehe iho ra i ta rätou mau rämepa. 8 Ua parau atu ra te feiä maamaa ra i te feiä paari: Hö mai i te tahi vähi i ta òutou mörï na, te pohe nei hoì ta mätou mau rämepa. 9 Ua parau mai ra rä te feiä paari, nä ô mai ra: Eiaha, o te òre hoì o te navaì ia ôpere na tätou atoà; e haere rä òutou i te feiä hoo ra hoo atu ai i ta òutou iho. 10 E te haere atu ra rätou e hoo ra, tae mai ra taua täne faaipoipo âpï ra, e te feiä i ineine ra, haere atu ra ia e o ia atoà i roto i te ôroà faaipoiporaa, e ôpanihia iho ra te ùputa. 11 E muri aè ra, ua haere mai ra te tahi pae pötii ra, ua nä ô mai ra: E te fatu, e te fatu, a ìriti aè na ia mätou 12 Ua parau atu ra rä o ia, nä ô atu ra: Aore au i ìte ia òutou, oia mau ta ù e parau atu ia òutou na. 13 E teie nei, e ara, aore hoì òutou i ìte i te mahana e te hora atoà e tae mai ai te Tamaiti a te taata.

 

 

Manaò.

Eiaha e taiä, te feiä faaroo e ìmi nei i te Atua Nui Tumu Tahi na roto i te tiàturiraa, e vai ineine noa rätou i te mau taime atoà, e noa atu te huru o ta rätou mau hopoià. Aita to rätou mau manaò e haafifi nei i te taere o te Atua, to rätou ra manaò rahi ia ineine maitaì rätou i te mahana, te ruì e te hora e tae mai ai te Atua no te ôroà täatiraa. Na to na haehaa, e to na veve e faaitoito ia òre o ia e maìri i muri. To na tiàturiraa i te iòa o te Atua, e òre ia o ia e haavare, e vai maite ia te reira. I te mea te ìte nei o ia te aroha e te ora tei roto ia i te Atua, tei horoà ia na i te itoito i te äraraa ma te taiä òre A tupu atu ai te pätoìraa, te faaìnoraa, na roto i te mau òhipa e ìtehia ai te maitaì. Na te reira e horoà i te feiä faaroo te òaòa, tei pärahi tämau noa i roto i te mau poroìraa a te Atua. Ei faaìteraa i te upootiàraa te aroha e te here o te Atua. Te upootiàraa o te feia faaroo o to rätou ia vai ineineraa, noa atu ua vareà rätou i te taòto, ua ineine, oia hoì to na auraa teie manaò, e taòto ma te vai ineine noa. E aha ia e noaa ai te taiäraa, e inaha ua ineine, àreà ra tei òre i ineine ra e noaa ia te taiäraa. Te mau parau ia e faahitihia nei ia au te haapotoraa o na taiòraa e maha.

-Taramo 63, 4 e maitaì rahi tei to hämani maitaì i tei te ora. E teie nei, e haamaitaì ta ù vaha ia òe.

-Materi 8, 35 Ua ìteä hoì au ia na ra, ua ìte ia te èà i te ora, e herehia mai hoì o ia e te Fatu.

-I Tëtäronia 4, 18 E tënä na, e haamähanahana òutou ia òutou iho i teie nei mau parau.

-Mätaio 25, 13 E teie nei, e ara, aore hoì òutou i ìte i te mahana e te hora atoà e tae mai ai te Tamaiti a te taata.

Mau manaò mätamua.

Ia maìri te taòto o te taata faaroo i roto ia Ietu, e faaroo o ia i te reo o te Fatu i te mau taime atoà. E ua ineine atoà o ia i reira i te faahoìraa i te Atua ra, tei na rotohia i te hanahana o te Metia. O teie te òhipa i ravehia e na paretenia tino hoê àhuru i rave i te tiaìraa i te tane faaipoipo âpï, èi faahanahanaraa i teie ôroà. Tei ìtehia e toopae tei vareà roa i te taòto ma te ineine òre, e toopae tei vareà i te taòto ma te ineine. E i te hora mau ra i faaroohia ai te pii, teie mai nei te tane faaipoipo âpï, tei òre i ineine, ua vai ia i roto i te hepohepo, àreà ra tei ineine ra, ua ìte ia i te mahanahana no te ôroà faaipoiporaa. Tei toe mai ra i rapae, te reo mai ra o te Fatu e ara, eiaha e mataù.

No te aha, e aha te tumu?

No te mea , ua momoàhia tätou i te tane faaipoipo, o ta Pauro ia e faaìte nei i roto i te Torinetia piti  pene 11 i te ìrava 2, i te naòraa e TE MANAÒ NEI AU IA ÒUTOU I TE MANAÒNAÒ ATUA ; UA MOMOÀHIA ÒUTOU E AU I TE TANE HOË, IA PUPU ATU VAU IA ÒUTOU EI PARETENIA VIIVII ÒRE I TE METIA RA.

No reira te änihia nei i te feiä faaroo, IA ARA E IA VAI  IENINE  NOA, i te hora no te tane faaipoipo.

