Ioane 2.13-25. Àita

 

Tāpati 7 no Mati 2021.

ÔROÀ

Àita

Taramo 19

1 Na te Mënätehe. Taramo na Tävita. 2 Te parau hua nei te mau raì i te hanahana o te Atua. E te faaìte nei te reva i te òhipa a ta na rima. 3 Te haapii nei te tahi ao i te tahi i te parau, e te faaìte nei te tahi ruì i te tahi i te ìte. 4 Aore e ôrero, aore e parau, aore to rätou reo i ìteä. 5 Ua tae rä to rätou haruru i te mau fenua atoà, e ta rätou faaìteraa i te ôtià o teie nei ao. Ua faatià o ia i to te mahana tiàhapa i roto ia rätou, 6 o tei haere mai mai te täne âpï ra mai roto mai i to na ra piha, e mai te taata püai e òaòa ra ia horo i to na hororaa. 7 Mai te tahi pae raì to na haereà mai, e tae noa atu ra i te tahi pae i to na pouraa i raro, e aore roa te hoê mea i ère i to na mähanahana. 8 Oia atoà te ture a te Fatu aita e hapa, i te haafäriuraa i te värua. Te faaìte a te Fatu e mea mau ia, e paari ai te âau o te maùa. 9 Te haapaòraa a te Fatu e mea tià ia, e òaòa ai te âau. Te aò a te Fatu e mea märamarama ia, e märamarama ai te mata nei. 10 Te mataù i te Fatu e mea viivii òre ia, e tià ia i te vai-mäite-raa. Te faaauraa a te Fatu e parau mau ia, e te mea tià anaè. 11 E taoà hinaaro-rahi-hia ia i to te àuro,  i te àuro rahi ra e te maitataì. E momona rahi ia i to te meri i te topataraa no roto i te meriterio.12 Na te reira hoì i haapii mai i to tävini, e tei te haapaò i te reira te utuà rahi. 13 O vai hoì tei ìte i ta na iho ra mau hara?  E tämä mai òe ia ù i ta ù mau hara ìteä-òre-hia nei. 14 E täpeà mai òe i to tävini i te hara ìimi, eiaha roa te reira ia faahepo mai ia ù, ei reira vau e maitaì ai, aore aè ra te hara rahi. 15 E tiàhia mai te parau a ta ù vaha i reira, e te manaò o ta ù âau, i mua i to aro, e te Fatu, e ta ù haapüraa e ta ù ora.

Ètoto 20.1-17.

Ture 10.

1 Ua parau mai ra te Atua i teie atoà nei mau parau, nä ô mai ra, 2 vau to Atua ra o te Fatu, o tei arataì mai ia òe mai te fenua mai ra mai Àifiti, mai te ùtuafare i tävini ai ra.

3 Eiaha roa to òe ei Atua ê atu, ia ù nei.

4 Eiaha roa òe e hämani i te îtoro tarai no òe, e te hohoà no te hoê mea i nià i te raì ra, e no te hoê mea i raro i te fenua nei, e no te hoê mea o te moana i raro aè i te fenua ra:

5 Eiaha roa òe e piò i raro ia rätou, eiaha hoì e tävini ia rätou; e Atua tähoo hoì au o te Atua no òe nei o te Fatu, e te tähoo hoì i te hara a te feiä metua i nià i te tamarii e tae noa atu i te toru e te maha o te uì, ia òre rätou ia hinaaro mai ia ù ra;

6 E te aroha räa atu i te feiä i hinaaro mai ia ù, e ua haapaò i ta ù parau, e tautani noa atu te uì.

7 Eiaha òe e faahiti faufaa òre noa i te iòa o to Atua ra o te Fatu; e òre hoì te Fatu e faatià ia na i tei faahiti faufaa òre noa i to na ra iòa.

