Papa Haamori. ÔROÀ Àita Tāpati 7 no Mati 2021.

 

Tāpati 7 no Mati 2021.

Papa Haamori.

ÔROÀ

Àita

Ômuaraa.

Haamanaò tätou e, te ôroà, to te taata ia haamaitaìraa e to na hoì faahanahanaraa i te Atua no te mau maitaì atoà ta te fenua e faaìte noa ra. Te haamanaò atoà mai nei te Èvaneria ia tätou, o Ietu Metia, to tätou Fatu, o te Parau ia a te Atua i riro mai ei taata, mä te tino e te toto. I roto i te Tamaiti, aita te Atua i täâfa i te horoà i te ora, ua hope roa rä i te horoàhia mai e ana.

Haamaitaì tätou i te Atua i te hoê reo himene e tià mai tätou.

 

Himene

Pärahi tätou.

 

Faaroo mai tätou i te Taramo 19, i te naòraa e,

1 Na te Mënätehe. Taramo na Tävita. 2 Te parau hua nei te mau raì i te hanahana o te Atua. E te faaìte nei te reva i te òhipa a ta na rima. 3 Te haapii nei te tahi ao i te tahi i te parau, e te faaìte nei te tahi ruì i te tahi i te ìte. 4 Aore e ôrero, aore e parau, aore to rätou reo i ìteä. 5 Ua tae rä to rätou haruru i te mau fenua atoà, e ta rätou faaìteraa i te ôtià o teie nei ao. Ua faatià o ia i to te mahana tiàhapa i roto ia rätou, 6 o tei haere mai mai te täne âpï ra mai roto mai i to na ra piha, e mai te taata püai e òaòa ra ia horo i to na hororaa. 7 Mai te tahi pae raì to na haereà mai, e tae noa atu ra i te tahi pae i to na pouraa i raro, e aore roa te hoê mea i ère i to na mähanahana. 8 Oia atoà te ture a te Fatu aita e hapa, i te haafäriuraa i te värua. Te faaìte a te Fatu e mea mau ia, e paari ai te âau o te maùa. 9 Te haapaòraa a te Fatu e mea tià ia, e òaòa ai te âau. Te aò a te Fatu e mea märamarama ia, e märamarama ai te mata nei. 10 Te mataù i te Fatu e mea viivii òre ia, e tià ia i te vai-mäite-raa. Te faaauraa a te Fatu e parau mau ia, e te mea tià anaè. 11 E taoà hinaaro-rahi-hia ia i to te àuro,  i te àuro rahi ra e te maitataì. E momona rahi ia i to te meri i te topataraa no roto i te meriterio.12 Na te reira hoì i haapii mai i to tävini, e tei te haapaò i te reira te utuà rahi. 13 O vai hoì tei ìte i ta na iho ra mau hara?  E tämä mai òe ia ù i ta ù mau hara ìteä-òre-hia nei. 14 E täpeà mai òe i to tävini i te hara ìimi, eiaha roa te reira ia faahepo mai ia ù, ei reira vau e maitaì ai, aore aè ra te hara rahi. 15 E tiàhia mai te parau a ta ù vaha i reira, e te manaò o ta ù âau, i mua i to aro, e te Fatu, e ta ù haapüraa e ta ù ora. Âmene.

 

Himene Tätarahapa.

 

Faaroo tätou i teie i te ture a te Atua ia au i te faaìteraa a te puta Ètoto i te pene 20.i te mau ìrava 1 e tae i te ìrava 17. 1 Ua parau mai ra te Atua i teie atoà nei mau parau, nä ô mai ra, 2 vau to Atua ra o te Fatu, o tei arataì mai ia òe mai te fenua mai ra mai Àifiti, mai te ùtuafare i tävini ai ra.

3 Eiaha roa to òe ei Atua ê atu, ia ù nei.

4 Eiaha roa òe e hämani i te îtoro tarai no òe, e te hohoà no te hoê mea i nià i te raì ra, e no te hoê mea i raro i te fenua nei, e no te hoê mea o te moana i raro aè i te fenua ra:

5 Eiaha roa òe e piò i raro ia rätou, eiaha hoì e tävini ia rätou; e Atua tähoo hoì au o te Atua no òe nei o te Fatu, e te tähoo hoì i te hara a te feiä metua i nià i te tamarii e tae noa atu i te toru e te maha o te uì, ia òre rätou ia hinaaro mai ia ù ra;

6 E te aroha räa atu i te feiä i hinaaro mai ia ù, e ua haapaò i ta ù parau, e tautani noa atu te uì.

7 Eiaha òe e faahiti faufaa òre noa i te iòa o to Atua ra o te Fatu; e òre hoì te Fatu e faatià ia na i tei faahiti faufaa òre noa i to na ra iòa.

