Papa haamori Hitimaùe. Tāpati 18 no Èperera 2021.

 Tāpati 18 no Èperera 2021.

Papa haamori

Hitimaùe.

Färiiraa.

Haamaitaì mātou ia òe e te Atua Nui Tumu Tahi, fenua no mātou, fenua māòhi no to mātou Māòhiraa, reo no ta mātou faateniteniraa, te Iho tumu no to mātou ora, uruaìraa no mātou i roto i te àti e te fifi, Metua faaroo i to mātou reo tātarahapa, monoì tāvai i to mātou mau māuiui. Mai te tamarii i aòhia e to na metua, tē hoì mai nei mātou mā te âau tātarahapa no tē ani ia òe, ia haamahora mai ā òe i to òe rima metua e ia fārii ia mātou i roto i to òe here. Âmene.

Haamaitaì tätou i te Atua i te hoê reo himene e tià mai tätou.

Himene.

Pärahi tätou.

Teie ta tätou taiòraa Taramo,

Taramo 4

1 Na te Mënätehe nä nià i te Netinota. Taramo na Tävita. 2 Ia tiàoro atu vau ra, e faaroo mai, e te Atua o ta ù parau tià ra, ua faaorahia mai au e òe i ta ù àtiraa ra. E tënä na, e aroha mai ia ù, e faaroo mai i ta ù pure.3 Mai te aha te roa, e te mau taata na, to òutou haapaò i ta ù hinuhinu nei ei mea haamä? E to òutou hinaaroraa i te faufaa òre e te ìmiraa i te haavare? Tera. 4 Ia ìte mai rä òutou, ua mäìtihia e te Fatu ta na taata paieti ra: te faaroo mai ra te Fatu ia tiàoro atu vau ia na. 5 E mataù òutou, eiaha rä e rave i te hara, a feàfeà na to òutou âau i nià i to òutou mau roì, a faaea noa ai. Tera. 6 Ei tütia parau tià ta òutou e hopoi, a tiàturi atu ai i te Fatu. 7 Rave rahi të parau e: Nä vai e faaìte mai i te maitaì ia tätou nei E nänä mai, e te Fatu, i te märamarama o to mata i nià ia mätou nei 8 Ua horoà mai òe i te òaòa i roto i ta ù âau, e ua hau i to rätou, ia faarahihia ta rätou tïtona e te uaina ra. 9 E tïraha vau i raro mä te ora, e e taòto hoì; na òe anaè rä, e te Fatu, i pärahi ai au mä te ora. Âmene.

 

Himene tätarahapa.

 

Teie huru ta Pauro faaìteraa i te no Ietu i täparahihia,

Òhipa 3.13-19

13 Na te Atua o Âperahäma, e o Ìtaata, e o Iatöpa, na te Atua o to tätou hui tupuna ra i haamana i ta na Tamaiti ia Ietu, o ta òutou i püpü nei, e ua faaruè i mua i te aro o Pirato, ia na i märô ra e, e tuu. 14 Faaruè iho nei rä òutou i te Taata Moà e te Parau tià ra, e ani atu ra hoì i te täparahi taata ia tuuhia mai ia òutou na; 15 täparahi iho nei hoì i te Tumu o te ora, i ta te Atua i faatià mai te pohe mai ra, o mätou nei ä hoì te ìte. 16 Na na i faaètaèta i teie nei taata i te faarooraa i to na iòa, i ta òutou e hiò nei, e ta òutou hoì i ìte nei: oia ia, na te faaroo hoì ia na i roaa ai ia na teie nei ora rahi mau i mua ia òutou atoà nei. 17 E teie nei, e a ù mau taeaè, ua ìte au e, e hoê ä ìte òre to òutou, e to òutou hui raatira i nä reira ai. 18 O te mau parau rä a te Atua i faaìte mai i mütaa iho i te vaha o ta na mau perofeta atoà ra, e e pohe te Metia, o ta na ia i faatupu iho nei. 19 E teie nei, e tätarahapa òutou, e e färiu mai, ia päraihia ta òutou hara, ia ìteä mai te ànotau haumärü no ô mai i te aro o te Fatu ra.

Haamaitaì tätou i te Atua no teie nei mau parau e tià ai.

 

Himene òaòa.

 

Teie te faaìteraa a Ioane âpotetoro faaitoito i te ètärëtia a te Metia.

1 Ioane 2.1-5

E tauturu mai te Metia ia tätou

1 E a ù mau tamarii ra, te päpaì nei au i teie nei mau parau ia òutou, ia òre òutou ia rave i te hara. Ia roohia atu rä te hoê taata i te hara, e tià to tätou tei ô i te Metua ra, o Ietu Metia, o te taata parau tià ra; 2 e o ia hoì te täraèhara i ta tätou nei hara; eere hoì i ta tätou anaè ra, i ta to te ao atoà nei rä. 3 Teie te mea e ìte ai tätou e, ua ìte tätou ia na: ia haapaò tätou i ta na parau. 4 O tei parau e: Ua ìte au ia na, e aore o ia i haapaò i ta na parau, e haavare o ia, aore te parau mau i roto ia na. 5 O tei haapaò rä i ta na ra parau, ua maitaì roa mau ä te hinaaro o te Atua ia na. O te mea ia e ìte ai tätou e, tei roto tätou ia na ra: Âmene.

Haamaitaì tätou i te Atua i te hoê reo himene.

 

Himene.