8 E haamanaò i te mahana täpati ia haamoàhia ia.

9 E tià ia òe ia haa, e ia rave i ta òe mau òhipa atoà i na mahana e ono ra;

10 Âreà te mahana hitu ra, o te täpati ia no to Atua ra o te Fatu; eiaha roa òe e rave i te òhipa i te reira mahana, o òe, e to tämaïti atoà, e to tamähine, e to tävini täne, e to tävini vahine, e to mau puaa atoà ra, e te taata ê atoà io òe ra. 11 E ono hoì o te Fatu mahana i te hämaniraa i te raì e te fenua, e te tai, e te mau mea atoà i roto ra; âreà te mahana hitu ra, faaea iho ra o ia i te reira; i haamaitaì ai te Fatu i te mahana täpati, e ua haamoà iho ra hoì i te reira.

12 E faatura atu i to metua täne, e to metua vahine; ia haamaorohia to òe puè mahana i te fenua ta to Atua ta te Fatu e höroà no òe na.

13 Eiaha roa òe e täparahi noa i te taata.

14 Eiaha roa òe e faaturi.

15 Eiaha roa òe e èiä.

16 Eiaha roa òe e pari haavare noa ia vëtahi ê.

17 Eiaha roa òe e nounou i to vëtahi ê ra fare, eiaha atoà òe e nounou i ta vëtahi ê ra vahine, e to na tävini täne, e to na tävini vahine, e ta na puaatoro, e ta na âtini, eiaha atoà i te mau mea atoà na vëtahi ê ra.

1 Tōrīnetia 1.22-25

22 Te ani ra hoì te âti-Iüta i te täpaò, e te tïtau ra te Herëni i te paari; 23 te parau nei rä mätou i te Metia faatataurohia ra, e türoriraa no te âti-Iüta, e e mea maamaa i te Herëni. 24 Âreà i te feiä i haapaòhia ra, te âti-Iüta e te Herëni atoà, o te mana ia o te Atua, e te paari o te Atua, te parau i te Metia nei. 25 E paari rahi hoì to te mea maamaa a te Atua nei, i to te taata nei paari; e püai rahi to te paruparu o te Atua, i to te taata nei püai.

Ioane 2.13-25.

Ietu i roto i te hiero

Mät 21,12-13; Mär 11,15-17; Ruta èv 19,45-46

13 Te fätata ra te Päta a te âti-Iüta ra, haere atu ra Ietu i Ierutarëma. 14 E ìte atu ra o ia i te feiä hoo puaatoro, e te mämoe, e te ûupa, e te feiä hoo moni i te pärahiraa i roto i te hiero ra. 15 Ua hämani iho ra o ia i te taura rii ei papaì, ua tiahi atu ra ia rätou atoà i räpaeàu mai i te hiero ra, e te mau mämoe e te puaatoro, e hueä atu ra hoì te moni a te feiä hoo moni ra, faatïòpa atu ra hoì i te mau ìri. 16 Ua parau atu ra i te feiä hoo ûupa ra: E hopoi ê atu i tënä na mau mea. Eiaha e faariro i te fare o ta ù Metua ei fare hooraa taoà 17 Ua manaò aè ra ta na mau pipi i te parau i päpaìhia ra e: Ua riro roa vau i te itoito i to fare. 18 Ua parau mai ra te âti-Iüta ia na, nä ô mai ra: E aha ta òe täpaò e faaìte mai i nä reira mai ai òe? 19 Ua parau atu ra Ietu ia rätou, nä ô atu ra: A vävähi na i teie nei hiero, e ua ruì toru anaè, ua tiàfaahou ia ia ù. 20 Ua parau mai ra te âti-Iüta: E maha àhururaa e ono tiàhapa te mätahiti i te faatiàraa i teie nei hiero, e tià faahou änei ia òe i te ruì toru? 21 Ta na tino iho ra te hiero ta na e parau ra. 22 E ia tiàfaahou mai o ia mai te pohe mai ra, ua haamanaò aè ra ta na mau pipi e, i parau na hoì o ia i taua parau nei; ìte aè ra rätou i te parau i päpaìhia ra, e te parau i parauhia e Ietu ra. E ìte te Metia i to roto i te taata 23 E ia na i pärahi i Ierutarëma i te ôroà ra i te Päta, e rave rahi tei faaroo ia na i reira, i te mau täpaò i ìteä ia rätou ta na i rave ra. 24 Aita rä Ietu i tiàturi atu ia rätou, no te mea ua ìte o ia ia rätou atoà. 25 E òre hoì o ia e faaìtehia mai e vëtahi ê i te huru o te taata, ua ìte hoì o ia i to roto i te taata.