8 E haamanaò i te mahana täpati ia haamoàhia ia.

9 E tià ia òe ia haa, e ia rave i ta òe mau òhipa atoà i na mahana e ono ra;

10 Âreà te mahana hitu ra, o te täpati ia no to Atua ra o te Fatu; eiaha roa òe e rave i te òhipa i te reira mahana, o òe, e to tämaïti atoà, e to tamähine, e to tävini täne, e to tävini vahine, e to mau puaa atoà ra, e te taata ê atoà io òe ra. 11 E ono hoì o te Fatu mahana i te hämaniraa i te raì e te fenua, e te tai, e te mau mea atoà i roto ra; âreà te mahana hitu ra, faaea iho ra o ia i te reira; i haamaitaì ai te Fatu i te mahana täpati, e ua haamoà iho ra hoì i te reira.

12 E faatura atu i to metua täne, e to metua vahine; ia haamaorohia to òe puè mahana i te fenua ta to Atua ta te Fatu e höroà no òe na.

13 Eiaha roa òe e täparahi noa i te taata.

14 Eiaha roa òe e faaturi.

15 Eiaha roa òe e èiä.

16 Eiaha roa òe e pari haavare noa ia vëtahi ê.

17 Eiaha roa òe e nounou i to vëtahi ê ra fare, eiaha atoà òe e nounou i ta vëtahi ê ra vahine, e to na tävini täne, e to na tävini vahine, e ta na puaatoro, e ta na âtini, eiaha atoà i te mau mea atoà na vëtahi ê ra. Haamaitaì tätou i te Atua Nui Tumu Tahi no teie mau parau e tià ai.

 

Himene òaòa.

 

Teie ta Pauro faaìteraa i te Metia ia au i te Törïnetia 1 i te pene 1 i te mau ìrava 22 e tae i te ìrava 25,

22 Te ani ra hoì te âti-Iüta i te täpaò, e te tïtau ra te Herëni i te paari; 23 te parau nei rä mätou i te Metia faatataurohia ra, e türoriraa no te âti-Iüta, e e mea maamaa i te Herëni. 24 Âreà i te feiä i haapaòhia ra, te âti-Iüta e te Herëni atoà, o te mana ia o te Atua, e te paari o te Atua, te parau i te Metia nei. 25 E paari rahi hoì to te mea maamaa a te Atua nei, i to te taata nei paari; e püai rahi to te paruparu o te Atua, i to te taata nei püai. Âmene.

Haamaitaì tätou i te Atua i te hoê reo himene.

 

Himene.

Pure

Pure tätou i te Atua no te ìteraa i ta na parau, tätou e taiò e e faaroo, e te Atua Nui Tumu Tahi a türama i to mätou âau i te ìteraa te auraa no te Parau Maitaì o ta òe Tämaïti to mätou faaora. Âmene.

 

Taiòraa.

Ioane 2.13-25.

Ietu i roto i te hiero

Mät 21,12-13; Mär 11,15-17; Ruta èv 19,45-46

13 Te fätata ra te Päta a te âti-Iüta ra, haere atu ra Ietu i Ierutarëma. 14 E ìte atu ra o ia i te feiä hoo puaatoro, e te mämoe, e te ûupa, e te feiä hoo moni i te pärahiraa i roto i te hiero ra. 15 Ua hämani iho ra o ia i te taura rii ei papaì, ua tiahi atu ra ia rätou atoà i räpaeàu mai i te hiero ra, e te mau mämoe e te puaatoro, e hueä atu ra hoì te moni a te feiä hoo moni ra, faatïòpa atu ra hoì i te mau ìri. 16 Ua parau atu ra i te feiä hoo ûupa ra: E hopoi ê atu i tënä na mau mea. Eiaha e faariro i te fare o ta ù Metua ei fare hooraa taoà 17 Ua manaò aè ra ta na mau pipi i te parau i päpaìhia ra e: Ua riro roa vau i te itoito i to fare. 18 Ua parau mai ra te âti-Iüta ia na, nä ô mai ra: E aha ta òe täpaò e faaìte mai i nä reira mai ai òe? 19 Ua parau atu ra Ietu ia rätou, nä ô atu ra: A vävähi na i teie nei hiero, e ua ruì toru anaè, ua tiàfaahou ia ia ù. 20 Ua parau mai ra te âti-Iüta: E maha àhururaa e ono tiàhapa te mätahiti i te faatiàraa i teie nei hiero, e tià faahou änei ia òe i te ruì toru? 21 Ta na tino iho ra te hiero ta na e parau ra. 22 E ia tiàfaahou mai o ia mai te pohe mai ra, ua haamanaò aè ra ta na mau pipi e, i parau na hoì o ia i taua parau nei; ìte aè ra rätou i te parau i päpaìhia ra, e te parau i parauhia e Ietu ra. E ìte te Metia i to roto i te taata 23 E ia na i pärahi i Ierutarëma i te ôroà ra i te Päta, e rave rahi tei faaroo ia na i reira, i te mau täpaò i ìteä ia rätou ta na i rave ra. 24 Aita rä Ietu i tiàturi atu ia rätou, no te mea ua ìte o ia ia rätou atoà. 25 E òre hoì o ia e faaìtehia mai e vëtahi ê i te huru o te taata, ua ìte hoì o ia i to roto i te taata.