 

Pure

 

Pure tätou i te Atua, te Atua ua âmui mätou i vahi hoê, no te haamori ia Òe, e no te faaroo i ta òe parau, ia tià i ta Òe parau ia faahau i to mätou âau tei teimaha i teie hepetoma i maìri ia mätou, tauturu mai ia mätou te Atua Maitaì roa ra. Âmene.

 

Taiòraa.

 

Te parau ta tätou e taiò teie päpaìraa a Ruta èv.

Ruta èv. 24.35-48

35 Ua faaìte atoà mai ra räua i te parau ta räua i ìte i te äratià ra, e to räua ìteraa ia na i te vähiraa i te päne ra.

Te färaa mai Ietu i nä pipi àhuru mä hoê

(Mät 28,16-20; Mär 16,14-18; Ioane 20,19-23; Òhipa 1,6-8)

36 E tei te parauraa räua i taua parau ra, ua tià noa mai ra Ietu i rotopü ia rätou, nä ô mai ra: Ia ora na òutou 37 Hitimaùe atu ra rätou, e te mehameha, parau aè ra e värua ta rätou i hiò ra. 38 Ua parau mai ra o ia ia rätou: E aha òutou i hitimaùe ai? E aha i tupu ai te manaò i to òutou âau? 39 A hiò mai na i ta ù rima e ta ù âvae: o vau mau ä, A fäfä mai na ia ìte; aita o te värua e ìò e te ivi mai to ù nei, ta òutou e hiò mai nei. 40 Nä reira mai ra o ia e oti aè ra, ua faaìte mai ra ia rätou i ta na rima e ta na âvae. 41 E aore ä rätou i faaroo i te òaòa e te mäere, ua parau mai ra o ia ia rätou: E mäa ta òutou e vai nei? 42 Ua hopoi atu ra rätou i te tahi maa ià tunu na na e te meriterio. 43 Ua rave iho ra o ia, àmu iho ra i mua i to rätou aro. 44 E ua parau mai ra o ia ia rätou: Oia teie ta ù i parau atu ia òutou a pärahi atoà ai tätou ra, e ia hope te mau parau atoà no ù i päpaìhia i roto i te ture a Möte, e te mau perofeta, e te taramo i te faatupuhia e tià ai. 45 Ua faaìte mai ra o ia i to rätou âau ia ìte rätou i te parau i päpaìhia ra. 46 Ua nä ô mai ra o ia ia rätou: I nä-reira-hia taua parau ra i te päpaì, e ia nä-reira-hia to te Metia pohe e tià ai, e ia tiàfaahou mai te pohe mai i te ruì toru; 47 e ia poro-haere-hia te tätarahapa e te faaòreraa i te hara i to na ra iòa, na Ierutarëma atu nei ä, e àti noa aè te mau fenua atoà e tià ai. 48 E teie nei, ei ìte òutou i teie nei mau parau.

Ia haamaitaì mai te Atua i te täiòraahia ta na parau.

 

Pure

Pure tätou i te Atua, ua faahitimaùe e ua faamehamaha ta mätou parau ia mätou e te Atua, te tupuraa ra o te parau ua faahau ta òe Tämaïti i to mätou âau i ta na òhipa i rave e ta na parau, ua fafahia to na tino, ua àmu i te maa, ua parau mai ia mätou e ìte òutou no ù. Âmene.

Haamaitaì tätou i te Atua i te hoê reo himene.

 

Himene.

Faaitoitoraa.

Himene

Parau faaära.

Himene püpüraa moni.

Püpüraa moni

Pure Ärai

E te Atua Nui Tumu Tahi e, mai to Vārua i faaârepurepu i te moana i täpaòhia e te pōuri, hou òe i ìriti ai te ùputa o te māramarama e te ora, ua faaârepurepu atoà to Vārua i tonohia mai e to mātou Fatu i te âau o ta na mau pipi, hou òe i ìriti ai ia rātou i te ùputa o te māramarama i ta òe Parau, tē tiàturi nei mātou e, e faaârepurepu ā to Vārua i te moana uri paò o to mātou nei âau ètaèta, e na òe ā e ìriti ia mātou i te ùputa o te māramarama, e fārii ai mātou i tē haere atoà nā nià i te êà i vai fātata noa ai to mātou mau Tupuna ia òe, e te Tumu hōê roa o te ora. Âmene.

 

Himene âmui

Pure a te Fatu

E to mätou Metua i te raì tua tinitini

Ia faateiteihia to òe iòa moà

Ia tae mai to òe hau

Ia haapaòhia to òe hinaaro i te fenua nei, mai tei te raì atoà na

Ho mai i te mäa na mätou i teie mahana

Faaòre mai i ta mätou tärahu, mai ia mätou e faaòre nei i ta rätou i tärahu ia mätou nei

Eiaha e faaruè ia mätou ia fati i mua i te ènemi, faaora rä ia mätou i te ìno

No òe te hau, te mana, e te hanahana

E a tau e a hiti noa atu, Âmene.

 

Faaitoitoraa

Teie te parau faaitoito,

37 Hitimaùe atu ra rätou, e te mehameha, parau aè ra e värua ta rätou i hiò ra

 

Haamaitaìraa.

Teie te parau haamaitaì,

2 e o ia hoì te täraèhara i ta tätou nei hara; eere hoì i ta tätou anaè ra, i ta to te ao atoà nei rä. 3 Teie te mea e ìte ai tätou e, ua ìte tätou ia na: ia haapaò tätou i ta na parau. Âmene.