I roto ra i te parapore e faatiàhia nei e Ietu, no te ôroà faaipoiporaa, tei taaê roa i te mau faaipoiporaa ta tätou i ìte. I reira to te tane faaipoipo e to na mau hoa haereraa e färerei i te vahine faaipoipo i to na ùtuafare. Ua tono te vahine faaipoipo i na pötii i te èà tià èi veà no te färii i te tane faaipoipo i te ahiahi o taua mahana ra. Te vai ra e pae i rotopü ia rätou tei faaineine maitaì i ta rätou mau rämepa, te vai atoà ra e pae tei òre i manaònaò noa aè i te rave i te tahi maa hinu no ta rätou mau rämepa. Ua tuu te tiàturiraa i roto i te navaì o ta rätou hinu e te vitiviti o te tane faaipoipo.

E teie nei, e ara, aore hoì òutou i ìte i te mahana e te hora e tae mai ai te Tamaiti a te Taata.

O vai te pupu taata ta Ietu e horoà nei i teie parau ?

1) I te mau faatere faaroo, o te òre i rave i te òhipa ta te Atua i faaue ia rätou e rave, o rätou tei naeàhia i te faahaparaa tià a te Atua. I mua i te parau no te àti e fatata mai ra, aita i maoro roa no te taui i te haereraa. Aita ra teie faaäraraa i puta i roto i te àpoo no te tarià, o te tumu ia i huri-taère-roa-hia ai te òire no Ierutarëma i te mätahiti 70, e tei arataì i te nunaa Âti-Iüta i roto i te pürararaa.

2) I te mau pipi iho. Ua parau Ietu ia rätou e haere mai O ia i roto i teie nei ao no te faaìte e te mana nei te Atua i nià i te taata. E tiàmaraa to te taata no te faataa ia na no te Atua, e aore ra, no te àro atu i te Atua. E rave rahi taime ua tïtauhia te taata tätaì tahi ia rave i ta na faaotiraa, no te âpee i to na Fatu i roto i to na mau àti e to na mau poheraa. Ua ìte atoà ra tätou i te ineine òre no te mau pipi i mua i teie tïtauraa, ua horo rätou ia au i te faaìteraa a te (Mataio 26 : 56).

E ara eiaha e mätaù, i roto i te parau ta tätou e hiò nei, te faaìte mai ra o Ietu, te parau no te HAU O TE ATUA, te vai ra te tahi òhipa e tïtauhia i te taata mai teie mau paretenia tei mau i ta rätou mau rämepa e tei haere e farerei i te täne faaipoipo âpï. No teie mau paretenia, te ìte ra tätou e aita rätou i hoê maitaì no teie färereiraa. Te auraa ta tätou e ìte ra, è ère te mau taata atoà te fänaò i te hau o te Atua. Te feiä e haapaò i te hinaaro o te Atua, o rätou te fänaò i terä hau, e te feiä tei òre e haapaò i te hinaaro o te Atua, e au rätou i teie mau paretenia tei òre i färerei te täne faaipoipo âpï. Èita te mau paretenia haapaò-òre e färerei i te täne faaipoipo âpï. Te päpü ra ia tätou, te faaìte noa mai ra te parau a te Atua ta Ietu e horoà ra i te hinaaro o te Atua. È ère na te Atua e faatano mai ia na i nià i te taata, na te taata ra, e faatano ia na i nià i te Atua. Ìte noa ai tätou i to tätou rara-noa-raa, te Atua iho teie e ani mai nei e hiò i te tävini tei au i to na manaò ; eere rä te reira i te parauraa tià roa, no te mea aita ta te Atua e faatureraa e tuu mai ra i nià i to na tävini, eere na te ture e arataì ra i te tävini, na te ìteraa rä e, te mau haereà o te Tumu Nui, te aroha ia e te parau mau i te feiä i haapaò i ta na parau i faaau, e ta na i faaìte mai, oia te raveraa i te mea e mauruüru ai te Atua. Aita te Atua e hinaaro ra ia riro to na tävini ei mataìtaìraa na te taata. Te auraa, e òhipa to muri mai i teie hiò, e tuhaa ta te taata, o ia anaè të tano e rave i te reira. Aita te Atua e tämata ra i te huti i te manaò o te taata i te tahi pae, aore ra te tahi. Te faaotiraa ta te taata e rave atu, na na noa ihoä te reira e rave, no te mea rä ua hiò e ua faaroo, ua ìte e ua faaroo e äteatea rii atoà ia to na manaò. Te huru te reira o te taata e moè i te vähi taata, eiaha mai te mea e, e täpunipuni noa o ia, aita rä hoê mea e haru ai te mata taata i nià ia na ; eita atoà hoì o ia e ìmi i te räveà ia haapaòhia atu o ia, nä roto änei i ta na huru àta püai, te rarahi o to na vaha, aore ra te tahi huru peu no te huti i te mata o te taata i nià ia na. Te huru taata ia ta te parapore e haapäpü ra e ua pau te hinu o te mörï ua märö te ùiti o te rämepa i te mea ua àma noa i roto i te faufaa òre. Ia àma noa tätou mau rämepa i te mau taime manaò-òre-hia, i te mea e maitaì rahi to te ora, ua ìteähia mai tätou i nià i te èà o te here tei haamähanahana ia tätou 13 E teie nei, e ara, aore hoì òutou i ìte i te mahana e te hora atoà e tae mai ai te Tamaiti a te taata.

 

Teraì òr. Faatura.