Na te Atua Nui Tumu Tahi e haamaitaì mai i e täiòraahia ta na parau.

 

Pure.

Pure tätou i te Atua, i to mätou faarooraa i te Parau Maitaì no to mätou Fatu o Ietu Metia tei faaìte ia mätou i to na tüàti òre i te mau òhipa i tupu i roto i te hiero e to na tiàturi òre i te mau tià faaroo, e te Atua a tauturu mai ia mätou ta òe mau tämarii. Âmene.

Haamaitaì tätou i te Atua i te hoê reo himene.

 

Himene.

Faaitoitoraa.

Himene.

Parau faaära.

Himene püpüraa moni.

Pure Ärai.

E te Atua to mätou Metua i te ao, ua horoà òe ia mätou te tiàmäraa no te faaroo i ta òe e tïtau nei ia mätou i te mau taime atoà. I mua i taua tiàmäraa ra, aita i mäìti noa i to òe hinaaro, ua haapaò rä i tei au ia mätou e ua riro te reira ei faahaparaa na mätou ia òe. Te ìte atoà nei mätou e i te tahi taime, ua haafaufaa mätou i to mätou iho mau manaò e ua tuu i te reira i nià aè i ta òe mau tïtauraa.

I mua i te mau tämataraa i tämatahia ai ta òe Tämaïti, ua nounou aè mätou i te mau mea e ìtehia to mätou hanahana i mua i te aro o teie nei ao. Ua haapae roa mätou ia òe e i to òe mau hinaaro. Ua moèhia ia mätou e nä òe mätou i tïtau ei rave òhipa.

Te tätarahapa nei mätou no taua mau ìno ra o ta mätou i rave e te ani atu nei ia tauturu mai òe ia mätou i te raveraa i te mea e maitaì to òe  iòa  e noaa ai i te taata atoà te ora o ta òe i fäfau no mätou.

A tauturu i to Ètärëtia i te faaìteraa i to iòa i to teie nei ao. A haamanaò noa òe ia na e o òe te tumu hoê roa no te ora o ta mätou e fänaò nei i te mau mahana atoà. Mai te  ìte e, te faaìteraa i te parautià eere ia tei roto noa i te faaìteraa manaò, e aore ia i te faaìteraa parau. Tei roto atoà rä i te faaòhiparaa i taua mau parau ra, ia haamaitaì te taata ia òe no te mea, te faatià ra ta òe Ètärëtia i to òe na hinaaro. I te iòa o to Tamaiti o Ietu a ìte mai ia mätou Âmene.

 

Himene ôroà.

Ôroà.

Himene Âmui.

Pure a te Fatu.

E to mätou Metua i te ao ra.

  Ia raa to òe iòa

Ia tae to òe ra hau.

Ia haapaòhia to òe hinaaro

I te fenua nei mai tei te ao atoà na.

Ho mai i te mäa 

E au ia mätou i teie nei mahana 

E faaòre mai i ta mätou hara

Mai ia mätou atoà e faaòre nei

I tei hara ia mätou nei

E eiaha e faaruè ia mätou

Ia roohia-noa-hia na e te àti,

E faaora rä ia mätou i te ìno

No òe hoì te hau, e te mana,

E te hanahana, e a muri noa atu. Amene.

 

Teie te parau faaitoitoraa

Faaitoitoraa.

24 Aita rä Ietu i tiàturi atu ia rätou, no te mea ua ìte o ia ia rätou atoà.

Haamaitaìraa.

2 Te parau hua nei te mau raì i te hanahana o te Atua. E te faaìte nei te reva i te òhipa a ta na rima. 3 Te haapii nei te tahi ao i te tahi i te parau, e te faaìte nei te tahi ruì i te tahi i te ìte. 4 Aore e ôrero, aore e parau, aore to rätou reo i ìteä.

 

Teraì òr. Faatura.