Manaò.

Te haapii nei te tahi ao i te tahi i te parau, e te faaìte nei te tahi ruì i te tahi i te ìte. Mai te tahi pae raì to na haereà mai, e tae noa atu ra i te tahi pae i to na pouraa i raro, e aore roa te hoê mea i ère i to na mähanahana. Oia atoà te ture a te Fatu aita e hapa, i te haafäriuraa i te värua. Te faaìte a te Fatu e mea mau ia, e paari ai te âau o te maùa. Te haapaòraa a te Fatu e mea tià ia, e òaòa ai te âau. Te aò a te Fatu e mea märamarama ia, e märamarama ai te mata nei. Te mataù i te Fatu e mea viivii òre ia, e tià ia i te vai-mäite-raa. Te faaauraa a te Fatu e parau mau ia, e te mea tià anaè. E tiàhia mai te parau a ta ù vaha i reira, e te manaò o ta ù âau, i mua i to aro, e te Fatu, e ta ù haapüraa e ta ù ora. Oia mau, ia faaroo mai tätou i te haapotoraa o na taiòraa e maha i te naòraa e,

-Taramo 19,  14 E täpeà mai òe i to tävini i te hara ìimi, eiaha roa te reira ia faahepo mai ia ù, ei reira vau e maitaì ai, aore aè ra te hara rahi.

-Ètoto 20, 2 vau to Atua ra o te Fatu, o tei ärataì mai ia òe mai te fenua mai ra mai Àifiti, mai te ùtuafare i tävini ai ra.

-1 Torinetia 1, 25 E paari rahi hoì to te mea maamaa a te Atua nei, i to te taata nei paari; e püai rahi to te paruparu o te Atua, i to te taata nei püai.

Ioane 2, 24 Aita rä Ietu i tiàturi atu ia rätou, no te mea ua ìte o ia ia rätou atoà.

Tätararaa.

Te Taramo 19 i te ìrava 14 te naò ra ia e, E täpeà mai òe i to tävini i te hara ìimi, eiaha roa te reira ia faahepo mai ia ù, ei reira vau e maitaì ai, aore aè ra te hara rahi. I teie reo to te Atua i te faaìteraa a te Ètoto i te pene 20, i te ìrava 2 vau to Atua ra o te Fatu, o tei ärataì mai ia òe mai te fenua mai ra mai Àifiti, mai te ùtuafare i tävini ai ra. I te mea te fätata mai ra te Päta a te âti-Iüta ra, haere atu ra Ietu i Ierutarëma. E ìte atu ra o ia i te feiä hoo puaatoro, e te mämoe, e te ûupa, e te feiä hoo moni i te pärahiraa i roto i te hiero ra. Ua hämani iho ra o ia i te taura rii ei papaì, ua tiahi atu ra ia rätou atoà i räpaeàu mai i te hiero ra, e te mau mämoe e te puaatoro, e hueä atu ra hoì te moni a te feiä hoo moni ra, faatïòpa atu ra hoì i te mau ìri. E ìte te Metia i to roto i te taata. E ia na i pärahi i Ierutarëma i te ôroà ra i te Päta, e rave rahi tei faaroo ia na i reira, i te mau täpaò i ìteä ia rätou ta na i rave ra. Aita rä Ietu i tiàturi atu ia rätou, no te mea ua ìte o ia ia rätou atoà. E òre hoì o ia e faaìtehia mai e vëtahi ê i te huru o te taata, ua ìte hoì o ia i to roto i te taata. Te hinaaro nei o Ietu e ärataì i teie mau taata i nià i te èà e färerei ai te taata i te hanahana o te Atua, te parau nei ra o Ietu i teie mau taata tei òre e au i roto i te fare o to na Metua, te mau òhipa i faanahohia no  te ôroà pata e fatata ra ia rätou. Ua faanahohia te Hiero èi vahi täpihooraa, ua faanaho-atoà-hia te fäito no te faaòreraa hara, ta te taata riirii, e ta te taata toà, no teie mau tumu i päpaì ai o Ioane i teie parau e, Aita rä Ietu i tiàturi atu ia rätou, no te mea ua ìte o ia ia rätou atoà. Te ìte nei o Ietu i te mau faatere faaroo âti-Iüta i te ätearaa i ta te Atua tïtauraa i te taata no te faatupu i te Aroha e te Here i roto i te mau taata atoà e tiàturi ra i te faaoraraa a te Atua.

Aita rä Ietu i tiàturi atu ia rätou, i te feiä hoo puaatoro, e te mämoe, e te ûupa,

Aita rä Ietu i tiàturi atu ia rätou, e te feiä hoo moni i te pärahiraa i roto i te hiero ra.

I hämani ia o Ietu i te taura rii ei papaì, ua tiahi ia rätou i räpaeàu i te hiero ra, te mau mämoe te puaatoro, e hueä atu ra te moni a te feiä hoo moni, faatïòpa hoì ra i te mau ìri. Parau atu ra i te feiä hoo ûupa : E hopoi teie mau mea Eiaha e faariro i te fare o ta ù Metua ei fare hooraa taoà.

Te mau pipi manaò aè ra i te parau i päpaìhia ra e: Ua riro roa vau i te itoito i to fare.

Ua äni rätou, ia faaìte o Ietu i te hoê täpaò,  te täpaò a Ietu, e vävähi i teie hiero, ia ruì toru anaè, ua tiàfaahou ia ù.

Aita rä Ietu i tiàturi atu ia rätou, te âti-Iüta e i teie parau e tià faahou i te ruì toru?  Ta na tino te hiero ta na e parau ra. E tiàfaahou mai te pohe mai ra, ua haamanaò aè ra ta na mau pipi e, E ìte te Metia i to roto i te taata. E ia na i pärahi i Ierutarëma i te ôroà ra i te Päta, e rave rahi tei faaroo ia na i reira, i te mau täpaò i ìteä ia rätou ta na i rave ra. 24 Àita rä Ietu i tiàturi atu ia rätou, no te mea ua ìte o ia ia rätou atoà.  E òre e faaìtehia ia vëtahi ê i te huru o te taata, ua ìte hoì o ia i to roto i te taata.

E aha te Àita ta te ìrava e faaìte ra, o te pätoìraa ia i te täno òre no te faatupuraa òhipa, ua ateä roa e ua täui-roa-hia te tumu mau ta te faanahoraa e tïtau ra. Teie ta Ioane faaìteraa no Ietu, ma te faaära i te mau taata atoà i te mau òhipa e tiàturihia mai ai, e haamori i te Atua Nui Tumu Tahi ma to tätou huru taata hämanihia ia au i te faanahoraa o te ora a te Atua. No te puai hoì te pohe, i hinaaro ai tätou i te ora, no te òre hoì e noaa ia tätou i aroha mai te Atua Nui Tumu Tahi ia tätou. Ia haavïhia te taata i roto i te haamoriraa, te faaìte noa mai ra te reira, i to na täumiraahia i te peu o te faatîtîraa òre to na âau e mähorahora faahou e hoène to na faaroo i roto ia na. Te taata i ìte i te ora e türaì o ia i te mau mea e täumiumi ia na, no te mea höroà mai te Atua i te mau maitaì atoà ia ora tätou. Ta te Atua parauraa i te faaìteraa a te Ètoto i te pene 20, i te mau ìrava 1 e tae i te ìrava 17 Eiaha, ta Ioane Àita.  Ia  maitaì Tätou i te here Metua.

 

 

Teraì òr. Faatura.